&nbsp;<a href="https://kyzylorda-news.kz/">Kyzylorda-news.kz.</a>&nbsp; Бүгінде қол қусырып қарап отыратын заман емес. Бұрынғыдай емес мүмкіндік те көп. Тек әрекет етіп, еңбек етсеңіз болғаны. Асқақ арманға апарар жолда адаспайсыз. Әрине, арманның орындаларына сену де керек. Қазір қазақ жастарының әлемге қарай жол салатын кезі. Онысы орынды. «Ауылдан шықпағанның ақылы ауылдасынан аспайды» дегенді жиі естіп жатамыз. Рас, шетелге шығып, жаңа білім алып, көзқарасты жақсы жаққа өзгертуге болады.&nbsp;Жақында әлеуметтік желіде қармақшылықтарға тартымды видеоларымен танылып жүрген мобилограф Еркебұлан Әптаевтың шетелде жұмыс істеп жүргенін көзіміз шалады. Ондағы жұмысы мен қызықты оқиғаларын күн санап қарай бастадық. &nbsp;Жалынды жаспен әңгімескен сұхбатты төменнен оқи отырыңыздар.&nbsp;– Әңгімені әріден бастамай-ақ қазіргі айналысып жүрген ісіңнен бастасақ. Жалпы мобилографияға қалай келдің?– Менің қос бірдей жоғары дипломым бар. Екеуімен де біраз мекемеде жұмыс істеп көрдім. Несін жасырайын, бұл мамандықтардан табысым көп болмады. 2021 жылы туған ауылым Қуаңдариядағы ауылдық клуб үйінде еңбек жолымды бастадым. Сол уақытта ауылдық жерде тұрған соң ауылдың өмірін түсіріп жүрдім. Ең алғашқы әке-шешемнің киіз үй құрып жатқанын видеосын монтаждап салдым. Қолымда арзан телефон еді. Ол видео естелік ретінде әлі сақтаулы тұр. Содан бастап ауыл өмірі туралы видеолар шығара бастадым. Жасаған дүниелерім туған жерден жырақта жүрген ауыл түлектерінің ортасында тарай бастады. Әлгі тараған видеоларым маған мотивация болып, әрі қарай да осы ісімді жалғастыруға сеп болды. Ауылдың әйгілі «Ыстық бұлағы», өрістегі қойлар маған керемет локация болды. Солай ең бірінші мобилографияға қадамды ауылда жүріп бастап едім.&nbsp;– Сені оған дейін гитарашы ретінде танитын едік.– Иә, 2015 жылы Семей қаласында Шәкәрім университетінде студент болып оқып жүргенде гитара үйреніп, вокальды ансамбльдер аштым. Осылайша қайырымдылық концерттерін балалар, қарттар үйіне көп бердік. Сол уақытта Семейдің жергілікті арналарында тікелей эфирге шығып тұрдық. Оқуды аяқтап, ауылға келіп гитарамен көптеген тойда қызмет көрсеттім. Сонымен қатар екі жылдай Ш.Төлепова атындағы аудандық мәдениет үйінде аспаптарда сүйемелдеуші болып жұмыс істедім. Аспаптарға жақын болуыма әкем мен анамның септігі тиген шығар. Себебі олар да өнерден кенде емес.– Бұл сұрақ бәріне де қызық болар. Шетелге қалай шықтың?&nbsp;– Осыдан 3 ай бұрын жарнамадан Дубай қаласына мобилограф керек дегенді көріп қаламын. Соған ұсыныс тастап көрдім. Ол жауапсыз қалып, арада бір апта өткен соң өздері хабарласты. Бақылап қарасам Дубай қаласында тұратын өзіміздің қазақ кәсіпкерлері екен. Ең бірінші түсірген жұмыстарымды тексерді, тапсырма берді. Ол кезде дәл мен секілді Қазақстаннан 50-ден аса адам ұсыныс тастапты. Сонша адамның ішінен менің жұмысымды ұнатып, «біз сені қабылдаймыз» деп хабарласты. Ойламаған жерден жәй ғана көре салайын деген оймен басталған істе шешім қабылдау оңай болмады. Отбасым, әке-шешемнен жырақта қалай болады, сенуге болатын жандар ма деген сұрақ көп болды. Шақырушы жандар да соны түсініп, &nbsp;ойлануға біраз уақыт берді. Ақылдаса келе, тәуекел етіп, ақпан айының 1-і күнінен бастап осындамын. Міне, бүгін 1 ай болды, Дубай қаласында тұрып жатырмын. Елге қайтамын ба, әлде жұмысымды жалғастырамын ба әзірге белгісіз болып тұр. Бірақ елден жырақ өмір сүру үлкен мәселе. Ата-анам, жарым мен баламды сағынамын…– Қазір онда немен айналысудасың?– Мені жұмысқа алған қазақ кәсіпкер отбасының жеке мейрамханасы және тур агенттігі &nbsp;бар. Сол екі салада видеолар түсіріп беремін. Қаншама адам армандаған, қолы жеткен адам көптеген ақша жұмсап бір рет қана көріп кететін әлемнің алдыңғы қатарындағы үлкен қалада мен қазір тегін аралап, бір жағынан жұмыс жасап отбасымды асырап отырмын. Бұл бір Алланың қалауы, екінші отбасымның қолдауы және мобилографияның арқасы.&nbsp;– Қызықты оқиғаларыңмен бөлісе отырсаң…– Жұмысқа алған кәсіпкерлердің маған қойған талаптарынан бөлек, өздерінің тарапынан тегін жатын орын, 3 мезгіл тамағы, ұшақ билеті, виза, жүріп тұруымның барлығын қаржыландырады. Рестораны Шығыс асханасы негізінде жұмыс істейді. Мұнда лағманның 150 түрі дайындалады. Маған мәзірде көрсетілген кез-келген тамақты таңдап ішуге рұқсат берілген. Тамаққа келгенде көп таңдаймын, оның үстіне лағман жей алмаймын. Онда бізге белгілісі тек палау. Осында келгелі күнде палау жеймін. Жұмыс іститін ресторанда 30 шақты адам бар. Олар 4-5 түрлі ұлттан құралған. Даяшылар филиппин, ұйғыр, аспаздар пәкістандық, жүргізушілер қазақ, пәкістандықтар мен түріктер. Олар менің күнде палау жеп жүргенімді көріп «Mister Palau» деп атап кетті. Дәл осы сұхбатты сіздерге палау жеп отырып беріп отырмын.&nbsp;– Қазір барлығының әлемдік нарыққа шыққысы келеді. Жалпы сенің көзқарасың шетелге шыққанда қалай өзгерді, не көрдің, не түйдің?– Қазір шет елге шығу жастар арасында бір-бірімен жарыс, бақталас, яғни біздің тілімізде «тренд» болып кетті. Иә, шетелге шығып келген жандардан көп еститініміз сол «көзің ашылады», «ой өрісің кеңейеді», «жаңа ақпараттарға қанық боласың» деген секілді. Мен осы сөздерді Қазақстаннан ұшып Біріккен Араб Әмірлігінің астанасы – Абу Даби қаласына қонып, аэропортына кірген бойдан түсіне қойдым. Қысқа уақытта тұрғызылған бірнеше рекордтық үлкен зәулім ғимараттарды көріп, көп нәрсені түсінуге болады. Қазақстанда жүріп осы Дубайды тұрғызған патшаның сұхбатын көрдім, ол кісіге мына сұрақ қойылады. «Қайда асығып жатсыз, неге ең үлкен ғимараттар, неге қатты жылдамдықпен Дубайды дамытып жатсыз?» дегенде, патшаның айтқаны «Мен халқымды сүйемін, сол үшін 50 жылдан кейін 100 жылдан кейін көретін дамыған қаланы халқым қазір көруге лайықты, білім, медицина, жұмыс тапшылығы дегенге менің халқым ешқашан мұқтаж болмауы керек» деген. Осындай ғажайып дүниені неге аралап көрмеске?! Көргісі келеді, бірақ әртүрлі қорқыныштарға бой алдыруы мүмкін. Дей тұра, қорқынышты жиып, басқа елдің, ұлттың мәдениетін көруге кеңес беремін. &nbsp;Біріккен Араб Әмірлігіне келіп басқа да мемлекеттерге қызығушылығым арта түсті және алдағы уақытта мақсат етіп тізіммен баратын елдерді, қалаларды жазып қойдым. Бұл өмірімдегі алғашқы үлкен сапар мен үшін – үлкен тәжірибе, үлкен білім, үлкен көзқарас болып жатыр.– Қателеспесем, осыған дейін шағын кино түсірдің. Сол туралы кеңінен айта кетсең…– Иә, видео саласында 3 жыл жүріп көп ұсыныстар түсіп жатты. Соның ішінде тәжірибе болған ұсыныстардың бірі – қысқа метражды фильм түсіру. 2022 жылы аудандағы «Қазақстан Халық Банкі» АҚ Байқоңыр өңірлік филиалының аудандық бөлімшесінің басшысы Нұрбол Үсенов ағамыздан ұсыныс түсті. Ол фильм облыстық байқауға арналып, тек жабық көрсетілім бойынша түсірілген. &nbsp;Үш күн түсірілім жасадық және монтажына бір күн уақыт кетті. Сол байқауда мен түсірген фильм І орынды жеңіп алды. Өткен жылы &nbsp;«КМФ» микроқаржылық ұйымының Жосалы бөлімшесіненШынболат ағамыздан да ұсыныс түсті. Бұл кісілердікі де дәл солай облыстық конкурсқа арналған екен. Бұл жолы да облыстан бас жүлде иеленді. Бұл ағаларымыз да әлі күнге дейін көрген кезде алғысын жаудырып ризашылығын білдіріп жүреді.– Жарайсың! Уақыт бөліп сұхбат бергеніңе рақмет! Еңбегің жана берсін!

Мобилограф Еркебұлан Әптаев ауылда жүріп шетелге қалай шықты?

Аралда 4 жайлы мектеп салынады

<a href="https://kyzylorda-news.kz/">Kyzylorda-news.kz.</a> Қаланың сәулеті мен ажарын айшықтап тұратын басты бейнелі көріністі осы жолдың жайы екені жасырын емес. Сән-салтанатынан бөлек, қатынастың қолайлылығы мен тұрғындардың қауіпсіздігі және көлік қозғалысының икемділігі де жайлы жолдың көмегінен болары анық. Олай болса, аудандағы қала көшелерінің жолдары мәселесі төңірегінде істеліп жатқан жұмыстарға тоқтала өтейік.Ел көріп, біліп отыр. Тұрғындардың өтінішін орындау мақсатында биыл қала көшелерінің жолдарын жаңарту бағытындағы жұмыстар басталып кетті. Нақтырақ тоқталар болсақ, Ә.Сатаев, Төле би, С.Мұқанов, Ж.Тәжімбет, Ә.Жұбаниязов пен Б.Майлин, Ғ.Мүсірепов көшелерін асфальттау жұмыстары басталып кетті. Республикалық және облыстық бюджеттен қаржыландырылатын бұл жоба көше тұрғындарына үлкен қуаныш сыйлады. Мұны тас жол төселгелі жатқан көшелердің тұрғындарының сөзінен анық аңғарамыз.<blockquote>«Адам болған үстіне бола түссе дейді ғой. Бізде де жолы жаңарған көшелерді көргенде «бізге де осындай жол салынса» деп қызыға қарайтынбыз. Былтыр осы біз тұратын көшелер асфальтталады дегенді естігенде қуанғанымызды жасырмаймыз. Бірақ биыл қар кетіп, жер икемге келе бастағаннан көшелерді тегістеп, жұмыстың басталғаны шаттығымызды еселеп тастады. Қуануға себеп те жоқ емес. Қыс кетіп, қар ерігенде, жаңбыр көп жауған кездерде көшенің басынан аяғына қарай өту мұң болатын. Ортаға жиналған судан көлік қатынасы болмайтын. Тіпті өз көліктерін үйіне жеткізе алмай, көшеге қойып кететін кездер де болады. Енді міне осы қиындықтың бәрі артта қалды. Істеліп жатқан бұл жұмыс үшін бірінші кезекте аудан басшысына алғысымыз шексіз. Халықтың пікірімен санасып, қолайлы жағдай жасап отырған атқарушы биліктің жұмысын оң бағалаймыз», – дейді.</blockquote>Айта кетейік, «Арал жолдары» және «Арал құрылысы» мекемелеріне тапсырылған жұмыс ауқымды. Жоғарыда аталған 6 көшеге толықтай асфальт төселсе, Б.Майлин, Ғ.Мүсірепов көшелеріндегі жолдың жанынан жаяу жүргіншілер жолы да салынатын болады. Бұл жұмыстар жыл көлемінде толықтай аяқталып, халық игілігіне берілмек.&nbsp;«Жол – ол өмір» деген шетелдіктердің сөзін еске түсірер болсақ, біздегі сапалы жол жақсы өмірдің айғағы болмақ. Сондықтан мердігерлер де бірінші кезекте тұрғындарға жайлы өмірді қамтамасыз етуді ойлап, сапаға мән берсе дейміз.

Аралда көшелер асфальтталуда

<a href="https://kyzylorda-news.kz/">Kyzylorda-news.kz.</a> Шиелі – бір жағынан Қаратау, екінші жағынан Сырдария аралығындағы шөбі, суы мол, тірлікке өте қолайлы, ат бауырын жазып шабатын дала. Тауды қарақұйрық, арқар, киік жайлаған. Дария жағасындағы қалың тоғай сан алуан аңға, құсқа толы. Дарияда 6-7 пұт тартатын жайын, басқа балықтар, қамыс іші арасында қабан, жолбарыс тіршілік еткен. Қырғауыл, қоян, түлкі басқа аң-құстар мекені болған. Ең соңғы жолбарысты Орыс солдаттары арнайы аулап, 1910 жылдары көзін жойған. Қабанды 1940 жылға дейін Ресейден келген аңшылар аулаған. Қырғауылды жергілікті аңшылар Ташкенге апарып сатқан. Тұмса табиғатта тіршілік еткен тірі байлықтарымыз осылайша азайып, қызыл кітапқа еніп кетті. Болашақта балаларымызға Шиеліде қарақұйрық пен жолбарыстың ізі барын айтсақ ертегідей естілер ме, кім білсін?&nbsp;Жалпы Шиелі ауданында 22 ауылдық округ орналасқан. Әр ауылдың өзіне тән ерекшеліктері де бар. Алайда оны ауданға кіріп, ауылға бас сұқпаған адамның біле қоюы екіталай. Осы тұста Батыс-Еуропа мен Батыс-Қытайды жалғап жатқан үлкен жолдың бойына әр ауылды айшықтап тұратын белгі қойсақ қайтеді? Мысалы, Сұлутөбенің тұсына қарақұйрықтың, Тартоғайдың тұсына бүркіттің, Бәйгеқұмның тұсына жолбарыстың, таулы жер Еңбекшінің тұсына арқардың бейнесін орнатуға болады. Сондай-ақ, Шиелінің тұсына жасанды шие ағашын бейнелеуге болады. Осылайша, жол бойынан жүріп өткен саяхатшылар, шет елдік азаматтар, тіпті өзге облыстың тұрғындары да Шиелінің бай табиғатын, жан-жануары мен мәдениетіне сырттай қанық болып кете алады. Хан бұйрығымен бас кететін заманда даңқты ақын-жырауларымыз «Бас кеспек болса да, тіл кеспек жоқ!» деген қағиданы берік ұстанған екен. Олай болса, бейбіт күнде пікір айтып, ұсыныс көтерудің еш әбестігі жоқ болар.

Шиелі: Қарақұйрық, арқар мен киік те бар

Баланың талантын ұштап, талабын шыңдау оңай емес, әрине. Ол үшін мамандыққа деген адалдық һәм еңбекқорлық қажет. Жалағаш ауданында кәсіби мамандығын сәт сайын дамытып, өз ісін абыроймен атқарып жүрген мұғалімдер аз емес. Солардың бірі – Ысқақова Әйгерім. Ол былтыр жыл қорытындысымен «Үздік педагог – 2023» республикалық байқауының облыстық кезеңінде үздік деп танылып, 1 035 000 теңге қаржылай сыйақыға ие болды.&nbsp;Қоғам қайраткері Темірбек Жүргенов атындағы №123 мектеп-лицейінің ағылшын тілі пән мұғалімі Әйгерім Жарқынбекқызы – оқушыларға сапалы білім, саналы тәрбие беру жолында тынымсыз еңбек етіп келе жатқан шығармашыл, ізденімпаз, тәлімгер ұстаз. Ол өзінің еңбекқорлығымен, адамгершілігімен, жақсы қарым-қабілетімен көзге түсіп келеді.&nbsp;<blockquote>– Әйгерім Жарқынбекқызының білім беру саласына қосқан үлесі зор, жеткен жетістіктері көп деп білемін. Себебі ол – тәжірибелі, кәсіби жетістігі көп маман. Соның нәтижесінде Әйгерім «Үздік педагог – 2023» республикалық байқауында үздіктер қатарынан көрініп, мектебіміздің ғана емес, ауданымыздың да абыройын асқақтатты. Әріптестері мен шәкірттерінің артқан сенімін ақтай алды. Ол – 18 жылдық еңбек өтілі бар білікті маман. Осы уақыт ішінде ұстаздық етуден жалықпай, әр сабағын қызықты етіп өткізу үшін жаңашылдық енгізіп жүретін Әйгерімнің өзгеріске жаны құмар. Ол үнемі ізденіс үстінде жүріп, білген-түйгенін әдістемелік оқу-құралдарына жинақтап, түрлі байқауларда жеңіске жетіп жүр. Әйгерім мектепішілік, аудандық, облыстық семинар, конференцияларға белсене қатысып қана қоймай, желілік қауымдастық аясында мұғалімдермен тәжірибе алмасу мақсатындағы жұмыстарға да ерекше атсалысатын білімді маман, – дейді №123 мектеп-лицейінің директоры Айнұр Мыханова.&nbsp;</blockquote>Айнұр Сәнибайқызының сөзінің жаны бар. Кейіпкеріміз бүгінге дейін талай білім бәйгесінде үнемі үздіктер қатарынан көрініп, оқ бойы озық шығып жүрген маман. Мәселен, ол облыстық «Көптілді ұстаз», «Ағылшын тілі пәнінің ең үздік мұғалімі», «Табысты мұғалім академиясы», «Үздік авторлық бағдарлама – 2021» байқауларынан жүлделі орындар иеленген.Республикалық «Қазақстан мұғалімі – 2020» ұлттық байқауында арнайы дипломмен марапатталған ол 2021 жылы дәл осы байқаудан 1 миллион теңге грант жеңіп алып, қаржысына мектептегі ағылшын тілі кабинетін жабдықтаған. Республикалық «Үздік авторлық бағдарлама – 2022» байқауынан ІІІ орын және «Қазақстан педагогтарының Алтын кітабы» байқауында І орын иеленген Әйгерім Жарқынбекқызының өмірбаяны, еңбек жолы, жетістіктері аталған кітапқа енген. Еңбегі еленген педагог 2021-2022 жылдары ҚР Білім және ғылым министрлігі мен облыстық білім басқармасы басшысының «Құрмет» грамотасымен және облыстық «Жыл таңдауы – 2022» жылды қорытындылау шарасында «Креативті ұстаз» номинациясымен марапатталған.Айта кетейік, Әйгерім Түркия, Торонто, Крым, Уфа қалаларының белді университеттері, халықаралық Білім және ғылым Академиясы ұйымдастырған халықаралық конференцияларда үздік баяндама жасап, алғыс хаттармен марапатталып жүр. Ол Л.Н.Гумилев атындағы Еуразия ұлттық университетінің докторанты атана отырып, өзекті тақырыптарда ғылыми бағыттағы мақалалар жазуға бетбұрыс жасаған. Мәселен, Коксон тізіміндегі «Хабаршы», «Наука и жизнь Казахстана» ғылыми журналдарына бірнеше өзекті мақалалары жарыққа шыққан. Шәкірттері республикалық «Тіл – тұнық ойдың кәусары» олимпиадасы мен жалпы білім беретін пәндер бойынша республикалық ғылыми &nbsp;жобалар байқауында жүлделі орындар иеленіп, халықаралық «British Bulldog», «Кенгуру-лингвист» сайысында да жыл сайын алғашқы үштікті түйіндеуде.&nbsp;<blockquote>– Үздік педагог байқауы 2012 жылдан бастап дәстүрге айналған. Былтыр жаз мезгілінде осы байқаудың ережесі туралы хат келді. Бұрынғы басшымыз Ләйлә Шөменова мен қазіргі мектеп-лицей директоры Айнұр Мыханова ұсынысы бойынша қатысуға ниет білдірдім. Соңғы 3 жылдағы өзімнің және оқушыларымның жетістіктерін жинақтап, ашық сабақ өткіздім. Терең білімі мен тынымсыз еңбегінің арқасында бірнеше әріптесім осы байқауда ерекше көзге түсті. Бұл байқаудағы жеңіс менің ғана емес, маған сенім білдіріп қолдаған іргелі білім ордамның жеңісі, жемісі деп білемін, – дейді кейіпкеріміз.</blockquote>Айта кетейік, еліміз бойынша өткізілген «Үздік педагог – 2023» республикалық байқауының қорытындысы бойынша мектепке дейінгі, орта, техникалық және кәсіптік білім беру ұйымдарының 64 педагогы өз мамандығы бойынша үздік атанды. Республикалық байқау жеңімпаздары «Үздік педагог» куәлігін, «Үздік педагог» төсбелгісін және 3 450 000 теңге көлемінде ақшалай сыйақыны иеленді. 2012 жылдан бастап өткізіліп келе жатқан «Үздік педагог» конкурсында бүгінге дейін 624 педагог үздік деп танылып, олардың әрқайсысына мемлекеттік қолдау ретінде 1000 айлық есептік көрсеткіш мөлшерінде сыйақы берілген. Биыл конкурсқа қатысу үшін барлығы 961 ұстаз өтініш қалдырған.&nbsp;

Үздік педагог атағын иеленген жалағаштық ұстаз Әйгерім Ысқақова

Қызылорда облысы білім басқармасының тәрбие, спорт және қосымша білім беру орталығының ұйымдастыруымен мектеп оқушылары арасында саламатты өмір салтын қалыптастыру, бұқаралық спортты дамыту және облыстық үздік команданы анықтау мақсатында «Ұлттық мектеп лигасы» бағдарламасына сәйкес спорт түрлерінен облыстық іріктеу жарыстары өтті. Ұлттық Мектеп лигасы – жас таланттарды табуға мүмкіндік беретін спорттық жарыстар, мектеп спортындағы ерекше жоба. &nbsp;Спорттық іс-шараның негізгі мақсаты – балалар мен жасөспірімдер спортын дамыту және насихаттаумен қатар, оқушылардың рухани қайрат-жігерін шыңдап, патриотизмге тәрбиелеу. Лига жарыстары барысында жасөспірімдер арасында командалық рух қалыптастыру. Баскетбол бес ойыншыдан тұратын екі команда қатысады. Баскетбол алаңының қарама-қарсы екі шетіне орнатылатын қалқаны бар тағандарға сақина бекітіледі. Ойынның мақсаты - допты қарсыласының сақинасына түсіріп, ұпай жинау. Ойыншылар допты лақтыруға, пас жасауға, домалатуға немесе жерге жиі-жиі ұрып дриблингпен алып жүруіне болады. Доп өзіне тигеннен кейін ойыншы онымен тек екі қадам ғана аттай алады. Баскетболды таза 20 минуттан екі тайм ойнайды. Таймдардың арасындағы үзіліс 10 минуттан тұрады. Ойынның басталуында төреші алаңның қақ ортасында командалардың екі ойыншысының арасында тұрып допты тіке лақтырады. Олар секіріп, допты командасындағы әріптестеріне тартып әперуге тырысады. Сайыс нәтижесі бойынша үстел теннисінен Қазалы ауданының Е.Бозғұлов атындағы №249 мектеп-лицейдің оқушылары гандболдан ер балалар арасында өткен жарыста Ғ.Мұратбаев атындағы №91 мектеп оқушылары жеңімпаз атанды. Сонымен қатар, баскетболдан қыз балалар арасында өткен жарысқа Қ.Сәтпаев атындағы №216 мектептің оқушылары қатысып, жүлделі үшінші орын иеленді. Үстел теннисі әрқашан жылдамдыққа бағытталған қатал сайыс екені рас. Алғашында XIX ғасырда оны түстен кейінгі ойын ретінде ермек қылған. Ойыншылар ас үстелінің үстіне тордың орнына кітаптарды қойып, шылымның қорабымен шампанның тығынын соғып ойнаған. Гандбол – олимпиадалық спорт түрі болғандықтан, ширақтықты талап ететін спорт түрін дамыту өңірлерде дұрыс жолға қойылып келеді. Бұл спорт түрінің пайда болу уақыты 1898 жыл деп есептеледі. Аталған спорт ойының дене шынықтыру мұғалімі Хольгер Нильсен ойлап тапты. Гандбол – 7-ге 7 ойыншыдан ойналатын топтық ойын, допты қолмен ғана ойнайды. Ойынның басты мақсаты – мүмкіндігінше қарсылас топтың қақпасына көбірек доп лақтыру. Ойын жабық алаңда өтеді, алаң тіктөртбұрыш секілді болып келеді.&nbsp; Бұдан бөлек үстел теннисі бойынша Е.Бозғұлов атындағы №249 мектеп-лицейдің 10 сынып оқушысы Сайлаубаев Тимур, Ғ.Мұратбаев атындағы №91 мектептің 11 сынып оқушысы Әміржанов Даниял және Қ.Сәтпаев атындағы №216 мектептің 10 сынып оқушысы Ысқақ Үміт үздік атанып, білім басқармасының дипломымен марапатталды. Облыстық іріктеу жарысында жеңімпаз болған командалар республикалық жарысқа жолдама алды. &nbsp;

Облыстық іріктеу жарысында жеңімпаз болды

<a href="https://kyzylorda-news.kz/">Kyzylorda-news.kz.</a> Наннан құдіретті не бар? Бір замандары «Нан болса, ән де болады» дедік. Бұл ақиқат сөз еді. Әлемде бір үзім нанға зар болып отырған миллиондар аз ба? Айлығы шайлығына жетпей, қалт-құлт етіп бір үзім нан үшін базар жағалап жүргендер өзімізде де баршылық емес пе? Олар жанының қадірін білмесе де, нанның қадірін жақсы түсінеді. Біз бұл арада жасып жүргендерді ғана емес, асып ішіп, тасып жүргендердің нанды аяқ асты ете бастағанын да меңзеп отырмыз.Қазір әлеуметтік желі арқылы әркім өз базынасын әлемге жеткізе алады. Ол рас. Десек те, кейде бір мәселені көтергенде оның екінші тұсын ескере бермейміз. Мәселен, дүкендерде сатылатын 1 бөлке нанның салмағы қанша? Ал мемлекеттік стандартта нанның салмағы қанша грамм болуы керек? Шиелі кенті ардагерлер кеңесінің төрағасы Болат Күлімбет біраз уақыт бұрын өзінің фейсбук парақшасында нанға қатысты бір мәселе көтерген болатын. Аудан тұрғындарының талқысына түскен нанның бағасы мен қадірі жайында біз де толығырақ тарқатып көргенді жөн санадық. Сонымен Б.Күлімбет:&nbsp;<blockquote>– Мемлекеттік стандарт тек медициналық құралдарда ғана бар деп ойласам, олай емес барлық жерде бар екен. Мысалы, 1 бөлке нан мемлекеттік стандарт бойынша 620 грамм болуы керек болса, «Қазына» сауда орталығынан сатып алған 1 бөлке нан 370 грамм болып шықты. Әрине бұған дүкеннің еш қатысы жоқ. Мәселе наубайханада болып тұр. Биыл 2024 жылы кәсіпкерлерді тексермеу туралы мараторий 1 қаңтардан бастап тоқтатылды. Сіздің жеп отырған наныңызды салмағы қанша грамм? Наубайханашылар қандай уәж айтар екен? – деді.&nbsp;</blockquote>Алдымен дүкен сөрелеріндегі нан бағасын зерделедік. Кент орталығындағы бірнеше дүкенге бас сұғып, 1 бөлке нанның бағасы 110-115 теңгеден сатылып жатқанын білдік. Енді ардагердің сауалына жауап іздеп Тәуелсіздік көшесі бойындағы «Дархан» наубайханасына жол тарттық. Бізді Сұлтан Дәулет есімді азамат күтіп алды.&nbsp;<blockquote>– 1 бөлке нанның қамыр күйіндегі салмағы 420 грамм, ал піскен нан 380 грамм болады. Біз дүкендерге нанның 1 данасын 100 теңгеден жеткізіп береміз. Егер 1 нанның салмағы 620 грамм болуы керек болса, бізде нанды 200 теңгеден өткізуге тура келеді. Себебі мемлекеттен көрсетілетін жәрдем бойынша ұнды келісім шартпен СПК «Байқоңыр» арқылы 7800 теңгеден алатынбыз. Алайда ол ұннан жасалған нан піспейді, сапасы өте нашар. Халық ол нанды өзімізге қайтарып әкеліп берді. Сондықтан келісімшартты үзіп, 1 жылдан бері ұнды 10 500 теңгеден сатып алудамыз. Сондай-ақ 5 адамды жұмыспен қамтып отырмыз. Олардың айлық жалақысы 150-200 мыңның арасында. Одан бөлек жанар жағар май, жарық пен жылу, салықты қоссақ, наубайханашыға қалар табыс тиын-тебен ғана, – деді наубайханашы.&nbsp;Расында ас атасына балайтын нанның қандай еңбекпен дастархан басына келетінін кейде ескере бермейді екенбіз. Қазіргі таңда ауданда ірі 7 наубайхана бар. Мәселен, 50 келі 1 қап ұн 10 500 теңге болса, одан 130 нан шығады. Ал 130 дана нан 13 000 теңге болады. Одан наубайханаға 2500 теңге пайда қалады. Енді ол пайдасы әр дүкенге нан тасымалдайтын көлігінің жанар жағар майына, жұмысшылардың жалақысына, салық пен жылуына шашқанда қандай пайда қалмақ? Оны да ойламасқа болмайды.&nbsp;</blockquote><blockquote>– Менің наубайханада жұмыс істегеніме 20 жыл болыпты. Осыдан 20 жыл бұрын бір шөлмек минералды су 60 теңге, нанның бір бөлкесі 60 теңге болды. Ал қазір екеуінің арасындағы айырма жер мен көктей. Мәселен, су 500 теңге болса, нан бағасы – 110 теңге. Бұл – нанның қадірін түсірмей ме?. Қазір «ішкенің – алдыңда, ішпегенің – артыңданың» заманы. Бұрын жерге түскен нанның қиқымын теріп, қасиетті санасақ, қазір қоқыс жәшіктерінің жанынан өте қалсаң, жаның түршігеді. Жағалай шашылған – нан. Осыдан соң 5 теңге қосылса «нан қымбаттады» деп шуылдап жатамыз. Меніңше, нанның шынайы бағасы 150-200 теңгеден болуы керек. Сонда ғана нанның қадірін түсінетін шығармыз, – деді Жанар апай.&nbsp;</blockquote>Арзанның қадірі болмайтыны тәрізді, бидайдың бағасын өмір бойы төмен бағада ұстап тұру да ауыл шаруашылығын өркендетуге кері әсерін тигізері сөзсіз. Өйткені кез келген шаруа тер төгіп өсірген бидайын арзан бағаға бергісі келмейді. Бірақ лаж жоқ, баға сондай болған соң, нарықта белгіленген бағаға өткізуге мәжбүр.​​​Ал дала қосындағы тіршілік техникасыз бітпейді. Демек, техникаға кетер дизель отынының бағасы еткен еңбегіңнің жарымын соған жұмсауға алып келеді. Содан, жер тырнаған диқанның да қай бір шекесі шылқи қойсын?! Нан бағасы, мұның өзі – үлкен бір мәселе. Оның бағасы көтерілер болса, ауылдағы кәсіпкер бидайын қымбатқа өткізіп, жағдайын жақсартар еді, техника паркін жаңалар еді. Ал ауылдың жағдайының жақсарғаны – мемлекетіміздің жағдайының жақсарғаны. Енді бидай бағасы қымбат болса, оны сатқан ауылдағы ағайын біраз пайда табар еді. Демек, келесі жылы ол бидайды көбірек егуге мүдделі болады. Өнімнің көлемімен қатар, сапасын арттыруға тырысады. Ауылда жұмыс болса, жұмыссыз жүрген жастар да баруға ұмтылады. Шыны керек, бәріміз жиылып, қалаға үдере көшкеннен еш пайда жоқ. Ауылға тұрып, жұмысын істеп, малын өсіріп, егінін егіп отырса – нұр үстіне нұр емес пе?!&nbsp;Осы орайда аудандық ауыл шаруашылығы бөлімінің арнайы маманы Қасымхан Құрманалиевпен тілдескен едік. Маман «Ауданда ірі 7 наубайхана СПК «Байқоңырмен» келісімшартқа отыратын. Алайда 2023 жылдың мамыр айынан бастап барлық наубайхана әлеуметтік ұннан бас тартты. Ұн жол шығынымен 7400 теңгеге келеді. Бірақ әлеуметтік ұннан жасалған нан дұрыс піспей, тұрғындардан көп шағым түскендіктен келісім шарт толық үзілді» деп наубайханашылардың сөзін растады. Ал кент тұрғындарының бірі «Нан бағасын қымбаттатуға қарсымын. Өйткені тұрмысы төмен отбасылардың қалтасына салмақ түседі» десе, енді бірі «Бидайдан жасалған ащы судың 1 құтысы 1000 теңгеден кем емес, дәл сол бидайдан жасалған нан неге арзан болуы керек. Қымбаттасын! Ел қадірін білсін!» десті.&nbsp;Расында, тоқшылықтың мәуесін тарылтып алмайық Дамыған елдердің озық тәжірибесін негізге алсақ, Алманияда күнделікті 3 мыңнан астам түрлі нан мен тоқаш пісіріліп, сатылады екен. Елдегі орташа көрсеткіш бойынша бір неміс отбасы жылына 42,4 кило нан тұтынады. Мәселен, Штутгарт қаласында багеттер теңгеге шаққанда – 1 500 теңге. Германиялықтарда ұзақ жылдар бойы наубайшы мамандығы кеңінен өріс алды. Қазіргі таңда неміс наубайшылары өнімдерін әлеуметтік желілер мен көрмелерде жиі жарнамалап жүр. Сөйтіп, кәсіби дағдыларын жетілдіріп, көпшіліктің қалауындағы өнімді ұсынуға тырысады. Алманиялықтардың ас атасына деген сүйіспеншілігі жыл сайын артпаса, кеміген емес. Сол себепті бұл елде нан-тоқаш өнімдерінің 3200 түрі бар. Осыған байланысты мемлекеттің қолдауымен «Неміс нан институты» құрылып, тоқсан сайын арнайы бақылау жүргізіліп тұрады екен. Ал Күншығыс елінде күріш тағамы негізгі өнім болғанымен, кейінгі кездері Батыс иіріміне бет бұрғанын аңғаруға болады. Мәселен, жергілікті тұрғындар дүкен сөрелеріндегі француз багеттері мен америкалық тостерлерді жиі сатып алады. Осы орайда бір нанның бағасы иенге шаққанда – 610 теңге болады екен. Осылайша әлемдік тәжірибенің өзі ас атасына деген құрметтің қандай болатынын аңғартып отыр. Ал біз де ше?&nbsp;Туған күнде тәтті тортты бетке ұрып, бүтін нанды қоқысқа тастаймыз. Тіпті әлеуметтік желіде тренд қуам деп нанды табан асты етіп жатқан жасөспірімдердің ісі ше? «Алты жыл аш жүрсең де, ата салтыңды ұмытпа» деген текті қазақтың ұрпағымыз. Қашанда үлкеннің ғибратын құлаққа ілеміз. Олай болса, нанға зар болғандар мен нантепкі жасап жүргендердің «тірлігін» жұрт болып жұмылып айта алсақ, қане. «Нан қалдығын енді қайда тастаймыз?» дейтіндер де табылар. Көбіне мұрты бұзылмаған тоқаштар көгеріп, үлкен дүкендер мен мейрамханалардан шығады. Мүмкін нан қалдығын жинап, фермермен келісімге келіп, соларға берсе, қасиетті нан қара жерде жатпас па еді? Нан қадірі – жан қадірінен кем емес дегенді әр азамат түсінсе, кіндігінен тараған ұл-қызына ұқтырса, иманды іске ұйытқы болар ма еді? Ал нан бағасы сапасына сай болса қымбатсына қоймайтын шығармыз…

Шиеліде нан бағасы қымбаттай ма?

<a href="https://kyzylorda-news.kz/ru">Kyzylorda-news.kz</a> Соңғы жылдары кәсіпкерлік саласына серпін беруде нәзікжандылардың қосқан үлесі зор.&nbsp;Оған мемлекет тарапынан берілетін қолдаудан бөлек, өз қаражаты есебінен шағын және орта бизнес саласында жоғары жетістікке жетіп жүрген кәсіпкер келіншектер дәлел. «Адамды адам ететін еңбек» деген қағиданы ұстанатын&nbsp;Жалағаш ауданының тұрғыны&nbsp;Сәуле Нұрмаханова – кәсіпкерлік саласында өзіндік орны бар, озық келіншектердің бірі. Ол аудан тұрғындарының сұранысына сай жартылай дайындалған өнімдер өндіреді.Бойжеткен кезінен дәмді тағамдар мен тәттілер пісіруге қызығушылығы жоғары Сәуленің сол кездегі арманы шағын асхана желісін ашу болған. Сол арманның жетегінде жүріп, кәсібінен нәсібін &nbsp;тауып жүрген іскер келіншек бүгінде халықтың алғысын алып, талғампаз тұтынушылар көңілінен шығуда.&nbsp;<blockquote>– Негізі бала күнімнен өнерге жақын болдым. Мектепте баян аспабында ойнап, ән айтып сайыстарға қатысып, жүлделі орындарды иеленіп жүргеніммен аспаз болуға деген қызығушылығым басымырақ болды. Қазіргі таңда жетістікке жету үшін өзіңе инвестиция құйып, іздену және білім алып, даму қажет. Заман талабына сай мен де Алматы қаласында мықты аспаздардан дәріс алып, тәжірибе жинадым. Мақпал, Жанат, Сымбат есімді аспаздардың курсына арнайы барып, білімімді жетілдірдім. Содан соң осында келіп кәсіп ашуды қолға алдым. Ал бұл кәсіппен айналысқаныма енді бір жыл болады, – дейді кейіпкеріміз.</blockquote>Қазіргі таңда кәсіпкер келіншек 5 адамды тұрақты жұмыспен қамтып отыр. Ол жартылай дайындалған өнімнің түр-түрін, мәселен, манты, тұшпара, котлет, тефтели, голубцы, жайма, кеспемен аудан орталығындағы «Бағдат», «Сәтті», «Бибігүл ана», «Қаракөз» сынды дүкендердің сауда желілерін қамтамасыз етуде. Айта кетейік, өнім аудан тұрғындарына қолжетімді бағада, «Сәуледен сарқыт» сауда маркасымен сатылуда.Кәсібін ең алғаш екі түрлі өнім шығарумен бастаған Сәуле қазіргі кезде әлеуметтік желіден арнайы парақша ашып, тұтынушылармен тұрақты байланыс орнатқан. Ең алғаш бес қалта манты мен жеті қалта тұшпараны «Сәтті» дүкенінің сөресіне қойған ол бүгінде аудан, ауыл тұрғындарына едәуір танылған, күніне орташа есеппен 25-30 килограмм өнім өндіреді. Оның айтуынша, ең жоғары сұранысқа &nbsp;ие &nbsp;өнім – тұшпара мен жайма. Кәсіпкер келіншек үй өнімдері сұранысқа ие болғандықтан алдағы уақытта тұрғындардың таңдауына сай өнімнің санын еселеп, оларды өзге де дүкен сөрелерінен халыққа қолжетімді етіп, ауылдарға да тасымалдап, кәсібін кеңейтуді көздеп отыр. Мәселен, алдағы уақытта халықтың сұранысы бойынша түрік ағайындардың таңғы асы сигара бөректі қосқысы келетінін айтады. Кәсіпкер келіншек сұхбат барысында сапасы жоғары өнімге сұраныста та көп болатынын тілге тиек етті.&nbsp;<blockquote>– Бұл кәсіпті қолға алғанға дейін, 2000 жылдары таба нан пісіріп, сататынмын. Ол кезде қазіргідей техника дамымаған. Үлкен кісілер біледі, ол жылдары «мылқау пеш» деген болатын. Сол пешпен таба нан пісіріп, ыстықтай дүкен сөрелеріне апарып қоятынмын. Алдағы үлкен жоспарым – цех ашу. Бүгінде фундаменті қаланды. Көктемде ашылу салтанатын жасасақ деген ниеттеміз. Одан бөлек Қытайдан қажетті құрылғыларды алдырғалы жатырмын, – дейді ол.</blockquote>Кейіпкеріміз жартылай дайын өнімнен бөлек қазы, әсіп, түрлі рулеттер, әртүрлі салаттар, ыстық тағамдарды арнайы «Дайын дастархан», «Құтты қонақ», «Ақ отау», «Бай дастарқан» сынды біріктірілген тағамдарды тапсырыспен әзірлейді. Байқасаңыз, қазір кез келген дүкеннің төрінен жартылай дайын тамақтың түрін таңдап жүріп аласыз. Үнемі жұмыстан қолы босамайтын отбасыларға бұл таптырмас мүмкіндік. Тек дайын өнімді үйге апарып пісіре саласың. Бұл да заманның, технологияның дамып келе жатқанының көрінісі, уақыт үнемдеудің бір түрі екені &nbsp;рас.&nbsp;<blockquote>– Мен – Сәуле апаның өнімдерін тұрақты тұтынушылардың бірімін. Себебі кешке жұмыстан асығып үйге жеткенде балаларыма дәмді әрі тез дайындалатын тағам әзірлеу үшін Сәуле апаның өнімдерін жиі пайдаланамын. Балаларым әсіресе тұшпара мен котлетті сүйіп жейді. Сондықтан азық-түлік аларда «Сәуледен сарқыт» маркалы өнімін молынан аламын. Бастысы, өнім таза әрі сапалы, – дейді кент тұрғыны Гүлжайна Ерланқызы.</blockquote>Иә, қазіргі таңда екі қолға бір күрек таппай жүрген әйелдер көп. Сондай-ақ кез келген істі бастағанда тәуекелге бел буып, алған бетінен қайтпай, айқын мақсатына жететіндер де аз емес. Сондай тәуекелшіл жандардың бірі – кейіпкеріміз Сәуле Нұрмаханова. Жеткен жетістігін аудан тұрғындарынан алған алғысына балаған ол, берекелі кәсібі арқылы туған жерінің дамып, көркеюіне өзіндік үлесін қосуды көздейді.

Жалағаштық Сәуле Нұрмаханова жартылай дайындалған өнімдер өндіреді

&nbsp;<a href="https://kyzylorda-news.kz/">Kyzylorda-news.kz</a> &nbsp;«Мешіт – ізгілік мекені» дейді халық. Орталық «Жанқожа батыр» бас мешітінің салынып пайдалануға берілгеніне де 10 жыл толғанын күнделікті күйбең тіршілікпен айналысып жүріп байқамай да қалыппыз. Мешіттің іргетасы, 2007 жылы Әйтеке би кентінің Жанқожа батыр көшесі бойынан қаланып, қабырғалары тұрғызылып, төбесі жабылды. Содан кейін бөлінген қаржы толық жетіспеуіне байланысты мешіт құрылысы жеті жыл тоқтады. 2013 жылы кәсіпкер азаматтардың аудан халқының көмегімен қаржы жиналып, мешіт құрылысы қарқын алып, 2014 жылдың желтоқсан айының 24-ші жұлдызында ашылу салтанаты болып, халық игілігіне пайдалануға берілді. Мешіттің салынуына бастама көтеріп, оған алғашқы қомақты қаржы бөлгізіп, сауапты іске кіріскен Жанқожа бабаның төртінші ұрпағы Оңтүстік Кореяның елшісі, Сеул қаласының құрметті азаматы, профессор, қоғам қайраткері, 1964 жылы туған жерлесіміз Майдан аталығынан тарайтын ұрпақ өкілі Дархан Бердалиев есімді азамат. Жүрегі жомарт, пейілі кең Дархан бауырымыз бір естелігінде: – Менің еткен еңбегім еленіп, бағаланып, берілген ондаған медаль, тағы басқа марапаттарым жеткілікті. Миллиондаған халқы бар Оңтүстік Корея Республикасының астанасы Сеул қаласының Құрметті азаматымын. Бірақ бәрінен маған Отаным, туған жерім ыстық, қолымнан келетін бір нәрсе болса Қызылордаға, ауылыма болсын деймін. Оның ішінде Қазалы жері, халқы мен үшін ерекше, – деген Дархан Бердалиев. Бұл шынайы көңілімен айтылған сөзінде Дархан бауырымыз тұрды. Өзінің кіндік қаны тамған Қазалы ауданының орталығынан даңқты батыр, әрі әулие Жанқожа батыр көшесі бойынан бабасының атымен аталатын зәулім де, сәулетті имандылық үйін салдырды. Он жыл ішінде, аталған мешіттен жүздеген шәкірт діни дәріс алды. Намаз оқылды. Некелер қиылды. Қаншама сәбиге азан шақырылып, есімдері қойылды. – Діни де, мәдени іс-шаралар өткізілді. Асханасында ас берілді. Діни қиссалар, уағыздар айтылды. Алланың кәламы Құрандар оқылды. Тұңғыш рет қарилар дайындайтын медресе салынып пайдалануға берілді. Онда келешек қаншама қари, хафиздер шығатыны да белгілі. Осы кездің өзінде қарилардың алғашқы түлектері шығып та үлгірді. Алла Тағала осы ізгі амалдардың сауабын Дархан бауырымызға нәсіп еткей демекпіз. Бұл мешіттің сырттан келген белгілі тұлғалардың, қонақтардың тағзым етіп құлшылығын жасап кететін киелі орынға айналғанының біздер куәсіміз, – дейді орталық «Жанқожа батыр» мешітінің діни қызметкері Беганыш Жақсыбай. «Жанқожа батыр» мешітінің іші де, ауласы да, кең құлшылық жасайтын бөлмелері де жайлы, таза екенін халық көріп сүйсінуде. Мешіт пен медресені өз дәрежесінде ұстап тұру да, оңай шаруа емес екені белгілі. Бірақ, жүректеріне иман ұялаған азаматтар баршылық. Солардың, аудан халқының көмектерінің арқасында мешіт көркеюде, гүлденуде, діни қызметкерлердің сапасы жақсаруда. Он жыл ішінде, Қайрат Дәуіржанұлы, Мейрамбек Жәмиев, Берік Мәдиұлы, Нұрдаулет Асқарұлы есімді білікті дін өкілдері имамдық етті. Бақтияр Саламатов, Мұстафа Есмамбетов, Өмірбек Ниетов, Ернұр Кенжемұратұлы, Марғұлан Алтынбек, Зәуре Өтегенқызы және білікті қари Исмайл Омарұлы діни дәріс берудің шеберлік шыңына көтерілгендер. «Жанқожа батыр» мешіті асханасының меңгерушісі Жасұлан Абдурахманұлы, тазалықшы Алмагүл Темірбекқызы және Алмат, Ануар, Ізбасар, Дәріжан, Серік есімді молдаларымыз да мінездері көркем, сауатты да, амалдарға жетік өз қызметтеріне төселген жандар. «Жанқожа батыр» мешіті ашылғаннан бері, діни дәріс алуға келген алпыс, тіпті, жетпістен асқан кейуаналар мен қарияларымыз қазіргі кезде Алланың кәламы қасиетті Құранды өз дәрежесінде оқиды. Облыс бойынша құран оқу жарысынан қазалылық қыз алдыңғы орындардан көрінуі ұлағатты ұстаз – Зәуре Өтегенқызының еңбегінің нәтижесі. Қаншама жастар да, ересек әйелдер мен ерлер де оқып жатыр. Осының бәрі Алла тағаланы мойындап және қасиетті Құран-Исламның рухани көгінде жарық шашқан нұрлы шырақ екенін шынайы жүректерімен сезіне білген бауырларымыздың ізгі амалдарына жатады. Он жыл ішінде алты жыл қатарынан орталық «Жанқожа батыр» мешіті облыс бойынша «Жылдың үздік мешіті», ондағы имамдар «Жылдың үздік имамы» номинациясын иеленді. Мешіт жамағаты бірнеше рет футболдан аудандық, облыстық жарыстарға қатысып, жүлделі орындарды иемденді. Берік Мәдиұлы имам республикалық дәрежедегі медальмен, баспасөз хатшысы Беганыш Жақсыбай Қазақстан республикасы ішкі істер Министрлігінің «Құрметті ардагері» және осы саланың «Құрметті грамотасымен» марапатталды. Халықтың көмегімен жыл ішінде салынып біткен қарилар медресесі және мешіт күмбездерінің алыстан көз тартарлықтай болып қапталып безендірілуі тағы басқа да, жасалынып жатқан ізгі амалдар, жетістіктер баба мешітінің он жылдығы мен батыр бабамыздың 250 жылдық мерей тойларына тарту десе де болады. Бұл үшін уақытпен санаспай, табандылық танытып, көпшілікті ұйымдастыра білген жас та болса, бас бола білген білікті имамдар – Берік Мәдиұлы мен Нұрдаулет Асқарқұлы, мешіт жанашыры – Сәбит Аралбаев, Болатбек Қоңырбаевтардың еңбектеріне Алла да халық та разы деген үміттеміз.&nbsp;&nbsp;

Дархан Бердалиев: Он жыл ішінде, аталған мешіттен жүздеген шәкірт діни дәріс алды

<a href="https://kyzylorda-news.kz/">Kyzylorda-news.kz.</a> Қарекет қылған адамның қарны да, көңілі де тояды. Расында солай. Талап қылып, алға талпынған азаматтарға бүгінде мүмкіндік көп. Бұл мүмкіндіктер алдағы уақытта да әрі қарай жалғасын табатыны ақиқат. ҚР Президенті Қасым-Жомарт Тоқаевтың да басты назарындағы кәсіпкерлік саласы бүгінде біз айтқан азаматтарға жан-жақты қолдау көрсетіп келеді.&nbsp;Мемлекет кәсіпкерлікті жан-жақты қолдау үшін тиімді тәсілдер қолданып жатыр. Атап айтқанда, гранттар, шағын және жеңілдетілген несиелер беріледі. Аймақтардағы кәсіпкерлердің санын айтарлықтай көбейту үшін мемлекет тарапынан қолдау шараларын күшейту қажет. Осы мақсатта арнайы ұлттық жоба жүзеге асырылып жатыр. Бірақ бұл туралы халықтың көбі білмей жатады. Сондықтан ел ішінде бизнесті қолдау саясаты туралы ақпараттық-түсіндіру жұмысын жүргізу қажет, – деген болатын ел Президенті.Міне, аймақтарда, өңірлерде кәсіпкерлікті жан-жақты дамытып, түсіндіріп, халыққа тиімді жағын насихаттап келе жатқан, сондай-ақ кәсіп бастаушыларға таптырмас мүмкіндік тудырып келе жатқан аудандық кәсіпкерлер палатасының жұмысы жүйелі. Соған бір дәлел жуырда ғана Аралдан ашылған «Aral sabyn» бренді. Кәсіп иесі Нұртай Бозғұлов «Ұлттық жоба» шеңберінде қайтарымсыз грант жеңіп алып, ауданда алғашқы рет сабын шығару жұмысын бастады.1993 жылы туған жас кәсіпкер осы уақытқа дейін кәсіппен айналыспаса да, осындай тың бастаманы бастауға тәуекел етіп, қазіргі уақытта мемлекеттің қолдауын пайдаланып, Алматы қаласынан сабын жасауға арналған екі техника алдырған. Осы техникалардың көмегімен бүгінгі таңда алғашқы өнімдерін дайындап шығарып жатыр.Кір сабынның құрамы өте оңай. Өсімдік майының, малдың майының қалдығы, каучук соданы қолданамыз. Жасалу жолы да аса қиын емес. Араластыратын қоспаларды мөлшерімен қосып, барынша араластырған соң, нығыздап, оны сабынның пішініне келтіретін құрылғыға ауыстырамыз. Бірақ шикізатты сырттан алдырып отырмыз. Алматыдан, Ақтөбеден алдыруға тура келеді. Оған да себеп бар. Өйткені біз жақта олардың бағасы қымбатқа түседі, – дейді кәсіпкер.Расында қай уақытта да сұраныстан түспейтін тауардың түрін таңдаған жас кәсіпкер алдағы уақытта өз өнімін нарыққа шығару жолын да қарастырып қойған. Қазірде базар нарығындағы бағадан төмен бағада тұтынушыларға ұсынуды көздеп отырған жас кәсіпкердің болашақтағы жоспары да ауқымды.Әзірге басты мақсат – сапалы өнім шығарып, тұтынушылардың көңілінен шығу. Қай өнім болса да бағасына сапасы сай болғаны дұрыс қой. Бірақ тек сабын өндірумен ғана шектелмейміз. Алдағы уақытта сұйық сабын мен жуынуға, жууға арналған гельдер шығаруды да жоспарлап отырмыз. Бәрін уақыт көрсетеді, – дейді Нұртай Малкаждарұлы.Алдыға мақсат қойып, сол мақсатқа жетудің жолын таба білген жас кәсіпкерге біз де сенім артамыз. Өзінің сүйікті ісін істеген адам емес, өз ісін сүйіп істеген адам ғана бақытқа бөленеді деген емес пе?!

Аралдық кәсіпкер кір сабын шығарып табысын еселеуде

&nbsp;<a href="https://kyzylorda-news.kz/">Kyzylorda-news.kz</a>&nbsp; Қазалы ауданындағы Е.Бозғұлов атындағы №249 мектеп-лицейде аудандық білім бөлімінің ұйымдастыруымен «Жарқыра, жаса, жас маман» атты аудандық форум өтті. Жиынға білім беру ұйымдарынан 80 жас маман қатысқан шараның ашылу салтанатында аудандық білім бөлімінің әдіскері Гулнар Жамалбекқызы Дүзелбаева алғысөз сөйлеп, сәттілік тіледі.Форум бағдарламасы бойынша жас мамандар Жалғас Жансаяның ұйымдастыруымен «Бір үйдің баласындай...» тренингінде форумға қатысушы жас педагогтардың шығармашылық қабілеттерін шыңдау мақсатында топтық педагогикалық ойындар жүргізді. Ұстаздар алты &nbsp;бағытта ұйымдастырылған керемет іс- тәжірибелермен танысты. «Қолөнер – мол өнер» бағытында М.Горький атындағы №16 мектеп-лицейінің технология пәні мұғалімі Көпжасар Тілектес қыш құмыра бағытында жұмысымен таныстырды. Сондай-ақ, практика жүзінде саз балшықтан әртүрлі формада құмыралар жасады. Бұдан бөлек, М.Горький атындағы №16 мектеп-лицейдің ұйымдастырушы педагогі Смағұл Жұлдызай «Мандала» әдісін ұсынды. Мандала әдісі – сурет салу арқылы адамның ішкі жағдайын бағалауға арналған диогностикалық материал. Қатысушы жас ұстаздар баяу әуен арқылы өздерінің ішкі құпияларымен бірге көңіл сандығын аша білді. Жиын барысында Ғ.Мұратбаев атындағы №17 орта мектептің жас маманы Жақсылық Әсел "Мұғалімнің цифрлық зертханасы" (электронды портфолио, интернет ресурс жасау) тақырыбында жас мамандарға шебер сынып өткізді. Шебер сынып барысында Www.wix.com платформасында жасалған жұмыстарымен таныстырып, сайттың мүмкіндіктері және оны қалай пайдалану туралы көрсетті. Жас мамандар сол жерде өздеріне жеке электронды портфолио әзірлеп, практика жүзінде платформа жұмысымен танысты. Шебер сынып соңында пікірлер ортаға салынып, Padlet тақтасында кері байланыс жасады. М.Горький атындағы №16 мектеп-лицейдің жас маманы Марат Перизат "Дебат және ТЕD" тақырыбында жас мамандарға шебер сынып өткізді. Онда дүниежүзілік мектеп форматымен таныстырып, жас мамандарға берер мүмкіндіктерін атап көрсетті. Ұстаздар теориялық білімдерін, практика жүзінде толықтырып, шебер сынып соңында жас мамандар пікірлерін «ҰЛТТЫҚ ҚОРЖЫН»-ға салды. Форум барысында С.Сейфуллин атындағы №165 мектептің тарих пәнінің мұғалімі Нағашыбай Берік, №266 мектеп-лицейдің ағылшын тілі пәні мұғалімі Қазанбай Гаухар, №98 орта мектептің ағылшын тілі пәні мұғалімі Қымбат Толыбаева «Цифрлық әлем» тақырыбында сабақ үдерісінде қолдана алатын платформалық әдіс-тәсілдерді жасау жолдарын игерту мақсатында шеберлігімен бөлісті. Е.Бозғұлов атындағы №249 мектеп-лицейдің жас мамандары – Сараман Аслан «Әдістемелік құрал және авторлық бағдарламаны әзірлеу, Сараман Гүлдана «Оқушыларды зерттеушілік жұмыстарға бағыттаудағы педагогикалық қызмет» тақырыбында түсіндірме жұмыстар жүргізілді. Жұмыс барысында жас мамандар, әдістемелік құрал мен авторлық бағдарламаның айырмашылықтары мен олардың жасалу жолдары, ғылыми жобалардың жазылу стандарты мен оған қойылатын талаптар және жазылу барысында кететін қателіктер мен олардың жасалу жолдары туралы ақпарат ала отырып, осы бағытта бірлесе жұмыстар жасады. Сонымен қатар, Ы.Алтынсарин атындағы №204 орта мектептің арнайы маманы Толқынай Елубайқызы, №21 «Алпамыс» бөбекжәй-балабақшасының психологы Мейрамбек Меруерттің ұйымдастыруымен «Әлем сенімен керемет!» тақырыбында қатысушы жас мамандармен арт-коучинг психологиялық сағаты жүргізілді. Мұғалімдер түстер политрасын пайдалана отырып, саусақ арқылы әуен ырғағымен қиялынан туындаған бейнелерді ақ қағаз бетіне түсірді. Форум соңында жиынға қатысушы жас мамандар берері мол, іс-тәжірибелерімен бөліскен ұйымдастырушыларға ризашылықтарын білдірді. Шарада тәжірибесімен бөліскен жас мамандар аудандық білім бөлімінің Алғыс хатымен марапатталып, қатысушыларға сертификаттар табысталды. &nbsp;

Қазалыда «Жарқыра, жаса, жас маман» атты аудандық форум

<a href="https://kyzylorda-news.kz/">Kyzylorda-news.kz</a>&nbsp; &nbsp;"Қол жұмылмай – жылынбайды" дейді қазақ. Осынау үш-ақ ауыз сөздің астарында қандай терең мағына жатыр десеңізші?! Иә, бұл жерде ағайынның ортақ істегі ауызбіршілігі, жанашырлығы жайлы айтылған. Дәл осындай ұйымшылдық ұялаған, бақ қонған, ауызбіршілікті алтындай бағалаған жұрт қоныс тепкен орынның бірі – шойын жолдың бойында орналасқан Ақсуат ауылы. Олай дейтініміз, мұндағы әрбір жақсылық әкелер бастамаға, игі іске еңбектеген баладан, еңкейген қарияға дейін атсалысып, қапы қалмайды. Жақында аталмыш ауылға жол түсіп барғанымызда бұған толықтай көзіміз жетті. Ауылда округке қарасты барлық мекеннің оқушыларын білім нәрімен сусындатып отырған жалғыз білім ордасы бар. Ол – №100 "Кеңтүп" орта мектебі. Бүгінде балалардың шамшырағын жағар орында жоғарыда айтып өткендей, округке қарасты шағын елдімекен оқушыларын қоса алғанда екі жүзге жуық бала білім алуда. Тіпті, балалардың қауіпсіздігін қамтамасыз етіп, алыстан ат терлетпесі үшін мұнда жетпіс орындық жатақхана да бар. Бір айыбы сол, мектеп ескіріп, тозығы жетейін деген. Бірақ, келелі болашақ – білімді жастың қолында екенін ұғып, бұған мойымаған ауыл тұрғындары мәселені қолға алған. Жақсылық жасап жарысқан жандарды өзгеге үлгі ету. Біздің Ақсуат ауылындағы сапарымздың мақсаты да осы. Бұл бастаманы ақсуаттық жастар көтеріп, жиналып ауыл ақсақалдарымен кеңескен. Осылайша, мектеп ауласын абаттандырып, кіреберісін қалпына келтірмек болып шешім қабылдап, жылу жинау басталды. Кейінгі буынның бастамасын ең алғашқы болып қолдаған жандардың бірі – ауылдың құрметті ақсақалы Бүркітбай Тілегенов. Ол бұны жастардың аузынан естігенде еш ойланбастан ауыл болашағы үшін жасалып жатқан іске үлесін қоспақ болып, қорасындағы тайын табыстаған. Ауылға жеткенімізде Бүркітбай ақсақалға жолығып, "Аға, ауылдағы әрбір асарда алғашқылардың бірі болып демеушілік жасайды екенсіз. Бұның сыры неде?" дегенімізде, "Балам, несібе-берекені Алла тағала мұқтаж жанға үлестіріп, жақсылық қылу үшін береді. Сол себепті маған берілген нығметпен бөлісуді міндетім деп санаймын", – деді ол. – Өзіміз осы ауылдың топырағына аунап өстік, өндік. Кейін оқу тәмамдап келген соң туған жерге қызмет еттік. Шүкір, Құдай берген жалғыз ұлым, келінім және үш немерем бар. Жалпы, ауылдың жағдайы жақсы. Тек осындағы жалғыз мектебіміздің жағдайы алаңдатады. Көптен ойлап жүр едім. Президентіміздің "Әрбір азамат өзінің туған жеріне үлес қосуы керек" деген сөзі бар. Міне, ел басшысының сөзін ойға түйіп, ауыл жастары бас көтеріп, мектептің жұмыстарын қолға алып, игі істі жүзеге асыруда. Бұл өте орынды ігилікті шара. Әрқашан жақсылықты қолдауға дайынмын. Басқа да, осы ауылдан түлеп ұшқан аптал азаматтардың басын біріктіріп, ауылды одан әрі көркейтуге шақырамын, – деді Бүркітбай Тілегенов. Бүркітбай ақсақалдың батасын алып шыққан соң, мектепке беттеп, бүгінгі жайын көріп қайттық. Ескі, еңкейіп кіріп, еңсеңді түсірер мектеп қақпасын жаңадан тұрғызған. Мектеп директоры Марат Кеулімжаевтың бастамасымен аулаға көшет отырғызуға орындар, арықтар қазылып, тегістелген. – Мектеп алдындағы баспалдаққа қыс бойы жауған қар еріп, мұзға айналып, мұғалім, оқушыларды тайғанақтатып, әбігерге салатын. Жастар жинаған қаржыға ең әуелі осы баспалдақ үстіне аркалы шатыр құрдық. Маңдайшасына мектеп атауын жаздырдық. Жалпы, аудандық білім бөлімі тарапынан тиісті жұмыстар жасалып, қаржылар бөлінуде. Бірақ, бөлінген қаржы тек ішкі жұмыстарға жетіп тұр. Сыртқы жұмыстарына кезек күттірмейік деп, ауыл жастары бастама жасады. Қолынан келгенше, қаражат жеткенше жұмыстарға кірісіп кетті. Бұдан бөлек, алдағы уақытта мүмкіндік болса, аулаға ойын алаңын да салсақ деген ойымыз бар. Қазір кіреберіс пен аулаға құм төселген. Есік алдына көлік қоюға орын жасалды. Барлығы бірден емес, бірақ жайлап, қалыпқа келуде. Ауылымздың саналы жастарына, оларды қолдап-қоштап жатқан барша тұрғындарына туған жерге деген ерекше махаббаттары үшін алғысым шексіз, – дейді Марат Кеулімжаев. Мұнан соң ауыл іргесіндегі шағын үйде тұратын Қойтамбай Нұрбаевқа бардық. Қойтамбай ағаның есімін қойшы болған әкесі атақты ел сыйлаған шопан болсын, өз жолын қусын деген мақсатта азан шақырып қойса да, өмір жолы мектеп қабырғасында балаларды біліммен сусындатып, ұстаздық етумен тоғысқан екен. Зиялы азамат та, мектеп ауласын қайта ретке келтіруге білек сыбана кірісіп, демеушілік жасағандардың қатарынан табылды. – Білім саласында қызмет етіп, тер төккеніме де қырық үш жылдың жүзі өтіпті. Бүгінде сол жылдардағы бейнеттің зейнетін де көріп отырмын. Қазір ізімнен ерген қарындасым, балам, келінім де осы жолды таңдаған. Жалпы, айтқанда мұғалімдер династиясымыз десек болады. Мұғалім болу – үлкен бақыт. Осындай керемет мамандыққа жарты ғұмырымды арнағаныма да еш өкінбеймін. Жас кезімізде мектеп ауласындағы гүлді суғару үшін еш ерінбей, Сырдариядан шелектеп су тасушы едік. Одан қалды спорт зал салатын болып, ауыл тұрғындарына асарлатқанда, ешқайсысы "жоқ" демей, мың саз кірпіштен басып, өз қолымызбен салғанымыз да бар. Қазір бізден кейінгі буынның да, осы салаға жанашырлықпен қарауы қатты қуантады. Жақында жағымды жаңалықты естігенде қолымыздан келгенше қаражат жинап бердік. Кемелді келешегіміз үшін ештеңе де аямаймыз. Түсіністік танытып, бір жағадан бас, бір жеңнен қол шығарып жатқан тұрғындарға басымды идім, – деді ардагер мұғалім Қойтамбай Нұрбаев. Бұдан кейін соңғы аялдамамыз ауыл ақсақалдар кеңесінің төрағасы Қуаныш Ырзахановтың үйі болды. Қуаныш ақсақал осы ауылдан түлеп ұшқан барша азаматтарға үндеу жасады. – Ардақтылар жиналған Ақсуат ауылынан Нәжмадин Мұсабаев сынды аудан басқарған, білікті де, білімді азаматтар шыққан. Ал, енді осы секілді мықты азаматтарды ауылды көркейтуге, өсіруге, басталған істі өндіруге шақырамын. Ол кісілер бұл үндеуімді естісе, шет қалмасына сенемін. Өйткені, олардың әрбірінің жүрегінде туған жерге деген махаббаттың шексіз екендігі бәрімізге белгілі. Ақусат ауылынан әлі де, осы секілді мықты азаматтардың топ жарып шығарына кәміл сенімдімін. Алла қаласа, бастаған ісімізді аяқсыз қалдырмай, сәтті тәмамдайық. Ақсуат ауылы №100 "Кеңтүп" орта мектеп ғимаратының сыртқы келбетін жаңалау, оқушылар қауіпсіздігін қамтамасыз ету барысында &nbsp;мектептің сыртқы кіре беріс қақпасын жаңа үлгіде жасауға, мектеп ауласын көркейту-көгалдандыру жұмыстарына белсенділік таныта отырып, қаржылай және материалдық көмек көрсетіп, демеушілік жасаған ауыл азаматтарына алғысымды білдіремін. Соның ішінде, Бауыржан Қожамжаров, Қоныс Досжанов, мектеп директоры Марат Кеулімжайға, Нұрлан Өксікбаев, Роман Есіркеев пен ауылдың ардагер ұстаздары, түлектері және мектептің қызметкерлері мырзашылық танытып, қаржылай көмектерін беріп жатқан барша жанашыр жандарға рахмет! – деді Қуаныш Ырзаханов. Қазақ халқында «Қайырымдылық жасасаң, қайырын өзің көресің» деген тағылымды тіркес бар. Айналаңа жүрек жылуын ұсыну, аялы алақанын тосып, қамқоршысы болу – сауапты істердің бірі, әрбір адамның азаматтық парызы. Әрбір жасалған істе ізгілік бар. Соны түсініп, ауызбіршілігі артқан Ақсуат ауылындағы ағайын көздегеніне жетеді деген сенім мол. &nbsp;

Қазақстан және Қызылорда облысының жаңалықтары