<a href="https://kyzylorda-news.kz/">Kyzylorda-news.kz</a> Қазақстандық ата-аналар мектеп формасын алып тастау туралы петицияға қол жинап жатыр. Бұл туралы <a href="https://stan.kz/kazakstandik-ata-analar-mektep-formasin-alip-tastau-tur-421979/">Stan.kz </a>ақпарат агенттігі КТК телеарнасына сілтеме жасап хабарлайды.Ата-аналар міндетті мектеп формасын алып тастау туралы петицияға қол жинауды бастады.Кейбір ата-аналар мектеп формасының бағасы қымбат болғандықтан, оны міндетті етпеу керек деп санайды. Ата-аналар баланың үлгерімі оның үстіндегі киіміне байланысты емес екеніне сенімді. Сондықтан оқушыға өз қалауындағы киіммен баруға еркіндік беру қажет деп қол жинау&nbsp;басталған.&nbsp;Әзірге петиция 156 ғана қол жинапты.Сатушылардың айтуынша, жыл сайын мектеп формасының құны шамамен 10-15% қымбаттайды.Қазір бірқатар жекеменшік мектептер өздерінің арнайы формасын енгізсе, мемлекеттік білім ордаларында ғана бірыңғай үлгі сақталып отыр. Алайда саудагерлердің айтуынша, бұл жағдай сатылымға айтарлықтай әсер етпеген. Өйткені форма міндетті болғандықтан, ата-аналар бәрібір сатып алуға мәжбүр.<blockquote>“Сұраныс азайды деп айта алмаймын. Тек сауда арналары өзгерді. Қазір көп&nbsp;маркетплейстер, ыңғайлырақ сату жолдары пайда болды. Бұл офлайн бизнесті біраз әлсіретті. Бірақ жалпы нарық&nbsp;кішірейіп жатыр деп айтпас едім. Ал менің ойымша, стандартты форма сақталуы керек, яғни, ақ көйлек пен төменгі бөлігінде қара түс”, –&nbsp;дейді кәсіпкер Юрий Ким.</blockquote>Жауапты министрлік те әрбір оқушы міндетті мектеп формасын киюге&nbsp;тиіс деп санайды. Біркелкі киім үлгісі оқу орнында тәртіп пен іскерлік атмосфераны қалыптастырып, балалардың назарын білім алуға аударады дейді жауаптылар.<blockquote>“Қазақстанның қолданыстағы заңнамасында міндетті мектеп формасына қатысты барлық қажет құқықтық негіздер бекітілген. Әрбір мектеп сол талаптың аясында жұмыс істеуге тиіс. Оқушылардың мектеп формасы классикалық үлгіде және бірыңғай түстік гаммада сақталуы керек. Барлық оқушының біркелкі іскерлік, оқу атмосферасын қалыптастыруға көмектеседі. Оқушылар бір-бірінің сәні мен сыртқы келбетіне емес, тек білім алуға көңіл бөле алады. Сонымен қатар мектеп формасы оқушылар арасындағы теңдікті нығайтады. Бұл буллинг пен балалардың бір-бірін күлкі ету жағдайын азайтады”, –&nbsp;дейді оқу-ағарту министрлігінің ресми өкілі&nbsp;Мереке Амангелдіқызы.</blockquote>Дегенмен петицияға қажет&nbsp;қол жиналса, жауапты органдар оны қарауға міндетті. Әзірге ата-аналардың&nbsp;қымбат болса да, биылғы оқу жылына қамданудан басқа амалы жоқ.

Қазақстандық ата-аналар мектеп формасын алып тастау туралы петиция жариялады

<a href="https://kyzylorda-news.kz/">Kyzylorda-news.kz</a> Қызылорда облысы бойынша ҚАЖ департаментінің 37 мекемесінде мекеме бастығы әділет подполковнигі Абай Битаевтың төрағалығымен жеке құраммен жиын өтті.Жиын барысында мекеме бастығы қызметкерлерге заңдылықты қатаң сақтау, кез келген заң бұзушылыққа жол бермеу, арнайы контингентпен тек заң аясында және белгіленген тәртіпке сай жұмыс істеу қажеттігін ерекше атап өтті. Ол қызметтік тәртіпті сақтау – әрбір қызметкердің басты міндеті екенін және бұл талап мекемеде тұрақты бақылауда болатынын жеткізді.Сонымен қатар, жиында сыбайлас жемқорлықтың алдын алу мәселесі де қозғалды. Мекеме бастығы жеке құрам арасында сыбайлас жемқорлыққа мүлдем төзбеушілік қағидатын қалыптастырудың маңыздылығын түсіндіріп, бұл бағытта әр қызметкер осы жауапкершілікті сезінуі тиіс екенін айтты.

Жеке құрам арасында заңдылық пен тәртіп қатаң бақылауда

<a href="https://kyzylorda-news.kz/">Kyzylorda-news.kz</a> Қызылорда қаласында балалар спортын және шығармашылығын қолдауға арналған «Даму бала» платформасы арқылы қызмет көрсететін кәсіпкерлерден 88 млн теңгеден астам қаражатты жымқыру фактісі бойынша сот үкімі шығарылды, деп хабарлайды Қаржылық мониторинг агенттігі.Агенттіктің Қызылорда облысы бойынша департаменті жүргізген тергеу барысында, мониторингтік топ құрамында болған қатысушылардың бірі өзінің қызмет бабын пайдаланып, сыбайласымен бірге кәсіпкерлерден тексеріс нәтижелерін «оң шешіп береміз» деген желеумен ақша бопсалағаны анықталды.<blockquote>- Нәтижесінде олар 88 млн теңгеден астам қаражат алған. Ақшаның бір бөлігіне коттедж және автокөлік сатып алынған. Соттың санкциясымен бұл мүлікке тыйым салынды, - делінген ақпаратта.</blockquote>Сот үкімімен басты айыпталушы кінәлі деп танылып, 6 жылға бас бостандығынан айыру және мүлкін тәркілеу жазасы тағайындалды. Оның сыбайласы 5 жылға шартты түрде бас бостандығынан айырылды.Үкім заңды күшіне енген жоқ.

Қызылордада «Даму бала» платформасы арқылы ақша жымқырғандар сотталды 

<a href="https://kyzylorda-news.kz/">Kyzylorda-news.kz</a> «Өнер орталығында» Құрылысшылар күніне арналған салтанатты шара өтті. Оған Парламент Сенаты мен Мәжілісінің депутаттары Наурызбай Байқадамов, Руслан Рүстемов, Мұрат Ергешбаев, облыстық құқық қорғау органдарының бірінші басшылары, зиялы қауым өкілдері, сала ардагерлері қатысты.Аймақ басшысы Нұрлыбек Нәлібаев жиналған қауымды кәсіби мерекемен құттықтап, құрылыс саласында атқарылған жұмыстарды атап өтті.<blockquote>– Президентіміз «Біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз! Адал әрі табанды еңбегімен табысқа жеткен адамдар қашанда құрметті, сыйлы болуы керек», - деген болатын. Бұл - &nbsp;экономикалық тұрақтылық пен әлеуметтік прогрестің басты факторы ретінде жұмысшы кәсіптерінің рөлін күшейтудегі стратегиялық қадам. "Жұмысшы мамандықтары жылына" орай жақында ғана Мемлекет басшымыздың Жарлығымен өңіріміздің бірқатар металлургтері, теміржолшылары мен құрылысшылары мемлекеттік наградаларға ие болды. Бұл еңбек адамдарына көрсетілген зор құрмет пен лайықты жоғары баға. «Алаштың анасы» атанған қасиетті Сыр өңірі Президентіміздің, Үкіметтің ерекше қолдауымен қарқынды дамуда. Облысымыздың бюджеті 823 млрд. теңгеден асып, 2022 жылдан бері 226 пайызға өсті. Бұл қаражат аймағымыздағы ең өзекті деген мәселелерді шешуге, тұрғындардың өмір сүру сапасын жақсартуға, ауқымды инфрақұрылымдық жобаларды іске асыруға бағытталуда. Биыл 96 жобаның құрылысына бюджеттен 166 млрд. 800 млн. теңге қаржы бөлініп, 2022 жылмен салыстырғанда 8 есеге артты. Нәтижесінде құрылыс жұмыстарының көрсеткіші бойынша республикада үздіктер қатарында келеміз. Құрылыс саласында қызмет ету – бұл жай ғана мамандық емес, елге қызмет ету. Құрылысы қарымды елдің экономикасы да қуатты. &nbsp;Туған жеріміз, Сыр өңірінің әлеуметтік-экономикалық жағдайының жақсаруына, сәулеттік келбетінің жаңаруына, заманауи ғимараттардың бой көтеруіне қосқан елеулі еңбектеріңіз үшін Сіздерге барша Сыр жұртшылығының, жеке Өзімнің атымнан шынайы алғысымды білдіремін, - деді Н.Нәлібаев.</blockquote><img src="https://knadmin.beoblood.kz/uploads/rylysshylar_k_ni_tty_tau_78bee9767a.jpg" alt="Құрылысшылар күні құттықтау.jpg">Мерекелік шарада құрылыс саласының үздіктері «Достық», «Құрмет», «Ерен еңбегі үшін», «Еңбек даңқы» орден-медальдарымен марапатталды.&nbsp;Сонымен қатар ҚР Өнеркәсіп және құрылыс министрінің «Құрметті құрылысшы» төсбелгісіне, «Құрмет грамотасына» және Қызылорда облысының «Құрмет грамотасына» ие болды. Мерекелік іс-шарада әнші Қайрат Баекенов, әнші-композитор Жарасхан Төлеубай ән шырқады.<img src="https://knadmin.beoblood.kz/uploads/rylysshylar_k_ni_tty_tau_3_f55cf061f6.jpg" alt="Құрылысшылар күні құттықтау 3.jpg">

Құрыш қолды құрылысшылар құрмет төрінде

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың қатысуымен Сырдария өзенінің сол жағалауындағы жаңа қала аумағында бой көтерген 5 қабатты тұрғын үй кезекте тұрған отбасыларға табысталды. Салтанатты шараға Парламент Сенаты мен Мәжілісінің депутаттары Наурызбай Байқадамов, Руслан Рүстемов, Мұрат Ергешбаев, зиялы қауым өкілдері мен ел ағалары қатысты.Аймақ басшысы өңірдің әлеуметтік-экономикалық дамуындағы жетістіктерге тоқталып, жаңа қоныс иелеріне құттықтауын жеткізді.<blockquote>«Биыл ұлтымыздың тарихи «Қазақ» атауының қайтарылғанының, Қызылорданың Қазақ елі астанасы болғанының 100 жылдығы кең көлемде аталып өтуде. Мерейлі жыл аясында аймағымызда сәулеті келіскен, әсем де замануи ғимараттар бой көтеріп келеді. Бұл - &nbsp;жыл сайын тамыздың екінші жексенбісінде кәсіби мерекелерін атап өтетін құрыш қолды құрылысшыларымыздың қажырлы еңбегінің нәтижесі. Бүгін жерлестеріміздің баспаналы болу қуанышына ортақтасып, пәтер кілтін табыстау рәсіміне жиналдық. Аймағымызда тұрғындардың тұрмыстық жағдайын жақсартуға бағытталған бірқатар маңызды ірі инфрақұрылымдық жобалар бар. Облыс бойынша 96 жобаның құрылысы жүруде. Жақында балалар мен жасөспірімдерге арналған «Сыр жұлдыздары» шығармашылық-инновациялық академиясы өз жұмысын бастады.&nbsp;Физика-математика бағытындағы «Білім-инновация» лицей-интернаты, Қазанғап атындағы Қызылорда музыкалық жоғары колледжінің жаңа ғимараттары ел игілігіне пайдалануға берілді. Облыстық тарихи-өлкетану музейі салтанатты түрде ашылды. Президентіміздің қолдауымен Қызылорда қаласында 11 мың орындық жаңа стадион, «Қазақстан халқына» қорының демеушілігімен құны 2 млрд. 900 млн. теңге болатын мүмкіндігі шектеулі жандарға арналған дене шынықтыру-сауықтыру кешенінің құрылысы қарқынды жүруде. Сыр жұртшылығы асыға күткен нысандар алдағы қыркүйек айында ашылады. Облыс орталығында &nbsp;көпбейінді «Қызылорда Арена» спорт кешені, Ассамблеяның 30 жылдығы аясында «Қазатомөнеркәсіп» ұлттық атом компаниясының» қолдауымен жаңадан «Достық үйі» бой көтеруде.&nbsp; «Таза Қазақстан» республикалық бағдарламасы аясында облыс орталығының озық сәулеттік үлгісін қалыптастырып, көпқабатты тұрғын үйлердің аулаларын, саябақтар мен мәдени-демалыс орындарды абаттандырудамыз. Орталық алаң қайта жаңғыртудан өтті. Қазіргі таңда шаһардағы Президент саябағында, Қорқыт Ата мемориалды аллеясында қызу жұмыс қарқын алған. &nbsp;Жаздың басында қайта жаңғыртудан өткен қалалық мәдени-демалыс паркі ашылды. Алдағы уақытта облыс орталығындағы 50-ге жуық парк, сквер, аллеяларды кезең-кезеңімен жаңғыртамыз.&nbsp; Баспаналы болу әрбір отбасыны жақсылыққа жетелейді. Жаңа баспаналарыңыздың іргетасы берік, қабырғасы мығым, ішіндегі әр отбасының шаңырағы татулық пен берекеге толы болғай!», - деді Н. Нәлібаев.</blockquote><img src="https://knadmin.beoblood.kz/uploads/Baspana_tabystau_5bad619d28.jpg" alt="Баспана табыстау.jpg">Рәсімде Наурызбай Байқадамов жаңа пәтер иелеріне құттықтауын жеткізіп, қоғам қайраткері Бақберген Досманбетов батасын берді. Сонымен қатар тұрғын үйді салған &nbsp;мамандар облыс әкімінің Алғыс хатымен марапатталды.Айта кетейік, соңғы үш жылда облысымызда қаржыландырудың барлық көздерінен 2 млн. 500 мың шаршы метр тұрғын үй пайдалануға берілді.&nbsp;Кезекте тұрған халықтың әлеуметтік осал топтарына, жалғыз баспанасы апатты деп танылған азаматтарға 5 мыңнан аса пәтер сатып алынып, 25 мыңға жуық тұрғын қоныс тойын тойлады.&nbsp;Барлық аудан орталықтарында жаңадан салынған 1500-ға жуық пәтер иелеріне табысталды. Биыл тұрғын үй құрылысы мен жеке салушылардан &nbsp;3 800 дайын пәтерді сатып алуға бюджеттен қаржы бөлінді.&nbsp;Қаржыландырудың барлық көздерінен 870 мың шаршы метр тұрғын үй беріледі. Қызылорда қаласының өзінде соңғы үш жылда тұрғын үй құрылысы мен пәтер сатып алуға 64 млрд. 97 млн. теңге қаралып, &nbsp;5 600 пәтер жерлестерімізге табысталған.&nbsp;Биыл жыл соңына дейін &nbsp;3 мыңға жуық пәтер беру көзделген.<img src="https://knadmin.beoblood.kz/uploads/Baspana_tabystau_2_0b881426a3.jpg" alt="Баспана табыстау 2.jpg">Фото: Қызылорда облысы әкімінің баспасөз қызметі

Қызылордада тұрғын үй кезегінде тұрған отбасыларға пәтер кілті табысталды

<a href="https://kyzylorda-news.kz/">Kyzylorda-news.kz</a> Президент Қасым-Жомарт Тоқаевтың төрағалығымен Қазақстан Республикасы Қауіпсіздік Кеңесінің отырысы өтті. Жиында нашақорлық күрделі әлеуметтік және құқықтық құбылыс ретінде қарастырылып, наркотизмге қарсы іс-қимыл мәселелері талқыланды.Кеңесте Ішкі істер министрі Ержан Сәденовтің, Ұлттық қауіпсіздік комитетінің төрағасы Ермек Сағымбаевтың, Денсаулық сақтау министрі Ақмарал Әлназарованың және Қаржылық мониторинг агенттігінің төрағасы Жанат Элимановтың баяндамалары тыңдалды.Мемлекет басшысының айтуынша, бұл әлеуметтік кеселдің белең алуына қатысты ахуал елімізде де, халықаралық ауқымда да алаңдатарлық жағдайға жетті.<blockquote>– Наркотизм – заманның дерті, қоғам үшін аса қауіпті. Ол жастардың болашағына балта шабады. Ұлт саулығына қатер төндіреді. Нашақорлық пен есірткі бизнесіндегі әлемдік үрдіс алаңдатарлық сипатқа ие болды. Көптеген елдің үкіметтері аталған проблеманы физикалық және психикалық тәуелділік қана емес, ауқымды қоғамдық, экономикалық және құқықтық құбылыс ретінде қарастыра бастады. Наркотизм термині мұндай тәсілдің мән-мағынасын ашады, – деді Қасым-Жомарт Тоқаев.</blockquote>Сарапшылар мен ғалымдар наркотизм ұғымының нашақорлықтан әлдеқайда кең екенін, әлеуметтік, экономикалық және құқықтық проблемалармен, соның ішінде ұлттық қауіпсіздік мәселесімен ұштасып жатқанын айтады.Президент есірткіге тәуелділер емдеу-сауықтыру шараларымен жеткілікті деңгейде қамтылмай отырғанына назар аударып, мәселені шешу қажет екенін мәлімдеді.<blockquote>– Есірткіге тәуелді жандардың көпшілігі мен олардың жақындары жариялылықтан және жұртшылықтың талқылауынан қауіптеніп, проблемасын жасырады, – деді Мемлекет басшысы.</blockquote>Бұл ретте мемлекеттік саясаттың нашақорларға кеңшілік танытып, ал есірткі саудасына келгенде қатаң және мүлде төзбеушілік ұстанымда болуға тиіс екені айтылды.Қасым-Жомарт Тоқаев аталған індетке қатысты статистикалық мәліметтерді жинау мен өңдеу бағытындағы ақпараттық-сараптамалық жұмысты жетілдіру, сондай-ақ химиялық заттардың таралуын қадағалау мәселелерін тағы бір маңызды міндет деп санайды.Президент нашақорлықтың алдын алу шараларын күшейтуді, әсіресе, білім беру мен ақпарат саласында кеңінен жұмыс жүргізуді тапсырды.Мемлекет басшысының пікірінше, жастар арасында есірткінің насихатталуына жол беруге болмайды. Бұл ретте ол интернетте және медиа индустрияда тыйым салынған заттар мен ішімдік ішуді дәріптейтін жағымсыз үрдіс белең алғанына тоқталды.Жиында есірткімен байланысты құқық бұзушылықты анықтау, жолын кесу мен жазалаудың тиімділігін арттыруға қатысты кешенді мәселелерге ерекше мән берілді.<blockquote>– Кез келген есірткі түрінің өндірісі мен сатылымына қатаң тыйым салынып, мемлекеттің жіті бақылауында болуы керек, – деді Президент.</blockquote>Қасым-Жомарт Тоқаев трансұлттық ұйымдасқан қылмысқа қарсы іс-қимылды, сондай-ақ есірткі сататын орындар мен зертханалардың иелерін әшкерелеу жұмыстарын күшейту қажеттігін айтты.Сонымен қатар Мемлекет басшысы күмәнді қаржы операцияларын бақылауға алудың маңызына тоқталды. Бұл түйткіл құқық қорғау органдарының назарынан тыс қалмауға тиіс.Президент наркотизмге қарсы күреске қоғам болып жұмылудың маңызды екенін атап өтті. Сондай-ақ Үкіметке, өңір әкімдеріне және жауапты мемлекеттік органдарға нашақорлықтан сақтандыру және есірткі бизнесіне қарсы күрес шараларын күшейту жөнінде бірқатар нақты тапсырма берді.&nbsp;Жиын қорытындысы бойынша Мемлекет басшысы Нашақорлыққа және есірткі қылмысына қарсы іс-қимыл мәселелері жөніндегі ведомствоаралық штабты Ішкі істер министрлігінің қарауынан алып, Қазақстан Республикасы Үкіметінің деңгейіне көтеруді тапсырды. Бұл нашақорлықпен және есірткі саудасымен күресті жандандыруға, сондай-ақ тиісті мемлекеттік органдар арасындағы жұмысты анағұрлым тиімді үйлестіруге мүмкіндік береді.

Мемлекет басшысы Қауіпсіздік Кеңесінің отырысын өткізді

<a href="https://kyzylorda-news.kz/">Kyzylorda-news.kz</a> «AMANAT» партиясының «Халықпен бірге!» деп аталатын сайлауалды бағдарламасында инфрақұрылымдық жүйелерді жақсарту мақсатында тіршілікті қамтамасыз ету инфрақұрылымын дамыту арқылы, оның ішінде: тұрғын үй, таза ауыз су, жылу, энергия және жолдарды жаңғыртуға ықпал етіп, азаматтардың жайлы және қауіпсіз өмір сүруін қамтамасыз ету басты назарда.Осы орайда бүгін партияның облыстық филиалының атқарушы хатшысы Ләйлә Төрешова және облыстық филиал жанындағы Партиялық бақылау комиссиясы мен Сыбайлас жемқорлыққа қарсы іс-қимыл жөніндегі аймақтық кеңестің мүшелері жылу желілері бойынша жөндеу жұмыстарына бақылау жүргізді.Аманаттықтар Қызылорда қаласындағы Желтоқсан және Есенов пен Бектұрғанов көшелерінде жасалып жатқан жұмыстарды зерделеп, мердігерлермен пікірлесті.Желтоқсан көшесінде Дм 273мм жер асты құбырларына монтаж жұмыстары жүргізілуде. Ал Есенов пен Бектұрғановта &nbsp;№23 жылжымайтын тірекке 4 бірлік темірбетонды эстакада іргетасы орнатылған. Дм 108мм жер асты құбырларына монтаж жұмыстары жасалуда.“Ктэц” МКК жылу желілері филиалының директоры Хасен Иманғалиевтың айтуынша жөндеу жұмыстарына ешқандай кедергі жоқ. Барлық шаруалар кезең-кезеңімен атқарылуда.Мониторинг барысында Атқарушы хатшы сапаға ерекше мән беру қажеттігін атап өтті.&nbsp;<blockquote>«Алдағы жылыту маусымына сапалы дайындықты қамтамасыз ету қажет. Жөндеу жұмыстарының мерзімінде аяқталуы мен техникалық талаптарға сай орындалуы – тұрғындардың жайлы тұрмысының кепілі.Бұл бағыттағы жұмыстар партияның тұрақты бақылауда болады.»,- деді Ләйлә Төрешова мердігерлерге.</blockquote>Қызылорда қаласының жылу желілерінің тозуын &nbsp;азайту мақсатында бюджет есебінен жоба құны 7 403,9 млн.теңгеге 6 жоба бойынша жалпы ұзындығы 8,7 км құрайтын жылу желілерін қайта жаңғырту жұмыстары жүргізілетін болады, қәзіргі таңда мердігер мекемелер анықталды. Сонымен қатар Кәсіпорын қаражаты есебінен жалпы ұзындығы 3,9 км диаметрі 57-325 мм құрайтын &nbsp;кварталаралық жылу желілерін ағымдағы жөндеу жұмыстары 30,8 млн теңгеге жоспарлануда. Нәтижесінде жылу желілерінің тозу деңгейі 42,3 пайыздан 39,7 пайызға төмендейді.<img src="https://knadmin.beoblood.kz/uploads/Amanat_zhylu_zhelileri_5521339bd2.jpg" alt="Аманат жылу желілері.jpg">

«AMANAT»: Жылу желілері бойынша жөндеу жұмыстары партия назарында

Қазақстан Республикасының Конституциясы, ұлтаралық келісімді бұзуға әкеп соғуы мүмкін кез келген әрекетке тыйым салады.Ұлтаралық араздық – қоғамдық тұрақтылық пен бірлікке төнетін ең қатерлі қауіптердің бірі болып табылады.Мұндай әрекеттердің салдары – жаппай тәртіпсіздіктерге, әлеуметтік құрылымның бұзылуына, сондай-ақ этностар мен мәдени топтар арасындағы терең қайшылықтарға алып келуі мүмкін.Аталған құқықбұзушылықтардың жасалу алаңы ретінде «Instagram», «TikTok», «Threads» сияқты әлеуметтік желілер танылып отыр. Бұл платформаларда әрбір қолданушыға пікір білдіру бостандығы берілген.Алайда, ұлтаралық араздықты қоздыратын пікірлер Қазақстан Республикасының Қылмыстық кодексінің 174-бабына сәйкес қылмыстық жауапкершілікке әкеп соғады. Атап айтқанда, бұл бап бойынша 2 жылдан 7 жылға дейін бас бостандығынан айыру, ал ауыр зардаптарға әкелген жағдайда – 12 жылдан 20 жылға дейін бас бостандығынан айыру жазасы қарастырылған. Аталған әрекеттер экстремистік қылмыстар санатына жатады.Мұндай құқықбұзушылықтар үшін кінәлі тұлғалар белсенді өкініш білдіруіне, жәбірленуші тараппен татуласуына, қылмыстық әрекеттің ескіру мерзімінің өтуіне немесе рақымшылық актісіне байланысты қылмыстық жауапкершіліктен және жазадан босатылмайды.Тәжірибе көрсеткендей, құқық қорғау органдары тарапынан тұлғасы анықталғаннан кейін, кінәлі азаматтар өз іс-әрекетіне өкініп, көпшілік алдында кешірім сұрайды. Алайда бұл олардың жауапкершілігін жоюға негіз болып табылмайды.Осыған байланысты барлық азаматтарды заң талаптарын сақтауға, әрбір хабарламаға және айтылған сөздерге жауапкершілікпен қарауға шақырамыз.Қоғамдағы бейбітшілік, тұрақтылық пен сенімді тек ортақ құқықтық мәдениет пен өзара құрмет арқылы ғана сақтап қалуға болады.

Қарағанды облысының прокуратурасы әлеуметтік желілерде ұлтаралық сипаттағы жанжалдардың жиілеп кеткенін ескертеді

<a href="https://kyzylorda-news.kz/">Kyzylorda-news.kz</a> “AMANAT” партиясы Шиелі аудандық филиалына қарасты “Арман” мәдениет үйі, “ Атамекен, “Көкшоқы” бастауыш партия ұйымдарының ұйымдастыруымен Абай Құнанбайұлының 180 жылдығына орай «Дана сөздің дарасы-Абай» атты аудан жастары арасында жыр кеші өтті.&nbsp;Кешті белгілі жырау, әнші Мұхамедәлі Бекпейісов жүргізіп, ауданның өнерпаздары Нұртілек Ақтаев, Нұрберген Оспанов, Ізбасқан Дәулетхан және жас шәкірттері Абай Құнанбайұлының әндерін нақышына келтіріп орындап, Нартай әндерін айтып көрермендердің ыстық ықыласына бөленді.Іс-шарада аудандық мәслихаттағы “AMANAT” партиясы фракциясының депутаты, “Атамекен” бастауыш партия ұйымының төрағасы Нұргүл Шалекеева ұлы ақынның заңғар тұлғасы жайында айтып өтті.Абай Құнанбайұлының сарқылмас мұрасы мен ұрпақ тәлімін, ұлт мұратын, мемлекет дамуын үйлестіруші рухани күшке айналып, бүгін де, ертең де, болашақта да ел өркендеуіне жаңаша мазмұн берері, жаңарған қоғамдық сананың өрелі істеріне темірқазық болары сөзсіз. Абайдың даналығы ғасырлар қойнауынан жеткен бабалар үні – бұлар біздің рухани мәдениетіміздің бір парасы ғана. Ол өткен заманның, кешегі түркі дүниесінің соққан тынысы болса да бізге түсінікті, жүрегімізге қонымды Абай – лебі, Абай – үні, ана тынысы – заман тынысы, халық үні. Абайдың жарқын бейнесі, жалынды жыры бізбен бірге мәңгі жасап келеді.<img src="https://knadmin.beoblood.kz/uploads/Abaj_zholy_zhastar_keshi_8d1d0088c0.jpg" alt="Абай жолы жастар кеші.jpg">

Жастар арасында жыр кеші өтті

<a href="https://kyzylorda-news.kz/">Kyzylorda-news.kz</a> Арал ауданының әкімі Аманжол Оңғарбаев құрылысшылар күні мерекесі қарсаңында ауданда құрылыс аласына еңбегі сіңген бір топ сала ардагерлері мен құрылысшыларды қабылдап мерекесімен құттықтады.Алдымен құрылысшы мамандығының және оның қоғамдағы маңызы мен өзектілігіне тоқталған аудан басшысы құрылыс саласы бойынша аудан көлемінде атқарылып жатқан бірқатар жұмыстар жайын сөз сабақтады.<blockquote>– Құрметті құрылыс саласының қызметкерлері және ардагерлері! Сіздерді кәсіби мерекелеріңіз – Құрылысшылар күнімен құттықтаймын. Озық елдер көшіне ілесіп, қалалар келбетін айшықты етуде құрылыс саласының маңызы ерекше. Бұл салаға тән кәсіби мереке өткен ғасырдың орта шенінен бастап атап өтіліп келеді. Еліміздегі құрылыс саласы – Отандық экономиканың басты қозғалтқыш күшіне айналды. Бүгінде Сіздердің мамандықтарыңыз ең қажетті, ең ықпалды әрі үлкен мамандықтар қатарында. Салыстырмалы түрде алатын болсақ осы Аралдың өзі қайнаған құрылыс алаңына айналып тұр. Жер жерде салынып жатқан ғимараттар мен жүргізіліп жатқан әлеуметтік инфрақұрылымдардың барлығында құрылысшылар еңбек етуде. Баршаңызды бүгінгі кәсіби мерекелеріңізбен құттықтай отырып, Сіздерге зор денсаулық, отбасыларыңызға амандық, бақ-береке тілеймін, – деді аудан әкімі.</blockquote>Жиын барысында саналы ғұмырын құрылыс саласына арнаған алдыңғы аға буын мен аудандағы құрылыс саласының дамуына ерекше үлес қосып жүрген бір топ құрылысшылар аудан әкімінің Алғысымен марапатталды.Аудан әкімінің құрылысшыларға көрсеткен құрметін жоғары бағалаған сала ардагерлері мерекеге орай өздерінің ыстық ықластарын арнап, ізгі тілегін жеткізді.

Құрылыс саласына еңбек сіңірген жандарды құттықтады

<a href="https://kyzylorda-news.kz/">Kyzylorda-news.kz</a> Қайтарымын күтпей қайырымдылық жасау – ізгі іс. ҚАЖ департаментіне қарасты №68 мекемесі жомарттық жолынан жаңылмай, “Мектепке жол” республикалық қайырымдылық акциясына белсене қатысты.Баланың жүзі балбұл жайнап, білімнің қара шаңырағына қапаланбай барғаны құба-құп. Сондықтан, жыл сайын дәстүрлі үрдіске айналған акцияның маңызы зор. Яғни, аз қамтылған, көпбалалы немесе қиын жағдайдағы отбасының балаларын жаңа оқу жылына дайындауда қолдаумен қуаттап келеді . Бұл ретте, мекеменің жеке құраммен жұмыс жөніндегі аға инспекторы Динара Шахи бір отбасының екі баласына сөмке мен оқу құралдарын табыстады.&nbsp;<blockquote>– Биыл ұлым 2 сыныпқа, ал қызым 1 сыныпқа барады. Олардың қалауын орындап, қамдану керегі белгілі ғой. Мектепке дайындықтың қалтаға салмақ салатыны жасырын емес. Сол себепті, қажетті оқу құралдарымен қамтамасыз еткен мекеме ұжымына алғыс айтамын. Балаларым қуанып, көңілі көтеріліп қалды, - дейді жалғызбасты ана.&nbsp;</blockquote>Баланың қуанышынан артық бақыт жоқ. Кедергісіз білім алу – кемел келешегінің кірпішін қалауға негіз болмақ.

ҚАЖД қызметкерлері “Мектепке жол” қайырымдылық акциясына атсалысты

<a href="https://kyzylorda-news.kz/">Kyzylorda-news.kz</a> Партиялық бақылау комиссиясының мүшелері Қызылорда қаласының Арай шағын ауданындағы 1500 орындық «Жайлы мектеп» құрылысының жұмысымен танысты.Аталмыш мектеп «AMANAT» партиясының Сайлауалды бағдарламасы аясында салынуда. Нысанның бүгінгі жай-күйімен «АбуСер» ЖШС мердігер мекемесінің өкілдері таныстырып, жұмыстың уақтылы жүргізіліп жатқанын жеткізді.Құрылыс жұмыстарынан сыртқы беттері сендвич панельмен қапталып, шатыры жабылған. Ішкі инженерлік жүйе жұмыстары толықтай жүргізіліп, &nbsp;қабырғаларының әрлеу жұмыстарымен сыртқы электр жүйелері толығымен монтаждалған.Қазіргі таңға спорт залдың құрылысы 90% орындалған. 2-3 қабатындағы пәндік кабинеттер арнайы оқу жабдықтарымен қамтылған.Партиялық бақылау комиссиясының төрағасы Мейрамбек Есжанов мердігер мекеме өкілдерінен құрылыс жұмыстарының уақытылы әрі сапалы бітуін талап етті.<img src="https://knadmin.beoblood.kz/uploads/Amanat_fe5adda1fd.jpeg" alt="Аманат.jpeg">

Қазақстан және Қызылорда облысының жаңалықтары