<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінде ұлағатты ұстаз, тарихшы ғалым, тарих ғылымдарының кандидаты, профессор Меруерт Нағыметқызы Аңсатованы еске алуға «Отан тарихының іргелі мәселелері: алаштану, тұлғатану және тарихнамалық зерттеулер» тақырыбында республикалық семинар өтті.&nbsp; &nbsp;Жиынға зиялы қауым өкілдері, профессор-оқытушылар құрамы, ұстаздың шәкірттері, әріптестері мен туған-туыстары қатысты.Конференцияда Ғылыми жұмыстар және халықаралық байланыстар жөніндегі проректор Майнура Бурибаева Меруерт Нағыметқызының ғылымдағы жолы мен қоғамға сіңірген еңбектеріне тоқталды.Меруерт Аңсатова – саналы ғұмырын білім мен ғылымға арнап, бірнеше буын тарихшы мамандарын даярлаған ұлағатты ұстаз. Ұстаздық қызметімен қатар, ғылыми-зерттеу жұмыстарын да қатар алып жүрген ол отандық тарих ғылымының дамуына елеулі үлес қосты. Ғалымның халықаралық және республикалық басылымдарда 120-дан астам ғылыми мақаласы, 20-ға жуық ғылыми-әдістемелік құралы жарық көрген. Облыс тарихшыларымен бірлесіп «Сыр өңірі тарихы» ұжымдық еңбегін дайындауға атсалысқан.Ұстаздың еңбегі елеусіз қалған жоқ. Ол «Қазақстан Республикасының білім беру ісінің үздігі», Ыбырай Алтынсарин төсбелгісінің иегері, Қазақстан Республикасы Президентінің және министрлік деңгейіндегі бірнеше Құрмет грамоталары мен Алғыс хаттарымен марапатталған. 2019 жылы Қазақстан Республикасы жоғары оқу орындары қауымдастығының шешімімен «Жоғары және жоғары оқу орнынан кейінгі білім саласының үздік педагогы» атағын иеленді. Сонымен қатар, Қазақстан педагогикалық ғылымдар академиясының корреспондент мүшесі және облыс әкімінің 2012 жылғы стипендианты, «Қорқыт ата атындағы Алтын медаль» иегері.Семинарда Қорқыт ата атындағы Қызылорда университеттің «Тарих және археология» білім беру бағдарламасының аға оқытушысы, тарих ғылымдарының кандидаты Айтжан Оразбақов, Сәкен Сейфуллин атындағы Қазақ агротехникалық зерттеу университетінің Қазақстан тарихы кафедрасының қауымдастырылған профессоры, тарих ғылымдарының кандидаты Ляззат Джумалиева, әл-Фараби атындағы Қазақ ұлттық университетінің «Археология, этнология және музеология» кафедрасының қауымдастырылған профессоры Гүлжан Мейрманова, педагогика ғылымдарының магистрі, Қызылорда облыстық тарихи-өлкетану музейінің бөлім меңгерушісі Айгерім Беккулиева, Анкара Хажы Байрам Вели университетінің профессоры, тарих ғылымдарынын докторы Гүлжанат Құрманғалиева, Қорқыт ата атындағы Қызылорда университетінің су шаруашылығы және жерге орналастыру білім беру бағдарламасының профессоры, техника ғылымдарының докторы Серікбай Қошқаров, университет ардагері тарих ғылымдарының кандидаты, профессор Минсара Караманова, «Қазақ тілі мен әдебиеті және журналистика» білім беру бағдарламасының оқытушысы, доцент, филология ғылымдарының кандидаты Алдажар Әбілов және профессордың сіңілісі Фарида Ансатова, Гуманитарлық-педагогикалық институтының директоры, тарих ғылымдарының кандидаты, доцент Сағат Тайман ғалымның өмірі мен ғылыми мұрасы жайлы кеңінен баяндады.Конференция – ұлағатты ұстаздың жарқын бейнесін ұлықтап, оның ғылым мен қоғамдағы ізі мен өнегелі жолын кейінгі ұрпаққа үлгі етуге арналған тағылымды басқосу болды.

 Ұлағатты ұстаз Меруерт Аңсатованы еске алуға арналған республикалық конференция өтті

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде “Электр энергетикасы, техносфералық қауіпсіздік негіздері және экология” білім беру бағдарламасының ұйымдастыруымен 5 маусым – Дүниежүзілік қоршаған ортаны қорғау күніне орай семинар өтті.Іс-шараның мақсаты – экологиялық мәдениетті қалыптастыру, қоршаған ортаны қорғаудың маңыздылығын түсіндіру және болашақ мамандардың экологиялық сауаттылығын арттыру болды.Семинарға Қызылорда облысы бойынша экология департаментінің мемлекеттік экологиялық бақылау бөлімінің бас маманы Қуаныш Бурибай, Санитарлық-гигиеналық зертхана меңгерушісі Айнұр Шойбекова, Инженерлі-технологиялық институтының директоры Бақытбек Абжалелов, сонымен қатар “Электр энергетикасы, техносфералық қауіпсіздік және экология” білім беру бағдарламасының профессор-оқытушылары мен студенттері қатысты.Жиын барысында сала мамандары қазіргі экологиялық жағдайға, табиғи ресурстарды ұтымды пайдалану жолдарына, өндірістік мекемелердің экологиялық жауапкершілігіне және жас ұрпақтың табиғатты аялаудағы рөліне тоқталды.Семинарда студенттер өздерін қызықтырған сұрақтарға сала мамандарынан нақты жауап алды. Сондай-ақ, кездесуде экологиялық мәселелерді шешуде жастардың белсенділігін арттыру қажеттілігі айтылды.Іс-шара соңында ғылыми-зерттеу жұмыстарында үздік нәтиже көрсеткен студенттерге алғыс хат табысталды.

Дүниежүзілік қоршаған ортаны қорғау күніне орай семинар өтті

<a href="https://kyzylorda-news.kz/">Kyzylorda-news.kz</a>&nbsp; «26 маусым – Халықаралық нашақорлыққа қарсы күрес күніне» орай айлық аясында, Қызылорда облысының Полиция департаменті Есірткі қылмысына қарсы іс-қимыл басқармасының ұйымдастыруымен есірткіге қарсы төсбелгі дизайны байқауы ұйымдастырылды.Байқаудың басты мақсаты – кез келген адам, өзінің кеудесіне, есірткіге қарсы төсбелгіні мақтанышпен тағып, азаматтық ұстанымдарын көрсете алу болып табылады.Көптеген идеялар болды! Әр автор ұсынған дизайнын таңдау керектігіне дәлелдер келтірді. Байқау комиссиясы ұзақ уақыт талқылап, Қызылорда қаласындағы №176 орта мектептің оқушысы – Әуезхан Іңкәр, Қазалы ауданындағы №16 мектеп-лицейінің оқушысы – Бақытжан Нұрай, Қармақшы ауданындағы №113 орта мектептің оқушысы – Телқараева Нұрдананың ұсынып отырған жобалары есірткіге қарсы азаматтық позицияны анық көрсетеді деп шешіп, жеңімпаздар деп жариялады.

Қызылорда жастары есірткіге қарсы төсбелгі дизайнын жасау байқауына қатысты

&nbsp;<a href="https://kyzylorda-news.kz/">Kyzylorda-news.kz</a> Бүгінгі күні Сырдария өзенінің бойындағы су шаруашылық жағдайы күрделі бақылауда. Шардара су қоймасындағы су көлемі 3510,0 млн текше метр-ді құрап отыр. Бұл өткен жылмен салыстырғанда айтарлықтай төмен – 2024 жылы мұнда 4943 млн текше метр су болған. Қоймадан төменге секундына 300 текше метр су жіберілуде. Бұл туралы Арал-Сырдария бассейндік инспекциясының басшысы Зейнолла Қазтоғанов мәлімдеді.<blockquote>– Көксарай су реттегішінде де жағдай ұқсас: биыл су көлемі 165,89 млн текше метр болса, былтырғы көрсеткіш 461,76 млн текше метр болған. Төменге тасталып жатқан су мөлшері 200 текше метр/сек, бұл да былтырғы 300 текше метр/сек деңгейінен азайған.Шардара мен Көксарайдан Сырдария өзенінің төменгі ағысына жалпы 500 текше метр/сек су жіберілуде. Қызылорда су торабынан төменгі ағысқа 85 текше метр/сек су жіберілуде. Су торабына дейінгі каналдар арқылы 390,64 текше метр/сек су алынуда. Өзеннің төменгі бөлігінде де су мөлшері азаюда. Бүгінгі күні Қызылорда облысының көлемі 34,5 млн текше метр су жинақтай алатын 6 су қоймаларында 22,33 млн текше метр су жинақталған. Шардара су қоймасымен Көксарай су реттегішінің жұмыс кестесі бақылауға алынып, жергілікті атқарушы органдар және су шаруашылығы ұйымдарымен Сырдария өзеніндегі су шаруашылық жағдайына күнделікті мониторинг жұмыстары жүргізілуде, – деді Зейнолла Молдағалиұлы.</blockquote>Фото: Өңірлік коммуникациялар қызметі

Сырдария бойындағы су деңгейі төмендеді: Шардара мен Көксарайдағы көрсеткіш күрт азайған

<a href="https://kyzylorda-news.kz/">Kyzylorda-news.kz</a> Ғылым және жоғары білім министрі Саясат Нұрбек Назарбаев зияткерлік мектебі оқушысының мектептен шығарылуына байланысты даулы оқиғаға пікір білдірді. &nbsp;Бұл туралы kaz.inform.kz хабарлады.<blockquote>– Мәселе күрделі. Академиялық адалдық мәдениетін қалыптастыру қажет. Көшіру – өзіңе-өзің зиян тигізу, дипломдық жұмысты көшіру – өзіңе кесел. Бұл студент немесе мектеп оқушысының өзі алмаған білім. Қазір Назарбаев зияткерлік мектебінен оқушының шығарылуына қатысты даулы оқиға өрбіп жатыр және де бұл дұрыс шешім. Өйткені, мықты академиялық адалдықсыз сапалы білім қалыптастыру мүмкін емес. Барлық ең мықты білім жүйесі – канадалық, солтүстікамерикалық, жапондық жүйе академиялық адалдық қағидаты негізінде қалыптасқан. Егер плагиат қабылданбаса және антиплагиат мәдениеті өте қатаң түрде қалыптасса, онда сапа да болады. Сондықтан мұны дұрыс болды деп есептеймін. Мұндай кез келген жағдайда академиялық адалдық қағидатынан таймау қажет, – деді министр елордада өтіп жатқан Астана халықаралық форумы аясында.</blockquote>Фото: primeminister.kz

Саясат Нұрбек NIS оқушысының мектептен шығарылуы жайында: дұрыс шешім   

<a href="https://kyzylorda-news.kz/">Kyzylorda-news.kz</a> Танымал блогер Мөлдір Анарбаева қызметкерлеріне 100 пәтер табыстаған Тұрсын Алагөзовті мақтады. Бұл туралы Stan.kz ақпарат агенттігі хабарлайды. Блогер байлығын бөлісе алатын байлардың көбейгенін тіледі.<blockquote>"Тұрсын Алагөзовтың бір-ақ күнде 100 пәтерді бұрқ еткізгені нағыз жаңалық болды. Жігітке тән қасиет, жасай берсін, Жұмағұл! Дақпыртып, елдің бәрін жинап алып, "Ойбай мен пәтер беремін" демей-ақ, жайлап барып, шақырып алып, "мәңдер" деп бере салды. Міне нағыз жігіт! Құдай-ау, жүз бірдей адамның жыртығы жамалды ғой?! Бөлісе алатын байлар көбейсін!”, – деді блогер.</blockquote>Одан кейін қажылыққа жолдама беріп, кейін алдап кететін кәсіпкерлерді де сынады.<blockquote>“Меккеге жолдама беріп жатады ғой, алдайды-сулайды, артынан жылатады. Соны он орап алады ғой. Сол жаққа барып келгенде не табасың? Үй-күйі жоқ қаншама адам бар. Нағыз сауаптың қайда екенін мына кісі біледі. Адамның ең кереметі ұлтына, тіліне, дініне қарап бөлмей, адам ретінде қарап, құрмет көрсетуі — адамның ең кереметі. Ол қараған жоқ, по жуғыш па, неше жылдан бері водитель ме? Оның ұлты орыс па, қазақ па? Діні қандай? Тілі қандай? Ол тек қана жақсылық жасады, жарайсың!", – деді блогер.</blockquote>Фото:&nbsp;https://www.instagram.com/moldir_anarbaeva/

"Меккеге жолдама бергенше, үй бер": Белгілі блогер кәсіпкер Тұрсын Алагөзовті көпке үлгі етті

<a href="https://kyzylorda-news.kz/">Kyzylorda-news.kz</a>&nbsp; Бүгін «Aray City Mall» сауда-ойын-сауық орталығында «1 маусым – Халықаралық балаларды қорғау күніне» орай іс-шара өткізілді. «Балалардың қауіпсіздігі – басты назарда!» атты ашық есік күнін Қызылорда облысының Төтенше жағдайлар департаментінің қызметкерлері ұйымдастырды.&nbsp; Ашық есік күнінің аясында аталмыш орталықта құтқару киімдерінің, &nbsp;құрал-жабдықтарының, &nbsp;құтқару техникаларының көрмесі өтті. Балалар құтқару құралдарының қандай мақсатта пайдаланылатындығымен танысты. Әсіресе алғашқы медициналық құралдар, өрт сөндіру, құтқару, кинологиялық қызмет жөнінде өздерінің сұрақтарына жауап алды. Сонымен бірге көрмеде «Айзере» орталығының тәрбиеленушілері өз туындыларын ұсынып, түрлі жанрдағы суреттер арқылы қауіпсіздік тақырыбын бейнеледі. Балалардың шығармашылық жұмыстары олардың қауіпсіздік туралы түсінігін арттыруға және төтенше жағдайлардан қорғану дағдыларын дамытуға бағытталды.&nbsp; Іс-шара барысында балаларға арналған көңілді бағдарламалар ұйымдастырылып, тәттілер мен балмұздақтар таратылды.&nbsp; Сонымен қатар, қауіпсіздік тақырыбындағы қысқаметражды мультфильмдер көрсетіліп, балалардың қауіпсіздік туралы білімін тереңдетуге септігін тигізді. &nbsp;Қызылорда облысының Төтенше жағдайлар департаменті балалардың қауіпсіздігін қамтамасыз ету бағытында осындай іс-шараларды тұрақты түрде ұйымдастырып, өскелең ұрпақтың қауіпсіздік мәдениетін қалыптастыруға ерекше мән беруде.&nbsp; Аталмыш іс-шараға республикалық және жергілікті БАҚ өкілдері де қатысып, арнайы телесюжет, репортаж, мақала, заметка дайындады.Фото: Қызылорда облысының ТЖД

«Балалардың қауіпсіздігі – басты назарда!» атты ашық есік күні өтті

<a href="https://kyzylorda-news.kz/">Kyzylorda-news.kz</a> 1 маусым – Балаларды қорғау күні мерекесі қарсаңында “Атамекен” отбасы үлгісіндегі балалар ауылында ҚАЖД-нің №60 мекемесінің ұйытқы болуымен және Қызылорда облысының өңірлік коммуникациялар қызметімен бірлесіп тағылымы мол шара өтті.&nbsp;Іс-шара барысында ұйымдастырушылар балаларға қуаныш сыйлайтын түрлі сыйлықтар табыстап, мерекелік көңіл-күй қалыптастарды. Өз кезегінде балалар да өз өнерлерін ортаға салды. Балалар әуелетіп ән салып, би десе би билеп мерекені шын көңілмен қарсы алды.Бұл күн әр баланың жүрегіне жылу ұялататын күн. Ұйымдастырушылардың бастамасы балалардың жүзіне күлкі, жүрегіне сенім ұялатты.<img src="https://knadmin.beoblood.kz/uploads/Atameken_balalar_auyly_7245bfc65b.jpeg" alt="Атамекен балалар ауылы.jpeg">

Балалар күніне орай тағылымды іс-шара өтті

<a href="https://kyzylorda-news.kz/">Kyzylorda-news.kz</a> &nbsp;Ақорда резиденциясында елімізге ресми сапармен келген Руанда Республикасының Президенті Поль Кагамені салтанатты қарсы алу рәсімі өтті. Мемлекеттер басшылары бір-біріне ресми делегация мүшелерін таныстырды. Құрмет қарауылының бастығы рапорт берген соң Қазақстан мен Руанданың әнұрандары шырқалды. Салтанатты рәсімнен кейін президенттер келіссөз өткізді.Қасым-Жомарт Тоқаев Поль Кагамеге ілтипат білдіріп, бұл сапардың тарихи мәні зор деп бағалады. Сондай-ақ Қазақстан мен Руанда арасындағы қарым-қатынас жаңа деңгейге шығатынын жеткізді.<blockquote>– Сіздің бұл сапарыңыз және алдағы келіс­сөздер екіжақты ықпалдастыққа тың серпін беру тұрғысынан өте маңыз­ды деп ойлаймын. Руанданың эко­но­микасы қарқынды дамып келеді. Менің­ше, өзара байланыстарды нығайта беру қажет. Өйткені Қазақстан – ІЖӨ кө­лемі, ІТ технологиялар мен жасанды ин­теллектті дамыту бойынша өңірдегі көшбасшы ел. Бұл біздің өзара тиімді ынтымақтастығымызды өркендетудің басым бағыттары бола алады. Сондықтан сіздің сапарыңызға ерекше мән беремін, – деді Қасым-Жомарт Тоқаев.</blockquote>Руанда Президенті Мемлекет бас­шысына қонақжайлық танытқаны үшін алғыс айтып, екіжақты ынтымақтастықты дамытуға ниетті екенін жеткізді.<blockquote>– Еліңізге шақырғаныңыз үшін ризашылығымды білдіремін. Мен бұған дейін Қазақстанға 2015 жылы келген болатынмын, бұл – менің екінші сапарым. Өзіңізбен және сіздің командаңызбен бірге екі ел игілігі жолындағы бірлескен жұ­мысымызды жалғастырудың мүмкін­дік­терін қарастырамыз, – деді Поль Кагаме.</blockquote>Тараптар Қазақстан мен Руанданың сая­си, сауда-экономикалық, көлік-ло­гис­­тика, ауыл шаруашылығы және цифр­­ландыру салаларындағы қарым-қа­­ты­­настарын дамыту перспективасын тал­қы­лады. Сондай-ақ президенттер аймақ­тық және халықаралық мәселелер туралы пікір алмасты.Мемлекет басшысы кеңейтілген құрамда келіссөз кезінде Астана халық­аралық форумына қатысу үшін елімізге келген Руанда Президентінің Қазақстанға 2015 жылы жасаған сапарынан кейін екі елдің өзара құрметке негізделген, ынтымақтастық пен орнықты дамуды көздейтін қарым-қатынасы айтарлықтай табысқа жеткенін атап өтті. Президент Қазақстанның Африка мемлекеттерімен байланысты кеңейтуге ерекше мән беретініне назар аударды.<blockquote>– Сіздің көреген көшбасшылығыңыз­бен Руанда даму даңғылына түсіп, инсти­туционалды орнықтылық пен болашаққа бағдарланған жаңашылдықтың үлгісін көрсетті. Еліңіздің экономикалық өсімі 8 пайыздан асты. Бұл – жаңғыртудың жарқын көрінісі. Осы орайда сіздің еліңізбен ынтымақтастықты дамытуға айрықша мән береміз. Қазақстан екіжақты тиімді байланыстарды нақты жобалар арқылы ілгерілетуге дайын. Сіздің сапарыңыз барысында қол жеткізілген уағдаластықтар Қазақстан мен Руанда арасындағы қарым-қатынасты жаңа деңгейге көтеретініне сенімдімін, – деді Қасым-Жомарт Тоқаев.</blockquote>Өз кезегінде Поль Кагаме көрсетілген сый-құрмет үшін ризашылығын білдіріп, Қазақстанның екіжақты ықпалдастықты дамытудағы күш-жігеріне жоғары баға берді. Сондай-ақ Руанда мен Қазақстан арасындағы серіктестіктің әлеуетіне тоқталып, екі елдің өркендеуіне және стратегиялық диалогтың нығаюына ықпал ететін бірлескен жобаларды жүзеге асыруға дайын екенін жеткізді.<blockquote>– Астанаға екінші мәрте жолым түскеніне қуаныштымын. Қазақстан ұлттық даму жолында толайым табысқа жетіп, соның арқасында халықаралық аренадағы рөлі артып келеді. Біз өзіңізбен және сіздің еліңізбен серіктес әрі достас болғанымызға ризамыз, – деді Руанда Президенті.</blockquote>Келіссөз барысында мемлекеттер басшылары екіжақты ықпалдастықтың басым бағыттарын, соның ішінде сауда, инвестиция, көлік, ауыл шаруашылығы, ақпараттық технология, электрондық үкімет және қаржы салаларындағы байланыстарды дамытуға уағдаласты.Қазақстан мен Руанда президенттері БАҚ өкілдері үшін брифинг өткізді. Мемлекет басшысы Президент Поль Кагаменің Қазақстанға ресми сапармен келгеніне ризашылығын білдіріп, елдеріміз үшін мән-маңызы зор келіссөздер жүргізілгенін атап өтті. Оның айтуынша, Африка құрлығының халықаралық ықпалы жылдан жылға күшейіп келеді. Қазақстан осы аймақтағы елдермен тығыз қарым-қатынас орнатуға ерекше мән беріп отыр.<blockquote>– Біз Руанданы Африкадағы сенімді серіктесіміздің бірі ретінде қарастырамыз. Сондай-ақ өзара әріптестікті одан әрі нығайтуға мүдделіміз. Бүгінгі кездесу мазмұнды әрі мағыналы болды. Біз екіжақты ынтымақтастықты күшейту жолдарын талқыладық. Нақты келісімдерге қол жеткіздік. Екі ел арасындағы саяси диалогты дамытуға уағдаластық. Алдағы уақытта Сыртқы істер министрліктері жоғары деңгейдегі кездесулер өткізетін болды, – деді Қасым-Жомарт Тоқаев.</blockquote>Мемлекет басшысы биыл Қазақстан мен Руанда дипломатиялық және қызметтік төлқұжат иелерін визалық талаптардан босатуға келіскеніне тоқталды.Бұдан бөлек, мемлекеттер басшылары парла­ментаралық дипломатия мәселесін пысықтағанын жеткізді. Сондай-ақ көлік-логистика және сауда салаларында бірлескен жұмыс топтарын құру туралы келісім жасады. Қазақстан Президенті мұны сауда-экономикалық қатынастарды одан әрі дамытудың тетігі санайды.<blockquote>– Бұл ретте халықаралық дәліздердің мүм­кіндігін талқыладық. Келіссөз барысында азық-түлік қауіпсіздігін қамтамасыз ету мәселесін пысықтадық. Қазақстанның ауыл шаруашылығы өнімдерін Африка құрлығына тасымалдау жолдарын қарастырдық. Елдеріміз озық технология, жасанды интеллект және ғарыш саласында айтарлықтай тәжірибе жинақтады. Біз цифрландыру және киберқауіпсіздік мәселелеріне қатысты ортақ жобаларды қолға аламыз деп келістік. Ғарыш кеңістігін бірлесіп игеру жөнінде уағдаластыққа қол жеткіздік. Мұндай қадам мемлекеттік қызмет пен бизнестің тиімділігін арттыруға септігін тигізеді. Ақпараттық қауіпсіздікті күшейтуге мүмкіндік береді, – деді Президент.</blockquote>Қасым-Жомарт Тоқаев Қазақстан мен Руанда жасыл энергетика саласын өркендетіп, табиғи ресурстарды тиімді пайдалануға мүдделі екенін айтты. Осыған орай қос мемлекет бірлескен жобаларды жүзеге асыруға ниетті. Бұл уағдаластықтар сауда-саттық көлемін арттыруға жол ашады. Сонымен қатар екі елдің инвестициялық ықпалдастығына тың серпін береді.<blockquote>– Бүгінде Астана мен Кигалидің халықаралық қаржы орталықтары арасында тығыз байланыс бар. Біз жаһандық қаржы нарығындағы осы байланысты одан әрі нығайтуға келістік. Климаттың өзгеруіне қарсы күрес және қоршаған ортаны қорғау мәселелері де назардан тыс қалған жоқ. Руанданың климатты сақтау бағытында мол тәжірибесі бар. Соның арқасында жаһандық жобаларға зор үлес қосып келеді. Осы ретте тәжірибе алмасудың өзекті екенін атап өттік. Халықаралық конвенциялар мен келісімдер аясында экология мәселелерін шешу үшін күш біріктіру жолдарын талқыладық, – деді Мемлекет басшысы.</blockquote>Келіссөздер кезінде мәдениет, білім-ғылым салаларындағы ынтымақтастыққа да ерекше назар аударылды. Атап айтқанда, президенттер академиялық байланысты дамытуға, студент алмасуға, сондай-ақ, бірлескен ғылыми зерттеулер жүргізуге келісті.Қасым-Жомарт Тоқаев Поль Кагамені әлемдік саясатта мол тәжірибесі, беделі бар Президент ретінде атап өтіп, жаһандық мәселелер жөнінде пікір алмасқанына тоқталды.<blockquote>– Екі елдің халықаралық түйткілдерге қатысты ұстанымдары ортақ деп айтуға болады. Біз жаһандық дағдарыстың бәрін тек дипломатиялық жолмен шешу керек деп есептейміз. Бейбіт келіссөздер жүргізуді қолдаймыз. Бұған қоса, халықаралық ұйымдар аясында өзара ықпалдастықты күшейтуге уағдаластық. Бастамаларымыз бойынша бір-бірімізге қолдау көрсетуге келістік. Президент Кагаме мырзаның елімізге ресми сапарының тарихи маңызы бар. Біз екіжақты байланысты дамытуға, түрлі саладағы ынтымақтастықты кеңейтуге мүдделі екенімізді растадық. Бүгінгі келіссөздің нәтижесі – соның айқын дәлелі. Енді осы келісімдерді сапалы жүзеге асыруымыз керек, – деді Мемлекет басшысы.</blockquote>Өз кезегінде Поль Кагаме келіссөздердің қорытындысын жоғары бағалады.<blockquote>– Қазақстан Президентімен өте нәтижелі келіссөз жүргіздік. Елдеріміз арасындағы берік достық өзара серіктестігімізді одан әрі нығайтуға негіз болады. Келісімдерге қол қою арқылы ынтымақтастық мүмкіндіктерін арттыруға ниеттіміз. Екі мемлекеттің сауда, технология және ауыл шаруашылығы салаларында бір-бірінен үйренері көп. Біз «Самұрық-Қазына» АҚ мен Rwanda Mines, Petroleum and Gas Board арасында келісім жасалуын құптаймыз. Руанда Қазақстанның энергетика, тау-кен өнеркәсібі және минералдарды өңдеу салаларындағы инновацияларын игеру арқылы айтарлықтай пайдаға кенеле алады, – деді Руанда Президенті.</blockquote>Фото: Ақорда

Келісім өзара серіктестікті нығайтуға негіз болады

<a href="https://kyzylorda-news.kz/">Kyzylorda-news.kz</a> Елордада Орталық Азия елдері мен Қытай елі медиа саласы мамандарының қатысуымен форум өтіп жатыр, – деп хабарлайды <a href="https://kaz.inform.kz/news/astanada-ortalik-aziya-kitay-mediaforumi-bastaldi-a9d936/">Қазақпарат.</a>Медиафорум Президент Қасым-Жомарт Тоқаевтың құттықтау сөзімен ашылды. Құттықтау сөзін ҚР Президентінің ішкі саясат мәселелері және коммуникациялар жөніндегі көмекшісі Арман Қырықбаев оқып берді.<blockquote>— Құрметті достар, сіздерді Қытай мен Орталық Азияның ықпалдастығын арттыруға арналған форумның ашылуымен құттықтаймын. Бұл - біздің еліміздің медиа саласындағы келісім мен сенімді арқау еткен, серіктестікті бекемдей түсетін бас қосу. Бүгінде жер жүзінде ауқымды өзгерістер болып жатыр, түрлі мәдениеттер мен қоғам арасындағы алтын көпір саналатын журналистердің рөлі бұрынғыдан да артып келеді. Сауатты әрі байыпты ақпараттық саясат, ынтымағымызды күшейтіп, орнықты дамуымызға септігін тигізеді. Қазіргі заманда медиа саласында бейбітшілікті, өзара қолдау мен татулықты дәріптейтін аса маңызды құралға айналды. Осы орайда Қытай Халық Республикасының төрағасы Си Цзиньпин мырзаның «Бір белдеу, бір жол» бастамасының мәні зор. Бірегей жоба жаһандық ынтымақтастық тұжырымдамасы ретінде әлем қауымдастығының жоғары бағасына ие болып отыр. Қазақстан Қытай Халық Республикасымен достық қатынасты дамытуға айрықша мән береді. Тиімді диалог құруға ұмтылған елдеріміздің мүддесі бір, мақсаты ортақ. Халықтардың бір-бірін жақын танып білуі және жаһандық сын-қатерлердің шешімін бірлесіп іздеу өте маңызды. Бұған жауапкершілігі мол медиа саласы өкілдері зор үлес қоса алады. Мұндай алқалы жиындар Еуразия кеңістігінде тұрақтылық, ашықтық және жасампаздық қағидаттарын орнықтыра түсуге ықпал етеді. Форумда осы аймақтағы барлық елдің игілігіне қызмет ететін тың идеялар мен парасатты пікірлер айтылады деп сенемін. Баршаңызға бақ-береке, мол табыс тілеймін, — делінген Президент құттықтауында.</blockquote>Фото: Виктор Федюнин

Астанада «Орталық Азия – Қытай» медиафорумы басталды  

<a href="https://kyzylorda-news.kz/">Kyzylorda-news.kz</a> 2025 жылы Қызылорда облысының 68 медициналық ұйымы стоматологиялық қызмет көрсетуге&nbsp;Әлеуметтік медициналық сақтандыру қорымен шарт жасасты.Жоспарлы стоматологиялық көмекті тек балалар мен жүкті әйелдер ғана ала алады.&nbsp;Қатты ауырсыну кезінде шұғыл стоматологиялық көмекті балалар мен жүкті әйелдер, зейнеткерлер, мүгедектігі бар адамдар және оларға күтім жасайтын жұмыс істемейтін адамдар, оның ішінде мүгедектігі бар немесе бірінші топтағы мүгедектігі бар балалар, әлеуметтік маңызы бар және жұқпалы аурулары бар пациенттер, көп балалы аналар, атаулы әлеуметтік көмек алушылар және басқалар ала алады.&nbsp;Пациенттер осы медициналық ұйымдарға жолдамасыз тікелей жүгіне алады.<img src="https://knadmin.beoblood.kz/uploads/1_ddf9f0aa0d.png" alt="1.png"><img src="https://knadmin.beoblood.kz/uploads/2_0eb472d603.png" alt="2.png"><img src="https://knadmin.beoblood.kz/uploads/3_125261c455.png" alt="3.png">Фото: Нұрболат Нұржаубай

МӘМС: Қызылорда облысының 68 медициналық ұйымынан стоматологиялық қызмет көрсетіледі

<a href="https://kyzylorda-news.kz/">Kyzylorda-news.kz</a> Шымкентте жалғызбасты ана өзін белгісіз біреулердің ұрлап әкетіп, қаладағы психологиялық көмек орталығында 10 күн бойы күштеп ұстап, зорлық-зомбылық көрсетіп, беймәлім құжаттарға қол қойғызғанын жария етті, деп хабарлайды <a href="https://azattyq-ruhy.kz/">Azattyq Rýhy.</a>Әйел ақыл-есінің түзу екенін, денсаулығына қатысты ешқандай тіркеуде тұрмайтынын айтып, президенттен көмек сұрады. &nbsp;&nbsp;<blockquote>«Құрметті Қасым-Жомарт Кемелұлы! Мен, Фаузия Ахметова, жалғызбасты анамын. Сізге өз басымнан өткен ауыр оқиғаға байланысты мәжбүрлі түрде жүгініп отырмын.2025 жыл, 25 сәуір күні таңғы сағат 05:30 шамасында Түркістан қаласындағы өз үйімнен белгісіз үш ер адам мені балаларымның көзінше күштеп алып кетіп, Шымкент қаласындағы «Көмек центр» деп аталатын оңалту мекемесіне апарды. Аталған мекеме өздерін реабилитациялық орталық ретінде таныстырып, мені ешқандай медициналық немесе құқықтық негізсіз ұстап отырды.Менің есірткіге немесе басқа да психобелсенді заттарға еш қатысым жоқ. Ешбір тіркеуде тұрмаймын. Соған қарамастан, мені күшпен ұстап, ұрып-соғып, қол қоюға мәжбүрледі. Қол қоймағаным үшін дәрі-дәрмек ішкізіп, есімді білмей қалу деңгейіне жеткізді. Бірнеше рет аяқ-қолымды скотчпен байлады. Мен жаным қиналғаннан өз-өзіме қол жұмсап, қолымды бірнеше рет кестім», - деді әйел видеоүндеуінде.</blockquote>Айтуынша, ол 5 мамыр күні ғана туыстарымен хабарласуға мүмкіндік алған.<blockquote>«Жедел жәрдем шақырту мақсатымен үйіме хабар жеткізгім келді, алайда ешқандай медициналық көмек көрсетілмей, қайтадан бір аяқ-қолымды байлап тастады. Он күн бойы заңсыз ұсталдым. Тек 5 мамырда туыстарыма хабарласып, сол жерде құтқарылдым. Осылайша мені шығарып алды», - деді ол.</blockquote>Әйелдің сөзінше, орталықта кәмелетке толмаған балалар да күштеп ұсталып отырған көрінеді. Ол өзінің басынан өткен оқиғаға байланысты полицияға арыз жазса да, құқық қорғау органдары тергеуді бастамаған.<blockquote>«Ол орталықта кәмелетке толмаған қыздардың, балалардың заңсыз қорқытып, ұсталып отырғанын көзіммен көрдім. Осыдан кейін Шымкент қаласының Полиция департаментіне арыз жаздым. Алайда жиырма күн өтсе де, арызым бойынша ешқандай тергеу әрекеті жүрмей отыр. Заңсыз оңалту орталығы әлі де жұмысын тоқтатпай отыр. Бұл жағдай құқық қорғау органдары мен аталған орталықтың арасында сыбайластық бар деген күмән туады», - деді ол.</blockquote>Алайда Шымкент қаласының полиция департаменті азаматшаның арызы бойынша қылмыстық іс тергеуге алынған дейді.<blockquote>«Оқиғаның барлық мән-жайы мен құқыққа қайшы әрекеттерге қатысы бар тұлғаларды анықтауға бағытталған тергеу іс-шараларының кешені жүріп жатыр. Тергеу аясында орталықтың қызметі тексеріліп, құжаттама, жазбалар, сондай-ақ екі тараптың уәждері зерделенеді. Тергеу жұмыстары заң шеңберінде жүріп, ұсынылған барлық жайттар объективті және толыққанды қаралады», - деп хабарлады полиция.</blockquote>Зәбір көрдім деген ана кінәлі адамдардың жауапқа тартылуын талап етті.<blockquote>«Осы оқиға бойынша менің заңсыз ұсталғаным мен зорлық-зомбылыққа ұшырағанымды, «Көмек центр» деп аталатын орталықтың медициналық лицензиясыз жұмыс істеп отырғанын, онда кәмелетке толмаған балалардың да заңсыз ұсталғанын, полицияның арызымды қараусыз қалдырғанын, өзімнің балаларымның қауіпсіздігі үшін алаңдайтынымды ескере отырып, сізден осы істі жеке бақылауыңызға алып, әділетті тергеу жүргізілуін және кінәлі тұлғалардың заң алдында жауапқа тартылуын сұраймын», - деді Президентке үндеу жолдаған әйел.</blockquote>Редакция тілшісі осы оқиғаның мән-жайын анықтау үшін Шымкенттегі психологиялық орталыққа хабарласты. Мекеменің қызметкері дәл қазір жауап беруге мүмкіндігі жоғын айтып, 1-2 сағаттың көлемінде қайта байланысқа шығуға уәде берді.Фото: скрин

Қазақстан және Қызылорда облысының жаңалықтары