<a href="https://kyzylorda-news.kz/">Kyzylorda-news.kz</a> ақпараттық агенттігінің 17 желтоқсанға арналған жұлдыз-жорамалы.
Тоқты
Кез-келген бастама үшін қолайлы күн. Романтикалық кештерге таптырмас уақыт. Күнделікті күйбең тіршіліктен арылып, өзіңізге демалыс ұйымдастырғаныңыз жөн.
Торпақ
Бұл күні бизнес пен денсаулыққа қатысты ешнәрсе жоспарламағаныңыз жөн. Банк пен мемлекеттік мекемелермен байланысу үшін қолайсыз уақыт.
**Егіздер 
**Түске дейінгі уақыт талантыңызбен танылатын кез. Күннің екінші жартысында келісімшарттарға қол қою секілді жұмыстарды жоспарламағаныңыз жөн.
Шаян
Шығармашылық идеяларды жүзеге асырып, идеяларыңызды дамытуға қолайлы күн. Түстен кейін сауда жасасаңыз табысқа кенелесіз.
Арыстан
Бүгінгі күн сіз үшін отбасыңызбен демалуға қолайлы. Таңертеңгілік жаңа серіктестер табылып, &nbsp;қаржылық мәселелеріңіз шешіледі.
Бикеш
Сыртқы келбетіңіз бен стиліңізді бүгін өзгертпегеніңіз жөн. Жеке өміріңізде жайсыздықтар орын алады.
Таразы
Күтпеген жерден шығынға ұшырауыңыз мүмкін. Әйелдермен түсініспеушілік туындайды. Өзіңізді физикалық тұрғыдан шамадан тыс шаршатпаңыз. &nbsp;
Сарышаян
Созылмалы ауруыңыз қозып, жарақаттанып қалуыңыз мүмкін. Батыл болыңыз. Мансап сатысында жоғарылауыңыз мүмкін.
Мерген
Сабыр түбі сары алтын. Ашуыңызды ақылға жеңдіріңіз. Ішімдік ішпеңіз және көлік жүргізбеңіз.
Тауешкі
Ескі проблемалар сіздің көңіл-күйіңізді бұзуы мүмкін. Романтикалық кеш ұйымдастыруға қолайлы күн.
Суқұйғыш
Бүгін өзіңізді бір шама жайсыз сезінуіңіз мүмкін. Бүгін алкогольді асыра пайдаланбағаныңыз жөн.
Балықтар
Сіздің әрекетіңіз басқалардың қызғанышын оятып, наразылығын тудыруы мүмкін. Басшылар сізді тым қатты сынға алады.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Өткен жылы еліміздің газ тұтыну көрсеткіші 15 миллиард текше метрге жетті, деп хабарлайды <a href="https://24.kz/kz/zha-aly-tar/ekonomika-zhnalyktary/item/360649-aza-standy-tardy-50-k-gildir-otyn-a-osyl-an">«Хабар 24»</a>.
Алдағы уақытта бұл одан әрі жоғарыламақ. Осы мақсатта «ҚазТрансГаз» компаниясы жаңа газ өңдеу нысандарын салуды жоспарлап отыр. Сарапшылар&nbsp; көгілдір отын жүйесін дамыту республика үшін табысты болатынын айтады. Себебі соңғы бес жылдың өзінде инвесторлар еліміздің&nbsp; газ тасымалдау және жаңа тасымал бағыттарын ашу мақсатында 1 триллион теңгеден артық қаржы құйған. Осының арқасында газ тасымалдайтын құбырлардың ұзындығы 23 процентке ұзарып, Орталық Азиядағы ең ірі газ жолының біріне айналды. Ал тұрғындарды газбен қамту саласына келер болсақ, биыл ел тұрғындарының 50 процентке жуығы көгілдір отынға қол жеткізді. Яғни 9 миллион тұрғын&nbsp; және 48 мың кәсіпорын табиғи газға қосылған.

Қазақстандықтардың 50% көгілдір отынға қосылған

<a href="https://kyzylorda-news.kz/">Kyzylorda-news.kz.</a> Шетелдіктерге тұрақты тұруға рұқсатты, яғни ықтиярхатты беру үшін мемлекеттік баж 4 айлық есептік көрсеткішке дейін (10 мың теңгеден астам) өседі. Бұл туралы мәжілістің жалпы отырысында еңбек және халықты әлеуметтік қорғау министрі Біржан Нұрымбетов айтты, деп хабарлайды&nbsp;<a href="https://sputniknews.kz/society/20191211/12265959/Qazaqstan-yqtiarhat.html">Sputnik Қазақстан.</a>
Бүгін мәжілістің жалпы отырысында көші-қон процесіне толықтырулар мен өзгерістер енгізу туралы заң жобасы қаралды. Құжатта шетелдіктерге ықтиярхат беру үшін мемлекеттік бажды ұлғайту көзделіп отыр.
<blockquote>
 “Бүгінде оның мөлшері шамамен 480 теңге. Оны 4 айлық есептік көрсеткішке дейін ұлғайтуды көздеп отырмыз. Ішкі істер министрлігіндегі әріптестеріміздің айтуынша, ықтиярхатты дайындаудың өзіндік құны анағұрлым қымбат, 4 мың теңгеден асады. Жыл сайын елімізде 24 мыңға жуық ықтиярхат жасалады екен, оның ішінде 10 мыңға жуығы этникалық қазақтар үшін. Олар мемлекеттік баждан босатылған. Сонда бажды 4 АЕК-ке дейін ұлғайтсақ, мемлекеттік ықтиярхат дайындауға жұмсалатын шығындарының орны толар еді”, – деді Нұрымбетов.
</blockquote>
Бұдан бөлек, заң жобасында квотаға рұқсаттама мен квотаға қатысты да өзгерістер ұсынылып отыр.
<blockquote>
 “Шетелдік азаматтарды жұмысқа тарту үшін міндетті түрде рұқсаттама алу керек екенін білесіздер. Ол рұқсаттаманың күші тек бір өңірге ғана тарайды. Бірақ, іс жүзінде кейбір компаниялардың шетелдік жұмысшылары көршілес облыстағы нысандарға барып, жұмыс істеуге міндетті. Алайда ол бара алмайды, себебі оның рұқсаты тек бір өңірге ғана тарайды. Сондықтан рұқсатты екі өңірге тарату мәселесі шешімін тапты. Бұл инвесторлардың&nbsp; бұрыннан айтып жүрген өтініші болатын”, – деді министр мәжіліс каулыларында.
</blockquote>
Нұрымбетов түсіндіргендей, рұқсаттаманы алу үшін шетелдік компаниялар салық төлейді.
Сонымен қатар, енді квотаның мөлшерін белгілеу құзыреті үкіметтен еңбек министрлігіне беріледі. Бұрын квота мөлшері үкімет қаулысымен анықталатын. Егер заң қабылданса, келесі жылдан бастап квота мөлшері өкілетті министрліктің бұйрығымен бекітіледі.
Бұған қоса, еңбек министрлігі шетелдік жұмысшыларды тартуға квота мөлшерін екі есеге дейін қысқартуды ұсынып отыр. Нұрымбетовтің сөзінше, осы жылға 49 мың квота қарастырылған, яғни осыншама шетелдік елімізде жұмыс істей алады деген сөз. Депутаттар заң жобасын бірінші оқылымда мақұлдады

Қазақстанда ықтиярхат қымбаттайды ма?

<a href="https://kyzylorda-news.kz/">Kyzylorda-news.kz.</a> Бүкіл Кеңес Одағын «аяғынан тік тұрғызып», азаттықтың алғашқы лебін төрткүл дүниеге жеткізген Желтоқсан оқиғасы қай уақытта болсын халықтың жадынан өшпейтіндігі анық. Өйткені, сол кездегі өрімдей жастарымыз батыр бабаларымызға тән қайсарлық пен өрлікті, ерлікті әлемге паш етті. Осы жолда жанын пида еткен азаматтар да бар. Жалпы, Желтоқсан оқиғасына қатысқан қазақ жастарының қай-қайсысы болсын, зор құрметке лайық. Аталмыш оқиғаның 30 жылдығы қарсаңында өздеріңізге желтоқсан оқиғасын терең зерделеп жүрген Динара Бегалының зерттеу мақаласын ұсынып отырмыз. Онда оқиға кезінде ер азаматтарша ерліктің, өрліктің ерен үлгісін көрсете білген қазақ қыздары әңгіме арқауы болған. Олардың іс-әрекеті бүгінгі жастарға үлгі болатыны анық.
Алаңға тек ер жігіттер ғана емес, нәзік жанды, қайсар мінезді қарлағаштарымыздың да қатысқаны барлығымызға мәлім. Сондықтан да олардың бізге жеткізген әр сөзі құнды әрі құрметті деп білемін. Соның ішінде бірнешеуіне тоқталғым келіп тұр. Соның бірі – Гүлбахрам апай. Ол кіс былай деп баяндайды:
1986 жылы «Қазақконцерт» бірлестігінде жұмыс істеп, «Қазақфильм» киностудиясында «Түрксіб туралы ән» деген фильмнің түсіріліміне қатысып жүргенмін. Фильмді Қапал-Арасан өңірінде түсіріп жатқан едік. 16 желтоқсан күні кешке Д.Қонаевтың орынынан алынғанын естідік. 17 желтоқсан күні түсіру тобы Алматыға қайтты. «Қазақфильмде» халық әртістері жиналып, мәселені талқылады. Киностудиядан шыққаннан кейін №61 автобусқа мініп, алаңға тарттым. Алаңға бет алғанымда , милициялар жолымды кес-кестеп , «қайда барасың?» деп жібермеуге әрекеттенді. «Алаңға әдейілеп келе жатырмын. Жолымды бөгемеңдер», – дедім. Олар : «Өлгің келсе, бара бер», – деді. Алаңның жиегіндегі шыршаларды жағалап , жастардың арасыныан бір-ақ шықтым. Адам деген қарақұрым. Сол кезде жастардың ешқайсысы шектен шығып, тәртіп бұзбады. Жасақшылар қолдарындағы дубинка, сапер күректерімен шерушілерді аямай ұрып, асқан қатігездік көрсетті. Біз арпалысып жүріп, қараңғылықтың басқанын аңғармай қалдық. Түнгі сағат 22.30 кезінде мені құқық қорғаушылар ұстап, қолға түскендердің жанына әкеліп , етбетімнен жатқызды. Көк мұздың үстіне біраз жатқаннан кейін Әуезов аудандық IIБ-сына алып келді. Сол жерде милиция болып істейтін ағамның Мұрат деген сыныптас досы мені көріп, шақырып алып әбден ұрысқаннан соң, IIБ-сы ғимаратының артқы есігінен шағарып, таксиге салып жіберді.
Ертеңіне тағы алаңға тарттым. Сөйтсем, алаңды жасақшылар сыртынан қоршап алған екен. Әрең дегенде қоршаудан саңылау тауып ішке өттім. Содан кешегідей оқиға бұл күні де жалғасын тапты. Кешкі сағат 7-нің шамасында алаңнан сытылып шығып, Әуезов театрына келдім. 18 желтоқсан күні театрда әзіл-сықақ кеші өтуі керек еді. Әртістер Әзірбайжан Мәмбетовтың бөлмесінде отыр екен. Мәмбетовтың кабинетіне кірген бетте «Қорқаулар сияқты неге тығылып отырсыңдар? Ана жақта жастарды қырып жатыр. Мұндайда сүт бетіндегі қаймақтардың үндемей қалғаны жараспайды», – дедім ашумен .
Әзірбайжан аға: «Болды, жетеді! Бәріміз алаңға барамыз. Алаңға шықпағандар ертең жұмыстан шығады!» – деді. Әзірбайжан мен Тұңғышбай ағаға ілесіп , сыртқа шықтым. Содан үшеуміз Тұңғышбай ағаның машинасына мініп, алаңға тарттық. Өкінішке қарай, милиция бізді алаңға жеткізбей тоқтатты. Машинадан түскенде Ә.Мәмбетов: «Мен КСРО депутатымын», – деп, куәлігін көрсетті. Оған қарамай таяқтың астына алды. Тұңғышбай ағаны да ұрды. Мүйізі қарағайдай ағаларымызды ұрып жатқанын көрген соң, машинаның артқы есігінен шығып, арықтың ішіне түсіп алып, Абай даңғылығынан Сәтпаев көшесіне дейін еңбектеп жеттім. Жастардың тобына кіріп аман қалдым. Түнгі сағат 12-шамасында екінші рет ұсталдым. Сол кезде Фрунзе ауданы IIБ-ның қызметкері Мұңғатов Есенгелді деген милиционер «пагонымды жұлды» деп менің үстімнен арыз жазды. Осылайша жаламен күнәм ауырлай бастады. Бес күн қамауда жаттым. Бұл кезде «Қазақконцертке» де хабар жеткен. Үш рет сот болып , 4 жылға кетіп қала жаздадым. Соңғы 3-ші рет «Қазақконцерт» бірлестігінде жолдастық сот өтті. Сол кезде маған Шамисон деген еврей: «Баласы бар екен, аяушылық білдірейік . Ұжым болған соң бір-бірімізге қалжыңдаймыз. Біз оған ренжімейміз», – деді.
Басқа да әріптестерім рақымшылық жасау керек деп шешті. Қысқасы мені «Қазақконцерт» ұжымы құтқарып қалды. Мен үшін директорымыз жұмыстан шықты. Жаңа директор мені жұмыстан шығарғанымен, жатханамдағы бөлмемді алмай, жасырын концертке жіберіп, қамқорлық жасады. Жазамды шартты түрде өтеп шықтым сондай қиын-қыстау кезінде Гүлжан Толпақова, Роза Рысбаева, Сара Тыныштығұлова – бәрі мені қорғап қалуға тырысты. Ал жастардың көрмеген қиянаты жоқ. Алаңда қолға түскендерді Медеу мұз айдынының астындағы тоңазытқышқа қамағанынан да хабарым бар.
Ал, енді Гүлнар Кеңесқызы Байбосынованың «сөйлетіп» көрейік: «Арамызда таяқтан бет-жүзі адам танымастай өзгеріп кеткен бір жігіт болды. Оның көзі шығып кеткен еді. Содан бізді жеті түнде Шамалған жақтағы жүгері егетін алқапқа апарып тастады. Күн суық, бәріміз оңбай таяқ жегенбіз. Жолдың бойымен қалаға қарай жүгірдік. Ешқандай машина тоқтамайды. Әйтеуір, таң ата жатақханаға жетіп жығылдым. Суық қатты өтіп кеткен еді. Бір ауруханада жаттым» – дейді бір жазбаларында. Сонымен қатар Гүлнар қазақ қыздарын рухтандырып, алға бастап жүрді деп айтсам кем айтқаным емес. Себебі, «ЖепПИ, КазМУ, Нархоз, КазПИ қайда?», «Жүріңдер, көше аралап , сондағы қыз-жігіттерді қатарымызға тартайық!», «Қыздар, жігіттер бөлінбейік!» – деп ұрандатты. Бес ай қатарынан тергеуде болып, жазасын өтеген қайсар да, батыл Гулнар Желтоқсан оқиғасына қатысқанына өкінбейтінін айтып, керісінше бұл ісін мақтан тұтатынын айтты. Осындайда қазақ қыздарына қайран қаласың.&nbsp;
«1986 – да, желтоқсанның ызғарында қақаған,&nbsp;
Қайсар ойларың кісендерін үзіп, сан жылдар байлап, матаған,
Саналарыңнан бағынғыш, құлшыл, үркек сезімдерің өтті өліп,
Шәмшінің «Менің Қазақстаным» әнін ту етіп шырқап, көтеріп ,&nbsp;
Жаңа ұран айтып қиюына қашқан заманға,&nbsp;
Топтасып едіңдер Бержнев атты алаңға..» -деген М.Шахановтың өлең жолымен желтоқстан құрбандарына тағзым етуіміз қажет.
Жылдан жылға оқиға жайлы зерттеліп, желтоқсан оқиғасы құрбандарының тізімі толығу үстінде. Мысал ретінде ел мен ердің намысын ту етіп қылмыстық кодекс бойынша жазаланғанған апаларымызды еске алғым келеді:
Сәбитова Жансая Әлкейқызы — Алматыдағы №19 жұмысшы жастар орта мектебінің оқытушысы, 5 жыл.
Салықова Нағима Аскарқызы — Алматы бас киімдер фабрикасының бухгалтері, 3 жыл.
Еспенбетова Қаншайым Мұхатқызы — «Поршень» зауытының токарі, 3 жыл 6 ай.
Махметова Айткүл Әбдірахманқызы — №1 баспахананың жұмысшысы, 2 жыл.
Әбілқайырова Гүлнар Бердіқожақызы — бас киімдер фабрикасының тігіншісі, 3 жыл.
Панинова Гүлвира Төлебайқызы — бас киімдер фабрикасының тігіншісі, 2 жыл.
Шамаева Галимат Әбенқызы — бас киімдер фабрикасының тігіншісі, 2 жыл.
Лепесбаева Гүлнар Сабырғалиқызы — бас киімдер фабрикасының тігіншісі, 2 жыл.
Рақымжанова Гүлмира Әкімжанқызы — бас киімдер фабрикасының тігіншісі, 2 жыл.
Иманбаева Қайыпхан Сұлтанқызы — «Поршень» зауытының токарі, 3 жыл.
Рамазанова Ғалия Файзуллақызы — тігінші-мотористка, 1 жыл (еңбекпен түзеу жазасы).
Мергенова Бақша — мүгедектігіне байланысты жұмыс істемеген, 3 жыл.
Әлиева Раушан — Қарағанды мемлекеттік университетінің студенті, 1 жыл.
Еркінбекова Әлия Төреханқызы — Қарағанды медицина институтының студенті, 1 жыл 6 ай.
Досанова Жанат Әбдірахманқызы — Қарағанды медицина институтының студенті, 1 жыл 6 ай.
Мусина Гүлден Қанафияқызы — Қарағанды медицина институтының студенті, 1 жыл 6 ай.
Сәрсенбекова Раиса Мырзабекқызы — бухгалтер-ревизор, 2 жыл.
Кәрімғазина Гүлжан Ғазизқызы — кооператив техникумының студенті, 1 жыл.
Серекенова Анар Жемісханқызы — Заң техникумының студенті, 1 жыл 6 ай.
Айтжанова Жанат Нәукенқызы — пединституттың студенті, 1 жыл 6 ай.
Шынықұлова Ләйлә Бекенқызы — пединституттың студенті, 1 жыл еңбекпен түзеу жазасы.
Шоқаева Ғалия Құдысқызы — жатақхана вахтері, 2 жыл.
Мусина Мәншүк Жанатқызы — юристік техникумының студенті, 1 жыл 6 ай қара жұмысқа жіберілген.&nbsp;
Мұхамеджанова Сәбира Есімбекқызы 1986 жылғы Желтоқсан оқиғасының құрбаны.
1985 жылы Шығыс Қазақстан облысы Тарбағатай ауданы Ақмектеп аулының «Ленин жолы» сегіз жылдық мектебін үздік бітіреді. Сол жылы облыс орталығы Өскемен қаласындағы педагогикалық училищеге оқуға түседі. 1986 жылғы 17-18 желтоқсанда Алматы қаласында болған қазақ жастарының отаршылдық және әміршілдік жүйеге қарсы көтерілісін қуаттап 22 желтоқсанда Өскемен қаласында бірге оқитын студент жастармен бірге наразылыққа шығады. Студент қыздардың бұл әрекеттері барып тұрған ұлтшылдық деп бағаланып, сол күні кештен бастап партия, кеңес, комсомол, мемлекеттік қауіпсіздік, құқық қорғау орындары тарапынан тергеу, олардан жауап алу басталады. Нәтижесінде орынсыз қорлау мен жала жабу мен тергеуге шыдай алмаған Сәбира Мұхамеджанова барлығын ұйымдастырған мен деп мәлімдеп, жатақхананың бесінші қабатынан секіріп, мерт болады. Сөйтіп ол Желтоқсан құрбаны, батырына айналды.&nbsp;
Асанова Ләззат Алтынайқызы Желтоқсан оқиғасының құрбаны. 1985 жылы Алматыда П.Чайковский атынддағы музыкалық училищеге оқуға түскен. Алматыда 1986 ж. 17-18 желтоқсанда болған қазақ жастарының отаршылдық және әміршілдік жүйеге қарсы азаттық көтерілісіне белсене қатысқан. Ол Орталықтың билеп -төстеушілігіне наразылық білдіріп, қаладағы Жаңа Алаңға алғашқы ереуілшілер қатарында “Қазақтар! Кіріптарлық құлдықта өмір сүргеніміз жетеді! Біз еліміздің тәуелсіздігін жеңіп алған кезде ғана азат бола аламыз!” – деген ұранмен шықты.
Бұдан бөлек 200-ге жуық әйел (Асымбекова Рысты Мұрзайқызы, Елеусінова Зәуре Чкалқызы, Қадырова Гүлзина Дүйсеханқызы, Әбішева Бибізада Есетқызы, Исманғужинова Зейнаш Мадыханқызы, Сейітова Лаура Қожмұханқызы, Ішлікова Бағдагүл Ансызбайқызы, Досынбекова Гүлжами, Кубеева Гүлназ Асқарбекқызы, Мұрзатаева Ғалия Қасымқызы, Медетбаева Райгүл Сабырданқызы, Алиақпарова Жайнат Қасымқызы, Мұқанова Райхан Қимұқанқызы, Тойтаева Гүлмира Әбдікәрімқызы…) ауруханаға түскендермен (барлығы-286 адам, қыз-келіншектер-73) тізім жалғаса береді.
Мінекей осындай апаларымызға тағзым ете отырып, олардың ерліктерінен үлгі алумыз қажет.
Тұрса да биік өр басын,&nbsp;
Қазаққа бақыт орнасын.&nbsp;
Сексен алтыншы жылғыдай,&nbsp;
Желтоқсан желі болмасын!&nbsp;
Күн кешіп лапылдаған жастарым,&nbsp;
Дүрліктірді желтоқсанның аспанын.&nbsp;
Жерді, дінді, тілді баба дәстүрін&nbsp;
Қорғау үшін көтерді олар бастарын!
<a href="http://sarbaz.kz/volno/geltoqsan-oqighasyna-qatysqan-qazaq-qyzdary-163391420/?sphrase_id=698278">Sarbaz</a>

Желтоқсан оқиғасына қатысқан қазақ қыздары

<a href="https://kyzylorda-news.kz/">Kyzylorda-news.kz.</a> 2019-2020 оқу жылында бакалаврдың 51 мың 85 студенті мемлекеттік грант негізінде білім алады, деп хабарлайды&nbsp;<a href="https://24.kz/kz/zha-aly-tar/bilim-zh-ne-ylym/item/360637-biyl-bilim-granttary-aj-sala-a-k-p-b-lindi">«Хабар 24»</a>.
Сондай-ақ 13 мыңнан астам магистрант пен 2 мың 230 доктаранттың оқуы мемлекеттік білім беру тапсырысы бойынша қаржыландырылады. Гранттардың салалар бойынша қалай үлестірілгеніне тоқталатын болсақ, ең көбі инженерлік, өңдеу өнеркәсібі және құрылыс салаларына берілген. Яғни, оның саны 15 мыңнан асады. Сондай-ақ педагогика ғылымына 8 мың 376, ақпараттық-байланыс технологиялары саласына 6 мыңдай,&nbsp; медицинаға 2 мың 700 және «Мәңгілік ел жастары – индустрияға!» жобасы аясында оқитын студенттерге 5 мың 109 оқу гранты берілген.

Биыл білім гранттары қай салаға көп бөлінді?

<a href="https://kyzylorda-news.kz/">Kyzylorda-news.kz.</a> Рубик кубигін жылдамдыққа құрау – ол өз алдына жеке спорт. Ал осы түрлі түсті шаршыдан картина жасау – бұл өнер. Спидкубинг саласында үздік атанып, қазіргі уақытта Рубик кубигінен бірнеше картина жасаған алматылық студентпен жүргізілген сұқбатты назарға ұсынамыз.
<img src="https://kyzylorda-news.kz/wp-content/uploads/2019/12/kwbik1.jpg" alt="" />
Асан Айбар Нұрқұланұлы. Жасы – жиырмада. Шет тілдер және іскерлік карьера университетінің маркетолог мамандығы бойынша 2-курс студенті. Ол Тәуелсіздік мерекесіне арнап “Барыс” картинасын, Абайдың 175 жылдығына орай “Абай” және Тұңғыш Президент күніне “Елбасы” портреттерін Рубик кубигінен жасап шықты.
Спидкубинг спорты жайлы. “Бәрі былай басталды”
2012 жылдың жазынан бастап Рубик кубигін құрауға қызыға бастадым. Бәрі былай басталды. Ойыншықтарымның арасында түрлі түсті Рубик кубигі жататын. Бірақ оны мүлде қолға алмайтынмын. Бір күні осы ойыншыққа қарап, неге екені белгісіз құрап көргім келді. Алғашында өзім құрауға тырысып көрдім, кейін Youtube-тің көмегімен құрау тәсілдерін көрсететін видеолар қарап, ақыры меңгердім. Алғашында бір кубикті 5 минут құрайтынмын. Қызығушылықтың арқасында бұл көрсеткішті жарты жылда 30 секундқа дейін қысқарттым. Қазіргі уақытта жеке рекордым – 11,72 секунд.
<img src="https://kyzylorda-news.kz/wp-content/uploads/2019/12/kwbik2.jpg" alt="" />
Шынымды айтсам, менің мұндай жетістікке жетуіме Нұркен деген досымның да септігі тиді деп ойлаймын. Өйткені біз үнемі кубикті жылдамдыққа құрап жарысатын едік. Екеуміздің біріміз рекорд қойсақ, келесіде сол рекордты міндетті түрде бұзуға асығатынбыз. Бұл екеумізге де үлкен стимул болды.
Мен бұл салаға қызыға бастағанда, маған кубикті құрау тәсілдерін нақты, қысқа-нұсқа түсіндіріп беретін адам немесе видео табылмады. Ал қазіргі уақытта бұл олқылықтың орны толды деп айта аламын. Youtube видеохостингінде Максим Чечнев деген ресейлік блогер бар. Осы азаматтың контентіне көңілім толады. 25 сабаққа бөлінген оның видеоларынан кубикті құраудың қыр-сырын, құпияларын толық меңгеруге болады. Дегенмен, бұл материалдардың барлығы орыс тілінде. Өкінішке қарай, Рубик кубигін құрастыру техникаларын қазақы тілмен түсіндірген бір де бір видео көрген жоқпын.
Спидкубинг саласында қазақ балалары саусақпен санарлық. Тіпті, бар дегеннің өзінде олар орыстілді қазақтар немесе қазақша ежіктеп сөйлегенімен бәрібір орысша ойланатын адамдар. Біздің қоғам кубикті тек ойыншық ретінде көретін сияқты. Ой өрісі, ойлау жүйесі енді қалыптасып келе жатқан балаға бұл құралдың тигізетін пайдасы көл-көсір екенін білмейтін болар, мүмкін.
Спидкубингте түрлі дисциплина бойынша жарыс өтеді. Ең негізгісі 3*3 кубигін құрау. Бұл дисциплина бойынша әлем рекорды (3,47 секунд) қытайлық Yusheng Du есімді азаматқа тиесілі. Ал Қазақстандық рекорд – 6,44. Маусым айында өткен Cubing Semey Open 2019 байқауында бұл рекордты небәрі 10 жастағы Абылай Оразалин орнатты.
<img src="https://kyzylorda-news.kz/wp-content/uploads/2019/12/kwbik3.jpg" alt="" />
Мен бұл салаға қызыға бастағанда Қазақстанда бір де бір жарыс ұйымдастырылмайтын. Ал біз досым екеуіміз өзімізді үлкен байқауларда сынап көргіміз келді. Қазақстанда спидкубингтен жарыс ұйымдастырылмайтындықтан, бізге сол кезеңде ең тиімдісі Челябинскте өтетін чемпионат болды. Жол шығынын, қатысу жарнасын есептегенде үлкен қаржылық қиындыққа тап болдық, соңында амалсыз бара алмадық. Спидкубингтен Қазақстанда алғашқы жарыс 2017 жылы&nbsp; өтті. Арман Машимов есімді азамат біздің елде алғаш болып спидкубинг саласына көңіл бөліп, Қазақстанда Спидкубинг федерациясын құрды. Осы ұйымның арқасында жыл сайын Алматы, Нұр-Сұлтан, Семей қалаларында дәстүрлі түрде түрлі жарыстар ұйымдастырылуда.
Алматылық спидкуберлер өте ұйымшыл. Біз айына 1-2 рет міндетті түрде бас қосып, осы салаға қатысты әңгімелесіп, ортаны кеңейтіп, бұл салаға енді қызығып жүрген жастарды өзімізге тартуға тырысамыз. Мұнда көбіне танымал спидкуберлер өздерінің тәжірибелерімен бөлісіп, керек ақпараттар айтады.
Спидкуберингте жас мөлшеріне шектеу жоқ. Дегенмен, байқасаңыз, бұл салада көбіне мектеп оқушыларының мерейі үстем. Себебі, ересек адамға қарағанда кішкентай баланың миы жылдам жұмыс істейді. Олар көргенін бірден қағып алып, есте сақтап қалуға қабілетті.
Рубик кубигінен картина жасау. “Алғашқы туындым анама арналады”
2015 жылы Максим Чечнев атты ресейлік спидкубер Украинада өтетін “Україна має талант” бағдарламасына қатысып, финалдық сайыста Рубик кубигінен жюри мүшесінің портретін жасап шықты. Таңқаларлығы, оның көзі байлаулы болды.
Максимнің бұл өнері маған ерекше әсер берді. Осы сәттен бастап оны әлеуметтік желіде бақылай бастадым. 2015 жылдың аяғында ол Алматыға арнайы шақыртумен келе жатқанын өз парақшасында хабарлады. Бұл хабарды естіп, бірден досым Нұркенге айттым. Екеуіміз ретін тауып, Алматыда онымен кездесіп қалудың жоспарын құрдық. Жоспар жүзеге асты. Алматының белгілі қонақүйлерінің біріне жайғасқан Максимге Skype арқылы қоңырау шалып, танысып, көріссек деп ниет білдірдік. Ол ұсынысты қуана-қуана қабыл алды. Алматыға қазақстандық кәсіпкердің шақыртуымен кубиктен портрет жасауға келген екен. Максимнің қолқа салуымен бұл жұмысқа біз де араласып, оған қолғабыс қылдық. Осы уақытта ол бізге бұл өнердің қыр-сырын, түрлі амал-тәсілдерін, құпияларын үйретті.
Осы уақытқа дейін төрт картина жасадым. Алғашқысын анамның туған күніне сыйлық ретінде інім екеуіміз құрадық. Екіншісін Абай Құнанбаевтың 175 жылдық мерейтойына арнап атамыздың портретін жасап шықтым. Тұңғыш Президент күнінде Елбасы Нұрсұлтан Назарбаевтың, Тәуелсіздік мерекесіне Қазақстанның ұлттық символына баланатын “Барыс” суретін құрадым. Портретті жасауға шамамен 4 сағат уақыт кетті. Туындыны 400 дана кубиктен жасап шықтық.
Асан Бекаман Нұрқұланұлы: Алматы қаласындағы #77-мектептің 7-сыныбында оқимын. Мен Рубик кубигін құрауды ағамның көмегімен осыдан екі жыл бұрын үйрендім. Құрау тәсілдерін, техникасын жақсы білемін. Бірақ, бұл салаға деген қызығушылығым ағамның қызығушылығына қарағанда төмен. Әр адам әртүрлі ғой. Көрдім, қызықтым, үйрендім, қойдым. Мұнымен әрі қарай айланысуды мақсат еткен жоқпын. Анамның туған күніне ерекше бір сыйлық жасағымыз келіп, екеуіміз ақылдасып, соңында кубиктен жасалған анамның портретін сыйға тарттық. “Нағыз сыйлық – ол қолдан жасалған сыйлық” дейді ғой. Анамызға қатты ұнады.
<a href="https://massaget.kz/layfstayl/bilim/60092/">Massaget.kz</a>

Тәуелсіздік, Абай, Елбасы. Студент Рубик кубигінен картина жасады

<a href="https://kyzylorda-news.kz/">Kyzylorda-news.kz.</a> Атырау қаласындағы Назарбаев зияткерлік мектебінің 12-сынып оқушысы Бибарыс Ғилаж еріктілердің қызметіне арналған жаңа мобильдік қосымшаны жасап шығарды, деп хабарлады&nbsp;<a href="https://24.kz/kz/zha-aly-tar/bilim-zh-ne-ylym/item/360647-aza-standy-o-ushy-zha-a-leumettik-zheli-ojlap-tapty">«Хабар 24»</a>.
Ол «Шаңырақ» ұялы бағдарламасына қайырымдылық пен әлеуметтік жобаларды жүзеге асыратын еріктілер үшін қажетті деректерді жинаған. Мобильді қосымшаны қолданушылар бір-бірімен тұрақты хабарласуға және деректер алмасуға мүмкіндігі бар. Мұнда кәдімгі әлеуметтік желі сияқты тіркелушілер жеке профильдік-аккаунт ашады және қосымшадағы басқа да қолданушыларды қауымдастықтарға енгізе алады.
<blockquote>
 «Мемлекет басшысы Қасым-Жомарт Тоқаевтың жарлығымен келесі жыл елімізде Еріктілер жылы деп белгіленді. Менің білуімше, қазіргі ақпараттық кеңістікте барлық қазақстандық еріктілердің басын қосатын және олар туралы ресми мәлімет беретін деректер қоры жоқ. Бұл мобильді қосымша арқылы мен осындай проблемаларды шешудің жолын іздедім. «Шаңырақ» ұялы бағдарламасында жергілікті және басқа да аймақтағы еріктілер туралы ақпараттар, олардың өткізетін шаралары туралы хабарламалар жарияланып тұрады. Жобаның баламасы ретінде танымал әлеуметтік желілерді де айтуға болады. Бірақ оларды пайдаланудағы қауіпсіздік ережелері барлық кезде сақтала бермейді. Ал мен дайындаған мобильді қосымша белгілі қауіптерді алдын-алуға және жасырын деректердің таралмауына септігін тигізбек. Қосымшада тек әрбір адамға қажетті негізгі функциялар қолжетімді болады. Мұнда қажетсіз жарнамалар мен спам ескертулер болмайды»,&nbsp;–&nbsp;деді Бибарыс.
</blockquote>
Мобильді қосымша Android Studio негізінде Java көмегімен жұмыс істейді. Жақын арада ұялы телефондарға арналған көмекші құрал Play-market-те қолжетімді болмақ. Жас өнертапқыштың бұл жұмысын қазылар алқасы мектепшілік және республикалық кезеңдердегі ғылыми-жобалар сайысында жоғары бағалаған. Соның бірі ағымдағы жылдың қыркүйегінде өткен Қазақстан Жастары Конгрессының инновациялық жобалар байқауы.
<blockquote>
 «Енді авторлық туындыға пантент алу және оны кең көлемді қолданысқа енгізу қалды», – дейді Бибарыс Ғилаж.
</blockquote>
Оның айтуынша, болашақта бұл мобильді қосымша еріктілердің жұмысын едәуір жеңілдетеді. Олардың нәтижелі жұмысын жан-жақты көрсетуге, белсенділер мен жаңа қолданушыларды анықтауға мүмкіндік бермек.
Назарбаев зияткерлік мектебінің болашақ түлегі Бибарыс Ғилаж бағдарламалау курсымен бірнеше жылдан бері айналысады. Ол түрлі облыстық және республикалық IT технологиялар мен робототехника сайыстарының жүлдегері. Ағымдағы жылы АҚШ-ң Стенфорд университетінде бағдарламалау, көшбасшылық және әлеуметтік ғылымдар курсын сәтті тәмамдап шыққан.

Қазақстандық оқушы жаңа әлеуметтік желі ойлап тапты

Kyzylorda-news.kz. Қызылорда облысының әкімі қызметін 6 жылдан астам уақыт атқарған Қырымбек Көшербаев өңірдің әлеуметтік-экономикалық дамуына үлкен үлес қосты. 
Ол 1978 жылы В.И.Ленин атындағы Қазақ политехникалық институтын инженер-құрылысшы мамандығы бойынша бітірген.
1991 жылы КОКП Орталық комитетінің жанындағы қоғамдық ғылымдар Академиясының аспирантурасын бітірді. Философия ғылымдарының кандидаты (1991 жыл), саясаттану ғылымдарының докторы (1997).&nbsp;
1978 – 1979 жылдары Қызылорда қаласында қаласында «Главрисхозстрой» мекемесінде инженер, өндірісті дайындау тобының бастығы.
1979 – 1981 жылдары Бүкілодақтық екпінді комсомол құрылыс штабы Қызылорда облысы күріш инженерлік жүйесінің бастығы.
1981 – 1982 жылдары Қазақстан ЛКЖО Орталық комитетінің комсомолдық екпінді құрылыс ұйымдары секторының меңгерушісі.
1982- 1983 жылдары Қазақстан ЛКЖО Орталық комитетінің жауапты ұйымдастырушысы.
1983 – 1986 жылдары Қазақстан ЛКЖО Қызылорда қалалық комитетінің бірінші хатшысы.
1986 – 1987 жылдары Қазақстан ЛКЖО Орталық комитетінің комсомолдық ұйымдар бөлімі меңгерушісінің орынбасары.
1987 – 1988 жылдары Қазақстан ЛКЖО Орталық комитеті мәдениет бөлімінің меңгерушісі.
1988 – 1991 жылдары Мәскеу қаласында КОКП Орталық комитеті жанындағы қоғамдық ғылымдар Академиясының аспиранты.
1991 жылы Қазақ КСР Президенті Аппаратының мәдениет және ұлтаралық қатынастар Референтурасының референті.
1991 – 1994 жылдары Қазақстан Республикасы Премьер-Министрі орынбасарының көмекшісі.
1994 – 1995 жылдары Алматы қаласы &nbsp;Калинин аудандық әкімшілігінің басшысы.
1995 жылы Қазақстан Республикасы Министрлер Кабинеті Аппараты жетекшісінің орынбасары ішкі саясат бөлімінің меңгерушісі.
1995 – 1996 жылдары ҚР Үкіметі Аппараты жетекшісінің орынбасары аумақтық даму бөлімінің меңгерушісі.
1996 – 1997 жылдары Қазақстан Республикасы Президентінің баспасөз хатшысы Баспасөз қызметінің жетекшісі.
1997 – 1999 жылдары Қазақстан Республикасы Білім, мәдениет және денсаулық сақтау министрі.
1999 жылы Қазақстан Республикасы Денсаулық сақтау, білім беру және спорт министрі.
1999 – 2000 жылдары Қазақстан Республикасы Білім және ғылым министрі.
2000 – 2003 жылдары Батыс Қазақстан облысының әкімі.&nbsp;
2003 – 2006 жылдары Қазақстан Республикасының&nbsp;Ресей Федерацмясындағы Төтенше және Өкілетті Елшісі&nbsp;Қазақстан Республикасының Финляндия Республикасындағы Төтенше және Өкілетті Елшісі.&nbsp;
2006 жылдан 2011 жылдары Маңғыстау облысының әкімі.&nbsp;
2012 жылдың 13 шілде күні Мемлекет басшысының Өкімімен Қазақстан Республикасы Президентінің кеңесшісі қызметіне тағайындалды.
2012 жылдың 26 қыркүйек күні Президент Жарлығымен Қырымбек Көшербаев Президент Кеңесшісі қызметінен босатылып , Қазақстан Республикасы Премьер-Министрінің орынбасары болып тағайындалды.
2013 жылдан 2019 жылға дейін Қызылорда облысының әкімі қызметін атқарды.
Сондай ақ &nbsp;“Қызылорда облысының Құрметті азаматы” &nbsp;атағы режиссер, Қазақстан Республикасының еңбек сіңірген қайраткері Хұсейін Әмір-Темір Жүсіпұлына, еңбек ардагері, Қазақстанның еңбек сіңірген қайраткері Қайруллаев Қорғанбек Қайруллаұлына да табысталды.

Қырымбек Көшербаев Қызылорда облысының Құрметті азаматы атанды

<a href="https://kyzylorda-news.kz/">Kyzylorda-news.kz.</a> Желтоқсан оқиғасының құрбандарының бірі – Қайрат Рысқұлбековтің ата-анасына жазған «Соңғы хаты» мен&nbsp;сот залында айтқан әйгілі Ақтық сөзі» һәм&nbsp;өсиет-аманаты&nbsp;кім-кімді де терең толғанысқа,&nbsp;тебіреніске&nbsp;қалдырары сөзсіз.
«…Иә, мен сiздерден еш жасырмаймын, мен 18 желтоқсан 1986 жылы алаңға бардым, көпшiлiкпен бiрге. Барғанда да Қонаевтың күйiн күйттеп барған жоқпын. Тек қана, ол жерге барған себебiм, бар мақсатым, бiрiншiден, ол жерде не болып, не iстеп, не қойып жатқанын өз көзiммен көру болды. Екiншiден, алаңда қазақтың уыздай жас қыздарын ұрып-соғып, өлтiрiп жатыр дегендi елден естiген соң, өз басым қолымды жайып «күл болмасаң, бүл бол» деп отыруға еркектiк ар-намысым еш жетпедi. Ер қатарында ер қара боп, саны бар, сапасы жоқ боп, ербеңдеп жүрген намыссыз еркек мен емеспiн, құдайға шүкiршiлiк, менiң де көркейген кеудемде нағыз ерге лайық «намыс» баршылық.
&nbsp;Оның үстiне «қыздың жолы жiңiшке» деген. Менiң түсiнiгiмше, әйел адамға ер адамдар тұрмақ, аң екеш аңдардың, хайуандардың еркегi де ұрғашысына мүйiз, я болмаса тұяғын көтермейдi. Ал, бiз бәрiмiз де аң емес, адамзаттың ұлы — адамбыз, сондықтан, ер адам әйел затына қол көтерiп, қол жұмсауға тиiс емес, әуелi еш правосы жоқ. Мiне, қысқаша айтқанда, осындай түсiнiкпен, әйел затына ер болып өз қолұшымды берiп, көмектесуге, оларды арашалап-қорғау үшiн барғаным рас. Сол жерде қолымнан келгенше бiр көмегiмдi бергенiм де рас. Ол үшiн әлi күнге дейiн еш өкiнбеймiн, керiсiнше, үлкен мақтаныш тұтамын. Бiрақ та, бiр Құдай өзi куә, адам баласын еш өлтiргенiм жоқ. Мұндай айуандық жасаудың өзi, сормаңдай менiң қолымнан келмейдi. Еш уақытта, ешқашан да…
Ал, әйел затына айуандықпен қол көтерiп, шашынан тартып, көкпарша сүйрегенi үшiн бiр милицияны ұрып-соққаным өте рас. Ол адам күнi бүгiнге дейiн аман-есен зыр жүгiрiп жүр. Өз қолыммен жасаған бар терiс қылық, бар қылмысым осы ғана».
Назарларыңызға&nbsp;Қайрат Рысқұлбековтың “Ақтық сөз” атты өлеңін ұсынамыз:
Ақтық сөз
Елбең-елбең жүгірген,
Ебелек отқа семірген
Арғымақ мінген жаратып,
«Ақ сауыт киген темірден,
&nbsp;Алатаудай бабалар,
Аруағыңмен жебей көр!»
Ұлы Ленин бабамыз
Қатарға тең деп тартқан соң,
Компартия басқарып,
Достық отын жаққан соң,
Аға дедік орысты,
Әділдігі жаққан соң.
Ал енді қазір неткен күн,
&nbsp;Орыстан ынсап кеткен күн.
Тізесі қатты батқан соң,
Шыдамастан ақыры,
Қарғыс атқан Алаңда
Қарғыс атқыр жеткен күн.
Қаймана қазақ қамы үшін
&nbsp;Қарусыз шықтық Алаңға.
Алыстан әскер алдырып,
Қырып салды-ау табанда.
Сөйлесем даусым жетпейтін
Кез болдық мынау заманға.
Шовинизм еді ғой
Басты себеп жанжалға.
Екі жүзің қырылып,
Екі жүзің ұрылып,
Екі жүзің сотталып,
Жоқтаусыз кетіп барасың!
Қатарым жусап қалғанда,
Қыршынымнан қиылып,
Солармен бірге өлсемші-ай!
Артта қалған ата-анам,
Арулап қолдан көмсеңші-ай!
Тұтқынға түстім жаутаңдай,
Жоламай ешкім қасыма.
Бара қалсаң, сәлем айт,
Сырттағы құрбы-досыма.
«Ақтық сөзің не?» деген
Бүгін қойды сот сұрақ.
Айтайын оны халқыма:
Жоқ пиғыл менде жасымақ.
Қорлай да беріп қайтадан,
Титыққа орыс жетпесін.
Туған жердің намысы,
Бөтен қолда кетпесін.
Салт-санадан айырылып,
Арақтан ұрпақ азбасын.
Ел көркейтер азамат
Қызғаныштан тозбасын.
Абай туған жерінде
Бомбасын атом жармасын.
Құлыптасты қиратып,
Өлігіңді қазбасын.
Өз ұлтыңның басшысын
Орнынан сүйреп алмасын.
Үміт еткен Мәскеуден
Қарадай көңілің қалмасын.
Ленин салған сара жол.
Қолдаушысыз болмасын.
Барлық ұлтпен тең болып,
Ешкімнен көңілің қалмасын.
Ендігі жерде басыңнан
Бірлік пен бақ таймасын.
Осы айтылған ақтық сөз
Туың болсын әрдайым.
Мойныма алып жаланы,
Мен болайын құрбаның.
Бас-аяғы сол болсын
Басыңа түскен қатердің.
Ақтық сөзді енді мен
Сотқа да бір айтайын:
Күнәдан таза басым бар,
Жиырма бірде жасым бар,
Қасқалдақтай қаным бар,
Бозторғайдай жаным бар,
Алам десең, алыңдар!
Қайрат деген атым бар,
Қазақ деген затым бар.
«Еркек тоқты – құрбандық»,
Атам десең, атыңдар!
Мен не етермін, не етермін,
Мен келмеске кетермін.
Көрмеген, қош бол, таңдарым,
Көре алмай мен өтермін.
Қош, аман бол, артымда
Ағайын, туған азамат!
Артымда қалған ата-анам,
Ел-жұртым, саған аманат!

Қайрат Рысқұлбековтің &#8220;Ақтық сөзі&#8221;

<a href="https://kyzylorda-news.kz/">Kyzylorda-news.kz.</a> 16 желтоқсан – ата бабамыздың арманы орындалып, жасампаздығымызды жаңа белеске көтерген Тәуелсіздік күні. 1991 жылғы 16 желтоқсанда Елбасы Нұрсұлтан Назарбаев қол қойған Конституциялық Заңнан бастау алған тәуелсіздігімізге 28 жыл толды.
Бұл атаулы күн 1991 жылғы желтоқсанның 16-сында Қазақстан Республикасының Тұңғыш Президенті Н.Ә.Назарбаев қол қойған «Қазақстан Республикасының мемлекеттік тәуелсіздігі туралы» және 2008 жылғы 25 маусымдағы және 2009 жылғы 22 сәуірдегі заңдармен өзгертулер енгізілген 2001 жылғы желтоқсанның 13-інде «Қазақстан Республикасындағы мерекелер туралы» Қазақстан Республикасы заңдарына сәйкес атап өтіледі.&nbsp;
Тарихқа көз жіберетін болсақ, Тәуелсіздік – 1986 жылғы Желтоқсан оқиғасында алаңға шыққан жастардың ерік-жігері, ең алдымен барша қазақстандықтардың арман-мұратының салтанат құруы. Патша дәуірінде де, Кеңес Одағы кезінде де тәуелсіздікке деген ұмтылыс халықтың едеуір бөлігінде қалыптасты. Біз бірнеше жүз жыл отаршылдықтан кейін ХХ ғасырдың аяғында қайта жаңғырған мемлекетпіз. Тәуелсіздік – бұл азап пен төзімнің, халықтың сан ғасырлар бойы еркіндікті аңсаған шыдамының өтуі. Қазақстанның тәуелсіз, егеменді ел ретінде танылғанына міне он тоғыз жыл толып отыр. Тәуелсіздік сияқты ұлттық мерекені бүгінгі таңда қазақ халқы жүрегімен сезінуі керек. Тәуелсіз елдің ең басты тұғыры ол қоғамның, сол мемлекеттегі жергілікті ұлттың рухы, жігері, қоғамдық санасы. Басты байлық жай ұлттық мүдде емес, азаматтардың мүддесі мен қажеттілігі. Жаңа әлемдегі жаңа Қазақстанның бүгінгі құдіретті күші ел бірлігінде, ұлттар татулығында жатыр. Қазақстан үшін ХХI ғасыр тарихының парағы парасат пен пайымға толы.
Біздің стратегиялық міндетіміз ең бірінші тұрғындардың өмірінің сапасы мен тұрмыстық деңгейін көтеру болып табылады. Желтоқсан көтерілісі — 1986 жылы 17-19 желтоқсан аралығында Алматыда болған қазақ жастарының КСРО үкіметінің отаршылдық, әміршіл-әкімшіл жүйесіне қарсы наразылық іс-қимылдары. Бостандыққа, тәуелсіздікке ұмтылған қазақ халқы тарихындағы елеулі оқиға болып табылады. Желтоқсан көтерілісіне КОКП ОК-нің қаулысымен “қазақ ұлтшылдығының көрінісі” деген баға беріліп, көтеріліске қатысқан азаматтар қуғын-сүргінге ұшырады. КСРО-ның тоталитарлық, отаршыл саясатына қарсы қазақ жастарының азаттық күресі тарихи маңызы бар үлкен оқиға болды.
1991 жылы КСРО ыдырап, Одақтың құрамындағы елдер өз алдарына жеке мемлекет болып жатты. Солардың қатарында Қазақстан да болды. 1991 жылы 16-желтоқсанда Қазақстанның Жоғарғы Кеңесі “Тәуелсіздік пен мемлекеттің егемендігі туралы” заңды қабылдады. Ескеретіні, Қазақстан КСРО құрамындағы елдердің арасында ең соңғысы болып Тәуелсіздігі туралы заңды қабылдады. Бұл заң 1990 жылы 25-қазанда қабылданған Қазақстанның Егемендігі туралы Декларациямен бірге Қазақ елінің елдігін нығайта түсті.
Қазақстанның Тәуелсіздігін ресми түрде ең алғаш болып мұхиттың арғы жағында жатқан Америка Құрама Штаттары мойындады, екінші болып айдаһардай айбарлы Қытай, сонан соң Ұлыбритания мойындады. Оның артынан Моңғолия, Франция, Жапония, Оңтүстік Корея және Иран Ислам мемлекеті мойындады. Иран — Қазақстанның тәуелсіздігін мойындаған алғашқы мұсылман мемлекеті. Ал “Тәуелсіздігімізді ең алғаш болып бауырлас Түркия мемлекеті мойындады” деген сөздің ақиқат еместігін білгеніміз жөн. Түркия алғаш болып Қазақстанда өз елшілін ашты, бірақ тәуелсіздігімізді мойындауда он жетінші болды. Бұл деректі еліміз Тәуелсіздік алғаннан кейін Сыртқы істер министрінің орынбасары қызметін атқарған, елдің сыртқы саясат тұжырымдамасы авторларының бірі болған Вячеслав Ғиззатов келтірген. ҚР Сыртқы Істер министрлігінде тіркелген дипломатиялық құжаттарда Түркияның Қазақстан тәуелсіздігін ресми түрде мойындайтын протоколға 1992 жылдың 2-наурызы күні қол қойғандығы көрсетілген. Алғашықы күндері әлемнің салмақты елдері мойындап, кейіннен басқа да елдер мойындап жатты. Осылайша әлемдік саясат аренасында Қазақстан деген мемлекет тәй-тәй басты. Небары бірнеше аптаның ішінде әлемнің көптеген беделді елдері Қазақ елінің тәуелсіздігін мойындап, дипломатиялық қатынастар басталды.
«Осы қиындықтарға қарамастан, тәуелсіздіктің 24-ші жылы жадымызда көптеген жан толқытарлық, Қазақстан үшін айрықша мәні бар оқиғаларымен есте қалады. Біз экономикамыздың оң өсімін сақтадық. Индустриялық дамудың екінші бесжылдығы және «Нұрлы жол» бағдарламасы басталды. 2015 жылы 800 миллиард теңгенің 120 жобасы іске қосылды, 10 тұрақты жұмыс орны ашылды, мыңдаған шаршы метр баспана пайдалануға беріліп, оларға жастар мен аз қамтылған отбасылар қоныстанды», – деді Қазақстан Президенті ел өмірінде болған өзге де айшықты оқиғаларға тоқталып.
Қазақстан Дүниежүзілік сауда ұйымына кірді. Еуразиялық экономикалық одақ жұмысын бастады. Әлемдік жетекші экспорттаушылардың елулігі қатарына қосылып, 43-орынды иеленді. Қазақстан МАГАТЭ-мен бірлесіп, Ядролық отын банкін құрды, ол біздің елге орналастырылады. Үшінші ғарышкеріміз Айдын Айымбетов Жер төңірегіндегі орбитаға сапар шекті.
<img src="https://kyzylorda-news.kz/wp-content/uploads/2019/12/16-zheltoqsan-1.jpg" alt="" />
<img src="https://kyzylorda-news.kz/wp-content/uploads/2019/12/16-zheltoqsan-2.jpg" alt="" />
<img src="https://kyzylorda-news.kz/wp-content/uploads/2019/12/16-zheltoqsan-3.jpg" alt="" />
<img src="https://kyzylorda-news.kz/wp-content/uploads/2019/12/16-zheltoqsan-4.jpg" alt="" />

16 желтоқсан – Қазақстан Республикасының Тәуелсіздік күні

Қазақстан Республикасының Ұлттық мейрамы – Тәуелсіздік күні
1991 жылы Қазақстан Республикасының Президенті Нұрсұлтан Назарбаев «Қазақстан Республикасының Мемлекеттік тәуелсіздігі туралы» Конституциялық заңға қол қойды. Қазақстанның Мемлекеттік тәуелсіздігі жарияланды.
Қазақстанда энергетиктер күні
Энергетиктердің кәсіби мерекесі Қазақстан Республикасы Президентінің 1998 жылғы 20 қарашадағы Жарлығына сәйкес, желтоқсанның үшінші жексенбісінде аталып өтіледі.
1991 жылы «ҚазАқпарат» (ҚазТАГ) алғашқы болып әлемге Қазақстан Республикасының мемлекеттік тәуелсіздігі жарияланғанын хабарлады.
1994 жылы Қазақстан Республикасының Президенті Н.Ә. Назарбаев өз резиденциясында ЕуроОдақ Комиссиясының Қазақстандағы тұрақты өкілі Роберт Кремердің сенім грамотасын қабылдады. Елбасы Алматыда ЕуроОдақ өкілдігінің ашылуы Қазақстан мен Еуропа арасындағы экономикалық, саяси байланыстардың дамып, еуропалық серіктестермен сауда-саттық, іскерлік қатынастардың жолға қойылуына едәуір көмек көрсетеді деп атап өтті.
1996 жылы Алматыдағы Республика алаңында Тәуелсіздік монументінің ашылу салтанаты болды.
1996 жылы Алматыда бесжұлдызды «Анкара» қонақ үйінің ашылу салтанаты өтті. Аталған шараға Қазақстан мен Түркияның Президенттері қатысты.
1997 жылы Қазақстанның Ұлттық банкі ұлы жазушы М.Әуезовтің 100 жылдығына арналған құны 20 теңгелік металл естелік шақаларын айналымға шығарды.
2000 жылы Алматыда Абылай ханға ескерткіш ашылды. Ескерткіш авторы, мүсінші – Нұрлан Далбаев. Абылай хан, Әбілмансұр (1711-1781) – қазақ ханы. Арғы тегі Жошы хан, бергі бабалары қазақ елінің негізін салған Әз-Жәнібек, одан соң Еңсегей бойлы Ер Есім хан, Салқам Жәңгір хан. Абылай – Жәңгір ханның бесінші ұрпағы.
2016 жылы Мемлекет басшысы Нұрсұлтан Назарбаев Тəуелсіздіктің 25 жылдығына орай Астанада жаңа 25 қырлы монументті ашты. «Тәуелсіздіктің 25 жылдығы» монументі – болаттан өрілген қаңқаны табиғи тастан қашалған қаптамамен орау арқылы тұрғызылған көпбұрышты фигура. Оны салуға 1319 тас жұмсалды. Соның 1069-ы бірегей өлшемде жеке-жеке қашалып жасалды, ал 250-і типтік тастар болды. Тастардың жалпы салмағы – 94,5 тонна.

16 желтоқсан: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 16 желтоқсанға арналған жұлдыз-жорамалы.
Тоқты
Жаңашылдыққа ұмтылудың қажеті жоқ. Мұндай өзгерістерді келер жылдың еншісіне қалдырғаныңыз жөн. Биыл бастаған шаруаларыңызды тиянақты етіп бітіргеніңіз жөн.
Торпақ
Бүгінгі күн жолға шығуға қолайлы. Барлық уақытыңызды отбасыңызға, балаларыңызға арнаңыз. Яғни, отбасыңызбен бірге жолға шығыңыз. Оларды қыдыртып, көңіл көтеріңіздер.
Егіздер
Айналаңыздағы адамдар сіздің іс-әрекетіңізді ерсі көруі мүмкін. Сондықтан өзіңізді ортада қалай ұстау керектігін ұмытпаңыз. Түстен кейін романтикалық кездесуге барасыз.
Шаян
Өзгерісті қалап жүрсіз. Алайда дәл қазір әлденені өзгертуге ерте. Маңызды мәселелерді де кейінге қалдырғандарыңыз жөн. Оның орнына үйдегі құжаттардың түзейтіндерін ретке келтіріңіз. &nbsp;
Арыстан
Өзіңіздің күшіңізді жоғары бағалап, серіктестеріңізді қорқытып алмаңыз. Олар сіздің бұл әрекетіңізді дұрыс түсінбей қалуы мүмкін. Сондықтан бүгінгі күн қандайда бір мәселені шешуге арналмаған.
Бикеш
Бүгін белсенділігіңіз төмендейді. Алайда еш қорықпаңыз. Барлық шаруаны дер кезінде орындап үлгеретін боласыз. Жұмыстағы тапсырмаларды да, үй ішіндегі тіршілікті де өз уақытында бітіресіз. &nbsp;
Таразы
Маңызды сауалдарға жауап табамын деп әуре болмаңыз. Өйткені жауап тапқаныңызбен оны іске пайдалануға еш мүмкіндігіңіз жоқ. Оның орнына үй шаруасымен айналысқаныңыз жөн.
СарышаянБүгінгі күн серуендеуге, байланыс орнатуға және саяхатқа шығуға қолайлы болмақ. Болашағыңызға тікелей қатысы болатын жандармен таныс боласыз. Сонымен қатар бүгін өзіңізді ұрыс-керістен аулақ ұстаңыз.
Мерген
Керемет күн. Барлық туындаған мәселені оңай шеше аласыз. Сонымен қатар жыл соңына дейін жоспар құрмаңыз. Сондай-ақ бүгін жақын адамыңыздан сый алып, жақсы жаңалық естейсіз.
Тауешкі
Белсенділігіңіз төмендеп кетеді. Оған себеп денсаулығыңыздың сыр беруі болмақ. Шаршаңқысыз, сондай-ақ жүйкеңізде сыр берген секілді. Сырқатыңыз асқынбай тұрғанда, ем алғаныңыз жөн.
Суқұйғыш
Бүгін жұмыстың «астында» қаласыз. Шаруа шаш етектен болғандықтан, біраз шаршап та қалуыңыз мүмкін. Бірақ сіз аз уақыт демалыстан соң қайта қалыпқа келіп, ісіңізді жалғастыратын боласыз.
Балықтар
Айналаңыздағылармен тіл табысуыңыз қиындайды. Алайда өзіңізді дер кезінде ұстасаңыз барлығы орнына келеді. Маңызды мәселелерде мұқият болыңыз. Өйткені шешімді өзіңіз шығарасыз.

Қазақстан және Қызылорда облысының жаңалықтары

Жұлдыздар не дейді?

Қазақстандықтардың 50% көгілдір отынға қосылған

Қазақстанда ықтиярхат қымбаттайды ма?

Желтоқсан оқиғасына қатысқан қазақ қыздары

Биыл білім гранттары қай салаға көп бөлінді?

Тәуелсіздік, Абай, Елбасы. Студент Рубик кубигінен картина жасады

Қазақстандық оқушы жаңа әлеуметтік желі ойлап тапты

Қырымбек Көшербаев Қызылорда облысының Құрметті азаматы атанды

Қайрат Рысқұлбековтің “Ақтық сөзі”

16 желтоқсан – Қазақстан Республикасының Тәуелсіздік күні

16 желтоқсан: Атаулы күндер мен оқиғалар

Жұлдыздар не дейді?

Қазақстан және Қызылорда облысының жаңалықтары

Жұлдыздар не дейді?

Қазақстандықтардың 50% көгілдір отынға қосылған

Қазақстанда ықтиярхат қымбаттайды ма?

Желтоқсан оқиғасына қатысқан қазақ қыздары

Биыл білім гранттары қай салаға көп бөлінді?

Тәуелсіздік, Абай, Елбасы. Студент Рубик кубигінен картина жасады

Қазақстандық оқушы жаңа әлеуметтік желі ойлап тапты

Қырымбек Көшербаев Қызылорда облысының Құрметті азаматы атанды

Қайрат Рысқұлбековтің &#8220;Ақтық сөзі&#8221;

16 желтоқсан – Қазақстан Республикасының Тәуелсіздік күні

16 желтоқсан: Атаулы күндер мен оқиғалар

Жұлдыздар не дейді?

Қайрат Рысқұлбековтің “Ақтық сөзі”