<a href="https://kyzylorda-news.kz/">Kyzylorda-news.kz.</a> 2-6 наурыз аралығында Қызылорда қаласында мемлекет және қоғам қайраткері Нәлқожа Ергешбаевты еске алуға арналған тоғызқұмалақтан ашық Азия кубогы өтеді.
Дүбірлі бәсекеге Ауғанстан, Әзірбайжан, Қырғызстан, Түркіменстан, Өзбекстан, Түркия, Ресей, Моңғолия, Босния және Герцеговина, Қазақстанның әр өңірінен келген тоғызқұмалақшылар шеберлік байқасады.
Жарыс классика бойынша 9 турда, 17 жасқа дейінгі жастар және одан жоғары жастағы ерлер мен əйелдер арасында 4 топта өткізіледі.
Айта кетейік, ашық Азия кубогы Қазақстанда жəне Қызылорда облысында алғашқы рет ұйымдастырылуда.
Жарыс 2 наурыз күні сағат 10.00-де “Нұрсəт” теннис орталығында басталады, 16.00-де А.Тоқмағамбетов атындағы мәдениет үйінде салтанатты ашылуы өтеді.
Турнир жеңімпаздары мен жүлдегерлерінің есімдері 6 наурыз күні белгілі болады.

Қызылордада тоғызқұмалақтан ашық Азия кубогы өтеді

<a href="https://kyzylorda-news.kz/">Kyzylorda-news.kz.</a> Көліктердің VIP санатындағы мемлекеттік тіркеу нөмірлері 2014 жылдан бері сатылымда бар. Қазақстандықтар қалауынша сандар тізбегін таңдап, бірдей әріптерге тапсырыс бере алады.
2019 жылы ел азаматтары авто ХҚО арқылы 3,018&nbsp;млрд теңгеге 12 658 ерекше тіркеу нөмірін сатып алған. Бұл қаржылай көрсеткіш 2018 жылмен салыстырғанда жарты миллиард теңгеге кем. Онда қазақстандықтар 14 909 VIP нөмірі үшін 3,560 млрд теңге жұмсаған. Айта кетейік, ол уақытта мамандандырылған ХҚО-мен қатар ерекше нөмірлерді полицияның тіркеу-емтихан алу бөлімдері де рәсімдейтін.
Бүгінде ерекше сандар мен әріптердің тізбегін көп сатып алатындардың рейтингін Алматы, Нұр-Сұлтан мен Шымкент қалаларының тұрғындары бастап тұр.
Көлік иелері жаңадан сатып алған темір тұлпарына ерекше нөмірлерді мамандандырылған ХҚО немесе egov.kz&nbsp; арқылы онлайн тіркеу барысында таңдай алады. Сондай-ақ егер азаматтың бұрыннан VIP-нөмірі болса, жаңадан алған көлігіне алты ай ішінде сол нөмірді қайта рәсімдеуге құқығы бар.
2020 жылы АЕК мөлшерінің өсуіне байланысты VIP-нөмірлердің бағасы келесідей өзгерді:
<img src="https://kyzylorda-news.kz/wp-content/uploads/2020/02/26tabnomera1.jpg" alt="" />

Қазақстандықтардың VIP көлік нөмірлеріне деген сұранысы азайған

<a href="https://kyzylorda-news.kz/">Kyzylorda-news.kz.</a> Соғыс жылдарында менің ата-анам да, корей отбасыларымен бірге Қиыр Шығыстан Сібірге – Краснояр өлкесіне, Хакас автономиялық республикасының Черногор қаласына жер аударылған болатын. Әжем өз әңгімесінде оларды олардың осы жаққа дейін қалай жеткендігі жөнінде, ызғарлы суықтың кесірінен жол үстінде туыстарының ауырып, суық пен аштықтан қайтыс болғандығын айтып отыратын. Мен сол әңгімелерді ешқашан ұмытпаймын.
<img src="https://kyzylorda-news.kz/wp-content/uploads/2020/02/26shin2.jpg" alt="" />
Менің туыстарым соғыстан кейінгі уақытта, Қазақстанға қоныс аударғанға дейін көп қайғы-қасірет шеккен еді. Әкем үнемі жаман халық болмайды, тек озбыр билік болатынын айтатын. Ол әрқашан «Қазақ елінде өмір сүріп жатқанымыз – біздің бақытымыз» деп айтып отыратын.
Уақыт өте келе, есейген сайын ата-анамыздың айналадағы адамдар туралы айтылған пікірін жиі еске аламыз. Менің де ата-анам үнемі қазақ халқына сыйластығы мол екенін, ерекше ілтипатпен қарайтынын айтып отыратын. Оған, әкемнің мына сөздері дәлел болмақ. «Қай қазақтың үйіне барсаңда, ол сені құшақ жая қарсы алады. Сен аш қалмайсың» деп айтып отыратын. Расыменде, қазақ халқы өзінің қонақжайлығымен ерекшеленіп тұрады. Сондықтан да болар халық Ассамблеясы тек Қазақстанда ғана бар. БҰҰ Бас Ассамблеясы Қазақстан халқы Ассамблеясының жұмыс тәжірибесін жаһандық деңгейде зерделеуді ұсынды.
1 наурыз – Қазақстан халқы Ассамблеясы құрылған күні көктемді осындай тамаша дәстүрде бастағанымыздың символдық мәні бар. Осы күні біздерге құшағын жайған қазақ халқына айтар алғысымыз көп.&nbsp; Біздің елімізде ешқашан соғыс пен ұлтаралық қақтығыстар болмасын, бейбітшілік пен достықтың туы желбірей берсін.
Ольга Григорьевна Шин,
Н.Илялетдинов атындағы №169 орта мектеп
директорының тәрбие ісі жөніндегі директоры

Ольга Шин: Қазақ халқы қонақжайлылығымен ерекшеленеді

<a href="https://kyzylorda-news.kz/">Kyzylorda-news.kz.</a> Сырдария ауданы әкімінің 2020 жылғы 14 ақпандағы №50-Ө Өкімімен Нұртазаев Талғат Мейрамханұлы Сырдария ауданы әкімінің орынбасары&nbsp; қызметіне тағайындалды.
<img src="https://kyzylorda-news.kz/wp-content/uploads/2020/02/26syrzamakim2.jpg" alt="" />
Талғат Нұртазаев 1984 жылы Сырдария ауданында дүниеге келген. 2005 жылы Қорқыт ата атындағы Қызылорда мемлекеттік университетін «экономист» мамандығы бойынша, 2012 жылы «Болашақ» университетін «құқықтану» мамандығы бойынша бітірген.
Еңбек жолын 2006 жылы Сырдария ауданы Қалжан ахун ауылдық округі әкімі аппаратында салықшы қызметінен бастаған. 2007-2014 жылдары Сырдария аудандық қаржы бөлімінің инспекторы, бас маманы, 2014 жылдан осы уақытқа дейін Қызылорда облысы бойынша тексеру комиссиясының бақылаушысы, мемлекеттік аудиторы жауапты қызметтерін атқарып келген.

Сырдария ауданы әкімінің орынбасары тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысы «Азаматтық қорғау мемлекеттік жүйесінің басқару органдары мен күштерін көктем кезеңіндегі төтенше жағдайлардың алдын алу және оларды жою жөніндегі іс-қимылдарға дайындау» тақырыбындағы «Көктем-2020» Республикалық командалық-штабтық оқу-жаттығуы өткізілді. Бұл туралы облыстық ТЖД баспасөз қызметі хабарлады.
Қызылорда облысы ТЖД Дағдарыс орталығында оқу-жаттығу штабы құрылып, лауазымды тұлғалардың кезекшілігі ұйымдастырылды.
Облыстық, қалалық және аудандық Төтенше жағдайлардың алдын алу және жою комиссиясының жедел тобының жеке құрамы жағдайдың шиеленісуіне және төтенше жағдайлардың туындауына байланысты жағдайды бағалау және жергілікті жерлерде тиісті басқару органдарының жұмысын ұйымдастыру үшін төтенше жағдай орын алған ауданға жедел жетуге&nbsp; дайын болды. Азаматтық қорғаудың мемлекеттік жүйесі аясындағы аумақтық кіші жүйенің күштері мен құралдары дайындыққа келтірілді. Әрбір құрылымдар бойынша нақты мүмкіндіктер мен есептер нақтыланды.
2020 жылдың 25 ақпан күні жергілікті уақытпен&nbsp; сағат 14:00 Талсуат елді мекенінің тұрғынынан 112 Біріңғай диспетчерлік қызметіне Қызылорда қаласы, Талсуат елді мекенінде Сырдария өзені бөгетінің бұзылғандығы туралы ақпарат түсті.
Қызылорда қаласынан төмен қарай 20 шақырым жерде орналасқан Талсуат елді мекенінің тұсында Сырдария өзенінен сең жүру кезінде мұзды кептеліс орын алып, салдарынан Сырдария өзенінің оң жаға қорғаныс бөгетінің 5 м бөгеті бұзылды.
Талсуат елді мекенінің мінездемесі: Қызылорда қаласының батыс беткейінде&nbsp;&nbsp; Сырдария өзеніне жақын орналасқан.&nbsp; Талсуат елді мекенінде&nbsp;&nbsp; 365 тұрғын үйде 1697 халық, оның ішінде 530 бала.&nbsp; Мал саны 710. аймақтың су басу қаупі бар аймағында&nbsp; 68 тұрғын үйде&nbsp; 588 тұрғын, 66 ірі мал, 120 уақ мал және 4 жылқы бар екені анықталды.
14:02 – Дағдарыс жағдайында басқару басқармасының жедел кезекшісі жедел әрекет ететін қызметтерді құлақтандырып, оқиға орнына жібереді.
14:20 – Өрт&nbsp; сөндіру және&nbsp; авариялық-құтқару қызметтінің жедел- құтару жасағы оқиға орнына келіп, &nbsp;дарияның арғы бетінде қалып қойған екі зардап шегушіге құтқару жұмыстарын жүргізу үшін Құтқарушылар&nbsp;&nbsp; арнайы&nbsp; гидро комбинизон киіп&nbsp; құтқару құралдары арқылы зардап шегушілерді&nbsp; судан&nbsp; қауіпсіз орынға шығарып, апаттар медициналық орталығына және&nbsp; жедел жәрдем қызметіне&nbsp; тапсырады.
Оқиға орны қоғамдық тәртіпті сақтау тобы күштерімен қоршауға алынып&nbsp; тұрғындардың қауіпсіздігі мен бағала заттардың қолды болмауы мақсатында&nbsp; қоғамдық тәртіп күзетіледі.
Сонымен қатар, төтенше жағдай аймағында &nbsp;Жергілікті полиция қызметінің бағыттауымен&nbsp; жол қозғалысы қауіпсіздігін қамтамасыз ету және тұрғындарды эвакациялау кезінде автобустарды сүйемелдеу жүргізіледі.
Өртке қарсы қызметінен 6 техника 20 қызметкер Талсуат елді мекеніндегі тұрғындар &nbsp;мен материалдық құндылықтарды эвакуациялау жұмыстарын жедел жүргізуге кірісіп, су сору мотопампаларының көмегімен&nbsp; тұрғын үйлер ауласын судан тазарту әрекеттеріне көшеді.&nbsp;&nbsp; сонымен қатар әкелінген құмды қамтап бұзылған қорғаныс бөгетін қалпына келтіру &nbsp;жұмыстарын жүргізеді. және&nbsp; № 5547 әскери бөлімінен 2 техника 50 адам&nbsp; оның ішінде 30 адам&nbsp; төтенше жағдай аумағын қоршап қауіпсіздікті қамтамасыз етеді. &nbsp;қалған 20 адам Өртке қарсы қызметімен бірлесіп &nbsp;елді мекеніндегі тұрғындарды және материалдық құндылықтарды эвакуациялау жұмыстарын жүргізу және&nbsp; қаптау жұмыстарына кіріседі. &nbsp;
Құрылыс басқармасы (Инженерлік қызмет) Талсуат елді мекеніндегі қорғаныс бекеттерін нығайту жұмыстарын жүргізу үшін&nbsp; 10 қызметкер және&nbsp; 5 бірлік техника көмегімен құм арқылы бөгетті қалпына келтіру жұмыстарын жүргізеді.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
&nbsp; – жолаушылар көлігі және автомобиль жолдары басқармасы Талсуат елді мекенінің тұрғындарын Эвакуациялық қабылдау пунктіне&nbsp; жеткізу үшін көлікпен қамтамасыз етеді;
– Құрамында 3 үлкен сыйымдылықтағы&nbsp; автобус 3 жүргізушісімен&nbsp;
Жергілікті атқарушы органдар Қызылорда қаласы Талсуат ауылы №178 мектеп ғимаратынан &nbsp;эвакуциялық жинақтау пунктін дайындыққа келтіріп, &nbsp;зардап шеккен адамдарды түгендеп,&nbsp; Қызылорда қаласы №212 мектеп ғимараты базасында орналасқан &nbsp;эвакуациялық қабылдау пунктіне жөнелтеді.&nbsp; Эвакуациялық қабылдау пунктінде&nbsp; ана мен бала және алғашқы медициналық көмек көрсету, психологиялық көмек көрсету бөлімдері қарастырылған.
Қызылорда облысының кәсіпкерлік қызметімен эвакуацияланған тұрығындарды азық-түлікпен, ыстық тамақ және өмір тіршілік көздерімен,&nbsp; жеке гигиеналық заттармен.қамтамасыз етеді;
Қызылорда облысының ауыл шаруашылық басқармасы Талсуат елді мекеніндегі су басуға қауіп бар елді мекендегі үй жануарлары мен малдардың есебін жүргізіп, қосымша жем шөп қорын нақтылап &nbsp;Үй жануарларын қауіпсіз аймаққа көшіру жұмыстарын жүргізу мақсатында Төтенше жағдайлар аумағынан үй жануарларын қауіпсіз аймаққа айдайды.
Төтенше жағдай аумағынан 588 адам және 190 үй жануары оның ішіндде 66 ірі мал, 120 уақ мал, 4 жылқы көшіріліп,&nbsp; бұзылған бөгет азаматтық қорғау қызметтерінің күштерімен қалпына келтіріліп, зақымданған үйлер мен келген шығындар жергілікті атқарушы органдармен есептеліп шығындары анықталуда.
Нәтижесінде Талсуат елді мекенінде бұзылған бөгетті қалпына келтіруге &nbsp;барлығы 15 құрылым, 183 адам, 42 техника жұмылдырылды.
<img src="https://kyzylorda-news.kz/wp-content/uploads/2020/02/26okuzhattygu2.jpg" alt="" />
<img src="https://kyzylorda-news.kz/wp-content/uploads/2020/02/26okuzhattygu3.jpg" alt="" />
<img src="https://kyzylorda-news.kz/wp-content/uploads/2020/02/26okuzhattygu4.jpg" alt="" />
<img src="https://kyzylorda-news.kz/wp-content/uploads/2020/02/26okuzhattygu5.jpg" alt="" />
<img src="https://kyzylorda-news.kz/wp-content/uploads/2020/02/26okuzhattygu6.jpg" alt="" />

Қызылордада «Көктем-2020» арнайы-тактикалық оқу-жаттығуы өтті

<a href="https://kyzylorda-news.kz/">Kyzylorda-news.kz.</a> Өткен жылы аймақта 2264 үйді ұры-қары үптеп кеткен. Ал ағымдағы жылдың алғашқы айының өзінде 163 үйге ұры түскен. Тұрғындар сақтық жасау үшін қандай қарапайым ережелерді ескергені жөн. Бұл жөнінде сала маманынан сұрап білдік.
<blockquote>
 &nbsp;«Пәтер кілтін есік алдындағы кілемнің астына, почта жәшігіне немесе оңай табылатын жерге қалдырмау қажет. Шатырға шығатын сатыдағы торға және есіктегі тұтқаға үнемі жарық түсуін қадағалап, үйден шыққан кезде терезені мықтап жауып, кілтті табу қиын жерге жасырыңыз. Үйден жақын маңдағы дүкенге шықсаңызда есік-терезелерді міндетті түрде жабыңыз. Бірнеше күнге жолға шықсаңыз ол жөнінде ешкімге хабарламаңыз. Әлеуметтік желідегі парақшаларыңызға сапарда болғаныңыз туралы суреттеріңіз бен мәліметіңізді жолдан келген соң жариялағаныңыз абзал. Пәтерді жалға бергенде пәтер жалдаушылардың кім екенін анықтамай кіргізбеңіз. Ұзақ уақытқа кеткенде бағалы заттарыңызды өзіңізбен ала жүріңіз немесе темір сейфке салып оны еденге бекітіп кетіңіз. Күзету жүйесін ұялы телефонның GSM, радиобайланысы арқылы да орнатуға болады. Пәтерді автоматты қоңыраумен жабдықтаса ол бөтен адамдар кіргенде дабыл қағады», – дейді, Қызылорда қалалық полиция басқармасы жергілікті полиция қызметінің аға инспекторы, полиция подполковнигі Айнұр Жұмабаева.
</blockquote>

Пәтер тонаушылардан қалай сақтану керек?

<a href="https://kyzylorda-news.kz/">Kyzylorda-news.kz.</a> Парламент Мәжілісінің жалпы отырысында ҚР Жоғарғы сотының азаматтық істер жөніндегі сот алқасының төрағасы Мейрамбек Таймерденов судьялар жұмысында жоспарланып отырған өзгерістер туралы айтып берді, деп хабарлайды <a href="https://24.kz/kz/zha-aly-tar/o-am/item/376765-sudyany-protsestik-r-li-t-begejli-zgertiledi-zho-ar-y-sot">«Хабар 24»</a>.
Бүгін жалпы отырыста «Қазақстан Республикасының азаматтық процестік кодексіне соттар жұмысының заманауи форматтарын ендіру, артық сот рәсімдері мен шығындарын қысқарту мәселелері бойынша өзгерістер мен толықтырулар енгізу туралы» заң жобасы бірінші оқылымда талқылануда.
<blockquote>
 «Заң жобасы үш бағыттан тұрады. Біріншіден, соттар жұмысын заманауи форматқа келтіру. Екіншіден, азаматтық процестегі тиімділікті арттыру, үшіншіден, сот ісін жүргізудегі цифрландыру қамтылды. Бұл түзетулер біздің азаматтарға не береді? Соттарға «неге судья істі қарағанда оның ақ-қарасына терең үңілмейді», «неге тек ұсынылған дәлелдерді қанағаттандырып, шешім шығарады» деген сын айтылады. Осыған себеп, қолданыстағы Азаматтық процестік кодекстің талабы. Кодекс бойынша судья ешбір жағдайда талап-арыз аясынан шықпауы тиіс, оны міндеттеп қойған. Тараптар нені талап етсе, тек сол мәселені қарап, тек сол мәселе бойынша ғана шешім қабылдауы керек. Өз бетінше басқа мән-жайларды анықтауға, өзге дәлелдерді сұратуға судьялардың еш құқығы жоқ», – деді Мейрамбек Таймерденов.
</blockquote>
Осы орайда ол бүгінгі Азаматтық процестік кодексте судьяның қолы байлаулы екенін атап өтті.
<blockquote>
 «Бұл проблеманы шешудің бір ғана жолы бар, яғни судьяның процестік рөлін түбегейлі өзгерту. Әділ шешім қабылдау үшін ол дауды жан-жақты, егжей-тегжейлі түсініп, анықтауы қажет. Бұл дегеніміз, судья процестік жағынан еркін болуы қажет. Қандай уәжді немесе дәлелдерді зерттеу керек екенін ол өзі анықтауы қажет. Бұл біз ашып отырған жаңалық емес, озық дамыған елдердің соттарында қалыптасқан тәжірибе», – деді азаматтық істер жөніндегі сот алқасының төрағасы.
</blockquote>
Оған қоса, жоба бойынша судьяларды қабылдаған шешімдерін, құқықтық салдарын, яғни судьяның нақты осы іс бойынша неге мұндай шешімге келгендігін тараптарға процестен кейін түсіндіруді міндеттеу ескерілген.

Қазақстанда судьяның процестік рөлі түбегейлі өзгертіледі

<a href="https://kyzylorda-news.kz/">Kyzylorda-news.kz.</a> Қазақстан көпұлтты, тату-тәтті мемлекет. Оның ішінде ІІІ Интерноционал ауылы осыған нақты мысал болардай. Бұл ауылда 14 ұлттың өкілдері қоян-қолтық бірге өмір сүріп, бірге еңбек етіп келеді. Біздің ауылымыздың тұрғындары үшін халық арасындағы достық өмірдің үлкен мәніне айналған.
Игілікті болашақ жолында өзара бірлікте жұмыс жүргізіп жатқан отбасы мен мектептер аз емес. Соның бірі ретінде өзім еңбек етіп жүрген №108 орта мектебі туралы айтқым келеді.
Бұл мектеп өзінің мақсат қойғыштығы мен жүйелі жұмыс жүргізе білудегі асқан шеберлігін осы ұжымның өсіп-өркендеуіне пайдаланып, білім нәрімен сусындап жатқан әрбір баланың өмірін жақсы жағынан өзгерту жолында зор жауапкершілікті сезіне жұмыс жүргізеді. Басты мақсатымыз болашақ ұрпақтың мемлекеттік тілді жетік меңгеріп, отанына адал қызмет етуге тәрбиелеу және білімді де білікті маман болып қалыптасуына бағыт-бағдар көрсету. Бұл ретте білім мен қатар тәрбиенің атқаратын рөлі ерекше.
&nbsp;Ұстаздық ете жүріп болашақ ұрпақ тәрбиесіне де зор мән берудемін.&nbsp; Тәрбиенің мақсаты – елдік сананы қалыптастырып, ұлттық рух пен ұлттық патриотизмді негіздеу, ұлтсыздықпен күресу болса керек. Сондықтан тәрбиенің жүзеге асуының технологиясы қалай дегенде де ұлтымызға ұстын, болашағымызға тұғыр болатын ұлттық тәрбиеде жатыр деп нық сеніммен айта аламыз.
Қай қоғамда өмір сүрмейік, ұрпақ – ол біздің болашағымыз, жарқын күндеріміз. Сондықтан болашағымызды қазіргі сәттен жақсы тәрбиелесек, ертеңгі күнімізге сеніммен басуға болады деп нық айта аламыз.
Санаулы күндерден соң көктем де келіп, «Алғыс айту» мерекесі тойланады. Сол мерекенің қарсаңында мен де өз атымнан қазақ халқына өз ризашылығымды білдіргім келеді. Біздерге қамқор болып, өзгелерден бөле жармай, бір ауылда тату-тәтті өмір сүріп келеміз. Біздің еңбегімізді бағалап, өз кезегінде біз де аянбай тер төгудеміз. Осындай бірлікте, татулықта күн кешіп келеміз. Әлбетте, бұл бізді қуантады. Себебі, өмірдің мәні ауызбіршілікте, ынтымақта екені белгілі.
Дильфура Байрахтарова,
Қазақстан халқы Ассамблеясының мүшесі,
облыстық түрік этномәдени бірлестігінің белсендісі
<img src="https://kyzylorda-news.kz/wp-content/uploads/2020/02/26difura2.jpg" alt="" />

Дильфура Байрахтарова: Өмірдің мәні – бірлікте

<a href="https://kyzylorda-news.kz/">Kyzylorda-news.kz.</a> Синоптиктер Қазақстанда 27-29 ақпан аралығында ауа райы қандай болатынын айтты.
Қыс аяқталып үлгермесе де, Қазақстанда көктем өз үстемдігін орнатып жатыр. Республиканың барлық аумағында ауа температурасы климаттық нормадан 5…12°С жоғары болады. Еліміздің оңтүстігі мен оңтүстік-батысында қар жауады.
Циклондар мен антициклондар бір-біріне тез ауысып, синоптиктер оларды бақылауға үлгермей отыр. Ал олардың тез ауысуы – көктемгі процестердің басталуының негізгі белгісі.
Міне, алдағы үш тәулікте Қазақстан арқылы суық полярлық және арктикалық фронттар үлкен жылдамдықпен өтеді, оның артынан антициклон тарайды. Содан кейін батыс облыстарға Ресейдің еуропалық бөлігінен кезекті фронттар келеді.
Сондықтан жаңбыр және жылбысқы қар жауады, артынша күн ашылып, күн райы тез өзгереді. Ауа температурасы өте жоғары болады.

Күн жылынып, ауа температурасы көтеріледі

<a href="https://kyzylorda-news.kz/">Kyzylorda-news.</a> Тілдің кең таралуы әдетте оны білудің қаншалықты тиімді екеніне және оның географиялық локациясына байланысты болып келеді. Тіл қанша танымал болғанымен, аталған тілде жалпы сөйлеушілер саны мен оны туған тілі санайтындар саны сәйкес келмей жатуы да мүмкін.
Төмендегі кестеде әр тілде жалпы саны қанша адам сөйлейтіні және оны туған тілі санайтын адамдар саны көрсетілген.
<img src="https://kyzylorda-news.kz/wp-content/uploads/2020/02/26kaztilitab1.jpg" alt="" />
Жоғарыда көрсетілген кесте бойынша, сөйлеушілердің жалпы санының көптігінен бірінші орынға ағылшын тілі жайғасқан. Екінші сатыда Мандарин Қытай тілі болса, үштікті хинди тілінде сөйлеушілер қорытындылайды. Ең әдемі саналатын испан мен француз тілдерінде сәйкесінше 534 миллион және 280 миллион адам ойын жеткізе алады екен. 6 мен 7-ші сатыларда араб және бенгал тілдері орналасқан. 258 миллион адам тіл қатыса алатын орыс тілі 8-ші орында. Португал мен индонезия тілдері кең тараған тілдер ондығын қорытындылайды.
Ал&nbsp;қай тіл қанша адамның ана тілі саналатынын төмендегі кестеден көре аласыздар:
<img src="https://kyzylorda-news.kz/wp-content/uploads/2020/02/26kaztilitab2.jpg" alt="" />
Екінші кестеден, кең таралған тілдер тізімінде екінші болып тұрған Мандарин Қытай тілінің алдыңғы қатарға шыққанын көреміз. Ал бірінші кестеде 4-ші сатыны місе тұтқан испан тілі оны ана тілі санайтындар тізімінде екінші орында. 379 миллион адамның бойына ағылшын тілі ана сүтімен дарыған. Одан кейін хинди, бенгал, португал, орыс, жапон тілдері орналасса, 9-шы және 10-шы сатыларда біз естіміген Батыс Пунджаби мен Маратхи тілдері бой көрсетеді.&nbsp;
Бұл кестеде қазақ тілі қай сатыға тұрақтаған?&nbsp;
Жоғарыда көрсетілген иллюстрация бойынша, қазақ тілінде сөйлей алатындардың жалпы саны мен оны ана тілі есептейтіндердің көрсеткіші тең түседі. Яғни, екеуі де – 12,934,060. Осылайша, “Әлемде ең көп таралған 100 тіл” рейтингінде қазақ тілі 89-орынға жайғасқан. Генеологиялық жіктелуі бойынша туыстас келетін түрік тілі 20-орын, өзбек тілі 54-орын, әзірбайжан 82-орынға тұрақтаған.
<a href="https://baq.kz/news/othernews/lemde-e-k-p-taral-an-100-til-aza-tili-ay-orynda/">Baq.kz</a>

Әлемде ең көп тараған 100 тіл. Қазақ тілі қай орында?

<a href="https://kyzylorda-news.kz/">Kyzylorda-news.kz.</a> Қазақстан Республикасының Мемлекеттік қызмет істері агенттігі жаңа интернет-ресурсқа көшті.
Енді, орталық және өңірлік деңгейдегі бос лауазымдар туралы ақпараттар, Агенттік және оның аумақтық департаменттерінің мәліметтері мен жаңалықтары мемлекеттік органдардың бірыңғай интернет-ресурсында орналастырылатын болады.
Агенттіктің сайтына өту үшін <a href="https://gov.egov.kz/memleket/entities/qyzmet?lang=kk">gov.egov.kz</a> сайтына кіріп, келесі сілтемелер арқылы: «Мемлекеттік органдар» → «Басқалар» → «Қазақстан Республикасы Мемлекеттік қызмет істері агенттігі» → «Парақшаға өту» батырмасын басу қажет.
Мемлекеттік қызметтегі бос лауазымдарға өту үшін мына <a href="https://gov.egov.kz/memleket/entities/qyzmet/activities/directions?lang=kk">сілтемеге</a> өтіңіз.

Мемлекеттік қызмет істері агенттігі жаңа интернет-ресурсқа көшті

<a href="https://kyzylorda-news.kz/">Kyzylorda-news.kz.</a> Жүздеген этнос өкілдері Қазақстан атты үлкен шаңырақтың астында тату-тәтті өмір сүруде. Кезіндегі өкіметтің өктемдігімен жер аударылған өзге этнос өкілдері Қазақстаннан пана тапты. Солардың арасында шешен, корей ұлты көптеп жер аударылды. Өзегінен теппей отбасыларына қабылдап, бір дастарханнан ас ішуі қазақ халқының ақ пейілділігін білдіреді.
Менің туған жерім Қазақ елі, сүйікті Отаным – Қазақстан. Осындай қасиетті жерде туып-өсіп, оқыдым, білім алдым. Мамандық иесі атанып, еңбек еткеніме 30 жылдан асты. Үлкен шаңыраққа келін болып, жар сүйдім, 4 перзентті болдым. Жолдасым Әбдумажит Тереңөзектің тумасы. Өмір бойы адал еңбек етіп, отбасымыздың тірегіне айналды. Енемнен көрген, үйренгендерімнің арқасында өнегелі отбасы атанып, тәрбиелі ұл-қыз өсірдік. Қазір үлкен ұл мен қызым оқу бітіріп, бір-бір мамандық иесі атанды. Екі кіші қызым мектепте оқиды. Олардың болашағына еш алаңдамаймын. Өйткені, балаларымның Отаны – өсіп-өркендеген Қазақстан.
Облыста, ауданда өтіп жатқан түрлі мәдени-көпшілік шараларға қатысып жүремін, өзім Ассамблея мүшесімін. Осындай қоғамдық жұмыстың басы-қасында жүріп, үлкен мінберлерден сөз сөйлеп, мерекелік шаралардың куәсі болдым. Біздің басымыз қосылатын ауданда «Достық» үйі бар. Онда кездесулер, салтанатты жиындар өтеді.&nbsp;
2015 жылы Қазақстан халқы Ассамблеясының 20 жылдық мерекелік медалімен марапатталып, мерейім үстем болды. Бұл менің осы күнге дейінгі алған наградаларымның ішіндегі ең қымбаттысы болды десем артық айтқандық болмас. Сондықтан мен алдымен Елбасына, сонан соң еңбегімізді бағалаған ел ағаларына, қолдау білдірген Ассамблея мүшелеріне алғыс айтамын. Еліміздің көк байрағы желбіреп, бейбіт аспанда өмір сүре берейік.
Люба Махмурзаева,
Тереңөзек аудандық тұтынушылар
құқығын қорғау басқармасының маманы
<img src="https://kyzylorda-news.kz/wp-content/uploads/2020/02/26liubapikir2.jpg" alt="" />

Қазақстан және Қызылорда облысының жаңалықтары