<a href="https://kyzylorda-news.kz/">Kyzylorda-news.kz.</a> Қызылорда облысы Қармақшы ауданында 13 жастағы қызды ауылдағы 2 ересек жігіт зорлаған. Бұл туралы жәбірленушінің анасы мәлімдеді.
Оқиға осыдан 5 ай бұрын болған. Анасының сөзіне сенсек, 22 және 25 жастағы ауыл тұрғындары 9-шы мамыр күні кешқұрым оқушы қызды алдап, бірінің үйіне апарған. Азғындық әрекеттерін жүзеге асырған соң, таңға жақын ауыл шетіндегі көлшіктің жағасына апарып тастапты. Сол күні жәбірленуші тарап арызданғандарын айтты. Бірақ іс “сағызша созылып” келеді деп отыр. Ал кәмелет жасына толмаған жасөспірімге қиянат жасағандар бостандықта жүр деп ашынды.
<blockquote>
 “Олар ешқандай жауапқа тартылған жоқ. Жауап алынған я қамалған жоқ, я келген жоқ. Бес ай жүзінде мен РОВД-дан ешқандай ақпарат ала алмағандықтан Қызылорда облысынан адвокат жалдап, істі көтергенімде істің қысқартылғанын білдім. Сол екеуінің жазаға тартылып, баламды бүлдірген сол таң атқанша істеген қорлықтарының жазасы тартылсын”, – дейді жәбірленушінің анасы.
</blockquote>
Оқиғадан кейін, мектеп психологтары қызбен жан-жақты жұмыс жүргізген. Ал облыстық ішкі істер департаменті аталған дерекке қатысты жазбаша мәлімдеме жасады. Онда тергеп-тексеру амалдары жүргізіліп жатқандығын және іс департамент басшылығының қатаң бақылауында екендігі көрсетілген.
<a href="https://astanatv.kz/kz/news/57273/">Astanatv.kz</a>

Қармақшыда ауылдастары оқушы қызды зорлаған

<a href="https://kyzylorda-news.kz/date/2020/10/16/">Kyzylorda-news.kz.</a> «Алиментті өндіріп алудың тиімді жүйесін құру бойынша 30 қадам» іс-шаралар жоспары бекітілді. Әділет Министрлігі облыс әкімімен және республикалық палатамен бірлесіп алимент өндіру мәселелері бойынша өзара ынтымақтастық туралы меморандумдарды іске асыруда. Басты мақсат борышкерлерді жұмысқа орналастырып, алимент өндіру.
Бұл туралы Өңірлік коммуникациялар қызметінің ақпарат алаңында өткен брифингте облыстық Әділет департаментінің басшысы Ирина Бәкішева мәлімдеді.
<blockquote>
 “Облыста 115 борышкер жұмысқа орналастырылды. Былтыр проблемалық алименттер саны 773 болатын. 336-сы берешек қарыздарын өтеді. Енді 470-і қалып тұр. Ал алимент төлеуден жалтарып жүрген 54 борышкер әкімшілік жауапкершілкке тартылып, 25 борышкерге ұсыным берілді. Сондай-ақ, 851 борышкерге ҚР аумағынан шығуына шектеу қойылды”, – деді Ирина Жұмабайқызы.
</blockquote>
Әділет органдарымен мемлекеттік қызметтің 12 түрі көрсетіледі. Қызмет түрлерінің азаюы бірқатар тіркеу функциялары «Азаматтарға арналған үкімет» мемлекеттік корпорациясына берілуіне байланысты.

Қызылордада алимент төлеуден жалтарып жүрген 54 борышкер жауапкершілікке тартылды

<a href="https://kyzylorda-news.kz/">Kyzylorda-news.kz.</a> Елдегі несие алуға қабілетті 9 миллион тұрғынның 7 миллион 200 мыңы банкке қарыз. Бірінші несие бюросының мәліметі осындай, деп хабарлайды&nbsp;<a href="https://astanatv.kz/kz/news/57275/">AstanaTV</a>.
Пандемия жағдайды одан сайын ұшықтырып отыр. Қазір кредитін өтей алмайтындар күрт көбейген. Екінші деңгейлі банктер мен қаржы ұйымдарының қысымы да күшейген. Кредитін уақытында төлей алмаған тұрғындарға коллекторлық қызмет тыным бермеуде. Тіпті, қарызын кешіктірген күндеріне еселеп қайтаруға мәжбүрлеп жатқан көрінеді.
Алматы қаласының тұрғыны Артемий Лебедевтің кредитті уақытынан кешіктіргеніне үш ай болған. Тұрақты жұмысынан айырылған оның жағдайын қаржы ұйымы ескермек түгілі, қарыз үстіне қарыз еселеп берген. Тіпті, тағы кешіктірсе үйіндегі мүлкін тәркілейтіндерін айтып қорқытқан. Тығырыққа тірелген соң, қаржы ұйымынан алған 20 мың теңгесі де бірнеше есеге өсіп кеткен. Қарызға белшесінен батқан тұрғын қайда барарын, кімнен көмек сұрарын білмей дал.
<blockquote>
 “315 мың теңге қалды. 25 мыңнан төлеп келдім. Карантинге байланысты төлей алмағаным үшін 90 мың теңге қосып жіберіпті. Төлеуге міндеттісің дейді. Айыппұлдың қайдан қосылғанын да түсіндірмейді. Өте дөрекі сөйлеседі. Мүлкіңді тәркілейміз деп қорқытатын болды”, – дейді Лебедев.
</blockquote>
Банк алдындағы беделі түскен тұрғындардың мәселесін шешумен айналысатын заңгерлердің айтуынша, елімізде кредитін төлей алмағандар саны күрт артқан. Мысалы, бүгінде 1 миллион 375 мың адамның есеп шоты бұғаттаулы. Жеке сот орындаушыларына өткен берешек көлемі 7 триллион теңгеге жуықтайды. Кредит бойынша артық пайызды байқаған кез келген адам заңгерге немесе ұлттық банкке жүгіне алады, дейді мамандар.
<blockquote>
 “Банктер үстінен пайыздар қосып жіберген жағдайда, көп адамдар сол жарлықты естіп хабарласып жатады. Ол кезде ұлттық банктің қаржы нарығын қорғау агенттігіне өзінің құқығын қорғап, президенттің жарлығын негізге ала отырып арыз жіберуге болады. Жалпы банктердің жылдық тиімді үстемақылсы 56 пайыздан аспауы керек”, – дейді заңгер Фархат Әбдіқадіров.
</blockquote>
Ал бірінші несие бюросының мәліметінше, елде кредит алуға қабілетті 9 миллион тұрғынның 7 миллион 200 мыңы банкке қарыз. Оның жалпы сомасы 3,5 триллион теңгені құрайды. Мамандар, кредитті төлеуден қашудың пайдасыз екенін айтады. Одан да банкке барып, мәселені тиімді шешу жолдарын қарастырған жөн. &nbsp;
<blockquote>
 “Қазіргі уақыттағы статистика бойынша борышкерлердің 19 проценті қиын жағдайды бастан кешіріп жатыр. Яғни, төлем жасай алмауда. Бірақ, олардың банктен қашып жүруі дұрыс емес. Одан да банкке барып, қарызды бірнеше айға тоқтата тұруды сұрауға болады. Болмаса, аз-аздан бөліп төлеуге болады”, – дейді бірінші несие бюросының атқарушы директоры Әсем Нұрғалиева.
</blockquote>
Заңгерлердің сөзінше, тұтынушылық кредитті кешіктіргені үшін 56 пайыздан аса үстемақы қосу заңсыздық. Оған қоса, мүлікті тәркілейміз деген қорқыту өз алдына заңға қайшы әрекет екенін ескертеді.
Сондықтан мұндай жағдайда сотқа жүгінген жөн деп кеңес береді мамандар. Ал шағын қаржы ұйымдарының көбі заңды белшесінен басып, тұрғындардың қаржылық сауатсыздығын пайдаланып келеді. Берген қарызды бірнеше еселеп қайтарып алатындардың көбі ұлттық банктен рұқсат алмаған.

Кредит төлеу кешіккенде борышкер не істеу керек – заңгерлер пікірі

<a href="http://kyzylorda-news.kz">Kyzylorda-news.kz.</a> Қазалы ауданындағы ауыл жастары асарлатып жүр. Қ.Пірімов ауылының азаматтары осы елді мекендегі мүмкіндігі шектеулі отбасына үй салып берді. Баспананы тұрғызып қана қоймай, оның ішін қажетті жабдықтармен де қамтамасыз етті. «Көп түкірсе көл» деген осы болар.
Тұрғын үйге мұқтаж отбасыға үй салу жөнінде құмжиектік азаматтар өткен жылы қасиетті Рамазан айында ақылдасып, қазан айында үйдің іргетасын құйып қойған. Оған негізгі себеп осы ауылдың байырғы тұрғыны, ІІ топ мүгедегі Орысбай Науханбаевтың ауласын жыл сайын су басып қалады. Биылғы көктемде қатты жауған жаңбыр суы үй ішіне дейін жайылып кетті. Сондықтан ауыл азаматтары «бір жағадан бас, бір жеңнен қол шығарып», жаңа үйдің кірпішін қалауды бастап кетеді.
<blockquote>
 «Өткен жылы Оразаның уақытында ауылдың азаматтары өзара ақылдасып, Орысбай ағамызға үй салу туралы шешім қабылдағанбыз. Бастапқы уақытта бірқатар азаматтардан ғана қаржы жинаймыз деп келісілген болатын. Алайда мен фейсбук әлеуметтік желісіне салған азғантай видеомнан кейін, осы ауылда туып, қазіргі таңда еліміздің әр түкпірінде жүрген азаматтар да хабарласып, көмек қолын созатынын жеткізді. Солай болды да. Небәрі 3 күннің ішінде бізге 1,6 млн теңге ақша жиналды. Осылайша біздің қайырымдылық ісімізге ауылдың үлкен-кішісі де, сырттағы тілекші ағайындар да біркісідей атсалысты. Үйдің құрылысын салуға бір тиын да ақша жұмсамадық. Үйдің іргетасын құядан бастап, кірпішін қалау, шатырын жабу, сыртын сылап-әрлеу жұмыстарына дейін ауылдың жігіттері атқарды. Көмектесеміз деп келген азаматтардың қатары өте көп болды. Оған еліміздегі карантиннің септігі тиді деп ойлаймын. Тіпті бір күні 100 адамға дейін келген уақыт та болды. Сондықтан бұл іске атсалысқан барша азаматтарға ауыл тұрғындарының атынан алғыс айтамын», – дейді Қ.Пірімов ауылындағы №92 мектептің мұғалімі Сәбит Ықыласов.
</blockquote>
Ауыл азаматтарының арқасында Орысбай Науханбаевтың отбасы жылы да жайлы, заманауи құрылыс материалдарымен салынған үйде тұрып жатыр. Жақында ғана жаңа үйге көшкен олардың ауыл азаматтарына айтар алғысы шексіз.
<blockquote>
 «Мен туғаннан 2 топ мүгедегімін. Әйелім демүмкіндігі шектеулі жан. Сондықтан да өзіміздің үй салуға шамамыз келмейді. Жыл сайын ауламызды су басып, үйіміздің қабырғалары бұзылды. «Әрі қарай не болар екен?» деп ойланып жүргенде, бір күні үйдің іргетасы құйылды, кірпіш келді, содан соң ағаш келді. Осылайша жақында жаңа үйге қоныс аудардық», – дейді Қ.Пірімов ауылының тұрғыны Орысбай Науханбаев.
</blockquote>
Мұнан бөлек Қ.Пірімов ауылының азаматтары тағы бір отбасына көмек қолын созуда. Атап айтар болсақ, мүмкіндігі шектеулі Бектілеу Ізтілеуовтың үйіне күрделі жөндеу жұмыстарын жүргізуде. Қайырымды жандар үйдің еденін, терезесін және шатырын толық ауыстырып, ішкі-сыртқы сылақтарын түсіріп, қайтадан сылауда.
Халқымызда «Оң қолың бергенді сол қолын көрмесін» деген сөз бар. Десекте қиындыққа тап болған отбасыларға жақсылық жасап, жанашырлық танытқан Қ.Пірімов ауылы азаматтарының қайырымдылық ісі көпке үлгі.
<img src="https://kyzylorda-news.kz/wp-content/uploads/2020/10/4-1.jpg" alt="" />
<img src="https://kyzylorda-news.kz/wp-content/uploads/2020/10/8-1.jpg" alt="" />
<img src="https://kyzylorda-news.kz/wp-content/uploads/2020/10/10-2.jpg" alt="" />
<img src="https://kyzylorda-news.kz/wp-content/uploads/2020/10/11.jpg" alt="" />
<img src="https://kyzylorda-news.kz/wp-content/uploads/2020/10/12-1.jpg" alt="" />
<img src="https://kyzylorda-news.kz/wp-content/uploads/2020/10/13-1.jpg" alt="" />
<img src="https://kyzylorda-news.kz/wp-content/uploads/2020/10/14-1.jpg" alt="" />
<img src="https://kyzylorda-news.kz/wp-content/uploads/2020/10/15.jpg" alt="" />
<img src="https://kyzylorda-news.kz/wp-content/uploads/2020/10/17-1.jpg" alt="" />
<img src="https://kyzylorda-news.kz/wp-content/uploads/2020/10/18.jpg" alt="" />
<img src="https://kyzylorda-news.kz/wp-content/uploads/2020/10/20.jpg" alt="" />
<img src="https://kyzylorda-news.kz/wp-content/uploads/2020/10/22.jpg" alt="" />

Қазалыда ауылдастары мұқтаж отбасына үй салып берді (ФОТО)

<a href="https://kyzylorda-news.kz/">Kyzylorda-news.kz.</a> Қызылорда «Болашақ» университеті 2014 жылдан бастап Чехияның «Sociosféra-CZ» ғылыми-баспа орталығымен ынтымақтастық байланыс орнатқан. Ынтымақтастық шеңберінде университет пен орталық бірлескен халықаралық ғылыми-практикалық конференцияларды жиі өткізіп отырады.
Жақында ғылыми-баспа орталығының базасында «Қазіргі жағдайдағы тәрбиенің мақсаттары, міндеттері мен құндылықтары» атты VII Халықаралық ғылыми-практикалық конференция өтті. Аталған іс-шараны «Sociosféra-CZ» ғылыми-баспа орталығы, Қызылорда «Болашақ» университеті, Қызылорда облысы бойынша саяси зерттеулер қауымдастығының филиалы және Краснодар қаласындағы әскери байланыс академиясының филиалы ұйымдастырды. Конференция жұмысына Ресей мен Қазақстан жоғары оқу орындарының ғалымдары, оқытушылары мен студенттері және мектеп мұғалімдері қатысты.
Конференция аясында Қызылорда «Болашақ» университетінің даму және экономикалық мәселелер жөніндегі проректоры Д.Б. Досманбетов, «Болашақ» ҒЗИ директоры М.Ө. Насимов, «Болашақ» университетінің «Экономика, аудит, бизнес және басқару» кафедрасының меңгерушісі А.Т. Райымбекова және «Ақпараттық жүйелер» мамандығының студенті Н. Жұмаділданың баяндамалары жарық көрді. Айта кету қажет, «Болашақ» ҒЗИ директоры М.Ө. Насимов аталмыш конференцияның ұйымдастыру комитетінің мүшесі болып табылады.
<img src="https://kyzylorda-news.kz/wp-content/uploads/2020/10/k-10.13.20-scaled.jpg" alt="" />

«Болашақ» университетінде VII Халықаралық ғылыми-практикалық конференция өтті

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықованың төрағалығымен аппараттық мәжіліс өтті. Күн тәртібінде 4 мәселе қаралды. Атап айтсақ, өңірдің әлеуметтік-экономикалық дамуының 2020 жылдың 9 айлық қорытындысы, облыс бюджетінің 2020 жылдың 9 айы қорытындысымен игерілу барысы және болжамы, жұмыспен қамтудың 2020-2021 жылдарға арналған Жол картасының орындалуы және жылу беру маусымының басталу барысы сөз болды.
Өңірдің әлеуметтік-экономикалық дамуының 2020 жылдың 9 айлық қорытындысы бойынша экономика және бюджеттік жоспарлау басқармасының басшысы Нұрғали Қордабай баяндады. 
Бүгінгі таңда экономикалық дамуды сипаттайтын макрокөрсеткіштердің бірқатары бойынша өсім байқалады.
Өнеркәсіптің өңдеуші секторы 3,5%, ауыл шаруашылығығының жалпы өнімі 3,1%, және тұрғын үйлерді пайдалануға беру 0,4% артты. 
«Ауыл ел бесігі», «Қызылорда облысының экономикалық даму жоспары», «Жұмыспен қамтудың Жол картасы», «Қарапайым заттар экономикасы» және мемлекеттік бағдарламалары аясында атқарылып жатқан жұмыстар-құрылыс салу көлемі, негізгі капиталға инвестициялар тарту көрсеткіштері бойынша межені орындап қана қоймай, оған қоса өңдеуші өнеркәсіп, ауыл шаруашылығы, сауда және қызмет көрсету салаларына да оң ықпал етпек.
«Ауыл ел бесігі» жобасы аясында ағымдағы жылы облысымызға 62 инвестициялық жобаны жүзеге асыру үшін 5,1 млрд.тенге бөлінген. Бүгінде 35 жоба толығымен іске асырылды.
Аймақ басшысы бюджеттік бағдарламалар әкімшілері, аудандар және Қызылорда қаласының әкімдері аймақтың әлеуметтік-экономикалық дамуының макрокөрсеткіштері бойынша 2020 жылдың жоспарлы параметрлеріне қол жеткізуді қамтамасыз етуді және статиска департаментімен бірлесіп, ай сайын экономикалық көрсеткіштердің орындалуына алдын-ала талдау жасап, оң тенденцияны қамтамасыз ету жұмыстарын жүргізуді тапсырды.
Сонымен қатар, Арал, Жалағаш және Жаңақорған аудан әкімдері «Ауыл- Ел бесігі» жобасымен 2020 жылға жоспарланған қаржыларды 100 пайыз игерілуін және нысандардың толық іске қосуын, ал, облыстық құрылыс, сәулет және қала құрылысы басқармасы басшысына қала және аудан әкімдерімен бірлесіп барлық көздерден жүзеге асырылып жатқан құрылыс жұмыстарының есебін жүргізіп, атқарылған жұмыстардың статистикалық есептерге енгізілуін қамтамасыз етуді жүктеді.
Мұнымен қоса, облыс әкімі Гүлшара Әбдіқалықова өңірдің әлеуметтік-экономикалық дамуының 9 айлық қорытындысы бойынша индустриялдық-инновациялық даму басқарма басшысына 
өңірге барлық қаржы көздерінен инвестиция тарту межесін орындауды, кәсіпкерлік және туризм басқармасы басшысына көтерме және бөлшек сауда айналымын арттыру бойынша жұмыстарды ұйымдастыруды, жолаушылар көлігі және автомобиль жолдары басқармасы басшысына «көлік саласы» көрсеткіші бойынша төменгі деңгейдің қалыптасу фактілерін зерттеп, оң тенденцияға шығу жөнінде нақты тапсырмалар берді. Аталған басқарма басшылары бұл жұмыстарды қала және аудан әкімдіктерімен бірлесіп атқаратын болады.
Күн тәртібіндегі екінші мәселе бойынша облыстық қаржы басқармасының басшысы Елена Шаврова сөз сөйледі. 
2020 жылдың 1 қазанына облыс бюджеті түсімдері 103,3 пайызға орындалды. Шығындар жоспары 99,7 пайызға игерілген. Ал, бюджет қаражатының жылдық жоспарының 67% ғана игеріліп отыр. Жалпы, жыл соңына дейін 123 млрд.теңге қаржы игерілуі тиіс.
2020 жылдың 9 айында облыс бюджеті шығыстар бойынша 99,7% орындалды. Атап айтқанда, Арал, Қазалы, Қармақшы, Жалағаш және Жаңақорған аудандары мен Қызылорда қаласының бюджеттері бойынша қаражат 99,9% игерілді. 9 айдың қорытындысы сәйкес қаражаттың ең төмен игерілуі Сырдария ауданына тиесілі – 98,8 %.
Аймақ басшысы: «2020 жылдың қорытындысымен игерілмеген қаржылар бойынша тікелей бірінші басшыға тәртіптік шара қолданылатындығын ескертемін», – деді.
Сондай-ақ, барлық облыстық бюджеттік бағдарлама әкімшілері, Қызылорда қаласы және аудан әкімдеріне жыл соңына дейін жоспарланған қаржыларды толық әрі мақсатты игеруді, дебиторлық және кредиторлық берешектерге жол бермеуді қамтамасыз етуді жүктеп, облыстық бюджеттен бөлінген қаржылар есебінен үнемделген қаржыларды қайтару немесе басқа шығындарға қайта бағыттау бойынша тиісті жұмыстарды жүргізу керектігін еске салды.
Жұмыспен қамтудың 2020-2021 жылдарға арналған Жол картасының орындалуы бойынша облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова баяндама жасады.
Биылғы жылы «Жұмыспен қамтудың Жол картасы» аясында республикалық бюджеттен 37,8 млрд. теңге бөлініп, облыс бойынша 275 жоба жүзеге асуда.
Нақты айтсақ, әлеуметтік-мәдени нысандардың күрделі және ағымдағы жөндеу, қайта жаңғырту, құрылысы бойынша 125 жоба, тұрғын үй-коммуналдық нысандардың күрделі және ағымдағы жөндеу, қайта жаңғырту, құрылысы бойынша 42 жоба, инженерлік-көліктік инфрақұрылым нысандарының күрделі және ағымдағы жөндеу, қайта жаңғырту құрылысы бойынша 62 жоба іске асырылуда. Мұнымен қоса, елді мекендері аббаттандыру мақсатында 47 жоба іске қосылған.
Жұмыспен қамтудың жол картасы аяқталғаннан кейін, жаңа нысандардың құрылысы арқылы 452 тұрақты жұмыс орындары ашылады деп жоспарлануда. Жалпы бүгінгі күні жоба аясында 9182 адам жұмыспен қамтылған. Оның ішінде 5455 тұрғын жұмыспен қамту орталықтары арқылы алынған. Орташа еңбек ақы 88 242 теңгені құрайды. 9 айдың қорытындысы бойынша қаржының игерілуі 98,6% құрады.
Облыс әкімі Гүлшара Әбдіқалықова облыстық жұмыспен қамтуды үйлестіру және әлеуметтік бағдарламалар басқармасы басшысына Қызылорда қаласы және аудан әкімдерімен бірлесіп, жоба аяқталғаннан кейінгі тұрақты жұмыс орындарының ашылуын, оларға жоба аясында жұмыспен қамтылған азаматтардың кемінде 50%-н тартылуын қамтамасыз етуді жүктеді.
Белгілі болғандай аймақ басшысының тапсырмасына сәйкес пандемияның алдын алу мақсатында облыс бойынша жылу беру маусымы 10 қазаннан басталды.
Жылу беру маусымының басталу барысы туралы облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетов баяндады. 
Облыс көлеміндегі 1183 әлеуметтік нысан жылумен қамтылды. Сонымен қатар, облыс орталығындағы 713 және Қазалы ауданынының Әйтеке би кентіндегі 67 көпқабатты тұрғын үй жылуға толығымен қосылды.
«Қызылордажылуэлектрорталығы» МКК-нің № 6 бу қазандығы және 14 автономды блокты модульді қазандықтар жұмыс істеп тұр. «Өңтүстік қазандық» филиалында 2 қазандық, «Қазалы-Теміржолжылу» филиалында 2 қазандық жұмыс істеуде. 
«КазТрансГаз Аймақ» АҚ келісім шарт негізінде газ отыны үздіксіз берілуде. Бұдан бөлек 10 күндік авариялық қоры 4,6 мың тонна мазут жасақталған.
<blockquote>
 «Әлеуметтік желілер арқылы Қызылорда қаласындағы шағын мөлтек аудандар тұрғындары тарапынан әлі күнге дейін жылудың дұрыс берілмеуі, қысымның аз болуы жөнінде арыз шағымдар көп түсуде. Осыған қарамастан жылу үшін коммуналдық төлемді 10 қазаннан бастап есептейтіндіктерін айтып, наразылықтарын білдіруде. Осы бағытта нақты шаралар қабылдаңыздар», – деді облыс әкімі Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2020/10/121681588_2819172294852488_8789327634975573166_o.jpg" alt="" />
Сонымен қатар, Қызылорда қаласы мен аудан әкімдіктері, бюджеттік бағдарлама әкімшілері мен коммуналдық кәсіпорын басшыларына 2020-2021 жылдардағы жылу беру маусымының тұрақты өтуін, отын қоймаларына қажетті көмір көлемінің тұрақты жеткізілуін қатаң тапсырды.

Гүлшара Әбдіқалықова: Бөлінген қаржы игерілуі тиіс

<a href="https://kyzylorda-news.kz/date/2020/10/15/">Kyzylorda-news.kz.</a> Белгілі америкалық The Ring журналының сайты барлық салмақ дәрежелері өкілдерінің рейтингтерін жаңартылған нұсқасын жариялады, деп жазады &nbsp;<a href="https://www.sports.kz/news/janibek-alimhanulyi-voshel-v-top-10-reytinga-the-ring-posle-vpechatlyayuschey-pobedyi-nokautom">Sports.kz</a>.
Орта дивизионда Қазақстанның WBO Global және WBC Continental Americas чемпионы Жәнібек Әлімханұлы дәрежелер туралы табельге оныншы нөмірмен енді.
Еске сала кетейік, өткен демалыс күндері Жәнібек екінші раундта аргентиналық Гонсало Корияны&nbsp;<a href="https://www.inform.kz/kz/zhanibek-alimhanuly-karsylasyn-nokautpen-zhendi_a3704570">нокаутпен жеңген болатын</a>.
Орта салмақтағы The Ring чемпионы – мексикалық Сауль «Канело» Альварес, ал бірінші орында – Әлімханұлының отандасы, IBF және IBO әлем чемпионы титулдарының иегері Геннадий Головкин.
The Ring нұсқасы бойынша орташа салмақ дәрежесіндегі ТОП-10 мынадай: 1. Геннадий Головкин (Қазақстан) 2. Джермалл Чарло (АҚШ) 3. Деметриус Андраде (АҚШ) 4. Сергей Деревянченко (Украина) 5. Риота Мурата (Жапония) 6. Камил Шеремета (Польша) 7. Крис кіші Юбэнк (Ұлыбритания) 8. Роб Брант (АҚШ) 9. Лиам Уильямс (Ұлыбритания) 10. Жәнібек Әлімханұлы (Қазақстан)

Геннадий Головкин мен Жәнібек Әлімханұлы The Ring рейтингінде үздік ондыққа кірді

<a href="https://kyzylorda-news.kz/date/2020/10/15/">Kyzylorda-news.kz.</a> Дүниежүзілік денсаулық сақтау ұйымы таяу жылдары туберкулезден болатын өлім-жітімнің күрт өсуі мүмкін екендігін ескертті, деп хабарлайды <a href="https://lenta.inform.kz/kz/ddu-koronavirus-tuberkulezden-bolatyn-olimnin-osuine-akelui-yktimal_a3706804">ҚазАқпарат.</a>
Бұған коронавирус пандемиясынан туындаған дағдарыстар мен қаражаттың жетіспеушілігі себеп болуы мүмкін.
ДДҰ 2020 жылдың бірінші жартысында туберкулездің жаңа жағдайлары туралы есеп беру мен бақылаудың едәуір төмендегенін айтты, өйткені елдер COVID-19 таралуын болдырмауға шектеулер енгізген болатын.
Есепте әлемдегі туберкулез ауруы ең жоғары елдердің қатарына кіретін Үндістан, Индонезия және Филиппин елдері 2020 жылдың алты айындағы жағдай туралы хабарламалар өткен жылдың сәйкес кезеңімен салыстырғанда 25-30% төмендегені туралы айтқан.
ДДҰ моделіне сәйкес, ауру жағдайлары туралы хабарламалар санының мұндай азаюы туберкулезден қосымша өлімнің күрт өсуіне әкелуі мүмкін. 2018-2019 жылдар аралығында шамамен 14 миллион адам туберкулезден емделген, бірақ бұл 2022 жылға дейін емделуге үміттенген 40 миллионның үштен бірі ғана.
ДДҰ мәліметтері бойынша, науқастардың шамамен 85%-ын алты ай бойы дәрі-дәрмекпен сәтті емдеуге болады. Емдеу сонымен қатар инфекцияның одан әрі таралуын азайтады. 2000 жылдан бастап туберкулезді емдеу 60 миллионнан астам адамның өлімін сақтап қалды.
Естеріңізге сала кетейік, туберкулез әлемдегі ең қауіпті жұқпалы ауру болып саналады. Бұл көбінесе өкпеге әсер ететін және оңай таралуы мүмкін бактериялардан болады.

ДДҰ: Коронавирус туберкулезден болатын өлімнің өсуіне әкелуі ықтимал

<a href="https://kyzylorda-news.kz/date/2020/10/15/?doing_wp_cron=1602745337.4086410999298095703125">Kyzylorda-news.kz.</a> Қызылордада «Қарапайым заттар экономикасы» бағдарламасы шеңберінде өңдеу өнеркәсібі үшін айналым қаражатын 100 %-ға дейін ұлғайтуды сұрайды.
Бұл туралы Қызылорда облысы кәсіпкерлер палатасының Өңірлік кеңес отырысында «Қарапайым заттар экономикасы» бағдарламасы Жобалық кеңсенің жұмысын қарау барысында айтылды. Жобалық кеңсе жұмысын Кәсіпкерлер палатасы Жобаларды сүйемелдеу бөлімінің бастығы Мұрат Балабаев таныстырды.
Хабарламашының айтуынша, «Қарапайым заттар экономикасының» жобалық кеңсесі өткен жылы «Атамекен» Ұлттық кәсіпкерлер палатасына берілген. Бағдарламаға қабылданған кезінен бері 6 рет толықтырулар енгізілген. Әр өзгеріс сайын бағдарлама жетілдіріліп, кәсіпкерлердің қызығушылығы арта түсуде екен. Бүгінде бағдарлама аясында екінші деңгейлі банктер кәсіпкерлерге несиені 15 пайызбен беретін болса, оның 9 пайызын мемлекет субсидиялайды. Кәсіпкерге берілетін ақырғы мөлшерлемесі 6 пайыз. Екі жыл бұрын 8 пайыз болатын. Несиелендіру мерзімі алғашқыда 7 жыл болса, қазір 10 жылға дейін созылды.
<blockquote>
 «Несиенің 50 пайызына дейін кепілдендіру енгізілді. Бұрын мұндай артықшылық болған емес. «Даму» қоры банктен алынған несиелерге ғана беріп келген болатын. Бағдарламаға Аграрлық-несие корпорациясы енгізілген кезде де кепілдендіру тетігі болған емес. Жақында бағдарламаға «Ауыл шаруашылығын қаржылай қолдау» Қоры кепілдендіру мәселесімен енді. Осының арқасында агроөнеркәсіптік кешен саласындағы жобаларды кепілдендіру мүмкіндігі туды. Бүгінде «Қарапайым заттар экономикасында» несие мерзімінің үш кезеңіне дейін жеңілдік кезеңі бар. Айналым қаражатын толықтыру алғашында 30 пайыз еді, 50 пайызға дейін ұлғайтылды. Енді Ұлттық банкке бағдарлама аясындағы айналым қаражатын 100 пайызға дейін ұлғайтуды ұсынып жатырмыз», – дейді Мұрат Балабаев.
</blockquote>
Палата маманы бағдарламаға алғашында 365 тауарлар мен қызметтерді ғана қаржыландыру жоспарланса, соңғы өзгерістерге сай бұл сан мыңнан асқандығын айтты. ОКЭД-тер саны 65 болса, қазір екі есе өсіп, 142-ге жеткен.
Өңірлік кеңес мүшелері отырыста несие алған кәсіпкерлердің кәсібі кедергісіз жұмыс жасауы үшін инфрақұрылымға қатысты мәселелерді шешуде мемлекеттің көмегі қажет екендігін, сондай-ақ мемлекеттік бағдарлама аясында берілетін 6 пайыздық несиенің өзі өңдеу өнеркәсібімен айналысушылар үшін айтарлықтай салмақ салатынын, сол үшін екінші деңгейлі банктермен бірлесе тиімді шешім қабылдау қажеттігін айтты.
Айта кету керек, Қызылорда облысы бойынша «Қарапайым заттар экономикасы» бағдарламасына қатысуға кәсіпкерлерден жалпы құны 14,7 млрд.теңгені құрайтын 164 жоба түсіп, оның ішінде 8,7 млрд.теңге сомасындағы&nbsp; 108 жоба мақұлданған, 14 жоба қаралуда. Қалған жобалар бойынша құжаттар жинақталуда.

Қызылорда: Өңдеу өнеркәсібіне қаражатты ұлғайту қажет

<a href="https://kyzylorda-news.kz/date/2020/10/15/">Kyzylorda-news.kz.</a> Достық үйінде облыстық Қазақстан халқы Ассамблеясының ұйымдастыруымен медиация мәселелері бойынша ғылыми және әлеуметтік жобалар байқауы өтті.
Байқаудың мақсаты – облыста медиация институтын насихаттау, соттан тыс татуласу шараларының оңтайлы тұстарын халыққа жеткізу, елдегі қоғамдық келісім мен жалпыұлттық бірлікті нығайту болып табылады.
Байқауға Қызылорда, Байқоңыр және аудандардан 35-ке жуық жоба ұсынылды. Әділ қазылар құрамына «Бітім» медиация орталығының басшысы Л.Бақтыбаева, «Нұр Отан» партиясы облыстық филиалының қызметкері Ә. Жаппасбаев және «Дарын» облыстық қосымша білім беру орталығының қызметкері Н. Рамазанова енгізілген.&nbsp;
Жоба қорғаушылардың қатарында ерекше жұмыстарымен көзге түсіп, жақсы дайындықпен келгендердің қатарында №7 мектеп-лицейінің оқушылары Айдын Бүркітбай және Айзада Серікқызы болды. Олар «egov mobile» қосымша іспетті, «mediation» атты бағдарламасы шығарылса,&nbsp; әрі онда Қызылорда облысындағы медиация орталықтары мен кабинеттерінің байланыс нөмерлері, кәсіби медиаторлар тізімі, медиация институты жайлы толық ақпараттар болса, сондай-ақ, газет беттерінде «Медиация айдары» шығарылып, халыққа нақты мәліметтер берілсе, медиация институты туралы бейне жарнамалар шығарылып, ұлттық арналарда көрсетілсе&nbsp; деген тиімді ұсыныстарын жеткізді.&nbsp;
Аймақта медиация институтын насихаттау мақсатында өткізілген әлеуметтік және ғылыми жобалар байқауына қатысып, үздік нәтиже көрсеткені үшін №7 мектеп-лицейінің оқушылары Айдын Бүркітбай және Айзада Серікқызы I дәрежелі диплом иегері атанды. Ал II дәрежелі дипломмен №264 мектеп-лицейінің оқушысы Ақжүніс Мүсілім, III дәрежелі дипломмен №10 мектептің оқушысы Роза Гажданбекқызы марапатталды. Барлық қатысушыларға Алғыс пен сыйлықтар табыс етілді.
<img src="https://kyzylorda-news.kz/wp-content/uploads/2020/10/mw6a9234.jpg" alt="" />

Қызылордада бітімгерлер «Mediation» бағдарламасын шығаруды ұсынды

<a href="https://kyzylorda-news.kz/date/2020/10/15/?doing_wp_cron=1602745337.4086410999298095703125">Kyzylorda-news.kz.</a> Бүгін Қазақстанда және әлемнің көптеген елдерінде Бүкіләлемдік қол жуу күні аталып өтеді, деп хабарлайды <a href="https://www.inform.kz/kz/kol-zhumaytyn-adamdar-kanday-auruga-ushyraydy-dariger-kenesi_a3706773">ҚазАқпарат</a>.
Біріккен Ұлттар Ұйымы, соның ішінде БҰҰ Балалар қоры (ЮНИСЕФ) 2008 жылы 15 қазанда Бүкіләлемдік қол жуу күнін жариялады. Қолды сабынмен жуу – жыл сайын 3,5 миллион баланың өмірін қиятын түрлі аурулардың алдын алуға көмектеседі.
Осы орайда Нұр-Сұлтан қаласы Жедел медициналық көмек станциясының эпидемиолог-дәрігері Баян Оспанова тазалық пен гигиеналық дағдылардың қаншалықты маңызды екенін түсіндірді.
<blockquote>
 «Күн сайын адамдарда терінің жаңа қабаты құрылады. Ол 2 апта сайын жаңарып отырады. Біздің терімізде көптеген түрлі микроағзалар бар. Оларды резиденттік флора деп атаймыз, яғни өз микробтарымыз теріде өмір сүріп, көбейе алатын флора. Барлық адамның жеке резиденттік микрофлорасы болады. Бірақ, адамдар түрлі заттарды ұстағанда, транзиторлық микрофлора пайда болады. Яғни тері үстінде инфекциялық микробтар қалуы мүмкін. Сол мақсатта осы транзиторлық микрофлораны жою үшін қолды міндетті түрде мұқият жуу керек», – деді Б. Оспанова.
</blockquote>
Дәрігер қол жуылмаса, транзиторлық микрофлора шырышты қабатқа түсуі мүмкін екенін еске салды.
<blockquote>
 «Бұл түрлі ауруларға әкеп соғуы мүмкін. Мәселен, көздің шырышты қабатына түссе – конъюктивит, мұрын мен ауызға түссе – ринит, фарингит, стоматит сынды инфекциямен байланысты аурулар туындауы мүмкін. Мәселен, дәретханадан кейін қол жуу керек деп неге айтамыз? Өйткені, онда ішек флоралары болуы мүмкін, олар адам ағзасына енсе, дизентерия, сальмонеллез, энтерит сынды ішек инфекциялары өршуі мүмкін. Сосын тамақ ішер алдында да қол жуу керек. Себебі, ыдыс-аяқты ұстағанда да ағзаға инфекция енуі мүмкін», – дейді маман.
</blockquote>
Коронавирус инфекциясы да зат үстінде салыстырмалы түрде ұзақ уақыт сақталады.
<blockquote>
 «Қазір де маска тағып, қол жумайтын болсақ, еш қорғаныс болмайды. Өйткені адамдар масканы бір тағады, бір шешеді. Кей адамдар бір масканы күні бойы тағып жүреді. Үйге кіргенде қалтасына салады да, сыртқа шыққанда сол кір масканы алып киеді. Сол лас ауамен дем алады. Яғни, жуылмаған қолдан вирустық, ішек инфекциялары, тіпті тамақтан улану қауіптері бар», – деді Б. Оспанова.
</blockquote>
Сонымен бірге, дәрігер оқырмандарға қол жуу тәсілдері жөнінде кеңес берді.
<blockquote>
 «Әдеттегі сабын мен антибактериялық сабынның құрамы әртүрлі. Жай сабындар терідегі кірден тазартады. Ал бактерияға қарсы сабындар терідегі зиянды-зиянсыз барлық микроағзаларды жояды. Мұндай сабындарды әдетте медицинадық мамандар қолдануы тиіс. Ал тұрғындар күнделікті өмірде әдеттегі сабынды пайдаланса да жеткілікті. Ал егер үйде ішек инфекциясы бар науқас болса, оның айналасындағы микроағзаларды жою үшін әрине, бактерияға қарсы сабын керек», – деп түсіндірді Б. Оспанова.
</blockquote>
Қол жууда су температурасы маңызды емес. Дегенмен, су бөлме температурасында болғаны жөн.
<blockquote>
 «Жылы сумен сабын тезірек шайылады. Ал салқын сумен ұзағырақ жуу керек болады. Ең бастысы – тердіегі сабынды да жақсылап шаюымыз керек. Өйткені, сабын да теріде қалып қойса, бактериялардың көбеюіне жайлы орта болуы мүмкін. Яғни, сабыннан да қолымызды тазарту маңызды. Қол жуу уақытына келсек, сағатқа қарап, секунд санаудың қажеті жоқ. Барлығын кезек-кезегімен жуу керек. Ең алдымен алақанды ысқылап жуғанда 5-ке дейін санау керек. Содан кейін қолдың сырты – 1,2,3,4,5. Саусақтардың арасы – 5 секунд, бас бармақ пен тырнақтарды да шамамен 5 секундтан жууға болады. Осылайша, бір минутқа жетер-жетпес уақытта қол жууға болады. Ал медициналық қызметкерлердің өз ережесі бар – ота алдында, ине саларда немесе науқастарды тексеруде қол жуатын арнайы ережелер белгіленген», – деді Баян Оспанова.
</blockquote>

Қол жумайтын адамдар қандай ауруға ұшырайды?

<a href="https://kyzylorda-news.kz/date/2020/10/15/">Kyzylorda-news.kz</a>. Статистикалық мәліметтерге сүйенсек, жүргізуші куәлігін алу мен көлікті тіркеу қызылордалықтар арасында ең көп тараған қызметтердің бірі болып табылады екен. Осы жылдың өзінен басынан бастап АвтоХҚО арқылы қала бойынша&nbsp;6546, аудан бойынша&nbsp;3696 жүргізуші куәлігі берілген. Жалпы, облыс бойынша&nbsp;10 242 жүргізуші куәлігі алынған. Ал, egov.kz электронды үкімет порталы арқылы онлайн түрде жүргізуші куәлігін алғандар саны&nbsp;6364 құрайды.
Сонымен қатар облыс бойынша жүргізуші куәлігін алу үшін&nbsp;290 азамат емтихан тапсырған. Оның ішінде&nbsp;57 азамат емтиханды сәтті тапсырып, жүргізуші куәлігін оңай әрі жылдам алған.
Естеріңізге сала кетейік қазіргі таңда жүргізуші куәлігін алу мен мерзімін ұзарту бұрынғы кезге қарағанда әлдеқайда ыңғайлы болды. Енді жүргізуші куәлігіңіздің мерзімі өткен жағдайда электрондық үкімет порталын пайдаланып, медициналық тексерістен өту арқылы жаңартуға болады.
Сонымен қоса жүргізуші куәлігін алу үшін емтиханды сынақ (пробный) ақылы түрінде күнделікті тапсыруға мүмкіндіктеріңіз бар.

Қазақстан және Қызылорда облысының жаңалықтары