<a href="https://kyzylorda-news.kz/">Kyzylorda-news.kz</a> ақпараттық агенттігінің 27 маусымға арналған жұлдыз-жорамалы.
Тоқты
Көптен жиналған тапсырмаларды орындайсыз. Сізге әлдекімдер әділетсіздік жасауы мүмкін. Сақ болыңыз. Тік мінезіңіз барлығын орнына келтіретініне сеніңіз. Бірақ сабырсыздығыңыз мәселенің шешілуіне аздап кедергі келтіруі мүмкін.
Торпақ
Сауда-саттықпен айналысатын жандардың жолы болады. Алдыңызға мақсат қоя білсеңіз, оған жету және мол табыс табуға мүмкіндік бар. Нәзікжандылар бүгін аз да болса уақытты көңілді өткізеді. Ал басшылық қызметтегі ер адамдардың жолы болғыш. &nbsp;
Егіздер
Бүгін күш-жігеріңізді жинап, бастаған ісіңізді соңына дейін жеткізіңіз. Жаңа жобаларды жүзеге асырып, қосымша табыс көзін табуға қолайлы күн. Жеке өміріңізде орын алған кейбір қателіктерді жөндей аласыз. Түстен кейін ескі таныстарыңызбен жүздесесіз.
Шаян
Серіктестеріңізге талап қойып, өз ұстанымдарыңызды сақтап қаласыз. Өзгелердің айтқанына ермей, өзіңізге ұнаған іспен айналысыңыз. Айналаңызда болып жатқан жағдайлар сізге пайдасын тигізуі мүмкін.
Арыстан
Бүгінгі күн жаңа таныстықтарға, достарыңызбен кездесуге және басқосулар ұйымдастыруға қолайлы күн. Сізді бүгін тосынсый күтіп тұр. Сонымен қатар бүгін өзіңізге қажетті ақпараттарға қол жеткізесіз.
Бикеш
Алдын ала жоспар құрған болсаңыз, бүгінгі күн сіз үшін сәтті болмақ. Көп жағдайда достардың емес, өзіңіздің ішкі түйсігіңіздің көмегіне жүгініңіз. Жеке өміріңізде аздаған қиындықтар туындауы мүмкін, бірақ еш мойымаңыз.
Таразы
Қонақ күтуге, достармен кездесуге өте қолайлы күн. Әйел адамдар асханадан шықпай, түрлі тәттілер дайындаса, ерлер таза ауада демалады. Балаларыңызға көп көңіл бөліңіз. Оларға сіздің көмегіңіз қажет.
Сарышаян
Шабытыңыз тасып, ішкі түйсік дамиды. Кез келген істі оңай атқарып, жақсы нәтижеге қол жеткізесіз. Сіздің талантыңызға, сапалы жұмысыңызға тәнті болатындар көп. Жақындарыңыз бен балаларыңызға көп көңіл бөліңіз.
Мерген
Өте керемет күн. Жұлдыздар бастаған істі соңына дейін жеткізуді ескертеді. Оларды қазір аяқтамасаңыз кейін көп ақша мен күш жұмсауыңызға тура келеді. Әріптестеріңізбен келіспеушіліктер туындауы мүмкін. Ал ескі таныстарыңыз өздерінің ақыл-кеңестерін береді.
Тауешкі
Бойыңыздағы талантты шығарыңыз. Әсіресе шығармашылық қырыңызды таныта біліңіз. Жаңа таныстарыңыздың арқасында өміріңізді жаңа бағытқа бұрасыз. Дәл бүгін өмірлік серігіңізді табуыңыз мүмкін.
Суқұйғыш
Бүгінгі көңіл-күйіңіз өте керемет. Бүгінгі күніңіз басқосулармен, мерекелік кештермен өтеді. Құжаттарға қол қойып, келіссөздер жүргізуіңіз де мүмкін. Жаңадан бастаған ісіңіз алға басады. Бірақ ол үшін көп күш жұмсауыңыз қажет.
Балықтар
Өз ортаңызда ойыңызды ашық айтып, пікіріңізді білдіріп отырыңыз. Шығармашылық жоспарларыңызды орындауға сәтті күн. Тек шығармашылық бағытта ғана емес, сонымен бірге басқа да әстерде жолыңыз блолады.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Танымал шоумен Нұрлан Қоянбаев Іnstagram парақшасына елдің Туын жүктеп, әлемдік рекордты жаңартуға ниетті екенін жеткізді, деп хабарлайды <a href="https://www.inform.kz/kz/instagram-rekordy-kazakstan-tuynyn-fotosy-alem-boyynsha-en-kop-pikir-zhinagan-suretke-aynalmak_a3666448">ҚазАқпарат</a>.
<blockquote>
 «Инстаграмда бір фото 5 млн комментарий жинап әлемдік рекорд орнатыпты. Достар, әлемдік рекордты жаңартып жібереміз бе? Әрқайсымыз 20 пікірден қалдырсақ, кем дегенде 20 млн комментарий жинаймыз. Осы фото әлемдегі ең танымал фотоға айналсын! Кеттік! Биікте самғасын көк байрағымыз!» – деп жазды ол.
</blockquote>
Әзірге сурет астында 709 593 пікір жазылды.
<blockquote>
 «Мен instagram парақшасындағы Гиннес рекордтарын қарап отырғанмын. Ең көп пікір жинаған суреттің пікірі 5 млн-ға жеткен екен. Бір футболшыны басқа клубқа шақырып, Түркияның «Бешикта́ш« клубының жанкүйерлері пікір қалдырған екен. Футболистің парақшасына 5 млн пікір қалдырып кеткен. Ол адамды Гиннес рекордына енгізген. Ол пікір екі айдың ішінде жиналған», – деді ол.
</blockquote>
Қоянбаев айтқандай, осыдан кейін Туды дәріптеу мақсатында Іnstagram парақшасында ең танымал жалауға айналып, ең көп пікір жинау идеясы туған.
<blockquote>
 «Осылайша, біздің жалауымыз әлемдегі ең танымал, ең көп пікір жинаған сурет болсын деп бір күн бұрын жүктедім. 24 сағатта 700 мың пікір жинады. Бұл Ресей бойынша рекордты жаңартты. Ел бойынша да ең көп жинаған пікір осы. Себебі, Қазақстанда ең көп пікір 50-60 мыңға жетеді. Біз бір күннің ішінде 700 мың пікір жинадық. Кешке дейін млн-ға жетеді деп ойлаймын. Бірақ ол жеткіліксіз. Халық қолдап, 5 млн-нан асырсақ деген ниет бар», – деді ол.
</blockquote>
Шоуменның айтуынша, бұл идеяны өзі мақсатты түрде насихаттамаған.
<blockquote>
 «Достарымыз өздерінің парақшаларына бөлісті. Бақылауым бойынша, көп оқырман жеке парақшаларына салып, бөлісіп жатыр. Республикалық деңгейде барлығына жариялап айтқан жоқпыз. Халықты міндеттемей, өз ниетімен, күшімен жинаған дұрыс деп ойладым. Бірақ, министрліктерден хабарласып жатыр. Оларға да идея ұнаған. Қолдаймыз деп жатыр», – деді Нұрлан Қоянбаев.
</blockquote>

Іnstagram рекорды: Қазақстан Туының фотосы әлем бойынша ең көп пікір жинаған суретке айналмақ

<a href="https://kyzylorda-news.kz/">Kyzylorda-news.kz.</a> Қымбатты талапкерлер!
Қадірлі ата-аналар!Бүгін Қызылорда қаласында ұлттық тестілеу өтуде. 
Көңілдеріңіз күпті болып, қобалжып тұрғандарыңызды жақсы білемін, Сіздерді түсінемін де.
Алайда, Өздеріңіз де байқадыңыздар біздің үміткерлеріміз білімдеріне сеніп, жауынгерлік рухта.
Тестілеудің жоғары деңгейде өтуі үшін қалада екі тестілеу пунктінде сынақ ұйымдастырылып, қажетті барлық жағдай жасалды. Санитариялық ережеге сай әрбір түлек дезинфекциялық туннелдерден өтіп, бетпердемен және арнайы тексерістен өткізілді. Кабинеттер талапқа сай жасақталды. Білім сынағына Қызылорда қаласы бойынша 469 оқушы тестілеу сынағына кірді.
Қымбатты талапкерлер!
«Білім – бақтың жібермейтін қазығы» дейді дана халқымыз. Білектінің емес білімдінің күні туған заманда өмір сүрудеміз.
Тәуелсіз мемлекетіміздің арқасында елімізде білім алуға ниеті бар азаматқа жол ашық және оған жағдай жасалған.
Бүгін – он бір жыл алған білімдеріңіздің таразыға түсер, өмірлік бағыт-бағдарларыңыздың айқындалар сәті жетті. Ұлттық бірыңғай тестілеуге жан-жақты әзірленіп, тыңғылықты дайындықпен келгендеріңіз анық.
Осы сында үмітімізді ақтап, жоғары көрсеткіштерге қол жеткізетіндіктеріңізге сенемін. 
Ертең ел қуатын еселеп дамытатын, бәсекеге қабілетті, білікті маман мына Сіздер деп білемін.
Тестілеуден сәтті, аман-есен өтулеріңізге тілектеспін!

Нұрлыбек Нәлібаев талапкерлерге сәттілік тіледі

<a href="https://kyzylorda-news.kz/">Kyzylorda-news.kz.</a> Бүгінгі күнде COVID-19 инфекциясының нақтыланған жағдайларының өсуі 7 пайыздан асатын деңгейде тіркелуіне байланысты қала аумағында шектеу және карантиндік шараларды күшейту мақсатында Қызылорда қаласы бас санитарлық дәрігерінің 7-ші қаулысы қабылданды. Бұл туралы облыстың бас санитарлық дәрігері Әлия Әбдіқайымова брифингте айтты.
1. Қызылорда қаласы әкімдігі, мемлекеттік, құқық қорғау және арнайы органдар:
1) қала аумағындағы халық көп шоғырланатын қоғамдық орындардың (қала аумағындағы демалыс парктері, аллеялар, субұрқақтар, жағалаулар мен жағажайлар, аквапарктер және т.б. серуендеу орындары) қызметін дүйсенбі-сенбі күндері аралығында 22:00-ден кейін шектеуді, жексенбі күндері қызметін тоқтатуды және аталмыш орындарда тұрғындардың болуына тыйым салуды.
2) жексенбі күндері қоғамдық көліктің жұмысын сағат 10:00-ден 18:00-ге дейін шектеуді, бұл ретте жолаушылар саны көліктегі орындықтар санынан аспауы тиіс;
3) мектептен тыс қосымша білім беру ұйымдары (дамыту, білім беру орталықтары, үйірмелер, факультативтер және т.б.) қызметін тоқтатуды;
4) әр сенбі және жексенбі күндері барлық қоғамдық тамақтану орындарының қызметін тоқтата тұруды, олардың жұмысын «клиенттерге дейін жеткізу» принципімен сағат 11:00-ден 22:00-ге дейін шектеуді;
5) штаттық режимде жұмыс істейтін дәріханалар, азық-түлік, ауыл шаруашылық нысандарын қоспағанда, әр жексенбі күні демалыс парктер мен аквапарктер, барлық сауда үйлері мен базарларында, бөлек тұрған сауда нысандарында дезинфекциялық шараларды жүргізе отырып, «санитариялық күнге» жабуды.
6) 00:00 сағат 2020 жылғы 27 маусымнан бастап 00:00 сағат 6 шілдеге дейін бильярд, букмекерлік және лото-мото конторалардың, футкордтар, фитнес, тренажер залдары (орталықтары), ойын-сауық орталықтары, балалардың ойын алаңдары, компьютер клубтары, спорт кешендерінің (үйірмелер, секциялар) қызметін тоқтата тұруды;
2. Әуежай, теміржол және автовокзалдардың басшылары қала аумағындағы теміржол, автовокзалдары, әуежай, аудан және қалааралық бағыттағы қатынас құралдарының бекеттерінде шығарып салушы және күтіп алушы тұрғындарды шектеуді;
3. Қызылорда қаласы әкімдігі КВИ-ның профилактикасы және Қызылорда қаласында шектеу шараларын сақтау бойынша интернет ресурстар мен әлеуметтік желілерде жадынамалар, хабарландырулар тарату, инфографика, видеороликтер, жүгіртпе жолдары арқылы жаппай түсіндірме жұмыстарының жүргізілуін қамтамасыз етуді.
4. Қаулының орындалуын қадағалауды өзіме қалдырамын.
5. Осы қаулы 2020 жылы 27 маусым 00 сағат 00 минут бастап күшіне енеді.

Қызылордада карантин режимі тағы күшейтілді

<a href="https://kyzylorda-news.kz/">Kyzylorda-news.kz.</a> Шиелі ауданы Бәйгеқұм елдімекенінде орналасқан «Ханқожа» көлінде рейд жүргізілді.
Аталған іс-шараға Шиелі ауданы азаматтық қорғау гарнизонының қызметкерлері, Қызылорда облысы Төтенше жағдайлар департаменті «Өрт сөндіру және авариялық-құтқару жұмыстары қызметінің» Жедел құтқару жасағы қызметкерлері және Қызылорда облысы бойынша көліктік бақылау инспекциясының су көлігіндегі бақылау бөлімінің басшысы А.Қожаниязова қатысты.
Шара барысында қайықты жүргізу кезіндегі ережелер түсіндірілді. Сонымен қатар демалушылар арасында жеке құтқару құралдарын дұрыс пайдаланбағандар ҚР Әкімшілік құқық бұзушылық туралы&nbsp; кодексі бойынша әкімшілік жауапкершіліктері қаралды.
Сондай-ақ, қызметкерлер тұрғындарға су айдындарындағы қауіпсіздік ережелері жайлы түсіндірме жұмыстарын жүргізді. Іс-шара барысында бөлім қызметкерлері су айдындарындағы қауіпсіздік ережелері тақырыбында&nbsp; арнайы дайындалған&nbsp; 400-ден аса үнпарақтарды демалушыларға таратты.
<img src="https://kyzylorda-news.kz/wp-content/uploads/2020/06/kk-2-1-scaled.jpg" alt="" />
<img src="https://kyzylorda-news.kz/wp-content/uploads/2020/06/kk-2-4-scaled.jpg" alt="" />

Бәйгеқұм елдімекеніндегі «Ханқожа» көлінде рейд шарасы жүргізілді

<a href="https://kyzylorda-news.kz/">Kyzylorda-news.kz.</a> Жат ағымдар туралы айтқанда ең алдымен жастардың мәселесі алға шығады. Себебі, деструктивті діни ағымды таратушылар алдымен жастарды жандарына жиюға тырысады. Олардың сенгіш, ақпараттарды талдай білмейтінін жақсы біледі. Сонымен қатар бүгінде жастардың 100 пайызға жуығы ғаламтор меңгерген. Ал, жалған діни ұстанымды таратушыларға әлеуметтік желілер арқылы насихат жүргізген өте оңай әрі оңтайлы. Олар осы әдіс арқылы адам психологиясын қалай әсер ету керектігін жақсы біледі.
Ғаламтор жайлы кеңірек әңгімелейтін болсақ, бір минутта ютбта 400 сағаттық видео жүктеледі, ватсапта 50 млрд. СМС хаттар жіберіледі, инстаграмда 50 мың сурет жүктеледі. Ал, гуглға минутына 4 млн рет сұраныс түседі. Әрбір минутта Вконтакте парақшасында&nbsp; 3,5 млн пост жасалады екен. Осылардың ішінде қаншасы діни ақпараттар екенін ешкім білмейді. Жоғарыда аталған цифрлардың 1 ғана пайызы деструктивті діни ағымдардың таратқан мәліметі дейтін болсақ, онда миллиондаған жастың бір сағат ішінде психологиясы өзгеріске ұшырады деген сөз.
Біздің дін орталығының мамандары мектептегі, орта және жоғарғы оқу орындарындағы жастармен жиі кездесулер ұйымдастырамыз. Әр кездесулерде оларға түрлі анкеталар таратып, ойларын білуге тырысамыз. Сауалнамамыз көрсеткендей жастардың 60-70 пайызы діни білім туралы ақпаратты ғаламтордан қарайды екен. Ал, әлеуметтік желілердегі ақпараттың бәрі ақиқат деп айтуға болмайды. Осыған қарап-ақ деструктивті діни ағымдардың теріс идеологияларының ағын судай тасып ағып жатқанын аңғару қиын емес.
Қызылорда облыстық ішкі саясат басқармасының Дін мәселелерін зерттеу орталығының мамандары әрдайым әлеуметтік желілерге талдау жүргізіп отырады. Орталықтың «Интернет және БАҚ-пен жұмыс бөлімі» қызметкерлері Ақпарат және қоғамдық даму министрлігінің қоғамдық келісім комитетінің дінтану сараптамасына айына күмәнді делінген 20-ға жуық ақпарат жібереді. Олардың ішінде акаунт, электронды кітаптардың сілтемелері бар. Комитетпен мақұлданған 7-8 ақпарат пен акаунттар жойылады. Бірақ, келесі айда тағы сараптама жасағанымды біз жойған ақпараттар өзге акаунттар мен желілерде қайта көрініс табады. Бұл дегеніміз интернет желілердегі ақпараттарды мүлдем жою мүмкін емес деген сөз.
Теріс діни ағымдарды насихаттайтын ақпараттардың кең етек алуының себебін де анықтауға тырыстық. Тағы сол жастар арасында сауалнама өткізіп, зерттеу жасағанымызда жастар ВКонтакте, Инстаграм, Одноклассники желілерінен лақап (фейк) атпен жеке парақшаны 5-10 минут ішінде парақша ашып, оны қолдана алатындарын жеткізді. Демек әлеуметтік желілердегі ақпаратты біз жойып, оларды таратушы акаунттарды өшіргенімізбен оны өзгелей етіп қайта ашудың еш қиындығы жоғын білдік. Ал, бізге олардың таратқан теріс ақпараттарын жою үшін біраз уақыт жұмсауымызға тура келеді.
Бүгінде ата-аналардың балаларымен өткізетін уақытының аздығы да жастардың жиі адасуына алып келетіндігін айта кету керек. Жастар мен жасөспірімдердің сөзінше ата-аналары күндіз жұмыста жүретіндіктен тәрбиелік бағытқа немқұрайлы қарайды. Әрине, әке-шешесі сол балалардың жақсы жағдайы үшін тынымсыз еңбек етеді, шаршап үйіне келеді. Балаларының өзге уақыттарды немен шұғылданып жүргенін зерттей бермейді. Күндізгі тәрбиесін оқу орындарындағы ұстаздарына артып қойған. Балаларына қымбат ұялы телефон алып бергенімен, оның ішінде қай ақпарат ұрпағының санасын улап жатқанын сезбейді. Күндіз немен айналысып жүргенінен хабарсыз. Ұлы немесе қызы дінге бет бұрса, балам имандылыққа бет бұрды деп қуанады. Шын мәнісінде, ол қандай дін ұстанғанын ұқпайды. Сол үшін әрбір ата-ана өз баласының өзінің және мемлекеттің болашағы екеніне баса мән беру керек. Тәрбиесімен жіті айналысып, оның озық ойлы азамат болып қалыптасуына қатаң бақылауға алғаны жөн. Өйтпеген жағдайда, деструктивті ағымдар әке-шешенің бұл қателігін мүлт жібермей, өз мақсаттарына пайдалануы әбден мүмкін.
Шәрібай ТОБЖАНОВ,
Қызылорда облыстық ішкі саясат басқармасының
Дін мәселелерін зерттеу орталығының
маманы

Жастар неге жиі адасады?

<a href="https://kyzylorda-news.kz/">Kyzylorda-news.kz.</a> Қызылордада облыстық сайлау комиссиясының отырысы өтті.
Жиында Қазақстан Республикасы Парламентi Сенатының депутаттығына кандидаттарды қолдап таңдаушылардың қолдарын жинауға арналған қол қою парақтарын жою мәселелері қаралды.
Қазақстан Республикасы Орталық сайлау комиссиясының 2014 жылғы 17 шілдедегі 11/236 қаулысымен бекітілген «Сайлау құжаттарын сақтау қағидаларының» 6 тармағына сәйкес Қазақстан Республикасы Парламентi Сенатының депутаттығына кандидатты қолдап таңдаушылардың қолдарын жинауға арналған қол қою парақтары құпия ақпарат құқығы негізінде Қазақстан Республикасы Парламенті Сенатының депутаттығына кандидат тіркелген күннен кейінгі он жұмыс күні бойы сақталады, ал кейіннен жойылады.
Осыған байланысты ҚР Парламенті Сенатының депутаттығына кандидат болып тіркелген С.Сермагамбетов, А.Альназарова, А.Кайруллаев, И.Шагиртаев, М.Сарсенбаевты қолдап таңдаушылардың қолдарын жинауға арналған қол қою парақтарын жою туралы шешім қабылданды.

Қызылорда облыстық сайлау комиссиясының отырысы өтті

<a href="https://kyzylorda-news.kz/">Kyzylorda-news.kz.</a> Ауыл шаруашылығы сарайларының біріндегі қыз ұзату тойы қай облыста өткені анықталды,&nbsp;деп хабарлайды&nbsp;<a href="https://stan.kz/saraydagi-toy-eldi-shulatkan-saltanatti-shara-kay-oblis-333404/">Stan.kz.</a>
Бұған дейін әлеуметтік желілерде карантин кезінде ерекше орында өткізілетін қыз ұзату тойына дайындық&nbsp;түсірілген видео тарады. Салтанатты тойды өндірістік аймақта орналасқан арнайы техникаға арналған сарайда өткібек болған.
Белгілі болғандай, сарай Қарағанды облысы Осакаров ауданында орналасқан.
<blockquote>
 «Бұл видео бойынша Осакаров ауданы Молодежный кентінің полиция қызметкерлері тексеріс жүргізді.&nbsp;Жеке кәсіпкер той өткізу&nbsp; фактісін жоққа шығарды.&nbsp;Тойға дайындық жүргізілді.&nbsp;Нысанның иесі басқа жақта&nbsp;болған, дайындық туралы ештеңе білмеген. Іс-шараның ұйымдастырушысы жеке кәсіпкердің немере бауыры болды. Той өткен жоқ», – деп хабарлады Осакаров аудандық тауарлар мен қызметтердің сапасы мен қауіпсіздігін бақылау басқармасы.
</blockquote>
Қарағанды ​​облысының санитарлық қызметінің мәліметінше, жеке кәсіпкермен түсіндіру жұмыстары жүргізілді.
<blockquote>
 «Нысан басшысы жұмыстан қызметкерлерді&nbsp;босатты.&nbsp;Осакаров аудандық тауарлар мен қызметтердің сапасы мен қауіпсіздігін бақылау басқармасы мамандары бірнеше рет түсіндіру жұмыстарын жүргізді. Қарағанды облысының бас мемлекеттік дәрігерінің қаулысы табыс етілді», – деді Қарағанды облысының санитарлық қызметінің мамандары.
</blockquote>

Сарайдағы той қай облыста өткені белгілі болды

<a href="https://kyzylorda-news.kz/">Kyzylorda-news.kz</a>. Бұқаралық ақпарат құралдарының өкілдерін кәсіби мерекесімен құттықтаған ақпарат және қоғамдық даму министрі Аида Балаева журналистер бойындағы екінің біріне бұйыра бермейтін дара қасиетті атады, деп хабарлайды <a href="https://sputniknews.kz/society/20200626/14327580/Ministr-BAQ-okilderi-dara-qasiet.html">Sputnik Қазақстан</a>.
Кез келген қоғамның дамуы, мемлекеттің өсіп-өркендеуі сол қоғамның ішкі тұрақтылығына, береке-бірлігіне, ұлттық құндылықтарының сақталуына, мемлекеттік мықты идеологиясына байланысты.
<blockquote>
 «Ал мұны қалыптастыратын, ең бірінші, ғалымдар мен зиялылар, ақын-жазушылар мен журналистер», – деп атап өтті министр өз сөзінде.
</blockquote>
Сондай-ақ, ол БАҚ өкілдерін қоғам жанашырына теңеген.
Өйткені, қоғам тіршілігіндегі қылт еткен қиындыққа бірінші болып үн қатып, тығырықтан шығар жол іздейтін де журналистер қауымы, дейді ол.
<blockquote>
 «Журналистика – шығармашылық өрісті ғана емес, кәсіби өршілдік пен аса терең мәдениеттілікті, жан-жақты білім мен ішкі тәрбиені қатар талап ететін кірпияз мамандық. Өйткені, ғұлама ғалыммен де, біртуар дарынмен де, қарапайым қауыммен де тең сөйлесіп, тамырын табу – екінің біріне бұйыра бермейтін дара қасиет. Асқақ абырой», – деді Балаева.
</blockquote>
Министр мұндай қасиет пен абыройды отандық журналистиканы бүгінгідей тамаша биікке көтерген майталман аға буыннан бастап осы күні ақпарат ағынымен алысқан әрбір тілшінің бойынан көретінін айтты.

Министр БАҚ өкілдерінің дара қасиетін атады

<a href="https://kyzylorda-news.kz/">Kyzylorda-news.kz.</a> Ұлттық қауіпсіздік комитетінің шекара қызметі карантин кезінде шекарадан өту тәртібін түсіндірді, деп хабарлайды&nbsp;<a href="https://sputniknews.kz/">Sputnik Қазақстан</a>.
Шекаралық бақылау департаменті бастығының орынбасары, полковник Ғани Ағаділовтың айтуынша, төтенше жағдай тоқтатылса да, мемлекеттік шекарадан өтуге қатысты уақытша шектеулер алынған жоқ. Себебі карантин жалғасып жатыр.
<blockquote>
 «Қазіргі тәртіп бойынша Қазақстан азаматтары ел аумағына кедергісіз кіре алады. Ал шетел азаматтарына республикадан шығуға рұқсат берілген. Шектеулер дипломаттарға, ұшақ пен теңіз кемелерінің экипаждарына, пойыз бригадаларына, жүк автокөліктерінің жүргізушілеріне және басқа тұлғаларға тарамайды», – деді Ағаділов бүгінгі онлайн брифингте.
</blockquote>
Осы орайда департамент бастығының орынбасары оқуға түскен жастарды шекарадан өткізу мәселесіне де тоқталды. Оның сөзіне қарағанда, шетелдің жоғары оқу орнына түсуге үміткер қазақстандықтарда тиісті құжаттар болуы қажет.
<blockquote>
 «Сол оқу орындарының растайтын құжаттары, шақыру және осы мақсатпен сол елдерге кіруге ресми рұқсаты болған жағдайда шекарадан шектеусіз өте алады. Егер осы азаматтар кәмелеттік жасқа толмаған болса, ата-аналарының еріп жүруіне рұқсат берілген. Сонымен қатар, емтихан тапсырғанға, студенттік визаларды ұзартуға ешқандай шектеу жоқ», – деп атап көрсетті Ағаділов.
</blockquote>
Қазіргі кезде өткізу пункттерінде жолаушылар легі азайды. Дегенмен, тәртіп бұзушылықтар да жоқ емес.&nbsp;
<blockquote>
 «Шекараны жалған құжатпен өтуге, тауар-материалдық құндылықтарды бақылаудан жасыруға, тыйым салынған және шектеулер қойылған азық-түлік санатын өткізуге, қорғаныш құралдары және медициналық бұйымдарды заңсыз шығару фактілері анықталуда», – дейді Ағаділов.
</blockquote>

Шетелге түскен студенттің елден шығу тәртібі қандай?

<a href="https://kyzylorda-news.kz/">Kyzylorda-news.kz.</a> «Қазгидромет» РМК Қызылорда облысы бойынша филиалының хабарлауынша 27 маусымда Қызылорда облысының кей жерлерінде найзағай, дауыл, шаңды дауыл күтіледі. Солтүстік-батыстан жел соғады, күші 15-20, кей жерлерде 25 м/с күтіледі.
Қызылорда қаласы 27 маусымда солтүстік-батыстан жел соғады, екпіні 15-20 м/с, шаңды дауылмен күтіледі. Дабылды ескертудің ықтималдылығы90-100%.

Қызылордада ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a> Қазақстан Республикасының агроөнеркәсіптік кешенін дамытудың 2017-2021 жылдарға арналған Мемлекеттік бағдарламасына сәйкес облыстың ауыл шаруашылығы өндірісін субсидиялау жыл сайын артуда, деп хабарлайды облыстық ауылшаруашылығы басқармасының баспасөз қызметі. 
Былтыр Қызылорда қаласында көлемі 2,2 гектарды құрайтын «КазАгроМир» ЖШС-нің заманауи автоматтандырылған жылыжай кешені толықтай іске қосылды. Жобаға 143,0 млн. теңге инвестициялық субсидия төленген. Бүгінде жылыжайдан күніне 5-6 тонна өнім жиналып, ішкі нарықты қияр өнімімен қамтамасыз етіп отыр. 40- тан аса адамды жұмыспен қамтып отырған кәсіпорыннан биыл 300 тонна қияр жиналған. 
Сондай-ақ, өңірде шаруашылық құрылымдары тыңайтқыштардың құнын субсидиялау бойынша өтінімдер тапсырып, қаржыларын алған. Қызылорда қаласына қарасты «Ы. Жахаев атындағы» ҒЗИ, Сырдария ауданына қарасты «Мағжан и К» және Қармақшы ауданына қарасты «Жаңажол» ЖШС-тері егіске пайдаланатын азотты және фосфорлы тыңайтқыштары үшін 174,1 млн. теңге субсидия алған. Нәтижесінде, аталған шаруашылықтар дақылдың өнімділігін арттыру мақсатында құрамында микроэлементтері бар тыңайтқыштарды қолдануда. 
Мал шаруашылығы бойынша ағымдағы жылы Қазалы ауданына қарасты «Қуанышбаева» ЖК «Ауыл шаруашылығы қаржылай қолдау қоры» АҚ арқылы 50,0 млн. теңге несие қаражатын алып Ресей Федерациясынан 80 бас ет бағытындағы асыл тұқымды МІҚ малының аналықтарын облысқа жеткізген. Ал, Шиелі ауданына қарасты «Айболат» шаруа қожалығы өз қаржысы есебінен 24,0 млн. теңгеге Шығыс Қазақстан облысынан отандық ет бағытындағы асыл тұқымды МІҚ аналықтарын алып келіп, әр басына 150,0 мың теңгеден 12,0 млн. теңге субсидия алуға қол жеткізген.

Қазақстан және Қызылорда облысының жаңалықтары