<a href="https://kyzylorda-news.kz/date/2020/09/11/">Kyzylorda-news.kz.</a> Елорданың білім басқармасы қашықтан білім алу үшін таратылған интернет роутердің трафигі неге тез таусылатынын түсіндірді, деп хабарлайды&nbsp;&nbsp;<a href="https://sputniknews.kz/">Sputnik Қазақстан</a>.
Басқарма басшысы Шолпан Қадырованың айтуынша, бүгінде роутерлердің интернет трафигіне қатысты мәселе туындап отыр. Ата-аналар бір айға берілген интернеттің не себепті он күннің ішінде таусылып қалатынын сұрайды. Осы орайда бір оқушыға нақты қанша мегабайт берілетінін білгісі келеді.&nbsp;&nbsp;
<blockquote>
 “Біз қашықтан оқытуды қамтамасыз ету мақсатында 22 600 роутер сатып алып, оқушылар мен педагогтарға уақытша пайдалануға бердік. Интернет трафигі ай сайын 70 гигабайт. Оған қоса, отандық білім беру ресурстарын тегін пайдалануға болады”, – деді Қадырова онлайн брифингте.&nbsp;
</blockquote>
Оның сөзіне қарағанда, он күннің ішінде трафиктің таусылып қалу жағдайлары бар. Осыған байланысты провайдерлермен бірге тексеріс жасалды.&nbsp;
<blockquote>
 “Тексеріс барысында оқушылардың, ата-аналардың немесе басқа адамдардың интернетті орынсыз пайдаланатыны, оқу процесіне қатысы жоқ сайттарға кіретіні анықталды. Мысалы, Youtube-тан видео көру, түрлі әлеуметтік желілерге кіру, фильмдер қарау және тағы басқасы бар”, – деді Қадырова онлайн брифингте.
</blockquote>

Оқушыларға берілген роутердің интернет трафигі неге тез таусылып қалады?

<a href="http://kyzylorda-news.kz">Kyzylorda-news.kz.</a> Қызылорда қаласының 49 жастағы тұрғыны алаяққа алданып қалған. Қала орталығынан үш бөлмелі пәтер алып беремін деген алаяқтың сөзіне сенген ол 2 миллион теңге көлемінде ақшасын берген.
<blockquote>
 «Бұл дерек&nbsp; бойынша&nbsp; Қазақстан Республикасы Қылмыстық кодексінің 190-бабы 1-бөлігімен (Алаяқтық) сотқа дейінгі тергеп – тексеру жүргізілді. Тергеу барысында күдікті қатарында танылған Қызылорда қаласының тұрғыны&nbsp; өзінің жасаған қылмыстық әрекетін толығымен мойындаған. Полицейлер күдіктінің бұл қылмыстан бөлек тағы алаяқтық қылмыс жасағанын анықтады», – делінген полиция департаментінің таратқан хабарламасында.
</blockquote>
Тергеу барысында күдіктінің алаяқтық іс-әрекеті толығымен дәлелденіп, алаяқ сот шешімімен 4 жыл 6 айға бас бостандығынан айырылды.

Қызылордада үй алып беремін деп алдап соққан алаяқ  сотталды

<a href="https://kyzylorda-news.kz/date/2020/09/11/">Kyzylorda-news.kz.</a> 2020 жылғы 12-14 қыркүйекке арналған ауа райы болжамы белгілі болды.
Синоптиктердің болжамынша, алдағы күндері елімізде күн жылып, мизам шуақ болады. Дегенмен, кейбір өңірлерде жаңбыр жауып, тұман болу ықтималдығы басым.&nbsp;
<blockquote>
 “Үш күн бойы Қазақстан аумағының басым бөлігі солтүстік-батыс циклонының алдыңғы бөлігінің ықпалында болады, ол ауа температурасының жоғарылауын тудырады. &nbsp;Алайда кей жерлерде найзағай ойнап, &nbsp;өткінші жаңбыр өтеді. Тек еліміздің шығысында жауын-шашын болмайды, ал түнгі және таңғы уақытта кей жерлерде үсік және тұман байқалады”, – деп хабарлайды Қазгидромет.
</blockquote>

Демалысқа арналған ауа райы болжамы

<a href="https://kyzylorda-news.kz/date/2020/09/11/">Kyzylorda-news.kz.</a> 15 тамыздан бастап Қызылорда қаласы Төтенше жағдайлар басқармасының ұйымдастыруымен қала мен қалаға қарасты барлық ауылдық округтерде тұрмысы төмен&nbsp; және аз қамтылған жанұяларға тұрғын үй секторларында өрт қауіпсіздік ережелерін сақтау бойынша түсіндірме жұмыстары жүргізіліп келеді.&nbsp;
Бұған қоса, «АЛАУ ГАЗ-АЙМАҚ» ЖШС Қызылорда облысы бойынша филиалымен бірлесіп, қала әкімдігі ұсынған тізімге сәйкес қатты отынмен жылытылатын аз қамтылған отбасылардың моржаларын тазалау және көмірқышқыл газын анықтайтын датчиктер орнату жұмыстары қолға алынған.&nbsp;
<blockquote>
 «Қазіргі таңда түсіндірме жұмыстары барысында қала өрт сөндіру бөлімдерінің қызметкерлері мен жастар ресурстық орталығының волонтерлары жұмылдырылып, барлығы 1 мың 384 тұрғын үй араланып, 6 мың 596 адам қамтылды. Аталған түсіндірме жұмыстары жылу беру маусымы аяқталғанға дейін жалғасын табатын болады. Қала тұрғындарын төтенше жағдайлардың алдын алу және болдырмау мақсатында өрт қауіпсіздігі шараларын қатаң сақтауға шақырамыз», – дейді Қызылорда қаласы Төтенше жағдайлар басқармасының бастығы Жасұлан Түйменов.
</blockquote>

Жылу беру маусымы: Өрт қауіпсіздігін сақтау маңызды

<a href="https://kyzylorda-news.kz/">Kyzylorda-news.kz.</a> Карантин талаптары жеңілдетілгеннен бері жұмысын қайта бастауға кәсіпкерлерден 9634 өтініш түсті. Оның 440-ы қанағаттандырудан бас тартылды. Бұл туралы қалалық Тауарлар мен көрсетілетін қызметердің сапасы мен қауіпсіздігін бақылау басқармасы басшысының міндетін атқарушы Гүлмира Сыздықова мәлімдеді.
Шілде айынан бері карантин талаптарының сақталуын қадағалау бойынша 1882 рейд жүргізіліп, 420 заңбұзушылық анықталды. Оларға жалпы сомасы 18 612 600 теңге әкімшілік айыппұл салынды.
<blockquote>
 «Ең көп кемшілік азық-түлік дүкендері, сауда үйлерінде анықталды. Жеке үйлерде той жасаған 130 адамға айыппұл салынды. Қоғамдық тамақтану, семинарлар өткізу секілді кемшіліктер кездесті»,- деді Гүлмира Жамбылқызы.
</blockquote>
Ал 164 дерек маска тағу ережесін бұзуға қатысты, жұмыс жасау уақытының шектелуін бұзу бойынша – 48, тыйым салынған нысандардың қызмет көрсетуі бойынша – 37, залалсыздандыру талаптарының сақталмауы және адамдар арасындағы арақашықтықтың сақталмауы бойынша – 25 талап бұзушылық орын алды.

Қызылорда: Карантин кезінде 420 заңбұзушылық анықталды

<a href="https://kyzylorda-news.kz/date/2020/09/11/">Kyzylorda-news.kz</a>. Қазақстанда өткен тәулікте 77 адамда коронавирус індеті ПТР арқылы расталды.
Шығыс Қазақстан облысында 18 адам COVID-19 жұқтырды. Бұл – ел бойынша өткен тәуліктегі ең жоғары өсім. Шымкентте коронавирус жұқтырған адам тіркелмеді.
Аймақтар бойынша:
<ul>
<li>Нұр-Сұлтан қаласы – 8</li>
<li>Алматы қаласы – 9</li>
<li>Ақмола облысы – 3</li>
<li>Ақтөбе облысы – 1</li>
<li>Алматы облысы – 4</li>
<li>Атырау облысы – 6</li>
<li>Шығыс Қазақстан облысы – 18</li>
<li>Жамбыл облысы – 2</li>
<li>Батыс Қазақстан облысы – 2</li>
<li>Қарағанды облысы – 7</li>
<li>Қостанай облысы – 2</li>
<li>Қызылорда облысы – 2</li>
<li>Маңғыстау облысы – 1</li>
<li>Павлодар облысы – 4</li>
<li>Солтүстік Қазақстан облысы – 4</li>
<li>Түркістан облысы – 4.</li>
</ul>
Жалпы ел бойынша ауырғандар саны 106 661.

Қызылордада өткен тәулікте 2 адамнан коронавирус анықталды

<a href="https://kyzylorda-news.kz/date/2020/09/11/">Kyzylorda-news.kz.</a> Кейбір жолаушылар пойызының қозғалыс кестесі өзгерді, деп хабарлайды «Жолаушылар тасымалы» АҚ баспасөз қызметі.
Жолаушылар ағынының ұлғаюына байланысты:
№67/68 «Нұр-Сұлтан Нұрлы жол – Өскемен-1» бағытындағы жолаушылар пойызы 4 күнде 1 реттен күн аралыққа жүру жиілігі 15 қыркүйектен бастап Нұр-Сұлтан Нұрлы жолдан қысқарса, Өскеменнен келуі/жөнелтілуі 16 қыркүйектен бастап қысқарады, ал Нұр-Сұлтан Нұрлы жолға келуі 17 қыркүйектен бастап жүру жиілігі күн аралыққа қысқарады;
№4/3 «Нұр-Сұлтан Нұрлы жол – Алматы-2» бағытындағы күн аралық сайын қатынайтын пойыз Нұр-Сұлтан Нұрлы жолдан 13 қыркүйектен бастап тақ сан бойынша жөнелтілсе, Алматыдан келу/жөнелтілуі 14 қыркүйектен бастап жұп сан бойынша, Нұр-Сұлтан Нұрлы жолға келуі 15 қыркүйектен бастап тақ сан бойынша ұзартылады;
№25/26 «Алматы-2 – Шымкент» бағытындағы күн аралық сайын қатынайтын пойыз қайта жанданып, Алматыдан 14 қыркүйектен жұп сан бойынша жөнелтілсе, Шымкенттен келуі/жөнелтілуі 15 қыркүйектен тақ сан бойынша, Алматыға 16 қыркүйектен жұп сан бойынша келеді;
Сонымен қатар,тіркелмелі және жолда тоқтамайтын вагондардың жолаушылар пойыздарының жүруі уақытша тоқтатылады:
– №656/655 «Нұр-Сұлтан Нұрлы жол – Айсары» Нұр-Сұлтан Нұрлы жол мен Айсарадан 2 қазаннан бастап жөнелтіледі;
– №353-903-108/107-902-354 пойыздар құрамындағы қатынайтын жолда тоқтамайтын реттік вагон №26/27 «Павлодар-Жезқазған», Павлодардан 2 қазаннан бастап жөнелтілсе, Жезқазғаннан 4 қазаннан бастап жөнелтілетін болады;
– №339-56/55-902-354 пойыздар құрамында қатынайтын жлолда тоқтамайтын реттік вагон №25 «Павлодар-Қызылорда», Павлодардан 1 қазаннан бастап жөнелтілсе, Қызылордадан 3 қазаннан бастап жөнелтіледі;
– №22-6941/6942-21 пойыздар құрамдарында қатынайтын жолда тоқтамайтын реттік вагон №30/32 «Алматы-1-Достық», Алматыдан 2 қазаннан бастап жөнелтілсе, Достықтан 3 қазаннан бастап жөнелтіледі;
– №86/85 пойыздың құрамындағы №25/26 «Қарағанды-Сарыағаш» тіркемелі реттік вагондар, Қарағандыдан 1 қазаннан бастап жөнелтілсе, Сарыағаштан 2 маусымнан бастап жөнелтілді;
– №673-86/85-674 пойыздарының құрамындағы №21/22 «Павлодар-Сарыағаш» тіркелмелі реттік вагондар, 1 қазаннан бастап Павлодардан жөнелтілсе, 3 қазаннан бастап Сарыағаштан жөнелтіледі.
Аталған пойыздарға бұрын жол жүру билеттерін ресімдеген жолаушылар жол жүру құжаттарын қайтаруды ресімдей алады және ақшалай қаражатты ұстап қалусыз толық көлемде ала алады.
Билеттер үшін төлемдерді қайтару билетті қайтару тәртібі мен сатып алу тәсіліне байланысты қолма-қол және қолма-қол ақшасыз есеп айырысу арқылы жүргізіледі.
Жолаушылар пойыздарының қозғалыс кестесі бойынша барлық анықтамалық ақпаратты «105» нөмірі бойынша білуге болады.

«Павлодар-Қызылорда» пойызының жүру кестесі өзгерді

<a href="https://kyzylorda-news.kz/date/2020/09/11/">Kyzylorda-news.kz.</a> Қазақстандық БАҚ Атырау облысы әкімінің бірінші орынбасары Нұрлан Таубаевтың ұсталғаны туралы хабарлады.
Шенеунікті астанадан Атырауға арнайы келген сыбайлас жемқорлыққа қарсы агенттіктің бір топ қызметкерлері ұстады, деп жазады «<a href="https://azh.kz/">Ақ Жайық</a>» газеті.
Таубаевпен бірге облыстық құрылыс басқармасының басшысы Тимур Басаровтың да ұсталғаны хабарланды. Олар 182 миллион теңге пара алды деп күдіктелуде.
Еске салайық, Нұрлан Таубаев биыл мамыр айында Атырау облысы әкімінің бірінші орынбасары болды. Жақында ғана Қазақстанның сыбайлас жемқорлыққа қарсы қызметінің басшысы Алик Шпекбаев елдегі сыбайлас жемқорлыққа қарсы күресті күшейту туралы айтқан еді.&nbsp;
<img src="https://kyzylorda-news.kz/wp-content/uploads/2020/09/news_full1599744727545f52c9c2bd93ddc58918cee4be6a62.jpg" alt="" />

Облыс әкімінің орынбасары мен құрылыс басқармасының басшысы ұсталды

<a href="https://kyzylorda-news.kz/">Kyzylorda-news.kz.</a> Биыл облыста 488 шақырым жол жөнделеді. Оған республикалық және облыстық бюджеттен 19 614,0 млн.теңге бөлінді. Бұл туралы Өңірлік коммуникациялар қызметінің ақпарат алаңында өткен брифингте облыстық жолаушылар көлігі және автомобиль жолдары басқармасының басшысы Мұрат Тлеумбетов мәлімдеді.
<blockquote>
 “Нұрлы жол” бағдарламасы аясында – 5 434,2 млн.теңге қаралды. Қомақты қаржыға 136 шақырым жол жөнделіп, көпірлер салынып, қайта жаңғыртылады. 2020-2025 жылдарға&nbsp;арналған “Нұрлы жол” мемлекеттік бағдарламасы шеңберінде жергілікті маңызы бар автомобиль жолдарын жөндеуге жалпы құны 46 млрд.теңге болатын 79 жоба енгізілді, – деді Мұрат Жолкелдіұлы.
</blockquote>
<img src="https://kyzylorda-news.kz/wp-content/uploads/2020/09/119140592_1111694012559443_1519570924532602102_o.jpg" alt="" />
Айта кетейік, жыл соңына дейін облыстық және аудандық маңызы бар автомобиль жолдарының 69 пайызын жақсы және қанағаттанарлық деңгейге жеткізу жоспарлануда.

Қызылордада 488 шақырым жол жөнделеді

<a href="https://kyzylorda-news.kz/ru/">Kyzylorda-news.kz.</a> Қызылорда облысының әкімі Гүлшара Әбдіқалықованың төрағалығымен жылу беру маусымына дайындық жөніндегі облыстық штаб отырысы өтті.
Кеңейтілген жиында аймақ басшысы бірқатар сала басшыларының баяндамаларын тыңдап, жылыту маусымы кезінде қолға алынған жұмыстардың барысын саралады.
Облыс әкіміне алдымен облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетов атқарылған жұмыстарды тізбелеп, қазіргі ахуал барысын баяндады.
Бүгінгі күні өңірде жылу беру жұмыстары 85 пайызға аяқталған. 2020 жылға ағымдағы және күрделі жөндеуге, «Нұрлы жер» бағдарламасы және «Жұмыспен қамту жол картасы» аясында 4 млрд.теңге қаржы қаралған. Нәтижесінде жылу қазандықтарына жөндеу жұмыстары жүргізіліп, ұзындығы 15 шақырым болатын магистралды және квартал ішілік жылу желілері қайта жаңғыртылуда. Бұл жұмыстардың нәтижесі өңірдегі жалпы жылу желілерінің тозу пайызын 42 пайыздан 39 пайызға дейін төмендетеді.
Облыс әкімі қала, аудан ішіндегі жылыту жағдайларын бағамдай келе, бірқатар мәселелерге уақытылы мән беріп, жұмысты тез арада реттеуді тапсырды.
<blockquote>
 “Қызылорда қаласындағы, Белкөл кентінде жылу құбырларын күрделі жөндеу жұмыстары бекітілген жоспарға сәйкес жүргізілмей отыр. Барлық жүзеге асып жатқан жобалар 1 қазанға дейін аяқталуы қажет. Жөндеу жұмыстарының барысына арнайы кесте әзірлеп, орындалуы туралы әр аптаның дүйсенбісінде маған баяндауларыңыз тиіс”,-деді облыс әкімі сала басшыларына.
</blockquote>
<img src="https://kyzylorda-news.kz/wp-content/uploads/2020/09/119238198_2717732981663087_6029773932837964431_o.jpg" alt="" />
Жиында Гүлшара Әбдіқалықова аудандарға газ тарату мәселесін алға қойып, әлеуметтік нысандарға жылу беру жұмысын уақытылы іске асыруды тапсырды. Атап айтқанда, «ҚазТрансГаз Аймақ» АҚ Қызылорда өндірістік филиалының директоры Талғат Қызылбаевқа Қармақшы, Жалағаш Сырдария аудандары орталығына газ тарату стансаларын пайдалануға қажетті қаржы шешілгендіктен, аудан халқына уақытылы газ беруді міндеттеді.
<blockquote>
 “Облыстағы жылу беру нысандарының басым бөлігі әлеуметтік салаға тиесілі. Денсаулық сақтау мекемелерінде, әсіресе, Қазалы аудандық Туберкулезге қарсы диспансері және Сырдария аудандық ауруханасының күрделі жөндеу жұмыстары бүгінде толық аяқталмаған. Жылу беру маусымына аз ғана уақыт қалса да, денсаулық сақтау саласының әзірлігіне күмәнім бар. Сондықтан, аудан әкімдігімен бірлесе отырып, аурухананың жылу жүйесінің қалыпты жұмыс жасауына жағдай жасаңыздар”,-деді облыс әкімі.
</blockquote>
Отырыста облыс әкімі көпқабатты тұрғын үйлерге жылу беру мәселесін қарап, модернизациядан өткен үйлердің жұмыстарына қатысты қала әкіміне бірқатар тапсырма берді. Сондай-ақ, отын қоймаларына керекті отын көлемін қамтамасыз етуде әлі де жұмысты жандандыру қажет деді. Көмір қоймаларында тапшылық туындамасы үшін бағаның негізсіз өспеуіне жол бермеу қажеттігін мән беріп, кәсіпкерлік және туризм басқармасының басшысы Фердауси Қожабергеновке нақты тапсырма жүктеді.
<blockquote>
 “Алдыңғы жылдары көмір тапшылығы мен бағаның күрт өсуіне байланысты тұрғындар тарапынан дүрбелең туғанын білесіздер. Сондықтан бағаның өсуін, екі ортадағы делдалдықты болдырмау мақсатында, көмір өндіруші мекемелермен тікелей келісім-шартқа отыру үшін кәсіпкерлермен жұмыстарды үйлестіріңіз”,-деді өңір басшысы.
</blockquote>
Жиын соңында облыс әкімі жоспарда айқындалған, межеде міндеттелген жұмыстарды тарқата келе, қала, аудан әкімдіктері, сала басшылары, коммуналдық қызметтің жетекшілеріне 1 қазанға дейін әлеуметтік нысандар бойынша қажетті отын қорын жасақтауды 100 пайызға, тұрғындарды 70 пайыз қамтамасыз етуді, коммуналдық төлемдерді жинақтауды басты назарға қойды. Сондай-ақ, облыстық энергетика және тұрғын үй-коммуналдық шаруашылық басқармасының басшысына мекемелер арасындағы берешек қарыздарды болдырмау шараларын қабылдауды қатаң тапсырды. Ал, облыстық экономика және бюджеттік жоспарлау басқармасының басшысы Нұрғали Қордабайға электр энергиясы тарифінің өсуіне байланысты бюджеттік мекемелердің шығындарын қайта қарауды міндеттеді. Сондай-ақ, білім, мәдениет саласындағы нысандарға жылу беру жұмыстарын өз мерзімінде аяқтауды жауапты басқармаларға жүктеді.
Мұнан бөлек, облыс әкімі аппаратының ұйымдастыру-инспекторлық жұмыс және аймақтық даму бөлімінің инспекторлары 1 қазанға дейін қаладағы және аудандардағы нысандарды аралап, мониторинг жүргізуі қажеттігін атап өтіп, жұмыстың орындалуын бақылауды облыс әкімінің орынбасары Серік Сүлейменовке тапсырды. 
Отырысты қорытындылаған облыс әкімі жылу беру маусымын ешқандай кедергісіз өткізуіміз қажет деді.
<img src="https://kyzylorda-news.kz/wp-content/uploads/2020/09/119136756_2717733938329658_585324095466108049_o.jpg" alt="" />
<img src="https://kyzylorda-news.kz/wp-content/uploads/2020/09/119169939_2717734388329613_8849743776379925329_o.jpg" alt="" />
<img src="https://kyzylorda-news.kz/wp-content/uploads/2020/09/119210886_2717734144996304_4947428226490667683_o.jpg" alt="" />

Жылу беру маусымына дайындық жөніндегі облыстық штаб отырысы өтті

<a href="https://kyzylorda-news.kz/date/2020/09/10/">Kyzylorda-news.kz</a>. «Қазгидромет» РМК 11 қыркүйекке арналған ауа райы болжамын жариялады.
«Қазгидромет» РМК Қызылорда облысы бойынша филиалының хабарлауы бойынша 11 қыркүйекте Қызылорда облысының кей жерлерінде найзағай күтіледі. Шығыстан батысқа ауысып, жел соғады, күші күндіз кей жерлерде 15-20 м/с күтіледі. Күндіз төтенше өрт қаупі сақталады.

Қызылордада найзағай ойнап, күшті жел соғады

<a href="https://kyzylorda-news.kz/date/2020/09/10/">Kyzylorda-news.kz.</a> Жарты жылдың қорытындысы бойынша Әлеуметтік медициналық сақтандыру қоры МӘМС пакетіндегі медициналық көмекті төлеуге 4,2 млрд теңгеден астам қаржы жіберді. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.
Қор филиалының басшысы төлем халыққа көрсетілген медициналық қызметтердің сапасы мен көлеміне мониторинг жүргізілгеннен кейін ғана жүзеге асырылатындығын атап өтті. Клиникалық хаттамаларды және емдеуге қажетті талаптарды сақтай отырып, факті бойынша көрсетілген және құжатпен расталған қызметтер ғана төленеді.
Бақыт Исмаханбетовтың айтуынша, жарты жылдықтағы шығындардың басым бөлігі стационарлық медициналық көмек төлемі – 927,9 млн теңге. 6 ай ішінде жоспарлы түрде еліміздің стационарларында 7,2 мыңнан астам адам емделді.
Көрсетілген консультациялық-диагностикалық көмек үшін шамамен 1,5 млрд теңге төленді. Атап айтқанда, диагностикалық қызметтер арасында КТ және МРТ қызметтері&nbsp; азаматтар үшін өзекті. Жарты жыл ішінде пациенттерге КТ және МРТ 7,9 мың қызмет көрсетілді: 34,7 млн. теңге сомасына 3,5 мың компьютерлік томография қызметі, 70,7 млн. теңге сомасына 4,3 мың МРТ қызметі.
Сонымен қатар, қаңтар мен маусым аралығында 102,1 мың-нан астам стоматология, 39,2 мыңға жуық рентген және 24,8 мыңнан астам УДЗ-диагностика қызметтері көрсетілді, олардың жалпы құны 494,8 млн теңгеден асады. Олардың барлығы МӘМС пакетінде медициналық сақтандыру қаражаты есебінен көрсетілді, пациенттерге медициналық көмек үшін Қор ақы төледі.
Одан бөлек, құны 478 млн теңгені құрайтын 2 611 қызылордалық медициналық оңалтудан өтті. Жарты жылда тағы 38 мыңнан астам азамат 147 млн теңге сомасына жоғары технологиялық медициналық қызмет алды.
<blockquote>
 «Естеріңізге сала кетейік, бірінші жартыжылдықта барлық қазақстандықтар МӘМС жүйесінде шартты түрде сақтандырылған және медициналық қызметтерді кепілді көмек аясында, сондай-ақ МӘМС аясында пайдалана алатын. Екінші тоқсанда карантин аясында жоспарлы түрде медициналық көмек көрсетуге шектеу қойылды. 1 тамыздан бастап еліміздің клиникаларында жоспарлы медициналық көмек қайта басталды, сондықтан екінші жартыжылдықта МӘМС жүйесінде көрсетілген медициналық қызметтер бойынша көрсеткіштердің өсуі күтілуде», – деп атап өтті ӘМСҚ филиалының директоры.
</blockquote>
2020 жылға Әлеуметтік медициналық сақтандыру қорының филиалымен 55 медициналық қызмет көрсетушілермен келісім – шарт жасалды, оның ішінде 28 (50,9%) – мемлекеттік, 27 (49,1%) – жеке меншік.

Қазақстан және Қызылорда облысының жаңалықтары