<a href="https://kyzylorda-news.kz/">Kyzylorda-news.kz.</a> Маусым айынан бастап барлық ЖОО-лар құжаттарды электронды түрде қабылдай бастайды. Бұл туралы ҚР Білім және ғылым министрі Асхат Аймағамбетов&nbsp;онлайн конференцияда&nbsp;айтты.
<blockquote>
 «Цифрландыру мәселесі өте өзекті болып тұр. Біз биыл бірінші рет цифрлық режимде ҰБТ тапсыруға құжаттарды қабылдадық. Алдыңғы жылмен салыстырғанда құжаттардың саны біраз көбейді. Цифрландыру мәселесі ары қарай да біздің басты назарымызда болады», – дейді ҚР Білім және ғылым министрі Асхат Аймағамбетов.
</blockquote>
Оның айтуынша, енді ЖОО мен колледждерге құжат қабылдау науқаны басталады. Бұл мәселені де қазіргі жағдайға сәйкес дұрыс жолға қойып, тиімді іске асыру керек.
<blockquote>
 «Жыл сайын 300 мыңнан астам түлек колледж бен ЖОО-ға құжаттар тапсырады. Құжаттар пакеті фотосурет, көшірме, куәліктен және басқа да 6 құжаттан тұрады. Бұл құжаттарды жинау үшін шамамен 4 мың теңге кетеді. Жыл сайын осындай құжаттарды тапсыруға 1 мрлд теңге жұмсалады. Сонымен қатар құжаттарды барып тапсыру, кезекке тұру керек. Мұндай қажетсіз кезекке тұруды болдырмау үшін құжаттарды қабылдауды автоматтандыру керек. Биыл барлық білім беру ұйымдарына қабылдау Электрондық үкімет порталы арқылы жүзеге асырылады. Порталда кішкене апаттық жағдай орын алғандықтан, оның қалай жүзеге асырылатынын қазір көрсете алмаймыз. Маусым айынан бастап барлық ЖОО-лар құжаттарды электронды түрде қабылдайды», – дейді Білім және ғылым вице-министрі Рүстем Биғары.
</blockquote>

Биыл талапкерлер ЖОО-ға құжатты электронды түрде тапсырады

<a href="https://kyzylorda-news.kz/">Kyzylorda-news.kz.</a> Қазақстан Республикасы Мәдениет және спорт министрі Ақтоты Райымқұлова Қызылорда қаласы «Мұз айдыны» спорт кешенінің директоры қызметіне тағайындалған ауыр атлет, 4 дүркін әлем чемпионы Илья Ильинді құттықтады.
<blockquote>
 «Құрметті Илья Александрович!
 Сізді Қызылорданың «Мұз айдыны» спорт кешенінің директоры қызметіне тағайындалуыңызбен шын жүректен құттықтаймын!
 Сіз жоғары спорттық бабыңыз бен еңбекқорлығыңыздың арқасында Егемен Елімізді әлемдік деңгейде мойындатқан шыңдалған шеберсіз. Тау көтерген толағайдай талай додада мерейіңіз үстем түсіп, байрақты бәсекелдерден жүлдесіз қайтпай келесіз. Сіз бағындырған спорттық биік белестер мен табыстар ізіңізден еріп келе жатқан жас зілтеміршілер үшін үлгі.
 Алдағы уақытта да Сыр өңірінің спорт саласын дамыту жолында қолға алған бастамаларыңызға сәттілік серік болсын. Жаңа қызметте ел абыройын асқақтатар жас дарынды атлеттер шоғырын қалыптастыруға үлес қоса беріңіз!
 Осынау орайлы сәтті пайдалана отырып, Сізге ұзақ ғұмыр, зор денсаулық, қажымас қайрат, қызметте табыс, отбасыңызға амандық пен ортаймас несібе-дәулет тілеймін!», – делінген Мәдениет және спорт министрінің аталған құттықтау хатында.
</blockquote>
Айта кетейік, кеше Илья Ильин Қызылорда қаласы «Мұз айдыны» спорт кешенінің директоры қызметіне тағайындалған болатын.

Министр Ақтоты Райымқұлова Илья Ильинді құттықтады

<a href="https://kyzylorda-news.kz/">Kyzylorda-news.kz.</a> Қызылорда қаласында екі жастағы сәби үшінші қабаттағы терезеден құлап кетті, деп хабарлайды <a href="https://lenta.inform.kz/kz/kyzylordada-eki-zhastagy-sabi-ushinshi-kabattan-kulap-ketti_a3648803">ҚазАқпарат.</a>
Оқиға кезінде сәбидің ата-анасы үйде болған. Анасы екі жастағы қыз баланың терезеден құлап кеткенін байқамай қалған.
<blockquote>
 «Сәбидің терезеден құлап қалғаны жөнінде ауладағы балалар келіп айтқан. Қазір бүлдіршіннің жағдайы орташа, облыстық балалар ауруханасының жансақтау бөлімінен палатаға шығарылды», – деп мәлім етті Қызылорда облыстық төтенше жағдайлар департаменті Өрт сөндіру және апаттық-құтқару жұмыстары қызметінің баспасөз хатшысы Әлия Ережепова.
</blockquote>
Соңғы жылдарда Қызылорда қаласында мұндай жағдайлар жиі тіркеліп отыр. 2018 жылы 4 бала көп қабатты үйдің терезесінен құлады. Ал, 2019 жылы 7 бала осындай жағдай болып, оның ішінде 1 бала оқиға орнында қаза тапқан. Зардап шеккендердің негізгі бөлігін 1 мен 6 жас аралығындағы балалар құрайды.

Қызылордада екі жастағы сәби үшінші қабаттан құлап кетті

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев Қазақстанда келесі жылдан бастап микроқаржылық ұйымдарды лицензиялау жүйесі енгізілетінін мәлім етті.
<blockquote>
 «Халықтың табысы азайып бара жатқан уақытта тұтынушылық несие нарығының жағдайына мониторинг жүргізудің маңызы зор. Азаматтардың қарыз бойынша жүктемесінің көбейіп кетуіне жол бермеу керек. Қаржы нарығын реттеу бойынша агенттік проблемалық қарызы бар қарыз алушылардың оңалту мүмкіндіктерін қарастыруы керек. Сонымен қатар қарыз алушы мен өнімнің типіне қарай сыйақы ставкасын есептеу амалдарын қайта қарастырған абзал», – деді Президент төтенше жағдайды қамтамасыз ету бойынша мемлекеттік комиссия отырысында.
</blockquote>
Мемлекет басшысы, сонымен қатар, азаматтардың мүддесін қорғау үшін банктік емес, несиелік ұйымдарды бақылау жұмысы күшейетінін мәлім етті. Ал келесі жылдан бастап микроқаржылық ұйымдарды лицензиялау жүйесі енгізілмек.

Президент банкте проблемалық қарызы бар азаматтардың мәселесін шешуді тапсырды

<a href="https://kyzylorda-news.kz/">Kyzylorda-news.kz.</a> Ел аумағында төтенше жағдай режимі аяқталғанмен де, аймағымызда дерттің таралуы бәсеңдемеуде. Өңіріміздегі карантиндік шектеулерге байланысты Халыққа қызмет көрсету орталықтары 18 мамырдан бастап жаңа форматта өз жұмысын бастайтын болады.
Қағаз түріндегі қызметтер алдын ала брондау арқылы көрсетіледі. Электронды қызметтер, яғни egov.kz порталында қолжетімді онлайн қызметтер көрсетілмейді.
Осыған орай қазір облыс, қала әкімдігінің қолдауымен қаламыздың бірнеше нысандарында egov.kz бұрыштары, яғни өз-өзіне қызмет көрсету секторлары ашылды. Енді тұрғындар онлайн қызметтерді egov.kz электрондық үкімет порталы арқылы осы жерден ала алады. Алғашқы бір күннің ішінде-ақ қызмет көрсету бұрышының көмегін 100-ден аса тұрғын пайдаланып үлгерді.
<blockquote>
 «Бұл өзіне-өзі қызмет көрсету секторлары азаматтардың Халыққа қызмет көрсету орталықтары ашылғанға дейін ыңғайлы қызмет алуы үшін ашылды, олар мұнда электрондық-цифрлық қолтаңба (ЭЦҚ) немесе мобильдік азаматтар базасында тіркелген жағдайда, түрлі анытамалар мен электронды қызметтерді алады», – дейді «Азаматтарға арналған үкімет» мемлекеттік корпорациясы» КЕ АҚ облыстық филиал директоры Айдын Қайруллаев.
</blockquote>
Қазіргі таңда қала бойынша бірнеше нысандарда ашылған өзіне-өзі қызмет көрсету секторлары арқылы 100-ге жуық кеңес беріліп, 18 тұрғын электронды цифрлы қолтаңба ЭЦҚ алып, 1 жүргізуші куәлігі мен 2 көлік құралы тіркеліп, рәсімделді.
Қызылорда қаласында өзіне-өзі қызмет көрсету секторлары мына мекен-жайларда орналасқан:
1. Қалаға қарасты барлық ауылдық округ әкімдігінің ғимараты;
2. Ә.Тәжібаев атынадғы облыстық кітапхана;
3. Сол жағлауда орналасқан облыстық жастар ресурстық орталығы;
4. «Бақытты отбасы» орталығы;
5. Қаламыздағы автосалондар ғимараты;
6. «Энергосервис» мекемесі;
7. Барлық пәтер иелері кооперативтері ғимараты;
8. Тұрғын үй жинақ банкі ғимараты.
<img src="https://kyzylorda-news.kz/wp-content/uploads/2020/05/02-18.jpg" alt="" />
<img src="https://kyzylorda-news.kz/wp-content/uploads/2020/05/03-11.jpg" alt="" />
<img src="https://kyzylorda-news.kz/wp-content/uploads/2020/05/04-3.jpg" alt="" />
<img src="https://kyzylorda-news.kz/wp-content/uploads/2020/05/05-2.jpg" alt="" />

Қызылордадағы бірқатар мекемелерде ХҚО-ның қызмет көрсету бұрыштары ашылды (ФОТО)

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 169 адамға жетті.
12 мамыр 12:30-дағы&nbsp;ақпарат бойынша Қызылорда облысында тағы 8 адам қауіпті індеттен жазылып шыққан.
Індеттен айыққандардың қатарына соңғы қосылған науқастар – Қызылорда қаласы мен Шиелі ауданының тұрғындары.
Осылайша коронавирустық инфекциядан жазылғандар саны өңірде 169 адамға жетіп отыр.
Аталған науқастардан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

Қызылорда облысында қауіпті індеттен жазылғандар саны 169 адамға жетті

<a href="https://kyzylorda-news.kz/">Kyzylorda-news.kz.</a> Ресейлік терапевт Лариса Алексеева «360» телеарнасына берген сұхбатында қандай маскалардың вирустан жақсы қорғайтынын айтып берді, деп хабарлайды&nbsp;<a href="https://ria.ru/20200512/1571296116.html">РИА Новости</a>.
<blockquote>
 «Бір рет пайдаланылатын үш масканы қолдану ең дұрыс қорғаныш. Бірақ қалаған жағдайда бір рет пайдаланылатын масканы бірнеше рет пайдалануға болатын маскалармен ауыстырып тағуға болады», – дейді дәрігер.
</blockquote>
Оның айтуынша, қандай жағдай болсын өзімен бірге бірнеше бір реттік маскаларды алып жүрген жөн.
Бір ғана масканы қолдану нәтижесінде ондағы вирустың барлығы жиналып, ағзаға барады дейді. Сондықтан дәрігер масканы жиі ауыстырып тұруға кеңес береді.

Дәрігер қандай масканың вирустан жақсы қорғайтынын айтты

<a href="https://kyzylorda-news.kz/">Kyzylorda-news.kz.</a> Еңбек және халықты әлеуметтік қорғау министрі Біржан Нұрымбетов неліктен кей қазақстандықтың 42 500 теңге көлеміндегі әлеуметтік төлемді екінші рет ала алмай отырғанын түсіндірді.
Министрдің айтуынша, бүгінде төлемді 4 миллион 539 мың адам алған. Бұл бағытқа бюджеттен 193 миллиард теңге бөлінген.
<blockquote>
 «Төтенше жағдай режимінің алғашқы айында, яғни 16 сәуірге дейін 3 миллион 735 мың адам төлем алды. Бұл адамдар төлемді екінші рет алуға құқылы. Біз мамыр айының басынан бастап төлемді жүргізе бастадық. Демалыс күндерінің алдында 5-6 мамырда екі миллионнан астам тұлғаға төлеу үшін шешім шығарылды. Біз банктерге 99 миллиард теңге бөлдік», – деді министр Үкімет үйінде өткен онлайн-брифингте.
 «Кей азамат әлеуметтік төлемді алып үлгерді. Алайда демалыс күндері банктер жұмыс істемеді, бірақ бүгіннен бастап азаматтар 42 500 теңгені алып жатыр. Бұл төлемдер алуы тиіс басқа адамдарға да тағайындалады», – деді Нұрымбетов.
</blockquote>
Бұған дейін министр Қазақстанда 11 мамырдан бастап 42 500 теңге төлемақысын беруге&nbsp;<a href="https://kyzylorda-news.kz/kogam/42-500-tenggelik-toelemge-qatysty-oetinish-qabyldaw-toqtatyldy-61357/">өтініш қабылдау тоқтатылғанын</a>&nbsp;атап өткен болатын.
11 мамырға дейін түскен өтініштерді Еңбек министрлігі қарастырады және оң шешім шығарылса, төлем жүргізіледі.

Министр кей азаматтың 42 500 теңгені екінші рет неге ала алмай отырғанын түсіндірді

<a href="https://kyzylorda-news.kz/">Kyzylorda-news.kz.</a> Сыбайлас жемқорлыққа қарсы іс-қимыл агенттігінің Серіктестік департаментінің директоры Расул Медетов жемқорлық туралы ақпарат берген адамға берілетін сыйақы мөлшері қалай өскенін айтып берді.
<blockquote>
 «Биылдан бастап сыбайлас жемқорлық бойынша ақпарат берген адамдарға сыйақы мөлшері өскенін атап өткім келеді. Бұрын ең максималды көрсеткіші – 250 мың теңге болса, қазіргі таңда хабар берген адам 10 млн 600 мың теңгеге дейін сыйақы ала алады. Әрине ол факт бірақ дәлелденіп, сот үкімі шығуы керек», – деді Расул Медетов агенттіктің Facebook парақшасындағы сұхбатта сөйлеген сөзінде.
</blockquote>
Еске сала кетсек бұған дейін Расул Медетов жемқорлық туралы хабар берген адамның ақпараты шынайы болуы керектігін мәлім еткен еді.
<blockquote>
 «Қазақ «ауруын жасырған өледі» дейді. Сондықтан әрине белгілі бір жерде парақорлық фактісі тіркелетін болса ол жайлы хабарлау – біздің міндетіміз, азамат ретінде парызымыз. Бірақ бұл ретте бір мәселеге назар аудартқым келеді. Өзім де өңірлерде жұмыс істедім. Азаматтардың кейбірі анау жерде мынадай, мынау жерде анадай парақорлық болып жатыр деп негізсіз әрі дәлелденбеген ақпарат беріп жатады. «Қымбат көлігі бар, демек пара алады» екен деген осындай алыпқашпа сөздер шындыққа жанаспауы да мүмкін. Сондықтан келіп түскен ақпарат міндетті түрде шын болуы керек», – деді Расул Медетов агенттіктің&nbsp;<a href="https://www.inform.kz/kz/zhemkorlyk-turaly-habar-bergen-adamnyn-akparaty-shynayy-boluy-kerek-agenttik_a3648238">Facebook</a>&nbsp;парақшасындағы сұхбатта сөйлеген сөзінде.
</blockquote>

10 млн 600 мың теңге: Сыбайлас жемқорлық туралы ақпарат үшін берілетін сыйақы мөлшері ұлғайды

<a href="https://kyzylorda-news.kz/">Kyzylorda-news.kz.</a> ҚР Премьер-Министрінің орынбасары Ералы Тоғжанов ҚР Үкіметінде өткен брифингте коронавирус инфекциясымен күресуге тартылған дәрігерлер мен медицина қызметкерлеріне үстеме ақы төлеудің одан әрі жалғасатыны туралы мәлімдеді.
<blockquote>
 «Мемлекет басшысының тапсырмасы бойынша, дәрігерлер мен медицина қызметкерлеріне үстемеақы төлеу үшін Үкіметке 40 млрд теңгеге жуық қаражат бөлінді», – делінген ҚР Үкіметінің ресми сайтында.
 «Төлемдердің жартысы төленді. Қалған бөлігі биыл тамыз айына дейін төленетін болады», – деді вице-премьер.
</blockquote>
Сонымен қатар Е. Тоғжанов жұмысқа шығатын ата-аналарға қолайлы болу үшін балабақшаларда кезекші топтар ұйымдастырылатынын айтты. Бірақ санитарлық нормаларды сақтау қажет болады.
<blockquote>
 «Мысалы, балабақшаларда әрбір топта 25-30 баладан бар. Карантин кезеңінде сақтық шараларын ескере отырып, топтардағы балалар санын 15-ке дейін ғана жеткізу керек. Бұл ретте жұмыс істейтін әр ата-ананың балаларын балабақшада қалдыру мүмкіндігі бар екенін атап айтқым келеді», – деп атап өтті Премьер-Министрдің орынбасары.
</blockquote>

Медицина қызметкерлерінің үстемеақысы тамыз айына дейін төленеді

<a href="https://kyzylorda-news.kz/">Kyzylorda-news.kz.</a> Білім және ғылым вице-министрі Шолпан Каринова соңғы қоңырауды өткізу тәртібін түсіндірді.
<blockquote>
 «11-сынып түлектеріне аттестатты 3-4 маусымда тапсыру туралы шешім қабылданды. Жыл сайын аталған іс-шара маусымның ортасында өткізілетін. Түлектерге арналған қорытынды аттестацияның болмауына байланысты және ҰБТ-ға дайындалу қажеттілігін ескере отырып, біз аталған іс-шараны маусым айының басына ауыстырдық», – деп жазды Каринова әлеуметтік желідегі парақшасында.
</blockquote>
Оның сөзіне қарағанда, соңғы қоңырау мектептің жанында өтеді. Бірақ ата-аналарға қатысуға рұқсат жоқ.
<blockquote>
 «Мерекені өткізудің ерекшелігі – 11 сынып түлектеріне салтанатты түрде аттестат беріледі және соңғы қоңырау соғылады. Сонымен қатар, іс-шара міндетті түрде мектеп жанында таза ауада қонақтардың қатысуынсыз, тек 11 сынып оқушыларының қатысуымен және санитарлық нормаларды сақтай отырып өткізілуі тиіс. Түлектерге әдеттегі мектеп формасымен қатысу ұсынылады», – деп атап өтті ол.
</blockquote>
Салтанатты бөлімнен кейін экология министрлігімен бірлесіп, мектеп түлектерінің ағаш отырғызу акциясын ұйымдастыру жоспарланып отыр. Алдағы уақытта осы акция жыл сайын 25 мамырға орай ұйымдастырылатын болады.
Айта кетейік, кеше ҚР Премьер-Министрінің бірінші орынбасары Ералы Тоғжанов еліміздің мектептеріндегі соңғы қоңырау салтанаты <a href="https://kyzylorda-news.kz/kogam/qazaqstan-mektepterinde-songghy-qongyraw-mawsym-ajynda-oetetini-ras-pa-61364/">маусым айының басында өтетінін</a> айтқанын хабарлаған болатынбыз.

Биылғы соңғы қоңырауға ата-аналар қатыспайды

<a href="https://kyzylorda-news.kz/">Kyzylorda-news.kz.</a> Қазақстанда мемлекеттік басқару жүйесінде реформа жүргізіледі. Бұл туралы мемлекет басшысы Қасым-Жомарт Тоқаев&nbsp;<a href="https://twitter.com/TokayevKZ?ref_src=twsrc%5Egoogle%7Ctwcamp%5Eserp%7Ctwgr%5Eauthor">Twitter</a>-дегі парақшасында хабарлады.
Президенттің пікірінше, эпидемиядан кейінгі кезеңде де бастамашылдық танытып, терең жауапкершілікті сезіне білу маңызды.
<blockquote>
 «Бізге кез келген ахуалға бейімделіп, жедел шешім қабылдайтын, жаңартылған, тиімді әрі шағын мемлекеттік аппарат қажет», – деп жазды ол.
</blockquote>
Тоқаев сондай-ақ Төтенше жағдай жөніндегі мемлекеттік комиссия Экономикалық өсімді қалпына келтіру жөніндегі мемлекеттік комиссия болып қайта құрылатынын мәлім етті.
<blockquote>
 «Дағдарыс және дағдарыстан кейінгі даму жағдайындағы негізгі басымдықтарымыз: азаматтардың денсаулығын қорғау, олардың табысын арттыру, бизнесті дамыту, білім және ғылым саласын жаңғырту», – деп атап өтті ол.
</blockquote>
Мемлекет басшысының айтуынша, Қазақстан экономиканың жаңа құрылымын қалыптастыру керек. Бұл – дағдарысты еңсеріп, өркендеуге қадам басудың бірден-бір жолы.

Қазақстан және Қызылорда облысының жаңалықтары