<a href="https://kyzylorda-news.kz/">Kyzylorda-news.kz</a>. «Қазгидромет» мамандары 3 желтоқсан күні Қазақстанда ауа райы қандай болатынын мәлім етті.
Атмосфералық фронттардың әсерінен ел аумағының кей жерлерінде қар жауады. Оңтүстікте жауын-шашын (жаңбыр, қар) жауады, көктайғақ болады.
Бірқатар өңірлерде тұман түсіп, жаяу бұрқасын соғады, жел күшейеді.

Бейсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Биыл газбен жабдықтау жобаларын іске асыру үшін бюджеттен 4,5 млрд теңге бөлінді.
Бес мыңнан астам халық тұратын Арал ауданының Жақсықылыш кентіне газ берілді. Жосалы, Жалағаш және Тереңөзек кентін газдандыру жұмыстары жүргізілді. Үш аудан орталығы көгілдір отынға келер жылы қосылатын болады. Сонымен қатар, «Жұмыспен қамту жол картасы» бағдарламасы аясында Қазалы ауданындағы Ғани Мұратбаев, Шиелі ауданындағы Байсын елді мекендеріне газ беру жоспарлануда.
Қала іргесіндегі Наурыз және Махамбет елді мекендерін газдандыруға арналған жобалық-сметалық құжаты дайындалса, Қармақшы ауданының Төретам және Ақай, Шиелі ауданының Алғабас, Ақмая, Қодаманов елді мекендерін газдандыруға құжаттамасы әзірленуде.
<blockquote>
 “Негізі жоспар бойынша облысқа 13 АГРС салу қарастырылған. Қазір Арал, Қазалы, Байқоңыр, Жаңақорған, Шиеліде салынып тұр. Жалағаш пен Тереңөзекке біреуі орнатылса, қалада екеуі жұмыс жасап тұр. Қазір Сексеуіл кентіне, Шиелідегі Шоқай ауылына салуды жоспарлап жатырмыз. Өйткені, ол жерлерде халық саны көп, басқа ауылдар жақын орналасқан. Облыс орталығында 2 жылу орталығы, 190 шақырым жылу құбыры бар. Биыл бу қазандықтары мен 7,8 шақырымды құрайтын жылу құбыры күрделі жөндеуден өткізілді”, – деді облыстық энергетика және тұрғын үй-коммуналдық шаруашылық басқарма басшысының орынбасары Ерлан Жоламанов.
</blockquote>
Жылу маусымы биыл мерзімінен ерте берілді. Дегенмен, тұрғындар арасында жылудың, газдың қысымына байланысты көңілтолмаушылық бар.
<blockquote>
 “Қалада екі АГРС бар. Екеуі бір-біріне қосылмаған. Сол жағалауда газдың қысымының азайып кететіні сондықтан. Қысым әртүрлі болғандықтан қалада да мұндай мәселе кездеседі. Бірақ тұрғындар жылу маусымының алдында құбырын, моржаларын тазарту секілді жұмыстарды тұрақты жүргізбейді. Оның да кесірі тиеді. Ал орталықтандырылған жылуға қосылған үйлердің өжірелері суға толып қалатынынан болады. Бұл бағытта биыл біраз жұмыс атқарылды. 32 көпқабатты тұрғын үй жаңғыртудан өтті”, – деді Ерлан Жоламанов.
 “Облыс орталығына көгілдір отын келгеніне он жылдан асты. Әдепкіде, газ есептегіш құралдарына «Смарт карта» қолданылған. Оның қызмет көрсету мерзімі аяқталды. Қазір механикалық есептегіш түріне ауыстырып жатырмыз. Оның артықшылығы көп. Біріншіден онлайн төлем жасауға ыңғайлы. Екіншіден, әр айдың басында бағдарламаны жаңарту үшін жасалатын бұғаттауға жол берілмейді”, – деді «ҚазТрансГаз Аймақ» АҚ ҚОФ апатты-диспетчерлік қызметінің басшысы Базарбек Ерімбетов.
</blockquote>

Қызылорда: Үш аудан орталығы көгілдір отынға қосылады

<a href="https://kyzylorda-news.kz/">Kyzylorda-news.kz</a>. Бүгін Үкімет отырысында Денсаулық сақтау министрі Алексей Цой министрлер кабинетін мүгедектігі бар адамдарға медициналық және оңалту көмегі бойынша қабылданып жатқан шаралар туралы хабардар етті.
Қазір Қазақстанда 705 500 адам мүгедек, оның 93 900-І бала. Елімізде 500 астам медициналық ұйымда медициналық оңалту қызметі көрсетіледі, оның 37-сі ересектерге және 23-і балаларға арналған оңалту орталығы.
<blockquote>
 «Денсаулық сақтауды дамытудың 2020-2025 жылдарға арналған мемлекеттік бағдарламасы аясында мүгедектерге медициналық көмектің қолжетімділігі мен сапасын арттыру шаралары қарастырылған. Мемлекеттік жеке меншік әріптестік аясында 10 өңірде балаларды оңалту орталығын ашу жоспарлануда», – деді Алексей Цой.
</blockquote>
ҚР Тұңғыш Президенті Қорының белсенді араласуының арқасында мүмкіндігі шектеулі балаларға арналған тағы сегіз оңалту орталығы 2020 жылдың соңына дейін іске қосылады. Нәтижесінде, жалпы алғанда 18 оңалту орталығын пайдалануға беріледі де, 45 мыңнан астам балаға немесе мүгедек балалардың жалпы санының 48% медициналық оңалту қызметін көрсетуге мүмкіндік болады.
Министр жалпы, мүмкіндігі шектеулі жандар профилактикалық, диагностикалық, емдік медициналық қызметтер мен дәрі-дәрмектерді қамтитын ТМККК-мен де қамтамасыз етілгенін атап өтті.
2020 жылы 567 медициналық ұйым оңалту қызметін көрсетеді, бұл 2019 жылмен салыстырғанда 8,9 есе көп. Жеткізушілермен 638 мың қызмет түріне шарт жасалды, бұл бір жыл бұрынғыға қарағанда 15% көп. Мұқтаж адамдардың 60% медициналық оңалту қызметімен қамтылған, бұл өткен жылмен салыстырғанда 7% жоғары. 2021 жылы 75% дейін ұлғайту, ал 2025 жылы барлық мұқтаж адамға жаппай медициналық оңалту қызметін ұсыну жоспарланып отыр.

Қазақстанда 10 өңірде балаларға арналған оңалту орталықтары салынады

<a href="https://kyzylorda-news.kz/">Kyzylorda-news.kz</a>. Мәжіліс депутаттарының кезекті сайлауына түсетін «Nur Otan» партиясының тізімі тіркелді. Орталық сайлау комиссиясы тиісті қаулыны бекітті.
Қаулыға сәйкес, Мәжіліс депутаттығына кандидаттарға куәліктер беріледі. Сондай-ақ «Nur Otan» партиясы қоғамдық бірлестігінің атауы сайлау бюллетеніне енгізіледі.
Айта кетейік, «Nur Otan»-ның партиялық тізімінде 126 адам&nbsp; бар. Олардың қатарында Қазақстан Премьер-министрі Асқар Мамин, «Nur Otan» төрағасының бірінші орынбасары Бауыржан Байбек, Нұрсұлтан Назарбаев Қорының директоры Дариға Назарбаева, Мәжіліс Төрағасы Нұрлан Нығматулин, Президент Әкімшілігінің басшысы Ерлан Қошанов, Президенттің көмекшісі – Президент Әкімшілігінің өтініштерді қарауды бақылау бөлімінің меңгерушісі Тамара Дүйсенова, вице-премьер Ералы Тоғжанов бар.&nbsp;
<blockquote>
 “Кім «Nur Otan» партиясының тізімін қабылдау үшін дауыс беруіңізді сұраймын. Рақмет, бірауыздан. Осылайша «Nur Otan» партиясының тізімі тіркелді. Партияны құттықтаймын. «Nur Otan» партиясының тізімін тіркеу туралы мәліметтерді Қазақстан халық жинақ банкіне жіберуід тапсырамын. Енді партия сайлау қорын қалыптастыруға арнайы шот ашуға құқылы”, – деді ҚР Орталық сайлау комиссиясының төрағасы Берік Имашев.
</blockquote>
<a href="https://24.kz/kz/zha-aly-tar/sayasat/item/440011-nur-otan-partiyasyny-tizimi-tirkeldi">Хабар 24</a>

«Nur Otan» партиясынан Мәжіліс депутаттығына сайлауға түсетіндер кімдер?

<a href="https://kyzylorda-news.kz/">Kyzylorda-news.kz</a>. Қызылорда облысында браконьерлікті, биологиялық ресурстар объектілерінің заңсыз айналымын анықтау және жолын кесу мақсатында 1 желтоқсаннан бастап «Киік» жедел профилактикалық іс-шарасы өткізілуде.
Іс-шараның мақсаты – табиғатты қорғау заңнамасын бұзушылықтарды, биологиялық ресурстар объектілері мен өнімдерінің заңсыз айналымының алдын алу, анықтау болып табылады.
Іс-шара желтоқсанның 31-не дейін жалғасады.

Қызылордада «Киік» жедел профилактикалық іс-шарасы басталды

<a href="https://kyzylorda-news.kz/">Kyzylorda-news.kz</a>. Тұңғыш Президент күніне орай «Тәуелсіздіктің жеті қыры» деректі фильмдер топтамасы жастар арасында кеңінен насихатталуда.
Туындының негізгі өзегі ретінде Елбасы Н.Ә.Назарбаевтың 2019 жылы маусымда өткен «Кемеңгерліктің 30 жылы» халықаралық конференциясында атап көрсеткен сын-қатерге негізделген. Ел өз тәуелсіздігінің басында нақ осы сын-қатерлерге тап болды. Ал оларды еңсеру егемен Қазақстанның даму жолының бірегейлігін анықтады. Барлығы 7 фильм дайындалды. Олардың әрқайсысы белгілі бір тақырыпқа арналған. Атап айтқанда, экономика, интеграциялық үдерістер, ұлтаралық келісім, антиядролық бастамалар, жаңа астана, транзиттік әлеует, қандастарымыздың Отанға оралуы. Фильмдердің мазмұны беделді спикерлердің – белгілі мемлекет, қоғам қайраткерлерінің, Елбасының елдің дамуы бойынша күрделі саяси шешімдер қабылдауының куәгерлерінің естеліктері мен пікірлерінен, сондай-ақ тарихшы, саясаттанушы және экономика саласының мамандарының сұхбаттарынан құралған.
Фильмнің «Бір ел, бір тағдыр» деп аталатын бірінші фильмінде өзге елдер үшін бейбітшілік пен тұрақтылықты сақтаудың үлгісі болған этносаралық бірлік пен конфессиялық келісімнің бірегейі қазақстандық үлгісін сипаттайды. Қазақстан халқы Ассамблеясын құру жұмысына ерекше көңіл бөлінген. Еліміздегі 100-ден аса этностың басын біріктіріп отырған бірегей құрылым тұрақтылықты сақтап, республиканың ілгерілей дамуы үшін маңызды роль атқарады.
«Сын сағаты» деп аталатын екінші фильмде жас елдің нарықтық экономикада өзін қалыптастыру жолындағы «тар жол, тайғақ кешуін»&nbsp; сипаттайды. Қазақстанның қысқа мерзімде ТМД кеңістігінде көшбасшысы, экономикалық тұрғыдан дамыған мемлекетке айналғанын айқындап көрсетеді.
«Парасатты шешім» фильмінде Елбасының әлемдегі төртінші ядролық арсеналдан бас тарту және КСРО ядролық қаруының 2/3 сынағы өткізілген Семей полигонын жабу туралы тарихи шешімі туралы баяндайды. Сондай-ақ, фильмде Арал теңізін жаңғырту жұмыстары туралы көрсетіледі.
«Ұйымдасқан ұтады» фильмі аймақтық қауіпсіздік және шекараны делимитациялау мен демаркациялауды жүзеге асырғанын, АӨСШК, ҰҚШҰ, ЕҚЫҰ интеграциялық бірлестіктер шеңберінде өңірлік қауіпсіздік жүйесін құру жөніндегі жұмысты бастағанын көрсетеді. Осы кезде Н.Ә.Назарбаевтың ЕАЭО құру жөніндегі идеясын жүзеге асыруға ерекше көңіл бөлінеді.
«Жаңғыру жолы» фильмінде республиканың халықаралық транзиттік әлеуетін кеңейту, «Нұрлы жол» бағдарламасын іске асыру туралы баяндайды.
Фильмнің «Елдіктің бастауы» деп аталатын бөлімінде Елбасының демографиялық мәселелерді шешу, этникалық қазақтарды отанына қайтару, қазақ тіліне мемлекеттік мәртебе беру, қазақ тілінде білім беру мекемелерінің ашылуы туралы айтылады.
«Өзгерісті сәт» деп аталатын келесі фильмде жаңа жас Астананың құрылысының қалай салынғанын, гүлденгенін, әлемнің ең әдемі шаһарына айналғанын, бас қаламыздың басты миссияларын анықтап, көрермендерге байыпты түрде жеткізеді. Нұрсұлтан Назарбаевтың жаңа астананы тұрғызу бастамасы мен оны ақиқатқа айналдыруы Елбасының модернизациялық жобасының басты табысының символына айналды.
Еліміз тәуелсіздігін алған алғашқы жылдарында отандық экономика әдеттен тыс қиындықтарға тап болып, шын мәнінде құрдымға кетудің сәл-ақ алдында тұрды. Тәуелсіз Қазақстан мұраға бос қазына мен гиперинфляция, жаппай жұмыссыздық, кедейшілік және басқа да ауыр проблемалар қалдырған кеңестік әкімшілік-командалық экономиканың үйіндісінен бой көтерді. Біз енді ғана бүршік жара бастаған тәуелсіздікке қатер төндіретін экономикалық апаттың алдында тұрдық. Сол кезде біз бетпе-бет келген драматизмге толы тартысты жағдай ұзақ ойланып-толғануға да мүмкіндік бермеді: экономиканың есін жиғызу жан сақтаудың жалғыз амалы болды. Мәселе шын мәнінде солай еді. Мемлекет бүкіл күш-жігерін экономикаға жұмылдырып, сол тарихи шайқаста жеңіп шықты.
Осындай аса күрделі жағдайда ел тізгінін ұстаған Нұрсұлтан Назарбаев өзін көреген саясаткер, елін елдікке бастаған дарынды реформатор ретінде көрсете білді. Оған Қазақстанның жүріп өткен жолы, жетістіктері дәлел.
Тұңғыш Президент іске асырған реформалардың нәтижесінде тәуелсіздіктің алғашқы жылдарындағы жеті негізгі сын-тегеурінді еңсеруі, тәуелсіздіктің жеті жетістігіне айналғаны даусыз. Сөйтіп, Қазақстанның даму моделі әлемдік қауымдастықта кеңінен танылды. Бұл модель терең эволюциясы бар мемлекеттің біртіндеп және сенімді дамуын көрсетті.
&nbsp;Жас ұрпаққа Тұңғыш Президенттің басшылығымен қолға алынған реформалардың жемісті болғанын арқау еткен «Тәуелсіздіктің жеті қыры» фильмдер топтамасының маңызы зор. Сондықтан да тәуелсіздік тамырынан тағылым алып өсетін ұрпақ тәрбиелеу, тәуелсіздіктің оңай келмегендігін ұғындыру, оны көздің қарашығындай сақтауды жеткізу, жастардың бойында отаншылдық, елдік қасиеттерді қалыптастыру – бүгінгі қоғамның басты міндеті.
Меруерт Аңсатова,
Қорқыт Ата атындағы
Қызылорда университетінің профессоры,
тарих ғылымдарының кандидаты

Тәуелсіздіктің жеті қыры

<a href="https://kyzylorda-news.kz/">Kyzylorda-news.kz</a>. Биыл облыста мәжбүрлі еңбек және 14 жасқа толмаған балалардың еңбегін пайдалану фактілері бойынша жеке және заңды тұлғалардан өтініштер тіркелмеген. Бұл туралы Өңірлік коммуникациялар қызметінің ақпараттық алаңында облыстық еңбек саласын бақылау басқармасының басшысы Төреахмет Жолымбетов баяндады.
<blockquote>
 “Полиция органдарының адам саудасына қарсы күрес желісі мәліметі бойынша жыл басынан бері 5 жеңгетайлық және 1 бас бостандығынан заңсыз айыру қылмыстық іс тіркеліп, тергеу амалдары жүргізілуде. Сонымен қатар, облыс аумағында адам саудасымен байланысты қылмыстарды ескерту, жолын кесу, анықтау және ашу бағытында құзырлы органдарымен бірлескен жедел-іздестіру іс-шараларын өткізудеміз. Яғни, адамдарды еңбекке қанау мақсатында заңсыз бостандығынан айыру деректерін анықтау, жолын кесу бағытында облысымызда 3671 шаруа қожалықтың 2876-сы тексерілді”, – деді Төреахмет Сайлаубайұлы.
</blockquote>
Мәжбүрлі еңбек пен адам саудасының құрбаны болмау үшін, миграция қызметіне тіркелу, кез-келген қызметті жасамас бұрын келісім-шарт жасасу, жұмысқа қабылдаушы ұйым мен тұлғалар жайлы хабардар болу, еңбек шартын жасасу, бөтен тұлғаларға ешқашан жеке куәлік пен өзге де жеке құжаттарды бермеу өте маңызды екенін ескерген жөн.

Қызылордада адам саудасына қатысты 6 дерек тіркелді

<a href="https://kyzylorda-news.kz/">Kyzylorda-news.kz</a>.&nbsp;Қазақстан ашық әрі әділетті сайлау өткізуге дайын.
Ресей Федерациясының төрағалығымен видеоконференция форматында өтіп жатқан Ұжымдық қауіпсіздік туралы шарт ұйымы Ұжымдық қауіпсіздік кеңесінің сессиясына Парламенттің төменгі палатасының сайлауы туралы Мемлекет басшысы Қасым-Жомарт Тоқаев осылай деді, деп хабарлайды <a href="https://lenta.inform.kz/kz/kasym-zhomart-tokaev-biz-ashyk-ari-adiletti-saylau-otkizuge-niettimiz_a3725521">ҚазАқпарат</a>.
<blockquote>
 «COVID-19 пандемиясы әлемдік саясат пен экономиканы шатқаяқтатып жіберді. Жағдайды сауда соғыстарына ұласқан өзара санкциялар мен шектеулер тіпті ушықтырып тұр. Экстремизм, терроризм, есірткі саудасы, киберқауіпсіздік пен заңсыз көші-қон саласындағы жаһандық тегеуріндердің артып бара жатқаны да алаңдатады. Осындай жағдайда бейбітшілікті нығайтып, аймақтағы қауіпсіздік пен тұрақтылықты қамтамасыз ету жолындағы мемлекетаралық механизм ретіндегі біздің ұйымның рөлі айтарлықтай арта түседі. Осы мүмкіндікті пайдалана отырып, пандемияны еңсеруге үн қосқаныңыз үшін құрметті Владимир Владимирович (РФ президенті Путинге) сізге алғысымды айтқым келеді. Таяу арада Қазақстанда ресейлік вакцинаны әзірлейтін зауыт салынады», – деді Қасым-Жомарт Тоқаев сессияда.
</blockquote>
Президент сонымен қатар сессияға қатысушыларға Қазақстанда электоралды кезең басталып жатқанын айтып өтті.
<blockquote>
 «2021 жылғы 11 қаңтарда Парламенттің төменгі палатасы мен жергілікті өкілдік органдарының сайлауы өтеді. Сайлау конституциялық мерзімде болады. Партиялардың бәріне даярлануға жеткілікті уақыт берілді. Биыл біз теңдессіз демократиялық реформалар пакетін қабылдадық. Олар көппартиялылықты және партиялық бәсекелестікті дамытуға, азаматтық белсенділікті арттыруға бағытталған. Атап айтқанда заңнамалық деңгейде парламенттік оппозиция институты бекітіліп, партиялық тізімге жастар мен әйелдердің үлесі үшін 30 пайыздық квота бөлінді. Біз ашық әрі әділетті сайлау өткізуге ниеттіміз. Серіктестеріміздің қолдауы мен осы елдердің бақылаушыларын күтеміз», – деді Қасым-Жомарт Тоқаев.
</blockquote>

Қасым-Жомарт Тоқаев: Біз ашық әрі әділетті сайлау өткізуге ниеттіміз

<a href="https://kyzylorda-news.kz/">Kyzylorda-news.kz</a>. Футболдан ел біріншілігі аяқталды. Премьер-лигада аймақ намысын қорғаған «Қайсар» командасы 7 орынмен аяқтады. Бірінші лигада бақ сынаған «Байқоңыр» командасы оңтүстік дивизионда 6-орынға, «Қайсардың» жастар құрамы екінші лиганың батыс дивизионында 2-орынға тұрақтады.
Жыл басында «Қайсар» футбол клубының бюджеті 4 млрд. теңгені құрады. Алайда әлемдік ахуалға байланысты команданың қаржылық жағдайы оңтайланып, 34 процентке, яғни 1 млрд 362 млн теңгеге қысқарды. Пандемия кезінде спорт сайыстары уақытша тоқтатылып, тамыз айында футбол біріншілігі қайта жалғасты. Командадағы футболшылардың келісім-шарты 15 қарашада аяқталды. Дегенмен, команданың негізгі құрамдағы ойыншылары соңғы тур ойындарына қатысуға келісімдерін берді. Маусымның соңғы ойынында бас бапкер Стойчо Младенов команда құрамында болмады. Себебі әлемдік ахуалдың өршуіне байланысты Болгария мемлекеті 27 қарашада толыққанды жабылатын болғандықтан, болгар маманы өз еліне қайту мәжбүр болды.
<blockquote>
 “Келер жылы «Қайсардың» қаржылық жағдайы 1 млрд. 600 млн. теңге болады деп жоспарлануда. Сонымен қатар биылғы жоспарды орындамағындықтан, бас бапкер Стойчо Младеновпен келісім шарт ұзартылмайды. Енді бас бапкер лауазымына орналасу үшін жергілікті жаттықтырушыларға Сұлтан Әбілдаев, Ерлан Шойтымов және Қанат Шерімбетовке мүмкіндік берілмек. Сондай-ақ, командадағы маңызды ойыншыларды сақтап қалуға әрекет етілуде. Бүгінде Думан Нәрзілдаев, Ілияс Әмірсеитов, Шоқан Абзалов, Марсель Исламқұлов, Нұрымжан Салайдын секілді ойыншылармен келісімге келдік. Команданың биылғы лидерлері Элгуджа Лобжанидзе, Бағдат Қайыров, Александр Марочкин, Александр Заруцкиймен келіссөздер жүргізілуде, – деді облыстық дене шынықтыру және спорт басқармасының басшысы Жақсылық Оспанов.
 «Қайсар» футбол клубының алдағы дайындығына «Байқоңыр» командасынан Елжас Сарбай, Ерболат Серік, Аян Құлмағанбетов, Руслан Дүйсенбаев және Бекзат Құрманбекұлы шақыртылады. Келер маусымда өнер көрсететін жаңа футболшылар «Қайсардың» оқу-жаттығу жиынында сұрыпталатын болады. Негізінен жергілікті футбол мектебінің түлектеріне басымдық береміз. Бұған қоса, қазақстандық және ТМД елдерінің ойыншыларын қарастырамыз, – деді «Қайсар» ФК директоры Серік Досманбетов.
</blockquote>
<img src="https://kyzylorda-news.kz/wp-content/uploads/2020/12/128976957_1181204928941684_2736387604579217302_o.jpg" alt="" />

«Қайсар» премьер-лиганы 7 орынмен аяқтады

<a href="https://kyzylorda-news.kz/">Kyzylorda-news.kz</a>. Бүгін Қазалы ауданының әкімі Мұрат Ергешбаев Қазақстан Республикасының чемпионаттарында жүлдегерлер қатарынан көрінген спортшылар мен олардың жаттықтырушыларын қабылдады.
<blockquote>
 “Қазалы ауданының спортшылары қай жарысқа қатыспасын жеңіске жетіп, қашан да үздіктер қатарынан көрініп келеді. Ауданнан шыққан атақты спортшылардың да қатары қалың. Әріге бармай-ақ, 2012 жылы Лондон Олимпиадасында қола медаль жеңіп алған Марина Вольнова қызымыздың жетістігін айтсақ болады. Маринаның есімі ауданның тарихында ғана емес, еліміздің тарихында алтын әріптермен жазылып қалады. Өйткені ол Тәуелсіз Қазақстан тарихында Олимпиадада әйелдер боксынан жүлде алған алғашқы спортшы. Марина Вольнова Лондон Олимпиадасынан кейін отбасылық жағдайына байланысты шарша алаңға шықпаған болатын. Осы жылы былғары қолғапты қайта қолға алды. Жетістіктері де жаман емес. Кеше Шымкент қаласында бокстан ерлер мен әйелдер арасындағы Қазақстан Республикасының чемпионатында күміс жүлдеге ие болды. Осының алдында Венгрияда өткен халықаралық жарыста қола медаль иемденді”, – деді Мұрат Ергешбаев.
</blockquote>
Мұнан соң Қазақстан Республикасының чемпионаттарында күміс, қола медаль алған спортшыларға «Құттықтау» хатын табыс етіп, сый-сияпат жасады. Ал, Олимп шыңына шыққан Маринаның бапкері, көптеген жеңімпаз боксшылардың ұстазы Қазақстан Республикасының еңбек сіңірген жаттықтырушысы Бақытбек Құлбаевты «Қазақстан Конституциясына 25 жыл» мерекелік медалімен марапаттады.
Басқосуда Қазалы аудандық олимпиадалық резервтың мамандандырылған балалар-жасөспірімдер мектебінің жаттықтырушысы Бақытбек Құлбаев пен ардагер спортшы Сапарбек Көбегенов спортшыларға ерекше мән беріп, қабылдау өткізген аудан басшысына алғысын айтып, өздерінің ұсыныс-пікірлерін жеткізді.Айта кетейік, 23-29 қараша күндері Шымкент қаласында бокстан ерлер мен әйелдер арасындағы Қазақстан Республикасының чемпионатында Дәметкен Келімбет пен Гүлсая Ержан қола жүлдегер атанды. Ал, Олжас Сырлыбай пен Айдос Сүлеймен қараша айының соңғы күндері Алматы қаласында грек-рим күресінен ересектер арасында өткен Қазақстан Республикасының чемпионатында күміс және қола медальді еншіледі.
Тағы бір жас талант Аяжан Нұржан биылғы жылдың ерекшелігіне байланысты Қызылорда қаласында ауыр атлетикадан әйелдер арасында онлайн өткен Қазақстан Республикасы чемпионатында қола жүлдеге қол жеткізді.
<img src="https://kyzylorda-news.kz/wp-content/uploads/2020/12/129364191_2929533377267590_1647054338958351645_o-1.jpg" alt="" />
<img src="https://kyzylorda-news.kz/wp-content/uploads/2020/12/129365467_2929533693934225_7920249056969040556_o.jpg" alt="" />
<img src="https://kyzylorda-news.kz/wp-content/uploads/2020/12/129587049_2929533593934235_6834296242248101989_o.jpg" alt="" />
<img src="https://kyzylorda-news.kz/wp-content/uploads/2020/12/129176758_2929533157267612_3411025748537235981_o.jpg" alt="" />

Қазалы ауданының әкімі жеңімпаз спортшыларды қабылдады

<a href="https://kyzylorda-news.kz/">Kyzylorda-news.kz</a>. 1 желтоқсан күні «Бектас-Қоныс» кен орнында жұмысшыларға арналған 48 контейнер өртенді. Мұнай кенішінде 30 адам болғаны анықталды. Өрт кезінде үш адам көз жұмды.
<blockquote>
 “Өртті сөндіруге Төтенше жағдайлар департаментінің 19 қызметкері мен 3 техникасы, «ПожМонтажҚұрылыс» ЖШС мемлекеттік емес өртке қарсы қызметінің 9 жұмысшысы мен 2 техникасы, «ПетроҚазақстанҚұмкөлРесурс» ЖШС мемлекеттік емес өртке қарсы қызметінің 3 қызметкері мен 1 техникасы жұмылдырылды. Өрт бес сағатқа созылды. Яғни, таңғы сағат 06:40-та сөндірілді. Оқиға орнында қаза тапқан 1967, 1985 және 1970 жылғы азаматтар. Бүгінде өрттің шығу себептері тексерілуде, – деді Облыстық ТЖД бастығының міндетін атқарушы Руслан Қайрақбаев.
 “Кен орнында көз жұмған адамдардың еңбек шарты тексеріліп, тиісті құжаттар дайындалатын болады. Олардың еңбек шарты сақталады. Яғни, сақтандыру қоры бойынша тиісті төлемдер төленеді. Бұдан бөлек, мемлекет тарапынан отбасына әлеуметтік жәрдемақы берілетін болады”, – деді облыстық еңбек саласын бақылау басқармасының басшысы Төреахмет Жолымбетов.
 “Өрт қауіпсіздігі сақталмағаны үшін қылмыстық іс қозғалды. Яғни, ҚР қылмыстық кодексінің 292 бабының 3 бөлігі бойынша сотқа дейінгі тергеп-тексеру жұмыстары жүргізілуде. Аталған іс бойынша сараптамалар тағайындалды”, – деді Қызылорда ОПД Тергеу басқармасының бастығы Әбдібек Жаназаров.
</blockquote>

Қызылорда: Кен орнында қаза тапқан азаматтардың еңбек шарты сақталады

<a href="https://kyzylorda-news.kz/">Kyzylorda-news.kz</a>. WhatsApp мессенджерінде алдағы уақытта екі апталық локдаун енгізілетіні туралы хабарлама тарап жатыр. Онда тіпті азық-түлік дүкендері де жабылып, дәріханалар ғана бұрынғы режимде жұмыс істейтіні айтылған, деп хабарлайды&nbsp;<a href="https://sputnik.kz/">Sputnik Қазақстан</a>.
Денсаулық сақтау министрлігіне қарасты тауарлар мен көрсетілетін қызметтердің сапасы мен қауіпсіздігін бақылау комитеті бұл ақпаратты жоққа шығарды.
<blockquote>
 “Бұл жалған ақпарат. Қазіргі таңда қатаңдату шараларын қабылдау жоспарланып отырған жоқ. Бір де бір облыста мұндай мәселе көтерілмеді”, – деп хабарлады комитеттің ресми өкілі Ержан Байтанаев.
</blockquote>
Ол медициналық бетперде тағудың және әлеуметтік арақашықтықты сақтаудың маңыздылығын еске салды. Сондай-ақ, адамдар көп жиналатын жерлерге бармауға шақырды.

Қазақстан және Қызылорда облысының жаңалықтары