<a href="https://kyzylorda-news.kz/">Kyzylorda-news.kz.</a> Індетке байланысты халық санағы келесі жылға шегерілуі ықтимал, деп хабарлады <a href="https://24.kz/kz/zha-aly-tar/o-am/item/412637-khaly-sana-y-kelesi-zhyl-a-shegerilui-m-mkin">“Хабар 24”</a>.
<blockquote>
 «Қазақстанда халық санағын 2020 жылдың 1 қазанынан бастап жүргізу жоспарланған еді. Алайда халық санағын жүргізетін қызметкерлер халықпен жақын қарым-қатынаста еңбек ететіндіктен, коронавирус инфекциясы қаупінің алдын алу мақсатында Ұлттық экономика министрлігі Үкіметке санақты келесі жылға шегеруді ұсынды. Мұндағы негізгі себеп – халықтың мен халық санағын жүргізетін персоналдың амандығы. Біз тиісті шешімді күтіп отырмыз», – деді ұлттық экономика министрі Руслан Дәленов ОКҚ-да өткен баспасөз мәслихатында.
</blockquote>

Халық санағы келесі жылға шегерілуі мүмкін

<a href="https://kyzylorda-news.kz/">Kyzylorda-news.kz.</a> Қызылорда облысынан Отан алдындағы міндетін орындауға 700 азамат аттанды. Олар әскери борышын ҚР Ұлттық қауіпсізді комитеті Шекара қызметінде, ҚР Мемлекеттік күзет қызметінде, ҚР Ұлттық ұлан қызметінде, ҚР Қарулы күштері қатарында өтейтін болады. Бұл туралы Өңірлік коммуникациялар қызметінің ақпарат алаңында өткен брифингте Қызылорда облысы бойынша қорғаныс істері жөніндегі департамент бастығының орынбасары Қанат Омаров мәлімдеді.
<blockquote>
 «Азаматтарды жөнелту жұмыстары барлық санитарлық нормаларды сақтай отырып жүргізіледі. Аудандық, қалалық шақыру пункттерінде және облыстық жиын пунктінде санитарлық посттар қойылды. Санитарлық пост арнайы медициналық маманмен қамтамасыз етілген. Шақыру пунктеріне келген әрбір әскерге шақырылушыларды санитарлық нормаға сәйкес тексеріп, аудандық қалалық және облыстық медициналық комиссиядан өтуге жіберіледі», – деді Қанат Жаңабайұлы.
</blockquote>
Бұған дейін әскерге шақырудың көктемгі кезеңінде 800-ден аса қызылордалық аттанған болатын. Әскери бөлімдерге елімізді қорғауға қабілетті, денсаулығы мықты, дене бітімі шыныққан, сауаты жеткілікті, моральдік-іскерлік қабілеті жоғары азаматтар жөнелтіледі.
<img src="https://kyzylorda-news.kz/wp-content/uploads/2020/07/fb_img_1596009063340-2.jpg" alt="" />

Қызылордадан әскерге 700 азамат аттанды

<a href="https://kyzylorda-news.kz/">Kyzylorda-news.kz.</a> Бүгінгі таңда Жалағаш ауданында індеттің алдын алу, таратпау мақсатында жұмыстар жүргізілуде. 
Күшейтілген санитариялық-дезинфекциялық талаптардың сақталуын қадағалау мақсатында аудан әкімдігі жанынан құрылған 3 мобильді топ күндіз және түнгі мезгілде рейд жұмыстарын тұрақты жүргізуде.
Рейд барысында кәсіпкерлік нысандар оның ішінде дүкендер, дәмханалар және өзге де қоғамдық тамақтану орындары, көлік жуу орталықтары, таксисттер тұрағының күшейтілген санитариялық-дезинфекциялық режимді сақтауы, жұмыс уақыттары тексеріліп, саудагерлер мен тұрғындарға қоғамдық орындарда коронавирус инфекциясын жұқтырмау үшін қауіпсіздік шараларын қатаң сақтауға кеңес беруде.
Тексеріс жұмыстарының нәтижесінде қойылған талаптарға бағынбаған кәсіпкерлерге заңдылыққа сәйкес шара көрілуде.
Сонымен қатар бүгін аудан жастары халық көп шоғырланатын бірнеше орындарға індеттің алдын алу, сақтық шараларын барынша сақтау бағытындағы 15 дана плакат ілді.
Айта кету керек, бүгінгі күнге дейін 200-ге жуық кәсіпкерлік нысанға мобильді топтар тарапынан тексеру және түсіндірме жұмыстары жүргізілді. 3 дүкен иелеріне карантиндік тәртіпті бұзғаны үшін Әкімшілік құқық бұзушылық туралы Кодекстің 425 бабына сәйкес айыппұл салынды.
Барша аудан тұрғындарын енгізілген шектеулерді қатаң сақтауға шақырамыз.
<img src="https://kyzylorda-news.kz/wp-content/uploads/2020/07/fb_img_1596012601988-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012604988.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012607374-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012609734-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012612666-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012615008-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012617316.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012619786-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012625533-1.jpg" alt="" />
<img src="https://kyzylorda-news.kz/wp-content/uploads/2020/07/fb_img_1596012628449-1.jpg" alt="" />

Жалағашта мобильді топ рейд жұмыстарын тұрақты жүргізуде

<a href="https://kyzylorda-news.kz/">Kyzylorda-news.kz.</a> Қызылорда облысына 170 дәрігер қажет. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
<blockquote>
 “Өңірде қалыптасқан эпидахуал кезінде денсаулық сақтау саласында қажетті мамандардың жетіспеушілігі анық байқалды. Нақты қандай салалар бойынша мамандар тапшы? Осы бойынша зерттеу жасалды ма және шешілу жолдары қандай?”, – деді облыс әкімі “Қызылорда” телеарнасының тілшісі Әкімжан Жолтаев.
 “Әрине, бұл өте өзекті мәселелердің бірі. Бұл бойынша жауапты сала мамандарымен бірлесіп толық зерттеу жасалды. Денсаулық сақтау басқармасының мәліметіне сәйкес биылғы жылы 170 дәрігерге сұраныс бар. Олардың ішінде: 46 аймақтық дәрігер, 26 анестезиолог-реаниматолог, 8 неонатолог, 8 психиатр, 5 фтизиатр, 5 онколог, 4 балалар хирургі, 5 офтальмолог, 3 инфекционист, 3 балалар невропатологы, 3 оториноларинголог, 3 реабилитолог, 3 дерматовенеролог, 3 патанатом, 4 травматолог, 3 нефролог, 2 пульмонолог, 2 кардиолог, 2 акушер-гинеколог, 2 хирург, 2 дәрігер-лаборант, 2 терапевт, 1 уролог, 1 эндоскопист дәрігер қажет.
 Бұл сұранысты реттеу үшін, бүгінгі күнге 18 жас маман медицина ұйымдарына, олардың 7-еуі елді мекендерге жолданды. Олар – 4 жалпы тәжірибелік дәрігер, 3 терапевт, 3 акушер-гинеколог, 2 хирург, 4 педиатр, 1 нейрохирург, 1 ЛОР дәрігер.
 Бұдан бөлек, провизорлық стационарларға 5 интерн, 1 резидент (жоғары оқу орынын толық аяқтамаған) уақытша жұмысқа қабылданды. Сонымен қатар, Денсаулық сақтау министрлігінің мемлекеттік тапсырысы негізінде медициналық университет түлектерін бөлу хаттамасы бойынша (по протоколу распределения выпускников медицинских ВУЗ-ов) алдағы уақытта облысымызға қосымша 123 жас маман келеді деп күтілуде. Сондай-ақ, облыс әкімінің гранты негізінде медицина мамандығы бойынша білім алып жатқан резиденттерден 15 жас дәрігерлер өңірімізге келіп қызмет атқаратын болады. Осы сәтті пайдалана отырып, дәрігер мамандарды аймағымызға келіп медицина саласының дамуына үлес қосуға шақырамыз, – деді облыс әкімі Г. Әбдіқалықова.
</blockquote>

Қызылорда облысына 170 дәрігер қажет

<a href="https://kyzylorda-news.kz/">Kyzylorda-news.kz.</a> Қызылорда облысындағы 243 мектеп жаңа оқу жылын қашықтан оқыту форматында бастайды. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
Брифингте аймақ басшысына қойылған сауалдардың бірі жаңа оқу жылына қатысты болды.
<blockquote>
 “Жаңа оқу жылы таяп қалды. Осы ретте қашықтықтан оқыту мәселесіне дайындығымыз қалай және мектепке 1 сынып оқушыларын қалай қабылдайды?”, – деген сауал жолдады облыстық “Ақмешіт жастары” газетінің тілшісі Ерхан Ақын.
 “Алдағы 1 қыркүйекте оқу жылы облыстағы 243 мектепте қашықтан оқыту форматында басталады. Қалған шалғай орналасқан және шағын жинақты 50 мектепте дәстүрлі оқытады деп жоспарлануда. Сонымен бірге, бастауыш сыныптардың оқушыларының ата-анасының өтініші бойынша тиісті мүмкіндіктерге қарай отырып, қатаң санитарлық шараларды сақтаумен кезекші сыныптар ашылады деп күтілуде. Бүгінгі күнге білім беру ұйымдарын жаңа оқу жылына дайындау жұмыстары жүйелі түрде жүргізілуде. Қашықтан оқыту форматы бойынша оқушылар мен педагогтардың электронды құрылғыларымен (компьютер, ноутбук, планшет, смартфон) және интернет, мобильді интернет байланысымен қамтамасыз етілуіне мониторинг жүргізілді. Облыстағы 18 мың мұғалімге 18-22 тамыз аралығында арнайы оқыту курсы онлайн форматта ұйымдастырылады. Компьютері жоқ 300 мұғалімге кәсіподақ есебінен техникалық құралдар беріледі”, деді – облыс әкімі.
</blockquote>
Сондай-ақ, Гүлшара Әбдіқалықова балаларды 1-сыныпқа қабылдауда медициналық анықтамалар уақытша талап етілмейтінін жеткізді. Қазіргі таңда ата-аналар мектепке балалардың құжаттарын 2 түрлі жолмен өткізе алады. Қағаз жүзінде мектепке тапсырылады. Ал, онлайн «egov» порталы арқылы іске асады.
Айта кету қажет, 1-сыныпқа құжат қабылдау 1-тамызға дейін іске асырылады. Қазіргі күні 16207 баланың құжаты қабылданған. Білім басқармасының ақпараттық анализі бойынша биыл 1-сыныпқа 19 мыңға жуық оқушы мектеп табалдырығын аттайды.
<img src="https://kyzylorda-news.kz/wp-content/uploads/2020/07/116344395_2597178650385188_8369051536997539870_o.jpg" alt="" />

Қызылорда облысындағы 243 мектеп жаңа оқу жылын қашықтан оқыту форматында бастайды

<a href="https://kyzylorda-news.kz/">Kyzylorda-news.kz.</a> Сыр өңірінде «Жұмыспен қамтудың Жол картасы» аясында 9 мыңнан астам азамат жұмысқа шақырылды. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
<blockquote>
 “Қазіргі пандемия кезеңінде көптеген жұмыс орындарының босап қалғандығын естіп жүрміз, осы ретте Қызылорда облысында “Жұмыспен қамтудың жол картасы” бойынша қанша жұмыс орны ашылады?”, – деді “Ақмешіт апталығы” газетінің тілшісі Бағлан Тілеубергенова.
 “2020 жылы Жол картасы аясында Қызылорда облысында 
276 жобаны жүзеге асыру жоспарланып, бүгінгі күні оның 275-і іске асырылуда. Жоба аясында 9 299 жұмыс орнын ашу жоспарланса, қазіргі таңда 7 768 жұмыс орны ашылды. Бұл жоспарланған жұмыс орнының 83,5 %-ын ғана құрайды. Яғни, әлі де 1500-ден астам жұмыс орындары бар. Бірақ, өздеріңіз жақсы білесіздер халық арасында немесе әлеуметтік желілерде жұмыссыздық мәселесі жиі көтеріледі. Дегенмен, жоғарыда айтқанымдай бізде жұмыс орындары бар, алайда жұмыс орындарына деген сұраныс болмай тұр. Жұмыс сұраушылардың басым бөлігі ауыр жұмысты қаламайды. Ұсынған жұмысты ауырсынып, жеңіл жұмыс, жеңіл ақша тапқысы келеді. Ал, шын мәнінде жұмысқа мұқтаж адам еңбекті ауыр немесе жеңіл деп бөліп қарамайтыны анық. Сондықтан жерлестеріме айтатыным осы мүмкіндікті тиімді пайдаланайық”, – деді аймақ басшысы.
</blockquote>
Гүлшара Наушақызының айтуынша, бүгінгі таңда Қызылорда қаласында 98 жоба бойынша жұмыстар басталып, 2 724 азамат жұмыспен қамтылса, Арал ауданында барлығы 16 жоба іске асырылуы жоспарланса, нақты жұмысқа орналасқандардың саны –505 азаматты құрап отыр.
Сондай-ақ, Қазалы ауданында 42 жобадан 41-і басталды. Нақты жұмысқа орналасқандардын саны – 1059 адам. Ал, Қармақшы ауданында 29 жоба бойынша жұмыстар басталып, 163 азамат жұмыспен қамтылған.
Жалағаш ауданында 18 жобаның барлығы басталып, 539 азамат, Сырдария ауданында 18 жоба бойынша жұмыстар басталып, 321 азамат, Шиелі ауданы бойынша барлық 21 жоба бойынша жұмыстар басталып, 649 азамат жаңа жұмыс орындарына қабылданған.
Сонымен қатар, Жаңақорған ауданында 23 жоба іске асырылуда, 539 азамат жұмысқа қабылданған.

Сыр өңірінде «Жұмыспен қамтудың Жол картасы» аясында 9 мыңнан астам азамат жұмысқа шақырылған

<a href="https://kyzylorda-news.kz/">Kyzylorda-news.kz.</a> Қызылорда облысының Тауарлар мен көрсетілетін қызметтердің сапасы мен қауіпсіздігін бақылау департаменті мен басқа да мемлекеттік органдар қызметкерлері және үкіметтік емес ұйымдар өкілдерінен құрылған мониторингтік топ ағымдағы жылдың 08 шілдесінен бастап бүгінгі күнге дейін қаладағы 9 емхана, 122 дәріхана мен «СҚ-Фармация» ЖШС-нің дәріханалық қоймасына мониторинг жүргізді. 
Қалалық емханаларда пневмония, жоғары және төменгі тыныс алу жолдарының жіті респираторлық аурулары бойынша тегін медициналық көмектің кепілдік берілген көлемі аясында және міндетті әлеуметтік медициналық сақтандыру жүйесі шеңберінде берілетін дәрілік заттардың қоры мен олардың пациенттерге берілу жағдайымен танысты. 
Барлық дәріханада жоғарыда аталған нозологиялар бойынша балаларға берілетін дәрі-дәрмектер қоры жеткілікті екені анықталды. Алайда ересектерге берілетін дәрілік заттар кей емханаларда тапшы болғанымен, «СҚ-Фармация» арқылы қосымша тапсырыстар жасалып, дәрілік заттарды жеткізу жоспарланған. Емханаға келе алмайтын, үй жағдайында емделіп жатқан пациенттерге тегін дәрі-дәрмектерді жеткізіп беру үшін емханалар жанынан арнайы мобильдік бригадалар ұйымдастырылған. Бүгінгі күні емханалар мен ауруханаларда тегін берілетін дәрі-дәрмектердің бір айлық қорын қалыптастыру бойынша жұмыстар жүргізілуде. 
Бүгінгі таңда Қызылорда облысы бойынша 328 дәріхана, дәріхана пункттері фармацевтикалық қызметпен айналысады. Оның 178-і Қызылорда қаласында орналасқан. Мониторинг барысында дәріханалардағы ыстықты төмендететін, вирусқа қарсы, антибактериалды дәрілік заттардың сатылымдағы қоры мен шекті бөлшек саудадағы бағаларының сақталуына назар аударылды. 
Жұмысшы топтың алғашқы күндеріндегі мәлімет бойынша дәріханалардың жоғарыда аталған дәрілермен қамтамасыз етілуі 83,6% құраса, мониторинг жүргізудің 17-күнінде бұл көрсеткіш 97,7%-ке дейін көтерілді. Яғни сұраныстағы препараттармен қамтамасыз ету жағдайы жақсарды. Бастапқыда болмаған ыстықты түсіретін, вирусқа және микробқа қарсы препараттар күн сайын барлық дәріханаға түсе бастады. 
Бұдан бөлек, «Чингиз» ЖШС-нің дәріханалық желісіне бір реттік әкелу тәртібі бойынша көп мөлшерде сұранысқа ие дәрілер (парацетамол, амброксол, эуфиллин, дексаметазон, гепарин, левофлоксацин, офлоксацин, метронидазол) жеткізілді. 
Дәрі тапшылығы қатты сезілген маусым-шілде айларында халық сұранысын қанағаттандыру, дәріханалардағы кезектерді азайту мақсатында Қызылорда қаласында – 5, Арал ауданында – 1, Қармақшы ауданында – 1, Қазалы ауданында – 1, Жаңақорған ауданында – 1 дәріхана жаңадан іске қосылды. 
Мониторинг басталған кезеңмен салыстырғанда қазіргі таңда дәрі-дәрмекке қатысты дүрлікпе басылған, дәріханалар алдындағы ұзын-сонар кезектер жойылды. 
Мониторинг жүргізу барысында бірқатар заңбұзушылықтар да орын алды. Атап айтқанда, қаладағы 3 дәріхана дәрілік затты бекітілген шекті бағасынан асырып сатқан. Атап айтқанда 2827,9 теңге тұратын «Хилак форте» дәрілік заты 300 теңгеге сатса, 2142,82 теңге тұратын «Линекс» №16 дәрісі 2310 теңгеден сатылған. Сол сияқты 4143,7 теңге тұратын «Линекс» №32 дәрісі 4595 теңгеден сатылған. Шағын кәсіпкерлік субъектілеріне осы заңбұзушылықтары үшін ӘҚБтК 426-бабының 1-бөлігі 541 710 теңгеге айыппұл салынды. 
Бұдан бөлек, Қызылорда облысының Тауарлар мен көрсетілетін қызметтердің сапасы мен қауіпсіздігін бақылау департаменті құқық қорғау органдарынан келіп түскен материалдар бойынша 40 әкімшілік іс қозғалып, 6 материал әкімшілік сотқа жолданды. Оның ішінде фармацевтикалық қызметке рұқсат құжатынсыз дәрілік затты сату, Қазақстан Республикасында тіркелмеген және медициналық мақсатта қолдануға рұқсат етілмеген дәрілік затты сату дерегі бойынша жеке тұлғаларға қатысты 14 іс қозғалып, 118 065 теңге айыппұл салынды. Сонымен қатар дәрілік затты шекті бағадан асырып сату фактісі бойынша 27 шағын кәсіпкерлік субъектісі кінәлі деп танылды. Аталған деректер бойынша Қызылорда облысының тауарлар мен көрсетілетін қызметтердің сапасы мен қауіпсіздігін бақылау департаментімен 4 041 990 теңге көлемінде айыппұл салынды Заңбұзушылықтардың басым бөлігі – 16 іс Қызылорда қаласында орын алды, одан кейін Аралда-6, Қазалы мен Жаңақорғанда 5-ден, Шиеліде-4, Байқоңыр, Сырдария, Жалағаш мен Қармақшыдан 1-ден орын алды.

Қызылордада дәрі-дәрмекке қатысты 43 әкімшілік іс қозғалды

<a href="https://kyzylorda-news.kz/">Kyzylorda-news.kz.</a> “Бүгінгі таңда Сыр өңірі диқаншыларын су тапшылығы қатты алаңдатуда. Егер бұл мәселе шешімін таппаса, 50 пайыз егістіктен айырылып қалу қаупі бар екендігі айтылуда. Бұл бағытта облыста қандай нақты шаралар қабылдануда?”
Осындай сауалды бүгін облыс әкімі Гүлшара Әбдіқалықоваға өңірдегі пандемиямен күрес және экономикалық ахуал жөнінде өткен брифингте “Kyzylorda-news.kz” ақпарат агенттігінің бас редакторы Нұрсұлтан Мықтыбай қойды.
<blockquote>
 “Қазіргі таңда облыс бойынша 184,7 мың га егіс егіліп, негізгі дақыл күріш егісі 89,6 мың гектарды құрады. Бүгінде су алу каналдары арқылы егіске күнделікті секундына 404 текшеметр су алынуда.
 Атап айту керек, өткен жылмен салыстырғанда, Нарын – Сырдария каскадының су қоймаларында судың көлемі 4,4 млрд. текшеметр аз болса, Шардарадағы жиналған су 2,3 млрд текшеметрді құрап, өткен жылдың осы кезеңімен салыстырғанда 1,1 млрд текшеметрге аз, ал төменге Сырдария өзені арқылы секундына 520 текшеметр су тасталып, 2019 жылмен салыстырғанда 180 текшеметрге аз болып отыр.
 Бұл өз кезегінде, сумен қамтамасыз ету барысына кері әсерін тигізіп, нәтижесінде барлық аудандардың егіс алқаптарында су тапшылығы байқалуда. Бүгінде облыс бойынша 1853 га. күріш егісіне су жетіспей отырса, 405 га. егіс мүлдем сусыз қалғандығы анықталды.
 Жақында егістігіне су жеткізе алмай қиналған диқандардың қазіргі жай-күйін Сенат депутаты Мұрат Бахтиярұлы, менің орынбасарларым мен салаға жауапты мамандар көзбен көріп қайтты.
 Сырдария өзеніндегі су тапшылығына байланысты облыстың егін алқаптарын сумен қамтамасыз етуде қалыптасқан күрделі жағдайды күнделікті бақылауда ұстап, тікелей ұйымдастыруды және су тапшылығын алдын алу бағытында жұмыс жасауды тапсырдым.
 Облыстың егістік алқаптарын тұрақты сумен қамтамасыз ету мақсатында, қазірден бастап тамыз айының 10-на дейін Экология, геология және табиғи ресурстар министрлігіне Шардара су қоймасынан төменге секундына 550 текшеметр су тастауға тапсырма беру туралы Үкімет Басшысына жедел ұсыныс жолдаған болатынмын.
 Менің ұсынысым оң шешімін тауып, бүгіннен бастап тиісті су көлемі жіберіле бастады.
 Ендігі міндет, осы жіберілген бар су көлемін тиімді пайдаланып, егілген егісті су тапшылығына ұрындырмай алып шығу мақсатында барлық аудан әкімдері мен тиісті сала басшыларына нақты тапсырмалар бердім”, – деді облыс әкімі Г. Әбдіқалықова.
</blockquote>
<img src="https://kyzylorda-news.kz/wp-content/uploads/2020/07/116709250_2597178110385242_8006416064290709428_o.jpg" alt="" />

Сыр дихандарының су тапшылығы мәселесі шешімін табады

<a href="https://kyzylorda-news.kz/">Kyzylorda-news.kz.</a> Қызылорда облысында жылу беру маусымына дайындық қарқынды жүріп жатыр. Бұл туралы облыс әкімі Гүлшара Әбдіқалықова өңірдегі пандемиямен күрес және экономикалық ахуал жөнінде өткен брифингте журналистердің сауалына жауап беру кезінде мәлімдеді.
<blockquote>
 “Байқағанымыздай облыс орталығында жылу құбырлары жаңартылып жатыр. Жалпы, жылу беру маусымына дайындық барысы қалай жүргізілуде?”, – деп сұрақ қойды аймақ басшысына облыстық “Сыр бойы” газетінің тілшісі Назерке Саниязова.
 «Қызылорда облысы бойынша тіршілікті қамтамасыз етуші кәсіпорындар мен әлеуметтік сала нысандарының алдағы жылу беру маусымына дайындығы бекітілген кестелерге сәйкес жүргізілуде. Тұтынушыларды электр және жылу энергиясымен, газбен және сумен қамтамасыз ететін коммуналдық кәсіпорындардың жөндеу жұмыстары 43%-ға орындалды.
 Облыстың білім беру, денсаулық сақтау, мәдениет, спорт нысандары мен автономды қазандықтардың жөндеу жұмыстары 36%-ға орындалды.
 Бүгінгі күнге, орталықтандырылған жылу жүйесіне қосылған көп қабатты тұрғын үйлердің дайындығы 25%-ды құрайды. Облыс бойынша 1185 әлеуметтік сала нысандарының алдағы жылу беру маусымына қажетті қатты отын қоры 39,5 мың тонна және сұйық отын 26 мың тонна.
 Ал, жергілікті тұрғындарға 163,6 мың тонна көмір отыны қажет. Бұған қоса, қала және аудан тұрғындары үшін көмір бағасының өсуіне жол бермеу мақсатында көмір өндіретін кәсіпорындармен тікелей келісім-шарт жасау бойынша жұмыстар атқарылуда. Сондай-ақ, «Нұрлы жер» және «Жұмыспен қамту жол картасы» мемлекеттік бағдарламалары аясында инженерлік желілерге қайта жаңғырту және көпқабатты тұрғын үйлерге күрделі жөндеу жұмыстары жүргізілуде. Жалпы қысқа дайындық мәселелері тұрақты бақылауда және межеленген жоспарлы жұмыстарды мерзімінде аяқтаймыз», – деп жауап берді бұл сауалға облыс әкімі.
</blockquote>
<img src="https://kyzylorda-news.kz/wp-content/uploads/2020/07/116567002_2597178373718549_5003493228432465775_o.jpg" alt="" />

Қызылорда облысында жылу беру маусымына дайындық қарқынды жүріп жатыр

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықованың қатысуымен пандемиямен күрес бағытында атқарылып жатқан жұмыстар мен аймақтың экономикалық ахуалы жөнінде брифинг өтті. Аймақ басшысы өңірдегі аталған екі мәселенің жай-күйіне тоқталған соң, журналистердің сұрақтарына жауап берді.
Гүлшара Наушақызына қойылған сұрақтың алғашқысы бір жолғы төлем, яғни, 42 500 теңгеге қатысты болды.
<blockquote>
 “Президенті Қасым-Жомарт Кемелұлы Тоқаевтың бастамасымен елдегі күшейтілген карантиндік талаптарға сәйкес, халықты әлеуметтік қолдау мақсатында тағайындалған 42500 теңге көлеміндегі бір жолғы төлем туралы әлі де болса түсініспеушіліктер туындауда. Біржолғы төлем кімдерге беріледі?”, – деп сауал жолдады облыс әкіміне “Қазақпарат” ХАА тілшісі Әділжан Үмбетов.
 «Елімізде карантиндік шектеу шараларының енгізілуіне байланысты біржолғы төлем төлеудің ережесі әзірленді. Өңірде 95038 адам 42500 теңге көлемінде қосымша әлеуметтік жәрдемақы алуға жүгінді. Оның ішінде, шілде айында 93273 азаматқа көмек көрсетілді. Бүгінде 37141 азаматқа автоматты түрде SMS жолданып, табысынан айырылғандығын растау жұмыстары жүргізілуде», – деді Г. Әбдіқалықова.
</blockquote>
Сондай-ақ, облыс әкімі 42500 теңге көлеміндегі бір жолғы төлем кімдерге берілетінін нақтылап өтті.
Оның айтуынша, аталған жәрдемақы біржолғы төлем табысынан толық айырылған азаматтарға, жалдамалы жұмыскерлер, яғни, ақысыз демалысқа жіберілген жағдайда, жеке кәсіпкерлерге (жеке практикамен айналысатын азаматтар), фрилансерлерге, өз бетінше жұмыс істеп жүрген азаматтың жұмысы тоқтап қалған жағдайда беріледі.
<img src="https://kyzylorda-news.kz/wp-content/uploads/2020/07/116709837_2597178157051904_8039496311627191386_o.jpg" alt="" />

Қызылорда облысында 42500 теңге жәрдемақыны 93273 тұрғын алған

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықованың қатысуымен пандемиямен күрес бағытында атқарылып жатқан жұмыстар мен аймақтың экономикалық ахуалы жөнінде брифинг өтті.
<img src="https://kyzylorda-news.kz/wp-content/uploads/2020/07/img-20200729-wa0051-1.jpg" alt="" />
Жалпы, аймағымызда коронавирус індетімен сырқаттанған 2 859 адам тіркелді. Осы күнге дейін науқастардың 1965, яғни 69% жазылып шықты. Covid-19 инфекциясынан облыс бойынша 7 науқас қайтыс болған.Эпидмаусым басталғанда облыста барлығы 976 төсекорын дайындалды. Оның 135-і инфекция, 241-провизор, 600-карантиндік орын. Бүгінгі күні олардың саны 2405-ке артты.
<blockquote>
 «Қажеттілік туындаған жағдайда 500 төсек орын резервіміз бар. Оның ішінде инфекциялық 200 және провизорлық 300 орын әзірленді. Облыста 6 компьютерлік томограф қызмет көрсетеді. Оның 4-еуі облыс орталығында, 2-еуі ауданда орналасқан. Қосымша аппарат алуға демеушілерді тарту мәселесі қарастырылуда», – деді облыс әкімі Г.Әбдіқалықова.
</blockquote>
Өңірде 52 рентген аппаратының 20-ы облыс орталығындағы, 32-сі аудандардағы медицина мекемелерінде қызмет көрсетеді. 107 өкпені жасанды желдету аппараты (ИВЛ) бар. Денсаулық сақтау министрлігіне 192 өкпені жасанды желдету (ӨЖЖ) аппаратына тапсырыс берілді. Сонымен қатар, 153 оттегі концентраторы бар. Кеше қосымша өңірімізге «Шұғыла» қоғамдық қоры тарапынан 200 дана оттегі аппараты жеткізілді.
<img src="https://kyzylorda-news.kz/wp-content/uploads/2020/07/img-20200729-wa0048.jpg" alt="" />
COVID-19 инфекциясына қарсы күрес шараларына тартылған 2407 медицина қызметкеріне қаржылай қолдау мақсатында пандемия кезеңінде 4 айда 1 млрд 117,6 млн теңге төленді. Сондай-ақ, облыстың барлық емдеу мекемелері бірінші типтегі костюмдермен, қорғаныс құралдарымен қамтамасыз етіліп, қажетті бекітілген 26 түрлі дәрі-дәрмектің 2 айлық қоры қалыптасты. “СК Фармациядан” келетін барлық дәрі-дәрмектің 100 пайызы келді. Ал, дәріханаларда 1 айға жетерлік дәрі қоры қалыптасты. Бүгінгі күні сұраныстағы дәрілердің 100% сатылымда бар.Облыс әкімі өңір экономикасын қайта қалпына келтіру аясында атқарылып жатқан шараларға тоқталды.
<blockquote>
 «Экономикалық жағдайды ескере отырып, облыстың 2020 жылға арналған бекітілген бюджеті қайта қаралып, 2,2 млрд теңге бюджет шығыстары қысқартылды. Экономиканы қайта қалпына келтіру жөніндегі облыстық жоспар бекітілді. Жоспарға сәйкес жергілікті жолдарды жөндеу, су және жылу жүйесін жаңғырту, энергиямен қамтамасыз ету, жаңа жұмыс орындарын ашу, ауыл шаруашылығы және әлеуметтік саланы дамыту бағытында шаралар жүзеге асырылатын болады. Сыр өңіріндегі экономиканың негізгі қозғаушы күші ауыл шаруашылығы саласында да тың серпін бар. Үстіміздегі жылы облыс бойынша 184,7 мың гектар жерге ауыл шаруашылығы дақылдары егілді», – деді облыс әкімі Гүлшара Әбдіқалықова.
</blockquote>
Өңір экономикасын қайта қалпына келтіру аясында өңірге жаңа инвестициялар тартылуда. Атап айтсақ, құны 1,5 млрд теңге болатын жылына 130 тоннаға дейін түйе сүтінен құрғақ ұнтақ өндіретін цехтың құрылысы. Және құны 3 млрд теңге болатын жылына 180 мың тонна тұз өндіретін үшінші испандық цехтың құрылысы. Екі жоба да Арал ауданында жүзеге асырылады.
Мұнымен қоса, 2020 жылдың екінші жартыжылдығында Арал ауданында кальцийленген сода, Қызылорда қаласында шыны пластик құбырлар шығаратын зауытар мен Жаңақорған ауданында күн электр станциясының құрылысы басталады деп жоспарлануда. Сонымен қатар, жыл соңына дейін 3 өндіріс іске қосылады деп жоспарлануда. Олар, Қызылорда қаласында шыны зауыты, Арал ауданында кварц құмын байыту бойынша тау-кен байыту комбинаты (бірінші желісі) және Қармақшы ауданында құс фабрикасы.
Сондай-ақ, аймақ басшысы «Жұмыспен қамту жол картасы» мемлекеттік бағдарламасының өңірде жүзеге асырылу барысын айтты.
<blockquote>
 «Мемлекеттік бағдарлама аясында 37 млрд. теңгені құрайтын 276 жоба жүзеге асырылуда. Нәтижесінде облыста 9299 жаңа жұмыс орындары құрылады. Бүгіннің өзінде 7 768 адам жұмысқа орналасты. Ең бастысы, жобаларды жүзеге асыруда пайдаланылатын тауарлар мен қызметтердің 90 пайызы отандық өнімдер», – деді облыс әкімі Гүлшара Әбдіқалықова.
</blockquote>
Ал, «Қарапайым заттар экономикасы» бағдарламасы аясында біздің облысымызда 7,6 млрд теңгені құрайтын 96 жобасы мақұлданды. Жобалар аясында 570-ке тарта жаңа жұмыс орны құрылады. Сондай-ақ, «Бизнестің Жол картасы 2025» бағдарламасы аясында көзделген қаражат 1,7 млрд теңгеден 3,4 млрд теңгеге дейін екі есеге ұлғайтылды.
Сонымен бірге, бизнесті қолдау бағдарламасы аясында қарастырылған құралдарды тиімді пайдалану үшін «Қызылорда облысының 2023 жылға дейінгі Экономикалық даму жоспары» әзірленді. Жоспардың негізгі мақсаты – шағын және орта бизнес жобаларын дамыту және қолдау. Жалпы жоспармен экономиканың түрлі салаларында 265 жоба жүзеге асырылмақшы, оның ішінде биыл 24 млрд теңгенің 95 жобасы өз жұмысын бастады, оның ішінде тамақ өнімдерін өндіру, ауыл шаруашылық өнімдерін терең өңдеу, мал шаруашылығын дамыту және тағы басқалары.
Аймақта құрылыс қарқыны да бәсеңдеген жоқ. Қиын кезеңге қарамастан биылғы жылы барлығы 30 әлеуметтік нысанның құрылысын жүргізу жоспарланса, жыл аяғына дейін 22 нысан халық игіліне пайдалануға беріледі деп күтілуде. Қызылорда қаласы мен аудандарда барлығы 1406 пәтерді құрайтын 87 тұрғын үйдің құрылысы жүргізілісе, жыл аяғына дейін 74 тұрғын үй халық игілігіне пайдалануға беріліп, 1000 жуық жерлестеріміз жаңа баспанаға ие болады.
Ақпараттық және насихаттық жұсмыстар да жүйелі жүргізілуде. Облыс көлемінде 75 тақырыптық билбордтар және адамдар көп жиналатын қоғамдық орындарда, көп қабатты үйлердегі арнайы орындарда жадынамалар, постерлер, үнпарақтар орналастырылуда. Төтенше жағдай қызметкерлерімен радио хабарландыру жасалып, облыстық телеарнада күнделікті тікелей эфирде “Дәрігер сағаты” бағдарламасы арқылы мамандар медициналық кеңес береді. Мемлекетпен қатар, осы індетпен күресуге ерекше үлес қосып жүрген белсенді азаматтардың жұмысын бір ортаға тоғыстырған «Сыр волонтерлары» орталығы құрылды.
Жиын соңында облыс әкімі тұрғындарды сақтық шараларын сақтауға шақырды.
<blockquote>
 «Алдымызда барша мұсылман қауымының асыға күтетін «Құрбан айт» мерекесі келе жатыр. Кеше ғана облыстың бас санитарлық дәрігерінің қаулысы қабылданып, қаулыға сәйкес құрбан шалу рәсімдері онлайн форматта ұйымдастырылды. Сондықтан, жақындарымыздың амандығы мен саулығы үшін көпшілік шаралардан бас тартып, жамағат болып жиналмай, отбасында атап өтуге шақырамын. Сақтық шараларына аса мән беріп, талаптарға бағыну – тек өзіміздің денсаулығымыз үшін ғана емес, тұтас ел алдындағы азаматтық борышымыз, саналы түрде басты ұстанымымыз болу керек», – деді Гүлшара Әбдіқалықова.
</blockquote>

Гүлшара Әбдіқалықова өңірдегі пандемиямен күрес және экономикалық ахуал туралы брифинг өткізді

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің өкімімен 2020 жылғы 28 шілдесінен бастап Ақжігітова Индира Сансызбайқызы қалалық жұмыспен қамту, әлеуметтік бағдарламалар және азаматтық хал актілерді тіркеу бөлімінің басшысы қызметіне тағайындалды.
Индира Сансызбайқызы, 1973 жылы Қызылорда облысы, Сырдария ауданында дүниеге келген. 
Білімі жоғары, 1994 жылы Қорқыт Ата атындағы Қызылорда мемлекеттік университетін «физика, информатика және есептеуіш техника», 2009 жылы Қарағанды экономикалық университетін «есеп және аудит» мамандықтары бойынша білім алған. 
Еңбек жолын 1995 жылы Қызылорда политехникалық институтында физика және электротехника кафедрасының ассистенті қызметінен бастап, кафедра оқытушысынан бастаған. 
1997-1999 жж. Қызылорда облыстық дарынды балалар мектеп-интернаты директорының ғылыми-әдістемелік жөніндегі орынбасары; 
1999-2005 жж. Қызылорда облыстық білім берудің жаңа технологиялар орталығы директорының міндетін атқарушы, директоры; 
2005 жылы «Қызылорда облыстық білім берудің жаңа технологиялар мен информатизациялау орталығы» МҚК директоры; 
2005-2007 жж. Қызылорда облыстық экономика және бюджеттік жоспарлау департаментінің бас маманы; 
2007-2009 жж. Қызылорда облысы әкімі аппаратының ақпараттық технологиялар бөлімінің меңгерушісі; 
2009-2015 жж. Қызылорда облысы әкімі аппаратының электронды әкімдікті интеграциялау және дамыту бөлімінің меңгерушісі, бөлім басшысы; 
2015-2017 жж. Қызылорда облысы әкімі аппаратының электронды әкімдікті дамыту және мемлекеттік қызметтердің мониторингі бөлімінің басшысы; 
2017-2018 жж. Қызылорда облысы әкімі аппараты басшысының орынбасары-электронды әкімдікті дамыту және мемлекеттік қызметтердің мониторингі бөлімінің басшысы; 
2018-2019 жж. Қызылорда облысы әкімі аппаратының орынбасары, Қызылорда облысының цифрлық технологиялар басқармасының басшысы; 
2019 жылдың сәуір-қараша айлары аралығында «Agile Solutions» ЖШС бас директоры; 
2019 жылғы желтоқсан айынан осы кезге дейін Қызылорда қаласы әкімі аппаратының электронды әкімдікті дамыту және мемлекеттік қызметтердің мониторингі бөлімінің басшысы қызметін абыроймен атқарып келді.

Қазақстан және Қызылорда облысының жаңалықтары