<a href="https://kyzylorda-news.kz/">Kyzylorda-news.kz.</a> Денсаулық сақтау министрлігі коронавирустан емделуде денсаулыққа кері әсер ететін алты әдісті атады.
COVID-19-бен күресудің мұндай тәсілдеріне сода ингаляциясы, сарымсақ суының таңғажайып әсері және антибиотиктердің шамадан тыс қолданылуы мен басқа да денсаулыққа қауіпті халық емі жатады.
Ингаляциялық бу терапиясы
Мұндай жолмен емдеу әдісінің тиімділігі ғылыми дәлелденбеген. Сонымен қатар, сода қосылған “ыстық ванна” шырышты қабықты күйдіріп немесе Квинкенің ісінуіне әкелуі мүмкін. Ал содаға аллергия болса, шырышты қабаттың күюі немесе Квинкенің ісіну қаупі жоғары. Сонымен қатар, ингаляция жасауға бірқатар қарсы көрсетілімдер бар. Мысалы, гипертермия – жоғары дене температурасы, гипертония – жоғары қан қысымы, жүрек-тамыр аурулары немесе бүйрек қызметі бұзылған жағдайда бұл емді қолдану денсаулыққа қауіпті.
Сарымсақ суын ішу немесе аш қарынға сарымсақ жеу
Асқазан-ішек жолдары аурулары бар адамдарға сарымсақ суын ішуге немесе сарымсақ жеуге болмайды. Мұндай суды ішу асқазанды ауыртып, асқазан қыжылы мен бауырдың шаншуына әкелуі мүмкін. Осы табиғи антисептиктің барлық антимикробтық қасиеттеріне қарамастан, оның коронавируспен күресу тиімділігі дәлелденген жоқ.
Арақ немесе спирт буымен дезинфекциялау
Алкогольді шамадан тыс мөлшерде тұтыну иммундық жүйені тежейді. Бұл вирустың тезірек өршу қаупін арттырады. Сондай-ақ, жүрек-қан тамырлары аурулары мен бауыр дертінің асқыну қаупін арттырады және емдеуді қиындатады.
Өкпеде ауа айдау үшін шар үрлеу
Өкпеге жасалатын мұндай жаттығу коронавирус инфекциясының асқынуына әкелуі мүмкін. Бұл әдіс альвеолаларға әсер етіп, интерстициалды қабыну пайда болады. Осы жағдайда өкпе тініне жаппай зақым келіп, оны осал етеді. Өкпеге түсетін кез-келген жүктеме, мысалы, шарды үрлеу сияқты әрекеттер оны жыртып жіберуі мүмкін, салдарынан тыртық ұзақ уақыт жазылмайды.
Сонымен қатар, кеуде қуысына жылдам қозғалыспен шамадан тыс күш түсіру өкпе жарақатына әкеледі. Науқастың қақырығына қан араласып, ол қан түкіруге ұласуы мүмкін. Сол сияқты альвеолаларды зақымдаумен қатар, тыныс алуды қиындатып, эмфиземаның дамуы мен өкпе фиброзының күшеюіне әкелуі мүмкін.&nbsp;
Хиджама COVID-19 вирусын өлтіре ме?
Хиджаманың (қан алдыру әдісі) да тиімділігі ғылыми негізделмеген. Хиджама медициналық процедураға жатпайды, оны созылмалы жүрек патологиясы, қан жасушаларының төмен концентрациясы, кез келген қан тамырының патологиясы, тіпті психикалық ауытқулар кезінде де жасауға болмайды. 65 жастан асқан адамдар мен балалардың көп қан жоғалту қаупі бар.
Антибиотикті неге ішпеу керек?
Бүгінде коронавируспен ауырсаңыз, шұғыл түрде антибиотик ішу керек деген ақыл-кеңес көп айтылып жүр. Алайда дәрігерлер екі себепке байланысты антибиотик қабылдамауға кеңес береді. Біріншіден, аурудың симптомсыз және жеңіл түрінде 80% жағдайда организм вирусты өздігінен жеңе алады.
Ал температураны төмендету үшін парацетамол немесе ибупрофен ішу керек, дейді мамандар.
Екіншіден, антибиотиктерді ұзақ уақыт және жиі қолдану әсерінен бактериялардың дәріге төзімділігі пайда болуы мүмкін. Яғни, кейін антибиотик шын қажет болғанда, ол науқасқа көмектеспейді деген сөз. 
<a href="https://sputniknews.kz/society/20200709/14430586/Khalyk-em-dariger-koronavirus.html">Sputnik</a>

Коронавируспен ауырғанда қандай халық емін қолдануға болмайды?

<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаев елімізде коронавирус індетінен қайтыс болған азаматтарды еске алу үшін 13 шілдені Ұлттық аза тұту күні деп жариялады.
Бұл індет көп шаңырақты қара жамылдырып, отбасын арқа сүйер азаматынан, асыл анасынан, ақылшы қарияларынан айырды. Осы сәтте сол отбасыларға қайғыра көңіл айтамын.
Ел арасында індетті жұқтырған елдің маңдайалды азаматтары да бар. Олар әлі де мемлекет үшін біраз дүние жасап, өз салаларында жетістікке жетер еді. Олардың қатарында өзгенің өмірін сақтап қалу үшін өз басын қатерге тіккен ақ халатты абзал жандар, халыққа қызмет етіп жүрген әкім орынбасарлары, билік пен халық арасындағы алтын көпірге айналған журналистер, өнерімен елді сүйсіндірген өнер иелері де бар. Еліміздің осындай асылдарынан айырылуы халыққа ауыр тигені анық.
Бұл індетті ауыздықтау өз қолымызда. Қазіргі таңда жауапты мамандар мемлекет басшысының тапсырмасына сәйкес, барлық іс-шараларды қолға алды. Оған қоса, халық та «Бір жеңнен қол, бір жағадан бас шығарып», қоғам белсенділеріне ілесіп, ажалмен арпалысып жатқан жандарға көмек беріп жатыр. Еріктілер де күндіз-түні тынбай дәрігерлерге көмек көрсетуде. Бұл біздің ауызбіршілігіміздің бар екендігін, өзгенің қайғысына немқұрайлылық таныта алмайтынымызды білдіреді.
Ендігі кезекте халық мамандардың кеңесін бұлжытпай орындап, сақтық шараларын ұстануы қажет. Тәртіпке бағынғанда ғана біз бұл індетті жеңе аламыз.
Ғазиз ҚЫРДАНОВ
Сырдария ауданындағы №44 орта мектептің мұғалімі

Ғазиз Қырданов: Індетті ауыздықтау – өз қолымызда

Kyzylorda-news.kz. Ауа райының бұзылуына байланысты еліміздің бірқатар өңірінде ескерту жарияланды, деп хабарлайды «Қазгидромет» РМК баспасөз қызметі.
14 шілдеде&nbsp;Қызылорда облысының&nbsp;кей жерлерінде шаңды дауыл сақталады. Облыста және Қызылорда қаласында солтүстік-шығыстан соққан желдің күші 15-20 м/с жетеді. Күндіз 43 градус аптап ыстық болады.
Осы күні Қызылорда қаласында шаңды дауыл соғып, 41 градус ыстық сақталады.
14 шілде күндіз&nbsp;Ақмола облысының&nbsp;кей жерлерінде найзағай жарқылдап, солтүстіктен және солтүстік-шығыстан соққан желдін екпіні 15-20 м/с дейін күшейеді. 14-16 шілдеде облыстың кей жерлерінде 35 градус ыстық және өте жоғары өрт қаупі сақталады.
14 шілдеде&nbsp;Маңғыстау облысының&nbsp;кей жерлерінде шаңды дауыл соғып, жел оңтүстік-шығыстан солтүстік-батысқа ауысады. Жел жылдамдығы – 15-20 м/с.
Күндіз кей жерлерде найзағай ойнап, 38-41 градус қатты ыстық сақталады.
Күндіз 14-16 шілдеде&nbsp;Қостанай облысында&nbsp;және облыс орталығында 35-39 градус ыстық болады.
14 шілдеде&nbsp;Қарағанды облысында&nbsp;солтүстік-шығыстан және шығыстан жел соғады. Кей жерлерде жел қарқыны 15-20 м/с жетеді.
Жезқазған қ аласында солтүстік-шығыстан және шығыстан соққан желдің екпіні күндіз 18 м/с дейін күшейеді.

Қызылордада 43 градус ыстық болады

Kyzylorda-news.kz. Бүгін Қазақстан Республикасының Президенті Қ.К. Тоқаевтың 2020 жылғы 9 шілде күнгі № 116 «Қазақстан Республикасында коронавирус індетінен қайтыс болған азаматтарды еске алу жалпыұлттық аза тұту күнін жариялау туралы» өкіміне сәйкес республика бойынша Нұр-Сұлтан қаласының уақытына сәйкес сағат 12.00-де (жергілікті уақытпен сағат 11.00) 1 минуттық үнсіздікпен еске алу рәсімі өтті.
Қызылорда облысында 1 минуттық үнсіздікпен еске алу рәсімі 4 жерде ұйымдастырылды. Атап айтсақ, облыс әкімдігі ғимаратының алдындағы алаңынан облыс әкімі, әкімнің орынбасарлары, аппаратының басшысы, облыстық ардагерлер кеңесінің төрағасы, Рәміздер алаңынан полиция қызметкерлері, облыстық медициналық орталығының алаңынан дәрігерлер және Қорқыт ата атындағы университетінің бас корпусының алаңынан ректордың орынбасарлары, ардагер ұстаздар, кәсіподақ және жастар ұйымының төрағалары қатысты.
Мемлекеттік органның, Қорқыт-ата атындағы университеттің өкілдері, полиция қызметкерлері мен дәрігерлер қаза болған адамдарды құрметтеу мен еске алу белгісі ретінде киімдеріне қаралы таспа тақты.
Белгілі болғандай, «Мемлекеттік рәміздер туралы» ҚР Конституциялық заңына сәйкес аза тұту күні бүкіл ел бойынша мемлекеттік органдардың, сондай-ақ, дипломатиялық өкілдіктердің ғимараттарында мемлекеттік тулар түсірілуі тиіс, «Жарнама туралы» Заңға сәйкес барлық теле- және радиоарналардың хабар тарату торынан жарнамалық контентті алып тастау қажет және т.б.
<img src="https://kyzylorda-news.kz/wp-content/uploads/2020/07/fb_img_1594626005502.jpg" alt="" />

Облыс әкімі пандемия құрбандарын  еске алу рәсіміне қатысты

<a href="https://kyzylorda-news.kz/">Kyzylorda-news.kz.</a> Қазақстан халқы Ассамблеясы әлемді жайлаған пандемияға байланысты ел халқына Үндеу жариялады, деп хабарлайы <a href="https://lenta.inform.kz/kz/kha-kazakstan-halkyna-undeu-zhariyalady_a3672110">ҚазАқпарат.</a>
<blockquote>
 «Әлемді жайлаған COVID-19 індеті, өкінішке қарай, біздің елімізде де белең алып, ауруға шалдыққандар саны күрт өсіп отыр. Кісі өлімі көбейіп, арыстай азаматтарымыздың ортамыздан кетіп жатқаны жанымызға батады.
 Осынау қиын сәтте Қазақстанның Тұңғыш Президенті – Елбасы, Қазақстан халқы Ассамблеясының Төрағасы Нұрсұлтан Назарбаев біздің күшіміз – бірлікте екенін тағы бір мәрте еске салды. Халқымыз басына түскен ауыртпалықты өзінің күш-жігері, ұйымшылдығы, болашаққа деген ұмтылысы арқылы жеңетініне сенім білдірді.
 Мемлекет басшысы Қасым-Жомарт Кемелұлы Тоқаев 13 шілдені Ұлттық аза тұту күні деп жариялап, орын алған кемшіліктерді жойып, қолға алынуы тиіс шұғыл шараларды атап көрсетті.
 ҚХА өз кезегінде қазақ еліне қолдау білдіре отырып, карантин талаптарын қатаң сақтауға және туған-туыстарға жанашыр болуға шақырады.
 Бүгінгі қаралы сәтте жақындарынан айрылған барша отбасылардың қайғыларына ортақтасып, шын жүректен көңіл айтамыз»,-делінген Үндеуде.
</blockquote>

ҚХА Қазақстан халқына Үндеу жариялады

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев өз үндеуінде 13 шілде – Ұлттық аза тұту күні деп жариялаған болатын. Бүгін түнде Қазақстанның барлық қаласында мемлекеттік тулар түсірілді. Нұр-Сұлтан уақытымен 12:00-де елде бір минуттық үнсіздік жарияланды. Қатерлі дерттен қайтыс болған азаматтардың рухына тағзым жасалды. Елімізде коронавирус жұқтырғандардың саны 59 мыңнан асып, оның ішінде 375 адам қайтыс болғаны анықталды. Қазақта «Өлі разы болмай, тірі байымайды» деген сөз бар. Қайғыдан қан жұтып, қара жамылған әулеттерге қайғысына ортақтасып көңіл айтамын.
Мұның алдында Мемлекет басшысы Қасым-Жомарт Тоқаев Үкіметтің кеңейтілген жиынын өткізгенін, Үкіметтің жұмысын және салалық ведомстволардың жұмысын қатаң сынға алған.
Жағдайдың өте күрделі сипат алғаны белгілі. Президент елдің көкейінде жүрген сөздерді ашық айтты. Дұрыс. Жағдайды ашық айту керек. Шындықты жасырмау қажет. Бұл тұрғыдан алғанда Президент осының алдында жасаған телевизиялық Үндеуінде және бүгінгі жиында ештеңені жасырып, жаба тоқып, мәселеден сырт айналып кеткен жоқ. «Қалыптасқан ахуал екі аптадан кейін жақсарады деп үміттенемін. Олай болмаған жағдайда, жалпы Үкіметтің осы құрамда жұмыс істеу мүмкіндігі туралы мәселе туындайды.
Бірінші, елді қажетті дәрі-дәрмекпен қамтамасыз ету. «Дәріханаларда дәрі-дәрмек толып тұр» деген ақпарат бар. Ол неге елге жетпейді? Әр облыс халқына қажет дәрі-дәрмекті дереу жеткізудің не қиындығы бар? Дәрі-дәрмек тапшылығын қолдан туғызып отырғандар болса, дереу анықтап, жазалау қажет.
Екінші, жекелеген азаматтар өз қаржысына дем алдыратын аппарат алдыртып жатыр. Осы жабдықтарды кедендік рәсімдеу, жедел қажетті аймақтарға жеткізу ісінде үйлесімді әрекет жоқ. Қазір әр минут қымбат. Шабандық жіберген сайын адам шығыны көбейе бермек.
Үшінші, Президент «Біз жұмыстың тәсілдерін үнемі өзгерте береміз. Бұрынғы басшылық аяқ астынан науқастарды симптомды және симптомсыз деп бөлу керек деп шешті. Қазір бұл әдістемеден бас тарттық. Міне осындай әрекеттер халық арасында күмән туғызады», – деді. Жұмыс тәсілдерін өзгерте беруден опа таппаймыз. Барды бар, жоқты жоқ деп айтудың қаншалық қиындығы бар екенін түсінбеймін. Осы ретте қашықтан жұмыс істеуге жіберілген, шағын және орта бизнесі тоқтап қалған, күнкөріс жағдайы қиындаған азаматтарды есепке алып, мемлекет тарапынан тиісті қолдау шараларын жасау қажет деп білемін.
Төртіншіден балалардың білім алу мәселесі. Оқу қандай жағдайда жүреді? Министрлік ұсынып отырған үш нұсқаның ең тиімдісі қайсы? Осы мәселеде де анық ақпарат қажет. Ата-аналар балаларын мектепке дайындау ісінде мемлекет тарапынан нақты жауаптар күтеді. Оқулықпен қамту ісі де назарда болуы тиіс. Бесінші, жаз ілезде өтеді. Күз келеді. Қыс келеді. Қысқа дайындықты қазірден бастау қажет. Жаз мезгілінде піскен жеміс-жидектен тосап қайнату, дәрілік шөптерді жинау, құрамында дәрумен мол азық-түлік қорын жасау да кезек күттірмейтін шаруалар. Ашығын айту керек, халық түрлі қиындықпен бетпе-бет қалды. Әр азамат, әр отбасы, әр әулет амандықтың қамын жасамаса болмайды. Өз денсаулығымызды, жақындарымыздың денсаулығын ойласақ, қамсыз, қарекетсіз отырмауға тиіспіз. Қатерлі індеттен құтылудың барлық шарасын жасау қажет. Онсыз ат төбеліндей халқымыздың басы қатерге тігіледі. Еліміз аман, жұртымыз тыныш болғай!

Нұртөре Жүсіп: Қамсыз, қарекетсіз қалмайық

<a href="https://kyzylorda-news.kz/">Kyzylorda-news.kz.</a> Мемлекет басшысының Өкімімен 13 шілде жалпыұлттық аза тұту күні болып белгіленген болатын. Осыған орай түнгі сағат 00:00-ден бастап еліміздегі барлық Мемлекеттік Ту төмен түсірілді.
Ал бүгін Нұр-Сұлтан қаласының уақытымен сағат 12:00-де республика бойынша коронавирус пандемиясының құрбандарын бір минут үнсіздікпен еске алу жарияланды.
Жалпыұлттық аза тұту күніне орай Қасым-Жомарт Тоқаев Ақорда резиденциясының алдында індеттен қаза болған азаматтарды құрметпен еске алды. Сонымен қатар рәсімге Мемлекеттік хатшы Қырымбек Көшербаев, Президент Әкімшілігінің Басшысы Ерлан Қошанов, Қауіпсіздік Кеңесінің хатшысы Әсет Исекешев, Президент Кеңсесінің бастығы Нұрлан Онжанов, Денсаулық сақтау министрі Алексей Цой қатысты.
Індет құрбандарын үнсіз еске алу рәсімі республиканың барлық аймағында өтті.

Қазақстан Президенті пандемия құрбандарын үнсіз еске алу рәсіміне қатысты

<a href="https://kyzylorda-news.kz/">Kyzylorda-news.kz.</a> Бүгінде әлемдік пандемияның таралу қарқыны бәсеңдемей отыр. Біздің елдегі жағдай да оңай болып тұрған жоқ. Біз қазір аса қажеттілікке сәйкес енгізілген карантин режимінің талаптарын өте мұқият орындауымыз қажет.
Қабылданған сақтық шаралары мен медицина қызметкерлерінің арқасында емделіп шығып жатқан азаматтардың саны көбейіп келеді.
Өкінішке орай, бұл індеттің салдарынан қаншама атпал азаматтарымыздан, тұрғындар жақын-жуықтарынан айырылуда.
Президент Қасым-Жомарт Тоқаев телеарналар арқылы елімізде қалыптасқан ахуалға байланысты жасаған үндеуінде 13 шілдені – індеттен қаза болған дардың рухына арнап Ұлттық аза тұту күні деп жариялады. 
Соған сәйкес, бүгін еліміздің Мемлекеттік Туы төмен түсірілді. Көңіл көтеретін шаралар мен телебағдарламалар тоқтатылды.
Дерттен көз жұмған барлық шейіттеріміздің жақын-жуықтарына, ағайын-туыстарына қайғыра көңіл айтамын!
Халқымыз аман, жан-жағымыз түгел, жақындарымыз әрдайым жанымызда болсын. Жаратушы иеміз елімізді бәле-жәледен сақтасын. Енді тарихымызда мұндай қаралы күн орын алмасын деп тілеймін. Бірлескен іс-әрекетімізбен бұл қиындықты жеңетін боламыз.
Жұмабай ЖАҚЫП,
Халықаралық «Қазақ тілі қоғамы» бірлестігі Арал аудандық филиалының төрағасы

Жұмабай Жақып: Бірлесе бұл қиындықты да жеңеміз

<a href="https://kyzylorda-news.kz/">Kyzylorda-news.kz.</a> Қазір елімізде әлемді алаңдатып отырған індеттің таралуы бәсеңдемей отыр. Тіптен, қайғымен аяқталып жатқан жағдайлар да кездесуде. Мемлекет басшысы сол үшін 13 шілдені – Ұлттық аза тұту күні деп жариялады.
Елдегі жағдайға байланысты&nbsp;Президент Қасым-Жомарт Тоқаев телевизиялық үндеу жариялаған болатын.
Еліміздің тұрғындарын карантин ережелерін қатаң сақтауға шақырды. Індетпен күрестің нәтижелі болуы, ең алдымен, барша жұрттың саналы әрекеті мен жауапкершілігіне байланысты екендігін және коронавирустың таралуына байланысты денсаулық сақтау жүйесіне көп ауыртпалық түсіп жатқандығын айтып өтті. Мемлекет тарапынан індеттен сақтану мақсатында қажетті шаралар атқарылуда.
Өкінішке қарай, пандемия салдарынан көз жұмған жандардың қатарында елдік мұратты ту еткен арыстай азаматтарымыз, зиялы қауым өкілдері, мемлекет және қоғам қайраткерлері, сондай-ақ, өзгенің өмірі үшін соңғы сәтке дейін күресіп өткен дәрігерлеріміз бар. &nbsp;Осыған орай індеттен қаза тапқандардың туыстары мен жақындарына орны толмас қайғыларына ортақтасып, көңіл айтамын.
Біздің қайсар халық не бір зұлмат заманды бастан өткергенде сынбады, керісінше, бірлігі бекемделді, іргесі нығайды, ауырлықты бірге көтерді. «Тар жол тайғақ кешуде» аяғынан табандап тік тұрған ел болса, ол біз едік.
Алла енді мұндай зұлматтан сақтасын! Дүниеден өткен жандарды Жаратқан панасына алсын! Ауруханада жатқан бауырларымыз тезірек сауығып кетуіне тілектеспін!

Мамыр Байдәулетов: Бірлігімізбен биікпіз

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаев елімізде еңбегі сіңген бірқатар медицина қызметкерлерін арнайы наградалармен марапаттау туралы Жарлыққа қол қойды, деп хабарлайды Ақорданың&nbsp;<a href="http://www.akorda.kz/kz/legal_acts/decrees/kazakstan-respublikasynyn-memlekettik-nagradalarymen-nagradtau-turaly-8">ресми сайты.</a>
Қазақстан Республикасының мемлекеттік наградаларымен наградтау туралы
ҚАУЛЫ ЕТЕМІН:
1. Қазақстан Республикасына сіңірген аса үздік еңбегі, қызметтік борышын атқару үстінде көрсеткен жанқиярлығы үшін:
Жоғары дәрежелі ерекшелік белгісі – «Қазақстанның Еңбек Ері! атағы беріліп, айрықша ерекшелік белгісі – Алтын жұлдыз бен «Отан» ордені тапсырылсын:
Исаев Олег Николаевич (марқұм)
–
Ақмола облысының денсаулық сақтау басқармасы жанындағы «Көкшетау қалалық көпбейінді ауруханасы» МКК бөлімше меңгерушісі
Қозбағаров Қалихан Есбосынұлы (марқұм)
–
«Облыстық клиникалық жұқпалы аурулар ауруханасы» МКК бас дәрігері, Ақтөбе облысы.
2. Осы Жарлық қол қойылған күнінен бастап қолданысқа енгізіледі.
Қазақстан Республикасының
Президенті Қ.Тоқаев
Нұр-Сұлтан, Ақорда, 2020 жылғы 13 шілде
№ 370

Мемлекет басшысы бірқатар медицина қызметкерін марапаттау туралы Жарлыққа қол қойды

<a href="https://kyzylorda-news.kz/">Kyzylorda-news.kz.</a> Сыр журналистикасы орны толмас қайғыға душар болды. Бүгін ақын, Қазақстан Жазушылар және Журналистер одағының мүшесі, Қазақстанның Құрметті журналисі, Қызылорда қаласының, Сырдария ауданының Құрметті азаматы Әскербек Рахымбекұлы ағамыз 78 жасында фәнидің қақпасын жапты.
Әскербек Рахымбекұлы Қызылорда облысы Сырдария ауданы Қоғалыкөл ауылында 1942 жылғы 22 наурызда туған. 1965 жылы Қызылорда педагогикалық институтын бітірген.
1965-1969 жылдар аралығында «Сырдария» газетінде қызмет атқарған.1970 жылдан облыстық «Ленин жолы» (қазіргі «Сыр бойы») газетінде, «Сырдария» газетінде Қызылорда облыстық теларадио комитетінде, облыстық партия комитетінде жауапты қызметтер атқарды.
Ә.Рахымбекұлы әр жылдары облыстық «Сыр бойы» (бұрынғы «Ленин жолы») газетінің бас редакторы, осы газетте редактордың орынбасары, кеңесші қызметтерін атқарды.
Оның «Тұсаукесер», «Сырдария әуендері», «Тұлпар туралы дастан», «Ғашық жүрек», «Айдынынан айырылған Аралым – ай», «Алтын Арай», «Тұлпарлар тағдыры», басқа да жыр кітаптары шықты.
Әскербек Рахымбекұлы – «Сырдария» кітапханасы атты 200 томдық кітаптар сериясы редакторының бірі. Екі мәрте «Жалын» баспасы жариялаған жабық бәйгенің жүлдегері.
Қаламы қуатты қаламгер Ә.Рахымбекұлы руханияттың алып бəйтерегі, айналасына жыр-шуақ шашқан, Сырдың сырбаз мінезіндей сыралғы, ойы терең, сөзі сұңғыла ақын көркем əдебиеттің де көрнекті өкілі еді. Аймақ мəдениетінің дамуына да айрықша атсалысты. Əсіресе айтысты дамытуға, əн жанрына қосқан сүбелі үлесі ел жадында сақталатын болады. Бір ғана келіндерге арнап жазған өлеңі өнер əлемінде əлі де шарықтап келеді. Расында, ол әділеттің ақ жолынан айнымай, шығармашылық мұратының шыңына шыққан жан.
Әскербек Рахымбекұлы “Сыр медиа” серіктестігінің ардагерлер кеңесінің төрағасы болып, ізінен ерген рухтас іні-қарындастарының ғана емес, Қызылорда облысындағы ақын-жазушылардың ақылшы ұстазы болды. Амал нешік, ардақты ақын, асыл ағамыз келместің кемесіне мініп кете барды. 
Қаламгердің отбасына, жақындарына және Сыр жұртшылығына, руханият жанашырларына қайғысына ортақтасып, көңіл айтамыз. Оның жарқын бейнесі, құнды мұрасы ұрпақ жадында мәңгі сақталады.
Ағамыздың алды жарық, иманы жолдасы болсын!
Марқұмның жаназа намазы 13 шілде күні сағат 15:00-де “Наурыз” мөлтек ауданы, Үсенбаев (тоғызыншы) көшесі 156 үйде өтеді.
“Сыр медиа ” ЖШС ұжымы

Ақын Әскербек Рахымбекұлы дүниеден өтті

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев телевизиялық Үндеуінде 13 шілде – Ұлттық аза тұту күні болып белгіленгенін айтқан болатын.
Осыған орай Қазақстан мұсылмандары дін басқармасының төрағасы, Бас мүфти Наурызбай қажы Тағанұлының бастамасымен еліміздегі республикалық, облыстық ірі-ірі мешіттерде және медреселерде, қарилар даярлау орталықтарында 100 (жүз) Құран Хатым оқылуда, деп хабарлайды&nbsp;<a href="https://www.muftyat.kz/kk/news/qmdb/2020-07-09/32086-kmdb-13-shilde-elimizdin-barlyk-onirinde-kuran-khatym-dugasy-zhasalady/">ҚМДБ ресми сайтында</a>.
13 шілде күні елорда уақытымен сағат 13:00-де осы күндері қариларымыз оқып жатқан Құран Хатымның дұғасы жасалады. Ал Бас мүфтидің қатысуымен республикалық «Әзірет Сұлтан» мешітінде жасалатын Құран Хатым дұғасына ҚМДБ-ның Instagram желісіндегі ресми парақшасы және YouTube каналы арқылы онлайн қосылуға мүмкіндік бар.
<blockquote>
 «Қазақстан мұсылмандары діни басқармасы еліміздегі барша мұсылман қауымын осы күндері шама келгенше Құран оқып, Алланы зікір етіп, кешірім тілеп және Пайғамбарымызға (оған Алланың салауаты мен сәлемі болсын) көптеп салауат айтып, республика имамдарымен, қариларымен 13 шілде күні бір мезетте ел амандығы үшін дұға жасауға шақырады», делінген діни басқарма таратқан хабарламада.
</blockquote>

Қазақстан және Қызылорда облысының жаңалықтары