<a href="https://kyzylorda-news.kz/">Kyzylorda-news.kz</a>. Қызылорда облысы кәсіпкерлер палатасының директоры Ғалымбек Жақсылықов шағын және орта бизнестің қызметіне жасалған талдау, сондай-ақ кәсіпкерлермен өткізілген кездесулер барысында аймақта шағын индустриялық аймақтарға деген сұраныстың жоғары екендігін көрсетті деп отыр.
Мұндай индустриалды аймақтар «Атамекеннің» бастамасымен Оңтүстік Қазақстан, Алматы, Ақмола, Жамбыл облыстары мен Алматы қаласында құрылып, жұмыс жасауда екен.
<blockquote>
 «Жүргізілген зерттеулер жергілікті тауарөндірушілердің арасында шағын индустриалды аймақ құруға болатын 3 әлеуетті саланы анықтады. Бұл ішкі нарықта сұранысқа ие тоқыма, тамақ өнімдері мен жиһаз өндірісі. Өнімнің осы түрлерін өндіруге қатысатын біздің өңіріміздегі кәсіпкерлер одан әрі дамыту үшін жеткілікті тәжірибе жинақтады. Алғашы уақытта шағын индустриалды аймақты тігін өндірісі бойынша құруға болады. Ақпарат үшін облыста қазір 56 тігін цехтары жұмыс жасауда», – дейді Палата директоры.
</blockquote>
Ғалымбек Жақсылықовтың айтуынша, тігін өндірісін таңдауының да себебі бар. Шағын индустриалды аймақ құру арқылы аталмыш сала негізінде жаңадан жұмыс орындарын көптеп ашуға болады.
<blockquote>
 «Бұл ұсынысымызды қала әкімдігі қолдап отыр. Қала басшылығымен бірге облыс орталығындағы бос ғимараттарды аралап көрдік. Қазір әкімдік өкілдері аталмыш ғимараттарды индустриалды аймаққа айналдыру үшін қажетті қаржы көлемін есептеуде. Жақын күндері облыстық бюджеттік комиссияға ұсыныс беретін болады», – деді Кәсіпкерлер палатасының басшысы.
</blockquote>
Палата директоры аталмыш ұсынысты аймақ басшысы Гүлшара Әбдіқалықоваға кеңейтілген мәжілісте айтқанын, бастама қолдауға ие болып, тиісті сала басшыларына тапсырма берілгенін жеткізді.

Қызылордада шағын индустриалды аймақ құрылмақ

<a href="https://kyzylorda-news.kz/">Kyzylorda-news.kz</a>. Шиелі аудандық прокуратурасының бастамасымен аудан көлеміндегі қылмысқа бейім азаматтардың тізімі жасалды.
Бұл тізімге наркологиялық (ішімдікке және есірткіге тәуелді) есепте тұратындар, бұрын қылмыс жасағандар, шартты түрде жаза өтеу мекемелерінен босап шыққандар және пробациялық бақылаудағы, жалпы барлығы – 349 адам енді.
Қауіптілігіне қарай олар қызыл, сары және жасыл санатқа бөлген.
<ul>
<li>Қызыл санатқа – ішімдікке, есірткіге тәуелді және ұдайы құқық бұзушылықтар жасап, бірнеше рет қылмыстық жауаптылыққа тартылғандар;</li>
<li>Сары санатқа – қоғамдық орындарда ұсақ құқық бұзушылықтарға жиі жол беріп, отбасы шырқын бұзып, бірнеше рет әкімшілік жауаптылыққа тартылғандар;</li>
<li>Жасыл санатқа – пробациялық бақылауға алынғандар, бірақ бақылауда жүріп құқық бұзушылыққа жол бермегендер.</li>
</ul>
Тізімді қалыптастырудың негізгі мақсаты – ауданда қылмыстың алдын алу, қайта қылмысқа жол бермеу үшін мінез-құлқын түзету, тұрмыстық-отбасылық жағдайын зерттеу арқылы әлеуметтік ортаға бейімдеу.
Прокуратура, полиция, пробация қызметкерлерімен бірге айына 2 рет тізімге енген тұлғалардың мекен-жайларын аралау арқылы қайта қылмыс жасаудың, есірткі заттарын пайдалану, сақтау, пробациялық бақылау тәртібін бұзудың, отбасы-тұрмыстық қатынастардағы құқық бұзушылықтардың құқықтық салдары туралы түсіндірме жұмыстары жүргізіледі. Аралау барысында міндетті түрде отбасы мүшелерімен де сұхбаттасып, тұрмыстық жағдайлары зерттеледі, отбасы мүшелерінің ұсыныс-пікірлері ескеріледі. Мәселен, ерікті түрде алкоголь өнімдеріне тәуелділікті емдеуден нәтиже бермеген соң, отбасы мүшелерінің ұсыныс-пікірлері ескеріліп, 15 азамат еріксіз емдеуге жолданды.
Әлеуметтік ортаға бейімдеу мақсатында оларды жұмыспен қамту шаралары да ұйымдастырылуда. Қазіргі таңда 30 сотталған адам жұмыспен қамтылды. Аудандық прокуратураның ықпалымен 3 сотталған «Бизнес Бастау» бағдарламасы арқылы қайтарымсыз несие алып, кәсіпкерлікті жүзеге асыруда. Мұндай жұмыстар бүгінгі күні өз жалғасын табуда.

Шиелі ауданында қылмысқа бейім азаматтарға бақылау күшейтілді

<a href="https://kyzylorda-news.kz/">Kyzylorda-news.kz</a>. Қызылорда облысы Полиция департаментінің Шиелі аудандық полиция бөлімінің қызметкерлері боранды түнде жолда бұзылған көліктің жүргізушілеріне көмек беріп, көліктерінің техникалық ақауларын жөндеуге көмектесті.
Бұдан бөлек, олар боранды күні жоғалған азаматты аман-есен тауып, туыстарына тапсырды.
Шиелі ауданы Ақмая ауылының тұрғыны ағасының жоғалғаны жөнінде учаскелік полиция инспекторына айтып, көмек сұрады. Жоғалған бауырын тауып беруді өтінген&nbsp;азаматша оның жүйке ауруымен ауыратындығын айтқан.
Жоғалған адамның жағдайын ескере келе, полиция бөлімінің жеке құрамы толықтай іздеу жұмыстарына кірісті. Облыста 23 қаңтар күні ауа-райы кенеттен бұзылды. Боранды күні ауданның барлық ауылдары мен далалық жолдары, вокзал маңы, орман алқаптары түгел қамтылды.&nbsp;
Жоғалған азамат Бидайкөл ауылындағы көпір жанынан табылып, туыстарына&nbsp;аман-есен тапсырылды. Өз кезегінде ағасының&nbsp;табылғанына қуанған азаматша тәртіп сақшыларына алғысын білдірді.

Қызылордалық полицейлер жоғалған азаматты тапты

Президент төрағалығымен өткен Үкіметтің кеңейтілген отырысында қандай мәселелер қаралды

<a href="https://kyzylorda-news.kz/">Kyzylorda-news.kz</a>. Қызылорда облысында ірі өндіріс орындары саналатын фабрика мен зауыттар биыл пайдаланылуға беріледі. Құны 48,5 млрд теңгені құрайтын 4 жобаны іске қосу жоспарланған.
Атап айтар болсақ, Қызылорда қаласындағы шыны зауыты, Қармақшы ауданындағы құс өндіру фабрикасы, Арал ауданында тұз өндіру және түйе сүтінен құрғақ ұнтақ шығару зауыттары. Бүгінде Арал ауданындағы екі жобаның құрылыс жұмыстары 70-80 пайызға аяқталған. Қос жобаның жалпы құны 4,4 млрд теңгені құрайды.
Облыста биыл 3 бірдей зауыт салу жұмыстары басталады. Яғни «Шалқия» полиметалл кен байыту фабрикасы, калцийленген сода зауыты мен шағын арматура зауыты салынады. Сондай-ақ, құрылысы өткен жылы бастау алған ет комбинатының салу жобасы жалғасын табады.
Айту керек, Қызылорда өңірінде индустрияландыру бағдарламасының үшінші бесжылдығы аясында бәсекеге қабілетті, экспортқа бағытталған 37 жоба жүзеге асырылады. Нәтижесінде 7 мыңға жуық адам жұмыспен қамтылады.
<img src="https://kyzylorda-news.kz/wp-content/uploads/2021/01/zhoba1.jpg" alt="" />

Қызылордада биыл 4 ірі жоба іске қосылады

<a href="https://kyzylorda-news.kz/">Kyzylorda-news.kz</a>. Қызылорда облысында алғаш рет «Bolashak bridge» толық метраждағы фильмі түсіріліп, көрермен назарына ұсынылды.
Студенттер өмірінен сыр шертетін туындыны «Болашақ» университетінің тапсырысымен «Aslan films» студиясы таспалады. Аталмыш университет 2009 жылдан бері «Болашақ аялдамасы» атты сериал түсіріп келеді. Бұл жолғы кино туындының атауы да, шығармашылық тобы да өзгеше. Яғни, қазақша баламасы «Болашақ көпірі» деп аталады.
<blockquote>
 “Үш достың университет қабырғасында өткізген қиыншылықтары мен қызықты оқиғаларына құралған фильм алғашқы күндерден ақ көрерменнің ыстық ықыласына ие болды. Алдағы уақытта да университетіміздің ғылыми жетекшісі, экономика ғылымдарының докторы, профессор Бақберген Досманбетовтың қолдауымен өз көрермендерімізді тың дүниелермен қуантамыз. Өздеріңіз білетіндей, ҚР Президенті Қасым-Жомарт Тоқаев «Тәуелсіздік бәрінен қымбат» мақаласында «Бүгінде әлемдік киноиндустрияда тарих тақырыбындағы сценарийлерге сұраныс жоғары. Американың да, Еуропаның да айтулы оқиғалары туралы фильмдер өте көп. Қазір Netfliх, HBO және басқа да алпауыт кинокомпаниялар Азияға бет бұруда. Осы орайда біздің де шежіремізде ауқымды фильмдерге арқау болатын маңызды белестер мен оқиғалар баршылық. Мысалы, әлемдегі ең қуатты империялардың бірі болған Алтын орда тарихы дайын тұрған жоқ па?! Бұл мәселеге болашақта кино саласының мамандары баса назар аударғаны жөн», деген болатын. Бұл бағытта да жұмыс жасау жоспарда бар”, – деді «Болашақ» университетінің ректоры Қуаныш Дәуренбеков.
</blockquote>
Киноға университеттің ұстаздары мен студенттері арасында кастинг өткізіп, актерларды таңдаған.
<blockquote>
 “Біз осыған дейін төрт қысқа метражды фильм, клиптер түсірдік. Уақыт өткен сайын тәжірибе жинақтап келеміз. Әрине, барлығы кәсіби актер болмағасын түсірілім барысында аздаған қиыншылықтар болды. Бірақ ұстаздар мен студенттердің талпынысы бізді қуантты. Алға қойған жоспарларымыз өте көп. Жақсы сценарийлік жұмыстар болса біз қабылдауға дайынбыз. Өткен жылы «Аслан» балалар студиясын аштық. Мақсатымыз таланттарды іріктеу, дәріс беріп, актерлық мамандыққа бейімдеу. Бұйыртса, өз киноларымызда ойнайтын болады”, – «Aslan films» студиясының директоры Жасұлан Алдабергенов.
</blockquote>

Қызылорда: «Bolashak bridge» толық метражды фильмі жарыққа шықты

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев Қызылорда өңірінің әкімі Гүлшара Әбдіхалықовадан құрылыс қарқынының баяулау себебін сұрады. Президенттің айтуынша өңірде құрылыс қарқыны 27 пайызға төмендеп кеткен, деп хабарлайды <a href="https://lenta.inform.kz/kz/memleket-basshysy-kyzylorda-onirinin-basshysynan-kurylys-karkynynyn-bayaulau-sebebin-surady_a3745350">ҚазАқпарат</a>.
<blockquote>
 «Гүлшара Наушақызы, халықты баспанамен қамтамасыз ету – өзекті мәселе. Статистикаға қарасақ, былтыр Қызылорда облысында құрылыс қарқыны 27 пайызға төмендеген. Тұрғын үйлерді пайдалануға беру 20 пайызға азайған. Бұл мемлекет бойынша ең төменгі көрсеткіш. Жағдайды түзеу үшін не істеп жатырсыздар? Бұл мәселе бойынша қандай жоспарларыңыз бар?» – деп сұрады Қасым-Жомарт Тоқаев Үкіметтің кеңейтілген отырысында Қызылорда облысының әкімінен.
</blockquote>
Бұл сұраққа жауап берген Гүлшара Әбдіхалықова пандемия мен несиелік үйлерге сұраныстың азаюына байланысты құрылыс саласының көрсеткіші төмен болғанын айтып өтті.
<blockquote>
 «Қазір кезекте тұрған 30 270 адам бар. Оның ішінде «Отбасы банкі» салымшыларының өзі ғана – 8 мың адам. Оның ішінде тек 600 адам ғана бірінші жарнаны төлей алатынын дәлелдеп отыр. Проблемалар бар. Бірақ біз биыл алдымызға жоспар қойдық: 644,7 мың шаршы метр үй беріледі. Оның ішінде бірінші Қызылорда қаласы және аудандар бойынша арнайы үй салу инфрақұрылымдарын дайындап қойдық. Екіншіден, Үкіметпен бірге қазіргі бағдарламаларға байланысты арендалық және несиелік үйлер бойынша жұмыс істейміз», – деді ол.
</blockquote>
Еске сала кетсек Мемлекет басшысы Қасым-Жомарт Тоқаевтың төрағалығымен Үкіметтің кеңейтілген&nbsp;отырысы&nbsp;өтіп жатыр. Онлайн форматтағы жиында елдің әлеуметтік-экономикалық дамуының 2020 жылғы қорытындылары мен алдағы жоспары талқылануда.

Мемлекет басшысы Қызылорда өңірінің басшысынан құрылыс қарқынының баяулау себебін сұрады

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев Үкіметке Қызылорда облысына нақты қолдау көрсетуді тапсырды, деп хабарлайды <a href="https://lenta.inform.kz/kz/kasym-zhomart-tokaev-kyzylorda-oblysy-kurdeli-kezendi-bastan-keship-zhatyr_a3745324">ҚазАқпарат.</a>
<blockquote>
 «Қызылорда облысы күрделі кезеңді бастан кешіп жатыр. Өңірдің негізгі табысы мұнайдан түсетіні белгілі. Бүгін де оның қоры таусылып, өндіру көлемі азайып барады. Соған қарамастан алға жылжуымыз керек», – деді Қасым-Жомарт Тоқаев Үкіметтің кеңейтілген отырысында.
</blockquote>
Президенттің айтуынша, Қызылорда өңірін қолдау үшін жұмыс екі бағытта жүргізілуі керек.
<blockquote>
 «Біріншіден, жаңа мұнай-газ кеніштерін барлап, қазіргі кен орындарына зерттеу жүргізу керек. Екіншіден, өңірдің экономикасын әртараптандырған абзал. Сонымен қатар шағын және орта бизнес пен қызмет көрсету саласын дамыту өте маңызды. Бұл міндеттерді орындауға өңірдің өз шамасы жетпейді. Бюджеті жеткіліксіз. Сондықтан Үкіметке Қызылорда облысына нақты қолдау көрсетуді тапсырамын», – деді Мемлекет басшысы.
</blockquote>

Қасым-Жомарт Тоқаев: Қызылорда облысы күрделі кезеңді бастан кешіп жатыр

<a href="https://kyzylorda-news.kz/">Kyzylorda-news.kz</a>.&nbsp;Пандемия басталғаннан бері 1 жыл ішінде жер шарында 100 миллион адам коронавирус жұқтырып, оның 2 миллионнан астамы бұл кеселден көз жұмды. Сарапшылардың көбі осы жылдың соңына дейін пандемия қазіргі біз қарастырып отырған формада аяқталуы ықтимал деп санайды. Мұны олар тиімді және қауіпсіз вакциналардың жасалуымен байланыстырады. Бұдан бөлек, дәрігерлер дексаметазон мен антикоагулянттар көмегімен коронавирустық инфекциямен нәтижелі күресуді үйренді. Осыған байланысты, әлемде COVID-19-ды жұқтырған науқастар арасындағы өлім-жітім өткен жылдың сәуірімен салыстырғанда 30 пайызға төмендегенін көрсетті.
Пандемия аяқталғаннан кейін көпшілікті алаңдататын сұрақ “коронавирустық инфекцияның неге айналатындығы” жайында болуы мүмкін. Амиериканың Emory университетінің ғылымдары беделді Science ғылыми журналында бұл сұраққа жауап беруге тырысқан.
Әлем халықтарының ұжымдық иммунитетінің қалыптасуына қарай, қазіргі коронавирустық пандемия залалсыз болып, салқын тию немесе мерзімді жұқпалы тұмау сияқты болуы мүмкін. Бұл вакцинациялаудың арқасында, сонымен бірге көптеген адамдар COVID-19-бен ауырып, иммундық қорғанысқа ие болуы нәтижесіне байланысты.
SARS-CoV2 коронавирусы бүгінде үлкен қауіп төндіріп отырғаны, ол табиғатта бұрын болмаған, адамзат баласы онымен ешқашан кездеспеген және біздің иммундық жүйеміз одан қалай дұрыс қорғануға әлі бейімделмеген. Алайда COVID-19-бен ауырғандардың саны көбейіп, оған қарсы вакцина алғандардың саны көп болса, жағдай өзгереді.
Вакцинация да коронавирустың толықтай жойылуына әкелмейтінін ескерген жөн. Ол қазіргі агрессивтілігінен айырылғанымен, адам популяциясына қатысуын жалғастыра бермек. Басқаша айтқанда, дәрігерлер тілімен коронавирус эндемиялық инфекцияға айналады. Ол уақыт өте келе аздап өршіп, көбінесе балалар арасында таралатын болады.
Неліктен балаларда? Өйткені дүниеге келгеннен кейін олардың ағзасы үнемі бұрын-соңды кездеспеген көптеген бактериялар мен вирустарға тап болады. Балалар ұдайы микроағзалармен күресуді үйренеді. Сондықтан да олар коронавирустық инфекцияны жеңіл өткізеді. Бұл әсіресе 5 жасқа дейінгі балаларға қатысты: оларда COVID-19 көбінесе жеңіл суық тию түрінде өтеді немесе ешқандай симптомсыз.
Emory университетінің ғылымдары коронавирустың алты түрінің, оның ішінде 2003 пен 2012 жылдары Оңтүстік-Шығыс Азияда орын алған SARS пен MERS эпидемияларының сипаттамаларын зерттеді. Белгілі болғандай, иммундық жауап сипаттамалары тұрғысынан қазіргі коронавирус оларға ұқсамайды, көбінесе тұмау тудыратын түрлеріне ұқсайды.
Әдетте бұл вирустар бірінші кезекте ауруды оңай алып жүретін 3-5 жастағы балаларға жұғады. Кейінгі жас кезеңдерінде қайталап жұқтыру салдарынан адамдарда иммундық қорғаныс дамиды. Осының арқасында вирус адамдар арасында таралуын жалғастырғанымен, қауіптілігін біртіндеп жоғалтады. Осылайша коронавирус эндемиялық инфекцияға айналуы мүмкін.
Басты міндет – пандемияға қарсы иммунологиялық негізді тез құру, яғни ұжымдық иммунитетті дамыту керек екені түсінікті. Қалыпты жағдайда бұл бірнеше жыл немесе онжылдықтарды қамтиды. Вакциналардың көмегінің арқасында мұның барысын қадағалауға және 1 жылға дейін жеделдетуге, тіпті алты айға дейін қысқартуға болады.
Алайда сәтті сынақтар мен коронавирустық вакциналардың тиімділігі туралы мәлімдемелермен бірге, оларды жасап шығару, тарату және басқа да жеткізу мәселелері пайда болды. Осыған қарамастан, бірқатар елдер өз тұрғындарын вакцинациялауды сәтті өткізді. Мәселен, 9 миллион халқы бар Израильде азаматтардың 25 пайызы қажетті вакциналарды 1 айдың ішінде алған екен. Үш миллион британдықтар да вакцинаның алғашқы дозасымен салдырып үлгерді. Әйтсе де, егер вакцинацияның тиімді процесін жылдамдатып реттейтін болсақ, нәтижесінде COVID-19 қызылша инфекциясына ұқсас болуы мүмкін. Барлығына, соның ішінде балаларға вакцина егу мүмкін болған кезде, біз COVID-19-ды өте сирек кездестіретін боламыз.
Тағы да бір болжамдар бойынша, коронавирус кәдімгі маусымдық тұмауға айналуы әбден мүмкін. Бұл кейбір адамдарға зиянсыз, бірақ басқаларға қауіпті болуы мүмкін тұмауға ұқсайды. Коронавирустың мутациясына байланысты жағдай ауыр болуы мүмкін. Британдық мутант еуропаның 22 елінде табылып отыр. Олар шектеу шараларын күшейте бастады.
Мен мына пандемия тезірек аяқталып, коронавирус эндемиялық немесе маусымдық инфекцияға айналып, тіпті мүлдем жоғалады деп үміттенемін. Бірақ, бұлай болғанша мен Сіздерді өзіңізге және айналаңыздағы адамдарға қамқорлық жасауға, арақашықтық пен гигиенаны сақтауға, адамдар көп жиналатын орындардан аулақ болуға шақырамын.
Алмаз Шарман,
Медицина ғылымының профессоры
<a href="https://massaget.kz/layfstayl/Zdorove/64356/">Massaget.kz</a>

Пандемия қашан аяқталады?

<a href="https://kyzylorda-news.kz/">Kyzylorda-news.kz</a>. Елімізде 100 жаңа ІТ-компания құрылып, 10 мыңнан астам білікті маман дайындалады. Бұл туралы Үкіметтің кеңейтілген отырысында Премьер-Министр Асқар Мамин айтты, деп хабарлайды&nbsp;<a href="https://stan.kz/">Stan.kz</a>.
<blockquote>
 “Экономиканы сапалы цифрландыру бойынша белсенді жұмыс жалғасады. 2021 жылы талшықты-оптика 2 мыңнан астам ауылда пайда болады. Жер учаскесін беру процесі түбегейлі өзгереді. Жер учаскесін онлайн рәсімдеуге болады”, – деді Асқар Мамин.
</blockquote>
Оның айтуынша, мемлекеттік қызметтердің 90 пайызы смартфон арқылы қолжетімді болады. 100 пайыз проактивті әлеуметтік төлемге көшу де жоспарланып отыр. 100 жаңа ІТ-компания құрылып, 10 мыңнан астам білікті маман дайындалады.
<blockquote>
 “Мәліметтерді өңдеу және сақтау саласындағы инвестиция өсімі 72 млрд теңгені құрайтын болады. Инновациялық жобалар 6 млрд теңгеге гранттық қаржыландыру алады”, – деді премьер-министр.
</blockquote>

Жер учаскесін онлайн рәсімдеуге болады

<a href="https://kyzylorda-news.kz/">Kyzylorda-news.kz</a>. Биыл бюджет саласындағы бір миллионнан астам қызметкердің жалақысы өседі. Бұл туралы премьер министр Асқар Мамин мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Айтуынша, биыл 1,3 миллион адамға жұмыспен қамтудың әртүрлі шаралары ұсынылады. Бұл жұмыссыздық деңгейін 4,9 процентке дейін төмендетуге мүмкіндік береді.&nbsp;
<blockquote>
 “Жұмыспен қамту жол картасын іске асыру жалғасады. Бұл ретте тұрақты жұмыс орындарын құруға баса мән беріледі”, – деді премьер Тоқаевтың төрағалығымен өтіп жатқан үкіметтің кеңейтілген отырысында.&nbsp;
</blockquote>
Еңбек нарығын жаңа жағдайда бейімдеу үшін жұмыспен қамтудың жаңа түрлері енгізіледі.&nbsp;
Экономикада құрылатын жұмыс орындарының есебін толық жүргізу үшін жұмыспен қамтудың өңірлік жол карталары жасалады.&nbsp;
Бұдан бөлек, еңбек нарығын дамытудың 2022-2027 жылдарға арналған ұлттық жоспары әзірленеді.&nbsp;
“Осы жылы бюджет саласындағы бір миллионнан астам жұмыскердің жалақысы өседі”, деді Мамин.

Биыл кімдердің жалақысы өседі?

<a href="https://kyzylorda-news.kz/">Kyzylorda-news.kz</a>. Қызылорда қаласы әкімі орынбасарларының азаматтарды жеке мәселелері бойынша онлайн қабылдайды.
Қала әкімінің орынбасары Елмұрат Рахматуллаев әр аптаның сейсенбісіндеі сағат 15-00-ден 17-00-ге дейін қашықтықтан қабылдау өткізеді.
Сонымен қатар Асқарбек Есжанов әр сәрсенбі сайын сағат 15-00 мен 17-00 аралығында онлайн қабылдау жүргізеді.
Ал Бектас Нұридинов аптаның бейсенбі күні сағат 15-00 мен 17-00 аралығында тұрғындарды онлайн қабылдайды.
Айта кетейік, қала әкімі орынбасарларының қабылдауына жазылу үшін 8 (7242) 27-00-81 телефон нөміріне қоңырау шалыңыз.
<img src="https://kyzylorda-news.kz/wp-content/uploads/2021/01/bezymjannyj-1.png" alt="" />

Қазақстан және Қызылорда облысының жаңалықтары