<a href="https://kyzylorda-news.kz/">Kyzylorda-news.kz</a>. Бүгін елордадағы Орталық коммуникациялар қызметінде өтіп жатқан брифингте Қызылорда облысының әкімі Гүлшара Әбдіқалықова өңірде білім саласына қатысты атқарылып жатқан жұмыстарды баяндады.
<blockquote>
 «Білім беру саласында биыл 300 мектептің 225-і жаңа оқу жылын қашықтықтан оқытудан бастаса, ал, қазір 121 мектеп дәстүрлі режимде жұмыс істеуде, 40 мыңға жуық бала оқитын 2 мыңнан астам кезекші топ ашылды. Қашықтан оқытуға қажет мектеп теңгеріміндегі 14 мыңнан астам компьютер оқушыларға берілді. Бюджет қаражаты мен демеушілер есебінен 27 мыңға жуық компьютерлік техника сатып алынды, олар тұрмысы төмен отбасының балаларына табысталды. Апатты мектептерді жою бағытындағы жұмыстар жалғасуда. Жыл басында аймақта осындай 3 мектеп болды. Біз 140 орындық бір мектепті аяқтадық, тағы бір мектептің құрылысы жалғасуда. Келесі жылы үшінші мектептің құрылысын бастаймыз. Жекеменшік мектептердің құрылысы бойынша инвесторлармен жұмыс істеудеміз. Биыл 300 және 500 орындық тағы 2 мектеп салынуда. Жыл сайын осы салаға қаржы салуды арттырып келеміз. Биыл жоғары оқу орындарында аз қамтылған және көп балалы отбасылардан шыққандар мен ауыл балалары үшін берілетін грант саны 150-ге дейін өсті», – деп атап өтті Г.Әбдіқалықова.
</blockquote>

Облыс әкімі: «Білім беру саласына бөлінетін қаржы жыл сайын көбейе беретін болады»

<a href="https://kyzylorda-news.kz/">Kyzylorda-news.kz.</a> Бүгін Нұр-Сұлтан қаласындағы Орталық коммуникациялар қызметінде өтіп жатқан брифингте Қызылорда облысының әкімі Гүлшара Әбдіқалықова өңірдің спорт саласындағы жетістіктеріне де тоқталып өтті.
«Жыл соңына дейін бюджет есебінен тағы 12 жаңа спорт нысанын, соның ішінде байдарка мен каноэде есу базасын саламыз. Мемлекеттік-жекешелік әріптестік аясында дене шынықтыру-сауықтыру кешендерінің құрылысы бойынша 5 жоба іске асырылуда, онда 720 адамды қамтитын 60 секция ашылады. Спорттағы жоғарғы жетістіктер арқылы біздің спортшылар Токио олимпиадасына 2 лицензия алды», – деді облыс әкімі.

Сыр елінде жаңа 12 спорт нысаны салынады

<a href="https://kyzylorda-news.kz/">Kyzylorda-news.kz</a>. Қызылорда облысында ауыз су және көгілдір отынмен қамту, жол жөндеу жұмыстары қарқынды жүргізіліп жатыр. Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова мәлімдеді.
<blockquote>
 «Бүгінде облыс халқының 97%-ы орталықтандырылған сумен қамтамасыз етілген және халықтың 63%-ы табиғи газды тұтыну мүмкіндігіне ие. Маусым айында Арал ауданының Жақсықылыш кентіне газ орнаттық. Келесі жылы газдандырылмаған жалпы саны 50 мың халық тұратын 5 елді-мекенге, оның ішінде 3 аудан орталығына көгілдір отын беруді жоспарлап отырмыз. Нәтижесінде, жыл соңына дейін облыс халқының 70%-ы табиғи газға қол жеткізе алады. Сондай-ақ, су құбыры және кәріз желілерін қайта жаңартуға жалпы құны 4,2 млрд.теңге болатын 28 жобаны іске асыру жұмысы жүргізілуде, бұл 101 мыңдай тұрғынды таза ауыз сумен қамтамасыз ететін болады», – деп атап өтті Г.Әбдіқалықова.
</blockquote>
Облыс әкімінің айтуынша, биыл Қызылорда қаласында 15 шақырым жылу трассасын жаңарту жұмыстары жүргізілді, бұл жылу желілерінің тозуын 42%-дан 39%-ға дейін төмендетті.
Сондай-ақ, облыста 498 шақырымнан астам көлікжол, көшелер мен көпір өткелдері жөнделген.
<blockquote>
 «Әлеуметтік салада 30 әлеуметтік нысанның құрылысы жүргізілді (16,6 млрд.теңге), оның 7-і аяқталды, тағы 16-сын жыл соңына дейін бітіреміз. Денсаулық сақтау саласында аудандық орталық ауруханалар салу мәселесін түбегейлі шештік. 2024 жылға дейін 62 алғашқы медициналық-санитарлық көмек нысанын жаңартуды жоспарлап отырмыз, осылайша, бұл мәселені толығымен шешеміз», – деді облыс әкімі.
</blockquote>

Қызылорданың инфрақұрылымын дамыту жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz.</a> Бүгін Нұр-Сұлтан қаласындағы Орталық коммуникациялар қызметінде өтіп жатқан брифингте Қызылорда облысының әкімі Гүлшара Әбдіқалықова Байқоңыр қаласындағы қазақстандық тұрғындар үшін көп пәтерлік тұрғын үйлер салынатынын мәлімдеді.
Гүлшара Наушақызы атап өткендей, биыл облыста 1946 пәтерлік 98 көппәтерлі тұрғын үй салынуда, оның 969 пәтерлік 74-і жыл соңына дейін пайдалануға беріледі.
Ал, келесі жылы Байқоңыр қаласында Қазақстан азаматтары үшін тұрғын үй салу жалғасады. Өткен жылы Байқоңырда «Нұрлы жер» бағдарламасы бойынша 30 жылда алғаш рет 250 пәтерлік бес тұрғын үй салынды.
<blockquote>
 «Кезекте тұрған 1300-ден астам қазақстандықты ескере отырып, Байқоңыр қаласында тағы да елу пәтерлік 5 үйдің құрылысын 2021 жылы бастау туралы шешім қабылданды. Үкіметтің қолдауы нәтижесінде инженерлік коммуналдық инфрақұрылымды дамыту мәселелерін де шешеміз», – деді өңір басшысы.
</blockquote>

Г. Әбдіқалықова: «Байқоңыр қаласындағы қазақстандық тұрғындар үшін көп пәтерлі тұрғын үйлер салынады»

<a href="https://kyzylorda-news.kz/">Kyzylorda-news.kz.</a> Қызылорда облысында жыл басынан бері 19 мыңға жуық жаңа жұмыс орны құрылған. Ал, оның 14 мыңы – тұрақты. Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова мәлімдеді.
<blockquote>
 «Тұрақты табыс пен халықтың өмір сүру сапасы – бұл біздің ең маңызды басымдықтар. Осы жылға арналған «Жұмыспен қамтудың Жол картасы» аясында жалпы сомасы 38,9 млрд.теңгеге 277 инфрақұрылымдық жобаны жүзеге асыру көзделген, бұл 9,5 мыңға жуық адамды жұмыспен қамтиды», – деді Г.Әбдіқалықова.
</blockquote>

Қызылорда облысында биыл тұрақты 14 мың жұмыс орны ашылған

<a href="https://kyzylorda-news.kz/">Kyzylorda-news.kz.</a> Қызылорда облысы мал шаруашылығы бойынша алда келеді. Мәселен, Сыр өңірінде мал шаруашылығы бойынша 33 жоба жүзеге асырылуда. Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова айтты.
Облыс әкімінің атап өтуінше, мал шаруашылығында өткен жылы өңірде ірі қара мал саны – 4,4%, қой мен ешкі – 5,5%, жылқы – 8,5%, түйе – 5,3%-ға өскен.
<blockquote>
 «Негізгі міндет – жайылымдық шаруашылықта пайдалануға болатын жайылымдардың тиімділігін арттыру. Ол үшін пайдаланылмаған жайылымдардағы 452 су көзін жөндеуді жоспарладық. Бұл үшін шамамен 7 миллион гектар жерді пайдаланамыз. Мұнан бөлек, мал шаруашылығы өнімдерін өндіру мен қайта өңдеу бойынша жалпы сомасы 10 миллиард теңгеден астам 33 жоба жүзеге асырылуда», – деді брифингте Г.Әбдіқалықова.
</blockquote>

Сыр өңірінде мал шаруашылығы саласында 33 жоба жүзеге асырылуда

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова елордада Орталық коммуникациялар қызметінде өтіп жатқан брифингте аймақта балық шаруашылығын дамытудың өңірлік бағдарламасы қабылданғанын айтты.
<blockquote>
 «Балық аулау өнеркәсібінде биыл біз 2030 жылға дейінгі балық шаруашылығын дамытудың өңірлік бағдарламасын жасадық, оны іске асыруға 28 миллиард теңгеден астам қаржы бөлінеді. Бұл тауарлық балық көлемін 34 есеге ұлғайтуға мүмкіндік береді, ал балық өнімдерінің экспорты қазіргі 4,2 мың тоннадан 8,5-ке дейін артады. 55 тауарлы балық аулау фермасы, 10 тоған, 4 торлы ферма салынады», – деді облыс әкімі.
</blockquote>

Г. Әбдіқалықова: «Қызылорда облысында 55 тауарлы балық аулау фермасы салынады»

<a href="https://kyzylorda-news.kz/">Kyzylorda-news.kz.</a> Биыл Сыр елінің дихандары суармалы суға байланысты көп қиындық көргені белгілі. Енді, осы өзекті мәселені шешу мақсатында өңірде 6 су қоймасы салынбақ.
Бұл туралы Қызылорда облысының әкімі Гүлшара Әбдіқалықова елордадағы ҚР Президенті жанындағы Орталық коммуникациялар қызметінде өтіп жатқан брифингте кеңінен әңгімелеп берді.
<blockquote>
 «Биыл күріш өсірушілеріміз гектарына 61,8 центнер өнімнен 550 мың тоннадан астам күріш жинап, тағы да жоғары нәтижеге қол жеткізді. Суармалы суға байланысты суды аз талап ететін дақылдардың егістіктерін кеңейту туралы шешім қабылдадық. Суармалы суға байланысты өзекті мәселелерді азайту үшін көлемі 2,3 миллиард текше метрді құрайтын 6 су қоймасын салуды жоспарлап отырмыз. Сонымен бірге, Қызылорда су торабын, Әйтек су торабын қайта жаңғырту, Жиделі су қоймасын жөндеу, Жалағаш ауданындағы ирригациялық дренаж жүйесін жетілдіру (15 мың га) бойынша ірі инфрақұрылымдық жобаларды іске асыру жұмыстары басталды. Сондай-ақ, Мемлекет басшысының тапсырмаларын орындау мақсатында 143 мың гектар аумақтағы алқаптың ирригациялық және дренаждық жүйесін, 29 мың гектар суармалы жерлерді қалпына келтіру және айналымға енгізу жобалары іске асырылатын болады. Біз қазіргі заманауи суару жүйелеріне ерекше мән береміз. Мысалы, пилоттық режимде Жаңақорған ауданында күздік бидай себілген 80 гектар жерге аквагель қолданылды. Бұл гектарынан орта есеппен 18 центнерден өнім жинауға мүмкіндік берді», – деп атап өтті облыс әкімі Гүлшара Наушақызы.
</blockquote>

Қызылорда облысында 6 су қоймасы салынады

<a href="https://kyzylorda-news.kz/">Kyzylorda-news.kz.</a> Қызылорда облысында биыл әлемнің 17 еліне ауыл шаруашылығы өнімдерінің 11 түрі экспортталған. Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова айтты.
<blockquote>
 «Қызылорда облысында өндірістің өсуі ауыл шаруашылығы саласында да байқалады. Соңғы 5 жылда жалпы өңірлік өнімдегі агросектордың үлесі 4%-ға дейін өсті.Бұл инвестициялардың өсім қарқыны мен жаңа технологиялардың енгізілуіне байланысты. Мысалы, 2019 жылы агроөнеркәсіптік кешеннің негізгі капиталына 6,7 млрд.теңге инвестицияланса, тек 9 айда көрсеткіш 8 млрд теңгеден асты. Бұл ретте, ауыл шаруашылығы өнімдерінің экспорты шамамен 12%-ға өсті, оның ішінде 98%-қайта өңделген өнім. Алғаш рет Ресейге мұздатылған көкөніспен жаңа піскен қызанақ жеткізуді бастадық, Германияға алғашқы 420 тонна қамыс жіберілді. Жалпы, биыл әлемнің 17 еліне ауыл шаруашылығы өнімдерінің 11 түрі экспортталды», – деді Г.Әбдіқалықова.
</blockquote>

Сыр елінің ауыл шаруашылық өнімдері әлемнің 17 еліне экспортталуда

<a href="https://kyzylorda-news.kz/">Kyzylorda-news.kz.</a> Қызылорда облысында жұмыс істеп тұрған кен орындары сарқылып келеді. Осыған орай аймақта жаңа кен орындарын зерттеу жүргізіліп жатыр. Бұл туралы Орталық коммуникациялар қызметіндегі брифингте облыс әкімі Гүлшара Әбдіқалықова мәлімдеді.
<blockquote>
 «Жұмыс істеп тұрған кен орындарының сарқылуына байланысты мұнай өндіру көлемінің азаю үрдісі сақталып отыр (82,9%), бұл өнеркәсіптегі өнім өндірісінің көрсеткішіне (88,2%) әсер етуде. 9 айда 750 мың тоннадан астам өнім өндіруден айрылдық, жер қойнауын пайдаланушылар болжамына сәйкес, жыл қорытындысы бойынша 1 млн.тоннадан астам мұнайды өндіре алмаймыз, осы себепті, Шу-Сарысу шөгінді бассейнінің жер қойнауын зерттеу бойынша жұмыстар басталды», – деп атап өтті облыс әкімі.
</blockquote>

Қызылорда облысында жаңа кен орындарын зерттеу жүргізіліп жатыр

<a href="https://kyzylorda-news.kz/">Kyzylorda-news.kz.</a> Қызылорда облысында 2020 жылдың 9 айында өнім өндіру 3,5%-ға артып, пайдалануға берілген тұрғын үй саны да көбейген. Бұл туралы Қызылорда облысының әкімі Гүлшара Әбдіқалықова елордадағы ҚР Президенті жанындағы Орталық коммуникациялар қызметінде өтіп жатқан брифингте мәлімдеді.
<blockquote>
 «Өңдеу өнеркәсібінде өнім өндіру осы жылдың 9 айының қорытындысымен 3,5%-ға, ауыл шаруашылығында 3,1%-ға артты. Жұмыс істеп тұрған шағын және орта бизнес субъектілерінің саны 5,4%-ға (45-тен 47,4 мыңға дейін) өсті», – деп атап өтті облыс әкімі.
</blockquote>
Сондай-ақ, облыс әкімі биыл Сыр өңірінде 485 мың шаршы метрден астам тұрғын үй пайдалануға берілгенін атап өтті. Бұл – өткен жылдың сәйкес кезеңімен салыстырғанда 0,4%-ға артық.
Сонымен қатар, өңірде өткен жылға қарағанда инвестиция көлемі 69,5%-ды құраған.
<blockquote>
 «Төмендеудің объективті себептері бар. Өткен жылы бірнеше ірі инвестициялық жобаларды іске асыру аяқталды, олардың үлесіне жылдық инвестициялар көлемінің шамамен 30%-ы тиесілі болды. Биыл енгізілген шектеулерге байланысты жалпы экономикаға инвестициялар көлемі қысқарды, бұл құрылыс жұмыстарының көлеміне де әсер етті (50,8%)», – деді бұл тұрғыда Г.Әбдіқалықова.
</blockquote>

Қызылорда облысында өнім өндіру 3,5%-ға артқан

<a href="https://kyzylorda-news.kz/?doing_wp_cron=1606103668.7674028873443603515625">Kyzylorda-news.kz.</a> Нұр-Сұлтан қаласында ҚР Президенті жанындағы Орталық коммуникациялар қызметінде Қызылорда облысының әкімі Гүлшара Әбдіқалықованың журналистерге арналған брифингі басталды.
Бұл – Гүлшара Наушақызының облыс әкімі ретіндегі БАҚ өкілдеріне арналған алғашқы брифингі.
<blockquote>
 «Пандемия қалыпты тіршілікке өзгеріс енгізді. Дегенмен, Президент қабылдаған шешімдердің арқасында негізгі басымдыққа ие салалардағы көрсеткіштердің төмендеуіне жол берген жоқпыз», – деді брифингте Гүлшара Наушақызы.
</blockquote>
Айта кетейік, облыс әкімі аталған брифингте Мемлекет басшысының Қазақстан халқына Жолдауынан туындайтын негізгі міндеттерді орындау мақсатында жасалған жұмыстар, ағымдағы жылдың 9 айының қорытындысы мен Қызылорда облысының әлеуметтік-экономикалық даму көрсеткіштеріне тоқталатын болады.

Қазақстан және Қызылорда облысының жаңалықтары