<a href="https://kyzylorda-news.kz/">Kyzylorda-news.kz</a>. 25 маусымынан бүгінге дейін Арал ауданының Жақсықылыш кентінде 13, Аққұм ауылында 1, Қарақұм ауылдық округінде 10 бас түйенің белгісіз ауруы тіркелген болатын. Ветеринар дәрігерлердің клиникалық тексерулерінен кейін түйе малының «некробактериоз» ауруы екені анықталды. Бұл туралы бүгін Өңірлік коммуникациялар қызметінде өткен баспасөз конференциясында облыстық ветеринария басқармасы басшысының орынбасары Әнуарбек Дәрмағамбетов мәлімдеді.
Некробактериоз жануарлар арасында болатын аса қауіпті аурулардың тізбесіне жатпайды. Дегенмен де жұқпалы болып табылады. Бактериялар жарақат болған жануарларда тарайды. Көбінесе ауырған түйелердің табанын зақымдалып, мазольді қабатын бұзып түсіреді.
Аталған кеселмен жануарлардың барлық түрлері ауырады. Бұл ауру әсіресе қажетті жем-шөп қорегінің болмауынан, қыстан арық, көтерем болып шыққан малдарда көптеп кездеседі. Сондай-ақ, лайлы-шалшық жерлерде, көктемде қора-жайларға механикалық антисанитарлық жұмыстардың жүргізілмеуінен пайда болады.
Әнуарбек Шәкіратұлының айтуынша, қазіргі таңда ветеринар дәрігерлер ауырған түйелерді емдеу үшін түрлі антибиотиктерді қолдануда. Оның ішінде «Бициллин-3», «АСД фракция-3» ерітіндісі, «Ашокси», «Нитокс-200» ветеринариялық препараттарын малдарға егу жүргізілуде. Препараттар мал иесінің өз қаражаты есебінен егілуде.
Қазірде ауырған түйе малдарының жағдайы қалыпты. 24 бас түйенің 14 сауықты.
Бұдан бөлек қосымша лабораториялық қорытынды алу үшін түйелерден қосымша патологиялық сынама алынуда. Айта кету керек, түйелер арасында мұндай ауру соңғы рет өңірде 1990-жылдары тіркелген екен.

«Жем-шөп қорегінің болмауынан»: Аралда жұқпалы ауру тарап жатыр

<a href="https://kyzylorda-news.kz/">Kyzylorda-news.kz</a>. Бүгін облыс әкімі, облыстық Қазақстан халқы Ассамблеясының төрағасы Гүлшара Әбдіқалықованың төрағалығымен «Бірлік пен бейбітшіліктің 30 жылы» тақырыбында Қызылорда облысының Қазақстан халқы Ассамблеясының ХХIІІ сессиясы өтті.
Күн тәртібінде екі мәселе қаралды. Атап айтсақ, Қазақстан халқы Ассамблеясының ХХІХ сессиясының қорытындысы бойынша Қызылорда облыстық Қазақстан халқы Ассамблеясының міндеттерін талқылау, облыстық Қазақстан халқы Ассамблеясы төрағасының жаңа орынбасарын қоғамдық негізде тағайындау.
Сессияға Қызылорда облысының Қазақстан халқы Ассамблеясының мүшелері, облыстық мәслихат депутаттары, Қызылорда қаласы әкімі және онлайн байланыс арқылы аудан әкімдері, этномәдени бірлестік жетекшілері, үкіметтік емес ұйымдар, облыстық Ассамблеяның құрылымдарының жетекшілері қатысты. 
Аймақ басшысы Қазақстан халқы Ассамблеясының ел дамуында аса маңызды рөл атқаратынын назарға салып, алдағы уақытқа бірқатар міндеттерді жүктеді.
<blockquote>
 «Биыл бірлігі бекем, татулығы жарасқан Қазақстан халқы Тәуелсіздіктің 30 жылдығын атап өтуде. Тәуелсіздік – бұл ең алдымен біздің ортақ тарихымызға тағзым, кемел келешегімізге нық сенім. Елбасы Нұрсұлтан Әбішұлы Назарбаевтың сарабдал саясатының арқасында саяси жүйесі тұрақты, экономикалық әлеуеті мықты, халықаралық беделге ие қуатты мемлекетті қалыптастырдық. 
 2020 жылы әлемді құрсауына алған пандемия жағдайында халқымыз індетті еңсеру жолында бір жағадан бас, бір жеңнен қол шығара алды. Облыстық ассамблея мүшелері осы істің бел ортасында болып, үлкен қолдау көрсетті. Осы орайда, Мемлекет басшысы Қасым-Жомарт Кемелұлы Тоқаевтың «Тәуелсіздік үшін нағыз күрес күнделікті еңбекпен, үздіксіз әрі дәйекті елдік саясатпен мәңгі жалғасады» – деген сөзінің мазмұны терең. 
 Іргелі мемлекет атануымызда, бірлік, келісім және өзара қолдау қағидаттарына негізделген Қазақстан халқы Ассамблеясының рөлі ерекше. Бүгінде Алаштың анасына баланған Сыр өңірінде 35 этнос өкілі тату-тәтті өмір сүруде. Осы ретте, қазақстандық патриотизм, азаматтық теңқұқықтық қағидаттарын, мемлекеттік тілдің біріктіруші рөлін, алуан түрліліктегі бірлікті ілгерілету, ұлтты тұрақты жаңғырту жөнінде шаралар қабылдану қажет. Этномәдени бірлестіктердің мүшелерін Саяси қуғын-сүргін құрбандарын толық ақтау жөніндегі өңірлік комиссияның жұмысына тартып, этноәлеуметтік процесстерге мониторинг жүргізіп, қоғамдық келісімді бұзу ықтималдығы жоғары көріністерге талдау жасау арқылы оларды шешу бойынша ұсыныстар әзірленуі керек. Қайырымдылықпен айналысып жүрген кәсіпкерлер мен меценаттарды ынталандырудың және қайырымдылықты дамытудың жаңа форматты шараларын ұйымдастыру маңызды», – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2021/07/215256806_3512111085558602_4032131494006543247_n.jpg" alt="" />
Мұнымен қоса, облыс әкімі «Жаңғыру жолы» жастар қозғалысының жұмысын жандандыру мақсатында аймақтық жастар ұйымдарымен бірлескен іс-шаралар кешенін жүзеге асырып, облыстық ассамблеяның Аналар және Қоғамдық келісім кеңестерін этносаралық байланыс алаңы ретінде пайдалануды тапсырды. Және этносаралық қарым-қатынас, қайырымдылық, волонтерлік және мемлекеттік тілді үйрену орталықтары ретінде достық үйлерінің жұмысын күшейту қажет екенін атап өтті.
Отырыста модератор ретінде сөз бастаған Қызылорда облысы әкімінің орынбасары, облыстық Қазақстан халқы Ассамблеясының төрағасының орынбасары Серік Ахмет Қазақстан халқы Ассамблеясының мүшесі, облыстық мәслихат хатшысы Наурызбай Байқадамов, облыстық Қазақстан халқы Ассамблеясы төрағасының орынбасары, неміс этномәдени бірлестігінің жетекшісі Ирина Шек, Қазақстан халқы ассамблеясы жанындағы Волонтерлер орталығының жетекшісі Ильдар Гафуров, облыстық перинаталдық орталықтың бас дәрігері Олег Ким және облыстық Қазақстан халқы ассамблеясының мүшесі, облыстық мәслихат депутаты Дильфура Байрахтароваға сөз берді. Спикерлер бейбітшілік пен келісім, ұлттық құндылықтар, әлеуметтік, қоғамдық даму мәселелері бойынша пікірлерін ортаға салды.
Сессияда облыстық Ассамблея Кеңесін осы лауазымға ауыстыру қағидатына сәйкес ұсынымдар бойынша аймақ басшысы Гүлшара Әбдіқалықова облыстық Қазақстан халқы Ассамблеясының Төрағасы ретінде Ирина Шекті қоғамдық негізде төрағаның орынбасары қызметіне тағайындап, алдағы жұмысына сәттілік тіледі. Сондай-ақ, осы қызметте болған Ильдар Гафуровке жақсы жұмысы үшін алғысы білдірді.
Облыстық ассамблеяның XХІІІ сессиясын қорытындылаған аймақ басшысы, облыстық Қазақстан халқы Ассамблеясының төрағасы Гүлшара Әбдіқалықова алдымызда кемел келешекке, жарқын болашаққа жету жолында ұлт үшін атқарылуы тиіс ұлы істер бар екенін атап өтті. Сонымен қатар, ел тұрақтылығын сақтауда, індеттің күшейуіне байланысты вакцинация жұмыстарын насихаттауға атсалысуда, қуаңшылық кезеңінде елді бірлікке шақыруда облыстық Ассамблеяның орны ерекше екенін назарға салды.
<img src="https://kyzylorda-news.kz/wp-content/uploads/2021/07/211348986_3512138875555823_4303379846913521388_n.jpg" alt="" />

«Бірлік пен бейбітшіліктің 30 жылы»: Облыстық Қазақстан халқы Ассамблеясының ХХIІІ сессиясы өтті

<a href="https://kyzylorda-news.kz/">Kyzylorda-news.kz</a>. Қазіргі уақытта кеселді жеңудің жалғыз ғана жолы бар. Ол вакцина салдыру. Екпе ектіруге күмәнмен қараудың, бұл процедурадан қорқудың қажеті жоқ. Қазір өңірімізде вакцинаның бірнеше түрі бар. Әр азаматқа таңдау құқығы берілген.
Облыс орталығындағы емханалар мен сауда орталықтарында екпе егу пунктері жұмыс жасап жатыр. Кез-келген уақытта барып, екпе ектіруге болады. Бұл туралы Өңірлік коммуникациялар қызметінің ақпарат алаңында өткен брифингте облыстық психикалық денсаулық орталығының дәрігері Гүлнар Алтынбасова мәлімдеді.
<blockquote>
 «Сіздерді мамандардың кеңесіне құлақ түруге шақырамын. Бүгінгі күні басты мақсат – ұжымдық иммунитет қалыптастыру. Сол кезде ғана біз бұрынғы тіршілігімізге орала аламыз. Өз басым алғашқылардың бірі болып вакцина салдырдым. Препараттың екі компонентінде толық қабылдадым. Бұл шешімім үшін өкінбеймін. Жалпы, қауіпті инфекцияға жасы үлкен адамдар тез шалдығатындығы айтылып жатыр. Мен екпе ектіру арқылы өзімді және де отбасымды дерттен қорғадым деп ойлаймын. Сол себепті барлықтарыңызды вакцина салдыруға шақырамын. Өткен жылдан бері бетперде тағып жүру күнделікті өмірімізге етене еніп кетті. Соның өзінде осы сақтық талабына салғырт қарайтын жерлестеріміз бар. Бұған қоса, әлеуметтік арақашықтықты сақтаудың маңызы зор. Көпшілік жиналатын қоғамдық орындарға бармауға тырысу қажет. Той-томалақтардан да бас тартқан абзал»,- деді Гүлнар Жағыппарқызы.
</blockquote>
<img src="https://kyzylorda-news.kz/wp-content/uploads/2021/07/202231820_1325715564490619_91486702007683172_n.jpg" alt="" />

Гүлнар Алтынбасова: Басты мақсат – ұжымдық иммунитет қалыптастыру

<a href="https://kyzylorda-news.kz/">Kyzylorda-news.kz</a>.&nbsp;9 шілде аталған сала қызметкерлерінің күні. Атаулы мереке біздің елде 2019 жылдан бастап күнтізбеге еніп, аталынып өтіп келеді.
Кәсіби мерекеге орай, «Қазсушар» РМК-нің Қызылорда филиалында су шаруашылығы ардагерлері мен сала мамандарының қатысуымен жиын өткізілді. Ал, 10 шілде күні Шиелі ауданында «Су шаруашылығы нысандарын көркейту-көгалдандыру тақырыбында» ғылми семинар болады.
Жалпы, Сыр елінің негізгі тіршілік көзі – Сырдария өзенінің суы. Жүздеген жылдар бойы диқан қауымы дариядан тартқан тіршілік нәрімен егінін егіп, тіршілігін жасап келеді. Ал арнайы су шаруашылықтарының құрылып, жұмыс істей бастағанына ғасыр толып отыр.
Бүгінде аймақта ұзындығы 10 мың шақырымнан аса сумен қамтамасыз ететін және 3 мың шақырымнан астам қашыртқы дренаждық жүйелер бар.
Сырдария өзеніндегі суды реттеу мақсатында республикалық меншікке қарайтын Қызылорда, Әйтек, Қазалы және Ақлақ су тораптары жұмыс істейді. Облыс аумағында 7 су қоймасы, 219 су нысаны бар.

Су шаруашылығы қызметкерлерінің күні

<a href="https://kyzylorda-news.kz/">Kyzylorda-news.kz</a>.&nbsp; 2021 жылдың үшінші тоқсанынан бастап әлеуметтік төлемнің үш түрін тіркелген мекенжайға қарамастан алуға болады. Бұл туралы&nbsp; “Азаматтарға арналған үкімет” мемлекеттік корпорациясы басқарма төрағасының орынбасары Біржан Жүнісов хабарлады.
Қазіргі уақытта әлеуметтік төлем рәсімдеудегі басты талап – тұрақты мекенжай анықтамасы.
<blockquote>
 “Мемлекеттік қызмет көрсету процесін цифрландыру аясында жаңашылдық енгізіліп отыр. Енді кейбір қызмет түрлерін тіркелген мекенжайға қарамастан, кез келген&nbsp; халыққа қызмет көрсету орталығынан алуға болады. Қазақстандықтар үшінші тоқсанда бала туу, бала күтімі бойынша жәрдемақы, жүктілікке байланысты табыстан айырылу кезінде төленетін ақшаны осы қағидат бойынша ала алады. Сондай-ақ, бала асырап алуға байланысты төлемді де осылай рәсімдеу қарастырылған”, – деді Біржан Жүнісов.
</blockquote>
Өзге төлемдер бойынша да жыл соңына дейін осы тәртіпті енгізуді жоспарланып отыр.
2021 жылдың бірінші жартыжылдығында “Азаматтарға арналған үкімет” әлеуметтік салада 800 мыңнан астам мемлекеттік қызмет көрсетті. Мемлекеттік корпорация төлемнің 44 түрі бойынша электронды макет енгізбек. Міндетті зейнетақы, әлеуметтік және медициналық аударымдар бойынша дербестендірілген есеп болады.

Қазақстандықтар жәрдемақыны тұратын жеріне қарамастан кез келген ХҚО-дан рәсімдей алады

<a href="https://kyzylorda-news.kz/">Kyzylorda-news.kz</a>. 2021-2022 оқу жылында магистратураға түсу үшін 13 мыңнан астам грант, докторантураға – 1800-ден астам грант бөлінді.
Білім беру гранттары ҚР Еңбек және халықты әлеуметтік қорғау министрлігінің деректеріне және жұмыс берушілердің сұранысқа ие мамандықтар туралы ақпаратына сәйкес бөлінген, деп хабарлайды ҚР Білім және ғылым министрлігінің баспасөз қызметі.
Магистратурада оқуға гранттардың көп саны педагогикалық мамандықтар бойынша қарастырылған – 3 642 грант. Инженерлік, өңдеу және құрылыс салаларына – 3429, жаратылыстану ғылымдары, математика және статистика бағыты бойынша – 1278, ақпараттық-коммуникациялық технологиялар бойынша – 1233, ауыл шаруашылығы және биоресурстар бойынша – 527 грант бөлінді.
Естеріңізге сала кетейік, магистратураға түсу үшін кешенді тестілеуден өтуге ниет білдірушілерді тіркеу 18 маусымда басталып, 15 шілдеге дейін жалғасады. Емтихан 20 шілдеде басталады.
<blockquote>
 «Талапкерлерге ыңғайлы болу үшін біз тестілеу нәтижелерімен келіспеген жағдайда апелляцияға беру жүйесін өзгерттік. Ол электрондық форматта өтеді. Енді талапкер тестілеу аяқталғаннан кейін 30 минут ішінде бірден апелляцияға өтініш бере алады»,&nbsp;– деп хабарлады ҚР Білім және ғылым вице-министрі Қуаныш Ерғалиев.
</blockquote>

2021-2022 оқу жылында магистратураға түсу үшін 13 мыңнан астам грант бөлінді

<a href="https://kyzylorda-news.kz/">Kyzylorda-news.kz</a>. Қазақстанның бұрынғы денсаулық сақтау министрі Елжан Біртановтың ісі бойынша тергеу аяқталды. Қорғаушы тараптың пікірінше, тергеу кезінде көптеген заң бұзушылыққа жол берілді. Бұл туралы&nbsp;<a href="https://sputnik.kz/">Sputnik Қазақстан</a>&nbsp;тілшісіне экс-министрдің қорғаушысы Дмитрий Куряченко мәлімдеді.
<blockquote>
 “Тергеу аяқталды. Тергеу аяқталуына бес күн қалғанда күдік “жымқырудан” “өкілеттікті асыра пайдалануға” ауыстырылды. Жалпы тергеу денсаулық сақтау министрлігінің бұрынғы басшысын бюджет қаражатын жымқыру күдігі бойынша 2020 жылдың мамырында басталғанын еске салғым келеді. Алайда ақырында ешқандай жымқыру фактісі жоқ екені анықталды. Оны кейіннен қаржы мониторингі агенттігі де мойындады. Бірақ Біртанов та, қорғаушысы ретінде біз де ешқандай қылмыс, жымқыру жоқ екенін қайта-қайта айтып келдік. Сонда қаржы мониторингі агенттігі жымқыру фактісі бар деген мәлімдеме арқылы халықты алдап отырғаны ма?”, – деді Дмитрий Куряченко.
</blockquote>
Ол анықталмаған “жымқыру” қылмысы үшін Біртановты тергеу изоляторында ұстағанын, кейіннен сегіз ай үйқамақта отыруға рұқсат еткенін мәлімдеді. Экс-министр қызметтік өкілеттігін асыра пайдалану бойынша тағылған айыпты да мойындап отырған жоқ.
<blockquote>
 “Менің қорғауымдағы Біртанов тағылған айыпты мойындамайды. Тергеу әділетсіз өтті әрі көптеген заң бұзушылыққа жол берілді. Мұның барлығы сотта дәлелденеді”, – деді адвокат.
</blockquote>
Келесі сот отырысы қашан өтетіні әзірше белгісіз. Заңгердің айтуынша, қазір іспен танысу сатысы басталып жатыр.
Еске сала кетейік, 8 шілдеде Елжан Біртанов пен денсаулық сақтау министрінің бұрынғы орынбасарына қатысты сотқа дейінгі тергеу аяқталғаны белгілі болды.
Қаржы мониторингі агенттігінің мәліметінше, оларға қызметтік өкілеттігін асыра пайдалану бойынша айып тағылып отыр.
Сонымен қатар Біртанов 2020 жылдың маусымында санитарлық авиация тікұшағын жеке мақсатта пайдалану фактісі бойынша қызметтік өкілеттігін асыра пайдаланды деп айыпталуда.
<h3 id="">Біртановты қамауға алу</h3>
Қазақстанның бұрынғы денсаулық сақтау министрі Елжан Біртанов 2020 жылдың қазанында ұсталды. Ол аса ірі көлемде бюджет қаражатын жымқырды деген күдікке ілінді. 7 қарашада экс-министрге үй қамауында ұстау бойынша бұлтартпау шарасы қолданылып, оның мерзімі бірнеше рет ұзартылды.

Біртанов бюджет қаражатын жымқырмаған болып шықты

<a href="https://kyzylorda-news.kz/">Kyzylorda-news.kz</a>. Биыл өзге өңірлермен қатар Арал ауданының шаруалары да табиғаттың тосын мінезінен, қуаңшылық жағдайынан зардап шегіп отыр. Осы орайда бүгін аралдық 40 белсенді аудан аумағындағы шабындықтардан шөп оруға жол тартты.
«Жұмыла көтерген жүк жеңіл» деген ұранмен бастау алған шараға аудан әкімі Серік Сермағамбетов, аудан ардагерлері мен жастар қауымы қатысты.
<blockquote>
 «Ерікті жастарымыздың елге деген жанашырлықтарына ризашылығымды білдіре отырып, бастамаларыңызға сәттілік тілеймін! Бірілік пен ынтымақтың арқасында бұл қиындықты да жеңіп шығатынымызға сенемін!», – деген аудан басшысы өз сөзінде ауданымызда қалыптасқан қуаңшылық жағдайын еңсеру бағытында атқарылып жатқан жұмыстар мен қабылданған шараларды атап өтті.
</blockquote>
Аталған шара ауданға қарасты Жетес би және Қаратерең ауылдық округтерінен бастау алмақ. Сондай-ақ Аманөткел, Ақирек, Аққұм және Жаңақұрылыс ауылдық округтерінде де жүзеге асырылады. Аталған аумақтар бойынша бүгінде 12 шөп орушы бригадалар жасақталып, аудан бойынша шөп тасымалына қажетті 127 көлік жұмылдырылды.
Аудан әкімдігі жанындағы төтенше жағдайлардың алдын алу жөніндегі комиссияның екі мәрте отырысы өткізіліп, комиссия шешіміне сәйкес ауданда төтенше жағдай жариялау туралы біржақты шешім қабылданды. Аталған шешім облыстық және аумақтық мемлекеттік органдардың келісімдерінің негізінде ҚР-ның Әділет министрлігінің ашық НҚА порталында ағымдағы жылдың 24 маусымында жарияланды және 12 шілдеде министрлікпен бекітіледі деп жоспарлануда.
Ауданда төтенше жағдай жарияланған кезде Сырдария бойындағы бірқатар каналдарды тазалау, су тоспаларын салу, елді мекендердің территорияларынан су ұңғымасын іске қосу және ең бастысы шөп бағасын тұрақтандыру мақсатында шаруа қожалықтарының тасымалға кететін шығындарын яғни, жанар-жағармайын өтеу қолға алынатын болады. Жалпы бұл бағытта атқарылатын шаралар аз емес.
Жалпы ауданнның территориясы шөптің шығымына байланысты үш аймаққа бөлінді. Атап айтқанда 13 елді мекен қызыл аймақ, 6 елді мекен сары аймақ, 4 елді мекен жасыл аймақ болып белгіленді. Бүгінде аудандағы мал басына қажетті 205 мың тонна шөпті тасымалдау жұмыстары басталды. Осы орайда өткен маусым айынан бастап облысымыздағы көршілес аудандардан және Ақтөбе облысының Ырғыз ауданынан жоңышқа шөбі тасмалдануда. Бұдан бөлек аймағымыздың өзге өңірлері де Аралға көмек ретінде шөп шабу науқанына қолғабыс жасап, игі бастамаларға үн қосуда.
<img src="https://kyzylorda-news.kz/wp-content/uploads/2021/07/214007840_3020742621587437_6209304240454289334_n.jpg" alt="" />
<img src="https://kyzylorda-news.kz/wp-content/uploads/2021/07/214077128_3020742874920745_7617797385085645817_n.jpg" alt="" />

Аралдық еріктілер шөп оруға аттанды

<a href="https://kyzylorda-news.kz/">Kyzylorda-news.kz</a>. Биылғы жылы Сырдария ауданында ауыл шаруашылығы тауар өндірушілері 32200 гектарға ауыл шаруашылғы дақылдарын орналастырды.
Оның ішінде: негізгі дақыл күріш 20542 гектар, жаздық бидай 1100 гектар, арпа 84 гектар, мақсары 162 гектар, 34 гектар соя, 31 гектар қант құмайы, дәндік жүгері 75 гектар, жаңа жоңышқа 1938 гектар, картоп, көкөніс, бақша 835 гектар, 15 гектар жеміс-жидек, ескі жоңышқа 7384 гектарды құрады.
Аудан бойынша 2021 жылдың 1 маусымында 36201 бас мүйізді ірі қара, 33914 бас қой мен ешкі, 16236 бас жылқы, 1621 бас түйе, 1455 бас құс өсірілуде.
Сырдария ауданына жоспар бойынша 180 күнге 50200 бас шартты мүйізді ірі қараға 90400 тонна шөп, 18100 тонна жем қажет деп есептелген.
Аудан бойынша жем-шөп дайындау, шабындық жерлерді анықтау мәселелерін жедел шешу мақсатында аудандық штаб құрылды.
Бүгінгі күнге 5925 гектар жоңышқаның бірінші орымынан 7521 тонна мал азықтық жоңышқа шөбі жиналып өңірдегі жеке тұрғындар мен шаруашылық құрылымдарына сатылуда.
«Мади-Қажы» ЖШС-де жоңышқа шөбінің екінші орымы басталып 2 бригада 2 жатка, 2 шөп басатын техника және 5 жүк көлігмен жұмыс жасалуда.
Сонымен қатар аудан әкімдігі күріш, бидай, жоңышқа шөбін егумен айналысатын шаруашылық құрылымдарымен жем-шөп қорын жасақтау мақсатында меморандумдар жасалды.
Аудандағы шаруаларға қолдау көрсету мақсатында ерікті жастар тобы құрылып шөп дайындау жұмыстарын жүргізуге көмек көрсетуде.
Сондай-ақ, аудандық «Ақжарма и К», «Шаған-Жер», «Мади-Қажы», «Мағжан и К», «Бесарық» шаруашылықтары қуаңшылық орын алған Арал, Қазалы аудандарына көмек ретінде 2850 пресс жоңышқа мен 12 тн. жем жеткізіп берді. Сондай-ақ, осы шаруашылықтардаң Арал, Қазалы аудандарына жем-шөбін әзірлеуге «Жасыл ел» еңбек жасағының жастары көмектесті.

Сырдариялықтар Арал, Қазалы аудандарының шаруаларына жәрдемдесті

<a href="https://kyzylorda-news.kz/">Kyzylorda-news.kz</a>. Әділет министрлігі COVID-19-ға қарсы вакциналау міндеттілігінің құқықтық негізі туралы айтты.
Ведомствоның ақпаратынша, инфекциялық және паразиттік аурулардың пайда болуы мен таралуының алдын алу үшін Денсаулық туралы кодексте профилактикалық екпелер егу шарасы көзделген.
Кодекстің 85-бабы 4 және 8-тармақтарына сәйкес, медициналық қарсы көрсетілімдері жоқ, Қазақстан аумағында тұрақты тұратын жеке тұлғалар инфекциялық және паразиттік ауруларға қарсы екпелерді алуға міндетті.
Олардың қатарына коронавирусқа қарсы профилактикалық екпе де жатады. Бұл үкіметтің 2020 жылғы 24 қыркүйектегі №612 қаулысында айтылған.
<blockquote>
 “Осылайша, медициналық қарсы көрсетілімдері жоқ адамдар үшін COVID-19-ға қарсы міндетті вакциналаудың құқықтық негіздері бар және бұл “Мемлекет адамның өмір сүруі мен денсаулығына қолайлы айналадағы ортаны қорғауды мақсат етіп қояды” деген (Конституцияның 31-бабы) конституциялық нормаға сәйкес келеді. Адамның және азаматтың құқықтары мен бостандықтарына кепілдік бере отырып, Қазақстан Конституциясы мұндай шектеудің жол берілетін шектерін белгілей отырып, оларды шектеу мүмкіндігін жоққа шығармайды”, – делінген хабарламада.
</blockquote>
Конституцияның 39-бабы 1-тармағына сәйкес, құқықтар мен бостандықтар халықтың денсаулығын қорғау мақсатында ғана шектелуі мүмкін.
<a href="https://sputnik.kz/society/20210708/17552603/mindetti-vaktsinalau-Konstitutsia.html">Sputnik Қазақстан</a>

Әділет министрлігі міндетті вакциналауға қатысты мәлімдеме жасады

<a href="https://kyzylorda-news.kz/">Kyzylorda-news.kz</a>. Гаухар Жаңабаева Арал ауданында тұрады. Тұрмыста, жолдасымен 3 бала тәрбиелеп отыр. Мамандығы заңгер Гаухар ешқашан бір ғана табыс көзімен шектелмепті.
<blockquote>
 «Мамандығым бойынша отбасылы болғанша 7 жыл жұмыс жасадым. Іс-қағаздарымен айналыстым, мұнан өзге мәтін теру, слайд жасау секілді компьютерлік қызметтер көрсеттім, қосымша тойларда жедел суретке түсірумен айналыстым. Желілік бизнесте де нәтиже көрсете алдым. Кейін тұрмысқа шыққан соң жаңа ортаға бейімделу, үйдің тірлігі, бала күтімі секілді міндеттерім қосылған соң барлығын тоқтаттым», – деген Гаухар Жаңабаевава араға алты жыл салып, кәсіпке қайта келгенін айтты.
</blockquote>
Бала күтіміндеге аралдық келіншек өзінің тігінге икемі бар екенін ескере келе, кестелеп тігуді қолға алады. Ол үшін жолдасы шет елдік әріптермен жұмыс жасауға мүмкіндік беретін алғашқы тігін машинасын алып береді. Аталмыш тігін машинасымен тапқан табысының басын құрап, бір жылдың ішінде қазақ тілінің алфавитіне негізделген жаңа тігін машинасын сатып алады.
<blockquote>
 «Кәсібім жүре бастағанын көрдім. Бұл машина да маған аздық етті. Сонымен елдің аузында жүрген «Бастау» жобасын жолдасым екеуміз зерттеп, қатысамын деп шештім. 1 ай оқып, біліктілігімді жетілдірген соң қайтарымсыз қаржы алу үшін жобамды қорғадым. Нәтижесінде 505 мың теңге грант алып, тігінге керек құрал-жабдықтарымды түгелдеуге мүмкіндік алдым», – дейді кәсіпкер Гаухар.
</blockquote>
Жас кәсіпкер «Бастау» жобасының тұтынушымен жұмыс жасап, түрлі есептіліктерді тапсыруда айтарлықтай көмек болғанын жеткізіп отыр. Ол «Бастау» жобасына дейін бұл қызметтерді ақылы тапсыртып келген екен.
Бүгінде Гаухар Жаңабаева тойға арналған бұйымдар мен жас нәрестелердің киімдерін кестелеу қызметін көрсетеді. Әсіресе нәрестенің перзентханадан шыққанда киетін киіміне баланың атын кестелеп беруді сұраушылар басым екен.
<blockquote>
 «Жақында тұтынушылардың сұранысын ескере келе киімдерге жазуды бояумен салуды, кружкаларға сурет салу секілді қызметтерді енгіздім. Жалпы қазіргі кәсібім Арал ауданында жоғары сұранысқа ие. Айына орта есеппен 200 мың теңге табыс табуға мүмкіндік беріп отыр. Еңбектенсең нәтижесін көруге болатынына нақты көзім жетті. Тапсырысты уақытылы орындау үшін кейде уақытпен санаспай жұмыс жасауға тура келеді. Алда кәсібімді ұлғайтып, жаңа қызмет түрлерін қосқым келеді. Ол үшін қазір жобамды әзірлеп жатырмын», – дейді Гаухар Жаңабаева.
</blockquote>
Айта кету керек, Арал ауданында 2017-2020 жылдары 1156 азамат «Бастау» жобасы бойынша оқытылып, 801 азаматтың жобасы мемлекет тарапынан түрлі қаржы көздері арқылы қаржыландырылған. Биылғы жылы 300 адамды жоба аясында оқыту жоспарлануда. &nbsp;
<img src="https://kyzylorda-news.kz/wp-content/uploads/2021/07/156222809_4504835569543177_2424884658090379773_n.jpg" alt="" />
<img src="https://kyzylorda-news.kz/wp-content/uploads/2021/07/156851558_4504835859543148_7950516253191535448_n.jpg" alt="" />

Гаухар Жаңабаева: Айына орта есеппен 200 мың теңгеден артық табыс табамын

<a href="https://kyzylorda-news.kz/">Kyzylorda-news.kz</a>. Қазақстанның еңбек сіңірген қайраткері, режиссер Сатыбалды Нарымбетов 75 жасында өмірден өтті.
«Бүгін қазақ кинематографиясы орны толмас қазаға ұшырады. Кино мен əдебиетте өзіндік суреткерлік əлемін қалыптастырған, қазақ киносына тамаша туындылар тарту еткен Сатыбалды ағамыз келместің кемесіне мініп арамыздан кете барды.
Қазақстан Республикасы Мəдениет жəне спорт министрлігінің атынан кинорежиссёр, жазушы, «Құрмет» орденінің, «Платиналы Тарлан» сыйлығының иегері, Франция кино академиясының Жорж Садуль атындағы тəуелсіз сыйлығының лауреаты, Қазақстанның еңбек сіңірген қайраткері Сатыбалды Жәлелұлы Нарымбетовтің қайтыс болуына байланысты отбасы мен жақындарының қайғысына ортақтасып, көңіл айтамын.
Əр фильмі мен шығармасы арқылы сол заманның тыныс-тіршілігін, ауанын жеткізуге тырысатын мэтрдің асыл бейнесі қалың қазақтың көңіл төрі мен жүрек түкпірінде мəңгі сақталады.
Марқұмның көзі тірісінде жасаған игі-жақсы амалдары алдынан жарылқасын. Жатқан жері жайлы, топырағы торқа болсын»,- деп жазды Ақтоты Райымқұлова&nbsp;<a href="https://www.facebook.com/Aktoty.raiymkulova">Facebook</a>&nbsp;-тегі парақшасында.
Сатыбалды Нарымбетов 1946 жылы 7 наурызда Түркістан облысы, Түркістан ауданы, Ащысай ауылында туған. Мәскеу қаласындағы мемлекеттік кинематография институтын бітірген. 1
984 жылы жоғары режиссерлік курсты (Г.Н. Данелияның шеберханасы бойынша) бітірген.
1969 жылдан «Қазақфильм» студиясында сценарист әрі кинорежиссер ретінде қызмет етті.
1970 жылдан – «Қазақфильм» киностудиясының кинорежиссері болды.
Ал 2005 жылдан бері Шәкен Айманов атындағы «Қазақфильм» АҚ «Дебют» бірлестігінің жетекшісі болып еңбек еткен еді.
Ол «Құрманғазы» атты деректі фильмге (1972 жылы), «Зауал» (1981 жылы), «Күзгі бұралаң жол» (1984 жылы) қысқа метражды фильмдерге, «Ұрын келген күйеу» (1987 жылы), «Созақтан шыққан Гамлет» (1990 жылы), «Көзімнің қарасы», «Жас аккордеоншының өмірбаяны» (1994 жылы), «Омпа» (1998 жылы) және тағы басқа көркем фильмдерге режиссерлік еткен.
Бұған дейін, жазушы Смағұл Елубай Сатыбалды Нарымбетовтің ауыр халде, бір аптадан бері комада жатқаны туралы жазған болатын. Оның айтуынша, асқазанындағы ескі жара ашылып қан құсып ауруханаға түскен.
<a href="https://lenta.inform.kz/kz/tanymal-rezhisser-satybaldy-narymbetov-omirden-ozdy_a3809725">ҚазАқпарат</a>

Қазақстан және Қызылорда облысының жаңалықтары