<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 2087 адам коронавирус індетінен емделіп шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 717, 
Алматы қаласы – 161, 
Шымкент қаласы – 101, 
Ақмола облысы – 29, 
Ақтөбе облысы – 60, 
Алматы облысы – 41, 
Атырау облысы – 140, 
Шығыс Қазақстан облысы – 82, 
Жамбыл облысы – 31, 
Батыс Қазақстан облысы – 117, 
Қарағанды облысы – 333, 
Қостанай облысы – 61, 
Қызылорда облысы – 36, 
Маңғыстау облысы – 50, 
Павлодар облысы – 77, 
Солтүстік Қазақстан облысы – 25, 
Түркістан облысы – 26.
Қазақстан бойынша жазылғандар саны – 410150.

Қызылордада 36 адам коронавирус індетінен сауықты

<a href="https://kyzylorda-news.kz/">Kyzylorda-news.kz</a>. Қызылорда қаласында сегіз ай бұрын жұмбақ жағдайда жоғалып кеткен әйелдің мәйіті табылды, деп хабарлайды ҚазАқпарат.
Айта кетсек, әйел 2020 жылдың 30 қазанында үйінен белгісіз бағытқа шығып, хабар-ошарсыз кеткен. Іздеу жұмыстарына арнайы мобильді топ құрылып, оның жұмысына құзырлы органдардың күштері мен еріктілер жұмылдырылды.
<blockquote>
 «Полицейлер Қызылорда қаласына қарасты Белкөл елді мекенінен 2,5 шақырым аумақтан белгісіз адамның мәйіті тапты. Бірнеше мәрте жүргізілген сараптамалар нәтижесінде ол сегіз ай бұрын жоғалған әйелдің мәйіті екендігі нақтыланды. Мәйітте зорлық-зомбылық белгісі жоқ. Қазіргі таңда тиісті сотқа дейінгі тергеп-тексеру амалдары жүргізілуде. Кісі өлімінің нақты себептері анықталуда», – деп мәлім етті Қызылорда облыстық полиция департаментінен.
</blockquote>

Қызылордада 8 ай бұрын жоғалып кеткен әйелдің мәйіті табылды

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 3130 адамда коронавирус індеті ПТР арқылы расталып ауырғаны белгілі болды , деп хабарлайды coronavirus2020.kz.
Аймақтар бойынша: 
Нұр-Сұлтан қаласы – 798, 
Алматы қаласы – 491, 
Шымкент қаласы – 246, 
Ақмола облысы – 108, 
Ақтөбе облысы – 104, 
Алматы облысы – 118, 
Атырау облысы – 160, 
Шығыс Қазақстан облысы – 80, 
Жамбыл облысы – 43, 
Батыс Қазақстан облысы – 198, 
Қарағанды облысы – 325, 
Қостанай облысы – 53, 
Қызылорда облысы – 50, 
Маңғыстау облысы – 137, 
Павлодар облысы – 130, 
Солтүстік Қазақстан облысы – 40, 
Түркістан облысы – 49.
Жалпы ел бойынша ауырғандар саны 451130.

Қызылордада өткен тәулікте  50 адам коронавирус жұқтырған

<a href="https://kyzylorda-news.kz/">Kyzylorda-news.kz</a>.&nbsp; Қазгидромет 10 шілдеге арналған ауа райы болжамын жариялады.
Республиканың басым бөлігінде оңтүстік циклонның әсерінен құбылмалы ауа райы сақталады. Найзағай жарқылдап, жаңбыр күтіледі, батыста, солтүстікте, солтүстік-батыста және орталығында – қатты жаңбыр жауады.
Еліміздің тек солтүстігінде ғана жауын-шашынсыз ауа райы күтіледі. Республиканың кей жерлерінде дауыл, бұршақ, желдің күшеюі күтіледі, оңтүстікте және батыста жел, шаңды дауыл күшейеді.
Қызылорда облысының кей жерлерінде жел шаңды дауылмен бірге 15-28 м/с күшейеді, түнде және таңертең Қызылорда облысының кей жерлерінде дауыл күтіледі.

Қызылордада шаңды дауыл тұрады

<a href="https://kyzylorda-news.kz/">Kyzylorda-news.kz</a>. Бүгін Қызылорда облысының ахуалдық орталығында облыс әкімі Гүлшара Әбдіқалықованың төрағалығымен жастар ісі жөніндегі кеңестің алғашқы отырысы өтті. Жиынға облыс әкімінің орынбасары, бірқатар басқарма басшылары, қала әкімінің орынбасары мен селекторлық байланыс арқылы аудан әкімдері, белсенді жастар қатысты.
Облыс әкімі жастар саясатын жүзеге асыруда мемлекеттік бағдарламаларды тиімді қолдану қажеттігін атап өтіп, бұл орайда жастардың әлеуеті жоғары екенін тілге тиек етті.
Отырыста облыстық ішкі саясат басқармасының басшысы Мира Қазбекова «ҚР жастарын қолдау жөніндегі 2021-2025 жылдарға арналған кешенді жоспарын» іске асырылу барысы туралы баяндады. Бүгінде аймақта 14 пен 28 жас аралығындағы 176 300 жас тұрады, бұл тұрғындардың жалпы санының 21,6% құрайды. Олардың ішінде жұмыссыздық деңгейі 4,2%–ды, NEET санатындағы жастар 8,3%-ды құрайды.
Жиында Мира Қазбекова жастар үшін өзекті мәселелердің қатарында тұрғын үймен қамтамасыз етуді атап өтіп, жастардың көпшілігі «Орда» аймақтық тұрғын үй бағдарламасын қайта іске асырылуын қолдайтынын жеткізіп, «Отбасы банкпен» бірлесіп жалға берілетін тұрғын үй беру бағдарламасын іске асыру ұсынылатынын жеткізді.
Бірінші жартыжылдықта өңірде жастардың қатысумен 6347 іс-шара өткізілген, олардың басым бөлігі қайырымдылық іс-шаралар. Жыл басынан бері жастардың бірлесуімен 6287 аз қамтылған отбасы азық-түлік жиынтықтарын, киім-кешек пен тұрмыстық заттар алғанын, 31 отбасына балаларды оқыту үшін компьютер үлестірді. Сондай-ақ, 500-ден астам ерікті жас пен «Жасыл ел» сарбаздары қуаңшылық тартқан аудандарға мал азығын дайындауға атсалысты.
Гүлшара Әбдіқалықова мал азығын дайындау жұмыстарына жастар өкілдерін, волонтерлерді, «Жасыл ел» жастар еңбек жасақтарының сарбаздарының жұмылдыру ісін күшейтуді, жас көшбасшылардың Үндеу жариялауын қамтамасыз етуді тапсырды. Мұнан бөлек, жастарды жаппай екпе алуға белсенді түрде шақыру қажеттігін қаперге салды. Ал, облыстық статистика департаменті мен ішкі саясат басқармасының басшыларына ұлттық халық санағын жүргізу жұмыстарына волонтер жастардың қатысу белсенділігін арттыруды жүктеді.
Отырыста облыс әкімі еңбек нарығына қажетті кадр даярлау бағытында Ресейде білім алатын студенттерді жұмысқа тарту мәселесін көтерді. Соның аясында бірқатар басқарма басшыларына Ресей Федерациясында білім алып келген түлектерді жұмысқа орналастыруда бос орындарды қарастыру қажеттігін алға тартып, 3 күн мерзім ішінде «Бітіруші түлектерді жұмыспен қамтудың Жол картасын» әзірлеп, бекітуге енгізуді тапсырды. Сонымен бірге жоғары және орта арнаулы оқу орындарын бітірген жастарды тиімді жұмыспен қамту мақсатында басқарма басшыларына техникалық, кәсіптік және жоғары білім беру ұйымдарының мамандықтары бөлінісіне талдау жүргізіп, еңбек нарығына қажетті мамандықтар тізбесін қайта жасақтау қажеттін назарға салды.
Жиында облыстық жұмыспен қамту және әлеуметтік бағдарламалар басқармасының басшысы Гаухар Қалмақова «Дипломмен – ауылға!», «Жасыл ел», «Еңбек» бағдарламалары мен «Жас кәсіпкер» және «Жас маман» жобаларының тиімділігін атап өтті. Есепті кезеңде 6127 жас, оның ішінде 3694 ауыл тұрғыны «Еңбек» бағдарламасына қатысуға ниет білдіріп, бағдарлама аясында 5923 адам жұмысқа орналасты. 12 адам қысқа мерзімді курстардан өтіп, 572 адам кәсіпкерлік негіздеріне оқуға жіберілді. Одан бөлек, 92 адам несие алды, олардың 69-ы өз ісін бастады. 380 жас бизнесті дамытуға грант алды, 2314 адам бос жұмыс орындарына орналасты, 259 адам әлеуметтік жұмысқа жолданды.
Жыл басынан бері 980 азамат жастар практикасынан өтіп, 2370 адам қоғамдық жұмысқа орналасты. Сонымен қатар, өңірде «Алғашқы жұмыс орны» және «Ұрпақтар сабақтастығы» жобалары іске асырылуда, олардың аясында 111 жас маманды жұмысқа орналастыру жоспарлануда.
Кешенді жұмыстарды саралаған облыс әкімі басқарма басшысы Гаухар Қалмақоваға ішкі саясат басқармасы мен Қызылорда қаласы және аудан әкімдерімен бірлесіп, жастарды, оның ішінде ауылдық жерлерден және NEET санатындағы жастарды жұмысқа орналастыруға бағытында тиісті шаралар қабылдауды тапсырды.
Отырыста облыстық полиция департаментінің бастығы Бауыржан Ибраев жастар арасындағы құқық бұзушылықтардың алдын алу бойынша жүргізіліп жатқан жұмыстар туралы баяндады. Мәселен, өңірде тұрақты негізде «Жасөспірім-Заң-Қауіпсіздік», «Жасөспірім және көше», «Жасөспірім», «Түнгі қаладағы балалар», «Квадрат» және т.б. іс-шаралар өткізіледі кәмелетке толмағандарға темекі өнімдері мен алкогольді сатушылар, өз міндеттерін орындамайтын ата-аналар жауапкершілікке тартылады. Нәтижесінде есепті кезеңде жастар қылмысының деңгейі 33,9%-ға төмендеді.
Мұнан кейін Қызылорда қаласы әкімінің орынбасары Асқарбек Есжанов сөз алып, облыс орталығында мемлекеттік жастар саясатын жүзеге асыру және маргиналды жастармен жұмыс барысын баяндады. Бүгінде қала тұрғындарының 19,5%-ы жастар құрайды, яғни олардың саны 63 204-ке жетті. Оның ішінде 24 544-і жоғары және орта арнаулы оқу орындарының студенттері. Биыл қалада жастарға бағытталған 7 әлеуметтік жобасы іске асырылуда. Сонымен бірге Жастар ресурстық орталығы арқылы 8000 жас қызметін пайдаланды.
Отырысты қорытындылай келе, облыс әкімі Гүлшара Әбдіқалықова облыс мекемелерінің басшыларына жастармен, оның ішінде NEET санатындағы жастармен жұмысты жандандыруды, сондай-ақ жастар үшін бүгінгі таңда ең өзекті мәселелерді анықтап, оларды шешу жолдарын ұсынуды тапсырды. Соңында облыс әкімі қыркүйек айында онлайн форматта жастармен кеңейтілген құрамда кездесу ұйымдастырып, жастар үшін өзекті мәселелерді айқындауға мүмкіндік беретін ашық алаң қалыптастыру қажеттігін еске салды.

Қызылордада жастар ісі жөніндегі кеңестің алғашқы отырысы өтті

<a href="https://kyzylorda-news.kz/">Kyzylorda-news.kz</a>. Жыл сайын аймақта балық аулау көлемі артып келеді. Ағымдағы жылдың 6 айында облыста ауланған балық көлемі 5301 тоннаны құраса, экспорт 2037 тоннаға жетті.
<blockquote>
 «Биыл 2 мың тоннадан астам балық Ресей, Польша, Нидерланды, Германия, Грузия және Литва елдеріне экспортталды. Облыста балық шаруашылығын дамыту мақсатында, тауарлы балық өсіру жұмыстарын күшейтудеміз. Өткен жылы облыста 155 тонна тауарлы балық өсірілсе, тауарлы балық өсіретін шаруашылықтардың саны 10-нан 20-ға жетті. Енді биыл 30-ға жеткізсек, балық өсіру көлемін 172 тоннаға ұлғайтамыз деп жоспарлап отырмыз», – деді облыстық табиғи ресурстар мен табиғат пайдалануды реттеу басқармасы басшысының орынбасары Бауыржан Оспанов.
</blockquote>
Айта кетейік, өткен жылы облыста ауланған балық көлемі 9 пайызға өссе, экспорт 2 пайызға ұлғайды. Сондай-ақ, балық өнімдері 9 мемлекетке экспортталды. Соңғы 5 жылда балық экспорты 1,2 есеге өсті.

Қызылордада балық экспорты 1,2 есеге өсті

<a href="https://kyzylorda-news.kz/">Kyzylorda-news.kz</a>. «Бизнестің жол картасы 2025» мемлекеттік бағдарламасы аясында облыстағы шағын кәсіпкерлердің жаңашыл жобалары үшін мемлекеттік гранттар беруге 261 млн. теңге қаржы бөлінді. Оның ішінде тек 18-29 жас аралығындағы кәсіпкерлердің жаңа бизнес-идеяларына 250 млн. теңге қаржы бағытталады. Жас кәсіпкерлердің 70-тен астам жобасы конкурстық негізде іріктеледі. Бұл туралы Өңірлік коммуникациялар қызметінің ақпараттық алаңында өткен брифингте облыстық кәсіпкерлік және туризм басқармасының басшысы Фердоуси Қожабергенов мәлімдеді.
<blockquote>
 «Биыл бағдарламаға Үкіметпен бірқатар өзгерістер енгізілді. Яғни, бұған дейін конкурсқа қатысу үшін кәсіпкерлерге кәсіпкерлік негіздерінен оқудан өткендігін растайтын сертификатпен қатысу міндеттелген болса, Үкіметпен енгізілген өзгерістерге сәйкес кәсіпкерлер сертификатты қажет болған жағдайда тапсыру мүмкіндігі қарастырылды. Алдағы конкурстық іріктеу осы жылдың шілде айында басталады. Конкурсқа құжаттар қабылдау үшін алдын-ала облыстық бұқаралық ақпарат құралдары, әлеуметтік желілеріне хабарландыру беріледі», – деді Фердоуси Әбілқасымұлы.
</blockquote>
Жалпы осы уақытқа дейін 500-ден астам жобаға 612 млн. теңге қаржы бөлініп, мемлекеттік гранттар берілді. Бағдарлама талаптарына сәйкес, жобалардың іске асуына, грант қаражаттарының мақсатты жұмсалуы мен жұмыс орындарының құрылуына қаржы агенттігі ретінде “Даму” КДҚ” АҚ тұрақты түрде мониторинг жұмыстарын жүргізеді. Бүгінге дейін мониторинг нәтижесімен 22 жобаға берілген грант қаражаты мақсатсыз жұмсалғаны анықталып, 23 млн. 783 мың теңге қаражат сот арқылы өндірілді.

Қызылорда: Жаңашыл бизнес-идеяларға қайтарымсыз қаржы беріледі

<a href="https://kyzylorda-news.kz/">Kyzylorda-news.kz</a>. Ауданға арнайы келген Мәжіліс депутаттарының бір тобы Шәкен, Майлыбас ауылдық округтеріне жол тартқанын біз бұған дейін айтқан болатынбыз. Халық қалаулыларының тағы бір тобы Қазалыдағы құрылыс жұмыстарымен танысты.
ҚР Парламенті Мәжілісінің депутаттары Бақытбек Смағұл, Ғалым Әміреев, Геннадий Шиповских қала мен кенттің екі аралығындағы «Рәміздер алаңында» алдағы уақытта салынатын құрылыс нысандарымен танысты.
Аудан әкімінің орынбасары Ғалымжан Еркебай Қазалы қаласы мен Әйтеке би кентінің екі аралығынан алдағы уақытта Жалаңтөс батырдың 445 жылдығына орай еңселі ескерткіш бой көтеретінін тілге тиек етті.
Сондай-ақ, қазіргі таңда 2 қабатты 12 пәтерлі 12 арендалық тұрғын үйдің жоба-сметалық құжаттарының мерзімі аяқталатынын айтып, тез арада қаржы бөлуге ықпал жасауды сұрады. Құрылыс жұмыстары басталып кету үшін 2,2 млрд теңге қажет.
Мәжіліс депутаттары Әйтеке би кентінде құрылысы қарқынды жүріп жатқан емхана құрылысымен де танысты. Ауысымына 250 келушіге арналған. Құрылыс жұмыстарын «SCS Инжиниринг» ЖШС жүргізіп жатыр. Серіктестіктің жауапты қызметкерлері емхана құрылысын желтоқсан айында аяқтауды жоспарлап отырғандарын жеткізді.
Қазіргі таңда Қазалы ауданының орталығы – Әйтеке би кенті мен Қазалы қаласының аралығындағы автомобиль жолын кеңейту жұмыстары жүріп жатыр. Халық қалаулылары бұл жұмыстармен де танысты.
Жоба барысында 7 шақырым автомобиль жолын 4 жолаққа дейін кеңейту, 2 темірбетон көпірін, 2 су өткізгіш құбырын қайта жаңғырту және тағы басқа жұмыстар жүргізілетін болады. Сонымен қатар, әр бір жүру жолағы 3,5 метр және автобус аялдамасына арналған алаң, жол қиылыстарын салу қарастырылған.
<img src="https://kyzylorda-news.kz/wp-content/uploads/2021/07/3205e95d-7ce7-4c52-a486-9b0875c14526.jpg" alt="" />

Мәжіліс депутаттары Қазалыдағы құрылыс жұмыстарымен танысты

Kyzylorda-news.kz. Алматыда шетелге шығатын адамдарға жалған вакциналау паспорттарын дайындаған туристік компания анықталды, деп хабарлады ішкі істер министрлігінің баспасөз қызметі.
Сауд Арабиясы Корольдігіне баратын қажыларға барлығы 143 паспорт жасалған.
<blockquote>
 “Туристік фирманың кеңсесін тінту кезінде ұйымдастыру техникасы, мөрлер, бланк өнімдері алынды”, – деп хабарлады полиция.
</blockquote>
Полиция жалған құжат дайындағандар 4 жылға дейін бас бостандығынан айырылатынын, ал оны пайдаланғандар 40 тәулікке дейін қамауға алынатынын ескертті.
Жыл басынан бері ішкі істер органдары ПТР-тестілеу нәтижелері мен вакцинация паспорттарын қолдан жасау, сондай-ақ оларды пайдалану бойынша 30 қылмысты тіркеді.
Sputnik Қазақстан

Полицейлер жалған вакциналау паспортын алғандар қанша уақытқа қамалатынын айтты

Kyzylorda-news.kz. Облыс аумағында Кіші Арал теңізі, Сырдария өзені және 207 көл бар. Онда балықтың 18 түрі аулануда. Бұл туралы Өңірлік коммуникациялар қызметінің ақпарат алаңында облыстық табиғи ресурстар мен табиғат пайдалануды реттеу басқармасы басшысының орынбасары Бауыржан Оспанов баяндады.
<blockquote>
 “Қамыстыбас балық питомнигінде жыл сайын 15 млн. дана балық шабақтары өсіріліп, балық шаруашылығы маңызы бар көлдерге және Кіші Арал теңізіне жіберілуде. Өңірде жылдық қуаттылығы 12,5 мың тонна болатын 9 балық өңдеу зауыты жұмыс істейді. Оның 4-уі Еуропалық сапа стандартына сәйкес. Яғни, «Еврокод»саны бар. Зауыттарда 500-ден астам адам тұрақты жұмыспен қамтылған. Ал маусымдық жұмысшылар саны үш мыңға жуық”, – деді Бауыржан Оспанов.
</blockquote>

Қызылордада балық өңдейтін 9 зауыт бар

Kyzylorda-news.kz. Аймақтағы еңбек инспекторлары жыл басынан бері мекемелер мен кәсіпорындарға 81 тексеру жүргізді. Нәтижесінде еңбек заңнамасын бұзған 143 дерек анықталды. Бұл туралы Өңірлік коммуникациялар қызметінің ақпараттық алаңында өткен брифингте облыстық еңбек саласындағы бақылау басқармасының басшысы Төреахмет Жолымбетов мәлімдеді.
Сондай-ақ,басқармаға келіп түскен арыз-шағымдарға сәйкес 457 жұмыскердің құқықтары қорғалып, жалақы бойынша берешектері, іссапар шығындары, үстеме ақы, өтемақы, қоса атқарған қызметіне қосымша ақылары өндіріліп берілген.
<blockquote>
 “Биыл жеті кәсіпорынның 1330 жұмыскеріне 120, 6 млн. теңге жалақы қарызы төленді.Сондай-ақ, басқарма тарапынан кәсіпорындардың жұмыс берушілеріне түсіндірме хаттар жолданып, нәтижесінде 994 ұйымда өндірістік кеңес құрылды. Жыл басынан бері 498 ұжымдық шарт тіркеліп, мониторинг жасалды. Бұған қоса, электронды базаға 1100 мекеме мен кәсіпорын бойынша 19980 еңбек шарты жасалып, есепке алынды”,-деді Төреахмет Сайлаубекұлы.
</blockquote>

Қызылордада еңбек заңнамасын бұзған 143 дерек анықталды

&nbsp;Kyzylorda-news.kz.&nbsp;&nbsp;&nbsp;Қызылорда облысы кәсіпкерлер палатасының алаңында ауыл шаруашылығымен айналысатын кәсіпкерлер мен мүдделі мемлекеттік органдардың қатысуымен кездесу өтті.
Кездесуге арқау болған тақырып – салаға көрсетіліп жатқан қолдаудың нәтижесі, проблемалары, шешу жолдарын қарастыру.
Мал шаруашылығымен айналысушылар үшін жем-шөпке берілетін субсидия бүгінде шаруаларды сарсаңға салып қойды деп отыр кәсіпкерлер.
<blockquote>
 «Кәсіпкерлікпен айналысып келе жатқаныма 8 жыл. Мал өсіреміз. 4 адамды жұмыспен қамтып отырмыз. Мемлекет жем-шөпке субсидия береді дегенде қуанған жандардың біріміз. Алайда іс жүзінде бұлай болмай отыр. Өткен жылдың желтоқсан айында мал азығына жұмсалған шығындарды өтеуді субсидиялауға Қызылорда облысының бюджетінен 730,5 млн.теңге бөлінді. Алайда бұл қаржы бізге жетпей қалды. Кім өтінішті жылдам беріп үлгерді, солар ғана ала алды. Бұл әділеттілік емес қой?! Сонда біз малдың жағдайын ойлаймыз ба, әлде өтінішті қашан беру керек деп компьютерді аңдып отыруымыз керек пе?», – дейді кәсіпкерТұрсынкүл Ибраева.
</blockquote>
Кәсіпкердің айтып отырғаны «QOLDAU» жүйесі. Өтініш аталмыш платформада қабылданады. Жергілікті бюджеттен бөлінген қаржының жеткіліксіз мөлшері, жүйеде алғашқы болып өтініш берген кәсіпкерлердің өтінішінің қабылдануына алып келген. Бүгінде облыстағы кәсіпкерлердің жем-шөпті субсидиялауға сұранысы 394,2 млн.теңгені теңгені құрап отыр.
Кездесуге қатысқан ҚР Сыбайлас жемқорлыққа қарсы іс-қимыл Агенттігінің Қызылорда облысы бойынша департаменті басшысының орынбасары Ғалия Әлімқұлова да бұл мәселеге алаңдаулы екендігін жеткізді. Ол ауыл шаруашылығы тауар өндірушілерін субсидиялау саласында сыбайлас жемқорлыққа қарсы талдау бойынша жұмыс жүргізіліп жатқандығын, қазірдің өзінде бірнеше жүйелі мәселелер анықталғандығын айтты.
<blockquote>
 «Субсидиялау практикасын зерделеу мақсатында облыстың аудандарында кездесулер ұйымдастырылды. Оған мүдделі ұйым басшылары қатыстырылды, «Атамекеннің» өңірлік филиалының басшылығы да бар. Облыстың барлық аудандарындағы фермерлер «QOLDAU» ақпараттық жүйесінің жұмысына байланысты проблемаларды баса айтуда. Шаруалар сыбайлас жемқорлық тәуекелдерін көрсете отырып, жүйенің жұмысына өзгерістер енгізуін сұрауда. Миллиондаған субсидия 1-3 минуттың аралығында таратылып беріледі екен. Салдарынан кәсіпкерлер өз қызметтерімен айналыспай, мықты программист мамандарды іздеп, алған субсидияның бір бөлігін осы сала мамандарына беруге мәжбүр. Тіпті ресейлік мамандардың қызметіне жүгінгендері де бар», – деген Ғалия Әлімқұлова кәсіпкерлердің бұл мәселені шешудегі ұсынысы кезектілік тәртібімен беруді қарастыру екендігін атап өтті. Яғни сала кәсіпкерлері бюджет қаражатын барлық аудандар бойынша пропорционалды түрде бөле отырып, мал басының санына сүйене отырып субсидиялауды ұсынуда.
</blockquote>
Кездесуде мұнан өзге мал шаруашылығымен айналысатын шаруа қожалықтарын дамытып, нәтижеге қол жеткізу үшін көрсетілуі қажет қолдау тетіктеріне қатысты өзге де ұсыныстар айтылып, шешілу жолдары талқыланды.
Шараны қорытындылаған Қызылорда облысы кәсіпкерлер палатасы директорының орынбасары Пірмұхаммед Сыздықов шараға қатыса алмаған өзге де кәсіпкерлердің ұсыныстарын жинақтап, ҚР Сыбайлас жемқорлыққа қарсы іс-қимыл Агенттігінің Қызылорда облысы бойынша департаментіне жолдайтындығын, алдағы уақытта бұл бағытта бірлесе шаралар қабылдауға дайын екендігін жеткізді.

Қазақстан және Қызылорда облысының жаңалықтары