<a href="https://kyzylorda-news.kz/">Kyzylorda-news.kz.</a> Өткен жылдың ІV тоқсанда денсаулық сақтау және әлеуметтік қызметтер саласы қызметкерлерінің орташа айлық жалақысы 197,4 мыңды құрады. Бұл бір жыл бұрынғы көрсеткіштерден 32,1%-ға көп, деп жазады <a href="https://qazaqstan.tv/live">Qazaqstan Ұлттық телеарнасы</a>.
Салыстыра кетсек, былтыр Қазақстанда орташа жалақы 233,1 мың теңгеге өскен еді. Бұдан денсаулық сақтау және әлеуметтік қызметтер саласының қызметкерлері еліміз бойынша жалпы жұмысшылардан 15%-ға төмен жалақы алатынын көруге болады.
Еске сала кетейік, биылғы 1 қаңтардан бастап әлеуметтік сала қызметкерлерінің лауазымдық жалақысы (құрамына медқызметкерлер де кіреді) 50%-ға өсті. 2022 жылы лауазымдық жалақы 25% – ға, ал 2023 жылы тағы 25%-ға өседі.
<img src="https://kyzylorda-news.kz/wp-content/uploads/2021/02/154432472_3931642320255985_4229054350735010066_n.jpg" alt="" />

Қызылорда: Медқызметкерлердің жалақысы қаншаға өсті?

<a href="https://kyzylorda-news.kz/">Kyzylorda-news.kz.</a>&nbsp; Алматыда 27 ақпанда өтетін MTK Fight Night турниріне қатысушылардың салмағын өлшеу рәсімі өтті. Бұл туралы &nbsp;<a href="https://www.sports.kz/news/kamshyibek-kunkabaev-proshel-vzveshivanie-pered-boem-za-titul-wbo">Sports.kz</a> хабарлайды.
Кештің басты жекпе-жегінде Қазақстан құрамасының капитаны Қамшыбек Қоңқабаев (2-0, 2 КО) бірінші ауыр салмақтағы WBO Asia Pacific чемпионы бос атағы үшін Украина өкілі Сервер Эмурлаевпен (23-1, 9 КО) жұдырықтасады. Екі қарсылас та өз санаттарының лимиті – 90,7 келіден аспады.
Естеріңізге сала кетейік, бастапқыда қазақстандықтың қарсыласы солтүстік ирландиялық боксшы Стивен Уорд (13-1, 4 КО) болуы керек еді. Бірақ ол жеке себептермен ұрыстан шығуға мәжбүр болды.
Сондай-ақ шоу аясында рингке өзге де қазақстандық және шетелдік боксшылар шығады. Турнир 27 ақпанда Нұр-Сұлтан уақытымен 17:00-де басталады. Тікелей эфир Sporttimekz және IFL TV YouTube арналарында, сондай-ақ ESPN арналарында көрсетіледі.

Қамшыбек Қоңқабаев WBO титулы үшін айқас алдында салмақ өлшеді

<a href="https://kyzylorda-news.kz/">Kyzylorda-news.kz</a>. Аймақта ел Тәуелсіздігінің 30 жылдығын атап өту жөніндегі облыстық кешенді іс-шаралар жоспары әзірленген болатын. Онда ақпан айы – «Қазақстан спорттық ұлт» спорт айы болып белгіленген. Айлық аясында 69 спорттық сайыс өткізілді. Оған 5444 спортшы қатысып, өзара бақ сынады.
Спорттық жарыстардың 3-і республикалық, 15-і облыстық, 46-сы қалалық және аудандық деңгейде ұйымдастырылды. Тоғызқұмалақтан онлайн форматта өткізілген республикалық турнирге еліміздің барлық өңірінен 144 спортшы қатысты. Сондай-ақ, еркін күрестен және волейболдан республикалық турнир өтті. Оған өзге облыстардан 610 спортшы келді. Ал гандболдан және волейболдан облыстық біріншілік өткізілді.
<blockquote>
 Бұл жарыстарды ұйымдастырудағы басты мақсатымыз – Еліміздің Тәуелсіздігінің 30 жылдығын мерекелеу, жасөспірімдер мен жастарды патриоттық сезімге тәрбиелеуге және дене шынықтыру және спорт арқылы салауатты өмірге баулу. Аталған жарыстардың барлығы карантин талаптарын сақтай отырып, көрермендерсіз, салтанатты шараларсыз өткізілді, – деді облыстық дене шынықтыру және спорт басқармасының басшысы Жақсылық Оспанов.
</blockquote>
Өңірде наурыз айында халық балуаны Қажымұқан Мұңайтпасұлының 150 жылдығына орай жастар арасында қазақ күресінен республикалық турнир, самбодан жасөспірімдер арасында ҚР чемпионаты болады.
Сәуір айында қазақ күресінен «Алтын белбеу» облыстық іріктеу турнирі, мәнерлеп сырғанаудан Элизабет Тұрсынбаеваның жүлдесіне арналған «Көктем жұлдыздары» республикалық турнирін өткізу жоспарлануда.

Қызылордада ақпан айында 69 спорттық сайыс ұйымдастырылды

<a href="https://kyzylorda-news.kz/">Kyzylorda-news.kz.</a>&nbsp; Мектеп қабырғасында оқытылатын әрбір пән өзіндік ерекше маңызға ие. Осы ретте білім ошақтарын «Бірінші байлық – денсаулық», «Дені саудың жаны сау» деп халық даналығын басшылыққа алған «Дене тәрбиесі» сабағынсыз елестету мүмкін емес. Дене шанықтыру пәні ол тек жаттығуларды орындау ғана емес, оқушыларды еңбексүйгіштікке, қажырлылыққа, төзімділікке, батылдыққа, батырлыққа, жігерлілікке, патриоттыққа, отансүйгіштікке тәрбиелейтін пән. Ол адамның тәнін ғана емес, жан дүниесін, рухын тәрбиелейді. Ал осындай міндет жүктелген ұстаздың өзі де рухы мықты, жігерлі, өз мамандығын шексіз сүйген жан болуы тиіс. Осы салада қырық жылдан астам абыройлы еңбек етіп, зейнеткер атанған қармақшылық Еркін Атабаевты сондай азаматтардың бірі деп сеніммен айта аламыз.
Ол 1952 жылы Қармақшы ауданы Жосалы кентінде қарапайым отбасында дүниеге келген. Әкесі Оразбек жүргізуші болып еңбек етсе, анасы Шәмшат Төлепова тек Сыр өңіріне ғана емес, бүкіл қазақ жұртына танымал термеші, жырау болған кісі. Бала Еркіннің өнерге бейімділігі байқалмаса да спортқа деген құштарлығы басым болды. Аудан орталығындағы өзі он жыл білім нәрімен сусындаған Шоқан Уәлиханов атындағы №26 мектепті 1969 жылы бітірісімен Алматы қаласындағы Қазақ мемлекеттік денешынықтыру институтының «денешынықтыру және спорт маманы» факультетіне оқуға түсуі сол құштарлықтың жалғасы іспеттес. Институт дипломын алып, Жосалы кентіндегі №105 орта мектепке ұстаз болып оралған жас жігіттің арман-мұраты таудан құлап аққан ағын судай арынды еді. Бұл 1973 жыл болатын.
Институт қабырғасында жеңіл атлетика түрімен айналысып, «Спорт падишасы» атанған спорт түріне ден қойған Еркін бұл саланы жақсы меңгеріп шыққан болатын. Әдетте кез келген спортшы спортпен айналысуды тоқтатып, жаттықтырушылыққа ауысқанда сол саланы меңгере алмай көп қиындық көріп жатады. Өйткені, өзің айналысу бір бөлек те, өзгені үйрету бір бөлек нәрсе. Басқаны үйрету үшін өзің көп білуің керек, әрі сезімталдық пен шыдамдылық таразыға түседі. Жас ұстаз бұл іске кіріскенге дейін Жосалы кентінде жеңіл атлетиканың арнайы білімді бірде бір маман жоқ еді. Еркін сол уақытта өзіне жан-жақты қолдау көрсеткен мектеп ұжымын, әсіресе мектеп директоры Райхан Жұмаділдаева апайы мен кәсіподақ ұйымының төрағасы Үсен Қошалақов ағайын жылылықпен еске алады. Жұмысқа бар ынтасымен кіріскен Еркін жеңіл атлетика үйірмесін ашып, екі-үш жылда аудан көлеміне белгілі Н.Сағымбаев, О.Түйебаев, Н.Түйебаев, Н.Қартанов, Б.Байшылықов секілді спортшыларды даярлап шығарды…
Жетпісінші жылдары спорт қоғамдары көп болатын. Жас бапкер сол тұста аудандық жасөспірімдер спорт мектебін басқаратын «Күрес профессоры» атанып кеткен, белгілі күрес маманы Жарболсын Құндақпаевпен, «Қайрат» ерікті спорт қоғамының төрағасы Қорғанбек Манасов және аудан орталығындағы №149 кәсіптік мектеп жанындағы «Еңбек резевтері» қоғамының басшысы Аманкелді Ерекешовпен, темір жол бекетіндегі «Локомотив» спорт қоғамының жетекшісі Қуаныш Қаражанов секілді азаматтармен қойын-қолтық араласып, жемісті еңбек етті.
Еңбек еткен жан көзге түспей тұрмайды. 1978 жылы облыстық комитетінің төрайымы Райса Войнова Еркін Атабаевты Қармақшы аудандық спорт комитетінің бастығы етіп тағайындайды. Иә, білікті маман Р.Д.Войнова спорт десе ішер асын жерге қоятын, ізденгіш жігітті көре білген еді. 1986 жылға дейін аудан спортын басқарған Ерекең көп нәрсені іске асырып, спорт түрлерінің қанат жаюына үлес қосты. Сол кезеңдері қазақша күрестен Кеңес Одағының батыры Тәйімбет Көмекбаев жүлдесін сарапқа салынатын турнир бастау алды. Қазір ол халықаралық дәрежеге ие болған. Ол кезде батырдың көзі тірі, алыстағы жайлаудан ол кісіні жүк көлігімен, мотоциклмен болса да жеткізіп, төрге отырғызып жарысты тамашалауға мүмкіндік жасайтын. Соңынан батасын алатын. Ол да өмірдің бір қызық сәттері екен-ау!
Спорт комитеті басшылығына келген ол жыл сайын өтетін облыстық спартакиада бәсекесінде оған дейін алғашқы ондыққа ілікпейтін Қармақшы ауданы командасының көрсеткіштерін жақсартуды мақсат тұтты. Жұмысты жүйелі жоспармен жүргізген Е.Атабаев қармақшылықтардың спорттың он тоғыз түрінен алдына тек Қызылорда мен Байқоңыр қаласы мен Арал ауданын жіберіп, үнемі төртінші орыннан көрінуіне қол жеткізе алды . Әр жыл сайын жиын-терім аяқтала сала қолға алынатын «Сабан той», «Алтын күз» спартакиадаларында Еркін дайындап әкелген қыз-жігіттер қазақша күрес, жеңіл атлетика, арқан тарту, сияқты ұлттық спорт түрлерінен бас бәйгені басқаға ұстатпайтын. Ол сонымен бірге аудан көлеміндегі спортқа бейімі бар жастардың осы саланың маманы атануына ұйытқы бола білді. Олардың спорт разрядтарын иемденіп, физкультура институтына оқуға түсуіне бағыт бағдар беріп отырды.
Осы орайда ол институтта өзімен бірге оқыған, жатақханада бір бөлмеде жатқан қармақшылық Қуаныш Үкенов атты азаматты құрметпен еске алады. Оқу бітірісімен институтта оқытушы болып қалған Қуаныш Еркін досының оқуға түсуге жіберген жастарға көп көмек көрсеткен болатын. Сол секілді сол уақыттары аудан басқарған Елеу Көшербаев пен түрлі салалаға жетекшілік еткен Нәжмадин Ысқақов, Абламит Сыдықов, Нұртілеу Салықов, Піртаза Қалиев секілді өзге де ағаларының Қармақшы спортының көтерілуіне ықпалы болғанын ұмытпайды. Спорт комитеті басшылығынан кеткеннен кейін Ерекең әуелі №105 қазақ орта мектебінде, кейінірек №30 қазақ орта мектебінде ұстаздық қызметін жалғастырды.
«Еңбек – мың іріліктің бірден бір нышаны» дегендей, адал еңбек өз жемісін бермей қоймайды. Еркіннен тәлім тәрбие алған қыз-жігіттер институт бітірген соң туған жеріне орала бастады. Соның бірі – спорт шеберлігіне үміткер, 800 және 1500 метр қашықтыққа жүгіруден облыс көлемінде талай рет топ жарған Найзабек Сағымбаев. Осы бір еңбекқор жігіт ұстазы Еркін Атабаев екеуі Қармақшы топырағында жеңіл атлетиканың кең қанат жаюына көп үлес қосты. Найзабек дайындаған Мұрат Кетебаев, Бақытжан Байшылықов, Молдабек Ахметов сынды спортшылар Қазақстан чемпионаттарында талай рет жүлде алды. Е.Атабаев баулыған шәкірттер арасында облыстық, республикалық, халықаралық жарыстарда топ жарғандар аз емес. Сондай-ақ еңбегі сіңген, жоғары санатты жаттықтырушылар да жетерлік. Бүгінде ұстаздың шәкірттері тәрбиелеген спортшылар талай халықаралық додаларда жеңімпаздар мен жүлдегерлер қатарынан көрініп мерейді асыруда Міне бұл туған жеріне жеңіл атлетиканың дәнін сепкен, спорттың өзге түрлерінің пайда болуына үлес қосқан Еркін Атабаевтай азаматтың маңдай терінің өтеуі десе де болады.
Ұдайы ізденіс пен еңбектің арқасында абыройға бөленген ұстаз 2015 жылы еңбек демалысына шықты. Өмірінің 42 жылын туған жерінде білім мен спорттың саласының жандануына, жас ұрпақты тәрбиелеуге арнаған жанның еңбегі елеусіз қалған жоқ. 2003 жылы ҚР Білім және ғылым министрлігінің Құрмет Грамотасымен марапатталса, 2006 жыл қорытындысымен жоғарын санатты мұғалім атанды. Сондай-ақ ауданның үздік спортшысы атануымен қатар, 2007 жылы «Қазақстан Республикасының Құрметті спорт қайраткері» атағына ие болды. Сонымен бірге білікті маман 2015 жылы Қазақстан Педагогикалық Ғылымдар Академиясының шешімімен І республикалық тәуелсіз қоғамдық байқауының жеңімпазы атанып, «Үздік ұстаз» номинациясын иемденіп, ҚР Педагогикалық Академиясының мүшелігіне сайланды. Сонымен қатар бірнеше рет облыс, аудан әкімдерінің және сала басшыларының Құрмет Грамоталарымен және Алғыс хаттарымен марапатталған.
Өмір бір орнында тұрмайды. Сонау жетпісінші жылдардың басында бойы тіп-тік, қап-қара шашы аққұба өңіне жарасып тұратын шымыр жігіт бүгінде жетпіс жас деген белеске де жақындап қалды. Бірақ адамның жастық шағын ұмытуға мұрша бермейтін спорт деген құдіретті өнерді серік еткен Ерекең өзін әлі жас жігіттей сезінеді. Жеңгеміз Әбила екеуі төрт қыз бен бір ұлы тәрбиелеп өсіріп, бүгінде немерелерінің қызығын көріп отырған жайы бар.
Еркін ағамыз қазір аудан орталығындағы №30 қазақ орта мектебінің ардақты ардагері ақылшысы. Ол аудан басшылығы және сала жетекшілері мен халық қалаулыларының назарын жасөспірімдерді салауаттық өмір салтына баулу үшін кемшін түсіп жатқан тұстар мен проблемалық мәселелерге ұдайы аударып келеді. Зейнеткер болса да саналы ғұмырын арнаған салаға немқұрайлылық қарай алмайды. Е. Атабаев міне сондай азамат.
Қызылорда қаласы
<img src="https://kyzylorda-news.kz/wp-content/uploads/2021/02/atabaev-e.jpg" alt="" />

Ұстаз мерейі

<a href="https://kyzylorda-news.kz/">Kyzylorda-news.kz.</a>&nbsp;ҚР ҚМ Мемлекеттік кірістер комитеті зейнетақы төлемдеріне салық салу жөнінде азаматтардан келіп түсіп жатқан өтініштер мен сұрауларға байланысты, қосарланған салық салу туралы алаңдауға негіз бар ма, осыған түсіндірме берді.
Агенттер (жұмыс берушілер) жеке тұлғалардан ұстап қалған міндетті зейнетақы жарналарына жеке табыс салығы (ЖТС) салынбайды, дәл осындай тәртіп міндетті кәсіптік зейнетақы жарналарына да қатысты. Зейнетақы жарналарының сомасын ұстап қалу кезінде ЖТС салынбауына байланысты зейнетақы жинақтарының сомасына төлеген кезде бір рет қана салық салынады, тиісінше қосарланған салық салуға жол берілмейді, деді ҚР ҚМ Мемлекеттік кірістер комитетінде.
Сондай-ақ, Мемлекеттік кірістер комитетінде екінші тәсілмен төленетін біржолғы зейнетақы төлемдеріне салық салу тәртібіне қатысты егжей-тегжейлі айтып берді. Бұл тәсіл БЖЗҚ белгілеген кесте бойынша (зейнетақы аудару басталған келесі айдан бастап) 16 жылдан аспайтын мерзім ішінде ай сайын тең үлестермен ЖТС ұстап қалуды көздейді.
Толықтай түсіну үшін бұл тәсілді мысал ретінде қарастыруды ұсынылған.
Мысал келтірейік:
салымшының ЖЗШ-сындағы зейнетақы жинақтарының сомасы = 8 500 000 теңге,
жеткіліктілік шегі = 3 500 000 теңге,
біржолғы зейнетақы төлемі = 5 000 000 теңге (8 500 000 – 3 500 000),
есептелген ЖТС сомасы = 5 000 000 (толық көлемде) * 10%= 500 000 теңге,
біржолғы зейнетақы төлемі түріндегі кіріс сомасы = 5 000 000 теңге,
ЖТС зейнетақыдан келесідей түрде ұсталады:
Есептелген ЖТС сомасы 16 жылға, яғни 192 айға бөлінеді. Сонымен, 500000/192 = 2604теңге – ай сайын зейнетақыдан кейінге қалдырылған ЖТС сомасы ұсталатын болады.
<blockquote>
 «Егер жеке тұлға Қазақстан Республикасынан тыс жерлерге тұрақты тұруға кетуге немесе зейнетақы жинақтарының сомаларын сақтандыру ұйымдарына аударуға шешім қабылдаса, онда кейінге қалдырылған жеке табыс салығының сомасы толық біржолғы төлеммен ұсталатын болады. Егер жеке тұлға қайтыс болса – осы жеке тұлғаның мұрагерлерінен мұраға қалған зейнетақы жинақтарынан, кейінге қалдырылған жеке табыс салығының сомасы бір рет ұсталатын болады», – деп толықтырды ҚР ҚМ МКК-нің баспасөз қызметінде.
</blockquote>
<a href="https://24.kz/kz/zha-aly-tar/bylu-manyzdy/item/457918-alyn-an-zejneta-y-zhina-tarynan-zheke-tabys-saly-y-alaj-alynady">Хабар 24</a>

Алынған зейнетақы жинақтарынан жеке табыс салығы қалай алынады

<a href="https://kyzylorda-news.kz/">Kyzylorda-news.kz.</a> Қызылорда облысының кәсіпкерлер палатасы «Кәсіпкерлік қызметті жүргізуге сервистік қолдау»&nbsp; компонентінің жүзеге асырылып жатқандығын хабарлайды. &nbsp;
Жалпы кәсіпкерлікке қатысты қызметтерді&nbsp;<a href="https://g4b.kz/">порталы</a> арқылы онлайн алуға болады.
Сондай-ақ, Қызылорда қаласындағы Палата жанындағы Кәсіпкерлерге қызмет көрсету орталығы төмендегі қызметтерді офлайн түрде де көрсетуде:
– бухгалтерлік және салық есептілігін жүргізу, сондай-ақ статистикалық есептілікті жасау қызметтері;
– маркетинг сұрақтары бойынша қызметтер;
– мемлекеттік сатып алу сұрақтары бойынша қызметтер.
Сервистік қолдау экономиканың барлық секторларында әрекет ететін шағын және орта кәсіпкерліктің субъектілеріне көрсетіледі.
ҚЫЗМЕТТЕР АҚЫСЫЗ, ТЕГІН.
Толығырақ мәліметті Қызылорда қаласы, Қорқыт ата көшесі, 123 мекен-жайында орналасқан Қызылорда облысының Кәсіпкерлер палатасының Кәсіпкерлерге қызмет көрсету орталығынан алуға болады.
Анықтама үшін телефон: 8/7242/ &nbsp;40-08-74, 40-02-02
Сall-Center – 1432

Қызылорда: Кәсіпкерлер палатасының кеңесшілері бизнес-жоспарыңызға көмектеседі

<a href="https://kyzylorda-news.kz/">Kyzylorda-news.kz.</a>&nbsp; «Қазгидромет» РМК 27 ақпан – 1 наурыз аралығындағы ауа райы болжамын ұсынды.
«Солтүстік-Батыс циклонының жақындауына байланысты республиканың басым бөлігінде ауа температурасының жоғарылуы күтіледі. Күндіз жекелеген өңірлерде оң мәнге дейін артады. Тек батыс аумақтарға циклонның ықпалы жалғасады.
Үш күнде қар мен жаңбыр түрінде жауын-шашын болады. Елдің тек оңтүстік және оңтүстік-шығысында күн райы – жауын-шашынсыз. Жекелеген жерлерде тұман, көктайғақ, желдің күшеюі және жаяу бұрқасын болжанады», – делінген хабарламада.

Демалыс күндері ауа райы қандай болады?

<a href="https://kyzylorda-news.kz/">Kyzylorda-news.kz.</a>&nbsp; Біржолғы зейнетақы төлемі пайдаланылмаса не болады? Бұл сұраққа жауап БЖЗҚ баспасөз қызметі таратқан ақпаратта айтылған, деп хабарлайды <a href="https://lenta.inform.kz/kz/birzholgy-zeynetaky-tolemi-paydalanylmasa-ne-bolady_a3757915">ҚазАқпарат</a>.
2021 жылдың 1 ақпанынан бастап БЖЗҚ уәкілетті оператор болып белгіленген банктерде ашылған салымшылардың арнайы шоттарына біржолғы зейнетақы төлемдерін аудара бастады.
Біржолғы зейнетақы төлемі уәкілетті оператор – «Отбасы банк» тұрғын үй құрылыс жинақ банкі» АҚ-дағы арнайы шотқа түскеннен кейін алушы 45 жұмыс күні ішінде (Біржолғы зейнетақы төлемдерін тұрғын үй жағдайларын жақсарту үшін Қазақстан Республикасының заңнамасына сәйкес пайдалану қағидаларының 13-тармағына сәйкес) уәкілетті операторға біржолғы зейнетақы төлемдерінің нысаналы мақсатын растайтын құжаттарды ұсынады.
Уәкілетті операторға растаушы құжаттарды белгіленген мерзімде ұсынбаған жағдайда, бұл қаражат салымшының БЖЗҚ-дағы зейнетақы шотына қайтарылуы тиіс.
Салымшы сұратқан зейнетақы жинақтарының сомасын БЖЗҚ уәкілетті оператордағы арнайы шотқа аударғаннан кейін 45 жұмыс күні ішінде бұл қаражаттың инвестициялық басқарудан алынатынына, демек, оған инвестициялық табыстың есептелмейтініне назар аударғымыз келеді.
БЖЗҚ-ғы зейнетақы активтерінің 2020 жылғы жылдық табыстылығы 10,92% құрады. Егер осы деректерді негізге алсақ, мәселен, 45 жұмыс күні ішінде мақсаты бойынша пайдаланылмаған біржолғы зейнетақы төлемінің 5,5 млн теңге мөлшеріндегі орташа сомасын уәкілетті оператордағы арнайы шоттан БЖЗҚ-ға аударғаннан кейін осы кезеңдегі салымшы толық алмаған инвестициялық табыс мөлшері шамамен 100 мың теңгені құрауы мүмкін.
Бұдан басқа, арнайы шотқа аударылған зейнетақы жинақтарына инфляция деңгейін ескере отырып, олардың сақталуы бойынша мемлекеттің заңда көзделген кепілдігі қолданылмайды. Сондай-ақ, БЖЗҚ-дан төленетін біржолғы зейнетақы төлемдерінің сомаларынан салымшы таңдаған және оның өтінішінде көрсетілген тәсілге сәйкес жеке табыс салығын (ЖТС) есептеу және ұстап қалу жүргізіледі.
Осыған орай, БЖЗҚ-ға қаражатты қайтару, инвестициялық табыс пен мемлекет кепілдігін жоғалту, сондай-ақ, ЖТС-ты мерзімінен бұрын есептеу жағдайларын болдырмау үшін салымшыларға біржолғы зейнетақы төлемдерін пайдалануды жауапкершілікпен әрі мұқият жоспарлауды ұсынамыз. Зейнетақы жинақтарының мақсатты пайдаланылуын растау үшін қажетті құжаттардың тізімін өтінім бергенге дейін мұқият зерделеп, оларды уәкілетті операторға уақытылы ұсынуды қамтамасыз еткен жөн.
Еске салсақ, 2 қаңтарда ҚР Президенті Қасым-Жомарт Тоқаев зейнетақы жинағының бір бөлігін мақсатты пайдалануға қатысты заңға қол қойды.
Қазақстандықтардың зейнетақы жинақтарын пайдалану үшін жаңартылған «жеткіліктілік шегі» жарияланды. Зейнетақы жинағынан алуға болатын сома БЖЗҚ сайтында автоматты түрде көрсетіледі.

Біржолғы зейнетақы төлемі пайдаланылмаса не болады

<a href="https://kyzylorda-news.kz/">Kyzylorda-news.kz.</a>&nbsp; Қазақстанда пәтерлер ақпан айында орта есеппен 3,5 пайызға қымбаттады. Krisha.kz сарапшыларының пікірінше, пәтер бағасы рекордтартық көрсеткіштерге жетті, деп хабарлайды&nbsp;<a href="https://stan.kz/">Stan.kz</a>.
Пәтер бағасының едәуір өсуі үш облыс орталығында – Ақтау, Орал, Атырауда байқалады. Біржолғы зейнетақы төлемдерінің мөлшері бойынша бұл өңірлер&nbsp;көш бастап тұр.
Осылайша, Ақтауда тұрғын үйдің бір шаршы метрінің орташа құны 13,1 пайызға өсті. Шаршы метрді сатушылар 216 975 теңгеге бағалайды. Бұл соңғы үш жылдағы абсолютті максимум. Бұл деңгей соңғы рет 2018 жылдың қаңтарында, ұзаққа созылған құлдырау кезеңіне дейін тіркелді.
Екінші орында Орал қаласы (плюс 7,8 пайыз). шаршы метр&nbsp;құны 246 550 теңгені құрайды – бұл соңғы 5 жылдағы ең жоғарғы көрсеткіш.
Сондай-ақ, Атырау жоғары динамикалы және құндылығы бойынша рекордты қалалардың үштігіне кірді (плюс 4,8 пайыз). Шаршы метрі ақпанда 296 700 теңгені құрады.
Өскемен мен Ақтөбеде пәтер бағасы 4,3 пайызға, Қызылордада 4 пайызға өсті. Шаршы метрі 309 350, 186 400 және 162 925 теңгені құрайды.
Семейде индекс 3,3 пайызға өсіп, бір шаршы метр үшін 244 925 теңгені құрады.
Петропавлда – 2,9 пайыз: 244 925 теңге / шаршы метр.
Талдықорғанда – 2,7 пайыз: 266 800 теңге / шаршы метр.
Қостанайда – 2,5 пайыз: 260 175 теңге / шаршы метр.
Алматыда ұсыныстар бір айда 2,4 пайызға өсті. Қазір орташа құны бір шаршыға 479 425 теңгені құрайды – бұл соңғы 5 жылдағы ең жоғарғы көрсеткіш.
Күні кеше&nbsp;Тоқаев еліміздегі үйлердің қымбаттауын&nbsp;қалай реттеуге болатынын&nbsp;айтты.&nbsp;Мемлекет басшысы Қасым-Жомарт Тоқаев қол жетімді баспана мәселесін шешу үшін құрылыс ұйымдарымен алдын ала келісім жасауды ұсынды.

Рекордтық көрсеткішке жетті: Қазақстанда пәтер бағасы қымбаттап жатыр

&nbsp;<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 746 адам коронавирус індетінен емделіп шықты. Бұл туралы&nbsp;<a href="http://www.coronavirus2020.kz/">www.coronavirus2020.kz</a> сайты хабарлады.
Аймақтар бойынша:
Нұр-Сұлтан қаласы – 86,
Алматы қаласы – 59,
Шымкент қаласы – 5,
Ақмола облысы – 62,
Ақтөбе облысы – 19,
Алматы облысы – 64,
Атырау облысы – 56,
Шығыс Қазақстан облысы – 32,
Жамбыл облысы – 10,
Батыс Қазақстан облысы – 72,
Қарағанды облысы – 42,
Қостанай облысы – 96,
Қызылорда облысы – 16,
Маңғыстау облысы – 6,
Павлодар облысы – 78,
Солтүстік Қазақстан облысы – 32,
Түркістан облысы – 11.
Қазақстан бойынша жазылғандар саны – 195121.

Бір тәулікте 16 қызылордалық коронавирустан емделіп шықты

<a href="https://kyzylorda-news.kz/">Kyzylorda-news.kz.</a>&nbsp;8 наурыз – Халыықаралық әйелдер күніне орай қазақстандықтар 3 күн демалады.
Биыл 8 наурыз дүйсенбіге тура келеді. Сәйкесінше қазақстандықтар&nbsp;сенбі, жексенбі және дүйсенбіде&nbsp;демалады.
Сондай-ақ Мемлекеттік мерекелер күнтізбесіне сәйкес, қазақстандықтар жыл сайын Наурыз мейрамында үш күн – 21-23 күндері демалады. Дегенмен, биыл 21 наурыз жексенбіге дәл келіп отыр. Ал «Қазақстан Республикасындағы мерекелер туралы» Заңға сәйкес, демалыс және мереке күндері сәйкес келген жағдайда мерекеден кейінгі жұмыс күні демалыс болып есептеледі.

Қазақстандықтар 8 наурыз мерекесіне орай  неше күн демалады?

<a href="https://kyzylorda-news.kz/">Kyzylorda-news.kz.</a>&nbsp;Қазақстанда өткен тәулікте 855 адамда коронавирус індетін жұқтырды, деп хабарлайды&nbsp;<a href="http://www.coronavirus2020.kz/">www.coronavirus2020.kz</a>.
Аймақтар бойынша:
Нұр-Сұлтан қаласы – 135,
Алматы қаласы – 110,
Шымкент қаласы – 12,
Ақмола облысы – 74,
Ақтөбе облысы – 16,
Алматы облысы – 72,
Атырау облысы – 28,
Шығыс Қазақстан облысы – 64,
Жамбыл облысы – 21,
Батыс Қазақстан облысы – 75,
Қарағанды облысы – 54,
Қостанай облысы – 65,
Қызылорда облысы – 8,
Маңғыстау облысы – 2,
Павлодар облысы – 78,
Солтүстік Қазақстан о,блысы – 38
Түркістан облысы – 3.
Жалпы ел бойынша ауырғандар саны 211212.

Қазақстан және Қызылорда облысының жаңалықтары