<a href="https://kyzylorda-news.kz/">Kyzylorda-news.kz</a>. ҚР Денсаулық сақтау министрлігі Санитарлық-эпидемиологиялық бақылау комитетінің төрайымы Айжан Есмағамбетова сәуірде азаматтардың қай санатына коронавирусқа қарсы вакцина салынатындығын айтты, деп хабарлайды <a href="https://lenta.inform.kz/kz/sauirde-azamattardyn-kay-sanaty-vakcina-alady_a3766526">ҚазАқпарат</a>.
<blockquote>
 «Бірінші кезеңде медицина қызметкерлеріне, педагогтарға, күштік құрылымдардың өкілдеріне екпе жасадық. Осы санатқа вакцинация жалғаса береді. Вакцинаның қосымша үлкен жеткізілімі түсетіндігін ескере отырып, созылмалық аурулары бар, тәуекел тобына кіретін адамдарды вакциналау көзделеді. Сонымен қатар медициналық-әлеуметтік және өзге де жабық мекемелердің қызметкерлері мен контингенті вакцина алады. Өйткені, жабық мекемелерде коронавирус инфекциясының таралуы тәуекелі біршама жоғары», – деді ол.
</blockquote>
Оның атап өтуінше, алдағы уақытта халықтың басқа санаттары, оның ішінде 65 жастан асқан зейнеткерлер де коронавирус инфекциясына қарсы екпені біртіндеп алатын болады.
<blockquote>
 «Қарағанды медициналық фармацевтика кешенінде 600 мың доза вакцина шығарылатын болады. Бұл осы уақытқа дейін жасалған келісімшарт аясында жүзеге асырылады. Қазіргі уақытта қосымша қажет екпеге байланысты «Спутник V» вакцинасын өндірушілермен келіссөз жүргізіліп жатыр», – деді Айжан Есмағамбетова.
</blockquote>

Сәуірде азаматтардың қай санаты вакцина алады?

<a href="https://kyzylorda-news.kz/">Kyzylorda-news.kz</a>. Қала әкімінің міндетін атқарушы Б. Нуридиновтың 2021 жылғы 18 наурыздағы №58 өкімімен Құрақбаева Кенжегүл Құрақбайқызы қалалық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы қызметіне тағайындалды.
Кенжегүл Құрақбайқызы, 1967 жылы Қызылорда облысы, Қызылорда қаласы Қосшыңырау ауылында дүниеге келген.
Білімі жоғары. 1984 жылы Новосибирск қаласы, Сауда техникумында «Есепші», 2000 жылы Қарағанды экономикалық университетінің «Қаржы және несие» мамандығы бойынша білім алған.
Еңбек жолын 1987 жылы облыстық зейнетақы және жәрдемақы орталығында бөлім инспекторы болып бастаған.
1993–1996 жж. Қызылорда қалалық халықты әлеуметтік жағынан қорғау бөлімінде инспектор, аға инспектор, бас маман;
1996–1999 жж. Қызылорда қалалық халықты әлеуметтік жағынан қорғау бөлімінде, Зейнетақы төлеу бөлімінің бастығы;
1999–2000 жж. Қызылорда қалалық халықты әлеуметтік жағынан қорғау бөлімі, Ардагерлер секторының меңгерушісі;
2000–2005 жж. Қызылорда қалалық еңбек және халықты әлеуметтік қорғау бөлімі, Әлеуметтік жәрдемақы төлеу және соғыс ардагерлерімен, мүгедектермен жұмыс атқару бөлімінің бастығы;
2005 жылдың қаңтар айынан бастап осы кезге дейін Қызылорда қалалық жұмыспен қамту, әлеуметтік бағдарламалар және азаматтық хал актілерін тіркеу бөлімі басшысының орынбасары қызметін абыроймен атқарып келді.
Отбасылы, екі ұл, төрт немере тәрбиелеп отыр.
<img src="https://kyzylorda-news.kz/wp-content/uploads/2021/03/162568042_2796097317323675_6199721780460673678_o.jpg" alt="" />

Қалалық жұмыспен қамту бөліміне басшы тағайындалды

<a href="https://kyzylorda-news.kz/">Kyzylorda-news.kz</a>. Қазгидромет 20-21 наурызға арналған ауа райы болжамын жариялады.
<blockquote>
 «Қара теңіз үстінде қалыптасқан циклон 20-21 наурызда Қазақстанның ауа райын анықтайды. Көптеген облыстарда жауын-шашын (жаңбыр, қар) болады және ауа температурасының жоғарылауы байқалады. Алайда, қыс берілгісі келмейді және кезекті антициклон біздің аумаққа батыстан ауысады. Бұл көктайғақтың пайда болуын әкелсе де, температураның айтарлықтай төмендеуіне әкелмейді», – делінген Қазгидромет хабарламасында.
</blockquote>

Демалыс күндері ауа райы қандай болады?

<a href="https://kyzylorda-news.kz/">Kyzylorda-news.kz</a>. Қызылорда көпсалалы балалар ауруханасының нейрохирург-дәрігерлері қызылордалық 10 жасар Даниял Қуанышұлының миына күрделі ота жасады.
Дәрігерлер E.Dowling заманауи әдісі бойынша баланың миындағы 10-11 сантиметр көлеміндегі эхинококкоз кистасын алды.
Баланың анасы Гүлназ Жүндібаеваның айтуынша, ұлының сырқаты ағымдағы жылдың ақпан айында біліне бастаған. Баласының басы жиі ауырып, жағдайы нашарлаған соң өздеріне қарасты емханаға барған. Емхананың дәрігер-невропотологы тексеру жұмыстарын жүргізіп, оның миында эхинококкоз кистасы бар екенін тауып, Нұр-Сұлтан қаласындағы нейрохирургилық орталыққа портал арқылы тіркейді. Кезек күту барысында науқас ем алғанымен, 14 наурыз күні жағдайы күрт нашарлап, жедел-жәрдем арқылы облыстық балалар ауруханасына түседі.
Балаға күрделі отаны көпсалалы балалар ауруханасы нейрохирургия бөлімшесінің меңгерушісі Қанат Медетбаев және Аманжол Рүстемов пен Ануар Қосбармақов жасады. Ота 2 жарым сағатқа созылып, дәрігерлер оң нәтижеге қол жеткізген.
Дәрігерлердің айтуынша, қазіргі таңда бала өзін жақсы сезінеді. Науқастың көру қабілеті мен оң жақ қимыл қозғалысы қалыпқа келген.
Айта кетейік, күрделі отаны бастан өткерген бала алдағы 10 жыл дәрігерлердің бақылауында болады.
<img src="https://kyzylorda-news.kz/wp-content/uploads/2021/03/162491551_925591624862546_8673830066783971854_n.jpg" alt="" />
<img src="https://kyzylorda-news.kz/wp-content/uploads/2021/03/162303247_925591668195875_1098075709270430710_n.jpg" alt="" />

Қызылордалық дәрігерлер 10 жасар баланың бас сүйегіне күрделі ота жасады

<a href="https://kyzylorda-news.kz/">Kyzylorda-news.kz</a>. Қызылорда облыстық дін істері басқармасының бастамасымен 10-22 наурыз аралығында «Ұлттық құндылық – ұлт болмысы» тақырыбымен ақпараттық челлендж басталды.
Аталған челлендж арқылы әлеуметтік желіде ұлттық тағамды әзірлеу, ұлттық киімді көрсету, ұлттық дәстүрлер мен ұлттық ойындарды насихаттау және көктемгі тазалық, оның ішінде ағаш отырғызуға шақыру бағытындағы жұмыстар қамтылған.
<blockquote>
 «Бүгінде ұлт тарихын, ұлттық құндылықтарды әлеуметтік желіде кеңінен ақпараттандыру өте маңызды. Себебі жат ағымның ізінен еріп, адаспау ішін ұлттық рух пен болмыс, қазақы сенім мен түсінік керек. Біз соны қоғам ішінде насихаттап келеміз. Мәселен, қазір деструктивті діни ағым идеологиясына қарсы насихат жұмыстарды күшейту мақсатында «Көмбе.SYR» атауымен YouTube арнасын аштық. Арна ішінде «Сыр-сұқбат», «Жыр-жақұт», «Поэзия патшалығы», «Көнелер көзімен», «Сыр-сандық», «Жаршы» тақырыптық бағытында бағдарламалар шығарып жатырмыз», – деді облыстық дін істері басқармасының басшысы Қуаныш Жанұзақов.
</blockquote>
Бұдан бөлек, облыста жат ағымның арбауында қалып, теріс бағыттағы діни ұйымдардың құрбаны болған адамдарға көмек беретін, діни сауалдарына жауап беретін «Ақниет» орталығы жұмыс істейді.
<blockquote>
 «Орталық құрылғалы діни радикализмге қарсы жұмыстарды жүргізіп келеміз. Яғни, диструктивті ағымның ізінен кеткен адамдарды қайта оңалтумен айналысамыз. Біздің офис Сырдария мөлтек ауданында орналасқан. Қазір орталықта 2 теолог маманы жұмыс істейді. Олар кеңес беріп, өзіміздің дәстүрлі дінді түсіндіретін болады», – деді «Ақниет» ақпараттық-насихаттау және оңалту орталығы» қоғамдық қорының өңірлік жетекшісі Жеңіс Маткаримов.
</blockquote>
Сондай-ақ, аймақтағы діни ахуалды зерттеу және талдау мақсатында үнемі әлеуметтік сауалнамалар жүргізіліп отырады. Қазіргі таңда халық арасында жүргізілген сауалнама нәтижесінде 95,4%-ы облыстағы діни ахуалдың жай-күйін «тұрақты» деп бағалаған.
Айта кетейік, бүгінде Қызылорда облысында 7 конфессияға жататын 189 діни ұйым, оның ішінде 11 жергілікті діни бірлестік және 178 филиал жұмыс жасайды.
<img src="https://kyzylorda-news.kz/wp-content/uploads/2021/03/162417914_1252135908515252_518038048628633784_o.jpg" alt="" />

Қызылордада «Ұлттық құндылық – ұлт болмысы» челленджі басталды

<a href="https://kyzylorda-news.kz/">Kyzylorda-news.kz</a>. Назарбаев Зияткерлік мектептерінің бастамасымен өткен Наурыз кездесулері аясында қызылордалық оқушылар қоқысты өздігінен сұрыптап, тазалайтын роботтар прототипін жасады. Бұл экологиялық машиналар планетамызды жасыл және таза ұстауда үлкен көмегін тигізеді.
Бұл өрендер жер шарының экологиялық ахуалына алаңдайды. Әсіресе айналаны пластик қалдықтарымен залалсыздандыру мәселесіне ерекше мән беріп, оның шешілу жолдарын қарастыруда. Наурыз кездесулеріне Жалағаш ауданынан келген 10-сынып оқушысы Нұрсұлу Мырзаш планетаны пластиктен тазалауға роботтар үлкен септігін тигізер еді деп санайды.
<blockquote>
 «Назарбаев Зияткерлік мектебінде өтіп жатқан вебинарларда робот құрастырып жатырмыз, көптеген ақпарат алып жатырмын. Мен үшін үлкен жетістік. Робототехника дамыған заманда, әрбір мекенге, көшеге роботтар қою керек. Пластикті бөліп жинау, оны қайта өндейтін зауыттарды ашу арқылы қоғамымызды тазартып, мәселені түбегейлі жоя аламыз», – дейді дарынды жас.
</blockquote>
Биыл оныншы рет ұйымдастырылған Наурыз кездесулеріне еліміздегі Зияткерлік және жалпы білім беретін білім ордаларынан 500-ге жуық оқушы қатысты. Балалар экологиялық тақырыптарға арналған қазақстандық және шетелдік ғалымдардың вебинарлары мен тренингтеріне қатысу арқылы жаңа білім алып, зерттеушілік қабілеттерін арттырды.
<blockquote>
 «Біз пластикке қайта өмір беруге болатынына тағы да көзіміз жетті. Атақты спикерлердің таныстырылымдарынан өте маңызды ақпараттар алып, пластик қалдықтарынан не өндіруге болатынын, оны қай бағытта пайдалануға болатынын білдік», –дейді Қызылорда қ. NIS-тің 9-сынып оқушысы Жұлдызай Мұнайтбасова.
</blockquote>
Экологиялық таза өмірге алғашқы қадамдардың бірі – адамзат экомәдениеті деген үндеу салған жас өрендер «Пластикке екінші өмір сыйла» экологиялық экочелленджде тың жобаларымен бөлісті. Оқушылар жер шарының жасыл болашағына әрқайсымыздың жауапты екендігімізді еске салып, қарапайым пластиктен жасаған тұрмысқа қажетті пайдалы дүниелерді таныстырды.
<img src="https://kyzylorda-news.kz/wp-content/uploads/2021/03/6873a296-9840-49a2-b3af-db4a3f781830-1.jpg" alt="" />

Қызылордалық оқушылар эко-роботтар құрастырды

<a href="https://kyzylorda-news.kz/">Kyzylorda-news.kz</a>. Республиканың әр өңірінен жиналған үздік ұстаздар ҚР Президенті Жарлығымен «Қазақстанның еңбек сіңірген ұстазы» құрметті атағын иеленді. Үздіктердің қатарында Қызылорда облысы, Қазалы ауданындағы №249 мектептің ұстазы Жәмилә Әбжан құрметке бөленді.
Тәжірибелі ұстазға ҚР Білім және ғылым министрі Асхат Аймағамбетов салтанатты түрде марапатты табыстады. Үздік ұстаз 1000 айлық есептік көрсеткіш мөлшерінде сыйақы иеленді. Яғни, сырбойылық ұстазға 2 млн 700 теңгенің сертификаты берілді.
Жәмилә Әбдінағиқызы – жоғары санатты педагог-зерттеуші. Білім Беру Ісінің Құрметті қызметкері, республикалық Білім Академиясының Құрмет грамотасының, халықаралық АКСЕЛС қоғамының Құрмет грамоталарының иегері. Педагогика саласында 32 жыл еңбек өтілі бар білікті ұстаз. 
“Үздік Ұстаз” , “Үздік авторлық бағдарлама” жинақтарының авторы.
Жәмилә Әбдінағиқызы – Америка Құрама Штаттарының елшілігі мен Қазақстан Білім Министрлігі ұйымдастырған ағылшын тілі пәні мұғалімдерінің сайысында жүлдегер атанып, АҚШ елінің ұстаздарымен тәжірибе алмасуға жолдама алған ұстаз.
Шәкірттері халықаралық АКСЕЛС қоғамы ұйымдастырған сайыстың жеңімпазы ретінде АҚШ-та білім алған. Оқушысы Н.Оңдасов «Болашақ» бағдарламасы бойынша Ирландияның Дублин қаласында білім алуда. Оқушылары ҰБТ көрсеткіші бойынша жыл сайын жоғары балл жинақтап, мемлекеттік грант иегері атануда.
Аймақ абыройын асырып, биік белеске шыққан ұстазды марапатымен құттықтаймыз!

Қызылордадағы ауыл мұғалімі «Қазақстанның үздік ұстазы» атанды

<a href="https://kyzylorda-news.kz/">Kyzylorda-news.kz</a>. Қызылорда облысы Полиция департаментінің бастығы полиция полковнигі Бектөре Сұлтан қиын да жауапты саланың үздік мамандарын марапаттады. &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
Қызылорда қалалық Полиция басқармасының Ақсай полиция бөлімінің аға тергеушісі полиция аға лейтенанты&nbsp;Сұлтан Рысбай «Үздік тергеуші» болып танылса, жас та болса, қайсарлығымен көзге түскен&nbsp;Қызылорда қаласы Полиция басқармасының аға&nbsp;анықтаушысы полиция аға лейтенанты Мәди Қайсариев&nbsp;«Үздік анықтаушы» атанды. &nbsp;
<blockquote>
 «Жауапты қызметті абыроймен атқарып,&nbsp; жақсы нәтижелермен көзге түскен қызметкерлерді марапаттарымен құттықтап, алғыс білдіреміз. Атқарып отырған еңбектеріңізге табыс, отбасыларыңызға амандық, береке-бірлік тілеймін!», – деді Департамент бастығы&nbsp;Бектөре Жеңісбайұлы.&nbsp; &nbsp;&nbsp;&nbsp;&nbsp;
</blockquote>
Марапаттау рәсімінде барлық санитарлық талаптар сақталды.

Қызылордада үздік тергеуші мен анықтаушы марапатталды

<a href="https://kyzylorda-news.kz/">Kyzylorda-news.kz</a>. Қызылорда облыстық партия филиалы төрағасының бірінші орынбасары Ләйлә Төрешова өткізген қоғамдық қабылдауға келген қала тұрғындары баспана мен әлеуметтік көмектер көрсету жөнінде өтініштерін білдірді.
Төрағаның бірінші орынбасары әрбір мәселені мұқият тыңдап, тиісті сала өкілдерімен бірге шешу жолдарын зерделеді. Өтініш иелерімен ортақ талқыға түскен әрбір өтініш иесіне заң аясында нақты кеңестер беріліп, баспаналы болудың алғашқы қадамдары түсіндірілді.
Қабылдауға келген азаматтар мүмкіндікті барынша пайдаланып, көкейлеріндегі өзге де сауалдарына жауап іздеді. Барлық өтініштер қаралды, тиісті көмек берілді.

«Nur Otan»: Барлық өтініш қаралып, тиісті көмек берілді

<a href="https://kyzylorda-news.kz/">Kyzylorda-news.kz</a>. Қызылорда облысының бас мемлекеттік санитарлық дәрігері мереке күндері сақтық шараларын назардан тыс қалмау керектігін айтады.
«Құрметті қызылордалықтар! Сіздерді Ұлыстың ұлы күні – Наурыз мерекесімен құттықтаймын. Биыл Наурыз мейрамы әдеттен тыс жағдайға тұспа-тұс келіп отыр. Пандемияға айналған коронавирустың кеңінен таралуы бұл мейрамды карантиндік режимде атап өтуді талап етіп отыр.
Бүгінгі күні Қызылорда облысы коронавирус инфекциясының эпидахуалын бағалау матрицасында «жасыл» аймақта. Дегенмен де COVID-19 инфекциясын жұқтыру жағдайлары күн сайын тіркелуде. «Өкінішке орай, карантин талаптарын бұзушылықтар әлі де азаймай тұр. Жыл басынан бүгінгі күнге дейін 99 карантин талабын бұзушылық анықталды. Оның басым көпшілігі халыққа қызмет көрсету орындарында анықталуда, үй жағдайында той жасау фактілері азамай отыр. Карантин талаптарын бұзушылықтар кәсіпкерлік нысандармен қатар, білім беру, медициналық ұйымдар мен мемлекеттік мекемелерде де орын алып отыр.&nbsp;&nbsp; Сақтық шаралары ғана індетті тоқтата алатындығын естен шығармауымыз керек.
Өңірімізде карантин талаптары кезең-кезеңімен жеңілдетілгенімен бірқатар шектеулер әлі де сақталуда. Солардың бірқатары –&nbsp; ойын-сауық іс-шараларын, сондай-ақ отбасылық, салтанатты, естелік іс-шараларды (банкеттер, үйлену тойлары, мерейтойлар), оның ішінде үйде және адамдар көп жиналатын өзге де іс-шараларды&nbsp; өткізуге, мерекелік корпоративтерді ұйымдастыру мен өткізуге тыйым салынады.
Алдағы Наурыз мекересі мен ұзақ демалыс күндері&nbsp; халық көп жиналатын орындарға бармауға, ұжымдық іс-шаралар өткізбеуге және қатыспауға, суық тигізіп алмауға, індеттің алдын алу шараларын сақтауға шақырамын. Елдегі эпидемиологиялық жағдай әрқайсымызға байланысты, сондықтан маска тағып жүріңіздер, әлеуметтік ара қашықтық пен қарапайым гигиена талаптарын сақтауларыңызды сұраймын», – дейді Қызылорда облысының Бас мемлекеттік санитариялық дәрігері Динара Жанабергенова.

Мереке күндері сақтық шараларын қатаң сақтау қажет

<a href="https://kyzylorda-news.kz/">Kyzylorda-news.kz</a>. «Апостиль» мөртабанын қою Гаага конвенциясына қосылған, консулдық заңдастыру талаптарының күшін жоятын және жеңілдетілген заңдастыру рәсімін енгізетін елдерге құжаттар жолдау кезінде қолданылады. Яғни, апостиль – бұл заңдастырудың осы түрін мойындайтын елдердің аумағында ұсыну үшін құжаттың заңдылығы туралы ақпаратты толтырудың халықаралық стандартталған нысаны.
Бүгінде «Қазақстан Республикасының әділет органдарынан және өзге мемлекеттік органдарынан, сондай-ақ нотариустардан шығатын ресми құжаттарға апостиль қою» мемлекеттік қызметін толық электрондық нысанда көрсету бойынша пилоттық жоба шеңберінде мемлекеттік қызметті электрондық нысанда алу іске асырылуда.
Апостиль – құжатқа қол қойған тұлғаның қолының және оның өкілеттіктерін растайтын, сондай-ақ осы құжатта бекітілген мөрдің немесе мөртабанның түпнұсқалылығын қағаз түрінде немесе электрондық нысанда куәландыратын арнайы мөртаңба болып табылады.
«Е-Апостиль» ақпараттық жүйесі – құжаттарды тіркеуге және апостиль «мөртаңбасын» электрондық түрде беруге арналған, апостиль қойылған құжаттардың орталықтандырылған есебі мен бірыңғай мұрағатын қамтамасыз ететін ақпараттық жүйе.
Бұл ақпараттық жүйе арқылы электрондық нысанда қызмет алу үшін тұлға электрондық цифрлық қолтаңбаны қолдана отырып, портал арқылы өтініш береді.
Апостиль қою үшін ұсынылған құжат сканерленген құжаттың түпнұсқасын сканерлеу арқылы жүзеге асырылады (ксерокөшірмелерден сканерлеуге жол берілмейді).
Электрондық апостиль қою үшін ұсынылатын сканерленген құжат түпұсқаға дәлме-дәл сәйкес келуі тиіс, түзетулерге немесе мәтінді шимайлауға &nbsp;жол берілмейді.
Қызметті беруші ресми құжаттағы лауазымды адамның қойған қолы мен мемлекеттік органның мөр бедерінің қолда бар үлгілерге сәйкестігін, сондай-ақ ресми құжатқа қол қойған лауазымды адамның ресми құжатқа қол қоюға өкілеттіктерінің болуын тексереді.
Одан әрі ұсынылған құжаттарға жүргізілген тексеру нәтижелері бойынша қызметті беруші мемлекеттік қызмет көрсету немесе одан бас тарту туралы шешім қабылдайды.
Өтінішті және қажетті құжаттарды портал арқылы тапсырған кезде өтініш келіп түскен сәттен бастап 1 (бір) жұмыс күні ішінде оның «жеке кабинетіне» мемлекеттік қызметті көрсетуге сұрау салуды қабылдау туралы мәртебе жіберіледі.
Қызметті алушының өтініші мен ұсынылған құжаттары талаптарға сәйкес келген жағдайда, қызметті беруші апостильдеуге жататын электрондық құжатта Е-Апостиль ақпараттық жүйесі арқылы электрондық апостиль қалыптастырады және уәкілетті тұлғаның ЭЦҚ қойылған мемлекеттік қызмет көрсету нәтижесін ЭҮШ арқылы қызметті алушының «жеке кабинетіне» порталға &nbsp;жібереді.
Электрондық апостильдің астында қызметті берушінің электрондық парағының мекенжайы (веб-параққа сілтеме) көрсетіледі. Электрондық тіркелімде электрондық апостиль қойылатын құжаттар бойынша тіркеу жүргізіледі.
Апостиль мөртаңбасының нысанынан тыс жерде төменде «Осы апостиль қол қоюшының қолының, лауазымының/атағының түпнұсқалығын және құжатқа қойылған мөрдің немесе мөртаңбаның түпнұсқалығын куәландырады және ол қойылған құжаттың мазмұнын куәландырмайды» деген мәтін көрсетіледі.
Электронды қызметтің қазіргі таңда қай салада болса да өзінің оң нәтижелерін бере бастағанын ескерсек, «Е-Апостиль» ақпараттық жүйесі де алдағы уақытта халықтың көңілінен шығатынына сеніміз мол.
Еркін Тажикенов,
Қызылорда облысы Әділет департаментінің
Тіркеу қызметі саласындағы әдістемелік қамтамасыз
ету және бақылау бөлімінің басшысы

«Е-Апостиль» ақпараттық жүйесінің тиімділігі қандай?

<a href="https://kyzylorda-news.kz/">Kyzylorda-news.kz</a>. Қызылордада жыл басынан бері 7 529 отбасына атаулы әлеуметтік көмек төленді.
Ал көмек алушылардың ішінен еңбекке жарамды 1828 адам жұмыспен қамтылды. Оның ішінде 812-сі тұрақты жұмысқа орналасты. Бұл туралы Өңірлік коммуникациялар қызметінің ақпарат алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова мәлімдеді.
<blockquote>
 «Мемлекет тарапынан бөлінетін жәрдемақылар, әлеуметтік көмектерден бөлек жыл сайын қайырымдылық акциялары ұйымдастырылып отырады. Былтыр көмекке мұқтаж 14 мыңнан астам отбасына 161 млн теңгеге азық-түлік және тұрмысқа қажетті заттар берілді. Сондай-ақ, «Асар» әдісімен аз қамтылған көп балалы 20 отбасы тұрғын үйге қол жеткізді. Ал биыл «Қайырымды істер марафоны» жобасы аясында 1000-нан астам отбасына көмек көрсетілді. Жақында аймағымызда республикалық «Халық» және «Береке» қайырымдылық қорлары «Халық берекесі» әлеуметтік жобасын ұсынды. Бұл жоба көмекке мұқтаж отбасыларды «дағдарыс» жағдайынан шығаруға мүмкіндік береді. Қазіргі таңда, үйлестіру жұмыстары жүргізілуде», – деді Гаухар Амангелдіқызы.
</blockquote>
Сонымен қатар әлеуметтік қызметтер порталы арқылы мүмкіндігі шектеулі азаматтарға 1600 дана техникалық оңалту құралы берілді.

Қазақстан және Қызылорда облысының жаңалықтары