<a href="https://kyzylorda-news.kz/">Kyzylorda-news.kz</a> Қызылорда қаласындағы Назарбаев Зияткерлік мектебінің ұжымы Президент Жолдауын талқылады. Teams платформасында өткен жиынға мектептің барлық педагогикалық құрамы, әкімшілік бөлімі мен техникалық қызметкерлері қатысты.
Мемлекет басшысының дәстүрлі баяндамасы әдеттегідей ел дамуы мен халықтың әл-ауқатын жақсартуға арналған маңызды бастамаларды қамтиды. Оның ішінде денсаулық пен білім сапасын арттыруға ерекше мән беріліп, еңбек нарығын жақсарту, саяси жаңғыру мен ұлт бірлігін нығайту шаралары атап көрсетілді.
<blockquote>
 «Бұл Жолдау мемлекет экономикасының пандемиядан кейінгі даму бағыттарын айқындайды. Атап айтқанда, білім саласы мен әлеуметтік салаларды дамытуға қажетті алғышарттарды статистикалық деректермен нақты көрсетеді. Барлық айтылған бастамалар еліміздің алдағы уақыттағы тұрақты даму прогресін қамтамасыз етері сөзсіз», – дейді тарих пәнінің мұғалімі Нұркен Әбдіжәлиев.
</blockquote>
Зияткерлік мектеп педагогтары жолдауда көрсетілген міндеттер бойынша өз ой-пікірлерімен бөлісе отырып, ұстаздарға жүктелген міндеттерді жүзеге асыруға бірауыздан дайын екендіктерін жеткізді.
<blockquote>
 «Мемлекет басшысының ұсынған идеялары қазіргі жаһандық жағдайда аса қажетті болып отыр. Орта мектептердің көптеп салынуы педагог мамандарының маңызын көрсетсе, дарынды балаларды қолдау арқылы жастардың білім мен ғылымға деген қызығушылығын арттырып, үздік нәтиже көрсетуге мотивация беруі алға ұмтылдырады», – деп ой білдірген мектеп директоры Бахыт Жұматай мемлекеттің зияткерлік әлеуетті қалыптастырудағы әрбір бастамаларының сәтті орындалуында мектептердің үлесі зор екенін атап өтті.
</blockquote>
Ел келешегі – білімді жастардың қолында екені сөзсіз. Осы ретте жаңа жағдайға бейімделген оқу бағдарламалары мен реформалары зияткер ұрпақ тәрбиелеп, еңбек нарығында жоғары сұранысқа ие түлектерді дайындауға ықпал ететіні анық.

Назарбаев Зияткерлік мектебінің ұжымы Президент жолдауын талқылады

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы кәсіпкерлер палатасының заңгерлері сегіз жылда үш мыңнан астам кәсіпкердің құқығын қорғап, 8,8 млрд теңгесін сақтап қалған.
Жалпы «Атамекен» қызметінің басты бағыттарының бірі – кәсіпкерлердің құқығы мен заңды мүддесін&nbsp; қорғау.
Палата құрылған сәттен бастап, яғни сегіз жылда кәсіпкерлерден алты мыңнан аса арызтүскен. Оның 2232 өтініші бизнесті қорғау бағытында болды.
Орта есеппен Палата сарапшылары түскен өтініштердің&nbsp; 42 пайызын немесе 934-ін шешіп берген. 64 лауазымды тұлға жауапкершілікке, соның ішінде 18-і әкімшілік жауапкершіліккетартылған.
<blockquote>
 «Палата заңгерлері өтініштерді қарағанда кәсіпкерлердің 8,8 млрд теңгесін сақтап қала алды. Бұл – күші жойылған айыппұлдар, өсімпұлдар, мемлекет тарапынан қайтарылған қаражат, сақталып қалған бизнес мүлкінің құны және басқалары. Осы қаржының 69 пайызы орта бизнеске тиесілі болса, 31-і шағын кәсіпкерліктікі»,–дейді Кәсіпкерлер палатасының директоры Ғалымбек Жақсылықов.
</blockquote>
Айта кетейік, 2021 жылдың сегіз айында Қызылорда облысы кәсіпкерлер палатасына түскен 89 өтініштің 40-ы шешіліп, кәсіпкерлердің 79 млн теңгесі қорғалды.
<blockquote>
 «Бұдан басқа, кәсіпкерлерден түскен өтініштерге талдау жасай отырып, жиі көтерілетін, жүйелі мәселелерді арнайы тізілімге енгіземіз және шешу жолын қарастырамыз.Бұл тізілім не үшін керек? Дәл осындай проблемамен өзге де кәсіп иелері кездесуі мүмкін.Арнайы есепке алу арқылы біз мәселенің алдын аламыз.Сегіз жыл ішінде мамандар 161 мәселені анықтап, оның 93-і арнайы тізілімге енгізілді, 68-і оң шешілді. Биылдың өзінде осындай 8 мәселенің 5-еуі реттелді»,– дейді Палата директорының құқықтық мәселелер жөніндегі орынбасары Салават Құлмахан.
</blockquote>
Палата мамандары бизнестің құқығын қорғаумен бірге жергілікті атқарушы органдар қабылдайтын нормативтік-құқықтық актілердің жобасына сараптамалық қорытынды береді. Сегіз жылда заңгерлер 1064 актінің жобасын қарап, 117-сіне ескертпелер мен ұсыныстар берген.
<blockquote>
 «Кәсіпкерлердің мәселесін жедел шешуде Кәсіпкерлердің құқығын қорғау кеңесінің рөлі ерекше. Кеңес өңірде 2014 жылдан бері тұрақты жұмыс істейді. Осы мерзім аралығында 55 отырыс өтіп, 800-ден аса кәсіпкердің мәселесі шешілді», – дейді Салават Құлмахан.
</blockquote>
Жыл басынан кеңестің сегіз отырысы өтіп, 12 мәселе қаралды. Онда кәсіпкердің құқығын қалпына келтіру бойынша 15 ұсыныс беріліп, оның 9-ы қолдау тапты.

Қызылорда облысында кәсіпкерлердің 8,8 млрд теңгесі қорғалды

<a href="https://kyzylorda-news.kz/">Kyzylorda-news.kz</a> Қармақшы аудандық полиция бөлімінің кезекші бөліміне аудан тұрғыны қоңырау шалып, үйінің ауласында тұрған «Ниссан Максима» автокөлігін белгісіз біреу ұрлап кеткені туралы арызданады. Жәбірленушіге 4 млн 500 мың теңге залал келтірілген.
Аталған хабарлама бойынша автокөлікті іздестіру үшін «Тосқауыл» операциясы жарияланады. Көп ұзамай жүргізілген іздестіру жұмыстарының нәтижесінде Департаменттің жергілікті полиция қызмет басқармасы патрульдік полиция ротасының қызмет аға инспекторлары полиция аға лейтенанты Жарасхан Буганаев пен полиция аға лейтенанты Шалқарбаев Ердаулет ұрланған автокөлікті біржарым сағаттан кейін «Батыс-Қытай-Батыс-Европа» тас жолының Дерментөбе ауылының тұсында табады. Заңсыз іс-әрекет жасаған 20 жастағы аудан тұрғыны анықталып, АПб-не жеткізілген. Оқиғаның мән-жайы анықталуда. &nbsp;
Орын алған дерек бойынша Қазақстан Республикасы Қылмыстық кодексінің 200-бабының 1-бөлігімен (Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу (айдап кету ) сотқа дейінгі тергеп-тексеру амалдары жүргізілуде.

Көлік ұрлаған қармақшылық тұрғын ұсталды

<a href="https://kyzylorda-news.kz/">Kyzylorda-news.kz</a> ҚР Мәдениет және спорт министрі Ақтоты Райымқұлова Паралимпиада чемпиондарын жеңісімен құттықтады, деп хабарлайды ҚазАқпарат.
<blockquote>
 «Бүгін Токио төріндегі байрақты бәсекеден оза шауып, қазақ халқына олжа алып келген ел Тәуелсіздігінің 30 жылдығына алтын, күміс және қола медаль сыйлаған паралимпиадашы спортшыларға салтанатты түрде құрмет көрсетуге жиналып отырмыз. Тарихи жеңіске толы Паралимпиада ойындары кеше ғана шымылдығын жапты. Елге оралған азаматтарымызбен осы залда кездесіп отырғанымызға қуаныштымыз», – деді Мәдениет және спорт миинстрі салтанатты шарада.
</blockquote>
Айта кетейік, Паралимпиада ойындарында Қазақстан&nbsp;5 медаль алды. Оның біреуі – алтын, 3-еуі күміс, 1-і қола медаль.
Жалпы командалық есепте қазақстандық спортшылар 51-орынға табан тіреді.
Бүгін Президент Қасым-Жомарт Тоқаевтың Жарлығымен Давид Дегтярев III дәрежелі «Барыс» орденімен, Зарина Байбатина, Теміржан Дәулет, Әнуар Сариевтер «Парасат» орденімен, Нұрдәулет Жұмағали «Құрмет» орденімен&nbsp;марапатталды.
Қырымбек Көшербаев іс-шара барысында алтын медаль алған Давид Дегтяревке 106 миллион теңге, күміс медальге ие болған Зарина Байбатина, Теміржан Дәулет, Әнуар Сариевтерге 63 миллион теңге, қола жүлдегер атанған Нұрдәулет Жұмағалиге 31 миллион теңге қаржылай сыйақы табыстады.

Биылғы Паралимпиада ойындары тарихи жеңіске толы болды – Ақтоты Райымқұлова

<a href="https://kyzylorda-news.kz/">Kyzylorda-news.kz</a>&nbsp; Бүгін, 7 қыркүйекте Қызылорда қаласы Төле би көшесінде азанғы сағат 10:30-11:00 шамасында 4 жастағы Әділ есімді бүлдіршін табылды.
Баланың айтуы бойынша, ата-анасының есімдері Мақсат, Қалдыгүл.
<blockquote>
 “Осы бүлдіршіннің ата-анасы, туған-туысқандары туралы қандай да бір ақпарат білген жағдайда Қызылорда қалалық Полиция басқармасының 29-75-20 кезекші бөліміне және де 8-776-103-14-35 нөмірлеріне хабарласуларыңызды сұраймыз”, – делінген қалалық полиция басқарамысының таратқан хабарламасында.
</blockquote>

Қызылордалық бүлдіршіннің ата-анасы іздестірілуде

<a href="https://kyzylorda-news.kz/">Kyzylorda-news.kz</a>.&nbsp; Байқауға қатысуға елдегі әлеуметтік кәсіпкерлікті дамытуға ниет білдірген барлық КЕҰ шақырылды. Қатысушылар білім беру бағдарламасын өту мүмкіндігі үшін бәсекеге түсіп, нәтижесінде үш миллион теңгеге дейін грант ала алады.
Өтінімдерді қабылдау 2021 жылдың 17 қыркүйегіне дейін жалғасады.
Жоба «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қорының бастамасымен бүкіл ел аумағында жүзеге асырылуда.
Өтінімді Қордың <a href="http://www.sk-trust.kz/ru/competition">сайтында</a> қалдыруға болады:
Байқау қалай өтеді?
Бірінші кезең: тілек білдірушілердің өтінімдері жиналады, содан кейін комиссия олардың байқау шарттарына сәйкестігін тексереді.
Екінші кезең: қатысушылар әлеуметтік кәсіпкерлік, маркетинг, қаржы және бизнестің заңдық аспектілері саласында «Инкубатор» немесе «Акселератор» оқыту бағдарламаларының бірінен өтеді. Оқыту онлайн өтеді. Екінші кезеңнің қорытындысы бойынша финалистер анықталып, олар өздерінің әлеуметтік жобаларын конкурстық комиссияға ұсынатын болады.
Жоба жеңімпаздары желтоқсан айында жарияланады.
Естеріңізге сала кетейік, «Әрекет» жобасы жүзеге асырыла бастаған сәттен бастап үш жыл ішінде 120-дан астам ұйым жарты миллионнан үш миллион теңгеге дейін грантқа ие болды. Жоба көмегімен көптеген КЕҰ өзін-өзі өтеуге шықты және әлеуметтік мәселелерді шешуге атсалысты.
Сұрақтар туындаған жағдайда, коммерциялық емес ұйымдар мына телефондар арқылы: +7 705 376 40 00 (тек WhatsАpp жазбаша хабарлама арқылы, сұрақтарға жауаптар Нұр-сұлтан қ. уақыты бойынша жұмыс күндері 10:00-ден 18:30-ға дейін жіберіледі) немесе&nbsp;<a href="mailto:areket.skt@gmail.com">areket.skt@gmail.com</a>&nbsp;электрондық пошта арқылы байланыса алады.
«Samruk-Kazyna Trust»
&nbsp;Әлеуметтік жобаларды дамыту қорының
Корпоративтік қызметі
+7 (7172) 24 80 15, +7&nbsp;702&nbsp;554 99 22

Қазақстанда «Әрекет» гранттар байқауы жарияланды

<a href="https://kyzylorda-news.kz/">Kyzylorda-news.kz</a>&nbsp; Биылғы жылдың 8 айында республика бойынша 2079 адам АИТВ инфекциясын жұқтырған. Ал облыста жыл басынан бері 24 адамнан АИТВ вирусы анықталды. Инфекцияны жұқтырған 24 адамның алтауы нәзік жандар болса, он сегізі ер адам. Бұл туралы Өңірлік коммуникациялар қызметінде өткен баспасөз конференциясында ЖИТС-тің алдын алу және оған қарсы күрес жөніндегі облыстық орталықтың ұйымдастыру әдістемелік бөлімінің меңгерушісі Қанат Шушаев мәлімдеді.
Биыл тіркелген 24 науқастың 14 қала тұрғыны болса, қалған бөлігі аудандардан анықталған. Атап айтқанда, Жаңақорған, Қазалы, Шиелі аудандарында 2 адамнан ЖИТС жұқтырса, Жалағаш, Арал, Қармақшы аудандарынан 1 адамнан белгілі болған. Ал Байқоңыр қаласынан 1 азаматтың ауруды жұқтырғаны белгілі болды. Жас шамасына қарай ауру жұқтырушылардың көбі 30 және 40 жас шамасындағы азаматтар.
<blockquote>
 “Аурудың көбеюінің негізгі себебі биыл тестілеу саны 23,6 пайызға артты. Тестілеу саны көбейген сайын жұқтырушылардың көбею мүмкіндігі жоғарылайтыны сөзсіз. Тағы бір себеп айтақ, АИТВ-ға тұрғындарды тестілеу стратегиясында өзгерістер орын алды. Соның нәтижесінде облыс бойынша барлығы 4000-ға жуық жүкті әйелдердің жыныстық серіктестері тексеріліп, олардың арасынан 3 адамнан АИТВ инфекциясы анықталды. Сондай-ақ, аталған инфекцияны жұқтырған 2 жүкті әйел босанып, туылған нәресте антиретровирусты еммен қамтылды”,- деді сала маманы Қанат Закирьяұлы.
</blockquote>
Ал облыстық жастар денсаулығы орталығы жасөспірімдер мен жастар арасында АИТВ инфекциясының тарлуының алдын алу мақсатында бірқатар жұмыстар жүргізуде. Баспасөз конференциясында облыстық жастар денсаулығы орталығының директоры орынбасарының міндетін атқарушы Айзат Алдабергенова атқарылып жатқан жұмыстарды баяндады.
<blockquote>
 “Орталық жұқпалы инфекциялардың алдын алу мақсатында жастар мен жасөспірімдер арасында түсіндірме жұмыстарын тұрақты жүргізіп келеді. Жыл көлемінде бұл мақсатта офлайн және онлайн форматта 48 іс-шара өткізілді. Бүгінгі күні біздің орталықта симмуляциялық кабинет жұмыс жасайды. Онда репродуктивті денсаулықты қорғауға арналған арнайы құралдармен тренингтер ұйымдастырылады»,- деді Айзат Дарханқызы.
</blockquote>

Қызылордада жыл басынан бері 24 адамнан АИТВ вирусы анықталды

<a href="https://kyzylorda-news.kz/">Kyzylorda-news.kz</a> Алматы қаласындағы Ә.Қастеев атындағы ҚР Мемлекеттік өнер музейінде Қазақстанның еңбек сіңірген өнер қайраткері көрнекті суретші Қайырбай Зәкірұлының туғанына 75 жыл толуына және шығармашылығына 50 жыл толуына орай «Минотаврлар марафоны» атты жеке көрмесінің ашылуы өтті.
Мәдени шара Қазақстан Тәуелсіздігінің 30 жылдығы, ҚР Көркем академиясының 15 жылдығы аясында ұйымдастырылып жатыр. Көрмеге автордың жеке жинағынан алынған 30-ға жуық туынды қойылған. Салтанатты іс-шараға Сыр елінен облыстық мәслихат хатшысы Наурызбай Байқадамов бастаған арнайы делегация қатысып, аймақ басшысы Гүлшара Әбдіқалықованың құттықтауын жеткізді. Сондай-ақ, өнер иесіне шапан жауып, құрмет көрсетті.
<blockquote>
 “Сізді 75 жасқа толған мерейтойыңызбен және шығармашылығыңыздың 50 жылдығымен Сыр жұртшылығы атынан шын жүректен құттықтаймын! 
 Тәуелсіз еліміздің бейнелеу өнерінің дамуына зор үлесін қосып жүрген өз ісінің майталман шебері, график суретші, лирик ақын ретінде халқыңыз құрметтеп, бағалайды. 
 Өзіндік өнеріңіз интеллектуалды-философиялық көп қырлылығымен ерекшеленіп, ежелгі салт-дәстүр, әдет-ғұрыппен сабақтасып, уақытпен үндеседі. 
 Қаламыңыздан туған дүниелер елімізде ғана емес, АҚШ, Франция, Португалия, Қытай, Жапония, Марокко, Йемен секілді шет мемлекеттердің өнер мұражайларында, Ресей Федерациясы Мәдениет министрлігінің қорында қойылып, шетелдік дербес коллекционерлердің қолында сақталған. 
 Ел Тәуелсіздігінің 30 жылдығына арналған «Минотаврлар марафоны» атты жеке көрмеңіздің ашылуымен құттықтай отырып, деніңізге саулық, ұзақ өмір, отбасыңызға амандық тілеймін. 
 Шығармашылық шабытыңыз шарықтай берсін! 
 Тойыңыз тойға ұлассын!”, – делінген облыс әкімі Гүлшара Әбдіқалықованың құттықтауында.
</blockquote>
<img src="https://kyzylorda-news.kz/wp-content/uploads/2021/09/241533819_4307940189282892_743643721675930961_n.jpg" alt="" />
Қайырбай Зәкірұлы – әйгілі қазақстандық суретші, график, Қазақстан бейнелеу өнеріне 1970 жылдары келген көрнекті тұлға. Ол көпшілікке «Ұлбаланың бақыты», «Теңіз туралы толғау», «Базар жырау» топтамаларымен белгілі. Философиялық терең ойлайтын суретшіні әлем, адам болмысы, уақыт байланысы және ата-бабалардың рухани мұрасы тақырыптары толғандырады. 1990 жылдардан бастап суретші шығармашылығы өзгеріске ұшырап, туындыларында мифологиялық сюжеттер мен ғарыштан, бейне бір құс жолынан келгендей мистикалық бейнелер пайда болады.
«Минотаврлар марафоны» – Қ.Зәкірұлының акварель туындылары топтамасының шартты атауы. Оған соңғы екі жылда орындалған жиырмаға жуық акварель парақтары кіреді. Мұндай тақырыптың таңдалуы ең алдымен, суретшінің дүниетанымы мен көзқарасының&nbsp; өзіндік ерекшелігінде жатыр. Өмір мен өнерді марафон деп қабылдайтын ол, өз шығармаларында уақыт пен сезімнің трагедиясын көрсетуге тырысады. Егер суретші үшін графика – ең алдымен ойлау, дүниетанымды көрсету тәсілі болса, онда акварель – сезімдері мен эмоционалды рефлекстерді жеткізудің құралы. Шын мәнінде автор “Күлтегін”, “Қызыл құмыра”, “Чонтваридің жұмағы”, “Толғанай”, “Қаңбақ”, “Реквием”, “Летаргия”, “Талтүс”, тағы басқа акварель жұмыстарында адам құндылығының жоғалуы сынды уақыттың қасіретін ішкі жан дүниесінен өткізе отырып, мысқылмен, сарказммен жеткізеді.
<img src="https://kyzylorda-news.kz/wp-content/uploads/2021/09/7c3bb9aa-786b-4d8a-98a7-fb1a1378173b.jpg" alt="" />
<img src="https://kyzylorda-news.kz/wp-content/uploads/2021/09/59159cf5-d352-4e8d-b869-4dcde1dea9da.jpg" alt="" />
<img src="https://kyzylorda-news.kz/wp-content/uploads/2021/09/764fdbd7-f01d-4448-b6b5-65c2feaf05db.jpg" alt="" />
<img src="https://kyzylorda-news.kz/wp-content/uploads/2021/09/76e6d8d2-c68e-41c5-a004-e670ec7dd292-1.jpg" alt="" />

Алматыда суретші Қайырбай Зәкіровтің жеке көрмесі ашылды

<a href="https://kyzylorda-news.kz/">Kyzylorda-news.kz</a>. Мемлекеттік мектепте де, жеке білім беру ордасында да хиджаб кию ел заңына қайшы. Бұл туралы ақпарат және қоғамдық даму министрлігіне қарасты дін істері комитетінің төрағасы Ержан Нүкежанов мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “2016 жылы мектеп формасына қатысты білім министрінің бұйрығы шықты. Оған сәйкес, стандарт бекітілген. Азаматтар осы ережені, жалпы заңдарды сақтауға тиіс”, – деді&nbsp;Нүкежанов.
</blockquote>
Ол Конституцияда Қазақстан зайырлы мемлекет екені жазылғанын атап өтті. Мектепке баратындар білім және ғылым министрі бұйрығын, “Діни қызмет және діни бірлестіктер туралы” заң мен Конституцияны сақтауға міндетті.&nbsp;
<blockquote>
 “Мемлекеттік мектепте де, жеке білім беру ордасында да хиджаб кию ел заңына қайшы. Стандарттар барлық мектепке қатысты. Талап орындалмаған жағдай болса, өңірдегі білім басқармасы, комитет немесе министрлікке жүгіну керек”, – деді комитет басшысы.
</blockquote>

Мектепте хиджаб киюге бола ма – дін комитетінің жауабы

<a href="https://kyzylorda-news.kz/">Kyzylorda-news.kz</a>. Бүгін Қызылорда қаласының Қарауылтөбе ауылынан бастап алғаш күрішке орақ түсті. Қала әкімі Ғанибек Қазантаев алдымен ауыл шаруашылық саласының биылғы көрсеткіштері мен Ы.Жахаев атындағы «Қазақ күріш шарушылығы» ҒЗИ ЖШС-нің жұмыстарымен танысып, орақ түсу науқанын ашып берді.
<blockquote>
 «Қырман тасысын» деген ақ тілегін айтып, жаз бойы еткен еңбегінің жемісін терер шақта барлығыңызға: «Қырмандарыңыз астыққа толсын. Орақ науқанын нәтижелі аяқтап, ел ризығын төкпей шашпай жинап алудағы еселі еңбектеріңіз жемісті болсын» – деген Ғанибек Қонысбекұлы диқандарға сәттілік тіледі.
</blockquote>
Өздеріңізге белгілі, мемлекет тарапынан ауыл шаруашылығына қолдауға үлкен мән беріліп келеді. Ағымдағы жылы қала бойынша барлығы 8905 гектар жерге ауыл шаруашылығы дақылдары орналастырылды. Оның ішінде дәнді дақылдар 4664 гектар, яғни 4113 га күріш, 419 га бидай, 87 гектар арпа, 40 га сорго, 5 га сұлы, 1278 гектар мал азықтық дақылдары, картоп, көкөніс, 2818 гектар бақша дақылдары, 40 гектар майлы дақылдардын құрап отыр.
Негізгі дақыл күріштің көлемі 4113 гектарға егілді. Биылғы жылы егілген ақ егісті жинауды өткен шілде айының ортасында толық аяқтап, гектар түсімі бойынша жаздық бидайдың әр гектарынан 7,0 центнерден, арпадан 5,0 центнерден, сұлыдан 0,5 центнерден өнім алынды. Шаруашылық құрылымдары 1033 гектар жерге ескі жоңышқа егісінің және 245 гектар жаңа жоңышқа дақылдарынан барлығы 3196 тонна жоңышқа шөбі жиналды. Сондай-ақ егілген картоптың әр гектарынан 128,0 центнерден, көкөністен 131,0 центнерден, бақшадан 128,0 центнерден орта өнім алынуда. Егін жинау жұмыстары әліде жалғасуда.
«Ы.Жахаев атындағы Қазақ күріш ғылыми зерттеу институты» ЖШС-і қала бойынша 2021 жылы барлығы 1413 гектар жерге ауыл шаруашылығы дақылдарын еккен. Оның ішінде 655 гектар негізгі дақыл күріш, 30 гектар күздік бидай, 130 гектар жаздық бидай, 10 гектар арпа, 5 гектар сұлы, 40 гектар сорго, 40 гектар мақсары, 215 гектар жаңа жоңышқа, 284 гектар ескі жоңышқа дақылы және 4 гектарға көкөніс дақылдары орналастырылған. 
Қазіргі таңда шаруашылық құрылымдары негізгі дақыл күріш жинау жұмыстарына дайын. Белгіленген кестеге сәйкес күріштің суын байлау жүргізілді. Күріш жинау жұмыстары бойынша 1 қыркүйектен бастап саралап ору, 7 қыркүйектен 30 қыркүйекке дейін жаппай ору жұмыстарын аяқтап, шаруалар жоғарғы өнім алуды жоспарлап отыр.
Келер жылғы егістің негізі үшін барлығы 2600 гектар сүдігер жырту және 850 тонна көлемінде сапалы күріш тұқымын құю жоспарланып отыр.
<img src="https://kyzylorda-news.kz/wp-content/uploads/2021/09/241491813_2913937765539629_8775334644539412688_n.jpg" alt="" />
<img src="https://kyzylorda-news.kz/wp-content/uploads/2021/09/241394910_2913937848872954_445443356415945106_n.jpg" alt="" />
<img src="https://kyzylorda-news.kz/wp-content/uploads/2021/09/241515339_2913937698872969_127870829333536199_n.jpg" alt="" />
<img src="https://kyzylorda-news.kz/wp-content/uploads/2021/09/241507749_2913937928872946_9155869679778238918_n.jpg" alt="" />

Қызылордада егінге орақ түсті

<a href="https://kyzylorda-news.kz/">Kyzylorda-news.kz</a>. Ә.Қастеев атындағы ҚР Мемлекеттік өнер музейінде Қазақстанның еңбек сіңірген өнер қайраткері көрнекті суретші Қайырбай Зәкірұлының туғанына 75 жыл толуына және шығармашылығына 50 жыл толуына орай «Минотаврлар марафоны» атты жеке көрмесінің ашылуы өтеді.
Мәдени шара Қазақстан Тәуелсіздігінің 30 жылдығы, ҚР Көркем академиясының 15 жылдығы аясында ұйымдастырылып жатыр.

Қайырбай Зәкіровтің 75 жылдығына орай жеке көрмесінің ашылуы өтеді

<a href="https://kyzylorda-news.kz/">Kyzylorda-news.kz</a>. Өңірде эпидахуал біршама тұрақталып, облыс «сары» аймақтағы орнын сақтап тұр. Дегенмен босаңсуға әлі де ерте дейді дәрігерлер. Өңірлік коммуникациялар қызметінде өткен баспасөз конференциясында облыстық денсаулық сақтау басқармасы басшысының орынбасары Жалғасбек Үсенов аймақтағы ахуалға тоқталып, екпе алу жұмыстарының барысын кеңінен баяндап берді.
Жалғасбек Тұрлыбекұлының айтуынша күз мезгілі тұмау, салқын тию секілді ауру инфекцияларын қоздырады. Бұл кезеңде коронавирус инфекциясы тұмаумен араласып, аурудың асқыну қаупі бар. Сондықтан вакцина алып, сақтық шараларын сақтаған жөн дейді.
<blockquote>
 «Аурушаңдық деңгейінде төмендеу тенденциясы бар. Мемлекеттік қызметшілер, дәрігерлер, мұғалімдер арасында ұжымдық иммунитет қалыптасқанын байқадық. Себебі коронавирус инфекциясымен ауырғандар саны азайған. Ал, ем алып жатқандардың 98 пайызы вакцина алмағандар екенін баса айтқымыз келеді», – деді брифингке қатысқан облыстық санитарлық-эпидемиологиялық бақылау департаменті басшысының орынбасары Әлия Мүтәліпқызы.
</blockquote>
Айта кету керек, бүгінде күніне 1300-1500 адам екпе салдыртуда. Екпе кабинеттерінің 3500-ге дейін жүктемені орындауға мүмкіндіктері бар. Жалпы бүгінге дейін облыста коронавирус инфекциясын жұқтырудың 16 509 дерегі тіркелген. Оның 21% 2020 жылғы есепке алынса, 78,9% ағымдағы жылы анықталған. Барлық тіркелген коронавирус инфекциясының 2% сырттан тасымалданған. 58% скринингтік тексеру нәтижесінде анықталса, 40% қарым-қатынас арқылы жұқтырғандығы белгілі болды.

Қазақстан және Қызылорда облысының жаңалықтары