*<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова сырбойылықтарды қос мерекемен құттықтады.*
Құрметті Отан қорғаушылар, ардақты ардагерлер!
Сіздерді Отан қорғаушылар күнімен және Ұлы Жеңістің 76 жылдық мерекесімен шын жүректен құттықтаймын!
Қос мерекенің қатар келуі де заңдылық тәрізді. Кешегі жау оғынан қорғаған майдангерлерімізге, бүгінгі еліміздің айбынын асқақтатар әскерімізге қандай құрмет көрсетсек те жарасады.
Тұңғыш Президентіміз – Елбасы Нұрсұлтан Әбішұлы Назарбаев кез келген елдің егемендігі экономикалық және саяси ғана емес, сонымен бірге, әскери әлеуетпен қамтамасыз етілгенде ғана нағыз тәуелсіздікке айналады десе, Мемлекет Басшысы, Бас Қолбасшы Қасым-Жомарт Кемелұлы Тоқаев жауынгерлеріміздің батырлығы мен қайтпас қайсарлығы жер бетінде бейбітшілік пен тыныштықты сақтауға мүмкіндік бергенін атап өтті.
Біз Отан Қорғаушылар күні мен Жеңіс күнін қатар атап жүрміз. Өйткені, бұл мерекелер рухы жағынан бір-бірін толықтыратын, ұрпақтар сабақтастығына ұласқан мерекелер. Әр отбасында сұрапыл соғысқа қатысып, елі мен жерін, ұрпағының бейбіт өмірін қорғаған өз батырлары бар. Мен де майдангердің ұрпағы ретінде бұл күннің қадір-қасиетін жоғары бағалаймын. Бұрындары түрлі кездесулер өткізіп, алаңдарда, мәдени ғимараттарда концерттер беріп мерекелеп жататынбыз. Былтырдан басталған пандемия бұрынғыша атап өтуге мүмкіндік бермей отыр. Биыл коронавирус бәсеңдесе, майдангерлеріміздің үйіне құттықтап барамыз, мәңгілік алуға гүл шоқтарын қоямыз деген едік. Өкінішке қарай, бірнеше аптадан бері “қызыл, сары аймақтарда” болуымыз оған кедергі жасап отыр. Дегенмен, «NurOtan» партиясы облыстық филиалының бастамасымен ел Тәуелсіздігінің 30 жылдығы мен партияның «Ардагерлерді ардақтайық» жобасы аясында облыс көлемінде «Мың алғыс Сізге, майдангер» арнайы хэштегпен ақпараттандырылған шаралар шеруі басталып, интернет-ресурстарда, әлеуметтік желілерде, ардагерлер, жастар, үкіметтік емес ұйымдар, этнос өкілдері онлайн түрде ықыластарын білдіруде.
Ардагерлерді ардақтау – ұрпақ парызы. Жыл өткен сайын майдангерлеріміздің қатары да сиреп барады. Қазір облысымызда Ұлы Отан соғысының 11 ардагері бар. Толық атап кетсем деймін. Бес ардагер – Жүнісов Төлеген, Бәйтіков Әбдрахман, Колесник Любовь Сергеевна, Әбішев Әбдраман, Сатыбалдиев Әбдірауық Қызылорда қаласында, 3 ардагер – Бектұрғанов Қалеп, Смағұлов Қабақ, Тобабергенов Тілеуберген Қазалы ауданында, ал, Жанасов Талжан Байболұлы Арал ауданында, Тасыров Яхия Сырдария ауданында, Байжанов Сәрсенбек Шиелі ауданында тұрады. Оларға облыстық бюджеттен біржолғы материалдық көмек 1 млн теңге, жергілікті бюджеттен біржолғы әлеуметтік көмек 116,6 мың теңге төленуде.
ҰОС жылдарындағы тылдағы қажырлы еңбегі мен мінсіз әскери қызметі үшін бұрынғы КСРО ордендерімен және медальдарымен марапатталғандарға (35 адам) 1 адамға облыстық бюджеттен 100,0 мың теңгеден, аудандық/қалалық бюджеттен 87,5 мың теңгеден біржолғы әлеуметтік көмек беріледі.
Екiншi рет некеге тұрмаған, қайтыс болған соғыс мүгедектерiнiң және соларға теңестiрiлген мүгедектердiң, қатысушылардың әйелдерiне (күйеулерiне) (49 адам) 1 адамға 100 мыңтеңгеден, ҰОС жылдарында тылда кемінде 6 ай жұмыс істеген азаматтарға (3661 адам) әрқайсысына 100,0 мың теңгеден облыстық бюджеттен біржолғы әлеуметтік көмек төленуде.
Қымбатты Отан қорғаушылар! Ат жалын тартып мінген азамат үшін Отан қорғаудан қасиетті міндет жоқ!
Пандемияның шарықтау шегінде алдыңғы шепте жүріп, ерен еңбектің үлгісін көрсете білдіңіздер.
Биыл тәуелсіздігімізге 30 жыл. Тәуелсіздік құндылықтарының қорғалуы ең көкейтесті мәселе. Сондықтан, ата-бабаларымыз аманат еткен атамекенімізді, туған Отанымызды, жерімізді, халқымызды көзіміздің қарашығындай қорғай білейік. Бейбіт күннің бағасын білейік. Тәуелсіз еліміздің тыныштығын тілейік.
Қайыспас қайсар майдангерлеріміз, айбынды Отан қорғаушыларымыз! Сіздерді мерейлі мереке – Отан қорғаушылар және Ұлы Жеңіс күндерімен тағы да шын жүректен құттықтаймын!
Өнегелі ғұмыр сүріп, бейбітшілік, болашақ үшін тер төгіп, қанын да, жанын да аямаған ардагерлерімізге алғысымызды айтамыз. Олардың майдан даласындағы ерен ерліктері бүгінгі ұрпағы үшін нағыз өнеге, тәлім-тәрбие.
Бар өмірін әскери іске арнап, ыстық-суық демей, күн-түн демей, елін, жерін қорғап, өз қызметін мінсіз атқарып жүрген әскерімізге ризашылығымызды білдіреміз. Еліміздің айбынын асқақтатар ер-азаматтарымыз, сардарлар мен сарбаздарымыз аман болсын!
Тәуелсіз Қазақстан жасасын!

Гүлшара Әбдіқалықова қызылордалықтарды қос мерекемен құттықтады

*<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаев қазақстандықтарды Отан қорғаушылар күнімен құттықтады, деп хабарлайды Ақорданың баспасөз қызметі.*
«Құрметті қазақстандықтар!
Сіздерді Отан қорғаушы күнімен шын жүректен құттықтаймын!
Біз бұл күні Қарулы Күштеріміздің ардагерлеріне және еліміздің егемендігі мен ұлттық мүддесін қорғап тұрған, антына адал әскери қызметшілерге құрмет көрсетеміз.
Қазақстан жер жүзіне қашанда бейбітшілікті жақтайтын және жауапкершілігі жоғары мемлекет ретінде танымал. Сондай-ақ, экономикалық, гуманитарлық мүмкіндіктері ғана емес, әскери әлеуеті де мықты елге айналдық.
Тұңғыш Президент, Елбасы Нұрсұлтан Әбішұлы Назарбаевтың орасан еңбегінің арқасында заманауи қару-жарақпен және жаңа техникамен жабдықталған қуатты армия жасақталды. Қарулы Күштеріміздің барлық құрылымында қызмет ететін сарбаздар мен сардарлардың жауынгерлік рухы, отаншылдығы, әскери дайындығы және кәсіби машығы еліміздің қорғаныс қабілетінің жоғары болуын қамтамасыз етеді.
Мемлекет туған жері үшін аянбай еңбек етіп, әскери қызметке бүкіл ғұмырын арнаған отансүйгіш перзенттерін жан-жақты қолдауға айрықша мән береді. Біздің міндетіміз – жаңа геосаяси ахуалға сай еліміздің қорғаныс қабілетін одан әрі нығайта түсу.
Армия – мемлекеттігіміздің мызғымас тірегі, Тәуелсіздігіміздің кепілі. Қазақстан Республикасының әскери қызметшілеріне халқымыздың қауіпсіздігі мен бейбіт өмірі жолындағы мінсіз қызметі үшін ризашылығымды білдіремін»,-дейді Президент.

Қасым-Жомарт Тоқаев қазақстандықтарды Отан қорғаушылар күнімен құттықтады

*<a href="https://kyzylorda-news.kz/">Kyzylorda-news.kz.</a> 7 мамыр – ҚР Қарулы Күштерінің құрылған күні.*
1992 жылғы 7 мамырда Мемлекеттік қорғаныс комитеті Қазақстан Республикасының Қорғаныс министрлігі болып қайта құрылды. Дәл осы күні Елбасы Н.Ә.Назарбаевтың Жарлығымен Қазақстан Республикасының Қарулы Күштері құрылды. Бұл күн елімізде мемлекеттік мереке және демалыс күні саналады.
1991 жылы 25 қазанда Қазақстан Президентінің Жарлығымен Қазақ ССР Мемлекеттік қорғаныс комитеті құрылды. Кейін ол Қазақстан Республикасының Қорғаныс министрлігі болып қайта құрылды.
1992 жылдың 7 мамырында ҚРТұңғыш Президенті- Елбасы Нұрсұлтан Назарбаевтың арнайы Жарлығы шықты. Бұл Жарлық бойынша, республика аумағындағы КСРО Қарулы Күштерінің құрамындағы мекемелер, бөлімдер, құрамалар Қазақстан Республикасының құзыретіне берілді. Жоғарғы Бас Қолбасшы ретінде Қарулы күштерді басқаруды Президент өз мойнына алды. Президенттен басқа қорғаныс ісімен тікелей шұғылданатын алғашқы Қорғаныс министрі қызметіне генерал-полковник Сағадат Нұрмағамбетов тағайындалды.

Бүгін Отан қорғаушылар күні

*<a href="https://kyzylorda-news.kz/">Kyzylorda-news.kz.</a> Қазақстан территориясының басым бөлігінде фронталды бөліктің өтуіне байланысты құбылмалы ауа райы күтіледі, деп хабарлайды Қазгидромет.*
Кей жерлерде жаңбыр жауады, найзағай жарқылдайды. Тек еліміздің батысы және солтүстігі антициклонның ықпалында болғандықтан жауын-шашынсыз ауа райы сақталады. Республиканың кей жерлерінде желдің күшеюі, оңтүстік және оңтүстік-шығыста шаңды дауылмен бірге күшейеді, бұршақ жаууы ықтимал.
Жамбыл, Түркістан, Алматы облыстарының кей жерлерінде бұршақ жаууы ықтимал, желдің жылдамдығы 15-21 м/с жетеді. Түркістан, Жамбыл облыстарының кей жерлерінде қатты дауыл күтіледі.
Солтүстік Қазақстан, Шығыс Қазақстан, күндіз Павлодар, Қызылорда облыстарының кей жерлерінде жел 15-20 м/с күшейеді.
Түнде Ақмола, Қостанай, Солтүстік Қазақстан облыстарының кей жерлерінде 2 градус үсік күтіледі.

7 мамырға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бұған дейін «Ashyq» жобасына қатысты объектілерге (субъектілерге) шектеу шараларын белгілейтін №12 Қаулының күші жойылды.
Дегенмен “Ashyq” жобасына қатысатын кәсіпкерлік нысандардың қызметі ҚР Бас мемлекеттік сандәрігерінің 30.04.2021 жылғы №18 Қаулысымен реттеледі.
06 сәуірде қабылданған №13 Қаулыға сәйкес:
<ul>
<li>Балаларды сауықтыру ұйымдарының жұмысына белгіленген тыйым алынып тасталды. Енді бұл ұйымдар толтырылуы 30%-дан аспаған жағдайда белгіленген талаптарды сақтай отырып, қызмет көрсетуді бастай алады;</li>
<li>азық-түлік тауарларын сату бойынша супермаркеттер, гипермаркеттер жұмысына толымдылығы мен уақытына белгіленген шектеулер алынып тасталды. Бұдан былай аталған нысандар штаттық режимде жұмыс жасайды;</li>
<li>ашық аспан астындағы азық-түлік және азық-түлік емес базарларына белгіленген шектеулер алынып тасталды, енді бұл нысандар да штаттық режимде жұмыс жасай алады;</li>
<li>стрит-фуд (жеке тұрған шатыр/ларек/отыратын орны жоқ дүңгіршек) жұмыс кестесін штаттық режимде ұйымдастырады;</li>
<li>мекеме қызметкерлерінің жұмыс жасау нысанына қатысты да келесі өзгерістер енгізілді: міндеттерін қашықтықтан орындау мүмкін емес жұмыскерлерді қоспағанда, COVID-19-ға қарсы вакцинацияланбаған және соңғы 6 ай ішінде COVID-19-бен ауырмаған қызметкерлер қашықтықтан жұмыс істеу форматына ауыстырылады;</li>
<li>мешіттер, православие шіркеулері және басқа да діни объектілер аумағында ұжымдық діни іс-шараларды (оның ішінде «жұма намазы», күнделікті православиелік дұғалар және басқаларын) ашық ауада өткізуге рұқсат берілді.</li>
</ul>
Бұған дейін ғимарат ішінде орналасқан қоғамдық тамақтану орындары сағат 09.00-20.00 аралығында, ал ашық алаңдағы объектілер 09:00-22:00 аралығында жұмыс жасаған болатын. Жаңа Қаулыға сәйкес орналасқан жеріне қарамастан барлық қоғамдық тамақтану орындары сағат 09.00-20.00 аралығында, ал асханалар типі бойынша қоғамдық тамақтану объектілерінің жұмысы 24.00-ге дейін ұйымдастырылады;
<ul>
<li>бір мезгілде 30 адамнан асырмай жинақтай отырып, облыстық командаларды даярлау үшін оқу-жаттығу жиындарын өткізуге рұқсат берілді.</li>
</ul>

Жаңа қаулы: Балаларды сауықтыру ұйымдарының жұмысына рұқсат берілді

Kyzylorda-news.kz. Бүгін Қызылорда қаласының әкімі Ғанибек Қазантаев және Кәсіподақ орталығы мен жұмыс берушілер арасында өзара түсіністік пен әлеуметтік әріптестікті қамтамасыз ететін үш жақты меморандумға қол қойды.
Тараптар қызметкерлердің жұмыспен қамтылуы, еңбек құқықтары мен кепілдіктерін сақтау және өндірістің қалыпты жұмыс істеуін қамтамасыз ету мәселелері жөніндегі өзара ынтамақтастық туралы меморандумға отырды.
Қорқыт ата атындағы Қызылорда университеті, Болашақ университеті және «Бақ-береке» ЖШС, «Промстройсервис.Е» ЖШС мен Ажар сити, Қызылорда сауда желілері сынды 6 мекеме меморандум талаптарын мақұлдап, Қызылорда қаласының әкімдігі және Кәсіподақ орталығымен өзара ынтымақтастығын нығайтты.
<blockquote>
 «Алда енді өздеріңіз секілді жұмыс берушілермен, ірі мұнай компанияларымен және кәсіп орындармен де меморандумға отыратын боламыз. Бүгінгі жұмыс алда атқарылар ауқымды жобалардың бастамасы болды. Қалыптасқан қиын кезеңге қарамастан біздің бастамамызды алғашқылардың бірі болып қолдағандарыңызға шынайы алғысымды білдіремін», – деді Ғанибек Қазантаев.
</blockquote>
<img src="https://kyzylorda-news.kz/wp-content/uploads/2021/05/fb_img_1620303934005.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620303921063.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620303937129.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620303942448.jpg" alt="" />

Қызылорда: Үш жақты меморандумға қол қойылды

<a href="https://kyzylorda-news.kz/">Kyzylorda-news.kz.</a> Сыр өңірінен 2021 жылы 1500-ге жуық жас әскерге аттанбақ. Олардың 700-ге жуығы көктемгі мерзімді әскерге шақыру науқаны аясында жүзеге асырылады. Бүгінге дейін 300-ден астам жас Отан алдындағы борыштарын өтеуге аттанып үлгерді.
<blockquote>
 «Денсаулығы мықты, дене бітімі шыныққан, сауаты жеткілікті, моральдік-іскерлік қабілеті жоғары азаматтар ҚР Қарулы Күштері қатарына, ҚР ҰҚК Шекара қызметінде, ҚР ІІМ Ұлттық ұланы мен ҚР төтенше жағдайлар министрлігіне қарасты бөлімдерде және Мемлекеттік Күзет қызметінде борыштарын өтейтін болады.Бұл мереке батырлық пен табандылық, отансүйгіштік пен Отанға шексіз қызмет етудің нышаны. Қай дәуірде болмасын, Отан қорғау әр азаматтың қасиетті борышы. Қазақстан әскерлері қатарында қызмет өткеріп жүрген барлық азаматтарды, Ұлы Отан соғысы ардагерлерін, жауынгер – интернационалисттерді, Отан қорғауға даяр азаматтарымызды мерекемен шын жүректен құттықтаймыз», – деді Қызылорда облыстық қорғаныс істері жөніндегі департаментінің басқарма бастығы Алмат Жақыпов.
</blockquote>
Облыста 2018 жылдан бері «Жас сарбаз» әскери патриоттық клубы жұмыс жасайды. Мектеп оқушыларына отансүйгіштік тәрбие беріп, түрлі шараларды өткізуге ұйытқы болып келеді.
<blockquote>
 «Отан қорғаушылар күніне орай «Мен әскердемін» челенджін қолға алдық. Бейне үндеу арқылы сарбаздар туған жерін, Отан алдында әскери борышын өтеп жатқан бөлімі туралы баяндайды. Жастарды әскерге шақырады. Сондай-ақ, әскери техникалық мектептен сарбаздардың жаттығуын түсірдік. Мереке күндері әлеуметтік желіге жүктейміз», – деді «Жас Сарбаз» әскери-патриоттық қозғалысының облыстық филиалының жетекшісі Айдос Қожамұратов.
</blockquote>
Отан қорғаушылар және Жеңіс күніне орай оқу орындарында «Ерлік» сабақтары ұйымдастырылуда. Әскери қызметшілердің «Өшпес ерлік» атты Ұлы Отан соғысы және тыл ардагерлерін құттықтау онлайн жүргізіледі. Сондай-ақ атаулы датаға байланысты әскери қызметшілердің балаларының қатысуымен «Менің атам қалай әскери борышын өтеді» атты сурет салудан конкурс өткізіледі.

Қызылордада 1500 жас әскерге аттанады

Kyzylorda-news.kz. Қызылорда облысы бойынша ҚАЖ департаментіне қарасты ЗК-169/4 мекемесінің қызметкерлері тыл ардагері Айқын Қожағұлованы Ұлы Жеңістің 76 жылдық мерейтойымен құттықтады.
<blockquote>
 “Соғыс басталғанда небәрі 7 жаста едім. Етігімен су кешіп, масақ тердім. Ол кезде 7-8 жастағы балалар толыққанды жұмысшы адамдар болып саналатын. Бізде балалық шақ деген дәурен болмаған. Мектептің 4-7 сыныбындағы балалардың бәрін егінге апаратын. Бір кесе бидай үшін сотталып кететін”, – деген әже сұрапыл соғыс жылдарындағы тартқан тауқыметі жайлы сыр шертті.
</blockquote>
Тыл еңбегінің ауыр жүгін арқаласа да, ұрпағының бүгінгі бақытты сәті үшін көрген қиыншылығына еш өкінбейтінін айтты.
Жұбайымен 8 бала өсіріп, олардан тараған немере, шөбере қызығын көріп отырған кейуана қазіргі бейбіт заманға шүкіршілік етеді. Қазір немере-шөберелерінің ортасында отырған қария оларға үнемі төзімділік пен еңбекқорлық жайлы жиі айтады.
87 жасқа келген кейуанадан естіген әңгімеден рухани жан азығын алып қайтқан ҚАЖ қызметкерлері ардагердің батасына кенелді. Өз кезегінде тыл ардагері де сала қызметкерлеріне алғыс айтты.

Қызылордада ҚАЖ қызметкерлері тыл ардагеріне құрмет көрсетті

<a href="https://kyzylorda-news.kz/">Kyzylorda-news.kz.</a> Қызылордада Жеңістің 76 жылдығына орай Ұлы Отан соғысының 11 ардагеріне 1 млн. теңгеден беріледі. Бір жолғы төлем соғысқа қатысушылардың жесірлеріне, тыл еңбеккерлеріне және басқа да бірқатар санаттарға қарастырылған. Бұл туралы Өңірлік коммуникациялар қызметінің алаңында өткен онлайн брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Айгүл Ибраева мәлімдеді.
Қазір Қызылорда облысында 11 соғыс ардагері тұрады. Атап айтқанда, Аралда – 1, Қазалыда – 3, Сырдария ауданында – 1, Шиеліде– 1, Қызылорда қаласында – 5. Сондай-ақ, аймақта Ұлы Отан соғысының қатысушылары мен оларға теңестірілген 3756 ардагер бар.
<blockquote>
 «Іс шаралар жоспарында онлайн-мерекелік құттықтаулар, қайырымдылық, әлеуметтік-тұрмыстық көмек көрсету шаралары қамтылды. Сондай-ақ, ардагерлер туралы роликтер көрсетілуде. Арнайы дайындалған билбордтар қаланың көрнекі жерлеріне, автобустарда ілініп, ардагерлердің өмір жолы жан жақты насихатталуда», – деді Айгүл Болатқызы.
</blockquote>
Жеңістің 76 жылдығына орай Ұлы Отан соғысының 11 қатысушысына облыстық бюджеттен 1 млн. теңге, жергілікті бюджеттен 116,6 мың теңгеден, КСРО ордені мен медалін алған 35 ардагерге облыстық бюджеттен 100 мың теңгеден, аудандық/қалалық бюджеттен 87,5 мың теңгеден, екiншi рет некеге тұрмаған, қайтыс болған соғыс мүгедектерiнiң және соларға теңестiрiлген мүгедектердiң, қатысушылардың 49 жұбайына 100 мың теңгеден, Ұлы Отан соғысы жылдарында тылда кемінде 6 ай жұмыс істеген 3661 азаматқа 100 мың теңгеден біржолғы әлеуметтік көмек берілуде.

Қызылордада Ұлы Отан соғысының 11 ардагеріне 1 миллион теңгеден беріледі

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықованың төрағалығымен 7 мамыр – Отан қорғаушы күніне орай салтанатты жиын өтті. Жиында аймақ басшысы өңірдегі Қарулы Күштер, қорғаныс істері саласының әскери азаматтарына «Алғыс хат» табыстады.
<blockquote>
 «Сіздерді Қазақстан Қарулы Күштерінің құрылғанына 29 жыл толуы мерекесімен құттықтаймын. Отан қорғау – күн сайынғы ерлік екенін ескеретін болсақ, қорғаушыларымыздың арқасында биыл Тәуелсіздігіміздің 30 жылдығын атап өтеміз. Осыған орай, егеменді еліміздің отын сөндірмей, қорғаныс жүйесін бекем ұстауда жылдар бойы өз үлесін қосып келген азаматтарымызды марапаттайтын боламыз», – деді облыс әкімі Гүлшара Әбдіқалықова.
</blockquote>
Марапатталушылардың қатарында облыстық жұмылдыру дайындығы басқармасының «Жұмылдыру және шұғыл жұмыстар орталығы» коммуналдық мемлекеттік мекеме басшысының орынбасары Бауыржан Садықов, Қызылорда облысының аумақтық қорғаныс бригадасының 99215 әскери бөлімінің командирі, полковнигі Керимбай Ойықбаев, Қызылорда облысының қорғаныс істері жөніндегі департаментінің Жаңақорған аудандық бөлімінің жасақтау бөлімшесінің бастығы Жасулан Шанкулов, ҚР Ұлттық қауіпсіздік комитеті Шекара қызметінің Қызылорда облысы бойынша департаментінің, идеологиялық және кадрлық жұмыстары бөлімінің бастығы, майор Нурбек Абдиракинов, ҚР Қорғаныс министрлігінің 66597 әскери бөлімінің ефрейторы Шапағат Болатов, ҚР Ұлттық ұланының 5547 әскери бөлімінің батальон командирі, майор Жасулан Беркенов бар.
Жиын соңында Қызылорда облысының Қорғаныс істері жөніндегі департаментінің бастығы, полковник Айдын Сағындықов көрсетілген құрметке алғысын жеткізіп, мерекемен құттықтады.
<img src="https://kyzylorda-news.kz/wp-content/uploads/2021/05/182621409_3340757266027319_6251812889990677077_n.jpg" alt="" />
<img src="https://kyzylorda-news.kz/wp-content/uploads/2021/05/182498999_3340757429360636_8887600804307170051_n.jpg" alt="" />

7 мамыр – Отан қорғаушы күніне орай әскери азаматтар марапатталды

<a href="https://kyzylorda-news.kz/">Kyzylorda-news.kz.</a> Қазақстанда 665 Ұлы Отан соғысының ардагері тұрады. 2020 жылы олардың саны шамамен 1025 болған. Қазір ардагерлер қатары сирепті.
Бұл туралы еңбек және халықты әлеуметтік қорғау вице-министрі Ерлан Әукенов мәлімдеді.&nbsp;
<blockquote>
 “2020 жылы 1025 ардагер болса, биыл – 665 ардагер қалды. Егер ардагерлер мен оларға теңестірілгендер санатын алсақ, тыл еңбеккерлерін қосқанда, олардың саны 127 мыңнан 114 мың адамға дейін азайды”, – дейді Әукенов.&nbsp;
</blockquote>
Осы орайда Әукенов Қазақстан тәуелсіздігінің 30 жылдығында еңбек және халықты әлеуметтік қорғау министрлігінің атынан барша Қазақстан халқын жеңіс күнімен құттықтады.
<blockquote>
 “Әрбір адамның борышы – өз елінің өткенін білу және құрметтеу, барлық ұрпақтың жарқын болашағы жолында жеңіске жету үшін майданда соғысқан және тылда еңбек еткен ардагерлеріміздің ерліктерін ұмытпау. Соғыс кезінде майданға 1 млн 200 мыңнан астам қазақстандық шақырылды, 20-дан астам атқыштар дивизиясы мен басқа да құрамдар құрылды”, –&nbsp;деді Ерлан Әукенов.
 “Жауынгерлік еңбегі үшін жүздеген мың қазақстандық медальдармен және ордендермен марапатталды, 500-ге жуық адам Кеңес Одағының батыры атанды. Төрт қазақстандық екі мәрте батыр атанды, 110 қазақстандық үшінші дәрежелі Даңқ орденімен марапатталды. Қолына қару алған әрбір екінші қазақстандық Жеңіске жету жолында қасық қаны қалғанша күресіп, өмірін қиды – ұрыстарда қаза тапты, жаралар мен аурулардан көз жұмды, хабар-ошарсыз кетті. 630 мың адам тұтқыннан оралмады”, – деді вице-министр.
</blockquote>
<a href="https://stan.kz/">Stan.kz</a>.

Қазақстанда 665 Ұлы Отан соғысының ардагері тұрады

<a href="https://kyzylorda-news.kz/">Kyzylorda-news.kz.</a> Бүгін қала әкімі Ғанибек Қазантаев ақын <a href="https://www.facebook.com/profile.php?id=100046117569708&__cft__[0]=AZWnVwQwpDwIMyEzqrgNj6qi_nP2heka9aTqzQGgLCa2xRm5xQHs8oGb0oLYkZ4zilTfYUrKpK_u0MCsKbL3TtRF9wo7uNa2ATqF62Y-SMpQVBbIRDB4aS3GphNPjKQ3-yWdf8RGqLy1pIITFMqo3Pg_&__tn__=-]K-R">Серик Ыдырысов</a>ты қабылдап, 63 жас мерейтойымен құттықтады.
Серік Ыдырысұлы қазақтың қасиетті қара домбырасын қолға алып, ұрпақты ұлттық өнермен сусындатып, дүйім елдің құрметіне бөленген Сырдың біртуар азаматы, тұлғалы ақыны. Бүгінде 63 жасқа келген өнегелі өмірі иесі саналы ғұмырында бойға біткен асыл өнер дана халқымыздың сөз өнері, суырып салма ақындықты насихаттап келеді.
<blockquote>
 Кездесуде қала әкімі Серік Ыдырысұлының ұлттық өнерді ұлықтаудағы еңбегіне ерекше тоқталып «Бүгінде бабадан қалған асыл өнерді ұлықтаумен бірге педогог-ұстаздықты қатар алып, шәкірт тәрбиелеп жүрген, туған жұртыңыздың мақтан тұтар тұлғаларының біріне айналдыңыз. Алашқа азулы ақын болып танылған сізді Сыр топырағының киесінен шабыт алған айтыстың ақтаңгері ретінде жақсы білемін және құрметтеймін» – деп, ақынды туған күнімен құттықтап, сый-құрмет көрсетті.Өз кезегінде мерейтой иесі ел азаматына құрмет көрсеткен қала әкімі Ғанибек Қонысбекұлына ризашылығын білдірді.
</blockquote>
<img src="https://kyzylorda-news.kz/wp-content/uploads/2021/05/182987581_2828125697454170_3368407024788191007_n.jpg" alt="" />

Қазақстан және Қызылорда облысының жаңалықтары