<a href="https://kyzylorda-news.kz/">Kyzylorda-news.kz</a>.&nbsp;Жалағаш ауданы Аққұм ауылдық мәдениет үйінде «Қыз- ұлттың ұяты, халықтың шырайы» атты дөңгелек үстел болып өтті.
Оған Жалағаш ауданы әкімінің орынбасары Жасұлан Еспенбет, Аналар кеңесінің төрайымы Рахима Ахметова, облыстық іскер әйелдер қауымдастығының төрайымы Манат Алмашева, аудандық және ауылдық округтердегі Аналар кеңесінің төрайымдары, көп балалы аналар мен жас келіндер қатысты.
Қатысушылар кітап және салт-дәстүрден сыр шертер көрмені тамашалады.
Шараның шымылдығын Жалағаш ауданы әкімінің орынбасары Жасұлан Еспенбет ашты. Ол республикалық «Аяулы ана» байқауынан бірінші дәрежелі диплом иеленген Мауыты Қабылбектің әжесі Бақыткүл Арысбаеваға алғысын білдірді.&nbsp; Өскелең ұрпақты тәрбиелеуге қосқан үлесі мен еліміздің бетке ұстар тұлғасына айналған перзентті өсіргені үшін «Білім-өркениет» ұлттық инновациялық ғылыми-зерттеу орталығы атынан Құрмет грамота мен «Алтын алқа» төсбелгісін табыстады. Сондай-ақ бүгінгі мазмұнды шараға сәттілік тіледі.
Дөңгелек үстел аясында аудан бойынша отбасы құндылығын насихаттау мен арттыру бағытында атқарылған ауқымды жұмыстар слайд арқылы көрсетілді.
Өз кезегінде облыстық Аналар кеңесінің төрайымы Рахима Ахметова ұлттық тәрбие негізінде сөз қозғады.
<blockquote>
 «Бүгінде көптеген ата-ана отбасын асырау, бар-жоқты түгендеуге баса назар аударып, бала тәрбиесі шеткері қалып келеді. Аналар кеңесі осы мәселе бағытында жұмыс жасап, жаңа жобаларды жүзеге асырып, өскелең ұрпаққа дұрыс бағыт-бағдар беру мақсатында кездесулер ұйымдастыруда», – деді Рахима Ахметова.
</blockquote>
Шара барысында аналар тарапынан өнегелі ойлар мен&nbsp; құлақасар пікірлер айтылды. Ана туралы және отбасына байланысты бүгінгі күні туындап жатқан мәселелерді талқылау, оларды шешу жолдары ұсынылды.

Жалағашта аналар кеңесінің жиыны өтті

<a href="https://kyzylorda-news.kz/">Kyzylorda-news.kz</a>. Синоптиктердің болжауынша, бейсенбіде еліміздің басым бөлігінде атмосфералық ағындар салдарынан ауа райы құбылмалы болады, деп хабарлайды Қазгидромет.
10 маусымда Қазақстанның басым бөлігінде найзағайлы жаңбыр жауады, оңтүстік-шығыста, орталықта кей жерлерде нөсер жауады. Кей жерлерде дауыл соғып, жел күшейеді, оңтүстікте шаңды дауыл соғуы мүмкін, солтүстікте түнде және таңертең тұман түсуі ықтимал.
Күндіз Қызылорда облысының кей жерлерінде жел 15-20 м/с күшейіп, шаңды дауыл соғуы мүмкін.

Қызылордада шаңды дауыл соғады

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 1144 адамда коронавирус індеті ПТР-сынама арқылы расталды, деп хабарлайды coronavirus2020.kz.
**Өңірлер бойынша: 
**Нұр-Сұлтан қаласы – 222, 
Алматы қаласы – 126, 
Шымкент қаласы – 58, 
Ақмола облысы – 48, 
Ақтөбе облысы – 30, 
Алматы облысы – 64, 
Атырау облысы – 69, 
Шығыс Қазақстан облысы – 79, 
Жамбыл облысы – 32, 
Батыс Қазақстан облысы – 89, 
Қарағанды облысы – 160, 
Қостанай облысы – 35, 
Қызылорда облысы – 10, 
Маңғыстау облысы – 45, 
Павлодар облысы – 41, 
Солтүстік Қазақстан облысы – 17, 
Түркістан облысы – 19.
Жалпы, пандемия басталғалы коронавирусқа шалдыққандар саны – 397 976.

Қызылордада өткен тәулікте 10 адам коронавирусқа шалдыққан

<a href="https://kyzylorda-news.kz/">Kyzylorda-news.kz.</a> Бүгін, 10 маусым күні сағат 12-30-да (Нұр-Сұлтан қаласының уақытымен) ҚР Президенті жанындағы Орталық коммуникациялар қызметінде Қызылорда облысының әкімі Гүлшара Әбдіқалықова баспасөз конференциясын өткізеді.
Аймақ басшысы Мемлекет басшысының тапсырмалары аясында Қызылорда облысының әлеуметтік-экономикалық дамуы туралы баяндайтын болады.

Гүлшара Әбдіқалықова Нұр-Сұлтан қаласында баспасөз конференциясын өткізеді

<a href="https://kyzylorda-news.kz/">Kyzylorda-news.kz</a>. ҚР білім беруді және ғылымды дамытудың 2020-2025 жылдарға арналған бағдарламасының аймақта жүзеге асырылу барысы«Nur Otan» партиясы Қызылорда облыстық филиалы жанындағы «Білім мен ғылымды дамыту» жөніндегі аймақтық қоғамдық кеңес отырысында талқыланды.
Жиында облыстық білім басқармасының басшысы Ақзира Қасымова аталмыш бағдарламаның өңірде орындалысы барысын кеңінен таныстырып өтті.
<blockquote>
 «Атап айтсақ, мемлекеттік бағдарламада жергілікті әкімдіктердің құзыретіне 4 индикатор, 23 көрсеткіш бекітілген. Бүгінгі күні 4 индикатор мен 22 көрсеткіш толық орындалған. Қалған бір көрсеткіш үш ауысымды оқытуды жоюға бағытталған. Алайда бұл мәселені шешу үшін жұмыстар қолға алынуда. Мәселен, Қызылорда қаласында үш ауысымды болдырмау бағытында 600 орындық жаңа мектеп пен 200 орындық бір мектептің қосымша құрылысы жыл соңына іске қосылмақ. Сондай-ақ, осы мақсатта жеке инвесторлармен 800 орындық 2 жеке мектеп пайдалануға беріледі. Сонымен бірге, Арал, Жаңақорған аудандарында екі жаңа 300 орындық мектеп қыркүйек айында оқушы қабылдайды деп жоспарланып отыр», – дейді облыстық білім басқармасының басшысы Ақзира Қасымова.
</blockquote>
Басқарма басшысы мектепке дейінгі тәрбие мен оқыту мәселесіне де тоқталып өтті. Мәселен ағымдағы жылы 1-6 жасқа дейінгі балаларды мектепке дейінгі тәрбие мен оқытужоспар бойынша 81 пайыз болса, орындалысы 85,5 пайызды құрап отыр. 3-6 жасқа дейнгі балалардың қамтылуы 100 пайыз. 
Балалар қауіпсіздігі үшін 70 мектеп бейнебақылау жүйелеріне қосылып, терроризмге қарсы қауіпсіздік талаптарына сәйкестендірілген. Нақты айтар болсақ, 14 мектеп жедел басқару орталығына, 56 мектеп полицияның кезекші бөлімшелеріне қосылған. 110 мектеп ювеналды полиция қызметкерлерімен қамтамасыз етілген. 
Техникалық және кәсіптік білім беру бағытына келсек, облысымызда 30 колледжде (оның ішінде 17 мемлекеттік, 13 жекеменшік) 97 мамандық 163 біліктілік бойынша 20 мың студент білім алуда. 2020 жылы мемлекеттік тапсырыс негізінде бітірген 4067 студенттің 3459 жұмысқа орналасып, көрсеткіш 85,1% құрап отыр. 
Басқарма басшысы дарынды балаларды қолдау бағытындағы жұмыстарды да тілге тиек етті. Айтуынша жыл басынан халықаралық және республикалық олимпиадалар мен ғылыми жоба конкурстарында 124 оқушы жүлделі орын алған. Республикалық олимпиаданың қорытындысымен 26 оқушы жеңімпаз атанып, өңіріміздің олимпиадалық командасы республикада жүлделі 3 орынды иеленген.
<img src="https://kyzylorda-news.kz/wp-content/uploads/2021/06/6b69a886-facf-4fc0-beb4-47d336510a7e.jpg" alt="" />
<img src="https://kyzylorda-news.kz/wp-content/uploads/2021/06/c88c4edf-754f-4623-9f2a-d9a9f7c2a903.jpg" alt="" />

Жаңақорған, Арал аудандарында жаңа мектептер пайдалануға беріледі

<a href="https://kyzylorda-news.kz/">Kyzylorda-news.kz</a>. Қазақстан халқы Ассамблеясының кеңесі ҚХА мен Ассамблея кеңесінің жаңа құрамын мақұлдады, деп хабарлайды <a href="https://www.inform.kz/kz/kazakstan-halky-assambleyasy-men-assambleya-kenesinin-zhana-kuramy-bekitildi_a3798848">ҚазАқпарат</a>.
Ассамблея кеңесінің кеңейтілген отырысында ҚХА және Ассамблея Кеңесінің құрамына өзгерістер мен толықтырулар енгізу мәселесі қаралды.
<blockquote>
 «Қазіргі құрам ҚР Президентінің 2020 жылғы 23 қарашадағы шешімімен бекітілді. Сонымен қатар, ҚХА сессиясының 2021 жылғы 28 сәуірдегі шешімімен ассамблеяны басқару құқығын ҚР Президентіне беру, сондай-ақ ҚХА құрметті төрағасы мәртебесін ҚР Тұңғыш Президенті – Елбасына бекіту мәселесі мақұлданды», – деді ҚХА Төрағасының орынбасары-Хатшылық меңгерушісі Марат Әзілханов.
</blockquote>
Ол сондай-ақ, этносаралық қатынастар саласындағы мемлекеттік саясатты жетілдіру шеңберінде этносаралық келісімді қамтамасыз ету жүйесін жаңғырту жүргізілгенін атап өтті.
<blockquote>
 «ҚХА хатшылығы жергілікті жерлерде Ассамблея құрамдарын қалыптастыру тәсілдерін әзірледі және қалалар мен облыстардың ҚХА төрағаларына (әкімдерге) жіберілді. Сол бойынша өңірлерде Ассамблея мүшелерін ротациялау жұмысы жүргізілді», – деді Марат Әзілханов.
</blockquote>
Оның айтуынша, өңірлік Ассамблея құрамына этномәдени бірлестіктердің, ҚХА құрылымдарының, ғылыми және шығармашылық интеллигенцияның, қоғамдық бірлестіктер мен жастар ұйымдарының, мемлекеттік органдар мен өңірлердің ұсыныстарына сәйкес қоғамдық пікір көшбасшыларының өкілдері кіріп отыр.
<blockquote>
 «Ассамблея құрамы 523 мүшеден тұрады. Оның ішінде орталық деңгейде – 105, өңірлік деңгейде 418 мүшесі бар. Осылайша, Ассамблеяның өңірлік құрамдауышын, сондай-ақ жастар сегментін айтарлықтай кеңейту көзделеді. Ассамблея құрамында барлығы 39 этникалық топ бар», – деді ҚХА Төрағасының орынбасары.
</blockquote>
Сондай-ақ ҚХА кеңесінің құрамы жаңартылады.
<blockquote>
 «Кеңес құрамы 76 мүшеден (бұрын 72 мүше болған) тұрады, оған Мемлекет басшысы, Президент Әкімшілігі мен Тұңғыш Президент – Елбасы Кеңсесінің басшысы, Ақпарат және қоғамдық даму, Мәдениет және спорт, Білім және ғылым министрлері, Нұр-Сұлтан, Алматы, Шымкент қалаларының, облыстардың әкімдері кірді. Олар да жергілікті ҚХА төрағалары болып саналады. Кеңестің 10 мүшесі Парламент Мәжілісінің, Кеңестің екі мүшесі Парламент Сенатының депутаттары екенін айту керек, – деді Марат Әзілханов.
</blockquote>

Қазақстан халқы Ассамблеясы мен Ассамблея Кеңесінің жаңа құрамы бекітілді

<a href="https://kyzylorda-news.kz/">Kyzylorda-news.kz</a>. Қызылордада тергеу изоляторында «Ashyq» қосымшасы&nbsp;іске қосылды.
Елдегі эпидемиологиялық ахуал жөніндегі деректерді бақылау және талдауға арналған «Ashyq» қосымшасы Қызылорда облысы бойынша ҚАЖ департаментіне қарасты ЗК-169/1&nbsp;тергеу изоляторында&nbsp;іске қосылды.
Мекеменің кіре берісіндегі&nbsp;бақылау бекетіне QR-код жүйесі орнатылды. Келушілер мобильді қосымшаны алдымен телефонға жүктеп, нөмірі бойынша тіркелуі тиіс. Кейін QR-кодты сканерлеп, ЖСН нөмірін енгізеді. Сол кезде 4 түстің бірі жанады. ПТР тест тапсырмасаңыз және вирус жұқтырмаған болсаңыз көк түс , ПТР тест тапсырып, теріс нәтиже көрсеткен болса жасыл жанады. Ал, науқастармен байланыста болғандарға сары, короновирус жұқтырғандарға қызыл түс шығады. Сары мен қызыл түс жанған жағдайда келуші мекемеге кіре алмайды.
Осы статустардың көрсетілуі мекемеге келушілердің карантин уақытында жұмыс істеуге әрі келушілердің жазасын өтеп жатқандардың өміріне қауіп төндірмеуге мүмкіндік береді.
Сондықтан мекеменің Азаматтарды қабылдау фронт офисінде Ashyq қосымшасы жайлы жазылған&nbsp;парақшалар қойылып, бекет қызметкерлері тарапынан түсіндірме жұмыстары жүргізілуде.

Тергеу изоляторында «Ashyq» қосымшасы іске қосылды

<a href="https://kyzylorda-news.kz/">Kyzylorda-news.kz</a>. Жаңақорған ауданына Сырдария өзенінің жоғарғы ағысынан секундына 550 текше метр су келуде. Су деңгейі Келінтөбе магистралды каналы арқылы секундына 40 текшеметр, Сунақата каналынан секундына 6 текшеметр, Сумағар каналына 1,5 текшеметрді құрады. Бұл туралы Өңірлік коммуникациялар қызметінің ақпарат алаңында Жаңақорған ауданы әкімінің орынбасары Оңал Ержанов мәлімдеді.
<blockquote>
 «Бүгінгі таңда аудан бойынша егіс көлемі 36163 гектар. Биыл күріш дақылы 1346 гектарға қысқартылды. Келінтөбе, Сунақата, Сумағар каналдарымен 163 шаруашылық құрылымдары 7000 гектарға күріш дақылын егіп, суға бастыру жұмыстарын толық аяқтады», -деді Жаңақорған ауданы әкімінің орынбасары Оңал Ержанов.
</blockquote>
Бүгінгі мәлімет бойынша Шардара су қоймасына секундына 70,3 текше метр су түсуде. Қоймадағы су көлемі 3925 млн. текше метр, ал қоймадан төменге секундына 200 текше метр су жіберілуде. Көксарай су реттегішіндегі су көлемі 644,4 млн. текше метр, төменге секундына 350 текше метр су жіберілуде.
<blockquote>
 «Шардара мен Көксарайдағы су көлемі 4569,4 млн. текше метр. Сырдария өзенінің төменгі ағысына секундына 550 текше метр су жіберілуде, бұл өткен жылдан 50 текше метрге кем. Қазір Қызылорда облысына секундына 555 текше метр су жіберілуде»,-деді облыстық табиғи ресурстар және табиғат пайдалануды реттеу басқармасы басшысының орынбасары Бауыржан Оспанов.
</blockquote>
Су тапшылығында заманауи ылғал сақтағыш технологияны пайдалана отырып, «Пазылбек Қажы» шаруа қожалығы 500 гектар жерге мақсары дақылын егіп, нәтижелі өнім алуды жоспарлауда. Жалпы ауданда әртараптандыру бағытында жұмыстар жүйелі түрде жүргізіліп келеді.
Су тапщылығы жағдайының алдын алуға байланысты Жаңақорған ауданындағы Келінтөбе магистралды каналы және Сунақата каналдарына механикалық тазалау жұмыстары жүргізілді. Бүгінде облыс бойынша каналдармен алынатын су көлемі жоспар бойынша 470,7 текше метр алынуы қажет болса, нақты алынып жатқаны 445,1 текше метр,-деді Қазсушар РМК Қызылорда филиалының су шаруашылығы нысандарын пайдалану бөлімінің басшысы Айдос Асанбаев.

Жаңақорғандық дихандар 36163 гектар жерге егін екті

<a href="https://kyzylorda-news.kz/">Kyzylorda-news.kz</a>. Биыл Арал теңізінің құрғаған ұлтанында мемлекеттік орман қорының 1000 га жеріне 1 млн 800 мың дана сексеуіл көшеті отырғызылды. Қазіргі уақытта Қызылорда облысының ормандарды молықтыру және орман өсіру көлемін ұлғайтудың 2021-2025 жылдарға арналған Кешенді жоспары облыс әкімдігімен жасалынып, келісу үшін ҚР Экология, геология және табиғи ресурстар министрлігіне жолданды.
Бұл туралы Өңірлік коммуникациялар қызметінің ақпарат алаңында Қызылорда облыстық орман шаруашылығы және жануарлар дүниесі аумақтық инспекциясы басшысының орынбасары Исатай Абдразахов мәлімдеді.
<blockquote>
 «Кешенді жоспарға сәйкес, 2021-2025 жылдар аралығында Арал теңізінің құрғаған ұлтанында жалпы аумағы 401,8 мың га жерге орман мелиорациялық жұмыстар жүргізу көзделген. Оның ішінде, 38,1 мың га көшетпен отырғызу, 363,7 мың га әуеден және жерден тұқымнан себу арқылы сексеуіл екпелерін жасау. Осы жұмыстар жүргізілген жағдайда барлығы 328,7 млн. дана ағаш көшеттерін өсіру жоспарлануда»,-деді Исатай Абдразахов.
</blockquote>
Мамыр айында Инспекцияның ұйымдастыруымен Республикалық селекциялық тұқым өсіру орталығы, Қазақ орман шаруашылығы ғылыми зерттеу институтының мамандарынан құралған арнайы экспедиция жұмыс жасады. Қазіргі кезде облыстық жұмысшы тобымен тексеру жұмыстары жүргізілуде.

Арал теңізінің ұлтанына 2 млн-ға жуық көшет отырғызылды

<a href="https://kyzylorda-news.kz/">Kyzylorda-news.kz</a>. Қазақстан халқы Ассамблеясының кеңейтілген отырысында Мемлекеттік хатшысы Қырымбек Көшербаев Ассамблеяның стратегиялық міндеті не екенін еске салды, деп хабарлайды <a href="https://www.inform.kz/kz/kyrymbek-kosherbaev-dostyk-uyleri-memlekettik-tildi-damytuga-atsalysatyn-bolady_a3798826">ҚазАқпарат</a>.
<blockquote>
 «Стратегиялық міндет ретінде біз барлық этно-әлеуметтік топтарды біртұтас ұлтқа біріктіру жөніндегі көпжоспарлы жұмысты жалғастырамыз. Ассамблея құрылымдары – Достық үйлері мен лингвистикалық кабинеттер арқылы мемлекеттік тілді дамыту бойынша күш-жігерді де ұлғайтудың маңызы зор. Ассамблеяның және этномәдени бірлестіктердің әлеуметтік бағдарланған, қайырымдылық қызметін дамыту, сондай-ақ әртүрлі салалардағы волонтерлік институтын дамыту жөнінде шаралар қабылдау жалғасады», – деген Қырымбек Көшербаев аталған міндеттерді іске асыру үшін этномәдени бірлестіктер мен Достық үйлерінің жанындағы қайырымдылық және волонтерлік ұйымдардың, мемлекеттік тілді үйрету орталықтарының жұмысына жағдай жасап, материалдық-техникалық базасын нығайту жөнінде шаралар қабылдауды қажеттігін атады.
 «Этностарды қазақ халқының айналасындағы біріктіру мен топтастырудың орталығы ретінде достық үйлерінің жұмысын құруға тұжырымдамалық, жаңаша көзқарас қажет», – деді Мемлекеттік хатшы.
</blockquote>

Қырымбек Көшербаев: Достық үйлері мемлекеттік тілді дамытуға атсалысатын болады

<a href="https://kyzylorda-news.kz/">Kyzylorda-news.kz</a>. Биыл 10 маусымда күн сақина тәрізді тұтылады. Қазақстандықтар сирек кездесетін құбылысты түстен кейін тамашалай алады.
В.Г.Фесенков атындағы астрофизикалық институтының жұлдыздар және тұмандықтар физикасы зертханасының меңгерушісі, физика-математика ғылымдарының кандидаты Любовь Шестакованың айтуынша, 2021 жылы күннің төрт тұтылуы болады. Олардың тек біреуі ғана көрінеді.
<blockquote>
 «Күннің тұтылуын ертең байқауға болады. Бұл құбылыс сақина тәрізді болады. Бұл өте сирек кездесетін және таңғажайып оқиға. Күн тұтылу белдеуі Солтүстік Америка, Солтүстік мұзды мұхит, Ресейдің солтүстік-шығыс бөлігі арқылы өтеді. Қазақстан аумағында тұтылудың тек жекелеген фазалары ғана көрінуі мүмкін. Яғни, елдің солтүстік-шығыс облыстарында Павлодар, Петропавл, Өскемен, Семей қалаларында анық байқалады», – деді ол.
</blockquote>
Нұр-Сұлтанда күннің тұтылуы сағат 17.15-те басталып 19.03-те аяқталады. Бұл құбылыс шамамен сағат 18:11 кезінде анық көрінеді.
Алматыда күннің тұтылуын 17:44-тен бастап, 19:05-ке дейін тамашалауға болады. Әсіресе 18:26 шамасында бұл құбылыс анығырақ байқалады.
Биыл 4 желтоқсанда күн тағы тұтылуы мүмкін. Бірақ оны тек Антарктида мен оның айналасынан ғана көруге болады.
<a href="https://lenta.inform.kz/kz/10-mausymda-kun-tutylady_a3798781">ҚазАқпарат</a>

10 маусымда күн тұтылады

<a href="https://kyzylorda-news.kz/">Kyzylorda-news.kz</a>. Бүгін Қызылорда қаласының әкімі Ғанибек Қазантаевтың төрағалығымен өткен аппараттық мәжілісте кадрлық тағайындаулар таныстырылды.
Алдымен бұған дейін қала әкімінің кеңесшісі қызметін атқарып келген Шаймағанбетов Әмірбек Бердібекұлы басқа қызметке ауысуына байланысты өз лауазымынан босатылған болатын. Қала әкімі әріптестерінің арасында зор абырой мен беделге ие болған, Қызылорда қаласының әлеуметтік-экономикалық дамуына лайықты үлес қосып, қоғамдық-саяси ахуалдың тұрақтылығын сақтай білгені үшін Әмірбек Бердібекұлын қаланың ең жоғарғы марапаты «Құрмет грамотасымен» марапаттап, сәттілік тіледі.
<img src="https://kyzylorda-news.kz/wp-content/uploads/2021/06/199299410_2851413625125377_2795060530341611736_n.jpg" alt="" />
Осы кезге дейін Қызылорда қаласының қорғаныс істері жөніндегі басқармасының бастығы лауазымын абыроймен атқарып келген Намазбаев Руслан Бауыржанұлы қорғаныс саласында еңбек сіңірген жылдарына орай зейнетке шығуына байланысты Қазақстан Республикасы Қорғаныс министрінің орынбасары, Қарулы күштер бас штабы бастығының 2021 жылғы 4 маусымдағы бұйрығымен өз лауазымын тоқтатты.
<img src="https://kyzylorda-news.kz/wp-content/uploads/2021/06/198389973_2851413655125374_8436765609576999241_n.jpg" alt="" />
Руслан Бауыржанұлы Қызылорда қаласындағы қорғаныс істері саласына өзінің сүбелі үлесін қосып, жоғары нәтижелер көрсете білді. Жас ұрпақты отансүйгіштікке тәрбиелеу, олардың патриоттық рухын ояту жолында аянбай жұмыс жасағаны үшін Руслан Бауыржанұлы қала әкімінің «Алғыс хатымен» марапатталды.
2021 жылғы 2 маусымнан бастап Асқар Айдос Асқарұлы қалалық мемлекеттік сатып алу бөлімінің басшысы қызметіне тағайындалды.
<img src="https://kyzylorda-news.kz/wp-content/uploads/2021/06/198793984_2851413588458714_844495315112947295_n.jpg" alt="" />
Айдос Асқарұлы 1987 жылы дүниеге келген. Жоғары білімді. 2009 жылы Қаныш Сәтбаев атындағы Қазақ Ұлттық техникалық университетін «Көлік, көлік техникасы және технологиясы» мамандығы, 2011 жылы «Ақмешіт» гуманитарлық техникалық университетін «Қаржы» мамандығы, 2019 жылы Қорқыт Ата атындағы Қызылорда мемлекеттік университетін «Құқықтану» мамандығы бойынша бітірген.
Еңбек жолын 2010 жылы облыстық кәсіпкерлік және өнеркәсіп басқармасының инспекторы ретінде бастаған.
2010-2014 жылдары облыстық жұмылдыру дайындығы, құрылыс, ауылшаруашылығы басқармаларында бас маманы, 2014-2019 облыстық жастар саясаты, жолаушылар көлігі және автомобиль жолдары, энергетика және тұрғын үй-коммуналдық шаруашылық, мемлекеттік сатып алу басқармаларының бас маманы, бөлім басшысы, 2019 жылдан осы уақытқа дейін қалалық мемлекеттік сатып алу бөлімінің бас маманы қызметтерін атқарып келген.
2021 жылғы 8 маусымнан бастап «Қызылорда тазалығы» жауапкершілігі шектеулі серіктестігінің директоры қызметіне Құлмағанбетов Талғат Бекмұрзаұлы тағайындалды.
<img src="https://kyzylorda-news.kz/wp-content/uploads/2021/06/196694312_2851415795125160_4179513267747812634_n.jpg" alt="" />
Талғат Бекмұрзаұлы 1977 жылы дүниеге келген. Жоғары білімді. 2006 жылы Қорқыт Ата атындағы Қызылорда мемлекеттік университетін «Тасымалдауды және жол қозғалысын ұйымдастыру» мамандығы бойынша бітірген.
Еңбек жолын 2006 жылы «Көркейту» мекемесінің инженері ретінде бастап, 2007-2009 жылдары осы мекеменің абоненттік бөлімінің басшысы, бас инженері қызметтерін атқарған.
2009-2012 жылдары «Қызылорда қызмет сервис» жауапкершілігі шектеулі серіктестігінің директоры, 2013 жылы «Тұрғын үй Қызылорда» жауапкершілігі шектеулі серіктестігі директорының орынбасары, 2013-2017 жылдары «Қызылорда тазалығы» жауапкершілігі шектеулі серіктестігінің бас инженері, директоры, 2017-2018 жылдары қалалық коммуналдық шаруашылығы, жолаушылар көлігі және автомобиль жолдары бөлімінің басшысы, 2018-2019 жылдары «Қызылорда тазалығы» жауапкершілігі шектеулі серіктестігінің директоры, 2019-2020 жылдары «Мелиоратор» жауапкершілігі шектеулі серіктестігінің бас инженері, 2020 жылдан осы кезге дейін «Қызылорда автобус паркі» жауапкершілігі шектеулі серіктестігінің бас инженері қызметін абыроймен атқарған.

Қазақстан және Қызылорда облысының жаңалықтары