<a href="https://kyzylorda-news.kz/">Kyzylorda-news.kz</a>. Биыл Қызылорда облысында Тәуелсіздіктің 30 жылдығына орай азат елдің жетістіктерін насихаттайтын 12 тақырыптық бағыт бойынша 266 түрлі форматтағы іс-шараларды қамтитын облыстық кешенді іс-шаралар жоспары бекітілді. Жыл басынан бері 70 іс-шара өткізілді.
<blockquote>
 «Жалаңтөс Баһадүрдің 445 жылдығына арналған іс-шаралар, республикалық айтыс, ақын, жырау Кете Жүсіптің 150 жылдығына арналған жыраулар мен жыршылар байқауын өткізуді жоспарлап отырмыз. Атақты күрішші, «Дала академигі» Ыбырай Жахаевтың 130, КСРО халық артисі, әнші Роза Бағланованың 100 жылдықтарын атап өтеміз», – дейді Қызылорда облысының әкімі Гүлшара Әбдіқалықова.
</blockquote>
Сонымен қатар аймақта ұлттық мәдени құндылықтарды дәріптеуге және ел тарихын зерттеуге ерекше назар аударылуда.
Осы жылдың мамыр айында ең ежелгі өркениет орталықтары болған қалалар – сақтардың астанасы Бәбіш мола, оғыздардың бас қаласы Жанкент, қыпшақтар мен Қазақ хандығының астанасы – Сығанақ қалаларының орнында археологиялық зерттеулер басталды.

Гүлшара Әбдіқалықова: Ыбырай Жақаевтың 130, Роза Бағланованың 100 жылдығын атап өтеміз

<a href="https://kyzylorda-news.kz/">Kyzylorda-news.kz</a>. Сыр өңірінде «Қызылорда» өңірлік инвестиция орталығы арқылы ауыл кәсіпкерлерінің стартап жобаларына несие беру жұмыстары жолға қойылған. Қызылорда облысының әкімі Гүлшара Наушақызы баспасөз конференция барысында аймақтағы кәсіпкерлік саласында атқарылып жатқан жұмыстарға тоқталды.
Әдетте банк тарапы қызығушылық таныта қоймайтын жобаларға жергілікті билік тарапынан қолдау күшейген. Бір жыл ішінде ауылдағы кәсіпкерлердің 143 жобасын мақұлданған. Қолдау тапқан кәсіп түрлері негізінен мал шаруашылығы, егін шаруашылығы, балық өсіру және қызмет көрсету саласына бағытталған.
Ерекше айтуға болады, Сыр елінде 5 жылдан бері кәсіпкерлерді демеуге арналған «Қызылорда» өңірлік инвестиция орталығы жұмыс істеуде. Осы кезге 2000-ға жуық кәсіпкерлік жобаларға 8 миллиардтан астам теңгеге несие берілген.
Еске салайық, Қызылорда облысында 2021 жылдың 5 айында кәсіпкерлік субьектілерінің саны 7,3 пайызға өскен.

Қызылордада ауыл кәсіпкерлерінің 143 жобасы мақұлданды

<a href="https://kyzylorda-news.kz/">Kyzylorda-news.kz</a>.&nbsp;Қызылордада ауыл балаларының спортпен айналысуы үшін 5 спорт кешені салынады. Бұл туралы баспасөз брифингінде облыс әкімі Гүлшара Әбдіқалықова айтып өтті.
Жаңа нысандар 4 аудандағы бірнеше ауылдың балалар үшін спортпен шұғылдануына ерекше мүмкіндік береді. Мұнан бөлек, өңірде корпоративтік қордың қолдауымен тағы бір көпфункционалды спорт кешені бой көтереді.
Өңірде спорт алаңдарын ашуға ниетті кәсіпкерлер қатары артқан. Кәсіпкерлер мемлекеттік жекешелік әріптестік шеңберінде 7 жобаны іске асыруға мүдделі.

Қызылорданың бірнеше ауылында 5 спорт кешені салынады

<a href="https://kyzylorda-news.kz/">Kyzylorda-news.kz.</a> Қызылорда өңірінде мектеп салу қарқыны бәсеңдеген емес. 2021 жылы 6 білім беру ұйымы пайдалануға беріледі, оның ішінде инвесторлармен бірге 300 және 500 орындық 2 жеке мектептің іргетасы қаланған. Бұл туралы Орталық коммуникациялар алаңында өткен баспасөз брифингінде облыс әкімі Гүлшара Әбдіқалықова баяндады.
<blockquote>
 «Білім беру саласында апатты жағдайдағы мектептерді жою жұмыстары жалғасуда. 2020 жылы бізде 3 апатты жағдайдағы мектеп болды, біз 140 орындық бір мектепті пайдалануға бердік, тағы екеуінің құрылысы биыл аяқталады. Мұнан бөлек, 550 орынға арналған үш қосымша білім беру ұйымының құрылысы жүргізілуде», – деді Гүлшара Әбдіқалықова.
</blockquote>
Сонымен бірге өңірде 3750 орындық тағы 5 мектептің құрылысын бастау жоспарлануда. Ал, 47 балабақша мен 44 мектепте арнайы инклюзивті сыныптар ашылған.

Сыр елінде 1 жылда 6 мектеп пайдалануға берілді

<a href="https://kyzylorda-news.kz/">Kyzylorda-news.kz</a>. Жыл соңына дейін қызылордалықтардың 67,4 пайызы көгілдір отынның игілігін көреді. Бұл туралы Қызылорда облысының әкімі Гүлшара Әбдіқалықова баспасөз конференциясында айтты.
<blockquote>
 «Үкімет қолдауының арқасында инженерлік-коммуналдық инфрақұрылымды дамыту мәселелері де шешілуде. Бүгінгі таңда облыс тұрғындарының 97%-ы орталықтандырылған ауыз сумен қамтамасыз етілген, 65%-ы табиғи газ тұтынады. Жыл соңына дейін аймақ халқының 67,4 %-көгілдір отынның игілігін көреді», – дейді аймақ басшысы.
</blockquote>
Су, кәріз желілерін салу және қайта жаңғырту бойынша құны 1,4 млрд. теңгенің&nbsp; жобалары жүзеге асуда (РБ – 1,3 млрд теңге; ОБ – 0,1 млрд теңге), 400 шақырым болатын жол, көпір өткелдері мен көшелерді жөндеуге және салуға 17 млрд-тан астам теңге бағытталды (РБ – 8,1 млрд теңге; ОБ – 9,2 млрд теңге), бұл жақсы деңгейдегі жолдардың үлесін 70%-дан 75%-ға дейін арттыруға мүмкіндік береді.
«Birgemiz: Taza Alem», «Таза Табиғат» жалпыұлттық жобалары аясында «ЭКО – Қызылорда патрулі» жобасы жұмыс жасауда.
Рұқсатсыз қоқыс полигондары туралы хабарламаларға волонтерлерді тарта отырып, жедел шаралар қабылдануда.

Қызылорда: Биыл аймақ халқының 67,4% көгілдір отынның игілігін көреді

<a href="https://kyzylorda-news.kz/">Kyzylorda-news.kz</a>. Қызылорда облысында күріш егісінің көлемі 80 мың гектарға дейін қысқарады. Бұл туралы Қызылорда облысының әкімі Гүлшара Әбдіқалықова баспасөз конференциясында мәлімдеді.
<blockquote>
 «Ауыл шаруашылығы өндірісін дамытудағы негізгі міндеттердің бірі – егістіктерді суармалы сумен қамтамасыз ету, жайылымдар мен шабындықтарды және Арал теңізін қоса алғанда, көлдерді уақтылы суландыру. Суармалы сумен байланысты проблемаларды ескере отырып, ауылшаруашылығы өндірісін, әсіресе, егіншілікті әртараптандыру, су ресурстарын тиімді пайдалану жөнінде шараларды қабылдаудамыз. Аймақтағы топырақтың қатты тұздылығын ескере отырып, біз күріштен толықтай бас тарта алмаймыз. Дегенмен, күріштің егіс алқаптарын азайтуға жұмыс жүргізудеміз», – дейді облыс әкімі.
</blockquote>
Аймақ басшысының айтуынша, биыл өңірде күріш егісі көлемі&nbsp;89,5 мың гектардан 83 мың гектарға дейін қысқарды. Келешекте бұл көрсеткіш 80 мың гектарға дейін қысқарады.
<blockquote>
 «Бүгінгі күні күрішті суға бастыру&nbsp;100 пайызға орындалды. Алдағы уақытта ауылшаруашылығы тауарын өндірушілерге тұрақты табыс табуға мүмкіндік беретін ылғал сыйымдылығы аз дақылдар – соя, жүгері, майлы және жемшөп дақылдарының егістігін ұлғайтуды жоспарлап отырмыз», – дейді Гүлшара Әбдіқалықова.
</blockquote>
Қазіргі уақытта ауылшаруашылығына ылғал үнемдеу технологияларын енгізу қолға алынуда. Өткен жылы облыста пилоттық режимде аквагельдерді қолдану сынақтан өткізілді. Биыл бұл тәжірибені кеңейтіп, жүгері мен жоңышқа өсіру үшін жаңбырлатып суару тәсілі енгізіледі.

Қызылордада күріш егісінің көлемі қысқарып келеді

<a href="https://kyzylorda-news.kz/">Kyzylorda-news.kz</a>. Қызылорда облысында жыл ішінде жалға берілетін 945 пәтерлік 54 үйдің, оның ішінде Байқоңыр қаласында 250 пәтерлік 5 үйдің құрылысы жүргізіледі. Бұл туралы өңір басшысы Гүлшара Әбдіқалықова мәлімдеді.
<blockquote>
 «Облыс бойынша мемлекеттік бюджет есебінен әлеуметтік әлжуаз топтарға арналған тағы 342 пәтер жеке құрылыс иелерінен сатып алынады. Сондай-ақ, 965 пәтерлік 44 ипотекалық үй және жеке инвесторлар тарапынан 248 пәтерлік 7 үйдің құрылысы жүргізілуде. Мемлекет басшысының тапсырмасына сәйкес құрылыс салушылар, банктер және өзге де мүдделі ұйымдармен тұрғын үй саясатын дамытудың жаңа бағыттарын, оның ішінде жеке тұрғын үй қорында кезекте тұрғандар үшін жалдау ақысын субсидиялау тетігін енгізуді талқылаудамыз. Қазіргі таңда кезекте 30 690 адам тұр», – деді облыс әкімі.
</blockquote>
Жыл соңына дейін жеке тұрғын үй құрылысын қосқанда, шамамен 645 мың шаршы метр тұрғын үй беру жоспарланған. Бұл көрсеткіш өткен жылмен салыстырғанда 6%-ға артық.

Гүлшара Әбдіқалықова: Аймақта 54 тұрғын үйдің құрылысы жүргізіледі

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысының алыс ауылдарында екпе салуға қажетті 39 арнайы мобильді топ құрылды. Бұл туралы аймақ басшысы Гүлшара Әбдіқалықова мәлімдеді.
Пандемиямен күресте дәрі-дәрмектің жеткілікті болуы маңызды. Өңірде індетті алдын алуға бағытталған кешенді шаралар нәтижесінде дәрі-дәрмектің 2 айлық қоры қалыптасқан. Бұл үшін жергілікті бюджеттен 488 млн теңге бөлінген.
Баспасөз конференциясында Қызылорда облысының әкімі Гүлшара Әбдіқалықова өңірде дәрі-дәрмек бағасының шектен асыру жағдайына жол берілмейтінін жеткізді. Сондай-ақ, тұрғындардың денсаулығы үшін екпе егуге қажетті шаралар толық іске асқан.
Өңірде вакцина салдыруға қажетті 106 екпе бөлмесі ашылған. Оның 91-і ауылдық жерде орналасқан. Мұнан бөлек, шалғай ауылдардағы тұрғындарға екпе салу үшін 39 арнайы мобильді топ құрылған.
Айту керек, 1 ақпаннан бері облысқа QazVac-in, HayatVax, Спутник-V вакцинасынанІ компоненті бойынша 129050 келіп, оның 74% салынған. Ал, екінші компонентінде 87300 жеткізіліп, 46,8% салынған.

Қызылордада екпе салуға қажетті 39 арнайы мобильді топ құрылған

<a href="https://kyzylorda-news.kz/">Kyzylorda-news.kz</a>.&nbsp; Сенат депутаттары «Қазақстан Республикасының Үкіметі мен Ресей Федерациясының Үкіметі арасындағы «Байқоңыр» ғарыш айлағынан «Союз-2» зымырандарын ұшыру жөніндегі келісімді ратификациялау туралы» Заң жобасын қабылдады.
Сенат отырысында Мәжіліс мақұлдаған «Қазақстан Республикасының Үкіметі мен Ресей Федерациясының Үкіметі арасындағы поляр маңындағы орбиталарға солтүстік бағытта ғарыш аппараттарын ұшыру үшін «Байқоңыр» ғарыш айлағынан «Союз-2» типіндегі тасымалдағыш зымырандарды ұшыруды жүзеге асыру жөніндегі ынтымақтастық туралы келісімді ратификациялау туралы» Қазақстан Республикасы Заңының жобасы қаралды.
Заң жобасын таныстырған Цифрлық даму, инновациялар және аэроғарыш өнеркәсібі министрі Бағдат Мусин Қазақстан аумағынан «Союз-2» типіндегі тасымалдағыш зымырандарды ұшырғаны үшін қандай төлем алынатынын түсіндірді.
<blockquote>
 «Қазақстан Республикасы Парламентінің Мәжілісі мақұлдаған «Қазақстан Республикасының Үкіметі мен Ресей Федерациясының Үкіметі арасындағы поляр маңындағы орбиталарға солтүстік бағытта ғарыш аппараттарын ұшыру үшін «Байқоңыр» ғарыш айлағынан «Союз-2» типіндегі тасымалдағыш зымырандарды ұшыруды жүзеге асыру жөніндегі ынтымақтастық туралы келісімге 2019 жылғы 20 маусымда Нұр-Сұлтан қаласында қол қойылды. Осы келісім бүкіл әлемді кеңжолақты интернетпен қамтамасыз етуге бағытталған OneWeb халықаралық жобасын жүзеге асыру үшін «Байқоңыр» ғарыш айлағынан ғарыш аппараттарын ұшыру негізінде Қостанай облысының аумағында «Союз-2» типіндегі тасымалдағыш зымырандардың бөлінетін бөліктерінің құлау ауданын Ресей тарапынан пайдалану тәртібін реттейді. Құлау ауданын пайдалану үшін Қостанай облысының Жангелді ауданы әкімшілігіне түсетін жылына 3 рет ұшыру үшін 460 мың доллар көлемінде төлемақы анықталған. Ал қосымша ұшыру болған жағдайда әрбір ұшыру үшін 50 мың доллар көлемінде төлемақы төленетін болады. Құлау ауданы жылына небәрі бірнеше рет сервитут шартына сай қолданылып отырады», – деді министр.
</blockquote>
Сондай-ақ, ол аталған зымыран бөлшектерінің қай өңірге құлайтынын, жергілікті тұрғындардың қауіпсіздігі қалай қаматамсыз етілетінін баяндады.
<blockquote>
 «3-6 тәулікті құрайтын бұл кезеңдерде адамдар мен үй малының қаупсіздігін қамтамасыз ету үшін құлау ауданына кіру жабық болады. Қалған уақытта құлау ауданында жүруге және оны жайылым ретінде пайдалануға шектеу қойылмайды. Адамдардың құлау ауданынан тысқары жерлерде тұруы қауіпсіз болып табылады. Сонымен қатар тасымалдағыш зымырандарды әрбір ұшырған сайын жақын маңдағы тіршілік ортасына гигиеналық баға беру жұмыстары жүргізіліп, сынамалары алынатын болады», – дейді Бағдат Мусин.
</blockquote>
Ведомство басшысы киік төлдейтін уақытта Байқоңырдан аталған зымырандардың ұшуына шектеу қойлатынын да еске салды.
<blockquote>
 «Құлау ауданын пайдалану кезінде жануарлар мен өсімдіктер әлеміне жыл сайын мониторинг жүргізу көзделуде. Табиғат қорғау ұйымдарының киіктердің төлдеу және құстардың ұя салу кезеңінде құлау ауданын пайдалануды шетеу туралы талаптары орындалады. Яғни, сәуір мен маусым айлары аралығында тасымалдағыш зымырандар ұшырылмайды», – деді министр.
</blockquote>
<a href="https://lenta.inform.kz/kz/senat-soyuz-2-zymyrandaryn-ushyru-zhonindegi-kelisimdi-ratifikaciyalau-turaly-zan-zhobasyn-kabyldady_a3799176">ҚазАқпарат</a>

Сенат «Союз-2» зымырандарын ұшыру жөніндегі келісімді ратификациялау туралы заң жобасын қабылдады

<a href="https://kyzylorda-news.kz/">Kyzylorda-news.kz</a>. Биыл Байқоңыр қаласы мен Төретам елді мекенін дамытуға 2,1 млрд теңге жұмсалады. Бұл туралы Қаржы министрі Ербол Қарашөкеев айтты, деп хабарлайды ҚазАқпарат.
«1994 жылғы 10 желтоқсандағы Қазақстан Республикасының Үкіметі мен Ресей Федерациясының Үкіметі арасындағы «Байқоңыр» кешенін жалға беру шартына өзгеріс енгізу туралы хаттаманы ратификациялау туралы» заң жобасын талқылау кезінде Сенат депутаты Бекболат Орынбеков Байқоңырдағы орта білім мәселесін көтерді.
<blockquote>
 «Тарихи ғарыш кешені орналасқан 76 мыңнан асатын тұрғыны бар, оның ішінде 49 мыңнан астам Қазақстан Республикасының азаматы бар Байқоңыр қаласын дамыту кезеңінде бірқатар проблема туындап отыр. Атап айтқанда, Ресей тарапынан қолданыстағы ифнрақұрылымды күтіп ұстауға ғана қаражат бөлінуде. Қаладағы тұрғын үй қоры жаңартылмайды және инженерлік инфрақұрылым мен әлеуметтік нысандардың тозығы жеткен. Қазақстан тарапы да қолданыстағы заңнамалар негізінде Байқоңыр қаласының инфрақұырылым жобаларын тікелей қаржыландыра алмайды. Сонымен қатар қаржы жетіспеушілігі салдарынан ҚР азаматтарын сапалы біліммен қамтамасыз ету кезеңінде проблема орын алып отыр, Атап айтқанда, қалада 9200 оқушы тәлім алатын 12 мектеп бар. Оның ішінде Ресей Федерациясының 7 мектебінде 4000 оқушы және Қазақстанның 5 мектебінде 5200 оқушы білім алуда. Ресейлік мектептердегі 4000 оқушының 1408-і – Қазақстан Республикасының азаматтары. Олардың ресейлік білім беру бағдарламасын оқуына байланысты мемлекеттік грантпен жоғары оқу орнына түсу кезінде қиындықтар туындайды», – деді депутат.
</blockquote>
Сенат өкілі қаладағы 11 мың пәтердің иесі өз баспаналарын өз аттарына қарата алмай жүргенін де еске салды.
<blockquote>
 «Қолданыстағы заңнамаларға өзгеріс енгізіп, жалға алу кезінде төленетін түсімдер есебінен Байқоңыр қаласы мен оған іргелес жатқан Төретам мен Ақай елді мекендерін дамытуды қаржыландыру жұмыстары қашан және қалай іске асырылмақ? Байқоңыр қаласының 11606 пәтерінде тұрып жатқан ҚР азаматтарының баспанасын жекешелендіру мәселесі қашан және қалай шешімін табады», – деп сұрады Бекболат Орынбеков.
</blockquote>
Қаржы вице-министрі Ербол Қарашөкеевті айтуынша, «Байқоңыр» кешенінен түсіп жатқан жалдау ақысын нысаналы түрде Байқоңыр қаласы мен Төретам, Ақай елді мекендерінің дамуына жіберу –тұжырымдамалық мәселе.
<blockquote>
 «Мүдделі мемлекеттік органдар арасында ол мәселе талқыланған. Түсіп жатқан жалдау ақысы негізі салық емес түсім болғандықтан, бірыңғай бюджетке түседі. Оның бір бөлігін арнайы түрде бөліп алып, осы елді мекендердің дамуына жіберу мүмкін емес. Себебі ол бюджеттік принциптерге қайшы келеді», – деген министрлік өкілі соған қарамастан, осы елді мекендердің, Байқоңыр қаласының инфрақұрылымын қаржыландыруға толық мүмкіндік бар екенін атады.
 «2021 жылы Байқоңыр қаласы мен Төретам елді мекенін қаржыландыру үшін нысаналық трансферт арқылы бюджеттен 2,5 млрд теңге құю жоспарланған. Жалпы Қызылорда облысына республикалық бюджеттен 22,7 млрд теңге көзделіп отыр. Сол себепті мүмкіншілік бар. Нысаналы трансферт арқылы осы мақсаттарға ақшаны жіберуге дайынбыз. Ол үшін әрбір министрлік өз құзыреттерінде бізге ұсыныстарын енгізуі қажет», – деді вице-министр.
</blockquote>
Ведомство өкілі Байқоңыр қаласындағы 11 мыңнан астам пәтерді жекешелендіру мәселесін біржола шешуге бағытталған процес басталғанын да айтты.
<blockquote>
 «Ол үшін қолданыстағы тұрғын үй заңнамасын өзгерістер енгізудің қажеті жоқ. Біріншіден, ол Қызылорда облысының әкімдігінің құзыреті. Жекешелендіру процесін бастау үшін әуелі облыс әкімдігі сол пәтерлерді Ресей тарапының жалдауынан шығаруы керек. Жалдаудан шығару үшін «Байқоңыр» кешенінің мәселелері жөніндегі үкіметаралық комиссияның күн тәртібіне енгізіп, Ресей тарапынан, «Байқоңыр» әкімшілігінен келісім алу керек. Ресейдің жалдауынан шығарылғаннан кейін Қызылорда облысы әкімдігінің коммуналдық меншігіне өткізіп, осындан кейін қолданыстағы заңнама бойынша жекешелендіру процесі жүргізіледі. Ол жұмыс басталды, қазір жүргізіліп жатыр», – деді Ербол Қарашөкеев.
</blockquote>

Биыл Байқоңыр қаласы мен Төретам елді мекенін дамытуға 2,1 млрд теңге жұмсалады

<a href="https://kyzylorda-news.kz/">Kyzylorda-news.kz</a>. Қызылордалық тұрғынның үйінен 352 мың теңге жоғалады. Оны шаңырағына келген қонағы ұрлап алғаны белгілі болды. Жәбірленуші полицияға мән-жайды айтып, шағым түсірген.
Полицейлердің жүргізілген жедел-іздестіру жұмыстарының нәтижесінде күдікті азамат анықталып, ұсталды. Ол ҚПБ-на жеткізіліп, «ешқайда кетпеу және өзін дұрыс ұстау туралы қолхат» түріндегі бұлтартпау шарасы қолданылды.
«Аталған дерек бойынша Қазақстан Республикасы Қылмыстық кодексінің 188-бабының 1-бөлігімен (Ұрлық, яғни бөтеннің мүлкін жасырын жымқыру) сотқа дейінгі тергеп-тексеру амалдары жүргізілуде. Оқиғаның мән-жайы анықталуда», – делінген полиция департаментінің хабарламасында.

Қызылордалық тұрғынның үйіне қонаққа барған танысы ақшасын ұрлап алған

<a href="https://kyzylorda-news.kz/">Kyzylorda-news.kz</a>. Сауда және интеграция министрі Бақыт Сұлтанов картоп пен сәбіздің қымбаттауына не себеп болғанын түсіндірді.
Айтуынша, ауыл шаруашылығы министрлігінің мәліметіне сәйкес отандық картоп өндірісі ішкі тұтынуды 108%-ке қамтамасыз етеді. Ал картоптың тауарлық өндірісінің көлемі бар болғаны 2,0 миллион тоннаны немесе жалпы түсімнің 47%-ін құрайды. Қалған көлемі тауар айналымына жүйелі түрде қатыспайды, өйткені ол халықтың жеке қосалқы шаруашылықтарында өндіріледі.
Былтыр экспорт 360 мың тонна көлемінде рекордтық мәнді құрады. Осылайша, картоп экспортының үлесі 19%-ті құрайды, бұл нарықтағы тапшылыққа әкеледі. Осыған байланысты маусымаралық уақытта картопты импорттау қажеттілігі туындады. Бұл жағдай жылдан жылға қайталануда.
<blockquote>
 “Осы мәселені шешу үшін ауыл шаруашылығы министрлігі де, жергілікті атқарушы органдар да тиісті шаралар қабылдамай отыр. Өткен жылы баға картоп экспортына тыйым салу арқылы ғана тұрақтандырылды”, – деді Сұлтанов үкімет отырысында.
</blockquote>
Айтуынша, биыл картопты төмен бағамен экспорттаудың салдарынан отандық өнім қорлары 3 есе қысқарған (903 мың тоннадан 330 мың тоннаға дейін). Сол себепті Иран мен Пәкістаннан 28 мың тонна қымбат картоп сатып алынды. Оның бағасы отандық картопқа қарағанда үш есе жоғары.
“Жалпы 4 айда картоп импорты өткен жылдың сәйкес кезеңімен салыстырғанда 67 есе өсті, ал жыл басынан бері импорт бағасы 47%-ке жоғарылады. Бұл ретте әкімдіктер барлық қажетті тетігі болса да, халықты қамтамасыз ету үшін ішкі нарықта картоп бағасын ұстай алмады”, – деді министр.
Атап айтқанда, субсидиялау кезінде өндірушілерге “қарсы міндеттемелер” қойылмаған. Өңірлік тұрақтандыру қорларына картоп жеткілікті көлемде сатып алынбады. Сондай-ақ форвардтық сатып алу және “айналым схемасы” сияқты нарықтық тетіктер толық пайдаланылған жоқ.
“Өңірлердегі тұрақтандыру қорларында қазіргі уақытта картоп қоры іс жүзінде жоқ”, – деп мәлімдеді Сұлтанов.
Бұдан бөлек сауда министрі сәбіз бағасына да тоқталды.
Сәбіз бойынша одан да қиын жағдай қалыптасты. Отандық өнім қоры жыл басымен салыстырғанда 5,3 есе төмендеген.
<blockquote>
 “Негізгі тапшылық сәуірден шілдеге дейінгі кезеңде қалыптасады. Сол аралықта біз Өзбекстаннан қымбат сәбізді импорттауға мәжбүрміз. Бұл ретте Өзбекстанда сәбіз бағасы жыл басынан бері 55%-тен астамға өсті. Сәбіз қоры өңірлерде әлі жеткілікті емес. Тұрақтандыру қорларында бар болғаны 258 тонна сақталуда”, – деді ведомство басшысы.
</blockquote>
Ал сәбіз бойынша форвардтық сатып алу бүкіл ел бойынша 5,7 мың тоннаны құрайды, оның 73%-і тек Алматы қаласына тиесілі.
Бұған дейін Қазақстан өңірлерінде өткен жылғы картоп өнімінің бағасы шарықтап тұрғаны хабарланды.
Картоптың “отаны” саналатын Солтүстік Қазақстан облысында бұл көкөністің бір келісі 500 теңгеден сатылып жатыр. Егіс даласынан картоптың бір килограмы 280 теңгеден, сәбіз бен қызылша – 320 теңгеге дейінгі бағада саудалануда.
&nbsp;<a href="https://sputnik.kz/">Sputnik Қазақстан</a>

Қазақстан және Қызылорда облысының жаңалықтары