Kyzylorda-news.kz. Ұлы Жеңіс күні қарсаңында Қызылорда қаласындағы Назарбаев Зияткерлік мектебінің оқушылары мен ата-аналары аймақтағы ҰОС ардагерлерінің үйіне барып, мерекелік сый-сияпат көрсетті.
Бүгінде Қызылорда облысында көзі тірі небәрі 11 Ұлы Отан соғысының ардагерлері қалды. Жеңіс батырларына құрмет көрсету және көрсеткен ерліктері үшін шынайы алғысын білдіруді мақсат тұтқан мектеп ұжымы дәстүр бойынша жеңіс батырларымен жүздесті. Ақсақалдар келген қонақтарға қуанғандарын жасырмады.
Кездесу барысында оқушылар отты жылдар тарихы туралы тың ақпарат алып, ардагерлердің ақ батасын алды.
<blockquote>
 «Ер есімі – ел есінде» демекші, ешкім де, ештеңе де ұмытылмайды. Қиын күндерде даңқты ерліктің үлгісін көрсетіп, бізге бейбіт аспан астында өмір сыйлаған батырларымызға бас иіп, шынайы алғысымызды білдіреміз», – деп құттықтауын жеткізді 8-сынып оқушысы Айя Сердалы.
</blockquote>
Отты жылдардың бел ортасында болып, соғысты басынан өткерген тарихи адамдармен жүздесу бақытына ие болған қызылордалық зияткерлер Жеңіс батырларының есімдері жастардың мәңгілік есінде сақталып, олардың жасаған ерліктері ұрпақтан ұрпаққа жетіп отыратынын жеткізді.

Қызылордалық зияткерлер соғыс ардагерлерін құттықтады

Kyzylorda-news.kz. Қызылорда қаласының әкімі Ғанибек Қазантаев кезекті жұмыс күнін шаһардың арық жүйелерін аралап, саябақтардың аяқ сумен қамтылу деңгейін көруге арнады.
Шаһар басшысы алдымен Келмембет батыр саябағына барып, саябақтың көгалдандырылуы мен аяқ сумен қамтылуын назарға алды. Қорқыт ата және Яссауи көшелерінің қиылысында орналасқан 1 мың 123 шаршы метр аумақты алып жатқан саябақ жер асты ұңғымасы арқылы суарылуда. ЭЦВ-6 насос қондырғысы арқылы 80 метр тереңдіктен су тартылып, аталған аумақтағы жасыл желекті сумен қамту мүмкін болып отыр.
Жер асты ұңғымасы арқылы суарылатын тағы бір нысан Темір жол паркі. Мұнда да демеушілік есебінен 80 метр тереңдіктен су тартатын ЭЦВ-6 насос қондырғысы қойылып, 2 мың 450 шаршы метрді құрайтын парк аумағы аяқ сумен толық қамтылған. Қала әкімі өткен жылы қайта жаңғыртудан өткен парктің көркейту-көгалдандыру жұмыстарын жандандыруды тапсырды.
Айта кетейік, жаңарған саябақ ескінің естеліктерін көненің көзіндей сақтап, бүгінгі күнге маңызын жоғалтпай жеткізген. Сонымен қатар келушілер үшін паркте субұрқақ, балалар ойын алаңы мен 2 спорт және жаттығу алаңы жұмыс істеуде.
Тағзым мемориалының аумағы да биылдан бастап жер асты ұңғымасы арқылы суарылып, толығымен көгалдандырылған. Қазіргі таңда мұнда гүл егу жұмыстары қарқынды жүргізілуде.
Аралау барысында қала әкімі арық жүйелерінің де жағдайын көріп, шаһар орталығындағы аяқ судың жайын түбегейлі шешудің бірқатар тәсілдерін сала басшыларымен бірге талқыға салды. Қала негізгі арық жүйелері биылға дейін Жібек жолы және Сарқырама мангистральді каналдары арқылы сумен қамтылып келген. Сәуір айының аяғында Сарқырама каналына су жіберілгенімен дария деңгейінің төмендеуі арық жүйелерін аяқ сумен қамтуды қиындатып тұр. Осы мәселені шешу үшін қала әкімі Жібек жолы мен Сарқырама каналдарын қалалық канал арқылы біріктіруді мамандармен ақылдасып, сала басшыларына тиісті жұмыстарды жүргізуге тапсырма берді.
<blockquote>
 «Екі каналды байланыстырып, Жібек жолы арқылы Сарқырама каналына су беру, қала орталығын аяқ сумен қамтудың тың тәсілі болмақ. Шаһар орталығы немесе шет аймақ деп бөлмей, толық қала аумағының аяқ сумен қамтылуын өз қадағалауымда ұстаймын», – деген қала әкімі жауаптыларға аяқ сумен қамтуды жоғары деңгейде жүргізуді жүктеді.
</blockquote>
<img src="https://kyzylorda-news.kz/wp-content/uploads/2021/05/fb_img_1620529241468.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620529247676.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620529251013.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620529255069.jpg" alt="" />
<img src="https://kyzylorda-news.kz/wp-content/uploads/2021/05/fb_img_1620529261953.jpg" alt="" />

Қызылорда қаласының әкімі арық жүйелерін жаңғыртуды тапсырды

Kyzylorda-news.kz. Қазақстанда өткен тәулікте 2350 адамнан коронавирус инфекциясы ПТР арқылы анықталды, деп хабарлайды coronavirus2020.kz.
Өткен тәулікте коронавирус инфекциясын жұқтырған 2350 жағдай тіркелді.
Оның ішінде:
Алматы қаласында – 59794 (+637),
Нұр-Сұлтан қаласында – 48799 (+324),
Шығыс Қазақстан облысында – 25675 (+103),
Қарағанды облысында – 25531 (+249),
Алматы облысында – 22981 (+208),
Атырау облысында – 22556 (+74),
Павлодар облысында – 21888 (+121),
Батыс Қазақстан облысында – 20367 (+120),
Ақмола облысында – 19507 (+136),
Қостанай облысында – 14940 (+24),
Солтүстік Қазақстан облысында – 14169 (+15),
Шымкент қаласында – 10216 (+85),
Ақтөбе облысында – 9909 (+60)
Жамбыл облысында – 8426 (+72),
Маңғыстау облысында – 6108 (+35),
Қызылорда облысында – 6038 (+52),
Түркістан облысында – 5685 (+35).
Елімізде коронавирус инфекциясын жұқтырғандар саны 342 589 жетті.

Қызылордада өткен тәулікте 52 адамнан коронавирус анықталды

Kyzylorda-news.kz. Қызылорда қаласының әкімі Ғанибек Қазантаев қызылордалықтарды 9 мамыр – Жеңіс күнімен құттықтады.
Құрметті майдангерлер, тыл ардагерлері!Қадірлі жерлестер!
Сіздерді 9 мамыр – Ұлы Жеңіс күнімен шын жүректен құттықтаймын! Соғыс үнінің басылып, бейбіт күнде өмір сүріп жатқанымызға биыл – 76 жыл. Келер ұрпақтың азаттығын ойлап, азаматтық арды ту етіп, Отанды қорғаған, майдан даласында отқа түсіп, кеудесін оққа тосқан бабаларымыздың батырлығы жадымыздан мәңгі өшпейді. Қайсарлық пен батылдықтың, жанқиярлық ерліктің дастанындай санамызда сақталады.
Бүгін көз алдымызда қатары сиреген ардагерлеріміз – сұрапыл соғыс жылдарында бас амандығын емес ел бостандығын ойлап, майданға түскен батырлар. Бүгінгі бейбіт күнге жетуіміз осы батырлардың Отанға, елге, туған жерге деген сүйіспеншілігінің, қажымас қайраты мен ерік-жігерінің жемісі. Майдангерлеріміздің жеңіс жолындағы жанқиярлық батырлығы жастарды ерлік пен патриотизм рухына тәрбиелеудің өзгермес өнегесі, отансүйгіштікке баулудың негізгі бастауы.
Ардақты ардагерлер!
Сіздердің майдан даласындағы ерліктеріңіз бен тылдағы еңбектеріңіз жадымызда жаңғырып, қатпарлы тарихымыздың ұмытылмас парағы болып қалады. Жылдар жылжып, уақыт өткен сайын бұл ерліктің қадір-қасиеті мен бағасы артып, шоқтығы биіктей бермек. Жеңіс жалауы желбіреген күнде Сіздерге алғыс айтып, шексіз құрметпен бас иеміз. Арамызда аман-есен жүріңіздер ардагерлер!
Қадірлі қызылордалықтар!
Баршаңызды бүгінгі ұрпаққа ұран болған ұлы мереке – Жеңіс күнімен құттықтай отырып, отбасыларыңызға бақ-береке, әулеттеріңізге амандық, шаңырақтарыңызға шаттық тілеймін!

Ғанибек Қазантаев қызылордалықтарды Жеңіс күнімен құттықтады

Kyzylorda-news.kz. 9 мамыр өзге де ТМД елдері сияқты Қазақстанда да Жеңіс күні ретінде аталып өтеді. Өйткені, осыдан 76 жыл бұрын КСРО үшін екінші дүниежүзілік соғыс жеңіспен аяқталған болатын, деп хабарлайды <a href="https://www.inform.kz/kz/bugin-zhenis-kuni_a3785741">ҚазАқпарат</a>.
Германия әскері КСРО аумағына шабуыл жасаған 1941 жылдың 22 маусымы ТМД елдерінің ресми тарихында 4 жылға созылған алапат соғыстың басталған күні болып есептеледі. Кез келген соғыстың экономиканы ондаған жылдарға артқа шегеріп, ұлттың тұрмыс сапасы мен демографиялық әлеуетін тежейтіні тарихтан белгілі. Сондықтан соғыстың біткені туралы хабарды «қара қағаздар» мен қалыптан тыс азапты жұмыстан титықтаған халықтың «жеңіс» деп қабылауы заңды еді.
КСРО үшін жеңісті жақындатуға одақ құрамындағы Қазақ КСР-ның қосқан үлесі зор. 1939 жылы одақ көлемінде жүргізілген халық санағы бойынша Қазақстанда 6,2 миллион адам тұратын еді. 4 жылда қазақ даласынан 1 миллион 200 мың майданға аттанып, оның 601 мыңы қайтып оралған жоқ.
100 мыңнан астам қазақстандық соғыстағы ерлігі үшін түрлі деңгейдегі орден-медальдермен марапатталды. Оның ішінде 99 майдангер Кеңес Одағының Батыры және Тәуелсіз Қазақстанның Халық Қаһарманы атақтарын иеленді.
«Совет-герман соғысы кезінде жауға атылған 10 оқтың тоғызы Шымкенттегі қорғасын зауытында құйылды» деп келетін қанатты сөз бар. Соғыс жылдарында Қазақстан жалпы одақ бойынша мыс құймасының 30%-ын, марганец кенінің 60%-ын, мыс кенінің 50%-ын, висмуттың 65%-ын, полиметалл кендерінің 70%-ын, мырыш өнімінің 85%-ын өндірді.
Соғыс жылдарындағы ресми статистикаға сүйенсек, шайқасқа жарамсыз бала-шаға мен қариялардың, жарымжандар мен әйелдердің тылдағы еңбегінің арқасында Қазақстан майданға 500 мың тоннадан астам астық, 230 мың тоннадан астам картоп пен көкөніс, 250 мың тоннадан астам ет, 300 мың тоннадан астам сүт, 1,7 млн тонна жүн, 2,5 млн дана жылы киім жіберді. Ұрысқа деп 110 мыңнан аса жылқы, жаудан азат етілген аудандарға деп 500 мыңнан астам мал жөнелткен. Тылдағы қазақстандықтардың қалтасынан 1941-1945 жылдары соғыс техникаларын жасауға 480,3 миллион рубль жинап алынды.
1941-44 жылдары республикаға 300 мыңнан астам алман ұлтының өкілі, 45 500 қарашай, 406 000 шешен мен ингуш, 21,150 балқар, 2 200 қалмақ, 4 500 қырым татарлары, 27 600 месхет түріктері және басқа да ұлт өкілдері жер аударылды.
1949 жылы КСРО бойынша кезекті санақ жүргізілуі керек болатын. Бірақ билік оны тағы 10 жылға шегерді. Сондықтан екінші дүниежүзілік соғысты 6,2 млн адаммен қарсы алған Қазақстан қанша адаммен аяқтағаны туралы нақты дерек жоқ деуге болады.
1 мамырдағы жағдай бойынша Қазақстанда Екінші дүниежүзілік соғысқа қатысқан 665 ардагер бар. Биыл Жеңіс күні қарсаңында оларға 1 млн теңгеден өтемақы берілді.
Сондай-ақ, мемлекет Екінші дүниежүзілік соғысқа қатысушыларға ай сайын 182 851 теңге, Екінші дүниежүзілік соғыс мүгедектері үшін ай сайын 188 051 теңге зейнетақы төлейді.
Қазақстанның соғыс ардагерлеріне беріп отырған өтемақылары көрші елдердің бәрінен жоғары.

Бүгін – Жеңіс күні

Kyzylorda-news.kz. Қазақстаның басым бөлігінде атмосфералық фронталды бөліктердің өтуіне байланысты ауа райы құбылмалы болады, деп хабарлайды Қазгидромет.
Кәсіпорны таратқан мәліметтерге қарағанда, республиканың кей жерлерінде найзағай ойнап, жаңбыр жауады. Қазақстанның батысында және шығысында күн жауын-шашынсыз болады. Республиканың кей жерлерінде жел күшейіп, солтүстікте, оңтүстікте және оңтүстік-шығыста жел күшейеді, бұршақ жаууы мүмкін.
Ақмола, Жамбыл, Түркістан, күндіз Алматы облыстарының кей жерлерінде найзағай ойнап, дауыл тұрып, бұршақ жауады. Жел 15-20 м/с жылдамдықпен соғады. Ақмола облысының кей жерлерінде тұман түседі.
Қостанай облысының кей жерлерінде тұман түсіп, найзағай ойнайды, дауыл тұрып, жел 15-20 жылдамдықпен соғады, желдің екпіні секундына 23 метрге жетеді.
Солтүстік Қазақстан облысының кей жерлерінде тұман түсіп, найзағай ойнайды, дауыл тұрып, жел секундына 15-20 метр жылдамдықпен соғады, екпіні 25 м/с болады.
Күндіз Атырау, Маңғыстау, Батыс Қазақстан облыстарының кей жерлерінде жел секундына 15-20 метрге дейін күшейеді. Атырау, Маңғыстау облыстарының кей жерлерінде күндіз найзағай ойнайды.
Түнде және таңертең Қызылорда облысының кей жерлерінде найзағай ойнап, жел 15-20 м/с жылдамдықпен соғады.
Павлодар облысының кей жерлерінде тұман түсіп, найзағай ойнайды, дауыл тұрып күндіз желдің жылдамдығы секундына 15-20 метрге жетеді, кей жерлерде екпіні 25 м/с болады.
Қарағанды облысының кей жерлерінде найзағай ойнап, бұршақ жауады, түнде тұман түседі, күндіз кей жерлерде жел 15-20 м/с жылдамдықпен соғады.

9 мамырға арналған ауа райы болжамы

Kyzylorda-news.kz. Қызылорда облысының әкімі Гүлшара Әбдіқалықова Сыр жұртшылығын қасиетті Қадір түнімен құттықтады.
<blockquote>
 “Сіздерді қасиетті Қадір түнімен құттықтаймын! 
 Бұл түн адамзатқа игілікті насихаттайтын, мейірім мен шапағаттың, сабырлық пен шыдамдылықтың қайнар көзі болған Құран түскен түн. 
 Қасиетті кештегі игі тілектеріңіз қабыл болсын! 
 Рамазан айында сабыр сақтап, төзімділік таныта білгеніміздің арқасында індетке байланысты қалыптасқан ахуал біршама тұрақталды. Сындарлы сәттерде сүрінбей келе жатқан Сыр елінің қажырлы халқы бұл сынақтан да сүрінбей өтеді деп сенемін. 
 Еліміздің бекем бірлігі мен ырысты ынтымағы сақталып, аспаны бейбіт, жері құнарлы болсын, халқымызға таусылмас несібе берсін! 
 Баршаңызға мықты денсаулық, отбастарыңызға амандық-саулық тілеймін! 
 Қадір түні құтты болсын!”, – делінген аймақ басшысының әлеуметтік желідегі парақшасында.
</blockquote>

Гүлшара Әбдіқалықова қасиетті Қадір түнімен құттықтады

Ұлы Жеңіс жауынгері

Kyzylorda-news.kz. Дүниежүзілік денсаулық сақтау ұйымы бүгін COVID-19-ға қарсы Sinopharm қытай фармацевтикалық компаниясы өндірген вакцинаны жедел пайдалануға рұқсат берді, деп хабарлайды ҚазАқпарат.
<blockquote>
 «Бүгін күндіз ДДҰ жедел пайдалануға болатын препараттар қатарына COVID-19-ға қарсы Sinopharm компаниясының вакцинасын қосты. Ол – ДДҰ қауіпсіздігі, тиімділігі мен сапасын мақұлдаған алтыншы вакцина», – деп мәлімдеді баспасөз конференциясында ДДҰ бас директоры Тедрос Аданом Гебрейесус.
</blockquote>
«Бұл COVAX механизмі портфеліндегі вакцина тізімін кеңейтеді және елдерге ұлттық реттегіштердің вакцинаны жедел мақұлдауына сенімділік береді», – деді ол.

ДДҰ Sinopharm компаниясының вакцинасын пайдалануға рұқсат берді

Kyzylorda-news.kz. Бүгін барша мұсылман қауымы қасиетті Қадір түнін қарсы алады. Биыл пандемияға байланысты бұл түні мешітте орындалатын діни рәсімдер онлайн өтеді.
Мамырдың 8-нен 9-на қараған түні күн батқан уақытта қасиетті Қадір түні кіреді. Алланың мейірімінен үміт еткен әрбір адам Қадір түні кірместен бұрын дәрет алып, таза киім киіп, үстіне хош иісті әтір сеуіп, қасиетті түнді күтуге дайындық жасауға тиіс.
<blockquote>
 “Қадір түні мың айдан да қайырлы, бұл түні жасалған ғибадат 83 жылдық сауапқа пара-пар,”- делінген.
</blockquote>
“Қадір” деген сөздің өзі араб тілінен “тағдыр” деген мағына береді. Сол себепті бұл түнде адамның бір жылдық тағдыры ғана емес, ризық-несібесі де жазылады. Сондықтан бұл түнді барынша құлшылықпен өткізген жөн.
Мұсылман қауымының Қадір түнін асыға күтудегі тағы бір себебі – Жаратушыға жақындау. Қадір түнінде тілеген дұға-тілектер сөзсіз қабыл болады. Сондықтан адамдар бұл түнді тағатсыздана күтіп, оны құр жіберіп алмауға, бұл түнді тиімді пайдалануға тырысады.
<h3 id="">Қадір түнін қалай өткізу керек?</h3>
Бұл түні адамдардың сыртынан ғайбаттап, өсек айтуға, ішімдік ішуге, жанжалдасуға, дауласуға болмайды.
Достармен көңіл көтеріп, ән айтуға, билеуге, сауық кештерін ұйымдастыруға тыйым салынады. Теледидардан ойын-сауық бағдарламалары мен фильмдерді де көруге болмайды. Оның орнына тәрбиелік мәні бар дүниелерді тамашалаған дұрыс.
Қадір түнінде түні бойы дастарқан жайып қою шарт емес.
Мұсылмандар бұл түнді құлшылық етіп, шын жүректен өкініп, күнәлары үшін кешірім сұраумен өткізуге тиіс. Таңға дейін Қасиетті Құран кітабын оқып, дұға жасаған абзал.
<h3 id="-1">Қандай дұға оқылады?</h3>
Айша (р.а.) анамыз Пайғамбарымыздан (с.ғ.с) : “Уа, Алланың елшісі, Қадір түнінде қандай дұға жасайын” деп сұрағанда, Алла елшісі: ” Уа Аллам! Сен кешірімдісің, кешіруді сүйесің, менің күнәларымды кешіре гөр”, – деп дұға етуге кеңес берген.
Қадір түнінің құрметіне Раббымыздан барша мұсылманның амандығын, өзара достық пен бауырмашылдықтың артуын, Ислам әлемінің біртұтастығы мен күллі адамзатты апаттардан сақта деп тілеуіміз шарт.
<h3 id="-2">Қадір түні қашан аяқталады?</h3>
Қадір кешінің уақыты күн батқаннан сәресіге дейін жалғасады.
<h3 id="-3">Биыл қасиетті түнді мешітте қарсы алуға бола ма?</h3>
Пандемияға байланысты қазақстандықтар биыл да Қадір түнін мешітте емес, үйде қарсы алады.
Қазақстан мұсылмандары діни басқармасы елдегі эпидемиологиялық ахуалды ескеріп қасиетті Қадір түнінде мешітте орындалатын діни рәсімдер онлайн режимде өтетінін хабарлады.
Мүфтият азаматтарды Қадір кешін үйде өткізуге шақырып, халықтың денсаулығы мен өмірі бәрінен қымбат құндылық болғандықтан, осындай уақытша шешімді дұрыс қабылдауды және тәртіпке бағынуды сұрады.
Қадір түнінде отандық телеарналар мен “Халық арна”, “Хикмет ТВ” және muftyat.kz сайтының әлеуметтік желідегі парақшаларында арнайы онлайн бағдарлама көрсетіледі. “Қасиеті мол қадір түні” онлайн бағдарламасында белгілі ғалымдар уағыз-насихат айтады. Сондай-ақ Құран хатым дұғасына қатысуға мүмкіндік бар.
Сонымен қатар қазақстандықтар діни басқарма жанындағы ақпарат беру орталығынан 8 7172 33 30 30 нөміріне хабараласып, тәулік бойы қызықтырған сауалды қоя алады.
&nbsp;<a href="https://sputnik.kz/">Sputnik Қазақстан.</a>

Қадір түнін қалай өткізу керек?

Kyzylorda-news.kz. Жеңіс күніне орай өтетін дәстүрлі мерекелік шаралар келесі жылға ауыстырылды. Бұл туралы Мемлекет басшысының баспасөз хатшысы Берік Уәли <a href="https://m.facebook.com/story.php?story_fbid=3809518819171522&id=100003403233694">Facebook</a>-тегі парақшасында хабарлады.
<blockquote>
 «Қазіргі күрделі эпидемиологиялық жағдайға байланысты Жеңіс күніне орай өтетін дәстүрлі мерекелік шараларды келесі жылға ауыстыру туралы шешім қабылданды.
 Президент отандастарымызға арнайы құттықтауын жолдайды. Қазақстанда Ұлы Отан соғысының ардагерлері мен тыл еңбеккерлерінің есімі ерекше құрметтеледі.
 Мемлекет басшысының өкімімен Ұлы Жеңіс күні мерекесіне орай соғыс ардагерлеріне материалдық көмек көрсетілді» делінген хабарламада.
</blockquote>

Жеңіс күніне орай өтетін дәстүрлі мерекелік шаралар келесі жылға ауыстырылды

<h4 id="kyzylordanewskz">Kyzylorda-news.kz. Білім және ғылым министрлігінің аппарат жиналысында вице-министр Шолпан Каринова жазғы мектептердің жұмысына қатысатын мұғалімдерге қосымша қаржы талап етілмейтінін айтты.</h4>
Каринова жазғы мектептерге тартылатын кадрлар мәселесіне тоқталды.
<blockquote>
 Бұл аралықтар (26 мамыр-19 маусым) мұғалімдердің еңбекақысын төлеуге қосымша қаражат талап етілмейді. Себебі мұғалімдердің жазғы уақыттағы 56 күн еңбек демалысының кестесі қайта қаралады, – деді вице-министр.
</blockquote>
Оның сөзінше, мұғалімдердің еңбекақысы осы күнге дейін сақталатын болғандықтан қосымша қаражат талап етілмейді.
<blockquote>
 Барлық мұғалім әр мектеп бойынша жасалған тарификацияға сәйкес өз жүктемесімен жұмыс істей алады. Сонымен қатар ұйымдастырылатын жазғы мектептің жұмысы санитарлық талаптардың қатаң сақталуымен жүзеге асырылады, – деп Каринова түсіндірді.
</blockquote>
Оқыту формалары, түрлері әртүрлі болуы мүмкін.&nbsp;
Біріншіден, қалыпты сабақтар, 40 минут жүргізілетін сабақтар, кесте, қоңырау болады. Әр мектепте тиісті тәртіппен сабақтар ұйымдастырады.
Шолпан Каринова атап өткендей, жұмыстың бірнеше түрі ұсынылады. Бұл – жобалық жұмыс, зерттеулер және басқа да жұмыстар. Сонымен қатар жазғы мектептің жұмысында оқушыларға үй тапсырмасы берілмейді.
<a href="https://baq.kz/news/othernews/zhazgy-mektepte-sabak-beretin-mugalimge-kosymsha-aky-tolene-me/?live=Y">BAQ.KZ</a>

Қазақстан және Қызылорда облысының жаңалықтары