<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 7149 адамда коронавирус індеті ПТР арқылы расталып ауырғаны белгілі болды.
Аймақтар бойынша:
Нұр-Сұлтан қаласы – 822,
Алматы қаласы – 1336,
Шымкент қаласы – 77,
Ақмола облысы – 691,
Ақтөбе облысы – 243,
Алматы облысы – 273,
Атырау облысы – 145,
Шығыс Қазақстан облысы – 265,
Жамбыл облысы – 132,
Батыс Қазақстан облысы – 346,
Қарағанды облысы – 1063,
Қостанай облысы – 462,
Қызылорда облысы – 49,
Маңғыстау облысы – 46,
Павлодар облысы – 784,
Солтүстік Қазақстан облысы – 382,
Түркістан облысы – 33.
Жалпы ел бойынша ауырғандар саны 1246103.

Қызылордада 49 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> Қазгидромет 2 ақпанға арналған ауа райы болжамын жариялады.
Сәрсенбіде ел аумағының басым бөлігінде күн ашық болады. Ал батыс және солтүстік-батыс өңірлерге атмосфералық ауа ағындары әсер етеді, жауын-шашын (жаңбыр, қар), көктайғақ, желдің күшеюі, солтүстік-батыста жаяу бұрқасын күтіледі.
Қызылорда облысының орталығына тұман түседі.

Сәрсенбіге арналған ауа райы болжамы

Kyzylorda-news.kz. Қызылорда гарнизонындағы Әуе шабуылына қарсы қорғаныс әскерлерінің әскери бөлімінде санитарлық-эпидемиологиялық талаптар сақтала отырып, жаңа оқу кезеңінің жауынгерлік әзірлік жоспарына сәйкес кезекті жауынгерлік атыс өтті.
Әскери бөлімде жеке құраммен арнайы жауынгерлік тапсырмаларды орындамас бұрын, әдістемелік-нұсқаулық сабақтар өткізіліп, барлық қауіпсіздік шаралары жеткізілді. Сондай-ақ іс-қимылдар кезінде жеке қаруды шебер әрі тиімді пайдалануға айрықша назар аударды. Осы сияқты жауынгерлік атыстар әскери бөлім жеке құрамының теориялық білімдерінің жетілуіне, қатарға жаңа қосылған жауынгерлердің тәжірибе алмасуына, қызметтік міндеттерін сапалы орындауына оң әсерін тигізеді.
Жауынгерлік атыстың мақсаты – әскери бөлім жеке құрамының жауынгерлік дайындық дәрежесін, үйлесімділігін көтеру және жеке қару-жарақтарының жауынгерлік мүмкіндіктері мен оларды қолдану ережелерін зерттеу.
<blockquote>
 “Ай сайын жоспарға сай өтетін жауынгерлік атыстарға барлық санаттағы әскери қызметшілер тартылады. Жауынгерлік атыс дайындығындағы әрбір жаттығу біздің тәжірибемізді арттырып, нәтижелерді жақсартуға мүмкіндік береді. Бүгінгі атыстар барысында офицерлер мен сержанттар оң нәтиже көрсетіп, қару – жарақты қолдану мен нысананы дәл атумен жақсы даярлықтарын көрсете білді”, – дейді жауынгерлік даярлық бөлімінің аға офицері капитан Жанасыл Ерасылов.
</blockquote>
Жауынгерлік жоспарға сай өтетін осындай жауынгерлік атыстар бөлім жеке құрамының тәжірибелік білімдерінің дамуына көмегін берері анық.

Жауынгерлік дайындық басты назарда

<a href="https://kyzylorda-news.kz/">Kyzylorda-news.kz.</a> Отбасы банк (“Бәйтерек” холдингінің еншілес ұйымы) қазақстандықтардың тұрғын үйді жалдау ақысын субсидиялауға қатысты онлайн өтінімдерін қабылдау үшін платформаның функционалдығын пысықтауда. Жұмыс барысын автоматтандыру үшін банк 6 мемлекеттік органның 16 дерекқорымен интеграция жасауы қажет. Сондықтан баспананы жалға алу ақысын субсидиялау бағдарламасы 2022 жылдың мамыр айынан бастап іске қосылады. Көп балалы отбасылар, 1 және 2 топтағы мүгедектер, жетім балалар, мүмкіндігі шектеулі балаларды тәрбиелеп отырған отбасылар жалдау ақысын субсидиялауға өтініш тапсыра алады. Алайда үміткерлер тұрғын үй алу кезегінде тұрулары қажет.
Олардың әрбір отбасы мүшесіне шаққанда соңғы 6 айдағы жиынтық табысы ең төменгі күнкөріс деңгейінің бір мөлшерінен аспауы тиіс (2022 ж. 1 КМ – 36 018 теңге). Мұндай отбасыларға көмек ретінде бюджеттен 50 миллиард теңге бөлінеді.
Бұл қаражатқа мемлекет 70 мың қазақстандықтың баспананы жалға алу құнының жартысын субсидиялайды.
<blockquote>
 “Бұл тізімдегілердің дені, 51 мыңға жуығы, көп балалы отбасылар. Тағы 10 мыңы – 1 және 2 топтағы мүгедек жандар, 7 мыңы – мүмкіндігі шектеулі балалар тәрбиелеп отырған аз қамтылған отбасылар, 2 мыңы – жетім балалар. Енді бұл азаматтар үшін баспана мәселесі аса өткір болмайды. Олар аталмыш бағдарлама арқылы отбасылық бюджетке түсетін салмақты азайтуға мүмкіндік алады. Үнемделген қаражатты тұрмысты жақсартуға бағыттауға болады немесе жеңілдетілген несие беру бағдарламаларына қатысу үшін қаражат жинақтауға да мүмкіндік бар”, – деп түсіндірді “Отбасы банк” АҚ Басқарма төрайымы Ләззат Ибрагимова.
</blockquote>
Бағдарламаға қатысатын азаматтардың тізімін Индустрия және инфрақұрылымдық даму министрлігі қалыптастырады. Оны алғаннан кейін Отбасы Банк аталмыш бағыттың операторы ретінде жалдау ақысын субсидиялау мүмкіндігі туралы тізімдегі азаматтарды хабарландырады. Ізінше үміткер банк филиалына келмей-ақ, Baspana market платформасы арқылы онлайн өтініш бере алады. Ол үшін қазақстандықтардың ЭЦҚ кілті болуы қажет. Өтініш берушінің кірісі платформада тексерілгеннен кейін ол өзіне қолайлы баспана тауып, оны жалға алу шартына онлайн қол қойып, тіркейді. Содан кейін ағымдағы шот ашып, жалға алу құнының 50 пайызын сол жерге аударады. Банк өз тарапынан қалған 50 пайызын аударып, жалға алушының төлем тәртібін одан әрі қадағалайды.
Үміткердің жалдау ақысын субсидиялауға онлайн өтініш беру мүмкіндігі болмаса, ол бұл жұмысты Отбасы банкінің бөлімшесінде өз-өзіне қызмет көрсету аймағында іске асыра алады.

Отбасы банк жалдау ақысын субсидиялау өтініштерін Baspana market порталында қабылдайды

<a href="https://kyzylorda-news.kz/">Kyzylorda-news.kz.</a> Қызылордалық полицейлер «Құқық тәртібі» жедел профилактикалық іс-шарасының 13 күнінде 87 қылмысты ашты.
Облыс орталығында бұрын жасалған 12 қылмыстың беті ашылды. Жалға берілетін пәтерлердің 480 тексерілді.
Тегіс ұңғылы атыс қаруды заңсыз сақтап, алып жүрген 12 адам анықталып, барлығына ӘҚБтК-нің 482-бабымен әкімшілік хаттама рәсімделген.
Әкімшілік құқық бұзушылықтардың барлығы 1400 дерегі анықталған. Оның ішінде ұсақ бұзақылықтың 507 дерегі, алкогольдік ішімдіктерді iшу немесе қоғамдық орындарға масаң күйде жүрудің 293, Қазақстан Республикасында тiркеусiз не жеке басты куәландыратын құжатсыз тұрудың 441, шетелдiктiң немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзудың 34, шетелдiктерді және азаматтығы жоқ адамдарды қабылдайтын жеке немесе заңды тұлғалардың Қазақстан Республикасының халықтың көші-қоны саласындағы заңнамасын бұзудың 18 дерегі анықталған.
Сонымен қатар көлік құралын алкогольдік масан күйінде басқарудың 40 дерегі анықталып, барлығы заңға сәйкес әкімшілік жауапкершілікке тартылды.​
Бұл бағыттағы жұмыстар өз жалғасын табатын болады.​

«Құқық тәртібі»: Қызылордада 87 қылмыстың беті ашылды

<a href="https://kyzylorda-news.kz/">Kyzylorda-news.kz.</a> Биылдан бастап әлеуметтік маңызы бар азық-түлік тауарларына бөлшек сауда бағаларының шекті мәндерін бекіту үшін облыс әкімдігінің қаулысы әзірленуде. Оған маңызы бар азық-түліктің 19 түрі енгізілмек. Бұл туралы бүгін Өңірлік коммуникациялар қызметінде өткен баспасөз конференциясында облыстық ауыл шаруашылығы басқармасының басшысы Талғат Дүйсебаев мәлімдеді.
Жалпы аймақтағы сауда орындарында азық-түлік тауарларының қоры жеткілікті, өнімдердің тапшылығы байқалмайды.
<blockquote>
 «Сондай-ақ, бағаның негізсіз өсуіне жол бермеудің тағы бір тиімді шаралары ретінде «айналым» схемасы бойынша кәсіпкерлерге заем беру тәсілі кеңінен пайдаланылуда. Бүгінгі күні «айналым схемасы» бойынша 973 млн. теңге заем 19 кәсіпкерлік субъектілеріне берілді. Заем алған кәсіпкерлер 19 түрлі әлеуметтік маңызы бар азық-түлік өнімдерін қалада орналасқан 36 әлеуметтік дүкенде және қосымша 14 ірі супермаркетте келісім негізінде ашылған әлеуметтік бұрыштарда нарықтан төмен бағада жеткізіп, сатуда», – деді Талғат Тұрсынұлы.
</blockquote>
Айта кетейік, облыста бағаны тұрақтандыру мақсатында өңірлік тұрақтандыру қоры жұмыс жасайды. Ол үшін облыстық бюджеттен қажетті қаражат бөлінген. Қазіргі таңда тұрақтандыру қорында 1396,9 тонна өнім бар.

Талғат Дүйсебаев: «Айналым» схемасы бойынша кәсіпкерлерге заем беру тәсілі кеңінен пайдаланылуда

<a href="https://kyzylorda-news.kz/">Kyzylorda-news.kz.</a> Былтыр қуаңшылық болған кезде шаруалар жем-шөп таппай, мал қырылып қалды. Тіпті, кейбір өңірде шаруаларға субсидия ретінде күн батареясы берілген. Ашығын айтқанда, ауыл тұрғындарына не қажет екеніне ешкім бас қатырмаған. Бұл туралы ҚР Президенті Қасым-Жомарт Тоқаев Сыбайлас жемқорлыққа қарсы іс-қимыл мәселелері жөнінде кеңесте айтты, деп хабарлайды <a href="https://www.inform.kz/kz/prezident-kuanshylyk-turaly-auyl-turgyndaryna-ne-kazhet-ekenine-eshkim-bas-katyrmagan_a3893670">ҚазАқпарат</a>.
<blockquote>
 «Бұл жерде ауыл шаруашылығындағы субсидияларға байланысты жемқорлық деректердің анықталғанын атап өтуге болады. Кейінгі бес жылда мемлекет аграрилерді қолдау үшін екі триллион теңге бөлді. Осы уақыт ішінде аталған салада 960 қылмыстық іс тіркелген. 450 адам қылмыстық жауапкершілікке тартылған. Бұл сала жылдар бойы жемқорлыққа белшеден батуда. Соның кесірінен мемлекет үлкен зиян шекті, азық-түлік қауіпсіздігіне нұқсан келді. Атап айтқанда, жайылымдық жерлерді суландыруға бөлінген 80 миллиард теңгенің тең жартысы мақсатқа сай жұмсалмаған. Былтыр қуаңшылық болған кезде шаруалар жем-шөп таппай, мал қырылып қалды. Тіпті, кейбір өңірде шаруаларға субсидия ретінде күн батареясы берілген. Ашығын айтқанда, ауыл тұрғындарына не қажет екеніне ешкім бас қатырмаған. Субсидияны игердік деп есеп беру үшін сол күн батареяларының бағасы еселеп көрсетілген. Мұның бәрі уәкілетті органдардың жауапсыздығынан болған. Ауыл шаруашылығы министрлігі мен әкімдер мұндай былыққа жол бергені үшін жауап беруі керек», – деді Президент.
</blockquote>

Президент қуаңшылық туралы: Ауыл тұрғындарына не қажет екеніне ешкім бас қатырмаған

<a href="https://kyzylorda-news.kz/">Kyzylorda-news.kz.</a> Қызылорда облысында жыл басынан бері әлеуметтік маңызы бар азық-түлік тауарларының ішінде 4 өнімінің бағасы жоғарылады. Бұл туралы облыстық ауыл шаруашылығы басқармасының басшысы Талғат Дүйсебаев хабарлады.
<blockquote>
 “Қазіргі таңда сәбіз-1,3 пайызға, пияз-5,3 пайызға, қырыққабат-7,7 пайызға, картоп-2,7 пайызға қымбаттады. Жұмыртқаның бағасы арзандап, қалған 14 өнімнің бағасы бірқалыпты. Бір апта ішінде облыс бойынша ӘМАТ индексі 100,1% құрады. Аймақта баға тұрақтандыру мақсатында өңірлік тұрақтандыру қоры жұмыс жасайды. Өнім қорларын қалыптапстыру мақсатында облыстық бюджеттен соңғы екі жылда (2020-2022) 3,4 млрд. теңге бөлініп отыр”, – дейді Талғат Дүйсебаев.
</blockquote>
Айта кетейік, қазіргі таңда тұрақтандыру қорында 1396,9 тонна өнім бар.

Қызылордада 4 өнімнің бағасы жоғарылады

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Әлихан Смайыловтың төрағалығымен өткен Үкімет отырысында білім және ғылым жүйесін дамыту бойынша кешенді жоспарлар қаралды, деп хабарлайды Үкіметтің баспасөз қызметі.
Білім және ғылым министрлігі қандай реформаларды жүзеге асыруды жоспарлап отырғаны туралы білім және ғылым министрі Асхат Аймағамбетов баяндады.
Балабақша деңгейі бойынша
Білім министрі 3 жастан 6 жасқа дейінгі балаларды балабақшамен қамту қазір 99%-ға жеткенін айтты. Мектепке дейінгі білім беру реформалары шеңберінде 3 тармақты іске асыру жоспарлануда:
Біріншіден, мектепке дейінгі тәрбие мен оқыту моделі қабылданды. Оны биылғы жылы іске асырамыз. Осыған дейін кішкентай балаларға мектептегі сияқты кестеге сәйкес 20 минуттық сабақтар жүргізіліп келген болса, енді жаңа модель бойынша педагог оқыту мен тәрбиелеуді баланың бақшаға келген тұсынан бастап, осы жастағы балалардың физиологиялық және психологиялық қажеттіліктері бойынша ойын және коммуникациялар арқылы арнайы әдістемемен іске асыратын болады. Шетелдік тәжірибелердің зерттеулері де осы әдістеменің маңыздылығын көрсетіп отыр.
Екіншіден, балабақшалардың сапасын қамтамасыз ету үшін оларға деген талаптар күшейтіледі. Яғни материалдық-техникалық база, бейнебақылау жүйесі, педагогтердің біліктілігі, санитариялық, өртке қарсы нормаларға сәйкестігі, мемлекеттік тапсырысты берудің басты талаптары болады. Соның ішінде жекеменшік балабақшалардан да балаларға қолайлы жағдай жасау талап етіледі.
Үшіншіден, балабақшалардағы орындарды бөлу кезіндегі ашықтықты қамтамасыз ету үшін, облыстардағы электронды кезектердің бәрі енді республика бойынша бірыңғай базаға еніп, біріктірілетін болады.
Орта білім деңгейі бойынша
Білім және ғылым министрлігі жоғарыда айтылғандардан басқа алдағы орта білім беру реформасында негізгі бағыттарды ұсынды.
<blockquote>
 «Академиялық біліммен бірге оқушыларға өмірлік маңызы зор дағдыларды игертуге бағытталған «Жаһандық құзыреттіліктер» таңдау курсы ұсынылатын болады», — деді министр.
</blockquote>
ҚР Үкіметінің отырысы барысында ҚР БҒМ басшысы оқу бағдарламаларын одан әрі жаңғыртуға да тоқталды.
<blockquote>
 «Президент техникалық бағыттағы мамандықтарды дамыту бойынша тапсырма берді. Оны орындау үшін математикалық білімнің сапасын арттыру қажет. Ол үшін оқу бағдарламаларын, әдістемелік құралдарды, оқулықтарды жаңартамыз, математиканы топтарға бөліп оқытуды қолға аламыз», — деді А. Аймағамбетов.
</blockquote>
Балаларды еңбекке дайындау үшін ерте кәсіптік бағдарлауға баса назар аударылады, тиісті бағдарламаны өзгертіледі. Орта білім берудің сапасын бағалау үшін «Алтын белгіге» үміткерлерге қойылатын талаптар да күшейтіледі.
«Биылдан бастап білім беру сапасына сырттай бағалау толығымен енгізіледі. Мемлекеттік аттестаттау рәсімі қайтарылып, профилактикалық бақылау түрінде балабақша, мектеп, колледж деңгейлері үшін өткізіледі. Заңға қажетті өзгерістер енгізілді», — деді министр Үкімет отырысы барысында.
Пән мұғалімдерінің тапшылығы проблемаларын шешу үшін қайта даярлау тетігі қолданылады. Мысалы, мамандығы мұғалім емес, бірақ кәсіби білімі мен тәжірибесі жеткілікті мамандар мұғалімдікке қайта даярлау арқылы тартылатын болады.
«Мемлекет басшысының тапсырмасымен біліктілікті арттыру курстары енді педагогтер үшін 5 жылда бір рет емес, 3 жылда бір рет өткізілетін болады. Тиісті заң жобасы Парламентте қарастырылуда. Педагогтердің курстарының мазмұны да айтарлықтай өзгереді» — деді А. Аймағамбетов.
Апатты, үш ауысымды мектептер және оқушы орындарының тапшылығы проблемаларын шешу мақсатында 200 жаңа мектеп ашу жоспарланған, биыл 1003 ауыл мектебі жаңғыртылады. 560 мектепке күрделі және кешенді ағымдағы жөндеуден өтеді, 2068 пәндік кабинет сатып алынады. 598 мектепте жиһаз жаңартылады, 862 кітапхананы жаңғыртудан өтеді. Кемінде 2 млн көркем және танымдық балалар әдебиеті сатып алынады.
«Президент тапсырмасымен заңнамалық деңгейде оқушылар сарайларын, музыка және көркемөнер мектептерін жекешелендіруге жол бергізбеу нормаларын енгізу бойынша жұмыс жүргізудеміз. Балаларды үйірмелер мен курстармен неғұрлым көбірек қамту үшін алғаш рет биыл қосымша білім беруге мемлекеттік тапсырыс орналастыру механизмі іске асырылады. Сондай-ақ, алғаш рет ерекше балақайларды арнайы психологиялық-педагогикалық қолдау үшін мемлекеттік тапсырыс енгізіетін болады», — деді министр.
Колледждер бойынша
Түлектерді мамандықпен қамту үшін биыл мемлекеттік тапсырыс саны 20 мың орынға көбейеді. Жұмыс берушілер қажетті мамандар дайындау үшін оқу бағдарламаларын жасауға және колледждерді басқару жұмысына Қамқоршылық және индустриялық кеңестерге кіре отырып тартылатын болады. Ірі кәсіпорындар салалық колледждерді шефтік қамқоршылыққа алады, осындай кәсіпорындар биылғы жылы 100-ге жеткізіледі.
<blockquote>
 «Дуалды оқытуды қолдау бойынша бірқатар шаралар жасалады. Кадрлар даярлауда колледждерге толық академиялық дербестік беріледі. Барлық оқу бағдарламалары жұмыс берушілермен келісіліп, жұмыс беруші тарапынан сараптамадан өткізілетін болады. Кадрларды жұмыс берушілермен бірге дайындау үшін біз биыл алғаш рет пилоттық режимде кәсіпорындардың өзіне мемлекеттік тапсырысты беретін боламыз», — деді Асхат Аймағамбетов.
</blockquote>
Жоғары білім беру бойынша 2022 жылы гранттар саны 10%-ға артады. Бұған қоса техникалық бағыттарға басымдық пен қолжетімділікті кеңейту үшін техникалық мамандықтарға арналған гранттардың үлесі 40%-дан 60%-ға дейін ұлғайтылатын болады. Сондай-ақ, ауылдық квота да биыл 35%-ға дейін ұлғайтылады.
<blockquote>
 «Білім сапасы жағынан алшақтығы бар өңірлердің абитуриенттеріне техникалық бағыттары бойынша қосымша 10 000 нысаналы грант бөлінетін болады. Біз талдау жүргізіп, өңірлерді анықтадық. Бұл – Маңғыстау, Атырау облыстары. Жоспарға сәйкес студенттер еліміздің жетекші жоғары оқу орындарында білім алатын болады. Сондай-ақ, оқу аяқталған соң тұрғылықты жерлеріне барып өтеу көзделеді», — деді министр.
</blockquote>
Қоғамдық тәртіпті сақтау жөніндегі міндеттерді орындау кезінде қаза тапқан құқық қорғау және арнаулы мемлекеттік органдар қызметкерлерінің балаларына университеттерде тегін оқу үшін білім гранттарын беру жөніндегі норма енгізіледі.
<blockquote>
 «Экономика үшін кадрларды жедел даярлау үшін биыл пилоттық режимде 2,5 – 3 жыл оқытумен қолданбалы бакалавриат енгізіле басталады. Жоғарғы білім беруде «онлайн-оқыту» жаңа нысанын енгізу жоспарлануда. Тиісті заң жобасы Мәжілісте қаралуда. Бұл цифрландыру заманының сұранысына сай келетін шара», — деді А.Аймағамбетов.
</blockquote>
Мемлекет басшысының тапсырмасы бойынша беделді шетелдік университеттердің 5 филиалы ашылады.
<blockquote>
 «Қазіргі уақытта елімізде Де Монтфорт Лестер Ұлыбритания университетінің филиалы жұмыс істей бастады. Солтүстік Қазақстан мемлекеттік университетін Аризона университетіне сенімгерлік басқаруға беріледі. Сондай-ақ, техникалық бағыттар бойынша Ресейдің үздік жоғары оқу орындарының филиалын ашу бойынша келіссөздер жүргізілуде. Тағы да бір британдық университеттің филиалын ашу бойынша келісссөздер жүріп жатыр. Еліміздің батыс өңірі жастарының жоғары стандарттарға негізделген білімге қол жеткізуін қамтамасыз ету мақсатында екі жетекші шетелдік техникалық университеттің филиалдары ашылатын болады», — деді А. Аймағамбетов.
</blockquote>
Ғылым саласы бойынша Білім және ғылым министрлігі ғалымдарды қолдау жөнінде кешенді шаралар қабылдады. Жас ғалымдардың зерттеулеріне 1000 грант бөлу, 500 ғалымды жетекші шетелдік ғылыми орталықтарда тағылымдамаға жіберу ұйымдастырылады. Алғаш рет 2022 жылы жоғары оқу орындары мен ғылыми зерттеу институттарында постдокторантура енгізіледі.
<blockquote>
 «Егер бұрын ғалымдар жалақыны тек конкурстар арқылы ғана алатын болса, енді жетекші ғалымдар тұрақты жалақы алатын болады. Бұл – 85 ғылыми ұйымның 1200-ге жуық жетекші ғалымдарының жағдайын жақсартады», — деді А. Аймағамбетов.
</blockquote>
Бұған қоса, еліміз үшін аса маңызды іргелі зерттеулермен айналысатын тарих және этнология институты, тіл білімі институты, математика институты, ядролық физика институты, әдебиет және өнер институты, философия және т. б. институттардың ғалымдары енді жалақыларын тұрақты режимде алып, үздіксіз жұмыс істейтін болады.
Жоғарыда айтылғандардан басқа, Білім және ғылым министрлігі ғылыми зерттеу институттарының материалдық-техникалық базасын жаңғырту жұмыстары биыл да жалғастырад.

ҚР Білім және ғылым министрлігі қандай реформаларды жүзеге асырмақ?

<a href="https://kyzylorda-news.kz/">Kyzylorda-news.kz.</a> Қызылорда қаласында қоғамдық көлік өртенді. Бұл туралы әлеуметтік желілерде бейне жазбалар көбейді.
1 ақпан күні&nbsp; Қызылорда қаласында сағат 13:37 шамасында сол жағалау көпірінің жанында «Қызылорда автобус паркі» ЖШС-не тиесілі №1 автобус толығымен жанып кетті.
Өрт 13:49-да оқшауланып, 13:53-те жойылды.&nbsp;Автобус ішінде 16 жолаушы болған, барлығы автобустан өз бетінше шыққан, зардап шеккендер жоқ.&nbsp; Өрттің шығу себебі анықталуда.&nbsp; Өрт сөндіру және авариялық-құтқару жұмыстары қызметінің 9 қызметкері және 3 бірлік техника оқиға орында болып, қызыл жалынды өшіруге үлес қосты.
<img src="https://kyzylorda-news.kz/wp-content/uploads/2022/02/fb_img_1643708102384.jpg" alt="" />

Қызылордада автобус өртенді (ВИДЕО)

<a href="https://kyzylorda-news.kz/">Kyzylorda-news.kz.</a> Жалағаш ауданындағы Қаракеткен ауылында газ баллонының жарылуы салдарынан баспана өртеніп кетті.
Ауылдағы оқыс оқиға түнгі уақытта болған. Үйдің ас бөлмесіндегі 50 литрлік газ баллоны жарылып, баспананың қабырғалары құлаған.
Түн ортасындағы жарылыстан отбасындағы 5 адам зардап шекті. Қазір 55 жастағы әйел мен екі баласы, сондай-ақ келіні денелері күйіп, ауруханада жатыр. Ал 4 жастағы бүлдіршін дәрігердің қарауынан кейін үйіне қайтарылған.
<blockquote>
 “Азаматша 55 жастағы ІІІ-А дәрежелі 26-30% терінің күюі, орта ауырлық дәрежелі, баласы ІІ-ІІІ дәрежелі 25% терінің күюі, орта ауырлық дәрежелі, келіні ауырлық жағдайы жеңіл дәрежелі, баласы ауырлық жағдайы орташа дәрежелі диагноздарымен жатқызылды, – дейді Төтенше жағдайлар департаментінің мамандары.
</blockquote>

Қызылорда: Газ баллоны жарылып, отбасы мүшелері зардап шекті

<a href="https://kyzylorda-news.kz/">Kyzylorda-news.kz.</a> 2022 жылғы ақпанға арналған ауа райы болжамы жарияланды.
Ақпан айында еліміздің басым бөлігінде ауаның орташа температурасы климаттық нормадан 1-2° жоғары болады деп күтілуде, бұл Иран мен Орта Азия аудандарынан жылы ауа массаларының шығарылуына байланысты болады. Еліміздің шығысында Таймыр мен Шығыс Сібір аудандарынан суық антициклонның ықпал етуіне байланысты ауа температурасы климаттық норма шамасында болады. Ақпан айында жауын-шашын мөлшері республиканың басым бөлігінде норма шамасында, ал Қазақстанның батысында, оңтүстік, оңтүстік-шығыс және шығыс аумақтардың таулы және тау бөктерлі өңірлерінде нормадан көп болжанады.
Бірінші онкүндіктің басында Сібір антициклоны Қазақстанның басым бөлігінде аязды және көбінесе аз жауын-шашынды ауа райын шарттайды, ал республиканың батысында Батыс және Оңтүстік циклондардың ықпалымен жауын-шашын (жаңбыр, қар), желдің 15-20 м/с дейін күшеюі, тұман және көктайғақ құбылыстары күтіледі. Содан кейін циклонның солтүстік-шығыс бағытта ауысуымен республиканың қалған аумағында да жауын-шашынды және желді ауа райы күтіледі.
Ақпанның бірінші онкүндігінің бірінші жартысында ҚР оңтүстігі мен батысында күндізгі ауа температурасының жоғарылауы күтіледі.
Бірінші онкүндіктің ортасында еліміздің солтүстігінде және орталығында түнде -10-20°С-тан -5-13°С-қа дейін, күндіз -5-15°С-тан 0,-8°С-қа дейін аяздың әлсіреуі болжанады.
Онкүндіктің соңында республиканың шығысында температура фоны түнде -18-23°С-тан -12-17°С-қа дейін, солтүстік-шығыста -28-33°С-тан -20°С-қа дейін, күндіз -10-15°С-тан -5-10°С-қа дейін жоғарылайды.
Екінші және үшінші онкүндіктерде ауыспалы барикалық түзілімдермен ауа райының тұрақсыз сипаты күтіледі: жауын-шашын (жаңбыр, қар), екпінді жел, еліміздің солтүстік-батыс жартысы мен батысында бұрқасынмен, оңтүстігінде жекелеген күндері шаңды дауыл күтіледі.
Жекелеген күндері Шығыс Сібір аудандарынан суық антициклонның әсерінен температуралық фон төмендейді деп күтіледі:
– батыста және солтүстік-батыста түнде -12-22°С-қа дейін, күндіз -3-10°С-қа дейін;
– солтүстік жартысында түнде -20-35°С-қа дейін, күндіз -13-18°С-қа дейін;
– оңтүстік жартысында түнде -8-15°С-қа дейін, күндіз -5+3°С-қа дейін.
Жекелеген күндері Иран мен Орта Азия аудандарынан жылы ауа массаларының шығарылуына байланысты температуралық фон жоғарылайды деп болжанады:
– батыста түнде -5+1°С-қа дейін, күндіз +2+8°С-қа дейін;
– солтүстік-батыста, солтүстікте, орталықта және шығыста түнде -3-15°С-қа дейін, күндіз -6+3°С-қа дейін;
– оңтүстікте, оңтүстік-шығыста және оңтүстік-батыста түнде -5+5°С дейін, күндіз +5+12°С дейін.

Қазақстан және Қызылорда облысының жаңалықтары