<a href="https://kyzylorda-news.kz/">Kyzylorda-news.kz.</a>&nbsp; «Әскери қызметшілердің мәртебесі туралы» Заңға енгізілген өзгерістерге орай, әскери қызметшілердің зейнетке шығу жасын 5 жылға созуға болады. Бұл туралы онлайн-брифингіде Қорғаныс министрлігі Зейнетақымен қамсыздандыру орталығының бастығы полковник Қайыржан Бимолдин мәлім етті, деп хабарлайды ҚазАқпарат.
<blockquote>
 «Үкімет бекіткен ең басты норма – барлық әскери қызметшілер мемлекеттік бюджет арқылы зейнетақы тағайындау жүйесіне көшті. Бұрын 2016 жылға дейін жинақтау жүйесінде болғанбыз. Бұл – өте жақсы жетістік деп ойлаймын. Зейнет жасы бойынша ұзарту «Әскери қызметшілердің мәртебесі туралы» заңда қарастырылған. Биыл ол заңға өзгерістер енгізілді. Соған сәйкес, әскери қызметшінің жасын 5 жылға дейін созуға болады», – деді Қайыржан Бимолдин.
</blockquote>
Сондай-ақ, орталық бастығы әскери қызметшілердің зейнетақысы қалай есептелетінін де түсіндіріп өтті.
<blockquote>
 «Әскери қызметшілерге зейнетақы тағайындау нормалары «Қазақстан Республикасының Зейнетақы туралы» заңында қарастырылған. Ол әскери қызметшінің еңбек өтіліне тікелей байланысты. Нақты айтсақ, егер 25 жыл еңбек өтілі болса, әскери қызметшіге 50 пайыз зейнетақы тағайындалады. Ал 25-тен астам әр жылға 2 пайыздан қосылып отырады. Мысалы, 30 жыл еңбек өтілі бар әскери қызметшіге өзінің алып отырған жалақысының 60 пайыз зейнетақы тағайындалады», – деді ол.
</blockquote>
Айтуынша, «Цифрлық Қазақстан» бағдарламасы шеңберінде министрліктің әскери қызметшілерді зейнетақымен қамсыздандыру процестері автоматтандырылған.
<blockquote>
 «Оның ішінде зейнетақы тағайындау, қайта қарау, жаңғырту процестері автоматтандырылды. Бұрынғы жүйе бойынша мұның бәрі қолмен істелінетін. Зейнетақы төлемдерінің көшірмелері пошта арқылы жіберілетін. Бүгінде интеграциялық жүйе бойынша бірнеше секундтың ішінде жетеді. Бұрын тағайындау туралы құжаттар 2 айдың ішінде поштамен барып жатса, қазір екі жұма, бір айдың ішінде іске асатын жағдайға жетті», – деді орталық бастығы.
</blockquote>

Әскерилердің зейнетке шығу жасын 5 жылға созуға болады 

<a href="https://kyzylorda-news.kz/">Kyzylorda-news.kz.</a> Қазақ халқы қуғын-сүргінді патшалық Ресейдің кезінен бастап бастан кешірді десек, қателеспейміз. Өйткені «аға ұлт» бұратана халықтарға аяушылықпен қарамай, оларды барынша ашса алақанында, жұмса жұдырығында ұстағанын тарихтан білеміз. Қазақ жеріне орыс және украин шаруаларын әкеліп төгіп, атамекен жерлерінен айыруы, қайырымдылық деген желеумен қазақтарды шоқындыруы, Бірінші дүниежүзілік соғыс кезінде Орта Азияны мекен еткен халықтардың жастарын қанды қырғынның қара жұмысына айдауы және тағы басқадай қатігездік жағдайлар дәлел бола алады.
Кеңестік кезеңде қазақ халқы ерекше аяусыздықпен басып-жаншылды және оған қолдан қырғын жасалды. 1917 жылы Қазан төңкерісі орнағаннан кейін, қолына билік алған большевиктер алдымен бас көтерер ауқатты адамдарды қуғындай бастады. Малы мен жерін тартып алған адам еріксіз шет елге бас сауғалап қаша бастады. Үдере көшіп, басқа елге, басқа жерге бару дегеніңіз, оңай дүние емес. Жол-жөнекей ұры-қары мен өзара соғысқан Ресейдің қызылдары да, ақтары да аяусыз талаған талай көш қашып құтыла алмай жолда қалып, қырылды. Одан бергі уақытта ұжымдастыру басталып, қара халықтың қолындағы азын-аулақ малын сол қызыл өкімет тартып алды. Қазақ малдан айырылған соң күнін көре алмады. Отызыншы жылдардың басында ашаршылық кесірінен халқымыз баудай қырылды. Түлкі-тышқан тұрмақ, адам етін жеген қатігез заман сол кезде орнап еді.
Осындай халге елді душар еткен кеңестік Қазақ республикасын басқарған қандықол Филипп Голощекин 1941 жылы атылса да кейіннен Сталин өлген соң ақталған. Бұл кеңестік «қамқор ұлттың» қазаққа деген шынайы көзқарасын көрсетеді. Коммунистік империя дәл сол кезеңде қазақ пен украин халықтарын неге ерекше қаніпезерлікпен қырып-жойғанын әлі ешкім түсіндіре алмай келеді және ол тыңғылықты зерттелмеген тақырып болып қала береді. Ашаршылық кезінде 2 миллионнан аса қазақ құрбан болған деген мәліметтер бар. Бұл ауызбен айтып қана қоя салатын құрғақ сан емес. Әр қазақтың отбасы осы трагедиядан тыс қалмады. Бұрындары ашық айтылмайтын бұл әңгімені қазір көзі тірі кез келген қария еңірегенде етегі жасқа тола отырып айтады. Саяси көзқарасы мен сталиндік билікке өз наразылығын білдірген зиялы қауым, әсіресе Алаш орда өкілдері қуғын-сүргінге ұшырады. Большевиктер партиясының жеңісі анық нақтыланған соң, оған көздері жеткен алашордалықтардың кейбіреулері еріксіз түрде билікпен келісімге келіп, ұлтты сақтап қалу үшін ағартушылық қызметтерін жалғастыратын болды. Оған себеп, коммунистер көсемі В.Ленинмен жасалған келіссөздер болды. Соның негізінде қазіргі Қазақ республикасының территориясы айқындалған еді. Кеңестік басшы тарапынан құптау алғаннан кейін ұлт қаймақтары жаңа леппен жұмыс істеуге дайын болған еді. Өкінішке орай, билікке И.Сталин келген соң барлық жағдай өзгеріп сала берді. Оның жеке дара қолға алуымен барлық Алаш белсенділері қуғындала бастады. Бірде қапасқа қамап, бірде бостандыққа шығарған болып Ә.Бөкейханұлы, А.Байтұрсынұлы және М.Дулатұлы сияқты Алашқа бас болғандарды да, кеңестік өкіметті толық мойындап оған қызмет еткен С.Сейфуллин, Б.Майлин және І.Жансүгіровтерді оңдырған жоқ. Олардың өздерін ғана атып-шауып тастаған жоқ, оған қоса әйелі мен бала-шағаларына дейін өмір бойы қудалап күн көрсетпеді. Қазақ елі тәуелсіздігі қолына тигеннен кейін бар-жоғын түгендеген заман келді. 
Қуғын-сүргін құрбандарын ақтау мақсатында 1993 жылдың 14 сәуірінде арнайы заң қабылданды.
Елімізде 1997 жылдан бері 31 мамыр саяси саяси қуғын-сүргін және ашаршылық құрбандарын еске алу күні деп атап өтіліп келеді. Тарихшы ғалымдардың зерттеушілерінше өткен ғасырдың 20-шы және 50-ші жылдар аралығында Қазақстанда 125 мыңнан астам адам қуғын-сүргінге ұшырап, олардың 25 мыңы ату жазасына кесілген. Қазақ жерінде осындай саяси тұтқындардың жиырмадан астам лагері болды. Саны аз халықтың осындай бастан кешкен трагедиясы ешқашан естен шықпақ емес. Социалистік режим ашаршылық пен саяси қуғын-сүргін арқылы халқымызды көп жағынан жайратып, халқымызды қаймағынан айырды. Оның зардабы талай жылдарға созылды. Ұлттық сананың құлдықтан арылуы мен ойдың азат болуы тек қана еліміз тәуелсіздік алғаннан кейін ғана өз арнасына біртіндеп түсіп келеді.
Қазақ елі жыл сайын осы күні барлық құрбандардың аруақтарына тағзым етеді және өткеннен сабақ алып, қаралы тарихын ұмытпайды.
Сүйіндік Нұралиев,
Ы.Жақаев атындағы күріш өсіру тарихы музейінің ғылыми қызметкері

Тарихтың ақтаңдақ парақтары

<a href="https://kyzylorda-news.kz/">Kyzylorda-news.kz.</a>&nbsp; Мерекелік концертте ел аймақтарынан келген 800-ге жуық бала және эстрада жұлдыздары өнер көрсетеді, деп хабарлайды ҚазАқпарат.
«Balapan әлемі» фестивалі 1 маусым – халықаралық балаларды қорғау күні мерекесіне арналып отыр.
Мәдени шара сағат 11:00-де Нұр-Сұлтан қаласы Есіл өзені жағасындағы амфитеатрда өтпек.
Ұйымдастырушылардың айтуынша, концерттік бағдарламада ел аймақтарынан келген 800-ге жуық талантты бала және эстрада жұлдыздары өнер көрсетеді.
<blockquote>
 «Фестиваль аясында амфитеатр аумағында ұлттық спорт және ойын-сауық алаңдары ұйымдастырылып, асфальтқа сурет салу байқауы өтеді. Сонымен қатар «Balapan» әлемі» кітап көрмесі мен астаналық мектепішілік қолөнер үйірмелері мен шебер балалар дайындаған қолөнер бұйымдарының жәрмеңкесі ұйымдастырылады. Одан бөлек, шара аясында балалар көңілді аниматорлар мен цирк әртістерінің өнерін тамашалай алады» делінген хабарламада.
</blockquote>
Фестиваль барысында Ақтау, Жезқазған, Қызылорда және Семей қалаларындағы балаларға арналған іс-шаралардан тікелей қосылым жасалады.
Мерекелік концертті елорда тұрғындары мен қонақтары тегін тамашалай алады.
Телеарна көрермендері үшін «Balapan Әлемі» фестивалі «Balapan» телеарнасынан сағат 12:00-ден бастап тікелей эфирде көрсетіледі.
Айта кетейік, аталған мерекелік шараны «Balapan» телеарнасы Нұр-Сұлтан қаласы әкімдігімен бірлесіп ұйымдастырып жатыр.

1 маусым астанада республикалық балалар фестивалі өтеді

<a href="https://kyzylorda-news.kz/">Kyzylorda-news.kz.</a>&nbsp; 30 мамырда еліміздің сегіз облысында дауылды ескерту жарияланды.
Түркістан облысының&nbsp;таулы аудандарында таңертең және күндіз найзағай ойнайды деп күтіледі. Тау асуларында шығыстан соққан жел екпіні 15-20 м/с құрайды.
Қызылорда облысының&nbsp;орталығында төтенше өрт қаупі сақталады. Қызылордада төтенше өрт қаупі сақталады.
Шығыс Қазақстан облысының Жарма ауданында төтенше өрт қаупі сақталады. Семейде төтенше өрт қаупі сақталады.
Күндіз&nbsp;Ақмола облысының&nbsp;батысында, солтүстігінде, шығысында найзағай ойнайды, бұршақ түседі деп күтіледі. Облыстың батысы мен солтүстігінде 15-20 м/с жылдамдықпен батыстан жел соғады. Батыстан соққан жел екпіні 15 м/с-ға жетеді.
Күндіз&nbsp;Павлодар облысының&nbsp;солтүстігінде солтүстік-батыстан жел соғады, екпіні – 15-20 м/с.
Таңертең және күндіз&nbsp;Қостанай облысының&nbsp;солтүстік-батысында, солтүстігінде найзағай ойнап, бұршақ түседі, дауыл тұрады деп күтіледі. Оңтүстік-батыстан жел соғады, күндіз облыстың батысы мен солтүстігінде соққан желдің екпіні 15-20, кей жерде 23 м/с-ға жетеді. Оңтүстік-батыстан, батыстан жел соғады, екпіні 15-20 м/с құрайды.
Алматы облысында&nbsp;солтүстік-шығыстан жел соғады, Жалаңашкөл ауданында жел екпіні 17-22, кей тұста 24-29 м/с-ға жетеді.
Күндіз&nbsp;Солтүстік Қазақстан облысының&nbsp;батысында найзағай ойнап, бұршақ түседі деп күтіледі. Түнде және таңертең облыстың батыс аумағында тұман түседі. Облыстың оңтүстігінде батыстан 15-20 м/с жылдамдықпен жел соғады, кей тұста екпіні 23 м/с-ға жетеді,&nbsp;Петропавлда&nbsp;күндіз батыстан 15-20 м/с жылдамдықпен жел соғады.

Дүйсенбіге арналған ауа райы болжамы

Kyzylorda-news.kz. Татар этномәдени бірлестігінің ұлттық мерекесі Сабантой биыл Достық үйінің алаңында аталып өтті. Атаулы мереке шаһарымызда тұрып жатқан түрлі этнос өкілдерінің басын біріктіретін дәстүрлі мейрамға айналды.
18 жыл қатарынан тойланып келе жатқан мерекеде татар этносының көп жылдық дәстүрлері таныстырылып, ұлт достығы әспеттелді.
Сабантой – отбасылық, барша этностардың басын қосып, қуаныш сыйлайтын, ең бастысы халық арасында достық пен өзара түсіністікті қалыптастыратын мереке.
Салтанатты шараны облыстық ҚХА хатшылығының меңгерушісі, облыстық қоғамдық даму басқармасының этносаралық қатынастар мәселелері жөніндегі бөлімінің басшысы Уалихан Ибраев ашып, барша жиналған қауымды құттықтап өтті.
<blockquote>
 «Бүгін ынтымағы жарасқан Сыр өңірінде «Сабантой» мерекесін тойлаудамыз. Халқымыздың бейбітшілік пен достыққа, салт-дәстүрін ұлықтауға шақыратын бұл мейрамның, барлық этностардың мерекелері сияқты, біз үшін алатын орны ерекше. Сондықтан баршаларыңызды айтулы мерекемен шын жүректен құттықтаймын! », – деді.
</blockquote>
Өз кезегінде, Татар этномәдени бірлестігінің төрайымы Галия Гизатуллина облыстық қоғамдық даму басқармасы басшысының орынбасары Қуаныш Әбілдаевқа “Құмыра сындыру” рәсімін тапсырды.
Татарстан Республикасынан келген арнайы қонақтар Рамиль Айметдинов, Альфия Рамазанова назды даусымен жиналғандарға әсем ән арнап, Сыр халқына өнерлерін паш етті. Сондай-ақ, татар шеберлерінің қолынан шыққан бұйымдар мен тәттілерден әзірленген көрме-жәрмеңкесі тамашаланды.
Мерекенің көркін кіргізетін ұлттық ойындар – татар күресі, арқан тарту, гір көтеру, қол күрес және тағы да басқа көптеген спорттық ойындар ойналды. Сабантойға келген қала тұрғындары көркемөнерпаздар концертін тамашалап, қызықты мерекелік ойындарға қатысты. Татар әндері орындалып, жан жадыратар билер биленіп жатты. Айта кету керек, ойындарда жеңімпаз атанғандарға арнайы сыйлықтар берілді.
<img src="https://kyzylorda-news.kz/wp-content/uploads/2022/05/fb_img_1653819117526.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653819138116.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653819128446.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653819144991.jpg" alt="" />

Татар этномәдени бірлестігінің ұлттық мерекесі аталып өтті

Kyzylorda-news.kz. Еуразиялық экономикалық комиссия Кеңесінің 2022 жылғы 15 сәуірдегі № 59 Шешімімен Еуразиялық экономикалық комиссия Кеңесінің 2017 жылғы 20 желтоқсандағы № 107 «Жеке пайдалануға арналған тауарларға байланысты жекелеген мәселелер туралы» шешіміне өзгерістер енгізілгенін хабарлайды.
Қазақстан Республикасына, Беларусь Республикасына, Қырғыз Республикасына және Ресей Федерациясына Еуразиялық экономикалық одақтың кедендік аумағына алып жүретін багажда әуе немесе жаяу тәртіппен әкелінетін жеке пайдалануға арналған тауарларды бажсыз әкелудің құндық және салмақтық шектерін 500 евродан 1000 евроға дейін және 25 кг-нан 31 кг-ға дейін 2022 жылғы 1 қазанға дейінгі мерзімге арттыру көзделген.
Осылайша, 2022 жылғы 28 сәуірден бастап ЕАЭО кедендік аумағына алып жүретін багажда құны 1000 евроға дейінгі әуе немесе жаяу тәртіппен көлік түрлерімен әкелінетін жеке пайдалануға арналған тауарларға қатысты кедендік төлемдер алынбайды. 
2022 жылғы 28 сәуірден бастап берілген кедендік декларация бойынша құны 1000 евродан асатын әуе немесе жаяу тәртіпте көлік түрлерімен ЕАЭО кедендік аумағына алып жүретін багажда әкелінетін жеке пайдалануға арналған тауарларға қатысты кедендік төлемдер өндіріп алуға жатады. 
2022 жылғы 1 қазаннан бастап әуе көлігінен ерекшеленетін көлік түрлерімен бірге алып жүретін багажда әкелінетін немесе жаяу жүру тәртібімен жеке пайдалануға арналған тауарларды бажсыз әкелудің құндық және салмақтық нормалары бұрынғыдай 500 евро / 25 кг құрайтын болады.

Заңға өзгерістер енгізілді

Kyzylorda-news.kz. Сыбайлас жемқорлыққа қарсы іс-қимыл Агенттігі «28 мамырда соттың санкциясымен Ұлттық музей директоры Арыстанбек Мұхамедиұлына қатысты «күзетпен ұстау» бұлтартпау шарасы таңдалды», деп мәлімдеді.
Нұр-Cұлтан қаласы бойынша Сыбайлас жемқорлыққа қарсы қызмет «Алтын адамның әлем музейлеріне шеруі» халықаралық көрмесін өткізу жөніндегі мемлекеттік сатып алу туралы шарт аясында Ұлттық музейдің лауазымды тұлғаларына 146 миллион теңге сомасында бюджет қаражатын жымқырды деген күдікпен тергеу жүргізуде.

Ұлттық музей директоры Арыстанбек Мұхамедиұлына қатысты тергеу басталды

Kyzylorda-news.kz. Қызылорда облысының екі ауданында маусым айының басында қуаңшылықтың басталу қаупі туралы ескерту жарияланды, деп хабарлайды Zakon.kz.
“Қазгидромет” РМК синоптиктері осы жылы алғаш рет қуаншылыққа байланысты алдын ала ескерту жариялап, өңір тұрғындарын сақтық шараларына шақырды.
<blockquote>
 Болжамға сәйкес, Қызылорда облысының Қармақшы және Қазалы аудандарында маусым айының бірінші онкүндігінде атмосфералық құрғақшылық болады деп күтіледі.“Қазгидромет” РМК
</blockquote>
Атмосфералық құрғақшылық – аптап ыстыққа әрі жауын-шашынның болмауына байланысты ауа ылғалдылығының қатты төмендеуінен болатын құрғақшылық түрі. Ол – қауіпті, себебі мұндайда өсімдіктер қурап, тез жойылады.

Синоптиктер Қызылорда облысындағы құрғақшылыққа байланысты ескерту жариялады

Kyzylorda-news.kz. Қызылорда қаласында жыл басынан бері 224 алаяқтық дерегі тіркелген. Олардың 121-і интернет желісі арқылы жасалған, деп хабарлайды ҚазАқпарат.
Алаяқтық қылмыспен айналысатындардың 70 пайызы – әйелдер. Қазіргі таңда алаяқтық қылмысы былтырғымен салыстырғанда 44,1 пайызға азайған.
<blockquote>
 «Бұл халықтың құқықтық сауатының жылдан-жылға өсіп келе жатқандығын білдіреді. Полиция қызметкерлері күнделікті халыққа алаяқтықтан сақтану жолдарын түсіндіруде. Тұрғындар осыған мән беруі қажет. Алайда, алдап-арбаудың жетегінде кетіп жатқандар көп», – деді Қызылорда қалалық полиция басқармасының бастығы Әбдібек Жаназаров.
</blockquote>

Қызылордада алаяқтық қылмысының басым бөлігі интернет арқылы жасаған

Kyzylorda-news.kz. Өңірлік коммуникациялар қызметінің баспасөз конференциясында ҚР Энергетика министрі Болат Ақшолақов БАҚ өкілдерімен кездесті. Жиын барасында Қызылорда облысында өндірілетін мұнай қорының көрсеткіші мен елді мекендерді табиғи газбен қамтылу жайы баяндалды.
Сондай-ақ, БАҚ өкілдері тарапынан толғандырған сауалдарына жауап берді. ҚР Энергетика министрі Болат Оралұлының айтуынша, бүгінде Қызылорда облысының газдандыру деңгейі 66,5 пайызды құрайды. Сәйкесінше, 550,8 мың адам табиғи газбен қамтылған. Газбен жабдықтау жөніндегі жобаларды іске асыру республикалық және жергілікті бюджет есебінен, сондай-ақ «ҚазақГаз» компаниясының қаражаты арқылы жүргізілуде. Бүгінде Қызылорда облысында жиынтық қуаты – 89 МВт болатын 9 күн электр станциясы жұмыс істеп тұр.
Биыл Қызылорда облысында электр қуаты – 240 МВт болатын жылу электр орталығын салу жоспарлануда. Жобаны іске асыруға құны – 215,1 млрд теңге қаржы көзделіп, 2025 жылы пайдалануға беріледі деп жоспарлануда. Бұл жоба іске асырылса 700 млн.кВт тапшылықты жоюға мүмкіндік болады.
<blockquote>
 Қызылорда облысы мұнай өндіру көлемі бойынша 5-ші өндіруші аймақ болып табылады. Өңірдің мұнай өндіру үлесі ел бойынша 6,14 пайызды құрайды. Былтыр мұнай өндіру көлемі – 4,3 млн.тонна болса, биылғы жылдың 4 айында 1,4 млн.тонна мұнай өндірілген. Аймақта игеріліп жатқан кен орындарының басым бөлігінде мұнай өндірудің табиғи төмендеуі байқалады. Өңірлерді табиғи газбен қамтамасыз ету бағытында былтыр Энергетика министрлігінің бюджеттік бағдарламасы аясында 4 жоба жүзеге асырылды. Аталған жоба арқылы 3 елді мекен немесе 24 мың адам табиғи газға қол жеткізді. Биыл жалғасатын 1 жоба мен 6 жаңа жобаны қаржыландыру үшін республикалық бюджеттен газдандыруға 3,7 млрд.теңге мөлшерінде қаражат көзделген. Осыған сәйкес, Бірлік және Қыраш елді мекендерін газдандыру бойынша 1 жоба аяқталады. Төретам және Ақай елді мекендерін, сондай-ақ Сексеуіл, Махамбет және Наурыз кенттерін газдандыру бойынша қалған жобалар 2023 жылға ауысатын болады, -деді ҚР Энергетика министрі Болат Ақшолақов.
</blockquote>
Қызылорда қаласындағы орталықтандырылған жылумен жабдықтау мекемелерінде 20 аудандық қазандық жылу энергиясын береді. Станцияның негізгі жабдықтарының 82 пайызы тозған. Ал облыстағы «Қызылорда» Өңірлік электр желілік компаниясында» 10 056 км кабель және әуе электр беру желілері арқылы жұмыс істейді. Мұнда электр желілерінің 69 пайызы ескірген.
<blockquote>
 -Қызылорда қаласының тұрғындары үшін электр энергиясының кепілді жеткізушісі – «Энергосервис» ұйымы және облыс бойынша – «Шиелі Жарығы» және «Дәулетэнерго» ұйымдары болып табылады. 2019-2021 жылдары 5 қазандыққа және 3 газ турбиналық қондырғыға күрделі жөндеу жұмыстары жүргізілуде, – деді ҚР Энергетика министрі Болат Ақшолақов.
</blockquote>
<img src="https://kyzylorda-news.kz/wp-content/uploads/2022/05/fb_img_1653789269759.jpg" alt="" />

ҚР Энергетика министрі Болат Ақшолақов БАҚ өкілдерімен кездесті

Kyzylorda-news.kz. Қызылорда облысының мұнай және газ саласының бірқатар әлеуметтік және экономикалық мәселелерінің оңтайлы шешімін табу үшін аймаққа ҚР Энергетика министрі Болат Ақшолақов жұмыс сапармен келді.
Жиынға орталық және жергілікті атқарушы орган басшылары мен мұнай өндіруші және мұнай сервистік компания басшылары және коммуналдық кәсіпорындарының жетекшілері қатысты.
Облыс әкімі Нұрлыбек Нәлібаев өңірде мұнай сервис саласындағы жұмыстар мен қызметтердің тарифтері республика бойынша ең төменгі деңгейде екенін тілге тиек етіп, саладағы өзекті мәселелерді тізбектеді.
<blockquote>
 Аймақ экономикасының негізін мұнай-газ саласы құрайды. Дегенмен, қазіргі таңда белгілі себептерге байланысты бұл саланың дамуы төмендеуде.
 Облыс аумағында перспективалы және мұнайлы-газды үш шөгінді бассейн орналасқан. Қазіргі таңда екі бассейнде геологиялық зерттеулер жүргізу мәселесі шешімін тапты. Бірақ, Сырдария бассейні бойынша жобалық құжаттар дайындалғанмен, қаражат бөлу мәселесі шешілген жоқ. 
 Сондай-ақ, мұнай өндіру көлемін арттыру үшін өндіру және барлау ұңғымаларының тереңдігін 3 мың метрден астам тереңдікке ұлғайту қажет. Бұл шаралар өндірілетін мұнай көлемін 1,5 есеге, ал жобалық мұнай беруді шамамен 50%-ға арттыруға мүмкіндік береді,-деді Нұрлыбек Нәлібаев.
</blockquote>
Облыс әкімі мұнай экспортына квотаны ұлғайтуды және мұнай сервисті компаниялардың қызмет бағаларын индекстеуді ұсынды. Сондай-ақ, аймақтағы уран өндіретін «РУ-6» ЖШС-нің келісімшартын ұзарту керектігін атап өтті.
Жиында Нұрлыбек Нәлібаев аймақ үшін аса қажет жаңа жылу электр орталығын салу және жаңасын салғанға дейін қолданыстағы тозығы жеткен когенерациялық электрстанцияны қайта жаңғырту туралы ұсыныс көтерді.
Өз кезегінде ҚР Энергетика министрі Болат Ақшолақов облыс әкімі көтерген мәселелер өте өзекті екенін алға тартып, жылу электр орталығын салу мәселесінде оң шешім қабылданатынын жеткізді.
Басқосу барысында министрлік өкілдері сөз алып, алдағы бірлескен жұмыстардың маңыздылығына тоқталды. Мұнан бөлек, жергілік компания өкілдері мұнай өндіру секторындағы қызметкерлердің жұмыспен қамту бағытында іс-шаралар қабылдауды және өңірде газ өндіру мәселелері бойынша ғылыми-зерттеу институтын құруды ұсынды.
Айта кетейік, Энергетика министрі Болат Ақшолақов өңірге жұмыс сапары барысында жергілікті тұрғындар мен коммерциялық емес ұйым өкілдерімен кездесіп, «Қызылорда жылу электр орталығының» жұмысымен танысты.
<img src="https://kyzylorda-news.kz/wp-content/uploads/2022/05/fb_img_1653747213797.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653747203881.jpg" alt="" />

Қызылордада жаңа жылу электр станциясы салынады

Kyzylorda-news.kz. Сыр өңірінде ұлт әдебиетінің абызы, КСРО Мемлекеттік сыйлығының лауреаты Әбдіжәміл Нұрпейісовті еске алу кешінің жалғасы ретінде бүгін «Әбдіжәміл Нұрпейісов – заманымыздың заңғар жазушысы» атты республикалық ғылыми конференция ұйымдастырылды.
Жиынға облыс әкімі Нұрлыбек Нәлібаев, ҚР Парламенті Мәжілісінің депутаты Балайым Кесебаева, жазушы, кинодраматург, Қазақстанның еңбек сіңірген қайраткері Елубай Смағұл, ҚР Мәдениет қайраткері Мырзан Кенжебай және кинорежиссер Рүстем Әбдірашов, Ақтөбе облысы Шалқар ауданының арнайы делегациясы, мәслихат депутаттары, зиялы қауым өкілдері, ғалымдар мен ұстаздар, Әбдіжәміл Нұрпейісовтің туған-туысқандары қатысты. 
Конференцияда аймақ басшысы жазушының рухани мол мұрасы мен құнды туындылары бүгінгі ұрпағының рухын көтеріп, тәуелсіз Қазақ елінің баянды болашағына қызмет ете беретінін атап өтті.
Қазақ елінің, қасиетті Сырдың руханиятына, әлемдік ақыл-ойдың бай қазынасына өлшеусіз үлес қосқан классик жазушы, елінің Әбесі болған дарабоз тұлға туған жерінің тағдырлы мәселесін жаһандық деңгейге жеткізіп, оқырман қауымның шексіз ықыласына бөленді.
<blockquote>
 «Мәдени-рухани дәулетіміздің қадір-қасиетін қапысыз пайымдап, елі мен жері үшін тер төккен тұлғаларымыздың болмысын жаңылмай танып отыру – ұрпақ парызы» деп өзі айтып кеткеніндей, енді бізге Әбдіжәміл ағаның шығармашылығын, қазақ әдебиетінің дамуына үлес қосқан өлшеусіз еңбегін, қайталанбас классикалық туындыларын жас ұрпаққа ұлағаттау аманат болып қалды. Сондықтан, еске алу шарасын екі күнге екшеп, оның әрбір сәтін мән-маңызға толы мезіретпен атқаруды ойластырдық,-деді Нұрлыбек Нәлібаев.
</blockquote>
Іс-шарада Елубай Смағұл жазушының кесек болмысын және шығармаларындағы кейіпкерлердің мінезі мен ұстанымын жеткізудегі ерекше қолтаңбасын сөз етсе, Мырзан Кенжебай Әбдіжәміл Нұрпейісов шығармаларының терең мағынасы, өзекті сюжеттері мен аса шеберлікпен суреттелген кейіпкерлері болашақ оқырманның да жүрегінде әрқашан маңызды орын алатынын тебіреніспен жеткізді.
Сондай-ақ, Қорқыт Ата атындағы Қызылорда университетінің профессорлары Бағдат Кәрібозұлы, Ғабит Тұяқбаев және Ұлжан Жанбершиева классиктің шығармаларын жан-жақты талдап, Сырдың дара перзентінің ел болашағы үшін еткен ерен еңбегі мен азаматтық тұлғасын саралады.
<img src="https://kyzylorda-news.kz/wp-content/uploads/2022/05/fb_img_1653746897334.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653746920727.jpg" alt="" />

Қазақстан және Қызылорда облысының жаңалықтары

Әскерилердің зейнетке шығу жасын 5 жылға созуға болады

Тарихтың ақтаңдақ парақтары

1 маусым астанада республикалық балалар фестивалі өтеді

Дүйсенбіге арналған ауа райы болжамы

Татар этномәдени бірлестігінің ұлттық мерекесі аталып өтті

Заңға өзгерістер енгізілді

Ұлттық музей директоры Арыстанбек Мұхамедиұлына қатысты тергеу басталды

Синоптиктер Қызылорда облысындағы құрғақшылыққа байланысты ескерту жариялады

Қызылордада алаяқтық қылмысының басым бөлігі интернет арқылы жасаған

ҚР Энергетика министрі Болат Ақшолақов БАҚ өкілдерімен кездесті

Қызылордада жаңа жылу электр станциясы салынады

«Әбдіжәміл Нұрпейісов – заманымыздың заңғар жазушысы» атты республикалық ғылыми конференция өтті

Қазақстан және Қызылорда облысының жаңалықтары

Әскерилердің зейнетке шығу жасын 5 жылға созуға болады

Тарихтың ақтаңдақ парақтары

1 маусым астанада республикалық балалар фестивалі өтеді

Дүйсенбіге арналған ауа райы болжамы

Татар этномәдени бірлестігінің ұлттық мерекесі аталып өтті

Заңға өзгерістер енгізілді

Ұлттық музей директоры Арыстанбек Мұхамедиұлына қатысты тергеу басталды

Синоптиктер Қызылорда облысындағы құрғақшылыққа байланысты ескерту жариялады

Қызылордада алаяқтық қылмысының басым бөлігі интернет арқылы жасаған

ҚР Энергетика министрі Болат Ақшолақов БАҚ өкілдерімен кездесті

Қызылордада жаңа жылу электр станциясы салынады

«Әбдіжәміл Нұрпейісов &#8211; заманымыздың заңғар жазушысы» атты республикалық ғылыми конференция өтті

«Әбдіжәміл Нұрпейісов – заманымыздың заңғар жазушысы» атты республикалық ғылыми конференция өтті