<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың референдум қорытындысы бойынша Қазақстан халқына жасаған үндеуі жарияланды.
Құрметті отандастар!
Кеше елімізде айрықша мәні бар тарихи оқиға болды. Мемлекетіміз дамудың жаңа кезеңіне қадам басты. Ата заңымызға ұсынылған өзгерістерді азаматтардың басым көпшілігі қолдады. Референдум жоғары деңгейде өтті. Мұны халықаралық және отандық байқаушылар да айтып жатыр. Конституциялық реформалар қоғамда қызу талқыланды. Дауыс беру барысы демократия талаптарына сай өтті. Ешқандай мәжбүрлік болған жоқ. Референдум нәтижесі саяси жаңғырудың анық символына айналды. Азаматтарымыз зор жауапкершілік танытты және отансүйгіштік қасиетін паш етті. Біз Жаңа, Әділетті Қазақстанды құру жолындағы бірлігіміз бекем екенін көрсеттік. Конституциялық түзетулер мемлекеттігіміздің тұғырнамасын түбегейлі өзгертеді. Бүкіл қоғамның дамуына тың серпін береді. Референдумға белсене қатысып, қолдау білдірген барша халқымызға зор ризашылығымды білдіремін. Сондай-ақ, конституциялық өзгерістердің мән-маңызын түсіндіруге атсалысқан азаматтарға, түрлі қоғамдық ұйымдарға алғыс айтамын.
<hr />
Референдум еліміздің тарихындағы маңызды белес болды. Ұлтымыздың шынайы өзгерістерге деген дайындығы мен ұйымшылдығын көрсетті. Дауыс беруге азаматтарымыздың белсенді қатысуы қоғамымыздың кемелдігі мен жауапкершілігін білдіреді. Сайлау учаскесіне келіп, елімізді жаңғырту бастамасын қолдағандардың бәріне алғыс айтамын.
Сіздер нағыз патриотизмнің үлгісін көрсетіп, Қазақстанның дәйекті дамуына зор үлес қостыңыздар. Еліміз үшін осы бетбұрысты сәтте заңды құқықтарын пайдаланып, өздерінің ұстанымдарын айтқан бүкіл азаматқа ризашылығымды білдіремін.
Ата заңға өзгерістер енгізу реформаларымыздың соңғы сатысын емес, енді басталғанын білдіреді. Біз елімізді жан-жақты жаңғыртуды жалғастырамыз. Жаңартылған Конституция негізінде биліктің барлық институты қызметінің мейлінше тиімді моделін қалыптастырамыз. Олардың арасындағы үйлесім мен тепе-теңдік механизмін нығайтамыз. Дәйекті саяси жаңғыру ұлттық экономиканы дамытуға, ұлттық кәсіпкерлікті нығайтуға ықпал етеді.
Енді біздің алдымызда ашық әрі әділетті экономика құрып, заңнамаға реформа жүргізу міндеті тұр. Қолдан жасалған монополияларды түбегейлі жойып, сыбайлас жемқорлыққа тосқауыл қою маңызды. Біз кәсіпкерлердің бастамаларына қолдау көрсетіп, жекеменшікті сақтап, бәсекелестікті күшейтуіміз керек.
Алдымызда экономиканы шынайы әртараптандыру бойынша ауқымды жұмыстар тұр. Жоғары өнімді ауыл шаруашылығы мен қуатты көлік-логистика жүйесін дамыту, барлық салада цифрлық экожүйе қалыптастыру үшін шаралар қабылдау қажет. Еліміздің орнықты дамуының негізгі қозғаушы күші еңбек, білім және азаматтық белсенділік болуға тиіс. Тек сонда ғана өзін-өзі қамтамасыз ететін орта тап пен тиімді экономика қалыптастыра аламыз. Бұндай экономика кірісті әділетті бөлуге, сапалы жұмыс орнын ашуға, тұрмыс сапасын тұрақты арттыруға және барлық азаматтардың толыққанды жетілуіне мүмкіндік береді.
Мемлекеттік аппаратты жаңғыртып, бюрократиядан барынша арылту үшін жүйелі жұмыс жалғасады. Біз қоғамның барлық өкілдерінің талап-тілектеріне жауап беретін озық мемлекет құруымыз керек. Басқару жүйесінің тиімділігі жұмыстың барысымен емес, түпкі нәтижемен өлшенетін болады. Мемлекеттік аппарат бизнеспен, үкіметтік емес ұйымдармен және азаматтармен тығыз жұмыс істеуге баса назар аударуға тиіс. Сол арқылы ел мүддесіне сай тиімді шешімдер қабылданып, халыққа көрсетілетін қызмет сапасы жақсара түседі. Мемлекеттік қызметкерлер барынша ашық жұмыс жүргізіп, халыққа шынайы есеп беруі керек.
Мемлекеттік қызмет дегеніміз – жеке бастың бақ-дәулетін арттыратын жер емес. Бұл – туған халқыңның алдында айрықша жауапкершілік арқалау деген сөз.
Конституциялық реформа бүкіл құқық саласын жаңғыртуға жол ашады. Парламент пен Үкімет Конституцияға енгізілген өзгерістерге сай Заңнамаға тиісті өзгертулер енгізуі қажет. Қазақстанда тиімді құқық қорғау және сот жүйесін құруға мүмкіндік беретін реформалар әзірленуге тиіс. Мұны әлемдік тәжірибені ескере отырып жүзеге асырған жөн.
Біз қоғамның және бизнес өкілдерінің өз құқықтары мен заңды мүдделерін қорғауға сұранысы арта түскенін көріп отырмыз. Елімізге азаматтар мен кәсіпкерлерді барынша қорғайтын құқық жүйесі қажет. Заңнамада мемлекетіміздің тұрақты дамуын тежейтін ешбір кедергі қалмауға тиіс. Заман талабына сай келмейтін және күмән туғызатын нормалардың бәрі күшін жоюға тиіс.
Еліміздің экономикалық ресурстарын шағын ғана топтың қолына шоғырландырып, оларға артықшылық берген заңнаманы қайта қарау қажет.
Елден жылыстатылған қаржыны және заңсыз жекешелендірілген активтерді мемлекеттің иелігіне қайтару жөнінде Мекемеаралық комиссия құрылды. Бұл үшін мен арнайы Жарлыққа қол қойдым.
Біз адам құқығы мен бостандығын қорғау жүйесін кешенді түрде күшейтуге негізделген бағдарымызды жалғастыра береміз. Құқықтық реформа аясында Конституциялық сот қайта құрылады. Оның қаулыларына жедел әрекет ету тетігін енгізу қажет. Сонда азаматтарымыз осы аса маңызды институт қызметінің пайдасын сезіне алады. Жаңа, Әділетті Қазақстанда полицейлердің озбырлығына, біліксіз прокурорлар мен біржақты судьяларға жол берілмейді. Қоғам құқық қорғау және сот жүйесінің шын мәнінде өзгергенін қалайды.
Мен елімізді дамытудың осы және басқа да мәселелері бойынша нақты шешімдерді қыркүйек айында өтетін Парламенттің кезекті сессиясының ашылуында айтамын.
Қастерлі Тәуелсіздігімізді, ел бірлігін және қоғамдық келісімді нығайту – біздің негізгі міндетіміз. Бұл реформалар құр атақ-абырой үшін қолға алынған жоқ. Мұның бәрін Жаңа, Әділетті Қазақстан құру үшін жасап жатырмыз. Халқымызда «Кеңесіп пішкен тон келте болмайды» деген сөз бар. Бабаларымыз маңызды мәселені алқалы жиында шешкен. Мен осы дәстүрді жаңғыртып, Ұлттық құрылтай құру туралы бастама көтердім. Оған қоғамның түрлі топ өкілдері, беделді әрі белсенді азаматтар шақырылады. Құрылтайдың алғашқы отырысы ұлт ұясы – Ұлытауда өткізіледі. Осылайша, азаматтардың мемлекет ісіне атсалысу мүмкіндігі арта түседі. Шын мәнінде, еліміздің тағдыры – әрқайсымыздың қолымызда.
Біз қоғамдық және жеке құндылықтар жүйесін түбірімен жаңғырта білуіміз керек. Сонда ғана барлық салада түбегейлі өзгеріс жасай аламыз. Жаңа Қазақстанның ең басты байлығы – халық. Ал, ең негізгі мақсаты – азаматтардың бақытты өмір сүруін қамтамасыз ету. Әрбір азаматымыз саяси өзгерістер мен экономикалық өсімнің жемісін көруі қажет. Құрғақ уәде мен бос сөз ешқайда апармайды. Мен үшін нақты іс пен шынайы өзгеріс бәрінен маңызды. Бұл мақсатқа қол жеткізу үшін бар күш-жігерімді саламын.
Референдум қорытындысы біздің мемлекеттігіміздің тарихында мүлде жаңа дәуір басталғанын көрсетеді. Халқымыз өз таңдауын білдіру арқылы түбегейлі бетбұрыс жасауға ұмтылысын көрсетті. Жасампаз ел болуға деген ықылас-ынтасын байқатты.
Елімізді дамыту үшін әлі де көп жұмыс атқаруымыз керек. Бүкіл ел болып жұмылсақ, көздеген мақсатымызға міндетті түрде жетеміз. Мен бұған кәміл сенемін. Бүгін тәуелсіз Қазақстанның даму тарихында жаңа дәуірге жол ашылды. Осы жолда бірлігіміз әрдайым бекем болсын!
Жаңа Қазақстанды бәріміз бірге өркендетейік, ағайын!

Президенттің референдум қорытындысы бойынша Қазақстан халқына жасаған үндеуі

<a href="https://kyzylorda-news.kz/">Kyzylorda-news.kz.</a> Бүгін сағат 20.00-де Президент Қасым-Жомарт Тоқаев 5 маусым күні өткен референдумның қорытындысы бойынша республикалық телеарналар арқылы Қазақстан халқына үндеу жасайды.
Бұл жайында Президенттің баспасөз қызметі Telegram парақшасында мәлім етті.

Бүгін Президент референдум қорытындысы бойынша халыққа үндеу жасайды

<a href="https://kyzylorda-news.kz/">Kyzylorda-news.kz.</a>&nbsp; Жадырап жаз шығысымен балалардың барлығы жазғы тынығу лагерлеріне барып тынығады. Дәстүрге айналған мұндай тынығу мерзімі жыл айналып тағы да келді. Осыған орай Қазалыдағы «Шағала» балалар лагері 1 маусымнан бастап жазғы тынығу маусымына балаларды қабылдады.
Аудан әкімі Мұхтар Оразбаев «Шағала» балаларды сауықтыру демалыс орталығында өткен лагердьдің жазғы маусымының ашылу салтанатына қатысып, өнерлі жеткіншектердің концерттік бағдарламасын тамашалады.
Сондай-ақ, жазғы демалыс кезінде балалардың жақсы тынығып, уақыттарын тиімді пайдалануларына тілектестігін білдірді.
Қазіргі таңда лагерьдің бірінші ауысымында 125 оқушы демалуда. Балалар мұнда бес мезгіл тамақтанады. Олардың уақытты көңілді әрі пайдалы өткізуі үшін 13 тәрбиеші барын салып жүр. Демалушылардың денсаулығына арнайы дәрігер мен стоматолог жауап береді.

Қазалыдағы «Шағала» лагерінде 125 оқушы демалып жатыр

<a href="https://kyzylorda-news.kz/">Kyzylorda-news.kz.</a>&nbsp;Екі айдың ішінде балаларды 1-сыныпқа қабылдауға 250 мыңнан астам өтініш түсті. Оның ішінде балалардың 70,5%-ы мемлекеттік тілде оқуды таңдаған. Бұл туралы ҚР БҒМ баспасөз қызметі хабарлады.
Бірінші сыныпқа өтініштерді қабылдау 2022 жылғы 1 сәуірде басталып, 1 тамызға дейін жалғасады. Азаматтарға ыңғайлы болу үшін қызмет автоматтандырылды. Құжаттарды қабылдау egov.kz порталы арқылы жүргізіліп жатыр. Сондай-ақ ата-аналардың өтініші бойынша құжаттарды дәстүрлі қағаз форматында да тапсыруға болады.
<blockquote>
 «Құжаттарды қабылдау штаттық режимде жүріп жатыр. Осы ретте құжаттарды тапсыруда ата-аналардың белсенділігін байқауға болады. Биыл мемлекеттік тілде білім алғысы келетін 1-сынып балалары көбейді. Қазақ тілінде оқитын сыныптарға қабылдаудың ең жоғары көрсеткіші Маңғыстау (91%), Қызылорда (91,5%), Жамбыл (82,2%) және Атырау (80,1%) облыстарында тіркелді», – деді ҚР БҒМ Мектепке дейінгі және орта білім комитетінің төрағасы Гүлмира Кәрімова.
</blockquote>
Жаңа оқу жылында 1-сыныпқа барлығы 400 мыңнан астам қазақстандық бала барады деп күтіліп отыр.

Қазақ сыныптарына қабылдаудың ең жоғары көрсеткіші Қызылорда облысында тіркелді

<a href="https://kyzylorda-news.kz/">Kyzylorda-news.kz.</a> Атаулы әлеуметтік көмек алушылар газды төмендетілген бағамен сатып ала алады.
<blockquote>
 “Биыл 1 шілдеден бастап “мемлекеттік атаулы әлеуметтік көмек және (немесе) тұрғын үй көмегін алатындар” санатына енетіндер елдің барлық газдандырылған өңірінде төмендетілген бағамен газ алу мүмкіндігіне ие болады”, – деп хабарлады Ұлттық экономика министрлігінің баспасөз қызметі.
</blockquote>
Бұл үшін тұтынушы Egov.kz.порталында атаулы әлеуметтік көмек және тұрғын үй көмегін алушы ретіндегі өзінің мәртебесін тексеруі қажет. 
Мұндай санат құруға Ұлттық экономика министрлігінің табиғи монополияларды реттеу комитеті бастамашы болды. Ол үшін қоғамдық маңызы бар нарықтарда баға белгілеу қағидаларына өзгерістер мен толықтырулар енгізілді.
<blockquote>
 “Нәтижесінде 2022 жылдың 1 сәуірінен бастап Тараз және Орал қалаларында пилоттық жоба аясында жоғарыда аталған топтың азаматтары тауарлық газды 20%-ке төмендетілген бағамен алады. Бұл – 3 мыңнан астам тұтынушы. Бұл топтың тұтынушылары сәуір айындағы түбіртектерде газдың жаңа төмендетілген бағасын көрді”, – деп толықтырды.
</blockquote>
Қазақстанда жан басына шаққандағы орташа табысы кедейлік шегінен аспайтын адамдар атаулы әлеуметтік көмек алады. Олардың ішіне республика азаматтары, оралмандар, босқындар, шетелдіктер, елде тұрақты тұратын азаматтығы жоқ адамдар енеді. 
Тұрғын үй көмегі осы жерде тұрақты тұратын тұрмысы төмен отбасыларға (азаматтарға) беріледі.
<a href="https://sputnik.kz/20220606/aak-alushylar-ushin-gaz-bagasy-25349030.html">Sputnik</a>

Атаулы әлеуметтік көмек алушылар үшін газ бағасы арзанырақ болады

<a href="https://kyzylorda-news.kz/">Kyzylorda-news.kz.</a>&nbsp;Білім және ғылым министрі Асхат Аймағамбетов бастауыш сыныпта үш тілді оқыту жүйесіне енгізілетін өзгерістер туралы айтып өтті. Сөзінше, қазақ тілді мектептерде оқушылар 1-сыныпта тек туған тілінде білім алады, ал өзге тілдер екінші және үшінші сыныптарда қосылады, деп хабарлайды <a href="https://stan.kz/birinshi-sinipta-tek-tugan-tilinde-okidi-bilim-zhane-gi-365591/">Stan.kz</a>.
Министрдің айтуынша, қазақстандықтар үш тілді де меңгеруі керек және алдағы уақытта бұл жүйеден бас тарту жоспарланып отырған жоқ.&nbsp;
Дегенмен үш тілді 1-сыныптан бастап оқыту қиын болғандықтан, бастауыш сыныптарға өзге тілдерді бірте-бірте енгізбекші.&nbsp;
<blockquote>
 «Бастауыш сыныптарға келсек, осы тақырыпта зерттеу мен сараптама жүргізе келе, 1-сынып оқушысына үш тілді бірден меңгеру қиын екенін көрдік. Бұл – тиімсіз. Мәселе дидактика мен физиологияда.&nbsp;Осы мәселе бойынша шешім қабылдап, қазақ тілді мектептерде 1-сынып оқушысын&nbsp;тек қазақ тілінде оқытуға қатысты жұмыс жүргізіп жатырмыз. Алдымен өз тілінде оқып және жазып үлгереді. Екінші сыныпта орыс тілі, үшінші сыныпта ағылшын тілі енгізіледі», –&nbsp;деді Аймағамбетов.&nbsp;
</blockquote>
Ал орыс тілді мектептерде оқушы алдымен орыс тілінде жазып, оқып үйренеді. Ағылшын тілі үшінші сыныпта енгізілмек.&nbsp;
<blockquote>
 «Әдіснама тұрғысынан бұл негізделген. Дәл осындай зерттеу мен ұсыныстар бұған дейін болған, сондықтан осы өзгерісті енгіземіз», –&nbsp;деп қосты министр.&nbsp;
</blockquote>
Келешекте енгізу жоспарланып отырған өзгерістер келесідей:
<ul>
<li>Қазақ тілінде оқитын балалар үшін бірінші сыныпта тек туған тілінде оқытылады, екінші сыныпта орыс тілі, үшінші сыныпты ағылшын тілі қосылады;</li>
<li>Орыс тілінде оқитын балалар бірінші сыныпта орыс тілінде және мемлекеттік қазақ тілінде оқыса, үшінші сыныптан бастап ағылшын тілін де қосып меңгереді.</li>
</ul>
<blockquote>
 «Бұл өзгерістер жақын арада енеді, осы жүйеге көшеміз. Дайындық жүріп жатыр», –&nbsp;деп қосты министр.
</blockquote>

Асхат Аймағамбетов: Бірінші сыныпта тек туған тілінде оқиды

<a href="https://kyzylorda-news.kz/">Kyzylorda-news.kz.</a>&nbsp;Қазгидромет алдағы екі күнге арналған ауа райы болжамын жариялады.
Солтүстік-батыс циклонмен Қазақстанның басым бөлігінде найзағай ойнап, жел күшейеді. Тек республиканың оңтүстік-батысы мен шығысында жауын-шашынсыз ауа райы болжанады. Күндізгі ауа температура солтүстікте 23-30-ға дейін, облыстың оңтүстігінде 33 жылу, орталықта 27-35-ке дейін, шығыста 28-33-ке дейін, оңтүстікте 36 жылу, оңтүстік өңірлерде 27-35, облыстың оңтүстік-батысында 37-42 жылу болады деп күтілуде. Тек республиканың шығысында түнгі уақытта топырақ бетінде үсік жүреді.

Алдағы күндері 42 градус ыстық болады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Нұрлыбек Нәлібаев аймақта азық-түлік қорын көбейту үшін әр аудан, қаладағы ауылдарда егін егуге арнайы жер дайындауды және бақша дақылдарын егуді тапсырды. Нәтижесінде облыс бойынша 1482 гектар жер көлемі дайындалып, 6802 отбасыға бөлініп берілді.
<img src="https://kyzylorda-news.kz/wp-content/uploads/2022/06/aral.jpg" alt="" />
<img src="https://kyzylorda-news.kz/wp-content/uploads/2022/06/kazaly.jpg" alt="" />
<img src="https://kyzylorda-news.kz/wp-content/uploads/2022/06/karmakshy.jpg" alt="" />
<img src="https://kyzylorda-news.kz/wp-content/uploads/2022/06/zhalagash.jpg" alt="" />
<img src="https://kyzylorda-news.kz/wp-content/uploads/2022/06/syrdarija.jpg" alt="" />
<img src="https://kyzylorda-news.kz/wp-content/uploads/2022/06/kyzylorda.jpg" alt="" />
<img src="https://kyzylorda-news.kz/wp-content/uploads/2022/06/shieli.jpg" alt="" />
<img src="https://kyzylorda-news.kz/wp-content/uploads/2022/06/zhanakorgan.jpg" alt="" />

Қызылордада 1482 гектар жер 6802 отбасыға берілді

<a href="https://kyzylorda-news.kz/">Kyzylorda-news.kz.</a>&nbsp;Елордада газ желісіне қосылу қызметі үш есеге арзандайды. Бұл туралы “QazaqGaz” ұлттық компаниясының басшысы Санжар Жәркешев мәлімдеді, деп хабарлайды <a href="https://sputnik.kz/20220606/nur-sultan-gaz-qazaqgaz-25345250.html">Sputnik Қазақстан</a>.
Оның айтуынша, бұған дейін газға қосылу жұмыстарын «ҚазТрансГаз Аймақ» компаниясы атқарған. 
Ал 1 қаңтардан бастап осы қызмет бәсекелестік ортаға берілді. Сөйтіп, кәсіпкерлер газды тарту жұмыстарын атқаруға кірісті. Бірақ баға бірден шарықтап кетті.
<blockquote>
 «Бәсекелестікті қорғау агенттігі бәсекелестікті қиындатып жатырсыңдар деп, бізге тоқтатып тастады. Қазір олардың тарапынан түсіністік бар, «ҚазТрансГаз Аймақтың» қайтадан осы нарыққа келіп, газға қосылумен айналысатынын қолдап отыр. Содан баға түседі деп үміттенеміз. Біздің қызметіміздің бағасы – 113 мың теңге», – деді Жәркешев журналистерге берген сұхбатында.
</blockquote>
Компания басшысының сөзіне қарағанда, қазіргі кезде кәсіпкерлер 400-450 мың теңге алады.
Ал «ҚазТрансГаз Аймақ» компаниясы қайтадан бәрін өз қолына алса, осы қызметтің бағасы үш есеге төмендейді.
<blockquote>
 «Енді, баға үш есеге түседі деп айтуға болады. Қазақстан бойынша бекітілген бір баға болады», – деп атап көрсетті Жәркешев.
</blockquote>

Газға қосылу бағасы 100 мыңға дейін түседі

<h4 id="kyzylordanewskzhttpskyzylordanewskznbspnbspnbspstankzhttpsstankznbspnbsp"><a href="https://kyzylorda-news.kz/">Kyzylorda-news.kz.</a> Энергетика министрі Болат Ақшолақов сұйытылған газ бағасына&nbsp;қойылған шектеу аяқталғаннан кейін баға қалай реттелетінін&nbsp;айтып берді, деп хабарлайды&nbsp;<a href="https://stan.kz/">Stan.kz</a>&nbsp;ақпарат агенттігі.&nbsp;</h4>
Айта кетсек, қаңтар оқиғаларынан кейін президент газ бен жанар-жағармайдың бағасына шекті бағалар енгізуді тапсырған болатын. 180 күндік шектеу шарасы 1 шілдеде аяқталады. Мәселен, зауыттың өзінен газдың бір литрі 16 теңгеден сатылуы шарт.
Министрдің айтуынша, бұл – өте төмен баға. Себебі зауыттарда жөндеу жұмыстарына қыруар қаржы жұмсалады.&nbsp;
<blockquote>
 «Өте төмен бағалар сақтала берсе, өндірісті көбейтуге ешқандай ынталандыру болмайды. Өйткені қазіргі бағалар газды шығаруға кететін шығыннан да төмен болып отыр«, –&nbsp;деді Ақшолақов мәжілістегі үкімет сағатында.
</blockquote>
Министрдің айтуынша, 180 күндік шектеу аяқталғаннан кейін газ айналымы бақылауға алынады. Оған қоса, заңнамаға қосымша өзгерістер енгізіледі.
<blockquote>
 «Энергетика министрлігі мемлекеттік кірістер комитетімен бірлесе отырып, ішкі нарықта сатылатын сұйытылған газдың айналымын қадағалайды. Сондай-ақ, министрлік газ және газбен қамтамасыз ету туралы заңға өзгерістерді әзірлеп қойды.&nbsp;Бұл түзету бойынша Энергетика министрлігіне сұйытылған газдың бөлшек саудадағы шекті бағасын белгілеу құзыретін беру мәселесі қарастырылмақ. Тиісті түзетулер әзірленіп болған соң ҚР Парламент Мәжілісіне жолданады«, –&nbsp;&nbsp;деді Болат Ақшолақов.
</blockquote>
Сондай-ақ министр 2025 жылға қарай отандық газ тапшылығы болуы мүмкін екенін мәлімдеді.&nbsp;
<blockquote>
 &nbsp;«Газ қоры бойынша Қазақстан әлемде 22 орында, ал ТМД елдері арасында Ресей мен Түрікменстаннан кейін үшінші орында. Табиғи газды кеңінен пайдалану мүмкіндігін ескере отырып, әлемдік экономикада оның маңызы зор. Ел ішінде газ тұтыну тұрақты түрде өсіп келеді. 2017 жылдан бастап 2021 жылды қоса алғандағы кезеңде тұтыну 13,8-ден 18,6 млрд текше метрге дейін, яғни 4,8 млрд текше метр деңгейінде өсті. Газ тұтыну өсімі шамамен 35 пайызды немесе жыл сайын орта есеппен 7 пайызды құрады», –&nbsp;деді Болат Ақшолақов.
</blockquote>
Оның айтуынша, газ саласын дамытудың негізгі тежеуіш факторы бағаны ұстап тұру саясатына байланысты.
<blockquote>
 «Осыған байланысты 2025 жылға қарай отандық газдың тапшылығы және импорттық ресурстарға тәуелділік болуы мүмкін«, –&nbsp;деді министр.
</blockquote>

Министр 180 күндік шектеу аяқталғаннан кейін не болатынын айтты

<a href="https://kyzylorda-news.kz/">Kyzylorda-news.kz.</a> Қаржылық мониторинг агенттігінің Қызылорда облысы бойынша аумақтық департаменті жүргізген сенiп тапсырылған бөтен мүлiктi иемденiп алу немесе талан-таражға салу дерегі бойынша қылмыстық іс бойынша сот үкімі шықты, деп хабарлайды ҚМА баспасөз қызметі.
<blockquote>
 «Жаңақорған аудандық ауруханасының бірнеше қызметкері өздерінің қызмет бабын пайдалана отырып, 2015-2019 жылдар аралығында өзара келісімге келу арқылы іссапар шығындарын ресімдеп, ірі мөлшерде қаражат жымқырған. Яғни, шын мәнінде іссапарға бармаса да, құжат жасап, өз есеп шотына іс-сапар шығындары ретінде түсетін ақшаны аударуға және қолма-қол шешіп беруге келісім беретін аурухана қызметкерін тауып, банкомат картасына аударып, шешіп алу арқылы ірі мөлшерде мемлекет қаржысын иемденіп алуды жүзеге асырған» делінген хабарламада.
</blockquote>
Тергеу барысында аудиторлық тексерулер, бірнеше комиссиялық сарапшылар қорытындысын негізге ала отырып, сот-бухгалтерлік сараптамасы тағайындалған.
<blockquote>
 «Нәтижесінде «Жаңақорған ауданаралық ауруханасы»шаруашылық жүргізу құқығындағы коммуналдық мемлекеттік кәсіпорнына 14 млн теңгеден астам залал келтірілгені анықталды. Сот аудандық ауруханада әр жылдарды қызмет атқарған М.Сатыбалдиева мен З.Шомантаеваны кінәлі деп танып, есепшілік және материалдық жауапкершілігі жүктелетін қызметтер атқару құқығынан 2 жыл мерзімге айыра отырып, 7 жылға бас бостандығынан айыру жазасын кесті. Үшінші тұлға М.Бурисбаев 2 жыл мерзімге бас бостандығын шектеу жазасын алды» деп жазылған хабарламада.
</blockquote>

Жаңақорған аудандық ауруханасының есепшілері жалған құжат жасап, қаржы жымқырған

<a href="https://kyzylorda-news.kz/">Kyzylorda-news.kz.</a> 2022 жылдың 1-тоқсанында балаларға МӘМС бойынша 2,77 млн-нан астам стоматологиялық қызмет көрсетілді.
18 жасқа дейінгі балалар мемлекет есебінен міндетті әлеуметтік медициналық сақтандыру жүйесінде жеңілдікке ие санаттың бірі ретінде сақтандырылған. Олар МӘМС есебінен жоспарлы және шұғыл түрдегі стоматологиялық көмекті алуға құқылы. Әлеуметтік медициналық сақтандыру қоры 2022 жылдың 1-тоқсанының қорытындысы бойынша ҚР балаларға 2,77 млн-нан астам стоматологиялық қызмет көрсетілгенін атап өтті.
Балалардың мүддесін қорғау және құқықтарын қамтамасыз ету – мемлекеттік саясаттың басым міндеттерінің бірі. 2022 жылды Ел Президенті Балалар жылы деп жариялады. Осыған байланысты елімізде түрлі пайдалы жобалар мен іс-шаралар жүзеге асырылуда.
Қазақстанда 16 мамыр мен 16 маусым аралығында «Балаларға күлкі сыйла!» республикалық акциясы өтуде. Осы акцияның аясында Әлеуметтік медициналық сақтандыру қорының филиалдары денсаулық сақтау басқармаларымен, медициналық ұйымдармен және басқа да мүдделі құрылымдармен бірлесіп балаларға профилактикалық стоматологиялық тексерулер жүргізуді ұйымдастырады. Бұл ретте 18 жасқа дейінгі интернаттардың, балалар үйлерінің, медициналық-әлеуметтік мекемелердің тәрбиеленушілеріне, аз қамтылған отбасылардың балаларына жеке көңіл бөлінеді.
<blockquote>
 «Қазір балалардың көбінде тістің жетілуіне қатысты ақаулар кездеседі. Әсіресе, пульпит жиі ұшырасады. Тістің кеш пайда болатын жағдайлары жиі кездеседі, тістер қисық өседі. Мұның бәріне ата-ананың балаға қатты тамақ бермеуі себеп. Бала алма, сәбіз, печенье, құрт, ет сияқты қатты тағамдарды қаншалықты көп тістесе, оның тістері соғұрлым жақсы болады. Ата-аналар көбінесе балаларға жұмсақ тамақ береді. Балалар пюре, йогурт секілді тағамдарды шайнамай жұтады. Бұл тіс-жақ жүйесінің дамуына зиянын тигізеді. Сонымен қатар балалар фаст-фуд, тез дайындалатын тағам, газдалған тәтті сусындарды жақсы көреді. Бұлар тістің ерте бұзылуына әкеледі. Сондықтан адамның сау тістері ұзақ сақталуы үшін бала кезінен дұрыс стоматологиялық күтімді сақтау керек», – деп кеңес береді «Балаларға күлкі сыйла!» акциясына қатысушы, астаналық «Еr-Stom» стоматологиялық клиникасының стоматолог дәрігері Айнұр Нұрғалиева.
</blockquote>
Әлеуметтік медициналық сақтандыру қоры 18 жасқа дейінгі балалар жеңілдік санатына кіретінін және олар үшін МӘМС жарналарын мемлекет төлейтінін еске салды. МӘМС жүйесінде балаларға шұғыл және жоспарлы стоматологиялық көмек қамтылған. 2022 жылдың 1-тоқсанының қорытындысы бойынша ҚР балаларға 8 млрд теңгеге 2,77 млн-нан астам стоматологиялық қызмет көрсетілді.
Стоматологиялық көмек пациенттің медициналық ұйымды еркін таңдауы негізінде жүзеге асырылады, яғни учаскелік дәрігердің жолдамасы талап етілмейді. Қызметтерді алу үшін Қормен келісімшарты бар жеке стоматологияны таңдауға немесе өз емханаңыздың стоматологиялық кабинетіне жүгінуге болады. Елімізде МӘМС аясында 600-ден астам медициналық ұйым стоматологиялық қызмет көрсетеді.
МӘМС бойынша стоматологиялық көмекті кім ала алады?
Жоспарлы стоматологиялық көмек МӘМС пакетімен келесі азаматтар үшін қарастырылған: 
– балалар; 
– жүкті әйелдер.
Шұғыл стоматологиялық көмек ала алатын азаматтар:
– 18 жасқа дейінгі балалар; 
– жүкті әйелдер; 
– ҰОС қатысушылар және оларға теңестірілген тұлғалар; 
– I, II, III топтағы мүгедектер; 
– «Алтын алқа» және «Күміс алқа» алқаларымен марапатталған көп балалы аналар; 
– атаулы әлеуметтік көмек алушылар; 
– жасы бойынша зейнеткерлер; 
– жұқпалы және әлеуметтік маңызы бар және айналасындағыларға қауіп төндіретін аурулармен ауыратын науқастар; 
– ерекше қажеттіліктері бар балаға немесе бала кезінен I топтағы мүгедекке күтім жасайтын жұмыс істемейтін қазақстандықтар.
МӘМС-те пациенттердің осы санаттары үшін тегін көрсетілетін қызметтер:
– анестезия; 
– жақ немесе тістің рентгенографиясы; 
– тісті жұлу; 
– пломбаны дайындау және салу; 
– периостотомия; 
– пульпит, периодонтит, стоматиттің жедел түрлерін, альвеолитті емдеу; 
– абсцессті ашу.
Егер сұрақтарыңыз болса, сіз оларды емханаңыздан Пациенттерге қолдау көрсету қызметіне хабарласып сұрай аласыз. Егер сізге ол жерде көмек көрсетілмесе, онда өзіңізге ыңғайлы байланыс арнасы арқылы Әлеуметтік медициналық сақтандыру қорына өтініш жібере аласыз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot. Дәл осы құралдар сақтандырылу мәртебесін тексеруге мүмкіндік береді. Сондай-ақ, медициналық сақтандыру жүйесіндегі өз мәртебеңізді тексеріп, жүргізілген төлемдер туралы ҚР электрондық үкіметінің egov.kz сайтындағы «Денсаулық сақтау» бөлімінде «Медициналық қызметтер туралы және МӘМС-ға аударылған сомалар туралы ақпарат» мемлекеттік қызметі арқылы біле аласыз.

Қазақстан және Қызылорда облысының жаңалықтары