<a href="https://kyzylorda-news.kz/">Kyzylorda-news.kz.</a> Биыл Ғани Мұратбаевтың 120 жылдығы қарсаңында 12 тамыз – Халықаралық жастар күнінде республикалық «Ғани жастар сыйлығы» беріледі.
Құжаттар қабылдау уақыты маусым айының 30 жұлдызына дейін. Сыйақы мөлшері 120 000 теңге!
Республикалық «Ғани Мұратбаев» атындағы жастар сыйлығын беру жөніндегі конкурстың Ережесі:
<ol>
<li>Жалпы ережелер 
Республикалықи «Ғани Мұратбаев» атындағы жастар сыйлығы (бұдан әрі – Сыйлық) Қазақстандық патриотизмді арттыруға елеулі үлес қосқан жас дарынды белсенділерді қолдау, Орта Азия мен Шығыс жастарының жалынды жетекшісі, белгілі қоғам қайраткері Ғани Мұратбаевтың ісі мен өнегесін өскелең ұрпаққа дәріптеу, кеңінен насихаттау мақсатында өткізіледі. Сонымен қатар, Сыйлық талантты жастарды ынталандыру және олардың айрықша сіңірген еңбегін тану мақсатында беріледі.</li>
<li>Сыйлықты беру тәртібі</li>
<li>Сыйлықты беру мақсаттары: 
1) Қазақстан халқының бірлігін нығайту, қоғамдық келісімді қамтамасыз ету; 
2) Жастарды жан-жақты дамыту және қазақ тілін, мәдениетті, өнерді, дәстүрлерді, тарихи мұраны жастар ортасында насихаттау; 
3) Қазақстанның жас патриоты бейнесін көпшілікке тарату. 
​2. Сыйақыларды тағайындау және дипломдар мен бағалы сыйлықтарды тапсыру рәсімі Қазалы ауданында өткізіледі. 
​3. Сыйлық иелерін анықтау және сыйлықтарды тағайындау комиссия (бұдан әрі – Комиссия) шешімімен жүзеге асырылады. 
​4. Комиссия құрамына облыс, аудан әкімі аппаратының жауапты қызметкерлері, депутаттар, қоғам қайраткерлері, жастар ұйымдарының және үкіметтік емес ұйымдардың өкілдері, сала мамандары, БАҚ өкілдері кіре алады. 
​5. Конкурстың жұмысшы органы Қазалы ауданының әкімдігі (бұдан әрі – ұйымдастырушы) болып табылады. 
​6. Осы Ереже конкурсқа қатысуға үміткер барлық тұлғаларға танысу үшін ұсынылады және бұқаралық ақпарат құралдарында жарияланады. 
​7. Жеңімпаздар байқауға қайта қатысуға 5 жылдан кейін ғана құқылы. 
​8. Сыйлық жылына бір рет, Комиссия шешімімен белгіленген номинациялар бойынша тағайындалады. 
​9. Үміткер бір ғана конкурстық өтінім беруге құқығы бар. 
​10. Әр номинация бойынша сыйлықтың қаржылай мөлшерiн Қазалы ауданының әкімдігі белгiлейдi. 
​11. Конкурстық комиссияға жолданған материалдар қайтарылып берілмейді. 
​12. Сыйлық жеңімпазына ресупбликалық «Ғани Мұратбаев» сыйлығының дипломы, омырауға тағатын белгiсі және естелік сыйлығы беріледі. 
​13. Сыйлық 2022 жылдың маусым айының І-ші онкүндігінде өткізіледі.</li>
<li>Сыйлыққа қатысу шарттары 
​1. Сыйлыққа қатысушылар: 
Сыйлықты алуға үміткер ретінде 35 жасқа дейінгі жоғары кәсіби жетістіктері бар Қазақстан Республикасының азаматтары бола алады. 
​2. Сыйлық келесі бағыттар бойынша беріледі: 
-мәдениет пен өнер саласындағы жетістіктері (қыл қалам шеберлері) үшін; 
-білім және ғылым саласындағы жетістіктері үшін; 
-әдебиет және журналистика саласындағы жетістіктері (ақын немесе шығармашыл жастар) үшін; 
-спорт саласындағы жетістіктері үшін; 
-мемлекеттік тіл саясаты саласындағы жетістіктері үшін; 
-Қазақстандық патриотизмді қалыптастыру ісіндегі қоғамдық-саяси белсенділігі мен жетістіктері.</li>
<li>Өткізу кезеңдері 
​1. Бастапқы кезең. 
Конкурсты өткізу және оған қатысу шарттары туралы хабарландыру бұқаралық ақпарат құралдарында 1 (бір) ай аралығында жарияланады. 
​2. Негізгі кезеңі. 
Конкурсқа қатысушылар жазбаша нысандағы өтініш және материалдарын қағаз түрінде Ұйымдастырушыға ұсынады. 
Конкурсқа үміткерлердің материалдары Ұйымдастырушының мекен-жайына келіп түседі. 
Ұйымдастырушы Сыйлықты тағайындауға 10 күн бұрын материалдарды әр номинация бойынша бөліп, тізімін қалыптастырады және Комиссияның қарауына ұсынады. 
Комиссия өз жұмысының нәтижелері бойынша Сыйлық жеңімпаздарын белгілейді. 
​3. Сыйлық бойынша номинациялардың саны 14 адамнан аспауы тиіс. 
5.Үміткерлерді бағалау және іріктеу рәсімі</li>
<li>Комиссия сыйлыққа үміткерлерді таңдау кезінде келесі критерийлерді басшылыққа алады: 
үміткердің қоғамда алатын орны мен беделі; 
шығармашылық жобасының мән-мағына тұрғысынан тереңдігі; 
қазақстандық патриотизмді нығайтуға қосқан үлесі; 
ұлтаралық достастық пен келісімді нығайтуға тигізген әсері; 
ұлттық мәдениетті, тілді, өнерді, салт-дәстүрлерді насихаттау мен жаңғыртуға қосқан үлесі; 
жеке, кәсіптік, байқау жұмыстарымен жеткен жетістіктері үшін қоғамдағы танымалдылығы. 
Комиссия шешім шығару барысында шығармашылық және кәсіби одақтардың, қоғамдық бірлестіктердің пікірін ескеруге құқылы. 
Комиссия шешімі ашық дауыс беру жолымен қабылданады және оған Комиссия мүшелерінің жалпы санынан басым бөлігі дауыс берсе, қабылданған деп саналады. Дауыстар тең болған жағдайда, төрағаның дауысы шешуші болып табылады. Шешім хаттамамен ресімделеді.</li>
<li>Комиссияның құқықтары мен міндеттері</li>
<li>Комиссия: 
барлық қатысушылар үшін тең жағдай жасауға; 
Сыйлық нәтижелері туралы мәліметтердің уақытынан бұрын жария етілуіне жол бермеуге міндетті. 
Спектакльдердi, кино және телефильмдердi, бейнелеу өнерiнiң көрмелерiн қарауды, концерттiк бағдарламалар мен музыкалық шығармаларды тыңдауды ұйымдастыру, сыйлыққа ұсынылғандардың қызметімен танысуға. 
Комиссия: 
Ұсынылған жұмыстар осы Ереженің талаптарына сәйкес келмеген жағдайда, үміткерді конкурсқа қабылдамауға; 
келіп түскен материалдарға баға беруге; 
сыйлықты тағайындай отырып, конкурс қорытындыларын шығаруға; 
комиссия мүшелері өз өкілеттігін теріс пайдаланғаны анықталған жағдайда сыйлық беру қорытындыларын жоққа шығаруға құқылы.</li>
<li>Үміткерлердің құқықтары, міндеттері мен жауапкершілігі</li>
<li>Үміткер: 
Сыйлықты өткізу шарттары мен тәртібі туралы ақпарат алуға; 
Ұйымдастырушы органынан осы Ереженің тармақтары бойынша түсіндірме алу үшін жүгінуге құқылы. 
Осы Ереженің талаптарына сәйкес ресімделген материалдарды уақытылы ұсынуға; 
Осы Ережеде көзделген шарттарды сақтауға міндетті. 
Үміткер материалдар мен түйіндемеде көрсетілген ақпараттардың шынайылығына қойылатын талаптарды бұзғаны үшін, сондай-ақ осы Ережеде белгіленген шарттарды сақтамағаны үшін жауапты болады. 
8.Үміткерлердің дайындайтын құжаттары</li>
</ol>
<ul>
<li>Өз саласы бойынша жоғары және жақсы көрсеткіштерге қол жеткізгені үшін;</li>
<li>Әлеуметтік маңызды жобалар және қоғамдық өмірге белсене қатысуы;</li>
<li>Мемлекеттік жастар саясатын жүзеге асыру және жетілдіру бойынша қосқан жаңашыл бастамалары;</li>
<li>Жеке басының жетістіктері;</li>
<li>Облыстық, республикалық, сайыстарға қатысуы және жеңімпаз аталуы;</li>
<li>Жұмыс орнынан /оқу орнынан/, саласы бойынша мемлекеттік мекемелер мен ұйымдардан ұсыным хаттары (қол жеткізген жетістіктері мен марапаттарын көрсете отырып);</li>
<li>Түйіндеме (қазақ тілінде, 3х4 фотосуретімен);</li>
<li>Өмірбаяны;</li>
<li>Жұмыс орнынан /оқу орнынан/ анықтама;</li>
<li>Орта арнаулы немесе жоғары білімі туралы диплом (көшірмесі);</li>
<li>Жетістіктері (алғыс хаттары, мақтау қағаздары, дипломдары және т.б) сканер арқылы жасалған көшірмелері;</li>
<li>Мемлекеттік жастар саясатын жүзеге асыру бойынша өткізген, қатысқан шаралары жайлы мәлімет, жарияланған мақалалар, жүзеге асырған жобалары және басқа да ұсыныс, кепілдеме хаттары;</li>
<li>10х15 фотосуреті (1 дана, электронды нұсқасымен);</li>
<li>Жеке куәлігі (көшірмесі), тұрғылықты мекен-жайы бойынша анықтама. 
Құжаттар беттеліп, бекітіліп, ұсынылуы қажет (портфолио түрінде). 
Құжаттар «Қазалы ауданының ішкі саясат бөлімі» КММ-не тапсырылады. 
Ескерту: Тапсырылған құжаттар рәсімдеу талаптарына сәйкес келмеген немесе толық ұсынылмаған жағдайда қараусыз қалдырылатын болады. 
Қосымша ақпараттарды: Ж.Нұрмұхамедұлы көшесі №130, Қазалы ауданы әкімдігі ғимаратының 2 қабатында орналасқан «Қазалы ауданының ішкі саясат бөлімі» коммуналдық мемлекеттік мекемесінен алуға болады. 
8/724 38/ 79-2-80, /6920, 6921, 6922/.</li>
</ul>

Ғани Мұратбаев атындағы жастар сыйлығы беріледі

<a href="https://kyzylorda-news.kz/">Kyzylorda-news.kz.</a> Қазақ футболының аңызы Тимур Сегізбаевтың жүлдесі үшін аладоп аламаны аяқталды.
Жасөспірім футболшылардың мерейлі мерекесіне айналған турнирде «Қайсар» футбол орталығының 2008 жылғы тәрбиеленушілері алдына жан салмады. Олар топтық кезеңнің барлық кездесуінде айқын жеңіске жетіп, жартылай финалға жолдама алды.
Ақтық бәсеке үшін өткен кездесуде Сырдария командасын қапы қалдырса, финалда Қазалы құрамасын 1-0 есебімен жеңді.
Осылайша он үшінші мәрте ұйымдастырылған бәсі биік бәсекеде “Қайсар” өрендері жарыстың биік сатысына көтерілді.
Сондай-ақ турнирде өнегелі ойын көрсеткен Евгений Петрик «үздік ойыншы» атанса, Расул Жахат «үздік қақпашы» деп танылды.
Айта кетейік, шоқтығы биік аладоп бәсекесіне 10 команда, 150 ден аса балғын футболшылар қатысып, жарыстың көркін қыздырды.

«Қайсар» өрендері Тимур Сегізбаевтың кубогын еншіледі

<a href="https://kyzylorda-news.kz/">Kyzylorda-news.kz.</a> Шиелі ауданында саяқ шегірткелерге қарсы улау жұмыстары жүргізіліп жатыр.
Жалпы аудан бойынша 30600 гектарға зерттеу жүргізілді. Шаруашылық және мемлекеттік жер қорларынан 9460 гектар жерді өңдеу жоспарлануда.
Қазіргі таңда, кеше түнгі аласапыран дауыл салдарынан, бірқатар ауылдар мен кент ішінде жауған шегірткелерге қарсы улау жұмыстары жалғасуда.
<img src="https://kyzylorda-news.kz/wp-content/uploads/2022/06/289313747_1335505446979911_263607128996553125_n.jpg" alt="" />

Шиеліде зиянкестерге қарсы күрес жұмыстары жалғасуда

<a href="https://kyzylorda-news.kz/">Kyzylorda-news.kz.</a> «Майдан жолы» павлодарлық іздестіру-зерттеу отрядының іздеу жүйелері Беларусь жерінен Ұлы Отан соғысының он бір жауынгерінің сүйегін тапты, деп хабарлайды&nbsp;<a href="https://stan.kz/">Stan.kz</a>.
Жасақ командирі Александр Шитов бес күн бойы іздестіру жұмыстарының нәтижесін жария етті.
<blockquote>
 «Ұлы Отан соғысы кезінде осында қаза тапқан он бір қызыл әскердің сүйегін жыралардан таптық. Сондай-ақ олардың заттары – бақыраш, аяқкиім, күзет белгісі табылды. Бір шұңқырда снарядтан төрт жауынгер қаза тапқан», – деді Александр Шитов.
</blockquote>
Сондай-ақ Шитов 9 маусымда қайтыс болғандардың сүйегін алып шыққан жерден мемлекеттік награда – Қызыл Жұлдыз орденін тапқанын хабарлады. Оның кімге тиесілі екені жақын арада белгілі болады.
Павлодарлық «Майдан жолы» іздестіру тобы ERG «Батырлар жолымен» Еуразиялық тобының «Даңқ жолы» халықаралық патриоттық жобасы аясында Ұлы Отан соғысында қаза тапқан жауынгерлердің сүйегін іздеп жатыр. Беларусь Республикасы Витебск облысының Дубровно ауданында Понизовье ауылының маңында іздестірілуде.
Бұл жер кездейсоқ таңдалмаған. Бұл жерді азат етуге көптеген қазақстандық қатысып, сол жерде қаза тапты. Олардың сүйегін табу, өлгендердің аттарын қалпына келтіріп, керек болса жер қойнына беру – павлодарлық іздеу жүйелерінің игі мақсаты.

Ұлы Отан соғысына қатысқан 11 сарбаздың сүйегі Беларусьтен табылды

<a href="https://kyzylorda-news.kz/">Kyzylorda-news.kz.</a> Қызылорда қаласы әкімдігінің ұйымдастыруымен Қызылорда облысы әкімінің Кубогы үшін қаламгерлер арасында шағын футболдан республикалық турнир өз мәресіне жетті.
Қызылорда қаласында тұңғыш рет ұйымдастырылған додаға Нұр-Сұлтан, Алматы, Талдықорған, Шымкент қалалары мен Жамбыл, Түркістан облыстарынан барлығы 9 команда бақ сынады. 
Тартысты ойындар нәтижесінде жартылай финалға «Хабар», «Экспресс-К», «Қарекет» және «Ақмешіт» командалары шықты. Финалда пенальтиде басым түскен «Экспресс-К» командасы Қызылорда облысы әкімінің Кубогы үшін өткен республикалық турнирдің чемпионы атанды. 
Додада оза шапқан «Экспресс-К» командасын қала әкімі Асылбек Шаменов арнайы кубокпен, медальдармен және 1 000 000 теңге көлемінде қаржылай сыйлықпен марапаттады. Екінші орынды жеңіп алған «Хабар» командасы – 700 мың, ал, қола жүлдегер атанған «Ақмешіт» командасы 400 мың теңге, төртінші орын иемденген «Қарекет» командасына 200 мың теңге табысталды.
Турнирдің Үздік ойыншысы номинациясымен ардагер журналист Шоқан Махан (Алматы) марапатталса, «Қарекет» командасының ойыншысы Есболат Айдаболсын үздік шабуылшысы деп танылды. «Тараз пресс» командасының ойыншысы Айбек Қабылша үздік қақпашы атанса, турнирдің Үздік қорғаушысы номинациясымен Шымкент қаласынан келген Арай Есенбек марапатталып, қаржылай жүлделер тапсырылды.
Еліміздің түкпір-түкпірінен 100-ге жуық БАҚ өкілдерінің басын қосқан турнирде қатысушылар қонақжай Сыр елі жұртшылығына ризашылықтарын білдірді.
<img src="https://kyzylorda-news.kz/wp-content/uploads/2022/06/289345205_325996206388297_1550338816913048322_n.jpg" alt="" />
<img src="https://kyzylorda-news.kz/wp-content/uploads/2022/06/289451252_325996289721622_5587631058619374253_n.jpg" alt="" />
<img src="https://kyzylorda-news.kz/wp-content/uploads/2022/06/289326826_325996259721625_5870856469365431789_n.jpg" alt="" />

Қызылорда облысы әкімінің кубогын  «Экспресс-К» командасы жеңіп алды

<a href="https://kyzylorda-news.kz/">Kyzylorda-news.kz.</a> 2022 жылдың 15 маусымынан бастап «Жолаушылар тасымалы» АҚ әлеуметтік маңызы бар бағыттарға (2022 жылдың маусым айындағы жағдай бойынша 38 маршрут) пойызбен жиі саяхаттайтын жолаушылар жаңа «Күміс» дисконттық картасымен билет құнының 25% үнемдей алады. Бұл туралы Қазақстан темір жолы компаниясының баспасөз қызметі хабарлады.
«Күміс» дисконттық картасының құны – 7999 теңге. Оның жарамдылық мерзімі – іске қосылған сәттен бастап бір жыл. Дисконттық картаны «Жолаушылар тасымалы» АҚ билет кассаларынан сатып алуға болады. Ол дербес болып табылады және 16 жастан асқан жолаушыларға арналған. билеттерді офлайн/онлайн сатып алу кезінде картаны пайдалануға болады.
Жоба пилоттық болғандықтан, карталар саны шектеулі.
Жол жүру құжаты (билет) тек бір жеңілдік тарифтік шарты бойынша сатылады және басқа жеңілдікті тарифтік шарттармен жинақталмайды. Барлық қосымша ақпаратты «Жолаушылар тасымалы» АҚ билет кассаларында дисконттық картаны ресімдеу және сатып алу кезінде нақтылауға болады.
Жеңілдігі бар жолаушыларды теміржол билеттерін ресімдеу және сатып алу кезінде мұқият болуды және «жеңілдіктер» немесе «төмен бағалар» санатын дұрыс таңдауды сұраймыз.
Сондай-ақ, «Алтын», «Саяхатшы» және «Жастар» дисконт карталарының бар екендігін еске саламыз.
Жеңілдік 38 бағыт бойынша қатынайтын пойыздарға ғана жарамды. Бағыттардың тізімі туралы толығырақ https://bilet.railways.kz/post/discount-cards-kumis сілтемесі арқылы білуге болады

Пойыз билетін жеңілдікпен қалай сатып алуға болады?

<a href="https://kyzylorda-news.kz/">Kyzylorda-news.kz.</a>&nbsp;Өткен ғасырдың 70 жылдарының бас жағында Большевик колхозының партия ұйымының хатшысы Қошан Орынтаев С.Сейфуллин орталау мектебінің директоры болып жаңадан тағайындалған әкем ­Болатбекке кеп: – «Біздің колхозға ертең кешке Қазақстан мен КСРО-ның Халық артисі, «Қазақконцерттің» әнші-солисті, жетекші сахна шебері Роза Тәжібайқызы Бағланова келеді. Соған 4 ауылдан халық шақырылады. Концерт соңынан сіздің жаңа қызметіңіздің шашуы болсын, Алматыдан келген және колхоз басшыларын қарсы алып, күтсеңіз», – деген тілегін айтады.&nbsp;
Қазақ мейман күтуден қашпаған. Әкем қонақ күтуге қызу әзірлік бастап, концерт өтетін орын етіп мектеп артындағы ойын алаңқайын таңдайды. Бақалы (О кезде ауыл «Қызыл диқан» аталған) ауылының мәдениет үйі тар, халық сыймайды. Әкем мен партия ұйымының хатшысы сол таза ауада баяғының көшпелі қазақтары секілді өткізуді мақұл көреді. Бұл шешімге колхоз белсенділері де тоқтайды. Колхоздың жүк мәшинесінің артқы қорабы төмен түсіріліп, астына кілем төселіп, әншіге жоғары көтерілу үшін арнайы саты әзірленеді. Алаңқайға қадалар орнатылып, алаң жарықтандырылады. Мынандай күздің қоңыр салқын кешінде Көктөбе, Қосбөлтек, Теріс, Нұрлыкент ауылдарынан кәрісі бар жасы бар халық ағылсын-ай келіп. Бір-бірімен қауқылдасып-көрісіп, күліп-ойнаған жастар алаңға толды.
Белгіленген уақытта Роза Тәжібайқызы қасында өзімен Алматыдан «Қазақконцерттен» ілескен нөкерлерімен дала сахнасына қазақы киіммен халыққа тағзым етіп иіліп сәлем беріп, халық та қошеметпен дуылдата қол соққан думанды сәт мәңгі есте қалыпты.
Әлемнің 54 елінде өнер көрсеткен қазақтың таңдайына «бұлбұл ұя салған» қызы концертті қазақтың «Желсіз түнде жарық ай», «Қақтаған ақ күмістей кең маңдайлы», «Жарқ етпес қара көңлім не қылса да», «Қиыстырып мақтайсыз» т.б. ескі әндерін құйқылжыта орындаумен бастады. Бұдан өзге орыс, венгр, өзбек, қырғыз, тәжік, украин, грузин, әзербайжан және бірнеше тілдегі әндерді де нақышына келтіре орындады.
Әнші қай елге барса да, жергілікті халықтың әнін міндетті түрде орындап, үлкен ықыласқа ие болған. Біздің колхозда да аталған ұлт өкілдерімен қоса, неміс, шешен, татар ұлт өкілдері де қатысқан еді. Ел концертке дән риза. Тынымсыз, ұзақ шапалақпен кей әндерді қайталатып орындатып жатты. Апамызға қос бұрым мен үкі таққан жырға, қазақы киім керемет жарасым беріп тұрып еді. Концерт кемі екі сағатқа созылды. Ел-жұрт Роза апамыздың мәнді концертінен рухани ләззәт алып, күліп-ойнап, жарқылдап-жайнап дабырласып тарасып жатты.
Келісілген уәде бойынша&nbsp; колхоз партком хатшысы Роза апаны Болатбек әкеміздікіне бастап әкеледі. О кісінің шашбауын көтеріп, колхоздың басқарма төрағасы Л.В.Кисилев жұбайымен, бұрынғы партком хатшысы А.И.Попов әйелімен, әкім, соғыс ардагерлері Төрен Сейтаев, Райымбек Сатыбалдиев, Тұрмағамбет Мықтыбеков, бас экономист Шайділда Исмаилов, ферма меңгерушісі Әмірсейіт Шойбекұлы т.б. көп кісілер мектеп қожайынының үйіне қонаққа келеді. Жамырай қошеметпен қарсы алу сәтінде әкем есік ашып «Келіңіз, төрлетіңіз!» деп ізет көрсетіп тұрғанда, екі әйел баласы Роза апаны қолтығынан демеп, баспалдақпен көтерілуіне қолғабыс еткендердің бірі білімді апамыз Қаршыға (жұрт Нәлше дейтін): – Нешедесіз? – деп сауалдап үлгірді. – 50-демін, – деді Роза апа. Қаршыға Аңламасқызы апамыз: – Құрдасым, қызымдай екенсің ғой! – дегенде, Роза апа ризашылықпен жалт бұрылып, әдемі жымиғаны көз алдымызда, бүгінгідей еді…
Ішкі төр бөлмеге бағыт сілтеп, есіктерді ашып жүрген әкемнен Роза апа оң жақ бөлмеде қазақы зерленген кимешекпен, биік әдемі күндікпен аппақ шағаладай боп отырған Тындықыз (Сары деп атайтын жұрт) әжемізді көріп, кілт бұрылды.
Әжемнің көргенде ақ кимешегін,
Еркебұлан күй кешемін.
Жайылған мейірімдей ақжаулыққа,
Астасып ақ көңілмен үйлесемін.
Кимешек киесіндей салтымыздың,
Ақ жаулық пейіліндей халқымыздың.
Арындай қазағымның әжелері-ай,
Жанына ең жақыны жалпымыздың –деп, Роза апа әжеме әдемі де әсерлі жылы сөз айтып, қасында біраз аялдады.
Әжем де қарап тұрмады: – Бұлағың ағып тұрсын, шырағың жанып тұрсын! – деп, әрі қарай жақсы қыз баға жетпес бір гауһар тас, жәннаттың пісіп тұрған алмасындай. Иә, Алла, тура жолға өзің баста! – деп, ізгі ниет тілек айтқан еді. Ата салтың халықтық қалпың! – дегендей, Роза апа мен әжемнің қысқа сұхбатының өзі тағылым алатындай еді!
Халыққа, оның ішінде өзінің туған қазағына қалтқысыз қызмет еткен Роза Бағланова әкемнің төрінен кеп осылай орын алып, жайғасқан еді. Қазақтың «екі шәй, бір етінің» алғашқысына ден қойды қонақтар.
Роза апа ауыл ағаларымен түйдей құрдас та болып шықты.
– Мен Қызылорда облысының Қазалы шаһарының тумасымын, 1922 жылы 1 қаңтар да туғанмын. Әкем Тәжібай бақуатты, қос некелі &nbsp;кісі болған. Екі әйелі қатар босанып, татар қызы Мәриямнан Ыдырыс есімді ұл, екінші әйелі қазақ қызы Ақкүріштен мен туғанмын. Руым 12 атаның бір атасы жағалбайлы, «жылқысын көптігінен баға алмайды». Мектеп тәмамдаған соғыс алдындағы жылдарда Қызылорда пединститутына оқуға түскенмін. Әкем кенет дүние салып, о шаһардағы оқуды жалғастыра алмадым. Ташкент тоқыма институтына ауысып, оқу орнында даусым ерекше көзге түсті. Өзбек филармониясының директоры Кари Якупов есік алдын сыпырып ыңылдап ән салған мені әйелдер ән-би ансамбліне әншілікке қабылдады. 1941 жылы&nbsp; Мәскеу консерваториясына жолдама алдым, – деді Роза Бағланов.&nbsp;
Әкем Болатбектің кең дастарханындағы қадірлі қонақтарға басиелікті партком хатшысы Қошан Орынтаев жасап, қонақтарға кезекпен сөз беріп отырды. Әншімен бірге отырған ауыл ағаларының бірі майдангер Шайділда ата&nbsp; Роза апаға: – Сіз осы отырған ұрыс майданында болғандардың баршасымен құрдас екенсіз. Сіз де біз секілді ұрыс даласында жауынгерлер алдында ән айтып, жауынгерлерді рухтандырған деп естігенбіз, осы туралы айтсаңыз, –деді.
– Иә, «Тірлік басқа болса да – тілек бір, Бармақ басқа болса да, білек бір» деген қазақтың нақышына сай мен әлемді аралап жүріп, мың түспен әрленген декоративті сахнада ғана емес, ашық майдан алаңында да қайсарлықпен оқ пен от ортасында күн-түн қатып жаумен айқасып, қар төсеніп, мұз жастанып жүрген жауынгерлер алдында оларды рухтандыратын ән айттым. 1943 жылы соғыстың қызған шағы. Кезекті концерт кезінде фашистер минометпен атқылай бастады. Енді еңкейе бергенімде, көзімнің алдында қараңғылық орнады. Көзіме снаряд жарқыншағы тиген екен, – деді Роза Бағланов.&nbsp;
Роза Бағланова осы жарақатқа байланысты көзіне бірнеше мәрте ота жасатады. Кейде мүлде көрмей қалатын кездері де болған.
1945 жылы 9 мамырда Берлиндегі жеңіс концертіне қатысады. Өзбекстан атынан өнер көрсетіп жүрген қазақ әншісі туралы Мәскеуде жоғарғы партия мектебінде оқып жүрген «Мен қазақпын, мың өліп, мың тірілген» деп жырлайтын ақын Жұбан Молдағалив естіп, оның елге оралуына себепкер болған.
Анам Күлайнаның әзірлеген қызыл күрең шәйі мен қонаққа арнап сойылған қой еті балбырап пісіп, қонақ алдына тартылды. Сол дәуірдегі қазаққа жат «орыстың ақ ащы суы» да қойылып еді, Роза Тәжібайқызы шыны аяқты қолға алып, тілек сөз айтқанымен, әлгі «ащы су»-дан татып алмады.
1957 жылы Америкада Елизаветаның&nbsp;&nbsp; алдында ән салған Роза Бағланованы патшайымның өзі: «Қазақ әйелдерінің киген киіміне қарап-ақ, олардың қандай халық болғанын тануға болады. Бұл киім байлық пен талғамды аңғартады» деп бағалаған екен. «Әзербайжанның екі байлығы бар. Оның алғашқысы – мұнай, екіншісі – Мүсілім Магомаев», – деген екен Гейдар Алиев.
«Иә, әскери атақты қолбасшыларды майдан даласында көрдім. Маршалдар – Г.К.Жуков, Р.Я.Малиновский&nbsp; бәрі де әніме, үстімдегі қазақтың қынама бел жарасымды ұлттық киіміме қызықты, «дала қызғалдағына ғашық болдық деді», – дейді Бағланова.
Бақалы ауылында өткен «Дала қызғалдағы» Роза апаның ән кеші осылайша есте қаларлық, тағылымды, әсерлі өтіп еді. Біздің үйде тікесінен тік тұрып қошемет пен қызмет көрсеткен жандар мен күні кеше майданнан қан кешіп оралған өз құрдастарына, үй иелері Болатбек пен Күлайна, Рақыманбек пен Құрманкүл, Айдар, Беріктермен әсіресе Тындықыз әжеме Роза апа алғыс айтып, ризашылық сезімін білдірген еді.
«Отырыс есте қаларлық боп өтіп, бір-бірімізбен қимай қоштасқан едік. «Әйел – қоғамның қозғаушы күші» дегенге имандай сенген сәт еді бұл» деп еске алады әкем.
Ол халық алдына шыққанда әнді ­микрофонсыз айтып, өзінің шығармашылық еңбегімен халықтың көңілін көтерді, жан жүрегін жадыратты, елге қуаныш сыйлаған еді.
Роза Бағланова «Халық қаһарманы» атағына ие болған қазақтың жалғыз әншісі.&nbsp; Роза Бағланова ұзақ жылдық еңбегі үшін «Тарлан»&nbsp; қоғамдық&nbsp; және «Дәнекер» халықаралық сыйлығымен, «Еңбек Қызыл ту», «Халықтар достығы», «Құрмет белгісі» және «Отан» ордендерімен марапатталды, «Халық қаһарманы» атанды. Ұлы Тәжен мен келіні Марал өсіп-өніп, қаһарман қызға Ақерке, Тәжібай, Үрбибі есімді ­немерелер сыйлаған.
«Дүние – керуен, өмір – жол, жолмен жүрген керуеннің алды да, арты да біз емес!» дегендей, Роза Бағланова 90 жыл ғұмыр кешіп, 2012 жылы дүние салды. Тірі болғанда биыл 100 жылдығын тойлар едік. «Армансыз адам – қанатсыз құспен тең» дегендей, қазақтың таңдайында бұлбұл құс ұялаған Роза апа рухы пейіште шалқысын!
Найкен ҚАЙЫПБЕКОВА,
<a href="https://anatili.kazgazeta.kz/news/60619">«Ана тілі»</a>

Роза Бағланованың Бақалыдағы концерті

<a href="https://kyzylorda-news.kz/">Kyzylorda-news.kz.</a> Диетолог, нутрициолог&nbsp;Ирина Писарева тән сұлулығына ғана емес, денсаулыққа да кері әсер ететін ең зиянды үш салатты атады.
Зиянды салаттар тізімін бастап тұрған бәрімізге белгілі –&nbsp;&nbsp;Оливье, оны көпшілік жақсы көреді.
<blockquote>
 “Оливье Ресейдегі ең танымал салат болса керек. Бұл ең зиян, өйткені оған майонез қосылады. Екіншіден, онда бұршақ, крахмал&nbsp;қосылады, сонымен қатар оны көбінесе шұжықпен жасайды. Көп мөлшерде тұз және бәрі бірге бұл өте көп калориялы көмірсулар жиынтығы болып шығады. Бұлай тамақтану қорқынышты.&nbsp;Бір реттік тамақтану үшін&nbsp;бұл өте көп “, – деді Ирина Писарева.
</blockquote>
Екінші орындағы зияны – майшабақпен жасалатын салат.
<blockquote>
 “Бұл танымалдығы жағынан Оливьемен бірдей. Оны ешкім йогуртпен, қаймақпен жасамайды. Адамдардың 90 пайызы майонезбен жасайды, оған көп мөлшерде тұз және қант қосылады. Екіншіден, онда&nbsp;әртүрлі тағамдарды араластырады. Картоп, жұмыртқа,&nbsp;бұлар аллергенді болады, ал&nbsp;майшабақ тұзды. Ісінуге және бүйрек проблемалары бар адамдар үшін, бұл салатты жемеген дұрыс”, –&nbsp;деді диетолог.
</blockquote>
Үшінші салат, диетологтың айтуынша, мимоза. Бұл да майонезбен жасалатын тағам, үйлесімсіз өнімдердің қосылысымен жасалады.
Маман кез келген салатты денсаулыққа зияны тимейтіндей жасауға болады дейді.&nbsp;
<blockquote>
 “Мәселен, оливьені алсақ, шұжықты тауық филесіне ауыстыру. Оны қосымша тұздаудың қажеті жоқ өйткені әртүрлі ингредиенттердің жалпы санына байланысты ол өзі де&nbsp;тұзды болады. Майонезді йогуртпен&nbsp;ауыстырыңыз. Немесе зәйтүн майын қолдануға болады.
 Салат аз калориялы және пайдалы болады. Сондай-ақ, көбісі жұмыртқаны авокадомен алмастырады. Авокадо құрамында пайдалы майлар бар және ол зиянды&nbsp; холестеринді өндіруге ықпал етпейді, жұмыртқаның сарысында оның көп мөлшері бар”, –&nbsp;&nbsp;деп түйіндеді Писарева.&nbsp;
</blockquote>
<a href="https://stan.kz/">Stan.kz</a>

Диетолог ең зиянды үш салатты атады

Kyzylorda-news.kz. «AMANAT» партиясы Саяси менеджмент академиясы ұйымдастырып отырған көшпелі семинардың екінші кезеңінде өңірден 56 ауыл және ауылдық округ әкімдері біліктілік курсынан өтті.
Олардың біліктілігін арттыру үшін Саяси менеджмент академиясы толыққанды дайындық бағдарламаларын әзірледі. Бүгін қатысушылар өздері басышлық ететін ауылдық округке скрининг жасап, анықталған деректерге сәйкес тиімді бизнес жобаларды дайындау, әрбір ауылдық ерекшелігіне, мамандануы негізінде кооперация құру, сонымен қатар ауылдағы дайын өнімді стандарттау мен сертификаттаудың мемлекеттік нормалары төңірегінде практикалық курстардан өтті. Оқу барысында олар тәуекелдер, күтпеген жағдай туындаған кездерде бизнесті қайта бағдарлауға машықтанды.
3 күннен, күніне 8 сағаттан білімін жетілдіріп жатқан ауыл әкімдері ауыл халқының табысын арттыруға, елді мекенді экономикалық тұрғыда өркендетуде алып жатқан білімдерінің септігі зор екендігін айтады.
Мәселен, Сырдария ауданына қарасты Н.Ілиясов ауылының әкімі Сағдат Нұрмағамбетов дайын өнімді стандарттау мен сертификаттаудың мемлекеттік нормаларын үйрену ірі бизнес жобаларды жүзеге асырып отырған ауыл әкімдері үшін өте қажет деп санайды.

Қызылордада 56 әкім біліктілік курсынан өтті

<a href="https://kyzylorda-news.kz/">Kyzylorda-news.kz.</a> Ата-анамыз, ата-әжеміздің жас кезінен махаббат хикаяларын естіп отырып, шынайы махаббаттың барына кіршіксіз сенеміз. Дегенмен, бүгінде қарым-қатанас құру бұрынғы заманға қарағанда әлдеқайда қиындай түскендей. Оған себеп әлеуметтік желілер мен адамның еркіндікке ұмтылысы десек қателеспейміз. Бүгін қарым-қатынас құруға кедергі 5 себепті көрсетпекпіз.&nbsp;
<ol>
<li>Біздің бұрынғыдай бәріне түсінікті рөліміз жоқ 
Бұрын қалай болды? Ер жетеді, оқиды, жұмыс істейді, отбасын құрады, бала тәрбиелейді. Ер адам — отағасы, отбасын асырайды. Әйел адам&nbsp; үйде отырып, бала тәрбиесімен айналысады. Ер адам шешім қабылдайды, әйел адам құлақ асады.&nbsp;</li>
</ol>
Бүгінде адамдар ескірген, тиімсіз әрі адамның өзіне зиянын тигізетін әдеп үлгілерінен бас тартып жатыр. Өзгенің стандартына жаққаннан гөрі, өзінің жағдайын көбірек ойлайды.&nbsp;
Әйелдердің құқығы бұрынғыдай тапталмайтын болды, соған сәйкес қарым-қатынастағы теңдік те күшейді. Енді жар таңдарда оны алдымен зерттеу керек, оның қажеттілігі мен ерекшелігіне көңіл бөлу керек.&nbsp;
Оның үстіне қоғамда да сынау күшейе түсті. Егер әйел адам үйде отыруды қаласа, қоғам “күйеуінің айтқанынан шықпайтын, дамымайды” деп сөгеді. Ал мансап жолын қуса, “әбден басқа шыққан” дейді.
<ol start="2">
<li>Таңдау иллюзиясының құрбандарымыз 
Біреумен танысу үшін бұрынғыдай бір жерге барудың қажеті жоқ. Хабарлама жаздың, жолың болса таныса аласың. Әрі таңдау мүмкіндігі шексіз. Жас бойынша, сыртқы келбет, қызығушылық бойынша жіктей берсең болады. Қазіргі жұбыңызбен ұрысып қалсаңыз, өзгесін таба аласыз.&nbsp;</li>
</ol>
Таңдау иллюзиясының кесірінен адам алғашқы қиын сәтте-ақ жұбымен айырылысып жатады. Өйткені, санада одан да жақсысы жолығады деген сенім бар.&nbsp;
<ol start="3">
<li>Біз тым көп ақпарат аламыз 
Көптеген кеңестерді тыңдау нәтижесінде кейде адам өзін жоғалтып алып, белгілі бір шаблондармен өмір сүреді.&nbsp;</li>
</ol>
Кітапта басқа кеңес жазылса, ата-анамыз беретін ақыл-кеңес мүлде бөлек. Достарымыз басқа пікірді ұстанады. Қарым-қатынастың қай үлгісі дұрыс екенін ұғу қиын.&nbsp;
<ol start="4">
<li>Өзімізге және өзгеге қоятын талабымыз зор 
Әлеуметтік желінің дамуымен қатар, адамдардың арманы мен талаптары де өзгерді. Сырттай өзгенің қарым-қатынасын бақылау арқылы, оларды мінсіз көруіміз әбден мүмкін. Бірақ өмірде бәрі олай емес. Ұрыс-керіс міндетті түрде болады. Жұбыңызға қоятын талабыңызды азайтқаныңыз жөн. Мінсіз адам болмайды. Махаббат сол кемшіліктермен бірге қабылдаған сәтте болады.&nbsp;</li>
<li>Жауапкершілік алудан қорқамыз 
Жылдан жылға ата-анадан ерте сепарация жасайтындар саны азайып келеді. Оның үстіне, еркіндікке әбден үйреніп аламыз. Жауапкершілік алып, отбасын асыраудан жасқана бастадық.</li>
</ol>
Ғалымдар өтпелі кезең жасын ұлғайтып, 24 жасқа дейін жасөспірім шақ деп атауды ұсынды. Жарты ғасыр бұрын бұл жаста адамдардың жұмысы мен балалары болатын.&nbsp;
Өзін-өзі танып, жаңа нәре көруді, дамуды, өмірден ләззат алуды қалайтын адам өзінің серігін бір тәжірибенің бөлігі ретінде қабылдауы әбден мүмкін.
<a href="https://massaget.kz/jigitterge/psihologiya/67841/">Massaget</a>

Неге қазіргі заманда қарым-қатынас құру қиын?

Kyzylorda-news.kz. «AMANAT» партиясының облыстық филиалында 19 маусым – Медицина қызметкерлері күніне орай салтанатты шара ұйымдастырылды.
Шарада партия филиалының атқарушы хатшысы Ләйлә Төрешова медицина қызметкерлеріне өңірдегі денсаулық сақтау саласының дамуына қосқан үлесі үшін алғысын білдіріп, партия тарапынан ұлт саулығын дамыту бойынша атқарылып жатқан жұмыстарға тоқталып өтті. Шара барысында қызметте алдыңғы қатардан көрінген үздік мамандарға партияның Атқарушы хатшысы Асхат Ораловтың арнайы Алғыс хаты табысталды.
Мерекелік жиын соңында №1 қалалық емхананың «Құрметті ардагері» Махмұт Байхадамов өздеріне көрсетілген құрметке ризашылығын білдіріп, барша әріптестерін мерекемен құттықтады.

Медицина мамандары марапатталды

Kyzylorda-news.kz. Қала әкімдігінің ұйымдастыруымен Қызылорда облысы әкімінің кубогы үшін қаламгерлер арасында шағын футболдан республикалық турнир басталды.
Турнирдің ашылу салтанатына қала әкімі Асылбек Шаменов арнайы қатысып, командаларға сәттілік тіледі. Сонымен қатар, “Түркістан” телеарнасының директоры Жанахмет Ағыбаев турнирді ұйымдастырушыларға алғысын жеткізді.
Додада Нұр-Сұлтан, Алматы, Талдықорған, Шымкент қалалары мен Жамбыл, Түркістан облыстарынан барлығы 9 команда бақтарын сынауда.
«Қарекет» командасы – Талдықорған қаласы 
«Хабар» командасы – Нұр-Сұлтан қаласы 
«Экспресс-К» командасы – Нұр-Сұлтан қаласы 
«Алматы» командасы – Алматы қаласы 
«Тараз-Пресс» командасы – Жамбыл облысы 
«Шымкент» командасы – Шымкент қаласы 
«Түркістан ТВ» командасы – Түркістан облысы 
«Ақмешіт» командасы – Қызылорда қаласы 
«Қаламгер» командасы – Қызылорда қаласы
<img src="https://kyzylorda-news.kz/wp-content/uploads/2022/06/fb_img_1655541464098.jpg" alt="" />
<img src="https://kyzylorda-news.kz/wp-content/uploads/2022/06/fb_img_1655541467205.jpg" alt="" />

Қазақстан және Қызылорда облысының жаңалықтары