<a href="https://kyzylorda-news.kz/">Kyzylorda-news.kz.</a>&nbsp; «AMANAT»партиясы облыстық филиалының Атқарушы хатшысы Ләйлә Төрешова Арал ауданына қарасты Беларан ауылдық округі, Құланды елді мекені тұрғындарын өтініштерін тыңдады.
Онлайн ұйымдастырылған қабылдау барысында ауыл тұрғындары медициналық пункт, ауылдық клуб, жол, интернет желісін қосу секілді мәселелерді алға тартты.
Нақтырақ айтсақ, ауыл ардагерлері кеңесінің төрағасы Сағидулла Дәулетов ақсақал, халықтың сапалы медициналық қызметке қол жеткізу үшін елді мекендегі медициналық пункті Қаратерең амбулаториясынан шығарып, Арал қаласындағы емханалардың біріне қаратса дейді. Сондай-ақ, зейнеткер 1970 жылы іргетасы қаланған Құланды ауылдық клубты заману үлгіде қайтадан салып берсе деген өтінішін білдірді.
Қарияның өтінішін мұқият тыңдаған Атқарушы хатшы сол жерде нақты жауап берді. Яғни, медициналық пункті Қаратерең амбулаториясынан шығарып, Арал қаласындағы емханалардың біріне қарату мәселесі бойынша қаладағы емханаға қарайтын халық саны мен Құланды халқын қоса есептегенде заңнамалық нормаларға сәйкес халық санының тым көрсеткіштен асып кететіндігі түсіндіріліп, аудандық емханаға көмекке жүгінген науқастарға кезек күттірмей жұмыс жасау, сонымен қатар, Құланды ауылының тұрғындарына айына 2 рет, 3 күн бойы медициналық тексеру жүргізу мәселелі жауапты мамандармен келісілгендігін атап өтті.
Ал ауылға жаңа мәдениет үйін салу мәселесінің елді мекенде халық санының аз болуына байланысты өткен жылы 24 қарашада бекітілген «Құрылыс нысандарын салуға жататын білім, денсаулық сақтау, мәдениет, спорт нысандары туралы» тізбеге енгізілмегендігін жеткізді. Яғни, тұрғындар саны 1000 адамнан асса ғана жаңа ғимарат салынатындығын нақты жеткізіп, әзірге жөндеу жұмыстарын жүргізуге ықпал ететіндігін айтты.
Ауыл тұрғыны Жакуп Жұбанышов Бейнеу – Шымкент газ құбыры жанындағы автожолдан бастап, Құланды елді мекеніне дейінгі кіре беріс жолға тас төсеп, асфальт салып беруге ықпал етуді сұрады.
Партия филиалының Атқарушы хатшысы жалпы ұзындығы 35 шақырымды құрайтын бұл жолды бүгінгі таңда ауданның коммуналдық мешігіне алу жұмыстарының жүріп жатқандығын тілге тиек етіп, келер жылы кезекке сай құрылыс жұмыстары жүргізілетіндігін жеткізді.
Қабылдау барысында Ләйлә Төрешова мобильді интернет желісін қосуға қатысты ауыл тұрғындарының өтінішіне нақты жауаптар беріп, барлық мәселелер оң шешімін тапқанша партиялық бақылауда болатындығын атап өтті.

Ләйлә Төрешова шалғайдағы тұрғындардың өтінішін тыңдады

<a href="https://kyzylorda-news.kz/">Kyzylorda-news.kz.</a> Қызылордада кәсіпкерлердің сұранысы бойынша И.Әбдікәрімов атындағы Қызылорда аграрлық техникалық жоғары колледжі эксперименттік жоба аясында алғашқы 6 студентке негізгі мамандығына қосымша «токарь» біліктілігін берді.
Эксперименттік жобаның бастамашысы – Қызылорда облысы кәсіпкерлер палатасы.
Былтыр Кәсіпкерлер палатасы Өңірлік кеңесінің Адами капиталды дамыту комитетінде бизнес иелері маман тапшылығы мәселесін көтерген. Сол кезде шараға облыстағы колледж басшылары мен облыстық білім басқармасының өкілдері де қатысты.
Аталған отырыста «Квант» ЖШС мен «Қызылорда жылу электр орталығы» ЖШС басшылары мамандарының зейнет жасына келгенін айтып, орнына маман таппай отырғанын жеткізді.
<blockquote>
 «Жалпы дуалдық оқыту бағдарламасы аясында қазір колледждерде мамандар дайындалып жатыр. Дегенмен кей мамандыққа қатысты оқу орындарының лицензиясы болмағандықтан кәсіпкерлердің сұранысы қанағаттандырылмай келді. Былтырғы кездесуде «Білім беру қызметіне қойылатын біліктілік талаптары және оларға сәйкестікті растайтын құжаттар тізбесіне» енгізілген өзгерістерді негізге ала отырып, эксперименттік жобаны бастауды ұсындық.Облыстық білім басқармасы да, колледждер де қолдады. Алғашқы эксперименттік режимді енгізуге И.Әбдікәрімов атындағы Қызылорда аграрлық техникалық жоғары колледжі келісім берді», – деді Кәсіпкерлер палатасының директоры Пірмұхаммед Сыздықов.
</blockquote>
«Білім беру қызметіне қойылатын біліктілік талаптары және оларға сәйкестікті растайтын құжаттар тізбесіне» сәйкес кәсіпкерлердің сұранысы бойынша кәсіптік және техникалық білім беру ұйымдары негізгі мамандыққа қосымша модуль енгізу арқылы жаңа біліктілікті игеруге мүмкіндік бере алады. Мәселен, дәнекерлеуші мамандығының білім бағдарламасы оқу жоспарына қосымша токарь модулін қосу арқылы студентке екі біліктілікті қатар алуға немесе соңғысын таңдауға болады.
И.Әбдікәрімов атындағы Қызылорда аграрлық техникалық жоғары колледжі эксперименттік жоба аясында 6 студентін қосымша «токарь» біліктілігі бойынша «Квант» ЖШС базасында оқытты. Ол үшін кәсіпкерге мемлекеттен тәлімгерлерлік еңбекақы төленді.
Кеше колледжде «токарь» біліктілігін алған студенттерге сертификат тапсырылды. Шара аясында Кәсіпкерлер палатасының директоры Пірмұхаммед Сыздықов пен облыстық білім басқармасының бөлім басшысы Біржан Есенбаев, «Квант» ЖШС директоры Жаңабай Бекішев пен колледж директоры Бақытхан Әбдікәрімов жобаны жетілдіру тетіктерін талқылады.
<blockquote>
 «Тәлімгерлдік үшін кәсіпкерге төленіп отырған еңбекақы көлемі аз. Еңбекақы практикаға бөлінген сағат көлеміне сәйкес беріліп жатыр. Бұл бір топ үшін күніне шамамен 700 теңге. Аталған қаржы жұмыс берушінің студенттерді жұмыс орнында оқытуға жұмсаған шығындарымен салыстырғанда өте аз. Жақын уақытта облыстық білім басқармасымен бірге ұсыныс әзірлеп, мәселені республикалық деңгейде шешуді көздеп отырмыз», – деді Палата директоры.
</blockquote>
Шарада «Квант» ЖШС басшысы жоба аясында «токарь» біліктілігін алып шыққан студенттерді жұмыспен қамтуға әзір екенін, облыстық білім басқармасының өкілі кәсіпкерлерден маман даярлауға қатысты өзге де ұсыныстарын қарауға дайын екенін жеткізді.

Қызылордада кәсіпкерлер мен колледждердің эксперименттік жобасы алғашқы нәтижесін берді

<a href="https://kyzylorda-news.kz/">Kyzylorda-news.kz.</a>&nbsp; Бүгін Сырдария ауданында журналистердің кәсіби мерекесі қарсаңында редакция ардагерлерімен кездесу ұйымдастырылды. Басқосуда «Сыр медиа» серіктестігінің бас директоры, облыстық мәслихат депутаты Аманжол Оңғарбаев пен аудан әкімінің орынбасары Димаш Байдушев сала ардагерлерін мерекемен құттықтап, ұзақ жылдар баспасөз саласында атқарған еңбектеріне алғыс айтып, құрмет көрсетті.
Іс-шараға бас директордың орынбасары А.Абдуллаева, облыстық «Сыр бойы» газетінің бас редакторы Қ.Шарабидинов, қалалық «Ақмешіт апталығы» газетінің бас редакторы Ә.Батырбеков, аудандық газет редакциясының ардагерлері мен қызметкерлері қатысты. Кездесу барысында «Сыр журналистикасының тарихы» 5 томдығы жинағының таныстырылымы да ұйымдастырылды.
Аудан әкімінің орынбасары Д.Байдушев пен «Сыр медиа» серіктестігінің бас директоры, облыстық мәслихат депутаты А.Оңғарбаев сала ардагерлерінің өңір журналистикасының қалыптасуы мен дамуына сіңірген еңбегі және кітаптың ұлт руханиятына қосқан үлесі мен маңызы жөнінде кеңінен айтып өтті.
<blockquote>
 «Алаш ардақтыларының «Қай елдің баспасөзі мықты болса, сол елдің болашағы мықты» деп ХХ ғасырдың басында айтқан сөзі ХХІ ғасырда да өз маңызын жойған жоқ. Қазіргідей ақпараттық технологиялар мен жаңалық таратудың жаңа форматы, медиа мүмкіндіктер қарқынды дамыған заманда сапалы және толық таразыдан өткен шынайы ақпарат таратудың маңыздылығы зор. Осы ретте жергілікті газеттің жұмысына аудан әкімдігі тарапынан жан-жақты қолдау көрсетіліп жатқанын атап өтуіміз қажет», – деді аудан әкімінің орынбасары.
</blockquote>
Өз кезегінде «Сыр медиа» серіктестігінің бас директоры, облыстық мәслихат депутаты А.Оңғарбаев газет бетінде әр кезеңнің тыныс-тіршілігі айқын көрініп тұратындықтан кітаптың ел шежіресі деп атауға лайық екенін айтты.
<blockquote>
 «Бүгінде облыстың медиа кеңістігінде 100-ден аса бұқаралық ақпарат құралы жұмыс істеуде. Оның ішінде, 8 электронды, 3 ақпараттық агенттік, 3 интернет сайт, 87 баспа бұқаралық ақпарат құралы бар. Бұл салада 2,5 мыңға жуық қалам иелері аймақ халқын жедел және сапалы ақпараттармен қамту жолында тынымсыз еңбек етуде. Нақты және жедел ақпарат таратуды мақсат етіп, заман талабына сай дамудың жолын ұстанған бұл сала – іргелі индустрияға айналды. 5 томдық «Сыр журналистикасының тарихы» кітабында аймақтың ақпарат айдынында талай жылдар жаңалық пен жақсылықтың жаршысы болған басылымдардың тарихы баяндалады. Өткен ғасырдың 1925 жылы бүкіл қазақтың басын қосқан алқалы жиын өтіп, бұған дейін Қырғыз аталып келген еліміздің ҚАЗАҚ деген тарихи атауы, сол кездегі қазақ елінің астанасы болған Ақмешітте, осы киелі топырақта қайтарылғанын Сіздер жақсы білесіздер. Сол себепті, Сыр топырағы – қазақ руханиятының киелі ордасы және өңір журналистикасының ғана емес, Қазақ журналистикасының бастау бұлағы. Бұл көптомдық – бұған дейін жарық көрген Жарылқасын Нұсқабайұлы мен Қырықбай Аллабергеннің«Қазақ журналистикасының тарихы» атты еңбегінің заңды жалғасы», – деді «Сыр медиа» серіктестігінің бас директоры.
</blockquote>
Бұл 5 томдық жинақтың ерекшелігі сол, мұнда баспасөз шежіресі ғана емес бүтін бір өңірдің тарихи шежіресі жазылып, жинақталған. Оның ішінде Сыр өңіріндегі журналистика саласының қалыптасуы мен дамуы, бағындырған белестері мен жетістіктері де кеңінен қамтылған. Жинақта «Сталин жолы», «Еңбек майданы», «Сырдария», «Еңбек Туы», «Тереңөзек тынысы» және «Тіршілік тынысы» атауымен аудан жаңалықтарының жаршысына айналған аудандық басылымның тарихы, қайраткер қаламгерлердің өмірі мен шығармашылығы туралы жазылған. Сондықтан «Сыр журналистикасының тарихы» 5 томдығының ауданымыз үшін маңызы ерекше және бұл кітаптың жарыққа шығуы бәріміз үшін зор қуаныш болды.
Кітаптың таныстырылымында редакция ардагерлері С.Тоқсанбаев, М.Қалмұратұлы, С.Ерімбет, Қ.Балшықбаева, Ж.Тасымбаева, Ш.Нұрсейітов өз естеліктерімен бөлісті. Сала ардагерлері кейінгі буын қаламгерлердің еңбегі жемісті болуына тілектестігін жеткізді. Іс-шара соңында ардагерлерге аудан әкімі мен «Сыр медиа» серіктестігі бас директорының арнайы Алғыс хаттары мен «Сыр журналистикасының тарихы» кітабы табысталды.
<img src="https://kyzylorda-news.kz/wp-content/uploads/2022/06/288539582_1143143539581870_419180055564190630_n.jpg" alt="" />
<img src="https://kyzylorda-news.kz/wp-content/uploads/2022/06/288448001_1143143542915203_1431055304644396457_n.jpg" alt="" />
<img src="https://kyzylorda-news.kz/wp-content/uploads/2022/06/288626208_1143143616248529_126662901361912456_n.jpg" alt="" />

Сырдарияда қаламгерлерге құрмет көрсетілді

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазалыда жазушы, Халықаралық «Алаш» әдеби сыйлығының иегері Қуаныш Жиенбайдың 70 жылдық мерейтойына арналған шығармашылық кеш өтті.
Роза Бағланова атындағы мәдениет үйінде өткен «Теңізбен тағдырлас қаламгер» атты шығармашылық кеште ҚР Мәдениет қайраткері. «Құрмет», «Парасат» ордендерінің иегері Қуаныш Жиенбай мен оның жары құрметпен сахна төріне шығарылды.
Шығармашылық кеште аудан әкімі Мұхтар Оразбаев құттықтау сөз сөйлеп, қарымды қаламгердің еліміздің рухани-мәдени өмірінде өзіндік дара қолтаңбасы қалған тұлға екенін атап өтті.
Мұнан соң Қуаныш Әлмұратұлы мен оның жарының иығына қазақы дәстүрмен шапан мен ақ жаулық жауып, сый-құрмет көрсетті.
Мерекелік кеште медицина саласының ардагері, Қазалы ауданының құрметті азаматы Құлпыбай Ысқақов, Қазақстан Журналистер Одағының мүшесі, Қазалы ауданының құрметті азаматы Қасқырбек Мәмбетжан, ҚР мәдениет қайраткері Шаһизада Әбдікәрімов және жазушының қаламдас достары, «Егемен Қазақстан» газетінің тілшісі Сүлеймен Мәмет пен Толыбай Абылаев сөз сөйлеп, жазушыға деген ізгі лебіздерін білдірді.
Сондай-ақ, кеш барысында қазалылық өнер иелері — Оспанова Галя, Жәнібек Құтмаханов, Мұрат Әділ сахнада әннен шашу шашып, күй үнін күмбірлетті.
Шығармашылық кешті ақын, аудандық «Қазалы» газетінің бас редакторы, «Ғани Мұратбаев» сыйлығының иегері Есет Табынбаев әсерлі әңгімелермен өрбітіп, сұрақ қою арқылы жазушының өміріндегі қызықты да қиын сәттерді айтқыза білді. Сондай-ақ, оқырмандар да жазушының шығармашылығына қатысты өз сауалдарын қойып, пікір алмасты.
<img src="https://kyzylorda-news.kz/wp-content/uploads/2022/06/285557910_3380022765551980_5954157002519526298_n.jpg" alt="" />
<img src="https://kyzylorda-news.kz/wp-content/uploads/2022/06/285546566_3380023388885251_4576857202638337706_n.jpg" alt="" />
<img src="https://kyzylorda-news.kz/wp-content/uploads/2022/06/285700890_3380023065551950_1546954455719953414_n.jpg" alt="" />

Қазалыда жазушы Қуаныш Жиенбайдың шығармашылық кеші өтті

<a href="https://kyzylorda-news.kz/">Kyzylorda-news.kz.</a> Қазақстан президенті Қасым-Жомарт Тоқаев қазақ композиторы Шәмші Қалдаяқовқа аса жоғары ерекшелік дәрежесі «Қазақстанның Еңбек ері» атағымен, сондай-ақ орден&nbsp;және&nbsp; төсбелгісімен наградтау туралы жарлыққа қол қойды, деп хабарлайды Ақорда.
<blockquote>
 «Композитор Қалдаяқов Шәмшіге қазақ халқының музыка өнерін дамытудағы&nbsp;еңбегі үшін ерекше атақ «Алтын Жұлдыз» және «Отан» ордендерімен марапаттаумен қатар «Қазақстанның Еңбек ері» атағын беруді ұйғардым», –&nbsp;&nbsp;делінген хабарламада.
</blockquote>
Қаулы қол қойылған күнінен бастап қолданысқа енгізіледі.

Мемлекет басшысы Шәмші Қалдаяқовты «Қазақстанның Еңбек Ері» атағымен марапаттау туралы жарлыққа қол қойды

<a href="https://kyzylorda-news.kz/">Kyzylorda-news.kz.</a> «Айбын-2022» VIII республикалық әскери-патриоттық жастар жиынында Сыр өңірінің намысын қорғайтын «Сыр айбындары» әскери-патриоттық клубы дүбірлі додаға қызу дайындық үстінде.
Әскери-патриоттық жастар жиыны осы жылдың 20-25 маусым аралығында Қарағанды облысындағы Қазақстан Республикасы Қарулы күштерінің «Спасск» оқу орталығында өтеді. Сайысқа Қызылорда облысынан жарыс ережесіне сай 15 оқушы, яғни, 10 ер бала және 5 қыз бала қатысады. Осы жылы жас сарбаздар өздерінің дайындықтарын Қорқыт Ата атындағы Қызылорда университетінің жанындағы әскери кафедраның оқу-жаттығу полигонында далалық жағдайда шыңдауда.
Жастар әскери-қолданбалы спорт түрлерінен, плащ түріндегі жалпы әскери қорғаныс жинағы мен газқағарды уақытқа кию, әскерилендірілген эстафета және АК-74 автоматын бөлшектеу, жинақтау сынды жарыс түрлерінен нормативтерді жоғары дәрежеде орындауға талпынып жатыр.
<blockquote>
 «Республикалық әскери жиында Қызылорда облысының әр аудандары мен Қызылорда қаласынан жиналған талантты жастар бақтарын сынайды. Өтіп жатқан жаттығулардың нәтижелеріне сүйенетін болсақ, дайындығымыз жақсы деуге болады. Аталған жарыстан жеңіспен ораламыз деген ойдамын», – дейді Қызылорда облысының қорғаныс істері жөніндегі департаменті бастығының тәрбие, идеологиялық және әскери-патриоттық жұмыстар жөніндегі орынбасары подполковник Алмат Жақыпов.
</blockquote>
Жыл сайынғы өтетін «Айбын» әскери-патриоттық жастар жиыны еліміздің барлық аймақтарынан келетін жастарға ерік-жігер, намыс, қайрат сыйлайтыны анық.
<img src="https://kyzylorda-news.kz/wp-content/uploads/2022/06/287508828_518994219924714_1733876625131322890_n.jpg" alt="" />
<img src="https://kyzylorda-news.kz/wp-content/uploads/2022/06/287138912_518994116591391_8392438005406775883_n.jpg" alt="" />

«Сыр айбындары» әскери-патриоттық клубы жарысқа сақадай сай

Kyzylorda-news.kz. Тігін өнеркәсібі – елімізде табысы мол кәсіптердің бірі. Сол себептен де қазіргі таңда сұранысқа ие мамандықтардың көшін бастап тұр. Бүгінгі «Үздік түлек» айдарындағы кейіпкеріміз де осы текті өнерге бала кезінен қызығып, тігінші мамандығы бойынша білім алуда.
Ұлбике Дауылбаева – Арал индустриалды- техникалық колледжінің «Арнайы тігінші» мамандығының 4 курс студенті. Ұлбикенің анасы мен әпкесі де осы колледжден білім алып, бүгінде тігіншілікті тұрақты тіршілігі еткен. Шығармашылық отбасында туып өскен ол биыл өзінің сүйікті мамандығы бойынша оқуын аяқтайды.
Ұлбике бүгінде колледж қабырғасында теориялық білімін тәжірибеге ұштастырып, өндірістік оқу шеберінің нұсқауымен жаңа үлгідегі заманауи тігін машиналарымен жұмыс жасап, тігіншіліктің қыр-сырын үйренді. Қазіргі таңда ол Арал қаласындағы «Келжанова» тігін шеберханасында өндірістік тәжірибеден өтіп, мамандығына машықтануда. Соның арқасында Ұлбике ақылы тапсырыстар алып, отбасына қолғабыс етіп келеді.
«Тігіншілік – қол мен қиялдың еңбегі» дегендей, болашақта өзімді жұмыспен қамтамасыз етіп, кәсібімді ашуға мақсат қойып отырмын дейді ол.

Тігіншілік – қол мен қиялдың еңбегі

<a href="https://kyzylorda-news.kz/">Kyzylorda-news.kz.</a>&nbsp; 16 маусым күні облыстағы барлық білім беру ұйымдарында аттестат тапсыру рәсімі өткізіледі. Осыған байланысты мектеп бітіру кешін мейрамханаларда немесе ойын-сауықтық орталықтарда өткізуге қатаң тыйым салынады.
Тиісінше, мектеп бітіру кеші білім ордаларының ауласында қарапайым түрде ұйымдастырылады. Бұл туралы Өңірлік коммуникациялар қызметінде өткен брифингте облыстық білім басқармасының бөлім басшысы Нұрлан Дәулетәлиев мәлімдеді.
Өңірде негізгі орта білім туралы аттестатты алатын, яғни 9 сыныпты бітірушілер саны – 14 543 құраса, оның 1 765-і «Үздік аттестат» иегері. Ал 11 сыныпты бітіруші түлектер саны – 7506 оқушы. Оның 415-і «Алтын белгіге» үміткер болса, 804 оқушы «Үздік аттестат» иегері.
<blockquote>
 «Мектеп бітіруші түлектердің қауіпсіздігін қамтамасыз етуге және құқық бұзушылыққа жол бермеу үшін барлық өткізілетін іс шаралар мектеп ауласында өтеді. Бұл шараға барлық оқушылар мектеп формасымен қатысуға міндетті. Сонымен қатар, мектеп бітіруші түлектердің табиғат аясына немесе су айдындарына баруына болмайтынын ескертеміз. Балалардың қауіпсіздігін қамтамасыз ету үшін медицина қызметкерлері, өрт сөндіру мамандары және ішкі істер органдары жұмылдырылды. Адамдар көп шоғырланатын демалыс орындары мен ойын-сауық орталықтарына мектеп әкімшілігінен құралған кезекшілік топ рейд жұмыстарын жүргізеді. Тағы бір ескертетін жәйт, ата-аналар тарапынан ақша немесе сыйлықтар берілуіне тыйым салынады», – деді облыстық білім басқармасының бөлім басшысы Нұрлан Дәулетәлиев.
</blockquote>
Қоғамдық тәртіпті сақтау мақсатында әрбір білім беру ордаларында 2 полиция департаментінің қызметкері бекітілген. Олар күшейтілген режимде жұмыс істейтін болады.
<blockquote>
 «Ертеңгі болатын аттестат тапсыру рәсімі кезінде қауіпсіздікті барынша сақтауға полиция департаментінің қызметкерлері дайын. Қала ішінде көліктермен автошеру өткізуге болмайтынын ескертеміз. Әсіресе таңды қарсы алу үшін су жағалауларына баруға болмайды. Егер де ескертуге қарамастан құқық бұзушылық орын алған жағдайда мектеп бітіруші түлектердің заңды өкілдеріне әкімшілік шара қаралады», – деді облыстық полиция департаментінің Жергілікті полиция қызметi басқармасы бастығының орынбасары Бақыт Молдабеков.
</blockquote>

Ертең барлық мектептерде аттестат тапсыру рәсімі өтеді

<a href="https://kyzylorda-news.kz/">Kyzylorda-news.kz.</a> Синоптиктер 16-18 маусым күндеріне арналған ауа райы болжамын жариялады.
Алдағы үш тәулікте айтарлықтай өзгерістер күтілмейді. Жекелеген аудандарда күн күркіреп, өткінші жаңбыр жауады, 16 маусымда ҚР шығысында, оңтүстік-шығысында қатты жаңбыр жауады.
Қазақстанның солтүстік және орталық өңірлерінің тұрғындарын, нағыз жазғы ауа райы қуантады. Күндізгі ауа температурасы біртіндеп 25-30 жылуға дейін, ал Қарағанды облысының оңтүстігінде 35 жылуға дейін көтеріледі.

Алдағы күндер ауа райы қандай болады?

<a href="https://kyzylorda-news.kz/">Kyzylorda-news.kz.</a> Қызылорда облысында көктемгі мерзімді әскерге шақыру науқаны жүргізілуде. Биылғы жылдың көктемінде ҚР Қарулы күштері және басқа да әскери құралымдарға 700-ге жуық қызылордалық азамат әскери борышын өтеуге аттанады.
Қазіргі уақытта ҚР ҰҚК Шекара қызметіне 130-ға жуық, ҚР Қарулы күштері қатарына 300-ге жуық азамат жөнелтілді. Бұл жөнінде Өңірлік коммуникациялар қызметінде өткен брифингте Қызылорда облысының қорғаныс істері жөніндегі департамент бастығының орынбасары Алмат Жақыпов хабарлады.
<blockquote>
 «Сыр елінің азаматтарын мерзімді әскери қызметке шақыру барысы жоспарға сәйкес жүргізілуде. Әскерге шақырушылар мен олардың заңды өкілдеріне заңдық талаптар мен міндеттемелер ұдайы түсіндіріліп, облыстық жиын пункті жанынан қоғамдық қабылдау ұйымдастырылады. Облыс әкімдігінің қаулысы негізінде облыстық жиын пункті және темір жол станциясынан сарбаздарды шығарып салу барысында қоғамдық тәртіпті сақтау үшін полиция қызметкерлері жұмылдырылған. Сонымен қатар қала және аудандардарға медициналық комиссиялар толығымен тәжірбиелі мамандармен қамтамасыз етілген», – деді Қызылорда облысының қорғаныс істері жөніндегі департамент бастығының орынбасары Алмат Жақыпов.
</blockquote>

Қызылордадан 700-ге жуық азамат әскерге аттанады

<a href="https://kyzylorda-news.kz/">Kyzylorda-news.kz.</a> Қасым-Жомарт Тоқаев “Қазақстан Республикасы президентінің жанындағы ұлттық құрылтайды құру және Қазақстан Республикасы президентінің кейбір жарлықтарының күші жойылды деп тану” туралы жарлыққа қол қойды.
Өз жарлығымен ол ұлттық құрылтай туралы ережені және оның құрамын бекіту туралы шешім қабылдады.
Қазақстан Республикасы президентінің жанындағы ұлттық құрылтайдың құрамы: 
Төраға – Қазақстан президенті Қасым-Жомарт Тоқаев; 
Төрағаның орынбасары – мемлекеттік кеңесші Ерлан Қарин; 
Төрағаның орынбасары – “Бас редакторлар клубы” республикалық қоғамдық бірлестігінің президенті Бибігүл Жексенбай; 
Хатшы – президент әкімшілігі басшысының орынбасары Аида Балаева.
Сондай-ақ ұлттық құрылтай мүшелерінің арасында ғарышкер Тоқтар Әубәкіров, “Атамекен” ұлттық кәсіпкерлер палатасының басқарма төрағасы Райымбек Баталов, “Ауыл” халықтық-демократиялық патриоттық партиясының төрағасы Әли Бектаев, Ұлттық Ғылым академиясының академигі Асқар Жұмаділдаев, Сенат депутаты Ақылбек Күрішбаев, саясаттанушы Данияр Әшімбаев, блогер Максим Рожин және басқасы бар. Толық тізіммен мына жерден танысуға болады.
Ұлттық құрылтайдың алғашқы отырысы 16 маусымда жаңадан құрылған Ұлытау облысында өтеді.
Еске салсақ, мемлекет басшысы 2022 жылдың 16 наурызында Қазақстан халқына арнаған жолдауында билік пен қоғам арасындағы көпір ретінде ұлттық құрылтай құруды ұсынған болатын.

Президент Ұлттық құрылтай құру туралы жарлыққа қол қойды

<a href="https://kyzylorda-news.kz/">Kyzylorda-news.kz.</a> Қала әкімі Асылбек Шәменовтің төрағалығымен әлеуметтік маңызы бар азық-түлік тауарларының бағасын тұрақтандыру бойынша мәжіліс отырысы өтті. Жиынға қала әкімінің орынбасарлары, салалық басқарма, бөлім басшылары, «Байқоңыр» ӘКК АҚ директоры және сауда орындарының егелері қатысты. Бұл туралы қала әкімдігінің баспасөз қызметі хабарлады.
​Шаһар басшысы азық-түлік бағасының негізсіз өсуіне жол бермеу мақсатында бірлескен іс-қимыл жоспары бекітіліп, тұрақтандыру қоры арқылы сауда орындарына келісім-шарт негізінде қажетті әлеуметтік тауарлардың үздіксіз жеткізіліп отырғанын айтты. Дегенмен, кейбір тауар түрлерінен тапшылық сезілуде. Соның ішінде қантпен қамтамасыз ету күрделі болып отыр. Осыған байланысты елімізде қант зауыттарымен келісім жасалынып, шекердің алғашқы легі өңірімізге келе бастады. Енді ол барлық сауда орындарына теңдей үлестіріліп, бекітілген бағамен босатылатын болады.
​Ас атасы нанның бағасы да біркелкі болуы қажет. Өйткені келген бірінші сұрыпты ұн арзан бағада наубайханаларға жеткізіліп отыр. Ендігі мақсат сол нанның сапасы мен салмағына барынша мән берген жөн.
​Әлеуметтік желіде жиі көтерілетін күріш пен картоптың сапасы да мәжілісте кеңінен талқыланды. «Байқоңыр» ӘКК АҚ басшылығы әкелінетін барлық тауардың сапасы жіті қадағаланатынын, егер күмәнді жағдайлар орын алатын болса, өнім қайтарылатындығын айтты.
​Қала әкімі Асылбек Өмірбекұлы барлық кәсіп иелеріне қымбатшылықты қолдан жасамауды, егер осы тектес деректер орын алатын болса, тиісті шаралар қабылданатындығын жеткізді. Өйткені басты талап халықты қолжетімді бағада сапалы азық-түлікпен қамтамасыз ету. Бұл бағытта мониторинг жұмыстары күнделікті жүргізіліп отырады.
<img src="https://kyzylorda-news.kz/wp-content/uploads/2022/06/286938016_3112577392342331_7265535420712854033_n.jpg" alt="" />

Қазақстан және Қызылорда облысының жаңалықтары