Kyzylorda-news.kz. Биыл Қызылорда облысында 115 нысанның құрылысы жүргізілген. Бұл туралы бүгін ҚР Президенті Жолдауынан туындайтын міндеттер және облыстың әлеуметтік-экономикалық дамуы бойынша атқарылған жұмыстар туралы брифингте Қызылорда облысы әкімінің орынбасары Мархабат Жайымбетов мәлімдеді.
«Биылғы жылдың 11 айының қорытындысымен құрылыс жұмыстарының көлемі 106,4 млрд. теңгеге жетті. Бұл көрсеткіш былтырғы жылдың осы кезеңімен салыстырғанда 121,1 пайызды құрап отыр. Ал тұрғын үйді пайдалануға беру көрсеткіші 604 мың шаршы метрді құрап, өткен жылмен салыстырғанда 106,4 пайызға өсті. Облыста жыл басынан бері 115 нысан құрылысы жүргізілді. Бұл мақсатқа бюджеттен 24,2 млрд. теңге бөлінді. Оның ішінде, білім саласында 12 нысан, денсаулық сақтау саласында 6 нысан, мәдениет саласында 8 нысан, спорт саласында 17 нысан, тұрғын үй құрылысы бойынша 1 422 пәтерді құрайтын 32 тұрғын үй құрылысы жүргізіліп жатыр», - дейді Мархабат Жайымбетов.
Айта кететін жайт, аймақ басшысының қолдауымен өңірде заманауи үлгідегі жаңа әлеуметтік нысандар салу бастамасы сәтті іске асуда.
«Қызылорда қаласы, Сұлтан Бейбарыс көшесінің бойындағы Өнер орталығы мен Неке сарайының құрылысы басталып, келер жылы ел игілігіне берілетін болады. Алдағы 2023 жылға құрылыс жұмыстарының көлемі ауқымды болып отыр. Әлеуметтік нысандар мен тұрғын үй құрылысына мемлекеттік бюджеттен тиісті қаржы бөлінуде. Бұл қаржыға облыс бойынша 128 нысанның құрылысы жүргізіледі», - дейді облыс әкімінің орынбасары.
Айта кетейік, аймақта инженерлік коммуникациялық инфрақұрылым тарту бойынша 38 жоба жүзеге асырылды.
