<a href="https://kyzylorda-news.kz/">Kyzylorda-news.kz.</a>&nbsp;Биыл Қызылорда облысында 92 есірткі қылмысы анықталды. Оның ішінде есірткіні аса ірі мөлшерде сақтаудың – 5, есірткі сатудың – 19, есірткі өсірудің – 13 дерегі тіркелген. Бұл жөнінде Өңірлік коммуникациялар қызметінде өткен брифингте облыстық полиция департаментінің есірткіге қарсы іс-қимыл басқармасы бастығының орынбасары Ардақ Дүненов мәлімдеді.
<blockquote>
 «Есірткі қылмыстарын тергеп-тексеру барысында 20 кг-нан астам марихуана заты тәркіленді. Осыған байланысты 1 маусымнан 31 қазанға дейін республика көлемінде «Қарасора» жедел-профилактикалық іс-шарасы жүргізілуде. Шара барысында қалалар мен ауылдардағы бау-бақшалар, шаруа қожалықтарының аумақтары және облыстың барлық жерлерінде мониторинг арқылы тексерілуде. Сонымен қатар, нашақорлыққа қарсы күрес күніне орай мамыр айының 26-нан маусым айының 26-ы аралығында бір айлық профилактикалық шаралар ұйымдастырылуда. Қазіргі таңда 55-тен астам акция мен сайыс өткізілді», – деді Ардақ Дүненов.
</blockquote>
2021 жылы облыстық психикалық денсаулық орталығына қарасты наркологиялық стационарда 1300-ге жуық азамат емделіп шықты. Өткен жылдың қорытындысы бойынша есірткіге тәуелді 698 адам есепте тұрса, оның 7-і әйел.
<blockquote>
 «Қазіргі таңда наркологиялық стационарда 190 орындық 6 емдеу бөлімі науқастарға медициналық көмек көрсетеді. Бүгінде аймақ бойынша 708 азамат нашақор диагнозымен есепте тұр. Оның ішінде әйел саны – 6. Айта кету керек, орталықтың наркологиялық стационарына қарасты «Ақылы бөлім» қызмет жасайды. Мұнда ем алушылардың жеке мәліметтері құпия түрде сақталып, маскүнемдік пен есірткіге тәуелділігі бар кез келген адам емделе алады», – деді облыстық психикалық денсаулық орталығы директорының орынбасары Аман Тұрсынов.
</blockquote>

Қызылордада биыл 92 есірткі қылмысы анықталды

<a href="https://kyzylorda-news.kz/">Kyzylorda-news.kz.</a> Қызылорда қаласындағы №1 Халыққа қызмет көрсету орталығы 2022 жылдың шілде айынан бастап сенбі күні жұмыс істейді.
Әр сенбі сағат 9:00-ден 13:00-ге дейін клиенттерге қызмет көрсетеді.
Қазіргі уақытта ХҚКО-да көрсетілетін қызметтің көбін электронды түрде алу мүмкіндігі бар.

ХҚКО сенбі күні жұмыс істейді

<a href="https://kyzylorda-news.kz/">Kyzylorda-news.kz.</a> Егін егу маусымы басталар алдында облыс әкімі Нұрлыбек Нәлібаев азық-түлік қорын көбейту және сырттан алатын өнімдерге деген тәуелділікті азайту үшін әр аудан, қаладағы ауылдарда егін егуге арнайы жер дайындауды және бақша дақылдарын егуді тапсырған еді. Нәтижесінде, аймақта 1454 гектар жер көлемі дайындалды. Қазалы ауданына сапары барысында Ақжона ауылдық округіндегі егістік алқабына барды.
Бақша дақылдарын егумен айналысатын шаруалармен кездесіп, егін мәселесінде пікірлесті.
Облыс әкімі қазіргі кезде егісті әртараптандырудың маңызды екенін және әр ауылдың өзіндік ерекшелігін ескере келе, өнімділікті көбейту қажеттігін баса айтты. Сондай-ақ, арналарға су жеткізу, насос қондырғыларын уақытылы алу мәселесін жеделдетуді тапсырды.
Айта кетейік, Қазалы ауданында егін шаруашылығын әртараптандыру бағытында 114 гектар жер бөлініп, 228 отбасына үлестірілді. Оның ішінде 30 гектар картоп, 70 гектар көкөніс, 14 гектар бақша дақылдары орналастырылатын болады.
Майдакөл ауылы тұрғындарына бау-бақша көкөністерін егу үшін Бекарыстан би және Түктібаев аралығындағы тас жолдың бойындағы Құлпыбай учаскесінен бау-бақша егу үшін 30 гектар және Қурайлы, Бозарық каналы бойынан 20 гектар, Жаңаталап учаскесінен 20 гектар жер учаскелері бөлінген. Мұнда шаруалар қауын, қарбыз, картоп өнімдерін егеді.
<img src="https://kyzylorda-news.kz/wp-content/uploads/2022/06/289975959_329335296054388_8545146293507063133_n.jpg" alt="" />

Қазалыда егін шаруашылығын әртараптандыруға 114 гектар жер бөлінді

<a href="https://kyzylorda-news.kz/">Kyzylorda-news.kz.</a> «ҚазТрансГаз Аймақ» АҚ Қызылорда өндірістік филиалы алдағы жылыту маусымына нысандарды дайындау барысымен таныстыру үшін журналистерге арналған пресс-тур өткізді.
Газ саласының алдағы жылыту маусымына деген дайындық жұмыстары «QazaqGaz» ҰК» АҚ басшылығының ерекше бақылауында, сондықтан алдағы күзгі-қысқы кезеңге дайындық өткен жылыту маусымы аяқтала сала басталды.
«ҚазТрансГаз Аймақ» АҚ Қызылорда өндірістік филиалы облыс бойынша 2 336 км газ құбыры мен құбыр бойындағы нысандардың қалыпты жұмыс істеуіне жауапты.
«ҚазТрансГаз Аймақ» АҚ Қызылорда өндірістік филиалы директорының бірінші орынбасары Жайық Әлішевтің айтуынша, бүгінге дейін күзгі-қысқы кезеңге дайындық жоспары 56% – ға орындалған.
<blockquote>
 «Осы дайындық жұмыстары толық аяқталған соң облыстағы 125 284 абонент алдағы жылыту маусымында алаңсыз газ тұтына алады. Бүгінгі күні ескірген, қисайған, майысқан құбырларды жөндеп, сыры кеткен жерлерін қайта бояудан бастап, жер үстіндегі және жерасты газ желілерінің тұтастығын тексеру және жөндеу, газ құбырларындағы жабдықтың жай-күйін зерттеу мен ауыстыру сияқты техникалық жұмыстардың 21 түрі орындалып жатыр», – деді Ж.Әлішев.
</blockquote>
Бұдан бөлек, газға қатысты түрлі апаттық жағдай орын ала қалса, тиісті мамандардың қалай қимылдау керектігі бөлек пысықталуда. Бұл орайда техника мен газ мамандарының жұмыстарды орындауға дайындығын тексеру мақсатында арнайы оқу – жаттығу сабақтары өткізілді.
<blockquote>
 «Жылыту маусымына дайындық жұмыстарының жоспары кестеден ерте орындалып келеді. Техникалық жұмыстардан бөлек, облыс әкімдігінің тапсырысы бойынша салынып жатқан газ құбырларына да лайықты бақылау жүргізіліп келеді. Биыл жыл соңына дейін облыстағы тағы 5 елдімекенге газ жеткізіледі. Оларға көгілдір отынды апаратын газ құбырларының құрылысына «ҚазТрансГаз Аймақ» АҚ Қызылорда өндірістік филиалы тиісті бақылау жасауда. Бұл – жұмыстың сапалы жасалыуына септігін тигізбек», – деді ҚӨФ өндірістік-техникалық бөлімінің басшысы Нұрлан Құрманбаев.
</blockquote>
Газ мамандары жоспарлы жұмыстан бөлек, газ бен газ жабдықтарын пайдалануда қауыпсіздік шараларын сақтау керектігін үнемі ескертіп отырады. Филиал мамандары елдімекен көшелерін күнделікті аралап, газ қауіпсіздігі туралы жадынамаларды үй-үйге таратады. Бұл жұмыс өте ауқымды болғанымен, абоненттерге жадынама беру арқылы, газ тұтынуды қауыпсіз етуге көмектеседі.
<img src="https://kyzylorda-news.kz/wp-content/uploads/2022/06/290079510_1317336792124806_3690101779114144005_n.jpg" alt="" />

Жайық Әлішев: Газ құбырлары тексеруден өткізіліп жатыр

<a href="https://kyzylorda-news.kz/">Kyzylorda-news.kz.</a> Қазақстан журналистерінің кәсіби мерекесі қарсаңында Назарбаев Зияткерлік мектептерінде бастау алған медиамарафонға Сыр өңіріндегі журналистер қосылды.
Қызылордадағы NIS-тің бастамасымен ұйымдастырылған тимбилдингте бұқаралық ақпарат құралдарының өкілдері «Туған елге тағзым» өлкетану-зерттеу экспедициясының оқушыларымен бірге топтық ойындарда сайысқа түсті. Командалық тапсырмаларды орындау барысында қатысушылар бойында достық, ауызбіршілік секілді құндылықтар анық байқалып, көтеріңкі көңіл-күйде уақытты тиімді өткізді.
<blockquote>
 «Бұл шарада маған ерекше әсер қалдырды. Тапсырмалар жеңіл көрінгенімен тобымызды ширатты. Бос қауашақтардан қамал тұрғызып, шеңбердің ішінен өтіп, қиындықтарды бірге еңсердік. Бірге ән салып, би билеп, бір сәт жұмыстан қол үзіп, ойымыз да, бойымыз да сергіп қалды», – дейді «Сыр бойы» облыстық газетінің тілшісі Гүлбану Мақажан.
</blockquote>
Достықты ту еткен белсенді ойындар әрі қарай салтанатты шарамен жалғасты. Мектеп директоры Бахыт Жұматай бұқаралық ақпарат құралдарының қоғамдағы рөлін атап өтіп, кәсіби мерекемен құттықтады.
Әрқашан қоғамдық ахуалдың шебінде жүріп, халықты маңызды ақпаратпен қамтамасыз етіп, NIS жетістігі мен оқушылардың табысты еңбектерін жан-жақты насихаттауға қосқан ерекше үлесі үшін аймақтағы бірқатар БАҚ өкілдері мектеп директорының Алғыс хатымен марапатталды.
Сонымен қатар жыл ішінде 20-ға жуық зияткер шәкірттермен сұхбат жүргізіп, кең көлемді материал дайындаған мектептің бірнеше жылдан бергі досы – «Ақмешіт жастары» газетінің тілшісі Гүлдана Жұмадиноваға «Назарбаев Зияткерлік мектептері» ДББҰ-ның басқарма төрағасының атынан Алғыс жарияланды.
Мектеппен үнемі байланыста болып, ақпарат айдынында ынтымақтастықта жұмыс жасайтын «Өңірлік коммуникациялар қызметі» мемлекеттік мекемесі, Қызылорда облыстық қоғамдық даму басқармасы мен «Достық үйі» мемлекеттік мекемесінің қызметкерлеріне құрмет көрсетіліп, мектеп оқушыларының қолынан шыққан арнайы сыйлықтар табысталды.
<img src="https://kyzylorda-news.kz/wp-content/uploads/2022/06/dsc_3738-scaled.jpg" alt="" />
<img src="https://kyzylorda-news.kz/wp-content/uploads/2022/06/dsc_3295-scaled.jpg" alt="" />
<img src="https://kyzylorda-news.kz/wp-content/uploads/2022/06/dsc_3517-scaled.jpg" alt="" />
<img src="https://kyzylorda-news.kz/wp-content/uploads/2022/06/dsc_3524-scaled.jpg" alt="" />
<img src="https://kyzylorda-news.kz/wp-content/uploads/2022/06/dsc_3710-scaled.jpg" alt="" />

Медиамарафон: Достықты ту еткен тимбилдинг

<a href="https://kyzylorda-news.kz/">Kyzylorda-news.kz.</a> Аймақ басшысының алдағы жылу беру маусымын іркіліссіз өткізу тапсырмасын орындау мақсатында бүгін облыс әкімінің орынбасары Мархабат Жайымбетовтың төрағалығымен арнайы жиын өтті.
Жиын барысында «Қызылордажылуэлектрорталығы» мекемесінің қаржы-шаруашылық жағдайы және алдағы жылу маусымына дайындығы талқыланды.
«Қызылордажылуэлектрорталығы» облысымыздағы электр және жылумен қамтамасыз ететін жалғыз кәсіпорын. Бәрімізге орталықтың негізгі және қосалқы қондырғыларының тозығы жеткені белгілі. Дегенмен өткен жылу беру маусымында технологиялық бұзушылықтар мен тоқтаулар орын алған жоқ.
Алдағы уақытта өңірімізді сенімді сапалы жылу және электрмен қамтамсыз ету мақсатында ауқымды жобаларды іске асыру жоспарлануда.
Қазақстан Республикасы Энергетика министрлігі мен «Қызылордажылуэлектрорталығы» МКК арасында 2021-2030 жылдарға арналған жылу орталығын қайта жаңғырту туралы келісімге қол қойылды. Инвестициялық бағдарлама аясында 3 газтурбиналық қондырғыны ауыстыру арқылы КОГТЭС-ті жаңғырту қарастырылған.
Сонымен қатар, Президенттің тапсырмасына сәйкес еліміздің оңтүстігінде маневрлік қуаттар мәселесін шешу үшін Қызылорда қаласында осы жылуэлектрорталығының аумағында қуаттылығы 240 МВт бу-газ қондырғысын салу жоспарлануда. Жоба инвесторлар қаражат есебінен іске асырылады. Іске асыру мезімі 2025 жыл.
Отырыста кәсіпорын басшысы Медет Усаинның есебі тыңдалды. Жиын барысында Мархабат Жайымбетов компанияның жұмысына оның техникалық, қаржылық-шаруашылық жағдайына қатысты өзекті мәселелерді тілге тиек етті.
Атап айтқанда, кәсіпорын пайдалануындағы жылу желілерінің нормативті сыраптары өте жоғары екендігін, жалпы дебиторлық және кредиторлық қарыздарын төмендету, Еуропалық даму банкінен, «Нурлы жол» бағдарламасымен алынған қарызды мерзімінде қайтару бойынша мәселелерге тоқталды. Сонымен қатар, жылу беру маусымы басталғанда дейін көпқабатты тұрғын үйлердің дайындық жұмыстарын толығымен аяқтауға қала әкімдігіне тапсырма берілді.
Мархабат Жайымбетұлы кәсіпорындар арасындағы қарыздарды өтеуге жауапкершілікпен қарауды тапсырып, оның алдағы жылу беру маусымының тұрақты өтуіне тікелей қатысты екендігін айтты. 
Жиын қорытындысы бойынша облыс әкімінің орынбасары қала әкімінің орынбасарына және коммуналдық мекемелер басшыларына нақты тапсырмалар жүктеп, олардың орындалу уақытын қатаң бақылауда ұстауды тапсырды.
<img src="https://kyzylorda-news.kz/wp-content/uploads/2022/06/290292187_1317318248793327_1246671964518716062_n.jpg" alt="" />
<img src="https://kyzylorda-news.kz/wp-content/uploads/2022/06/290296689_1317320655459753_5182272565675282257_n.jpg" alt="" />

Қызылорда облысының жылу беру маусымына дайындығы пысықталды

<a href="https://kyzylorda-news.kz/">Kyzylorda-news.kz.</a>&nbsp;Қорқыт ата атындағы Қызылорда университетінде Ахмет Байтұрсынұлының 150 жылдығына арналған «Алаш қайраткерлерінің Қызылорда кезеңі және А.Байтұрсынұлы» атты халықаралық ғылыми- тәжірибелік конференция өтті.
Жиынға шетелдік және отандық ғалымдар, университеттің профессор-оқытушылар құрамы мен қызметкерлері қатысты. Сонымен қатар, Zoom платформасы арқылы да баяндамалар оқылып, тікелей эфирде ел назарына ұсынылды.
Конференцияны Қорқыт ата атындағы Қызылорда университетінің Басқарма Төрағасы – Ректоры Бейбіткүл Кәрімова жүргізіп, қазақ елінің жарқын болашағы үшін күрескен Алаш арыстарының еңбегі туралы кеңінен атап өтті.
<blockquote>
 «Алаш арыстары өз халқының алдында перзенттік парызын адал атқарған тұлғалар. Алаштық ұстаным қашанда елдің өсуі мен өркендеуінің қайнар бұлағы. Әрдайым солай болып қала береді. 
 1918 -1920 жылдары егеменді сыртқы саясатын жүзеге асырған Алаш Орда үкіметі қызмет еткені белгілі. Жақында көрнекті Алаш қайраткері Райымжан Мәрсековтің 1919 жылғы қаңтарда Алаш Орда үкіметінің атынан Жапон үкіметіне «егеменді Алаш республикасын мойындау, екіжақты қарым-қатынас орнату және жас Қазақ мемлекетіне көмек беруді» өтінген хаты табылды. Хатта сонымен қатар, Алаш Орданың Ұлттар лигасының жарғысы талқыланатын Париждегі бейбіт конференцияға өз өкілін жолдамақ жоспары айтылған. Тұңғыш мәжілісі 1920 жылдың қаңтарында өткізілген Париж конференциясына Алаш Орданың өкілі ретінде Мұстафа Шоқай қатысқан», – деді Бейбіткүл Сәрсемханқызы.
</blockquote>
Жиында ұлт ұстазы, қазақ тіл білімі мен әдебиеттану ғылымының негізін салушы ғалым, ұлттық жазудың реформаторы, түркітанушы, публицист, аудармашы, ақын, қоғам және мемлекет қайраткері, ағартушы, Алаш арысы Ахмет Байтұрсынұлының өмір жолы мен еңбектері туралы кеңінен айтылды. Ғалымдар «Ахмет Байтұрсынұлы және Алаш мұрасы», «Алаш қайраткерлерінің Қызылорда кезеңі», «Ахмет Байтұрсынұлының түркологияға қосқан үлесі», «Ахмет Байтұрсынұлының әдебиеттану ғылымындағы орны», «Ахмет Байтұрсынұлының тіл білімі ғылымындағы орны» бағыттары бойынша баяндамалар жасады.
Конференцияда тіл білімінің мамандары қазақ тілінің қолданылуы аясы, әліпби туралы да сөз қозғады. Айталық, Қорқыт ата атындағы Қызылорда университетінің Қазақ тілі мен әдебиеті және журналистика кафедрасының доценті Болат Боранбай «Жазу мен сөйлеу тек тілші әдебиетшіге ғана емес барлық адамдарға керек. Оқушыны сол дұрыс сөйлеу мен жазуға үйрететін пән – Қазақ тілі. Сондықтан қазақ тілінің сағат саны әдебиеттен көп болу керек» деген пікірін білдірді.
Айта кету керек, жиынға ҚР ҰҒА академигі, филология ғылымдарының докторы, Л.Гумилев атындағы Евразия ұлттық университетінің профессоры Шерубай Құрманбайұлы, филология ғылымдарының докторы, профессор, М.Әуезов атындағы Әдебиет және өнер институтының бөлім меңгерушісі Айгүл Ісмақова, филология ғылымдарының докторы, Қажы Байрам университетінің профессоры Хулия Касапоглу, тарих ғылымдарының докторы, Қ.А.Ясауи атындағы Халықаралық қазақ-түрік университетінің профессоры Тұрсұн Хазіретәлі, филология ғылымдарының докторы, тарих ғылымдарының кандидаты, профессор, Қорқыт ата атындағы Қызылорда университетінің Гуманитарлық-педагогикалық институтының директоры Сағат Тайман қатысты.
Шара барысында Алаш қайраткерлерінің Қызылорда кезеңі және Ахмет Байтұрсынұлы туралы зерттеу еңбектері жинақталған кітап көрмесі таныстырылды.
<img src="https://kyzylorda-news.kz/wp-content/uploads/2022/06/p1922341-scaled.jpg" alt="" />

Ахмет Байтұрсынұлының 150 жылдығына арналған халықаралық конференция өтті

<a href="https://kyzylorda-news.kz/">Kyzylorda-news.kz.</a>&nbsp;Сыр өңірінде жастар жұмыссыздығын төмендетіп, кәсіпкерлікті дамытуға айырықша мән беріліп жатыр, деп хабарлайды «<a href="https://24.kz/kz/zha-aly-tar/o-am/item/551573-yzylordada-rylys-salasynda-maman-tapshy">Хабар 24</a>».
Еңбек нарығына қажетті мамандықтарды жастарға таныстыратын «Мүмкіндіктер керуені» жыл басынан бері үшінші рет өтіп, 600-дей тұрақты және маусымдық жұмыс түрі ұсынылды. Шарада жоғарғы және орта арнаулы оқу орнын бітірген түлектерге арналған «Дипломмен ауылға», «Бизнес-Бастау» секілді мемлекеттік бағдарламалардың бағыттары таныстырылды. Сондай-ақ жас отбасылар тұрғын-үй алу мүмкіндіктері туралы мағлұматқа алды. Жәрмеңкеде адвокат, сот орындаушы және полиция қызметкерлері құқықтық кеңес берсе, дәрігерлер алдын ала тіркелусіз медициналық тексерістен өткізді. Жасөспірімдер жағы тегін үйірмелер мен тілдік курстарға жазылуға ынта білдірді. Мүмкіндіктер керуенінде 19 мекеме өкілі 200-дей жұмысшы таппай жүргенін айтады. Өзге өңірлерден шараға онлайн түрде қатысқан 23 жұмыс беруші де 400-ге жуық маман қажет екенін алға тартты.
<blockquote>
 «Қала іргесінде ашылып жатқан шыны зауыты бар. Соған осы кезде жұмысқа қабылдау жүргізіліп жатыр. Жеке мекемелер, ЖШС, жеке кәсіпкерлер санатынан да жәрмеңкеге бос жұмыс орындарын беруде», – дейді қалалық жұмыспен қамту орталығының бөлім басшысы Абылай Самұратов.
</blockquote>

Қызылордада құрылыс саласында маман тапшы

<a href="https://kyzylorda-news.kz/">Kyzylorda-news.kz.</a>&nbsp;25-27 маусымына арналған ауа райы болжамы жарияланды.
Солтүстік-батыс циклонының терең жырасы және онымен байланысты фронтальді бұлттылық алқаптары, өзімен бірге қысқа мерзімді жаңбыр, найзағай, қатты жел мен бұршақты ала келеді. Тек еліміздің батыс және солтүстік-батыс өңірлері ғана скандинавиялық антициклон жотасының әсерін сезінеді. Осылайша бұлт саны азайып, жаңбыр тоқтайды. Оңтүстікте шаңды дауыл күтіледі.
Ауа температурасының негізгі аясы күндіз келесідей күтіледі: батыста +25, +35С, солтүстікте +25, +33С, орталықта +30, +37С, шығыста +27, +37С, оңтүстікте өте қатты ыстық – +40+45С.

Демалыс күндерге арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp;Талантты жастарды танытатын «Дарын» мемлекеттік жастар сыйлығына байқау басталды. Байқауға өтініш қабылдау 10 тамызға дейін жалғасады. «Дарын» жастар сыйлығын алуға кандидатураларды ұсынуды мемлекеттiк органдар және қоғамдық бiрлестiктердің өкілдері жүргiзедi. Бүл туралы Өңірлік коммуникациялар қызметінде өткен брифингте облыстық «Жастар ресурстық орталығы» КММ директоры Мақсат Дауылбай хабарлады.
<blockquote>
 «Дарын» мемлекеттік жастар сыйлығы – ғылым мен шығармашылықты ұштастыра білген, қоғамдық қызметте жемісті еңбегімен көзге түскен, спортты жанына серік еткен дарынды жастарды мемлекет тарапынан қолдау мақсатында ұйымдастырылады. Байқау «Әдебиет», «Ғылым» , «Дизайн және бейнелеу өнері», «Журналистика», «Классикалық музыка», «Қоғамдық қызмет», «Спорт», «Театр және кино», «Эстрада», «Халық шығармашылығы» атты 10 номинация бойынша өтеді. Бұл ауқымды байқауға 29 жасқа дейінгі халықаралық, республикалық конкурстардың жүлдегелері және қоғамды дамытуға өзіндік үлес қосқан азаматтар үміткер бола алады. Жеңімпаздарға ҚР Үкіметінің қаулысымен «Дарын» мемлекеттік жастар сыйлығының лауреаты атағы беріліп, диплом және төсбелгілермен марапатталады. Сыр елінің дарынды жастары бұл байқауда жеңімпаз болатынына сенімдімін», – деді Мақсат Дауылбайұлы.
</blockquote>
Биыл Мемлекет басшысы тағайындаған «Тәуелсіздік ұрпақтары» конкурсына 30 грант беріледі. Әрбір грантқа 3 млн. теңгеден астам қаржы ұсынылған.
2021 жылы «Тәуелсіздік ұрпақтары» грантының жеңімпазы Айсана Намурадин байқау барысын баяндады.
<blockquote>
 «Ұстаздық пен қоғамдық салада белсенділік танытып, түрлі байқауларда жетістіктерге жетіп келемін. Ең үлкен жетістігім Мемлекет басшысы Қ.Тоқаевтың қолынан «Тәуелсізік ұрпақтары» грантының «Медиа» бағыты бойынша марапатталғаным. Бұл грант мемлекет тарапынан еліміздің өркендеуіне өз үлесін қосып жүрген белсенді жастарға қолдау деп білемін», – деді Айсана Намурадин.
</blockquote>

«Дарын» мемлекеттік жастар сыйлығына байқау жарияланды

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев Қазалы ауданына жұмыс сапарымен барып, жаңа үлгідегі 250 орындық емхананың ашылу салтанатына қатысты.
Аймақ басшысы тұрғындарды жаңа емхананың ашылуымен құттықтап, ауданға қажетті нысандарды салу алдағы уақытта да жалғасын табатынын жеткізді.
<blockquote>
 “Бүгін сіздермен көптен күткен ауысымына 250 келушіге арналған аудандық емхананың ашылу салтанатында жүздесіп отырмыз. 
 Бұл – тек қазалылықтар үшін ғана емес, барша облыс халқы үшін аса маңызды жаңалық. 
 Жаңа аурухана науқастарға сапалы, жоғары технологиялық медициналық көмек көрсету үшін заманауи медициналық техникамен, құралдармен жабдықталған. 
 Ресейден «Ангиограф» медициналық аппараты алынып, орнатылды. Бұл коронарография жасайтын аппарат аудандар ішінде тек Қазалыда ғана бар. 
 Бұның барлығы сіздердің сапалы дәрігерлік көмек алуларыңыз үшін жасалған игі істер”, – деді аймақ басшысы.
</blockquote>
Іс-шарада «РЗА» акционерлік қоғамының президенті, Қызылорда облысының құрметті азаматы Самұрат Имандосов жерлестерін құттықтап, жылы лебізін білдірді.
Облыс әкімі емхананың 1 қабаттағы орналасқан медициналық кабинеттердің жұмыстарымен танысты. «Жасыл дәлізден» өтіп, балалар бөлімін аралап шықты және рентген, флюрография, маммография және ФГДС кабинеттерінің жұмыстарымен танысып шығады.
Айта кетейік, емхана құрамында қабылдау бөлімі, педиатрия, жұқпалы аурулар бөлімі, рентгендік диагностикалық бөлім, ортопедия және бронхоскопия, УДЗ кабинеті сынды бөлімдерде білікті дәрігерлер мен тәжірибелі мейірбикелер қызмет көрсететін болады.
<img src="https://kyzylorda-news.kz/wp-content/uploads/2022/06/poliklinika1.jpg" alt="" />
<img src="https://kyzylorda-news.kz/wp-content/uploads/2022/06/poliklinika2.jpg" alt="" />

Қазалы ауданында 250 орындық емхана ашылды

<a href="https://kyzylorda-news.kz/">Kyzylorda-news.kz.</a> Мектеп мұғалімдеріне еңбек демалысының ақысы мен денсаулықты сауықтыру жәрдемақысын уақтылы төлемеу мәселесі «AMANAT» партиясы жанындағы Білім беру және денсаулық сақтау мәселелері жөніндегі республикалық қоғамдық кеңестің кезектен тыс отырысында қаралды.
«AMANAT» партиясының Хатшысы Жігер Қалиевтің айтуынша, орын алып отырған жағдай мемлекеттің педагогтарды қолдау үшін жұмсаған бар күш-жігерін зая кетіреді.
<blockquote>
 «Мәжіліс депутаттары мен партияның аймақтардағы қоғамдық қабылдау бөлмелеріне мектеп мұғалімдерінен еңбек демалысының ақысы мен сауықтыру жәрдемақысының толық және уақтылы төленбеу фактілері бойынша көптеген шағым келіп түсті. Партия мүшелерінің 30%-дан астамы – білім беру саласының өкілдері. Сондықтан бүгін біз партия алаңына өкілетті министрліктердің өкілдерін шақырдық және бейнеконференця байланысы арқылы барлық өңір қосылып отыр», – деді Жігер Қалиев.
</blockquote>
Бейнеконференця байланысы арқылы өткен жиынға өңірден партияның облыстық филиалының Атқарушы хатшысы Ләйлә Төрешова, партияның облыстық филиалы жанындағы «Білім беру және денсаулық сақтау» мәселелері жөніндегі қоғамдық кеңес төрағасының орынбасары Гүлнар Есқалиева және облыстық білім басқармасының басшысы Ділда Момбек қатысты.
Алқалы жиында мәселенің түп-тамырына үңіліп, оны жүйелі түрде шешу жолдары жан –жақты талқыланды.
<img src="https://kyzylorda-news.kz/wp-content/uploads/2022/06/2a785b7d-67b0-4b87-b272-75de29dafe22.jpg" alt="" />
<img src="https://kyzylorda-news.kz/wp-content/uploads/2022/06/3a8761a7-5499-4e55-91e7-d477c070ce6c.jpg" alt="" />

Қазақстан және Қызылорда облысының жаңалықтары