<a href="https://kyzylorda-news.kz/">Kyzylorda-news.kz.</a> Жалағаш аудандық ішкі саясат бөлімінің әлеуметтік тапсырысы аясында «QAZAQSTAN JASTARY» қоғамдық қорының және аудандық дене шынықтыру және спорт бөлімінің ұйымдастыруымен жастарға патриоттық тәрбие беру, және азаматтық белсенділігін арттыруға бағытталған әлеуметтік қызметі жобасы аясында бүгін Жалағаш кентінің орталық стадионында аудандық дене шынықтыру және спорт бөлімі «Наркескен» спорт клубының 10 жылдығы және спорт күні мерекесіне орай, 80-100 келі салмақ дәрежесінде «Үздік балуандар» бақ сынасты.
Жарысқа облыс көлемінен 30-ға жуық балуан қатысып бағын сынады. Аталған балуандар бәсекесін тамашалауға аудан әкімі Асқарбек Есжанов қатысты.
Боз кілемде белдескен сайысқа қатысушылардың қай-қайсысы болмасын өз деңгейлерінде сапалы күрес өрнегін көрсетіп, көрермендердің ыстық ықыласына бөленді.
Сайыс қортындысында 80 кг салмақта жүлделі бірінші орынды қазақ күресінен «Ақ бидай» республикалық ауыл спорты ойындарының жеңімпазы, дзюдо күресінен жастар арасында және ересектер арасында Қазақстан чемпионы Жалағаш ауданынан Ақылбек Серік, екінші орынды жастар арасында Азия чемпионатының күміс жүлдегері, қазақ, самбо, дзюдо күресінен спорт шебері қармақшылық Ерлан Жақсыбеков, жүлделі үшінші орынды дзюдодан 23 жасқа дейін Қазақстан Республикасының чемпионы, спорт шебері, Жалағаш ауданы Мәдиениет ауылының тумасы Айғали Қалдыбек қанжығасына байлады.
Сонымен қатар 100 кг салмақ бойынша бірінші орынды қазақ күресінен Азия чемпионатының қола жүлдегері, дзюдо, самбо, қазақ күресінен спорт шебері жалағаштық спортшы Жайдарбай Есенов, екінші орынды белбеу күресінен Қазақстан Республикасының спорт шебері Ақсу аулынынан келген Ұласқан Алпысбай иеленсе, үшінші орынды жастар арасында Азия чемпионы, ересектер арасында Қазақстан Республикасының чемпионы Қызылорда қаласынан келген Саламат Жұрқабаев еншіледі.
Жеңімпаздар ақшалай сыйлықтармен, арнайы белбеумен және аудан әкімінің алғыс хаттарымен марапатталды. Кез келген балуан буырқанып, құдіретін ұғар боз кілемнің байрақты бәсекесімен спорт мерекесіне арналған сайыстар өз мәресіне жетті.
Сондай-ақ ауданда бүгін спорт саласының үздіктері марапатталды.
Аудан әкімі Асқарбек Есжановтың қатысуымен аудандық мәдениет үйінде спорт күніне орай салтанатты шара өтті.
Салтанатты шарада аудан спортының дамуына үлес қосып жүрген спортшылар, сала ардагерлері, қызметкерлер арнайы аудан әкімінің алғысымен, құттықтауымен марапатталды.
Олардың қатарында спорт саласының ардагері Қуандық Ахметов, «Дене шынықтыру мен спортты дамытуға қосқан үлесі үшін» медалімен және «Үздік дене шынықтыру пәні мұғалімі» төсбелгісімен марапатталған №13 ОРМБЖМ жаттықтырушысы Ләззат Әбдіхалықова, Белбеу күресінен Жастар арасында әлем чемпионы Нұртас Алиса, Францияның Нормандия қаласында өткен жазғы бүкіл әлемдік гимназиада ойындарының чемпионы Нұрдәулет Маратұлы, әлем және Азия чемпионаттарының жүлдегері Жұмабек Альсина, шәкірттері облыстық, республикалық жарыстардың жеңімпазы Жанқожа Қаниевтер бар.
Салтанатты шара спорт күніне орай дайындалған аудандық мәдениет үйінің өнерпаздарының концертімен қорытындыланды.
<img src="https://kyzylorda-news.kz/wp-content/uploads/2022/08/300641076_1518069525311787_787494048173405056_n.jpg" alt="" />
<img src="https://kyzylorda-news.kz/wp-content/uploads/2022/08/300350075_1518069498645123_8782498368271982244_n.jpg" alt="" />
<img src="https://kyzylorda-news.kz/wp-content/uploads/2022/08/300239923_1518069821978424_4897436594300400931_n.jpg" alt="" />
<img src="https://kyzylorda-news.kz/wp-content/uploads/2022/08/300363780_1518091868642886_1661118484219766072_n.jpg" alt="" />
<img src="https://kyzylorda-news.kz/wp-content/uploads/2022/08/300775811_1518092045309535_73190729884501275_n.jpg" alt="" />
<img src="https://kyzylorda-news.kz/wp-content/uploads/2022/08/300397097_1518091905309549_381155753751549689_n.jpg" alt="" />
<img src="https://kyzylorda-news.kz/wp-content/uploads/2022/08/300228715_1518091911976215_3477819021349921635_n.jpg" alt="" />

Жалағаш ауданында спорт күні аталып өтті

<a href="https://kyzylorda-news.kz/">Kyzylorda-news.kz.</a>&nbsp;Бүгінгі таңда өмірімізді тұрақты ақпарат көздерінің бірі болып табылатын телевизиясыз елестету қиын. Телехабар тарату уақыт талабымен болатын жаһандық өзгерістер қарсаңында тұр. Бұл телехабар тарату саласының келбетін толығымен өзгертеді. Енді ешқашан бұрынғыдай болмайды.
Мұны әрбір қазақстандық азаматсезінетін болады. Заманауи өркениет жаңалықтарын қабылдап, өміріңізді ыңғайлы әрі «озық» етесіз бе,әлде тым жылдам дамып жатқан технологиялық прогресстен бойыңызды аулақ ұстап, технологияның қазіргі тенденциясын жоққа шығаруға тырысасыз ба?! Барлық жаңа нәрсе адамзатқа нақты пайда әкелмейінше,қашан да қорқыныш пен сенімсіздік тудырады.
Аналогты телехабар таратуды цифрға ауыстыру – бұл әлемдік процесс, оның ішінде Қазақстан да «цифрлық» кеңістікті қарқынды игеруде. 2012 жылдан бастап ел халқының 87%-дан астамы телевизиялық digital-пішімге көшті.
Қазақстандықтар «цифрға» сенім білдіруде,мұны түсіндіруге болады. Бірақ олар туралы айтпас бұрын, аналогты хабар тарату жүйесінің неліктен күні біткенінің себебін анықтау керек.
Аналогты сигнал сыртқы әсерлерге өте осал, кейде ол аяқасты жоғалып кетуі мүмкін, оны антенаның көмегімен немесе провайдердің телевизиялық кәбілін пайдаланып ұстап алуға болады. Мұндай телевизияның кемшілігі – сигналдың кедергіге әлсіздігі кескінмен дыбыс сапасының нашарлауына әкеледі. Нашар ауа-райында – жел, жаңбыр, найзағай кезінде сигнал нашарлап, көрермен суретті кедергілермен, бұрмаланған дыбыспен немесе мүлдем дыбыссыз алады. Хабар тарату сапасына телестанцияның алыстығы да әсер етеді. Сигнал көзі мен баратын жер арасындағы арақашықтық неғұрлым алыс болса, соғұрлым оның сапасы нашарлайды.
Бұрын аналогты телевизияцифрлық телехабар тарату пайда болғанға дейін телевизиялықкескін мен дыбысты таратудың жалғыз әдісі болатын. Цифрлық хабар тарату аналогқа қарағанда әлдеқайда ұзақ қашықтыққа қабылданатын қорғаныс пен сигналдың жоғары деңгейіне ие. Цифрлық сигнал кедергіге төзімді және көрермендерге өзінің бастапқы түрінде, шу мен бұрмаланусыз, тіпті ең қашық елді мекендерге де жете алады.
Цифрлық телевизиялық хабар таратуды дамыту қолжетімді бағдарламалардың санын көбейтеді, интерактивті хабар таратуды енгізеді және халыққа қосымша қызметтер ұсынады. Бұл, сонымен қатар, тұрғындарды көп бағдарламалық ТВ хабар таратумен қамтудағы сәйкессіздіктерді жоюға, елдің барлық тұрғындарына ақпараттық ресурстарға қолжетімділікті қамтамасыз етуге, телебағдарламалардың кескіні мен дыбысының сапасын жақсартуға көмектеседі.
Бұл жаңа дәуірдің тууы және біз осындай таңғажайып өзгерістің куәгері ғана емес, тарихи процестің белсенді қатысушылары да болып отырмыз.

Цифрлық хабар таратуға көшу – заман талабы қазақстандықтар «цифрға» сенім артты

<a href="https://kyzylorda-news.kz/">Kyzylorda-news.kz.</a> «Мәдениетті ана – мәдениетті ұлт» жобасы аясында Жалағаш ауданында аудан әкімінің орынбасары Жасұлан Еспенбеттің қатысуымен Аналар кеңесінің алғашқы форумы өтті. «Сыны мен сыры бөлек Сыр аналары» атты ерекше атаумен өткен шараға Қызылорда облыстық ҚХА жанындағы Аналар кеңесі мұрындық болды.
Форум басталмас бұрын облыстық Аналар кеңесінің төрайымы Рахима Ахметова бастаған делегация аудан орталығын аралап, қолға алынған игі жұмыстарға оң бағасын берді. Аудан орталығындағы «Иманқұл» мешітіне барып, болашақтың жарқын болуы үшін дұға етті. Содан соң мәртебелі қонақтарға мәдениет және тілдерді дамыту орталығының фойесінде ауданның белсенді аналарының туындылары таныстырылды. Онда қолөнер шеберлерінің бұйымдары, ұлттық нақышта тігілген киімдермен қоса ешкі сүтінен жасалған ерекше дизайндағы иіс сабындар көрмеге қойылды.
Шараның модераторы Жалағаш ауданы әкімінің орынбасары Жасұлан Еспенбет қазақта «Әке ұлды тәрбиелейді, ана тұтас ұлтты тәрбиелейді» деген қанатты сөз бар. Шындығында, ана баласына берген тәрбиесі арқылы болашақтың қалыптасуына да ықпал етеді. Аудан аналары өңіріміздің дамуы мен өркендеуіне, қоғамдық-саяси және рухани әлеуетін іске асыруға белсенді атсалысуда деп атап өтті.
Форумға қатысушылардың назарына аудандық Аналар кеңесінің жыл бойына атқарған ауқымды жұмыстары туралы бейнеролик ұсынылды.
Қызылорда облыстық ҚХА жанындағы Аналар кеңесінің төрайымы Рахима Ахметова форумның ерекшелігін атап өтті. Дәл осы қоғамда қазақтың бойына біткен асыл қасиеттердің бізден алшақтап бара жатқандығын, қоғамда ең алдымен ұлттық тәрбиеге басымдық беру қажеттігін айтты. Сол алшақтықтың орнын толтыруға аналар үлкен үлес қосады. Осы орайда өңірлік Аналар кеңесінің жүйесі қалыптасқандығын назарға салды. Тәлім-тәрбие ананың ақ сүтімен, бесік жырымен баланың бойына даритындығын алға тартты.
Өз кезегінде «Ана мен бала денсаулығын қорғау» тақырыбында аудандық аурухана бас дәрігерінің емдеу ісі жөніндегі орынбасары Гүлсім Каюпова, «Отбасылық зорлық-зомбылықтың алдын-алу» тақырыбында аудандық полиция бөлімінің жергілікті полиция қызметі бөлімшесінің ұйымдастыру аналитикалық жұмыс тобының инспекторы Берік Ахметқали, «Отбасы, неке мәртебесін көтеру, отбасы құндылықтарын дәріптеу» туралы аудандық Аналар кеңесінің төрайымы Айқын Жақсылықова және «Қазіргі өркениетті заманға сай әйелдің бейнесін қоғамдық санада қалыптастыру» төңірегінде үлгілі жас ана Раушан Атаулиева орамды ойларын ортаға салды.
Қызылорда қалалық мәслихат депутаты, облыстық Аналар кеңесінің белсенді мүшесі Айгүл Мұсабаева «Мәдениетті ана – мәдениетті ұлт» жобасының мән-маңызына тоқталып, бірлескен жобаларды атап өтті. Қыз баланың тәрбиесіне аса мән беру керектігін айтты. Өне бойы даналыққа тұнған, ақылы дариядай ата-әжелеріміз арқылы ұлттық тәрбиені насихаттап, қазақтың бойына біткен асыл қасиеттерді жас ұрпақтың бойына дарыту керек екендігін алға тартты.
Ал Қазақстан халқы Ассамблеясы және облыстық Аналар кеңесінің мүшесі Галина Щербакова отбасы беріктігі, ондағы жайлылықты қалай сақтау керектігіне тоқталып өтті. Форумның маңыздылығын айтып, ұйымдастырушыларға, Аналар кеңесінің үлгілі жұмыстарына ризашылықтарын білдірген аналар мен көңілі босап, көзіне жас алған ауыл келіндері де болды.
Мұнан соң аудандағы үлгілі 6 ана «Ардақты ана», «Үлгілі ана», «Рухты ана», «Өз ісінің шебері», «Дәстүр насихаттаушысы», «Ұрпақ жанашыры» номинациялары бойынша марапатталды. 
Ақ жаулықты асыл аналардың басын қосқан ауқымды форум соңы концертке ұласты.
<img src="https://kyzylorda-news.kz/wp-content/uploads/2022/08/300224060_1518464425272297_6003891223325650742_n.jpg" alt="" />

Аналар кеңесінің алғашқы форумы өтті

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің орынбасары Нұрымбет Сақтағанов Қазалы ауданына арнайы барып, бірқатар әлеуметтік нысандарды аралады. Сондай-ақ, жаңа оқу жылына білім беру нысандарының дайындық барысын да пысықтады.
Қасиетті өлкенің тыныс-тіршілігімен танысуға келген Нұрымбет Аманұлы алдымен Әйтеке би кентіндегі салынып жатқан 250 орындық мектеп құрылысына барды.
Өткен жылы басталған білім ордасының құрылысы жоспар бойынша биыл аяқталуы тиіс. Облыс әкімінің орынбасары құрылыс жұмыстарының қарқынын күшейтіп, мектепті уақытылы әрі сапалы аяқтауды тапсырды.
Мұнан соң аудан орталығында «Айгөлек» балабақшасына ат басын бұрып, апатты жағдайдағы көне ғимараттың алдағы жайын талқылады.
Әйтеке би кентіндегі Жанқожа батыр атындағы №70 мектепке де қосымша ғимарат салу – күн тәртібінде тұрған өзекті мәселелердің бірі. Облыс әкімінің орынбасары Нұрымбет Сақтағанов ауданға іссапары барысында білім ордасына арнайы барып, жай-күйімен танысты.
Облыс әкімінің орынбасары Нұрымбет Сақтағанов мұнан соң Қ.Пірімов ауылындағы спорт кешені мен Әйтеке би кентіндегі 600 орындық мәдениет үйін көріп, Қазалы қаласындағы №140 орындық «Өрімтал» балабақшасының құрылысымен танысты.
Сондай-ақ, ортағасырлық Жанкент шаһарына да арнайы барып, археологтармен тілдесті. Мамандар қазіргі таңда Германия мен Ресей мемлекеттерінен келген археологтармен бірге қазба жұмыстарын жүргізіп жатқанын жеткізді.
Облыс әкімі орынбасары Нұрымбет Аманұлының Қазалыға жұмыс сапары кезінде аудан әкімі Мұхтар Оразбаев, облыстық мәдениет және спорт басқармасының басшысы Руслан Рүстемов, аудан әкімінің орынбасары Дәурен Тілеумбетов және тиісті бөлім басшылары бірге жүрді.
<img src="https://kyzylorda-news.kz/wp-content/uploads/2022/08/300819460_3435717366649186_6125556976653070297_n.jpg" alt="" />
<img src="https://kyzylorda-news.kz/wp-content/uploads/2022/08/299904285_3435718316649091_5821969125628162229_n.jpg" alt="" />
<img src="https://kyzylorda-news.kz/wp-content/uploads/2022/08/299877149_3435718293315760_1860295139870315377_n.jpg" alt="" />

Қызылорда облысы әкімінің орынбасары жұмыс сапарымен Қазалы ауданына барды

<a href="https://kyzylorda-news.kz/">Kyzylorda-news.kz.</a>&nbsp;Соңғы жылдары технологиялар шапшаң дамып жатыр, мұны, әсіресе ақпарат жеткізудің жаңа әдістерініңенгізілуінен анық байқауға болады. Кино мен хабарларды кішкентай теледидардан көріп жүргеніміз кеше ғана сияқты. Кескіннің ақ-қара түсті болғанын, кейде тіпті дыбысы да жоғалып кететінін елестету қиын-ақ, бірақ, бақытымызға қарай, түрлі-түсті теледидардың дәуірі басталып, кескін түрлі түсті, дыбыс әр динамиктен тоқтаусыз шығып тұратын болды, бұл, әрине,болашаққа бастаған маңызды қадам еді.
«Қазтелерадио»акционерлік қоғамының жаңа заманға сай техникалық шешімдерінің арқасында 2018 жылдан бастап аналогты телевизия өшіріліп, цифрлық эфирлік хабар таратуғакезең-кезеңмен көшу басталды. Бүгін жоғары сапалы кескін және дыбыс беретін сигналдар Маңғыстау, Түркістан, Солтүстік Қазақстан, Қарағанды, Алматы, Жетісу, Павлодар, Қостанай облыстарының, сондай-ақ, Елорда тұрғындары мен қонақтарына, Алматы және Шымкент көрермендеріне қолжетімді. Республиканың 92,43% жері ЦЭТВ-мен қамтылған.
Цифлық Эфирлік Телевизия дегеніміз&nbsp; не өзі? Жәй сөзбен түсіндіретін болсақ, бұл – сигналды жеткізудіңжаңа технологиясына көшу. Аналогты сигнал ауылдық жерлерге тек 2-3 арна жеткізетін, әрі ауа-райы құбылыстарына төзімсіз болатын, сондықтан жиі-жиі дұрыс көрсетпейтін.
Цифрлық эфирлік телевизия неғұрлым сапалы кескінмен дыбыс қабылдауға мүмкіндік береді, ең бастысы, трансляцияланатын арналардыңсанын бірнеше есе арттырып, облыс орталықтарында 30-ға дейін, тіпті ең шалғай аудандарда 15-ке жеткізді. Бұдан басқа, қазір абоненттерге түрлі сервистер қолжетімді, оның ішінде телебағдарлама, қаралатын телехабардың қысқаша сипаттамасы және т.б., бір сөзбен айтқанда, аналогты хабар таратуданцифрлық хабар таратуға көшу көрермендер үшін де, ұлттық оператор ретінде хабар тарататын «Қазтелерадио» АҚ үшін де алға басқан үлкен қадам.
Цифрлық Эфирлік Телевизия абоненті болу өте оңай, ол үшін теледидарға цифрлық сигнал қабылдайтын жалғама құрал мен дециметрлік антеннаны жалғасаңыз жеткілікті – Сіздің алдыңызғакеремет сапамен көрсетілетін отандық арналардың тізімі шығады.Айтпақшы, заманауи теледидарлардың көбінің ішіне цифрлық эфирлік сигнал қабылдағышсалынған, ол кез келген бағдараламаны жалғама құралсыз көруге мүмкіндік береді. Ең маңыздысы, цифрлық эфирлік ТВтоптамасындағы арналар су&nbsp; тегін таратылады.&nbsp;&nbsp;&nbsp;&nbsp;
Сонымен, Цифрлық Эфирлік Телевизияға көшу дегеніміз, бұл – республикалық маңызы бар қалалар мен облыстық орталықтарынан алыс тұратын болсаңыз да, сүйікті хабарларыңызды тегін әрікеремет сапамен&nbsp; көру мүмкіндігі.
Қалай қосылуға болатыны және жабдық сатып алу туралы толық ақпаратты www.tsetv.kz сайтынан, сондай-ақ, ұялы операторларға тегін 8 8000 800&nbsp;193 нөмірі немесе 193 нөмірі арқылы ала аласыз.

Қазақстан кезең-кезеңмен цифрлық эфирлік телехабар таратуға көшіп жатыр

<a href="https://kyzylorda-news.kz/">Kyzylorda-news.kz.</a>&nbsp;Қазақстанда 917 адам коронавирус инфекциясынан жазылып шықты, деп хабарлайды COVID-19 таралуына жол бермеу жөніндегі ВАК баспасөз қызметі.
Нұр-Сұлтан қаласында – 18,
Алматы қаласында – 129,
Алматы облысында – 14,
Жетісу облысында – 13,
Жамбыл облысында – 377,
Батыс Қазақстан облысында – 64,
Қарағанды облысында – 196,
Ұлытау облысында – 14,
Қызылорда облысында – 32,
Маңғыстау облысында – 34,
Павлодар облысында – 10,
Түркістан облысында – 16.
Елімізде барлығы 1 349 188 адам COVID-19-дан емделіп, сауығып шықты.

Өткен тәулікте 32 қызылордалық коронавирустан жазылды

<a href="https://kyzylorda-news.kz/">Kyzylorda-news.kz.</a>&nbsp;Өткен тәулікте коронавирус инфекциясын жұқтырған 478 жағдай тіркелді. Кешегі мәлімет бойынша 740 қазақстандықтан қауіпті вирус анықталған еді, деп хабарлайды COVID-19 таралуына жол бермеу жөніндегі ВАК баспасөз қызметі.
Оның ішінде:
Нұр-Сұлтан қаласында – 95,
Алматы қаласында – 52,
Шымкент қаласында – 0,
Ақмола облысында – 59,
Ақтөбе облысында – 16,
Алматы облысында – 2,
Жетісу облысында – 3,
Атырау облысында – 19,
Шығыс Қазақстан облысында – 3,
Абай облысында – 4,
Жамбыл облысында – 3,
Батыс Қазақстан облысында – 35,
Қарағанды облысында – 83,
Ұлытау облысында – 0,
Қостанай облысында – 45,
Қызылорда облысында – 3,
Маңғыстау облысында – 21,
Павлодар облысында – 17,
Солтүстік Қазақстан облысында – 13,
Түркістан облысында – 5.
Елімізде коронавирус инфекциясын жұқтырғандар саны 1 384 027 жетті.

Қызылордада коронавирус жұқтырушылар саны азайды

<a href="https://kyzylorda-news.kz/">Kyzylorda-news.kz.</a>&nbsp;Қазақстанның алты аймағында дауылды ескерту жарияланды, деп хабарлайды Қазгидромет.
Қызылорда облысының орталығында, шығысында солтүстік-шығыстан жел соғады, таңертең және күндіз күші 15-20 м/с дейін жетеді. Облыстың басым бөлігінде төтенше өрт қаупі сақталады.

Дүйсенбі күнге арналған ауа райы болжамы

Kyzylorda-news.kz. Бүгін Қызылорда облысы әкімінің орынбасары Нұрымбет Сақтағанов ауданда жұмыс сапарымен болып, өңірдегі әлеуметтік нысандарды аралады.
Нұрымбет Аманұлы алдымен қалада орналасқан «А. Байтұрсынов» ауылдық емханасына барып, ондағы жұмыс барысымен танысты. Алғашқы медициналық-санитарлық көмек көрсететін емдеу мекемесінің 140 маманы 15 360 тұрғынға қызмет етеді. Емхананың 3 қабатында 2 егу бөлмесі, 2 егуге дейінгі зал, 2 егуден кейінгі зал және 2 дәрігер бөлмесі орналасқан. Облыс әкімінің орынбасары тұрғындар игілігі үшін оңалту орталығын ашуды қолға алып, алдағы уақытта ауыл халқына сапалы медициналық қызмет көрсетіп, ана мен бала денсаулығына ерекше назар аударудытапсырды.
Одан соң апатты жағдайдағы «Жазира» балабақшасы мен №1 қалалық кітапхана ғимараттарының жағдайын көрді. Аталған нысандардың ішінде облыс әкімінің орынбасарына аудандағы 5 балабақша мен 4 кітапхана ғимаратына апатты жағдайда деген қорытынды берілгені және осыған сәйкес жасалып жатқан жұмыстардың барысы түсіндірілді. Апатты деп танылған балабақшаның үшеуі Арал қаласында орналасқан. Жаңа ғимарат салу үшін жауапты басқармаларға қаржы бөлінуі үшін, өтінім берілген. Сондай-ақ, кітапхана мәселесі бойынша да №1 кітапхана ғимаратын салу үшін жоба-сметалық құжаттамасы әзірленіп, тиісті басқармаларға тапсырылған. Алдағы уақытта қаржы бөлінген соң, құрылыс жұмыстары басталып екі кітапхана ғимараты осы нысанға біріктіріледі де жоспарлануда.
Сонымен қоса №19 Арал аудандық олимпиадалық резервтің мамандандырылған балалар-жасөспірімдер мектебінде болып, атқарылып жатқан жұмыстарды көрді. Аталған нысанда бүгінде 23 жаттықтырушы (оның ішінде І санатты 7 жаттықтырушы, ІІ санатты 5 жаттықтырушы) 14 спорт түрінен дәріс береді. Кешенде 92 топта 1196 бала әр түрлі секцияларға қатысып, спортпен шұғылданады.
Мұнан соң сапар қаладағы жаңадан бой көтерген № 71 мектеп-интернатының ғимаратында жалғасты. Бас мердігер «SCS Инжиниринг» ЖШС құрылыс жұмыстарын 2021 жылы сәуір айында бастаған болатын. Нұрымбет Аманұлы 100 орындық интернатымен қоса жаңадан салынған 200 орындық мектеп ғимаратының ішін аралап, алдағы жаңа оқу жылына дайындықты күшейтіп, балаларды сапалы біліммен қамтамасыз етуге күш салуды міндеттеді. Қазіргі таңда мектептің ішкі жұмыстары аяқталып, оқу процесіне қажетті парта, орындық сынды жиһаздары құрастырылуда.
Сапар барысында облыс әкімінің орынбасары Жақсықылыш кентіндегі денешынықтыру және сауықтыру спорт кешенінде болды. Қазіргі күні құрылыс заттарының қымбаттауы нысанның құрылыс жұмыстарына тоқтау салып тұрғаны сөз болып, оның түйінін шешу мәселесі жан-жақты сараланды. Нұрымбет Аманұлы бұл жөнінде жауапты сала басшыларына нақты тапсырмалар беріп, нәтижесі өз бақылауында болатынын ескертті.
Облыс әкімі орынбасарының Арал ауданындағы жұмыс сапары Қамыстыбас елді мекеніндегі «Ауыл – Ел бесігі» жобасы аясында салынып жатқан дене шынықтыру және сауықтыру кешенінде қорытыланды. Қазіргі таңда нысанның ішкі жұмыстары жүргізілуде.
Құрылыс барысын бағамдаған Нұрымбет Сақтағанов ғимараттың сапасына ерекше мән беруді тапсырды. Округ әкімі мен жауапты сала басшыларына келешекте бұқаралық спорт түрлерін дамытуға және ауыл жастарының бос уақытын тиімді пайдалануға үлкен мүмкіндік туғанын, сол мақсатта аянбай еңбек ету жауапкершілігін жүктеді.
<img src="https://kyzylorda-news.kz/wp-content/uploads/2022/08/fb_img_1661076138093.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661076140764.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661076143805.jpg" alt="" />

Нұрымбет Сақтағанов Арал ауданына барды

Kyzylorda-news.kz. Жамбыл облысында шекара қызметінің сарбазы қайтыс болды, деп хабарлайды Sputnik Қазақстан.
18 жастағы Бекбол Мираш Атырау облысының тумасы. Қызылқоға ауданындағы Миялы ауылында дүниеге келген. Туыстары сарбаздың қайтыс болғанын растады.
<blockquote>
 “Қазір Тараздамыз. Денесін ұшаққа салып жатырмыз…”, – дейді олар.
</blockquote>
Айта кетері, бұған дейін әлеуметтік желіде Бекболдың өз-өзіне қол салғаны туралы ақпарат тарады.

Тағы бір сарбаз қайтыс болды

Kyzylorda-news.kz. Экология министрлігі еліміздің Су кодексін талқылау барысында Қазақстанның су ресурстарының тапшылығының күрделі проблемасына тап болғанын, тікелей ауыл шаруашылығымен айналысатын Түркістан, Жамбыл және Қызылорда өңірлерінің аудандарында бұл мәселенің байқалып жатқанын мәлімдеді, деп хабарлайды Stan.kz.
Экология министрлігінің айтуынша тұрғындарға да, бизнес өкілдеріне де судың жеткілікті болу үшін министрлік заң бұзушылықтарға бақылауды күшейтуді жоспарлап отыр. Дегенмен, ол үшін мамандар су ресурстарының қаншалықты тиімді пайдаланылғанын тексеруі керек. Ал елімізде ондай қызметкерлерден тек 62 адам жұмыс істейді. Толық және сапалы жұмыс істеу үшін осындай 600-ге жуық қызметкер қажет.
Министрлік сонымен қатар осыған байланысты шараларға қойылатын талапты да күшейту керек екенін айтты. Мәселен, осыған дейін қандай да бір тексерістер алдында хабарланып, айтылып жүрген. Бұл дайындықты алдын ала жасап қоюға мүмкіндік беріп келді.
<blockquote>
 “Қазіргі мемлекеттік бақылау жүйесі алдымен оны жоспарға қоюды, кәсіпкерді тексеріс баратынына алдын ала ескертуді талап етеді. Мұның бәрі алты айға дейінгі аралықта созылады. Осы уақыт ішінде біз барлығын бірден түсініп, зерттей алмаймыз. Сондықтан бақылау тек жұмыс уақытын қамтиды”,-деді ҚР Экология, геология және табиғи ресурстар министрлігі Су ресурстары комитетінің департамент басшысы Марат Иманалиев.
</blockquote>

Қызылордада су қоры таусылған

Kyzylorda-news.kz. Шетелде қиын жағдайға тап болған Әнел Бермағамбеттің ісін Ішкі істер министрлігі тергейді, деп хабарлайды ҚазАқпарат.
Айта кетейік, кеше әлеуметтік желіде Лаостағы қазақстандық азаматша жағдайына байланысты жазба жарияланды.
Бұл дерекке қатысты Қылмыстық кодекстің 126-бабының 1-бөлігімен (адам ұрлауға байланысты емес бас бостандығынан заңсыз айыру) қылмыстық іс тіркеліп, сотқа дейінгі тергеу басталды.
<blockquote>
 «Тергеп-тексеру нәтижесінде анықталған мәліметтерге сәйкес ресми ақпарат қосымша ұсынылады. Оқиға туралы ҚР Сыртқы істер министрлігіне хабарланды» деп мәлім етті ведомстводан.
</blockquote>
Жәбірленушінің ағасымен байланыс орнатылды. Сонымен қатар ҚР консулдығы департаментіне хат жолданған.

Қазақстан және Қызылорда облысының жаңалықтары