<a href="https://kyzylorda-news.kz/ru/">Kyzylorda-news.kz</a>. − Айгүл Алтынбекқызы, жыл басталғалы көп уақыт бола қойған жоқ. Әңгімемізді мектеп ордасында қолға алынған жаңа жобалардан бастасақ…− Мектепте 2019 жылдан бері бес бағыт бойынша «Жасыл мектеп» жобасы жүргізіліп келеді. Қазір жобаның аясын кеңейтіп, энергияны, суды үнемдеу, салауатты өмір салтын ұстану, дұрыс тамақтану, био алуан түрлілік, тазалықты сақтау негіздеріне сүйене отырып, жеті бағытқа ауыстырдық. Бүгінде «экологияға деген жанашырлық, тазалықтың бәрі өзіңнен, үйіңнен басталады» деген ұранмен жұмыс жасаудамыз. «Жасыл мектеп» дегеніміз жылы жай баптап, гүл өсіру ғана емес. Мәселен, біздің мектептегі жылыжай ішінде қияр, қызанақ, болгар бұрышы, құлпы¬ай егіледі. Бұл жердегі негізгі идея – оқушыларға егін ектіріп, кәсіп бастау емес, ғылыми жобаларға тәжірибе болсын әрі шәкірттерде дағды қалыптассын деген ой. Осыған дейін елуге жуық оқушының ғылыми жұмысы жүлделі орынға ие болды. Биылғы «Зерде» ғылыми жобалар байқауында оқушылар 32 орынды қанжығасына байлады. Ал 8-11 сынып оқушылары биология, химия пәндері бойынша алда келеді. Мұның бәрі оқушылардың тәжірибені өз қолымен жасап, түсінгенінің нәтижесі. Осы орайда оқушылардың үздік жұмыстары есіме түсіп отыр. Мектепті екі жыл бұрын бітірген Елдос Төлепберген есімді оқушымыз болды. Ол үйіне түрлі өсімдіктер мен көкөністерді отырғызып, көшеттерді мектепке алып келетін. Ғылым мен білімге деген қызығушылығы жоғары шәкіртіміз – «Елбасы меда¬лін» иеленген облыстағы алғашқы түлектердің бірі. Қазір мектепте Елдостың ізін жалғастырушы оқушылардың қатары көп. Былтыр Айару Бақытжан есімді оқушымыз эко-күнтізбе шығарып, көпшілікті тәнті етті. Эко-күнтізбенің ерекшелігі табиғатты қорғауға арналған халықаралық, мемлекеттік күндер арнайы белгіленген. Сондай-ақ күнтізбеде орналасқан QR-кодты сканерлеу арқылы оқушының мультипликациялық туындыларын көруге болады. Шәкіртіміздің бұл жобасы республикалық байқауда үздік деп танылды. Байқағаныңыздай, осындай қадамдар арқылы біз оқушыларға экологияны сақтау, табиғатты қорғау дағдысын қалыптастырудамыз. Тағы бір айта кетер жайт, экология термині тек табиғатқа қатысты айтылмайды. Бұл сөз адамдар арасындағы шынайы қарым-қатынастың болуын да сипаттайды. Мектептегі ауқымды жоба адамдар арасындағы адамгершіліктен, ұлт жандылықтан бастау алып, Отанды сүюге, туған өлкені қадірлеуге ықпал етеді деп ойлаймыз.− «Жасыл мектеп» жобасы қалай қолға алынды?− Президент Қасым-Жомарт Тоқаев «Жасыл мемлекет», «Жасыл ел» тұжырымы жайлы айтқан тұста «жасыл мемлекет жасыл мектептен басталса» деген ой келді. Әрі қарай іздене келе, Қорқыт ата атындағы Қызылорда университетінің жаратылыстану ғылымдарының кандидаты Рахат Хамитұлымен бірлесе отырып, «Жасыл мектептің» тұжырымдамасын жасадық. Жан-жақты зерттеу нәтижесінде «Жасыл мектебі» дамыған мемлекет Беларусь екенін білдік. Өткен жылы мамыр айында облыстық білім басқармасының қолдауымен біз Беларусияға тағылымдамадан өтуге арнайы барып, «жасыл университет, жасыл колледж, жасыл балабақша, жасыл дәріхана» жобасымен танысып келдік. «Еуропаның өкпесі» саналатын Беларусия бізге бәрі бір шыбықтан басталатынын, көгалдандыру жұмысына көп көңіл бөлу керегін түсіндірді. Сол жақтағы мектеп-гимназиямен меморандумға отырып, бірнеше рет оқушылармен бірге эко-марафон жасадық. «Беларусия-Қазақстан» арасындағы бұл көпірге аудандардағы оқушыларды да әлеуметтік желі көмегімен қамтудамыз. Бұл жобалар болашақта жалғасын тауып, әлі де үлкен қадамдар жасайтынымызға сенемін. Айта кетейін, былтыр жоба аясында мектептегі жаратылыстану бағытындағы сынып бөлмелерін жаңаладық. Оған қоса оқушылар үшін «Өлкетану» кабинетін де дайындадық. Ол жерден аймақтағы құнды жәдігерлерді, құрқылтайдың ұясын, әртүрлі өсімдіктердің гербарийы сынды дүниелерді көруге болады. Қазір аймақтағы өзге мектептер де келіп, тәжірибе алмасып, «Өлкетану» кабинетін ашуға ниет білдіріп жатыр.− Жуырда облыстық білім басқармасының басшысы Мейрамбек Шермағанбет тәрбие жұмысын жандандыру керегін және тәрбие орталығын құруды ұсынды. Білім ордасында бұл бағыттағы шаралар қалай жүгізілуде?− Қазір мектепте ұлттық құндылықтарға, тәрбиеге сәйкес көбірек қозғалыс жасаудамыз. Жуырда ғана мектебімізде «Менің батырым, менің әкем, менің досым» атты сайыс өтті. Шара барысында әкелер мектебімізге келіп, отбасындағы тәрбиенің маңызды екенін тағы бір дәлелдеді. Одан бөлек 1 сыныптар арасында бірнеше күнге созылған отбасылық марафон жүргізілді. Ал көктемде халықаралық әйелдер күніне орай «Менің әжем» деген ауқымды шараны жоспарлаудамыз.− Биылғы мектеп бітіруші түлектердің білім бәсекесіне дайындығы қандай? Қабілетіне сай мамандық таңдауы үшін қандай жұмыстар жүргізілуде?− Кәсіби бағдар беру бойынша университетпен, колледждермен бірге ауқымды жұмыстар атқарылуда. Мәселен, педагогика маманы болғысы келетін оқушылар мектепте тәлімгерлік жүргізе алады. Бұл балаларды көшбасшылыққа үйрететін жақсы мүмкіндік деп ойлаймын. Қаңтардағы ҰБТ бойынша оқушылар жоғары нәтиже көрсететті. Былтыр Дәулет Омаров есімді оқушымыз физика-математика пәнін таңдап, ҰБТ-да облыс бойынша ең жоғары 137 балл жинады. Бұл нәтиже де мұғалімдердің біліктілігі мен сапалы білімнің көрсеткіші деп ойлаймын.− Мектеп орын тапшылығы бар білім беру орындарының қатарында. Бүгінде қосымша құрылыс жұмыстары қалай жүргізілуде?− Иә, қазіргі кезде мектеп жанынан 375 орындық үш қабатты құрылыс жұмысы жүргізілуде. Жаңа оқу жылынан бастап қолданысқа беріледі деп жоспарлануда. Сондықтан алдағы уақытта мектебімізде орын тапшылығы болмайтынына сенімдімін.− Білім саласында сізді қандай мәселе алаңдатады?− Мені адамдар арасындағы қарым-қатынастың аздығы ойландырады. Соңғы уақытта көршімен, туысқандармен араласу сиреп барады. Кезінде біз бір үйдің емес, бір ауылдың баласы болып өстік. Қазіргі балалар адамдармен емес, телефонмен байланыста болуды қалайды. Сол үшін балалардың, көршінің, ағайынның арасындағы қарым-қатынасты жандандыру керек тәрізді. Біздің ең басты құндылығымыз – қонақжайлығымыз, жақынға деген жанашыр көңіліміз. Осындай жылы қарым-қатынасты балаларға үйреткім келеді.− Сұхбатыңызға рақмет! &nbsp;

Айгүл Өткелбаева: Балалар телефонмен байланыста болуды қалайды

<a href="https://kyzylorda-news.kz/ru/">Kyzylorda-news.kz</a>. Ұлттық нақыш пен киім құнсыз деген түсінік келмеске кетті. Бүгінде дәстүрден танбай, қолөнердің қадірін арттырып, оны заманауи технология тілімен үндестіргендер аз емес. Ұлттық брендті қалыптастыру жолында аянбай тер төгіп жүргендердің қатарында елге танымал этнодизайнер Ырза Тұрсынза да табылады. Осы санда ата-бабадан қалған асыл мұраны сақтап қалу, ұлттық дүниеге көзқарас, ізбасар тәрбиелеу жөнінде қолөнершінің пікірін қамтыған едік.Ине мен жiптi серiк еткен кейiпкерiмiз қөлөнерге бала кезден құштар. Анасының тiгiн машинасын ерте иемденіпті. Осылайша ескi сандықты сәндеп, құрақ көрпе тiгуге әуестенген. Этнодизайнер әуелде басқа кәсіппен айналысқанмен, соныңда ісмерлік өнерге деген ынтасы мен ықыласы ақыры жеңгенін айтады. Негізгі мамандығы – биология пәнінің мұғалімі болса да, оны тастап, «Алтын орда» авторлық дизайн үйін құрған. Алғашқы топтамасы алты құрақ көрпе мен жастықтан ғана тұрған екен. Ал қазір Ырза Тұрсынзада бастаған шеберлер тобы толықтай қазақы нақышта үй сәндеп, қыз жасауын, кестелі ұлттық киімдер тігумен айналысады. Өз iсiне аса ыждаһаттықпен қарайтын дизайнер әр бұйымды тiгерден бұрын оның тарихына ерекше мән береді.<blockquote>«Әу баста ісмерлікті еріккеннің ермегі деп санағандар болғаны рас. Олар бұл кәсіптің пайда әкелетініне де күмәнмен қарады. Бірақ қолөнер – мен үшін табыс табудың көзі емес, көңіл қалауым, ұлттық дүниелерге деген құштарлығым. Сондықтан болар, бұл кәсіпке көп күш пен қаржы салдым. Уақыт өте халықтың ұлттық бұйымға деген қызығушылығы бас қаламызда осы кәсiптi жандандыруға себеп болды. Ермек қылып жасаған алғашқы затым – алтын көрпелер. Сондықтан мекеме аты да осымен байланыстырылды. Бүгінде «Deluxe» санатындағы көз жауын алатын дүниелерге сұраныс жоғары. «Шалқардағы суреттер» атты вернисаж көрпе, «Оюлы әуендер» деген көрпелер топтамасы, «Жібектің жасауы», «Баянның жасауы» деп аталатын туындылар да көптің игілігіне жарауда. Сонымен қатар тапсырыс алғаннан кейін сол отбасының тарихын зерттейтінім бар. Ұлттық бұйымдар тек әдемі ғана болмауы тиіс, отбасының тарихынан сыр шерткені дұрыс. Оның түп негізі, тарихи тамыры сақталу қажет. Сондықтан арнайы қалаларға, мұражайларға барамын», – дейді шебер.</blockquote>Қолөнершіден өз ісіне қандай отандық тауарларды қолданатынын да сұрадық. Жастықтардың iшiне салатын мамық көбіне Қарағанды зауытынан, ал киiздер Талғар зауытынан тапсырыспен алынатын көрінеді. Әсем дүниелердің бағасы нарық талабымен байланыстырылған. Эконом, бизнес және элит кластағы бұйымдар болып бөлінеді. Бағасы 55 мың теңгеден басталады. Ең қымбат көрпенің бағасы – 2000 АҚШ доллары. Қолөнер шеберінің айтуынша, бұл тек көрпе матасының емес, оған жұмсалған қаншама күндік көз майы және соңғы технологиялық мүмкіндіктерді пайдалана отырып тіккен тігістің құны. Дизайнер брендтің құнын түсіруге болмайтынын алға тартады. Қазақ бренді де әлемге танылған &nbsp;«Kenzo», «Gucci», «VL» төсек-жаймаларынан кем емес деген пікірде. Сондай-ақ Ырза ханым қолөнерге қанықсам деушілерге бар білгенін үйретуге даяр. Қазір оның Инстаграм желісіндегі парақшасында 2 млн оқырман бар. Ал «Yrza Tursynzada live» Youtube арнасында 30 мыңнан астам жазылушы тіркелген және осы арнада әлемнің 70 елінен қыз-келіншектер шеберлік сабақтарын тамашалайды.<blockquote>«Жоғары эксклюзивті туындылар жасау үшін дайындығы жоғары шебер қашанда қажет. Бұл мәселе бойынша қиындықтарға тап келген едік. Әсіресе, бізде кесте тігетін, көрпе құрақтайтын қыз-келіншек тапшы. Шебер іздеп, табанымнан таусылған кездерім аз болған жоқ. Содан кейін шеберлерді елден іздемей, өзім үйретіп, дайындауым қажет екенін түсіндім. Сөйтіп ақылы түрде шеберлік сабақтарын ұйыдастырдым. Бұдан нәтиже шықпады. Ақылы сабаққа қарапайым халық келмеді. Келушілердің дені тек бизнестік көзқараста, яғни ұлт өнерін дамытсам деп емес, үйреніп алып, пайда тапсам деген ниетте болды. Ақыры шеберлік сабағын тегін үйрететін болдым. Облыстарды аралап тегін шеберлік сабақтарын өткіздім. Келушілердің қатары қалың болды. Қыз-келіншектер көп нәрсеге үйренуге тырысты. Мәселен, «Асыл ана» әлеуметтік жобасы аясында ұйымдастырылған «Көрпе Fest» мега-фестивалінен шыққан нәтиженің өзі жаман емес. Қолөнердің бар құдіреті, титтей нәрсені көрсетсең, қолына ине алмаған қыздардың өзі тігуді бастап кетеді. Қазір әлеуметтік желіде де, Youtube каналда да бейнесабақтар өткізуді қолға алып отырмын. Бастысы, жастар төл тарихымызбен сусындаса, қолөнерімізден қол үзбесе деген ниетім бар. Үйде отырған қыз-келіншектер де бос отырмай, табыс тапса деймін» , – дейді кейіпкеріміз.</blockquote>Ырза ханым iсмерлiгiмен аз уақытта шетелдiктердi де тәнтi еткен. Мәскеу, Франция, Италия, Германия секілді сырт елдерге шыққанда шебер қазақ мәдениетінен сыр шертетін бұйымдарды насихаттап, нағыз өнер кеніші елдің ішінде екенін айта жүреді. Ырзығын қолөнерден тапқан Ырза Тұрсынзаданың бұл еңбегі де лайықты деңгейде бағаланып отыр. «Алтын орда» дизайн үйі Президент тағайындаған «Алтын сапа» сыйлығына ие болған. Ал Қазақстанның кәсіпорындары үшін «Алтын сапа» «Оскар» сыйлығымен тең. Мекеме «Қазақстанның ең үздік өнімі» байқауынан бес мәрте &nbsp;жеңімпаз атанған. &nbsp;

Қызылордалық этнодизайнер 2000 доллар тұратын көрпеше тікті

<a href="https://kyzylorda-news.kz/ru/">Kyzylorda-news.kz</a>. Мұғалім ‒ мектептің жүрегі, қоғамның қозғаушы күші. Жақында №264 мектепте еңбек етіп жүрген білікті мұғалім Мөлдір Әбдіқаппарқызымен тілдестік.− Ең алдымен әңгімемізді осы салаға келген сәтіңізден бастасақ… Шәкірт тәрбиелеу, ұстаз болу сізге қандай жауапкершілік жүктейді?− Алғашында ұстаз болу менің арманым емес еді. Бірақ әкемнің «менің қызым ұстаз болады» деген сөзі осы салаға бастап келді. Дегенмен осы таңдауыма еш өкінген емеспін. Қиындығы мен қуанышы қатар жүрсе де,білім беру арқылы әрбір күнімнің сауапқа толы болатыны есіме түскенде әкеме ерекше алғыс айтамын.Мектеп қабырғасындағы ұстаздық қадамым 2006 жылы №101 мектеп-лицейінде басталды. Бастапқыда үлкен жауапкершілікті артқан соң, ішкі қорқынышымның болғаны рас. Алайда мамандығыма деген қызығушылығымды арттырып, көмек беріп, шәкірт тәрбиелеуге үйрететін ұлағатты ұстаздар көп болды. Сол кісілермен тәжірибе алмаса отырып, оқушыға жан-жақты білім беруді меңгердім.Алғаш рет шәкірттерімнің алдына барған кезде ұстаз болу өмірімдегі ең бақытты әрі маңызды сәт екенін ұқтым. Әр күн сайын қайталанатын сабақ барысы үлкен дайындықты, ізденісті, жан-жақтылықты қажет етеді. Ұстаз шәкіртке бар болмысымен үлгі, сондықтан өзіңді ұстау мәдениеті маңызды саналады. «Ұстазға қарап шәкірт өседі» дегендей, әрбір шәкірттің бойындағы қыр-сырын ашуға, сенімдерін ақтауға талпынып келемін. 2010-2011 оқу жылдары алғашқы шәкірттерім түлек атанды. Бүгінде білім берген оқушыларым әр түрлі сала бойынша маман иесі болып қызмет етуде. Олардың ел дамуына үлес қосып, жақсы маман иесі болғанына қуанамын.− Уақыт өткен сайын сала мамандарына жүктелетін талап та жоғарылып келеді. Жаңа заманға сай ұстаз қандай қабілеттерге ие болу керек деп ойлайсыз?− Мұғалім заман ағымына ілесіп отыру керек, өйткені адам үнемі ізденіс үстінде жүрмесе мидың жұмыс істеуі бәсеңдейді. Бұл − ғылымда дәлелденген қағида. Жан-жақтылыққа, үйренуге, ізденуге, оқуға қазір талпынбасақ болашақ ұрпағымыздың дамуына кедергі келетіні анық. Өйткені заман ағымына қарай білімді жаңартып, ақпараттық технологияларды күнделікті өмірде қолдана білу керек. Сондықтан мұғалімнің кәсіби маман болғаны дұрыс.«Ұстаздық ету – өзгенің бақытын аялау, өзіңнің уақытыңды аямау» деген сөз бекер айтылмаған. Біліммен қоса тәрбиені қатар алып жүру де – уақыт талабы. Бұл бағытта оқушылармен үнемі тәрбиелік іс-шаралар, сайыстар, кездесулер, саяхаттар ұйымдастырып отырамын. Игі істер мен жақсылықтарды құлақпен есту балалардың қызығушылығын оята қоймайды, тек айтылған дүниелерді қолмен ұстап, көзбен көрсе ғана белсенділіктері артады. Сонымен қоса біздің атқарған жұмыстарымыз оқушылардың жан-жақтылығына, қоғамда өзін ұстай білуіне, сөйлеуіне септігі тиеді деген сенімдемін. Шынында жер үстінде адам тәрбиелеуден асқан абройлы іс, ардақты жұмыс жоқ.− Ұстаздың мерейлі сәті оқушылардың жетістігінен де байқалып жатады. Осы орайда талапты та талантты шәкірттеріңіз жайлы да айтып берсеңіз…− Білім жүйесінің жаны да, жүрегі де − ұстаз. Ал ұстаздың мерейін көтеріп, еңбегін ақтайтын шәкірті. Білім алу барысында ата-ана, ұстаз, білім алушы болып үштікті берік ұстансақ, әрбір шәкіртіміздің жетістікке жетеріне сенемін. Әрбір шәкірттің бойында талап та, талант та болады. Осы кезге дейін мектепті «Алтын белгімен» бітірген шәкірттеріммен, «Білім инновация лицейінде», НЗМ мектептерінде оқуын жалғастырып жүрген оқушыларыммен мақтана аламын. Қазіргі таңда мектеп бітіруші түлектерімнен үлкен үміт күтудемін. Сонымен қоса облыстық, қалалық, мектепішілік жарыстарда жүлделі орындармен марапатталған оқушыларым да жеткілікті.– Сұхбатыңызға рақмет! &nbsp;

Қызылодалық ұстаз: Мұғалім ізденіс үстінде жүру керек

Қуаңдарияда малдарды дронмен бақылайды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласының әкімі Асылбек Шаменов қалада бастау алған жаңа жолдардың құрылыс жұмыстарын бақылады. Қала әкімі алдымен Е.Көшербаев көшесінде жүріп жатқан тротуардың құрылыс жұмысымен танысты.Ұзындығы 3,8 шақырымды құрайтын бұл аяқжолды «Қызылорда жолдары» ЖШС жүргізуде. Бекітілген кесте бойынша ауқымды шаруа маусым айында аяқталуы керек. Осыған байланысты серіктестік директорына жұмыстың мерзімінде және сапалы орындалуы тапсырылды. Күнделікті бақылау жауапты сала – қалалық тұрғын үй-коммуналдық шаруашылық, автомобиль жолдары және жолаушылар көлігі бөліміне жүктелді.Соңғы жылдары қаланың шет аймақтарына басымдық беріліп келеді. Тозығы жеткен электр желілері ауыстырылып, жаңа жолдар мен тротуарлар салынып, халықтың сұранысы қанағаттандырылуда. Соның дәлелі, қазірде КБИ тұрғын ауданындағы 7 көшеге қиыршық тас пен асфальт төселуде. Жалпы ұзындығы 3 шақырымды құрайтын бұл жолдар мамыр айында толығымен жаңаланады. Жұмыс барысын бақылауда қала әкімімен кездескен тұрғындар игілікті істің басталуына алғыстарын жеткізді.Бәйтерек тұрғын ауданындағы 7 көшеге де орташа жөндеу жұмыстары қолға алынды. Бүгінде мердігер мекеме алғашқы көшенің асфальт жабындысын нығыздауды аяқтау кезеңінде тұр. Енді қалған жолдардың негіздеу жұмыстары басталады. Жоспарға сәйкес, жалпы ұзындығы 12 шақырымға жуықтайтын көшелерге асфальт төсеу мамыр айында аяқталады. Қала әкімі Асылбек Шаменов мердігер мекеме басшылығына жұмыстардың бекітілген стандарттарға сәйкес тексеру жұмыстарынан кейін қабылданатынын айтып, сапаны бірінші кезекке қоюды тапсырды.Айта кетейік, биыл Қызылорда қаласы мен қалаға қарасты елді мекендердегі 236 көшеге орташа жөндеу жүргізу, 19 көшеге жаяу жүргіншілер жолын салу үшін 5,7 млрд. теңге бөлініп отыр. Оның ішінде 99 көшеге асфальт және 137 көшеге тас жол құрылысы жасалынатын болады.

Қызылордада жол инфрақұрылымы қарқынды дамып келеді

<a href="https://kyzylorda-news.kz/ru/">Kyzylorda-news.kz</a>. Қызылордада балықтың ерекше түрі өсіріледі. Африкалық жайынды Сыр табиғатына бейімдеуді шиелілік кәсіпкер қолға алып отыр. Тың кәсіпті меңгерген кәсіпкер ыстық белдеуде ғана кездесетін балықтың бұл түрін өзімізде өсіруге ниетті.Тың кәсіпті бастаған Шиелі ауданы Бидайкөл ауылының тұрғыны Мұрат Қалиевтің алға қойған мақсаты асқақ. Африкалық жайын балығын Сыр өңірінің табиғатына жерсіндіруді мақсат тұтқан ол өз кәсібін бастамас бұрын ұзақ ізденген. Балықтың осы ерекше түрі жайында көптеген ақпарат жинақтаған. Негізі балықтың аталған тұқымы көбіне Африка елінде өсіріледі. Сондай-ақ Сахара су қоймаларында, Иордания өзені бассейндерінде, Оңтүстік және Оңтүстік-Шығыс Азия елдерінде жиі кездеседі.Сондай-ақ бұл балық қабыршақты әрі терісі судың түсіне байланысты болып келеді. 1-1,5 жылдан кейін уылдырық шаша бастайды. Уылдырығының салмағы 400-500 грамм, ал ұзындығы 300-400 миллиметр болады. Жалпы көбіне ыстық аймақтарда тіршілік ететін болғандықтан, кәсіпкерге бұл балық түрін Сыр табиғатына бейімдеу оңайға соқпаса керек. Өйткені суыққа төзімсіз келеді.<blockquote>«Жайын балығының африкалық тұқымын көршілес Өзбекстаннан арнайы тапсырыспен алдық. Көрші мемлекетте бұл балық түрін өсіру жақсы дамыған. Негізінен, Өзбекстанда тоғанды балық шаруашылығы жақсы дамыған. Сондықтан да ол жақта бұл балықты бейімдеуде еш қиындық туындамайды. Өткен жылы африкалық балықты өзімізде өсіруге деген қызығушылық пайда болды. Сол мақсатта 2022 жылдың тамыз айында 2 500 жайын шабағын алдырдым. Үйімнің ауласына арнайы қауыз жасатып, сол жерде өсіріп отырмын», – дейді Мұрат Қалиев.</blockquote>Кәсіпкердің айтуынша, жайын балығының бұл тұқымы тез салмақ жинайтындықтан, етті болып келеді. Жыртқыш санатына жататын балықты жақсы баптаса, әр шабағы 3 келіге дейін тартатын көрінеді. Сондықтан бұл теңіз байлығын өсіріп, көл-көсір табысқа кенелуге болады екен.Жабық су бассейнін жасап, балықты Сыр табиғатына жерсіндіруді қолға алған кәсіпкердің алға қойған жоспары көп. Елдің өзге аумағында да африкалық балықтың өнімімен қамтамасыз етуді көздейді.«Африкалық жайын балығының шабақтарын қауызда +28 градус температурада ұстап отырмыз. Қалай дегенде де, Өзбекстанмен салыстырғанда Қызылорданың ауа райы бұл балықтың өсуіне жайсыз. Сол себепті жасанды жылы температураны қолдануға мәжбүрміз. Әсіресе, қыс мегілінде оны күтіп-баптау оңай болмайды. Соған орай бұл балықты көктем мен жаз мезгілінде өсіріп, күн суытатын уақыт таянғанда экспортқа шығарамын», – дейді кәсіпкер.Еліміздің табиғатына таңсық балық түрін өсіруді қолға алған кәсіпкер өз кәсібін кеңейтуді де көздейді. Осы мақсатта алдағы сәуір айында Өзбекстаннан қосымша 30 мың шабағын алдыруды жоспарлап отырғанын айтады. Сонымен қатар шағын тоған шаруашылығын құрмақ ниеті бар. Бұл жоспары ауыл әкімдігі тарапынан да қолдау тауыпты. Осылайша, табиғатынан батпақты су қоймаларына бейім балықты тез көбейтуге болатынын алға тартады.Кәсіпкер балық жемін Алматы қаласынан арнайы тапсырыспен алдырып отыр. Салмағы үш келіге жеткен шабақтарды Қытайға экспорттауды да жолға қойыпты. Себебі көршілес елде балықтың бұл түріне сұраныс өте жоғары болса керек.Сондай-ақ балық шаруашылығын дамытуға ниетті азаматтарға шабақтарын сатуды да көздейді. Тоған шаруашылығын өрістетуге бет бұрған кәсіпкердің алға қойған жоспары ауқымды. Тоған шаруашылығын ашу арқылы жергілікті тұрғындарды жұмыспен қамтуға ниет білдіріп отыр. Келешекте өзбекстандық әріптестермен келісімшарт негізінде уылдырық шайқау цехын іске қосып, өзге балық түрлерін өсіруді де қолға алғысы келеді. &nbsp;

Сырбойылық азамат африкалық жайын өсіруде

<a href="https://kyzylorda-news.kz/">Kyzylorda-news.kz.</a> Әлеуметтік медициналық сақтандыру қорының Қызылорда облысы бойынша филиалы МӘМС төлемдерін жүзеге асыру кезінде жұмыс берушілер мен қызметкерлер қандай қырларына назар аудару керектігін хабарлайды.Бас сарапшы Айгүл Аханованың айтуынша, жұмыс беруші қызметкерді МӘМС үшін жарналар мен аударымдар туралы хабардар етуі тиіс.&nbsp; Қызметкерге төлемнің екі түрі түседі:&nbsp;аударымдар - оларды жұмыс беруші өз қаражаты есебінен төлейді - 2023 жылы оның мөлшері қызметкер жалақысының 3% құрайды.Аударымдардың максималды мөлшері 10 ЕТЖ-дан 3% - дан аспауы керек (3%*10*70 000=21 000 теңге);&nbsp;жарналар - оларды жұмыс беруші қызметкердің жалақысынан ұстайды, олар қызметкердің жалақысының 2% құрайды. Аударымдардың ең жоғары мөлшері 10 еселенген ЕТЖ - 2% (2%*10*70 000=14 000 теңге).Егер қызметкер МӘМС жарналарын мемлекет төлейтін 6 жеңілдікті санаттың біріне кірсе, онда жұмыс беруші олар үшін аударымдар мен жарналарды төлемейді.&nbsp;Бұл санаттар: балалар; зейнетақы жарналарын алушылар, «Алтын алқа», «Күміс алқа» алқаларымен марапатталған немесе «Батыр ана» атағын алған, сондай-ақ I және II дәрежелі «Ана даңқы» ордендерімен марапатталған көп балалы аналар; мүгедектер; орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысаны бойынша білім алатын адамдар; жүктілікке және босануға, жаңа туған баланы (балаларды) асырап алуға, баланы (балаларды) үш жасқа толғанға дейін оның (олардың) күтіміне байланысты демалыстағы адамдар.Егер тағы сұрақтар туындап жатса, сіз оларды Әлеуметтік медициналық сақтандыру қорының мамандарына байланыс арналары арқылы сұрай аласыз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot. Осы құралдар арқылы сақтандыру мәртебесін тексеруге болады. Сондай-ақ, медициналық сақтандыру жүйесіндегі өз мәртебеңізді тексеріп, жүргізілген төлемдер туралы ҚР электрондық үкіметінің сайтында egov.kz "Денсаулық сақтау" бөлімінде "Медициналық қызметтер туралы және МӘМС-ға аударылған сомалар туралы ақпарат" мемлекеттік қызметі арқылы білуге болады.&nbsp; <img src="https://knadmin.beoblood.kz/uploads/Platezhi_2023_rabotodateli_kaz_5a71e5c910.jpeg" alt="Платежи 2023 работодатели каз.jpeg">

Жалдамалы қызметкерлер мен жұмыс берушілер МӘМС төлемдері туралы не білуі керек? 

<a href="https://kyzylorda-news.kz/">Kyzylorda-news.kz.</a> Кез келген елді мекенде мәселе болады. алайда оның шешімі де жоқ емес. Тек халық үніне құлақ асып, елдің мәселесін ертеңге қалдырмау қажет. Бұл тұрғыда жергілікті әкімдік жүйелі жұмыс жасап жатқанын жақсы білеміз. Жалағаш ауданының басшысы асқарбек есжанов та кезектілікпен жеке қабылдау өткізіп, тұрғындардың талап-тілегіне құлақ асады. Бастысы, нәтиже бар.Өткен аптада Жалағаш ауданының басшысы Асқарбек Темірбекұлы тұрғындарды жеке мәселелері бойынша тағы да қабылдады. Жеке қабылдауға келгендердің дені жұмыссыздық мәселесін алға тартып, екі қолға бір күрек табылса деген ниетпен жүргенін жасырмады.Бұл мәселе бойынша Асқарбек Темірбекұлы өңірде жұмыссыздық деңгейін төмендету мақсатында бөлімдер мен мекемелерде жұмыс жасайтын зейнет жасына жеткен немесе зейнетке шығып жұмыс жасап жатқан мамандарға талдау жасауды тиісті бөлімдерге тапсырды. Сондай-ақ ауданда жаңа жұмыс көздерін ашу мақсатында салынып жатқан құрылыс нысандарының жұмысын мерзімінде аяқтауды және өндірістік мақсаттағы кәсіпкерлік бастамаларға қолдау көрсетуді басты назарға алып, өзі қадағалау жасайтынын жасырмады.Қабылдау барысында аудан әкімі әрбір тұрғынның жеке мәселесін тыңдап, бірқатарына заңдылыққа сәйкес жауап берсе, басқа да тұрғындардың мәселесін шешу үшін тиісті бөлім басшыларына тапсырмалар жүктеді. Сонымен қатар әлеуметтік көмек сұраған аудан азаматтарына мүмкіндігінше көмек жасалатынын жеткізді.Иә, аудан басшысы бұған дейін де ауыл әкімдеріне тұрғындарды мәселелері бойынша жиі қабылдау қажеттігін айтып, елдің ішіндегі тұралаған мәселелерді шешуге жұмыс жасауды жүктегеніне талай куә болғанбыз. Бастысы, нәтиже бар. “Халық үніне құлақ асатын мемлекет” тұжырымдамасы әрбір өңірде осылай іс жүзінде жүзеге асса, халық оның игілігін көретіні анық. &nbsp;

Жалағаш ауданының әкімі тұрғындардыңталап-тілегін тыңдады

<a href="https://kyzylorda-news.kz/ru/">Kyzylorda-news.kz</a>. Пандемия жағдайы бизнес саласын да айналып өткен жоқ. Кей кәсіпорындар араға уақыт салып тірлігін түлете бастады. Солардың бірі – Қызылордадағы «АС-КА» жеңіл өнеркәсіп қауымдастығы. Мұнда айына 2500 дана өнім өндірілуде.Жеңіл өнеркәсіп қауымдастығының төрайымы Дина Махатова жергілікті кәсіпкерлер мектеп формасын тігуді 2019 жылы қолға алған. Облыс бойынша кәсіпорын арнайы киім тігу бойынша көшбасшылардың бірі болып табылады. Пандемия кезінде «Ас-КА» ЖШС медициналық бір реттік комбинезондар мен бахилаларды тігумен айналысты. Сол жылдардағы өнімнің бұл түрі медициналық салада өте жоғары сұранысқа ие болды. Жоғарыда аталған тауарлардың үлкен шығарылымы қысқа мерзімде осы кәсіпорынның жоғары тиімділігі мен құзыреттілігін көрсетеді. Осы оқу жылына ер балаларға арналған 1000 дана, қыз балаларға арналған 2000 дана мектеп формасын дайындаған кәсіпкер Дина Махатова материалдардың барлығы да Оқу-ағарту министрлігі қойған талапқа сай келетінін, арнайы сертификаттары алынғанын атап өтті. Мектеп формаларының бағасы нарық бағасынан анағұрлым төмен. Жейделер 2000-3000 теңгеден басталады. Ер балаларға арналған костюм, шалбар, жакеті 10 000 теңгеден.Өнімдері алғашқыда облысымызда, кейіннен еліміздің өзге де бірқатар өңірде сатылды. Кәсіпорын қолданылатын ең соңғы үлгідегі автоматтандырылған тігін машиналарының тігісі жатық, теп-тегіс. Әр тұты¬нушының дене бітімі мен талғамына орай әрбір өлшемге мән беріліп, киімнің қонымды болуын есепке алынды. Дизайны мен тігісі шетелдік костюм-шалбарлардан кем түспейтін отандық өнімнің матасы да сапалы.Өнім өте сапалы, ыңғайлы, мектеп формасына қойылатын талаптар толық сақталған. Фабрика тапсырыстан бөлек, дайын өнімдерін сатылымға шығарады. Алматы, Ақтөбе қалалары мен еліміздің басқа өңірлеріндегі ресми және келісім бойынша дүкендерде сатады, сондай-ақ түрлі жәрмеңкелерге қатысады.Кәсіпорын мектеп формасынан бөлек, теміржол, қорғаныс істері қызметкерлері үшін арнайы жұмыс киімін дайындайды. Фабрикада жеке лекалдар базасы бар. Соның арқасында киім өнімдері жаңа сән үлгілеріне сай дизайнда жасалады. Өндірісте жоғары дәрежелі мамандар істейді. Фабрика қызметінің арқасында жергілікті тұрғындардан 45 адам жұмыспен қамтылған. Тапсырыстың көбеюіне байланысты алдағы уақытта адам жұмысқа тартылуы мүмкін.&nbsp;«АС-КА» тігін фабрикасында киім өндірісінің толық циклі – дизайнын әзірлеуден бастап қаптамаға дейін жүзеге асады. Барлық жұмысты шеберлер жоғары технологиялық жабдықтар арқылы атқарады. Фабрикада орнатылған шетелдік заманауи жабдықтар сапасы әлемдік брендтерден еш кем түспейтін өнім өндіруге мүмкіндік береді.<blockquote>– Алдағы мақсат – осы ішкі нарықты қамтып, елімізде сатылымдағы отандық өнім мөлшерін ұлғайту. Мектеп оқушыларын сапалы, сәнді, бағасы да қолжетімді мектеп формаларымен қамтамасыз ету. Осы орайда ата-аналар мен мектеп ұжымдарына отандық өндірушіні қолдап, отандық киім киюге шақырамыз. Себебі отандық өнімді тұтынудың ел экономикасына пайдасы зор, – дейді Дина Махатова.&nbsp;</blockquote>Отандық нарықта сапалы киімдерімен танылған тігін фабрикасы еліміздің жеңіл өнеркәсібінің өрісін кеңейтуде. «АС-КА» киім бренді еліміздің бірқатар өңірінде кеңінен тарауда. Бүгін цех облысының мекемелерін ынтымақтастыққа шақырады.

Қызылордадағы жеңіл өнеркәсіп қауымдастығы айына 2500 дана өнім шығаруда 

<a href="https://kyzylorda-news.kz/">Kyzylorda-news.kz.</a>&nbsp;Бүгін «Жастар ресурстық орталығы» КММ-нің ұйымдастыруымен жастарға жеңілдікпен несие берудің бағыттары мен шарттары, кәсіпкерлікті дамыту бойынша сала мамандарының қатысуымен жастарға семинар-тренинг өткізілді.Семинар-тренингке Қызылорда қаласының жұмыспен қамту орталығының бөлім басшысы Абылай Мирамбекұлы, Қызылорда облысының жұмыспен қамтуды үйлестіру және әлеуметтік бағдарламалар басқармасы Халықты жұмыспен қамту бөлімінің бас маманы Гаухар Әлсейтқызы және «Аграрлық несие корпорациясы» АҚ Қызылорда облыстық филиалы Несиелендіру бөлімінің басшысы Қуаныш Садақбаев қатысып, жастарға өз салалары бойынша кең көлемде түсіндірме жұмыстарын жүргізді.Атап айтқанда, шарада 5 жыл мерзімге кәсіпкерлік қызметті бастауға ниет білдірген немесе кәсіпкерлікпен айналысатын 21-35 жас аралығындағы жастарға жылдық мөлшерлемесі 2,5% болатын несие беру мәселесі талқыланып, жастар өз қызығушылығын танытты.«Қазіргі таңда облыс бойынша жастарға 1,2 млрд теңге бюджеттік соманы құрайтын 5 жылға 2,5 пайызбен несие беру жұмыстары басталды. Бүгінгі күнге дейін 10-ға жуық азамат несие рәсімдесе, 40-қа жуық жас кәсіпкер несие жөнінде түрлі кеңестер алып, құжаттық мәселелерін шешуде. Бұл жерде жаңадан бастайтын кәсіптің ешқандай түріне шектеу жоқ. Тек мемлекеттік Заңға сәйкес талапқа сай емес кәсіп түрлеріне бұл несие берілмейді. Егер берілетін несие мақсатсыз пайдаланылған жағдайда және уақытында төленбесе алынған несие көлемінің 25 пайызы үстемеленіп, несиені қайта қайтару процесі жүретін болады», – деді «Аграрлық несие корпорациясының» маманы Қуаныш Садақбаев.Сонымен қатар, жиында сөз алған халықты жұмыспен қамту бөлімінің бас маманы Гаухар Әлсейтқызы 2021-2025 жылдарға арналған кәсіпкерлікті дамыту жөніндегі ұлттық жоба жөнінде айта келіп, мемлекеттік қайтарымсыз грант мәселесіне тоқталды.<blockquote>«Мемлекет тарапынан әлеуметтік осал топтарға жататын атаулы әлеуметтік көмек алушылар, көп балалы отбасылар, асыраушысынан айырылған, қоныс аударушылар мен қандастар, мүгедектігі бар адамдар мен мүгедектігі бар бала тәрбиелеп отырған отбасылар 400 АЕК-ке (1 380 000 тг) қайтарымсыз несиеге өтініш қалдырып, қазіргі таңда несие беру процесстері жүруде», – деді Гауһар Әлсейтқызы</blockquote>Қызылорда қаласының жұмыспен қамту орталығының бөлім басшысы Абылай Мирамбекұлы әлеуметтік жұмыс орындары, Жастар практикасы, «Алғашқы жұмыс орны» жобасы, жұмыссыз ретінде қалай тіркелу керек секілді бірқатар жұмыссыз жастарға арналған әлеуметтік бағдарламалар мен жобалар туралы тарқатып айтты.Мемлекет басшысы 2022 жылы 16 наурызда Қазақстан халқына «Жаңа Қазақстан: жаңару мен жаңғыру жолы» атты Жолдауын жариялаған болатын. Жолдау жарияланған бір жыл ішінде еліміздің орнықты дамуы сатылап, ауқымды әлеуметтік-экономикалық өзгерістер орын алып, еліміз жаңаша бағытта қарқынды даму жолына түсті. Бұл жөнінде жиынға қатысушы жастар өз пікірлерімен бөлісіп, елдегі оң өзгерістерге жастардың көзқарасын білдірді. Жастар жиындарында талқылатын негізгі және өткір мәселелер, ауқымды жобалар мен шараларды ұйымдастыру мен оған жастарды тарту мәселелері сөз болған жиында мемлекеттік жастар саясатының басым бағыттары талқыланып, реформалық өзгерістердегі жастардың рөлі кеңінен тарқатылды. Жиын соңында қатысушы жастар сала мамандарына өздерін толғандырған сұрақтарын қойып, қажетті жауаптар алды.

Қызылордада жастарға жеңілдетілген несие беріледі

<a href="https://kyzylorda-news.kz/">Kyzylorda-news.kz.</a>&nbsp; «Абай атындағы үш тілде оқытатын дарынды балаларға арналған мамандандырылған сыныптары бар мектебінде» Жаратылыстану пәндер әдістемелік бірлестігінің «Жаратылыстану пәндерінің оқыту әдістемесін креативті идеялар мен инновациялық технологияларды қолдану арқылы білім сапасын арттыру» тақырыбында қалалық семинар өтті. Семинарға Қызылорда қаласы бойынша білім бөлімінің әдіскері Нұрқанат Ақылбайұлы қатысты.Семинардың мақсаты жаратылыстану пәндерін оқытуда жаңа әдіс-тәсілдер қолданып, оқушылардың функционалдық сауаттылығын дамыту.Семинар барысында биология, химия, география пәндерінен ашық сабақ, пәнді оқыту ерекшеліктері мен әдіс-тәсілдер жайлы тренингтер өтті. Ұстаздарды сергітіп, оқушыларды сабаққа ынталандыру мақсатында өткізілген психологиялық тренинг қатысушыларға ерекше көңіл күй сыйлады.<img src="https://knadmin.beoblood.kz/uploads/336294402_1257031968504529_2232349166342387170_n_364257376f.jpg" alt="336294402_1257031968504529_2232349166342387170_n.jpg">Сонымен қатар, мұғалімдер ашық сабақ өткізіп, тәжірибелерімен бөлісті. Онда «Жаратылыстану ғылымдары: функционалдық сауаттылықты тиімді дамыту жолдары» тақырыбында Назерке Базарханова, &nbsp;«Мұғалім мектеп жүрегі, көңілді жүрсін үнемі» география пәні мұғалімі Айнұр Ахметжанова, «Химия сабағында CLIL пәндік тілдік интеграцияланған оқытуды жүзеге асыру» химия пәні мұғалімі Бақытбек Шәкиев, «Мейірімді болса жүрек, орындалар тілек» химия пәні мұғалімдері Күнзияш Аплатинова &nbsp;және Ағжан Айтмұханова, «Eye structure » биология пәні мұғалімі Венера Алимова, «Жаңа технологиялар - жаңа мүмкіндіктер» биология пәні мұғалімдері Ақмарал Аймаханова &nbsp;мен Анель Саттарбекқызы қатысушылар үшін ашық сабақ өткізді.Семинар соңында қатысушылар өзара пікір алмасып, кері байланыс жасады.<img src="https://knadmin.beoblood.kz/uploads/335451526_932262567921703_6792127992062985001_n_fb6fbaaae8.jpg" alt="335451526_932262567921703_6792127992062985001_n.jpg"><img src="https://knadmin.beoblood.kz/uploads/335273053_524938023141013_4444001717228349891_n_01e46e02a5.jpg" alt="335273053_524938023141013_4444001717228349891_n.jpg">

Креативті қалалық семинар өтті

<a href="https://kyzylorda-news.kz/">Kyzylorda-news.kz.</a> Саясаттанушы, Қызылорда облыстық Қазақстан халқы Ассамблеясы жанындағы Ғылыми-сарапшылық тобының мүшесі Бауыржан Үсенбаев&nbsp;бүгінгі этносаралық жағдай туралы баяндады.&nbsp;Бүгінгі таңда бүкіл елімізде қайта құру идеялары қанатын кеңге жайып, жан-жақты &nbsp;іс жүзіне &nbsp;асырыла бастады. Біртұтас Совет &nbsp;халықтарының &nbsp;жетпіс жылдан &nbsp;астам тарихына түбегейлі талдау жасалынып, саясатта, экономикада, әлеуметтік өмірде жол берілген &nbsp;қателіктерді жоюға, марксизм - ленинизм идеяларын қатып қалған догмалардан тазартуға ерекше назар аударылып, демократиялық таңдау жолына жаңа бағыт бағдар жасалынды. Бұл орайда, әсіресе бір Одаққа бас біріктірген әрбір ұлт, республикалардың &nbsp;дербестігі, саяси экономикалық, әлеуметтік ерекшеліктері алдыңғы қатарға шығып, елдегі ұлт саясатын қалпына келтіруге зор мән беріліп отыр. Осының &nbsp;нәтижесінде кәзір Кеңес мемлекетін мекендеген әрбір ұлттың, елдің елдігіне, ердің ерлігіне елеулі сын болатын кезең туды. Этносаралық қатынас мәселелері турасындағы мемлекетіміздің егемендігінің дамуы ғылыми - теория шеңберінен шығып, шешімін қажет еткен күннен бастап саяси айтыстар тақырыбына айналды. Әсіресе, бұл жағдай ақпарат кеңістігінде қызу талқыға түсуде. Ендігі жердегі басты міндет бір ұлттың мүддесін екінші ұлттан жоғары қоюға жол бермеу керек. Оны шешудің &nbsp;Республика басшылығы ұсынған сындарлы бағыттары қайсыбір азаматтардың оңнан да, солынан да соққысына алынды. Шовинистік пиғылдағылардың Қазақстанды бөлшектеуге деген құмарлықтары етек алды.&nbsp;Бұл жағдай тарихтан тіптен хабары жоқ немесе тарихты білгісі келмейтін дауырықпалардың көкейінен шығып жалған ұлтжандылыққа итермелеп келеді. Елімізде тұрып жатқан түрлі этностардың көпшілігі қазақ жеріне өздігінен келген жоқ. Кезіндегі соқыр саясаттың салдарынан жер аударылып және қуғындалып келген азаматтар. Ал қазір сол этнос өкілдерінің үшінші, тіпті төртінші ұрпақтары қазақ жерін өз отаным деп таниды. Тарихи отынына көшіп кеткен азаматтар да қазақ жерін, салтын, қонақжайлылығын, дархан көңілін ыстық лебіздермен еске алып жүгендері баршылық. Бұл біздің тарих алдындағы абыройымыз, мәртебеміздің биіктігі деп түсінемін. &nbsp;Қазақстандық қоғам бүгінде 100-ден аса этнос пен 40-тан астам конфессия өкілдері өмір сүретін этносаралық және конфессияаралық плюрализм мен төзімділіктің ерекше үлгісі болып табылады. Бейбітшілік пен тыныштық, азаматтық келісім, діни төзімділік, қоғам өміріне әр түрлі мәдениеттер өкілдерінің тең қатысуы - бұл қағидалар мемлекет тәуелсіздігі жылдарында ұлттық саясатымыздың негізін қалап, Қазақстанның әлемдік қоғамдастықтағы айрықша ерекшелігін қамтамасыз етті.Қазақстан бүкіл әлемге Ұлы Жібек жолының қиылысында орналасқан шығыс пен батыс өркениетін байланыстыратын көпір болып табылатын мемлекет ретінде танымал. Қазақстанның өркениетаралық орналасуы географиялық құрамдас бөлікке ие болып қана қоймай, сонымен бірге оның мазмұнды бөлігімен толықтырылады, өйткені ежелгі дәуірден бастап біздің мемлекетімізде әр түрлі діндер, дәстүрлер, әдет-ғұрыптар, тілдер және этностардың, халықтар мен ұлыстардың мәдениеттерінің басқа элементтері таралып, дамыды.<figure class="image image_resized" style="width:100%;"><img src="https://knadmin.beoblood.kz/uploads/Etnos_9dd6a9408a.jpg" alt="Этнос.jpg"></figure>Біз «келісім» сөзін жиі кездестіреміз, бірақ бұл нені білдіреді және оны қалай түсіну керек? Тар мағынадағы келісім қарама-қарсы пікірді қабылдау ретінде көрінуі мүмкін, бірақ кең мағынадағы келісім - бұл бір мақсаттағы пікірлердің жиынтығы, бұл белгілі бір мақсатқа бағытталған қозғалыс. Этносаралық келісім тек бірлікті, идеялар мен ойлардың симметриясын, олардың бірігуі мен үйлесімділікке жетуді білдіреді.Қазақстан әрқашан тұрақтылық пен жанжалдарды сындарлы диалог арқылы шешуді жақтайды және сол арқылы келісім идеясын жүзеге асырады. Қазақстандық келісім моделі қоғамның құрылуы мен бірлігіне бағытталған. Әлемдік тарихта келісім қағидаттары қабылданбаған, діни және ұлттық негіздер бойынша қақтығысқа жағдай туғызған мысалдар бар. Косоводағы, Қарабахтағы, Израильдегі және т.б.қақтығыстың мысалын еске түсіру керек.&nbsp;Бұл салада Қазақстанда сыртқы қауіп бар. Өз идеологиясында ымыраластық пен диалогты толығымен жоққа шығаратын және осындай қақтығыстарды қарулы жолмен шешуге бейім идеяларды қамтитын экстремистік топтардың тұрақсыздану қаупі бар. Мұндай идеологиялар қоғамның өзінде агрессияға толық жағдай жасауға қабілетті.&nbsp;Өзінің ақыл-ойы мен мәдени дәстүрі бойынша, қазақ қоғамына экстремистік идеялар тән емес, ол олардың санасы арқылы мәдениеті арқылы халықтың санасына енеді, бұл бірлікті сақтаудың қаншалықты маңызды екендігін көрсетті. Халық қоғамдағы үйлесімділіктің маңыздылығын түсінудің қиын жолынан өтті.&nbsp;Ең қиын сәттердің бірі 1932-1933 жылдардағы аштық болды, Қазақстанда ол «Ашаршылық» деген атпен белгілі болды. Осы сәтте адамдар мұқтаждардың барлығына көмектесу үшін бірікті, жанашырлық танытты, қиын жағдайға тап болғандардың барлығына қолдау көрсетті.&nbsp;Қазақстандағы этносаралық келісім өзінің бастауын қазақтардың өмірі мен дәстүрінен алатынын ұмытпауымыз керек, ағайын. Әрине, әр заманның өз қиындығы бар. Дегенмен, әр қиындықтың зілін ұлтқа, адамның шығу тегіне сайып қойсақ, бұл елдігімізге сын болмақ.Осы жерде айта кету керек, қанша жерден сыни пікірлер мен теріс сөздерге қалса да ел бірлігін сақтауда Қазақстан халқы Ассамблеясының қызметі зор. Ата заңымыз бойынша қазақстан азаматы - шығу тегіне, сеніміне қарамастан барлық құқығы жағынан тең. Ендігі жерде Қазақстан халқы ассамблеясының не қажеті бар деген сауал туады. Мен айтар едім, Қазақстан халқы ассамблеясының қажеттілігі сол – мемлекет құрушы қазақ ұлтының айналасына әртүрлі этнос өкілдерін топтастыруында. Қазақстан халқы ассамблеясы тіл мәселесін де оңтайлы көтеріп келеді. Қазақ тілі 100 пайыз қолданыстағы мемлекеттік тіл болуға тиіс. Бұны ассамблея да қолдайды. Ал тілге қатысты тұрмыстық деңгейде орын алып жатқан түсініспеушіліктер мейлі ол орыс, болсын, мейлі ол кәріс болысн, мейлі ол қазақ болсын, басқа да ұлт болсын әлі де қоғамымызда шовинисттік және өзімшілдік пиғылдың дәні бар екенін көрсетеді. Егер біз қазақ ұлты өзге этностарға өзімізді сыйлатқымыз келсе – руханият жағынан иманымызға, дәстүрімізге және тілімізге бекем болайық, тұрмыстық жағынан сыбайластықтан, көре алмаушылықтан ада, &nbsp;кәсібімізге шебер, білімде озат болайық. Мүмкін сол кезде ұлт ретінде қазақ халқын үлгі тұтып отандас орыстар балдарының атын Құдайберген, кәрістер – Жұмабай деп қояр. Өзімізді өзіміз түземей басқаларға мін айту әдептілікке жатпайтынын жақсы білесіздер.&nbsp;Этносаралық татулықты дамыту бойынша нақты нәтижелерге жету үшін келесі бағыттар бойынша мақсатты жұмыс қажет деп ойлаймын:&nbsp;- мектеп және университеттердің білім беру жүйелерінде көпмәдениеттілік доктринасын бекіту; балалар мен жастар арасында жағымсыз стереотиптердің, этносаралық өшпенділіктің және басқа ұлт өкілдерінің жеке қорлауының және нәсілдік ерекшелігінің көріну жағдайларына жауап беру;&nbsp;- әр түрлі халықтық дәстүрлер мен мәдени мұраларға негізделген көркемөнерпаздардың қойылымдарын дамыту; мектеп мұғалімдері мен университет оқытушыларының ұлтаралық және дінаралық диалог және бейбітшілік мәдениетіне деген көзқарастары бойынша өздерінің білімдері мен сенімдері үшін арнайы аттестаттау жүргізу;&nbsp;- мектеп оқушыларының бойында әскер мен құқық қорғау органдарына және басқаларға деген құрметті қамтитын патриоттық тәрбиенің негіздерін бұзбай, зорлық-зомбылыққа деген теріс көзқарасты қалыптастыру мақсатында мектеп нұсқаулықтарын әзірлеу, мұғалімдер мен ата-аналарға арналған арнайы курстар құру.

Қазақстан және Қызылорда облысының жаңалықтары