<a href="https://kyzylorda-news.kz/">Kyzylorda-news.kz.</a> Қала тазалығына үлес қосу – туған жерге деген қамқорлық болып табылады. Қаланы қоқыстан тазартып, көрікті жерге айналдыру мақсатында көптеген жұмыстар атқарылып келеді.«Тазалық – табалдырықтан басталады», демекші қоршаған ортаның тазалығына жауапкершілікпен қарау – әрбір азаматтың басты міндеті. Тазалықты жанына серік еткен сырдариялықтар ерекше белсенділік танытуда.Осы орайда Аудан көлемінде санитарлық жағдайды жақсарту, кенттің келбетіне өң беру, абаттандыру, көгалдандыру жұмыстарын оңтайландыру мақсатында барлық аудандық қызмет көрсетуші мекемелер, коммуналдық салалар мен мемлекеттік органдардың қатысуымен сенбілік өткізді.Сенбілікке қатысқан азаматтар арықтарды тазарту, күл-қоқыстарды шығару, талдарды әктеу, арам шөптерді шабу жұмыстарын жүргізді. Жалпы сенбілікке 1000-нан аса адам мен 5 арнайы техника жұмылдырылды.«Тазалық – мәдениеттіліктің өлшемі» деген бар. Осы ретте, аудан тұрғындарын аудан көлеміндегі жүргізіліп жатқан санитарлық тазалық жұмыстарына немқұрайлы қарамай, жанашырлық танытып, бірлесе атқаруға шақырамыз!Тазалық табалдырықтан басталады десек, өз аулаларыңыз бен үй айналасын тазарту аудан ажарына қосқан үлкен үлесіңіз және мәдениеттілігіңіздің белгісі болар еді.&nbsp;&nbsp;

Сырдария ауданында сенбілік өтті

<a href="https://kyzylorda-news.kz/">Kyzylorda-news.kz.</a>&nbsp; Аралда соңғы жылдары кәсіпкерлік көкжиегі кеңіп келді. Түрлі кәсіпкерлік нысандар бой көтеріп, сапалы қызмет түрлері ұсынылып жүр. Өйткені мемлекет тарапынан кәсіпкерлерге жасалып жатқан қолдау жоғары. Бұл көңіл қуантады. Өз ісін қолға алып, халық қажетін өтеумен қатар, табысқа кенеліп отырған жандар баршылық. Әсіресе ауылда кәсіпкерлікке ден қойғандар көбейген. Солардың қатарында Темірхан Сүйеуов пен Айнұр Эдилбаева да бар.&nbsp;Бұл жандардың жарасымды шаңырақ болғанына да жиырма жылға тарта уақыт болды. Айнұр – қырғыз ұлтының өкілі. Жақсықылыштық жігіт Темірханмен Алматы қаласында жұмыс істеп жүріп танысқан. Жарасым тапқан екі жас көп ұзамай шаңырақ көтереді. Осылайша 2005 жылы Жақсықылыш кентіне келін болып түскен Айнұр қазірде елге сіңісіп кеткен. Ағайын-туыспен де, көршімен де тату тірлік кешіп, алты баланы өмірге әкелді. Отағасы Темірхан 15 жылдан бері шаштараздық кәсіпті меңгеріп, кенттегі тұрғындарға қалтқысыз қызмет атқарып келеді.&nbsp;<blockquote>Отбасы болған соң жанұяны асырау ердің міндеті. Бұрындары әртүрлі жұмыстар істеп жан бағушы едік. Балаларым өмірге келе бастаған соң бала тәрбиесімен айналыса жүріп нәпақа табу керек болды. Бұрын да шаштараздық кәсіпке ептілігім болған соң ауылдан ашайын дедім. Оның үстіне ауылдағы үлкен де, бала да шаш алдыру үшін қалаға сабылады. Бұл артық шығын жұмсауға әкеледі. Мен кәсіпті қолға алғалы бері ауылдың халқы қызметіме жүгініп жүр. Осылай кәсібім алға басуда, – дейді отағасы Темірхан.&nbsp;</blockquote>Ер азаматтың табысқа кенелуінің артында әйелдің алып күші мен ақылы жататындығы белгілі. Темірханның жары Айнұр да өмірге перзент әкеліп, оларды тәрбиелеу ісімен айналысып, ерінің бабын келістіре білді. Сонан соң өзі де кәсіп ашып, жолдасына болысуды ойлады. Себебі қазіргі күні алты бала да есейіп мектептке барып, әжептәуір қолғанат болып қалған.&nbsp;<blockquote>Ауылда жоқ, халыққа қажет деген кәсіпті қолға алуды ойладым. Солай көлік жуу орнын ашсам деген ой келді. Себебі қазір ауылдағы әрбір үйде жеңіл көлік бар. Оларды арнайы орында жуғанды бәрі қалайды. Осылай «Атамекен» кәсіпкерлер палатасында арнайы курстан өтіп, кәсіп ашудың, жоспар жасаудың қыр-сырын меңгердім. Өткен жылы қайтарымсыз грант негізінде қаржы алуға құжаттарымды тапсырып көргем. Мемлекет менің жобамды қолдады. Осылайша гранттық қаржыға қол жеткізіп, кәсібімді бастап кеттім, – дейді Айнұр.&nbsp;</blockquote>Шаруа әйелінен кәсіпкер ханымға айналған Айнұр мұның бәрі балаларымның несібесі деп Тәңірге шүкіршілік айтады. &nbsp;Қазірде тірлігі түзу отбасын ел құрметтейді. Жаңа кәсіптерінің де тасы өрге домалай бастаған.&nbsp;<blockquote>&nbsp;Ұлыстың ұлы күнінде көлік жуу орталығының ашылу салтанатты рәсімін жасап, елдің батасын алдық. "Баталы құл арымас" деген ғой халқымыз. Әр игі істің басын осындай жақсылықпен бастау әдетімізге айналған. Мемлекеттің қолдауын алып, кәсіп бастап жатқанымыз да сол тілекші жандардың тілегінің арқасы деп ойлаймын, – деді кәсіпкер.</blockquote>Тірліктің көзін тауып, адал еңбекпен ұрпағын өсіріп отырған отбасы мұнымен тоқтап қалмай, енді кілем жуу орталығын ашсақ деген жоспарларының да бар екендігін айтып қалды. &nbsp;Нәсіп кәсіпте екендігін түсінген халықтың кәсіпкерлікке ден қоюы көңіл қуантады. Бұл да халық қажетін өтеумен қатар экономиканың өсуіне үлес қосу. Өз кезегінде мемлекет тарапынан да іс бастаймын &nbsp;дегендерге қолдау көп. Бүгінгі біздің кейіпкерлеріміз осы сөзіміздің дәлелі болмақ.

Жақсықылыштағы кәсіпкер отбасы        

<a href="https://kyzylorda-news.kz/">Kyzylorda-news.kz.</a> Қазақстанда азаматтар мен бизнес үшін бірқатар жаңа цифрлық сервисті іске қосу және «Электрондық үкіметтің» архитектурасын жаңғырту жоспарланып отыр. ҚР Премьер-Министрі Әлихан Смайыловтың төрағалығымен өткен Цифрландыру мәселелері жөніндегі комиссия отырысында осы және басқа да мәселелер қаралды, деп хабарлайды ҚР Үкіметінің баспасөз қызметі.Цифрлық даму, инновациялар және аэроғарыш өнеркәсібі министрі Бағдат Мусин бүгінгі таңда мемлекеттік органдардың биыл іске асыру жоспарланып отырған 66 цифрлық бастамасының тізбесі пысықталғанын баяндады.Олардың ішінде мүгедектікті белгілеу үшін медициналық-әлеуметтік сараптаманы цифрландыру, мектепке дейінгі ұйымдарға қабылдау үшін бірыңғай цифрлық кезекті іске қосу, ауыл шаруашылығы жануарларын есепке алу бойынша Vet Mobile қосымшасын енгізу, әскерден босату немесе оны уақытша кейінге қалдыру рәсімін автоматтандыру, нотариалдық қызметтерді электрондық форматқа көшіру қызметтері бар.Осы бастамаларды іске асыру азаматтар мен бизнестің күнделікті өмірдегі мәселелерін шешуге бағытталған, енді олар қағазбастылыққа салынып, табалдырық тоздырмайды және ұзақ уақыт кезек күтпейтін болады.Сонымен қатар тұрғын үй алуға цифрлық кезек енгізу, онлайн режимде еңбек шарттарын жасасу және мобильді қосымшада жеке тұлғалар үшін кедендік декларациялаудан өту мүмкіндігі, азаматтарды медициналық профилактикалық қызметтерді алу қажеттігі немесе өз өңірінде жұмысқа орналасу мүмкіндігі туралы хабардар ету (push-хабарлама), жанар-жағармай құю станциясында мұнай өнімдерінің бар-жоғын тексеру бойынша сервисті және т.б. іске қосу жоспарлануда.Сонымен қатар деректермен жұмыс істеу мәселесі талқыланды, ол – бюрократиядан арылтудың негізгі элементі, осы орайда азаматтардан түрлі мәліметтер сұратылмауы керек.Премьер-Министр ұсынылған бастамаларды мақұлдады, сондай-ақ цифрландыруды ілгерілету және қызмет көрсетудің проактивті форматын кеңейту халықтың өмір сүру сапасына оң әсерін тигізетінін атап өтті.Сондай-ақ отырыста жер қатынастарын цифрландыру барысы қаралды. Осы жұмыс аясында Жылжымайтын мүліктің бірыңғай мемлекеттік кадастрын кезең-кезеңмен іске қосу жоспарланып отыр, оның негізінде жер ресурстарының жария кадастрлық картасы және электрондық сауда алаңы іске асырылатын болады.Әлихан Смайылов АШМ-ге ауыл шаруашылығы жерлерін цифрландыру процесін ұйымдастыру тәсілдерін қайта қарауды тапсырды.Одан бөлек, отырыс барысында республика өңірлерін кең жолақты интернетпен қамтамасыз ету жөніндегі шаралар және 5G желісін таратудың техникалық мәселелері талқыланды, сондай-ақ сапалы құрылымдалған деректер негізінде мемлекеттік басқаруды цифрлық трансформациялау тәсілдері қаралды.

Азаматтар мен бизнес үшін бірқатар жаңа цифрлық сервисті іске қосу жоспарланып отыр - Үкімет

<a href="https://kyzylorda-news.kz/">Kyzylorda-news.kz.</a> Қазір дамыған елдердің экономикасын шағын және орта бизнес пен туризмнен түсетін кіріс көзі арттырып тұр. Сарапшылардың айтуынша туризмге әлемдік жиынтық өнімнің 10 пайыздайы тиесілі, яғни бұл сала мұнай және мұнай өнімдерін, автокөліктерді экспорттаудан кейінгі үшінші орында екен. Бір өкініштісі, біздің ел тұмса табиғаты, тарихи орындары, көне жәдігерлері мен жауһазан жерлері бола тұра туризм көшінен әлдеқайда қалып келеді. Басқасын айтпағанда өндірісі мен өнері, спорты мен сан саласы, әлеуметі мен экономикасы өрлеу жолында келе жатқан Жаңақорған ауданында осы туризм саласы әлі де еңсе көтере алмай келеді. Осы бағытта мамандармен тілдесіп, талдап-таразылап көрген едік.&nbsp;Қазір қалтасы мен қолында қаржысы барлар көбіне шетелге шығып демалғанды дұрыс көреді. Ел көріп, жер көріп, өзгені танығанға не жетсін. Бірақ демалуға тірнектеп жинаған қаражат өзге елдің қазынасын қампайтып, өзіміздікін ортайтып жатқанын түсінгіміз келмейді. Отандық туризмнің ұтылатыны – осы тұс. «Елде неге демалмайсың?» деп сұрай қалсаң, жауап дайын. Сын көтермейтін сервис жайын сөз етіп, шектен шыққан қымбатшылықты қозғайды. Ол дұрыс енді.&nbsp;Әлбетте, өңірдегі туризмді өркендетпей, ішкі туризмді дамыту туралы сөз айту артықтау сияқты. Осы ретте ауданның туристік әлеуеті туралы сөз қозғамақпыз.Тау мен тасы, өзені мен көлі, жазық даласы, орманды алқабы бар киелі өлкенің қойын-қонышы тұнып тұрған тарих һәм шежіре. Ыстық суы мен шипалы батпағын да қосыңыз. Бізде баратын жер көп, бірақ насихаты кемшін. Жарнамасы жеткіліксіз. Сосын сол келетін туристерге қолайлы жағдай жасау маңызды. Жүйкені жұқартатын жол азабы, дамымаған инфрақұрылым, интернеттің жоқтығы – отандық туризмнің ортақ мәселесі осы.Әлем туризмінің артықшылығы неде?Біз жоғарыда атап өткендей дамыған елдердегі туризмнің басты жетістігі ол инфрақұрылымы мен жарнамасы. Мәселен, қазақтар көп баратын Түркия экономикасына туризм саласы жыл сайын 35-40 млрд АҚШ долларын алып келетін ең маңызды салалардың бірі. Туристер саны бойынша Түркия әлемдегі 6-7 орында тұрған ел. 2022 жылы Түркия50 млн-ға жуық турист қабылдаған, ең көп турист Германия, Ресей және Ұлыбританиядан.Туристтердің негізгі бөлігі Стамбул мен Анталья қалаларына барса да, ақпан айының басында орын алған жер сілкінісі, әрине, туризм саласына кері әсерін тигізетін болады. Осыған қарамай түрік Үкіметі туризмді қайта қалпына келтіруді көздеп отыр.&nbsp;Сол секілді ислам елдері ішінде араб мемлекеттеріне саяхаттаушылардың санында есеп жоқ. Дубай, Египет жне өзге де өзіндік өрнегі бар керемет мегаполистерге кім-кімнің болсын барғысы келетіні анық. Италия болса көне шаһарларымен, Франция зәулім ғимараттарымен, Германия болса әдемі табиғатымен мақтана алады. Ал, бізде осылардың барлығы бар. Жер асты және жер үсті байлығының барлығы бізде тұнып тұр.&nbsp;“Travellers' Choice Awards” халықаралық премиясының 2023 жылғы нәтижесі бойынша демалуға арналған үздік ел – Куба деп танылды.Рейтингтің екінші және үшінші орындарын Вьетнам мен Маврикий аралы өзара бөлісті. Олардың артынан Камбоджа мен Таиланд үздік бестікке енді. Кайман аралдары, Марокко, Әзербайжан және Непал да саяхаттаудың ең тамаша орындары ретінде танылған. Ең көп сұранысқа ие туристік бағыттардың үздік ондығын Польша жапты.Қазақстанның бүгіні қалай?Бұл салаға Мемлекет басшысы арнайы пәрмен беріп, нақты міндеттер жүктеді. Жыл соңына дейін елге келетін туристер саны артуын, көркем жерлердің келбетін қайта келтіруін шегелеп берді.&nbsp;<blockquote>«Әлемде орын алған пандемия салдарынан Қазақстанның ішкі туризм саласы да бәсеңдеп қалған еді. Бірақ қазір 2019 жылмен салыстырғанда туристердің саны өсіп келеді. Соңғы 9 айда ішкі туризм статистикасы 6,5 миллион болса, жыл қорытындысы бойынша бұл көрсеткіш 8 миллионға жетуі мүмкін. Ал шетелден келген туристер саны 610 мыңнан 1 миллионға дейін жетеді. Халықаралық туризм кеңесінің болжамы бойынша 2024 жылы әлемдік туризм саласы қалпына келуі керек. Ал Қазақстанда бұл болжам 2022 жылы орындалды деуге болады», деді туризм индустриясы комитетінің төрағасы Дастан Рыспеков.</blockquote>Мысалы, 2021 жылы Қазақстан өз позициясын жақсартып, 117 ел арасында 66-орынға ие болды, 2019 жылы – 140 ел ішінде 80-орында еді. Қазақстанның біз білетін Көкшетауы, Алматының әсем жерлері, тарихи өңірлері мен тауларынан тұратын облыстары саяхатшыларды қызықтырмай қоймасы анық. Ол да уақыттың еншісіндегі меже.Туризм жобаларын субсидиялау<blockquote>«Туризмдегі инвестициялық әлеуетті дамытуға баса мән беріледі. Біздің министрлік «Қазақтуризм» компаниясымен бірлесіп, инвестициялық жобалар пулын қалыптастырды. Өткен жылдың қорытындысы бойынша 40 млрд теңгеге 138 жоба іске асырылды. Биыл 288 млрд теңгеге 115 жобаны іске асыру жоспарланып отыр», – деді мәдениет және спорт вице-министрі.Қазіргі жеңілдетілген несиелеу механизмі белгіленген мерзімде шығынды ақтауға мүмкіндік бермейді. Орта есеппен қонақ үй құны 10 жылда өтеледі.«Осыған байланысты туризм жобаларын субсидиялау мерзімдерін 5 жылдан 10 жылға дейін ұзарту, сондай-ақ қаржыландыру лимиттерін 5 млрд теңгеге дейін ұлғайту қажет. Тиісті ұсынысты Ұлттық экономика министрлігіне жібердік», – деді вице-министр.</blockquote>Аудандағы ахуал қалай?Жаңақорған ауданында туризм саласы бойынша 15 субьекті тіркелген. 4 шипажай, 2 балалар лагері, 6 қонақ үй, 3 демалыс орны. Сонымен қатар бүгінгі күнге дейін «Батыс Қытай – Батыс Еуропа» көлік дәлізі бойында жалпы құны 2 млрд 556 млнтеңгені құрайтын 6 жол бойы қызмет көрсету кешендері, В санатындағы – 4, С санатындағы –2 жол бойы қызмет көрсету кешендері жұмыс жасап келеді.«Батыс Қытай – Батыс Еуропа» көлік дәлізі бойында салынған жол бойы сервистік қызмет көрсету нысандарын дамыту тұрақты түрде жалғасуда. Мәселен, «Рахат» жол бойы қызмет көрсету кешеніндегі санитарлы-гигиеналық торап ҚР Мәдениет және спорт министрініңбұйрығымен бекітілген «Кәсіпкерлік субьектілерінің СГТ – ды күтіп ұстауға арналған шығындарының бір бөлігін субсидиялау» қағидаларының талаптарына сәйкестендірілді.Бүгінгі таңда жол бойы қызмет көрсету кешендерінің сапалы қызмет көрсетілуі, ыңғайлылығы, тазалығы, оның ішінде дәретханалары, олардың күтіп-бапталуы, терминалдар мен интернет желілерінің орнатылуы арнайы бақылауда дейді жауапты сала мамандары.Жалпы Жаңақорғанның брендіне айналған шипалы батпағы шипажайлардың жиі ашылуына мүмкіндік беруде. Қазірдің өзінде аудан орталығында 4 шипажай жұмыс істеп тұр. «Жаңақорған» шипажайы АҚ, «Шипажай Жаңақорған», «Ақ-Шуақ» және «Орда-Сығанақ» ЖШС.&nbsp;2022 жылы «Жан-Арай» ЖШС жол бойы қызмет көрсету кешенінің жанынан салынып жатқан тағы бір 100 орындықты шипажай құрылысы осы жылдың1 жартыжылдығында аяқталады деп күтілуде. Жоба құны 1,2 млрд теңге. Республикадағы қайсыбір шипажайды алмаңыз, сыртқы және ішкі ағзаларды бірдей емдейтін батпағы, тұзды және минералды суы бар емдеу орындары бізде ғана. Ем алумен қатар емделушілерге би кештері, концерт, киелі мекендерге әр аптаның жексенбісінде Арыстан баб, Түркістан, Сауран, өзіміздегі киелі жерлер Қорасан ата, Төлегетай-Қылышты ата кесенелеріне саяхат жасау ұйымдастырылған.Сондықтан келушілер саны да жылдан-жылға артып отырады. Әрине, келушілер емдік бағытта болмаса, туристік түсінікпен келмейді.&nbsp;Одан бөлек, Апанғақ, көне шаһарлар да бар бізде. Көркем жерлерді жеке кәсіпке айналдырып, табыс тауып отырған аймақта аудандар да жоқ емес. Мәселен, Шиелі ауданындағы “Бәгеқұм” демалыс орны маусымдық кезеңде әжептеуір қазынаны толтырады. Бізде де бай-бағландар жетеді, бірақ оны кім ойласын. Тау бөктерінен зәулім ғимарттар салып, керемет демалыс орнына айналдыруға болады. Бұл жөнінде әкімдікте талай талқылау болуда, бірақ қалталы азаматтар үйреншікті төрт түлікті көбейтіп, мемлекеттен тегін субсидияны алуға дағдыланып алған. Ол да шешілер. Жалпы туризмге қатысты шешімін таппай отырған мәселелер біздің ауданда аз емес. Бұл жайында аудандық кәсіпкерлік және туризм бөлімнің бас маманы Бекзат Омарова нақты жауап берді.&nbsp;<blockquote>«Жаңақорған ауданында белгіленген туристік маршруттар бойынша бүгінгі күні шешімін таппай келе жатқан мәселелер жетерлік.Соның бірі Ақүйік ауылдық округінің оңтүстік шығысында 25 шақырым қашықтықта орналасқан «Қатын қамал» үңгірі. 2021 жылы «Қатын қамал» үңгірін туристік орынға айналдыру мақсатында 25 шақырым жолды салу жоспарланып, облыстық жолаушылар көлігі және автомобиль жолдары басқармасынахатпен қажетті қаржы көрсетілген бюджеттік өтініммен ұсыныс хат жолданды. Алайда, бұл мәселе бүгінгі күнге әлі шешімін тапқан жоқ. Сонымен қатар, ортағасырлық тарихы бар Сығанақ қалашығын қайта жаңғырту, зерттеу жұмыстары баяу жалғасуда. Жыл сайын республикадан, облыстан қаралған мардымсыз қаржылар көне қаланың архитектуралық келбетін толық айқындауға жеткіліксіз деп ойлаймын», – деді бас маман.&nbsp;</blockquote>Қаратау сілемдеріндегі ежелгі таңбалы тастар,Бесарық өзенінің шатқалындағы ежелгі адамдардың жазған петроглифтері. Таңбалы тасқа Жаманбай батыр ауылдық округінен ары қарай 20 шақырым жол салынып, қолжетімді болып жатса ауданымызда туризмнің дамуына өз үлесін қосары сөзсіз. Бұл ретте, Жаманбай батыр ауылдық округінің басшылығы сол тау етегінде кәсіптерін жүргізіп жатқан кәсіпкерлердің кәсібін жандандыру мақсатында төменгі пайызбен несие алуларына сүйемелдеу жұмыстарын жүргіссе дейді Бекзат апайымыз.&nbsp;<blockquote>«Киелі жерлеріміз тарихи қасиетті нысандар тізіміндегі Қорасан ата кесенесі, Төлегетай-Қылышты ата кесенелерін ұрпақтары өз бақылауларына алып отыр. Бюджеттің есебінен асфальт жолдары салынған. Сонымен қатар, Қорасан ата кесенесі, Ақтас мешіті басынан зиярат етіп барушылар үшін 15 орындықты, заманауи талаптарына сай қонақ үйлер салынған. Түйінін айтқанда, ежелгі «Қатын қамал» үңгіріне, «Таңбалы тасқа» қарай баратын жолдар салу және Сығанақ қалашығын қайта қалпына келтіріп, аспан астындағы мұражайға айналдыру мақсатында бюджеттен қомақты қаражаттың қаралуы тиіс», – деді бас маман.</blockquote>

Туризм: Жаңақорғандағы жағдай қалай?

<a href="https://kyzylorda-news.kz/">Kyzylorda-news.kz.</a> &nbsp;Апта басында Талдықорған қаласында ауыр атлетикадан жеке жаттығулар бойынша 17 жасқа дейінгі жасөспірімдер арасындағы ел чемпионатының жалауы желбіреді. Елдің жас зілтеміршілері бақ сынаған ҚР-ның чемпионатында Сыр елінің қоржынына бір алтын жүлде түсті. 71 келіде өнер көрсеткен жаңақорғандық Аянат Жұмағали алтыннан алқа тағынып, тұғыр биігінен көрінді. Чемпион қызын жерлестері арнайылап күтіп алып, құрмет көрсетті.Жаңақорған ауданының мәдениет және спорт бөлімінің басшысы Әбілқайыр Сыздықов, сектор меңгерушісі Махмут Рахымжанов, аудандық мәслихат депутаты Серік Мырзабаев, №7 спорт мектебінің директоры Сламхан Боранбаев, БАҚ саласының ардагері Ерубай Қалдыбек және ата анасы мен жерлестері қошемет білдіріп, жеңісімен құттықтады. №7 спорт мектебінің түлегіне Сламхан ағамыз бен аудандық мәслихат депутаты Серік Мырзабаев сый-құрмет көрсетті.<blockquote>«Аянаттың жеңісі ауданның ғана емес, Сыр өңірінің жеңісі. Алла амандығын берсе, қызымыз елдің байрағын әлем елдерінің алдында биік тұғырға қондырып, әнұранымызды шырқататын болады. Біз оған сенімдіміз, өйткені, спортшымыз әлі жас, болашағы әлі алда. Бапкерлері мен ата-анасына алғыс айтамыз, елдің мақтанышына айнала берсін», – деп мәдениет және спорт бөлімінің басшысы ізгі тілегін білдірді.&nbsp;</blockquote>Аянат чемпионатта жұлқа көтеруде 85 келіні бағындырса, серпе көтеруде 106 келіні ырқына көндіріп, қоссайыстың нәтижесімен 191 кг-ды еңсеріп, жеңімпаз атанды. Айта кететіні, ол жақында Албанияда өткен Әлем чемпионатына қатысып, үздік бестікке енген болатын. Бұл керемет нәтиже, енді ересектер көшіне ілесіп, бағын сынауға ниетті.<blockquote>«Қазақстан біріншілігі Аянаттың спорттық мансабындағы екінші биік белес. Бұл жолы оның үздік екенін барлығы мойындады. Енді жаз айында спартакиадаға қатысып, артында Индияда өтетін Азия чемпионатына барамыз. Алла сәтін салса, әлемдік ареналарда атой салып, олимп шыңын бағындыруға барымызды салатын боламыз», – деді бапкері Берік Өтешов.</blockquote>Жалпы, Жаңақорғанда бұл спорт түрі соңғы бес жыл ішінде еңсе көтеріп, жас спортшыларды шыңдап үлгерді. Әсіресе, бұрымдылардың қатары артып, қызығушылығы оянып келеді. Солардың көшінде жүрген Аянаттың бүгінгі жетістігі аудан үшін үлкен абырой болды. Оның ізінен ерген Беріктің шәкірттері облыста озық жүр. Аймақ чемпионаттарында олжалы оралып келеді. Чемпион қызға құрмет көрсете келген өзі оқыған №169 Н.Ильялетдинов атындағы мектеп оқушылары мен ұстаздары да қуанышын бөлісіп жатты. Ал, әкесі қызының ертеңіне елдің үміт артып отырғанын біледі. Сондықтан қызына бағыт-бағдар беріп, осы сенім үдесінен шығуға батасын беріп келеді.<blockquote>«Алғашында Аянатты басқа спорт түріне беруге тырыстық. Бірақ өзінің қалауы ауыр атлетика болды. Осылай ұстазы Беріктен спорттың әліппесін үйренуді бастады. Аллға шүкір, қызымыз ауданның абыройын асырып, мерейімізді үстем етіп келеді. Алматы қаласындағы Қажымұқан Мұңайтпасов атындағы республикалық спорт мектеп интернатынан шақырту алып, сонда білім алуда. Бұйырса, 2028 жылғы Олимпиада ойындарында көріп қалам ба деген арман бар. Ең бастысы, спорттық мансабын биіктете беруі тиіс. Құрмет көрсетіп жатқан жандарға мың алғыс айтамын», – деді әкесі Жомарт.</blockquote>Иә, 5 жылдан соң Аянат Олимп шыңының алтынын елге алып келеді деп сенеміз. Ол уақыттың көшінде, бәрінен бұрын ауданның ауыр атлетика спортының өсіп келе жатқаны көңіл қуантады.

Жаңақорғандық бойжеткен жеңіс тұғырында

<a href="https://kyzylorda-news.kz/">Kyzylorda-news.kz.</a> &nbsp;Үндістанның Нью-Дели қаласында бокстан әйелдер арасында өтіп жатқан әлем чемпионатында қазақстандық Карина Ибрагимова бүгін финалдық жекпе-жегін өткізеді, деп хабарлайды <a href="https://www.inform.kz/kz/bokstan-ach-bugin-karina-ibragimova-finaldyk-zhekpe-zhegin-otkizedi_a4049478">ҚазАқпарат.</a>Қазақстандық боксшы 57 келіге дейінгі салмақта италиялық Ирма Тестамен қолғап түйістіреді.Қос спортшы Астана уақытымен сағат 18.30-да басталатын кешкі сессияда үшінші жекпе-жекте рингке шығады.Әлем чемпионаты «Qazsport» телеарнасынан тікелей эфирде көрсетіледі.Осыған дейін Азия чемпионы атанып, екі мәрте әлем біріншілігінің қола жүлдегері болған К.Ибрагимова енді кемінде күміс медаль алады.Ирма Теста да осал қарсылас емес. Ол – 2020 жылғы Токио олимпиадасының қола, өткен жылғы әлем біріншілігінің күміс жүлдегері, 2019 жылғы Еуропа чемпионы.Тағы бір қазақстандық Ләззат Күнгейбаева аса ауыр салмақта ертең алтын үшін таласады. Ал Алуа Балқыбекова, Надежда Рябец, Валентина Хальзова және Фариза Шолтай қола жүлдегер атанды.

Карина Ибрагимова финалдық жекпе-жегін өткізеді

<a href="https://kyzylorda-news.kz/">Kyzylorda-news.kz.</a> Қармақшы ауданына қарасты Алдашбай ахун ауылында материалдық көмек көрсету жұмысы жүргізілді.Ауылдық клуб үйінің жұмыс кестесіне сәйкес, &nbsp;Наурыз мерекесі қарсаңында мәдени-ісшаралар мен атқарылатын жұмыстарды іске асыру мақсатында &nbsp;мүмкіндігі шектеулі азамат клуб үйінің белсенді үйірме мүшесі Қайрат Кәрібозовқа материалдық көмек көрсетілді.Қазіргі таңда Қайрат эстрадалық ән айтып, қалың көпшіліктің алғысын алып жүр. Анасы Ырыстай ұйымдастырушыларға батасын беріп, үлкен алғысын білдірді.

Қармақшыда материалдық көмек көрсету жұмысы жүргізілді

<a href="https://kyzylorda-news.kz/">Kyzylorda-news.kz.</a> &nbsp;Сырдария өзенінің сол жағалауында 7 қабатты 6 тұрғын үй бой көтереді.&nbsp;Бұл туралы Өңірлік коммуникациялар қызметінің ұйымдастыруымен өткен көшпелі брифингте БАҚ өкілдеріне қалалық құрылыс бөлімінің басшысы Әнуар Айдын баяндап берді.<blockquote>«Бүгінгі таңда 1 тұрғын үйдің конкурсын «Аман Құрылыс» ЖШС-і жеңіп, құрылысын бастап кетті. Қалған үйлердің конкурс нәтижесі сәуір айында белгілі болады. Жалпы саны 504 пәтер болатын үйлер заманауи талапқа сай. Әрбір үйде лифт қамтамасыз етіледі. Сондай-ақ тұрғын үйлер сейсмикалық талаптарға толық сәйкес келеді. Аймақ басшысының тікелей қолдауымен жоба келер жылы қолданысқа беріледі деп күтілуде» деді Айдын Серікұлы.</blockquote>

Сол жағалауда 7 қабатты үйлер бой көтереді

<a href="https://kyzylorda-news.kz/">Kyzylorda-news.kz.</a> 25 наурыз күні Қазақстан аумағының басым бөлігінде қолайлы метеорологиялық жағдай сақталады.«Қазгидромет» РМК баспасөз қызметі таратқан мәліметке сенсек, 25 наурыз, сенбіде еліміздегі қалалардың басым көпшілігінде метеорологиялық ахуал бірқалыпты болады.Тек Қарағанды, Жезқазған, Теміртау, Өскемен, Семей, Риддер, Ақтөбе, Ақтау, Шымкент, Астана және Алматы қалаларында ауа сапасы біршама нашарлайды.Қолайсыз метеорологиялық жағдай - атмосфералық ауаның беткі қабатында зиянды заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.ҚМЖ жағдайында елді мекендердегі атмосфералық ауаның сапасы нашарлауы ықтимал.

Бүгін 11 қалада ауа сапасы нашарлайды

<a href="https://kyzylorda-news.kz/">Kyzylorda-news.kz.</a> 1 сәуірден бастап реэксорттау үшін Қазақстанға жеткізілетін тауарларды онлайн бақылау жүйесі іске қосылады. Бұл туралы Financial Times басылымы жазды.«Біз жапсарлас санкцияларға байланысты тәуекелдерді жақсы түсінеміз, сол себепті әріптестеріміздің барлығымен тауар аламасуды мұқият бақылаймыз» дейді басылым дереккөзі. Оның айтуынша, Қазақстан реэкспортты азайту бағытында үнемі жұмыс істеп келеді.Қазақстанның ұлттық статистика бюро мәліметінше, 2022 жылы Қазақстаннан Ресейге тауар экспорттау көрсеткіші 25 пайызға артқан.АҚШ пен Еуроодақтің пайымынша, Қазақстан Ресейге санкцияларды айналып өтуге көмектесіп отыр. Ресми Астана мұны бірнеше мәрте жоққа шығарған. Бұған дейін Bloomberg Ресей зымыран жасауға пайдаланатын микрочиптерді үшінші бір елдің көмегімен алып отырғанын хабарлаған. Агенттік мұндай мәліметті еуропалық лауазымы жоғары бір дипломатқа сілтеме жасай отырып таратты.Қазақстанда қайта экспортталатын тауарларға бақылау күшейтілетіні жөніндегі ақпаратқа қатысты пікір білдірген Ресей президентінің баспасөз хатшысы Дмитрий Песков Мәскеу Батыс елдерінің қысымы жөнінде білетінін айтты.<blockquote>«АҚШ бастаған ұжымдық Батыс елдері бірқатар мемлекеттерге ашық, дөрекі қысым көрсетіп жатқаны жаңалық емес. Қазақстан Ресей үшін одақтас және үлкен дос. Біз тәуекелдерді азайту үшін серіктестерімізбен тығыз байланыста боламыз» деді Песков.</blockquote>

Қазақстан Ресейге қайта экспортталатын тауарларға бақылауды күшейтеді

<a href="https://kyzylorda-news.kz/ru/">Kyzylorda-news.kz</a>. Қазақ «Ең үлкен тәрбиеші – еңбек» дейді. Осы бағытты бүгінгі өскелең ұрпақ та ұстанып келеді. Тұғыры биік туған елдің мақсат-мұраты мен мүддесін жеке басынан биік қоятын дарабоздардың бірі – Жаннұр Біләлқызы. Ол өңірдегі іргелі білім нысандарының қарашаңырағы – Қорқыт ата атындағы ҚМУ-дің студенті. Бүгінде қоғамдық жұмыстардың бел ортасында көрініп жүрген жастың арманы – асқақ.Жаннұр – Қорқыт ата атындағы Қызылорда университеті Инженерлі-технологиялық институты Су шаруашылығы және жерге орналастыру кафедрасының «Жерге орналастыру» мамандығының 2 курс студенті.Университет табалдырығын аттаған бой да, өзінің белсенділігімен, ізденімпаздығымен білімгерлер арасында ерекше көзге түсіп келеді. Қазір өзі 2 курста оқыса да, Қорқыт ата атындағы Қызылорда университеті Инженерлі-технологиялық институтының студенттік кеңес төрағасы.Белсенді жастардың қашанда қай ортада болмасын бағасы биік болары сөзсіз. Жас та болса, бас болып осындай үдеден шығып жүрген Жаннұрдың бағындырған белестерін де ауыз толтырып айтуға болады. Сабақта үлгерімі жақсы, қоғамдық жұмысты да қатар алып жүрген қаршадай қыздың марапаттары да жетерлік.Атап айтсақ, Қорқыт ата атындағы Қызылорда университетінің проректоры Базартай Жандос Нұртайұлының, «AMANAT» партиясы «Jastar Ruhy» ЖҚ Қызылорда облыстық филиалының төрағасы Медет Жорабектің, «AMANAT» партиясы Тұран филиалы атқарушы хатшысы Назаров Есенжол, облыстық Жастар ресурстық орталығының директоры Талғат Тілестің, Инженерлі-технологиялық институтының директоры Абжалелов Бақытбек Байдосұлының алғыс хат, дипломдарымен марапатталған. Сондай-ақ былтыр «Жылдың үздік волонтеры» деген номинацияны иеленді.Жалпы, волонтер – қайырымдылықтың бір қанаты. Ерікті болу ерлікпен тең. Бүгінде Жаннұр сияқты жастардың өз еркімен қоғамға пайдасын тигізуді көздейтін еріктілердің қатары жыл санап артып келетіні қуантады.<blockquote>«Тірі болсам, қазаққа қызмет етпей қоймаймын» деген Алаш зиялысы Әлихан Бөкейхановтың ұстанымын алға қоямын.</blockquote>Мына қоғамға қажет екеніңді сезінуден, еңбегіңнің нәтижесін көруден артық бақыт жоқ» дейді ерікті жас.&nbsp;Еліміздің өскелең ұрпақтарының арасында осындай жас таланттардың бой алдырып жүргені көңілге серпін сыйлайды. Алдағы уақытта да осындай озық ойлы әрбір жас қазақтай дархан елдің айбынын асқақтатып, мерейін үстем етері, мәртебесін биіктетері анық.&nbsp;

Жаннұр Біләлқызы: Еңбегіңнің нәтижесін көруден артық бақыт жоқ»

<a href="https://kyzylorda-news.kz/">Kyzylorda-news.kz.</a> Шиелі ауданына қарасты Сұлутөбе ауылының тұрғыны Қалдан Шәмшиев 80 жастан асса да, көкпардан қол үзген емес.&nbsp;Наурыз көкпары экс-шабандоз Қалдан ақсақалдың батасымен басталды. Ұлттық спортқа ақсақал аса ықыласпен қатысып, жас шабандоздарға мастер класс көрсетіп, өзінің кезекті салымын салды. Қолы қарулы кісі ешқандай спортпен айналыспаса да, күреске өте мығым. Ақсақал 21 жасында екі ортан жілікті қосып сындырған деседі. Жасында жылқышы болған атамыздың тірідей қасқыр ұстағанын көргендер де бар екен. Тіпті жаралы қабанды бір ұрып өлтірген сәтін бүгінге дейін ауыл тұрғындары ауыз толтырып айтады. Көкпар десе делебесі қозатын ақсақалдан наурыз көкпарының ертесіне шаршадыңыз ба?- деп сұрап едік. Экс шабандоз: «Шаршағаным жоқ, осы аулаға тал отырғызып келіп отырмын» - деп жауап берді.Айта кетейік, бүгінде ақсақал ауласын гүлзарға айналдырған.

Қазақстан және Қызылорда облысының жаңалықтары