<a href="https://kyzylorda-news.kz/">Kyzylorda-news.kz.</a> Қызылорда облысының прокуратурсы кәсіпкерлік ортадағы жүйелі мәселелерді, әкімшілік кедергілерді және бизнес өкілдеріне қысым көрсетуді анықтау мақсатында бизнес өкілдерімен кездесу тұрақты түрде өткізіліп келеді.Кезекті кездесу барысында Қызылорда қаласында орналасқан қоғамдық тамақтандыру орындарының өкілдері полиция органдарының Кальянды, яғни Қорқорды тұтынуды анықтау мақсатындағы тексерістеріне шағым білдірді.Зерделеумен бұл бағыттағы мемлекеттік бақылауды жүзеге асыру санитариялық-эпидемтологиялық бақылау органдарының құзыретіне жататыны анықталды. Осылайша Полиция органдары кәсіпкерлік субъектілеріне заңсыз тексеріс жүргізіп, негізсіз әкімшілік жауаптылыққа тартылғаны анықталды. Аталған мәселені талқылап, полиция органдарының бизнеске заңсыз араласуын болдырмауға шаралар белгілеу мақсатында &nbsp;мәжіліс өткізілді.Мәжіліске Қоғамдық тамақтану нысандарының өкілдері, облыстық полиция департаментінің, қалалық полиция басқармасының, Санитариялық-эпидемиологиялық бақылау департаментінің, қалалық басқармасының, Кәсіпкерлер палатасының басшылары қатысты.&nbsp;Негізінен «Халық денсаулығы және денсаулық сақтау жүйесі туралы» Кодекстің талаптарына сәйкес қоғамдық тамақтандыру орындарында Қорқор тұтынуға тыйым салынған, тек осы насандардағы Денсаулық сақтау министрінің 10.12.2020ж. №246/2020 бұйрығымен бекітілген талаптарға сәйкес келетін арнайы бөлінген орындарда тұтынуға рұқсат және бұл саладағы мемлекеттік бақылауды жүзеге асыру Санитариялық-эпидемиологиялық бақылау органдарына жүктелген. Алайда полиция қызметкерлері қоғамдық тамақтандыру орындарын аралап, анықтағлан жағдайда Қорқорды тұтынған адамға ӘҚБтК-тің 441-баптың 1-тармағымен хаттама толтырып, одан әрі тексеру әрекетін жүргізіп, кафе иесіне ӘҚБтК-тің 441-баптың 3-тармағымен хаттама толтырған. Осылайша полиция қызметкерлері кәсіпкерлік нысандарға тексеріс жүргізудің тәртібін бұзып, кәсіп иелерін негізсіз әкімшілік жауаптылыққа тартылған.Жиналыс қорытындысымен Полиция органына «Қазақстан Республикасының iшкi iстер органдары туралы» Заңының 6-бабы 2-тармағында көзделген негіздер болған жағдайда кәсіпкерлік нысандарға қарап тексеру жүргізу, Қорқорды тыйым салынған жерде тұтыну фактілерін растайтын құжаттардың (хаттама, түсінік, фото-бейне жазбалар) көшірмелері тіркелген жолданыммен мемлекеттік бақылау жүргізіп, ӘҚБтК-тің 425-бабымен әкімшілік жауаптылығын шешу үшін Санитариялық-эпидемиологиялық бақылау органдарына жүгіну белгіленді. Сонымен қатар Санитариялық-эпидемиологиялық бақылау департаментіне Кәсіпкерлер палатасымен бірлесіп облыс көлемінде бір айлық мерзімде қорқорды пайдалануға салынған тыйымдар мен пайдалану тәртібін реттейтін талаптарға түсіндірме жүргізу ұсынылды.Сонымен қатар жыл басында мемлекеттік кірістер органдарының мәмілелерді жарамсыз деп танумен байланысты сотқа жаппай жүгіну әрекетіне шағымдарын білдірген болатын. Бұл мәселені де зерделеп, Мемлекеттік кірістер органдарының жеткілікті дәлелсіз кәсіпкерлерді сот процесіне тартылып келгені анықталды.Мысалы өткен жылы салық органдары 500 кәсіпкердің мәмілелерін жарамсыз деп тану туралы сотқа 315 талап арыз беріліп, оның жартысына жуығы мемлекеттік кірістер органдарының пайдасына шешілмеген. Бұл өз кезегінде 200-ден астам кәсіпкердің қалыпты жұмысына кері әсерін тигізген.&nbsp;Сондықтан кәсіпкерлерді сотқа негізсіз тартуды болдырмау мақсатында Прокуратура, Мемлекеттік кірістер органы, Кәсіпкерлер палатасы болып үш жақты меморандумға қол қойылды.Меморандумға сәйкес мемлекеттік кірістер органдары сотқа жүгінбес бұрын үш органның өкілдерінен құралған комиссияның отырысында қаралып, жеткілікті негіздер болған жағдайда сот органдарына талаппен жүгінетін болды. Жалпы ағымдағы жылдың 1 тоқсанында кәсіпкерлердің құқықтарын қорғау саласында 25 прокурорлық қадағалау актісі енгізілді, қаралу қорытындысымен 306 актінің, 93 әкімшілік хаттамалардың күші жойылды, 500 кәсіпкердің құқығы қорғалып, 68 кәсіпкерге тиесілі 53 млн. теңге қаржысы өндірілді.«Халық үніне құлақ асатын мемлекет» тұжырымдамасын іске асыру аясында облыстың барлық прокуратура органдарында кәсіпкерлердің шағымдарына жедел әрекет ететін мобильді топтардың жұмысы жүргізілуде.Байланыс нөмерлері прокуратураның, әкімдіктің ресми сайттарында орналастырылған және оның жұмысы туралы әлеуметтік желілерде кеңінен таратылуда. &nbsp;Ағымдағы жылдың 1-тоқсанында осы мобильді топтарға кәсіпкерлерден 124 сигнал түсті, оның 70-не заң талаптары түсіндірілсе, 54 шағым өз дәлелін тапты. Қолданылған қадағалау актісімен 54 кәсіпкерге тиесілі 26,1 млн. теңге мемлекеттік сатып алу шартының орындалуын қамтамасыз ету қаржысы өндіріліп берілді. Сонымен қатар прокуратурамен Мемлекеттік кірістер органдарының «Түбіртекті талап ет» пилоттық жобасының іске асырылуы талданды. &nbsp; &nbsp; &nbsp;&nbsp;Пилоттық жоба бойынша дүкенге барған тұтынушы сатып алған зат үшін чек бермеген жағдайды бейне &nbsp;камераға түсіріп, дүкеннің атауын, орналасқан мекен-жайын көрсетіп, ұялы телефонға жүктелген арнайы бағдарламаның көмегімен хабарлама беру мүмкіндігі қаралған. Осы пилоттық жоба бойынша 712 дүкенге әкімшілік жаза қолданылған.Заңдылығын зерделеумен чектің берілмегенін растайтын жеткілікті материалсыз 93 әкімшілік істер анықталып, енгізілген прокурорлық қадағалау актісінің қаралу қорытындысымен күштері жойылды.Оған қоса осы әкімшілік істердің ішінде 8 жағдайда мемлекеттік кірістер органдарының қызметкерлері дүкендерге тексеріс жүргізудің тәртібін бұзғаны анықталып, тиісінше ӘҚБтК-тің 175-бабымен әкімшілік іс қозғалып, негізінен қарау үшін сотқа жолданды.Бүгінгі күнге 3 салық қызметкеріне осы баппен айыппұл салынса, қалған әкімшілік істер соттың өндірісінде. Сонымен қатар салықтық берешекті өндіру туралы жеке тұлғаға қатысты қабылдануы тиіс салықтық бұйрықтардың 306 кәсіпкерге заңсыз шағырылғаны анықталып, қолданылған шаралармен аталған бұйрықтардың күші жойылды.

Прокуратура: Қызылордада кәсіпкерлердің қызметіне заңсыз араласу мәселесі бақылауда

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданы әкімдігінің мәжіліс залында «Сыбайлас жемқорлықтың алдын алу және оған қарсы іс-қимыл» №4 үлгілік базалық бағытын түсіндіру мақсатында кездесу өтті.&nbsp;Кездесуге аудан әкімінің орынбасары Т.Нұртазаев, облыс әкімдігі жанынан құрылған жұмыс тобының мүшелері, облыс әкімі аппаратының әдеп жөніндегі уәкілі М.Шакирбаев, облыс әкімі аппаратының мемлекеттік-құқықтық жұмыстар бөлімінің бас инспекторы Б.Шерниязов, облыстық экономика және қаржы басқармасының жобалық басқару бөлімінің статисті Ә.Абсадық, «ZOOM» платформасы арқылы Қызылорда облысының Әділет департаментінің әкімшілік-құқықтық бөлімінің бас маманы Н.Бодыбаев және аудан әкімі аппаратының қызметкерлері, дербес бөлім басшылары, мемлекеттік қызметшілер, «ZOOM» платформасы арқылы кент, ауылдық округ әкімдері, заңгерлері мен бағынысты квазимемлекеттік сектор ұйымдарының басшылары қатысты.Кездесу барысында аудан әкімінің орынбасары Т.Нұртазаев сыбайлас жемқорлық әлеуметтік-экономикалық даму үдерісін, нарықтық экономикалық құрылуын, инвестициялар тарту процесін тежейтіндігін жеткізіп, ел дамуына елеулі қауіп төндіретіндігіне тоқталды.<blockquote>&nbsp;Сырдария ауданында сыбайлас-жемқорлықпен күрес жүйелі түрде жүргізіліп келеді. Мемлекеттік қызметкерлерге таза, нақты, әділетті түрде жұмыс жасау керектігін үнемі ескертіп келеміз. Сыбайлас-жемқорлыққа қатысты заң бұзушылықты болдырмау мақсатында әрбір мекемеде семинар кеңестер өткізіліп тұрады. Әрине, жемқорлық жайлаған қоғамда елдің дамуы бәсеңдейді. Сондықтан біз кеселмен күресті тоқтатпаймыз, – деді аудан әкімінің орынбасары. &nbsp;</blockquote>Күн тәртібіндегі мәселе бойынша облыс әкімі аппаратының әдеп жөніндегі уәкілі М.Шакирбаев, «Сыбайлас жемқорлыққа қарсы заңнама нормаларын сақтау жобасы аясында», облыс әкімі аппаратының мемлекеттік-құқықтық жұмыстар бөлімінің бас инспекторы Б.Шерниязов «Сыбайлас жемқорлық тәуекелдерін ішкі талдау жобасы туралы», облыстық экономика және қаржы басқармасының жобалық басқару бөлімінің статисті Ә.Абсадық «Жобалық басқарудың ақпараттық жүйесіндегі жұмыстар туралы», облыстық Әділет департаментінің әкімшілік-құқықтық бөлімінің бас маманы Н.Бодыбаев «Аудандағы норма шығармашылық қызметтің жағдайы туралы” тақырыбында хабарлама жасады.Жұмыс тобының өкілдері жиында көтерілген өзекті мәселелер мен ұсыныстарға жауаптарын жолдап, сонымен қатар, жұмыс барысында қолданыстағы заңнама талаптарын қатаң сақтап, заңдылықтың бұзылуына жол бермеу үшін тиісті шаралар қабылдау қажеттілігін жеткізді. &nbsp;

Жұмысшы топ бірқатар мәселе көтерді 

<a href="https://kyzylorda-news.kz/">Kyzylorda-news.kz.</a> Тереңөзек кенті клубында "Туған жерім – тұнған шежіре" атты жастар арасында брейн-ринг сайысы өтті.&nbsp;Жоғарғы сынып оқушыларының бос уақытын тиімді пайдалану, білімдерін шыңдау, салт-дүстүрді насихаттау мақсатында өткен сайысқа аудандық білім бөлімінің әдіскері Еркін Оқасов, Жастар ресурстық орталығының маманы Жансая Байтәжиева және "Тіршілік тынысы" газетінің тілшісі Бибісара Жанәлі қазылық етті. Білім сайысына аудан орталығындағы 4 білім ордасынан 4 команада қатысты. Сайыс басталмас бұрын №36 Ә.Тәжібаев атындағы мектеп-лицейден "Тапқырлар", №35 И.Тоқтыбаев атындағы мектеп-лицейден "Сейхун", №131 Т.Қозыбаев атындағы орта мектептен "Жалынды жастар" және №210 О.Әбілпаттаев атындағы мектеп-лицейден "Яксарт" командаларының топ жетекшілері өздерін таныстырып, ұрандарын айтты.Сайыс 4 кезең бойынша өтіп, "Зымыран сұрақтар, "Білгенге маржан", "Суреттер сөйлейді", "Қызық екен" кезеңдерін қамтыды. Командалық сайысты клуб әдіскері Ержан Жунусов жүргізді. Брейн-ринг ойынының шарты бойынша қойылған сұрақтарға кезек реттілігі бойынша мүдірмей, нақты жауап берілуі ескерілді. Жоғарғы сынып оқушылары ел тарихынан, салт-дәстүрден білімдерін көрсетіп, ұлттық құндылықтарды насихаттады. Туған жердің шежіресін білудегі ізденімпаздықтарын көрсетті. Ең қызықты "Суреттер сөйлейді" және "Қызық екен" кезеңдерінде жастар логикаға салып, өз ойларын еркін жеткізуге тырысты. Әсіресе, экранға берілген Қорқыт ата кешені, Байқоңыр ғарыш айлағы, Қожа Ахмет Яссауи мавзолейі мен Досмұқасан ансамбілі туралы толыққанды білімдерін көрсеткені қуантты.Нәтижесінде сайысты сәтті аяқтаған "Жалынды жастар" командасы бірінші орынға шықты. Екінші орынды "Сейхун" командасы иеленсе, үшінші орынды &nbsp;"Тапқырлар" мен "Яксарт" өзара бөлісті. Командаларға диплом мен естелік сыйлықтар табыс етілді. &nbsp;

Сырдариялық жастар брейн-рингте

<a href="https://kyzylorda-news.kz/">Kyzylorda-news.kz.</a> Бүгін аудан әкімі Берік Сарменбаев кент орталығындағы Д.Қонаев көшесінде бастау алған орташа жөндеу жұмыстарының барысымен танысты.&nbsp;Аталған жұмыстарды орындау «Айзон» жауапкершілігі шектеулі серіктестігіне жүктелген. Аудан әкімі мердігер мекемеге атқарылып жатқан құрылыс жұмыстарының сапалы, әрі уақытылы жүргізілуін тапсырды.Сонымен қатар, биыл Тереңөзек кентінде 12 көшеге орташа жөндеу жұмыстарын жүргізу жоспарланған.&nbsp;<blockquote>Бүгінде Тереңөзек кентінде көшелерді жөндеу жұмысы жүргізілуде. «Айзон» жауапкершілігі шектеулі серіктестігі Д.Қонаев көшесін жөндеуге жауапты мекеме саналады. Біз қай кезде де, тұрғындардың талап-тілегін орындауға мүдделіміз. Алдағы уақытта көшені жөндеуді сапалы орындауға байланысты бақылау жүргізілетін болады, – деді аудан әкімі. &nbsp;</blockquote>Атап айтқанда, Қ.Бөдеев көшесі 2 км, Ә.Тоқмағанбетов көшесі 0,8 км, Ә.Тәжібаев көшесі 0,5 км, А.Алиакбаров көшесі 1,9 км, Айтбай арық көшесі 0,5 км, Д.Қонаев көшесі 1,3 км, Б.Момышұлы 1,2,3,4,5,6 көшесі 1,8 км мердігер мекемелері анықталып, тиісті жұмыстар жасалуда. Ал А.Тоқмағанбетов 2,4,5,6, Б.Өтепов, С.Усабаев, Ә.Найзабаев, Т.Қозыбаев көшелері бойынша мемлекеттік сатып алу жұмыстары жүргізілуде. <img src="https://knadmin.beoblood.kz/uploads/a1cff42d_2d7a_4397_96d1_ac673dd21e4f_8ca3944aa7.jpg" alt="a1cff42d-2d7a-4397-96d1-ac673dd21e4f.jpg">

Тереңөзек кентіндегі Д.Қонаев көшесі күрделі жөндеуден өтеді 

<a href="https://kyzylorda-news.kz/">Kyzylorda-news.kz.</a>&nbsp; Сыр өңірінде Ұлт руханиятының көрнекті өкілі, мемлекет және қоғам қайраткері Темірбек Қараұлы Жүргеновтің 125 жылдығына арналған мерейтойлық іс-шаралар бастау алды.&nbsp;Бүгін аз ғана ғұмырында артына өшпес із қалдырып, Қазақ қоғамның қалыптасуына өлшеусіз үлес қосқан аңыз адам, тарихи тұлға Темірбек Қараұлының 125 жылдығына арналған «Ұлт руханияты және Т.Жүргенов мұрасы: жасампаздығы мен зерттелу кеңістігі» тақырыбында Халықаралық ғылыми-тәжірибелік конференциясы өтті. Конференцияға белгілі ғалымдар, ҚР ҰҒА Академиктері, зиялы қауым өкілдері, мемлекет қайраткерлері, сонымен бірге, облыс әкімінің орынбасары Н.Сақтағанов, Халықаралық «TURKSOY» ұйымының бас хатшысы С.Раев қатысты.Жиынға қатысушылар Т.Жүргеновтің қайраткерлік, қаламгерлік, азаматтық болмысы жайында ой бөлісті. Арда азамат туралы естеліктер айтып, қайраткердің республика тарихында алар қоғамдық-саяси орны, қаламгерлік мұрасы, жас ұрпаққа берер өнегесі туралы әңгімеледі. Сондай-ақ, Қорқыт ата атындағы Қызылорда университетінің ғылыми кітапханасында «Қазақ руханиятының жарық жұлдызы» тақырыбында арнайы кітап көрмесі ұйымдастырылды.&nbsp;Көрменің мақсаты – қоғам қайраткері Темірбек Жүргеновтің тағылымы мол өнегелі ғұмырын кейінгі өскелең ұрпаққа кеңінен насихаттау.&nbsp; Шараға қатысқан конференция қонақтары, зиялы қауым өкілдері көрмемен танысып, әдебиеттерге шолу жасалды.Мерейтойлық іс-шаралар Н.Бекежанов атыдағы Қазақ музыкалық-академиялық драма театрында өтетін Р.Отарбаевтың «Нарком Жүргенов» қойылымымен және «Жыр арқауы – Жүргенов» атты республикалық жыр мүшайрасымен жалғасын табады.<img src="https://knadmin.beoblood.kz/uploads/4abea06b_93ef_4c64_810d_ff17c59f6d05_c8519cb56d.jpg" alt="4abea06b-93ef-4c64-810d-ff17c59f6d05.jpg"> &nbsp;

Темірбек Жүргеновтің 125 жылдығына арналған конференция өтті

<a href="https://kyzylorda-news.kz/">Kyzylorda-news.kz.</a> Мемлекеттік саясат шағын және орта бизнесті қолдауға бағытталып отыр. Ел экономикасының басым бөлігін шағын және орта бизнес өкілдерінің иеленуіне де оңтайлы жағдай жасалып жатыр.Төремұрат Ермағамбетұлы өзінің іскерлігі мен тәжірибесіне сеніп, 15 жыл мұғалім болған соң кәсіпкерлікке бет бұрған. Құрылыс материалдарын шығаруды жоспарлап жүрген &nbsp;ол ойға алған жұмысына бел шеше кірісіп, «Барс 1» атты серіктестік құрады. Темір-бетон өнімдерін шығаратын шағын цех ашып, осы салада 17 жыл еңбек етті. &nbsp;Бүгінде зейнет жасында болса да әлі ісін жалғастыруда.Шағын цехта темір-бетон өнімдері шығарылады. Құрылыста пайдаланатын бұл құралды көп мекеме арнайы тапсырыспен алдырады. Өндірісті қолға алған тұста оның ең алдымен сапалы әрі бағасының қалтаға қонымды болуын ойластырды. Темір-бетон өнімдерін жасау үшін пайдаланылатын қалып Ресейден шығады, өте қымбат тұрады. Төремұрат Ермағамбетұлы өзінің көпжылдық тәжірибесіне сүйеніп, қалыпты жасап шығарады. Оның технологиясын, мемлекеттік стандартын, жыл сайын өзгеріп отыратын маркаларын шығару үшін де түрлі қоспалар қажет. Шикізаты Қаратаудан шықса, жергілікті жердің құмы мен Өскеменнің цементі қолданылады, қосылатын негізгі металл каркастары Шымкенттен келеді. Қоспасынан қателесуге болмайды. Бір жерден қателессең, еңбегің далаға кетеді. Осындай қоспалардың басын біріктіріп, жасап шығарған дүниесі тәп-тәуір болды.Бұл уақытта облыста ауыл шаруашылығын суландыруда үлкен жұмыстар басталған-ды. Сапасы жоғары әрі төмен бағадағы өнімнің кәдімгі зауытта шыққаннан еш айырмашылығы жоқ. Шиелі ауданындағы 18 разъезді суландыруға, Қармақшы ауданының «Ақжар» ауылындағы, «Сексеуілдегі», «Қазатомпром» мен РУ-6 мекемелерінің екі ортасындағы жерге, өткен жылы Қазалының «Майдакөл» ауылына цех өнімі алынып, суландыруға пайдаланылған.Бірде «ТрансАзияКонстракшн» мекемесі ағын суға арналған науаға (лоток) тапсырыс берді. &nbsp;Ал Қазақстанда оның 70 сантиметрден биігі жоқ. Тәуекелге бел буып, ұзындығы 6 &nbsp;метр, биіктігі 1 метр 80 см болатын науаны қыстың көзі қырауда жасап шығарды.Қаладағы «Су-3», «Эльмо», «Инфракос», «БаттОйл», «Асетан» «Саутс-Ойл», «Монолитстрой», «Ремстрой» секілді бірнеше серіктестікпен бірлесе жұмыс істейді. Алда өзге де кәсіп көзін ашуды жоспарлап жүрген Төремұрат Ермағамбетұлының еңбекқорлығы, іскерлігі көпке үлгі. &nbsp;

Кәсіпкер темір-бетон өндірісін дамытуда

<a href="https://kyzylorda-news.kz/">Kyzylorda-news.kz.</a> Қармақшы ауданында жастар мен жасөспірімдер арасында қылмыс пен құқық бұзушылықтың алдын алу мақсатында ардагерлер мен аудандық маслихат депутаттары аудан әкімінің орынбасары Біржан Далабайұлы жетекшілік ететін жұмысшы топпен бірге түнгі рейд жұмыстарын жүргізді. &nbsp;Рейд барысында кафелер, дүкендер, компьютерлік клубтар, аллеялар және көпқабатты тұрғын үйлердің аулалары мен қараңғы қуыс көшелер араланып, кәмелетке толмаған жасөспірімдерге түсіндірме жұмыстары жүргізілді.Сондай-ақ, Қазақстан Республикасының Заңына сәйкес кәмелеттік жасқа толмаған жастардың түнгі 23.00-ден кейін заңды өкілінсіз көшеде немесе ойын сауық орталықтарында жүруге тыйым салынатындығы жайлы ескертілді. Сонымен қатар, жасөспірімдер арасындағы құқық бұзушылық пен қылмыстың алдын алу мақсатында Қармақшы ауданындағы №121 орта мектебінің қызметкерлері, аудан әкімінің орынбасары Б.Далабаев, аудандық білім бөлімі қызметкерлері С.Мұратов пен А. Кенжебаева, аудандық ардагерлер ұйымы ақсақалдары Е.Назарқұлов, аудан орталығындағы мектеп ұстаздары, ата-аналар және де АІІБ қызметкерлерімен бірлесе кешкі және түнгі уақытта «Түнгі қаладағы балалар» атты рейдтік шаралар ұйымдастырды.Шараның негізгі мақсаты – жасөспірімдер арасындағы қылмыстың алдын алу және жолын кесу, балалар және жасөспірімдердің заңды өкілдерінсіз түнгі уақытта тұрғын үйден тыс орындарда болу фактілерін анықтау, олардың құқықтық сауаттылығын арттыру.Рейдтер мектеп маңындағы компьютерлік клубтарға, кафелерге, «Ардагерлер аллеясы», Құлмұратов көшесі бойында орналасқан ойын алаңдарында, «Дүр Оңғар», «К.Рүстембеков» атындағы жыраулар үйі алаңқайларына, Қорқыт ата, Е.Көшербаев, Амангелді, Б.Момышұлы , Т.Рұсқұлов, Ә.Егізбаев көшелері, мектеп микроауданы бойында орналасқан көшелерді жан-жақты аралау шаралары ұйымдастырылды. Рейд жүргізу барысында ешқандай кәмелетке толмаған мектеп оқушылары анықталаған жоқ және тәртіп бұзушылық болған жоқ. Тек кәмелетке толған үлкен жастағы бір-топ ер жігіттерді байқап, қасына жақындап мектеп оқушылары жоқ екендігін анықтадық дейді мамандар.&nbsp;Сонымен қатар, Қармақшы ауданындағы А.Жанпейісов атындағы №105 мектеп-лицейінің кезекші мұғалімдері мен сынып жетекшілері, ата-аналары және құқық қорғау органдарының қызметкерлерімен бірлесіп жасөспірімдер арасында қылмыс пен құқық бұзушылықтың алдын алу, ҚР заңына сәйкес кәмелеттік жасқа толмаған жастардың түнгі 23:00-ден кейін заңды өкілінсіз көшеде немесе ойын-сауық орталықтарында жүруінің алдын алу мақсатында түнгі рейдке шықты.&nbsp;

Қармақшыда түнгі рейд жұмыстары тұрақты жүргізілуде

Аймақта интернет-алаяқтық 64 пайызға төмендеген

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданында құқық бұзушылықтың алдын алу мақсатында түнгі рейд жүргізілген болатын. Аталған рейдке аудан әкімінің орынбасары Димаш Байдушев, аудандық мәслихат депутаты Еркебұлан Жақып, аудандық жастар ресурстық орталығының директоры Нұрман Абдрасилов, білім бөлімінің мамандары, жергілікті полиция бөлімінің қызметкері, жастар ресурстық орталығының мамандары және мектеп мұғалімдері қатысты.&nbsp;Бірлескен түрде ұйымдастырылған рейд барысында Қазақстан Республикасының Заңына сәйкес кәмелеттік жасқа толмаған жастардың түнгі 23.00-ден кейін заңды өкілінсіз көшеде немесе ойын-сауық орталықтарында жүруге тыйым салынатындығы жайлы ескертілді. Өз кезегінде түн мезгілінде тәртіпсіздік жасаған жасөспірімдердің ата-аналарына шара қолданатындылығы жөнінде сала мамандары айтты.<blockquote>«Өңірімізде орын алған соңғы оқиғаларға байланысты құқықтық іс-шаралар көбейтілді. Оның ішінде, түнгі рейд жүргізудің маңызы зор. Қазіргі уақытта ойын алаңдарында балалар спортпен шұғылдануды әдетке айналдырған. Ал компьютерлік ойындарға жиі баратын балалардың ата-аналары қатаң қадағалау жасауы тиіс», – дейді аудан әкімінің орынбасары Димаш Байдушев.</blockquote>Сондай-ақ, жасөспірімдер арасында келеңсіз жағдайлар және құқық бұзушылық орын алмас үшін түсіндірме жұмысы жүргізілді.&nbsp; &nbsp;

Сырдарияда түнгі рейд жүргізілді 

<a href="https://kyzylorda-news.kz/">Kyzylorda-news.kz.</a>&nbsp; Адам жанының арашашысы дәрігер еңбегі туралы айта бастасақ, көкейімізге осы мамандықтың нағыз майталмандары оралады. Ақ халатты абзал жандардың халық денсаулығы, қоғам игілігі жолында атқарып жүрген істеріне тәнті боламыз. Халық алғысына бөленіп жүрген абзал жандар қалада да, ауылда да көп.Ақбасты ауылдық медпунктінің меңгерушісі Ғазиза Ақназарова туралы да қай жерде болмасын жылы лебізді есітіп отырамыз. Аралдағы №15 мектептің түлегі мамандық таңдау, кім болып еңбекке араласамын дегенде ойланбастан жүрек қалауымен дәрігерлікті таңдады, Ақтөбе медицина институтына құжаттарын тапсырды. Оқушылық күндердің оралмас кей сәттерінің кейде ойға оралатыны бар. Әкесі Кемаладин қой кеңшарында малшы еді. Жазғы каникулда қолтығынан кітабы түспей жүріп қой қайыратыны есінде қалыпты. Мал баққан адамның қандай қиыншылықты бастан кешетінін көріп өсті. Қазір балаларына өзінің көзбен көріп, көңілмен сезгендерін үлгі етіп, жалқаулыққа берілмей, еңбекке шыңдалғанын қалап, ақылын айтып отырады. Ақтөбедегі медициналық институтынан дәрігер терапевт мамандығын алып шыққан Ғ.Ақназарова Арал қаласындағы жедел жәрдем бөлімшесінде ұзақ жылдар емдеуші дәрігер болып істеді. Үнемі ауысыммен жұмыс істеп, күн демей, түн демей науқас жандарға алғашқы көмек көрсету оның үйреншікті дағдысына айналды. Қаланың қай түкпірінен болмасын келген шақыруға жылдам жетумен бірге, бар мүмкіндігінше ауруханаға тез жеткізу жүргізушімен бірге мұның да міндеті саналатын. Талай жаны қысылып тұрғандарға көмек қолын созып, дәрігерлік кеңесін берді. Осы жедел жәрдем бөлімшесінде жүріп те елдің алғысына бөленді.2001 жылы Ғ.Ақназарова өзі сұранып, шалғайдағы Ақбасты ауылына келді. Кейбіреулер қаладағы қызметін тастап, ауылға аттанғанына таңданысты. Оның мұнда келгендігі бірінші мақсаты – дәрі-дәрмегі жетіспей жататын ауыл адамдарына дәрігерлік парызын орындап, өз тәжірибесі мен білігін сырқат жандардың жандарына жалау болып, қол ұшын беру болса, екіншіден, балаларының қазақы орта тәрбиесін көргенін қалады. Мұнда келгеннен кейін-ақ оның аты жан-жаққа танылып, сонау Шалқар ауданынан, Бозойдан, малшы ауылдардан іздеп келушілер көбейді. Басқа жерден келсе де жақсы лебізін айтып, Гиппократ антына адалдығын танытуды міндеті санады. Осындайда өзі бұрыннан байқап жүретін қолының биоэнергетикалық күш-қуатының құдіретін сезіне бастады. Кейде жұмыстас әріптестерінің де басы ауырып, балтыры сыздаса Ғазизаға ұстатып көретіні бар. Көрінгендердің барлығы көңіл-күйлерінің жақсарып, сырқыраған аяқтары, белдерінің сауығып кеткендеріне алғыстарын білдіріп жатады. Ал дәрігер үшін науқас жандардың риясыз ризашылығына бөленгені – үлкен абырой ғой.Өткен жылы қолындағы биоөрісті Алматыға «Халық емшісі» емдеу орталығына барып, тексертіп көрген. Мұның бойындағы биоэнергетикалық өрісті тексергендер таңданысып қалды. Қолындағы биоөрістің өте күшті екендігін айтқан емдеу орталығындағылар мұнымен жете танысып, хабарласып тұруы керегін мықтап тапсырды.Ол өз тәжірибесінің, білімінің алдамайтынына сенеді. Бірде жүрегі ауыратын келіншекті тексере отырып, жүрегінен өзгеше дыбыс естігендей болды. Жүрекпен ойнауға болмайды. Аяғы ауыр келіншекті дереу астаналық клиникаларға жіберді. Білікті мамандардың бақылауында болған әлгі келіншек баласын аман-есен дүниеге әкелді. Ал мұндай жайлардан кейін жоғарыдағылар да Ғ.Ақназарованың білігіне шек келтірмейді. Олар да ауыл дәрігеріне ризашылықтарын білдіріп жатады. Оның күнделікті жұмысынан мұндай мысалдарды көптеп келтіруге болады.Кешегі пандемия өршіген кезде негізгі күш емдеу мекемелеріне түскені белгілі. Ауылдағы медпунктті де індет кезінде науқастар басып тастады. Шағын ұжымдағы медбикелер Ұ.Тоқмырзаева, К.Өтепова, Т.Өтепова меңгерушімен бірге сырқаттанғандарға ем жасап, тыным таппады. Өкпе қабынуы індетімен күресуде ұжым басшысы әр науқасты жіті бақылап, емнің дұрыс жүруіне көңіл бөліп отырды. Осылардың тынымсыз еңбегі арқасында коронавирус індеті Ақбастыда басқа жерлерге қарағанда жайылып кетпей, құрықталды. Мұнда да Ғ.Ақназарованың кей науқастардың қасынан ұзамай, өзінің қатаң бақылауына алғанын атап айтуымыз керек.Көптің алғысына бөленген Ғ.Ақназарова марапаттардан да кенде емес. Жыл сайын республикалық, облыстық дейгейде түрлі марапаттарға ие болып келеді. Бұл да ол бағындырған биіктердің лайықты бағасы болса керек.Ғ.Ақназарова жанұясында аяулы әже атанып, балалары мен немерелерінің қызығын көріп отыр. Гүлмирасы – тұрмыста, балалы-шағалы, Шайхы, Шыңғыс, Дінмұхаммеді ауылда өз еңбегімен несібесін тауып жүр. Келіні Дидар ауыл әкімшілігінде бас маман болып істейді. Кіші келіні Орынкүл – психолог маман. Шамрадин, Нұрадин, Нұрхан, Өзге, Заңғар,Ахмед атты немерелерін көргенде, жұмыстан шаршап келгенін бірден ұмытып кетеді.

Алғыс алған абзал жан

<a href="https://kyzylorda-news.kz/">Kyzylorda-news.kz.</a> Арал ауданында кәсіпкерлікке ден қойғандар қатары жыл сайын артып келеді. Олардың ішінде жастардың үлесі жоғары. Мемлекет қолдауының арқасында өз кәсібін бастап, тәуір табыс тауып отырған жандар да бар. Олар өздерін жұмыспен қамтып қана қоймай, халық қажеттілігін де өтеп отыр. Солардың бірі – Науан Қосқұлов. Ол қазірде өзінің жаңа кәсібін дамытып, табысқа жеткен. Ескі жиһаздаға жаңаша өң береді. Яғни жарамсыз болып, сәннен шығып қалған диван, креслоңызды ығыстырып сарайға немесе қоқысқа тастауға асықпаңыз. Науан оны қалай жайнатуды біледі.&nbsp;Науан 2019 жылдан бастап кәсіпкер ретінде тіркеліп, жұмыс жасауда. Ол өз бизнесін бастау үшін мемлекеттен берілетін қайтарымсыз грантты жеңіп алған. Бұл қаражат оның ойға алған жоспарын жүзеге асыруға үлкен қолдау болды.<blockquote>&nbsp;Қазір екі жылға жуық уақыт болды. Ескі жиһаздарды жөндеумен айналысып келемін. Жөндеп қана қоймай, оған заманауи өң беріп, қаптап беремін. Бастапқыда ағайын-туыстарыма, таныстарыма істеп беріп жүрдім. Кейін бірінен-бірі көріп келді. Қазір қызметімен жүгінушілер баршылық. Кәсібімді бастауыма мемлекеттен алған қаражат үлкен көмек болды. Соған барлық қажетті құралдарымды алдым, – деді Науан.</blockquote>Жиһаздарды қаптау, тігіншілік өнермен пара-пар. Науан бұл кәсіпті бастауға өзінің өмірінде басынан өткен қиындықтардың себеп болғандығын айтты. Ол 2016 жылы істі болып екі жылын темір тордың ар жағында өткізді. Осы уақыт ішінде ол өмірден сабақ алды.<blockquote>&nbsp;Қателеспейтін пенде болмайды. Мен бұл сөзбен өзімді ақтап отырғаным жоқ. Бір кездеі жастық албыртпен шалыс басқан кезім болды. Ол ісімнің заң алдында жазасын тарттым. Жақындарымнан жырақта болған сол уақытта мен көп ойландым. Ол жақта да еңбек еттік. Сол кезде тігіншілік жұмыстармен алғаш рет таныс болдым. Машина, түрлі жиһаздар қаптау жұмыстарымен айналыстым, – деген кәсіпкер өмірдің қиындығынан сабақ алғандығын жасырмады.</blockquote>Ол қалыпты өмірге оралған соң, жақсылыққа бет бұрды. Қоғам да оны ығыстырып, сыртқа тепкен жоқ. Қайта ынталы жігіттің бастамасын қолдай кетті.<blockquote>Қазір жастарға болсын, қоғамның қандай өкілі болса да кәсіп істеп, еңбектенемін деген адамға барлық мүмкіндік бар. Оған толық көзім жетті. Бастапқыда қалай болар екен деп іштей жүрексіндім. Бірақ, бәрі сәтімен келді. Аудандағы кәсіпкерлікті дамыту саласында жұмыс істеп жүрген қызметкерлер де бар білгенін түсіндіріп, дұрыс бағыт нсқап отырады, – деді ол.</blockquote>Науанның қазірде бос уақыты аз. Күні бойы үй ауласындағы шағын цехында уақыт өткізеді. Тапсырыстары да көбейген. Енді осы цехты үлкейтуді жоспарлап жүр.<blockquote>&nbsp;Цехты кеңейткім келеді. Кәсіпкерлік мақсатта жер алып, үлкен жиһаз цехын салсам деймін. Онда тек қаптаумен ғана айналыспай, тапсырыспен түрлі жиһаздар жасағым да келеді. Қазір көбі қолдан жасатқысы келеді. Бірақ менде ондай мүмкіндік болмай отыр,– деген Науан болашақ жоспарлары туралы айтып берді.</blockquote>Науанның бүгінгі тірлігі түзу, мақсаты биік. Ол қазір бар жігерін жақсылыққа жұмылдырған. Қолынан іс келетін жігіттің жасаған дүниесі де тәуір-ақ. Тіпті кейбірі "қисайып, тозып тұрған диванымызды дүкендегі кемі 300 мыңға бағаланып тұрған диванға ұқсатып әкеліп бергенде, танымай қаламыз" дейді. Бірақ оның жұмысы ондай қымбат тұрмайды. Осылайша елдің алғысына бөленіп жүрген кәсіпкердің алдағы мақсаты орындалса, халыққа да қолайлы болғалы тұр.

Науан Қосқұлов: Кәсібімді бастауыма мемлекеттен алған қаражат үлкен көмек болды

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша білім бөлімінің ұйымдастыруымен &nbsp;Қ.Мұхамеджанов атындағы №1 мектеп гимназиясында «Құзіреттілікке бағытталған білім беру - жаратылыстану бағытында» &nbsp;тақырыбында қалалық &nbsp;семинар өтті.&nbsp;Семинарға Қызылорда қалалық білім бөлімінің әдіскері Нұрқанат Ақылбайұлы арнайы қатысып, ұстаздарға сәттілік тіледі.«Құзіреттілікке бағытталған білім беру - жаратылыстану бағытында» семинары мақсаты жаратылыстану пәндерін оқытуда жаңа әдіс тәсілдерді қолданып, оқушылардың функционалдық сауаттылығын арттыру, өзара тәжірибе алмасу мақсатында ұйымдастырылды. &nbsp;Химия пәнінен Гүлжан Тоқтарқызы «Қышқылдардың құрылысы» атты, биология пәнінен Жадыра Таңатарова «Ұрықтық дамудың алғашқы кезеңдері» тақырыбында және география пәнінен Жанділдаева Кенже &nbsp;«Елдерді саяси-географиялық аудандастыру» тақырыптарында ашық сабақтар көрсетті. Семинар соңында география пәні мұғалімі Венера Сарманкулова география пәнінен «ҰБТ-ға дайындаудағы тиімді әдіс тәсілдер» атты шеберлік сағатын өткізді.Семинарға арнайы келген қонақтар тал егу акциясы аясында мектеп ауласына көшеттер отырғызып, «Семинар маңызды әрі мәнді өтті. Қатысушылар ретінде өздерімізге қажетті дүниелерді алып қайттық», - деген пікірін білдірді.

Қазақстан және Қызылорда облысының жаңалықтары