<a href="https://kyzylorda-news.kz/">Kyzylorda-news.kz.</a> Су, жарық, жылу – тіршілік көзі. Бұл үшеуінсіз адамдар өмір сүре алмайды. Кейде бірнеше сағаттап жарық немесе су болмай қалса, тұрғындар сабырсыздық танытады. Ал кейде үздіксіз берілетін маңызды қажеттіліктің қадірін білмей, ысырапқа жол береміз.Тіршілік нәрі бізде арзанБіздің ғаламшардың 70 пайызын су басып жатыр. Десек те осы алапат судың бір ғана пайызы ішуге жарамды. Сондықтан ауыз су мәселесі талай жылдан бері әлемнің назарында. Судың жетіспеушілігіне байланысты оны үнемдеу бәрінен де маңызды.Бірде таныс әпкем Ақтауда қонақта болып, ондағы тұрғындардың ауыз суды қалай үнемдейтінін көріп, таңданысын да жасырмады. Әрбір тұрғын үйде қосақтап қойылатын судың шүмегінің бірінен ішетін су ақса, екіншісінен тұрмыстың қажеттігіне пайдаланатын су жүреді екен. Бұл бұлжымас қағида ұтымды қалыптасқан. «Біз болсақ таза судың қадірін білмей жүрміз. Күндіз-түні шүмектен ағатын ауыз суды оңды-солды пайдаланып жүрміз. Ал Ақтауда ауыз суды үнемдейді. Шын мәнінде, таза суды үнемдеуді біздер үйренуіміз керек. Қарапайым мысал, қазір көлік жуатын орындар көптеп ашылуда. Бір көлікті жуу үшін кететін судың мөлшерін қатты қысыммен атқылап жатқан суды көріп шошынасың. Не деген ысырапшылдық, сол судың сұрауы болады ғой» деген қынжылысын да жасырмады.Иә, «Судың да сұрауы бар» деген нақыл сөз бар. Осыдан оншақты жыл бұрын мезгілмен ғана 2 сағатқа берілетін ауыз судың кезегінде тұрған кездеріміз осы күні ұмыт бола бастады. Сырдариялықтар облыста 24 сағат таза ауыз су тұтынатын өңірлер қатарына кірді. Ең алдымен, ауданда Асқар Тоқмағамбетов ауылының тұрғындары тәулік бойы берілетін таза ауыз суға қол жеткізді. Әрбір тұрғын үйге дейін кіргізілген су құбырларынан үздіксіз сапалы су беріліп, ауыл тұрғындары үйлеріне кәріз жүйесін кіргізе бастады. Көп ұзамай аудан орталығында да су құбырлары ауыстырылып, күрделі жөндеуден өтіп, кент тұрғындары да сағаттап берілетін судың кезегіне тұрудан құтылды. Бұл – аймақ тұрғындарының сол жылдардағы кейбір аудандарында ауыз судың жоқтығынан қыстың күні қар ерітіп тұтынып отырған ауылдарға қарағанда сырдариялықтардың жеткен жетістігі болатын.Осы ретте, ауыз су үшін төленетін ақы туралы аз-кем айтқанды жөн көріп отырмыз. Яғни, күнделікті тұтынатын тұщы суға арнайы құрылғының көрсеткіші арқылы ай сайын төлем жүргізіледі. Бекітілген тариф бойынша бір текше метрге 377,5 теңгеден ақы төленсе, тұрғындар осы соманың 30 теңгесін ғана төлейді. Нақтырақ айтқанда 1 адам бір айда 4,3 текше метр ауыз суға 30 теңгеден төлейді, егер тиісті пайдалану көлемінен асып кетсе артық пайдаланғаны үшін төлем 377,5 теңгеден есептеледі.Жалпы, жоғарыда айтып өткеніміздей сусыз адам өмір сүре алмайды. Адам ағзасындағы судың көлемі небәрі 2 пайызға кемігеннің өзінде қатты шөл басады. Ал кемі 10 пайызын жоғалтса адам сандырақтап, әлсірейді. Адамды 20 пайыздық судың жеткіліксіздігі өлімге дейін әкеледі екен.Негізінен, дәрігерлер көп ретте судың пайдасы туралы жиі айтады. Оны жеткілікті мөлшерде ішу арқылы түрлі аурудан құтылуға болады. Мәселен, артық салмақтан арылу, жүрек жұмысын жақсартуға судың көмегі зор. Күніне 1,5-2 литр су ішетін адамдарда жүрек талмасына деген қауіп едәуір азаяды. Ғалымдардың зерттеуінше, адам сусыз 5-6 күн ғана өмір сүре алады. Орта есеппен адам өмірінің соңына дейін 35 тонна су ішеді.Су туралы тағы бір қызықты дерек – судың құны туралы. Дүниежүзінде ең қымбат суды шетелдіктер тұтынады. Арнайы бөтелкелерге құйылған бағалы судың 1 литрі 90 долларға дейін жетеді, теңгемен есептегенде 40 мың теңге. Ал Әзірбайжандағы көлдердің бірінде жанатын су ағады. Қауіпті саналатын судың құрамында метан газы болғандықтан оның жану қабілеті бар екендігі дәлелденген.Газ ауылдарға да жетедіОсыдан бірнеше жыл бұрын аудан әкімдерінің есепті жиындарында аудан тұрғындары үнемі газ мәселесін қозғап, қашан халық көгілдір отынға қол жеткізеді деп сауал қоятын. Бұл мәселе де көп ұзамай шешімін тауып кент тұрғындары тұрғын үйлерін табиғи газбен жылытуға мүмкіндік алды. Бұрын соңды ертегі болып көрінетін газдандыруға ендігі кезекте елді мекендер де қол жеткізбекші. Тұрмысқа ыңғайлы әрі бағасы қолжетімді газдың игілігін кент тұрғындары биыл үшінші жыл көріп отыр.<blockquote>&nbsp;Қазір отын жағып, көмір алу машақатынан құтылғанымызға қуаныштымыз. Кент тұрғындары көгілдір отынның рахатын көріп отыр. Бірқалыпты температурада, үй-жайымыз тәулік бойы жылып тұрады. Бұрын қыстыгүні үйден алысқа шығып кете алмайтынбыз, үй суып кетеді деп. Қазір ондай қорқыныш жоқ. Дегенмен кентте жағдайы келмейтін отбасылар бар. Олар қаражаттың болмауынан газға қосыла алмай отыр. Көмірдің бағасы қымбат, оның үстіне ағаш отын да керек. Сондықтан тым болмаса әлеуметтік аз қамтамасыз етілген отбасыларға газ кіргізуге көмек болса, – дейді кент тұрғыны М.Омарова.</blockquote>Осы күні кентте 1780 тұрғын үй мен 243 пәтер газға қосылған. Сонымен қатар 35 әлеуметтік және 57 кәсіпкерлік нысан газ пайдаланып отыр. 2021 жылы көгілдір отын пайдаланған тұрғындар әрбір текше метрге 18,99 теңге төлесе, 2022 жылдың 1 шілдесінен бастап 19,92 теңгеден төлем жасауда.Жарық тарифі туралы бірер сөзАл жарық мәселесі бойынша бұрын хабарлағанымыздай, аймақта электр энергиясына байланысты көптеген мәселелер алдағы уақытта кезең-кезеңімен шешілетін болады. Ескірген бағаналар мен трансформаторлардың есебі алынып, қажетті қаражаттың бөлінуіне орай ауыстырылады. Ал қазіргі кезде ауа райының қолайсыздығына байланысты жарықтың болмай қалуы сол электр желіні таратушы құрылғылардың тозуынан екендігі белгілі. Дегенмен тариф мәселесіне келсек, «Шиелі Жарығы» ЖШС өз тұтынушыларына 2022 жылдың 1 қарашасынан бастап электр энергиясының бөлшек сауда нарығында жабдықтау тарифтерінің өзгергендігі туралы хабарлаған болатын.Онда орташа босату тарифі 1 кВт сағатына – қосымша құн салығынсыз – 19,19 теңге, қосымша құн салығымен – 21,4928 теңге екені айтылған. Жеке тұлғалар үшін орташа босату тарифі – 19,2864 теңге қосымша құн салығымен, заңды тұлғалар үшін орташа босату тарифі – 23,9232 теңге. Мұнан басқа бірнеше деңгей бойынша және жалғыз тұратын зейнеткерлер, мүгедектер, Ұлы Отан соғысына қатысушылар және оларға теңестірілген тұлғаларға есептелетін төлем бар. Яғни, 1-деңгей бойынша 1 адамға бір айға 70 кВт дейін 18,86 теңге төлесе, 2-деңгеймен 80 кВт 23,14 теңге, ал 3-деңгей бойынша 28,93 теңгеден төлейді. Бұл жеке тұлғалардың электр энергиясын тұтыну көлеміне сай қосымша құн салығымен есептегенде ай сайын төлейтін төлем.P.S. Осындай тарифке қарап өмірлік маңызы бар су, жарық, газдың бағасы онша-мұнша қымбат еместей көрінеді. Десе де бізде басқа өңірлерген қарағанда коммуналдық төлемдер арзан екенін аңғаруға болады. Сондықтан төлемдерді уақытылы төлеу арқылы су, жарық, газды үздіксіз қолдануға болады. &nbsp;

Коммуналдық қызмет: кім қанша төлейді?

<a href="https://kyzylorda-news.kz/">Kyzylorda-news.kz.</a> Осы жылдың сәуір айының 15-і мен мамыр айының 15-і аралығы киік жануарының төлдейтін уақыты. Осыған орай, киік аңына броконьерлік жасауға және сатуға ұйымдасқан қылмыстық топтардың заңсыз жұмыстарына күшейтілген режимде арнайы құқық қорғау орган қызметкерлерінің қатысуымен қорғау жұмыстары күшейтілген түрде жүргізілетін болады. Бұл туралы Өңірлік коммуникациялар қызметінің ақпарат алаңында өткен брифингте «Охотзоопром» ӨБ РМҚК-ның Жануарлар дүниесінің қорғау қызметінің бас маманы Аюхан Оқушыбаев мәлімдеді.<blockquote>«ҚР Экология, геология және табиғи ресурстар министрлігі, ҚР Ішкі істер министрлігі және ҚР Ұлттық қауіпсіздік комитетінің бірлесіп Киік кең ауқымды акциясы жүргізілетін болады. Бұл акцияға «Охотзоопром ӨБ» РМҚК-нан 430 ға жуық инспектор және 2 тік ұшақ, 90 джип, камаз кунг автокөліктерімен қамтамасыз етіліп, арнайы техникалардан дрон аппараттары, түнгі көру құрылғылары жұмылдырылатын болады. Сондай-ақ, Қызылорда өңірлік филиалында 35 инспектордан құрылған барлығы 7 мобильдік топ қызмет жасайды. Бұл мобильдік топ Қызылорда облысының 17 783 279 мың гектар, Түркістан облысының 3 576 233 мың гектар жерінде киік, ақбөкен аңын және ҚР Қызыл кітапқа енген аңдарын қорғауға жұмыстарын жүргізеді. Қызылорда өңірлік филиалы жалпы саны 15 автокөліктермен, радио станция, GPS навигатор, бинокль, &nbsp;түнгі көру көзілдірігі, бейнекамера, фотоаппарат, спутниктік бақылау, спутниктік телефонымен қамтамасыз етілген. «Охотзоопром» ӨБ» РМҚК Кызылорда өңірлік филиалы өткен жылы заңсыз аңшылықпен айналысу деректері бойынша жалпы саны 18 қылмыстық істің, оның ішінде киік аңына сәйкес-10 қылмыстық істердің анықталуына атсалысып, табиғатты қорғауға сүбелі үлестерін қосуда. Ағымдағы жылдың өзінде сирек кездесетін аң-құстармен, аша тұяқты жануарларды және ақбөкен аңын қорғау, сақтау барысында 5-қылмыстық іс, 3-әкімшілік істі анықтады. Бүгінгі таңда киік аңы жойылып кету қаупі төніп тұрған тұяқты жануарлар қатарына жатады. Сондықтан, 2024 жылға дейін аулауға және сатуға тыйым салынады. Броконьерлермен күресті бірге жүргізіп, киік аңын болашақ ұрпаққа бірге жеткізейік», - деді Аюхан Қалықұлы.</blockquote>Айта кетейік, өткен жылғы санақпен санағанда барлығы 1 318 000 бас киік жануары бары анықталды.

Қызылордада киік қорғау акциясы жүргізіледі

<a href="https://kyzylorda-news.kz/">Kyzylorda-news.kz.</a> Қазақ халқының ғасырлар бойы қалыптасқан салт-дәстүрі ислам дінімен астасып жатқаны ақиқат. Үлкендер айтатын ырым-тыйым, жөн-жоралғыларымызға зер салар болсақ, жас ұрпақты теріс жолдан алыс болуға шақырып, тәртіп пен тәрбиеге баулып, адами қасиеттерді бойға сіңіріп өсуге жетелейді. Ал, осындай тәрбиенің тұнық бастауынан сусындаған жас шыбық келешек жапырағы жайқалған, еңселі, саялы ағашқа айналары сөзсіз. &nbsp;Дегенмен, соңғы уақытта тұманды тұңғиықтарға тартатын, келешегі күдікті, болашағы бұлыңғыр жат ағымдардың кесірінен дәстүріміздің дінге қайшы тұстары көп айтылып жүр. Дәстүрлі дін мен салт-санамыздың ара жігі неге ажырап бара жатыр? Иә, сұрақ көп. Ізденгенге тұщымды жауап та табылады.&nbsp;Қынжылтатыны сол, жат жолда жүрген жастарымыз кері идеологияның жетегіне еріп, ата-бабамыздың қасиетті құндылығы – салт-дәстүрімізге қырын қарауы, алаңдайтын мәселе. Тек жастар емес-ау, ақылы толысқан, отбасының тірегі мен үмітіне айналған азаматтар да ата-анасына қарсы шығып, шаңырақтың шырқын бұзып, ел-жұрттан безіп жүр. Тарихшы Лев Гумилев «Бір халықты идеологиялық тұрғыда жаулап алу, қару қолданып, күш жұмсаудан арзан, әрі анағұрлым тиімді», екенін айтып кеткен. Дәл қазір болып жатқан дәуір идеологиялық күрес, саяси тактикалар дәуірі.&nbsp;Құран мұсылмандардың қасиетті кітабы, шариғаттың негізі, адамзаттың тәрбиешісі. Әлемдік зерттеушілер &nbsp;Құран ешқандай мәдениетте кездеспейтінін дәлелдеген. Қазақ халқының әдет-ғұрып, салт-дәстүрлерін зерттеуде де ең алғаш Құран негізге алынады. Құран - ол мәңгі жасайтын мұсылман халқының бәрі бірдей мойындайтын заңы, жазба мұрасы. Тәрбие мәселесінде қасиетті кітаптың алатын орны ерекше.&nbsp;Мысалы, қазақ салт-дәстүрінде жаңа туған шақалақ пен анаға көрсетілетін шариғатпен байланысты бірнеше іс жоралғылар бар. Жүкті келіншек босанғаннен кейін әбден әлсірейтіні белгілі. Тоғыз ай көтерген баласы дүниеге келгеннен кейін әйелдің әл-қуат жиып, белі бекіп кетуі үшін оған арнайы мал сойылып, қалжа беріледі. Жас еттен асып, сорпа ішкізу үшін сойылған малдың семіз, күйлі болуы керек. Өмірге келген сәбиді ғана үкілеп, мәпелей бермей, анасына да көңіл бөлуді ерекше орынға қойған. Себебі, ана денсаулығының буын-буыны босап, жаңа туылған сәбидей болып оған күтімді өте маңызды деп санаған. Пайғамбарымыз «дүниеге сәби алып келуімен сол ана, күнәсінан арылып, жаңа туылған сәбидей пәк болады», деген.<figure class="image"><img src="https://knadmin.beoblood.kz/uploads/Whats_App_Image_2023_04_13_at_18_42_14_eebf107dfd.jpeg" alt="WhatsApp Image 2023-04-13 at 18.42.14.jpeg"></figure>Туылған сәби үшін ислам шариғаты бойынша «ақиқа» құрбандығы шалынады. «Ақиқа» деп әрбір нәрестенің ана құрсағында шыққан шашын, бір апта болған күні алып, сол рәсіммен кұрбандық шалынатын малды атайды. Әрбір бала ақиқасымен кепілдікте тұрады. Оны жетінші күні сойып, сәбидің есімі қойылады және шашы алынады. «Ұл балаға арнап екі қой, қыз балаға бір қой сойылады» деген. Себебі, яһудилер ұл балаға ақиқа шалып, қыз балаға шалмайтын. Сондықтан Пайғамбарымыз (ғ.с.) оларға ұқсамас үшін ұл балаға арнап екеу, кыз балаға біреу шалуды бұйырды.Әрбір ана босанғанда осындай жоралғылар қазақтың әрбір шаңырағында орындалып жатқанын көреміз. Сойылатын малдың «Бисмиллаһ» деп яғни, «Аллаһтың атымен» сойып, мойын омыртқасын бүтіндей асып, анаға жегізетін жағдайы бар. Сойылған малдың мойын омыртқасын босанған жас әйелге береді. Ол мойын омыртқаны опырмай, етін тек қолымен үзіп жеп, төрге іліп қояды. Ел ішінде жас баланың мойнының тез қатып кетуі осы омыртқамен байланысты деген сенім бар. Ал, қазақ салт-дәстүрінде бүгінге дейін, босанған аналарға мойын омыртқаны беретін үрдіс қолданылып келеді. Сонымен қатар, осы кездері орындалатын тағы бір шариғи амалдың бірі «ат қою».Пайғамбарымыз (ғ.с.): «Жаңа туған сәбиге жақсы ат қойыңдар, Аллаһ тағаланың алдында сол атымен шақырылады». «Оң құлағына азан, сол құлағына тәкбир айтылсын» деген.Қазақ ат коюда ертеде ешкімнен жаңылмай қойғанын тарих беттерінен білеміз. Ескіміз жаңарып, жыртығымызды жамап жатқан егемендігімізде осы салттардың қайта оралуы қуанарлық. Себебі, жаңа туған сәбиге имам – молдаларды шақыртып оң құлағына азан, сол құлағына тәкбир айтып атын қойып жатқан жағдайлар болып жатыр. Балаға жақсы атпен тәрбие беру ата мен ананың мойнындағы міндеті. Кім біледі, осындай рухани қазыналарымыздың пайдаланбауында болар, балаларымыз әлсіз, әртүрлі жағдайларға тез ауып кететіні осыдан шығар. Ашып айтатын болсақ, киім-кию үлгісі, жеңіл жүріс, мәнсіз әуендерді тыңдап, салт-дәстүрі мен дінін аяқ асты етіп жатқандары жетерлік. Себебі адам өзіне не керегін таппай, рухани күйреп, тұйыққа тірелгенде, оның жүйкесі сыр береді. Осы ретте киелі салтымыз бен мағыналы дәстүрлеріміз жастарымызға нұсқаушы ретінде керек. Қазақ халқының мәдениетін, мол мұрасын сақтап қалуға қатысты Мұхтар Әуезов «Тарихи тамырыңнан бас тарту, рухани дәстүрге кері қатынаста болу ұлттық мәдениет үшін қасірет. Болашаққа қадам басуға тек әлемге деген өзіндік бағдарламалық және ерекше көзқарасы бар, өткеннің мұрасымен, өзге де халықтардың тәжірибесімен байытылған мәдениеттің ғана құқы бар», -деп айтып кеткен.&nbsp;<figure class="image"><img src="https://knadmin.beoblood.kz/uploads/Whats_App_Image_2023_04_13_at_18_42_16_1_7d700faacc.jpeg" alt="WhatsApp Image 2023-04-13 at 18.42.16 (1).jpeg"></figure>Салт-дәстүр құндылығы – мәдениеттіліктің бір өлшемі. Мәселен, ата-ана сыйлау, үлкенге құрмет, кішіге ізет дегеннің өзі қалыптасқан халықтық қағидаттар. Ал оның бастауы – иманнан дер едік. Сонымен қатар, көрімдік, кәде сұрау, сәлем беру, ат тергеу, құрдастық қалжың салт-дәстүрге жатады. Алайда &nbsp;кейінгі кезде &nbsp;ислам атын жамылған пиғылы бөлек топтар халықтың танымын жоюға талпынып жүр. Қазақтың дүниетанымын мансұқтап, салт-дәстүрді жоққа шығарып, келіннің сәлем салуын Аллаға серік қосуға балады. Алайда Құранның 2 Бұқара сүресінің 42 аятында «Қисық жолды туралықпен айырбастап алғандар деп бұйырады. Хақиқатты бұзықтыққа араластырмаңдар да сондай-ақ біле тұра шындықты жасырмаңдар, қарсы келушілерден болмаңдар. Және де аяттарымды аз ғана бағаға айырбастамаңдар (дүниелік үшін бұрмаламаңдар)» делінген. &nbsp;Жалпы қазақ халқында үлкен кісіге, ақ сақалды қарияларға, ата мен анаға иіліп сәлем етіп, есік ашу, жол беру әдептері көпшіліктің бойына сіңген ізгі, ізетті қасиеттер. Осындай ізгі қасиеттерді бабаларымыз ислам дінінің кұнды заңдылықтары екенін білді. Олар: Қасиетті Құран мен Пайғамбарымыздың хадистері. Лұқман сүресінің 14 аятында: «Адамдарды ата-аналарына жақсылық жасауға бұйырдық. Ана оны үсті-үстіне әлсірей жүріп (құрсақта) көтереді, екі жыл бойы ақ сүтімен емізеді. (Ей адамдар!) маған да, ата-аналарыңа да шүкірлік етіңдер! Түптің түбінде қайта оралатындарың – Менің алдым» деп айтылған. Аллаһ тағаланың өзі бүкіл адамзат баласын ата-аналарына құрмет, оларға жақсылық жасап қарайласқан кезде ғана бақытқа жететінін бұйырады.Егер жат ағымдар біздің салт-дәстүрімізді түбегейлі жоққа шығарғысы келсе, демек біздің мықты тұсымызда осы жерде деп түсінуге болады. Сол себепті дәстүрімізді келешек ұрпаққа дұрыс дәріптей білсек, елдегі бірлігіміз бекем, берекеміз мол боларына сенім мол.Әсел АБЗАЛ#ислам_ізгіқоғам #aqmeshit_kz

Дін мен дәстүр тұтастығы маңызды

<a href="https://kyzylorda-news.kz/">Kyzylorda-news.kz.</a>&nbsp; Қайбір елдің болмасын ұлттық болмысында музыка өнерінің алатын орыны ерекше. Ұлттың ұлылығын да өзгеге ұқсамас айрықша қасиетін де танытатын осы киелі өнер. Біздің де сан ғасырдан жалғасқан төл өнеріміздің шашауын шығармай ұрпақтан ұрпаққа жеткізуде талантты музыканнатармыздың еңбегі өлшеусіз. Сондай жандардың бірі аудандық өнер мектебінің мұғалімі, сазгер Октябрь Ізбанов.Киелі өнерді бойға дарытқан Октябрь Ізбанов 1965 жылы 7 қазанда Арал ауданы, Аманөткел ауылында дүниеге келеді. Заманында ол дүниеге келген күн констетуция күні болып тойлатын болған. Сол себепті айтулы күні өмір есігін ашқан ұлыны әкесі «Октябрь» деп ат береді. Ауылдағы мектепті бітірген соң өнерге құмар болып сөкен бозбала өзінің шығармашылық қабілетін шыңдау мақсатында оқуға аттанады.<blockquote>– Негізінен мен ата анамнан ерте айырылдым. Анам өмірден озғанда тіпті жөргектегеі бала болғам. Ал әкем бірінші сыныпта оқып жүрген шағымды дүниеден озды. Көзкөргендердің айтуынша әкем домбырада ойнайтын болған екен. Тіпті менің де әкемнің домбыра шертіп отырған кездері есімде бар. Бірақ ол кезде мән бермеген екенмін. Кейін ауылдағы өнерлі азаматтардың қасында жүріп, соларға қызығып домбырада ойнай бастадым. Бірақ мынау менің ұстазым деп айта алмаймын. Бәрін өз бетімше үйрендім. Мектеп қабырғасында оқып жүргенде бұл өнерім шыңдала түсті. Осылайша болашағымды музыкамен байланыстырып әкеттім. Кейін, 1990 жылы Ақтөбе қаласындағы мәдениет ағарту колледжінің музика бөліміне оқуға түстім, - деді Октябрь Ізбанов.</blockquote>Оқу орынын бітіріп келген соң 1993 жылдан бастап Арал аудандық өнер мектебінде жұмысқа орналасады. Содан бері 27 жылдан астам уақыт оқушыларды домбыраға шертуге үйретіп келеді. Бұған қоса, аудандағы өнер иелерінен құрылған Қазанғап ұлт аспаптар орестрінің белді мүшесі. Октябрь аға домбырашы, әншілігімен қатар сазгерлік қырымен де көпшілікке таныс. Оның авторлығынан туған 15-тен астам ән бар.<blockquote>– Көбіне Ерғали Абдулла, Шолпан Балманова, Аманқос Есмырзаев сынды ақындардың өлеңдеріне ән жазып жүрмін. Негізінен 2009 жылдан бастап ән жаза бастадым. Ол да аяқ астынан пайда болды десем де болады. Сол кезде мектепте оқитын қызым Нұрбала ән айтушы еді. Сол өтініші жасады «Папа маған ұстаз туралы өзгеше бір ән тауып беріңізші» деп. Әрі бері қарап көрдім. Бәрі ел жадында жатталған бұрынан келе жатқан әндер екен. Содан ең алғашқы рет ұстазым әні өмірге келді. Онан соі біртіндеп жаңа әндердің тұсауы кесіле бастады, - дейді ол.</blockquote>Ол «Толқын» газетінің 90 жылдығына арналаған «Толқыным» әнінің де сазын жазды. Осылайша төл баспаға керемет тарту жасады. Әннің қалай өмірге келгені туралы да әңгімелеп берген еді.<blockquote>– «Толқын» газетін ес білгенен бастап білеміз. Ауданның бар жаңалығын толқынан оқып отырамыз. Аудандағы жалғыз баспамыздың 90 жылдық мерейтойы дегенде үнсіз қалғым келмеді. Бірақ бастапқыда жүрегім дауаламай көп жүрдім. Не дегенмен мұнда қаншама мықты азаматтар жұмыс жасаған ауданның айнасы болған соң елдің назары түсетінін білдім. Көпшіліктің көңілінен шықпай қалса қайтемін деген ой болды. Не керек, тәуекелге бел буып кірісіп кеттім. Бір жарым айға жуық уақытта ән толыққанда өмірге келді. Көптің көңілінен шықты, - деген сазгер мұны үлкен жетістікке балайды.</blockquote>Октябрь Ізбановтың балалары да өнерден құр алақан емес. Бес баласы да әке жолын жалғаған. Еліміздің әр түкпірінде бірі өнер саласында қызмет етіп жүрсе, енді бірі өнер академиясының студенті.Төл мәдениетімізді төрге сүйреп, өнерлі жастарға бағыт-бағдар беріп жүрген ағамыздың жеткен жетістіктерді да баршылық. Респуликалық, облыстық, аудандық жарыстарда топ жарғаны үшін алғыс хаттармен, медальдармен марапатталған. Ал 2020 жылы аудандағы З. Шүкіров атындағы шығармашылық бірлестік атынан «Жылдың үздік сазгері» атанды.Ол жетістікке масаттанбайды. Қарапайым, адами болмысынан айнымаған жанды да құрметті еткен осы болса керек. Үнемі шығармашылығын шыңдап отырады. Алдағы уақытта жеке ән кешімді өткізсем деген жоспары да жоқ емес. Бәрін уақыттың еншісіне тапсырған өнер адамының жүрек түкпірінен әлі де талай тамаша туындылар өмірге келері сөзсіз.

Сазгерлігімен танылған талант

<a href="https://kyzylorda-news.kz/">Kyzylorda-news.kz.</a> Мемлекеттік тапсырысты тәулігіне 10,5 сағатқа төлеуді сұраған қызылордалық жеке балабақша иелерінің мәселесі шешілді.Биыл ақпанда Қызылорда облысы кәсіпкерлер палатасына «Қазақстандық үздіксіз білім беру қауымдастығы» жеке кәсіпкерлер мен заңды тұлғалар бірлестігінің аймақтық филиал директоры Наталья Мишуковадан өтініш келіп түсті.Хатта: «Қызылорда қаласында 207 жеке балабақша жұмыс істейді. Басым көпшілігінің жарғысында 5 күндік жұмыс аптасымен балалардың 10,5 сағат болуы көрсетілген. Соған қарамастан Қызылорда қаласының білім бөлімі 5 күндік жұмыс аптасымен мемлекеттік тапсырыс аясында жұмыс істеп жатқан жеке балабақшаларға 9 сағатпен келісімшарт жасады», дей келе мәселені шешуге көмек сұраған.Кәсіпкерлер палатасының заңгерлері мәселені ҚР Сыбайлас жемқорлыққа қарсы іс-қимыл агенттігінің облыстық департаменті басшысының Палата алаңындағы жеке қабылдауына шығарды.<blockquote>«Қосымша бұл сұрақты қалалық білім бөлімі мен облыстық білім басқармасына, сондай-ақ Оқу-ағарту министрлігіне жолдап, түсіндірме беруін сұрадық. Себебі кәсіпкерлердің көтеріп отырған мәселесі орынды. Нормативтік-құқықтық актілерде қандай да бір шектеу көрсетілмеген», – дейді Кәсіпкерлер палатасы директорының құқықтық мәселелер жөніндегі орынбасары Салават Құлмахан.</blockquote>Осыдан кейін облыстық білім басқармасының өкілдері жеке балабақша иелерімен кездесіп, мектепке дейінгі тәрбие мен оқытуға мемлекеттік білім беру тапсырысын орналастыру бойынша конкурстық комиссияға тиісті құжаттарды (күн тәртібі көрсетілген мекеме жарғысы, ұйым қызметкерлерінің үлгі штатқа сай жасақталғанын және санитарлық талаптарға сай аз мәзірі мен үш мезгіл ыстық тамақпен қамтамасыз ету талабының сақталғаны дәлелдейтін құжаттар) тапсыруды ұсынады.Наурызда аталған комиссияның отырысы өтіп, өтінім берген 99 балабақшаның құжаттарының талапқа сәйкестігі қаралады. Нәтижесінде комиссия мүшелері 99 балабақшаға 10,5 сағатпен мемлекеттік тапсырыс орналастыру жөнінде қаулы шығарды.<blockquote>«Кәсіпкерлердің мәселесіне дер кезінде мән беріп, шешуге мұрындық болған Кәсіпкерлер палатасы мен Сыбайлас жемқорлыққа қарсы іс-қимыл агенттігінің облыстық департаментіне алғысымыз шексіз» – дейді «Қазақстандық үздіксіз білім беру қауымдастығы» жеке кәсіпкерлер мен заңды тұлғалар бірлестігінің аймақтық филиал директоры Наталья Мишукова.</blockquote>Кәсіпкерлікке қатысты сұрағы бар азаматтар Қызылорда облысының кәсіпкерлер палатасына 8 /7242/ 40-09-81 нөмірі арқылы хабарласа алады немесе Facebook желісіндегі «Сыр өңірі мен Қызылорда қаласындағы БИЗНЕС» тобынан барлық жаңалықпен танысуына болады.

Қызылордада 99 балабақшаның мәселесі шешілді

<a href="https://kyzylorda-news.kz/">Kyzylorda-news.kz.</a>&nbsp;Қоғамдық көліктердің қызметі қала тұрғындарының көңілінен шығуы қиын. Топырлатып адам тиеп алу, жылдамдықты арттыру, кешігіп келу, тағы басқа себептері көп. Қай кезде де клиенттің айтқаны дұрыс. Жүру ақысын төлегеннен кейін қызмет те соған сай болуы тиіс.Қазір қоғамдық көліктердің көбіне QR код қойылып, жолаушылар жүру ақысын телефон арқылы төлейді. Оның құны автобустарда 85 теңге. Егер төлем онлайн болмаған жағдайда, қолма-қол 90 теңге. Бұл да кезінде тұрғындардың наразылығын тудырып, біраз айқай-шуға ұласып барып басылған еді. Айтпағымыз, жолақы тағы да көтерілуі мүмкін. Жалақысын жолақыға жұмсайтын жұрт үшін жүріп-тұру құны тиімді болса игі. Елдің салмақ салып сұрап отырғаны – сапалы қызмет қана.Негізінен, біз автобустардың жүргізушілері мен кондукторларын, одан қалды автопарк басшыларын кінәлаймыз. Бір тараптың ғана пікіріне құлақ аспай, қызмет көрсетуші тараптың да сөзін саралап көрсек… Осы орайда қоғамдық көліктерде дифференциалды тариф жүйесін енгізу жөнінде «Қызылорда автобус паркі» ғимаратында көшпелі брифинг өткен болатын. Көп істің ақ-қарасын осы жерден білдік.Көлік көбейіп келедіОсыдан он жыл бұрын, яғни 2013 жылы Қызылорда қаласында жолаушылар тасымалын жақсарту үшін «Қызылорда автобус паркі» ЖШС құрылып, оның теңгеріміне облыстық бюджет есебінен «Zhangtong LCK 6105HGC» маркалы 20 автобус алынған еді.Ал 2017 жылы облыс әкімдігі, «Байқоңыр» әлеуметтік кәсіпкерлік корпорациясы» АҚ және Еуропалық қайта құру және даму банкі арасындағы үшжақты меморандум негізінде парк теңгеріміне «Zhоngtong LCK 6105 HGC» маркалы 92 автобус несиеге алынды. Келісім бойынша банк несиеге автобус алуды, ал жергілікті атқарушы орган заман талабына сай автобус паркін салуды өз міндетіне алды.Нәтижесінде 5 гектар жерге жаңа үлгідегі автобус паркі салынып, 2017 жылдың наурыз айында пайдалануға берілді. Серіктестік ауласындағы автобустарды жөндеу цехтары барлық керекті жабдықтармен қамтылған. Қазір үш ауысыммен тәулік бойы, демалыссыз жұмыс істейді. Цехта арнайы (ТО-1, ТО-2) 8 орында техникалық қызмет, 2 орында диагностикалық қызмет көрсетіледі. Бес тоннаға дейін жүк көтеретін кран балкасы және автобустарды көтеретін жылжымалы 3 домкрат бар. Бұдан бөлек, шиномонтаж, вулканизация, электр жабдықтарын жөндеу, агрегаттар жөндеу, басқа да күрделі бөлшектерді жөндеу орындары орналасқан.Автобустар парк ауласында орналасқан заманауи газ құю станциясынан экологиялық таза газ-метан отынымен қамтылады. Серіктестік 2013 жылы 20, 2015-2016 жылдары 92 «ZhongTong» маркалы автобусымен, 2017 жылы 10 «ПАЗ», 2020 жылы 13 «ZhongTong» автобусымен толықтырылып, қалаішілік бағыттарда жолаушылар тасымалымен айналысып келеді.Өткен жылы аймақ басшысының тікелей қолдауымен серіктестікке «Өнеркәсіпті дамыту қоры» АҚ арқылы лизингке 150 автобус алынған.<blockquote>&nbsp;Бүгінде қалаішілік он сегіз бағыт (1, 3, 11, 12, 14, 15, 17, 18, 19, 20, 22, 25, 28, 29, 30, 31) және қосымша жүктелген «Ягодка», «ПМК-66» саяжайларына қызмет көрсетудеміз. Күнделікті 150 автобус шығады, қатынау интервалы 12-15 минут. Автопарктегі бұрын қолданыста болған үлкен сыйымдылықтағы 40 көлік күрделі жөндеу жасалған соң қосымша бағыттарға қосылып, қалаішілік жолаушылар тасымалдау жұмысын жақсартуға өз үлесін қосады.Облыс орталығы тұрғындары мен қала қонақтарына сапалы қызмет көрсету үшін соңғы үлгідегі қоғамдық көліктер саны артады. Осы жылдың бірінші жартыжылдығында «Өнеркәсіпті дамыту қоры» АҚ арқылы лизингке қосымша 150 автобус алу жөніндегі ұсынысқа облыстық және қалалық мәслихат депутаттары қолдау көрсетіп отыр, – деді «Қызылорда автобус паркі» ЖШС директоры Мақсат Жүсіп.</blockquote>Цифрландырудағы серпілісСеріктестіктің стратегиялық жоспарына жыл көлемінде қалаішілік жолаушылар тасымалының барлық бағыттарын қамту кіреді. Цифрландыру күнделікті өміріміздің бір бөлшегіне айналып кеткені барлығымызға аян. Бүгінде «ALEMPAY» ЖШС-мен жасалған келісімге сәйкес жол ақысы ұялы байланыс операторының көрсетілген қызметтері немесе электрондық жол жүру картасы арқылы жүзеге асады. Сараланған тариф 2021 жылдың қаңтар айынан электронды төлем 85 теңге, қолма-қол төлем 90 теңге болып бекітілген.<blockquote>&nbsp;Алда өтетін қалалық мәслихаттың сессиясына қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі қолма-қол төлемді 130 теңгеге көтеруге ұсыныс берді. Электронды төлемақы 85 теңге болып қала береді. Бұл – электронды төлем жасауды арттырып, көлеңкелі кәсіптің алдын алудың бірден-бір жолы. Жаңашылдық тасымалдауда ыңғайлы және қаржы ағындарының ашықтығын қамтамасыз етеді. Автопарктің кірісін арттырып, жолаушы тасымалдауда мәдениет қалыптастырып келеді. Қызылордалықтарға электронды төлем жасаудың 8 түрі ұсынылған. Олар: SMS, QR код, ұялы қосымша, көлік және банктік карталарды қолданатын ұялы байланыс операторлары арқылы, – деді серіктестік басшысы.</blockquote>Сонымен бірге SMS BUS қосымшасын кез келген телефоннан өзіңізге жүктесеңіз, көліктің қай аялдамадан шыққанын, уақытын бақылай аласыз. Алдағы уақытта мекеме оқушылар тасымалын сапалы әрі қауіпсіз көрсету жауапкершілігін алмақ.Сынақ пен сұрақЖол жүру ережесін қатаң сақтау және жол-көлік оқиғаларына жол бермеу серіктестік басшылығының қатаң бақылауында. Қоғамдық көлік жүргізушілері жасаған жол-көлік оқиғалары дер кезінде талқыланып, апта сайын жол жүру ережесі оқытылады. Олар түрлі сынақ тапсырып тұрады.Қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі мамандары, Қызылорда қалалық полиция басқармасы әкімшілік полициясы жол-техникалық бөлімінің қызметкерлері және «Қызылорда автобус паркі» ЖШС жауапты қызметкерлері бірлесе отырып жаңадан ашылатын бағыттар бойынша жолдар мен көшелердің техникалық жағдайына комиссиялық тексеру жұмыстарынн жүргізді. Жол сапасын жақсарту, жол белгілерін орнату жөнінде тиісті мекемелерге сұралым берген. Бұл да – жолаушылар үшін атқарылған басты шаруалардың бірі.Жүргізушілер не дейді?Қоғамдық көлік санының еселеп артуына байланысты серіктестіктің штаттық бірлігі 376-дан 464-ке дейін артып, оның ішінде 300-ін автобус жүргізушілері құраған.Қойылатын кәсіби талап – 25 жасқа толған, кемінде 5 жыл жүргізуші жұмыс өтілі, «D» санаты бар жүргізушілер қабылданды. Алайда бұл талаптарға сай автобус жүргізушілері тапшы екені мәлім. Серіктестік жүргізген жұмыстар нәтижесінде 2022 жылдың қараша айынан 2023 жылдың қаңтар айына дейін 88 жүргізуші жұмысқа қабылданған.<blockquote>&nbsp;Қызметкерлердің құқықтары мен мүддесін қорғау, жұмыс жағдайын жақсарту, әлеуметтік кепілдіктерді қамтамасыз ету үшін кәсіподақ комитеті құрылған. Кәсіподақ белсенділері – қызметкерлер мен жұмыс беруші тараптың еңбекке байланысты ара қатынасын реттейтін заңды және тәуелсіз тұлға. Әлеуметтік кепілдіктер көзделген келісімдер, ұжымдық шарттар жасалып, олардың орындалуы қадағалануда. Кәсіподақ қызметкерлерді ынталандыру үшін мерекелік іс-шаралар ұйымдастырды. Алдағы уақытта қызметкерлерді шипажайға және балаларын тынығу лагерлеріне жіберу жұмыстары үйлестірілетін болады. Сондай-ақ, серіктестік жұмысшылары әртүрлі қайырымдылық акцияларына қатысып, тұрмысы төмен отбасыларға материалдық көмек көрсетіп келеді, – деді парк басшысы.</blockquote>Серіктестіктің әкімшілік ғимаратында өңірдің тарихы, мекеменің құрылу кезеңі, транспорт саласы ардагерлерінің өмірі жайында арнайы кабинет жабдықталған.Биыл 10 жылдыққа орай автобус жүргізушілеріне өз міндетіне жауаптылықпен қарағаны үшін «Үлгілі жүргізуші», «Елеулі үлесі үшін», «Креативті жүргізуші», «Шеберлі жүргізуші», «Жол қауіпсіздігі қозғалысының үздігі», «Таза автобус» және «Жыл жүргізушісі» номинациялары беріледі. Тоқсандық жұмыс нәтижелеріне сәйкес жетістікке жеткен қызметкерлерге 10 АЕК мөлшерінде сыйақы беру жоспарлануда.Ашық ақпарат алаңы«Қызылорда автобус паркіне» қарасты бағыттардың жаңартылған жол сызбалары қала тұрғындарына БАҚ және әлеуметтік желілер арқылы таныстырылып отырады. Мекеменің диспетчерлік CALL орталығы тұрғындармен кері байланыс орнатып, халықтың ұсыныс-пікірлері мен арыз-шағымдарын қабылдауда.Жыл басынан бері серіктестік Facebook, Instagram, TikTok әлеуметтік желідегі ресми парақшаларына, телеарна, газеттерге материалдар жариялап келеді. Қоғамдық көлік жүргізушілерінің жолаушыларға дөрекілік танытуына, жылдамдықты асыруына, басқа көліктермен жарысуына тұрғындар тарапынан түскен шағымдарға дер кезінде жауап беріліп, кері байланыс орнатылған.Қоғамдық көліктердің қызметін жетілдіруді тоқтатпау керек. Бүгінде автобустарға сән кіріп, перде ілініп, жүргізуші мен кондуктор арнайы киім киген. Осы бір көріністің өзі жолаушыларға жылылық сыйлайды. Дегенмен, жолда жүру мәдениетінде жетіспей жатқан тұстарымыз бар екені жасырын емес.Қоғамдық көліктегі мәселелер бүгін пайда болған жоқ. Күні ертең шешіле қоймасы да анық. Оларды шешуге қадам жасау, жол мәдениетін сақтау сіз бен бізге байланысты.&nbsp;

Қоғамдық көлік қызметі бақылауда

<a href="https://kyzylorda-news.kz/">Kyzylorda-news.kz.</a> Бүгін қала әкімі Асылбек Шаменовтың төрағалығымен өткен мәжілісте бюджеттің кіріс бөлігінің өсуін қамтамасыз ету және салық салу базасының резервтерін анықтау, оны кеңейту мүмкіндіктері қаралды.Күн тәртібіндегі мәселе бойынша қалалық мемлекеттік кірістер басқармасының басшысы Фердоуси Қожабергенов салық базасын кеңейту бағытында атқарылған жұмыстар және қосымша резервтер туралы баяндама жасады.І тоқсан бойынша салықтық емес түсімдер мен негізгі капиталды сатудан түсетін түсімдердің жоспары өз деңгейінде орындалмағанын атап өткен қала әкімі қаланың салық базасын ұлғайту бағытындағы жұмыстарды жандандырып, бекітілген барлық салық түрлері бойынша жоспарланған межені толық орындауды тапсырды.Келесі қалалық экономика және қаржы бөлімінің басшысы Гүлнар Баймаханова салық салу базасын ұлғайту бағытында атқарылған жұмыстар барысын баяндады.<blockquote>«2023 жылдың 1 тоқсаны қорытындысымен жергілікті бюджеттің жоспары 128,2%-ға орындалып, бюджет түсімдерінің өсімі байқалған. Дегенмен, 2023 жылға бекітілген жоспарды өз деңгейінде орындау үшін алда атқаратын көптеген жұмыс бар. Салық базасын ұлғайту бағытында салаға жауапты бөлімдер мен кент, ауылдық округтердің әкімдері және кірістер органдары арасында айқын өзара бірлескен жұмыс жүргізілуі тиіс. Осы бағытта атқарылатын iс-шараларды тұрақты түрде бақылауды осы салаға жетекшілік ететін орынбасар Дінмұхаммед Ермековке жүктеймін», - деді Асылбек Өмірбекұлы.</blockquote>Жиында қалалық бөлімдер, кент және ауылдық округ әкімдерінің бүгінгі көрсеткіштерін саралаған шаһар басшысы алда бюджетке түсетін түсімдер бойынша жоспарланған кіріс көзін сапалы әрі толық орындауды, салық берешектерді өндіру жұмыстарын күшейтуді тапсырды.<img src="https://knadmin.beoblood.kz/uploads/340937734_1586418561841403_898455114729439775_n_d930c5c5ca.jpg" alt="340937734_1586418561841403_898455114729439775_n.jpg">

Қызылорда: Салық базасын кеңейту мәселесі талқыланды

<a href="https://kyzylorda-news.kz/">Kyzylorda-news.kz.</a> Бүгін Сыр елінде АЛЖИР азабын тартқан қайраткер ана, Қазақ КСР-інің еңбек сіңірген дәрігері Дәмеш Ермекова-Жүргенованың есіміне құрмет көрсетіліп, көше атауы берілді.Ескерткіш тақтаның ашылу шарасына облыс әкімінің орынбасары Н.Сақтағанов, «Темірбек Жүргенов» қоғамдық қорының төрағасы С.Аңсат, Халықаралық «Turksoy» ұйымының бас хатшысы С.Раев, Қарағанды облысы, Ақтоғай ауданы мәслихатының төрағасы Р.Б.Әбеуов және зиялы қауым өкілдері, ағайын-туыстары мен қала тұрғындары қатысты.Шараның ашылуында құттықтау сөз сөйлеген облыс әкімінің орынбасары Нұрымбет Аманұлы облыс әкімі Нұрлыбек Нәлібаевтың ізгі лебізін жеткізді.&nbsp;<blockquote>«Қазақтың небір жайсаңдары мен марқасқаларының басына қара бұлт үйірген 1937 жылғы қудалауда тек зиялы азаматтар ғана емес, сонымен қатар, өмірлік жарлары, білімді, білікті аналар да зобалаң құрығынан құтыла алмады. Міне, сондай жандардың бірі – Қазақстан халық ағарту комиссары Темірбек Жүргеновтың зайыбы, білімді қазақ қыздарының қарлығашы, Қазақ ССР-інің еңбек сіңірген дәрігері Дәмеш Әмірханқызы Ермекова еді. Оның еңбегі мен өмір жолы бүгінгі жас ұрпаққа өнеге», - деді Нұрымбет Сақтағанов.</blockquote>Дәмеш Әмірханқызы Ермекова 1905 жылы Қарағанды облысы, Қазақ ауылында дүниеге келген. Орта білім алғаннан соң, Орта Азия мемлекеттік &nbsp;университетінің медицина факультетін 1929 жылы бітіріп, 1929-1933 жылдары Ташкент медициналық институтында оқытушы болды. Ташкент қаласында Нарком Темірбек Жүргеновпен танысып, отау құрып, 1938-1946 жылдары «Халық жауының» жары ретінде 8 жыл АЛЖИР-де отырды.&nbsp;1956-1973 жылдары Алматы медициналық институтында оқытушы қызметін атқарды. Қазақ КСР-нің еңбек сіңірген дәрігері, Алматы қаласының «Құрметті азаматы» атанды.Жиынға келген халық Дәмеш Ермекова-Жүргенова анамыздың атына көшенің берілуі тәуелсіздігіміздің жемісі, ұлт тұлғаларын ұлықтаудың шынайы көрінісі екенін айтты. Сонымен бірге «Темірбек Жүргенов» қоғамдық қорының төрағасы С.Аңсат және Қарағанды облысы, Ақтоғай ауданы мәслихатының төрағасы Р.Б.Әбеуов сөз сөйлеп, тілектерін &nbsp;білдірді.<figure class="image"><img src="https://knadmin.beoblood.kz/uploads/336226697_661975145738766_2883061558386361124_n_8e1df2b7a5.jpg" alt="336226697_661975145738766_2883061558386361124_n.jpg"></figure>

Мемлекет және қоғам қайраткері Темірбек Жүргеновтың зайыбы Дәмеш Ермекова-Жүргеноваға көше аты берілді 

<a href="https://kyzylorda-news.kz/">Kyzylorda-news.kz.</a> Барлық кезде де ұлт саулығы, адам денсаулығы мемлекеттің басты құндылығы әрі байлығы болып есептеледі.Кез-келген қызмет саласында жұмыс істейтін адамдар үшін олардың денсаулық деңгейін бақылап отыру маңызды. Кәсіпорындардың әкімшілігі меншік түріне қарамастан өз кәсіпорнындағы жұмысшылар арасындағы аурушаңдықкөрсеткіштерін зерделеп отыруы қажет.Әрбір жұмысшы мерзімді медициналық тексеруден өтіп отыруы тиіс және оның нәтижелері бекітілген медициналық үлгіде тіркеледі.Медициналық тексерудің 3 түрі бар. Біріншісі жұмысқа немесе оқуға түсу кезінде алдын ала медициналық тексеру. Екіншісі халықтың декреттелген топтары үшін ағымды медициналық тексеру. Сонымен қатар зиянды еңбек жағдайларында жұмыс істейтін адамдар үшін ағымды медициналық тексеру. Міне, осы медициналық тексерулерден уақытылы өтудің маңыздылығы туралы Қызылорда облыстық санитариялық-эпидемиологиялық бақылау департаменті басшысының орынбасары Әлия Әбдіқайымова айтып берді.<blockquote>«Алдын ала медициналық қарап-тексеру, яғни жұмысқа немесе оқуға түсу кезінде және ағымды медициналық қарап-тексеруге қойылатын талаптар 2020 жылы қабылданған «Міндетті медициналық қарап-тексеруге жататын адамдардың нысаналы топтарын, сондай-ақ оларды жүргізу қағидалары мен кезеңділігін, зертханалық және функционалдық зерттеулердің көлемін, медициналық қарсы көрсеткіштерді, зиянды және (немесе) қауіпті өндірістік тізбелерді бекіту туралы» бұйрығында көрсетілген. &nbsp;Сонымен қатар міндетті медициналық тексеруге жататын адамдардың нысаналы топтары, зертханалық және функционалдық зерттеулердің көлемі және жұмыстың зиянды факторларын ескере отырып, олардың кезеңділігі көрсетілген, - дейді департамент басшысының орынбасары.</blockquote>Қызылорда облысында халыққа қызмет көрсететін 415 коммуналдық нысан (сұлулық салондары, қонақ үйлер, моншалар, сауналар, спорт объектілері және басқалар) бар. Бұл кәсіпорындардың қызметкерлері бірқатар инфекциялық ауруларды (туберкулез, тері-дерматологиялық, трихофитоз, себорея, гепатит және басқалар) жұқтырып алуы және инфекция тасымалдаушы болуы мүмкін. Сондықтан облыс тұрғындары арасында жұқпалы аурулардың таралуын болдырмау және ауруды уақытылы анықтау мақсатында мерзімді және профилактикалық медициналық тексерулерден өту қажетті бойынша түсіндірме, санитариялық ағарту жұмыстары жүргізіледі.&nbsp;Ағымдағы жыл басынан бері облыс көлемінде коммуналдық нысандармен байланысты жұқпалы аурулар тіркелген жоқ. Әрбір адам өз денсаулығына жауапты болуы керек және ауруды ерте кезеңде анықтап, уақытылы емдеуді бастау үшін уақтылы медициналық тексеруден өтуі керек.

Медициналық қарап-тексеруден уақытылы өту маңызды

<a href="https://kyzylorda-news.kz/">Kyzylorda-news.kz.</a> Биылғы жылдың 24 сәуірінен - 2 мамыр аралығында 4-9 сынып оқушылары арасында білім жетістіктерінің мониторингі (ББЖМ) өтеді. Оған 1473 мектептен 50 мыңнан астам оқушы қатысып, үш бағыт бойынша компьютерлік кешенді тестілеуден өтеді. Ол оқу, математикалық және жаратылыстану бағыттары.Айта кетейік, білім алушылардың білім жетістіктерінің мониторингі – құқықтық салдары жоқ. Тестілеуді арнайы оқытылған өкілдер өткізеді. Халықаралық салыстырмалы зерттеулермен ұқсастығы мониторинг жүргізу жөніндегі нұсқаулық пен тест-әкімші сценарий әзірленді. Сондай-ақ мониторинг барысында білім алушылардың білім сапасына әсер ететін факторларды анықтау үшін тест тапсырушылар, педагогтер және білім беру ұйымдарының әкімшіліктері арасында сауалнама жүргізіледі.<blockquote>«Білім алушылардың білім жетістіктерінің мониторингі қорытындысы бойынша еліміздің барлық өңіріне білім беру сапасын жақсарту бойынша әдістемелік ұсынымдар әзірленеді, ол мектептердегі білімді дамытуға ықпал етеді. Әрбір білім беру ұйымы оның ішінде басшылықтан бастап педагогтер, оқушылар нақты нәтижелердің маңыздылығын түсінуі тиіс. Сондықтан мониторинг жүргізу кезінде академиялық адалдық қағидаттарының сақталуын қамтамасыз ету қажет», - деді Білім беру саласындағы сапаны қамтамасыз ету комитетінің бас сарапшысы Анар Тасмұратова.</blockquote>Естеріңізге сала кетейік, білім алушылардың білім жетістіктерінің мониторингі 2021 жылдан бастап өткізіліп келеді. Жыл сайын іріктеу параметрлерін ескере отырып, мектептердің жалпы санының 25% қамтылады. 2022 жылы 1441 мектеп қатысып, мониторинг қорытындысы бойынша барлық өңірлер кешенді талдау мен әдістемелік ұсынымдар алды. Онда білім беру сапасын арттыру үшін жұмысты күшейту бағыттары нақты көрсетілген.

Мектептерде білім алушылардың білім жетістіктерінің мониторингі басталады

<a href="https://kyzylorda-news.kz/">Kyzylorda-news.kz.</a> Қызылорда қаласындағы Нәлқожа Ергешбаев атындағы №172 орта мектепте жасөспірімдер арасындағы құқықбұзушылықтың алдын алу мақсатында «Құқықтық сауаттылық – заман талабы» тақырыбында 8-11 сыныптар арасында ашық пікір алаңы өткізілді.Жасөспірімдер мен кәмелетке толмағандар арасында құқық бұзушылықтың алдын алу және оны болдырмау бағытында түсіндірме жұмыстарын жүргізу мақсатында ұйымдастырылған іс-шараға «Сенімен Болашақ» Республикалық ата-аналар қоғамдық бірлестігінің Қызылорда облысының филиал директор, педагог Ш.Жұмабекұлы мен балалар психологы Ж.Баянова, Қызылорда облысының дін істер басқармасының дін мәселелерін зерттеу орталығының психолог маманы Қ.Қойшыбаева, Қызылорда қалалық полиция басқармасы ювенальды полиция бөлімшесінің ниспекторы полиция капитаны А.Абрахманова, ата-аналар комитетінің төрағасы А.Күнғабылов, мектеп директоры &nbsp;М.Байдилдаева, директордың тәрбие ісі жөніндегі орынбасары Ж.Құрманова, педагог-психолог З.Сисенбаева, әлеуметтік педагог А.Жанетова қатысты. «Сенімен Болашақ» Республикалық ата-аналар қоғамдық бірлестігінің Қызылорда облысының филиал директоры, педагог Ш.Жұмабекұлы мен балалар психологы Ж.Баянова, 8-11 сыныптың ұл балаларына «Атом-молекула» әдісі арқылы оқушыларды екіден, үштен, төрттен жұптастырып,сұрақтар қойды. Балалар психологы Ж.Баянова қыз балаларға «Су бұрқақ» әдісін пайдаланып, ер балаларға қошемет көрсету арқылы көңіл күйлерін көтерді. Кездесу барысында оқушылар,психолог Ж.Баяновадан жасөспірім шақтағы 4 қауіп түрі туралы ақпарат алды. Ол өз сөзінде депрессия, суицидалды ой, түрлі тәуелділік, криминальды топтарға қосылып кетудің себептері мен салдары, көмек алуға болатынын, досыңа көмектесу үшін тек байқау және тиісті маманға бағыттау дағдысының жеткілікті екенін алға тартты. Сонымен қатар оқушылар буллинг, кибербуллинг яғни "Интернет-буллинг" туралы ақпарат беріп, қорғану жолдарын баяндады сәлемдесіп, оқушыларды серпілтіп алды. Оқушылармен жақсы қарым-қатынаста бола отырып түрлі ойындар арқылы баланың ішкі жан дүниесіне үңіле білді. Оқушылар түрлі сұрақтар қойып, сұрақтар арқылы жауап ала білді. Алдағы уақытта оқушылармен тығыз байланыста жұмыс жүргізетіндіктері туралы атап өтті.Қызылорда облысының дін істер басқармасының дін мәселелерін зерттеу орталығының психолог маманы Қ.Қойшыбаева қазіргі уақытта жастардың жат дінге немесе діни ағымның соңына ермеуіне, ғаламтордағы алдаушылыққа еру, ақша ұсыну мақсатында, еліктеушілік, сенгіштік және кез келген сайттарға тіркелуге болмайтындығы, мысалы әр адамның нөмірі тіркелулі кез келген сайттардан материалдар оқыған кезде абайлауымыз керек сияқты мәселелерді &nbsp;қатаң назарда ұстауымыз керектігін ескертті.Ата-аналар комитетінің төрағасы А.Күнғабылов Тасбөгет кентіндегі ерікті жастардың көшбасшысы ретінде жасөспірімдерді қолдап, түрлі іс-шаралар мен қайырымдылық істерге белсене араласуына ықпал жасап жүргендігін және осы аталған шараға мектептен де оқушылардың үнемі қатысып отыратындығын айтты. Оқушыларға өзінің осы мектептің түлегі, ата-анасы және ата-аналар комитетінің төрағасы ретінде таныстырып өтті. Қазіргі таңдағы &nbsp;орын алып жатқан &nbsp; құқық бұзушылыққа байланысты &nbsp;алдағы уақытта мұндай келеңсіз оқиғалардың қайталанбауын, қай кезде де бала қауіпсіздігі басты назарда болатынын айтты.Қызылорда қалалық полиция басқармасының ювенальды полиция бөлімшесінің инспекторы полиция капитаны А.Абрахманова кәмелеттік жасқа толмағандар арасында жасалған іс-әрекеттері қоғамға қарама-қарсы болса онда олар қылмыстық немесе әкімшілік жауаптылыққа тартылатындығы туралы айтты. Сонымен қатар кәмелеттік жасқа толмағандардың беймезгіл уақытта көшеде бос жүрмеу керектігін де атап өтті. ҚР ӘҚБтК-нің 442 бабы 1-2-3 бөлімдері, 434 бап, 437 бап, 440 бап пен 127 баптардың түсіндірмесін оқушыларға жеткізді.Мектеп директоры Мария Шынәліқызы болашақ кемелді жастардың &nbsp;қолында екендігін атап айтып, іс-шараға келген қонақтарға ризашылығын білдірді. Оқушылардан іс-шара соңында кері байланыс алынып, өздерінің алған әсерлерін ортаға салып ой бөлісуге шақырды.

Қызылордада жоғары сынып оқушылары құқық тақырыбы аясында ашық пікір алаңына қатысты

<a href="https://kyzylorda-news.kz/">Kyzylorda-news.kz.</a> Қызылорда қаласына қарасты Талсуат ауылдық округінде 2022 жылы есеп бойынша тұрғындар саны 2354 адамды құраса, оның ішінде экономикалық белсенді халық саны 1093 адам. Ауылдың 190 тқрғыны өзін-өзі жұмыспен қамтыса, 202 адам зейнетте. Ал ауылдық округтегі жұмыссыздық деңгейі 0,5 пайыз, яғни жұмыссыздар саны – 5 адам.2022 жылы ауыл тұрғындарын жұмыспен қамтудың белсенді шараларына қатыстыру арқылы 1 адам жастар практикасына, 1 адам әлеуметтік жұмысқа, 15 адам қоғамдық ақылы жұмыспен және 17 адам тұрақты жұмыспен қамтылған. 2022 жылы ауылдағы тұрмыс деңгейі аз қамтылған 105 отбасына 18,2 миллион теңге көлемінде атаулы әлеуметтік көмек жәрдемақысы төленген. Ал қайырымдылық акциялары аясында 19 тұрмысы төмен отбасыларға азық-түліктей және басқа да қолдау шаралары ұйымдастырылған.Өткен жылы ауылдық округтің бюджеті 78 668,2 теңгені құрап, жыл соңында толық игерілген. Айта кету керек бұл бюджетке 2021 жылы орташа жол жөндеу жұмыстары жасалған 5 көшеден үнемделген 18 708,1 теңге қаржы қосылды. Ауылдық округ бойынша жыл басында салық түсімдерінің жоспары 5815,0 теңгеге бекітіліп, қараша айында 4439,0 мың теңгеге түзетілген. Ал жыл соңында 4642,6 теңге түсім түсіп, жылдық жоспар 104,5 пайызға орындалған.Жергілікті бюджеттен бөлінген 5263 мың теңгеге елді мекендегі көшелердің түнгі жарық бағаналарын, барлығы 202 дана бағананы күтіп ұстау жұмыстары жүргізілген. «Өңірлерді дамыту бағдарламасы» аясында 1856,1 теңгеге ауылдық округтегі Көкшетау және Қазалы көшелерін жарықтандыру жұмыстары жасалған. 2022 жылдың қазан айында «Туран ВодСтрой» серіктестігінің демеушілігімен балалардың ойын және тренажер алаңы салынды.Ауылдық округтегі арық жүйелері жүргізілген 3 көшені аяқ сумен қамту мақсатында 2 ұңғыма қазылып, пайдалануға берілген. Электр желілері талапқа сай жүргізілмеген 13 көшедегі ағаш бөренелерді ауыстыру мақсатында қалалық құрылыс бөлімімен жобалау-сметалық құжаты әзірленіп, сараптаманың оң қорытындысы алынған. Негізінде жоба құны 69759,3 мың теңге. Бизнесті қолдау мен дамытудың мемлекеттік бағдарламасы шеңберінде атқарылған жұмыстардың нәтижесінде ауылдық округте 150 шағын және орта кәсіпкерлік субъектілері жұмыс істеп келеді. Оның ішінде 2021 жылы 126 кәсіпкерлік субъектісі болса, 2022 жылы тағы 24 кәсіпкер тіркелген. 2022 жылғы 18 ауыл тұрғыны әр түрлі бағытта кәсіпкерлікті дамытуға несие беру орталықтарынан 55,8 миллион теңге несие рәсімдеген. 2021 жылы бұл көрсеткіш 32,6 миллион теңгені құраған еді. Ал «Бастау Бизнес» жобасы бойынша кәсіпкерлік негіздеріне 20 адам оқып, сертификат алса, оның ішінде 7 адам 8,6 миллион теңгеге мемлекеттік қайтарымсыз грант жеңіп алған.&nbsp;Ал, Бизнесті қолдау мен дамытудың мемлекеттік бағдарламасы аясында «Селекциялық және асыл тұқымдық жұмыс жүргізу» бойынша Талсуат ауылдық округіндегі 2 шаруа қожалық 2,2 миллион теңге субсидия алған.&nbsp;Жалпы Талсуат ауылдық округінің жер көлемі 2018 гектарды құрайды. Оның ішінде ауыл шаруашылығы мақсатында 29 шаруашылыққа табысталған жер учаскесінің көлемі 882,9 гектар. Ал ауылдық округте жалпы саны 3065 мал басы тіркелген. 2022 жылы ауылдық округтегі 150 орындық №178 орта мектепте барлығы 418 оқушы білім алған. Сол жылы мамырда 9 оқушы 11-ші сыныпты, 37 оқушы 9-шы сыныпты аяқтады. Ұлттық бірыңғай тестілеуге барлық 11 сынып түлектері қатысып, оның алтауы мемлекеттік грантқа иегері атанған.&nbsp;Сонымен қатар, ауылдық округте бір мемлекеттік және жеке &nbsp;балабақша бар. Мемлекеттік «Заңғар» балабақшасында ауылдың 90 бала тәрбиеленсе, «Балнұр» жеке бала бақшасында 15 бала тәрбиеленуде.Одан бөлек ауылдық округте апаттық жағдайдағы ауылдық клуб және бір кітапхана жұмыс істейді. Ауылдық клуб жанына 5 үйірме ұйымдастырылған. Сонымен бірге ауылдық округте мемлекеттік конкруста жеңімпаз атанған «Өмірзақ» серіктестігі жаңадан 150 орындық ауылдық клуб ғимаратының құрылысын жүргізуде. Құрылыстың аяқталу мерзімі 2023 жылдың сәуір айына жоспарланған.Ауылдық округтегі дәрігерлік амбулаторияда 8 медицина қызметкері ауыл тұрғындарына қызмет көрсетеді. Қызмет көрсету аймағына Талсуат ауылымен қатар 11-бекет, Дружба және Строитель саяжайлары кіреді. Амбулаторияда диспансерлік есепте 345 адам тұрады. Өткен 2022 жылы ауылдық округте 53 сәби дүниеге келген.Биылғы жылы Талсуат ауылдық округінде бірқатар жобалар жүзеге асып, қарқынды құрылыс жұмыстары жүргізіледі. Мәселен, жоба құны 65151,0 теңгеге ауылдық округтегі 8 көше асфальтталады. Оның ішінде О.Сауытбаев тұйығы, Құмкөл, Сейхун, Отырар, Сырдария, 7-ші көше, Көкшетау, Қазалы көшелері бар. Бүгінде мемлекеттік сатып алу конкурсы өткізіліп, жеңімпаздары анықталуда.&nbsp;Ал «Өңірлерді дамыту бағдарламасы» аясында құны 2054,0 теңгеге &nbsp;ауылдағы Ақтөбе көшесіне түнгі жарықтандыру жүргізіледі. Сонымен қатар ауылдық округтегі 2010 жылы салынған А.Құнанбаев көшесінде орналасқан балалар ойын алаңын ағымдағы жөндеу және №7 көшені түнгі жарықтандыру жүргізіледі. Бұл жұмыстарға құны 5 миллион теңге қаржы қарастырылған.13 көшеге талапқа сай электр желісін жүргізу жұмыстары жобасы «Ауыл-Ел бесігі» жобасына ұсынылған. Құны 69759,322 теңге болатын жоба қолдау тапқан жағдайда жұмыстар атқарылатын болады. Сондай-ақ ауылдағы Алматы, Астана, Ақмешіт, Отырар, О.Сауытбаев көшелеріне жарық жүргізу бойынша жобалау-сметалық құжаты жасалып, сараптаманың оң қорытындысы алынған. Ал ауылдағы Құмкөл, Ақмешіт, Атырау, С.Нұрмағамбетов көшелеріне жаяу жүргіншілер жолын салу бойынша жобалау-сметалық құжаты жасалып, сараптаманың оң қорытындысы шыққан.Ауылдық округ аумағында орналасқан әлеуметтік қызмет көрсететін 3 мекемеге жаяу жүргіншілер жолын салу үшін жобалау-сметалық құжаты сараптамасымен жасатуға мемлекеттік сатып алу жарияланып, жеңімпазы анықталған. Ал Сығанақ көшесіне тас төсеу үшін жобалау-сметалық құжаты жасалады. &nbsp;

Қазақстан және Қызылорда облысының жаңалықтары