<a href="https://kyzylorda-news.kz/">Kyzylorda-news.kz.</a> Айдынды Аралмен ежелден төсекте басы, төскейде малы қосылған көршілес Қазалы ауданы таланттардан кенде болған емес. Тіпті кешегі өткен Байназар Өтеповтің, Мәскеуде жоғары әдеби біліммен сусындаған, атақты қаламгер Шыңғыс Айтматовтың «Жәмила» повесін алпысыншы жылдары қазақша сөйлеткен, ұлы жазушымен дос болған сындарлы сыншы Қалжан Нұрмаханов, Балтабай Тәжімбетов, Бекділда Алдамжаров, Әнес Нарымбетов, Рүстем Жанаев, Сейітқұл Оспанов, бүгінгі арамызда жүрген Молдахмет Қаназ, Арал, Қазалының төл перзенті іспеттес, биылғы мемлекеттік сыйлыққа үкілеп қосып отырған халықаралық «Алаш» әдеби сыйлығының иегері Қуаныш Жиенбайдың есімдерін кім білмес?! Солармен қанаттас, қабаттас, туғалы қасиетті Қазалы топырағында мекен еткен ақын-журналист Жетіскен Мәкенәлінің есімін ел-жұрты мақтан тұтады.Қазалы ауданында адамдары аузын ашса жүрегі көрінетін Аранды атты ауыл бар. Жетіскен осы ауылдың перзенті. Ақын кіндік қаны тамған топырағына ұқсайды деген қанатты сөз бар. Рас шығар, бір көргенде Жетіскен тұйық азамат сияқты. Таныса, сөйлесе келе оның көпшіл, сыршыл екенін аңғаратынбыз.Иә, Аранды ауылындағы әкесі Мәкенәлі мен анасы Күләйдің құтты шаңырағында 1952 жылы 7 маусымда жарық дүниеге келген Жетіскен орта мектептен соң Қызылорданың медучилищесіне оқуға түсіп, оны 1971 жылы фельдшер мамандығы бойынша тәмамдады. Сөйтіп, бірінші санатты фельдшер дәрежесімен денсаулық саласында он екі жыл қызмет атқарды.Жетіскеннің арманы ақ желеңді дәрігер болу еді. Өмір бірақ өз дегенін жасайды екен. Бұған себеп болған, ол бала жасынан сол кездегі аудандық «Ленин туы», республикалық «Қазақстан пионері» газеттеріне мектеп қабырғасында дүниеге келген алғашқы өлең-мақалаларын күн құрғатпай жолдап жататын. Соның әсері ме, Жетіскен бір кездері екінші тынысы ашылған жүйріктей әдебиет ауылына ат басын бұрды. Сөйтіп, 1983 жылы 5 мамырда (сол кездері бұл Кеңестік баспасөз күні болып есептелетін) Қазалы аудандық «Ленин туы» газеті редакциясының табалдырығынан имене аттады. Ауылдан үзбей жазып, газет жұмысына белсене араласып жүрген ол басылым редакторлары Тиышбай Шерекенов, Киікбай Ізетов, Әлмәмбет Әлішев сияқты тіс қаққан қаламгерлермен бес жыл шығармашылық тығыз байланыс¬та қызмет атқарды.1988 жылы сол кездегі Қазалы аудандық партия комитетінің бірінші хатшысы марқұм Елеу Көшербаев журналист ақын Жетіскен Мәкеналыны аудандық мәдениет бөлімінің басшы¬лығына ұсынды. Зерделі, жастардың жанашыры болған білікті басшының ұсынысы облыстық салалық бас¬шылық пен аупарткомның бюро мүшелері тарапынан кеңінен қолдау тапқан. Сөйтіп отыз алты жастағы Жетіскен бұл өңірдің аузынан ақық жыр, көмейінен бұлбұл ән, кеудесінен күмбір-күмбір күй төгілген өнерлі өрендерді маңайына топтастырды. Жетіскен бөлімді басқарған жылдары Қазалының өнеріне берісі Сыр бойы, әрісі Алматының талғампаз көрермен қауымы дән риза болды, талай жас таланттар көптеген байқауларда томағасын сыпырып топқа салған түбіт қанат қырандардай биікке самғады. Әу баста жүрек толқынысын баса алмай қорқасоқтап тізгінін ұстаған бұл қызметті 1995 жылдың тамызына дейін, мұнан соң әр жылдары тілдерді дамыту саласында, сол кездегі ішкі саясат секторында бас маман, Ғ.Мұратбаевтың тарихи-мемориалдық музейінде аға ғылыми қызметкер, 2002-2005 жылдары екінші мәрте аудандық мәдениет және тілдерді дамыту бөлімінің бастығы болып қызмет атқарған. Аудан басшылары Жетіскен журналисті әр қияға салып, оның қай қызметтің тізгінін ұстаса да қапы қалдырмайтынын түсінді. Шынында солай болып шықты. Осындай қилы-қилы басшылық қызмет атқарып жүрсе де Жетіскен әріптесіміз бәз баяғы кішілік қалпынан жазбады. «Асыл адам айнымас» деп осындайда айтса керек.Ол үшін мүттайым мансаптан гөрі шырайлы шығармашылығы анағұрлым артық. Осы уақытқа дейін «ХХІ ғасырға аманат» атты алғашқы жыр жинағы Қызылорда қаласындағы «Тұмар» баспасынан басылып шықса, ал 60 жастың асқарына аттаған тұста ақынның «Тағдырмен тілдесу» жыр кітабы жарық көрді. Бұған әр жылдары оқырман қолына тиген «Ортаймаған қазаны, қазыналы Қазалы», «Тамыры терең, тарихы кенен – Қазалы» жинағының үш кітабы, «Асандар көтерілісі», аралдық қаламгер Толыбай Абылаевпен бірігіп жазған «Нұрбай би» және Шығыс жастарының көсемі болған Ғани Мұратбаев туралы деректі жинақтарын қосыңыз.Жетіскенді қарт Қазалының көзі қарақты, сөзі қанатты қаламгері десек, артық айтқандығымыз болмас. Тарихы бағзы оғыздармен еншілес осы аймақтың шежірешісі іспеттес ол. Қазалының өткені мен бүгіні туралы ерінбей, жалықпай жазған ізденіске толы деректі кітаптары Жетіскеннің жетістігі дер едім.Бұл жөнінде «Денсаулық» журналының бас редакторы, белгілі жазушы Молдахмет Қаназ ағамыз:<blockquote>«Анда-санда «кір жуып, кіндік кескен» туған жерге барсақ, елпектеп алдымыздан шығатын Жетіскен ініміз. Қазыналы Қазалының арғы-бергі тарихын түртінектеп жарыққа шығарып жүрген де сол. Қолға қалам ұстаған адам көп болғанмен Жетіскеннің орыны бір төбе. Қазалы туралы дерек қажет болса, дереу Жетіскенге хабарласамыз. Ол осы ауданның арамызда жүрген архиві сияқты», – деп дөп басып айтады.</blockquote>Туған ауданының құрметі мен ықыласын еншілеген Жетіскен құрдасым сүйікті жары Марияш екеуі ұланақтай төрт ұл, қызанақтай бір қыз тәрбиелеп, қияға ұшырды. Айтпақшы, Марияш Арал ауданындағы Қызылжар ауылының қызы. Әкесі Мардан Дәрібаев бұл өңірге белгілі кісі болған кезінде. Марияш замандасымыздың немере ағасы – қазақтың белгілі ақыны, марқұм Жарасқан Әбдірашев.Жетіскен – ақын азамат. Оған төмендегі өлең жолдары толық куә бола алады.Армысың, жиырма бірінші жаңа ғасыр! Ізгілік сыйлаймысың ұлан-асыр. Өзіңмен сәл ғана бір тілдесейік, Ақынның жүрегінде қала ма сыр?! – деп толғанады ақын құрдасым.Бір сөзбен айтқанда, ақын-журналист Жетіскен Мәкеналының алған асуы босқа жеткен жоқ. Оған шығармашылық шырайлы белестері куә.

Замандас келбеті

<a href="https://kyzylorda-news.kz/">Kyzylorda-news.kz.</a> Қызылқұм ауылдық округінің әлеуметтік, ауылдың экономикалық дамуы және басқа да мәселелері ауыл әкімі Оңталап Мүсілімнің жіті назарында. Мұнда 1207 адамнан құралған 216 отбасы негізінен мал шараушылығын жанына жақын тұтуда. Округ бойынша мал басы 1384 ірі қара, 3495 қой, 2680 ешкі, 785 жылқы және 128 түйені құрап отыр.Ветеринариялық пункт қызметкерлері тарапынан жоспарланған диагностикалық зерттеулер мен профилактикалық іс-шаралар тұрақты түрде жүргізіліп жатыр. Қазіргі кезде тұрғындар жеке мал шаруашылығынан бөлек, ауыл маңындағы су айдындарынан балық аулаумен шұғылданады.Округте №225 орта мектебі және № 146 негізгі мектебі, №27 «Бөбек» бөбекжай-балабақшасы, ауылдық дәрігерлік амбулатория, клуб, кітапхана, ауа райын зерттеу станциясы, почта байланыс бөлімшесі, ветеринариялық пункт, су бекеті жұмыс жасайды. Ауыл халқы кәсіпкерлікті де шыр айналдыруда. Оның ішінде, 3 шаруа қожалығы, 1 ауыл шаруашылығы кооперативі, 5 дүкен бар. Сонымен бірге, 8 жеке автобус аудан орталығына жолаушы тасымалдайды.Округ аумағында Жанқожа батыр атындағы шекара заставасы орналасқан. Кәукей ауылынан 170 шақырым жерде ұлт батыры Жанқожа бабаның қорымы бар. Бұрынғы өткен заманда осы аумақта әулие Қарабура, Бағыберген би, емші Жұбаныш Игісінұлы, сынықшы Омар секілді аты аңызға айналған адамдар өмір сүрген.Кең болсаң, кем болмайсыңҚызылқұм ауылдық округі әкімінің айтуынша, жыл басынан бері тұрмысы төмен және аз қамтылған 3 отбасыға мемлекеттік атаулы көмек тағайындалды. Ақылы қоғамдық жұмыспен 33 адам қамтамасыз етілді. Тұрақты жұмысқа 2 адам орналасса, 9 адам уақытша кәсіппен айналысуда. «Жасыл ел» бағдарламасы бойынша 18 жас мерзімдік жұмысқа қабылданды.<blockquote>«Жыл сайын мекеме-кәсіпорындар ұжымы, кәсіпкерлердің, жеке азаматтардың, сондай-ақ ауылда туып-өсіп, қазіргі кезде ауылымыздан тыс жерде өмір сүріп жатқан азаматтардың демеушілігімен қайырымдылық шаралары ұйымдастырылып жүр. Биыл 8 наурыз – Халықаралық әйелдер күні мерекесіне орай 31 анаға 1985 жылғы туылған түлектердің демеушілігімен сый-сияпат көрсетілді. Сондай-ақ, 1997 жылғы туған қыз-жігіттердің демеуші болуымен ауылымыздағы 5 тыл ардагеріне сыйлықтар тарту етілді», – дейді Оңталап Мүсілім.</blockquote>Сонымен қатар, ауыл түлектерінің күшімен Орталық саябаққа «Ауылым – алтын бесігім» Кәукей белгісі және субұрқақ салынды. Аз қамтылған отбасыларға 1 маусым – балалар күніне орай 3 велосипед табысталды. Мектепке жол акциясы бойынша 5 балаға оқу құралдары мен мектеп формалары алып берілді.Жеке кәсіпкер Кемал Талғат ауыл тұрғыны, зейнеткер апаға азық-түлік алып берді. Демеушілердің көмегімен 3 отбасыға қыстық мал азығы түсіріліп берілді. Екі отбасыға қатты отыннан көмек берілді.Кәукейліктер кәсіпті кеңейтудеОкруг бойынша жолаушы тасымалдау саласында тұрғындарға 8 автобус қызмет көрсетеді. Кәукей – Әйтеке би кенті бағыты бойынша күніне 2 рет, Кәукей – Ажар бағытына аптасына 2 рет жолаушылар автобусы қатынап тұр. Сонымен қатар өткен жылдан бастап такси қызметімен айналысатын 4 кәсіпкер тұрғындарға қызмет етуде. «Кәукей-Бозкөл» автомобиль жолының жөндеу жұмыстары да реттелуде.Биыл округте 70 кәсіпкерлік субъектісі ресми тіркелді. Оның ішінде, 1 ауыл шаруашылығы кооперативі, 3 шаруа қожалығы, 3 жауапкершілігі шектеулі серіктестік, 63 жеке кәсіпкер бар.Осы жылдан бастап 2021-2025 жылдарға арналған кәсіпкерлікті дамыту жөніндегі ұлттық жоба іске асырылуда. Игілікті жоба халықты жұмыспен қамтуды арттыру мақсатында шағын бизнесті дамыту, экономика салаларын әртараптандырудың драйвері – орта бизнеске сүйену, кәсіпкерлік субъектілері үшін тең жағдайлар – бәсекелестік кешенді дамытуға мұрындық болмақ. Осы ретте, ауыл тұрғындарының «Бастау Бизнес» жобасы шеңберінде оқуға қатысуын, жеке ісін ашуға, қысқа мерзім кәсіптік оқудан өтуіне, ауылда жаңа кәсіпкерлік субъектілерін құру бағытында тұрақты жұмыс атқарылады. Жалпы, 6 адам «Бастау Бизнес» жобасы шеңберінде оқуға қатысып, сертификаттарын алды.Басты міндет – халықтың қамыКөркейту-көгалдандыру жұмыстарына аудандық бюджеттен қомақты қаржы бөлініп отыр. Бұл қаржыға ауыл ішін көгалдандыру үшін аяқсу жіберіліп, жаңадан ағаш көшеттері егілді. Санитариялық тазалау жұмыстары жүргізілді. Сонымен қатар, ауыл ішін қоқыстан тазартуға да бөлек ақша аударылды. Қоқыстар бей-берекетсіз шашылмас үшін арнайы қатты қалдықтарды бөлек жинайтын тағы да қосымша контейнерлер сатып алынды. Сондай-ақ, өткен жылы салынған «Орталық саябақ» ішіне ауыл түлектерінің ұйымдастыруымен субұрқақ салынды.Округте мекемелер мен жекелеген тұрғын үйлер CDMA жүйесі арқылы телефон пайдаланып отыр. Округ орталығы «Актив», «Билайн» және «Алтел/Теле2» ұялы байланыс желілерімен қамтамасыз етілген. Почта байланыс бөлімшесі газет-журнал, зейнетақы төлемдерін таратумен бірге әртүрлі төлемақылар қабылдайды. Сонымен бірге, почта салымдарын жеткізуді қамтамасыз етеді.Кәукей ауылындағы №225 орта мектебінде 13 сыныпқа 46 мұғалім оқу-тәрбие жұмысын жүргізеді.2022-2023 жылғы оқу жылында мектепте 220 оқушы, мектепалды даярлық тобында 18 бала білім алады.Биыл мектепті 16 оқушы бітіріп шықты. ҰБТ тапсырған 14 оқушының орташа баллы 76 процентті құрады. Жоғарғы оқу орнына түсу үшін 12 оқушы грант конкурсына қатысып, қалған 4 оқушы колледжге барды. Ажар ауылындағы №146 шағын жинақты негізгі мектепте 16 оқушы білім алады. Оларға 9 мұғалім тәрбие береді.Бүгінде №27 «Бөбек» бөбекжай-балабақшасында 50 бала тәрбиеленуде. "Қызылқұм" дәрігерлік амбулаториясында 1 дәрігер, 1 фельдшер, 7 мейіркеш тұрғындардың денсаулығына жауапты. Ажар ауылы тұрғындары үшін фельдшер бекітілген. «Жедел жәрдем» көлігімен қамтамасыз етілген. Емханада 7 төсектік күндізгі бөлім бар. Ай сайынғы балаларды егу жұмысы бекітілген кестеге сәйкес жүргізілуде. Ересектер арасында диспансерлік есепте 213 адам тұрады. Есепте тұрған науқастар босатылған тегін дәрімен қамтамасыз етіліп келеді. Бір жасқа дейінгі нәрестелер көрсеткішіне қарай тегін сүт тағаммен қамтылуда.1981 жылы салынған Ауылдық клуб үйі апаттық жағдайда тұрғандықтан 2019 жылдан бастап ауылдық кітапханамен бірге бұрынғы ауылдық аурухананың бос тұрған ғимаратына уақытша орналасқан болатын. Аталған ғимарат тиісті талапқа сай болмағандықтан клуб үйінің қалыпты жұмыс жасауына өз қиындығын келтіріп келеді. Дегенмен, жоспардан таймай, әртүрлі іс-шара өткізілді. Мұндағы бес үйірмеге 60 оқушы қатысады.Наурыз айында жаңа клуб үйінің құрылысы басталды. Келесі жылы мамыр айында пайдалануға беріледі деп күтілуде. Құрылыс жұмыстарына ауылдағы жұмыссыз азаматтар да тартылуда. Қазіргі таңда құрылыста 4 азамат тер төгуде. Алдағы уақытта жаңа клубта мәдени-ағарту жұмыстары жандана түседі.Округ орталығы – Кәукей ауылы «Арал – Сарыбұлақ» топтық су құбырына қосылған, ауыл ішіндегі барлық үйге колонкалар тартылған. Ауылдағы әр отбасы өз үйіндегі колонка арқылы ауыз су пайдалануда. Ауыз суды тарату бекетінде 5 адам тұрақты судың тоқтаусыз берілуін қадағалайды.<blockquote>«Округ тұрғындары 1 подстанция, 6 трансформатор арқылы ауыл ішілік электр желісі арқылы тұрақты электр жарығымен қамтамасыз етілген. Алайда электр трансформаторлары ескі, кейбір көшелерде әсіресе кешкі мезгілге қарай электр жарығы әлсіреп кетеді. Бұл жөнінде тиісті мекемелерге сұраныстар жіберіліп қойған», – дейді ауыл әкімі.</blockquote>Оңталап Мүсілім мемлекеттік бағдарламаларды жүзеге асыру, шағын кәсіпкерлікті дамыту арқылы жұмыссыздықтың деңгейін төмендету мақсатында нақты іс-шаралар қабылдауды қолға алмақ. Шағын кәсіпкерлікті дамытуға жағдай да жасау ойда бар. Кәукей ауылының 2 көшесіне орташа жөндеу жұмыстарын жүргізуді де діттеп отыр. Электр желісі трансформаторларын жаңартылса, нұр үстіне нұр болады деуде. Ауылдық округте балық шаруашылығын дамытуды жоспарлауда. Қызылқұм ауылдық округінің әкімі қамыс өңдеу шаруашылығы да соңғы уақытта сұранысқа ие екендігін алға тартып, оны дамытуды көздеуде екен. Біздің тараптан талапшыл ауыл әкіміне игі бастамаларға сәттілік тілеуден басқа шара жоқ.

Төрт түлікті түлеткен ауыл

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысы ПД басшылығының ұйымдастыруымен облыс тұрғындары арасында құқықтық мәдениетін арттыру, қоғамда құқық бұзушылықтың алдын алу, құқық бұзушылықтарға "нөлдік" төзімділікті қалыптастыру мақсатында «Алаяқтық әрекеттен сақтаныңыз!» атты акциясы өткізілді.Акция барысында полицейлер интернет-алаяқтықтың түрлерін, жасалу жолдарын, олардың кеңінен пайдаланылатын айла-амалдарын әшкерелеп, халыққа алаяқтардың құрығына түсіп қалмас үшін не істеу керектігін түсіндірді.&nbsp;Жыл басынан бері өңіріміздегі барлық алаяқтық қылмыстардың саны 560-қа жетсе, соның ішіндегі 441-і интернет-алаяқтық болған. Алаяқтардың құрған тұзақтарына түскендердің қателерінен сабақ алмай, өзіміздің басымызға түскен кезде ғана бармақтарымызды тістеп отырамыз. Әр ауданда, әр қалада, әр ауылда да оңай жолмен алдап ақша табатын алаяқтар баршылық.Қазір Қызылорда облысы полиция департаментінің қызметкерлері еріктілермен бірлесіп қылмыстың бұл түрінің алдын алу бойынша кең ауқымды операцияны бастап кеткен. ПД бастығының орынбасары полиция подполковнигі Ілияс Жұмағұловтың айтуына қарағанда, облыс бойынша акцияға жүзден астам полицей тартылыпты. Олардың бәрі әкімшілік учаскелердегі аулалар мен кіреберістерді аралауда. Тәртіп сақшылары кіреберістерге жадынамалар жапсырып және тұрғындарға буклеттер үлестіреді. Ал алаяқтыққа қарсы тұруға ең осал топ – зейнеткерлермен түсіндірме жұмыстарын жүргізуде. «Жадынамалар әзірленді, профилактикалық акциялар барысында облыс орталығының барлық шағын аудандарын қамту жоспарлануда. Қызылордалықтарды әлеуметтік желілерде және мессенджерлер чаттарында интернет-алаяқтықтың алдын алу туралы ұсынымдарымен бөлісуге шақырамыз. Жас азаматтар қылмыстың осы түрі туралы егде тартқан туыстары мен көршілерін ескертуі қажет. Интернет-алаяқтармен байланысқан кезде шешім қабылдауға асықпай, банкке тексеру үшін қоңырау соғу, қандай жағдай болсын, жеке мәліметтерді айтпау не жолдамау маңызды екендігін халықтың есіне салудамыз. Алаяқтықтың алдын алу жұмысы ауқымды түрде жүргізіле береді», дейді Ілияс Жұмағұлов.Шарада адам көп шоғырланатын жерлерде, демалыс орындарында алаяқтық жөнінде ақпараттық үлестірмелі қағаздар таратылды.<figure class="image"><img src="https://knadmin.beoblood.kz/uploads/image_10_07_23_11_40_2_4178208753.jpeg" alt="image-10-07-23-11-40-2.jpeg"></figure>

Қызылорда облысында алаяқтықтың алдын алу акциясы өткізілді

<a href="https://kyzylorda-news.kz/">Kyzylorda-news.kz.</a> «Ауыл шаруашылығын қаржылай қолдау қоры» арқылы Қазалы ауданында 2015 жылдан бері бірнеше тұрғын шағын несие алып, құс өсіруге, мал шаруашылығын дамытуға, бау-бақшалар егуге қаржы жұмсады. Солардың бірі – бекарыстанбилік бағбан Төребай Қожақов. Ол агробизнесті зейнеткерлікке шыққаннан кейін бастаған. Бүгінде ақсақалдың ауласында жеміс ағашы мен көкөністердің сан түрі жайқала өсіп тұр.Бізге бау-бақшасын аралатып көрсеткен еңбекқор жан кіре берістегі көкке бой соза өсіп тұрған екі түп ағашты ерекше таныстырды. Бұл грек жаңғағы екен. Осыдан он жыл бұрын Түркістан қаласынан көшетін әкеліп отырғызған, жалықпай, күтім жасау арқылы жерсіндіріп, жемісін екі жылдан бері жеп келеді. Биыл да түйнек сала бастаған. Одан кейін бақты жағалай егілген шие, сары, қара өрік, алма, алмұрт ағаштары жайқалып, көз тартады. Көкөністер егілген атыздардың жөні бір бөлек. Онда қызылша, қызанақ, қияр, жуа, аскөк егіліп, жер идірген жанның бақылауына алынған.Кәсіпкер «ЭкоДаму» бағдарламасымен 1 миллион теңге алып, 2000 көшет сатып әкелді. Осылайша бірнеше жыл бойы төгілген тер мен еткен еңбек кәсіпкерлікке ұласты. Қазір Төребай Қожақұлы ауласындағы жеміс-жидектер мен көкөністердің барлығының көшеті мен жемісін аудан орталығына әкеліп сатады. Кейде ауыл тұрғындарына тегін үлестіріп, күтіп-баптаудың жолдарын айтып, жанашырлық көрсетеді.<blockquote>«Қазір бау-бақшаның алаңы 11 соттыққа дейін өсті. Мұнда жеміс ағаштарының сан түрі өседі. Үш-төрт жылдың ішінде жаңа көшеттер алғашқы жемісін береді. Қуаң жерлерден де жақсы өнім алуға болады. Мұндай бақшаны өсіру – үлкен еңбек. Көптеген замандастарым бақша егумен айналысады, дегенмен жақсы өнім ала алмай жатады. Мен арнайы бау-бақша өсірудің әдіс-тәсілдері жазылған кітаптарды іздеп жүріп, көп оқимын және ақпараттарға құлақ түремін. Мәселен, қашан суару керек, қалай артық бұтақтарды кесу керек екендігін кітапқа сүйене отырып істеймін. Бүгінде бұл жөнінде біраз тәжірибе жинадым», – дейді кәсіпкер.</blockquote>Әр жылдары тепловоз машинисі, таркторшы, күрішші, қойма меңгерушісі болған Төребай Қожақов еңбектен ешқашан қашқан емес. Балалары мен немерелеріне дейін бау-бақшаның күтімін жақсы біледі. «Еңбек еткеннің еңсесі биік» бағбанның алда жоспары көп. Бау-бақшасының көлемін бұдан әрі кеңейтіп, жеміс түрлерін көбейте түсуді ниет етіп отыр.

Қазалылық бағбанның алаңы 11 соттыққа дейін өсті

<a href="https://kyzylorda-news.kz/">Kyzylorda-news.kz.</a> Қазалы қалалық балалар кітапханасының ұйымдастыруымен «Болашаққа барар жол» жобасы аясында «Бәріміз бірге оқимыз» атты отбасылық кітап оқу күні өткізілді.&nbsp;Мақсаты – отбасылық кітап оқу дәстүрін жаңғырту, кітапқа, сөзге ұқыпты қарау, бірлескен шығармашылық арқылы отбасын нығайту, кітап арқылы жасөспірімдерді адалдыққа, әдептілікке, бауырмалдылыққа, достыққа берік, бір сөзді болуға, үлкенге құрметпен қарауға тәрбиелеу.&nbsp;Шара барысында балалар жазушысы Әлібек Файзуллаұлының жасөспірімдерге арналған «Өтірік айтпайтын күн» кітабынан «Өтірік айтпайтын күн» және «Көлеңке дос» әңгімесін кітапхананың тұрақты отбасылық оқырмандары Қанибаевтар отбасы, Рахмановтар отбасы және Орынбасаровтар отбасы болып талқылады. &nbsp;Кітапханашы Қазына Садирова шараны жүргізіп, жоба мақсатын түсіндіріп, оқырмандарға сұрақтар қою арқылы, шығарманың мазмұнын ашты. Ата-ана және олардың балаларының қолында жақсы кітап бар болса – ол үйде оқырмандық тұрақтылық қалыптасып, рухани бірлік болатынына кәміл сенуге болады. Кітапхананың басты және маңызды рөлі – оқырмандарды кітапқа жақындату.Шарадан соң жас оқырмандар Нұрдәулет Қанибай «Елім менің» әнін орындаса, Жанерке Орынбасар Абайдың өлеңін оқып, Балаби Теңелұлы А.Түменбайдың «Бүгін менің апамның туған күні» өлеңдерін оқып, өз өнерлерін көрсетті.

Кітап оқуға құштар отбасылар

<a href="https://kyzylorda-news.kz/ru">Kyzylorda-news.kz.</a> Астана – ұланғайыр еліміздің бас қаласы, әлем таныған жас қала. Өйткені еліміздің астанасында ғылыми-оқу орталықтары, мәдениет орталықтары, күрделі құрылыс зәулім үйлері бой көтерді. Елорданың көркі күннен-күнге арта түсті, әлем елдеріне мақтанышпен көрсете алатындай ару қалаға айналды. Еңселі Елорда, асқақтаған арман қала, астанамыз жасампаз қала деген сынды керемет теңеу сөздерді құрметпен, бойымызға біткен ұлтшылдық сезіммен көкірегімізді керіп, басымызды көтеріп, аса мақтанышпен айта аламыз. Есілдің бойында, Арқаның төсінде еркін орналасқан жасампаз қаланың жаңарған келбеті кез келген мейманды таңдандырмай қоймасы анық.Сарыарқаның төсінде, Есілдің жағасынан орын тепкен астананың бүгінгі келбеті – әлем жұртшылығына аян. Тарихқа көз жүгіртсек, сонау Ақмола, Целиноград атауларын арқалаған жас қала, қазіргі таңда түрлі форумдар мен саяси жиындар өтетін маңызды орталыққа айналды. Экономикасы мен мәдениеті қарыштап дамудың даңғыл жолына түсті. Күн сайын келбеті артып келе жатқан шырайлы шаһарда бой көтерген зәулім сарайлар мен жаңа ғимараттар да аз емес. Қалаға ат басын бұрып, табан тіреген шетел азаматтары жас қаланың әсемдігіне тамсанып, көкпен таласқан «Бәйтерек» монументіне бас сұқпай кетпейді. Астана сәулеттік кешенінің басты өзегін құрайтын негізгі орындарының алғашқы сапында «Хан Шатыр», «Бәйтерек», «Ақорда», «Бейбітшілік және келісім сарайы» және «Қазақ Елі» монументі тұр. «Бейбітшілік пен келісім» сарайы, «Тәуелсіздік» сарайы еліміз үшін маңызды, саяси форумдар мен үлкен басқосулардың мекеніне айналды. Ел Президентінің резиденциясы – Ақорда әсем де, салтанатты келбетімен қаланың ажарына сән қосып тұр. Мемлекеттік маңыз беретін ең айшықты ғимарат, оның ішкі сәулеті де ұлттық өнер мен дәстүрге мол. Осы ғимараттардың өзі тәуелсіздіктің тұғыры, азаттықтың белгісі іспетті. Астана &nbsp;қаласының аз уақыт ішінде жеткен жетістіктері мен шыққан белестері аз емес. Қазақстанды әлемге танытқан Елорданың даму жағдайы да, архитектуралық құрылысы да ерекше. Елорда арқылы әлем жұрты Қазақстанды таныды, оның қазіргі дамуы дәрежесін білетін жағдайға жетті.Иә, Астана – Тәуелсіздіктің тарихи таңбасы, жарқын болашақтың жол басы. Елорда – ізгі ниеттер мен игілікті істердің, келісім мен кемел ойдың қаласы. Аз уақыттың ішінде серпінді дамып келе жатқан қазақ мемлекетінің баршаға мойындалған елордасы – шын мәнінде ұлттық идея, Қазақстанның кескін-келбеті. Елорда – тәуелсіздігіміздің бойтұмары, бүкіл қазақстандықтардың ортақ мақта-нышы, бағыт-бағдарымызды айқындап беретін бағдаршамымыз, достық пен бейбітшіліктің мекені. Осыған дейін аз уақыт өтсе де, ауыз толтырып айтар жетістіктеріміз де аз емес. Әлем елдері тамсанып қарайтын ару Астана күннен-күнге өркендеп, тек жақсылыққа қадам басып келеді.&nbsp;Жақында Астана күні қарсаңында аудандық Қ.Қазантаев атындағы мәдениет үйінде салтанатты шара өтті. Аудан жұртына мерекелік көңіл-күй сыйлаған жергілікті өнерпаздар айшықты Астанамызды әнге қосып, жасампаз жас қаламыздың осы уақыт ішінде өсіп-өркендеу жолындағы ауқымды жобаларына тоқталды. Аудан халқын мерейлі мерекемен құттықтаған аудан әкімінің орынбасары Ғани Сүлейменов Астана халқымыздың аласармас айбыны, асқақ абыройы, мұқалмас рухы мен азаттық аңсаған бабалардың орындалған арманы екенін тілге тиек етті.– Астана әрбір қазақ үшін қымбат. Астана – тәуелсіздігіміздің тірегі, еліміздің жүрегі. Ел тәуелсіздігінің 30 жылдан астам уақытында қазақ даласы түбегейлі өзгерді. Сондай үлкен өзгерістердің бірі – астанамыздың Сарыарқаның төріне көшуі. Тәуелсіз қазақ елінің жаңа астанасының бой көтеруі, Астананың Ақмолаға келуі – бабалар рухын қастерлеу, қазақтың сонау ғасырлар бойы аңсаған арман-мұраттарының орындалуы десек болады.&nbsp;Тарих тереңінен сыр тартқан Алматы қаласының біз үшін ерекше орны бар. Қазақстанның өркендеуінің басты символы болған бұл қала да еліміздің астанасы, одақтағы әсем қалалардың қатарында болды. Алматы қазір де ғылым, білім, мәдениет және қаржы орталығына айналған, миллиондаған тұрғыны бар еліміздің ең басты қаласы болып қала береді. Бүгінгі Астана – әлемдегі жедел қарқынмен дамып келе жатқан қалалардың бірі. Елордамыз Алаш жұртының мақтан тұтар мерейіне айналып отыр. Себебі, Астана толассыз түлеу, дамылсыз даму үстінде. Сарыарқа төсіндегі Елорда-Астана өркен жайып, жаһандық сәулет өнерінің озық жиынтықтарымен ажарланып, құлпырып келеді.Астана өркениет көшіндегі темір қазығымыз. Астанамыздың діңгегі мықты, мәртебесі биік болсын, – деді аудан әкімінің орынбасары Ғани Кенжеғараұлы. Мұнан соң ел демократиясының дамуына үлес қосып, тар құрсағын кеңітіп дүниеге алты, жеті бала әкелген алтын құрсақты аналарға күміс, алтын алқа табысталды. Расымен, алтын құрсақты аналарға жылдың қай мезгілінде құрмет көрсетсек те артық етпейді. Дүниенің күретамыры, адамзаттың ардақ тұтар асылы, бір қолымен бесікті, бір қолымен әлемді тербеткен аяулы жан, тіршіліктің бастауы аналар қауымы барлық жақсылыққа лайықты. Қазіргі таңда ауданда өмірге ұрпақ әкеліп, оларды тәрбиелеп өсіруде үлгі-өнеге болып жүрген «Алтын құрсақты» аналар жеткілікті. Олардың әрқайсысы қоғамға пайдалы, саналы ұрпақ тәрбиелеуде аянбай тер төгіп келеді. Жалағаш ауданында үш жүзге жуық «Алтын алқа» және алты жүздей «Күміс алқа» иегері бар. Оның ішінде 44 ана І және ІІ дәрежелі «Ана даңқы» орденімен марапатталса, 40 ана Кеңестер одағының «Батыр ана» атағына ие болған.&nbsp;Салтанатты шара барысында аудан тұрғындары арнайы дайындалған бейнекөрсетілімге куә болса, жиын соңы концерттік бағдарламаға ұласты.Айта кетейік, елордамыз – Астана күніне орай 6 шілде күні орталық алаңда жалағаштықтарға арналған «Асқақтай бер, Астана» атты гала концерт ұйымдастырылды.&nbsp;Жалпы, тәуелсіздіктің алтын тұғыры, Алаштың асқақ айбары – ару астананың төрткүл дүниені өзіне қаратып, тамсандырғаны қашан. Аз ғана уақыттың ішінде сән-салтанатымен әлем астаналарымен иық тіресіп, бой таласа алатындай деңгейге жетті. Астана қаласы батыс пен шығысты жалғастыратын алтын көпір. Егемен елдің бас қаласы ата-бабамыз бен кешегі желтоқсан боздақтарының орындалған арманы.

Жалағашта елорда күні аталып өтті

<a href="https://kyzylorda-news.kz/">Kyzylorda-news.kz.</a>&nbsp; Қызылорда облыстық полиция департаментінің бастығы полиция генерал-майоры Махсудхан Аблазимов &nbsp;Жедел кеңес өткізіп, 2023 жылдың І жартыжылдығын қорытындылады. Жиынға департамент бастығының орынбасарлары, басқарма, қала, аудан басшылары және жеке құрам қатысты.Өткен аптада Мемлекет басшысы Қасым-Жомарт Тоқаевтың төрағалығымен Ішкі істер министрлігінің кеңейтілген алқасы өтті. &nbsp;Жиында биылғы 6 айда ішкі істер органдары атқарған жұмыстың қорытындылары және Президент тапсырмаларын орындау барысы қаралды.Қасым-Жомарт Тоқаев полиция қызметкерлерінің күнделікті жұмыстарының қауіп пен қатерге толы және оларға жүктелер жауапкершіліктің &nbsp;көп екендігін атап өтті. &nbsp;Мемлекет басшысының айтуынша құрылымдық өзгерістерді жалғастырып, «Жұртқа жақын полиция қағидатын» орнықтыру, «полиция қадамдық қолжетімділікте» қағидатын негізге ала отырып, елге қызмет жасау керек.Президент полиция қызметін цифрландыру, заңсыз есірткі айналымымен күресті күшейту, &nbsp;алаяқтықпен күрес, отбасындағы тұрмыстық зорлық-зомбылықтың алдын алу, жол қауіпсіздігі деңгейін арттыру қажеттігін мәлімдеді.Міне, Президенттің төрағалығымен өткен Алқа мәжілісінде көтерілген осы және полиция қызметіне қатысты өзге де мәселелерді Департамент бастығы &nbsp;полиция генерал-майоры Аблазимов Махсудхан Нұғманұлы бүгінгі жиында жеке құрамның &nbsp;назарына жеткізді. Мемлекет басшысымен қойылған басты талаптар мен берілген тапсырмаларға тоқталып, жіті түсіндірді. Бұл өз кезегінде полиция қызметкерлерінің жүктелген жауапкершілікті &nbsp;арттырып, адал әрі нәтижелі жұмыс жасауларына септігін тигізері анық. &nbsp; &nbsp;<blockquote>«Мемлекет басшысы Қасым-Жомарт Тоқаевтың төрағалығымен Ішкі істер министрлігінің кеңейтілген алқасы ерекше форматта өтті. Жиынға департамент басшыларынан бөлек, аудан және қалалық полиция басқармаларының басшылары да қатысты. Жыл басынан атқарылған жұмыс қорытындыланып, алда атқарар жұмыстар пысықталды. Қызметте кеткен кемшіліктер сараланып, олқылықтардың орнын толтыру үшін бірқатар тапсырмалар берілді.Сонымен қатар, кадрларды іріктеу жүйесінің жетілдірілуі, сыбайлас жемқорлыққа қарсы иммунитеттің қалыптасуы бойынша да мәселелер жіті қаралды.Қоғамдық тәртіпті сақтау, қылмыспен күресу – аса маңызды міндет екендігін Мемлекет басшысы басып айтты. Қоғамдық тәртіпті қамтамасыз етіп, қылмыстың алдын алу, қызметкерлердің заңдылық пен тәртіпті сөзсіз сақтауы бойынша міндеттер қойылды.Бұл ретте барлығымыз қылмыстың кез келген көрінісі бойынша алдын алу шараларын қабылдап, жедел әрекет етуіміз қажет» деді Департамент бастығы &nbsp;Махсудхан Нұғманұлы. &nbsp;</blockquote>Бүгінгі таңда өңірімізде криминогендік ахуал тұрақты. Жалпы облыс көлеміндегі қоғамдық орындардағы қауіпсіздік шараларын күшейтіп, қылмыстардың алдын алу бағытында полиция қызметкерлерімен атқарылған шаралар нәтижесінде қылмыс саны &nbsp;азайды. &nbsp;Кеңес барысында департамент бастығының орынбасарлары жетекшілік ететін салалары бойынша баяндама жасап, қызмет басшыларының есебі тыңдалды.Жиында полицияның жұмысын жақсарту, ішкі істер органдарын цифрландыру, полицияны халыққа жақындату, оң имиджін нығайту, халықтың сенім деңгейін арттыру және полиция қызметінің өзекті мәселелері туралы халықты жан-жақты және шынайы ақпараттандыру, полиция қызметін жетілдіру бағытындағы шаралар &nbsp; жөнінде сөз қозғалды.Сондай – ақ, жедел – қызметтік жұмыс талқыланып, халықпен тиімді серіктестік орнату, &nbsp;ішкі &nbsp;істер органдарының қызметінде ашықтықты &nbsp;және айқындықты қамтамасыз ету мәселелері нақтыланды. &nbsp; &nbsp; &nbsp;Полиция департаментінің бастығы жедел-қызметтік жұмыстарды &nbsp;қорытындылап, алдағы уақытта атқарылатын міндеттер бойынша Департаменттің басқарма, бөлім, бөлімшелері басшыларына құқық бұзушылықтардың, оның ішінде жасөспірімдер қылмысының алдын алуға, алаяқтық, ұрлыққа қарсы іс-қимылға, есірткі қылмысына қарсы күреске, жол қауіпсіздігін қамтамасыз етуге және т. б. мәселелерге қатысты нақты міндеттер қойды.Сондай – ақ, &nbsp;Махсудхан Нұғманұлы құқықтық тәртіп деңгейін одан әрі арттыруға, азаматтардың полицияға деген сенімін нығайтуға және қазіргі заманғы сын-қатерлер мен қауіптерге қарсы тұрудың тиімділігін қамтамасыз етуге бағытталған бірқатар тапсырма беріп, &nbsp;қоғамдық тәртіпті қамтамасыз ету мақсатындағы басым бағыттарды жауапкершілікпен атқаруды тапсырды.<figure class="image"><img src="https://knadmin.beoblood.kz/uploads/0_V4_A8587_28f96871f8.JPG" alt="0V4A8587.JPG"></figure>

Полиция департаментінде жыл басынан бері атқарылған жұмыстар сараланды

<a href="https://kyzylorda-news.kz/ru">Kyzylorda-news.kz.</a> Электронды сауда – «Цифрлық Қазақстан» бағдарламасының бір бағыты. Экономиканы цифрландыру арқылы қызмет көрсету сапасын арттырып, халықтың өмір сүру сапасын жақсартуға бағытталуда. Әсіресе онлайн-сауданың ауқымы кеңейіп келеді. 2005 жылдары енген интернет сауданың тұтынушылар саны артып, экономикаға оң әсерін тигізе бастады. Қазір 15 млн-ға жуық Қазақстандық интернет игілігін көріп жүр. Соңғы жылдарда онлайн-сауда қарқынды дамып келеді.&nbsp;Жаңақорған аудан халқының 70 пайызы электронды сауданың көрігін қыздырып, игілігін пайдаланып жүр десек артық емес. Тіпті, базар немесе арнайы сауда орындары бар кәсіп иелері де электронды саудаға басымдық беріп, өзінің парақшаларын ашып, арнайы маманды жұмысқа да алып жатыр. Өйткені, аудан халқының көпшілігі бұрынғыдай базар аралап жүрмейді. Үйде отырып, ұялы телефонның көмегімен қажетті тауарын электронды түрде тапсырыс беріп отыра бергенді жөн көреді екен.Әлемнің экономикасы дамыған елдерінде электронды сауда дәстүрлі дүкендердің орнын алмастырып, басым әлеумет онлайн сауда жасауға көшкен. Бұл көшті Қытай бастап тұр.Қазақстанда екі мыңға жуық дербес интернет дүкендер халық игілігіне жұмыс жасайды. Соның ішінде AliExpress, Satu.kz, технодом сияқты ірі дүкендер сауда саласында танымал. Тұтынушылардың басым бөлігінің сұранысына киім-кешек, жиһаз, косметика, тұрмыстық техника, кітап, көлік бөлшектері тауарлары ие. Онлайн сауданың басым бөлігін әйелдер қауымы жасайды. Сонымен қатар әуебилеттерінің 99 пайызы онлайн жүйеде сатылады. Теміржол билеттері мен мәдени іс-шараларға билеттер және коммуналдық төлемдер жасау бағытында төлемнің осы түрі анағұрлым артық сұранысқа ие.Электронды сауданың тиімділігі – уақыт пен қаржы үмендеп, фото, бейнелер арқылы үйде отырып-ақ қалаған затымызды таңдап, сауда жасай аламыз. Тұтынушылардың сұранысы мен талғамының өсуі – интернеттегі тауарлар сапасы мен қызмет түрлерінің көбеюіне септігін тигізуде, тіпті дәрі-дәрмек пен азық-түлікті де онлайн дүкендерден таба аламыз.Электронды саудада шекара жоқ. Тұтынушылар әлемнің кез-келген жерінен сауда жасаса, тауар өндірушілер жаһандық нарыққа шығып тұтынушыларына қызмет көрсете алады. Онлайн дүкендердің артықшылығы ешқандай сауда нүктесін, қоймаларды қажет етпейді, 24 сағат жұмыс жасауға ыңғайлы, тауарлар қоймаларда қалып бүлініп, бұзылады деген қауіп болмайды. Елімізде электронды сауда жүйесінің шағын кәсіп иелері үшін тиімділігі жоғары, олардың шаруасын одан әрі дамытуға, сондай-ақ ісін жаңадан бастаған кәсіпкерлердің аяқтан тұрып кәсіптерін дөңгелетуіне ықпалын тигізуде. Бұл сауда түрі ауыл шаруашылығы үшін көптеген мүмкіндіктер берері анық, бірақ ауылдарымыз электронды сауда ұғымынан әлі де тысқары қалып отыр. Өздері өндірген өнімін әлеуметтік желіге шығарып, жарнамалау арқылы табысын арттыруға болады. Әзірше бұл болашақтың еншісінде.Жаңақорған тұрғындары да электронды саудадан кенде қалған жоқ. Елдің әр аймағындағы брендтік дүкендерден электронды сауда арқылы киім және аяқ киім, тұрмыстық техника, қолөнер бұйымдары, косметика сатып алу біртіндеп дамып келеді. Мерекелер мен туған күн кештеріне тәтті дәмділерге интернетпен тапсырыс беру үрдіске айналуда. Осындай тәттілерімен Жанақорған халқының алғысын алып жүрген Жазира ханыммен тілдескен болатынбыз:– Мен өзімнің жан құрбым Бекзададан уйреніп тәттілерді пісіруді он жыл бұрын бастағанмын. Уақыт өте қызығушылығым артып, әлеуметтік желілерден қарап қайта пісіре бастадым, әрине бірінші жолдасымның қолдауымен қажетті құрал-жабдықтарымды алдым. Кондитерлік өнімдерді пісіріп кәсіп еткеніме алты айдан астам уакыт болды. Өзім мұғалім, бес баланың анасымын, қазіргі уақытта бала күтімімен отырмын, үйде қол қусырып отырмай балаларымның көмегімен осы кәсіпті жаныма серік етіп жүрмін. Аллаға шүкір тапсырыс артып келеді, тұтынушыларымнан әрдайым алғыс естіп келемін, бұл мен үшін жетістік, – деп өз сөзін аяқтады.Қолөнер бұйымдары қай заманда болмасын әйел затына көрік берері анық. Казірде aksaule_handmade деген есіммен танылып келе жатқан қолөнерші Ақсауле Құтыбаймен сұхбат өрбіттік:– Қолөнер бұйымдарына деген қызығушылығым 2019 жылдары студент кезімнен басталды. Уақытымды тиімді өткізіп жатақханадағы құрбыларыма есімдері жазылған білезіктер,тастармен безендірілген ободоктар, түрлі әшекей бұйымдарын жасап бизнес көзіне айналдыра бастадым. Қазіргі уақытта жасаған бұйымдарымды интернет арқылы басқа қалаларға да сатып кәсіп етіп жүрмін. Тек әшекей бұйымдармен шектелмей балаларға есімі жазылған бас киімдер, қалыңдық гүлдері, мұсылман заттарын тігуге де тапсырыстар қабылдап шеберлігімді шыңдап келемін. Мен шабытты жасаған бұйымымды тапсырыс иесіне жеткізіп, олардың алғысын аламын. Әрине бұл менің алты жылдық еңбегімнің жемісі деп білемін, – дейді ол. Әлеуметтік желінің игілігін көріп жүрген тағы бір жан Маржан ханымның әңгімесін тыңдап қайттық.– Өзім қыздарыма басқа қалалардан интернет дүкендерден киім алып жүрдім, неге мен де балалар киімі дүкенін ашпасқа деген ой келді. Басында қалай болады, біздің ауданымызда мұндай сауда қарқынды дамымаған деген қорқыныштың болғанын жасырмаймын. Уақыт өте халық үйренісе бастады. @kids.style.kzo балалар киімі дүкенімді ашқаныма бір жыл уақыт болды, маусымдық жеңілдіктер жасап тұрамын. Көп тапсырыстарымды әлеуметтік желі арқылы алып, жеткізіп беру қызметімен қамтып отырмын. Сонымен қатар @lady_style_janakorgan кыз-келіншектерге арналған киім дүкенін аштым. Аллаға шүкір, электронды сауданың игілігін көріп кәсібімді дөңгелетіп жүрген жайым бар, – дейді Маржан.Бүгінде әлемдегі төрт үлкен трендтің бірі – интернетте сауда жасау тәсілі. Дамыған елдерде қара базардың күні өтіп бара жатыр. Бір ғана, АҚШ жастарының 80 пайызға жуығы интернет арқылы сауда жасап, әрі осы онлайн-бизнес өзінің кәсібін дөңгелетіп жүр. Ал, елімізде ғаламтор арқылы сауда жасау, бизнес ашу ұғымы енді қалыптасу үстінде. Ал, Жаңақорғанда сауда алаңы бар бірде-бір сайт жоқ. Есесіне, «Инстаграм» желісін игілігіне икемдеген жастар көп. 2000 жылдары үйде отырып, пиццаға тапсырыс берушілерді шетелдік кинолардан көретінбіз.Ал, қазір жаһандық үдеріс ауылға да жетті. Қазір кент орталығында «Инстаграм» парақшасы арқылы италяндық пицца мен сушидің сан түрі, қуырылған тауық етін, дөнерді ыстықтай тапсырыс беруге мүмкіндік мол. Мұндай орталықтары саны оннан асады. Тапсырыс көлемі 2000 теңгеден асса үйіңе дейін жеткізу тегін. Бұдан бөлек, жаңақорғандық жас кәсіпкерлер желіден; балалар киімі, компьютерлік қызмет, фотомозайка, киімге ерекше есімдер жазу қызметі, кондитерлік тәтті өнімдер, қолөнер бұйымдары, косметикалық өнімдер саудалайтын 30-дан астам парақша тіркелген. Мұның барлығын электронды сауда деп айта алмаймыз. Өйткені, есептесу тәсілі қолма-қол ақшамен, яғни, онлайн жүйе арқылы банктік картаға аудармайды. Десе де, келешегі сайт нұсқасына қадам басып, қалыптасары сөзсіз. Бір жағынан, ІТ-технологияны меңгерген smm-ші маман тапшы ауданда. Соданда болар, интернеттен сайт ашудан бөлек, оны жүргізіп отырудың өзі үлкен қызмет.Осы тұста, Қазақстан Республикасының жаңа салық кодексіне сай, электронды сауда жасайтын кәсіпкерлер үшін бірқатар жеңілдік қарастырды. Жаңа кодекстің жай-жапсарын білмек мақсатта Жаңақорған ауданы бойынша Мемлекеттік кірістер басқармасының бас маманы Аида Әмірбекованы сөзге тарттық. Оның айтуынша, жаңа өзгеріске сай интернет-дүкендер мен интернет-алаң арқылы сауда жүргізетін заңды тұлғалар корпоративті табыс салығынан, ал дара кәсіпкерлер жеке табыс салығынан босатылады.– Елімізде интернет сауда арқылы табыс тауып отырғандардың саны күн артып келеді. Бұл өз кезегінде қаржы және уақыт үнемділігіне тиімді. Ендігі кезекте мемлекетте осы салаға үлкен қолдау көрсетуді қолға алды. Ол үшін электронды алаңда сауда жасайтындар табыс салығынан жеңілдік алу үшін үш шартты сақтайды. Бірінші, есеп айырысу қолма-қол төлемсіз жүргізіледі. Екінші, сатып алушымен келісім онлайн тәртіпте жасалуы керек. Үшіншіден, кәсіпкердің тауарды тасымалдауға, салып жіберуге және жеткізіп беруге құзыретті өз қызметі болуы керек. Немесе осындай қызметті жүзеге асыратын тұлғамен келісім шарты болуы тиіс. Бұл талаптар кәсіпкерге интернет алаңында өз бизнесін заңды жүргізуге мүмкіндік бере отырып, сатып алушының да мүддесін қорғауды көздейді – дейді басқарманың бас маманы.Сондай-ақ ол жеке тұлғалармен жасалған электрондық саудада тапқан табысы жылдық жиынтық табыстың 90 пайызынан кем болмауы тиіс екенін жеткізді. Оған қоса, Аида Әмірбекова электронды саудамен шұғылданатын кәсіпкер аталмыш жеңілдіктерді пайдалану үшін жеке кәсіпкер не заңды тұлға ретіде тіркеуде тұруы керектігін мәлімдеді.Электронды сауданың әлемдік нарықтағы әлеуетіне тоқталсақ. Дамыған елдерде бұл үдеріс келешекте дәстүрлі сауда саласын түбегейлі өзгертеді деп күтілуде. «Атамекен» ҚР ҰКП сарапшыларының мәліметінше, «Alibabа Group» компаниясының жылдық табысы 15 млрд АҚШ долларын құраса, «eBay» табысы 8,5 млрд АҚШ доллар, «Amazon» сауда айналымы 107 млрд долларға тең екен. Ал, Қазақстанда электронды сауда дегенде банктік транзакциясыз жүзеге асырылатын тауарлар мен қызметтер түсінігі қалыптасқан. Негізі әлемдік тәжірибеде онлайн саудада электронды қаражат айналымы, ақпарат алмасу, сақтандыру қызметі, банкинг, маркетинг жүйесі кіреді. Ресми дерекке сүйенсек, елімізде 10000-нан астам интернет дүкен бар. Жаңашыл жүйені игілігіне пайдаланушылар арасында Алматы қаласы көш бастап тұр. Екінші Астана, үштікті Қарағанды қорытындылаған. Осылайша, интернеттің мүмкіндігін пайдаланған тұтынушылар уақытын үнемдеп, ауылда отырып сауда жасауда. Белгілісі, Қазақстанда электрондық коммерция өнімдерін жеткізу көлемінің 70 процентін «Қазпошта» АҚ-ның үлесі құрайды. Онлайн сатып алушылар 18-34 жастағы азаматтар болып табылады екен.Осы орайда, жаңақорғандық тұрғындар интернет арқылы қандай заттарға жиі тапсырыс беретінін білдік. Аудандық пошта байланысы торабының, жылжымалы почта байланысы бөлімшесі мамандарының айтуынша, көбіне косметикалық өнімдер, киім-кешек, тұрмыстық заттар жиі келеді екен. Негізі интернет арқылы тапсырыс берушінің заты пошта торабына түсісімен, мамандар тапсырыс берушінің телефонына хабарлама қалдырады. Соңыра, сол хабарламадағы анықтама бойынша пошта бөлімінен алып кетеді.Түйіндей айтқанда, жаһандану үдерісінде ғаламтор игілігін пайдаланып, бизнесті бәсекеге бейімдесек әлемдік нарыққа шығатында мүмкіндік туады. Яғни, электронды сауда-саттық – бүгінгі күннің белесі. Бағындыра білсеңіз, бұл кең жолақты интернет сіздің де кәсібіңізге жарап қалады.Интернет – казіргі сауданың көркін келтіріп қана қоймай кемел елдердің қатарына кірігуімізге игілікті бір қадам болып отыр.

Жаңақорған тұрғындарының 70 пайызы электронды сауданы құп көреді

<a href="https://kyzylorda-news.kz/ru">Kyzylorda-news.kz.</a> Жаңақорған аудандық мәдениет және спорт бөлімінің қолдауымен, Өзгент ауылдық клубының ұйымдастыруымен аудандық мәдениет қызметкерлері арасында «Алтын балық - 2023» атты балық аулау жарысы өтті. Өзгент көлiнiң жағалауында өткен жарысқа 14 мәдениет қызметкері қатысты. Жарыстың шарты бойынша әр қатысушыға 2 қармаққа дейін пайдалануға рұқсат берілді. Қайықпен балық алулауға тыйым салынды.&nbsp;«Қазіргі заманда күйзеліске жиі ұшырайтын адамдар көп. Шаршағаныңды басып, күйзелісіңді жеңуге көмектесетін, өмір сүруге деген құлшынысыңды арттыратын демалыстың әрі спорттың ерекше түрі – балық аулау. Таза ауада, тұнық судың бойында жүйкең демалып, иммунитетің артатынын дәрігерлер де мойындайды. Сондықтан, Жаңақорған аудандық мәдениеті атынан балықшылар қауымдастығымен бірлесіп, осы үлкен іс-шараны өткізуді қолға алдық», деді ұйымдастырушылар. Осы балық аулау жарысы кезінде, ауыл-ауылдардан жиналған балықшылар аудандағы балық өндірісі әрі оны жүйелі жүргізудің жолдарын ортаға салды. Бұрындары су жүретін арналардың біріне қармақ сала қалсаң, тынымсыз қауып, қанжығамыз майланып, көңіліміз жайланып қайтатын еді. Қазір қанша бабын жасадым десең де қармақтың майлануы тым қиын. Балығы тулап жататын каналдардың бүгінде берекесі қашқан. Себебі балық аулаудың жабайы түрі пайда болды. Ол – тоқпен ұру. Бұлай жалғаса берсе, балықтың қарасын көруге зар болып қалар түріміз бар. Балықтың бал сорпасын татып жүрген талайдың сондықтан өкініші зор дегенді алға тартты жарысқа жиналған көпшілік.Әйтпесе, еліміздегі агроөнеркәсіп кешенінің маңызды бір саласы – балық шаруашылығы екені белгілі. Балық етінің адамзат баласына пайдасы көл-көсір екенін медицина мамандары да үздіксіз айтып келеді. Бір адам норма бойынша жылына 14 келі балық етін тұтынуы қажет екен. Өйткені балықтың құрамында 20 түрлі амин қышқылы бар, оның сегізі адам өмірі үшін өте қажетті зат болып табылады. Балықтың бір жағынан байлық екенін жеке кәсіпкерлерден-ақ аңғарып жүрміз. Қарапайым саудагерлердің өзі бір-екі келі балық сатып, қалтасын бір-ақ күнде қампайтып алады. Себебі кез келген жерде балыққа деген сұраныс жоғары. Содан болса керек, балық бағасы аспандап тұрса да, ойланбастан алатындар бар. Алайда ауланған олжаны өңдейтін кәсіпорындардың жоқтығы, заңсыз балық аулаушылардың азаймай отырғаны тағы басқа себептер салдарынан экспорт түгілі өзіміздің нарық та балықпен толық қамтамасыз етілмей тұр. Сондықтан болар, қай мезгілде болса да балық бағасы асқақтап тұр.1991 жылы елімізде балық аулау мен балық өнімдері өндірісінің жалпы көлемі 80 мың тоннадан асыпты. Оның ішінде тоғандық балық аулау 10 мың тоннаға жуықтаған. Барлық облыста балық зауыттары мен балық комбинатта¬ры, басқа да кәсіпорындар тиімді жұмыс істегенін дерек¬көздерден байқаймыз. Оның үстіне Кеңес одағындағы республикалардың үшеуінде ғана Балық шаруашылығы министрлігі болса, соның бірі біздің елімізде еді. Өкінішке қарай, еліміз нарықтық жүйеге бет түзеген кезеңде балық шаруашылығы құлдырауға ұшырады. Мемлекет бұл саланы дамытуға бағытталған іс-шараларды тек 2000 жылдардың бас кезінен бастап қолға алды. Жоғарыда айтқанымыздай, балық тұтынудың жылдық нормасы бір адамға шаққанда 14 келі болса, 2000 жылдары бұл көрсеткіш 4 келіге дейін түсіп кеткен. Бұл қазақстандықтардың балық етіне деген сұранысының төмендегенін білдіре ме? Әрине, жоқ. Күллі әлем теңіз өнімдеріне, оның ішінде балық етіне аса қызығушылық танытып отырғанда, «Өзен жағалағанның өзегі талмас» деп тәмсілдеген қазақтың балықтан бас тартуы ақылға қонымсыз. Демек, көрсеткіштің көңіл көншітпейтіндігі балық шаруашылығының ішкі қажеттіліктің өзін өтеуге қауқарсыз екенін білдіреді. Ауданымыздағы су айдындары иелерінің мәліметі бойынша кәсіпкерлікке бекітіліп берген 26 көл бар екен. 26 көлдің 8- і тауарлы көлдер. Яғни шабақтарды сырттан сатып әкеліп, көбейтеді. Бал татыған балық етін тұтынуға қазір кез келгеннің қалтасы көтере бермейді. Себебі – қымбат. Дүкен сөрелерінде ысталғаны, тұздалғаны, кептірілгені, қызылы, ағы – бәрі бар. Бірақ оның басым бөлігі отандық өнім емес.Біз балық аулау кәсібінен алдамыз. Ал оны өсіру, басын көбейту жағы кемшін. Балық аулаудың жабайы үрдісі пайда болғалы ауыл азаматтары да, мекеме қызметкерлері де жанашырлықпен жұмыс жасап жатыр. Әр көлдің басында арнайы қарауылдар қалтқысыз жұмыс жасап келеді. Тонаушыларға тосқауыл қойғанымыз бен қулықтарын асырып бағуда, – дейді аудандық ауыл шаруашылығы және жер қатынастар бөлімінің бас маманы Жасұлан Тұрапов балықшылардың сөзіне тұздық ретінде нақты ақпар берді.Мемлекет басшысы Қасым-Жомарт Тоқаевтың халыққа арнаған биылғы Жолдауы бизнес өкілдері үшін жағымды жаңалықтарға толы болды. Жолдауда еліміздің әлеуметтік экономикалық дамуы үшін қажетті бврлық мәселелерді көтерді. Соның ішінде кәсіпкерлікке қолдау көрсеткенде орта бизнеске де ерекше назар аудару керектігін айтап өтті. Балықты «ұрпақ несібесі» деп, қатты қадірлейтініміз жасырын емес. Бұл жөнінде орман және жануарлар дүниесін қорғау жөніндегі мемлекеттік мекемесі коммуналдық мемлекеттік мекемесінің балық маманы (ихтиолог) былай дейді.– 7-8 жыл болды көлде су жоқ. Бірақ оған қарамастан жұмыс жылдан-жылға қарқынды жүруде. Мамандарымыз тек уылдырық шашу жұмыстарымен айналысады. Өз қалтасынан қаржы шығарып, балық сатып алып салатын кәсіпкерлерімізде жеткілікті. Мәселен «Жыңғылдысай» көлінің иесі «Ислам» шаруа қожалығының басшысы Мақсат Жұмаділов Жетісайдан сазандарды әкеліп бағуда. Ал, «Қалғандария» көліне қарайтын «Сүйіндік» шаруа қожлығының иесі Сүйіндік Аманжолов осы шаруалығын жолға қою үшін кіші инкубациялық цех- 2 миллион балық шабағын шығаратын аппарат және Біріккен Ұлттар Ұйымының гранттық бағдарламасына қатысып – қуаты 5 мил балық шабақтарын шығаратын өндірістік цехын дамытуда. Онда алты адамды жұмыспен қамту орталығы арқылы оқып, білімдерін жетілдірді. Ал, тоқпен ұрып, балыққа залалдарын тигізіп жатқан тонаушыларға тосқауыл қоюда. Күзет қызметін күшейтуде. Дария бойынша Қызылорда облыстық инспекциясына жағдай жасалған. Ал көлге аудан бойынша техника жағы жетіспейді. Құтқарушы топтың қолында машина мен арнайы қайықтар, дрон секілді құрылғылар болса тонаушылар біздің көлден аяқ тартар еді. Былтыр күріштік алқаптардан және тартылып қалған көлдерден бір миллион екі жүздей балық шабақтары құтқарылды.- дейді ол.Ал, дәрігерлер болса «балық өнімдерін күнделікті тұтынған дұрыс» дейді. Алайда қос бүйірден қысқан қымбатшылық оған дес бере ме? Балықтың адам ағзасына пайдалы екенін елдің бәрі біледі. Сырт елден келген арзан торын дарияға тастап, шағын көлшікте балық-шабақты тоқпен ұрып алатын қаскөйлердің бүгінде қарасы қалың. Шектеу болса да, әсіресе, уылдырық шашар уақытын аңдитындар азаймай тұр. Табиғат байлығы талан-таражға түсіп, аң-құсқа жем болып жатқанын көзбен көрген соң мұны айту парыз деп білдік. Бұл мәселеге жауапты мекеме басшылары баса назар аударып, нақты қадамдар жасауы тиіс. Ауылшаруашылығы жәрмеңкелерінде «Ислам» шаруа қожалығының төрағасы Мақсат Жүмәділов жиі балық шығаратынын көреміз. Оны Келін¬төбе ауылдық округіне қарасты «Жыңғылдысай» көлінде өсіреді екен. Сапар барысында Сыр өңірі журналистері балық шаруашылығының қыр-сырына қанықты.Облыстық табиғи ресурстар және табиғат пайдалануды реттеу басқармасы арқылы облыс әкімдігінің 2011 жылдың 29 желтоқсанындағы №268 қаулысымен көл «Ислам» шаруа қожалығына бекітілді. 2014 жылы «Жыңғылдысай» көлінің статусы тауарлы көл балық шаруашылығына ауысты. Содан бері балық шаруашылығын дамытуға үлес қосып келеді. Бүгінде аталған көлде 1 қорықшы, 1 балықшы тұрақты қызмет атқарып келеді. Көлден жылына 5-10 тонна көлемінде балық ауланып, аудан, облыс көлеміне сатылымға шығарылады. Алдағы уақытта жылына 1-5 млн. дана шабақ шығаратын «Инкубатор цехын» іске қосу жоспарлануда. Сонымен қатар, осы шабақтарды өсіретін «Шабақ өсіру питомнигі» салынып, жұмысы жүйелі жолға түскен.– Балық шаруашылығы және оның дамуының Қазақстан үшін маңызы жоғары. Біріншіден, еліміз теңіздер мен мұхиттарға шыға алмайды. Екіншіден, біздегі балық еті елімізде ғана емес, шетелде де үлкен сұранысқа ие. Үшіншіден, балық еті – адам денсаулығына пайдалы. Әлемдік талап бойынша әр адам орта есеппен жылына 16 келі балық етін жеу керек. Алайда бізде бұл көрсеткіш төмен. Жалпы балық шаруашылығы – табысты саласының бірі. Осы салаға бет бұрғаныма алты жыл болды. Нарыққа шыққан балыққа сұраныс жоғары. Әсересе жәрмеңкелерде ұзын-сонар кезек болады. Осыны ескеріп, шаруашылықты дамытуды қолға алдым, – дейді Мақсат Исламұлы.Қазақстанға Ресей, Қытай, Норвегия және т.б елдерден түрлі кон¬сервілер, мұздатылған күйде балық сүбесі, уылдырықтар, теңіз балығы тасымалданады. Жыл өткен сайын импорт көлемі өсіп келеді. Демек балық шаруашылығын қолдаудын тетіктерін жетілдіріп, аквамәдениетті дамытуды қолға алу маңызды екенін ағқардың жарыс барысында.Ал, нақты жарыстың шарты бойынша әр команда 3 адамнан құралды. Бір командада 6 қармаққа дейін пайдалануға рұқсат берілді. Қайықпен балық алулауға тыйым салынды.Жарыс талабы бойынша әр үміткер аулаған балағының салмағына қарап сынға түсті. Нәтижесінде I орынды аудандық мәдениет үйінің директоры Ролан Бақтыбаев, II орынды жыршы-термешi Мұхтар Дәрiбаев, III орынды Шалқия кенттік мәдениет үйінің қызметкерi Сұлтан Байқожаев жеңiп алды. Сондай-ақ, «Ең үлкен балық» номинациясымен Бipлiк ауылдық клубының директоры Марат Беделбеков марапатталды.

Жаңақорғанда балық аулаудан жарыс өтті

<a href="https://kyzylorda-news.kz/ru">Kyzylorda-news.kz.</a>&nbsp; Асан қайғы елдің көшіп отырған тұрмысына қанағаттанбайды, халқының болашағын ойлап қамығады. Оның ойынша жер үстінде адамзат тіршілігінде көруі мүмкін жұмақ бар, аты – «Жерұйық». Онда жұрттың бәрі тең, бәрі де шат-шадыман тіршілік кешеді, ел аласы, ру таласы жоқ.&nbsp;Малға жай, елге ырыс осындай мекен барын ғайыптан болжап білген Асан қайғы енді сол жерді іздеп табу үшін желмаяға мініп, төңіректің төртбұрышын кезеді. Жолында кездескен тау, өзен, шұрайлы жерлерге тиісті баға беріп отырады. Ақыры Жерұйықты таба алмай, өксіп дүние кешеді. Ал аңызда Асан қайғының әкесі Сәбит Арал өңірінің Сырдария жағасын мекен еткені айтылады. Иә, Сыр өңірі халықтың тірлішілік етуіне ең қолайлы, жері шұрайлы мекен болғаны рас, қазірде солай. Сондықтан біз, әсіресе болашақ осы жердің егесі жастар табиғатымызға ерекше ілтипатпен, қамқорлықпен қарауымыз керек, – деген ақсақал қармағын көлге лақтырып қойып, аңыз арқылы жастарға өсиетін айтты.Иә, өткен аптада Астана күніне орай Жалағаш ауданының ардагерлері арасында дәстүрлі балық аулау жарысы өтті. Күн ұясынан көтеріле бастағаннан-ақ қармағын асынып, ардагерлер уағдаласқан орынға жинала бастады. Өздері ғана емес немере, шөберелерін де ерте келіпті. Жылдағы дәс¬түрден жаңылмай, балық аулау бәсекесіне барлығы қызу дайындықпен келген.Ардагерлер арасындағы додаға аудан әкімі Асқарбек Есжанов арнайы келіп, қазыналы қарттарымызға сәттілік тілеп, өмір жолында адал қызмет еткен зей-неткерлеріміздің өңір үшін атқарған еңбегі зор екенін жеткізді.– Қазіргі таңда аудандық ардагерлер кеңесі ауданда өтетін маңызды іс-шара-лардың барлығына қатысып келеді. Аудандық ардагерлер кеңесінің бастамасымен ардагерлер арасында шахмат, дойбы тағы басқа спорт түрлерінен жарыстар өткізіліп, Қорқыт ата кесенесіне саяхаттап қайтты. Мұның өзі біздің ағаларымыз бен әкелеріміздің белсенділігін көрсетсе керек. Сондай-ақ ауданымыздың өркендеуі мен дамуы үшін өз қажыр-қайраттары мен ақыл-кеңестерің аямай келеді. Әрқашан азаматтық пен адамгершіліктің үлгісі, үлкенге құрмет, кішіге қамқор бола білген ақсақалдарды азамат ретінде танимыз. Бұдан әрі де арамызда ақылшы, кеңесші бола жүріп, еліміздің игілігі үшін қоғам өміріне белсене араласады деп сенеміз. Мен сіздердің әрдайым осылай белсенді әрекетте болғандарыңызды қалаймын, – деді аудан әкімі Асқарбек Есжанов.Айта кетейік, ауданымызда қазіргі таңда 4000-ға жуық зейнеткер бар. Олар 79 бастауыш ұйымда есепте тұрады. Барлығы да өздеріне қамқор болар мекемелер мен ұйымдарға бекітілген. Ауданда бастауыш ардагерлер ұйымына тартылмаған бірде бір зейнеткер жоқ. Барлық ардагерлер ұйымдарының жұмыс істеуіне, өз міндеттерін атқаруы үшін қажетті жағдайлар жасалған. Жарыс өте тартысты өтті. Балалық шақтарын еске алса керек, басында белсенділік танытпай тұрған қарттарымыз, уақыт өте қармақтарына жиі балық түсе бастады. Әрине, Сырдарияның сағасында өскен ақсақалдардың балық аулаудың қыр-сырын толық меңгергеніне ешкімнің де күмәні болмады. Сонымен сайыстың қорытындысы бойынша Аққыр ауылынан келген 79 жастағы Үсен Шандыбаев есімді қария жүлделі бірінші орынды иеленді.&nbsp;– Судың жағасында есейгесін болар, балық аулау таңсық іс емес. Шыны керек, ес білгелі қармақ салу ең жақсы көретін ісім. Бұрын бұл өңірдің суында балықтан көп нәрсе жоқ еді. Тұтас бір өңірді асырайтын жағдайда болатын. Қазір дариядан су тартылғалы, балық та қашты. Десе де қазірдің өзінде ауыл маңындағы каналдардан балық аулап тұрамын. Әрине, балық аулаудың денсаулығыма пайдасы зор. Соның арқасында аяғым ауырмайды, денсаулығым жақсы, – деді Үсен ақсақал.Қазақ – қариясын сыйлаған халық. Қарияның батасынсыз қазақ қоғамында қордалы байламдар жасалып, іс басталмаған. Бұл – атам заманнан бері келе жатқан игі дәстүр. Сол дәстүрдің аясында бастау алған балықшылар сайысы ардагерлердің батасымен басталып, түрлі марапатпен қорытындыланды. Шара соңында ардагерлер кеңесінің төрағасы Садық Әлиев балық аулауға қатысқан барлық ардагерлерге алғыс білдірді. Иә, балық аулау сайысы тек жарыс ретінде емес, ардагерлеріміздің өскелең ұрпақ алдындағы бірлігі дара жолын көрсетер тағылымды шара ретінде маңызы зор.

Жалағаштық ардагерлер балық аулаудан бақ сынады

<a href="https://kyzylorda-news.kz/">Kyzylorda-news.kz.</a> ҚР Ғылым және жоғары білім министрі Саясат Нұрбек Қорқыт ата атындағы Қызылорда университетінің профессор-оқытушылар құрамымен және Сеул Ұлттық Ғылым және технологиялар университетінің (SeoulTech) өкілдерімен, SeoulTech информатика және инженерия кафедрасының профессоры, Кванттық жасанды интеллект жаһандық қауіпсіздік орталығының директоры Джесу Киммен және Сонгон Ким жобалау орталығы директорының орынбасарымен онлайн форматта кездесу өткізді.Сондай-ақ министр Қазақстанның жоғары білімі мен ғылымында болып жатқан жаңа өзгерістер, дамудың негізгі басымдықтары мен ғылым және жоғары білім министрлігінің жоспарлары туралы баяндады.Министр Саясат Нұрбек Үкіметтің жасанды интеллект мектебін іске қосу идеясын қолдайтынын атап өтіп, Seoultech өкілдеріне Қазақстанда Оңтүстік Кореяның озық тәжірибесі негізінде ақпараттық технологиялар саласын дамытуға қызығушылық танытқаны үшін алғысын білдірді. Сонымен қатар кездесуде Қызылордадағы жасанды интеллект мектебінің жеке кампусын салу жоспарлары мен уақытша орналасу мәселелері талқыланды.Жақын арада SeoulTech өкілдері Қызылорда университетінің мамандарымен бірлесіп, Қорқыт ата білім беру бағдарламаларын талқылауға және іске асыруға кіріседі.SeoulTech өкілдерінің айтуынша, аймақтағы жасанды интеллект мектебінің базасында жасанды интеллект (AI), киберқауіпсіздік (CS) және информатика (CS) бойынша кадрларды даярлау жүзеге асырылады.Естеріңізге сала кетейік, ағымдағы жылдың сәуір айында 2023 жылға дейін 7 жылға есептелген LUPIC жобасы іске қосылды. LUPIC бағдарламасы (LUPIC бағдарламасы) – Білім министрлігі (MoE) және Кореяның ұлттық зерттеу қоры (NRF) ұйымдастырған халықаралық білім беру бастамасы. Бағдарламаның мақсаты - кореялық білім беруді қолдау модельдерін ұсыну және университеттердің халықаралық даму мен ынтымақтастықта жетекші рөл атқаруы үшін ынтымақтастық орталықтарын құру.

Қазақстан және Қызылорда облысының жаңалықтары