<a href="https://kyzylorda-news.kz/">Kyzylorda-news.kz.</a> 7 мамыр – Отан қорғаушылар мерекесі күні Қармақшы ауданы, Төретам кентінде Жәрімбет би атына көше атауы берілді. Аталған салтанатты шарада облыс әкімінің орынбасары, Қазақстан Республикасы Президентінің Байқоңыр кешеніндегі арнаулы өкілі Қайрат Нұртай, Қармақшы ауданының әкімі Жандос Еркінбек және Байқоңыр қаласы әкімшілігі басшысының орынбасары Тимур Вербицкий қатысып, құттықтау сөз сөйледі.Түбі бір түркінің ортақ тұлғасы Қорқыт баба жатқан жер, адамзат алғаш аспанға аттанған Байқоңыр ғарыш айлағы орналасқан Қармақшы барша Қазақстанның мақтан тұтар мекені. Қасиетті өлкемізден шыққан ақын-жыраулар, батырлар мен әулие-әмбиелер – өлке тарихының алтын көмбесі.Солардың бірі – халық тағдырын өз тағдырынан жоғары ұстаған Жәрімбет әулие. Көзінің тірісінде Жәрімбет би-әулие Төретам кентінің аумағына өз ұрпақтарын қоныстандырып, келешекте бұл жерде дүние жүзіне танымал, үлкен қала болатынын айтып кеткен. Бүгінде қанатын кеңге жайған баба ұрпақтары еліміздің дамуына адал қызмет атқарып келеді.Әулие аты берілген көше Төретам кентінің кіре беріс көшесінен Жанқожа батыр көшесінің қиылысына дейінгі аралықтағы 461 метрді қамтиды, сонымен қатар кенттегі инфрақұрылымы жақсы дамыған орталық көшелердің бірі.Шара барысында аудандық ардагерлер кеңесінің төрағасы Асқар Мереков, әулие ұрпақтары атынан облыстық мәслихат депутаты Әмірбек Шаймағанбетовтер сөз сөйлеп, абыз ақсақал батасын беріп, «Жәрімбет би» атындағы көшеге қойылған стелланың лентасы қиылды. Шара соңы аудандық мәдениет саласы қызметкерлерінің жыр шашуына ұласты.

Төретам кентінде көше берілді

<a href="https://kyzylorda-news.kz/">Kyzylorda-news.kz.</a> 7 мамырда еліміздің 6 қаласында ауа сапасы нашарлайды, деп хабарлайды ҚазАқпарат «Қазгидрометке» сілтеме жасап.Атап айтқанда, Өскемен, Семей, Риддер, Атырау, Алматы және Астана қалаларында ауаның қолайсыз метеорологиялық жағдайлар болжанады.Қолайсыз метеорологиялық жағдайлар – атмосфералық ауаның беткі қабатында зиянды (ластаушы) заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.Қолайсыз метеорологиялық жағдай кезінде елді мекендердегі атмосфералық ауаның сапасы нашарлауы ықтимал.Ал Қызылорда облысында ауа температурасы 29° градусқа дейін көтерілсе тұрақты жылылық сақталады.

Бүгін еліміздің 6 қаласында ауа сапасы нашарлайды

<a href="https://kyzylorda-news.kz/">Kyzylorda-news.kz.</a> Қызылорда облысының полиция департаментінде Отан қорғаушылар және Жеңіс күніне орай үздік қызметкерлер мен ардагерлерге марапаттар табысталды.Бүгін Қызылорда облысының Полиция департаментінде «7 мамыр – Отан қорғаушылар» және «9 мамыр – Ұлы Жеңіс» күндеріне орай мерекелік салтанатты шара өтті.Іс-шара Қызылорда облысы Полиция департаментінің жеке құрамы, Ішкі істер органдарының ардагерлері, тыл ардагерлері, БАҚ өкілдерінің қатысуымен өтті.Шараға қатысушылар фашизммен соғысқан ІІО ардагерлерінің құрметіне арналған ескерткішке және қызметтік міндеттерін орындау кезінде қаза тапқан полиция қызметкерлеріне арналған мемориалдық стелаға гүл шоқтарын қойды. Гүл шоқтарын қою рәсімінен кейін жиналғандар қаза тапқан батырларды бір минут үнсіздікпен еске алды.Сонан соң Департаменттің мәжіліс залында салтанатты шара бастау алды. Қазақстан Республикасының Туы шығарылып, Әнұран орындалды.Қоғамның тыныштығы мен қауіпсіздігін қорғап жүрген қызметкерлерге, ардагерлерге, тыл ардагерлеріне арнайы Қазақстан Республикасының Ішкі істер министрі Ахметжанов Марат Мұратұлының ресми түрде құттықтау жедел хаты оқытылды.Өз кезегінде Полиция департаменті бастығының міндетін атқарушы полиция полковнигі Шамшидин Амитов антына адал қызмет етіп жүрген қызметкерлерді 7 мамыр мерекесі мен Ұлы Жеңіс күнімен құттықтап, ізгі лебізін білдірді.<blockquote>«Ерлік – елге мұра, ұрпаққа үлгі. Өскелең ұрпақ аға буын - ардагерлер танытқан қаһармандық пен қайсарлықтан үлгі алып, бой түзейді. Осы қасиетті күні адалдық пен еліне деген жанқиярлықтың үлгісін көрсеткен қаһармандардың рухы алдында бас иіп, тағзым етеміз. Теңдессіз ерліктің күшімен келер ұрпаққа бейбітшілік әкелген Ұлы Жеңіс күні қарсаңында ардагерлер мен тыл еңбеккерлерін мерекемен құттықтап, зор денсаулық, ұзақ өмір, игілік және ең бастысы – аспанымыз ашық, бейбіт өмір болсын деп тілеймін!», - деді Шамшидин Амитов.</blockquote>Ардагерлеріміздің ықылас-пейілімен, ізбасарларының жүрегіне құйған жігер-қуаты мен озық ойларының нәтижесінде Қазақстан полициясы қызметкерлерінің қатары нығайып, өркендеп келеді. Бұл ретте Қазақстан Республикасы Ішкі істер министрлігінің Құрметті ардагерлері - Рахимов Тастемір Сауранбайұлы және Шаймағамбетов Әмірбек Бердібекұлы полиция қызметкерлерін құттықтады.Айтулы мерекелерге орай, Қызылорда облысы Полиция департаментінің 250 қызметкері және 60 ардагер марапатталды.Әрі қарай дәстүр бойынша іс-шара концерттік бағдарламаға ұласты. Мерекелік концертте тәртіп сақшылары «Байтақ елім қазағым», «День победы», «Мен қазақтың баласы», «Парад победы», «Атамекен» әндерін орындап, шеберліктерімен таңдандырды.<img src="https://knadmin.beoblood.kz/uploads/344773273_657993319501610_1343615595811133019_n_60943ffa16.jpg" alt="344773273_657993319501610_1343615595811133019_n.jpg"><img src="https://knadmin.beoblood.kz/uploads/344773417_1407930706705289_5046623783354134463_n_97e7869481.jpg" alt="344773417_1407930706705289_5046623783354134463_n.jpg"><img src="https://knadmin.beoblood.kz/uploads/344565846_802905727970475_1667321623426482199_n_2334659ba5.jpg" alt="344565846_802905727970475_1667321623426482199_n.jpg">

Қызылордалық полицейлер мен сала ардагерлері марапатталды

<a href="https://kyzylorda-news.kz/">Kyzylorda-news.kz.</a> ҚР Президентінің сайлауалды бағдарламасын іске асыру бойынша республикалық штаб отырысында шағын және орта бизнесте жұмыспен қамтылғандар санын 4,7 млн адамға дейін арттыру тапсырмасының орындалу барысы қаралды.Жиналыстан соң облыс әкімі Нұрлыбек Нәлібаев Премьер-Министр берген тапсырмаларды пысықтау мақсатында жиын өткізді. Аймақ басшысы облыста 2025 жылға қарай шағын және орта бизнестің үлесін 25%-ға, ондағы жұмыспен қамтылғандардың санын 125 мың адамға жеткізу міндеті қойылғанын атап өтті. Кәсіпкерлікті қолдау және дамыту шаралары аймақта жүйелі іске асырылуы тиіс.&nbsp;«Қызылорда облысында бүгінде шағын және орта кәсіпкерлікте 71 мыңға жуық субъект жұмыс жасайды. Мұнда халықтың 34,8%-ы, яғни 122 мың адам жұмыспен қамтылған. Жыл басынан 16 мыңға жуық жаңа жұмыс орындары құрылды. Оның ішінде 4 мыңға жуығы тұрақты, ал уақытша жұмыс орындарына &nbsp;12 мыңнан аса адам орналастырылды. Қызылорда қаласы және аудан әкімдері өз аумақтарында жаңадан ашылған шағын және орта бизнес нысандарына бірінші кезекте сол жердің тұрғылықты &nbsp;азаматтарын жұмыспен қамту мәселесін үйлестіруі қажет», - деді Нұрлыбек Машбекұлы. Кейінгі жылдары елді мекендердегі тұрғындар несие ұйымдарынан алған қаржының басым бөлігін мал шаруашылығына жұмсайды. Алайда жайылымдық жер тапшы, қаржыландыру техника алу, наубайхана, дүкен, шаштараз, тігін цехын ашу секілді өндіріске бағытталған.&nbsp;Жиын қорытындысымен Н.Нәлібаев кәсіпкерлік субъектілерінің санын кемінде 10%-ға, жұмыс күшін 15%-ға, өндірілген өнім көлемін 40%-ға дейін ұлғайту бағытында жұмыстар атқаруды тапсырды. Қала және аудан әкімдері әр ауылдың әлеуметтік-экономикалық жағдайына, оның ішінде кәсіпкерлік қызметтеріне талдау жасауы тиіс. Іске қосылған өндірістік цехтардың нақты санын анықтап, жаңа өндіріс орындары мен қызметтерді іске қосуы керек. Сонымен қатар аудан және қала орталықтарында шағын өнеркәсіптік аймақ құру арқылы салалық ерекшелігіне қарай кәсібін енді бастаған азаматтарды шоғырландыру жұмысын жандандыру міндеттелді. Мұнан бөлек, экономиканың креативті индустриясында, туризм, сауда салаларында түрлі инвестициялық жобаларды іске асыру тапсырылды. Нәтижесінде Мемлекет басшысының тапсырмасына сәйкес 10 мың тұрғын үшін 100 жұмыс орны құрылуы тиіс.&nbsp;<img src="https://knadmin.beoblood.kz/uploads/344246876_1388931115283258_2014259360352349396_n_2da398736d.jpg" alt="344246876_1388931115283258_2014259360352349396_n.jpg">Айта кетейік, биыл кәсіпкерлікті дамытуға барлық қаржыландыру көздерінен 23 млрд. теңгеге жуық қаржы қаралды.

Қызылордада кәсіпкерлікті дамыту мәселелері қаралды

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Нұрлыбек Нәлібаев Шиелі ауданында тұратын Ұлы Отан соғысының ардагері Сәрсенбек Байжановтың үйіне барды.&nbsp;Облыс әкімі абыз ақсақалды ғасырлық мерейтойымен құттықтап, Сыр жұртшылығы атынан автокөлік кілтін табыстады.&nbsp;<blockquote>«Қазақта «қос тойың қабат болсын, екі дүниең абат болсын» дейді. Биыл сіздің 100 жасқа толуыңызбен қатар Ұлы Жеңістің 78 жылдығын да тойлаудамыз. 9 мамырды Ұлы Жеңіс мерекесі десек те, оған жететін жолдың қаншалықты &nbsp;ауыр болғанын бүгінгі ұрпақ ешқашан ұмытпайды. Туған елдің тәуелсіздігі мен бостандығы үшін жанын қиған боздақтарымызды біз мәңгі есте сақтаймыз. Майдан даласында Отан үшін кеудені оққа тосқан ерліктеріңіз бен қайсарлықтарыңыз үшін бас иіп алғыс білдіреміз», - деді облыс әкімі.</blockquote>Ғасыр куәгері Сәрсенбек Байжанұлы береке-бірлік бар жерде ғана істің алға басатынын айтып, ақ батасын берді.&nbsp;Сәрсенбек Байжанов 1923 жылы Шиелі ауданында дүниеге келген. Соғыс жылдары Сталинградтың Солтүстік &nbsp;батысындағы Магеллан қаласындағы &nbsp;шайқасқа қатысқан. Сол жолы көзінен, қолынан, аяғынан жарақат алып, бір жылдай госпитальда емделген. Екінші топтағы соғыс мүгедегі болып елге оралады. «Қызыл жұлдыз», «Германияны жеңгені үшін» ордендерімен және Ұлы Отан соғысының 50, 60, 65, 70, 75 жылдық мерекелік медальдарымен &nbsp;марапатталған. Жұбайы Жәмила Сейітжанқызымен бірге 5 ұл, 6 қыз, 40 немере, 65 шөбере және 3 шөпшек тәрбиелеп өсірген.Айта кетейік, бүгінде облыста 6 Ұлы Отан соғысының ардагері бар.<img src="https://knadmin.beoblood.kz/uploads/345064295_612102797628402_4230133502136477422_n_e6694d7257.jpg" alt="345064295_612102797628402_4230133502136477422_n.jpg"><img src="https://knadmin.beoblood.kz/uploads/344552545_196766813212513_7882573744660275810_n_0ed55a2004.jpg" alt="344552545_196766813212513_7882573744660275810_n.jpg">

Нұрлыбек Нәлібаев ғасыр жасаған ардагерге автокөлік кілтін табыстады

<blockquote><a href="https://kyzylorda-news.kz/">Kyzylorda-news.kz.</a>&nbsp; Биыл Ұлы Отан соғысындағы жеңіске 78 жыл. Осынша уақыт бейбітшілік бесігінде тербеліп келе жатсақ та, соғыс тартқызған қасірет, майдан зардабы талайлардың мәңгі жүрегінде. Олай дейтініміз, сол қанды соғыста қаншама ана баласынан, жарынан, бауырынан айрылса, қаншама бала әкесінен, &nbsp;ағасынан көз жазып қалды. &nbsp;Соғысқа аттанған талай қазақ баласы қыршынынан қиылды, қаншасы із-түссіз кетті. Сондай боздақтың бірі – аралдық Сәдуақас Мадияров.</blockquote>1923 жылы туған ол 1942 жылы небәрі 19 жасында қан майданға аттанды. Сол кеткеннен келмеді. &nbsp;Соғыс аяқталып, жұрт елге оралғанда да &nbsp;Сәдуақастан хабар болмады. Өлдіге санайын десе, қайтыс болғаны жөнінде қарақағаз келген жоқ. Соғыс біткесін де бауырларының оны іздеуге мүмкіндігі болмаған. &nbsp;Тек 2000 жылдан кейін ғана &nbsp;інісі Ақмұрат Мадияров ағасын іздеу жолына түседі. Кейін анықталғандай, ол үш жыл соғысқа қатысып, 1944 жылы мамырда қайтыс болған. Ұрыс даласындағы қиян-кесті шайқаста немістің 7 солдаты мен офицерін жойғаны үшін «За отвагу» медалімен марапатталған.<blockquote>– &nbsp; &nbsp;2005 жылы зейнетке шыққан соң ағамның жатқан жерін іздедім. Балам екеуміз Одесса арқылы жүріп отырып, Украинаның Запорожье облысы Херсон қаласының маңындағы Михайловка селосына бардық. Сол жерде майданда қайтыс болғандарға арналған үлкен аллея бар екен. Онда Ұлы Отан соғысында қайтыс болған &nbsp; адамдардың есімі жазылған үлкен ескерткіш қойылған. Кемі 3-4 мың адамның есімі бар-ау, өте көп енді, жан-жағына гүл егілген, тап-таза, қоршалған. Майданда қайтыс болған сарбаздарды қатты құрметтейтіндері байқалып тұр. Тіпті, біз секілді жоқ іздеп келушілерге арнап қонақүй де салынған, – дейді майдангердің інісі Ақмұрат ақсақал. &nbsp;– Әлгі аллеяда бізді бір қарт кісі бастап жүрді. Ол соғыс уақытында сегіз-тоғыздағы бала екен. Сол кездегі майдан зардабын, қиян-кескі ұрысты көзбен көрген. «Бала болсақ та бәрі көз алдымда. Шешеміз үйге қуып әкеп тықса да, ретін тауып сыртқа қашып шығып, айдап отырып, соғыс жүріп жатқан жерге келетінбіз. Бірде Днепр өзенінің бойынан біздің Совет әскері бері қарай шығуы керек болған ау. Қару-жарақтарын қойып шыға бергенде оларға қарай оқ жаудырды. Сонда қаншама жауынгер қаза тапты. Кейбірі жараланды. Шықпай қалғандарды «із-түзсіз жоғалғандар» қатарына қосқан болуы керек», – &nbsp;дегенді айтты әлгі кісі бізге. Өзіміз де солай топшыладық. Менің ағам жаралы болып, госпитальға түскен. Ол туралы деректі архив арқылы Ленинградтың медицинасынан таптық. Басқа еш дерек жоқ. Михайловка селосында бір ай бойы соғысқан екен. Сол жерден ескерткіш ретінде винтовканың оғын алдық. &nbsp;Топырағынан ала келіп, Арал ауданы Аманөткел ауылындағы әке-шешеміз жатқан қабірге апарып мұсылманшылық рәсімге сай жерледім. Анда-санда барып, құран оқып, еске алып тұрамыз, – дейді &nbsp;ақсақал.</blockquote>Ағасы Сәдуақас соғысқа аттанғанда Ақмұрат аға жасқа да толмаған екен. Анасының майданға кеткен баласын сағынып, ішқұса болған шерлі күйін, көзден аққан жасын талай көрді. Себебі, үміт үзейін десе ағасының артынан өлді деген қарақағаз жоқ, тек жараланды &nbsp;деген тілдей хабар ғана келген. Ал ана жүрегі өле-өлгенше соғысқа кеткен баласын сағынумен, бір жерден бір хабары шығып қалар деп үміттенумен, келіп қалар деп дәмеленумен өтті.<blockquote>– &nbsp; &nbsp;1970 жылы анам қатты науқастанып, төсек тартып жатты. Жасы келген сайын соғыстан қайтпаған баласын ойлаумен болды. Анамыздың өтінуімен үлкен ағамыз бастап жан-жақтан сұрастырып, іздеу салып жүргенбіз. Бірақ мардымды мәлімет таба алмадық. Қысылып жатқанда анам менен «ана баладан бір хабар бар ма? Не білдіңдер?» деп сұрады. Анамның сөзін ағама айттым. Ағам анамыздың көңіліне қарап, «артынан келген қарақағаз жоқ, соғысқа қатысқан талай жауангерлер жан-жақта жүр дейді ғой, ол да бір украин қызына үйленіп, балалы-шағалы болып жүрген шығар» деп айт деді. Солай айттық, – дейді ақсақал.</blockquote>2005 жылы Украинаға барып, ағасының топырағын алып, дерегін біліп келген соң Ақмұрат ағаның келіні ұлды болып, атын ағасының құрметіне Сәдуақас деп қояды. «Небәрі 21 жасында қыршын кетті, өмірден ешқандай қызық көрген жоқ. Соны ойлап, ең болмаса аты өшпесін деп немереме осы кісінің атын бердік» дейді ақсақал. &nbsp;

Сәдуақас Мадияров: Зейнетке шыққан соң, соғысқа аттанған ағамды іздедім

<a href="https://kyzylorda-news.kz/ru">Kyzylorda-news.kz.</a>&nbsp; Ел тарихындағы екіншідүниежүзілік соғыс адамзат баласына ауыр зардап әкелді. Қаншама боздақтар қан майданнан оралмай қалды. Елге есен-сау қайтқандардың да өмірі оңай бола қойған жоқ. Титықтаған халық, тұралаған тіршілік, тозған жер… Иә, осының бәрін қайта қалпына келтіру бірнеше жылдарға жалғасты. Бәрінен де халықтың кеудесіндегі сөнуге айналған үміт шырағын қайта жағып, тіршілікті қалпына келтіруде майдангерлер мен тыл еңбеккерлерінің атқарған жұмысы ұшан-теңіз…Биыл, міне, Ұлы Жеңістің жетпіс сегізінші көктемі. Сол 1945 жылдың көктемінде соғысты аяқтап, Жеңіс туын желбіреткен майдангердің бірі, гвардия жауынгері, «Қызыл Жұлдыз» орденді жерлесіміз Науша Әбдіқалықов еді.Ол 1942 жылы Арал аудандық әскери бөлімі арқылы өзі қатарлас өрімдей жастармен бірге әскерге алынған. Алматы қаласында 6 ай дайындықтан өткен соң автоматшылар қатарына алынып, алғы шептегі 91-атқыштар дивизиясының 279-полкінде жауынгерлік жорығын бастайды. Әсіресе, 1943 жылы Смоленскіні, 1944 жылғы Белоруссияны азат ету жолындағы шайқас өте ауыр шығынға ұшыратты. Алайда осындай қаһармандық пен ерлікке толы шайқастар жеңісті жақындата түскен еді. Атқыштар дивизиясы құрамында жау шебіне соққы бере жүріп үш рет ауыр жарақат алды. Әйтсе де, ол сұм соғыстың соңғы нүктесі қойылған күнге дейін майданда болды.Иә, 1945 жылы Балтық теңізінің жағасында неміс басқыншыларына біржола тойтарыс берілген болатын. Соғыстан әбден қалжыраған солдаттардың қуанышында шек жоқ. Елге деген сағыныш жүректерін елжіретіп барады. Алайда жауынгер Науша Әбдіқалықовтың жорық жолы әрі қарай жалғасты. Германияның Потсдам қаласында комендатурада қызмет атқарып, екі жылдан соң, яғни, 1947 жылы елге оралды. Жауынгердің ерлігі бағаланып, «Отан соғысы» және «Қызыл Жұлдыз» ордендерімен және бірнеше медальмен марапатталды. Туған жердің топырағына табаны тигенде, соғыс тәртібіне әбден бейімделіп сіресіп қалған сарбаздың тұла-бойы бір ғажап күйге бөленген болатын. Жазық дала, жусан иісі жанын жайландырып, соғыс салған жарақатқа ем болғандай еді.Ол – тіршілік қалыбы теңізбен тұтасып кеткен Арал өңірінің тумасы. &nbsp;Сол өңірдегі Көктем ауылында 1923 жылы дүниеге келіп, балалық шағын өткерді. Азамат атанып, ат жалын тартып мінді. Ауылда өскен соң шаруаның қай түрінен де хабары мол, өйткені, үлкендерден көргенін үлгі тұта білетін. Бозбала шағында соғысқа аттанып, Отан алдындағы жауапкершілік ерте есейткендей еді. Ойы салмақ тартып, бойы да ширығып оралды.Елге келді. Ендігі міндет – халыққа аянбай қызмет ету. Осындай оймен Көкшетау облысының Шучинск қаласында оқып, есепші мамандығын алады. Алғашқы еңбек жолын Арал қаласында орман шаруашылығы саласында бастаса, одан кейін Сырдария ауданында осы сала бойынша жемісті жұмыс атқарады. Ал 1962 жылдан зейнеткерлік демалысқа шыққанша, жалпы облыстық орман шаруашылығы басқармасында қырық жылға жуық қызмет етеді.Ел құрметіне бөленген еңбек адамы туралы «Сыр бойы газетінің» 2012 жылғы кезекті бір санында Жұматәли Әбдіраман ағамыз былай жазған екен:Ол уақыт көгілдір теңіздің толқып жатқан кезі. Портты қалаға кемелердің бірі келіп, бірі кетіп жататын. Аралдың тау-тау сексеуілдері баржаларға тиеліп, теңіздің арғы бетіндегі Мойнаққа, басқа жерлерге жөнелтіледі. Орманшылар сексеуіл өсіреді, оны дайындайды, пароходствоның тапсырмаларын орындайды. Сол кезде Қызылорданың іргесіндегі Сұлутөбе орман шаруашылығының атағы дүрілдеп тұрған болатын. Білікті маман 1958 жылы Сырдария ауданындағы мекемеге бас есепшілікке шақыртылды. Одан кейін 1962 жылдан бастап 1983 жылы зейнеткерлік демалысқа шыққанға дейін облыстық орман шаруашылығы басқармасында қызмет етіп, экономикалық бағытта өркендеуіне елеулі үлес қосты». Ердің бойындағы елге деген сүйіспеншілік, Отанға деген адалдық осынау естеліктерден аңғарылып тұр емес пе?! Сонымен қатар, қазақ ұғымында ататек, әулет, шаңырақтың абырой-беделі өз алдына бір төбе. Осы тұрғыдан келгенде, арғы атасы Сыдық бидің әділдігі мен парасаттылығы, әкесі Әбдіқалықтың іскерлігі мен ұстамдылығы бойына қонған Науша ағамыз ұрпағының да тәлім-тәрбиесіне терең мән беретін. Көпшілдікке, бауырмалдыққа және қарапайымдылыққа баулитын.Иә, осындай тәрбиенің жемісі – ұрпағы ұғымтал, зерек болып өсіп, әке даңқын аспандата білді. Айталық, ұлы Қыпшақбай, қыздары Гүлшара, Әсия, Марта, Меруерт ғылымның бір-бір саласын бағындырды. Есімі елге етене таныс Гүлшара Наушақызы әлеуметтік сала министрі, Мемлекеттік хатшы және Қызылорда облысының әкімі лауазымдарында өзіндік парасат-пайымымен танылды. Әке жолын жалғастырып, туған жерін түлетуге табанды қызмет етті.<blockquote>«Жарық дүниенің адамға бір-ақ рет берілетіні айдан анық. Осы дүниеде артында кім қандай із қалдырды? Елінің игілігіне қандай еңбек етті? Адам өмірінің маңыздылығы осында. Әкеміз Науша Әбдіқалықов – әділ мінезімен, салмақты, салиқалы болмысымен еліне адал қызмет еткен жан. Әкеміздің өмірі мәнді де мағыналы болды. Шаңырағына мейірім шуағын төгіп, балаларына барынша қамқор еді. Бес перзентін балапандай баулып, өмірдің ағымына, заманның талабына қарай қанаттандырып, өсірді. Анамыз Дәмешпен тату-тәтті ғұмыр кешті. Адам баласына дауыс көтеріп сөйлегенін көрмеппіз. Қандай іс болсын, ақылмен, сабырмен шешуге тырысатын.Әкеміздің бойындағы адами қасиеттерін, соғыстағы ерлігін, бейбіт өмірдегі елге сіңірген еңбегін көзін көрген жандар әлі күнге айтып отырады.Биыл әкеміздің туғанына 100 жыл толып отыр. «Адам ұрпағымен мың жасайды» деген халық даналығына сүйенсек, артында қалған перзенттері әке абыройына шық жуытпай, оның елге еткен қызметін әрі қарай жалғастырып келеді» деп жазады әкеге деген сағынышын жеткізген Меруерт Наушақызы.</blockquote>Бір ғасыр. Бұл аз уақыт емес. «Елу жылда ел жаңа, жүз жылда қазан» дейтін өмірлік өлшеммен қарайтын болсақ, осынау уақыт аралығында қаншама ұрпақ алмасты. Тарих беті жаңарып, қоғам өзгерді. Тіпті адами құндылықтар да алмасып жатыр. Алайда адал еңбек, абыроймен жеткен белес қана еш өзгеріссіз, елдің жүрегінде сақталып қалды. Әлбетте, Науша Әбдіқалықов сынды ел құрметіне бөленген жанның артына қалдырған өнегесі де ұрпақтан-ұрпаққа жалғаса бермек. Қазақтың біртуар ақыны Мұқағали Мақатаев жырлағандай: Өкінбе, әке, отың бар сөнбейтұғын, Ол мәңгілік жанады көрмей тыным. Ұрпағың бар, ел менен ер намысын, Тірі тұрса, қолынан бермейтұғын, – деген өлең жолдары әрбір перзент жүрегін жарып шыққан әкеге деген ыстық сезімді әйгілеп тұрғандай… &nbsp;

Меруерт Наушақызы: Әкеміздің халыққа көрсеткен жақсылығын ұрпақтары жалғастырып келеді

<a href="https://kyzylorda-news.kz/">Kyzylorda-news.kz.</a> 9 мамыр – Жеңіс күні және ҚР Суретшілер одағының құрылғанына 90 жыл толуына орай ҚР Суретшілер одағының мүшесі, Абызбеков Әбілда Қырбайұлының «Дала үні» атты &nbsp;шығармашылық көрмесінің ашылуы болды.Көрменің ашылу салтанатында облыстық тарихи-өлкетану музейінің директоры Сапар &nbsp;Көзейбаев, Қазақстан Суретшілер одағының мүшесі, «Құрмет» ордені иегері Аманкелді Кененбайұлы, ҚР Суретшілер одағының Түркістан облыстық филиалының төрағасы Нұрлан Шилібаев сөз сөйлеп, ізгі лебіздерін білдірді. Өнердің нәзік иірімдерінен туындылар тоқыған қылқалам шеберінің еңбектерін жаңғырту, шығармашылығын дәріптеу – шараның негізгі мақсаты.Көрмеге суретшінің 90-ға жуық кескіндеме туындылары қойылып, көпшілік назарына ұсынылды. Суретшінің туындылары еліміздің көрнекті жерлеріне эпикалық үн қосқан дала сұлулығы мен өнер сұлулығын ұштастырған түрлі форматтағы пейзаждар, еңбегі ерен тұлғаларға арналған қанық түстермен көмкерілген портреттер және ұлттық тақырыптағы ізденістік еңбектерден тұрады.Ол туған жердің түстік байлығын қанық жылы түстерді батыл қолдану арқылы кемеліне жеткізе сала білген. Ол сонысымен құнды, сонысымен құрметті.Өнер иесінің шығармашылық еңбектері облыстық, республикалық музейлер мен жеке коллекционерлер қорында сақтаулы тұр.<blockquote>– Өнер жанрының қай түрі болса да үлкен талантты, еңбекті қажет етеді. Оның ішінде қылқалам шеберлерінің түрлі бояу кескіндемелерін бір арнада тоғыстырып, үйлестіре білуі тазалық пен талғампаздықтың жемісі деп бағалар едім. Ал бұл тұрғыда Әбілданың әлемі шексіз сүйсіндіреді. Көрме арқылы жастарды өнерге, Отанды сүюге баули аламыз. Менің бүгінгі шарадан түйген маңызды ойым осы, – деді «Құрмет» орденінің иегері Амангелді Кененбайұлы.</blockquote>&nbsp;&nbsp;

«Дала үні» шығармашылық көрмесі ашылды

Жаңақорған ауданында ұлттық жоба аясында 16 тың жоба іске асты

<a href="https://kyzylorda-news.kz/">Kyzylorda-news.kz.</a> Жемісті жылдарда елдің тұрақтылығын, қоғамның қауіпсіздігін қамтамасыз етіп, тұрғындардың тыныштығына кепіл болатын Қазақстан полициясы құрылды. Қазақстан полициясы – Халқымыздың берік қорғаны, тәуелсіздігіміз бен тұрақтылығымыздың сенімді тірегі. Әр аймақтағы полиция бөлімдері жергілікті жердегі құқы бұзушылырадың алдын алуда, қоғамдағы қылмыстардың азайып, ел дамуына кедергі келтіретін олқылықтарды болдырмауда табандылық танытып, нәтижеге жұмыс жасауға күш салып келеді. Әсіресе, осы салада жүрген, ауданның тыныштығын, қоғамның тұрақтылығын күзеткен тәртіп сақшыларының еңбегі &nbsp;елеусіз қалмайды. Олар осы уақытқа дейін Жалағаш аудандық полиция бөлімінде де ахуалдың тұрақты болуы үшін жүйелі жұмыстар атқарып келеді. Атқарған жұмыстары нәтижесін беріп, көптегне қылмыстардың алдын алса, ашылған қылмыстар да жоқ емес.Жалпы, учаскелік полиция жұмысы – ішкі істер органдары жүйесіндегі ең әмбебап қызмет. Өйткені учаскелік полиция инспекторы қоғамның тыныштығын сақтаумен қатар ұсақ-түйек ұрлықтан бастап кісі өліміне дейінгі ауыр қылмыстардың қақ ортасында жүреді. Елді мекендердің, қарапайым халықтың қайнаған тіршілігімен біте қайнасып жүргендіктен, оларға сөгіс те бірінші келеді, алғыс та арқалап жатады. Ішімдікке тойып алып, ауылының берекесін алған маскүнеммен, отбасын ойрандаған озбырмен, қоғам тыныштығын бұзған бұзақымен де бетпе-бет келетін осылар. Сырт көзге форма кейіп, түзу жүрген сақшының жұмысы оңай көрінгенімен, бұл қызметтің көпке біліне бермейтін ауыртпалығы көп, жауапкершілігі мол. Осындай қауіп-қатері басым қызметтің жауапкершілік жүгін арқалап, өзіне бекітілген әкімшілік аумақ бойынша тұрғындардың өтініштеріне жедел ден қойып, халықпен тығыз байланыста жұмыс жасап жүрген тәртіп сақшының бірі учаскелік полиция инспекторы, полиция майоры Нұрлан Сенбековтың еңбегіне ерекше тоқталуға болады.&nbsp;2009 жылы Аққолқа елді мекенінде учаскелік полиция қызметкері болып еңбек жолын бастаған ол кейін Мәдениет, Мырзабай, Аққұм, Аққыр, Жаңадария ауылдарында абыроймен қызмет атқарып, ауыл халқының алғысына бөленді. Сондай-ақ аймақтағы жылдам қимылдайтын арнайы жасақтың құрамында адал еңбек етіп, аймақ тұтастығын сақтауға үлкен үлес қосып жүр. Кейіпкеріміз 2022 жылдың қазан айынан бастап Бұхарбай батыр ауылында учаскелік полиция инспекторы ретінде сапалы қызмет етіп келеді. Ең бастысы, ауыл тұрғындарының полицияға деген сенімі нық, жұмысына көңілі толады. Олай болатыны да заңдылық. Себебі елді мекенде соңғы жылдары қылмыстың саны күрт азайған. Иә, ел болғасын ұрлық, бұзақылық орын алып тұрады. Дегенмен Нұрекеңнің қырағылығы мен біліктілігінің арқасында мұндай қылмыстар да мүлде орын алмапты.<blockquote>«Тек қана полиция емес, кез келген азамат жұмысына асқан жауапкершілікпен қараса, ісінің алға басары сөзсіз. Иә, жасырмаймын, жұмысымның қиындығы басым, дегенмен арман қуып келген қызмет болған соң маған қызығы мен шыжығы бірдей. 2009 жылдан бастап ішкі істер саласында қызмет етудемін, еңбек өтіліме 15 жылдай болыпты. Аз уақыт емес, толықтай шыңдалдым деп айтуға болмайды. Десе де уақыт өткен сайын біз кәсібилене береміз. Өйткені біз күнде әртүрлі оқиғаларға, түсініксіз жағдайларға кезігіп жатамыз. Өзім қызмет етіп жүрген Бұхарбай батыр ауылының ахуалы тұрақты. Жалпы, ауыл тұрғындарының барлығы заңды құрметтейді, қоғам тыныштығын сақтауға бір кісідей атсалысады», – дейді Нұрлан Орынбасарұлы.&nbsp;</blockquote>Учаскелік полиция инспекторының басты міндеті қоғамдық тәртіпті сақтау болғанымен өзіне жауапты елді мекенде қылмыс тіркелсе, бірінші болып жететін ол криминалист, жедел уәкіл, тергеуші, анықтаушы сияқты жауапты мамандықтардың бүкіл міндетін қатар атқарып кете береді. Мәселен, 2013-2014 жылдары Мәдениет ауылында қызмет етіп жүргенінде, Қазпошта ғимаратына қаскөйлер ұрлыққа түседі. Бірақ бұл қылмыс дереу ашыла қоймайды. Осылайша арада бірнеше уақыт өткенде екінші мәрте ұрлық қайталанады. Бірақ Нұрекеңнің қырағылы мен елді мекен тыныс-тіршілігімен етене таныс болуының арқасында қылмыстың ізі суымай ашылып, ауылды дүрліктірген ұры ұсталады. Міне, көріп отырғанымыздай қиындығы мен қауіптілігі қатар жүретін қызметте учаскелік инспекторларына талай қылмыскермен бетпе-бет келуге тура келеді.Иә, заңсыз әрекет жасайтын түрлі азаматтармен жұмыс жасау оңай емес. Үнемі физикалық қалыпта болумен қатар психологиясы да тұрақты болуы шарт. Ол үшін полицей спортпен тұрақты түрде айналысып отыруы керек. Сол себепті кейіпкеріміз – жұмыстан бөлек спортты жанына серік еткен полицей.&nbsp;<blockquote>«Әрбір жігіт қарулы болу керек» деген әдемі сөз бар. Сондықтан бала күнімнен спортқа әуеспін. Бүгінде гір спортымен айналысқаныма 20 жылдан асты. Мақтанғаным емес, облыстық, аудандық додаларда үздік өнер көрсетіп, аудан абыройын асқақтатып жүрмін. Нақтырақ айтсам, гір спортынан облыстық біріншілікте 15 мәрте чемпион атансам, сондай-ақ қол күрестен 12 дүркін үздіктер қатарында болдым. Мұнан бөлек 4 мәрте республикалық ойындарға қатыстым, ауданда жылқы көтеруден 2 мәрте чемпион атандым. Әскерде жүргенде талай спорттық шараларда белсенділік таныттым. Жалпы, өзім 2006-2007 жылдары Жамбыл облысы Қордай ауданында және Бурныйдағы Бауыржан Момышұлы атындағы селода әскери борышымды өтедім», – дейді үздік полицей.</blockquote>Нұрекең 2014 жылдың қорытындысымен үздіктер қатарында болып, аймақ басшысының қолынан арнайы «Жыл сақшысы» номинациясын да алды. Десе де ол – қызметтен бөлек, ең алдымен отбасының өнегелі отағасы. Олай дейтініміз ол өзінің ізінен ерген 6 баласына жақсы тәлім-тәрбие беруде, сол себепті балалары білімнен, спорттан ата-анасының мақтанышы болып жүр. Үйдің үлкені, аяулы қызы Қарағанды қаласындағы университетте химия-биология пәнінің мұғалімі мамандығы бойынша білім алуда. Жұбайы – мәдениет саласының қызметкері. Ұлы Нұрислам Нұрекеңе тартып, спортты жанына серік еткен. Жақында ол Петропавл қаласында оқушылар арасында өткен республикалық гір тасын көтеру жарысында үздік нәтиже көрсетіп, 3 орынды иеленді. 10 сынып оқитын Нұрислам – спорт шеберлігіне үміткер. Полицей жауапты қызмет атқарса да, қолы қалт еткенде бау-бақша егіп, басқа да шаруаларды қатар алып жүруді де жөн көреді.&nbsp;Иә, «Халық үніне құлақ асатын мемлекет» құру міндеті құқық қорғау саласынан жұмысты бұрынғыдан да ширата түсуді талап етуде. Сондықтан полицей халықпен жеке кездесіп, қандай мәселесі барын тыңдап, оны бірлесе шешу жолдарын қарастыруға міндеттелген. Осы орайда кейіпкеріміз отбасымен Бұхарбай батыр ауылына көшіп, бүгінде туыстарының үйінде тұрып жатыр. Дегенмен жағымды жаңалық десек те болар, елді мекен тұрғындарымен кездесуінде аудан басшысы Асқарбек Темірбекұлы ауылдағы учаскелік полиция инспекторларына жеке қызметтік үй берілетінін жеткізген болатын. Бүгінде жоба мақұлданып, қаражат та қаралған, бұйыртса, осы жылда тәртіп сақшыларына қызметтік үй табысталмақ. Әрине мұндай мемлекеттің қолдауы ел тыныштығын күзеткен азаматтар жұмысына серпін берері сөзсіз. Биыл баспаналы болатындар қатарында кейіпкеріміз де бар.Отбасында ардақты әке, ата-анасына, бауырларына сүйікті ұл, әріптес¬тірінің алдында абыройлы, достарына сыйлы болған Нұрекеңдей азаматтың өмірлік-қызметтік жолы – өзгелерге үлгі. Күнде жұмысқа шығарда алдында не күтіп тұрғанын білмейтін қырағы полицей болу нағыз ердің ісі десем, артық айтқандық емес.

Халық қорғандарына қырағылық керек

<a href="https://kyzylorda-news.kz/">Kyzylorda-news.kz.</a> Жастар қоғамның қозғаушы күші ретінде озық идеямен қаруланып, елдің дамып, өркендеуіне өз үлесін қосып келеді. Тіпті мемлекет тарапынан жастарға үлкен қолдау көрсетіп келе жатқан «Болашақ», «Дипломмен – ауылға!», «Жасыл ел», «Жастар тәжірибесі» сынды бағдарламалар оң нәтиже беріп, жастардың жан-жақты болуына мүмкіндік сыйлауда.Енді осындай айтулы жобалардың қатарына «Азаматтық бастамаларды қолдау орталығы» қолдауымен жүзеге асырылып жатқан «Жергілікті өзін-өзі басқаруды дамытуға бағытталған іс-шаралар кешенін ұйымдастыру» атты жобасын қосуға болады. Мақсаты – әлеуметтік жобаларды жүзеге асыру арқылы ауылдық елді мекендердің проблемаларын шешуге азматтарды тарту. Міне, осы байқауға тың туындысын ұсынып, оны ойдағыдай қорғап шыққан жерлесіміз Ермек Сқақтың жобасы қолдауға ие болып, грант иегері атанды.Әлеуметтік желіде Қазақстанның 7 облысы бойынша, атап айтқанда Алматы, Жамбыл, Түркістан, Қызылорда, Батыс Қазақстан, Атырау және Маңғыстау облыстары арасында өтетін «ШАҒЫН ГРАНТТАР» байқауы жарияланғанын естіген сәттен бастап Ермек бағын сынап, жеңімпаз атануды мақсат етеді. Өйткені ауылдық жерлердің өзекті мәселелерін шешуде бұл таптырмас жоба болатын.Белгіленген ереже бойынша байқауға ұсынылатын жоба жергілікті қоғамдастық мүшелерімен ақылдаса отырып, ауылдың белсенді тұрғындарын тарту арқылы жасалуы көзделген. Содан ауыл тұрғындары соның ішінде жастардың бос уақытын тиімді өткізуде, оларды мәдени тұрғыда жанашыр, спорт саласында дені сау ұрпақ қалыптастыру үшін ерекше жоба жасау мақсатында әріптесі Әлайдар Зәйидінмен ақылдасады. Осылайша «Келісіп пішкен тон келте болмайды» демекші, бар ойымызды ортаға салып, ұстамды болған ұлттың ұстанымы қашанда мықты болатынын дәлелдесек деген тілекпен «TENNIS VILLAGE» жобасын жасап шығарады.<blockquote>«Жобаның мақсаты жастар мен балаларға дені сау ұрпақ қана ертеңгі елдің жалғасы, ұлт болашағының кепілі екенін санасына құю және бос уақытын тиімді өткізуде үстел теннисі орталығының маңыздылығын түсіндіру. Ал балалар бұл спорт түрімен шұғылдану арқылы өмірге деген құлшынысы оянып, зиянды іс-әрекеттерден өзін аулақ ұстауға тырысады. Кейде әлеуметтік мәселелердің көптігінен ата-ана перзентінің не істеп жүргенінен хабарсыз қалып жатады. Салдарынан жастарымыз бұзақы істерге ұрынып, теріс жолға түсіп, құмар ойындар жетегіне еріп бос уақытын қылмыс жасауға итермелейтін жолды таңдап жатады. Міне, осы тұрғыдан алғанда біз жасаған жоба аталған мәселерді толықтай жоймаса да, санын азайтуға жұмыс жасайтын болады», – деді жоба авторы Ермек Қалдыбекұлы.</blockquote>Осылайша, сыйақы қоры 7 000 000 теңге, әр өңірге 1 000 000 теңгеден, соның ішінде жеңімпаз атанған жобаға 435 000 теңге бұйырғалы тұрған сайысқа онлайн форматта «TENNIS VILLAGE» жобасын ұсынған жастардың жұмысы үздік идеяларының арқасында жеңімпаз деп танылып 374 900 теңгенің сертификатына ие болды.Енді жоба авторы үстел теннисі жобасын ұйымдастыру үшін арнайы жасақталған өз саласының майталмандарының басын қосып іске кірісетін болады. Өзі мақсатты топтарға теннис дағдыларын үйретсе, жобаның мақсатты топтарын жасақтау, әкімдікпен келіссөздер жүргізу, керекті жабдықтарды сатып алу, орналастыру бойынша Әлайдар Зәйидін айналысатын болады. Ал жобаның жүзеге асуы туралы әлеуметтік желілерде ақпараттандыруды уақытылы жариялауда Тұрар Көшербай жауапты болатынын білдік. Ең қуаныштысы жобаны келісім шарты толықтай жүзеге асқан кезде арнайы тізім жасақталып, 45 мақсатты топ теннис ойнау дағдысын, ережесін, тактикасын меңгеретін болады.Спортты, қоғам мәселесін, жастар тақырыбын қозғағаннан-ақ Ермектің Жаманбай ауылдық округіне қарасты №54 мектепте денешынықтыру пәнінен сабақ беретінін білдік. Еңбек жолын бастаған сәттен-ақ жастар жанашырына айналған кейіпкеріміздің басты арманы да өскелең ұрпақтың білімді және бәсекеге қабілетті болып өсуі жолында еңбек ету. Ендеше ауылда тұратын жастар да мұндай жобадан тыс қалмауы керек деген жас ұстаз елдімекен жастарының игілігі үшін аянбай тер төгіп келеді. Оның үстіне кей жерлердегі спорт ғимаратындағы үйірмелердің коммерциялануы да өзекті мәселеге айналғалы қашшан. Ал бұл тұрғыда Ермек пен Әлайдардың жобасы қолдауға тұрарлық дүние екеніне ешкімнің дауы жоқ.Жастар – ел дамуының құраушы күші. Олар мемлекеттің экономика, саясат, ғылым мен білім көкжиегіндегі орнын белгілейді. Сол үшін елімізде жастарды қолдауға арналған жобалардың көптігі қуантады. Бүгінгі таңда белсенді әрекет ететін шағын және орта бизнес субьектілері тұрғысынан Жаңақорған ауданы көш ілгері. Әсіресе жастар қауымы бұл салада өзіндік белсенділігін танытуда. Қаржылық институт тарапынан алынып жатқан несиенің басым бөлігі осы жас кәсіпкерлерге тиесілі екен. Сәтін салса, алдағы уақытта жас кәсіпкерлерге деген мемлекеттік қолдау шаралары ұлғаяды деген сенім мол.

Жаңақорғандық кәсіпкер  үздік идеясының арқасында 374 900 теңгенің сертификатына ие болды

<a href="https://kyzylorda-news.kz/">Kyzylorda-news.kz.</a> Әр аймақтағы полиция бөлімдері жергілікті жердегі құқық бұзушылықтардың алдын алуда, қоғамдағы қылмыстардың азайып, ел дамуына кедергі келтіретін олқылықтарды болдырмауда табандылық танытып, нәтижеге жұмыс жасауға күш салып келеді. Әсіресе, осы салада жүрген, ауданның тыныштығын, қоғамның тұрақтылығын күзеткен тәртіп сақшыларының еңбегі &nbsp;елеусіз қалмайды. Олар осы уақытқа дейін аудандық полиция бөлімінде де ахуалдың тұрақты болуы үшін жүйелі жұмыстар атқарып келеді.&nbsp;Полиция қызметкері болу үшін білім де, білік те, білек те, мінез де керек. Сондай-ақ ұстамды болуы, азаматтармен тіл табыса білуі, сыпайы болуы да аса маңызды. Осы ретте барлық аталған кәсіби талаптардың үдесінен шығып, елі үшін абыройлы қызмет етіп жүрген өңіріміздің тумасы Олжас Садықовты әңгімеге арқау етуге болады. Иә, шығармашылық топ Отан қорғаушылар күніне орай жұрт тыныштығын қорыған қызметкерлердің жұмысымен танысып, еңбектерін халыққа дәріптеу мақсатында аудандық по¬лиция бөліміне атбасын бұрғанбыз. Осылайша аудандық полиция бөліміндегі криминалдық полиция бөлімшесінің жедел уәкілі, аға лейтенант Олжас Садықұлымен әңгімелесудің реті келді.<blockquote>«Мен тәуелсіз қазақ елінің топырағында дүниеге келдім, ашық аспан астында, бейбіт күнде өмір сүрудемін. Бұл – халқымыздың ең басты байлығы деп есептеймін. Мен бала кезімде тарихи кітаптарды, батырлық жырларды көп оқитынмын. Сонда еліміздің қандай қиын-қыстау кезеңдерді басынан өткізгенін оқып, олардың батырлығына, ерлігіне қайран қалатынмын. Сол себепті болар бала кезімде халқымыздың қауіпсіздігі мен тыныштығын қорғасам, еліміздің мықты қалқаны болсам екен деп армандаушы едім. Міне, бүгін балалық арманым орындалып, елімнің тыныштығын қорғау барысында еңбек етіп келемін», – деп әңгімесін бастады Олжас.&nbsp;</blockquote>Мектепті жақсы аяқтаған Олжас білімін жетілдіру үшін М.Мәметова атындағы Қызылорда педагогикалық жоғары колледжіне оқуға түседі. Кейін Шымкент қаласындағы Заң университетінде «Құқықтану» мамандығы бойынша білімін толықтырады. Сөйтіп оқуын бітіре сала Алматы облысындағы 32363 десанттық-шабуылдау бригадасына ел алдындағы әскери бо¬рышын өтеуге шақырту алады. Әскерге абыроймен барып келген Олжас көп ойланбай бала кездегі арманын жүзеге асыруға бел буады. Осылайша жас қызметкер 2020 жылы арман қуып ішкі істер саласына жұмысқа орналасады. Еңбек жолын аудандық полиция бөлімінде жедел тергеу тобында техник-криминалист болып бастап, кейін учаскелік полиция қызметінде де жұмыс жасайды.<blockquote>«Әр мамандықтың өзінің қиыншылығымен қатар қызығы мен шыжығы болады. Жалпы, криминалдық полиция бөлімшесі қылмыстарды ескертуге, жолын кесуге анықтауға және ашуға, сондай-ақ іздестіруге бағытталған. Сондықтан жұмыс уақыты шектеусіз. Тергеу жүргізіп, күдіктіден жауап алынып жатса, жұмыс кестесіне сай жайбарақат кете алмайсың. Тәулік ішінде көптеген оқиғалар орын алады, сол себепті жедел уәкілдің жұмысы тынымсыз және шектеусіз», – дейді Олжас Садықов.&nbsp;</blockquote>Иә, криминалдық полиция бөлімі жұмысының қиындықтарына қарамастан, ол қызметіне адалдығын жоғалтқан емес. Соған сәйкес жас қызметкер кәсіби тұрғыда кемелденіп өсе бермек. Ең бастысы, қажымай еңбек етіп, заң талаптарына сай қызмет атқаруды өзіне мақсат еткен. Сондай-ақ кейіпкерімізге қиын мамандықтың қыр-сырын меңгеруге отбасы әрқашан қолдау көрсетіп отырса, жұбайы Қаршыға мен екі бүлдіршіні бар-лық қиындықты жеңуге күш береді.Бір қызығы Олжастың жұбайы Қаршыға Әбуқадыр да ішкі істер сала-сында абыроймен қызмет етеді. «Өмірімізді бір арнада тоғыстырған осы жұмыс» деп әзілдейді Олжекең әңгіме арасында. Әрине екі жастың жауапты мамандыққа деген сүйіспеншілігі, ортақ көзқарасы, бір мақсатқа жұмыс жасауы, бір мүддені көздеуі, бір арманға қадам басуы осындай жауапты салада абыроймен қызмет етуге күш-қуат берері сөзсіз.

Қазақстан және Қызылорда облысының жаңалықтары