<a href="https://kyzylorda-news.kz/">Kyzylorda-news.kz.</a>&nbsp; Бұрнағы күні спорт саласының ардагері, басылымның тұрақты оқырманы Мектепхан Елеусінов бізге қоңырау шалып, ақжолтай жаңалықпен бөліскен еді. Қай кезде де зияткерлік ойындардың облыс көлемінде дамуына зор үлес қосып келе жатқан ел ағасы шіркейлілік өрен Сәбина Абылайдың Қырғызстан елінде өткізілген Азия чемпионатында жеңімпаз атануын ерекше қуанышпен қабыл алғандығын жеткізді. Расында, жерлесіміз Қырғызстан елінде жалауын көтерген шахматтан Азия чемпионатында жеңіс тұғырынан көрінді.&nbsp;Негізінен, Қазақстан құрамасының 8 жасқа дейінгі қыздар командасының ойыншысы Сәбина Абылай жекелей сында рапид бағдарламасы бойынша жүлделі І орынды жеңіп алды. Жалпы, Қазақстан құрамасы командалық ойында да, рапидтен де алдыңғы орыннан көрінген. Біздің жерлесіміз &nbsp;тағы бір мәрте классика бағдарламасы бойынша ІІІ орынды қанжығасына байлады. Жетістігін еселей түскен Сәбина Абылай жекелей және командалық есепте 3 алтын, 1 қолаға қол жеткізді. Өз кезегінде &nbsp;№12 Сырдария аудандық балалар-жасөспірімдер спорт мектебінің шахмат бөлімшесінің жаттықтырушысы Үсен Маханбетов шәкіртінің жетістігі туралы пікір білдірді. &nbsp;<blockquote>– Менің шәкіртім Сәбина Абылай – №129 Ә.Жәмішев атындағы мектеп-лицейінің 3 сынып оқушысы. Дарынды оқушым шахмат үйірмесіне 5 жасынан бастап қатыса бастады. Алғырлығымен көзге түскен спортшымыз Қазақстан құрамасына қабылданып, сақадай сақ ойыншылардың қатарынан табылды. Қырғызстан елінде бірнеше қарсыластан басым түсіп, ме-рейімізді үстем етті. Алғаш рет Азия чемпионатында сырдариялық спортшы жеңіске жетіп, ауылдастарының абыройын асқақтата білді. Қызылорда қаласындағы теміржол вокзалынан Сырдария ауданына қарасты спорт саласының жауапты мамандары жеңімпазды салтанатты түрде күтіп алды. &nbsp;Барша құрмет көрсете білген жандарға алғысымыз шексіз! Алдағы уақытта шәкіртіміз орасан жетістіктерге қол жеткізеді деп сенеміз. Сәбинаның алар асуы алда. Уақыты келгенде әлем біріншілігінде шәкіртіміз топ жарса деген тілегіміз де жоқ емес, – деді Үсен Маханбетов.&nbsp; Жалпы, құрлықтық бәсекеге 11 мемлекеттен 280 шахматшы қатысқан екен.</blockquote>– Менің Азия чемпионатында жүлдегер атануын ең алдымен бапкерім мен ата-анамның арқасы деп білемін. Қырғыз елінде өткізілген жарыс барысында ойындар өте қиын әрі қызықты өтті. Аса дайындықпен келгендіктен, чемпионддық атаққа қол жеткіздім. Қызылорда келгенімде үлкендеріміз күтіп алды. Сол кезде қуанышымда шек болмады, – дейді Сәбина Абылай.

Сырдариялық спортшы Азия чемпионы атанды 

<a href="https://kyzylorda-news.kz/">Kyzylorda-news.kz.</a>&nbsp; Қазалы ауданында көптің ықыласына бөленіп, халық қамын ойлаған абыройлы азаматтар аз емес. Сол қатарда елге болысып, қысылтаяң сәтте қолдау көрсетіп жүрген жандардың бірі – облыстық мәслихат депутаты, кәсіпкер Ібайдулла Тілеп. Жуырда Қазалы халқына ғана емес, облысқа белгілі азаматпен сұхбат құрудың сәті түсті.– Сізді халық жақсы таниды. Дегенмен оқырманға ең әуелі өзіңіз жайлы толығырақ айтып берсеңіз…– Мен 1959 жылы теңіздің қолтығында дүниеге келіппін. Нақтыласам, «Қосшоқы» деген жер. Кейін әкем «Жанай» учаскесіне көшіп, 12 жасқа толғанша сол жерде білім алып, ойын қуып, теңіз толқынына қарап өстім. Одан кейін 1976 жылы Қызылорда ауылшаруашылығы техникумына оқуға түсіп, 1979 жылы бітіріп шықтым. 1980 жылы институтқа түстім. Осылайша 3-курста оқып жүріп әскерге аттандым. Азаматтық борышымды аман-есен атқарып келісімен қызу жұмысқа кірісіп, елмен араласып, аға мен іні тауып, бүгінгі күнге жетіп отырмын. Қазір кейбіреулер «уақытым бекер өтіп кетті» деп өкініп жатады. Алайда Шерхан Мұртазаның пайымдауынша, уақыт емес, өмір өтеді екен. Уақыт өз қалпында, таңның атысы күннің батысымен жалғасын тауып отырады. Артта қалған өмірге өкпе жоқ, тек алға қарай қадам басамыз.– Біраз жылдан бері облыстық мәслихат депутатысыз. Жалпы депутаттық, азаматтық ұстанымыңыз қандай?– Мені сол орынға отырғызған халық. Халық – құдайдың бір есімі. Елдің аманатын арқалап жүргеннен кейін мүмкіндігім келгенше білімімді, тәжірбиемді ел алдында көрсетіп, қызметімді абыроймен атқарып, берілген сенімді аяқасты етпей жүрсем, соның өзі – үлкен мәртебе. Ертеректе ауданға қарасты елді мекендерде жарық, ауызсу мәселесі күн тәртібінен түспейтін. Қазір олардың қатары азайды. Құдай қаласа, барлығының шешім табатын күні алыс емес. Бертін келе, ауылдарға да көптеген дүниелерді жеткізу керек болды. Жалпы адам баласының тұрмыс-тіршілігі жақсарған сайын сұраныс та өзгеріп, көбейіп отырады.Елді мекендерден көлікпен шыққан адам неліктен кентке шаршап жетуі керек?! Ауданда жастар уақытын құр өткізбеу үшін түрлі орындар салынып жатыр. Сол қатарға мұз айдынын қоссақ, артық болмайды. Біздің жастар сонда сырғанап, көңіл көтеріп, керемет саябақ пайдалануға беріліп, жұртшылық кешкілік қыдырса, нұр үстіне нұр болар еді. Шағын футбол алаңдары салынып, бүлдіршіндер доп теуіп, уақыт өткізіп жатыр. Мұны көрген сайын қуанамын. Түптеп келгенде, болашақ жастардыкі болғандықтан, біздің аудан жастары да ешкімнен кем болмай, жақсы білім алып, биіктерден көрінсе деймін. Ел игілігіне қажеттінің барлығы табылып, осыларды жүзеге асыру әрі атсалысу – менің азаматтық борышым. Негізгі ұстанымым да осы бағытта. Менің сөздік қорымда болмайды деген сөз жоқ, ертеңіміз жарқын, болашағымыз баянды болатынына сенемін.– Ібайдулла аға, бүгінге дейін облыстық мәслихат депутаттарының қолдауымен аймақта, оның ішінде ауданда шешімін тапқан мәселелерге тоқталсаңыз…– Әуелі ұсынған бағдарламаммен таныстырайын. Мемлекет басшысы Қасым-Жомарт Кемелұлы Тоқаевтың Қазақстан халқына арнаған Жолдауында еліміздің жаңа бағдары басты жеті қағидатқа негізделген. Сол қағидаттардың іске асуына атсалысу, шағын және орта бизнесті дамытудағы бағдарламаларды іске асыру, жастар ісін қолдауға, өнер және спортқа ден қойған жастардың жетістіктерге қол жеткізуіне мүмкіндіктер қарастыру, Арал, Қазалы ауданының әлеуметтік-экономикалық дамуына ықпал жасау, ішкі жолдарын күрделі, ағымдағы жөндеуге қаржы бөлдіру, елді мекендердің жол, су, электр жарығы мәселелерімен қоса газдандыру жұмыстарына күш салу – басты бағдарым. Қазірге дейін аймақта түйіні тарқатылған түйткілдер көп. Ал Қазалы ауданына келер болсақ, жоғарыда тоқталып өткендей, 2004-2005 жылдары жарық, сусыз отырған ауылдар көп кездесетін. Сол уақытта облыстық өкілетті орган мінберінде елге сыйлы азаматтар жетерлік еді. Мен солардың тәрбиесінен өтіп, көп нәрсе үйрендім. Жоғарыда айтқанымдай, бұрынырақта ауыл өз алдына, кенттің өзі жарықсыз отырды. Бір көшеге 2 сағат, келесісіне 2 сағат жарық барып тұратын. Ауызсу мәселесі де тура осындай болатын. Бүгінде ауызсу мәселесі шешілген. Барлығына бірдей жетіп тұр десек, артық емес. Сонымен қатар автожол мәселесінің де біржақты болып келе жатқанын көзіміз көріп жүр. Қараңғы көшелердің жарқырап тұрғанын, бүгінге дейін көптеген елді мекендерде білім ошақтары салынғанын айтпай кетуге болмайды. Ертеде дарияның арғы бетіндегі шет ауылдармен өткелдің болмауы салдарынан байланыс үзіліп қалатын. Мұның барлығы артта қалды. Осы ретте «Қарлаң» көпірінің салынып жатқанын мақтанышпен тілге тиек етсем деймін. Мұның өзі – үлкен іс. Міне, осындай дүниелердің игілігін халық көруге тиіс. Бұл жұмыстардың бәрінде облыстық мәслихат депутаттарының үлесі бар.– Жүйелі жұмыстың жолын жемқорлық кес-кестейді ғой. Осы тұрғыда пікіріңізді білсек…– Мен ауылда туып-өстім. Сол кезде есте қалғаны күнде кешкісін жағалай орналасқан көршілер кешкі ас дайын болғанда тамақтарын бір-біріне ала жүгіретін. Оған қоса біреудің үйінде той болса, барлығы бірдей қуанып, бір отбасында қайғылы жағдай орын алса, тұтас ауыл қайғыратын. Бұл – имандылықтың басымдығы. Кешегі күнге дейін мұның барлығы болғанымен, ненің әсері екені белгісіз, қазір жоғалып барады. Әрине, бәріне бірдей күйе жағудан аулақпын. Жемқорлық – қоғамның өзегіне түскен жегі құрт тәрізді. Мұның өзі ертеңге деген сенімді жоғалтады.– Осы тұста ұрпақ тәрбиесіне ұқыппен қарау керек секілді. Қазалы ауданындағы жастардың жаппай төбелесі елді бір дүрліктіріп алды емес пе?– Бала үйдегі тәрбиеге қарап түзелетіні сөзсіз. Соның арқасында биіктерден көрініп, ортасына сыйлы болып, елге танылатыны тағы бар. «Ұяда не көрсең, ұшқанда соны ілерсің» дейді дана халқымыз. Егер бала отбасында дұрыс тәлім алса, оның болашағы жарқын болады. Керісінше, бұрыс тәрбие берілсе, көптеген кедергілерге ұшырап, болашағы бұлыңғыр тартады. Қазір жастар ұялы телефонды жата-жастанып қарайды. Әлеуметтік желіге телміріп, уақытты құр жібереді. Бұл «Айта-айта Алтайды, Жамал апай қартайдының» кері. Мәселе күн тәртібінен түскен жоқ. Мейлі олар қалта телефонды ұстай берсін. Бірақ содан өзіне керегін алып, қажетіне жаратсын. Оны жақсы бағытта пайдалансын. Әрбір ата-ана бала тәрбиесіне бейжайлық танытпау қажет екенін түсінсе екен. Қазіргі заманда баланы, бала тәрбиесін қараусыз қалдыруға болмайды.

Жүйелі жұмыстың нәтижесі оң

<a href="https://kyzylorda-news.kz/">Kyzylorda-news.kz.</a> Мал шаруашылығы – өңіріміздегі ең маңызды саланың бірі. Бұл сала халықты түрлі тағам өнімдерімен, өнеркәсіпті шикізатпен қамтамасыз ететіні халыққа мәлім. Ал, осы малдың түрлі ауруға ұшырамауын, олардан алынатын өнімдердің адам денсаулығына зиян келтірмеуін қамтамасыз етуде тынымсыз еңбек ететін ветеринар мамандарының қызметі ерекше рөл атқаратыны айтпаса да түсінікті.&nbsp;Қазақ қауымының өсіп-өркендеуіне өзіндік маңызды рөлін атқаратын мамандыққа талай атпал азаматтар өмірін арнап, елге қызмет етті. Солардың бірі – Жосалы кентінің тұрғыны, еңбек ардагері Үміткәрім Досымов.&nbsp;Біз әңгімелегелі отырған &nbsp;азамат туралы &nbsp;халық не біледі деген сұраққа келсек, негізінен Үміткәрім аға Қазалы ауданына қарасты Байқожа стансасында дүниеге келіп, осы елдегі орта мектепте алғашқы әріпті танып, кейіннен ата-анасының Тұрмағамбет ауылына қоныс аударып, ауылдағы №29 орта мектепті тәмамдайды.&nbsp;1965 жылы мектепті бітірген ол замандастары сияқты &nbsp;өмірін жоғары білім алумен бастамай, керісінше ауданда жаңадан құрылған Жаңақала &nbsp;кеңшарында шопан болып жұмыс істейтін әкесіне көмекші болудан бастайды. Бірақ, арада екі жыл өткен соң, жас шопан білімін жетілдіруде Алматыдағы зоотехникалық мал дәрігерлік институтына құжат тапсырып, емтиханнан сәтті өтіп, онда жоғары білімді ұстаздардан 4 жыл бойы &nbsp;ветеринария саласының қыр-сырын терең меңгеріп шығады. Талапты студент институт қабырғасында білім ала жүріп, ондағы қоғамдық жұмыстарға да белсене араласады. Атап айтсақ, спорт десе ішкен асын қоятын Үміткәрім ағамыз спорттың гандбол түріне деген ерекше ықылас танытып, институт құрамасы сапында көптеген жарыстарға қатысады. Талантты спортшы өзінің дарындылығымен, ерекше қабілетімен көптеген дүбірлі жарыстарға қатысып, жүлделі орындарға ие болады. Нақтысын айтқанда, 1970 жылы &nbsp;жоғары оқу орындары арасында институт құрамасы сапында Тәжікстанда өткен бүкілодақтық додалы жарысқа қатысып, жеңімпаз атанса, &nbsp;келесі жылы Украинада өткен бүкілодақтық жарыста жүлделі ІІІ орынды, содан кейінгі жылы Литвада өткізілген жарыста тағы да ІІІ орынды иемденіп, өзі де үздік ойыншалар қатарынан орын алып, қазақ елінің, оның ішінде өзі білім алатын Алматы зоо ветеринариялық институтының мерейін тасытады.&nbsp;Осындай дарынды азаматтың еңбегін бағалаған институт басшылығы оны өзі білім алған оқу орнында денешынықтыру сабағының мұғалімі, оның ішінде гандболды дамытуға ұсыныс тастайды. Алайда, «Туған жерге туыңды тік» деген қазақ даналығын бойында сіңірген, әкесінің баласына айтқан ақыл-кеңесін орындауда Үміткәрім ағамыз әкесінің өзіне қойған талабын орындауға елге оралады. Жас маманды туған ауылы қуана қарсы алып, оны шаруашылық басшылығы бастапқы кезде мал емдеу бекетінің дәрігері, кейіннен сол бекеттің меңгерушісі қызметіне тағайындайды.Алғыр да әрбір іске шеберлікпен қараған Үміткәрім ағамыз араға жылдар салып, Жаңақала кеңшарына қарасты Кекірелі елді мекеніндегі мал фермасына дәрігер, ферма меңгерушісі қызметтерін сеніп тапсырып, қызмет жолында сатылап өсуіне жағдай жасайды.Білімді де білікті маман ауылдағы шаруашылық басшылығы сеніп тапсырған тапсырмаларды &nbsp;жауапкершілікпен орындап, аға буыннан алған өмірлік тәжірибесін шәкірттеріне арнап, олардың қоғамнан орнын сайлап алуына еңбек сіңіреді.Еліміз егемендік алып, жаңаша өмір сүре бастаған алғашқы жылдарында Үміткәрім Досымов &nbsp;ауыл тұрғындарымен тәуелсіздіктің туын аспандатып, елді жаңаша өмір сүруге шақырғандардың бірі болды. Ол өз ісінің шебері ретінде ел жаңаша қызмет етуде көптеген іргелі істердің басы-қасында жүрді. 1991 жылы &nbsp;ауыл тұрғындарымен ойласа отырып, мал шаруашылығы бағытындағы «Үш ағаш» кәсіпорнын құрды. Оны өзі басқарып, тәуелсіздіктің алғашқы жылдарында ауыл тұрғындары басынан өткерген қиыншылықтан аман-есен шығуына аянбай еңбек етті. Көптеген ауыл тұрғындарының төрт түлігінің сақталуына жұмыс жасады.&nbsp;Сондай-ақ, ол 1996-2000 жылдарда «Мыңтай» шекара бекетінде жетекші мал дәрігері, кейіннен өзі еңбек еткен Тәйімбет Көмекбаев ауылында өміріне серік еткен мамандығы бойынша елге еңбегін сіңіріп, құрметпен зейнеткерлік демалысқа шықты. «Еңбек етсең ерінбей,Тояды қарың тіленбей» деп данышпан ақын Абай Құнанбаев айтқандай, Үміткәрім Досымов өзінің саналы өміріне серік еткен мамандығының білгірі ретінде көптеген марапатқа да ие болған құрметті азамат.Ол Кеңес Одағы дәуірінде өздері қызмет еткен сала бойынша үздік деп танылған азаматтарға берілетін мадақтамалардан да, сый-құрметтен де кенде болған емес. Тіпті, сала үздігі ретінде «Урал» мотоциклін сыйға алса, облыстық, аудандық партия комитеттерінің, әкімдіктердің Құрмет грамоталарымен, Алғыс хаттарымен мадақталды. Т.Көмекбаев ауылындағы №1 мал фермасының меңгерушісі болып қызмет еткен жылдарда оның қолдауымен ферма шопаны Пернетай Игенбаев аудандық атқару кеңесінің депутаты болып сайланса, ферманың енді бір &nbsp;азаматы Жаңабай Сандыбаевтың республикалық комсомолдар съезіне делегат болып қатысуына қолдау көсретті.Сонымен қатар, Тұрсын Сержанов, Құдайберген Шайманов, Жақсылық Тілеубеков, Мұрат Өсербаев, Ақылтай Айбергенов, Нұрмахан Айбергенов сынды құрметті шопандарға олардың тұрмыстық жағдайларына қолдау жасады.«Мал шаруашылығы атам қазақтың басына біткен бақыт. Бұл шаруашылық бізге ата-бабадан аманатталып келе жатқан кәсіп десек те болады. Мен де бала кезден қолына аса таяғын ұстап, Қызылқұмда шопан болып еңбек еткен әкеме көмекші ретінде қой бақтым. Балалық шағымнан &nbsp;өміріме жақын болған бұл мамандықты өсе келе де кәсібіме айналдырдым. Мал дәрігері бұл ауыл тұрғындары үшін қадірлі де құрметті мамандық. «Еңбек түбі – береке» дейді қазақ халқы. Міне, өміріме серік болған сүйікті мамандығымның арқасында көптеген құрметке ие болдым. Ауылдастарымның алғысын алып, &nbsp;мал шаруашылығының өркендеуіне үлесімді қостым. Иә, талай қиыншылықтар басымнан өтті. Ондай кезде аға буын өкілдерінің өнегелі өмір жолдарына, өмірлік, қызметтік тәжірибелеріне сүйендім. Кейіннен мен де осы мамандықтың қыр-сырын меңгеріп, тіпті шәкірт те тәрбиеледім. Ауылдың әрбір отбасындағы төрт түлікке жақын болып, оның денсаулығына жауаптылығын өзімнің &nbsp;міндетім деп санадым. Қазақта «Еңбек түбі – бейнет, бейнет түбі – зейнет», «Еңбек етсең емерсің» деген жақсы тәмсіл бар. Ел-жұртымның өсіп-өркендеуіне қосқан перзенттік парызым үшін де бірнеше рет аудан, облыс басшыларының құрметіне ие болдым. Еңбегім еш кетпеді, Бүгінде ауылыма жол салып, той-томалаққа бара қалғанда ауылдастарым қуана қарсы алады. Қонаққа шақырады. Сыйлайды, тіпті кейде менің &nbsp;азды-көпті жақсылықты істерімді айтып құрмет көрсетеді. Бұдан артық маған қандай бақыт керек. Жасым да келді. Қарттарға жақсылықты мақтаулар айтсаң болды олар бір марқайып қалады. Әрине мен де мақтаудан кенде емеспін. Айналамды қоршаған жақсылармен бірге өмір сүріп жатқан жайым бар. Тек өмірімнің мәні, ұл-қыз сыйлаған жарымның өмірден ерте кетіп қалғаны болмаса. Алла маған бақытты өмір сыйлады. Ұл-қыз өсірдім. Немере, шөбере сүю бақытына ие болдым. Айлин есімді тәп-тәтті шөберімнің қолынан күнде бір рет су ішпесем көңілім көншімейді. Немерем Нұрдәулетім менің жолымды ұстанып, аудандық ветеринария стансасында мал дәрігері болып қызмет етуде. Жаман емес, ұжымдастары алдында абыройлы. Кейде маған еркелеп, «ата мен сенің ізбасарыңмын» деп те мақтанып қояды. Ал мен болсам, Аллаға шүкір деп ұрпақтарымның тілеуін тілеп отырамын» дейді &nbsp;абыз аға.Иә, «Өмір – өзен» дейді. Міне, осы өзеннің ағысымен жүзіп келе жатқан ел ардақтысы Үміткәрім Досымов ағамыз бүгінде аудан орталығы Жосалы кентінде тұрады. Аудандық ардагерлер кеңесінің алқа мүшесі. Өңірде болып жатқан қоғамдық жұмыстардың белсенді мүшесі. Өзінің өнегелі өмір жолымен жастарды қолдап, оларға үлгі көрсетіп жүрген аға буын өкілдерінің бірі.

Үміткәрім Досымов: Мал шаруашылығы қазақтың басына біткен бақ

<a href="https://kyzylorda-news.kz/">Kyzylorda-news.kz.</a>&nbsp; Кілем үй ішіне сұлулық та, жылулық та сыйлайды. Жайсаң төсек, ілсең суреттей сыр ақтарып тұратын сиқыры бар. Қазір кілемнің түрі көп. Иран, Түрік елдерінен келген кілемдер көздің жауын алады.Бірақ көненің көзіндей болған өзіміздің түкті кілемді бүгінде пайдаланбайтын болдық. Ал қолөнер еңбегі мен нағыз түкті кілемнің қандай болатынын білетін шетелдіктер оны арнайы тапсырыспен кемі 600 мыңнан бастап 1 миллион теңгеден астам қаржыға сатып алады екен. Біз мұны Айдарлы ауылындағы кілемші Роза Әлбатырова ападан естідік. Айтуынша, алты жасынан бері кілем тоқуды анасы мен әжесінен үйренген.&nbsp;<blockquote>&nbsp;Менің заманымда бұл ауылда барлық қыз-келіншек осы өнерді меңгерген еді. Ал қазір бірте-бірте қалып барады. Әйелдердің басын қосып, ауыл әкімшілігінен көмек сұрап ұлттық дәстүрді жаңғыртып келемін. Өзім Қазақстан Шеберлер одағының мүшесімін. Түкті кілемнің қадірін қазір бағаламай отырмыз. Басқа елдерде оның бағасы өте қымбат. Жыл сайын Астанадағы ұлттық өнімдер жәрмеңкесіне қатысатынмын. Көрмеге келген итальяндық келіншекпен таныстым. Сол жерде менің тоқыған кілеміме тапсырыс беріп, біреуін сатып алды. Қазір 2х3 көлемді түкті кілем 600 мың теңге тұрады. Оның ішіне жіптің бағасы мен әйелдердің еңбегін қосыңыз. Екі айға жуық уақыт жұмсаймыз. Егер маған дәл қазір тапсырыс түсетін болса, ауылдағы келіншектерді жинап бірлесіп тоқып шығамыз. Көрші-көлемнің бәрі тоқиды. Өзімнің шәкірттерім бар. Олардың барлығы тақыр, түкті кілем тоқуды біледі. Бірақ тек түкті кілем тоқимыз, өйткені, қолдары соған қалыптасқан. Қазір жіп иіретіндер жоқ. Арнайы жіп иіріп беретін апаларымыз өмірден өтіп кетті. Менің қолымнан жіп иіру келмейді. Сондықтан дайынын Алматыдан сатып аламыз. Меринос қойдың жүнінен иірілген жіп жарамайды. Ол өте жұмсақ. Жіп иіретін арнайы құрылғыны Ресейден ғаламтор арқылы іздестіріп жатырмын. Егер сол құрылғыға қол жеткізсек, онда жіп мәселесі де шешімін табар еді. Себебі, жүн көп. Бірақ оның да қадірін білмейміз. Біздің кезімізде қойды үш рет тоғытып, содан кейін барып жүнін қырқатын. Қазір ұстап алады да айдалада топырақтың үстінде қырқа салады. Оны тазалау да мүмкін емес, жарамсыз, табиғи суға жуылмағасын иісі де кетпейді. Бұрын жүннің қиқымы да қалмайтын, – дейді кілемші.</blockquote>Қай кезде де табиғи, таза, қолдан жасалған бұйымға сұраныс жоғары. Шебер жіп мәселесі шешілсе, тапсырыс та көп болатынын айтады. Жетпіс жастағы Батыр ана Роза Әлбатырованың шәкірттері көп. Соның бірі немересі Ақмарал Бегалықызы М.Мәметова атындағы педагогикалық жоғары колледжін бітіріп, ауылда үйірме ашыпты. Ал 3 жасынан кілем тоқуды үйреніп келе жатқан Қырмызы Серікқызы атты немересі әжесінің жанынан бір елі қалмайды. Өзінің қызығушылығы да жоғары. Кілемнің үстінде аунап өскен Қырмызы қазір түкті кілемді қиналмай тоқиды.Тоқу ісінде қолданылатын станок қарапайым екен. Ол кілемнің көлеміне қарай жасалады. Тікелей ілінген жіп – арқау, жоғары-төмен түсіріп отыратын белдеу ағаш – адарғы аталады. Арқау жіптің астынан алынған өрмекті шатыс деп айтады, бұл арада бойлардың ерсісі мен қарсысы ауысып тоқылып отырады, яғни тоқыма жіпті күршекпен іліп алып, ортасынан өткізгенде өзінен-өзі байланып шығады. Жіпті кесіп алып, өрмектің үстіне тоқпақпен ұрып, арқау жіпке қысады. Кілемге салынатын ою-өрнекті қағазға салып алады да, ілмекті санап отырып, кілемге бейнені салып шығады. Осындай күрделі жұмыс процесімен бастан-аяқ танысқандықтан, тоқыма өнерінің ұқыптылыққа үйретіп, шыдамдылыққа баулитынына тағы бір рет көз жеткіздік.Ұлттық құндылықты насихаттап жүрген жандарға қолдау болса, қазақтың түкті кілемі экспортқа көптеп шығар еді.

Көненің көзіндей түкті кілем

<a href="https://kyzylorda-news.kz/">Kyzylorda-news.kz.</a> Қоғамдық көліктердің медициналық және техникалық әл-ауқаты тексерілді. Осылайша төтенше жағдай орын алған сәтте қандай қадамдар жасалу керектігі түсіндіріліп, пысықталды. Мамандар жүргізушілерге автобус тізгіндеп келе жатқанда ұялы телефонмен сөйлесуге, жолаушыларға дөрекілік танытуға болмайтындығы және әдеп ережелерін түсіндірді. Этикет аясында қызмет көрсету керектігін еске салды.&nbsp;Қала ішілік 18 бағыт бойынша автобустар жаңартылып, транспорттық жүйеге өзгерістер енгізілген. Әрине, таңмен таласып жұмысқа шығып, жол бойында жүретін жүргізушілердің жұмысы оңай деуге келмес. Сонда да әр жұмыстың өзінің талабы болады. Сондықтан қоғамдық көліктегі жүргізуші мен жолаушы арасындағы диалогты ретке келтіріліп, арнайы тәртіпке сай іс-әрекеттер жасау ұдайы түсіндіріліп келеді.&nbsp;Үлкен мән беретін жағдайлардың бірі – ол медициналық қобдишалар. Үлкен сыйымдылықтағы қоғамдық көліктердегі медициналық қобдишалар жаңартылған. Мысалы, автобус ішінде өзін жайсыз сезінген жолаушыға жедел жәрдем келгенше, алғашқы медициналық көмек көрсетіледі.&nbsp;Алдағы уақытта қызметкерлер үшін арнайы тренингтер өткізу жоспарлануда.

Қоғамдық көліктердің медициналық және техникалық әл-ауқаты тексерілді

<a href="https://kyzylorda-news.kz/">Kyzylorda-news.kz.</a> «Адамды адам еткен – еңбек» дегендей, бүгінгі қоғам кешегі еселі еңбек еткен тұлғалардың арқасында даму үстінде. Бүгін¬гі күні де тек еңбек арқылы адам көздеген мақсатына жетуде. Сондықтан қай қоғамда да еңбек еткеннің еңсесі биік. Міне, өткен ғасыр мен осы ғасыр еншісінде еңбек көрігін қыздырып, содан бақты тапқан жандардың қатарында Орынбасар Құланшиевтей ардақты азамат бар екені мәлім. Аптал азамат кісі тек еңбек еткен адамның ғана мерейі үстем болатынын айтады.Біз айтып отырған О.Құланшиев бүгінде 65 жаста екен. Ауыл шаруашылығы саласының майтплманы – ауданға қарасты С.Сейфуллин ауылының тумасы. Балалық балғын шағы сол елді мекеннің топырағында өткен. Ауылдағы №137 «1 Май» атындағы орта мектепте онжылдық білім алған. Ол кезеңде бүгінгідей мектеп бітірісімен оқуға түсіп кету деген жоқ. Ер жеткен жігіт, бойжеткен қыз болсын оқу оқимын дегенше совхозда жұмыс істейтін болған. Ондағысы – енді ғана үлкен өмірге қанат қаққан жастар еңбекпен есейсін, барлық нәрсе маңдай терге байланысты екенін ұғынсын деген қағида. Осы қағида негізінде Орынбасар аға совхозда механизатордың көмекшісі болып еңбек жолын бастайды.<blockquote>Ол кездегі ауылдың жағдайы белгілі. Барлық адам шаруашылықта еңбек етеді. Мектеп бітірген жылы менің де еңбек жолым елді мекендегі совхоз жұмысымен байланысты болды. Шаруашылықта егін егіледі, мал бағылады, оған қажетті шөп жиналады. Осы жұмыстар совхозда бар техникалармен атқарылады. Ал олардың бұзілмай жүруі механизаторға тікелей байланысты. Сондықтан ең алғаш механизатордың көмекшісі болғанымда ауыл шаруашылығы техникаларын жөндеу жұмыстарына араластым. Азды-көпті тәжірибе жинақтадым, – дейді еңбек адамы.</blockquote>Совхозда техника жөндеп, оны тізгіндеуге машықтана бастаған жас маман 1975 жылдың желтоқсан айында аудандық әскери комисса-риаттың шақырумен үш айлық автомектепте оқыған. Сол негізде жүргізуші куәлігін алған.Одан кейінгі жылдары Ресейдің Саратов облысында әскери міндетін өтеп келіп, аудан орталығында еңбекке қайта араласады. Өзі Орынбасар Құланшиевтің еңбек кітапшасында үш қана мекеменің атауы тұр. Оның біріншісінде 1978-1983 жылдар аралығында аудандық «Сельхозтехника» мекемесінде көлік жүргізуші болып жұмыс істеген. Ал 1997 жылға дейін Тереңөзек аудандық «АТП» мекемесінде көлік жүргізуші болған. Және де 2002-2021 жылдар аралығында «ҚОР» МК АҚ-да мұнай саласында еңбек етіп, осы жерден құрметті зейнет демалысына шыққан.<blockquote>Қазіргі уақытта ер мен әйелдің барлығы көлік тізгіндей береді. Бірақ біздің уақытта бүгінгідей жеңіл көліктердің түр-түрі болған жоқ. Барлық техника шаруашылық жұмысына қатысты болатын. Сондықтан ауыр техникаларды тізгіндеп, ас¬тық тасу, жем-шөп жеткізу жұмыстарын істедік. Шопырлық жұмысты өткен ғасырдың аяғына дейін атқардық. Ал жаңа ғасырдың бас кезінде мұнай саласына жұмыс ауыстырып, 20 жылдай еңбек еттім. Мұнда да негізгі қызметім техника саласына қатысты еді. Сол жастайымнан еңбекке араласып, білікті механизаторлардан үйренген, көрген тәжірибем өмірлік азық болды десем артық айтқандық емес. Содан соң мен қатарлы замандасымның барлығы осылай еңбек етті. Олардың қайсысы болсын қара жұмыстан қашқан емес, – дейді О.Құланшиев.</blockquote>Осы күні бейнетінің зейнетін көріп жүрген еңбек ардагері туралы замандастары өте жақсы пікірде. Көпшілік жақсы танитын Орынбасар аға туралы сұрай қалсаң барлығы еңбеккеш екенін айтады.<blockquote>Біз – замандаспыз. Жас кезімізден бірге араласып келеміз. Орекең жас кезінен еңбекқор. Өзі техника тізгінінде болса да жан-жағындағыларға қолғабыс етіп, қай жұмысыңды да істеп жүре береді. Сонысымен де елге сыйлы болды. Қазір Орекең зейнет демалысында болса да үйде жатқанды құп көрмейді. Еңбек етуге бейімделіп қалған адам тынымсыз болатыны анық. Бүгінде бақша дақылдарын бірге егіп, соның бап-күтімін жасап келеміз. Бұл тұрғыда да ол кісінің тәжірибесі мол. Орекең – жастарға үлгі ететін нағыз еңбек адамы, – дейді еңбек ардагері Әлібек Емжаров.</blockquote>Орынбасар аға Құланшиев көпжылғы бейнеті үшін екі рет Қызылорда облысы әкімінің Алғыс хатымен, «Қазақстан мұнайына – 120 жыл» мерекелік медалімен марапатталған.Ардақты аға жалағаштық Минут Қайбаровамен шаңырақ көтерген. Бүгінде Нұрбол, Марат, Әсел есімді ұл-қызды жетілдіріп, олардан немере сүйіп отыр. Ардақты ата, құрметті әке, қадірлі еңбек адамы ретінде көпшілік құрметіне бөленуде.&nbsp;

Интернеттегі алаяқтық: Алданбаудың жолы

<a href="https://kyzylorda-news.kz/">Kyzylorda-news.kz.</a>&nbsp; Осыдан 2 жыл бұрын &nbsp;«Қазақстан дауысы» мегажобасында жеңімпаз атанып, Аманкелді ауылының атын аспаннан бір-ақ шығарған әнші, жерлесіміз Құралай Мейрамбек әлем сахнасын бағындырып, өнерімен халықаралық байқау шыңын бағындырды. «Славян базары» байқауында беларусь халқының «Рэчанька» әнін орындаған жерлесіміз үшінші орынды қанжығаға байлады.Екі күндік байқау нәтижесінде армениялық өнерпаз Маша Мнджоян бас жүлде алса, бірінші орын беларусь Самир Елчиевке берілді. Екінші орынды ресейлік Елизавета Слышкина мен италиялық Agape бөлісті. Үшінші орынды қазақстандық Құралай Мейрамбек және өзбекстандық Малика Хакимова иеленді.Өз кезегінде аудан әкімі Берік Сәрменбаев жас әншіні кезекті жүлдесімен "фейсбук" әлеуметтік желісіндегі &nbsp;ресми парақшасында құттықтады.&nbsp;<blockquote>– Қобыз үнін күмбірлеткен жас әнші, жерлесіміз Құралай Мейрамбек Беларусия Мемлекетінің Витебск қаласында өткен “Славян базары” Халықаралық байқауында жүлде алып, ел мерейін үстем етті. Талантты әншіге шалқар шабыт, шығармашылық табыс, сәттілік тілеймін, – деді аудан басшысы.</blockquote>«Өнерге деген махаббатым 5 жасымнан басталды. Содан бері ән шырқап, қазақ өнерін шетелге танытуды мақсат еттім. Сол жолда аянбай еңбек ете беремін» деген еді Сыр елінің мақтанышына айналған қобыз үнді әнші қыз Құралай бізбен бір сұхбатында. Міне, алдына осылай мақсат қойған жас әнші кезекті шыңын бағындырып отыр. «Құрметті қазақ елім! Байқауда қолдап, жанкүйер болған баршаңызға мың алғыс! Алла қаласа әлі талай көк туымды әлемде көкте желбірететін боламын» деп жазды ол әлеуметтік желідегі жеке парақшасында. Біз де жерлесіміздің әлі талай шыңды бағындыратынына үлкен сенім білдіреміз. Сондай-ақ Сыр елі талант пен дарын иесі Құралай Мейрамбекке әркез тілектес. Қазақтың бұлбұл қыздарының, қайсар рухты аруларының ізін жалғап, аудан, облыс, республика атын үлкен сахналарда әуелетіп жүрген жас әншіге шығармашылық табыс тілейміз.Аудан жастарының көшбасшысы, аудандық мәслихат депутаты &nbsp;Нұрман Абдрасилов жерлесімізді алғашқылардың бірі құттықтады.<blockquote>– &nbsp;Сен мықтысың, Құралай! Миллиондаған жанкүйерді жинап үлгерген, қазақ елінің атын күллі әлемге танытатын Құралай Мейрамбекке сенім артамыз! Сырдария жастары әлі-ақ әлемді мойындатады. Жерлесіміз бұған дейін әлемдік деңгейде байқаулардан топ жарып жүр. Оның отбасы мүшелері де, музыка өнерімен біте қайнасқан. Әкесі Мейрамбек, қос әпкесі Гүлзат пен Ұлпан күміс-көмей әншілер, – деді Нұрман Абдрасилов.</blockquote>

Сырдариялық әнші «Славян базары» байқауында ел намысын қорғады

<a href="https://kyzylorda-news.kz/">Kyzylorda-news.kz.</a>&nbsp; Тереңөзек кентінің шеткі аймақтарында да жоспарлы жұмыстар жүзеге асырылады. Бұл туралы аудан әкімі Берік Сәрменбаев Тереңөзек кентінің клубында болған жиында айтты.<blockquote>- Тереңөзек кенті күн санап өсіп, кеңейіп, қанат жайып келеді. Жаңадан құрылыс аймақтары, жаңа көшелер ашылуда. Бұған дейін өз алдына ауылдық округ болған О.Мәлібаев елді мекені қазіргі таңда Тереңөзек кентінің бір бөлігі болып отыр. Жаңа жобалар іске асырылып, елді мекен толық көгілдір отынға қосылды, ауыз сумен қамтылды. Биылғы жылы Қ.Бөдеев пен Б.Өтепов, Айтбай арық көшелері жөндеуден өтті. Ендігі кезекте Т.Қозыбаев көшесі жөндеуден өтеді деп жоспарлап отырмыз. Ал О.Мәлібаев көшесіне қосымша жобасына өзгерістер енгізіліп, алдағы қаржы бөлу мақсатында бюджеттік комиссияға ұсынылып отыр. Сонымен қатар тұрғындардың сұрауы бойынша демеушілік көздерімен ойын алаңын салуды да қарастырудамыз,-деді аудан басшысы.</blockquote>Жоспарға сәйкес, аудан әкімдігімен бұл елді мекенде жаңадан балабақша құрылысын салу мен мәдениет үйінің жобасын дайындау ұсынылып отыр.Жиын соңында аталған елді мекеннің мәдениет ошағында "Күмбірле киелі домбыра" атты концерттік бағдарлама болып, өнерпаздар әннен шашу шашып, көрермендерге көтеріңкі көңіл-күй сылады.

 Тереңөзек кентінің шеткі аймақтарында да жоспарлы жұмыстар жүзеге асырылады

<a href="https://kyzylorda-news.kz/ru">Kyzylorda-news.kz.</a> Қан тапсыру акциясына Шиелі ауданы әкімі Нұржан Сәбитұлы Ахатов, аудандық мәслихат төрағасы Айтбай Жандарбеков және ауыл әкімдері, мекеме басшылары мен қызметкерлері, бас аяғы 80-нен астам ерікті қатысты.Алдымен, ақ халатты абзал жандар ерікті түрде қан тапсырушы азаматтардың денсаулық жағдайын жан-жақты тексерді. Содан соң керекті мөлшерде қан алынып, артынша азаматтарға шай мен тәттілер ұсынылды.Аудан әкімі "Қан тапсыру акциясының көмегімен қанға мұқтаж бір азаматтың болсын өмірін арашалап қалуға көмегіміз тисе, бізге содан асқан бақыт жоқ. Бүгін қан тапсыруға өз еріктеріңізбен келіп отырғандарыңызға алғысым шексіз", - деп барша ерікті азаматтарға алғысын айтты.Мамандардың айтуынша, жаз маусымында донор қатары азаятын көрінеді. &nbsp;Сондықтан қанға мұқтаж науқастарға аудан тұрғындарының қолдауы ауадай қажет.&nbsp;Жалпы, 18 жастан асқан денсаулығы дұрыс, қайырымды, ең бастысы адам өмірін сақтап қалуға көмегін беруге дайын кез келген азамат донор ретінде қан тапсырып, дәрігерлерден кеңес ала алады. Қан құю арқылы ғана өмірді сақтап қалуға болатын ауру түрі өте көп. Бұған гемофилия, қан аздығы, бауыр қатерлі ісігі пен күйік алу т.б. дерттерді қосуға болады. Аяқасты апат жағдайында немесе күрделі операция кезінде донор қанын құю қажеттілігі де жиі кездеседі. Әсіресе, донор қаны босанған ананың өмірін сақтап қалуға өте жиі қажет.

Шиеліде ауқымды қан тапсыру акциясы өтті

<a href="https://kyzylorda-news.kz/ru">Kyzylorda-news.kz.</a> Таяуда Шиелі ауданының 95 жылдығына орай орталық кітапханада тағылымға толы шара ұйымдастырылды.«Еңбегіміз еселі, жасампаз жарқын – Шиелі» деп аталған кітап көрмесіне аудан әкімінің орынбасары Алмат Алдабергенов арнайы барып, кітап сүйер қауыммен кездесті.Көрмеде Шиелі ауданының бай тарихынан сыр шертетін туындылар мен өлкеден шыққан атақты жазушылардың таңдаулы туындылары таныстырылды.<blockquote>– Баршаңызды ақ маржандай күрішімен, қазыналы қойнауымен, нар тұлғаларымен шоқтығы биік – Шиелі ауданының 95 жылдық мерейтойымен құттықтаймын! Кітап адам баласының сан ғасырлық ақыл-ойының жемісі, тарихы мен тағылымының алтын сандығы. Сондықтан қандай замандар болмасын кітаптың оқырмандары әрдайым арта береді деп сенемін. Бүгін міне, мерейтой қарсаңында Шиелі ауданының тарихынан сыр шертетін, осынау киелі мекеннен шыққан жазушылардың туындыларынан жинақталған кітап көрмесі ұйымдастырылып отыр. Көрменің мақсаты – Шиелі ауданының бай тарихын дәріптеу, ауданымыздан шыққан жазушылардың еңбектерін қалың көпшілікке таныстыру болып табылады. Мерейтой аясында осындай рухани, таным көкжиегімізді арттыратын көрмелер мен жиындар алдағы уақытта да көптеп ұйымдастырылатын болады. Барлығыңызды сол шараларға белсене қатысуға шақырамын! – деді аудан әкімінің орынбасары.</blockquote>

Шиелі ауданының 95 жылдығына орай кітап көрмесі өтті

<a href="https://kyzylorda-news.kz/">Kyzylorda-news.kz.</a> Арал десе, біріншіден, адамның көз алдына балық пен тұздың келетіні анық. Негізгі қыр беттегі ауылдардың тіршілігінің басты көзі – мал шаруашылығы. Теңізге жақын тұрғындардың атакәсібі – балық аулау.Айтпақшы, былтыр ғана Арал қаласының іргетасы қаланып, қала болып құрылғанына 95 жыл толған. Мерейтойда балаларға арналған екі ойын-сауық орталығы ашылып, демеушілер есебінген 6 ойын алаңының құрылысы жүрді. Сондай-ақ, Атанши, Тоқабай, Жақсықылыш, Бөген және аудан орталығынан 5 балабақша салынды. «Балықшылар аллеясы» ашылып, пандемия кесірінен екі жыл өтпеген балықшылар слеті және Волга бойындағы халыққа 14 вагон балық жөнелткен қайырымды іске 100 жыл толуына орай үлкен мәдени іс-шараны да бірге қамтығаны бар.Біздің жұрттың өзгенің қиындығына қол созуға бел шеше кірісетіні баршаға белгілі. Аштықтың қиын кезеңінде Арал балықшылары Волга өзенінің жағалауындағы халыққа 14 вагон балық жөнелткенінің өзі үлкен тарих. Сол балықшы аталармен бірге қырда мал бағып, төрт түлікті көбейткендер де жетерлік. Ауданның 16 еңбеккері осылайша Социалистік Еңбек Ері атанды. Ұлы Отан соғысында ерлік көрсеткен батырлардың есімі ұмытылмайды. Ал тарихты тым әріге шегіндірсек, белгілі тұлғалар жетерлік. Бұл – Жанқожа батыр, Нұртуған жырау, Сартай мен Жетес бидің туған топырағы. Екіншіден, республика және шетелдерге аты танылған азаматтардың туған өлкесі. Халық жазушысы Әбдіжәміл Нұрпейісов, ақын Зейнолла Шүкіров, тұңғыш Премьер-министр Ұзақбай Қараманов, өнер майталманы Құдайберген Сұлтанбаев шыққан қасиетті жер. Жалғыз қазақ емес, 12 ұлт өкілі тізе қосып, тіршілік еткен, бауырмалдықтың ұясы болған аудан.Балықтан басқаға да басымдық бергенБылтыр ауданға 16,7 млрд теңге көлемінде инвестиция тартылған. Оның жартысынан астамы – жеке сектордың қаражаты. «2021-2025 жылдарға арналған индустриялық дамудың тұжырымдамасы» аясында құны 168,7 млрд теңгені құрайтын, іске қосылғанда 1303 адамды жұмыспен қамтитын 9 жоба енгізілген еді. Қазір бұның ішінде жалпы құны 3,6 млрд теңге болатын 2 жоба іске қосылған. Онда 268 адам жұмыс істейді.Индустрияландыру картасына қосымша 6 жобаны енгізу жоспарланған. Олар – &nbsp;«Қап шығару», «Құрғақ құрылыс ұнтақтарын өндіру», «Мал бордақылау алаңы және шұжық өндіру цехын ашу» «Профлист өндірісі», «Түйе сүтінен құрғақ ұнтақ дайындау» &nbsp;және «Тұрмыстық қатты қалдықтарды қайта өңдеу, төсеме тастар (брусчатка) өндірісі» жобасы. Сонымен қатар, биыл бюджет қаражатының өзінен 15,7 млрд теңгеге жуық қаржыға 23 әлеуметтік және инженерлік инфрақұрылым жобасы іске асырылмақ. Осы игі істердің арқасында кейінгі 5 ай көлемінде ауданға 4,9 млрд теңге инвестиция тартылғаны белгілі болып отыр.Айтып отырған жобалардың барлығы теңізді өлкеде бұрын болмаған. Мал бағу мен балық аулауды кәсіп еткен жұртқа осы бастамалар үлкен қолдау болғалы тұр. Жұмыс көзі көптеп ашылып, аудан халқының ахуалына оң әсерін тигізері сөзсіз. Кәсіпкерлік саласында Арал ауданы бойынша 6654 шағын және орта кәсіпкерлік субъектісі тіркелген. Ал жалпы тіркелген кәсіпкерліктің ішінен жұмыс &nbsp;жасап тұрғандарының үлесі 94,9 пайыз.Құрылыс һәм инфрақұрылымАуданда жаңадан салынып жатқан ірі құрылыс нысандары жеткілікті. Су жүйесін жаңарту, электр желілерін ауыстыру, кварталішілік газ құбырларын тарту және ауызсу жүйесімен қамту сынды жұмыстардан бөлек ауқымды істер бар. &nbsp;Мысалы, жақында ғана «Бөген» мен «Қызылжар» елді мекенінде дәрігерлік амбулатория құрылысы басталды. «Сексеуіл» кентінде 40 орындық ауылдық аурухана жұмысы қайтадан жанданды. Сондай-ақ биыл ауданда 600 және 300 орындық мектеп салынуы жоспарланған.Автомобиль жолдарын жақсарту мақсатында биыл 4,4 млрд теңге бөлінген. «Нұрлы жол» мемлекеттік бағдарламасы аясында аудандық маңызы бар 10 бағыттағы &nbsp;жол орташа жөндеуден өтуде. Олар – аудандық &nbsp;маңызы &nbsp;бар «Самара-Шымкент-Қамыстыбас-Аманөткел-Жаңақұрылыс», «Қызылжар-Шөмішкөл», «Сазды елді мекеніне кіреберіс», &nbsp;«Бөген-Ақлақ», &nbsp;«Қаратерең-Жаңақұрылыс», «Қызылжар елді &nbsp;мекеніне кіреберіс», &nbsp;«Самара-Шымкент-Бекбауыл», «Аққұлақ елді мекеніне кіреберіс», «Самара-Шымкент-Жақсықылыш-Тоқабай-Абай» және «Жаңақұрылыс-Бекарыстан би» жолы. Бұлар жөндеуден толық өтсе, аудандағы жақсы жағдайдағы &nbsp;автомобиль жолдарының үлесін 64-тен 80 пайызға дейін жеткізуге &nbsp;мүмкіндік тумақ.Сондай-ақ «Ауыл – ел бесігі» бағдарламасы аясында Сексеуіл кентіндегі №231 мектептен теміржол өткеліне дейінгі автожол орташа жөндеуден өтсе, оған қоса осындағы ұзындығы 5,5 шақырымды құрайтын 6 көшені жөндеу жалғасуда. Ал «Аманөткел» елді мекенінде ұзындығы 3,4 шақырым болатын 3 көше биыл жөндеуден өтті.Егін – елдің ризығыМал қайырып, теңізден маржан сүзген мұндағы ағайын егін егуге де ерінбейді. «Батыс Қытай-Батыс Еуропа» автобаны бойындағы Ақбай ауылының тұрғындары еккен қауын-қарбыздың дәмі көпшілікке белгілі. Ал кейінгі жылдары осындай үрдісті өзге ауыл диқандары да жалғастырып жүр.Биыл аудандағы егін көлемі екі есеге ұлғайып, 1500 гектар жер дайындалған. Былтыр Аралда 704,2 гектар егін егілген. Қазір суды үнемдеу, тиімді пайдалану мақсатында ауданның шаруа қожалықтары тамшылатып және жаңбырлатып суару әдістерін қолдануда.Аралдық шаруалар 21 гектар картоп, 87 гектар көкөніс, 342 гектар бақша, 700 гектарға жуық ескі және жаңа жоңышқа, сондай-ақ 352 гектар басқа дақыл түрлерін еккен. Облыс әкімінің тапсырмасымен жеке тұрғындарға бақшалық жер беріліпті. Қазір 76 гектар жерде 120-дан астам аудан тұрғыны түрлі егіс дақылдарын күтіп-баптап жүр.Ал диқандардың өнімін сату және сақтауда кәсіпкер С.Саяновтың &nbsp;сыйымдылығы 400 тоннаны құрайтын қоймасы бар. Бұған қоса ауданда сыйымдылығы мың тоннаны құрайтын қойманың құрылысы жүргізілуде.Арал балығы әлем елдеріндеОсыдан 50-60 жыл бұрын Арал жағасында балық аулау кәсібіне байланысты 2 комбинат, 10 зауыт, 70-ке жуық балық қабылдау бекеті болғанын кейінгілер білмеуі мүмкін. Қолда бар мәліметке сүйенсек, теңізден 30-дан аса балық түрі ауланыпты. Бүгінде қарасы көрінбейтін бекіре де осы теңізде ойнақ салды. «Қызыл кітапқа» енген қаяз, салмағы кішігірім тайыншадай ірі жайын да осында жүзді. Ақбалық, сазан, мөңке, шабақ, дөңмаңдай, шортан, торта мен тыран, алабұға сияқты түрлері тіпті мол болыпты. Бүгінде теңіз жағалай отырған көп ауылдың тілімен айтсақ, «алтын балық» саналатын, бағасы да құнды, Еуропаға бірден-бір экспортталып отырған тісті де –Аралдың бір байлығы.Арал теңізі балықшыларына қатысты мынадай бір ереже бар. Мұнда балық аулау уақыты әр жылдың шілде айынан басталады. Келесі жылдың дәл осы айына дейін белгілі бір лимит бойынша балықшылар қайық есіп, ау салып жүр. Әрине, бір жыл ішінде балық қорының табиғи көбеюі үшін уылдырық шашу уақытында теңіз не дария бетіне бірде-бір балықшы жоламауы тиіс.Қазір Аралда балық шаруашылығын дамыту шаралары қарқынды &nbsp;жүруде. Кезінде тасыған теңізде балық зауыты мен комбинаты көп болды дедік. Қазір де жоқ емес. Аралда 9 балық өңдеу зауыты бар. Бұлардың жылдық қуаты 24 мың тоннаға жуықтайды. Қосымша қуаттылығы 1,8 мың тонна болатын 12 цех бар, 31 балықшылар бригадасында барлығы 1426 адам жұмыс атқарады.Биылғы маусымда 3,4 мың тонна балық ауланып, 1,1 мың тоннасы &nbsp;өңделген. Оның 1 мың тоннаға жуығы экспортқа &nbsp;шығарылыпты. Айта кетейік, Аралдан шыққан балық Ресей, Польша, Әзербайжан, Германия, Грузия, Нидерланды, Венгрия мемлекеттеріне жөнелтілуде.Сонымен &nbsp;қатар, балық өсіру &nbsp;қолға &nbsp;алынып, ауданда 7 тоған &nbsp;ашу &nbsp;жоспарланған. Былтыр оның 3-і іске қосылып, 13 адам жұмыспен қамтылды. Мысалы, кәсіпкер Аманкелді Есімовтің «Жаңақұрылыс» ауылдық округіндегі тоғанда балық өсіру жобасы. «Ақбөгет» балық тоғанының жер көлемі 100 гектар, ал тоғанның өз көлемі 56 гектар. Көл тоғанынан бөлек, қолдан өсіретін &nbsp;екі балық тоғаны да бар. «Қарақұм» ауылдық округі бойынша Шалғынбай Алматбаев, «Бекбауыл» елді мекенінен Фарида Қарақұлова және «Қарашалаң» ауылынан Қанат Қарагенеев балық өсіру тоғанын құрып, өңірдегі осы салаға дем беріп жүр. Алдағы уақытта «Қаратерең» елді мекенінің тұрғыны Ә.Жанайбековке «Жарықкөл» маңынан қолдан балық өсіру тоғанын құру бағытында жер учаскесі табысталып, тиісті жұмыстар жүргізу жоспарланған.

Аралда берекелі тірлік бар

<a href="https://kyzylorda-news.kz/ru">Kyzylorda-news.kz.</a> Ауданда шешімін таппай тұрған немесе шешілуі керек өткір де өзекті мәселелер жоқ емес. Ал бұл маңызды істердің атқарылуына, түйінінің тарқатылуына мұрындық бола алатын кәсіби деңгейдегі парасат-пайым иелері – депутаттар екені баршамызға мәлім. Біздің арамызда да тұрғындардың өзі сайлап алған, аз ғана уақыт ішінде халықтың сенім үдесінен шығып үлгерген жандар бар. Солардың бірі – «Арман» мәдениет үйінің директоры, аудандық мәслихат депутаты Нұргүл Шәлекеева. Біз жаны нәзік болса да, көптеген істі атқарып, ел алғысын алып жүрген жанмен әңгіме өрбіттік.– Нұргүл ханым, сұхбатымызды бастамас бұрын әуелі өзіңіз жайлы аз-кем айтып өтсеңіз?– Сұхбатқа шақырғаныңызға рақмет! Мен, 1985 жылы 15 шілдеде дүние дидарына келгенмін. Үйдің тұңғышымын. Қарапайым отбасында өстім. 1992 жылы №45 Ақ орда мектеп-гимназиясының табалдырығын аттап, сол жерде білім алып, 2003 жылы мектепті тәмамдадым. Мектеп бітірген соң, Қызылорда қаласындағы бұрынғы Қорқыт ата атындағы Қызылорда мемлекеттік университетінің «Физика және математика» факультетінің «Еңбек технологиясы және кәсіпкерлік &nbsp;мұғалімі» мамандығын үздік дипломмен аяқтадым. Қолыма диплом алған соң, алғашқы еңбек жолымды өзім оқыған мектептен бастадым. Міне, содан бері басқа қалаға бармай, ауданымыздың дамуы үшін қолымнан келгенше қызмет етудемін. 2012 жылдан бастап «Арман» мәдениет үйінде жұмыс істеп келемін.– Керемет! Енді сайлауалды бағдарламаңызға кішігірім тоқталып өтсеңіз…– Әрбір депутат – халықтың сенімінен шығу үшін барын салады деп ойлаймын. Мен де өз сайлауалды бағдарламамда шешілуі тиіс бірқатар маңызы бар істерге тоқталдым. Солардың бірі – 2024-2025 жылдар аралығында №4 «Әл-Фараби» сайлау округіне қарасты аумақты электрмен жабдықтау желілерін реконструкциялауға ықпал ету. Сондай-ақ сайлау округіне қарасты аумақтарда аяқ су мәселесінің шешімін табу да ¬жоспарда бар. Бұдан бөлек, Шиелі кентінде орталықтандырылған кәріз су жүйелерін жүргізуге, әлеуметтік және инженерлік инфрақұрылым нысандарына қол жеткізуге, сайлау округіне қарасты аумақтарға жаяу жүргіншілер жолдары, көше шамдары, жолдарды жөндеу жұмыстарына ықпал жасауды да назардан тыс қалдырған жоқпын. Ал сайлауалды бағдарламаммен әрбір тұрғын әлеуметтік парақшамнан немесе басқа да ақпарат құралдарынан оқып танысты деп ойлаймын.– Жалпы сізді аудан тұрғындары өнер адамы ретінде таниды. Оның үстіне сізді үнемі белсенді ортадан кездестіреміз. Өтімді – ой, өрнекті – сөз айтасыз. Бәлкім, бұл қасиетіңіз біреуге ұқсаған шығар?– Мүмкін. Жалпы адамға қасиетті әуелі Алла, одан кейін ата-ана, мектеп, ұжым үйретеді деп ойлаймын. Мектеп демекші, &nbsp;бұрын &nbsp;оқушы кезімде сынып жетекшім: «Менің Нұргүлім жер қозғалса да қозғалмайды» деп әзілдейтін. Бұлай айтқаны – мені барынша сабырлы дегісі келгені шығар. Ал қазір бәрі басқа. Жұмыс, қарбалас өмір болғандықтан, кішкене сабырсызданып кететінім бар. Барлығына жауапкершілікпен қарағандықтан, бәрінің тиянақты, ойымдағыдай болғанын қалаймын. Әрдайым жаңашылдық іздеймін. Жұмыста да іс-шараларды барған саяхатымнан, өзге елдердегідей етіп, қазақы менталитетке салып өзгертуге тырысамын. Бәлкім бұл да бір қасиет шығар?!&nbsp;– Бүгінгінің депутаты қандай болу керек? Депутат мандаты сіз үшін нені білдіреді?– Депутаттық мандат – үлкен жауапкершілікке жетелейді. Жалпы депутат болу үшін – әділдік, іскерлік, адамгершілік қасиеттер жоғары болу керек деп ойлаймын.Ең бастысы – өзіңе жүктелген міндетті сезініп, оны ойдағыдай алып шығу керек.&nbsp;– Өз аймағыңыздың тұрғындарымен жиі кездесесіз бе? Мұндай кездесуде тұрғындар көбіне қандай мәселені жиі қозғайды?– Бүгінге дейін екі рет қабылдау жүргіздім. Бірінші қабылдау – «Аманат» партиясының ғимаратында өтті. Екінші қабылдау – шілде айының төртінші жұлдызында аудандық мәслихат ғимаратында өтті. Тұрғындар көбінесе денсаулық мәселесін жиі қозғайды. Сонымен қатар, көбісі мүгедектікке байланысты мәселенің шешілуін сұрайды. Халықтың ішінде тұрғын үй мәселесін де қозғап келетіндер баршылық. Бұдан бөлек, жеке бас жұмысын айтып, шағымданатындар да жоқ емес. Әрине, депутат – бұқара мен билік арасындағы алтын көпір болғандықтан, мәселелердің шешімін табуға күш саламыз.&nbsp;– Жалпы сіз депутат болып сайланғалы да төрт айға таяп қалыпты. Осы уақыт аралығында халықтың игілігі үшін қандай тындырымды тірліктер атқарып үлгердіңіз? Нендей мәселелер шешімін тапты?– Әрине, осы төрт айдың ішінде көп нәрсені тындырып тастадым деп айта алмаймын. Дегенмен қолымнан келгенше біршама мәселелердің шешілуіне атсалысып жүрмін. Өзіңіз білетіндей, жол мәселесі – бүгінгі тұрғындардың үлкен мәселесіне айналып отыр. Депутат болып, өзіме жауапкершілік алғалы қазіргі таңда Мырзахметов, Иманбеков, Базарбаев, Едігеев, Ердешбаев, Нұртазаев көшелеріне асфальт салынып жатыр. Мұның өзі мен үшін – үлкен жетістік. Ал алдағы уақытта әл-Фараби, Досбол Датқа, Дәулеткерей, А.Байтұрсынов, Ы.Жақаев, Абылай хан, Шәкәрім көшелерінің күрделі жөндеу жұмыстарына жоба-сметалық құжаттамасы жасақталып, мемлекеттік сараптаманың оң қорытындысын алды.&nbsp;– Елімізде халықтың мұңын тыңдап, бұқараның базынасына құлақ түріп жүрген әйелдердің саусақпен санарлық екенін беске білеміз. Ал біздің өңірде дәл қазіргі уақытта мандаттық міндетін атқарып, халық үшін аянбай еңбектеніп жүрген жалғыз іскер әйел ол – сіз. Айтыңызшы, жаныңыз нәзік болса да, мықты болуыңыздың себебі неде? Іскер әйел болудың қиындығы бар ма?&nbsp;– Әрине, 14 депутаттың ішінде жалғыз әйел адам болып жұмыс істеу – алғашында оңайға соққан жоқ. Мүмкін бұл іс маған үлкен тәжірибе алып келетіндіктен берілген шығар. Бастапқыда үйренісе алмадым. Ал қазір бәрі оңай әрі жеңіл. Іскер әйел болу үшін – бақытты әйел болу қажет. Оның барлығы маған отбасымнан келетін үлкен күш. Мен шабытты ет жақындарымнан аламын. Сондықтан жұмысымды да жеңіл, еш қиындықсыз атқарамын.– Әдемі әңгімеңізге рақмет!

Қазақстан және Қызылорда облысының жаңалықтары