<a href="https://kyzylorda-news.kz/">Kyzylorda-news.kz.</a> Қазалы ауданы бойынша білім бөлімінің ұйымдастыруымен 1 маусым – Халықаралық балаларды қорғау күніне арналған «Музыка әлемі» атты аудандық ән байқауының ақтық кезеңі өтті. Сайыста ән әлеміне қанат қағып, өнер өлкесінде өзіндік орын қалдыруға бет алған балғындар тыңдарман жүрегіне жол табуға тырысты.&nbsp;Байқаудың аймақтық іріктеу кезеңінен іркілмей өткен 13 талапкер бақ сынады. Қорытындысына сәйкес, бағы мен бабы қатар шапқан №100 орта мектептің 6-сынып оқушысы Дәрменова Ырысалды бірінші орынды жеңіп алды. Сондай-ақ, Жамбыл Жабаев атындағы №234 орта мектептің 6-сынып оқушысы Жеткербай Минура мен №97 орта мектептің 5-сынып оқушысы Баймұрат Кәусар екінші орынды місе тұтса, №182 орта мектептің 4-сынып оқушысы Қалдыбек Қарақат пен №225 орта мектептің 5-сынып оқушысы Алданбай Нұрмұхаммед үшінші орынды бөліске салды.&nbsp;Байқауда жеңіске деген жігері үшін Қалжан Нұрмаханов атындағы №95 орта мектептің 2- сынып оқушысы Оңталап Әмина, Сәкен Сейфуллин атындағы №165 орта мектептің 5-сынып оқушысы Қыпшақбай Мерей, Ғани Мұратбаев атындағы №17 орта мектептің 5-сынып оқушысы Қанибай Нұрдаулет алғыс хатпен марапатталды.

Қазалыда «Музыка әлемі» мәресіне жетті

<a href="https://kyzylorda-news.kz/">Kyzylorda-news.kz.</a> Жер бетінде ең көп тараған ауру түрлерінің қатарына буын аурулары да жатады. Дүниежүзілік денсаулық сақтау ұйымының мәліметіне жүгінсек, әлемдегі адамзаттың әрбір үшіншісі буыннан зардап шегуде. Алдын алмаса, соңы мүгедектікке соқтыратын қауіптің қарқындауына себеп не?Буын ауруларының түрлері қандай? Аурудың алдын алу үшін не істемек керек? Осы және тақырып турасындағы өзге де сұрақтарды Қазалы аудандық емханасының ревматолог дәрігері Жанар Қожағұловадан сұрап, білдік.– Жанар Жаңабергенқызы, буын аурулары біртіндеп дендейтін ауру түріне жатады. Көзге көрінбейтін өзгерісті алғаш қалай байқауға болады? Жалпы, буынның ағзадағы қызметі туралы айтып өтсеңіз…– Буын сүйектердің ағзадағы бір-бірімен байланысатын басты жері. Буынның бұзылысы әдетте қалыпты қозғалысқа кедергісін келтіріп, қиындық тудырады. Буын ауруының белгілеріне қозғалыс қиындауынан өзге қызу қимылдаған уақытта аурудың қозуы, ісініп қызаруы, температура көтеріліп, асқа тәбет жоғалуы, таңертең тұрғанда, буындардың қақсауы, әлсіздік, дене салмағы азаюы, бұлшық еттер ісініп, буындар қара, қызыл түске енуін жатқызуға болады.Қазір бұл сала зерттелген. Жағдайы мен салдарына орай түрліше жіктеледі, топтастырылады. Оларға нақты мына нәрсе себеп болады деп дөп басып айту қиын. Мәселен, буындардағы шеміршекаралық майдың таусылуы, сүйектердің қисық бітуі, жарақат салдарынан сынған сүйектердің дұрыс бітпеуі, ревмотологиялық аурулар негіз болуы мүмкін. Артық салмақ және шамадан тыс желінген ас, тұтынатын су сапасыздығы да ауруға соқтыруға себеп бола алады.Аяқтың ауруы, қолдың қақсауын салқын тигенге балап, дер кезенде мән бермей жүретіндер қатары қалың. Немқұрайлық салдары неге ұшырататынын көбі біле бермейді. Сондықтан уақытылы тесеруден өту кез-келген адамның ертеңгі күніне септесетінін айтудан жалықпаймыз.– Статистикаға жүгінсек, бұл аурумен ересек адамдардың 50 проценті ауыратын көрінеді. Сіз айтып отырған тексеруден өткен тексерілушілердің үштен бір бөлігі буындардың қатты ауырғанынан және олардың ісінуінен, қисаюынан зардап шеккенін айтып шағымданады екен. Бұрын бұндай белгілер үлкендерге тән болатын. Қазіргі жағдай қандай?– Оныңыз рас. Буын аурулары бейжайлықты көтермейді. Қазір ауру түрлері жасарып келеді. Осыдан бірнеше жыл бұрын үлкендер шағымданса, соңғы кезде жасы жиырмадан асқан жандардың арасында да белең ала бастады.Мәселен, остеоартроз, коксартроз, остеохондроз секілді аурулар кезінде адамның жүруі қиындайды. Жамбас, тізе буындағы буынаралық шеміршек майы азайып, қос сүйек бір-біріне қажалады. Алғашқыда аздаған ауырсыну еленбегенімен, кейде ауыр жұмыс істегенде, көп жүргенде, бір жерде ұзақ отырғанда, баспалдақпен жоғары көтерілгенде, сырқырап, бел мен жамбас сүйектерде ауырсынулар болады. Бірақ демалғаннан кейін, ауырғаны басылады. Сүйектер қажалған сайын ауырсыну күшейіп, адам тізесін бүге алмайды, ақсаңдайды. Бірте-бірте ауру үдеп, тіпті қарыс қадам жүрудің өзі мұңға айналады. Өкініштісі, аурудың соңғы сатысында дәрі-дәрмек те, жақпа май да көмектеспей, буын ауыстыру, яғни эндопротез салдыруға апарады.– Сандарды сөйлетсек…– 2019 жылы бізге 608 науқас тіркелсе, 2020 жылы – 654, 2021 жылы 681 адам есепке алынған.Остеоартроз ауры көп таралған. Ол жастар арасында да жиі кездеседі. Ревмотойдты артрит екінші орында. Сондай-ақ жүйелі қызыл жегі (СКВ), жүйелі склеродермия (ССД), дерматомиозит, анкилоздаушы спондилоартрит (Бехтерев ауруы) бар.Жыл басынан бері 88 адам жалпы ем алса, 48 науқас күндізгі бөлім қызметін тұтынды. 40 емделуші ауруханаға жатты. Жыл санап еліміздегі басты орталықтарға тексерілу, емделу аясы ауқымын кеңітіп келеді. Бұл бізге белгілісі. Ал өздігінен ем қабылдап жүргендері қаншама.– Буын ауырмас үшін оның алдын алу және бастапқы сатысында қандай қарапайым ережелерді қолданған дұрыс?– Буын ауруынан құлан-таза айығып кету қиын. Бірақ сырқатқа шалдыққан адамдар барынша ауыр салмақты зат көтермей, биік өкшелі аяқ киімнен бас тартып, тым ұзақ жаяу жүрмеуге мейлінше көңіл бөлгені дұрыс. Басты ескеретін нәрсе, дұрыс тамақтану. Мәселен, тәтті бұрыш, сарымсақ пен пияз, шпинат пен ақжелек секілді көкөністер буынға өте пайдалы. Буынға ыстық басу да зиян. Егер қабынған болса, кері әсерін тигізуі мүмкін. Салауатты өмір салтын ұстану буын ауруларының алдын алуға көмектеседі. Әрдайым жаттығулар жасап, рационыңызға табиғи нәрлі тағамдарды қосу маңызды. Дене жаттығуларын жасап, құрамында дәрумендері мол табиғи тағамдарды пайдаланған дұрыс.– Сөзіңізде «құлан-таза айығып кету мүмкін емес» деп қалдыңыз. Бүгінде «Буын ауруынан бір аптада арылтамын», «Үш күнде буын қиындығынан құтыласыз» деген сынды жарнамадан көз сүрінеді. Осы туралы тереңірек түсіндіріп өтсеңіз…– Аурудың алғашқы сатысында жағдайды біршама қалыпты күйге жақындатуға мүмкіндік бар. Ал созылмалы сипат алғанында, біз барынша сол қалпында ұстап қалуға күш жұмылдырамыз. Соңғы сатысында ағза ауыстырылуға жіберіледі. Бірақ науқасының созылмалығын естіп: «Менің буыным ауырады. Бәрібір кейіннен мүгедек болып қаламын» , – деп жерінуге болмайды. Қазір түрлі жаңалықтар, жаңа дәрі-дәрмектер шығуда. Олардың денсаулықтағы кінәратты түбегейлі жоймаса да, жақсартуға атсалыса алатынын тәжірибе көрсетіп келеді.– Уақыт бөлгеніңізге рахмет!

Жанар Қожағұлова, Қазалы аудандық емханасының ревматолог дәрігері: Буын аурулары бейжайлықты көтермейді

<a href="https://kyzylorda-news.kz/">Kyzylorda-news.kz.</a> Апта басында жалағаш ауданына қарасты аққұм ауылдық клубында алаш қозғалысының қайраткері, ақын, қазақ әдебиетінің жарқын жұлдызы мағжан жұмабаевтың 130 жылдығына орай «мен жастарға сенемін» көркемсөз оқу шеберлерінің аудандық байқауы өтті. Байқауға қатысқан барлық үміткерлер ақынның шығармаларынан сыр шертіп, өлеңді көркемдеп оқу арқылы сөзден маржан терді. ал аталған байқауға куә болған аққұмдықтар сыршыл ақынның өлеңдерінен рухани азық алды. Жалпы, қазақ поэзиясында лирикалық сыршылдықтың шыңына лайық, поэмаларында суреткерлік пен ойшылдығы қат-қабат келіп жататын өлең өлкесінде өшпес мұра қалдырған ұлы ақын – Мағжан Жұмабаев. Мағжан поэзиясының тақырыбы әр алуан. Өзі өмір сүрген жаңа ғасыр басында Мағжан бармаған, ол жырламаған тақырып жоқ деуге болады. XX ғасырдың басында әдебиет әлемінде қатар қанат қаққан ақындардан Мағжан Жұмабаевтың басты ерекшелігі өлең өрімінің өзгеше сұлулығы мен саздылығының ерекше үйлесім табуында. Мағжан Жұмабаев – қазақ поэзиясының жарық жұлдызы ұлы – Абайға еліктей отырып, ұлы ұстаз жолын ұстанғанмен өзінше жол табудан әсте жалықпай, көп ізденген жан.Ал қазақ өлеңінің ұлттық бояуыменен рухын ұстана отырып, оны түрлендіріп айтқан, адам жанының сұлулығы мен сыр сымбатын жырлаған, осылайша қалың оқырманның жүрегіне жол ашқан халқының білікті де парасатты ақыны Мағжан Жұмабаевтың 130 жылдығына орай өткен «Мен жастарға сенемін» көркемсөз оқу шеберлерінің аудандық байқауында 15 үміткер өлең оқып, екі кезең бойынша бақтарын сынады. Байқау шымылдығы Мағжан Жұмабаевты сомдаған өнерпаздың өлең оқуымен ашылды. Мұнан соң «Бал-бала» би тобының «Наркескен» биін тамашалап, онан ары үміткерлердің өнеріне кезек берілді. Ал қазақ өлеңін зергерлеп, елдің жүрегінен орын тапқан, жастардың жігеріне қанат бітіріп «Мен жастарға сенемін» деп жырлаған Мағжан ақынның шығармашылығына тоқталған Аққұм ауылының әкімі Алтынбек Асанбеков байқау қатысушыларына сәттілік тіледі.&nbsp;Ақынның 130 жылдығына арналған көркемсөз оқу шеберлерінің байқауына «Руханият орталығы» коммуналдық мемлекеттік қазыналық кәсіпорнының бөлім басшысы, аудандық мәслихат депутаты, Қазақстан жазушылар орталығының мүшесі, әділ-қазы алқа төрағасы Қуат Адисұлы, Алдаберген Бисенов атындағы № 38 орта мектептің қазақ тілі және әдебиет пәнінің мұғалім Жанар Шілдебаева, Мәдениет саласының үздігі, аудандық мәслихат депутаты Гүлжайна Айтжанова қазылық етті.&nbsp;Байқау нәтижесімен Бас жүлдені Мәдениет ауылынан Мақсұт Ақзере, жүлделі І орынды Аққыр ауылынан Бекасыл Дінмұхаммед, жүлделі ІІ орынды Аққұм ауылынан Жандосұлы Думан, жүлделі ІІІ орынды Далдабай ауылынан Алдаберлі Айда және Таң ауылынан Жасұлан Нұрдидар иеленсе, С.Торайғыров атындағы арнайы жүлдені Ақсу ауылынан Мұхамбетжанқызы Зияда, Т.Жүргенов атындағы арнайы жүлдені Есет батыр ауылынан Әділбек Сұлтан иеленді. Қатысушы өнерпаздардың барлығы 1986 жылы туылған түлектердің демеушілігімен Диплом және бағалы сыйлықтармен марапатталды. Айта кету керек, байқаудың өз дәрежесінде өтуіне 1986 жылы туылған 2003 жылғы мектеп бітіруші түлектер демеушілік етті. 200 000 теңге көлемінде сыйлықтар мен қаржылай демеушілік жасап, барлық қатысушыларды құралақан қалдырмады.&nbsp;Мағжан Жұмабаев – поэзия әлеміндегі жарық жұлдыз, қайталанбас құ¬былыс. Оның қуатты, бойға жігер, жүрекке от беретін рухты үні, ізденістері мен жаңашылдығы қазақ әдебиетін ХХ ғасырдың басында-ақ Еуропа, орыс әдебиетінің биік деңгейіне көтерді. Ақынның егемен еліміздің ертеңгі қызметін атқарар лайықты тұлға – ол жастар екенін ескеріп, «Мен жастарға сенемін» өлеңінде елдің қалыптасуына жастардан үлкен үміт күтіп, аманат сенім артқанын білеміз. Кеше ақыны «Мен жастарға сенемін» деп жырласа, байқау барысында бүгінгі буын ақын аталарының сенімінен шығуда, қазақ өлеңінің қалың қазақ жүрегінен орын табуы үшін барын салды. Шеберліктерін, талантын, ынта-жігерін қабілетімен ұштастыра білген үміткерлердің қай-қайсысы да бас жүлдеге лайықты болды. Бірақ байқау болған жерде жеңіс те, жеңіліс те болады. Бастысы қазақ әдебиетінің, поэзиясының тереңдігіне, құдіреттілігіне тағы бір куә болдық.

Көркемсөз оқу шеберлерінің байқауы өтті

<a href="https://kyzylorda-news.kz/">Kyzylorda-news.kz.</a> Өткен аптада Жалағаш ауданына қарасты Мырзабай ахун ауылына атбасын бұрып, бірінші ретте мектептің тыныс-тіршілігімен танысып, бітіруші түлектермен жүздесіп қайтқан болатынбыз.&nbsp;Ауылдағы №122 орта мектебінің шәкірттері 2008 жылдан бері жаңа оқу ғимаратында білім алуда. Аталмыш білім ордасында 2003 жылдан бастап Салима Оспанова мектеп директоры қызметін атқарып келеді. Бүгінде Салима Мырзабекққызы бастаған мектеп ұстаздары ауданымыздың білім саласын дамытуда елеулі еңбет етіп жүр, жеткен жетістіктері аз емес. Мектеп директоры аудандық, облыстық «Жыл директоры» байқауларында жеңімпаз атанып, аудан, облыс әкімінің «Құрмет грамоталарымен» марапатталған. «Ерен еңбегі үшін» Қазақстан Республикасының Президентінің жарлық бойынша медалімен, Жалағаш ауданының 80 жылдығына арналған медалімен, «Қазақстан Тәуелсіздігіне 30 жыл» мерекелік медалі мен Қазақстан Республикасының Президентінің алғыс хатымен марапатталған.&nbsp;1 маусым күні білім ошағында соңғы қоңырау соғылып, ендігі оқуын колледж немесе университетте жалғастыруды жоспарлап отырған білім сүйер түлектердің тұла бойын қимастық билегені анық. Биыл мектеп қабырғасында 243 бала білім алса, оның 11-і алтын ұя мектебімен қоштасып, 9 білім алушы алдағы ұлттық бірыңғай тестілеуде білімдерін саралайтын болады. Салтанатты шарада ел ертеңі болып табылатын жастардың бойына білім мен өнерді, адамгершілік пен адалдықты, рухани байлық пен ұлттық қасиеттерді сіңіріп, оларды тұлғалы азамат етіп қалыптастыруда үлкен үлес қосып жүрген бірқатар ұстаздар марапатталды. Шараға жиылған қонақтар мен ауыл ардагерлері жас түлектерге ақжол тілеп, батасын берді.&nbsp;Мектеп қазіргі заман талабына сай материалды-техникалық базамен, заманауи кабинеттерімен қамтамасыз етіліп, әр кабинет техникалық құралдар мен компьютерлер, интерактивті тақталармен, сондай-ақ әр пәнді терең үйретуге мүмкіндік беретін оқу бөлмелері қазіргі заман талабына сай жабдықталған. Атап айтар болсақ, &nbsp;химия, физика, биология, информатика, мультимедиялық, тіпті заманауи спорт зал да бар. Мұнан бөлек мектеп түлектері жасақтаған арнайы кабинеттерде жұмысын жасауда.&nbsp;Математика пәнінің мұғалімі Іскендір Қырқынбаев 1980 жылға дейін мектеп директоры болған, ұлағатты ұстаз. Ұлағатты ұстаздың еңбегін елеген 1958 жылы дүниеге келген шәкірттері озық қызметкердің құрметіне орай мектептен арнайы кабинет ашып, ішін толыққанды жабдықтаған. Мұнан бөлек бастауыш сынып мұғалімі болған Қыпшақгүл Сатқароваға да 1965 жылы дүниеге келген шәкірттері мен 1989 жылы туылған білім алушылары кабинет ашып жасақтаған. Міне, мектеп табалдырығын аттаған түлектер де мектептің қадір-қасиетін түсініп, ауыл үшін білім ордасының орны бөлек екенін іспен дәлелдепті.&nbsp;Мектепте білімді, дарынды балалармен жұмысты дамыту мақсатында жеке пәндерді тереңдетіп оқыту жұмыстары жүргізілуде. Сол себепті мектеп басшылығы ұстаздар біліктілігін арттыруды басты назарда ұстайды. Қазіргі таңда мектепте 44 мұғалім жұмыс жасаса, оның 38-і жоғары білімді, 3-еуі бірінші санатты, 4-еуі екінші санатты ұстаздар қатарында.&nbsp;Мектеп ұжымы қазіргі таңда оқытудың жаңа технологиялық әдіс – тәсілдерін пайдалану арқылы дарынды оқушыларды дер кезінде анықтап, шәкірттерді шығармашылыққа баулуды басты парымыз деп санайды. Бүгінде шәкіттері аудандық, облыстық, республикалық конкурстарда жеңімпаз атанып, талай зияткерлік, шығармашылық және спорттық сайыстарда жеңіс тұғырынан көрініп жүр.&nbsp;Айта кетейік, «Сыр өңірі-астаналар ордасы» ғылыми жобасында 7 сынып оқушысы Ұлжан Тұрлыбай ІІІ орын, «Химия» секциясы бойынша ғылыми жобасында Гүлшара Серікбаева ІІ орын, Меруерт Аманқали І орын мен сертификат, &nbsp;«Зерде» конкурсы математика секциясы бойынша Еңлік Бақытбекқызы мен Ақнұр Тұрақбай ІІІ орын, Ақдарын Қалдан ІІ орынды, Қазақ тілі секциясы бойынша Кәусар Мергенбек ІІІ орын, Техника секциясы бойынша Еркеназ Болат ІІІ орын, «Ақберен» өнер байқауында Шадыман Теміршеқызы аудандық, облыстық сайыстан І орын, Республикалықтан ІІІ орынды иеленді. «Ең үздік медиаторлар мектебі» аудандық кезең «Бейне¬фрагменттер конкурсында» І орынды Айзере Тұрабай, «Жарқын болашақ» байқауында Шадыман Теміршеқызы ІІІ орынды, «Жас қаламгер» байқауында номинацияны иеленген озат оқушы, І.Жансүгіров оқуларынан жүлделі ІІІ орынды, Абай оқуларында «Жүйріктен жүйрік озар жарысқанда» байқауында ІІ орынды иеленген.&nbsp; Абай оқулары «Абайдың ақын шәкірттерінің шығармалары» бай-қауында Жарқынай Мұрат І орынмен марапатталып, жеңіс тұғырынан кө-рініп жүрген үздік оқушылар. Сондай-ақ 5-6 сынып оқушылары арасында өткізілген аудандық пәндік олимпиада да 4 оқушы жүлделі ІІ, ІІІ орындарды иеленген. &nbsp;Бұл – ең әуелі сапалы білімнің, тынымсыз ізденістің, білімнің даңғыл жолына деген дұрыс бағытта екендігінің көрінісі. Осындай нәтижеге жету үшін мектепте білім алушыларға барлық жағдай жасалған. Сабақтан тыс уақытта оқушылар үшін арнайы үйірме жұмыстары ұйымдастырылған. Нақты атап айтсақ, вокал, театр, қолөнер, бейнелеу, дебат, футбол, волейбол, баскетбол, теннис, шахмат, тоғызқұмалақ үйірмелері бар.&nbsp;Сонымен қатар мектептің жүрегіне айналған ұстаздардың жеткен же-тістіктерді де жетерлік. Мәселен «Үздік дене шынықтыру пәнінің мұғалімі-2022» байқауында Олжас Достанов жүлделі ІІІ орынды, «Мектепке дейінгі ұйымдағы Үздік жоба-2022» байқауында Гүлбану Өмірбай жүлделі ІІІ орынды, «Үздік бастауыш сыныптағы қазақ тілі пәнінің мұғалімі» кәсіби байқауында Күнсұлу Нәзікбаева ІІ орынды, «Тәуелсіздік-тұғырым» атты эссе жазу байқауында Торғын Иманбаева арнайы алғыс хатпен, «Жас ұстаз-2022» аудандық командалық байқауында №122 мектеп ІІІ орынды, «Жаңа мектепке-жаңашыл ұстаз-2023» байқауында Айдана Қойшығұл «Жаңашыл жас ұстаз» номинациясымен марапатталды. Мұндай жетістікке жету, әрине шебер ұстаз, талапшыл басшының, бірлігі мен ынтымағы жарасқан ұжымның арқасы.&nbsp;«Адамды адам ететін – кітап, адамзат ететін – кітапхана» демекші, мектеп ордасында кітапхана жұмыс жасауда. Кітапханашы Зада Даниярованың айтуынша, оқушылардың кітап оқуға деген құштарлығы жоғары, әсіресе көркем әдебиет шығармашылығына қызығушылығы басым. Жалпы, кітапхана қорында 18742 дана кітап болса, оның 8880-і оқулық екен. Жастарды кітап оқу мәдениетіне тәрбиелеуге, олардың поэзияға деген құлшынысын арттыруға, талғамына, таңдауына сай әдебиеттерді іріктеуге көмектесіп, оқуға деген ынта ықыласын көтеруде кітапханада мәнерлеп оқу жарыстары, театрландырылған көрініс қою секілді түрлі танымдық шаралар ұйымдастырылады.Мектепте міндетті оқу қоры есебінен ыстық тамақпен 84 оқушы қам-тылған. Оның ішінде 56-сы 1-4 сыныпта оқиды. Жалпы, 140 оқушы ыстық тамақпен қамтылған. Оқушылардың әлеуметтік жағдайы мектептің басты назарында. Мәселен балалардың жазғы демалысын тиімді ұйымдастыру мақсатында биыл мектепте міндетті оқу қоры есебінен Жалағаш кенті «Ақтерек» лагеріне 17 оқушыға жолдама берілген. Сондай-ақ Алматы қаласындағы «Спутник» жазғы тынығу лагеріне 1 оқушы баратын болса, Жаңақорған ауданы «Талдысу» лагеріне 10 оқушыға «Балдихан» ЖШС басшысы Ғалымжан Балабатыров пен «Керейт» шаруа қожалығының басшысы Нұрбол Құндызбаев демалуға демеушілік жасады.&nbsp;Ұрпақ тәрбиелеуді өздеріне парыз еткен мектеп ұжымы әлі де талай бүлдіршіндерді біліммен қанаттандырып, биік белестерге жетелеуде жүйелі әрі еселі еңбек ететіні хақ.

«Талдысу» лагеріне 10 жолдама берілді

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев 2022 жылдың 1 қыркүйегінде Қазақстан халқына арнаған Жолдауында нашақорлықпен және есірткі саудасымен күресудің кешенді жоспарын әзірлеу қажет деген болатын. Президенттің осы жолдауынан кейін Жаңақорған ауданында Бас Прокурор Б.Асыловтың төрағалығымен есірткінің заңсыз айналымына қатысты кеңейтілген Үйлестіру кеңесі өтіп, есірткіге қарсы күресті күшейту мақсатында аса маңызды тапсырмалар берілді.​Осыған орай Қызылорда облысы прокуратурасының бастамасымен уәкілетті органдармен бірлескен «Есірткісіз аймақ» жобасы әзірленді. Жобаның мақсаты - заманауи озық дағдылар мен тәсілдерді қолдану арқылы есірткіге қарсы күрес тетіктерінің тиімділігін арттыру.«Есірткісіз аймақ» жобасын жүзеге асыру мақсатында облыстық прокуратураның үйлестіруімен жұмысшы топ құрылып, оның құрамына прокуратура, полиция, жергілікті атқарушы орган, орман шаруашылығы, төтенше жағдайлар және телекоммуникация қызметкерлері енгізіліп, әрбір органның міндеттері белгіленді және іс-шараның басым бөлігі профилактикаға бағытталды.Осыдан кейін аймақ көлемінде есірткіге қарсы күрес жұмысы күшейтілген режимде жүргізілді. Техникалық материалдық мүмкіндіктердің барлығын іске қосып, электронды ғарыштық түсірілім арқылы алдын-ала мониторинг жүргізіліп, есірткі өсімдігін егуге табиғи ерекшелігі мен жері құнарлы және суға жақын алқаптар анықталып, қолайлы аумақтар белгіленді. Осы аумақтарда прокуратура қызметкерлерінің ықпалымен жүргізілген кешенді жұмыстардың нәтижесінде қашық, далалық жерлерден бірнеше есірткі алқаптары табылды.Атап көрсеткенде, Жаңақорған аудандық прокуратурасының бастамасымен бекітілген топпен аралау кезінде, Жаңақорған ауданына қарасты Төменарық ауылдық округінің аумағында есірткі өсімдігіне ұқсас 222 түп өсімдік анықталып, ҚК-тің 300-бабы 2-бөлігімен тіркеліп, сотқа дейінгі тергеп-тексеру жүргізілуде.«Есірткісіз аймақ» жобасы бойынша атқарылып жатқан осындай жұмыстарға әрі қарайда пәрмен беру мақсатында Қызылорда облысының прокуроры Н.Бижанов Жаңақорған ауданында көшпелі жиын өткізді.Жобаны жүзеге асыру бойынша құрылған жұмыс тобымен облыс көлемінде осы бағыттағы жұмыстарды жандандыру және қадағалау мен бақылауды күшейту үшін нақты тапсырмалар берді.

Жаңақорғанда «Есірткісіз аймақ» жобасымен нақты жұмыстар атқарылуда

<a href="https://kyzylorda-news.kz/">Kyzylorda-news.kz.</a> Халықаралық балаларды қорғау күніне орай Қазалы пайдалану вагон депосының «ВЧД-6» бастауыш партия ұйымында аудандық мәслихат депутаты, «ВЧД-6» БПҰ төрағасы Орымбаев Арғын Қайрбайұлының және белсенді партия мүшелерінің, бастауыш кәсіподағының қатысуымен «Жас теміржолшы» челленджі ұйымдастырылды.Еңбек ұжымында эмоционалды-мерекелік көңіл күй қалыптастыруды мақсат еткен шарада теміржолшы формасын киген балақайлар техникалық сабақ өтетін вагон құрамының макеттерімен танысып, «теміржол вокзалымен поездардың жүріп-тұруы туралы» қозғалыс қауіпсіздігінің сақталуы туралы толық ақпараттар алып, депо басшылығы мен ата-аналарының жұмыс бөлмесінде болып жұмыс істейтін орындарымен танысты. Балақайлар негізінен вагон қарушылары, станция кезекшісі, жолшы, тіпті жолсерік болып киініпті.Адамзаттың алдында тұрған зор міндет - болашақ ұрпақтың бақытты өмірін қалыптастыру. Мереке қарсаңында өсіп келе жатырған жас ұрпаққа темір жолдың жұмысы туралы, оның адам өміріне қауіпті аймақ екені туралы қауіпсіздік ережелерін түсіндіріп, жас өркенге мерекелік көңіл күй сыйлаған депо ұжымы шара соңында балаларды мерекелерімен құттықтап, арнайы дайындалған сыйлықтарын тарту етті.

Қазалыда «Жас теміржолшы» челленджі ұйымдастырылды

<a href="https://kyzylorda-news.kz/">Kyzylorda-news.kz.</a> 31 мамыр – Қазақстан тарихының ең қайғылы беттерінің бірі – жаппай саяси қуғын-сүргін және миллиондаған Қазақ елін мекендеген халықтың қаза болуына әкеп соққан ашаршылық құрбандарын еске алу күні. Сонау өткен ғасырдың қойнында қалып бара жатса да, бұл күн өткен сайын жаралы рухымыздың жадында жаңғыра береді.Таң атысымен Жалағаш жұрты жылдағы үрдіспен аудан орталығындағы «Тағзым» алаңында орналасқан «Қарақұм көтерілісі» ескерткіші алдына жиналды. Жиналған халық ескерткіш алдына гүл шоғын қойып, солақай саясаттың қандықасап жендеттерінің қолымен жазықсыз жазаланған құрбандардың рухына құран бағыштап, бір сәт үнсіздікпен еске алды.<blockquote>«Дәл осындай зарлы үн XX ғасырдың басында қазақтың жерін жайлап еді. Қайран, қазақ елі... Бүгінгі ұрпаққа айта алмаған, жеткізе алмаған, жан дүниеңді дір еткізетін сырға, мұңға толы тарихи парақтары қаншама. Иә, қазақ халқы бұл дүниеде не көрмеді? Сонау «Ақтабан шұбырынды, Алқакөл сұлама» заманынан бастап, «репрессия» жылдарына дейінгі аралықта халқымыздың осынау кең жаһан далада жойылып кету қаупі тұрған еді. Шүкір, елін сүйген ата-бабаларымыздың жанкештігі, қайраткер, қайсарлығы арқасында біз кең байтақ жерде, ашық аспан астында бебіт ғұмыр кешіп жатырмыз. Сондықтан кейінгі ұрпақ қуғын-сүргіннен жазықсыз жапа шеккен қайраткерлердің есімдерін әрқашан еске алып, ұлықтайды. Біз өткен тарихты ұмытпаймыз. Олардың ерлік жолы үнемі мақтанышпен айтылады. Зұлмат жылдардың жаңғырығы халық жадынан өшпейді. Кешегі арыстардың ізін басар бүгінгі буын аянбай еңбек етпек. Тәуелсіздігіміз баянды болсын, қасіретті жылдар қайталанбасын, еліміз аман, жұртымыз тыныш болсын», – деді аудан әкімі Асқарбек Есжанов.</blockquote>Жаппай ел-жерді ұжымдастыру кезінде солақай саясаттың құрбаны болған, елім-жерім деген ұлтжанды батырлардың тікелей ұрпағы Оспан Жанұзақ ақсақал да «Қарақұм көтерілісі» ескерткіші алдына гүл шоғын қойып, әке аузынан естіген естеліктерін елге тарту етті.<blockquote>«Кеңес өкіметі орнағаннан-ақ қазақтар әртүрлі қысымға ұшырады. Кеңес билігінің жандайшаптары өз азаматтарын туған елінен бездіріп, сол кездері қазақтардың негізгі күнкөріс көзі болған төрт-түлік малын тартып алып, бала-шағасымен қоса қаңғыртып жіберді. Тәркілеу науқаны аяқталған соң да бай ұрпақтарын қудалауды жалғастыра берді. Соның салдарынан байларды айтпағанның өзінде кедейлердің тұрмыс жағдайы одан бетер қиындап кетті. Солақай саясат халық наразылығын тудырып, жұртшылықтың көтерілісіне ұласады. Кеңес өкіметіне қарсы шығып, наразылық білдіргендер жаппай ұсталып, бірі атылса, бірі жер аударылып, қамауға алынады. &nbsp;Шаш ал десе, бас алатын шолақ белсенділердің заманы туып, жаппай жазалау шаралары жағдайды мүлдем шиеленістіріп жібереді. Міне, біздің ата-бабаларымыз бүгінгі жайма-шуақ күн үшін қандай қасіретті күндерді басынан өткерді. Сондықтан кейінгі ұрпақ Тәуелсіздігіміздің бағасын жақсы түсініп, бағалай білуіміз қажет», – деп Оспан ақсақал аталық ақылын да айтты.</blockquote>Иә, Кеңес үкіметінің солақай саясатының салдарынан болған нәубет-тен әсіресе қазақтың жоғалтқаны көп. Ашаршылықты айтпағанда 100 мың адам осы қуғын-сүргіннің құрбаны болды. 20 мың адам атылды, олар Ә.Бөкейхан, А.Байтұрсынұлы, М.Тынышбаев, М.Дулатұлы, Т.Рысқұлов, М.Жұмабаев, С.Сейфуллин, І.Жансүгіров, Б.Майлин, С.Асфендияров сияқты қазақтың жанашыры, өз Отанының патриоты, біртуар азаматтары еді.Адам айтқысыз қасірет Жалағаш ауданынан да айналып өткен жоқ, ел 100-ге жуық ер-азаматынан айырылды. 1938-1944 жылдары коммунистік режим өңірімізге кәріс, Еділ бойының немістері, грек, молдаван, шешен, ингуш секілді т.б. мыңдаған өзге ұлт өкілдерін зорлап жер аударды. Мұрағаттық деректерге сүйенсек, 1937-1938 жылдары ақпан айында ауданымызға Қиыр шығыстан 3078 кәріс, 1944 жылдың 10-11 наурыз күндері Жалағаш станциясына Кавказдан 3885 адам, яғни 894 отбасы, оның ішінде 765-і ер, 1065-і әйел, 2055-і балашешен-ингуш күштеп жер аударылып, қоныстандырылған. Десе де көңілі ақ, пейілі таза қазақ жұрты жер аударылғандарды өз ағайынындай қабылдады, олар Жалағаш жерінен өздерінің екінші Отанын тапты деуге әбден болады.Бір сәт тарихқа көз жүгіртсек, осы қасіреттің бірден бір себепкері Голощекин және оның жандайшаптары қазақ даласындағы сұмдық апат туралы:&nbsp;«Бұл халықтың қырылғанына біз емес, өздері кінәлі. Еңбектенгісі келмейтін жалқаулығынан қырылып жатыр» деп Сталинге хат жазады. Осылайша, «қазақ жалқау» деген пропагандалық сөз арқылы өздерінің адам төзгісіз айуандықтарын ақтап алмақ болған.Ал бұл туралы тарихшы, академик Манаш Қозыбаев:«Голощекин аштан өлмеудің қамын ойлап тентіреген қазақтардың жағдайына бәлендей бас ауыртқан жоқ. Ол өзі республиканы басқарған 8 жыл ішінде бір рет те қазақ ауылында болып көрмепті», – деп Голощекиннің сөзі мен ісінің сәйкес келмегендігін әшкерелеп жазады.&nbsp;Иә, бүгінгі Тәуелсіздік кезеңінде өмір сүріп жатқан келешек ұрпақ ұлтқа қиянат жасаған осындай сатқындарды әшкерелеп, олардың тарихтағы қылмыстарын айтып, жазуға тиіспіз. Қанды қасаптың қасіретін тартқан ел біздей-ақ болар. Өткеннен сабақ алып, салауат айтып, тіріге тілеулес болайық, ағайын!

Қуғын-сүргін құрбандарын еске алды

<a href="https://kyzylorda-news.kz/">Kyzylorda-news.kz.</a>&nbsp;Бүгін &nbsp;Қызылордадағы Зияткерлік мектеп түлектері мен оқушылары «NIS Challenge» &nbsp;зияткерлік ойынында бақ сынасты.Назарбаев Зияткерлік мектептері түлектерінің «Alumni NIS» қауымдастығының бастамасымен өткізілген шара еліміздің түпкір-түпкірінде ұйымдастырылды. NIS-тің әртүрлі жылдардағы түлектер мен олардың ізбасарлары интеллектуалды алаңда бас қосып, түрлі форматтағы сауалдарға жауап бере отырып, білім көкжиегін кеңейтті.Ерекше ойында үздік топтар анықталып, түлектер қауымдастығының арнайы сыйлықтарына ие болды. Ал жеңімпаз команда 100 000 теңге көлемінде сыйақымен марапатталды. Бұл қаражат Зияткерлік мектепте білім алу үшін конкурстық іріктеуден өтіп, резервтік тізімге енген әлеуметтік жағдайы төмен оқушының оқу ақысына жұмсалатын болады. Сонымен қатар, жеңімпаз оқушылар Jusan Singularity бағдарламалау мектебін білім алу мүмкіндігіне қол жеткізді.<img src="https://knadmin.beoblood.kz/uploads/Whats_App_Image_2023_05_31_at_11_35_43_ef062de1e9.jpeg" alt="WhatsApp Image 2023-05-31 at 11.35.43.jpeg">

«NIS Challenge» ынтымақтастықты арттырды

Жалағаш ауданы әкімінің төрағалығымен аппарат мәжілісі өтті

<a href="https://kyzylorda-news.kz/">Kyzylorda-news.kz.</a> «Адамның бір қызығы бала деген» деп Абай атамыз айтқандай, бала – біздің басты байлығымыз. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз. Мемлекет басшысы Қасым-Жомарт Тоқаев та «Балаларға ерекше назар аудару керек. Себебі олардың амандығы – мемлекетіміздің жарқын болашағының сенімді кепілі» деген еді. &nbsp;«Өнерге әркімнің-ақ бар таласы» деп Абай атамыз айтқандай, ерекше жағдайдағы балалардың өнерін ашу, өнерге деген қызығушылығын арттыру, өмірге деген құштарлығын ояту мақсатында 1 маусым – Халықаралық балаларды қорғау күніне орай Жалағаш аудандық жұмыспен қамту, әлеуметтік бағдарламалар және азаматтық хал-актілерін тіркеу бөлімінің ұйымдастыруымен «Балалар бақытты болу үшін жаралған» атты мерекелік шара өтті. &nbsp;Аталған шараға Жалағаш ауданы әкімінің орынбасары Ғани Сүлейменов қатысып, балаларға ізгі тілегін білдірді. Шара барысында өнерпаз өрендеріміз ән мен биден шашу шашып, өз өнерлерін ортаға салды. Мерекелік шара мұнан әрі спорттық жарысқа ұласты. &nbsp;Спорттық сайысқа 34 бүлдіршін қатысып, дартс, дойбы, эстафета, қолөнер сынды спорт түрлерінен бақ сынады. Жарыс барысында балалар салған суреттер мен қолөнер бұйымдарынан арнайы көрме де ұйымдастырылды.Спорттық шараның нәтижесінде эстафетадан І орынды Асылзат Қуанышбай, ІІ орынды Арсен Төлеубай, ІІІ орынды Саят Кенжеқара иеленді. Дартс сайысының қорытындысы бойынша Саят Қалдан І орынды, Нұрай Мақсұт ІІ орынды, Айару Рысбай ІІІ орынды қанжығасына байлады. Дойбыдан Фархат Әлдебай І орынды, Гүлім Ақылбек ІІ орынды, Мадияр Аманкелді ІІІ орынды иеленді. Ал қолөнер сайысында Зере Мархабат І орынды, Ботакөз Бауыржан ІІ орынды, Нұрай Әнуарбек ІІІ орынды алды.&nbsp;Жеңімпаздарға арнайы дипломдар, медальдар және бағалы сыйлықтар табысталды. Сонымен қатар шарада өнер көрсеткен бүлдіршіндер мен жарысқа қатысқан балалар, көрермен болып отырған балақайлар да назардан тыс қалмай, бағалы сыйлықтарды иеленді. Мұнан бөлек шара барысында балаларға фуршет ұйымдастырылып, тәттілер ұсынылды. &nbsp;Мерекелік шараға аудандағы ірі шаруа қожалықтардың бірі «Сәрке батыр» ЖШС мен ауданға белгілі кәсіпкерлер, кент және ауылдық округ әкімдерінің әлеуметтік мамандары демеушілік білдіріп, өз үлестерін қосты. Сондай-ақ шара соңында белгілі кәсіпкер, «Батырбек» дүкенінің иесі Жеңісбек &nbsp;Бисенбаев балаларға бақытты шақтың бал дәмі, тегін балмұздақ таратып, көтеріңкі көңіл-күй сыйлады.

Жалағаш ауданында мерекелік шара өтті

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданының әкімі Асқарбек Темірбекұлы 31 мамыр – саяси қуғын-сүргін құрбандарын еске алуға арналған жиынға қатысты.Іс-шара барысында жазықсыз жапа шеккен жерлестерді, саяси қуғын-сүргін құрбандарын 1 минут үнсіздікпен еске алып, Құран бағышталды.<blockquote>«Кейінгі ұрпақ қуғын-сүргіннен жазықсыз жапа шеккен қайраткерлердің есімдерін еске алып, ұлықтайды. Біз өткен тарихты ұмытпаймыз. Олардың ерлік жолын үнемі мақтанышпен айтылады. Зұлмат жылдардың жаңғырығы халық жадынан өшпейді. Кешегі арыстардың ізін басар бүгінгі буын аянбай еңбек етпек. Тәуелсіздігіміз баянды болсын, қасіретті жылдар қайталанбасын, еліміз аман, жұртымыз тыныш болсын!» деді Жалағаш ауданының әкімі.</blockquote>Еске алу іс-шарасында қуғын-сүргін құрбаны болған азаматтардың ұрпақтары өткен күннен естеліктер айтып, халықтың ынтымағы мен достығы кешегі күннің бүгінгі жемісі екенін жеткізді.Иә, 31 мамыр – Қазақстан тарихының ең қайғылы беттерінің бірі - жаппай саяси қуғын-сүргін және миллиондаған адамның қаза болуына әкеп соққан ашаршылық.Қуғын-сүргін жылдары ішінде Қазақстан аумағында құрылған лагерьлерге 5 миллион астам адам жіберілді.«Бүгін біз ұжымдастыру жылдарында аштыққа ұшырағандарды, сондай-ақ туған жерінен кетуге мәжбүр болғандарды да еске аламыз. Сол жылдардағы орасан зор адам шығыны мен тағдыр тауқыметі әрбір азаматтың жүрегіне жара салды. Тоталитаризмнен зардап шеккен көптеген ұлт өкілдері үшін қазақ жері құтты мекенге айналды. Ата-бабаларымыздан дарыған қайсарлық пен төзімділіктің арқасында қатаң сыннан абыроймен өтіп, біртұтас ұлт ретінде бірігуге мүмкіндік алдық» &nbsp;деп атап өтті ҚР Президенті Қасым-Жомарт Тоқаев саяси қуғын-сүргін және ашаршылық құрбандарын еске алу күніне орай үндеуінде.Қуғын-сүргін арқылы 100 мыңға жуық қазақстандық өтті. 20 мыңы атылды. Жазықсыз жазаланғандардың қатарында Ә.Бөкейхан, А.Байтұрсынұлы, М.Тынышбаев, М.Дулатұлы, Т.Рысқұлов, М.Жұмабаев, С.Сейфуллин, І.Жансүгіров, Б.Майлин, С.Асфендияров сияқты мемлекет және қоғам қайраткерлері, ұлт зиялылары болды.

Жалағаш ауданының әкімі саяси қуғын-сүргін құрбандарын еске алуға арналған жиынға қатысты

<a href="https://kyzylorda-news.kz/">Kyzylorda-news.kz.</a> 26 маусым - Халықаралық нашақорлыққа қарсы күрес күніне орай ұйымдастырылып жатқан айлықтың шеңберінде және 1 маусым - Халықаралық балаларды қорғау күні мерекелеріне арналған «Атамекен» балалар ауылы мен «Спорттық туризм және туристік көпсайыс жастар федерациясы» қоғамдық бірлестігінің мүшелері арасында «Есірткісіз болашақ!» тақырыбында сурет салу байқауы ұйымдастырылды.Жеткіншектер өз суреттерінде, есірткісіз өмір сүру деген сұраққа жауап беруге тырысып, суреттерін салуға өте тиянақты қарады. Қойылған сұраққа көптеген жауаптар алынды, шығармашылық көрме экспозициясы 28 балалар жұмысынан құрылды. Барлық жас суретшілер сыйлықтар мен алғыс хаттар алды.&nbsp;Байқауды өткізуге «Қызылорда еріктілері» және «Спорттық туризм және туристік көпсайыс жастар федерациясы» қоғамдық бірлестіктері тартылды.

Қазақстан және Қызылорда облысының жаңалықтары