<a href="https://kyzylorda-news.kz/">Kyzylorda-news.kz.</a>&nbsp;Дана халқымыз «Ас тұрған жерде – ауру тұрмайды» дейді. Ақиқат, ас бар жерде ешқандай ауру жоқ. Бірақ мына заманда олай айтуға болмайды. Өйткені қазір тауарлардың ғана емес, тамақ өнімдерінің де сапасы сын көтермей тұр. Жуырда осыған байланысты және 7 маусым Дүниежүзілік тамақ өнімдерінің қауіпсіздігі күніне орай «Қауіпсіз тағам таңда» атты акция өтті. Акцияны аудандық санитариялық-эпидемологиялық бақылау басқармасының мамандары да жүйелі түрде жүргізіп, он күндік науқан аясында түрлі шаралар өткізіп, аудан тұрғындарына түсіндірме жұмыстарын жүргізді.«Ауру – астан». Әсіресе, елімізде орын алған эпид ахуалдан кейін тамақ өндірісіне қауіп жоғарылады. Қазір дүкен сөрелерінде самсап тұрған азық-түлік тауарларын да, көкөністер мен жеміс-жидектерді де емін-еркін жеуге қорқасың. Себебі олардың құрамында нитрат бар. Нитрат – көбінесе көктем мен жаз айларында сатылатын құлпынай, қарбыз, қауын, қызанақ пен қиярда көп болады. Ал мұндай өнімдердің сырты тәбет тартарлықтай көрінгенімен, адам ағзасына өте қауіпті. Әрине, олардың барлығы арнайы қаптамада, дәрі-дәрмектер арқылы егілетін болғандықтан, ерте піседі. Жер ананың көмегінсіз, мезгілсіз піскен жемістер мен көкөністерге деген сұраныстың қашан да жоғары болатыны белгілі. Сондықтан оларды тұтынбас бұрын әуелі арнайы тексерістен өткізген абзал. Осыдан бірнеше күн бұрын аудандық санитариялық-эпидемиологиялық бақылау басқармасының мамандары Ұлттық сараптама орталығының аудандық бөлімшесімен бірлескен бұйрыққа сәйкес, сондай-ақ онкүндік акция аясында азық-түлік тауарларының сапасын анықтау мақсатында арнайы тексеру жұмыстарын жүргізді.Санитарлық-эпидемилогиялық тексеру жұмыстары ең әуелі «Сыр Ұланы» тынығу лагерінен бастау алды. Мұнда жазғы лагерге келген балалардың күнделікті тұтынатын тағамдары, көкөніс пен жеміс-жидектер экспресс әдіспен нитратқа тексерілді. Сондай-ақ сала мамандары балаларға тамақ өнімдерінің қауіпсіздігі, тағамнан улану, сапасыз өнімдерден қорғау, жеке бас гигиенасын сақтау, жедел ішек инфекцияларының алдын алу жөнінде түсіндірме жұмыстарын жүргізіп, дәрістер оқыды.Науқан бұдан әрі «Әбдіманап базары» атындағы орталық базарда өз жалғасын тапты. «Қауіпсіз тағам таңда» атты акцияның барысында базарға келген тұрғындарға, сатып алушыларға арнайы үн парақтар таратылды. Бұдан бөлек тамақ өнімдерінің бөлшек сауда нысандарының жеке кәсіпкерлері арасында үгіт-насихат жұмыстары жүргізілді. Сондай-ақ радиоәдіс арқылы қауіпсіздіктің алдын алу жүйесі баяндалды. Ал аталған тексеру жұмыстары кезінде базарда сатылатын көкөніс пен жеміс-жидектерден 75 үлгі, сүт өнімдерінің қышқылдығынан 10 үлгі, ет өнімдерінен 15 үлгі алынып, тексерілді. Даброраториялық зерттеулер жүргізіліп, үлгілік зерттеу алынды.&nbsp; Нәтижесінде базарда сатылып жатқан қарбыз, құлпынай, өрік, пияз сынды өнімдердің қауіптілігі жоғары екендігі анықталды. Осы іс-шара жосарына сәйкес, кент орталығында орналасқан «Қазына» сауда үйінде басқарманың, аудан¬дық сала мамандарының қатысуымен зерттеу жұмыстары өз жалғасын тапты.<blockquote>«Қазіргі таңда Дүниежүзілік тамақ өнімдерінің қауіпсіздігі күніне орай «Қауіпсіз тағам таңда» атты халықаралық ауқымдағы түрлі іс шаралар акциясы жүргізілуде. Аталған акция Шиелі ауданында да қарқынды жалғасын тауып жатыр. Өздеріңіз білетіндей, азық-түліктің сапалы болуы – аса маңызды. Сондықтан әрбір тұтынушы дүкендерден, немесе сауда орындарынан өздеріне қажетті тамақ өнімдерін сатып аларда сақ болған жөн. Біз осы тақырыпқа байланысты аудан халқына арнайы үн парақтар таратып, түсіндірме жұмыстарын жүргіздік. Сонымен қатар, жемістер мен көкөністерден экспресс тексеру сынамасын алдық», – дейді аудандық санитариялық-эпидемиологиялық бақылау басқарма басшысының орынбасары Гүлстан Болатова.</blockquote>Иә, «Сақтансаң – сақтаймын» деген сөз де жан бар. Басқа айларды есепке алмаған күннің өзінде, жаз – түрлі дәрумендерге бай болатын мезгіл болғанымен, өте қауіпті ай. Өйткені – жаңа піскен өнімдерде түрлі инфекциялық вирустар болуы әбден мүмкін. Оның үстіне жуылмаған жемістерде қауіп жоғары. Ал мезгілінен бұрын пісетін көкөністердің құрамында нитрат жоғары. Мұның барлығы асқазанның жарасы, бауыр, өт жолдарын нашарлатуы бек мүмкін. Сол үшін ас ішерде абай болайық, қымбатты оқырман!

Шиеліде «Қауіпсіз тағам таңда» акциясы өтті

<a href="https://kyzylorda-news.kz/">Kyzylorda-news.kz.</a> Жалағаш ауданының әкімі Есжанов Асқарбек Темірбекұлы кезектілік тәртібімен тұрғындарды жеке мәселелері бойынша қабылдады.Тұрғындар тарапынан жұмыссыздық және тұрғын үй мәселелері көтерілді.Аудан әкімі кәсіпкерлікті дамыту мақсатында жер алу үшін сала басшыларына сүйемелдеу жұмыстарын жүргізу қажеттігін айтты.Азаматтарды жеке-жеке қабылдаған Асқарбек Темірбекұлы жауапты сала басшыларына бірқатар тапсырмалар берді.

Жалағаш ауданының әкімі жеке қабылдау өткізді

<a href="https://kyzylorda-news.kz/">Kyzylorda-news.kz.</a>&nbsp;Дана халқымыз «Сөз жеткізеді, сөз жеткізе алмағанды саз жеткізеді» деген тәмсілді бекер айтпаса керек-ті. Сан ғасырлар өтсе де сыры мен сынын жоғалтпай, саф алтындай сақ­та­лып келген қазақтың мұрасы – қобыз аспабының құны қашан да жоғары екендігі белгілі. Оның үнін естіген кез келген құлақтың рахат­қа, тыныштыққа бөленері сөзсіз. Содан да болар, қобызшыларды қазақ халқы ерекше, дарынды өнерпаздар деп есептейді. Біздің арамызда дәл осы төл өнерді жаңғыртып, оны өзгелерге насихаттап жүрген дарындылар көп-ақ. Оған дәлел – жас өнерпаз, ауданның ғана емес, Сыр өңірінің мақтанышы – Ақниет Бөлеген.Жерлесіміз жуырда Алматы қаласында өткен ХХV «Бозторғай» халықаралық балалар шығармашылық байқауына қатысып, төл өнер¬дің бәсін тағы да биіктетті. Жүлделі екінші орынды қанжығаға байлаған ол дәл осы сайыста үлкен ерлік көрсетіп, байқауға бар күшін салды. Ең әуелі аудандық, облыстық кезеңнен сүрінбей өтіп, әсем қала Алматыға аттанды. Содан кейін барып, әр жыл сайын өткізіліп отыратын халықаралық Бозторғай байқауына «аспапта орындау жанры» бойынша Шиелі ауданының атынан қатысты. Ақниет Бөлеген бүгінде Нартай Бекежанов ауылдық мәдениет үйін жанындағы «Қорқыт-қобыз» үйірмесінің мүшесі. Жүлделі екінші орынға ие болған ол бұған дейін де талай додаларда оза шапқан. Мәселен, ол облыстық «Қорқыттан қалған үн» байқауының жүлдегері.Айта кетейік, балалардың шығармашылығын дамытуды көздеген дәстүрлі байқауға биыл мыңнан аса өнерпаз қатысып, бес жанр бойынша өнер көрсеткен. Аталған байқауға 8 мемлекеттен өнерпаздар эстрадалық ән салу, аспапта орындау, хореография, халықтық орындау бағыты бойынша бақтарын сынады. Атап айтар болсақ, Қырғызстан, Өсбекстан, Тәжікстан, Ресей сынды көршілес елдер де қатысқан. Ал ауданның намысын қорғаған Ақниеттің биыл 25 рет өткізіліп отырған халықаралық додаға қатысуы – біз үшін мақтаныш. Ендеше, қобызды қасиетті санап, саз өнерді дамытып, ұлттық аспапты ұлықтап жүрген Ақниет Бөлегеннің шығармашылық жолына табыс тілейміз!

Шиеліні шыңға шығарған Ақниет

Үкітай Ерниязов: Мені күйші дегеннен гөрі домбырашы деген дұрысырақ

<a href="https://kyzylorda-news.kz/">Kyzylorda-news.kz.</a>&nbsp; Болашақ жұлдыздарды бала күнінен өнерге баулып, кішкентайынан үлкен сахнаға дайындайтын «Бозторғай» халықаралық балалар байқауы халық арасынан талай таланттарды тауып, жас есімдердің жарыққа шығуына жол ашты. Биыл да жылдағы дәстүр бойынша Алматы қаласы әкімдігінің қолдауымен ХХV халықаралық «Бозторғай» балалар шығармашылығы байқауы ару қала Алматыда&nbsp; өтті.Байқаудың мақсаты – талантты өнерпаздардың басын қосып, өнерін насихаттау.Жиырма бес жылдыққа аяқ басқан «Бозторғай» конкурсына Сыр елінің намысын қорғауға барған 100-ге жуық өнерпаз әлемнің түкпір-түкпірінен келген қатысушыларға талантын мойындатты.Сайысқа Болгария Тәжікстан Қырғызстан, Қытай, Өзбекстан республикаларынан 1000-нан аса дарынды жас қатысып, бақ сынады. Байқау ережесіне сәйкес ән, халықтық орындау, аспапта ойнау, хореография жанрлары бойынша өнер көрсетті.<blockquote>«Бозторғай» балалар шығармашылығы халықаралық конкурсы жыл сайын дәстүрлі түрде ұйымдастырылып келеді. Аталған конкурс Алматы қаласының Орталық демалыс паркіндегі ашық алаңда өтті. Қатысушылар еліміздің барлық аймақтарынан және шет мемлекеттерден келген. Сыр бойының талантты ұл-қыздары шетелден келіп, төрелік еткен қазылар алқасының алдына шығып, еш мүдірместен өнерін паш етті. Әрине, халықаралық байқау болғандықтан дайындық өте жоғары деңгейде жүргізілді. Өнерпаздарымыз үмітті ақтады, – деді облыстық халық шығармашылығын дамыту және мәдени-продюсерлік орталығы музыка және балалар шығармашылығы бөлімінің меңгерушісі Бағдагүл Есмұрзаева.</blockquote>Айта кетейік, бұған дейін Сыр өңірінде «Бозторғай» балалар байқауының облыстық кезеңі сәуір айында ұйымдастырылған болатын. Сайыс нәтижесінде 100-ге жуық өнерпаз іріктеліп, халықаралық байқауға жолдама алды. Конкурстың ерекшелігі – дәстүрлі ән салу мен халықтық орындау жанрларының қарастырылғаны. Бұл – ұлт руханиятының алтын ордасы Сыр бойында қазақ өнерінің қанат жайып, салтанат құруы. Байқаудың бастамашысы – облыстық мәдениет және спорт басқармасы болса, ұйымдастырушы – облыстық халық шығармашылығын дамыту және мәдени-продюсерлік орталығы.Үш күнге созылған байқау 4 жанр бойынша жас ерекшелігіне қарай үздіктерді анықтады.&nbsp;Атап айтар болсақ, «Ән» жанры бойынша Хабибулла Қыдыралиев, «Хореография» жанры бойынша «ЕркеНаз» би тобы, «Аспапта ойнау» жанры бойынша Дінмұхаммед Алмасұлы (орта топ), «Ақмешіт»&nbsp; домбырашылар ансамблі (кіші топ) бас жүлдені жеңіп алды. Басқа қатысушылар І, ІІ, ІІІ орындарды иеленіп, арнайы сыйлықтармен марапатталды.

Сыр өнерпаздары олжалы оралды

<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Жандос Еркінбек тұрғындарды жеке мәселелері бойынша қабылдады.Жеке қабылдауда тұрғындар тарапынан қойылған сауалдар негізінен жұмысқа орналастыру, тұрғын үймен қамтамасыз ету және табиғи газ орнату мәселелері бойынша болды.Қабылдау барысында аудан әкімі әрбір тұрғынның мәселесін тыңдап, заңдылыққа сәйкес түсініктеме беріп, айтылған мәселелердің барлығы бақылауында болтындығын жеткізді.

Қармақшы ауданының әкімі тұрғындарды жеке қабылдады

<a href="https://kyzylorda-news.kz/">Kyzylorda-news.kz.</a>&nbsp;Бұрын жұрт «Қызмет – қолдың кірі» деуші еді. Мақал-мәтелдердің заманына қарай өзгеріп жатқанындай, бүгінгі қызмет – құрмет, мәртебе.Әсіресе, мемлекеттік қызмет атқарушылар, сондай-ақ халық қалаулысы атанып жүрген жергілікті мәслихат депутаттары халықтың қайнар бұлағы саналады. Ел-жұрт олардан жылы сөз, қамқорлық, отбасы төмендер қайырымдылық күтеді. Ал Мемлекет басшысының облыс, аудан, ауылдық округтердегі өкілдері елдің қадірлісі ретінде санамызда жатталған. Сол үшін де біз оларды тыңдап, айтқан тапсырмаларын орындап отыруға тиіспіз.Жақында аймақ басшысы Нұрлыбек Нәлібаев аудан активімен жиналыс өткізіп, өңіріміздің жақсы жұмыстарына тоқталып, қала берді олқылықтарымызды да ортаға салды. Әңгіме мемлекеттік «Ауыл – ел бесігі» бағдарламасының аудан көлемінде іске асырылуы жайлы болғандықтан, ауылдық округ әкімдерінің жауапкершілігі сұралды. Сондай-ақ елді мекендерде қылмыс санының артуы, негізінен мал ұрлығы, ондағы учаскелік инспекторлардың жауаптылығы атап өтілді.Облыс әкімінің елді мекендердің дамуы үшін мемлекет тарапынан беріліп жатқан көмекті пайдалана алмай отырған ауыл әкімдеріне айтқан сыны біздің де жанымызға батты.Аймақ басшысы тоқетерін айтты. «Елге жанашырлық таныта алмайтын адамдарға арамызда орын жоқ» деді. Ардагерлермен болған кездесуде «Бұған дейін аудан әкімі сырттан келеді. «Кілең жаңақорғандықтар» дейтін едіңіздер. Ал қазір әкімдеріңіз шиелілік. Егер оған қолдау, көмек бермесеңіздер, онда қайтадан жаңақорғандық әкім алып келеміз» деп намысымызды жануының өзі де аудан ардагерлеріне ауыр тиді деп ойлаймын. Аудан әкімінің игілікті істерін қолдап та, жазып та келеміз. «Сын айтылмай, мін түзелмейді» деп бекер айтылмаған екен. Аймақ басшысының орынды, дұрыс тапсырмасы орындалуға жатады.«Ауылдың гүлденуі – еліміздің гүлденуі» десек, ауыл әкімдері мен учаскелік инспекторлар өздері қызмет ететін ауылдарға көшіп барып, сол ауылын гүлдендіруге үлестерін қосқаны абзал. Бұл жерден Шиеліден ауылдарға қатынап жұмыс істеп жүрген ауыл әкімдері жайлы әңгіме болған еді. Елді мекендердегі ауылдың ардагерлер кеңесі, ауыл ақсақалдары, қоғамдық кеңес, ауылдағы әйелдер кеңестері айтылған сыннан қорытынды жасауға ұмтылғанымыз дұрыс.«Жігітті намыс, қоянды қамыс өлтіреді» деген де сол замандағы әкім секілді билердің бірі шығар. Кім болсақ та елге жанашырлық танытуымыз керек. Сіз қалай ойлайсыз?

Елге қызмет көрсету – ердің ісі

<a href="https://kyzylorda-news.kz/">Kyzylorda-news.kz.</a> АҚШ Сауда палатасы, Сауда министрлігі және Қазақстанның АҚШ-тағы Елшілігі ұйымдастырған сертификатталған америкалық сауда миссиясының Қазақстанға бірінші сапары өтті. Оған 20-дан астам ірі америкалық компаниялар, атап айтқанда ExxonMobil, Boeing, GE, Baker Hughes, Citibank, Google, Microsoft, Apple және басқалар қатысты, деп хабарлайды ҚазАқпарат.Бағдарлама аясында бизнес-делегация Қазақстан-Америка инвестициялық дөңгелек үстел, ҚР Президенті жанындағы Шетелдік инвесторлар кеңесінің отырысы, АХҚО ұйымдастырған Астана халықаралық форумына және Astana Finance Days іс-шараларына қатысып, G2B және B2B форматында кездесулер өткізді.Миссияның негізгі мақсаты – Мемлекет басшысының төрағалығымен 2022 жылы Нью-Йоркте өткен Қазақстан-Америка дөңгелек үстелінің жалғасы ретінде Қазақстан мен АҚШ арасындағы инвестициялық және сауда қатынастарын нығайту және күшейту.Дөңгелек үстел қатысушыларға қолданыстағы инвестициялық жобалардың дамуы мен энергетика, инфрақұрылым, ауыл шаруашылығы және цифрлық экономика сияқты салаларға елдегі инвестицияны арттыру перспективаларын талқылауға мүмкіндік берді.Бизнес-делегация мүшелері ҚР Үкіметінің елде қолайлы инвестициялық ахуал құру жөніндегі күш-жігерін жоғары бағалап, инвестициялық бастамаларды жүзеге асырудың әлеуетін ерекше атап өтті.Сонымен бірге қатысушылар өзара сауда өсімінің оң серпініне қанағаттанатынын атап өтті.Осылайша, 2022 жылғы тауар айналымы 3,05 млрд АҚШ долларын құрап, рекордтық көрсеткішке жетті, бұл өткен жылмен салыстырғанда 37%-ға жоғары.АҚШ-тың Қазақстанға жалпы ТШИ ағыны 2022 жылмен салыстырғанда 82%-ға өсіп, 5,1 млрд АҚШ долларын құрады.Өз тарапынан АҚШ Сауда палатасының аға вице-президенті Хуш Чокси америкалық компаниялардың қазақстандық нарықта қатысуын кеңейтуге терең қызығушылық танытты.Сауда миссиясының ҚР Ұлттық экономика министрі Әлібек Қуантыров, Цифрлық даму, инновациялар және аэроғарыш өнеркәсібі министрі Бағдат Мусин, Ғылым және жоғары білім министрі Саясат Нұрбек, Энергетика министрі Алмасадам Сәтқалиев және Ауыл шаруашылығы министрі Ербол Қарашүкеевпен өткен кездесулерінде еліміздің инвестициялық ахуалын одан жақсарту шараларды талқылау басты назарға алынды.АХҚО мен Astana Hub-қа сапармен қатар, АХҚО басқарушысы Ренат Бектұровпен, ҚР Сыртқы істер министрінің орынбасары Алмас Айдаровпен және ҚР Сауда және интеграция вице-министрі Қайрат Төребаевпен жеке келіссөз жүргізілді. &nbsp;

АҚШ Cауда миссиясы ресми сапармен Қазақстанға келді

<a href="https://kyzylorda-news.kz/">Kyzylorda-news.kz.</a> Белгілі мемлекет және қоғам қайреткері Бердібек Машбекұлы Сапарбаев 70 жасында дүние салды. Қайғылы хабарды <a href="https://m.facebook.com/story.php?story_fbid=pfbid0cfViSci2g6uFwwLRNp8Moh1hM7vhUbVVszc6rdzoUyVcseu58xNS3keYHJ9zNJFfl&amp;id=100044366714072&amp;mibextid=Nif5oz">«Қазақстан»</a> ұлттық арнасы жеткізді, деп хабарлайды ҚазАқпарат.Бердібек Машбекұлы 1953 жылы 9 ақпанда Қызылорда облысы Жаңақорған ауданының Бесарық ауылында туған.1977 жылы Алматы Халық шаруашылығы институтын «Экономика және материалдық-техникалық жабдықтау» мамандығы бойынша бітірді.Экономика ғылымдарының докторы, профессор.Еңбек жолын Қызылорда облысының Задарьинский совхозының жұмысшысынан бастады (1969-1971 жылдары); әскери қызметін өткерді (1971-1973 жылдары).Институтты бітірісімен Республикалық мемлекеттік еңбек жинақтау кассалары (гострудсберкассы) басқармасында экономист (1977); ҚазКСР Қаржы министрлігінде экономист, аға экономист, жетекші, бас экономист, бөлім бастығының орынбасары (1977-1988 жылдары); жоспарлау-қаржы басқармасының бастығы, Бас экономика басқармасының бастығы, Қазақстан Республикасы Білім министрінің орынбасары (1988-1993 жылдары); Президент Аппараты бөлімі мен Қазақстан Республикасы Министрлері кабинеті меңгерушісінің орынбасары (1993); Қазақстан Республикасы Министрлер кабинеті Істер басқармасының Қаржы, еңбек және әлеуметтік қорғау бөлімі меңгерушісінің орынбасары және меңгерушісі (1994-1995 жылдары) болды.Қазақстан Республикасы Министрлер кабинеті Аппаратының басшысы (1995); Қызылорда облысының әкімі (1995-1999 жылдары); Оңтүстік Қазақстан облысының әкімі (1999-2002 жылдары) қызметтерін атқарды; Қазақстан Республикасы Кедендік бақылау агенттігінің төрағасы, Қазақстан Республикасы Қаржы вице-министрі - Кедендік бақылау комитетінің төрағасы (2002-2006); Премьер-Министр Кеңсесі басшысының орынбасары - Қазақстан Республикасы Парламентіндегі Үкіметтің Өкілі (2006-2007); Қазақстан Республикасының Экономика және бюджеттік жоспарлау вице-министрі (2007 жылы ақпан - 27 тамыз).2007 жылдың тамызынан Қазақстан Республикасының Еңбек және халықты әлеуметтік қорғау министрі. 2009-2014 жылдары - Шығыс Қазақстан облысының әкімі. 2014-2015 жылдары – Қазақстан Республикасы Премьер-Министрінің орынбасары.2015-2019 жылдары – Ақтөбе облысының әкімі.2019 жылдың ақпан-тамыз айларында Қазақстан Республикасының Еңбек және халықты әлеуметтік қорғау министрі болды.2019-2020 ж. ж. – Қазақстан Республикасы Премьер-министрінің орынбасары.2020-2022 жылдары Жамбыл облысының әкімі болды.«Құрмет» (1999), «Парасат» (2007) ордендерімен, «Астана» (1998), «Қазақстан Республикасының тәуелсіздігіне 10 жыл» (2001), «Қазақстан Республикасының Конституциясына 10 жыл» (2005) медальдарымен марапатталған.

Бердібек Сапарбаев 70 жасында өмірден өтті

Жаңақорғанда алманың 20-дан аса түрін өсіретін кәсіпкер бар

<a href="https://kyzylorda-news.kz/">Kyzylorda-news.kz.</a> «Қазгидромет» РМК-сы маусымның 10-ы күнгі ауа райы болжамын жариялады.Атмосфералық фронталды бөліктердің өтуіне байланысты Қазақстанның басым бөлігінде күн құбылмалы болады. Соған байланысты найзағай ойнап, жаңбыр жауады. Тек еліміздің батысында, солтүстік-батысында және оңтүстік-батысында ғана күн жауын-шашынсыз болады.Республика бойынша жел күшейіп, елдің шығысында шаңды дауыл тұрады, солтүстікте, шығыста, орталықта бұршақ жауып, шығыста, оңтүстікте дауыл тұрады, түнгі және таңғы уақытта солтүстікте тұман түседі.Алматы облысының солтүстігінде, орталығында, Жетісу облысының оңтүстігінде өте қатты ыстық сақталады.Алматы, Атырау, Маңғыстау, Жетісу облыстарының басым бөлігінде, Шығыс-Қазақстан, Батыс-Қазақстан облыстарының оңтүстігінде қатты ыстық болады.Түркістан, Ақтөбе, Қызылорда, Алматы, Маңғыстау, Жамбыл, Абай, Жетісу облыстарында, Атырау облысының солтүстігінде, шығысында, оңтүстігінде, Шығыс Қазақстан облысының солтүстігінде, солтүстік-батысында, Ұлытау облысының орталығында, Қарағанды облысының оңтүстігінде, Қостанай облысының оңтүстік жартысында, Ақмола облысының оңтүстігінде, шығысында төтенше өрт қауіпі сақталады.Күндіз Батыс Қазақстан облысының шығысында, оңтүстік-шығысында жоғары өрт қауіпі күтіледі. &nbsp;

Қазақстан және Қызылорда облысының жаңалықтары