<a href="https://kyzylorda-news.kz/">Kyzylorda-news.kz.</a> Сыр елінде дүниеге келген елге белгілі қаламгерлер жетерлік. Туындыларымен қоғамда болып жатқан жағдайларды қағаз бетіне түсіріп, халыққа жеткізіп отыратындар да солар. Сол қатарда Сыр бойылық белгілі жазушы, халықаралық «Алаш» және Қазақ ПЕН-клубы сыйлықтарының лауреаты Қуаныш Жиенбай да бар. Бүгінде қаламын серік етіп, 20-ға жуық кітапты жарыққа шығарған жазушымен сұхбаттасудың орайы келген болатын.– Қуаныш аға, ең әуелі жақынырақ танысып алсақ. Өзіңіз туралы қысқаша айтып өтсеңіз…– Аса қатты айта қоятындай ештеңе жоқ. Теңіз жағалауында өмірге келдім. Он жылдықты Бөген ауылында бітірдім. Сосын жұрт секілді оқу орнына түсуге талпыныс жасадық. Жетпісінші жылдардың басы, ол кезде ҚазГУ-дің журфагіне түсу үшін екі жылдық еңбек өтілімі қажет болатын. Мектеп бітіріп барғандықтан алғашқы жылы жолым болмады. Оған аса өкіне қойғаным жоқ. Сол жылы теңіздің тартылуына байланысты үйіміз Қазалыға көшіп келді. Өзім осындағы ПМК мекемесінде қара жұмысшы боп орналастым. Басықара бөгеті салынып жатқан кезең. Сондағы қауырт тірлік жайлы аудандық «Ленин туы» газетіне жазып тұрдым. Бірде газет редакторының орынбасары, ардақты ағамыз Әлмәмбет Әлішев корректорлық қызметке шақырды. Бір жылдай жұмыс істедім. Маған бұл үлкен сабақ болып, үйреніп, көп нәрсеге көзім жетті. Кейін оқуға түсіп кеттік. ҚазГУ-дің 3-ші курсынан республикалық «Лениншіл жас» газетіне жұмысқа орналастым. Өмір ары қарай өз ырғағымен жалғаса берді. Жазушы атандық, елге танылдық, бірақ мен үшін аудандық газеттің тәрбиесі мәңгілік есімде қалды. Ол ұзақ әңгіме…– Осы сұрақ көптен көкейімде жүрген еді. Жасыра алмаймыз, кеңестік кезеңде әдебиет – мемлекет саясатының жаршысы болды. Сол арқылы халыққа идеологияны сіңірді. Бүгінде қазақ патриорттарын тәрбиелеуде ұлттық әдебиетіміздің рөлі қандай?– Ұлттық әдебиеттің тоқырауға ұшыраған түгі жоқ, әдебиет даму үстінде. Десе де қазір уақыт та, заман да басқа, оқырманның талғам-таразысы бөлек. Сондықтан әдебиетке қойылар талап күшейді. Беталды қағаз шимайлайтын дәурен келмеске кетті. Иә, кеңес дәуірінде әдебиет партияның идеологиясын ¬басты орынға шығарды. Бірақ өзіне қойылар міндетті де естен алшақтатпады. Әдебиеттің мойны озық талай дүниелері сол кезеңде жазылды. Солар әлі күнге дейін кітап сөрелерінде шаң басып қалған емес, оқылады, зерделейтіндер бар. Тасқа басылған маржан сөздер балталасаң да өшірілмейді.– Қуаныш аға, бүгінгі балалар ертегі тыңдағаннан гөрі шет елдің мультфильмдерін көргенді жақсы көреді. Оның үстіне қазіргі ертегілердің теледидардан берілуі бәсеңдеп, радиодан айтылмай да кетті. Мұның кейінгі ұрпақ тәрбиесіне тигізер әсері қандай?– Бұл «Айта-айта Алтайды, Жамал апай қартайдының» кері ғой. Мәселе күн тәртібінен түскен жоқ. Ертегі тыңдайтын бүлдіршіндердің дені «Айфонның» тұтқынына айналғандығын өздері де сезбей қалды. Бұған бір жағынан ата-аналар да кінәлі, оларға бесіктегі сәбиі жыламаса болды. Дерт тым асқынып барады. Бұған қазірден тосқауыл қоймаса, коронавирусіңіз жолда қалады. Ал бұған дайын тұрған қандай рецепт барын білмеймін.– Күн сайын көзбен көріп жүрген, көңіліңіз толмайтын бүгінгі қоғам дертіне айналған мәселеге тоқталсаңыз…– Мәселенің көптігіне шашыңның түгі жетпейді. Және ол күн сайын тамырлап, өркен жайып барады. Ертеңгілік үйден шыға бере бір сүренсіз жағдай айқұлақтанып алдыңнан шыға келеді. Оны көрмегенсіп, айналып өте алмайсың. Мүлде көп... Ежелден қанға сіңген дағды – жастардан үлкен үміт күтеміз. Күн сайын тау қопарып тастаудың қажеті шамалы. Жастар алтындай уақытты бекерге өткізбесе деймін. Оларға жасалған мүмкіндік дегеніңіз сұмдық! Үйінде отырып-ақ интернет арқылы дүниені «төңкеріп» тастауға болады. Тек соған білім мен жігерді жетелей білетін құлшыныс болса…– Тәуелсіздік алғаннан бергі мезгілді саралап қараған адамға қазақ әдебиетінде проза жанрына келіп қосылған жастардың аздығы байқалады. Бұл құбылыстың себебін қалай түсіндірер едіңіз?– Бұл пікірге қосыла қоймаймын. Проза жазып жүрген жас жазушылар баршылық. Мәселе – олардың қалай жазуында ғой. Көпке қол шапалақтап қуануға болмайды, әрбір толқыннан мүйіздері қарағайдай екі-үш жазушы шығып, әдебиеттің абыройын асқақтатса, соның өзі үлкен олжа.– Бүгінде әдеби кітап оқитын жастардың қатары бәсеңдеп, керісінше әншілер, бизнесмендер жазған туындыларды оқуға құмартып тұрады. Шындығында жастардың әдебиетті оқымауына не кедергі? Әлде әдеби кітаптарды жарнамалау аздық ете ме?– Бизнес жолына түсіп, әлем жұртшылығын таңғалдырған алпауыттар жайлы қызық кітаптар ұшырасса, оны жата-жастанып неге оқымасқа?! Бизнесті биік дәрежеде жүргізу және оны сол деңгейде ұстап тұру – ақылға, өмірлік тәжірибеге байланысты. Күнделікті шай-судың шаруасынан аспайтын бизнесті мұрат тұтар тірлік деп ойламаймын. Біздің ¬жастар ауылдағы базар маңынан ұзап шығып, құлашты алысқа сермеуге тиіс. Ал жастар кітап оқымайды деген жаттанды, ескірген түсінік. Мұны сағыздай созып, айта берудің қажеті шамалы. Жақсы кітап қолға түспеуі мүмкін, бәлкім жарнама жағы жетімсіз шығар. Әйтсе де жақсы шығарма жерде қалмайды. Кітап оқу – жанға керек дәрумен. Жүректің дірілін, жан тебіреністі кітаптан басқа жерден тауып та, кездестіре де алмайсыз.– Қазақ әдебиетінің бүгінгі деңгейі қандай?– Алысқа бармай, бұған бір мысалдың төңірегіне ғана тоқталайын. Қазақ әдебиетінің қазіргі көзі тірі классигі, біздің жерлесіміз Әбдіжәміл Нұрпейісов ағамыздың елге, әдебиетке сіңірген өлшеусіз еңбегін таратып айтса молынан жеткілікті болар. Тоқсанның алтауына келген абыз ағамыз әлі ақ қағазбен күн сайын дидарласуын тоқтатқан емес. Және қағазға түскен әрбір сөйлемі мірдің оғындай тиген жерін ойып түседі. Таңғы шықтай тазалығын айтсаңшы... Жақында абыз ағамыздың 7 томдық шығармалар жинағы жарыққа шықты. «Қан мен тер» осы заманға лайықталып қайта жөнделген. «Осымен тоқтадым, енді жөндеп қалам тигізбеймін» дейді. Кім білсін? «Соңғы парыздағы» адамның жүрегін суырып алатындай соңғы тарау, соңғы аккорд қандай?! Үлкенімізге де, кішімізге де үлкен өнеге. Өз басым сөздің құдіретіне соншалық мән беретін одан басқа қаламгерді кездестірген емеспін. Орайы келгенде, сөйлесіп, пікірлесіп тұрамын. Әр кездесу мен үшін баға жетпес қазына. Қазақ әдебиетінің бүгінгі өсу деңгейін осы өлшеммен безбендей беріңіз. Ағамызға ұзақ ғұмыр тілейік. Ортамызды толтырып, аман-есен жүре берсін!– Құлазыған көңіліңізді не көтереді?– Көңілдің құлазуы – шау тартып, шаршағандықтың белгісі. Құдайға шүкір, әлі ондай күйді бастан кешкеніміз жоқ. Бос уақытым бола бермейді. Әрі газет тілшілеріне сұхбат та бере бермеймін. Қазалыдан, аудандық газеттен деген соң қолдау көрсетіп отырмын. Ол – менің жастық шағымның белгісі қалған үлкен мектеп қой. Өтінішіңді аяқасты етпегенім содан, шығармашылық ұжымға менің атымнан сәлем айт. Аман жүргендеріңізге тілекшімін.– Уақытыңызды бөліп, сұхбаттасқаныңыз үшін рахмет!

Қуаныш Жиенбай: Жастар уақытты бекерге өткізбесе екен

<a href="https://kyzylorda-news.kz/ru">Kyzylorda-news.kz.</a> Биылғы жылдың І-жартыжылдығында облыс соттарының өндірісіне 10301 талап қою түскен. Басым бөлігі банк келісім-шарттары және нотариалдық іс-әрекеттерге байланысты арыздар мен шағымдар. Бұл туралы Қызылорда облысының өңірлік коммуникациялар қызметінің ақпараттық алаңында өткен брифингте Қызылорда облыстық сотының азаматтық істер жөніндегі сот алқасы төрағасының міндетін атқарушы Мұхтар Еркінбеков мәлімдеді.<blockquote>-Биыл соттар өндірісіне сот бұйрығын шығару тәртібімен қаралған арыздар саны өткен жылдың осы мерзімімен салыстырғанда 5,3 пайызға артты. Ал, ағымдағы жылдың 6 айында сот бұйрығы – 1006, жалпы аяқталған істің 13,1 пайызды құрады,-деді Мұхтар Жүсіпбекұлы.</blockquote>Жалпы татуласу рәсімдері бойынша 1167 істі жүргізу тоқтатылған. Оның ішінде, татуласу келісімімен 39 іс аяқталды.<blockquote>- Осы жылдың 6 айында соттар өндірісіне 521 қылмыстық іс түскен. Бүгінде 513 қылмыстық іс аяқталды. Бұған қоса, 6 адамға қатысты ақтау үкімі қабылданды. Ал қысқартылған істер 16 пайызға кеміді. Яғни 73 қылмыстық іс қысқартылды,-деді Қызылорда облыстық сотының қылмыстық істер жөніндегі сот алқасы төрағасының міндетін атқарушы Бақытжан Қалымбет.</blockquote>Сот актілерінің күштері жойылған 29 іс бойынша жаңа шешім қабылданса, 16 іс бірінші саты соттарына қайта қарауға жолданды. Ал, 2 іс бойынша талап арыз қараусыз қалдырылды. 17 іс өндірісі тоқтатылды.&nbsp;

 Қызылордада татуласу келісімімен 39 іс аяқталды

<a href="https://kyzylorda-news.kz/ru">Kyzylorda-news.kz.</a> Күнделікті өмірде «Қарусыз майдан» деген сөз тіркесін жиі қолданамыз. Бұл тіркесті тәптіштеп түсіндірудің қажеті де шамалы. Орнымен қолдана білген жанға ең басты қару – тіл екендігіне ешкімнің дауы бола қоймас. Бірақ қару сөзін естігенде көз алдымызға пышақ, бәкі секілді суық қару түрлерінен бастап тапанша, қолдан жасалған обрез, мылтық, автомат сынды от қарулары елестейтіні анық.Білесіз, елімізде мұндай қарулардың қай-қайсысын болмасын рұқсатсыз ұстап, қалай болса солай қалаған жеріңде пайдалануға заң жүзінде қатаң тыйым салынған. Керек десеңіз, сотталасыз да. Алайда, заңға бас иіп, құлақ асып жатқандар қатары азаяр емес. Кешегі келмеске кеткен 90-шы жылдарғы криминалдық топтардың тапа тал түсте кез келген базарлар мен қала көшелеріндегі атыс-шабысын айтпағанда, қазірдің өзінде заңсыз қару асынып, дәулетіне тасынып жүргендер арамызда бар. Оған аудандық полиция бөлімі берген суыт хабарлар дәлел бола алады.<blockquote>– Жыл басынан азаматтардан заңсыз сақталған барлығы 24 қару-жарақтар тәркіленді. Оқыс оқиғалардың алдын алу мақсатында республика бойынша соңғы он жыл көлемінде ІІМ бастамасымен азаматтар арасында «Өз еркімен қару өткізу» акциясы жүргізіліп келе жатыр. Акция ережесінде көрсетілгендей, өз еркімен қару өткізушіге өткізген қаруының маркасына, қай елде және қашан шыққанына, пайдалануға жарамды-жарамсыздығына және басқа да ерекшеліктеріне қарай белгілі бір мөлшерде өтемақы төленеді, – дейді аудан сақшылары.&nbsp;</blockquote>Айта кетейік, аталған акция барысында өткен жылы облыста 116 қару-жарақ қабылданып, заңсыз айналымнан шығарылды.

Шиелі ауданында алты айда 24 қару-жарақ тәркіленді

<a href="https://kyzylorda-news.kz/ru">Kyzylorda-news.kz.</a> «Ауыл – ел бесігі» жобасы аясында бөлінген қаржыны игеру бойынша Қызылорда облысы үздік өңірлер қатарында. Бұл туралы ҚР Премьер-министрі Әлихан Смайылов аталған жобаны жүзеге асыру мәселелері талқыланған Үкімет отырысында хабарлады.Ұлттық экономика министрі Әлібек Қуантыров жобаны жүзеге асыру барысын баяндады. Сондай-ақ, бірқатар облыс әкімдері атқарылған жұмыстар туралы хабарлама жасады.Үкімет басшысы 2019-2022 жылдары әлеуметтік және инженерлік инфрақұрылымды дамыту бойынша мыңнан астам ауылда 3,7 мыңнан астам жоба іске асырылғанын, сондай-ақ 33 мың жұмыс орны ашылғанын атап өтті.<blockquote>«Биыл 800 елді мекенде шамамен 2 мың жоба жүзеге асырылады. Бөлінген қаржыны игеру қарқыны Павлодар, Ақтөбе, Қызылорда облыстарында жақсы», - деді Премьер-министр.</blockquote>Мұнан бөлек, жиында ауылдық елді мекендерді дамытуға жеке кәсіпкерлерді тартудың үлгілері атап көрсетілді. Мысал ретінде Жаңақорған және Сырдария аудандарында саябақ салуға қаражат бөлген «Азимут» ЖШС мен «Абзал и К» ӨК үлесі туралы айтылды.Отырысты қорытындылаған Үкімет басшысы «Ауыл – ел бесігі» жобаларын сапалы және уақытында іске асыруды қамтамасыз ету, сондай-ақ оларды барынша қаржыландыру мәселесін пысықтау қажеттігін атап өтті.<figure class="image"><img src="https://knadmin.beoblood.kz/uploads/363310232_583095340678381_6497643357361824024_n_f2cbba62c3.jpg" alt="363310232_583095340678381_6497643357361824024_n.jpg"></figure>

Қызылорда облысында «Ауыл – ел бесігі» жобасы бойынша бөлінген қаражатты игеру қарқыны жоғары

<a href="https://kyzylorda-news.kz/">Kyzylorda-news.kz.</a> Бұрнағыда құрақ құрау мата қиындысын ысырап етпес үшін жасалған екен. Ал бүгінде сол құрақтан әдемі етіп тігілген көздің жауын алар көрпелер әр шаңырақтың көркі. Әдетте бұл іске ебі барлар құрақ құраумен қатар түрлі төсеніш, жапқыш, перде, қоржын сияқты бұйымдарды тіге береді. Еңбекші ауылында осы өнермен айналысатындардың бірі – Сымбат Өскенбай.Жас кәсіпкердің ісмерлігін білмекке өзіне жолығып, әңгімелестік. Қолөнерге келуіне әжесі Әсем Әлжанова мен анасы Жанат Нұрылла сеп болыпты. «Қолөнерге қызығушылық бала кезден оянды. Қуыршақтарыма түрлі көйлектер тігіп, кигізіп қоятынмын» дейді кейіпкеріміз. Мектепті тәмамдаған соң, «Алматы мемлекеттік сервис және технологиялар» колледжіне тігінші мамандығын аяқтаған. Қолөнермен айналысып келе жатқанына біраз жылдың жүзі болыпты. Көрпе-көрпешелердің неше түрін тігетін шебердің қолынан шыққан ұлттық нақыштағы бұйымдарға қызығушылар көп екенін айтады ол.Бұл төңіректе Сымбатқа тапсырыс берушілер қатары әсте үзілген емес. Бұл істі кәсіп етіп, нәпақасын тауып отырған ол қазіргі кезде әлеуметтік желі арқылы да өз өнімдерін қалың жұртқа таныстырады. Ауылда отырып-ақ ғаламтордың жетістіген өз пайдасына жаратып жүрген жайы бар. Қолынан шыққан дүниелерін қалай дайындайтынын әлеуметтік желіге жүктеп, тиісінше табыс тауып отыр.<blockquote>– Жұмыс үрдісімді бейнежазбаға түсіріп, өңдеп, жүктеп отырамын. Қызығушылық танытып, үйретіңізші деп жататындар баршылық. Қаралым саны артумен бірге пікір жазушылардан «Бізге толық түсінікті болуы үшін онлайн сабақ өтіңізші» деген өтініштер де түседі. Бірақ мен онлайн емес, оффлайн үйреткім келеді. Өзімнің арнайы тігін оқу шеберханасын ашу жоспарымда бар, – дейді жас ісмер Сымбат.</blockquote>Жас та болса, бір кісідей ұрпақ тәрбиесі үшін өз кәсібін түрлендіріп жүрген жанның кезекті бастамасы бізді қуантты. Бүгінде кейіпкеріміз тек қазақы нақыштағы көрпеше, жапқыштардан бөлек, балалар ойыншығын, киімдерін тоқып жүр. Тәрбиеге айрықша мән беруді, оның тал бесіктен бастау алатынын бәрінен де жоғары санайтын Сымбат облыстық «Декоративті-қолданбалы өнердің» І орын иегері. Мұнымен қоса түрлі қолөнер байқауларына қатысып топ жарып жүр.<blockquote>– Жасыратыны жоқ, қазір балалардың денсаулығына зиянын тигізетін ойыншықтар қаптап кетті. Оның орнына осындай тоқылған кері әсері жоқ жұмсақ ойыншықтарды жасап, балғындардың қызығушылықтарын арттырып жүрмін, – дейді ол.</blockquote>Ауданда кәсіпкерлікті қолдайтын ұйым барын, арнайы мемлекеттік мекеме де жұмыс істейтінін, оған жүгіну үшін алдымен ауыл әкімдігінен жөн-жосығын, бағыт-бағдарын біліп алу керектігін айттық.Жастайынан анасының қасында кесте тігіп, қол машинасын жүргізген Сымбаттың бұл қадамына қуандық. Атадан балаға мирас болып жеткен ұлтымыздың төл өнерін жалғастырған ісмерге толайым табыс, тілейміз.

Шиелілік ісмерге тапсырыс берушілер қатары азайған емес

<a href="https://kyzylorda-news.kz/ru">Kyzylorda-news.kz.</a> &nbsp;Қызылорда қаласының тұрғыны Талант Сақтаған қазіргі таңда лазерлік кесу технологиясы арқылы ағаштан түрлі бұйымдар жасап, тұтынушылардың көңілінен шығып жүрген кәсіпкер, әрі қолөнер шебері. Ол 2020 жылы «Бизнестің жол картасы – 2020» бағдарламасы шеңберінде 2 млн көлемінде мемлекеттік грантқа ие болды. Таланттың кәсібі – лазермен ағашқа ойып жазу. Грант қаражатына сатып алған қондырғының көмегімен ағаштан тойбастар, кәдесыйлар жасайды. Тапсырыстар ептеп емес, көптеп түсіп жатыр екен.<blockquote>– Ағаштан ойып жасаған алғашқы затымыз – оқушылар қолданатын кәдімгі сызғыш. «Мұндай кеңсе тауарының түрі-түрі дүкенде самсап тұр» дерсіз. Біздің өнімнің ерекшелігі сол, арнайы тапсырыспен, балалардың есімін ойып тұрып жасаймыз. Әрі бағасы қолжетімді. Жұмысты бастағанымызға аз уақыт болса да, өнімдерімізге сұраныс артып жатыр. Кәсіпкерлікте ең алдымен өз ісіңді жақсы көру керек. Қазір ғаламтор арқылы көптеген идеяларға қол жеткізуге болады. Тек ерінбей жалықпай еңбектене білсеңіз болғаны, – дейді кәсіпкер.</blockquote>Шығармашылығын дамыта келе, тапсырыс берушілердің сұранысына орай ағаштан қойын дәптер, жұмыс үстеліне қажет органайзер, түрлі кәдесыйлар жасауға көшті.Сонымен қатар кейіпкеріміз лазерлік кесу технологиясы арқылы соңғы кездері ағашқа шежіре жазу тәсілін меңгерді. Бұл жерде әр отбасының руы, ата-бабалар тізімі жарияланады. Бұл ұрпақтан ұрпаққа естелік, әрбір шаңырақтың төрінде ілулі тұруы тиіс мұрағат десек болады.<figure class="image"><img src="https://knadmin.beoblood.kz/uploads/362691190_1463621887732337_8643179350283886366_n_0fcd4b5e2f.jpg" alt="362691190_1463621887732337_8643179350283886366_n.jpg"></figure>&nbsp;<figure class="image"><img src="https://knadmin.beoblood.kz/uploads/361576302_1463621877732338_4707152271942745530_n_53eb494c3b.jpg" alt="361576302_1463621877732338_4707152271942745530_n.jpg"></figure>

«Бизнестің жол картасы – 2020»: Қызылордалық шебер грант алып кәсібін жолға қойды  

<a href="https://kyzylorda-news.kz/ru">Kyzylorda-news.kz.</a> Жасөспірімдердің жүгенсіздігі, олардың қоғамдағы құқық бұзушылығы күн тәртібіндегі өзекті мәселесіне айналды. Әсіресе, жазғы демалыс уақытысында оларға деген бақылау күшейді. Осы мәселелер төңірегінде аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті.Комиссия отырысында балалар бұзақылығынан бөлек, құқық бұзушылықтың профилактикалық шаралары, 2023 жылғы 6 айдың қорытындысы түйінделді. Сондай-ақ, білім беретін мектептердің 2023-2024 оқу жылына дайындығы, аудандық білім бөлімі жанындағы қамқоршылық, қорғаншылық органның атқарылған жұмыстары туралы да баяндалды.Бір ойланатын жайт, бұл бір күндік ерегіс емес, есті алып, есесі кеткен егестің, көкіректе қатқан кек пен ызаның, өшпенділіктің көрінісіндей әсер етті. Ана сүті аузынан кеуіп үлгірмеген баланың жан-дүниесін кеулеген ненің кегі, ненің құсасы мен күйігі деп ойымыз онға, санамыз саққа кетуде. Басы төбелеспен басталып соңы аяусыз қатыгездікке апарып соқтыратын түйткілді жағдайлардың түп төркінін қайдан іздейміз, себеп-салдарын қалай тоқтатамыз? Осының жолын тауып, тосқауыл қоя аламыз ба?Болашақта желкенімізді түзеп, толыққанды қоғамға тоқ көңілмен қадам басуымыз үшін ең маңыздысы осы. Аймақ басшысының бірінші күннен бастап бала тағдырына баса мән беріп, өңір бойынша «Отбасы – тәрбие бесігі» атты келелі кеңес өткізуге дем беріп, кешенді іс-қимыл бағдарының түзілуін талап етіп отырғаны содан. Бір өкініштісі, жауапты тұлғалар жұмысын өз мәнінде жүргізе алмай отыр, дұрысы халықтық қағидамыз қазығынан ажырап, қолдан шығып кеткен сабақтастық дәстүрін діңгегіне қайта қиюластыра алмай келе жатырмыз.&nbsp;Жиынды аудан әкімі орынбасары Бектас Нуридинов жүргізді. Ол жасөспірімдер арасындағы тәртіпсіздіктерді анықтау, салдарын жою бағытында рейд жүргізгенде өзі байқаған келеңсіз көріністерді көптің назарына ұсынды. Нақтылап айтқанда, түн баласында ата-ана қарауынсыз көше кезген мектеп оқушыларының біразы қолға түсіпті. Кент орталығының өзінде жеті жерде орналасқан компьютер ойын орталықтарында құмарлық қызығына түсіп басқа дүниені тарс есінен шығарған жеткіншектердің ата-аналары беймезгіл көше кезген баласының осы қылығынан хабары бар ма екен? Жеткіншектерге ата-ана қарауынсыз жүруге тыйым салынған бейуақытта есігін айқара ашып қойып, балақанның басқа әлемге бауыр басуына жағдай жасап беріп отырған тек бір күндік пайдасын ойлаған кәсіпкерлерге ескертуден кейін ережеге бағынбайтын болса кәсібін тоқтатуға шара көрілетіні туралы да айта кетуді ұмытпапты. Келесі кезекте «Балалар мен жасөспірімдер арасында қылмыс пен құқық бұзушылықтың алдын алу» шаралары жөнінде аудандық полиция бөлімінің бастығының міндетін атқарушы Айбол Жолдасбаев баяндады.– Биылғы жылы жасөспірімдер арасында қылмыстылық жағдайлары тіркелмегенін айтты ол. Ал әртүрлі әкімшілік құқық бұзушылықтарға жол берген жағдайлар бойынша 143 хаттама толтырылған. Солардың қатарында түнгі 22-ден таңғы 6-ға дейін ойын-сауық мекемелерінде анықталған жасөспірімдердің ата-анасына ескерту және айыппұл салыныпты. 7 ата-ананың ісі сотқа жолданған. Көше-көшеге бөлініп, себепсізден сылтау тауып, топтасып төбелесе кету де кенеттен бой беріп қалып жүргенін, сондықтан полиция бөлімі қызметкерлерінің мобильдік тобына қырағы қадағалауға пәрмен беріліпті.– Қазірде кәмелетке толмағандар арасындағы құқық бұзушылықтар мен қылмыстардың алдын алуда аудандық ішкі істер бөлімі талапқа сай жұмыс жасауда. Яғни аудандық білім бөлімімен бірлесіп жастар мен жасөспірімдер арасындағы топтасқан құқық бұзушылық пен қылмыстардың алдын алу жоспары бекітілді. Ойынсауық орталықтарында, оның ішінде компьютерлік клубтарда түнгі сағат 22-ден кейін жүрген №125 мектептің 4, №163 мектептің 3 оқушысы анықталды. Сонымен қатар №163 мектептің 6 сынып оқушысы ойын сауық мекемесінің барына жұмысқа жалданған. №51 мектептің 5 оқушысы түнгі сағат 23-тен кейін өз беттерінше жүргені белгілі болды. Келесі күнгі рейд ауылдарда жалғасып, біраз шетін мәселелердің беті ашылды. Кәмелетке толмағандар арасындағы құқық бұзушылықтың алдын алу – қоғамдағы қылмыстың алдын алудың аса маңызды аспектісі. Жастарды заңды, әлеуметтік пайдалы қызметке бағыттап, өмірге ізгілікті көзқарас қалыптастырып, қылмыстылыққа жол бермейтін қағидаларға тәрбиелеу қажет. Мұндай жауапты жұмысты ата-аналар сезініп, сергек қарағанда ғана нәтиже болады, – дейді Айбол Жолдасбеков.Жалпы, аудан бойынша қолайсыз отбасында тәрбиеленіп жатқан балалардың саны 43, оның үшеуінің ата-анасының екеуі бірдей ішкілікке салынып, тіркеуге алынды. 68 бала мектепішілік бақылауға алынған. Өгей әке немесе өгей шешемен тұратын бала саны 131. Құзырлы орындар тарапынан кент орталығындағы №125 және 163 мектептерде ішінара топтардың құрылғандығы жөнінде мәлімет бар. Бұл бағытта әр баламен жекежеке жүйелі жұмыстар жүргізілуі керек. Қазіргі уақытта ораза айы болуы себепті мектеп оқушыларның түнгі уақытта атаанасының қадағалауынсыз мешіттерге баруына тыйым салынуы керек. Оқушылардың басты міндеті білім алу болса да тиісті бақылау болмауы себепті балалардың беймезгіл уақытта басқа мақсаттармен көшеден табылуы жағдайды ушықтыра түсуі мүмкін. Бұл бағытта үйде ата-аналар бақылауды күшейту керек, – деді сала басшысы.Келесі кезекте сөз алған ауданның бас имамы Әбдіхалық Нематовтың бала тәрбиесін нығайтуға бағытталған ұсыныстары мен өзіндік тәжірибелері біздің көп тұжырымдарымыздың теріс екендігін еріксіз мойындауымызға әкеп тіреді. Өйткені не үлгі өнеге болмасын хақ талабымен үндескен кезде онымен теңесетін күш-құдіреттің болмауы заңды да.– Бүгінгі мәжіліс исламдағы ең қайырлы мәжілістің бірінен болсын, – деп сөз бастады ол. Біраз ескертулер айтылуда. Кешкісін балалар мешітке бармасын, жұмаға қатыспасын деген талаптар да болып жатыр.Адамға бірінші иман керек, ихсан керек. Полиция көрмей тұр деп қорықпайтын бала иманы болса Құдай көріп тұр дейді. Құдайдан қорыққан ешқашан қиянатқа бармайды. Сол үшін біз әрбір баланың жүрегіне иман, ихсанды егуіміз керек. Бірақ мешітке келуге тыйым салынған соң, заңға бағыну керек, мешіттерге бала келіп жатқан жоқ. Ораза кезіндегі тарауих намазына бірлі-жарым ата-анасына еріп келіп жүргендер бар.Қазақта «Әкеге қарап ұл өседі, шешеге қарап қыз өседі» деген мәтел бар. Оның мәнісі, бала ата-ананың айтқанымен емес, соның үлгісімен жүреді деген сөз. Біз мектептерге барып жақсы сөзімізбен жеткіншектердің жүрегін жібітіп қайтатын едік. АНТ тобында міндетті түрде дін өкілдері болып жас өскінге ата-анасын құрметтеу, үлкенді сыйлау, амандасу әдебі, ізгілік пен шапағат жөнінде кең түсінік беретінбіз. Имам ешқандай теріс нәрсені айтпайды. Құранда 40-тан астам аятта әке-шешемізге жақсылық жасауды бұйырады. Кейінгі уақыттарда діннен хабары жоқ адамдар насихатты жүргізіп жүр. Осыдан келіп діннен ғана емес адамшылығымыздан ажырап қалмаймыз ба деген уайым мазалайды бізді. Мынадай қатыгездіктердің түп-төркіні келешегіміздің тым таязданып, рухани жұтап бара жатқанының белгісі емес пе деп қауіптенемін. Исламдағы бағасы жоқ бала тәрбиесінен алшақтағанда ұтқанымыз қайсы?Соңымызда жақсы із қаларлықтай әрекеттенуіміз керек. Мен өзім тұратын ауылда мұғалім азаматтар балалардың төбелесіп, боғауыз сөз айтып, өзімен өзі қырқысып жатқан көрінісін жасырын камераға түсіріп алған екен. Осы балалардың әкелерін мешітке жинап, әлгі сюжеттерді көз алдарына тостық. «Астапыралла» деп жағасын ұстады ата-анасы. Бір жесір ана өзі тәрбиелеп жатқан жалғызының даладағы жағдайын көргенде жүрегімен жылады. Көз алдында жүрген баласының шын бейнесін көріп бәрі де өз кемшілігін мойындады. Ал балалар өздерінің қателіктері үшін кешірім сұрады. Міне, бала тәрбиесі үшін сен-мен деспей қоғам болып жұмылуымыз керек, – деді бас имам. Жиында №125 мектептің тәрбие ісі жөніндегі меңгерушісі Ақерке Шайхова, қоғам белсендісі Айгерім Қарабаева, аудандық жастар ресурстық орталығы директоры Наурызбай Орынбасар ұсыныстарын ортаға салды.Аудан әкімінің орынбасары Бектас Нурдиновтің төрағалығымен өткен жиынның мазмұны өте терең. Өйткені, қазір балалардың әрбір іс-әрекеті бақылау мен қадағалауды қажет етеді. Әсіресе, балалардың ұсақ бұзақылығы, ұрлық жасауға жол беруі өзекті тақырып болып тұр. &nbsp;Аудандық білім бөлімі басшысының уақытша міндетін атқарушы Ербол Альменов, аудандық полиция бөлімі, жергілікті полиция қызметінің басшысы Бақытжан Көркембаев және аудандық білім бөлімінің бас маманы, білім бөлімі жанындағы қамқоршылық және қорғаншылық функциясын жүзеге асырушы органның жауапты маманы С Алдабекова баяндама жасады.Атаулы жиынды қорытындылаған аудан әкімінің орынбасары жастардың тәрбиесінде отбасындағы тұрақтылық пен берекенің ерекше екенін айтып «Отан – отбасынан басталатынына» – назар аудартты.Расында, балаға ата-ананың берген тәрбиесін ешкімде алмастыра алмайды. «Әкенің тәрбиесін жүз мектепте бере алмайды» деген сөз осындайда айтылған болар...

Жаңақорғанда жасөспірімдер жүгенсіздігі талқыланды

<a href="https://kyzylorda-news.kz/ru">Kyzylorda-news.kz.</a> Жаңақорған аудандық білім бөлімінің ұйымдастыруымен Садықбек Сапарбеков атындағы 125 орта мектептің спорт алаңыңда “Садақ ату” ұлттық ойын түрінен жарыс өткізілді. &nbsp;Бұл күні қазақша күрес, асық ату және тағы басқа да ұлттық ойын түрлерінен жарыстар өткізу көзделген. Ауданымызда ұлттық құндылықтарымызды насихаттау мақсатында жасөспірімдер арасында қазақ күресі, еркін күрес, асық ату, ләңгі тебу түрлерінен аудандық спорттық жарыстар өткізілді. Атаулы шараға аудан әкімінің орынбасары Бектас Нүрдинов және аудандық бөлім басшылары мен жалындаған жастар қатысты. Алғы сөзді аудан әкімінің орынбасары Бектас Балғабайұлы алып, &nbsp;шараны ашып берді.– Қазақтың ұлттық ойын түрлері мазмұндық жағынан адамды жауынгерлік рухқа тәрбиелейтін маңызды дүние. Әсіресе, садақ ату – қазақтың қанына сіңген өнер. Қалың нөпірді қақ жарып, дода ортасынан керіп тұрып садақ тартқан, мергендік өнерімен мәлім білекті жігіттерді көргенде жүрегі жарылмайтын қазақ бар ма? Жер жүзіне Ұлы даладан тарағанын тайға таңба басқандай етіп көрсеткен. Бұл да болса, біздің төл тарихымыздың қайта жаңғырғанының белгісі. &nbsp;Жақында ғана жаңақорғандық жас шабандоз Ғалымжан Өміртай Жамбы атудан Қазақстан Республикасының V чемпионатында чемпион атанып, бөркімізді аспанға аттық. Бұл бүгінгісі. Әуелі әңгіменің әлқиссасын әріден бастасақ.Биыл араға 20 жыл салып садақ атудан қазақстандық спортшылар Олимпиада ойындарына командалық жолдамаға қол жеткізді. Бұл қуанатын жағдай болғанымен, қазақ үшін таңданатын жәйт емес. Тарихқа көз жүгіртсек, садақ қадым заманынан бері көшпелілердің иығынан түспеген, қазақтың дәстүр-салтымен біте қайнасқан қымбат мұра деуге болады, – ұлттық спорт түрінің тарихына тоқталып өтті.Расында, тас дәуірінен ХХ ғасырға дейін оқ пен жебені жанына серік етіп, құралайды көзге атқан мергендер болғанына тарих куә. Бірі адырнасын сайлап аңға шықса, екіншілері соғыста жаудың бетін қайтарып, егемендік жолда қан кешкен. Алайда XXI ғасырда садақ атудан қазақ оғландары топта оза шаба алмай жүр. Садақ пен қазақ егіз ұғым. Садақты бабаларымыз ерте кезде аң аулауда, кейін соғыс ісінде қару ретінде қолданған. Тарих беттерін парақтасақ бес қаруын сайлап, қазанат мінген жау¬жүрек батырлардың ұлан-ғайыр байтақ даланы ұрпақ үшін қорғап қалған ерлігі біздерге өнеге. Көйлегін қанмен жуған батыр бабалар ат үстінде жүріп садақ атудың мергендік өнерін меңгерген. Сақ пен ғұнның бірден-бір мұрагері саналатын ата-бабаларымыздың садақ атудағы шеберлігін бүгінгі ұрпақтың тек кітаптан оқып, аңыз-әңгімеге еліртіп жүргені қынжылады. Көшпенді өмір салтын ХХ ғасырға дейін, ұрпақтан-ұрпаққа мирас етіп сақтап келген біздің қазақтың садақ жасау технологиясы мен оған қатысты төлтума атаулары мен ұлттық ойындары да әзірге ғылыми-зерттеу нысанына толық айнала алмады. Ердің бес қаруының бірі саналатын садақты қазіргі ұрпақ тек музейден ғана көруде. Садақ ату мен қазақтың арасындағы біте байланысқан деректерге қарамастан, қазіргі таңда еліміздің мергендері садақ ату спортынан дүбірлі додаларда жүлде салмағаны біраз ойға жетелейді. Садақтың баптауын келтіре алмай жүрміз бе, әлде садақ ату спорты бізге бейтаныс па? Халықаралық бәсекелердің ішіндегі ең абыройлысы да дәл осы – Олимпия ойындары. Аталған төрт жылдықтың басты додасында корей мергендерінің бәсі жоғары. Оңтүстік Корея 1972 жылдан бастап жарыстарға дербес қатыса бастаған ел. Өздері өнер көрсеткен Олимпия ойындарында корей елі садақ ату спортынан 23 алтын, 9 күміс және 7 қола жүлдеге қол жеткізген. Осылайша оңтүстіккореялық спортшылар Олимпиададағы жетістіктері жөнінен ешкімді маңына жуытпайды. Садақ ату спортындағы медаль саны бойынша екінші орында тұрған АҚШ-тың қанжығасында 17 алтын жүлде бар екенін ескерсек, әзірге корей мергендерін тоқтату өте қиын.Бүгінгі таңда Жаңақорған ауданында да мергендердің мектебі қалыптасып келеді. Бұл жөнінде біз ат спорты түрлерінен Сыр өңірінің жаттықтырушысы, білікті бапкер Исламхан Боранбаевтың да пікірін білген едік.– Біздің елде жас садақшылар бар, олардың деңгейі жоғары. Әзірге біз олардан жеңіс жолындағы жалынын, жігерін көре алмаудамыз. Біз ат спортын баптайтын болғандықтан кейде жамбы атуға жағдай жасалмағанын көріп еңсеміз түседі. Тек ірі мегаполистерде болмаса, қалған өңірлерде бұл спорттың түрі жоқтың қасы. Бұл дұрыс емес, өйткені нағыз ауылдың баласынан садақ ату спорты шығатынына сенімдімін. Сондықтан бабадан қалған бұл спорт түрлеріне әлі қолдау керек, сосын барып нәтижесін сұраған абзал, – деді бапкер.Қазіргі кезде жамбы ату спортының халықаралық деңгейдегі беделі өсіп келеді. Осы спорт түрінен &nbsp;саңлақтардан күтеріміз көп. Сыр өңірінен шыққан тұңғыш, әрі ең жас чемпион, жаңақорғандық Ғалымжан Өміртай жуырда Жамбыл өңірінде өткен Қазақстан Республикасының V чемпионатында топ жарған болатын.– Маған садақ ату мен ат жалында жүріп атой салу қаннан келген қасиет. Қазақтың әрбір баласы атқа міне алады, бабын келтірсең садақты да ата алады. Әрине садақ ату оңай спорт емес. нысана көздеп, діттеген жеріңе жеткізе білу аса шеберлікті талап етеді. Бізде садақ атуды қолдаудан бұрын, оны насихаттап, жастар арасында қызығушылықты тудыру кемшін қалған. Егер осы айтылғандар кезең-кезеңімен жүзеге асса біз алмайтын асу, біз бағындырмайтын белес жоқ, – деді жас чемпион. Қорыта &nbsp;айтқанда, төрткүл дүниенің бәсекелерінде қоржынымызға уыстап олжа салмауымыздың басты себебі – садақ ату спортына жеткілікті көңіл бөлмей келе жатқанын көрсететіндей. Сондықтан садақ ату өнерін жастар бойына тереңірек сіңдірсек, қанмен келген қасиетті бойына дарытып, жігерін жанысақ онда біздің елдің спортшылары әлемдік ареналарда, әсіресе тәуелсіздік алғаннан бергі арман болған Олимпиада алтынын алып берер еді. Ол күнге де жетерміз. Міне, шара барысында осындай ұлттық спорт түріне қатысты сан алуан өзекті ойлар айтылып, жастарға бағыт-бағдар берілді. Шара соңында, жеңімпаз жүлдегерлер аудандық мәдениет және спорт бөлімінің грамоталарымен марапатталды.

Жаңақорғанда ұлттық ойындар ұлықталды

<a href="https://kyzylorda-news.kz/ru">Kyzylorda-news.kz.</a> Жаңақорған аудандық "Ордакент ардагерлер, жастар ресурстық орталығы" ғимаратында аудан әкімдігі мен аудандық қоғамдық даму бөлімінің, "Қызылорда облысының Жастар Одақтары" қб-нің ұйымдастыруымен аудан тұрғындары арасында құқық бұзушылыққа, қылмыстылыққа, сыбайлас жемқорлыққа қарсы тұру, құқықтық сауаттылықты арттыру мақсатында сурет салу байқауы өтті.&nbsp;Байқаудың мақсаты: Сыбайлас жемқорлыққа қарсы тұру, қосымша көркем білім беруді дамыту, білім алушының тұлғасын тәрбиелеуде, оқытуда және шығармашылықта дамытуда балалар көркем мектептерінің рөлін арттыру. Қатысушылардың ой-өрісін кеңейту, өздерінің көркем қабілеттерін, дағдыларын, қиялын және даралығын көрсету болып табылады.Байқау барысында қатысушылар тақырыпқа сәйкес сурет салып, оған тақырып қойып, мән-мағынасын түсіндіріп көрсетті. Сонымен қатар, 9 сынып оқушысы Ақбота Жұмабайқызы өзінің салған суретін көпшілікке көрсетіп, сыбайлас жемқорлық тақырыбында көрермендерге баяндама оқып берді.– Сыбайлас жемқорлықпен күрес бүгінде көптеген елдер үшін өзекті мәселеге айналып отыр. Соның ішінде біздің еліміз де жемқорлықпен күресті жыл өткен сайын күшейтіп келеді. Бүгінде сот тәжірибесінде сақтандыру шарттарынан туындайтын даулар жиі кезедеседі. Мұндай даулар Қазақстан Республикасының Азаматтық кодексі (ерекше бөлім) мен «Сақтандыру қызметі туралы» заңға сай реттеледі.Дерек көздеріне сүйенсек, сақтандыру жүйесінің тарихы тереңде екенін аңғару қиын емес. Мәселен, осыдан 3,5 мың жыл бұрын Вавилон патшасы Хаммурапи тасқа қашап сақтандырудың заңды негіздерін бір жүйеге келтірген. Бұл тарихта Хаммурапи заңы деген атаумен қалған. Аталған заң барлығы 282 баптан тұрса, оның 55 бабы сақтандыру жүйесін қамтыған. Ал, біздің елімізде сақтандыру тұңғыш рет кеңес өкіметі орнағаннан кейін енгізіліп, сақтандыру мемлекеттік іске айналған. Мәселен еліміздің Қылмыстық кодексіне сай, пара алғандар бас бостандығынан айырылып қоймай, сыйақының 50-80 еселенген сомасын қайтаруы талап етілуде. Сонымен қатар, заң бұзғандар өмір бойы мемлекеттік қызмет атқара алмайды. Пара алған да, пара берген де, парақорлыққа делдал болған да жазасыз қалмайды. Дүниеге, ақшаға қызығушылық болған жерде бұл қылмыс жалғаса береді. Ал, оны түбегейлі жою үшін әуелі сананы өзгерткен дұрыс. Олай дейтініміз, жемқорлыққа ең жоғары жазаға тағайындаған бір ел болса, ол – Қытай. Мұнда сыбайластыққа жол бергендер өлім жазасына кесіледі. Бірақ, жазаның қаталдығының өзі Қытайдағы жемқорлыққа тыйым сала алмауда. Жыл сайын өлім жазасына кесілгендердің бәрі заңды қатайту арқылы қылмысты тежеуге болмайтынын көрсетеді.Сондықтан жемқорлықпен күрес кешенді түрде жүргізілуі керек. Мемлекеттік қызметтің беделіне нұқсан келтіріп, қазына қаржысына қол салушыларға то сқауыл қоюда сыбайлас жемқорлық индексі бойынша төменгі нәтижеге ие елдердің тәжірибесін қолданысқа енгізуіміз керек. Мәселен мектептен бастап қылмыстылыққа қарсы сана қалыптастыру сабақтары жүргізілуі керек. Мемлекеттік қызметтің мәртебесін көтеру, мерейін өсіру, беделін арттыру жұмыстары да баста назарда болғаны жөн. Себебі, әрбір бала мектеп партасынан бастап мемлекеттік қызметтің ең қадірлі, ең жауапты орын екенін, олар халықтың қызметшісі екенін ұғынып өсуі керек. Біздің елімізде жаңа технологияны қолдану арқылы ашықтықты қамтамасыз етудің бастапқы алғышарттары жасалған. Ендігі кезекте жемқорлыққа қарсы иммунитетті мектеп жасынан бастап қалыптастыруға, мемлекеттік қызметтің имиджін көтеруге күш салған жөн. Сонда ғана жазасыз-ақ жемқорлыққа күшті тосқауыл қоюға болады, – дейді байқауға қатысушы жасөренқыз Ақбота.Байқау соңында қазылар алқасының шешімімен жеңімпаздарға арнайы дипломдар мен қаржылай сыйақылар, қатысушыларға ынталандыру сертификаттары табысталды.Қазылар алқасының құрамы, қазылар алқасының төрағасы, "Әлшекей " атындағы өнер мектебінің директоры Қошқарбаев Қалдыбай, «Бала Art» өнер орталығының директоры Увайдаева Индира, "Қызылорда облысының Жастар одақтары" қб-нің төрағасы Алдабергенов Жасұлан, Жаңақорған ауданының қоғамдық даму бөлімінің маманы Қалжан Нұржан, Жастар ресурстық орталығының директоры Орынбасаров Наурызбай төрелік етті.

Жаңақорғанда сурет салу байқауы өтті

<a href="https://kyzylorda-news.kz/ru">Kyzylorda-news.kz.</a> Жаңақорған аудан әкімі Мұрат Жолкелдіұлы Тлеумбетов жуырда ғана өткен "Qazaqstan дауысы" мегажобасының финалисі, жерлесіміз, болашағынан зор үміт күттіретін жас әнші Нұрислам Тілеухан мен талант иесінің өмірдегі және өнердегі ұстаздары ата-анасын қабылдап, мерейлі жеңісіне деген ыстық ілтипатын білдірді. Өнер додасында топ жарып, аудан халқының мақтанышына айналған жас әншінің өнер жолындағы еңбегіне шығармашылық табыс тілеп, алғыс хат табыстады.&nbsp;Өз кезегінде еліміздегі мегажобаның ақтық кезеңіне дейін сүрінбей жеткен финалисі Нұрислам Тлеухан құрмет көрсеткені үшін аудан әкіміне алғысын жеткізіп, қазақ өнерін әлемге таныту жолында аянбай еңбек ететіндігін жеткізді. Иа, өнер – әр адамның бойындағы құдіретті күш секілді. Кейде асау өзендей арнасынан тасып, енді бірде бастау бұлақтай мөлдіреп жанды баурайды. Мұның өзі қандай керемет дүние! Нұрислам Тілеухан жас та болса осындай жолдан өтуде. Өнер – адамның бойындағы тылсым рухани күш десек, әншілік – сол өнердің ең қастерлісінің бірі. Осы әншілік өнер дарыған, нағыз сегіз қырлы, бір сырлы өнерлі жас өнер Нұрислам Тілеухан мерейімізді асырып, абыройымызды асқақтатып үлгерді. «Qazaqstan дауысы» музыкалық балалар мегажобасына қатысып, жүйріктердiң арасынан оза шауып, ақтық мәреге жетті. Бізге осының өзі үлкен жеңіс, жетістік. Төменарық ауылында өнерлі отбасында дүниеге келген талантты жас. Өңірдің мәдениет мен өнерінде біте қайнасып, нағыз шығармашыл «Асылбековтер» отбасының төл перзенті Нұрислам - ән өнерiн өзiндiк өресiмен жаңаша биiкке көтере бiлген талант иесi. «Ұяда не көрсең, ұшқанда соны ілерсің» демей ме?! Әкенің қанымен, ананың ақ сүтімен бойына дарыған киелі өнерді осы күні ұлдары дәріптеп келеді. Бала күніненн талай жарыстарда топ жарып, жыл сайын өтетін әлемдік мега жоба «Қазақстан дауысы. Балалар» ән сайысына да қатысып, күміс көмей әнші Толқын Забировадай тәлімгерді өзіне қаратқан бүлдіршіннің әр қадамы қуантады. Тіпті, Нұрисламның гитарамен орындаған «Аягөз, қайда барасың?» әні әлеуметтік желілерде хитқа айналып, талай жанның таңдайын қақтырды. Осы тұста талантты өреннің әкесі Бақыт Асылбековпен тілдескен едік. – Қазақ халқы «Әке көрген оқ жонар, шеше көрген тон пішер» демей ме? Үйде анасы екеуміздің ән айтып, өнер көрсетіп жүргенімізді көріп өсіп келе жатыр. Ұлым Нұрислам өнерге шынайы берілген, өте еңбекқор. Ол үнемі ізденіп жүреді. Өзіне ұнаған ән болса, дереу сол ән жайында мәліметтерді қарап, ақпараттарға қанығып отырады. Тіпті, өткен тарихымыздағы жезтаңдай әншілердің өмір жолдарын оқып, әрбір әндерін орындап көреді. Кеше ғана елімізде өткен дүбірлі додада Нұрислам өзін көрсетті деп ойлаймын. Домбыраны меңгеріп, халық әндерін репертуарына қосуда. Оның алар асуы алда деп сенемін, үміттенемін, – дейді Бақыт Асылбеков.Міне, осылай Нұрислам отбасында ұлттық құндылықтарды көріп өскен, жоғарыда айтқан әдеби-музыкалық ортада қазақтың ән-күйіне құлағы қанып, руханиятты бойына сіңіріп өскен бала. Ол қай елде болмасын өнер көрсеткенде биік сахналар арқылы ұлттық құндылықтарды көрсетуге тырысады. Өнерге деген құштарлығымен барлық тыңдарманның сезімін бір арнаға тоғыстыра білген талантты ұл Нұрисламның бұдан да биік шыңды бағындыруына тілектеспіз.Жаңақорғанда «Текті сөздің төресі» атты облыстық жыршы-термешілер байқауы өттіБүгін Жаңақорған ауданының 95 жылдығы мен Қазақстанның Халық ақыны М.Көкеновтің 95 жылдығына орай аудандық мәдениет үйі мен Жастар ресурстық орталығының ұйымдастыруымен «Текті сөздің төресі» атты облыстық жыршы-термешілердің байқауы өтті. Байқау барысында кәсіпкерлік бөлімі жергілікті кәсіпкерлердің қолөнер бұйымдары мен кәсіптік өнімдерінен көрме ұйымдастырды.&nbsp;Байқауға аймақтың 35 жасқа дейінгі 13 өнерпазы қатысты. Үміттерін үкілеп келген жыршы-термешілер II кезең бойынша өнер көрсетті. I кезең Жаңақорған өңipiнен шыққан ақын-жыраулардың шығармаларынан бip терме орындады, ал II кезең бойынша әр қатысушы өз қалауымен кез-келген термені орындап шықты. Тамырлы тарихынан сыр шертіп, өткенінен өнегелі тағлым беретін, төл өнерін төрге оздырып, текті сөзін ұлықтаған жаңақорғандықтар терме байқауын дәстүрге айналдырғанын айту керек. Аймақтық термешілер байқауында дүлділ дарындар өнер көрсетіп, көрермендерді әуезді ән, өнеге сөзімен рухтандырды.Сахна төріне көтерілген өнерпаздарға өңірге белгілі термеші, облыстық филармония қызметкері Майра Сәрсенбаева сәттілік тіледі.– Жер жаннаты Жаңақорған ауданының 95 жылдығына орай ұйымдастырылған облыстық термешілер байқауына облыстың әр өңірінен мықты, нағыз талантты өнерпаздар келіпті. Бұл бүгінгі байқаудың биік беделін көрсетеді. Ең бастысы төл өнерімізді қайта жаңғыртып, келер ұрпаққа аманат етіп қалдыруды мақсат еттік. Барлық өнерпаздар да жүйрік, әр термеші өлеңнің мақам-сазын дұрыс қолдана алатынына куә боламыз, өйткені әр өңірдің өзіне тән мақамы бар. Сондықтан бұл жастардан келешек көп үміт күтетін боламыз, – деді Сыр еліне танымал Сәрсенбай жыраудың немересі. Сөздің маржанын сазбен жеткізетін дала өнерпаздарының басын бір арнаға тоғыстырудағы басты мақсат – ұлттық құндылықтарды дәріптеу, өнерлі жастарды қазақтың төл өнерімен сусындату және ұлттық дәстүрді ел арасында кеңінен насихаттау. Асыл сөздің маржанын теріп, оны әуезді әнімен тыңдаушының құлақ құрышын қандыратын жас термешілердің өнерін біз де тамашалап, көңіліміз бір сергіп қайтты. Ал, шараның аудан орталығында өтуінің бір сырын кеш барысында байқадық, өйткені ауыл ақсақалдары мен жастар әр жырауға шабыт беріп, әуезді әндеріне тербеліп отырғанын байқап, дән разы болдық.Жаңақорғандық Нұрлыбек Қалман, Ислам Нағызхан, Түркістаннан келген Нұрбақ Анашбеков, Қызылорда қаласынан Руслан Өтегенов пен Аяжан Шымберген және успендік Ербақ Құрметжан мен Бөкен Жігер сахна төріне көтеріліп, додаға қосылды. Талапкерлер екі кезең бойынша өнер көрсетті, бірінші кезеңде Құлан Алдабергенұлының шығармашылығынан бір терме немесе арнау жыр орындаса, екінші кезеңде әр термеші еркін тақырыпта бір терме орындады. Термешілерге арнайы ыстық ықыласын арқалай келген ауылдың ақсақалдар кеңесінің төрағасы Молдахмет Ибрагимов:– Бүгін Жаңақорған ауданының аспанын әнге бөлеп, термемен тербеген жырау-жыршыларға алғыс айтамын. Төл өнерді ел арасында осылай насихаттап, жас буынның бойына қалыптастыруға жұмылып жүрген өнер ұжымына рахметтен басқа айтарымыз жоқ. Келер жылы да барша термешілерді ауыл төрінде күтетін боламыз деп үміттенемін, – деп жылы лебізін білдірді.Асыл сөздің маржаны мен терең ойдың тұнығын әуезді әуенмен жеткізе отырып, тыңдаушыны ұлттық рухқа, адамгершілікке, тазалыққа, қайырым мен мейірім сияқты көптеген адами қасиеттерге тәрбиелеуімен құнды болған терме өнерін дәріптеген жырауларға аққорғандық ағайын мен көрші ауылдардан келген көрермендер ризалығын білдіріп тарқасты.Қазылар алқасының құрамында өңірімізге белгілі жыршы-термешілер Майра Сәрсенбаева мен Мұхтар Дәрібаев және Жастар ресурстық орталығының директоры Наурызбай Орынбасаров болды. Қазылар алқасы термешілерді әншілік шеберлігіне, таңдаған туындысының мазмұндылығына, сахна мәдениетін ұстауына қарап баға берді. Қортындысында III орынды Көкен Өскенбай (Жаңақорған), Кеңес Әли (Қызылорда),Жәнібек Жақсан (Қызылорда) бөлісті. II орынға Руслан Өтегенов (Қармақшы), Күмісбек Айжарық (Арал) лайық деп танылды. I орын қазалыдан келген Ұлдана Нұртуғанның еншісінде. Ал, қатарынан озып шыққан жаңақорғандық Әсем Мажит Бас жүлдені жеңіп алды. Асыл сөздің маржаны мен терең ойдың тұнығын әуезді әуенмен жеткізе отырып, тыңдаушыны ұлттық рухқа, адамгершілікке, тазалыққа, қайырым мен мейірім сияқты көптеген адами қасиеттерге тәрбиелеуімен құнды болған терме өнерін дәріптеген жырауларға аққорғандық ағайын мен көрші ауылдардан келген көрермендер ризалығын білдіріп тарқасты.

Жаңақорған ауданының әкімі «Qazaqstan дауысы» мегажобасының финалисін қабылдады

<a href="https://kyzylorda-news.kz/ru">Kyzylorda-news.kz.</a> Мемлекет басшысының тапсырмаларын орындау бойынша Қызылорда облысы «Ауылдық денсаулық сақтауды жаңғырту» ұлттық жобасын іске асыруға кіріскенін хабарлаймыз.Ұлттық жоба аясында 2023-2024 жылдары 300 мың аса ауыл тұрғындарына медициналық көмек көрсету деңгейін көтеру, нормативтерге сәйкес ауылдық елді мекендерді медициналық көмекпен &nbsp;қамтамасыз ету және инфаркт, инсульт, жарақат және басқа да жағдайлар кезінде ауыл тұрғындарына шұғыл медициналық көмекті уақтылы көрсету үшін «алтын уақыт» қағидатын сақтаумен басқа да бірқатар бағыттарды көздейді.Ұлттық жоба аясында өңіріміздегі ауылда инфрақұрылымды дамытуда 27 нысан (24 дәрігерлік амбулатория, 2 фельдшерлік-акушерлік бекет, 1 медициналық бекет) құрылысы салынбақ.Аймағымызда 2023 жылы жоспарланған 16 нысан бойынша қазіргі таңда 14 дәрігерлік амбулатория құрылысы басталса, 1 нысан құрылысының &nbsp;мердігерлік сметасы беріліп конкурс жүруде.Сондай-ақ, 2024 жылға жоспарланған 11 нысан құрылысының жобалық-сметалық құжаттамасын әзірлеуде келісім шарт жасалынды.&nbsp;2025 жылға қарай Арал, Қазалы, Шиелі, Жаңақорған ауданаралық ауруханаларын «Көп бейінді ауданаралық аурухана» деңгейіне жеткізу жұмыстары жүргізілуде. Осыған орай, Арал, Қазалы, Шиелі және Жаңақорған &nbsp;көп бейінді &nbsp;аудандық орталық ауруханаларының ғимаратына қосымша құрылысын салу үшін жобалық-сметалық құжаттамасы әзірленіп, жобалар мемлекеттік сараптамаға енгізілді.Жоспарланған 4 көпбейінді ауданаралық ауруханаларда инсульт және кардиологиялық орталықтар, медициналық оңалту, травматология, хирургия, реанимация және қарқынды терапия бөлімдері, триаж жүйесі бар жедел жәрдем бөлмесі ашылып, заманауи медициналық құрал-жабдықтармен (КТ МРТ, ангиограф, сараптамалық дәрежедегі ультрадыбыстық, эндоскопиялық, реанимациялық жабдықтар, медициналық оңалту және т.б.) жабдықталатын болады.

Қызылордада «Ауылдық денсаулық сақтауды жаңғырту» ұлттық жобасы бастау алды

<a href="https://kyzylorda-news.kz/ru">Kyzylorda-news.kz.</a> Қызылорда облысы әкімінің орынбасары Нұрымбет Сақтағанов пен облыстық денсаулық сақтау басқармасының басшысы Олжас Ысқақов жұмыс сапарымен жаңа ғимаратта жұмысын бастаған облыстық онкология орталығына барды.Орталық бас дәрігерi Нұржамал Жұмағалиқызы облыс әкімінің орынбасары Нұрымбет Аманұлы мен аймақтың бас дәрігері Олжас Ермекұлына жаңа орындағы атқарылып жатқан жұмыстар, құрал жабдықтарымен таныстырды.&nbsp;Сондай-ақ, аралау барысында науқастармен кездесiп, ұсыныс-пiкiрлерiн тыңдады. Өз кезегiнде емделушілер қатары жаңа ғимараттың өте таза, заманауи жабдықтармен жабдықталғанын айтып алғыстарын бiлдiрдi.&nbsp;Нұрымбет Аманұлы тарапынан орталық қызметкерлеріне әрбір науқастың жағдайы ескерусіз қалдырмау керектігі айтылып, бірқатар нақты тапсырмалар берілді.Айта кетейік, облыстық онкология орталығы 2002 жылдан бастап онкологиялық аурумен ауыратын пациенттердің стационарлы ем қабылдауына бейімделмеген облыстық көпбейінді аурухананың «Әкімшілік-техникалық» бөлімінде орналасса, ағымдағы жылдың 19 шiлдесiнен бастап кең әрi науқастардың ем алуына толық жағдайы жасалынған 200 төсек орынға арналған жаңа ғимаратта жұмысын жалғастыруда.Сондай-ақ, орталықтың емхана бөлімі дәрігердiң кеңесін қажет ететін және жоспарлы ем алу мақсатында ауруханаға жатуға жолданған пациенттерді де қабылдауда.&nbsp;Жаңа ғимараттың әр палатасында 2-3 ем алушыға арналған және пациенттер үшін арнайы санитарлық тораптармен (әжетхана, жуыну бөлмесі), желдеткіштермен, орталықтандырылған оттегімен &nbsp;қамтамасыз етілген.&nbsp;Жансақтау бөлімі 6 төсек-орыннан 12-16 төсек-орынға дейін кеңейтілген, жабдықталған &nbsp;операциялық 2 залы бар.Ғимарат қосымша жаңа компьютерлік томограф, заманауи рентген аппаратымен, видеоэндоскопиялық аппаратпен жабдықталған.Жаңа ғимарат Берке хан 49 «А» мекен-жайында орналасқан (бұрынғы Модульді инфекциялық стационар).

Қазақстан және Қызылорда облысының жаңалықтары