<a href="https://kyzylorda-news.kz/">Kyzylorda-news.kz.</a> Өткен жылы Арал ауданның мерейін асырып, Ұлттық бірыңғай тестілеуден 137 балл жинап республика бойынша үздік үштікке кірген Нұрсұлтан Рысқалиев білім бәсекесінде барлығынан оза шапқан-ды. Оның білімпаздығымен биікті бағындырғаны мерейімізді асырып тастады. Мәртебеміз өсті. Алайда ол бір ғана шәкірттің жетістігі емес, оның ар жағында қаншама мұғалімнің білімі мен білігі, төккен тері жатыр. Нұрсұлтанға 5-сыныптан бастап сынып жетекші болып, биология пәнінен дайындаған ұстазы Әлібекова Гүлмира Нұртуғанқызы екендігін бірі білсе бірі білмес. Ендеше бүгін біз осы мұғалімді тақырыпқа арқау еттік.Гүлмира Нұртуғанқызы – Арал қаласының тумасы. Ол мектеп бітірген соң Ақтөбе қаласындағы А.Жұбанов атындағы университетті 2004 жылы бітіріп келген соң қаладағы №220 орта мектепке мұғалім болып қызметке орналасады. Содан бері 20 жылға тарта уақытта білім білігін таныта білген мұғалім талай шәкірттің шамшырағын жаққан.<blockquote>– 2022-2023 оқу жылында бұл сынып менің үшінші түлеп ұшқан шәкірттерім. Бұл сынып өте ерекше сынып болды. «Алтын белгі», 4 «үздік аттестат» иегері өз білімдерімен қорғап шықты. Бұларға 5-сыныптан бастап жетекші болдым. 9-сыныпта балалар бейімділігіне қарай бөлінгенде, менің сыныбыма физика, биология пәніне бейім оқушылар жинақталды. Сол сәттен-ақ Нұрсұлтан өзінің білімімен, жан-жақтылығымен, жауапкершілігімен танылды. Ол барлық пәнді үздік оқыды. Бәріміз Нұрсұлтанға сеніммен үміт артқанбыз және сол үміт ақталды, – дейді ұстазы. &nbsp;</blockquote>Ол шәкірттерін еш уақытта жақсы оқитын, нашар оқитын оқушы деп жіктеп қарамағандығын айтады. Гүлмира Нұртуғанқызы үшін оқушының бәрі бірдей. Оларға деген ықыласы да ерекше. Оқушыларына бауыр басып кеткендігі ұстаздың әр сөзінен байқалып тұрды.<blockquote>– Бала ең алдымен адамгершілік қасиетті жоғалтпауы керек деп ойлаймын. Мейлі оның білім дәрежесі қандай болсын бәрібір. Ең бастысы, кішіге ізет, үлкенге құрмет көрсете білсе, тәкәппарлықтан аулақ болса, өмірден өз орнын таба алады. Және балаға барлық пәнді меңгеріп, сүйіп оқуды міндеттеу де артық. Өзі қалаған пәнді жетік меңгеріп, сол бойынша сүйікті мамандығының иесі атанса, түбінде білікті маман болып шығары сөзсіз, – дейді ол.</blockquote>Гүлмира Әлібекова –талай шәкіртті олимпиада, Ұлттық бірыңғай тестілеу және ғылыми жоба сынды додаларға дайындап жетістікке жетіп жүрген білікті ұстаз. Өзінің сүйікті мамандығын оқушыға меңгерту жолында аянбайтын ізденімпаз жанның жас мамандарға да айтары бар.<blockquote>– Мерейімді өсіріп, мәртебемді асырып отырған осы шәкірттерім. Қазақта «Бұлақ көрсең көзін аш» деген сөз бар. Мен де әрбір шәкірттің талпынысын, қуанған сәтін жанарынан-ақ ұғамын. Талпынысы бар баланы қанаттандыру үшін әркез ізденісте жүремін. Жас мамандар да шәкірттерді түрлі білім бәсекелеріне дайындай жүріп өздерін де шыңдайды. Білімдерін де жетілдіреді. Сондықтан мұғалімдік мамандық көп ізденісті, жауапкершілікті қажет етеді деп ойлаймын, – дейді мұғалима.</blockquote>Ол үлгілі шәкірт тәрбиелеп, олардан бар уақытын аямай, өзгені бақытын аялай жүріп, мектепте мұғалім, отбасында жар, ана екендігін де естен шығарған емес. &nbsp;Жолдасы Нұрболатпен балаларын өсіріп, жарасымды шаңырақтың үлгісін көрсетіп отыр.

Шәкірті 137 балл жинап республикаға танылған аралдық мұғалім

<a href="https://kyzylorda-news.kz/">Kyzylorda-news.kz.</a>&nbsp;&nbsp; Мемлекет басшысы Қасым-Жомарт Тоқаев қоғамда кәсіпкерлердің орны туралы «Экономикалық саясатымыздың мақсаты айқын. Бұл – заман талабына сай әлеуметтік бағдары бар нарықтық экономика құру және дамыту. Бұл жүйенің өзегінде қоғам алдындағы жауапкершілігін сезіне білетін кәсіпкерлеріміздің ауқымды тобы тұратыны анық. Яғни бұл өзінің және балаларының тағдырын Қазақстанмен ғана байланыстыратын кәсіпкерлер. Дәл осындай кәсіпкерлер ел болашағы үшін өзіне жауапкершілік алуға дайын. Сол себепті кәсіпкерлікті дамыту үшін жүйелі жұмыс атқару өте маңызды» деген еді. Мемлекет басшысы атап көрсеткендей, шағын және орта кәсіпкерлікті дамыту – мемлекеттік саясаттың басым бағыттарының бірі. Бүгінде мемлекеттің қолдауының арқасында Қызылорда қаласында кәсіпкерлік саласы қарқынды дамып, көрсеткіштердің оң нәтижесі қалыптасқан.&nbsp; Шағын және орта кәсіпкерліктің даму динамикасын саралап көрсек, кәсіптің жылдан-жылға қарқын алып жатқанын байқаймыз.&nbsp; Айта кетейік, бүгінде жалпы қалада 32 064 кәсіпкерлік субъекті жұмыс жасауда. Ал облыс бойынша кәсіпкерлікке тіркелген нысандар санының 49,2% пайызы, яғни жартысына жуығы Қызылорда қаласының үлесінде.&nbsp; Өңірімізде мемлекеттік бағдарламалардың орындалуы бойынша көрсеткішке көз жүгіртсек, мемлекет тарапынан былтыр жыл басынан бері қала бойынша 15,4 млрд теңгені құрайтын 853 жоба қаржылай қолдау алып, шамамен 1253 жұмыс орны ашылған.&nbsp; «Кәсіпкерлікті дамытудың 2021-2025 жылдарға арналған ұлттық жобасы» аясында субсидиялау бағыты бойынша құны 8,2 млрд теңгені құрайтын 275 жоба қаржыландырылған.&nbsp; Аталған жоба аясында грант беру бағыты бойынша құны 262,1 миллион теңгені құрайтын 190 жоба қаржыландырылса, «Қызылорда» өңірлік инвестициялық орталығы» микроқаржы ұйымы ЖШС арқылы өз қаражаты есебінен жалпы құны 621,5 миллион теңгені құрайтын 71 жобаға қаржы берілген. «Аграрлық несие корпорациясы» АҚ арқылы «Жастарға арналған несие» (2,5процент) бойынша жалпы құны 128,8 миллион теңгені құрайтын 29 жоба қолдау тауып, 45 жобаның құны 790,5 миллион теңгені құраған. Сонымен қатар «Шағын және орта бизнес кредиттері бойынша ішінара кепілдендіру» арқылы 243 жоба қолдау тапқан. Ал бөлшек сауда көлемі өткен жылдың салыстырмалы кезеңімен 100,3 процентке жеткен. Былтырғы көрсеткіш бойынша қалада шағын өнеркәсіп саласында 706 жаңа жұмыс орны ашылған.&nbsp; Мәселен, қалада кәсіптің көзін тауып, халық тұтынатын тауар дайындап жатқан қап зауыты бар. Кәсіп иесі Ербол Қожанбаев өз ісіне шынайы берілген азамат цехты кеңейту жұмысының қалай жүріп жатқандығын, шикізаттың қайдан алынып, өнімнің қайда сатылатындығынан хабардар етті. Қалдықсыз өнім өндіретін өндіріс ошағы айына 800 мың қап тоқиды. Мұнда 17 адам еңбек етеді. Барлығы да – жергілікті тұрғындар. Отандық өнімнің әлеуетін арттырғысы келетін кәсіп иелерінің басты мақсаты – сырттан келетін тауарды ығыстырып, өнімнің қолданыс аясын кеңейту.&nbsp; Шағын зауыттағы тіршілік қарбаласқа толы. Күріш қабы дайын болғанға дейін бірнеше сатыдан өтеді. Әуелі пропилен түйіршіктері арнайы қондырғыда ұсақталып, 250 градусқа дейін қыздырылады. Одан күнделікті тұрмыста қолданылып жүргендей кәдімгі пленка шығады. Жіңішке, тілініп, тоқуға икемделеді. Содан кейін ол пленка иіріліп, жіпке айналады. Жіпті станокқа қояды. Бірнеше жіп тоқылып, жиектеме тігіліп, қап болып шығады.&nbsp; Қызылордалық кәсіпкер Мақсат Таев жас кезінен ағаш ою, қазақтың ұлттық музыкалық аспабы – домбыра мен басқа да интерьер бұйымдарын жасауға құмар болыпты. Кейіннен ағаш кесуге арналған заманауи кәсіби жабдық сатып алып, осы бағытта өз бизнесін дамытпақ та болды. Алайда жинаған қаражатына досының ақылымен ағаш өңдеу жабдығын сатып алып, жиһаз өндірісін қолға алады. Беларусь, Италиядағы компанияларда жұмыс істеген, осы салада білімі мен тәжірибесі мол досы өз тәжірибесін бөлісіп, ағаштан түйін түюдің қырсырын үйретті. Осылайша, 2020 жылы кәсіпкер «Ади Мебель» деген атаумен жеке кәсіпкерлік нысанын тіркеді.&nbsp; Оның тұтынушылары күннен-күнге көбейіп, өніміне де сұраныс артты. Қазір компания тапсырыс бойынша кез келген күрделі жиһазды жасайды. Бағасы жиһаз түріне, дизайнына, дайындау күрделілігіне және мерзіміне байланысты.&nbsp; 2022 жылы өз кәсібін кеңейтіп, тапсырысты арттыру мақсатында Мақсат Таев «Ұлттық жоба» бағдарламасы аясында ForteBankтен төмен пайызбен несие алып, қаражат жиһаз цехына арналған қойма және жиһаз жасау мерзімін қысқарту үшін арнайы жабдық сатып алды. Бұл тапсырысты тезірек орындауға мүмкіндік берді.&nbsp; – Қазір жиһаз индустриясы қарқынды дамып келеді. Сондықтан дизайнды үнемі соңғы үлгіде жаңартып, сапалы материалдар қолдануға тырысамыз. Яғни заман көшінен қалмай әрекет етудеміз, – дейді кәсіпкер.&nbsp; Қалалық кәсіпкерлік, өнеркәсіп және туризм бөлімі басшысының міндетін атқарушы Бауыржан Арынның айтуынша, қала көлемінде тиісті мекемелермен бірлесіп кәсіпкерлік нысандарды аралап, санитарлық тазалықты сақтау, белгіленбеген орындарда сауда жасаудың алдын алу және тағы басқа да жұмыс бойынша түсіндірме жұмысын ұйымдастырып отырады. Қалада кәсіпкерлікті дамыту мақсатында тұрғындарға, оның ішінде жастарға мемлекеттік бағдарламалар мен жобалар туралы түсіндірме жұмыстары тұрақты түрде жүргізілуде.&nbsp; Соңғы жылдары қалада кәсіпкерлік саласы өркен жаюда. Кәсіптің дамуы әлеуметтің әлеуеті артып, жұмыссыздықтың азаюына мүмкіндік береді.

Қызылордада өнеркәсіп өркендеп келеді

<a href="https://kyzylorda-news.kz/">Kyzylorda-news.kz.</a> Бүгінде кәсіпкерліктің көкжиегі кеңейіп келеді. Әсіресе жастардың кәсіпке ден қоюы көңіл қуантады. Мемлекет тарапынан жас кәсіпкерлерді қолдауға арналған түрлі бағдарламалар әзірленуде. Мұндай қолдауларды жастар оңтайлы пайдаланып, өздерінің ойға алған кәсіптерін ашуда. Соның арқасында жұмыссыздық деңгейі азайды. Тіпті шалғай ауылдағы жастар да кәсіпкерлікке ден қойып, ауыл халқының қажетін өтеп отыр. Сондай жандардың бірі – Мергенсай ауылының тұрғыны, жас кәсіпкер Бағлан Қалмағанбетов.Бағлан бала кезден теңізді өлкенің ата кәсібіне айналған балық шаруашылығының қыр-сырымен таныс болып өсті. Балық шаруашылығын басты табыс көзіне айналдырған ауылда туып-өскендіктен болар, ол үшін балық аулау ең оңай іс болды. Әкесі де, ағасы да теңіз маржанын сүзген балықшы еді. «Алма ағашынан алыс түспейді» демекші, Бағлан да теңіз төңіректеуге құмартты.<blockquote>– Көкшетау қаласынан жоғары оқу орнын аяқтадым. Қазір қолда дипломым бар. Дене шынықтыру пәнінің мұғалімі мамандығын алғанмын. Бірақ дипломмен жұмыс істеген жоқпын. Мен еркіндікті жақсы көретін адаммын. Тіпті студент кезімнің өзінде үлкен бір дүкенді жалға алып, дос баламмен сол жақта кәсіпкерлікті бастаған болатынмын. Кейіннен ауылға келіп, балық аулап жүрдім. Бұл кәсіп – жанымызға етене жақын кәсіптің бірі. Мектеп жасында-ақ қайыққа мініп, ау салуды меңгеріп алғанбыз, – деді Бағлан.</blockquote>Балық аулауды кәсіп етіп жүріп, Бағланға тың идея келеді. Ауылдан балық өнімдерін алуан түрлендіріп әзірлейтін цех ашуды қолға алады. Осылайша кәсіпкерлік жоспарын әзірлейді. Оның бұл бастамасы мыңның ішінен дараланып, жас кәсіпкерлерге берілетін қайтарымсыз грантты жеңіп алады.Балықтан түрлі өнім жасауға болады. Оның қайсыбірін алсаң да, халық арасында сұранысқа ие. Соның бәрін ескеріп, осы жобаны қолға алдым. Бастамам үздік деп танылып, 2 миллион теңге грантты жеңіп алдым. Бұл қаражатқа балық өнімдерін даярлайтын аппараттар алдым. Қазір өнімдерді заңдастыру жұмыстарын жасап жатырмын. Әзірге тәжірибе жүзінде ысталған балықты шығарып отырмын. Сұраныс жоғары, – деді жас кәсіпкер.Бағланның бизнес жобасында ысталған, консервіленген балық өнімдерімен қоса, балықтың фаршын шығару, тұзға пісірілген балық өнімін өндіру де бар. Бірақ қазіргі күні балықтың аз шығуына байланысты бұл өнімдерді кеңінен шығаруға мүмкіндік болмай отыр.Шынымды айтсам, мемлекеттік бағдарламаның арқасында мен өзімнің ойға алған мақсатыма қол жеткіздім. Бұл біз сияқты жастарға жасалған үлкен қолдау деп білемін. Менің бастамам ауылдағы қатарлас достарыма үлгі болды. Қазіргі күні кәсіп бастауға ниеттілер қатары артқан, – деген Бағлан кәсіпкерлікті дамытуға жасалған қолдаулардың оң нәтиже беріп жатқандығын айтты.Бағлан ысталған балық өнімін тапсырыспен дайындап жүр. Әсіресе Алматы, Ақтөбе, Көкшетау өңірлері Аралдың балығын алуға құмартқан. Сырттан бөлек, ішкі қажеттілікті де өтеуде. Тек шикізат көзінің аздығы қолбайлау болып отырғандығын айтады. Алдағы уақытта балық өнімдерінің алуан түрін шығаруды қолға алып отырған кәсіпкер ішкі нарықты да қамтамасыз етпек.Нарыққа шығу үшін өнімдердің сертификаты, заңды құжаттары болуы тиіс. Бұл халық тұтынатын өнім болған соң, мұндай заңдылықтар орындалуы керек. Сол себепті әзірге өнімді көпшілікке ұсынып отырған жоқпын. Осы мәселе шешілген соң, еркін саудаға шығаруға болады, – дейді кәсіпкер.Ата кәсіпті жаңаша түлетіп, кәсіптің көзін тапқан жанның ойға алған жоспары көп. Ол балық өнімдерін шығаратын цехты толықтай жұмысқа қосқанда, ауылдастарының жұмыссыздық мәселесін шешіп, аудан халқының балық өніміне деген қажеттілігін өтемек. Мұндай жарқын бастамамен танылған жас кәсіпкердің алдағы жұмысына сәттілік тіледік.

Жас кәсіпкер қайтарымсыз грант алып кәсібін жандандырды

<a href="https://kyzylorda-news.kz/">Kyzylorda-news.kz.</a> Халықаралық әйелдер күніне орай елордалық теміржол вокзалдарының перрондары мен пойыздарда жүзден астам әйел жолаушыға гүлдер мен сыйлықтар табысталды, деп хабарлайды El.kz ақпарат агенттігі.ҚТЖ мәліметінше, әйелдер қауымына саксофон әуені мерекелік көңіл-күй сыйлып, ал пойыздың ішінде дауыс ұлғайтқыш арқылы тілектер айтылды.<blockquote>Сыйлық алған әйелдер қауымы ықылас лебіздерін айтып, жолсеріктерге алғыстарын білдірді. Сондай-ақ бұл күні еліміз бойынша 8 наурыз мерекесіне арнайы безендірілген пойыздар жолға шықты. Ұлттық тасымалдаушы мереке күндері нәзік жандарды жыл сайын құттықтауды жақсы дәстүрге айналдырып отыр. Барлық облыстарда жолаушы әйелдерді құттықтау шаралары өткізілуде, - делінген мәліметте.</blockquote>Айта кетейік, жыл сайын «Жолаушылар тасымалы» АҚ пойыздарында орта есеппен 13 млн астам жолаушы қатынайды, олардың ішінде жартысы әйелдер қауымы.&nbsp;

Жолаушылар пойызында әйелдерге гүлдер мен сыйлықтар берілді

Тарихты өзгерткен қазақ қыздары

&nbsp;<a href="https://kyzylorda-news.kz/">Kyzylorda-news.kz</a>. Шұғылалы көктемнің шуақты күнімен келген аналар мерекесі қарсаңында Жаңақорған аудан әкімі Мұрат Тілеуімбетов аудандағы көпбалалы аналар мен әр салада қызмет етіп жүрген арналарды арнайы қабылдап, мейрам қарсаңында құрмет көрсетіп, мерекелік шараға ұласты.Адам баласы үшін ананың орны қашанда биік. Жұмақ - ананың табанының астында деген сөздің мәні аяулы жанның қадірін ерекше асқақтатып тұрғандай. Бір қолымен бесікті, екінші қолымен әлемді тербететін аналарға жүрекжарды лебізімізді күн сайын білдірсек те артық етпейді.&nbsp;Салтанатты шара мың бұралған бимен басталып, әсем әуенмен жалғасты. Мәдениет үйінің азаматтары бірінен соң бірі аяулы қыз-келіншектерге арнап өлең оқып, көрермен залында отырған ақжаулықты аналарға гүл шоқтарын тарту етті. Әдемі өрілген көріністен соң аудан әкімі Мұрат Жолкелдіұлы нәзік жандыларды шуақты мерекесімен құттықтап, бір топ ардагер ұстаздарға, батыр аналарға және түрлі салада еселі еңбек етіп келе жатқан аруларға құттықтау хаттар табыс етті.<blockquote>– Әлемдегі кез-келген ұлт алдымен ананы құрметтейді, ананың алдында басын иеді. Қазақ халқы әйел затының қадір-қасиетін жоғары бағалап, беделін биік қойған. Жер – ана, Отан – ана, тілдің өзін анаға теңеп, оның құдыретін осылай бағалады. Тіпті, Сырдария бойындағы киелі мекенді Сыр – ана деп атауымыз тегін емес.Міне, біз ана ұғымын осындай мәртебелі еттік. Асыл дінімізде де «Анаңды Меккеге үш рет апарсаң да ақ сүтін ақтай алмайсың», «Жұмақ ананың табанының астында» деген киелі ұғым бар. Сондықтан қай қоғамда болмасын нәзік жандылардың орны – төр. Кешегі ел егемендігін алған алмағайып, тоқырау тұста азаматтарға тіреу болып, маңдай терін төгіп, елді осынау тығырықтан аналар алып шықты. Қазір де әйел қауымының қоғамдағы қызметі орасан. Мәселен, біздің ауданның білім саласының 73 пайызын, медицина саласының 85 пайызын, мемлекеттік қызметкерлердің 25 пайызын біздің қыз-келіншектер құрайды. Қазақ қыздың тәрбиесіне де ерекше көңіл бөлді. Қыз өмірге келсе қуанып, шаңыраққа ырыс-береке кірді, қазына келді деп сүйіншілейді. Оларды отанның ұйытқысы, ары, ұяты деп биік қойды. Өйткені, қыз ертеңгі ана, ертеңгі елдің данасы. Сондықтан барша аруларды, аналарды, ақ самайлы әжелерді Аналар мерекесімен шын жүректен құттықтаймын! – деп аудан басшысы ыстық лебізін білдірді.&nbsp;</blockquote>Одан әрі сан салада қызметте жүрген жандарға, ардагер еңбеккерлерге құрмет көрсетіп, алғысын білдірді. Ауданның әлеуметтік-экономикалық өсіп-өркендеуіне үлес қосып жүрген мамандық иелерін марапат мінберіне көтерді. Әуелі, «Алтын алқа», «Күміс алқа» иелері Гүлнұр Аблазимова, Жамила Оштанованың кеудесіне медаль тағып, мақтау қағазымен марапаттады. Жаңақорған топырағында алтын алқа иелерінің қатары күн санап артып келеді. Оны жылдағы бала туу көрсеткішімен өлшеуге болады. – Бізді осылай құрмет төріне шығарып, мерейімізді үстем етіп отырған баршаңызға алғыс айтамын. Әрине, анаға деген махаббат ештеңемен өлшенбейді ғой, 7 нәрестені өмірге алып келгенім үшін Жартақанға сансыз шүкіршілік етемін. Бала Алланың берген сыйы ғой, бұйыртып жатса қазақтың санын көбейтіп, ұлағатты ұрпақ, иманды ұл-қыз тәрбиелеуге тырысамын. Өзімнің замандастарымды, ізімізден ерген аруларды мерекемен құттықтаймын, – деп жеткізді ізгі тілегін алтын алқа иегері Гүлнұр Абдулаханқызы.&nbsp;Сонымен қатар, айтулы шарада саналы ғұмырын білім жолына арнап, шәкіртінің бойына тәлімді тәрбие, саналы білім сіңіре білген ұстаз аналарға да ерекше ықылас білдірді.&nbsp;Шарада сөз алған аудан әкімі Мұрат Жолкелдіұлы құрмет көрсетті. Жылы лебізін білдіріп, мерекелік тартуын табыс етті.<blockquote>– Ел тарихының қай кезеңінде болмасын, батыр аналар ерлігі мен өнегелі істерінің арқасында бірлік, тұрақтылық пен тыныштықтың, өрлеу мен өркендеудің басынан табылды. Бүгінде, осы жолда еңбек етіп жатқан аналарымыз жетерлік. Қоғамда нәзік жандылар сан түрлі саланың қырсырын меңгерген. Әсіресе, ұстаздар қауымына алғысым шексіз. Олар – мектептің жүрегі. Жастардың білімді де білікті, парасатты азамат болып қалыптасуында мұғалімдер қауымының еңбегі зор, – деді аудан басшысы.&nbsp;</blockquote>Иә, елдегі бейбіт тірліктің, мызғымас бірліктің, жарқын болашаққа деген сенімнің, ізгілік пен мейірімділіктің ұйытқысы бола білген аналарды құрмет биігіне шығару ұлағатты іс, тағылымды ғибрат. Аудандық білім бөлімінде ұзақ жыл еңбек етіп келе жатқан бір топ ұстаз аналар марапат мінберінен көрінді. Солардың қатарында Әсел Байболова, Айжан Омарова, Жанна Бижанова, Бибігүл Тулегенова, Ұлбала Бисенова, Гүлзира Айсынова, Лора Тұртанова, Жанбибі Шаметова, Балжан Файзуллаева, Күлайхан Елтаева, Гүлнәр Әлібекова, Мадина Тулегенова, Рая Шыныбекова, Толқын Анарбековалар бар.<blockquote>–Қазір білім бәсекесіне ілесе білген ел ғана озық болуға ұмтыла алады. Сондықтан ұстаздарға артылар жүк өте ауыр. Осы саланы абыроймен алып жүрген мұғалімдерге дұрыс жол көрсетіп, тәлім бергенімізді мақтан тұтамыз. Осындай еңбекті елеп, құрмет көрсетіп жатқан аудан әкімі Мұрат Жолкелдіұлына және аудандық білім бөлімінің басшысы Бекжан Есенбаевқа рахмет дейміз, жастарға тек қызметтерінде абырой биігінен көрінуді тілеймін, – деді Роза апай.&nbsp;</blockquote>Ардақты ардагерлер білім саласының қызметкерлері мен құрмет көрсетіп жатқан әкімдік ұжымына табыс тіледі. Ұстаз жүгі – ауыр жүк екенін тілге тиек еткен ауданның бас ұстазы Бекжан Есенбаев зейнеттегі ұстаздарға ыстық ықыласын білдіріп, мерекелерімен құттықтап, дендеріне саулық тіледі. Мерейлі кештің соңы «Шаншар» әзіл-оспақ театрының қойылымымен жалғасты. Елімізге танымал театрдың «Манипуляция» қойылымында қоғамдағы әйелдердің қырық жандылығыменен қатар қырық айлалы бола алатынын керемет көрініс тапты. Сондай-ақ, шоу-бизнес саласында белгілі әншілер өнер көрсетті. Көптің көңілін көтеріп, көтеріңкі көңіл-күй сыйлаған білім бөліміне жұртшылық ризашылығын айтып жатты.Әйелдер қауымы – әрдайым отбасының ұйытқысы, береке-бірліктің шырақшысы. Әр адамның өміріндегі қуанышты әрі жарқын сәттердің көп болуына тілекші аналардың мерейін қалай тасытсақ та аз болатындай.Ел басына күн туғанда асыл аналарымыз бен аяулы аруларымыз қиындыққа мойымай, ұлт тағдырына араласты. Еселі еңбегімен және ерен ерлігімен танылған әйелдердің есімдері тарих жылнамасына мәңгілікке жазылып, жадымызда жатталады.Егемен елімізде әйелдер қауымы үшін жаңа мүмкіндіктерге жол ашылды.&nbsp;Сондай-ақ, облыс әкімінің «Алғыс хатымен» Талап ауылдық округі әкімі аппаратының заңгері Қаракөз Мадалиеваға, Нұрсұлу Аширбекова, Гүлназ Бектұрғановаға табыс етілсе, аудан әкімінің «Алғыс хаты» халыққа қызмет көрсету саласының ардагері Шарипа Ибрагимоваға, Жаңақорған ауданаралық аурухананың балалар дәрігері эндокринологы Баян Орынбаеваға, темір жол саласының ардагері Кенжегүл Бахтыбаеваға, байланыс саласының ардагері Ариягүл Молдабаеваға, көп балалы ана, кәсіпкер Баян Убайдуллаеваға, пошта саласының ардагері Үміткүл Раманқұловаға, көп балалы ана Мейрамкүл Төртбаеваға, Қыраш ауылдық округінің кітапхана үйінің меңгерушісі Гүлжахан Бейсеноваға, 1 топ мүгедегі Ақнұр Сматоваға, Жаңақорған аудандық емханасының бас мейіргері Тұрғаш Данееваға, 1 топ мүгедегі Рауза Ашироваға, 1 топ мүгедегі Қалдыгүл Құламетоваға, аудандық тарихи өлкетану музейінің меңгерушісі Ажар Жанаеваға, аудандық прокуратурасының іс жүргізуші инспекторы Фарида Байдалиеваға, «Күміс алқа» иегері Камила Пазыловаға, жеке кәсіпкер Гүлзира Талғатқызына, аудандық зейнетақы төлеу орталығының маманы Ақниет Жұмабаеваға, «Заңғар» бастауыш меңтебінің меңгерушісі Гауһар Тұрғанбайқызына, аудандық емхананың «көз көру бөлмесінде фельдшерсубординатор» Гүлмира Сыздықбаеваға, жұмыспен қамту орталығының маманы Нұргүл Сыланбековаға, Қожакент ауылдық округі әлеуметтік қызметкері Сәпия Абдуллаеваға, «Қыран» негізгі орта мектебінің мұғалімі Ханзада Дошанға табыс етілді.&nbsp;Ана көңілінің дархандығына, ана жүрегінің ізгілігіне тең келер құдірет жоқ. Ана алақанының жылылығынан асқан жылулық жоқ. Бойға қуат, көңілге шуақ дарытатын күш те ананың жүзінде, бір ауыз сөзінде, жүрегіндегі мейірбандықта жатыр. Бір сөзбен айтқанда, мына жарық дүниедегі ең күшті құдірет – ана мейірімі. Сондықтан оларға ілгері ізет, көшелі құрмет арта береді. Көктеммен бірге келген мейрамға орай ұйымдастырылған кеш аудан өнерпаздарының концерттік бағдарламасына жалғасты. Әуезді ән, мың бұралған бимен өріліп, көрермендерге керемет көңіл-күй сыйлады. Міне, адамзаттың анаға деген құрметі шексіз екенін осыдан көруге болады. Өйткені, анасы бар адамдар ешқашан қартаймайды. Сондықтан аналарымыз аман болсын, мереке құтты болсын, арулар!

Жаңақорған аудан әкімі Мұрат Жолкелдіұлы көпбалалы аналарға құрмет көрсетті

<a href="https://kyzylorda-news.kz/">Kyzylorda-news.kz.</a> Берік Әбділхамитұлы – Ақмая ауылының тұрғыны. Ол павловния ағашын туған жеріне жерсіндіруді алғашқылардың бірі болып қолға алған.Көпшілік аузында "Авангард" деп аталып кеткен ауылдың тұрғындары кейіпкеріміздің ауласына мойындарын соза қарайды. Себебі оның ауласы сән-салтанатын асырған жасыл желекке айналған. Ендігі мақсаты – дәл осы "Адам ата ағашын" ауыл маңында көбейтіп-көгалдандырып, әсемдігімен өзгелерді тамсандырып, табиғи қорғаныс белдеуін құру.Бұл жаңа идея ғаламторды ақтарып отқан сәт те туады. Сөйтіп дереу Өзбекстаннан арнайы тұқымын алады. Табиғатынан тәуекелшіл, есепке жүйрік ағамыз оның пайдасына тез арада көз жеткізіп, дереу ойға алған ісін жүзеге асыруға кіріседі.– 25 метрге дейін өсетін павловния елді мекенді көгалдандырып, көркейтуге үлкен пайдасын тигізе алады. Бес-алты апта бойы гүлдейтін ағаштың көлеңкесі айналасына тегіс түсіп, сізге ну орманның ортасында отырғандай әсер сыйлайды. Ал талдан бөлінетін оттегі мөлшері басқа ағаштарға қарағанда бірнеше есеге көп. Сондықтан да ауданымызды, қала берді ауылымызды экологиялық қиын жағдайдан құтқаратын бірден-бір жасыл желек осы болатынына үміт басым. Өйткені, қазіргі таңда мегаполистерде таза ауа тапшы. Көліктің иісті газы, кәсіпорындардан тарайтын түтіндер таза ауаны ластап жатыр. Мұның соңы адамдардың денсаулығына кері әсерін тигізіп, тыныс алу жолдарына қатысты көптеген кеселдерге шалдықтыруда. Осындай экологиялық проблеманы шешудің ең тиімді жолы – тал-теректі көбейтіп, көше бойын, аулаларды, жол жағасын жасыл ағаштармен көмкеру. Осы тұста павловниядан асқан пайдалы тал жоқ дер едім. Жұрт әдемі гүлдейтін талдардан тек сакураны біледі. Павловния одан әлдеқайда сұлу. Әртүрлі түспен гүлдеген кезде көздің жауын алады. Табиғаттың осынау сырға толы сұлу суреті міндетті түрде адамды өзіне баурайды. Сондықтан павловния бір шетінен экологияны жақсартса, екінші жағынан төңірегімізге әсем келбет те сыйлайды. Ертең туристер келіп, биікке ұмтылған сәндік ағаштарды көрсе, соның көлеңкесінде саялап, тамсанған күйде еліне қайтса, келесі сапарында да бізге келуге асығып тұрмай ма?! Міне, алдымен осы жағын ескеруіміз керек, – дейді Б.Сәрсенбаев.Кейіпкеріміздің бір арманы – табиғатты көркейтіп, Ақмаяны жасыл елге айналдыру. Егер ойға алған жоспары жүзеге асса, бұл мақсатқа әрі кетсе он жылдың көлемінде жетуге болатын көрінеді. Бүгінгі таңда жаңа идеяның авторында 1000 түп павловния көшеті дайын тұр. Енді жер мәселесі шешімін тапса игі. Себебі ағаштың пайдасын жергілікті әкімдік те түсініп келеді. Сол үшін де көшелердің сәнін кіргізіп, ауыл ішін абаттандыру мақсатында ауыл әкімінде де қолдау бар.Біз кейіпкерімізбен тілдескенімізде, бұл ағаш жайлы көптеген мәліметке қанық болдық. Мәселен, әлемдегі ең жылдам өсетін ағаш та осы павлония. Сондай-ақ бұл ағаш өте берік келеді.&nbsp;Әр үш жылда 8 рет кесіп алып, кәдеге жаратуға болады. Көктемде жапырақтары бүршік жармас бұрын шырағдан тәрізді гүлдейді. Бағлан мырза «талдың күтімі жақсы болса, 100-180 жылға дейін өмір сүреді» дегенді алға тартады.&nbsp;Ылғалды да бойына көп сіңіре қоймайды. Сондықтан павловниядан көптеген музыкалық аспаптар, тұрмыстық бұйымдар мен жиһаздар жасалады.&nbsp;– Құрылыста да таптырмайтын нағыз керекті материал. Әсіресе, үйдің шатырын жапсаңыз қатып-ақ кетеді. Мықты, шірімейтін, сірескен тал болғандықтан жуан белағаш – топсаның орнына жұмсасаңыз, одан тек ұтасыз. Павловния гүлі бал арасына қорек. Себебі оның түрлі-түсті гүлдері аралар өзіне азық ететін шырынға бай. Осылайша сәндік ағашты көбейте отырып омарташылықты да қатар дамытуға мүмкіндік туады. Ал талдың жапырағы төрт түліктің жем-шөбі есебінде пайдалануға жарайды. Жапырағының азықтық қуаты жоңышқаның калориясына пара-пар. Әрі құрамында малдың ағзасы оңай сіңіретін минералдар мен витаминдер көп, – дейді Берік Сәрсенбаев.Сонымен бірге павловния бауына көптеген дақыл түрлерін егуге болады. Алғашқы 2-3 жылда бір қатарға отырғызылған ағаш көшеттерінің арасына бидай, жүгері, ноқат, арпа, сұлы, мақта, лобия және басқа да алуан түрлі көкөністер ексе, мол өнім алуға болады. Өйткені, павловния баудың микроклиматын жақсартып, жердің құнарлылығын арттырып, көкөніс, дәнді дақылдардың өнімділігін жоғарылатады.Шиелі жері соңғы уақытта жасыл желегімен, тазалығымен өзгелерді тамсандырып, көп өңірлердің көш басында келеді. Оған өткен жылы "Үлгілі аудан орталығы" номинациясы бойынша екінші орынды еншілегініміз дәлел. Осылай тазалықты сақтап, жасыл желекке орау, кент ажарын келбеттендіру қай кезде де аудан әкімінің күн тәртібінен түскен емес.&nbsp;«Бабалар еккен шынарды балалары саялайды» демекші,&nbsp;ауыл болып жұмылып, осы істі қолдасақ нұр үстіне нұр емес пе?!

Шиелі: Ақмаяда "Адам ата" ағашы өседі

<a href="https://kyzylorda-news.kz/">Kyzylorda-news.kz.</a> Бүгінде құшақ-құшақ гүл мен сырлы сезімге толы 8 наурыз атты мерейлі мерекенің түбінде нәзік жанды қауымның өз үні мен еселі еңбегі, қайсарлығы мен қажырлы күресі жатыр. Әсілі, әйелдер қауымы әу бастан ер адамнан бір саты төмен жаратылған деседі. Оған аңыз бен қатталған қалың тарих куә. Дәйекті сөйлетсек, 1857 жылдың 8 наурызында Нью-Йорк қаласындағы тігін және аяқ киім фабрикасындағы жұмысшы әйелдердің теңдік сұраған наразылық шеруін де айтуға болады.Өмірдің мәні, тіршіліктің сәні – әйел. Ол – тіршіліктің тамыры, шаңырақтың ұйытқысы. Сондықтан әйел затының қоғамдағы, адамзат өміріндегі орны мен рөлі ерек. Бір қолымен бесікті, екінші қолымен әлемді тербеткен аналарға құрмет көрсету – күллі адамзаттың парызы. Қазақ халқы да қашаннан қыздарын қадір тұтып, төрінен орын ұсынған. Ақын Жүрсін Ерман айтқандай, «қай жерде, мейлі, қай елде, әлемнің мәні – әйелде».«Даму» кәсіпкерлікті дамыту қорының дерегі бойынша, республикада қаржылық қолдау алып отырған кәсіпкерлердің 57,6 проценті әйелдер екен. Бұл елімізде әйелдер кәсіпкерлігінің белсенді дами бастағанын аңғартады. Сондайақ қазір елімізде төрт банкті – «Халық банкті» (Үміт Шаяхметова), «Альфа Банкті» (Алина Аникина), РБК Банкті (Наталья Акентьева) және «Отбасы банкті» (Ләззат Ибргимова) әйел азаматтар басқарып отыр. Сол секілді сан салада басшылық қызметте жүрген шиелілік нәзік жандардың да ауданның өркендеуі жолындағы еңбегі ескерусіз қалған емес. Мәселен, Шиелі аудандық білім бөлімінің басшысы Жібек Баймұратова, санитарлық эпидемиялық бақылау басқармасының басшысы Гүлзада Айтекеева, аудандық статистика бөлімінің басшысы Алтынкүл Құрбанқызы сынды әйел-аналар басшылық қызметте де бедел биігінен көрініп жүр. Ал кәсіптің көзін тауып, аудан игілігі үшін іс атқарып жүрген Рәбибі Нұржанова, Айткүл Әбдіқадірова, Дүйсенкүл Тәжікова сынды кәсіпкерлердің де еңбегі елеулі.Иә, қазіргі қоғамда «Ер – түздікі, әйел – үйдікі» деп біржақты пікір айтып отыра алмаймыз. Себебі, бүгінгі әйел бейнесі – іскер, басшы, қызметкер сынды лауазыммен толыққан. Олар бала тәрбиелеп қана қоймай, кәсіп ашып, оны дамытуға қабілетті. Бүгінде ақ жаулықты аналардың да жетістікке жетіп, табысқа кенелуіне, сондай-ақ талай-талай асу алып, биік белесті бағындыруға білімі мен білігі жеткілікті. Демек әйелдердің қазіргі қоғамда атқарар рөлі орасан. Мәселен, облыс тұрғындарының 47,8 проценті әйелдер. Оның 54,7 проценті ауылдық жерлерде тұрады. Статистикалық мәліметтерді әрмен қарай сөйлетсек, әйелдердің қоғамдағы барлық салаларда жұмыс істеп жатқанын байқаймыз. Себебі, бүгінгі таңда барлық педагогтердің – 73 проценті, дәрігерлер мен медицина қызметкерлерінің – 87 проценті әйелдер. Ал барлық бюджеттік сала қызметкерлерінің 65 процент нәзік жандардың үлесінде болса, мемлекеттік қызметтегі әйелдердің үлесі – 35,4 процент. Қазіргі таңда ақ жаулықты аналар саясаттан да шет қалған емес. Бұған дейін облыстағы түрлі деңгейдегі депутаттардың 9 процентін әйелдер құраса, қазір бұл көрсеткіш 21 процентке өскен. Ал шағын және орта бизнесті дамытып отырған әйелдер 48,3 проценті құрайды. Бұлардың барлығы ауылдың өзінде ірі кәсіп арқылы табыс табуда. Бұл ауыл әйелдерінің отбасы, ошақ қасында ғана емес, сауда мен кәсіпте де белсенді екенін білдіреді.

Шиеліде іскер әйелдердің үлесі артуда

<a href="https://kyzylorda-news.kz/">Kyzylorda-news.kz.</a> Балаңыз өмірге келгеннен соң оның кішкентайынан жайлы орта, жақсы мекенде өскенін қалайтын боларсыз. Әрине өмір болған соң тіршілік қамымен жұмысбасты пендеге айналып, балаға күнұзақ қарап, оның балғын шағынан өзіне қажетті дүниелермен сусындап өскенін қалайсыз, бірақ мүмкіндік бола бермейді. Әрине мұндайда балаға жайлы орта ретінде өз ауданыңыздағы балабақшаларды таңдайсыз. Жүз ойланып, мың толғанып еркеліктен өзгені білмейтін бөбегіңізді балабақшаға беруге тура келеді. Әрине жағдайы жеткендер арнайы күтуші жалдайды. Ал айлыққа қарап күн кешетіндер ше? Әрине мұндайда балабақшаның болғаны қандай жақсы.Қазір бала тәрбиесі мен оның күтіміне келгенде арнайы жұмыс істейтін орталықтар баршылық. Аты дардай болғанымен, қызметіне көңіл толмаушылық та байқалып жатады кейде. Осыдан бірер жыл бұрын Алматы, Астана сынды үлкен қалаларда жұмыс істейтін балалар орталығының жұмысынан шу шықты. Қорғансыз сәбиге жасалған қиянат пен кемсіту сынды тәрбиешілердің озбырлығы мүлгіген қоғамды дүр сілкіндірген-ді. Алайда солай болды екен деп баласын балабақшаға беруден бас тартатын ата-ана жоқ. Сәбиін бір Аллаға, сосын күтушіге табыстап, тіршілік қамымен күнделікті қызметіне кіріседі. Сұраныс болған соң сәйкесінше балабақшалардың да саны артып келеді. Қазіргі таңда ауданның өзінде жиырманың үстінде мемлекеттік балабақшалар бар. Балаға сапалы қызмет көрсетіп, көптеген ата-аналардың алғысын алып жүрген балабақшалар да бар. Солардың арасында жұрт қаладағы «Қарлығаш» балабақшасын жиі айтады. Әрине оның қызметіне көңілі толып, марқайып қайтқан ата-аналардың да барын білдік. Дей тұрғанмен, балаға жайлы орта ретінде жұмыс істеп, көпшілік көңілінен шығып жүрген бұл ұжымның бірлескен ісін көпшілік білсе дейміз.Тарихы терең, тәрбиесі тәлімге толы бұл орталықтың ел сеніміне лайық қызмет етіп келе жатқанына бүгінде 40 жылдан асты. 1979 жылы іргетасы қаланып, пайдалануға берілген бұл орталықтың заман ағымына сай жұмысы жүйелі жүргізіліп, ісі алға басып келеді. Әрбір шаңырақтың еркелерін есейтіп, тәрбиеге баулып, уақытын тиімді өткізуге күш салып келе жатқан ұжымның алға қойған басты мақсаты – баланың денсаулығы мен өмірін қорғау жағдайын құру, мектепке дейінгі балалардың шығармашылық қабілетін ойын арқылы дамыту, балабақшада тәрбиелеу және білім беру үдерісіне жаңаша әдісін енгізу арқылы балаларды жан-жақты &nbsp;дамыту.Расында жұрт сеніп тапсырған соң оң-солын білмейтін балдырғандарды күтіп, мектепке дейінгі тәрбие беру ісінде толымды жұмыс атқарып келе жатқан орталық қазіргі уақытта 280 балаға 12 топ бойынша ілім мен білім, тәрбие мен тәлім беріп келеді. Жаңа Қазақстанның жарқын болашағын қалыптастыру жолында жұмыс істеп келе жатқан бөбекжайда 7 топ қазақ тілінде жұмыс жүргізсе, қалған 5 топ орыс тілінде жұмыс жүргізіп жатыр. Ал балаларға тәлім-тәрбие беретін педагогтардың бұл жұмыста тәжірибесі толысқан. Баламен қалай жұмыс істеу керектігі жолында ұдайы ізденіс үстінде болатын мамандардың үлкен ұжымның жүрегі һәм тірегі екені айтпаса да түсінікті.Әрине ата-ананың таңдауы түрлі бағытта жұмыс жүргізіп, түрлі жетістіктерге жеткен, баланың бағытын жақсы ортаға бейімдеп, тәлімді тәрбие беретін орталықтарға түсері сөзсіз. Бұл мүдде жолында бірігіп жұмыс істеп келе жатқан Гүлнара Әнесқызы басшылық ететін іргелі ұжымның жеткен жетістіктері жетерлік. Бұған дейінгі жетістіктері өз алдына, осы оқу жылының өзінде аудандық білім бөлімінің ұйымдастыруымен өткізілген «Үздік тәрбиеші – 2022» байқауына бөбекжай-бақшаның тәрбиешісі Роза Құрмансейітова қатысып, аудан бойынша «Ең үздік тәрбиеші – 2022» номинациясын жеңіп алды. Бұл жетістіктің өзі аталған балалар орталығының үздіктер санатында екенін дәлелдеп-ақ тұр. Осы орталықтың мәдени шараларын ұйымдастырып, жетістік жолында бірге жұмыс жүргізетін бөбекжай әдіскері Айгерім Кірбасова:<blockquote>Зейнолла Шүкіров атындағы қалалық мәдениет үйінің ұйымдастыруымен өткізілген «Ең сүйкімді бүлдіршін» атты балалар байқауында бөбекжай-бақшамыздан 2 тәрбиеленуші Амандық Димаш (тәрбиешілері Г.Тұрсынбаева, А.Жеткербаева) және Айзере Жеткербай (тәрбиешілері М.Жұбаниязова, Ұ.Шманова) қатысып, Димаш жүлделі орынды, Айзере ІІ орынды иеленді. Бұдан осы жылы «Жазғы шынықтыру-сауықтыру жұмыстарының ерекшеліктері» тақырыбында облыстық семинар өткізіп шықты. Семинарда педагог қызметкерлердің үздік жұмыстары көрсетілді. Мұндай нәтижелі жұмыстар мен жетістіктерден өзге баламен жұмыс істеудің түрлі тәсілдері бөбекжай ұжымында ұдайы қолға алынып отырады. Сондықтан да біздің орталықтың баламен жұмыс істеуде ауыз толтырып айтуға тұрарлық жетістіктері бар, – дейді.</blockquote>Иә, бүгінде "Қарлығаш" қанаттандырған қарлығаштардың алды аға буын өкіліне айналды десек, тәуелсіз еліміздің кемел келешегі үшін түрлі салада табысты еңбек етіп жатқан жастар қаншама? Ал сәні мен салтанаты келіскен, ұжым мүшелері ұдайы ізденіспен алға басатын тәрбие ошағының табысты жұмысы жыл сайын жаңа жетістіктермен жаңарып отыратыны айтпаса да түсінікті. Бұл мақсатта Гүлнара Әнесқызының басшылығымен қолға алынып жатқан жұмыстардың табысты тізбегі бұдан әрі де жалғасын таба береді деген сенімдеміз.

Аралдағы балабақша білім берудің жаңа талаптарына сай қызмет етуде

<a href="https://kyzylorda-news.kz/">Kyzylorda-news.kz.</a>&nbsp;&nbsp; &nbsp;Жуырда Тасбөгет кентінің әкімі Айдын Тыныштықбай БАҚ өкілдеріне берген брифингте жыл бойы атқарылған жұмыс барысы мен алдағы атқарылатын жұмыстарға тоқталды.Кент әкімінің айтуынша, өткен жылы инфрақұрылымды дамыту бойынша мемлекеттік бюджет, демеуші және инвестиция есебінен ауқымды жұмыстар атқарылған. Нақтырақ айтсақ, ұзындығы 82 шақырымды құрайтын 52 көшенің 41 көшесі жөндеуден өткен. Оның ішінде Сабалақ саяжайындағы 18 көше мен кенттегі 21 көшенің белгіленген бөліктеріне қиыршық тас төселіп, 2 көшеге асфальт төселген. Ал 7 көшеге жарық бағаналары орнатылса, «Еңбек» және «Өркендеу» саяжайындағы 3 көшеге демеушілер өз есебінен жарық бағаналарын орнатқан. Сонымен қатар аймақ басшысының қолдауымен кент аумағында құны 542,1 млн. теңгені құрайтын дене шынықтыру-сауықтыру кешені пайдалануға берілді.&nbsp;<blockquote>– Соңғы жылдары кентте кәсіпкерлікті дамыту бағытындағы мемлекеттік бағдарламаларға қатысу қарқыны артып келеді. Сондықтан биылғы жылы да тұрғындарға мемлекеттік бағдарламаны пайдалана отырып, кәсіп ашуға, кеңейтуге кеңес берілді. Нәтижесінде он екі айдың ішінде алпыс жеті тұрғын өз жобасын қорғап, 400,9 млн теңге көлемінде қаражат иеленді. Бүгінде кентте 1644 кәсіпкер бар. Олар өздерінің &nbsp;қызметін табысты жүзеге асыруда, – деді Тасбөгет кентінің әкімі Айдын Маратұлы.</blockquote>Мұнан соң кент әкімі биыл атқарылатын жұмыстарға тоқталды.– Өздеріңіз білетіндей, кентке қарасты Сабалақ саяжайын «көгілдір отынмен» қамтамасыз ету мәселесі де басты назарда. Қазіргі таңда «Досстройпроект» ЖШС мекемесінің демеушілігімен Сабалақ саяжайына «көгілдір отын» тарту жұмыстарының жоба-сметалық құжаттары әзірленді. Нәтижесін күтіп отырмыз, – деді Тасбөгет кентінің әкімі.Биыл Тасбөгент кентінің бюджеті 345,9 млн теңге болып бекітілген. Алдағы уақытта Е. Ертуғанов көшесінің Сапарбаев пен Баймағанбетов көшелері &nbsp;аралығына абаттандыру жұмыстары жүргізілсе, Исмайлов көшесіндегі жарық бағанасының орнатылмай қалған бөліктеріне жарықшамдар қойылмақ. Ал халықтың сұранысы бойынша кенттегі&nbsp; ұзындығы 12,7 шақырымды құрайтын 6 көшеге жарық бағаналарын орнату бойынша жоба сметалық құжаттары әзірленген.&nbsp; Сондай-ақ &nbsp;Ғ.Мұратбаев (Сапарбаев қиылысы) және Ә. Молдағұлова (Сейтпенбетов қиылысы) көшелеріне 4 аялдама мен Сабалақ саяжайының орталық көшесіне екі аялдама орнатылады. Одан бөлек кенттегі әлеуметтік нысандар орналасқан алты көшеге жаяу жүргіншілер жолын салуға және Сабалақ пен Еңбек саяжайындағы көшелерге жарық бағаналарын орнату мақсатында тиісті құжаттар әзірленуде.

Айдын Тыныштықбай: Көгілдір отынмен қамтамасыз ету басты назарда

<a href="https://kyzylorda-news.kz/">Kyzylorda-news.kz.</a> Мереке қарсаңында Қызылорда облысы, Шиелі ауданының тұрғыны Ботагөз Аркашбаева республикалық «Ару ана» конкурсының&nbsp; жеңімпазы атанып, Мемлекет басшысы Қасым-Жомарт Тоқаевтың қолынан марапат алды.&nbsp; ҚР Президенті жанындағы әйелдер істері және отбасылық-демографиялық саясат жөніндегі Ұлттық комиссияның ұйымдастыруымен өткен «Ару ана» республикалық конкурсының қорытындысымен Қазақстан бойынша 20 қыз-келіншек іріктелген болатын. Конгресс-Холлда&nbsp; өткен Халықаралық әйелдер күніне арналған мерекелік концертте оның 6-уы марапатталды. Жерлесіміздің жобасы «АГРОБИЗНЕС САЛАСЫНДАҒЫ ҮЗДІК ЖОБА» номинациясы бойынша жеңімпаз деп танылды. Б.Аркашбаеваның «Ешкі сүтін терең өңдеу» жобасы тәулігіне 50 литр ешкі сүтін өңдеуге бағытталған.&nbsp; Негізгі мамандығы&nbsp; хореограф болғанымен, 2017 жылдан бері&nbsp; «Оразбек» отбасылық шаруа қожалығын ашып, мал шаруашылығымен айналысуды бастаған. Қазір ешкі саны 100-ден асты, Австралия және Германиядан ешкі төлін әкеліп, жергілікті тұқымдармен будандастыру тәжірибесін қолға алған. Алдағы уақытта будандастырылған жаңа тұқымды халықаралық сатылымға шығаруды жоспарлауда.&nbsp; Ешкі сүтінен ірімшіктің 4 түрін, құрт, май, брынза, сүзбе&nbsp; жасап сатады. Өнімдерге сұраныс өте жоғары болғандықтан, кәсібін&nbsp; кеңейтпек.

Қызылордалық кәсіпкер республикалық конкурс жеңімпазы атанды

<a href="https://kyzylorda-news.kz/">Kyzylorda-news.kz.</a> 55 жастағы Қайрат Бекшаев Испаниядан Қазақстанға анасын іздеп келген Жәнібектің болжамды әкесі болу мүмкін екенін айтты, деп хабарлайды&nbsp;inbusiness.kz&nbsp;сайты&nbsp;"Көреміз"&nbsp;бағдарламасына сілтеме жасап.&nbsp; Ол 2001 жылы бір емес, екі келіншекпен көңіл жарастырғанын жеткізді. Тіпті&nbsp;24 жастағы&nbsp;ұлын&nbsp;Жәнібекке ұқсатып, өз еркімен ДНК сынамасын тапсырып та көрген.&nbsp; "Жәнібекті өзіме қатты ұқсаттым", – дейді&nbsp;Қайрат Бекшаев.&nbsp; Алайда, ДНК сынамасы мүлде басқалай болып шықты. Қайрат&nbsp;Бекшаев&nbsp;Жәнібектің әкесі емес. Ұқсастық нөл деңгейінде.&nbsp; Кейіпкер күдігі расталмаса да Жәнібекке көмектесуге дайын екен айтады.&nbsp;

Қазақстан және Қызылорда облысының жаңалықтары