<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев «Самара-Шымкент-Еңбекші» жолының Шиелі ауданындағы Еңбекші ауылына дейінгі 4,5 шақырымын жөндеу мәселесі бойынша жауапты мамандар және кәсіпорын өкілдерімен кездесті.&nbsp;Кездесуге облыс әкімінің орынбасары Ардақ Зебешев, Шиелі ауданының әкімі Нұржан Ахатов, облыстық кәсіпкерлік және өнеркәсіп басқармасының басшысы Дінмұхамед Абсаттаров, облыстық жолаушылар көлігі және автомобиль жолдары басқармасының басшысы Жәнібек Сыздықов, «Қазатомөнеркәсіп» ҰАК» АҚ өндіріс жөніндегі бас директоры Қуаныш Омарбеков, «KAP Logistics» ЖШС бас директоры Дархан Рамазанов, «Гежуба Шиелі цемент компаниясы» ЖШС бас басқарушысы У Чженьхуа, «Гежуба Шиелі Цемент Компаниясы» ЖШС бас басқарушының орынбасары Айбек Абсеметов қатысты. Бұл туралы Қызылорда облысы әкімінің баспасөз қызметі хабарлады.Аймақ басшысы тұрғындардың өмір сүру сапасын арттыру басты мақсат екенін атап өтіп, жоспардағы жобаларды тез арада іске асырып, ел игілігіне табыстау үшін бірігіп жұмыс жасауға шақырды.«Аталған жол учаскесін «Қазатомөнеркәсіптің» уран өндіруші мекемелері, «Гежуба Шиелі цемент компаниясы» және басқа да ірі кәсіпорындар күнделікті пайдаланады. Өздеріңізге белгілі, «Самара-Шымкент-Еңбекші» жолының 6 шақырымы (оның ішінде 4,5 шақырымы Еңбекші ауылына дейінгі жол) 2015 жылдан бері «КАП логистикс» серіктестігіне 10 жылға өтеусіз пайдалануға берілген. Қазір жолдың тозығы жетіп, күрделі жөндеуді қажет етуде. Өткен жылы қараша айында Шиелі ауданына жұмыс сапарымен барғанымда, Еңбекші ауылының тұрғындары осы жолдың жағдайына наразылық білдірді. Мендегі ақпаратқа сәйкес, «КАП логистикс» серіктестігі биыл Еңбекші ауылынан басталатын 13 шақырым жолға күрделі жөндеу жүргізуді жоспарлауда. Оған қосымша Еңбекші ауылына дейінгі 4,5 шақырым жолды күрделі жөндеуді ұсынамын. Құрметті әріптестер, бұл – үш ауылдағы 2871 тұрғынның (Еңбекші – 1605, Жиделіарық – 1025, Қосүйеңкі – 241) өтініші. Сол себепті бірлесіп жұмыс атқару маңызды», – деді Н.Нәлібаев.Еске салайық, өткен жылғы 6 қарашадағы облыс әкімінің Сырдария, Шиелі аудандарына жұмыс сапарының нәтижесімен қабылданған хаттамалық шешімге сәйкес облыстық кәсіпкерлік және өнеркәсіп, жолаушылар көлігі және автомобиль жолдары басқармаларына қолданыстағы заңдылықтар аясында «Батыс Еуропа – Батыс Қытай» автожолынан Еңбекші ауылына дейінгі бұзылған 4,5 шақырым жолды күрделі жөндеуді тас өнімдерін шығаратын кәсіпорындар арқылы қаржыландырылуды 1 желтоқсанға дейін үйлестіру тапсырылған.Еңбекші ауылына дейінгі 4,5 шақырым – Шиелі аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің теңгеріміне жататын 4 санаттағы жол. Өз кезегінде кәсіпорын өкілдері аталған жол ортақ пайдалану үшін керек екенін, бастаманы қолдайтынын жеткізді.<img src="https://knadmin.beoblood.kz/uploads/432651004_708805411440706_5211165407213317557_n_1f60e3209e.jpg" alt="432651004_708805411440706_5211165407213317557_n.jpg">&nbsp;

Еңбекші ауылына дейінгі 4,5 шақырым жол жөнделеді 

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; Бұл туралы Өңірлік коммуникациялар қызметінде өткен баспасөз мәслихатында Павлодар қаласы әкімінің орынбасары Светлана Гладышева айтты, деп хабарлады Elorda.info.Басылым мәліметінше, мерекелік концерт 22 наурызда Орталық алаңда өтеді.Ақшаның негізгі бөлігі, әрине, біздің жұлдыздарға кетті. Роза Рымбаева мен Қайрат Нұртастың қымбат екенін түсінеміз. Олардың жалпы гонорары шамамен 10 млн теңгені құрайды, - деді Светлана Гладышева мерекелік бағдарламаға қатысты қаланың жалпы шығыны туралы сұраққа жауап бергенде.Павлодарлықтар Наурыз мерекесін 21-22 наурыз күндері тойлайды.&nbsp;Фото: nur.kz

Наурыз мерекесі: Роза Рымбаеваны шақыру үшін қанша ақша жұмсалады?

<a href="https://kyzylorda-news.kz/">Kyzylorda-news.kz.</a>&nbsp; Көбінесе бұл сұрақпен Әлеуметтік медициналық сақтандыру қорының Қызылорда облысы бойынша филиалының мамандарына жүгінеді. Бас сарапшы Айгүл Аханова түсініктеме береді.Төлем жасамас бұрын, мәртебеңізді және соңғы 12 айдағы төлемдердің болуын тексеріңіз. Мұны Qoldau-24/7 мобильді қосымшасы, Telegram-дағы SaqtandyruBot арқылы немесе eGov.kz электрондық үкімет порталындағы жеке кабинет арқылы жасауға болады.Үзінді көшірмеде сіз әр ай үшін төлемдерді жеке-жеке көресіз. Егер сізде бірнеше төленбеген ай болса, сізге олар үшін әлдеқайда аз мөлшерде төлем жасап, мәртебені алу тиімді болады. Бірақ осыдан кейін мәртебеңізді жоғалтпау үшін ай сайын жарналарды төлеуді ұмытпаңыз. Егер сізде ешқандай төлем болмаған жағдайда, онда төлемді өткен жылға емес, алдағы 12 айға жасаған тиімді.МӘМС жарналарын екінші деңгейдегі кез келген банктердің мобильді қосымшалары, жылдам төлем терминалдары және «Қазпошта» филиалдары арқылы төлеуге болады.Алдағы 1 жылға төлем жасағыңыз келсе, ағымдағы айдан бастап барлығы 12 айға жеке жеке әр айды, жылын көрсетіп төлеу керек. Егер ағымдағы айдың аяқталуына шамалы күндер қалса немесе осы айда медициналық көмекке жүгінуді жоспарламасаңыз, төлемді келесі айдан бастап жасаған жөн. Сонда Сіз бір жыл бойы сақтандырылған боласыз.Жүйе төлемдерді дұрыс есептеу үшін жарналар әр ай үшін бөлек төленеді. Төлем жасау кезінде ЖСН, төлем енгізілетін ай мен жылды дұрыс көрсету маңызды.Сіз 12 айға төлемдерді бірден бір төлеммен төлеп тастай алмайсыз, өйткені жүйе әр ай үшін төлемді бөлек оқиды. Қате жіберген кезде мәртебені жоғалтпау үшін осы кезең үшін жарналарды қайтадан төлеуіңіз керек, ал қате төленген соманы қайтаруға болады. Қате төленген соманы қайтару «Азаматтарға арналған үкімет» мемлекеттік корпорациясына өтініш берген жағдайда жүзеге асырылады.Жарналарды 3 жұмыс күні ішінде төлегеннен кейін жүйеге төлемдердің түсуін және мәртебенің берілуін тексеру қажет. Еске салайық, мұны Qoldau-24/7 мобильді қосымшасы, Telegram-дағы SaqtandyruBot немесе eGov.kz сайтындағы жеке кабинет арқылы жасауға болады.Төлем ұзақ уақыт бойы жүйеге түспесе, төлем кезінде қате жіберілген болуы мүмкін. Ең алдымен, тексерулерге енгізілген деректердің дұрыстығын қайтадан тексеру қажет. Содан кейін банкке қоңырау шалып, төлемнің бар-жоғын біліңіз. Егер жоқ болса, «Азаматтарға арналған үкімет» мемлекеттік корпорациясына қоңырау шалыңыз, өйткені МӘМС жүйесіне барлық төлемдер Ұлттық банктегі арнайы шотқа түседі, содан кейін халыққа медициналық көмек Қор арқылы бөлінеді.Фото: Рустем Айтхожин/Kazinform

МӘМС-ке алдын-ала төлемді қалай жасауға және бiр жыл бұрын мәртебені қалай алуға болады? 

<a href="https://kyzylorda-news.kz/">Kyzylorda-news.kz</a> Өрт пен суды айтпағанда, қара жолда жермен жексен ететін апат аз емес. Айдың-күннің аманында төрт дөңгелектің тайқуы, яки өзге көлікпен тіресіп қаларлық қауіп жиі кездеседі. Амандық пен ажал апаңы таразыға түскенде тез жететін құтқарушылардың еңбегі ерлікпен пара-пар. Ауыр халдегі адамның күйін көзбен көріп, өмір сыйлауға ұмтылатын өрлігі қошеметке лайық. Қиын да күрделі саланың жай-жапсары жалпақ жұртты таңқалдыратыны анық. Осы орайда облыстық ТЖД жедел құтқару жасағының құтқарушысы Берікбол Жетебаев жұмысы жайында баяндап берді.<h2 style="margin-left:0cm;">Көлік мета­лының өзі мыжылады&nbsp;&nbsp; &nbsp;&nbsp;&nbsp;&nbsp;&nbsp;</h2>Тосыннан төнетін қауіп пен айтып келмейтін апат орын алғанда тез арада адамды құтқаруға асығамыз. Бізге жүктелген жауапкершілік пен негізгі міндетіміз де осы. Адамға көмек беру қаныма сіңген қасиет. Бала күнінен құтқарушы «мықты болу керек» деген ұстаныммен спортпен шұғылданып, өзімді жетілдірдім десем де болады. Сондықтан қалаған мамандығыма машықтанып, қызметімді абыроймен атқарып жүргеніме қуанамын. Апаттан адамды аман сақтап, дер уақытында құтқара алсақ, миссия­мыздың орындалғаны.Қазіргі таңда еңбек өтіліме – 4 жыл. Осы уақыт ішінде түрлі құтқару опера­циясына қатысып, қауіп пен қатердің бел ортасында жүрмін. Темір тұлпар бір-бірімен тіресіп, ойда-жоқта оқыс оқиға орын алады. Мұндай жағдайда көлік металына дейін мыжылып, адамға зақым келеді. Әрине, майысқан темір-терсек арасынан жарақаттанған адамды шығару оңай емес.&nbsp;Хабар түскен сәттен жылдам барып, алдымен жағдайды анықтаймыз. Көлікте қысылып, зардап шеккен жанды құтқару құралдарын қолданып қауіпсіз жерге шығарамыз. Жедел-жәрдем қызметі келгенше дә­рігерлікке дейінгі алғашқы көмек көрсетеміз.<h2 style="margin-left:0cm;text-align:justify;">Жүрек тұсына арматура қадалған адамды құтқардық</h2>Жол-көлік оқиғасы әртүрлі болады. Қай-қай­сысының да қиын­дығына мойымай, міндетті мінсіз орындау басты мақсатымыз. Мұны тек қызметтік борыш емес, азаматтық парызым деп ұғынамын. Бір кездері автокөлік жанармай бекетінің қоршауына соғып, жүргізушінің жүрек тұсына арматура кірген болатын. Әлбетте құтқарушыға қарап тұруға, бөгелуге уақыт жоқ. Тез арада әрекет етіп, істің шешімін табу маңызды. Сондықтан гидравликалық және спредер құралдың көмегімен арматурды кесіп алып, жарақаттанған адамды ауруханаға апардық. Осылайша жүргізушіні өлімнен арашалап қалдық. Сонда дәрігерлер дер уақытында келгенімізді, сәл кешіксек жағдай қиындайтынын айтқан еді.Апаттың салдары қашан да ауыр болады. Қайғылы оқиғаның қабырғаны қайыстыратыны белгілі. Сондай жайттың бәрін көз алдымнан өткіземін. Екі көліктің ортасында адам қалып қояды немесе қорқынышпен айқайлап жататындар бар. Мұның бәрі оңай емес. Кейде қатты соққыдан есін жия алмай, ішек-қарны ақтарылып қалатын сәттер де болады. Дей тұрғанмен қолымыздан келгенше көмек беруге тырысамыз. Жантүршігерлік оқиғалар төбеден мұздай су құйып жібергендей өн-бойымызды шымырлатып жібереді. Дегенмен, құтқарушы болғандықтан барлық жағдайға дайын боламыз.<h2 style="margin-left:0cm;">Төтенше жағдайға 1 минутта жиналу керек</h2>Адам алдында не боларын білмейді. Табан астынан тығырыққа тіреліп, қауіппен бетпе-бет келуі мүмкін. Сондықтан құтқарушылар құлағына хабар жетсе көп аялдамай, жиналамыз. Сайып келгенде, бұл мамандық иесіне жеделдік пен жылдамдық тән. Шымырлық пен ширақтық танытқанда ғана шешімге сай әрекет ету жеңіл болмақ. Талап пен тәртіпті ескеріп, жұмысты бүге-шүгесіне дейін білгені ләзім. Жалпы төтенше жағдай орнына жедел кезекші бөлімше 1 минутта жиналады. Ал ауқымды төтенше жағдай орын алса, жасақ қызметкерлеріне жиын дабылы беріліп, 1 сағат көлемінде шығып кетеді. Негізі бір айда шамамен 60-65 төтенше жағдай тіркеледі.<h2 style="margin-left:0cm;">Қаннан қорқатын адам құтқарушы бола алмайды</h2>Құтқарушының тек физикалық емес, психикалық жағынан да мықты болғаны абзал. Оқиға мезетінде өзі маза­сыз­данып, күйзеліске ұшыраса жұмысты әрі қарай алып кетуі екіталай. Бойда сенімділік бекіп, ептілік танытса адам құтқару қолынан келетіні айдан анық. Әрине қан-жоса болған жанды немесе мүрдені көзбен көру оңайға соқпайды. Кейде өзімізге де зақым келеді. Бірақ техникалық қауіпсіздікті сақтай отырып, жұмысты жүргіземіз. Арнайы бас киім, қорғаныш көзілдірігі, қолғап киеміз. Құтқару операциясын жүргізу үшін тез әрекетке көшеміз. Бізде психологиялық тұрғыда сынып қалу деген жоқ. Өйткені маман бар. Әр құтқарушымен байланысып, жаттығу жүргізіп, көмек көрсетеді.Қысқасы, екінің бірі құтқарушы бола алмайды. Алғашында құтқарушы мамандығын алуға 3 ай беріледі. Осы мерзімде түрлі құтқару жұмыстарына қатысып, мәйітханаға барады. Бірақ шошынып, қаннан қорқып, жүрегі шыдамай қайтып кеткендер аз емес.&nbsp;Жігері жасымайтын, қайсар құтқарушы ғана мамандықтың машақатын сезбейді.

Аймақтағы құтқару жасағының жұмысы жүйелі

<a href="https://kyzylorda-news.kz/">Kyzylorda-news.kz</a>&nbsp; Ұлттық бұйымдар алыстан көз тартады. Сыбызғыдай сызылған сыныптың шашбаулылары майысқан саусақтарымен жетіген тартып, әсем ән айтып отыр. Бұл Қазалы ауданындағы Ғани Мұратбаев атындағы 17 орта мектептің 4 "А" сыныбында өткен шараның бір шеті. Сынып жетекшісі Бағым Сахиева «Көрісу күні» аясында ұмыт болып бара жатқан салт-дәстүрді насихаттау мақсатында балалармен бірлесіп, «Бастаңғы» ұйымдастырды.&nbsp;Мектеп директорының тәрбие ісі жөніндегі орынбасары Айнұр Кенжалиева мен педагог ұйымдастырушы Бауыржан Бердібай сөз алып, ұлттық құндылықтарымызды жас ұрпақтың бойына сіңірудің маңыздылығына тоқталды.&nbsp;– Құрметті ата-аналар, оқушылар бүгін керемет күн. Көрісу күнімен тұспа-тұс келген сыныптарыңыздың Наурыз мерекесі тойлайтын күндеріңіз қатар келіп отыр екен. Қыстан аман-сау шыққанымызға осы күнді амал күні, көрісу күні деп атаған. Мереке баршамызға құтты болсын. Деніміз сау, отбасымыз аман болсын! Балалар үздік оқып, бізді қуантсын, – деді мектеп директорының тәрбие ісі жөніндегі орынбасары Айнұр Кенжалиева.&nbsp;– Көктем айы келіп, Наурыз мерекесі тойлауды бастап кеттік. Дана халқымыз күн мен түннің теңесуін біліп, жылдың басы санаған. Барлығыңызға жаңа жыл құтты болып, ақ мол болсын. Еліміз тыныш, бейбітшілік заман болып, өсіріп отырған балаларымыз биік белестерден көріне берсін, – деді педагог ұйымдастырушы Бауыржан Бердібай.&nbsp;Шаттыққа толы шара соңында балалар ән шырқап, би биледі. Керемет көрініс қойылды. Кең көлемде өткен мектеп оқушыларының шарасы көңіл қуантты. Келген қонақтар дастарқаннан дәм татып, тілектерін айтып, «Наурыз көже» ішті.

Қазақтың ұлттық салт-дәстүрі насихатталды

<a href="https://kyzylorda-news.kz/">Kyzylorda-news.kz</a>&nbsp; Жуырда аудандық білім бөлімі мен аудандық білім саласы ардагерлер ұйымының қолдауымен "Ата-ананың бала тәрбиесіне ықпалының педагогикалық шарттары" тақырыбында тренинг өтті.&nbsp;Аудандық оқушылар үйінің мәжіліс залында өткен жиында "Қазақстан Республикасы білім беру ісінің үздігі", "Қазалы ауданының құрметті азаматы", ғалым-ұстаз – Шарафадин Алтынбайұлы, белді кәсіпкер – Медеу Бердібайұлы мен ардагер ұстаз – Серік Қуанышбаевтар қатысты.Жалпы, қай уақытта болмасын, бала тәрбиесі мәселесі назардан тыс қалмаған. Өйткені ол – мемлекеттің аса маңызды міндеттерінің бірі. Кездесуде ата-аналар мен мұғалімдер бала тәрбиесіне қатысты өз ой-пікірлерін ортаға салды.– Қай елде, қай кезде болмасын, бала тәрбиесін ерекше дамытушы да, ілгері апарушы да-балалар, яғни бүгінгі ұрпақ-ертеңгі елдің болашағы. Жел бесіктен, жер бесікке дейінгі адам өміріндегі тәрбиенің ұйытқысы ата-ана мен ұстаз. Болашақ десек те, келешек десе де бала – ұрпақ деген мағынаны білдіреді. Адамның өзге тіршілік иесінен айырмашылығы – дүниеге перзент әкелген соң, оның болашағын ойлау, адам етіп тәрбиелеу. Бала тәрбиесі – бір отбасының ғана емес, бүкіл қоғамның мемлекеттік абыройлы міндеті. Кезінде Әл Фараби бабамыз «Ғылым емес, ең алдымен, тәрбиеге көңіл бөлу керек, тәрбиесіз адамға ғылым баянды болмайды» – демеп пе еді. Осыған орай, бүкіл ата-ана тәрбиеге бет бұруы керек. Ұрпақ тәрбиесіне мүдделі екендігін ата-аналар іс-жүзінде дәлелдеп отырулары тиіс. Міне, осындай ынтымақ бірлігінде ғана ойдағыдай нәтиже берері ақиқат. Жас ұрпақ біздің өміріміздің тікелей жалғастырушы ғана емес, еліміздің тірегі, мызғымас болашағы. Адамзаттың өмірдегі ең қымбаттысы, көз қуанышы – бала. Бала – дербес тұлға. Оның бойындағы табиғи қасиеттер, адамгершілік құндылықтары отбасында, мектепте, әлеуметтік ортада нәрленеді,&nbsp;– деді ардагер ұстаз Серік Қуанышбаев.Мұнан соң "Агро-Өркен" ЖШС құрылтайшысы Медеу Есқожаев өз қаржысына ұрпақ тәрбиесіне арналып шыққан "Тәрбие басы – тал бесік немесе бір өкініш, бір үміт" атты кітаптың 200 данасын баспадан қайта бастырып, тренингке қатысқан 200 ата-анаға Республикалық "Кітап сыйла" қозғалысы аясында тегін таратып берді. Жиын қатысушы ата-аналар сұрақ-жауабымен қорытындыланды.&nbsp;

Бала тәрбиесі – басты назарда 

<a href="https://kyzylorda-news.kz/">Kyzylorda-news.kz</a>&nbsp; Мұғалімнің шеберлігі мен жетістігі – сапалы білім мен жақсы тәрбие алған шәкірттерінде. Шәкірт қабілетін жан-жақты дамытып, шығармашылығын, ізденімпаздығын ұштай білу үшін ұстаз өзі шығармашыл тұлға болуы тиіс. Демек, бүгінгі заман мұғалімі қазіргі қоғамдық-әлеуметтік талаптарға жауап беретін, жан-жақты білімді, жаңашыл ойлау дағдысын меңгере отырып, теория мен практиканы үйлестіріп, оқыту тәсілдерін үнемі жетілдіріп, осының бәрін әдіснамалық тұрғыдан игеруі тиіс.&nbsp;Жуырда аудандық оқушылар үйінде білім мазмұнына сай технология элементтерін қолдана отырып, оқушылардың техникалық үйірмелер бойынша білімдерін тереңдетіп, қызығушылықтарын арттыру және логикалық қабілеттерін дамыту мақсатында «Техникалық шығармашылық: Ізденіс. Идея. Шеберлік» тақырыбында техникалық үйірмелер онкүндігі өткізілді. Онкүндікті техникалық бағыттағы &nbsp;«Авиамодельдеу», «Робототехника», «Бағдарламалау негіздері», «Көлік модельдеу», «Бастауыш техникалық жобалау», «3Д модельдеу» үйірмелері ұйымдастырды.&nbsp;Қазалы аудандық оқушылар үйінің «Бағдарламалау негіздері» үйірмесінің жетекшісі Гүлмира Нартайқызының айтуынша, онкүндіктің ашылуында&nbsp; аспан әлемін бейнелейтін ерекше декарацияны әр үйірме бағытында жасалған макеттер мен модельдер, роботтар, &nbsp;3Д модельдер көрмесі толықтырды.&nbsp;Оқу-тәрбие жұмысын түрлендіру бағытында ашық сабақтар, ұстаздар арасында&nbsp; тәжірибе алмасу сағаттары, оқушылармен&nbsp; тәрбиелік шаралар, спорттық жарыстар, оқушылар арасында&nbsp;ұйымдастырылған&nbsp; қызықты да, көңілді үзілістер -&nbsp; онкүндіктің мазмұнын аша түсті.&nbsp;Атап айтқанда, &nbsp;Ауғанстаннан кеңес әскерлерінің шығарылғанына 35 жыл толуына орай "Қаһарлы күндердің қаһарман елестері" тақырыбында ауған соғысы ардагерлері Қуаныш Шаңбаев, Болат Теңізбаев, Нұрлан Қоразбаевпен кездесу кеші өткізілді. Кешке қатысушы қонақтар, оқушылар, ұстаздар ауған жерінде қаза тапқан жауынгерлердің рухына 1 минут үнсіздік жариялап, еске алды. Ардагерлер ел болашағы жастарды патриотизмге, білімді, тәрбиелі болуға шақырды, оқушылар тарапынан қойылған&nbsp; сұрақтарға жауап берді. Ел аманатын арқалап, жастық шақтарының бір бөлігін от пен оқ астында өткізген ауған соғысы ардагерлеріне&nbsp;құрмет көрсетілді.&nbsp;– Дебат&nbsp;– пікірсайыс, шешендік өнер мен ой ұшқырлығы сынға түсетін ойын. Ойыншылар дәлелдер мен фактілерге сүйенеді. Дебат тәртіпке бағынады және дебатта ойыңызды еркін, нақты жеткізе аласыз. Оқушылар үйінде техникалық үйірмелер онкүндігі барысында &nbsp;қосымша білім педагогтарына арналған "Заманауи мұғалімнің кәсіби шеберлігінде АКТ қолдануы" тақырыбында әдістемелік сабақ, мұғалімдер арасында&nbsp; «Ғаламтор көлеңкесіндегі кітап» тақырыбында дебат өткізілді. Ұстаздар&nbsp; өздерінің өткір ойлы, сөзге шебер екендіктерін пікірсайыс барысында дәлелдеп, сөз саптау деңгейін, ораторлық қабілеттерін көрсете білді. Шараға дебат жетекшісі Жанболат Изжанов төрелік жасады. Сонымен қатар,&nbsp; "Лего құрастыру", "Жанасу датчигі" &nbsp;тақырыбындағы ашық сабақтар, оқушының бойында жақсы көңіл-күй қалыптастыруға арналған "Көңілді балақай" тренингі,&nbsp; оқушылардың балалық шағынан, отбасылық өмірінен, саяхат кезінен қызықты сәттерден «Бақытты балалық шақ» фотокөрмесі, «Қалдықтардан жасалған ғажайып» атты оқушылар арасында қалдық заттардан жасалған бұйымдар көрмесі, "Біз чемпионбыз!" спорттық сайысы өте тартысты ұйымдастырылды, – дейді Қазалы аудандық оқушылар үйінің «Бағдарламалау негіздері» үйірмесінің жетекшісі Гүлмира Иманалиева.Жеке тұлғаның өзіндік көзқарасын қалыптастыру және белсенділіктерін арттыру, ақыл-ой таным қабілеттерін дамыту, әрбір күні өзгеріске толы бүгінгі жауапты кезеңде замана көшінен қалмай, уақыт талабына сай жас ұрпақты білімді етіп тәрбиелеуде.&nbsp;Оқушылар үйінде түрлі бағыттағы онкүндік шаралар жалғасуда.&nbsp; Шығармашыл тұлғаны дамыту және қалыптастыруда, оқушының сабақтан бос уақытын тиімді ұйымдастыруда қосымша білім педагогтарының ізденістері мен педагогикалық шеберліктерінің арттыра түсері сөзсіз.&nbsp;

Шеберлік шыңдалған онкүндіктер

<a href="https://kyzylorda-news.kz/">Kyzylorda-news.kz</a>&nbsp; Бүгін 14 наурыз – Көрісу күні. Бұл күнді Амал мерекесі деп те атайды. Наурыз мерекесінің бастауы, жаңа жылдың басы ретінде тойланатын бұл мереке – күн мен түннің теңелген тұсында, қыстың бейнеті мен қиындығынан аман-есен шығып, халықтың Наурыз мерекесі алдында мәре-сәре болатын күн.Атаулы күнге орай Қашақбай Пірімов ауылында «Татулық достықтың киелі бесігі» атты мерекелік шара өтті. Тағылымды шараға аудан әкімінің кеңесшісі Бақытжан Жарылқап пен аудандық мәдениет және тілдерді дамыту бөлімінің басшысы Болат Жолтаев қатысып, жиылғандарды мерекемен құттықтады. Сондай-ақ, Амал мейрамының мән-мағынасы мен тарихына, оның құндылықтарына айрықша тоқталып өтті.Амал мерекесінде Абай ауылы, Жалаңтөс батыр, Қ.Пірімов ауылдарының әжелері қауышып, әдет-ғұрыпқа сай шашу шашты. Қазақтың ұлттық тағамдарынан дәм ұсынылып, ұлттық спорт түрінен ойындар ұйымдастырылды. Сонымен қатар, қазақ халқының ұлттық салт-дәстүріне негізделген театрландырылған көрініс пен концерттік бағдарлама ауыл тұрғындарының назарына ұсынылды. Өнерпаздар ән мен жырдан шашу шашып, халыққа ерекше қуанышты көңіл-күй сыйлады.

Қазалыдағы Қашақбай Пірімов ауылында көрісу күні аталып өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Жақында әдістемелік кабинеттің жылдық жоспарына сәйкес Ы.Алтынсарин атындағы №204 орта мектептің қазақ тілі мен әдебиеті пәні бірлестігінің ұйымдастыруымен «Оқылым дағдысы – функционалдық сауаттылықтың негізі» тақырыбында аудандық семинар өтті.&nbsp;Семинардың барысында мектеп басшысы Ләззат Ізбасқан мен аудандық білім бөлімінің әдіскері Жазира Оңғарова жиынға қатысушыларға сәттілік тілеп, құттықтау лебіздерін жеткізді. Мектеп оқушыларының алған білімдерін өмірде қолдану мүмкіндіктері туралы ақпарат беріліп, 7-сынып оқушысы Дамир Айғараның қазақ күйімен жалғасты.&nbsp;Бұдан бөлек, ұлттық құндылықтар қоса дәріптеліп, пән мұғалімдері Ажар Есенованың «Қазақ тілі пәнінен функционалдық сауаттылықты арттырудың тиімді тәсілдері» тақырыбында баяндамасы тыңдалды. Ғазиза Орынбетованың 9 «В» сыныбымен «Ғаламтор желісінің жетістіктері», Мақсат бағыныңқылы сабақтас құрмалас сөйлем тақырыбында ашық сабағы көрсетіліп, Шакизада Есенова мен Назгүл Ізімқұлдың «Білімдінің ойы ұшқыр, өресі кең» тақырыбында 9-сынып оқушылары арасында зияткерлік сайыс сабағы өткізілді. Одан әрі Қаламқас Телеуова мен Гүлназ Жүнісованың «Оқу сауаттылығының негізі – мәтінмен жұмысты толық қалыптастыру» тақырыбында шеберлік сағаты өткізілді. Мәтінмен жұмысты толық қалыптастыру мақсатында түрлі әдіс-тәсілдер ұйымдастырылды.&nbsp;Семинар соңында аудандық білім бөлімі әдіскері өткізілген сабақтардың мақсатына жеткендігін саралап, жиында жұмыстарын көрсеткен пән мұғалімдерін білім бөлімінің Алғыс хатымен марапаттады.

Филологтар шеберлік сабағын өткізді

Жаңақорған халқы ұстазға құрмет көрсетті

<a href="https://kyzylorda-news.kz/">Kyzylorda-news.kz.</a> Қызылорда облысы бойынша Қылмыстық-атқару жүйесі департаментінің №60 мекемесінде жалпы саны 4600 кітаппен толыққан, 300-ден астам жазасын өтеуші оқырманды қамтып отырған кітапхана жұмыс істейді. Алайда, қазақ тіліндегі әдеби шығармалар жиынтығы тапшы. Осы орайда, Ә.Тәжібаев атындағы Қызылорда облыстық әмбебап ғылыми кітапханасының қызметкерлері оқырмандар сұранысына сай мекеме кітапханасына алпысқа жуық түрлі ақын-жазушылардың шығармашылығындағы кітаптарды тарту етті.<blockquote>Жазасын өтеушілер мекемеде қалаған мамандығы бойынша білім алады. Сәйкесінше, білімдерін тереңдету мақсатында бірнеше әдебиетке сүйенеді. Өз қалаулары бойынша да түрлі ақын-жазушылардың шығармашылығын оқиды. Мысалы, жақында сотталғандардың бірі ас мәзірлер жиынтығын сұрады. Мекеме мен облыстық кітапхана қызметкердерінің біріккен жұмысы нәтижесінде жазасын өтеушілердің сұранысына ие кітаптар мекеме кітапханасының сөрелерінен табылды. Жаза басып жаңылса да, кітапқа құштар оқырманның бары көңіл қуантады, – дейді мекеменің тәрбие бөлімінің бастығы М.Әбдімажит.</blockquote>А. есімді сотталған мекеменің өндірістік аймағында аспазшы болып жұмыс жасайды. Жаза мерзімін тағдырластарына ас әзірлеумен өткізіп жатқан ол, түрлі тағамдардың жасалу тәсілін білу үшін мекеме кітапханасына жиі барады.<blockquote>Бостандықта жүргенде қаладағы қоғамдық тамақтану орындарында жұмыс жасадым. Бастапқыда тамақтың түрлері мен жасалу тәсілдерін кітаптан қарап жүретінмін. Қолымнан тағам даярлау келгендіктен мекеме асханасына жұмысқа орналастым. Бұл жақта бекітілген ас мәзірі бойынша тағам дайындаймыз. Әрине, бостандықта жүріп даярлаған ас мәзірі мүлде бөлек. Темір тордың арғы жағына шығатын күн де алыс қалмағандықтан, кітапхананың ас әзірлеуге қатысты түрлі кітаптарын жиі оқимын. Бүгін де жаңа кітап келгенін естіп, өзіме қажеттіні &nbsp;оқуға келдім,- дейді жазасын өтеуші.</blockquote>

Түрме кітапханасы жаңа кітаптармен толықты

<a href="https://kyzylorda-news.kz/">Kyzylorda-news.kz.</a> «Байқоңыр» әлеуметтік-кәсіпкерлік корпорациясы» акционерлік қоғамының қолдауымен әлеуметтік маңызы бар азық-түлік өнімдерін арзан бағамен сататын «Үй жанындағы дүкендер» ашылуда.Үй жанындағы дүкендер - бұл тауарларды бөлшек саудада өткізуге арналған арнайы әлеуметтік бұрыштар. Сауда бұрыштарын ашудағы басты мақсат - азық-түлік қауіпсіздігін қамтамасыз ете отырып, тұрақтандыру қорындағы әлеуметтік маңызы бар азық-түлік тауарларын (ӘМАТ) төмендетілген бағамен халыққа тиімді түрде ұсыну болып табылады.Бүгінде қаламызда 14 үй жанындағы дүкенде арнайы сауда бұрыштары ашылып, онда келісімшарт негізінде әлеуметтік маңызы бар азық-түлік тауарлары орташа нарықтағы бағадан 10%-15%-ға төмен бағада сатылуда.<blockquote>Үй жанындағы дүкендерде ашылған әлеуметтік бұрыштар бүгінде халыққа қолжетімді сипаттағы сауда алаңына айналып отыр. Тұжырымдамаға сәйкес, сауда дүкенінің тұтынушылары жақын маңдағы тұрғындар болмақ. Әлеуметтік бұрыш сөресінен күнделікті тұрмысқа қажетті әлеуметтік маңызы бар 19 түрлі азық-түлік өнімдерін белгіленген төмен бағада алуға мүмкіндік бар, - деді Басқарма төрағасының орынбасары Асхат Жорабекұлы.</blockquote>Айта кетейік, өз дүкендеріңізде әлеуметтік бұрыштарды ашу үшін бүгінде өтінім беру қабылдануда. Өтінімді 8 (701) 672-19-71, 8 (701) 222-44-49 (Whats’App) байланыс нөмірі арқылы немес әлеуметтік желілеріміздегі жеке мессенджерлер арқылы қалдыруға болады.Фото: aqmeshit-aptalygy.kz

Қазақстан және Қызылорда облысының жаңалықтары