<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев кадрлық өзгерістерге байланысты актив отырысында жаңа тағайындау туралы хабарлады.Қордабай Нұрғали Рахымшаұлы Қызылорда облысы бойынша тексеру комиссиясының аппарат басшысы лауазымына тағайындалды.&nbsp;<blockquote>«Нұрғали Рахымшаұлы Сіздерге жақсы таныс, мемлекеттік қызметтің түрлі сатысынан өтіп, лауазымды қызметтер атқарған тәжірибелі, іскер басшы. Әр жылдары мемлекеттік кірістер органдарында жетекші маманнан бастап, басқарма басшысы, департамент басшысының орынбасары болып абыройлы қызмет атқарды. Салық және бюджетке төленетін басқа да міндетті төлемдер көлемінің артуына өзіндік үлесін қосты. Нұрғали Рахымшаұлының жаңа қызметіне сәттілік, ел мүддесі жолындағы еңбегіне табыс тілеймін», – деді аймақ басшысы.</blockquote>Нұрғали Қордабай 1976 жылы туған. Қызылорда политехникалық институтын «Бухгалтерлік есеп және аудит», Қорқыт Ата атындағы Қызылорда мемлекеттік университетін «Құқық» мамандықтары бойынша бітірген.Еңбек жолын 1997 жылы «Дәнекер» АҚ бухгалтері ретінде бастаған. 1999-2015 жылдары Қызылорда облысының салық органдарында жауапты басшылық қызметтер атқарған. 2015-2016 жылдары Қызылорда қаласы әкімінің кеңесшісі. 2016-2018 жылдары Қызылорда облысының экономика және бюджетті жоспарлау басқармасы басшысының орынбасары, 2018 жылдың желтоқсан айынан бастап экономика және қаржы басқармасының басшысы қызметін атқарып келді.<img src="https://knadmin.beoblood.kz/uploads/347820991_1851730568532994_5923089880682446930_n_7ea1959611.jpg" alt="347820991_1851730568532994_5923089880682446930_n.jpg">

Қызылорда облысы бойынша тексеру комиссиясының аппарат басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев кадрлық өзгерістерге байланысты актив отырысында ҚР Мемлекеттік қызмет істері агенттігінің келісімі негізінде, облыс әкімінің өкімімен Қызылорда облысының экономика және қаржы басқармасының басшысы лауазымына Мүбараков Қамбарбек Амангелдіұлы тағайындалғанын хабарлады.Аймақ басшысы Қамбарбек Амангелдіұлын құттықтап, жаңа қызметінде сәттілік тіледі.<blockquote>«Қамбарбек Амангелдіұлы – аймақтың әлеуметтік-экономикалық ахуалымен етене таныс, мемлекеттік қызметтің барлық сатысынан өтіп, басқарушылық лауазымдарда мол тәжірибе жинаған әлеуеті жоғары кадр. Өңірдің әлеуметтік-экономикалық дамуының негізгі басым бағыттары мен стратегиялық мақсаттарын айқындауда экономика және қаржы басқармасының орны ерекше. Осы ретте бюджеттің әр тиынының мақсатқа сай жұмсалуын, сапалы игерілуін қамтамасыз етіп, барлық көрсеткіштер бойынша алдыңғы қатардан көрінеді деп сенім білдіреміз», – деді Нұрлыбек Машбекұлы.</blockquote>Жаңадан тағайындалған басқарма басшысын облыстық ардагерлер кеңесінің төрағасы Серік Дүйсенбаев пен Қызылорда облысы аумақтық кәсіподақтар бірлестігі төрағасы Мақсұт Нәлібаев құттықтады.Қамбарбек Мүбараков 1973 жылы дүниеге келген. Қызылорда политехникалық институтын «Агроөнеркәсіп кешені саласындағы экономика және менеджмент», Қызылорда гуманитарлық университетін «Заңтану» мамандықтары бойынша бітірген.Еңбек жолын 1990 жылы Өзгент совхозындағы орталық қырманның слесарі болып бастаған.1997-2009 жылдары салық органдарында түрлі деңгейдегі &nbsp;басшылық лауазымдарда қызмет атқарған. 2009-2018 жылдары Шиелі ауданы әкімінің орынбасары, Қызылорда облысы бойынша тексеру комиссиясының төрағасы. 2019-2022 жылдары Қызылорда облысының ауыл шаруашылығы басқармасының басшысы, Шиелі ауданының әкімі, Ы.Жақаев атындағы Қазақ күріш шаруашылығы ғылыми-зерттеу институтының төрағасы болған.2022 жылдың қараша айынан бастап осы кезге дейін Қызылорда облысының кәсіпкерлік және өнеркәсіп басқармасының басшысы қызметін атқарып келді.<img src="https://knadmin.beoblood.kz/uploads/348433924_616721787143222_903903431949079318_n_1a6442cd1e.jpg" alt="348433924_616721787143222_903903431949079318_n.jpg">

Қызылорда облысының экономика және қаржы басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев Мәдениет және өнер қызметкерлері күніне арналған салтанатты іс-шараға қатысып, Сыр елінің мәдениет қызметкерлері мен сала ардагерлерін кәсіби мерекемен құттықтады.<blockquote>«Ел Президенті Қасым-Жомарт Кемелұлы Тоқаев «Ұлт мәдениеті – халық өмірінің айнасы, оның болмысы. Сол себепті азаматтарымыздың рухы әрқашан биік болуы үшін мәдениетімізге, яғни, руханиятымызға баса мән бергеніміз жөн», – деген болатын. Бүгін Өздеріңізге ақжолтай жаңалықпен келдік. «Сырдың елі – жырдың елі» атанған қасиетті мекеннің абыройын асырып, бақ-беделін сақтауға үлес қосушы мәдениет және өнер, әдебиет өкілдерінің сан жылдан бергі тілегі – облыс әкімінің мәдениет және әдебиет өкілдеріне арналған «Тұран» сыйлығын табыстайтын боламыз. Жүлде қоры 500 мың теңгені құрайтын облыс әкімінің сыйлығы әдебиет пен өнер өкілдерінің шығармашылығын шыңдауға септігін тигізетініне сенімдімін. &nbsp;Он жылдан астам уақыттан соң арасы үзіліп қалған дәстүрді қайта жалғадық. Талай дарын мен талант түлеген Сыр өңірінде мұндай сыйлық пен марапаттың болуы – заңдылық», – деді аймақ басшысы.</blockquote>Жиында өнер иелеріне «Тұран» сыйлығын табыстау, ҚР Мәдениет және спорт министрлігінің «Еңбек ардагері» және «Мәдениет саласының үздігі» төсбелгісімен марапаттау рәсімі өтті. Мұнан бөлек, аймақтың бірқатар мәдениет саласының қызметкері Қызылорда облысының «Құрмет» грамотасымен, облыс әкімінің Алғыс хатымен марапатталды. Аймақтың мәдениет ұйымдарындағы 8 өнер ұжымына 40 домбыра тарту етілді.Мерекелік кеште ақын, Қазақстан Жазушылар одағы облыстық филиалының төрағасы Қаршыға Есімсейтова мен ақын Шаһизада Әбдікәрімов сөз сөйлеп, әріптестеріне игі тілектерін арнады. Аймақ басшысына өнер иелеріне қолдау көрсеткені үшін алғыс білдірді.Іс-шара соңы жергілікті өнерпаздардың қатысуымен концерттік бағдарламаға ұласты.Айта кетейік, биыл Сыр өңірінің мәдениет және өнер саласында көптеген жағымды жаңалық бар. Жыл соңында Қызылорда қаласындағы 1000 орындық көпфункционалды «Өнер орталығы», ал тамыз айында «Анаға тағзым» орталығы іске қосылмақ. Оған қоса өнер әлеміне қанат қаққан мүмкіндігі шектеулі өнерпаздардың шығармашылығын шыңдауға арналған Инклюзивті театр жобасы мақұлданды. Таяу арада Қызылорда қаласының әкімдігі мен облыстық мәдениет және спорт басқармасы бұған дейін үйірме ретінде жұмыс жасап келген «Жастар театрын» өз алдына кәсіби ұжым етіп құру бойынша нақты шаралар қабылдайды.Мұнан бөлек, биыл өнердің қарашаңырағы – Н.Бекежанов атындағы қазақ академиялық музыкалық драма театры 18 жылдан соң апталық бағдарламамен Алматы қаласына гастрольдік сапарға шығады. Үш дүркін «Алтын домбыра» иегері, жерлесіміз Мұхтар Ниязовтың жаңа ізбасарларын дайындау мақсатында өңірде тұңғыш рет «Айтыс олимпиадасы» атты облыстық жасөспірімдер айтысы өткізілмек.Қызылорда облысының құрылғанына 85 жыл және Қызылорда қаласының 205 жылдығына орай мерейтойлық салтанат аясында бірінші рет бюджет тапсырысымен 12 сериялы имидждік телесериал түсіру жобасы қолға алынды. Қазіргі заманауи трендке айналған телесериал арқылы аймақтың жағымды бет-бейнесін жасап қана қоймай, инвестициялық тартымдылығы мен туристік мүмкіндіктері республикалық, халықаралық деңгейде насихатталмақ.&nbsp;<img src="https://knadmin.beoblood.kz/uploads/347408521_130990686652484_3584911016618787127_n_a88d4c202e.jpg" alt="347408521_130990686652484_3584911016618787127_n.jpg"><img src="https://knadmin.beoblood.kz/uploads/347133806_259383573254587_1795306776942551515_n_c46724eae8.jpg" alt="347133806_259383573254587_1795306776942551515_n.jpg"><img src="https://knadmin.beoblood.kz/uploads/347408459_202426685998727_4978055725898543291_n_0454bd51a1.jpg" alt="347408459_202426685998727_4978055725898543291_n.jpg"><img src="https://knadmin.beoblood.kz/uploads/347548849_633003695350297_8563431292825283309_n_6caabc6e76.jpg" alt="347548849_633003695350297_8563431292825283309_n.jpg"><img src="https://knadmin.beoblood.kz/uploads/347265666_268051102358098_1961514152393716994_n_4eebbab6e4.jpg" alt="347265666_268051102358098_1961514152393716994_n.jpg"><img src="https://knadmin.beoblood.kz/uploads/347408853_1646190485853173_1230334526159042658_n_a3948d900c.jpg" alt="347408853_1646190485853173_1230334526159042658_n.jpg">

Қызылорда облысы әкімінің «Тұран» сыйлығы табысталды

<a href="https://kyzylorda-news.kz/">Kyzylorda-news.kz.</a> Ежелден-ақ ұлы халқымыз аналар мен қыз-келіншектерді, қыздарын ерекше құрмет тұтқан. Нәзік жандыларға ізет пен ілтипат көрсетіп, жүрек жылуларын арнаған. «Жұмақтың кілті – ананың табанының астында» деген аталы сөз осындай ұлағатты үрдістен қалса керек. Ұлттық әдебиетіміздегі Құртқа, Қарлыға, Баян, Ақжүніс, Қарашаш, Еңлік, Жібек, Ботакөздің өшпес бейнелері талай көңілдерді баурап, өмір жолдарына баянды бағыт сілтеді. Бойларына батылдық пен қайсарлық қасиеттерді дарытты.&nbsp;Осы тұста бүгінгі заман аналарының озық үлгісі ретінде Ажаркүл Алдажарованы тілге тиек етсек ешкім қарсы дау айта қоймас. Өйткені ол жас шағынан ұлттық құндылықтарымызбен сусындап, кеудесіне қазақы мінездерді қалыптастырған.&nbsp;1950 жылы қазіргі Жалаңтөс батыр ауылында қарапайым колхозшы отбасында туған көкөрім қыз ауылдың күнұзағына толастамайтын тынымсыз тірлігімен біте қайнасып өсті. Оң мен солын танығаннан бастап ата-анасына қолғабысын көрсетті.&nbsp;Бір сәтте тоқтауды білмейтін уақыт сынаптай сырғып алға жылжыды. Балдәурен балалық кезеңмен қоштасып, қолдарына кәмелеттік аттестаттарын алды. Сыныптас құрбы-құрдастарының біразы арман жетегіне еріп, жоғарғы оқу орындарына түсуге талаптанды.&nbsp;Ажаркүлдің көкірегінде жастықтың жігер оты жалындады. «Кіндік қаным тамған туған жерімде боламын. Оның экономикалық жағынан өсіп-өркендеп, көркейе түсуіне перзенттік үлесімді қосамын!» деген берік байламға келді. Бұл тілегін ауыл басшыларына жеткізді.&nbsp;Диқан кетпенін қолға алып, күріш егуге кірісті. Көктем келіп, күн жылт етісімен, егінжай басындағы қайнаған еңбектің ортасынан табылды. Өзіне бекітіліп берілген жерді механизаторлардың көмегімен агротехникалық талаптарға сай баптады. Егістікке мөлшерлі тыңайтқыш сіңірілді. Алқапқа дән себілісімен жұмыс қыза түсті. Таң алакеугімнен қас қарайғанша тыным таппады. Мезгілімен атыздарды суға бастыруға бар күшін салды. Шаршап-шалдыға жүріп, бұл шаруаны ойдағыдай аяқтап шықты.&nbsp;Күріш баладай бап тілейтін дақыл екен. Жас диқан осы істің басы-қасында жүргелі бері мұны жақсы ұғынды. Жаз бойы маңдай терін төге еңбек еткен Ажаркүл сол жылы 40 центнерден өнім келтіріп, қуанышқа кенелді.&nbsp;1976 жылы тегістелген жерге еккен күріштігінің әр гектарынан 99 центнерден өнім жинап, шаруашылық абыройын аспанға көтерді. Есімі алқалы жиындарда мақтанышпен ауызға алына бастады. 1978 жылы ІІІ дәрежелі «Еңбек даңқы» орденін, 1980 жылы Бүкілодақтық халықшаруашылығы көрмесінің «Алтын» медалін кеудесіне тақты. Ы.Жақаев атындағы жүлдені иемденіп, облыстың үздік күрішшілері сапына қосылды. Бірнеше рет сайлаушыларының қолдауымен облыстық Кеңестің депутаты болды. Қажырлы еңбегі үшін 1981 жылы Қазақ ССР Мемлекеттік сыйлығының лауреаты атанды. Аудандық, облыстық партия конференцияларына делегат, облыстық партия комитетінің мүшесі болып, абырой асқарына көтерілді. 1990-1994 жылдары Қазақ ССР Жоғарғы Кеңесінің депутаттығына сайланып, халық сенімін арқалады. 2009 жылдан бері Қазалы ауданының құрметті азаматы.&nbsp;Өзінің қазақ аналарына тән жігер-қайратының арқасында диқандықты игеріп, жоғарыдағыдай атақ-дәрежеге жеткен Ажаркүл Алдажарова бүгінде Жалаңтөс батыр ауылында тұрады. Диқан кетпенін серік ете жүріп, Гүлжан, Ерлан, Гүлнар, Нұрсұлтан, Әсем есімді ұл-қыздарына тәлімді тәрбие берді. Олардың бәрі де өмірден қалаған орындарын тауып, өз алдарына үйлі-баранды болып отыр. Сүйкімді немерелерінің «әже» деген тәтті сөздерін естігенде төбесі көкке жеткендей болады.&nbsp;Ажаркүл апа ізбасар сіңілдері мен келіндерінің биік адамгершілік деңгейінде өмір сүрулеріне тілекші. Олардың көңілдерінен әрдайым ибалық пен ізеттіліктің, мейірімділік пен адамгершіліктің, жігерлілік пен төзімділіктің нұрлы шуағы төгіліп тұрғанын қалайды. Бұралаңы көп өмір жолында өз орнын таба алмай жүрген талай жастарға ақыл-кеңесін беріп, дұрыс бағдар сілтеді. Көптен ажырамай, қатарға қосылуына ықпал жасады.&nbsp;Қайбір жылы ауылдық клуб жанына өнерлі қыз-келіншектерді топтастырып, «Өнеге» әжелер ансамблін ұйымдастырды. Ұмыт болып бара жатырған халық әндерін көрермендер арасында насихаттап, ұлттық мұраларымызды жаңғыртуға атсалысты.&nbsp;<blockquote>«Отбасы – шағын мемлекет» деп ақындарымыз жырлағанындай, шаңырақта береке-бірліктің ұялауы жұбайлардың өзара сыйластығына да байланысты. Менің белгілі күрішші атанып, мәртебемнің өсуіне өмірлік серігім Ержігіттің қамқорлығы мен көмегі тиді. Өндіріс саласында бірге жұмыс істеп, бір-бірімізге сүйеу болдық. «Еңбек түбі – береке» деген. Сондықтан бүгінгі жастардың ауырдың үсті, жеңілдің астымен жүрмей, еңбекқор болып, жақсылыққа талпынып тұрғандары жөн»,- дейді дүйім жұртқа танымалы Ажаркүл Алдажарова.&nbsp;</blockquote>Жас толқынның құлағына алтын сырға. Ардақты да абыройлы ананың дуалы аузынан шыққан лебізді көкірек сарайларына тоқи жүргенінің бүгінгі жастар үшін пайдасы мол екендігі айна қатесіз шындық.

Қазалылық Ажаркүл Алдажарова жастарды еңбекқорлыққа шақырады

<a href="https://kyzylorda-news.kz/">Kyzylorda-news.kz.</a> Мүлгіп жатқан далаға жан бітіріп, болат жолды бойлай зулаған пойыздың жылдамдығындай 23 жыл өте шығыпты. Теміржол саласындағы еңбегі Бекзада Мырзағұлованың кешегі күндей көз алдында. Әкесі Төребай 45 жылға жуық Төретам және оның аумағындағы №101, 109-шы станцияда басшылық қызмет атқарған. Сондықтан саланың қызығы мен қиындығы оған жақсы таныс.Бекзада Төребайқызы отбасында 8 ағайынды. Алайда әке жолын қуып, теміржолға бет бұрған тек кейіпкеріміз ғана.&nbsp;<blockquote>«Әуелде Қызылорда педогогикалық училищесінде жұмыс істедім. Тұрмысқа шығып, отбасылы болған соң солай қолайлы көрінген. Алайда теміржол саласына деген қызығушылығым басым болды. Еліміз тәуелсіздік алғаннан кейін 1992 жылы жолдасым, 1993 жылы өзім «Қазақстан Темір жолы» АҚ жолсерік болып жұмысқа орналастық. Солай екеуміз бірге 2009 жылға дейін бұрынғы «Қызылорда-Мәскеу», қазіргі №289-290 «Қызылорда-Көкшетау» жолаушылар пойызында бір вагонда еңбек еттік», – дейді кейіпкеріміз бізбен әңгімесінде.</blockquote>Әр саланың өзіндік қиындығы бары белгілі. Жолы алыс ұзақ сапарда жолаушылармен тіл табысу да оңай емес. Вагондағы әрбір жолаушының көңіліне қарау, шайын қайнатып, тазалығын сақтау, бір сөзбен айтқанда қолайлы жағдай жасау жолсеріктің – басты міндетінің бірі. Ал көпшілікте көңіл толмаушылықтың болуы қалыпты жағдай. Мұндай сәтте үлкенге құрмет, кішіге ізет көрсетіп, жағдайды ушықтырмай шешу кәсіби маманның ісі. Кейіпкеріміз Бекзада Төребайқызы тумысынан ақжарқын, көпшіл жан. Оның осы болмысы жұртшылықпен тіл табыса жұмыс істеуіне септігін тигізген. Ол – бұл талаптың үдесінен шыға білген маман.<blockquote>«Адам өз ісін сүйіп, бар ынтасымен жақсы көріп істесе еш кедергі болмайды деп ойлаймын. Жұртшылықпен етене араласып еңбек ету өзіме ұнайтын. «Қызылорда-Мәскеу» бағытында 6 күн жол жүреміз. Сол аралықта вагонға мінген әр жолаушымен бір үйдің адамындай жақсы араласып кететінмін. Жолаушылар үшін бастысы іштегі тазалық, шайдың кез келген уақытта қайнап тұрғаны ғой. Бұл міндетті орындау еш қиындық туғызған емес. Кейде ішімдік ішіп масайған жолаушылар мінеді. Ондай кезде айналасының мазасын алуы мүмкін. Небір жайттар болады ғой. Соның бәрін болдырмас үшін алдын ала қамданып, ушықтырмаудың амалын жасаймыз. Бүгінде талап қатал. Пойызға ішімдік ішіп мінуге немесе сонда отырып ішуге тыйым салынады. Бұл да дұрыс шығар. Бұрынғы мен қазіргіні салыстыруға келмейді. Қазіргі жолаушылар талапшыл ғой. Өз құқығын біледі», – дейді ол жұмыс барысы туралы.</blockquote>Өкінішке орай, 2009 жылы өмірлік серігі әрі әріптесі болған жолдасы Қасен Тәшімбетов дүниеден озады. 16 жыл бірге бір отбасының, бір саланың жүгін көтеріскен жақын жаннан айырылу оған жеңіл соққан жоқ. Тек көз қуанышы – балаларымен бірге өткізген сәттерінің естелігі жанына демеу болды.&nbsp;<blockquote>«Жолдасым екеуміз бір вагонда жолсерік болдық қой. Ол кезде кенже ұлым Аслан 1 жаста еді. Үлкендері оқушы болды. Алты күндік сапарға кішкентай 2 баламызды бірге алып шығатынбыз. Келесі 6 күнде үйде боламыз. Солай Аслан 2 жасқа толғанша жүрдік. Вагон біздің екінші үйіміз сияқты. Бала-шағамызбен, ел-жұртпен бірге Қызылорда мен Мәскеу арасын жол қылдық. Өзімнің баянмен ән айтатыным бар. Жолсерік болған соң кейде мереке күндерін жолда қарсы алуға тура келеді. Біз сапарымыздың қай күнге тура келетінін білеміз ғой. Ал жолаушылардың көбі мерекені үйінде қарсы алғысы келеді. Бірақ амалсыздан жолға шығуына тура келуі мүмкін. Ондай кезде алдын ала баянымды дайындап, бірге алып шығамын. Сосын барлығы орналасқан соң жолаушыларға ескертіп айтамын. Әрі қарай қосылып әнімізді айтып, олар ортада би билеп, мерекені жақсы көңіл-күймен қарсы аламыз. Мерекелік көңіл-күй болсын, бірге сезінейік деген ниет қой. Мұны жолдасым да құптайтын. Өте сабырлы, ақкөңіл еді. Әр сапарды асыға күтетін жолсерік десем артық болмас. Жұмысына бар ынтасымен берілген азамат болатын. Вагонның тазалығына баса мән беретін. Қазір сол кез ең қызықты сәттеріміз екен деп сағынышпен еске аламын. Жолдасым Қасен өмірден өткен соң 2016 жылға дейін еңбек еттім. 61 жасымда зейнетке шықтым», – дейді өмірі мен еңбек жолының шуақты сәттерін еске алған Бекзада Төребайқызы.&nbsp;</blockquote>Тоғыз жолдың торабында ширек ғасырға жуық адал еңбек еткен кейіпкеріміз өткен күндерін сағына еске алады. Жолға шығардағы әр сәті вагон тазалығын тексеру, төсек жабдықтарын қабылдау, қажетті отынды тиеу, вокзалдағы қарбалас, жолаушыларды күтіп алу, билетін тексеріп ішке кіргізу, сәт сапар тілеу – мұның бәрі оның өмірінің айнымас бір бөлшегі болған.&nbsp;Бір Аллаға сыйынып, ұзақ жолға шығу, діттеген жерге жолаушыларды аман-есен жеткізу жауапкершілігін бүгінде кенже ұлы Аслан атқарып жүр. Нағашы атасынан соң, әкесі мен анасы жүрген жолды жалғастырмаққа ниеттенген оның бұл салаға келгеніне 5 жыл болыпты. Иә, ата-анасы еңбек етіп, халық алғысын алған сол баяғы №289-290 «Қызылорда-Көкшетау» жолаущылар пойызында қызмет етеді. Азды-көпті 5 жыл ішінде Аслан да өз ісінің маманына айналған. Сырдан Көкшеге дейінгі аумақты жол еткен жолаушыларға жағдай жасап, діттеген жеріне аман-сау жеткізуде сенімді серік болып келеді. Сөзден іске жақын Аслан мамандығын мақтаныш санайды. Кейде осы жолда тұрақты сапарлатқан жолаушылар анасы мен әкесінің адамгершілік қасиетін өзара әңгіме қып айтып отырады екен. Ондай сәтте бойын мақтаныш кернеп, адал еңбек ету қай кезде болсын жемісті әрі абыройлы екенін жіті ұғады.&nbsp;Бүгінде 5 бала тәрбиелеп өсірген Қасен Тәшімбетов пен Бекзада Мырзағұлова ұлын ұяға, қызын қияға қондырған жандар. Әрқайсысы өзі ұнатқан саланың маманы. Ал кейіпкеріміз балалары мен немерелерінің қызығын көріп, елдің алғысына бөленген жан. Жолдасы екеуінің еңбегі басшылық тарапынан түрлі марапатқа лайық саналды. Алайда кейіпкеріміз ең лайықты баға – жолаушылар разылығы, халықтың алғысы деп санайды.

«Теміржолда 23 жыл қызмет еткен»: Бекзада Мырзағұлова саланың қызығы мен қиындығы туралы айтты

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев жұмыс сапарымен Ғ.Мұратбаев және Құмжиек ауылдық округтеріне барды.&nbsp;Ең алдымен аудан басшысы Әйтеке би кенті мен Ғ.Мұратбаев ауылына баратын жолдың құрылысымен танысты. Жұмысқа жауапты мердігер мекеме қызметкерлерімен кездесіп, жолдың сапалы болуын және уақытылы аяқталуын тапсырды.&nbsp;Мұнан соң Мұхтар Әуесұлы ауылдан жаңадан ашылған кварталда салынатын тұрғын үйлерді инженерлік инфрақұрылыммен қамтамасыз ету жұмыстарын көрді. Мұндада аудан басшысы мердігер мекеме – «Универсал Строй Сервис» ЖШС мамандарына жұмысқа асқан жауапкершілікпен қарау қажет екенін ескертті. Қазіргі таңда ауыл әкімшілігі ғимараты ағымдағы жөндеуден өтіп жатыр. Қызу шаруаның басына барған аудан әкімі жұмыстың сапасына баса назар аудару қажет екенін айтты.&nbsp;Сонымен қатар округтегі саябаққа да аялдап, ауыл әкімі Абай Рыстығұлға елді мекен ішіндегі жүріп жатқан барлық жұмыстарды қатаң бақылауға алуын тілге тиек етіп, тазалық жұмыстарына да мән беру керек екенін сөз етті.&nbsp;Аудан әкімі Мұхтар Оразбаевтың жұмыс сапары Құмжиек ауылдық округінде жалғасты. Мұнда саябақ пен ойын алаңдарының жайымен танысып, ауыл әкімі Әділхан Әбіловке тиісті жұмыстарды қолға алуды тапсырды.

Қазалы ауданының әкімі Ғ.Мұратбаев және Құмжиек ауылдарына барды

<a href="https://kyzylorda-news.kz/ru">Kyzylorda-news.kz.</a> Қорқыт ата атындағы Қызылорда университетінде пәндік олимпиада жеңімпаздарын марапаттау салтанаты өтіп, мектеп бітіруші түлектерге 20 білім гранты табысталды.&nbsp;Пәндік олимпиада университеттің ұйымдастыруымен Ұлттық біріңғай тестілеуде бар 16 пән бойынша 11-сынып оқушылары арасында өткізілді.Жеңімпаздарды марапаттау салтанатында Басқарма Төрағасы – Ректор Бейбіткүл Кәрімова олимпиадада үздіктер анықталғанын атап өтті.Білім бәйгесіне облыстағы мектептерден 1381 оқушы қатысты. Олимпиада нәтижесінде 20 оқушы топ жарып, университеттің 16 &nbsp;білім беру бағдарламасы бойынша ішкі білім грантын иеленді. Оның ішінде Дүниежүзі тарихы пәні бойынша білім гранты тәуелсіздік жолында күрескен қоғам қайраткері, алаш зиялысы Мұстафа Шоқай атынан тағайындалды. Ал Қазақстан тарихы, Қазақ әдебиеті, Қазақ тілі пәндері бойынша білім гранты ұлт руханиятының көрнекті өкілі, мемлекет және қоғам қайраткері Темірбек Жүргеновтің атынан тағайындалды. Құқық негіздері пәні бойынша жеңімпазға профессор, философия ғылымдарының кандидаты, Қызылорда қаласы мен Қазалы ауданының «Құрметті азаматы» Мұстафа Матаев атындағы білім гранты табысталмақ. Физика пәні бойынша білім гранты Қорқыт ата атындағы Қызылорда университетінде ұзақ жылдар бойы қажырлы еңбек еткен, педагогика ғылымдарының докторы, профессор Бақытжан Сайлыбаевтың атынан тағайындалды. Журналистика мамандығы бойынша жеңімпазға жалынды журналист, университет түлегі Сағитжан Бермағанбетов атындағы білім гранты берілді. Мұнан бөлек, Информатика, Биология, География, Химия, Шетел тілі, Орыс әдебиеті, Орыс тілі, Бастапқы әскери дайындық, Эстрада, вокал және музыкалық аспаптар, Дәстүрлі ән-жыр, Хореография, Көркем еңбек пәні бойынша грант табысталды.&nbsp;Айта кету керек, қазіргі уақытта университетте 10 168 білім алушы оқиды. Олардың 2840-ы мемлекеттік грант негізінде, 106-сы жергілікті атқарушы органдар (үкіметтің көпбалалы отбасыларға арналған гранты), 270-і Қызылорда облысы әкімінің гранты негізінде білім алады. Сонымен қатар, 546 түрлі әлеуметтік статустағы білім алушыға халықаралық, республикалық, облыстық сайыстар мен додалардың жеңімпаздарына 25, 50, 100 пайыз жеңілдіктер жасалған.&nbsp;Салтанатты шараға Т.Жүргенов қоғамдық қорының төрағасы, еңбек ардагері, Қармақшы ауданының құрметті азаматы Сәпен Аңсатов, қоғамдық қор өкілі Әмит Жұмағұлов, «Байқоңыр» әлеуметтік-кәсіпкерлік корпорациясы жанындағы «Қызылорда облысының даму орталығының» басшысы, экономика ғылымдарының докторы, М.Матаевтың ұлы Талғат Матаев, «Физика және математика» кафедрасының аға оқытушысы, ардагер М.Матаевтың жұбайы Торғын Аймұратова, Ұлттық қауіпсіздік комитеті саласының қызметкері, Б.Сайлыбаевтың ұлы &nbsp;Әділ Сайлыбаев, экономика ғылымдарының кандидаты, Б.Сайлыбаевтың қызы Алтынай Сайлыбаева, «Мұстафа Шоқай» қорының төрағасы Батырбек Жолдықұлов, жалынды журналист Сағитжан Бермағанбетовтың анасы Меруерт Бақбергенова қатысып, оқушыларға грант табыстады.&nbsp;<img src="https://knadmin.beoblood.kz/uploads/l_b1a58bc4fb.jpg" alt="л.jpg">

Қызылордада пәндік олимпиада жеңімпаздарына 20 білім гранты табысталды

<a href="https://kyzylorda-news.kz/">Kyzylorda-news.kz.</a> Қасиетті Қызылқұм бөктерінен талай талант түлеп ұшқаны көпке аян. Бүгінде Іңкәрдария ауылында мәдениет саласы бойынша жоспарға сәйкес, жүйелі жұмыс жүргізілуде. Аудандық мәдениет үйінің әдістемелік бөлімінің бастамасымен, ауылдық клуб үйінің ұйымдастыруымен &nbsp;аптаның сәрсенбісінде «Үйірме – өнерге бастар жол» тақырыбында аудандық семинар өткізілді. Аталған іс-шараға мәдениет саласының мамандары қатысты.Аудандық семинардың қатысушылары ең алдымен ауылдық клуб үйі жанынан ашылған үйірмелер жұмысымен танысты. Бірнеше жыл бұрын пайдалануға берілген ауылдық клуб үйінің ұжымын қырық жылдан аса тәжірибесі бар Зағира Ахметова басқарады. Қазіргі уақытта мәдениет ошағында &nbsp;«Ән жанры», &nbsp;«Драма», &nbsp;қолөнер және суретті қамтитын «Бейнелеу өнері» үйірмесі жұмыс жасайды. Сонымен қатар, «Сұлу-ай» шығармашылық өнер орталығы арқылы «Домбыра», «Баян», «Ұлттық би», «Хор», «Көркем оқу» үйірмесі ашылған. Әрбір үйірменің бағыт-бағдарын таныстырған ауылдық клуб үйінің әдіскері Әйкерім Жұмабекова жыл көлемінде қол жеткізген жетістіктерге тоқталды.&nbsp;<blockquote>&nbsp;Тарихы тереңде жатқан Іңкәрдария ауылында өнерлі өрендеріміз жеткілікті. Осы күні үйірме жұмысы жолға қойылып, балалардың шығармашылығын, қабілетін дамытуға барымызды салып келеміз. Осы кезге дейін шәкірттеріміз халықаралық және республикалық байқаулардан жеңімпаз атанып үлгірді. Аудан орталығынан шалғайда орналасқан ауылымыздан талантты, өнерлі шәкірттер көптен шығады деп сенеміз, – деді Айкерім Жұмабекова.&nbsp;</blockquote>Мәдениет саласының мамандарының тәжірибе алмасу мақсатында жүзеге асқан семинар барысында аудандық мәдениет үйінің әдіскері Гаухар Сәрсенбаева біршама әдестемелік жұмыстарды саралады.&nbsp;<blockquote>Біз дәстүрлі түрде аудандық семинарды әрбір ауылда ұйымдастырып келеміз. Осы жолы өзара іс-тәжірибемізбен бөлісу бағытында бас қосып отырымыз. 2023 жылдың 4 айында жақсы жетістіктерге қол жеткізген әріптестеріміз бар. Оларға кәсіпорын басшысының «Алғас хатын» тапсырдық. Жүйелі жоспар мен жұмыстың нәтижесін саралай келе, бір-бірімізге баға беріп отырамыз. Бүгінгі Іңкәрдария ауылындағы үйірме жұмысын танысып, материалдық базаға, балалардың шығармашылық әлеуетіне көңіліміз толды, – деді Гаухар Сәрсенбаева.&nbsp;</blockquote>Иә, расында &nbsp;«21 мамыр – Қазақстанда мәдениет және өнер қызметкерлерінің күні» кәсіби мерекесін атап өтетін сала мамандарының қызмет бағыты – сан алуан. Күндіз-түні демалыссыз қызмет ететін мәдениет саласының мамандары бар мақтауға лайықты. Осы ретте, аудандық мәдениет үйінің әдіскері Ақбота Талғатова аталған сала бойынша атқарылған жұмыстар жөнінде баяндама жасады.<blockquote>&nbsp;Мәдениет – адамзатты тұлға деңгейінде қалыптастыратын негізгі құрал болса, өнер – мәдениеттің алтын қазынасы. Қашан да мәдениеттің мәйегі &nbsp;– мәдениет үйі екені белгілі. Бұлбұл дауысты әнші де, мың бұралған биші де, ақиық ақын да, құдіретті күйші де, тіпті танымал әртіс пен режиссер да осы мәдениет үйлерінің киелі сахнасынан шығады. &nbsp;Осындай қиын да, қызықты саланың тізгінін ұстап, халық шығармашылығын дамыту мен ұлттық өнерімізді насихаттауда халыққа қалтқысыз қызмет көрсететін мәдениет ошақтары болып табылады. 2022 жылы Сырдария ауданы бойынша мәдениет үйлері мен клуб кәсіпорындары жанында &nbsp;97 үйірме жұмыс жасап, оған &nbsp;1275 өнерпаз тартылған. Бүгінде Сырдария ауданы бойынша мәдениет үйлері мен клуб кәсіпорындары жанында барлығы 101 үйірме жұмыс жасап, оған 1303 өнерпаз қамтылған. Оның ішінде, 14 халықтық атағы бар ұжым, 1 вокалды аспапты ансамблі, 1 ұлт аспаптар оркестрі, 1 үгіт бригада, 2 халық театры, 3 би тобы, 2 отбасылық ансамблі, 1 әзіл-сықақ отауы, 3 әжелер ансамблі, 16 ән үйірмесі, 7 драма үйірмесі, 9 домбыра үйірмесі, 11 би үйірмесі, 3 вокалды аспапты ансамблі, 1 этно рок ансамблі, 1 халықтық ұлт аспаптар оркестрі, 2 халықтық отбасылық ансамбль, 2 халық театры, 3 мәдени үгіт бригадасы, 15 көркемсөз үйірмесі, 10 әжелер &nbsp;ансамблі, 2 ардагерлер үйірмесі, 2 әзіл-сықақ отауы, 4 қолөнер үйірмесі, 3 жазба ақындар үйірмесі, 1 қобыз үйірмесі, 1 жыр-терме үйірмесі, 3 сурет үйірмесі, 1 дәстүрлі ән, 1 фото-видео үйірмесі, 1 квн үйірмесі, 1 флейта үйірмесі, 1 келіндер ансамбль халыққа мәдени қызмет көрсетеді. Мәдениет үйлері мен клуб кәсіпорындары жанынан жаңадан үйірмелер қосылып және өзгерген үйірмелер бар. Жаңадан ашылған үйірмелер қатарында аудандық мәдениет үйі жанынан «Домбыра» үйірмесі, Тереңөзек кенті клубы жанынан «Би» үйірмесі, Бесарық ауылдық мәдениет үйінде «Шырайлы» &nbsp;келіндер ансамблі, Аманкелді ауылдық мәдениет үйі жанынан &nbsp;«ВлокФлейта», «Фото-видео», «Жайдарман», «Үгіт бригада» үйірмесі бар екенін айта кетейін, – деді Ақбота Талғатова.&nbsp;</blockquote>&nbsp;Өз кезегінде Іңкәрдария ауылдық клуб үйі жанынан ашылған үйірме өнерпаздары көпшілікке концерттік бағдарлама ұсынды. Кеште &nbsp;қазақ зиялы қауымының көрнекті өкілі Темірбек Жүргеновтің 125 жылдығына орай, «Драма» үйірмесінің &nbsp;мүшелері «Нарком Жүргенов» қойылымын сахналады. Сонымен бірге «Ән» және «Ұлттық» би үйірмесінің шәкірттері ән шырқап, би биледі.<blockquote>&nbsp;Ауыл мәдениетін жандандыру үшін біршама жұмыстар жүргізіп келеміз. Негізінен, мәдениет саласының сан алуан бағыты бойынша әрбір маманға зор жауапкершілік жүктеледі. Біз қашанда раухани, идеологиялық іс-шараларды жүргізуге мүдделіміз. Ауылдағы кез келген баланың ерекше қабілетіне мән беріп, әлеуеті жоғары байқауларға дайындаймыз. Бүгін ұйымдастырылып отырған семинар барысында сала мамандары өзара тәжірибе алмасса, құба-құп. Біз үйірме жұмысын түрлендіруге, ауыл атын шығаруға өз үлесімізді қосамыз. Алдағы кәсіби мерекемен әріптестерімді құттықтаймын, – деді ауылдық клуб үйінің директоры Зағира Ахметова. &nbsp;&nbsp; &nbsp;</blockquote>

Мәдениет пен өнерді ұштастырған

<a href="https://kyzylorda-news.kz/">Kyzylorda-news.kz.</a> Қазалы ауданы әкімінің орынбасары Күнтілес Назымбековтың төрағалығымен Конго-Қырым геморрагиялық қызбасы ауруының табиғи ошақтарында жүргізілетін залалсыздандыру жұмыстарына байланысты көшпелі отырысы өтті.&nbsp;Жиынға Қызылорда облысы әкімі аппаратының «Жұмылдыру дайындығы және шұғыл жұмыстар орталығы» коммуналдық мемлекеттік мекемесінің басшысы Ерлан Бейсембаев арнайы қатысып, Конго-геморрагиялық қызбасының табиғи ошақтары (тәуекел аймақтар) болып анықталған ауылдық округ әкімдерімен және жұмысшы топ мүшелерімен кездесті.&nbsp;Кездесу барысында залалсыздандыру жұмыстарын жүргізуден бұрын бірінші кезекте мал басының түгел, мал қораларының талапқа сай таза болу қажеттігін жеткізді.&nbsp;Негізінде, 2023 жылға арналған көктем мезгілдегі Конго-Қырым геморрагиялық қызбасы ауруына қарсы залалсыздандыру жұмыстары бекітілген кестеге сәйкес ағымдағы жылдың 17 мамырында басталуы керек болса, қазіргі күнде ауа райының жаңбырлы болуына байланысты кейінге шегерілді. Себебі, жаңбырдан кейінгі жердің ылғал болуы залалсыздандыру жұмыстарына кері әсерін тигізеді. Отырыс барысында тиісті сала мамандарына тікелей тапсырмалар беріліп, орындалуы жіті қадағаланатындығы айтылды.

Қазалыда көктемгі залалсыздандыру жұмыстарына қатысты отырыс өтті

<a href="https://kyzylorda-news.kz/">Kyzylorda-news.kz.</a>&nbsp; Көктемгі егін науқаны басталуына орай Аманкелді ауылының тұрғындары тарапынан аяқ суға деген қажеттілік орын алуда. Соңғы кездері елді мекенді аяқ сумен қамтитын «Жетікөл Жарма» каналының іші қоға, шылау және қураған ағаштар басып, аяқ судың еркін жылжуына кедергілер келтіріп келеді. Қазіргі уақытта бақша егіп, мал ұстап, жеке шаруасын жүргізгісі келетін азаматтар көбейіп келеді. Соған байланысты «Жетікөл Жарма» каналының аяғы 165 ПК – 305 ПК (Хвостовой Жетікөл Жарма каналы) аралығын тазарту, қазу жөнінде ауыл ардагерлері мен тұрғындары тарапынан ұсыныстар айтылуда.Бұл мәселе 2023 жылдың ІІ тоқсанында аудан әкімі Б.Сарменбаевтың Аманкелді ауылы тұрғындарымен кездесу жиынында да көтерілген болатын. Халық үніне құлақ асқан аудан басшысы тиісті сала басшыларына шұғыл тапсырма беріп, нәтижесінде ауыл тұрғындарының ұсынысына сәйкес арнайы техникалар бөлініп, «Жетікөл Жарма» каналының аяғына 165 ПК – 305 ПК аралығына қазу жұмыстары жүргізуде.<blockquote>Бүгінде «Жетікөл Жарма» каналының тазартылуына ауыл тұрғындары дән риза. Егіс алқабына тұрақты аяқ су жебірілу үшін тазарту жұмысы жалғасын табуда. Қашанда ауыл тұрғындарының өтініші аяқсыз қалмай, жүйелі жұмыстар атқарылғанына қуаныштымыз. Алдағы уақытта осындай жұмыстар тұрақты түрде жүзеге асырылса деген тілек бар, – деді аудандық мәслихат депутаты Нұрман Абдрасилов. &nbsp;</blockquote>&nbsp;

Аманкелдіде «Жетікөл жарма» каналы тазартылды 

<a href="https://kyzylorda-news.kz/">Kyzylorda-news.kz.</a> Қызылорда облыстық қоғамдық даму басқармасының тапсырысымен үкіметтік емес ұйымдардың ресурстық орталығы және «Асыл мұра – орда» қоғамдық қорының бірлесе ұйымдастыруымен «Аймақта отбасылық-демографиялық саясатты дамыту» әлеуметтік жобасы аясында ерекше бала тәрбиелеп отырған отбасылардың қатысуымен «Мен және әлем» тақырыбында семинар-тренинг өтті.&nbsp;Ерекше баласы бар отбасыларды қолдау мақсатында ұйымдастырылған семинар-тренингті психолог-консультант, нейрокоуч Гульсая Кутжанова жүргізіп, аналарға жан-жақты психолоиялық кеңестер берді.&nbsp;Аналардың психологиялық жай-күйі, қиындықпен күрес, баласымен бірге жүргізетін психологиялық-педагогикалық технологияларына, оны түзету, тәрбиелеу әрі қолдау аспектілеріне тоқталды.&nbsp;Сонымен қатар жиында баланың жанұяда жеке өмірге бейімделу мүмкіндіктерін анықтап, отбасындағы баланың қажеттіліктері мен мүмкіндіктеріне тоқталды.Қатысушы аналар шынайы эмоцияларын шығарып, бір сәт сергіп, сала маманымен пікір алмасты. Басына түскен уақытша қиындықты жеңудің жаңа көздерін ашып, өз-өзімен тікелей жұмыс жасауға бекініп, жақсы көңіл-күймен тарқасты.

Әлеуметтік жоба: Қызылордада «Мен және әлем» тақырыбында семинар-тренинг өтті

<a href="https://kyzylorda-news.kz/">Kyzylorda-news.kz.</a> Бүгін Шиелі ауданындағы ірі уран өндіруші кәсіпорын «№6» кен басқармасының құрылғанына 40 жыл толуына орай аудандық мәдениет үйінде салтанатты кеш өтті.Мерейтойға орай ұйымдастырылған кешке Қызылорда облыстық мәслихатының төрағасы Наурызбай Сейтқалиұлы, аудан әкімі Нұржан Сәбитұлы, «Қазатомөнеркәсіп» ұлттық атом компаниясының HR (ЭйЧар) және цифрландыру жөніндегі бас директоры Әлібек Мансұрұлы және де сала ардагерлері мен кәсіпорын қызметкерлері, аудан тұрғындары қатысты.Шараның алғы сөзі Қызылорда облыстық мәслихатының төрағасы Наурызбай Сейтқалиұлына беріліп, Наурызбай Байқадамов кен басқармасына облыс әкімі Нұрлыбек Машбекұлының ыстық ықыласын жеткізді. Келесі кезекте сөз алған аудан әкімі Нұржан Ахатов кен басқарасын 40 жылдық мерейтоймен шын жүректен құттықтап, ізгі тілегін білдірді.<blockquote>«Еліміздегі тау-кен өнеркәсібінің жетекші салаларының бірі - уран өндірісінің жолға қойылғанына биыл 72 жыл толып, бүгінде уран өндірісі аймағымыздың, оның ішінде Киелі Шиелі ауданы экономикасының негізгі тірегіне айналды. Жалпы Қазақстанда әлемдегі бүкіл уран өндірісі көлемінің шамамен 40 пайызы, яғни жылына 20 мың тоннадан астам уран өндіріледі. 2018 жылдан бері еліміз уран өндіру мен сату бойынша әлемде бірінші орынға, ал уран қоры бойынша екінші орынға тұрақтады. Нәтижесінде, қазіргі таңда «Қазатомөнеркәсіп» Ұлттық атам компаниясында» жұмыс істейтін Қазақстан азаматтарының саны 20 мың адамға жетіп отыр. Бүгінде кәсіпорын ізденіс пен тынымсыз еңбектің нәтижесінде қуатты құрылыс базасын қалыптастырып, материалдық-техникалық базасын толықтай жаңартты. Мұнан бөлек, 500-ден астам азаматты тұрақты жұмыс орындарымен қамтып, жұмыссыздық деңгейінің айтарлықтай төмендеуіне ықпал етті», - деді аудан әкімі.</blockquote>Шара барысында бірқатар кен басқарманың қызметкерлері облыс әкімінің, аудан әкімінің алғыс хаттарымен марапатталса, Қызылорда облысының Құрмет грамотасымен «6 Кен басқармасы» жауапкершілігі шектеулі серіктестігінің Бас директоры Искаков Дауржан Мұхамеджанұлы марапатталды. Сондай-ақ, І дәрежелі «Қазақстан Республикасы атом саласының еңбек сіңірген қызметкері» құрмет төсбелгісімен кәсіпорында қажырлы қызмет еткен бірқатар азаматтар марапатталды.Мұнан соң мерекелік шара, өнер жұлдыздарының концерттік бағдарламасына ұласты.

Қазақстан және Қызылорда облысының жаңалықтары