<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен мемлекет және қоғам қайраткері, Ұлы Отан соғысының ардагері Ғафур Мұхамеджановтың 100 жылдығына арналған «Еселі еңбегімен еленген қайраткер» атты ғылыми-танымдық конференция өтті.Конференцияға сала басшылары, қоғам қайраткерлері, ғалымдар, облыстың зиялы қауымы, ардагерлер, Ғафур Мұхамеджановтың балалары мен немерелері қатысты.Нұрлыбек Машбекұлы қайраткердің аймақтың әлеуметтік-экономикалық дамуына қосқан үлесі туралы айтып, еңбек жолына тоқталды.<blockquote>«Аймағымыздың шежіресінде толағай болмысты, нар тұлғалы азаматтардың есімі әрдайым құрметпен аталады. Сондай ағаларымыздың бірі – елжанды азамат, Сыр перзенті, ғибратты ғұмыр иесі Ғафур Мұхамеджанов. Ол қасиетті Сыр топырағында дүниеге келіп, өз дәуіріндегі барлық тарихи оқиғаның бел ортасынан табылды. Совет, партия басшылығында болып, Шиелі және Жаңақорған аудандарының тізгінін ұстады. Тынымсыз еңбек, жоғары талап, іске деген адалдық ағамыздың рухани тағылымының тамыры терең, діңгегі мықты екенін көрсетті.Аймақтың бүгінгі бет-бейнесінің қалыптасуы мен дамуына Ғафур Мұхамеджановтың қосқан орасан зор үлесі бар. Аға буынның елі үшін жасаған еңбегі мен ерлігі жас ұрпаққа мирас болып қалуы тиіс. Парасат пайымы биік тұлғаның жарқын бейнесі, бекзат болмысы ешқашан ұмытылмайды, елімен бірге мәңгі жасай береді», – деді Н.Нәлібаев.</blockquote>Басқосуда облыстық мәслихат төрағасы, конференцияның модераторы Мұрат Тілеумбетов Парламент Сенатының депутаты, мемлекет және қоғам қайраткері, академик, заң ғылымдарының докторы Құл-Мұхаммед Мұхтар Абрарұлының Ғафур Мұхамеджановтың 100 жылдығына арнаған құттықтауын оқыды.Әрі қарай Ғафур Мұхамеджанов туралы естеліктер мен тарихи деректерге толы баяндамаларға кезек берілді. Саяси ғылымдар докторы, профессор Әбдіжәлел Бәкір, Қызылорда облысының Құрметті азаматы Ибрагим Әбибуллаев оның мұқтажға қамқор, әлсізге тіреу, шешімге әділ, халқына абзал азамат болғанын айтты. Баяндамалар легін саяси ғылымдар докторы, Қызылорда облысының құрметті азаматы Мұрат Бақтиярұлы жалғастырды. Тарих ғылымдарының кандидаты, доцент, Нұрлыбек Мыңжас та дәйекті деректерді ортаға салды.Ғафур Мұхамеджанов 1924 жылы 1 шілдеде Жаңақорған ауданы, Өзгент ауылында туған. Ол кісінің балалық және жастық шағы алапат аштық, сұрапыл соғыспен тұспа-тұс келді.Мектептен соң Қызылорда педагогикалық институтына түсіп, мұғалім мамандығын иеленді. Кейін Алматы Жоғары партия мектебін аяқтады. Еңбек жолын 1941-1942 жылдары бастауыш мектепте бастап, 1943-1945 жылдары Ұлы Отан соғысына қатысып, елге аман оралды.Соғыстан кейін ел еңсесін тіктеуге, халықтың әлеуметтік жағдайын жақсартуға білек сыбана кірісті. 1945-1970 жылдары Шиелі аудандық комсомол комитетінің хатшысы, аудандық атқару комитетінің бөлім меңгерушісі, төраға орынбасары, төрағасы, Шиелі аудандық партия комитетінің бірінші хатшысы қызметтерін абыроймен атқарды.1970-1975 жылдары Жаңақорған аудандық партия комитетінің бірінші хатшысы, 1975-1985 жылдары Қызылорда облыстық комитетінің бөлім меңгерушісі, облыстық атқару комитеті төрағасының бірінші орынбасары қызметінде болған. Облыстық комитет мүшесі, аудандық, облыстық кеңестердің депутаты болып сайланған.<img src="https://knadmin.beoblood.kz/uploads/Nauchno_poznavatelnaya_konferencziya_proshla_v_Kyzylorde_1_62bdbb8580.jpg" alt="Научно-познавательная конференция прошла в Кызылорде 1.jpg">Фото: Қызылорда облысы әкімінің баспасөз қызметі

«Еселі еңбегімен еленген қайраткер» атты ғылыми-танымдық конференция өтті

<a href="https://kyzylorda-news.kz/">Kyzylorda-news.kz</a> Бүгін – Қазақстан кәсіподақтары күні. Аталған сала қызметкерлері еңбек адамдарының құқығы мен мүддесін қорғауда, олардың әл-ауқатын жақсартуда маңызды рөл атқарады. Аймақтағы кәсіподақтардың жай-күйін бүгін Өңірлік коммуникациялар қызметінің ақпарат алаңында Қызылорда облысы аумақтық кәсіподақтар бірлестігінің төрағасы Мақсұт Нәлібаев айтты.&nbsp;<blockquote>– Қазіргі таңда Қызылорда облыстық аумақтық кәсіподақтар бірлестігі 12 салалық кәсіподақтарда 1 020 кәсіподақ ұйымдары мен 95 600 кәсіподақ мүшелерін біріктіреді. Кәсіподақтардың негізгі міндеті – еңбеккер мен жұмыс берушілер арасында туындайтын мәселелерді дер кезінде шешіп, барлық тараппен тығыз ынтымақтастықта болу. ҚР Кәсіподақтар Федерациясы биылғы жылды "Лайықты еңбек жылы" деп белгіледі. Биылғы іс-шаралар мен жұмыс бағыттарының барлығы еңбек адамдарына дұрыс жағдай жасалып, лайықты ақы төленуіне және жоғары деңгейде құрмет көрсетуге арналып отыр. Мәселен, сәуір айында Кәсіподақтар федерациясымен Еңбеккер әйелдер форумы өтті, оған облыстан 4 делегат қатысты. Ал 8-9 қазан кәсіподақтар күні қарсаңында Астана қаласында «Еңбек эволюциясы: Климат. Құзыреттілік. Код» атты жұмысшы мамандықтардың екі күндік жастар форумы болды. Форумға Қызылорда облысы кәсіподақтарының Келешек жастар кеңесінің 3 белсенді өкілі қатысты. Бұл жұмыскерлердің құқықтарын қатаң мемлекеттік қадағалаумен қатар, лайықты еңбек ортасын құруға мүмкіндік береді,- деді Мақсұт Ыбрайханұлы.&nbsp;</blockquote>Ал мұнай саласы бойынша кәсіподақ ұйымы 1989 жылдың қазан айында құрылған. Құрамында 1 400-ге жуық мүшесі бар ұйым әр жыл сайын өз қызметкерлерімен қоса олардың отбасына да қажетті қолдауды көрсетеді.<blockquote>– Биыл біздің кәсіподақ ұйымының құрылғанына 35 жыл толып отыр. Алғашында небәрі 10 адам мүше болған ұйым бүгінде 1 400-ге жуық қызметкерді біріктіріп отыр. Әр үш жыл сайын ұжымдық шартқа өзгерістер енгізіп, оны жаңартып отырамыз. Ұжымдық шартқа сәйкес, қыз-келіншектер дүниеге сәби әкелген күннен бастап оларға қажетті қолдау көрсетіледі. Зейнетке шыққан қызметкерлер мен ұжым мүшелерінің балаларына да әрдайым көмек қолын созамыз. Мысалы, биыл 450 бала Шымкенттегі демалыс орнына жолдама алды. Соынмен қатар, серіктестеріміздің қолдауымен де ұйым мүшелері демалысқа жіберіліп тұрады. Қазан, қараша айларында 100 адам Манкентке демалуға барады,- деді "Петро Қазақстан Құмкөл Ресорсиз" кәсіподақ комитетінің төрағасы Бақытжан Мукашева.</blockquote><img src="https://knadmin.beoblood.kz/uploads/k_sipoda_tar_k_ni_8486895f9d.jpg" alt="кәсіподақтар күні.jpg">Фото: Қызылорда облысының Өңірлік коммуникациялар қызметі

Бүгін – кәсіподақтар күні

<a href="https://kyzylorda-news.kz/">Kyzylorda-news.kz</a> Қызылорда облысының Сырдария ауданына қарасты Бесарық ауылындағы мектептің дене шынықтыру пәні мұғалімі Самат Ақпанбетов жары Гүлзирамен бірге жұмысқа арналған қолғап шығаруда.Оның кәсіптің бұл түрін қолға алуына қызығушылығы себеп болған. Самат әлеуметтік желі, ютубтен қолғап шығаруға қатысты бейне материалдарды көруді ұнатады. Осы саланы екі жылдан астам уақыт зерттей келе, отбасымен ақылдасып, шығарып көруге бел байлайды.Саматтың келіншегі де ұстаз. Мектепте информатика пәнінен сабақ береді. Қос ұстаз көп балалы отбасы. Бүгінде 5 баланы өсіріп, тәрбиелеуде.<blockquote>"Қазір бір ғана табысқа қарап отыратын уақыт емес. Ешкімге қол жаймай балаларымызды аяққа тұрғызғымыз келеді. Сол үшін отбасылық кәсібіміз болғанын қалаймыз. Бұған дейін де кәсіппен айналысып көргенмін. Сала бізге таңсық емес. Дегенмен осы жолы хоббиімді бизнеске айналдырып көргім келеді", - дейді Самат Ақпанбетов.</blockquote>Самат пен Гүлзира ең алдымен нарықты зерттейді. Қызылорда облысының өзінде шаруашылыққа қолданатын жұмысқа арналған қолғап шығарылмайтынын анықтайды. Облыс тұрғындары оны көрші Шымкенттен, Қытайдан алдырады екен. Содан қолғап шығару ісін жақсы білетін мамандарды іздеп табады. Таразда осы салаға машықтанған кәсіпкерлер бар екен. Солармен серіктес болып, Қытайдан қолғап шығаруға қажет жіп пен шағын цехтың құралын алдырады.<blockquote>"Кәсібімізге қажет қаржыны "Қызылорда" Өңірлік инвестициялық орталығынан алдық. Мемлекеттік бағдарлама аясында аз пайызбен 6 млн теңге несиеге осы ісімізді бастап отырмыз. Қазір нарықта жұмысқа қолдануға арналған қолғап парымен 120-150 теңгеден сатылып жатыр. Біз 80-85 теңгеден береміз. Сұраныс жоғары. Енді ғана ғой бастап жатқанымыз. Десе де алғашқы шығарған партияны құрылыс заттарын сатумен айналысатын кәсіпкерлер қуана-қуана алып кетті", – дейді.</blockquote>ЖК "Гүлзира" қазір күніне 200-250 дана, аптасына 1200-1500 дана қолғап шығарып жатыр. Цехтың қуаттылығына сай өнім шығаруына Гүлзира, ал өнімнің сапасы мен тұтынушы табуға Самат жауапты. Әзірге бар шаруаны өздері істеп жатқан отбасылық кәсіп иелері болашақта екі жұмысшы алуды көздеп отыр.<img src="https://knadmin.beoblood.kz/uploads/k_sipker_2_c974e96d64.jpg" alt="кәсіпкер 2.jpg"><img src="https://knadmin.beoblood.kz/uploads/k_sipker_1_8572a060d2.jpg" alt="кәсіпкер 1.jpg">"Қызылорда" өңірлік инвестициялық орталығының баспасөз қызметі

Қызылордалық қос мұғалім қолғап шығаруда

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Байқоңыр қаласы әкімшілігінің басшысы Константин Бусыгинмен кездесті.Кездесуге облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай қатысты.<blockquote>«Екі елдің Мемлекет басшыларының қолдауының арқасында Байқоңыр қаласының әлеуметтік-экономикалық жағдайы жыл сайын жақсарып келеді. "Байқоңыр қаласын сумен жабдықтау және су бұру жүйелерін реконструкциялау" жобасы бойынша жұмысты бастау үшін 27 қыркүйекте мердігерге ("Мелиоратор" ЖШС) 144 млн.теңге аванс төленді. Жыл соңына дейін 625 млн.теңге бөлу қарастырылған. Жобаның жалпы құны – 12 млрд.теңге, бұл қаржы қаланың су және кәріз құбырларын түгел ауыстыруға бағытталмақ. Жұмыс 17 қазанда ең алдымен, қала әкімшілігі ұсынған проблемалық учаскелерден басталады.</blockquote><blockquote>Бес тұрғын үйдің құрылысына қатысты айтсақ, мердігерлер міндеттемені орындамағандықтан, Қармақшы ауданының әкімдігі келісім-шартты біржақты тәртіппен бұзды. Қазіргі уақытта құрылысты аяқтауға конкурс жарияланды. Жұмысты келесі жылы бітіру жоспарлануда», – деді Н.Нәлібаев.</blockquote>К.Бусыгинмен бұған дейінгі кездесуде облыс әкімдігінің қаражаты есебінен қалада заманауи спорт кешенін салу туралы келісілген болатын. Бүгінде жер учаскесі анықталған, кешеннің дайын жобасы бар. Жаңа нысанды "Байқоңыр" ғарыш айлағының және қаланың 70 жылдығына орай пайдалануға беру жоспарланған.Қала әкімшілігі тұрғындардың тұрмыс-тіршілігіне қолайлы жағдай жасауда. Коммуналдық қызметтердің сапасын жақсартып, қолжетімділігін арттыруда жүйелі жұмыс бар. Атап айтқанда, Ресей тарапы тұрғындарды газ, жылу-электр станциясымен қамтамасыз етеді.Кездесуде Байқоңыр қаласы әкімшілігінің басшысы облыс көлемінде жүзеге асырылып жатқан жұмыстардың ауқымы мен Қызылорда қаласының күн санап көркейіп келе жатқанын ерекше атап өтіп, бірлескен жұмыстардың маңыздылығына тоқталды.Фото: Қызылорда облысы әкімінің баспасөз қызметі

Байқоңыр қаласының әлеуметтік-экономикалық даму мәселелері қаралды

<a href="https://kyzylorda-news.kz/">Kyzylorda-news.kz</a> Ақмола облысындағы Сұрған станциясында электровоз бен жүк вагондары рельстен шығып кетті, – деп хабарлайды Massaget.kz тілшісі «Қазақстан темір жолы» ҰК» АҚ баспасөз қызметіне сілтеме жасап.Куәгерлер оқиға орнынан түсірілген видеоларды бөлісіп жатыр.«9 қазанда сағат 17:40-та Есіл – Құсмұрын учаскесінің Сұрған станциясында электровоз мен жүк пойызының вагондары рельстен шығып кетті, зардап шеккендер жоқ», – деп хабарлады ҚТЖ баспасөз қызметі.ҚТЖ-ның мәліметінше, оқиғаның себебін анықтау үшін оқиға орнына комиссия жіберілді.Көлік полициясы Қостанай станциясындағы желілік полиция бөлімі жол қозғалысы немесе теміржол көлігін пайдалану қауіпсіздігі ережелерін бұзғаны үшін қылмыстық іс қозғағанын хабарлады.<blockquote>«Қазіргі уақытта тексеру жұмыстары жүргізіліп жатыр. Құрбандар жоқ. Басқа ақпарат ҚР Қылмыстық-процестік кодексінің 201 бабы бойынша жария етілмейді», – деп хабарлады полиция.</blockquote>Фото: Midjourney нейрожелісі

Ақмола облысындағы станцияда пойыз рельстен шығып кеткен

<a href="https://kyzylorda-news.kz/">Kyzylorda-news.kz</a> Tomorrow School – білім беру саласында әлемге танылған жаңашыл педагог Николас Садирак әзірлеген 01 Edu платформасында инновациялық peer-to-peer оқыту жүйесін пайдаланатын бірегей жасанды интеллект мектебі, деп хабарлайды&nbsp;<a href="https://el.kz/qazaqstandagy-algashqy-zhasandy-intellekt-mektebi-ashylmaq_135435/">El.kz</a>&nbsp;ақпарат агенттігі.Мектеп білім алушылар арасындағы тәжірибеге негізделген өзара байланысқа басымдық беріп, бағдарламалау дағдыларын нөлден бастап үйретеді. Мұндай бағдарламалар бойынша оқыған түлектердің 90%-дан астамы курсты аяқтағаннан кейін жұмысқа орналасып, әдістің тиімділігін айшықтады.Tomorrow School-дың оқыту ерекшеліктері:<ul><li>Мұғалімдер мен дәстүрлі сабақтар жоқ – оқыту студенттердің өзара көмегі мен топтық жұмысына негізделген;</li><li>Барлық студентте Астана қаласындағы Astana Hub технопаркі алаңында оффлайн форматта тегін оқу мүмкіндігі бар;</li><li>Мектеп тәулік бойы (24/7) жұмыс істейді, студенттер өздеріне ыңғайлы оқу кестесін құрады;</li><li>Оқуға түсу үшін бағдарламалау бойынша алдын ала тәжірибе талап етілмейді.</li></ul>Іріктеу үміткерлердің логикалық ойлауын тексеретін 2 онлайн ойыннан және «бассейн» деп аталатын оқытудың кіріспе кезеңіне тікелей қатысуды көздейтін бөлімнен тұрады. Бірінші «бассейн» 21 қазан – 17 қараша аралығында өтеді, мұнда қатысушылар бағдарламалау әлеміне тереңірек бойлап, оқуды жалғастыру үшін өз мүмкіндіктерін бағалайды.«Бассейннен» өткеннен кейін қатысушылар 18 айлық негізгі оқытуға көшеді. Бұл кезеңде олар 50-ден астам жобаны жүзеге асырып, Golang, Rust, JavaScript, Python және басқа да 20-дан астам бағдарламалау тілін меңгереді. Ақтық мәреде студенттер мына мамандықтардың бірін таңдауға мүмкіндік алады: ЖИ-инженері, бағдарламалық қамтамасыз етуді әзірлеуші, фулстек-әзірлеуші, мобильді қосымшалар әзірлеушісі, DevOps инженері, IT жүйелерінің сәулетшісі, киберқауіпсіздік маманы және бейнеойындар әзірлеушісі. Ал «бассейн» барысында үздік нәтиже көрсеткен өзге қаладан келген қатысушыларда негізгі оқу уақытында тұрғын үймен қамтылу мүмкіндігі бар.Фото: astanahub.com

Қазақстанда алғашқы жасанды интеллект мектебі ашылмақ

<a href="https://kyzylorda-news.kz/">Kyzylorda-news.kz</a> Талғарда 16 жастағы Шерзат Полат қаза тапқан төбелеске қатысты жеті адам қамауға алынды. Жасөспірімді өлтірген күдіктілердің осыған дейін де сотталғандары белгілі болды. Бұл туралы <a href="https://stan.kz/talgardagi-zhasospirimnin-olimi-kudiktiler-byrin-sottal-407698/">Stan.kz</a> ақпарат агенттігі <a href="https://t.me/kozachkow">Kozachkow</a> телеграм&nbsp;арнасына сілтеме жасап хабарлады.Бірыңғай сотқа дейінгі тергеп-тексеру тізілімінің мәліметінше, күдіктілердің&nbsp;екеуі бұған дейін де бұзақылық бабы&nbsp;бойынша сотталған және қазір Талғар ауданында пробациялық бақылауда.Шерзаттың ата-анасының айтуынша, төбелеске 13 адам қатысқан. Ата-ана&nbsp;олардың барлығының&nbsp;“хуторский”&nbsp;қылмыстық тобының мүшелері екенін айтады.Отбасы қоғам белсендісі Айтбек Амангелдіге көмек сұрап жүгінгені белгілі болды. Айтбек Амангелді қазір үш адвокаттың отбасыға тегін көмек беріп жатқанын айтты.<blockquote>"Отбасына тегін жұмыс істеуге келіскен үш адвокат бердік. Қақтығыс кезінде баланың әкесі мен ағасы да жараланған. Адам өмірі бір бөтелке сыраның құнына тең емес екенін дәлелдеу үшін іс бойынша ақпараттардың барлығы жарияланып отыруы керек. Шерзатты үлкен кісілердің, бүкіл отбасының көзінше ұрып өлтіргені қорқынышты", – дейді Айтбек Амангелді.</blockquote>Ата-анасының айтуынша,&nbsp;Шерзат бес баланың үлкені болған, ата-анасына дүкенде үнемі көмектеседі екен, әскери адам болуды армандапты.Фото: әлеуметтік желіден

Талғардағы 16 жастағы жасөспірімнің өлімі: Күдіктілер бұрын сотталған болып шықты

<a href="https://kyzylorda-news.kz/">Kyzylorda-news.kz</a>&nbsp; Бесарық – берекесі тасыған, үлгілі елді мекеннің бірі. Ауылдың әр көшесі мен ғимараты өзіне тән бірегейлігімен ерекшеленіп, көрген жанның көңілін баурайды. Мемлекеттен берілетін қолдау мен елім деген ерлердің қажырлы еңбегінің арқасында мұндағы инфрақұрылым күн сайын дамып келеді.&nbsp;"Ауыл аманаты" жобасы аясында ауылдың кәсіпкерлік әлеуеті артып, бірнеше жаңа өндіріс орындары бой көтерген. Ал қыркүйек айында дәл осы жоба бойынша бес бірдей кәсіп іске қосылды. Бұл жобалар ауылдың экономикасына ғана емес, тұрғындардың өміріне де серпін беруде. Сабын, қолғап, пластикалық ыдыстар және носки өндірісі сыртқы өнімдерге тәуелділіктен арылтса, ою-өрнек басып шығару ісі аз уақыт ішінде өзге аймақтардың да сұранысына ие болуда.– Бұл кәсіпті 2 жыл бұрын жұбайымның идеясымен қолға алған едік. Бастапқы уақытта кішкентай аппараттармен бастап, онлайн тапсырыс арқылы жұмыс істедік. Биыл кәсіпкерлерді қолдайтын "Ауыл аманаты" жобасы арқылы 15 млн теңгемен алып, сапасы ең жоғарғы құрылғыларды сатып алдық. Бүгінде отбасылық кәсіп ретінде жүргізіп отырмыз. Еліміздің барлық өңірінен сұраныс бар. Өз аудиториямызды қалыптастырып, тұрақты тұтынушыларымызды тауып үлгердік. Осы орайда ауылдан шыққан кәсіпкерлерді қолдау мақсатында ғимарат салған "Абай-Дәулет" ЖШС алғысымды білдіремін,- деді "Айқын" ою-өрнек басып шығару кәсібінің иесі Жарқын Сапарғалиұлы.– Биылғы жылы "Ауыл аманаты" жобасы аясында ауылымызда бірнеше жоба өз жұмысын бастады.Оның бірі – пластикалық бөтелке өндіру жобасы. Қазіргі уақытта 0,5, 1 және 1,5 литрлік құты шығарып жатырмыз. Тұрғындардың сұранысы бойынша алдағы уақытта 5 литр болатын пластик ыдысты да қолға алу жоспарлануда,- деді Бесарық ауылының әдіскері Бибізада Бекенова.<img src="https://knadmin.beoblood.kz/uploads/1_f5d9523960.jpg" alt="1.jpg"><img src="https://knadmin.beoblood.kz/uploads/3_fee5b129b6.jpg" alt="3.jpg"><img src="https://knadmin.beoblood.kz/uploads/4_04ab215b8b.jpg" alt="4.jpg">Фото: Өңірлік коммуникациялар қызметі

"Ауыл аманаты" жобасының игілігі

<a href="https://kyzylorda-news.kz/">Kyzylorda-news.kz</a> Кеше облыс әкімі Нұрлыбек Нәлібаевтың төрағалығымен мұнай саласының еңбек сіңірген ардагері, «Құрмет» орденінің иегері Көшербаев Болат Елеуұлын зейнет демалысына шығарып салу рәсімі өтті. Жиынға «ҚазМұнайГаз» ұлттық компаниясы басқарма төрағасының орынбасары Серікқали Брекешев, мұнай-газ саласының мамандары, облыстың зиялы қауымы, ардагерлер қатысты.Аймақ басшысы еңбек адамдарын құрметтеу бұрыннан қалыптасқан дәстүрдің жалғасы екенін айтып, Болат Елеуұлына құттықтау лебізін жеткізді.<blockquote>– Президентіміз Қасым-Жомарт Кемелұлы: «Адал еңбек етіп, адал табыс тапқан адам жетістікке жетеді, құрметке ие болады. Әділетті Қазақстан және Адал азамат ұғымдары ел тірегі болатын егіз құндылық ретінде әрдайым қатар тұруға тиіс» деген болатын.Біз адал қызмет атқарған, саналы ғұмырын аймағымыздың әлеуметтік-экономикалық, мәдени-рухани дамуына арнаған, елдің қошеметіне бөленген азаматтарды ардақтап, лайықты құрмет көрсетуді дәстүрге айналдырдық.Болат Елеуұлы ел экономикасының локомотиві саналатын мұнай-газ саласында 40 жылға жуық өнімді еңбек етіп, оның ішінде аймақтағы «Торғай Петролеум», «ПетроҚазақстан Құмкөл Ресорсиз» компанияларында басшылық қызметте болып, Сыр өңіріндегі мұнай өндірісінің өркендеуіне өз үлесін қосты.«ПетроҚазақстан Құмкөл Ресорсиз» компаниясымен бірегей жобаларды іске асырып, бизнестің әлеуметтік жауапкершілігін жоғары деңгейге көтерді. Облыстың әлеуметтік-экономикалық дамуында өзіндік орны бар компания қайырымдылық шараларына да белсене қатысып, соңғы 5 жылда 800 млн теңгеге жуық қайырымдылық көмек көрсеткен.Шетелдердің жоғары оқу орындарында білім алған аймақ түлектерінің оқу ақысы стипендиялық бағдарлама аясында компания демеушілігі есебінен қаржыландырылды. Бағдарламамен 115 жас түлек жоғары білім алды.Осындай игі істердің басында жүріп, аймақтың мұнай-газ саласын өркендетуге қосқан үлесіңіз жоғары бағаланып, бірқатар мемлекеттік наградамен марапатталдыңыз. Мұның бәрі қажырлы еңбегіңіздің жемісі әрі жарқын көрінісі деп білеміз. Сізді Сыр жұртшылығының атынан құрметті зейнет демалысына шығуыңызбен шын жүректен құттықтаймыз! – деді облыс әкімі.</blockquote>Басқосуда Көшербаев Болат Елеуұлына Сыр өңірінің дамуына қосқан ерекше үлесі үшін облыстың ең жоғары марапаты – Қызылорда облысының Құрмет грамотасы табысталды.Іс-шарада мұнай саласының ардагерін «ҚазМұнайГаз» ұлттық компаниясы басқарма төрағасының орынбасары Серікқали Брекешев, Қызылорда облысының Құрметті азаматы Самұрат Имандосов, Шиелі ауданының Құрметті азаматы Дәулет Барғанаев, Қарулы Күштер саласының ардагері, генерал-майор Әлімжан Ерниязов, сала ардагерлері Айтбай Көшербаев, Имамадин Оңғарбаев құттықтады.

 Аймақ басшысы Болат Көшербаевты зейнет демалысына шығарып салды

<a href="https://kyzylorda-news.kz/">Kyzylorda-news.kz</a>&nbsp; Бүгін облыс әкімі Нұрлыбек Нәлібаев Сырдария ауданындағы «Бесарық» ауылына жұмыс сапарымен барып, бірқатар нысанды аралап көрді.Еске салайық, аймақ басшысы бұған дейін осы ауылдағы кейбір нысандарды жөндеу, қалпына келтіру жөнінде тапсырма берген болатын. Атап айтсақ, дәрігерлік амбулатория маңдайшасындағы тақтайшаны ауыстыру, аумағын тазалау, спорт кешені алдына төселген сапасыз асфальтты, жарамсыз брусчаткаларды жөндеу, спорт зал еденіндегі арнайы төсенішті ауыстыруды жүктеген еді.Бүгінгі жұмыс сапарында аймақ басшысы жасалған жұмыстарды саралап, тапсырмалардың толық орындалуының нақты мерзімін белгіледі.«Бесарықта» «Абай-Дәулет» серіктестігінің бастамасымен фри зауыты, «Ауыл аманаты» жобасымен наубайхана, кондитерлік және жартылай дайын өнім цехтары, жұмыс қолғабы, шұлық, пластик ыдыстар, сабын, ағаш бұйымдары өндірістері өз жұмысын бастады. «Қызылорда» супермаркеті мен дәмхана да тұрғындарға жоғары сапалы қызмет көрсетуде.«Абай-Дәулет» серіктестігі «Бесарық» ауылын көркейту, көгалдандыру, күрделі жөндеу жұмыстарына соңғы жылдары 730 млн. теңгеден астам қаржы бөлді. Шаруашылық есебінен ауыл әкімдігі, мектеп, балабақша, мешіт ғимараттары күрделі жөндеуден өткізілді. Биыл 642 млн. теңгеге мәдениет үйіне күрделі жөндеу, орталық алаңға қайта жаңғырту жүргізіліп, жаңа өндіріс орталығы бой көтерді.«Ауыл аманаты» жобасы аясында да тұрғындарға қолдау көрсетілуде. Ауылдарда кепілдік мүлікке қатысты қиындықтар кезігетіні белгілі. Өткен жылы шаруашылықтың кепілдігімен «Сыр құсы» ауыл шаруашылығы өндірістік кооперативі құрылып, 27,6 млн. теңге несиеге қол жеткізді.Биыл ауылда 1 мың шаршы метрлік шағын өндіріс орталығы салынып, 13 кәсіпкер өз кәсібін бастауға мүмкіндік алды. Оның ішінде, «Ауыл аманаты» жобасы аясында 4 жоба, Өңірлік инвестициялық орталық арқылы 5 жоба және шаруашылықтың өз қаражаты есебінен 4 жоба бар, 25 жаңа жұмыс орны ашылды. Осы жобаларға 960 млн. теңге инвестиция тартылды.<img src="https://knadmin.beoblood.kz/uploads/462317794_838477325140180_7750892514531790891_n_99052f0db8.jpg" alt="462317794_838477325140180_7750892514531790891_n.jpg"><img src="https://knadmin.beoblood.kz/uploads/462281615_838477385140174_4619038020630435274_n_fc5a359991.jpg" alt="462281615_838477385140174_4619038020630435274_n.jpg"><img src="https://knadmin.beoblood.kz/uploads/462306422_838477771806802_4863715192014305082_n_7e0533ba33.jpg" alt="462306422_838477771806802_4863715192014305082_n.jpg"><img src="https://knadmin.beoblood.kz/uploads/462357143_838478105140102_7200268770563900434_n_e1813933f6.jpg" alt="462357143_838478105140102_7200268770563900434_n.jpg"><img src="https://knadmin.beoblood.kz/uploads/462425498_838478265140086_3792483456189907114_n_151a7423d3.jpg" alt="462425498_838478265140086_3792483456189907114_n.jpg"><img src="https://knadmin.beoblood.kz/uploads/462539957_838477985140114_3240469533369080943_n_2569625ece.jpg" alt="462539957_838477985140114_3240469533369080943_n.jpg"><img src="https://knadmin.beoblood.kz/uploads/462677222_838477528473493_2890713876347872428_n_e11d1aa64a.jpg" alt="462677222_838477528473493_2890713876347872428_n.jpg">Фото: Қызылорда облысы әкімінің баспасөз қызметі

 Аймақ басшысы тапсырмалардың орындалуын тексерді

<a href="https://kyzylorda-news.kz/">Kyzylorda-news.kz</a> &nbsp;Төбелеске қатысқан 7 адам ғана қамалған.&nbsp;Талғардағы төбелесте 16 жастағы Шерзат қаза тапқан еді. Кейін оның әкесі істің дұрыс жүрмей жатқанына шағымданып, әділдік іздеп, Бас прокурор Берік Асыловқа үндеу жасаған болатын, деп хабарлайды&nbsp;<a href="https://sn.kz/sn-akparat-agyny/116951-okinish-kormedik-talgarda-kaza-tapkan-balanyn-zhakyndary-kudiktilermen-kezdeskenderin-aitty-video">Skifnews.kz</a>Істі ішкі істер министрі бақылауға алдым дегенімен, марқұм жасөспірімнің тустары әлі де әділдікті іздейді. Төбелеске қатысқан 7 адам ғана қамалған.&nbsp;Марқұмның анасы Гүльбара Бишмбиева оқиғаның мән-жайын айта келе, баласын 7 емес, 13 адам ұрып-соғып, өлтіргенін мәлім етті.<blockquote>«Пышақталғаннан кейін де құлап жатқан жерінен келіп үстінен тепкілеп жатыр. 13 адамның бәрі ұсталып, тиісті жазаларын алса екен деймін. Менің баламды өлтірген адам 20-25 жылға сотталсын. Әділдік сұраймын», — дейді Гүльбара Бишмбиева.</blockquote>Полиция ұстаған 7 күдіктіні көру үшін уақытша қамау изоляторына туыстары кірген. Олар күдіктілердің жағдайы бостандықта жүрген адамдардан жақсы деп отыр.<blockquote>«Қылмыскерлердің ұсталғанына көз жеткізу үшін тергеу изоляторына кірдік. Жетеуін жеті камераға отырғызып қойған. Жетеуі жеті жерде. Бірақ олардан «адам өлтірдік, баланың өмірін қыршын қидық» деп отырған өкінішті көрген жоқпыз. Алдында жеп отырғандары – қазы. Астында қалың матрац. Мен өзім еркіндікте жүріп қазыны бір айда бір жеймін. Алдарында қазы, басқа да тамақтар тұр. Анық, ұзақ қарай алмадым. Олар неге 7 адамды ғана ұстап отыр? Бұл жерде 2 қызды қосқанда 13 адам бар. Біз соңына дейін барамыз. Олардың қазы жемек түгілі қара су ішуге құқықтары жоқ», — дейді Шертзаттың әпкесі Бақыт Реймова.</blockquote>Ал осыған дейін Шерзаттың әкесі оқиға болған күнгі видеоларды полиция өшіріп тастағанын айқан еді.Кейін Алматы облысының полиция департаменті бұл ақпаратты жоққа шығарып, видеодан дәлел ретінде скриншот ұсынған. Онда жігіттердің арасында екі қыз да барын көруге болады.<blockquote>«Әлеуметтік желілер мен бұқаралық ақпарат құралдарында Талғар ауданындағы қайғылы оқиға болған жерден бейнебақылау камераларының жазбалары өшірілді деген жалған ақпарат тарауда. Сотқа дейінгі тергеп-тексеру шеңберінде барлық қолда бар бейнежазбалар полиция тарапынан тәркіленіп, қылмыстық іс материалдарына заттай дәлел ретінде тіркелгенін хабарлаймыз.Қазіргі уақытта тергеу барысында барлық бейнежазбалар зерттеліп, оқиғаға қатысушылардың әрекеттеріне құқықтық баға беріледі», — деп хабарлады облыстық полиция департаменті.</blockquote>Редакция Алматы облысының полиция департаментіне төбелескен қатысқан 13 адамның бәрі неге ұсталмағанын, екі бойжеткен істің куәгері ме әлде күдіктілер қатарына жата ма деген сауалдарын жолдап, жауап күтіп отыр.Еске салайық, қайғылы оқиға 4 қазанға қараған түні болған еді. Шерзаттың әкесі жалға дүкен алып, сауда жасаумен айналысатын. Арты өліммен аяқталған төбелес осы дүкеннен басталған. Бір жігіт дүкеннен бір құты сыра алып, ақшасын төлемей кеткен. Шерзаттың әкесі сыраның ақшасын төлеуді талап еткен кезде дау туындап, жас бала кейін бір топ жігітті жинап әкелген. Осылайша, дүкен иелері мен жігіттердің арасында төбеле басталған. Ал 16 жастағы Шерзат әкесіне көмектеспекші болған. Қанды төбелесте оны пышақтап өлтірген.Фото: видеодан кадр

«Өкініш көрмедік»: Талғарда қаза тапқан баланың жақындары күдіктілермен кездескендерін айтты 

<a href="https://kyzylorda-news.kz/">Kyzylorda-news.kz</a> &nbsp;Бесарық ауылында «Таза Қазақстан» акциясына ауыл тұрғындары мен ауылдағы шаруашылық құрылымдары белсене атсалысуда. Ауыл инвесторы «Абай-Дәулет» ЖШС-і ауылды аббатандыру шараларына белсене қатысуда.<blockquote>– Меценат «Абай-Дәулет» ЖШС басшысы Мұрат Сәрсенбаевтың демеушілігімен ауылды қарқынды абаттандыру жұмыстары жүргізілді. Біздің Бесарық қазір бау-бақша іспетті, айналасы жасыл желекке оранған, гүлдері мен жас ағаштары жайқалып тұр. Серіктестік ауыл тұрғындарына жайлы демалыс орнын жасау мақсатында орталық алаң мен көшелерді абаттандырды. Бірқатар маңызды әлеуметтік нысандар қайта жаңғыртылды, жаңа өндіріс орындары ашылды. Осының барлығы ауыл тұрғындарының көңіл-күйіне, әлеуметтік жағдайының жақсаруына оң әсер етуде, – дейді ауылдық Қоғамдық кеңес төрағасы А.Ақжігітов.</blockquote>Экологиялық акция басталғалы Сырдария ауданында ауқымды жұмыстар атқарылды. Каналдар мен су қоймалары, қарт ауыл тұрғындарының аулалары, көптеген әлеуметтік нысандар мен кәсіпорындардың аумақтары қоқыстан тазартылды. Мыңдаған ағаштар отырғызылды. Біздің еріктілеріміз де туған жердің тазалығы үшін өзгелерге үлгі боларлық.

Қазақстан және Қызылорда облысының жаңалықтары