<a href="https://kyzylorda-news.kz/">Kyzylorda-news.kz.</a> &nbsp;Аудан әкімі Берік Сәрменбаев медицина саласының еңбек сіңірген дәрігері Бектас Ердәулетовті еске алуға арналған медицина қызметкерлері арасындағы аудандық спартакиаданың ашылуына қатысты.Аудан әкімі медицина саласын дамытуда Б.Ердәулетовтің еңбегі зор екенін атап өтті.<blockquote>– Арда азаматтың жүріп өткен жолы өскелең ұрпаққа үлгі-өнеге. Алтын қолды дәрігер жылдар бойы «Хирургия» бөлімшесіне жетекшіліп етіп, іргелі ұжымның жұмысына серпін берді. Ізетовтер әулетінің мақтанышына айналған ардақты жанның есімі нәтижелі істерімен ел жадында сақталады. Өйткені оның алдына көмек сұрап келген әрбір адам науқасқа деген ерекше мейірімін көрді, – деді Берік Әбдіғаппарұлы.</blockquote>Спорттық іс-шарада «Сенім» денсаулық сақтау жүйесі жұмыскерлерінің салалық кәсіптік одағының төрағасы Сәулебек Ысқақов, аудандық аурухана бас дәрігерінің емдеу ісі жөніндегі орынбасары Еркін Жаңабайұлы, Бектас Ізетұлының ағасы Шыңтас Ізетов өз естеліктерімен бөлісіп, медицина саласын дамытудағы еңбегін айтып өтті.Медицина қызметкерлер арасында бұқаралық спортты насихаттау мақсатында ұйымдастырылған жарысқа 7 команда, 150-ге жуық қызметкер спорттың 6 түрінен қатысуда.

Б.Ердәулетовті еске алуға арналған спартакиада өтуде

<a href="https://kyzylorda-news.kz/">Kyzylorda-news.kz.</a> Дәл қазір аграрлы аймақ саналатын Шиелі ауданында тіршілік қызып тұр. Диқандар ми қайнатар аптап ыстыққа қарамастан алқаптағы дақылын күтіп-баптауды бір сәтке де тоқтатпақ емес. Өйткені, мақсат айқын – маңдай термен еккен еңбектен өнімді мол алып, ысырап қылмай қамбаға құю. Мұның артында тек өздерінің ғана емес, бүкіл ауыл, қала берсе аудан мен облыстың абыройы жатқанын да диқаншы қауым жақсы біледі.Біз де Сыр салысы қамбаға құйылғанша әр ауылдағы ірі шаруа қожалыққа арнайы барып, таң атқаннан қас қараяр сәтке дейін дала төсінде жүрген диқандарды өз көзімізбен көріп, көргенімізді қағазға түсіріп қайтуды міндетімізге баладық. Оның бірнешеуі бұған дейін әріптестердің мақалаларына арқау болып та үлгерді. Ендігі кезек – ақ күріштің атасы атанған Ыбырай Жақаев атындағы ауылдың диқандарында. Мұнда кәсіпкерлікті дамытуға арналған бағдарламалар аясында мемлекет берген мол мүмкіндікті пайдаланып, несібесін Жер-Анадан теріп жүрген ірілі-ұсақты шаруа қожалықтары жетерлік. Иә, күрішті даңқты диқанның ауылдастары екпегенде кім ексін дейсіз ғой?!Жұмыс аптасының алғашқы күнінде әдеттегідей редакцияға емес, егін алқабына қарай тарттық. Бағытымыз – «Алтын дән – Шиелі» шаруа қожалығы. Жолдың кедір-бұдыры азайған соң ба, бұрынғыдай емес, діттеген жерімізге әп-сәтте жетіп алдық. Барсақ шаруа қожалықтың иесі Асқар Бердібаевтың өзі егінжайды аралап жүр екен. Іздегенге – сұраған. Амандық-саулық сұрасқан соң әңгіме ауаны басты тақырыпқа қарай ауыс­ты. Жұртшылық «Алтын дән – Шиеліні» жыл са­йын күріштен мол өнім алып, ауыл шаруашылық саласына айтарлықтай үлес қосып жүрген шаруашылықтың бірі ретінде таниды. Әңгіме барысында білгеніміздей, көктем шыға алтын дәннің «Лидер», «Янтарь» сұрыптары алқапқа себілген. Шаруашылық жетекшісі Асқар Бердібаев:<blockquote>– 2018 жылы 900 гектарға күріш еккен болатынбыз. Ал 2019 жылы оның көлемі 100 гектарға артып отыр. Одан бөлек 230 га жерге ескі жоңышқа егілді. Жылдағы есеппен салыстырғанда биыл дақыл бітік шығады деп болжап отырмыз, – дейді.</blockquote>Ең алғаш 2002 жылы небәрі 100 га жерге күріш егіп бастаған «Алтын дән – Шиелі» шаруа қожалығында жыл сайын жұмыс күші жетіліп, ауқымы да кеңейіп келеді. Алғашқы да 5 адам болып жұмыс бастаған ұжымда қазір 50-ге жуық диқан еңбек етуде. Мұндағы техникалар да жаңартылған. 2018 жылы шаруашылыққа 3 комбайн жаңадан алынса, 2019 жылы 2 су жаңа трактор мен 1 эксковатор жұмысты өндіріп жасауға септігін тигізіп жатыр. Пайдалана білгенге қара жердің берер ырысы мол. Әрине, бел бүгіп, тер төгіп еңбек етсең ғана. Бұл – диқан Асқар Айтөреұлының бала кезден түйгені. Сондықтан болар ол қиындығына қарамастан жоғары оқу орнын бітірісімен еш ойланбастан қолына кетпенін алып, еңбекке ерте араласты. Себебі әкесі де саналы ғұмырын егін даласында өткізіп, ел ықыласына бөленген жан еді.<blockquote>– Бастапқыда ешбір техника да, қаржы да болмады. Тек жалындаған жастық жігер мен нақты мақсатым ғана бар еді. Оңай жерде нан жоқ қой. Алғашқы кезде қиналғанымыз рас. Несиеге бес көлік алдық. Кейіннен ақша жинап, қажетті техниканы да, егіс алқабында ұлғайттық, – дейді диқан.</blockquote>Тынымсыз еңбек пен басқарушылық қабілетінің арқасында Асқар 2006 жылы ауылдағы кіші шаруа қожалықтарын біріктіреді. Бұл уақытта егіс көлемі 200 гектарға жеткен еді. Бүгінде «Алтын дән – Шиелі» күрішпен қатар мал шаруашылығымен айналысуды да жолға қойған. Сонау 2016 жылы алған 50 жылқысы қазір біршама көбейіп отыр.<blockquote>– Мемлекет берген мүмкіндік пен қолдауды барынша пайдаланған дұрыс қой. Жуырда ірі қара малды да алмақшымыз. Ата кәсіптің қай түрі болмасын еткен еңбегің еселеніп жемісін береді. Ал еңбектің наны қашанда тәтті болады, – дейді А.Айтөреұлы.</blockquote>Мұнымен қоса кәсіпкер Сыр салысына орақ түскенше қуаттылығы тәулігіне 60 тонна дақылды ақтауға жететін күріш ақтау зауытын іске қоспақшы. Иә, ерінбей еңбек етіп, жұмыстың ебін тапқан жанға еріксіз сүйсінесің. Кәсіпкерлерге мемлекеттің түрлі бағытта мол мүмкіндік беруі де қабілетті жандардың тынысын аша түскендей. Сөзсіз кейіпкеріміздің тірлігі еңбек еткеннің еңсесі биік, мерейі үстем болатынының тағы бір дәлелі.

Асқар Айтөреұлы: Еңбектің наны қашан да тәтті болады

<a href="https://kyzylorda-news.kz/">Kyzylorda-news.kz.</a> Шиелі іргесіндегі Тұран тұрғындарының тұрмысы жайлы, тіршілігі ауыл шаруашылығымен тығыз байланысқан, қазақы қаймағы бұзылмаған құтты мекен. Кеңес кезінде төрт түлігі төсінде өріп, алқабынан алтын дән өнген ауылдың тыныс-тіршілігі көпке үлгі. Ендеше, Тұран ауылдық округінде атқарылып жатқан, көңіл толтырар мардымды жұмыстар көп-ақ.542 түтіні бар Тұран ауылдық округінде 3407 тұрғын тұрмыс кешуде. Елді мекеннің жалпы көлемі – 11 252 гектар. Оның ішінде егістік – 3756,9 гектарды, ал жайылымдық жер – 2684,7 гектарды құрайды. Мұндағы тұрғындар негізінен мал шаруашылығымен айналысады. Мемлекеттік бағдарламалардың қолдау-көмектерін тиімді пайдаланып, ауыл шаруашылық техникаларын алуда. Жеңілдетілген несиелер арқылы асыл тұқымды мал басын көбейтуге де ден қойған. Шаруаға бейім жұртшылық шаруасын дөңгелетуге ұмтылып келеді. Соның нәтижесінде мал басы артып отыр. Қазір округте 26 шаруа қожалық, мал шаруашылығымен айналысатын 32 жеке кәсіпкер бар. Ата кәсіпті дамыту мақсатында 6 пайыздық несиені 3 азамат алыпты. Жалпы сомасы – 10 500 000 теңге. Ауылдағы үлкен «Төңкеріс-К» шаруа қожалығы бүгінде 92 адамды түрлі жұмыспен қамтып отыр.Сонымен қатар елді мекендегі ірі қара – 4683 басты құраса, уақ мал – 7209-ға жеткен. Ал қамбар атаның төлі – 940.Ауылдық округте 1 денсаулық сақтау, 1 білім беру, 1 ауылдық клуб, 1 учаскелік полиция жұмыс істейді. Сондай-ақ 8 дүкен бар. Ауылдың іші мұнтаздай тап-таза. Жеті көшесі толықтай жарықтандырылып, жаяу жүргінші жолақтары, жолда жүру белгілері қойылған. «Жол жаман болса атаң сүрінеді, атан да сүрінеді» деген дана халқымыздың тәмсілін ауыл тұрғындары жақсы түсінеді. Әрине, ат тұяғы сүрінбейтін тақтайдай жазық жол кімнің де болса арманы. Ерекшелігі сол, ауылдағы көшелердің 100 пайызы асфальтталған. Ауыл десе, алдымен есімізге ауыз су түседі. Бүгінде бұл елді мекенде ауыз су, аяқ су мәселесі толықтай шешімін тапқан. 2021 жылдың аяғында кіргізілген көгілдір отынды ауылдың 80 пайызы тұтынуда. Тұрғындардың көңіл-күйлері көтеріңкі. Еңбек адамдары таң атысымен қызу шаруаларына кіріседі. Әкіміне дән риза ауыл тұрғындары туған жердің көркеюі үшін жұмыла жұмыс істеуге әзір.«Өсер елдің керегесі кең болар» демекші, ауылдың әлеуметтік әлеуетін таныстырмаққа жол бастаған округ әкімі Болат Баймағанбетов елді мекеннің қанаты кеңге жайылып, әлеуметтік нысандармен халыққа қызмет ету орталықтары қарқынды жұмыс істеп жатқанын тілге тиек етті. Осы бағытта жасалынып жатқан жұмыстарды толығырақ тарқатсақ. Жоғарыда ауылдың 7 көшесіне көше шамдары қойылғанын айттық. Енді келер жылға Ы.Алтынсарин мен Орталық көшелеріне түнгі жарық бағаналарын орнату жоспарланған. Ауылдың болашағына нық сеніммен көз жүгірткен тұрғындар үйлерінің қоршауларын заманауи үлгіде жаңартып, құрылыс жұмыстарына ден қоя бастады. Ауыл әкімінің ауқымды жобаларды жүзеге асырып жатқаны тұрғындарға серпін беріп, әлеуметтік нысандар кезегімен бой көтеруде.Біз округ әкімімен арнайы тілдесу барысында ол: «Елу жылда ел жаңа…» деген сөз бар қазақта. Осы аталы сөзді басшылыққа ала отырып еліміздің өркендеуі жолында қалтқысыз қызмет етіп келеміз. Ауылдық жерлерге мемлекет тарапынан қолдау, қамқорлық көрсетіліп жатқаны бәріне аян. Сондықтан мұндай мүмкіндікті пайдаланып, ауылдарды ажарландырып, алдағы күндердің жарқын белестеріне жету үшін бәріміз бірге жұмылуымыз керек», – дейді Тұран ауылдық округінің әкімі Болат Баймағанбетов.Округтегі 3407 халықтың 1806-ы экономикалық белсенді санатына жатады. Олардың 32-і тұрақты жұмыс іздеп хабарласқан. Жыл бойына 54 отбасы жаңа форматтағы атаулы көмек алса, аудандық жұмыспен қамту орталығы арқылы ақылы қоғамдық жұмысқа 21 адам, жастар тәжірибесі бағдарламасы бойынша 1 азамат еңбекке тартылып отыр. Жалпы жұмыссыздық деңгейі – 0,2 пайызды құрайды.

Шиелідегі Тұран ауылында тіршілік бар

<a href="https://kyzylorda-news.kz/">Kyzylorda-news.kz.</a> &nbsp;Қазіргі Қызылорда облысы, Қазалы ауданы, «Жанқожа батыр» ауылындағы № 94 орта мектеп Жиделі колхозында 1934 &nbsp;жылы &nbsp;алғаш рет бастауыш мектеп &nbsp;болып &nbsp;ашылды.&nbsp;1937 жылы бастауыш мектеп Қазалы аудандық атқару комитетінің бұйрығымен 7 жылдық мектеп болып толықтырылды. &nbsp; Қазіргі таңда мектебімізде – 290 оқушы білім алуда. Мектепте 46 мұғалім жұмыс жасайды. Олардың 45-і жоғары білімді, 1-еуі арнаулы орта педагогикалық білімі бар. 5 мұғалім педагог-зерттеуші, 27 мұғалім педагог-сарапшы, 12 мұғалім педагог-модератор, 2 мұғалім санатсыз. Мектепте – 17 класс комплектісі мен 2 МАД тобы бар. 3-оқу тоқсанын 101 оқушы – үздік, 85 оқушы – екпінді бағамен аяқтады.&nbsp; Әр жыл сайын оқушыларымыз білім беру грантын иеленіп, облыстық, республикалық, халықаралық байқаулардың жеңімпазы атануда. Атап айтатын болсақ, 2023-2024 оқу жылында мектеп оқушыларының аудандық олимпиадасына әр пән бойынша оқушылар қатысып, 21 оқушы &nbsp;жүлдегер &nbsp;атанды. Ауыл мектептеріне арналған жалпы білім беретін пәндер бойынша 9-11 сынып оқушылары арасындағы облыстық олимпиадада 15 оқушы топ жарып, жүлделі ІІ және ІІІ орындарды қанжығасына байлады. &nbsp;Олар: 9-сынып &nbsp;оқушысы Ақнұр Оңғарбай қазақ тілі мен әдебиеті пәнінен 2-орын /жетекшісі Айгүл Мәлкеш/, 10-сынып оқушысы Гүлназым Замадинова ағылшын тілі пәнінен 2-орын/ жетекшісі Жанат Жұмағұл /, 9-сынып оқушысы Мерей Ізтұрған физика пәнінен 2-орын, 10-сынып оқушысы Аяулым Әділбек физика пәнінен 2-орын /жетекшісі Шаттық Қалиева/, 11-сынып оқушысы Жансая Ертуғанова биология пәнінен 2-орын /жетекшісі Ләззат Жандилда /, 11-сынып оқушысы Әлібек Шерхан математика пәнінен 3-орын/ жетекшісі Әлібек Жақсылықов/, 9-сынып оқушысы Нұрсұлтан Қайырлап математика пәнінен 3-орын /жетекшісі Ақбұрыш Батимова /, 9-сынып оқушысы Айжан Әділбек Қазақстан тарихы пәнінен 3-орын, 9-сынып оқушысы Қарлығаш Алтынбай құқық негіздері пәнінен 3-орын /жетекшісі Бағила Құрманәлі /, 10-сынып оқушысы Қосжан Берекет химия пәнінен 3-орын /жетекшісі Тұрсынкүл Тоқмамбет /, 9-сынып оқушысы Бақытбек Махфуза биология пәнінен 3-орын /жетекшісі Асан Тілек/, 10-сынып оқушысы Сағыныш Өмірзақ информатика пәнінен 3-орын /жетекшісі Жазира Бимырза /, 11-сынып оқушысы Диана Елдесбай ағылшын тілі пәнінен Алғыс хат /жетекшісі Жанат Жұмағұл /, 11-сынып оқушысы Мәулен Сағындық Қазақстан тарихы пәнінен Алғыс хат/ жетекшісі Асан Бақыт/, 9-сынып оқушысы Кәусар Елдесбай орыс тілі пәнінен Алғыс хат/ жетекшісі Айнұр Баймусаева/ иеленді. Бұдан басқа, Қызылорда облысы білім басқармасының «Дарын» облыстық қосымша білім беру орталығы Жаратылыстану-математика циклі пәндері бойынша ХҮІ Президенттік олимпиаданың І (өңірлік) кезеңінде көрсеткен ерекше жетістігі үшін 11-сынып оқушысы Әлібек Шерхан Алғыс хат, 10-11 сыныптарға арналған “Алтын түлек” олимпиадасының республикалық кезеңінен 1-орын иеленіп, ҚМУ грантын иеленді/ жетекшісі: Ә.Жақсылық/. Республикалық «Бояулар құпиясы» жас суретшілер байқауының облыстық кезеңіне қатысқан, ауыл мектебінің 8-сынып оқушысы Мінәжадин Мұхамеджан /жетекшісі: Рүстем Нуфтулла / ІІ орын иеленді.&nbsp;Осындай оқушыларды дайындап жүрген ұстаздарымыз да, жеңістен құр алақан емес. Биылғы оқу жылында өткен «Жыл мұғалімі – 2023» байқауына қатысқан тарих пәнінің мұғалімі Индира Әбіразақ жүлделі 2-орын иеленсе, информатика пәнінің мұғалімі Жазира Бимырза, ағылшын тілі пәнінің мұғалімі Жанат Жұмағұл, бастауыш сынып мұғалімі Гүлбану Кәрібай, алғашқы әскери даярлық пәнінің мұғалімі Алмат Аралбаев, мектеп директорының оқу-ісі жөніндегі орынбасары Әлібек Жақсылық Алғыс хат иеленді. Осы байқауда ерекше көзге түскен мектептің қосымша білім беру педагогы Бағила Құрманәлі бас жүлде иеленіп, аудандық білім бөлімінің дипломымен және бағалы сыйлығымен марапатталды.&nbsp; Мектеп басшылары арасында дебат турнирінде Адилхан Садиров Алғыс хат иеленді. Аудандық «Алтын тұғыр» олимпиадасында Меруерт Тоқтабаева Алғыс хат иеленді. Жылдың үздік әлеуметтік педагогы байқауына қатысқан мектептің әлеуметтік педагогы Әмірбек Жарылқап Алғыс хат иеленді. «Үздік дефектолог» байқауына қатысқан Гүлсая Алпысбай «Креативті маман» бағамын иеленді. Орыс тілі пәні бойынша практикалық жұмыстар байқауында Гүлмира Жали 2-орын иеленсе, математика пәні бойынша практикалық жұмыстар байқауына қатысқан математика пәнінің мұғалімі &nbsp;Айымкүл Пірімжар жүлделі 1-орын, биология пәні бойынша практикалық жұмыстар байқауынан Ләззат Жандилда – 2-орын иеленді. Бастауыш сынып мұғалімдерінің педагогикалық оқуына қатысқан бастауыш сынып мұғалімі Ақмарал Изетова 2-орын иеленген. Педагогикалық идеялар байқауына қатысқан тәлімгер Жанар Ерішова 1-орын, бастауыш сынып мұғалімі Мерует Тоқтабаева 2-орын, орыс тілі пәнінің мұғалімі Айнұр Баймусаева Алғыс хат &nbsp;иеленді.&nbsp;&nbsp;Мектепте 12 бағыт бойынша түрлі үйірмелер мен секциялар жұмыс жасайды. Соның ішінде, оқушылардың қызығушылығын арттыратын &nbsp;9 спорт секциясы болса, &nbsp;спортшылар облыстық, аудандық сайыстарға белсене қатысуда. Атап айтар болсам, ұлттық ойын секциясы бойынша облыстық ләңгі тебу сайысына қатысқан Әлимуса Қалабай /жетекшісі: Алпамыс Қожаниязов/ жүлделі І орын иеленді. Ұлттық мектеп лигасы аясында волейболдан мектептің 7-8, 9-11 сынып оқушыларынан құралған құрама командасы ауданда көш бастаушылардың қатарында жүлдегер атанып жүр/ жетекшісі: Ахмедия Тулешов /.&nbsp;Мектеп үш жылдан бері «Қазақстанның киелі жерлерінің географиясы» жобасы аясында, «Тарихи тұлғаларға қатысты тарихи орындар» тақырыбымен жұмыс жасап келе жатыр. Жоба аясында аудандық «Өлкетану» мұражайымен меморандум жасалынып, бірнеше рет оқушылардың мұражайға, Қорқыт ата кешеніне саяхаты ұйымдастырылды. Қазақстанның түкпір-түкпіріндегі тарихи мұражайларға виртуалды саяхаттар жасалды. Сонымен бірге, мектепке де, көшпелі мұражай ұйымдастырылып, білім алушыларымыз өлке тарихынан көптеген мәліметтер алды.&nbsp;Сондай-ақ, оқушының жылдар бойы алған білімінің сарапқа түсетін сәті – Ұлттық Бірыңғай Тестілеу кезі. ҰБТ-да оқушылар жылдан жылға өсу көрсеткішін көрсетіп, оқу орнына түсу білім грантын иеленуде. Атап айтсақ, 2022-2023 оқу жылында ҰБТ-да орташа көрсеткіші – 86,1 ұпай болып, 13 оқушы грант иегері болды. 3 оқушы «Алтын белгі» иегері, 1 оқушы «Үздік аттестат» иегері атанды. 5 оқушы колледждің грантына ие болып білім алуда.&nbsp;Биылғы оқу жылындағы үлкен жаңалықтың бірі – «Жайлы мектеп» жобасы аясында 300 орындық білім ордасы салынуда. 2023 жылдың қараша айының 1-жұлдызында іргетасы қаланған білім ордасының құрылысын «Асар» жауапкершілігі шектеулі серіктестігі жүргізіп жатыр. Құрылыс бастығы Б.Еспембетовтің айтуынша, «Тапсырыс беруші «Самұрық - Қазына» акционерлік қоғамы. Мектеп үйі екі қабаттан тұрады. Жайлы мектеп болғандықтан спорт кешені, ойын алаңы барлығы қарастырылған. 2024 жылы тамыз айында құрылыс аяқталады деп &nbsp;жоспарланған».<img src="https://knadmin.beoblood.kz/uploads/860b4496_fdf3_4ad5_ab69_ba1f4a3f9428_48f0034c64.jpg" alt="860b4496-fdf3-4ad5-ab69-ba1f4a3f9428.jpg"> &nbsp;

 Үздіктер басқосқан білім ордасы

Тәуелсіз еліміздің ертеңгі болашағы білімді жастардың қолында. Заманауи жаңашыл жас педагог – кемел келешектің жарқын болуына себепші болатын тұлғаның бірі.&nbsp;Бәсекеге қабілетті ел тізгінін ұстар жас ұрпаққа тәлімді тәрбие мен сапалы білім беру және ертеңгі болашағына оң бағыт-бағдар көрсету – қашан да әрбір ұстаздың азаматтық борышы мен жауапты міндеті. Қазіргі таңда шәкірттеріне заманауи білім мен тағылымды тәрбие беріп, игілікті істің жаршысы болып жүрген жаңашыл жас ұстаздарымыздың қатары көбейіп келеді. №44 орта мектептің жас педагогы – Талшын Сырлыбаева қарапайым ауыл балаларына білім нәрін беріп, жеке тұлға болып қалыптасуына еңбек етіп жүрген білікті де білімді, ізденімпаз маманның бірі.&nbsp;Білікті маман 1996 жылдың тамыз айында Шаған ауылында дүниеге келген. Бала күнінен зерек, оқуға құштар болып өскен бүгінгі кейіпкеріміз 2013 жылы Шаған ауылының №37 орта мектебін ойдағыдай тәмәмдап, Ақтөбе қаласындағы Құдайберген Жұбанов атындағы Ақтөбе өңірлік мемлекеттік университетінің грант иегері атанған. Мектеп қабырғасында оқып жүрген кезінен-ақ белсенді, оқуда озат, білімге құштар болған ол жоғарғы оқу орнын «Әлеуметтік педагогика және өзін-өзі тану» мамандығы бойынша үздік дипломмен бітіреді. Талшын Сырлыбаева алғашқы еңбек жолын 2018 жылдың қыркүйек айында өзі туып өскен Шаған ауылының №37 мектеп-лицейінің «Әлеуметтік педагог» маманы болып бастаған. Жаңашыл педагогтың басты мақсатының бірі – шәкірттерінің шығармашылық әлеуетін көтеруге жан-жақты жұмыс істеу болып табылады. Ол түрлі жаңа әдіс-тәсілдерді қолдана отырып, оқушылардың оқу-білімге, шығармашылыққа деген қызығушылығы мен белсенділігін арттырады. Ұлағатты ұстаз отбасылық жағдайға байланысты 2021 жылдың сәуір айынан бастап Қоғалыкөл ауылының №44 орта мектебіне ауысып, «Өзін-өзі тану» маманы қызметіне орналасады. Біліктілігімен көзге түсіп, іргелі ұжымның ортасында сыйлы болып жүрген Талшын 2023 жылдың қыркүйегінен қазірге дейін әлеуметтік педагог қызметін атқарып келеді.<blockquote>&nbsp; – Талшын Жанболатқызын мектебіміздің білікті әрі өз ісіне өте үлкен жауапкершілікпен қарайтын тиянақты мамандардың бірі десем артық айтқаным емес. Ол жыл көлемінде мектептегі әлеуметтік жағдайы аз қамтылған, толық емес отбасы балаларына әлеуметтік көмек қолдау көрсетіп қана қоймай, одан бөлек «Мектепке жол» акция­сы аясында оқуға қажетті құрал-жабдықтармен, киім-кешекпен қамтамасыз етуге, оқушылардың жазғы демалысын тиімді ұйымдастыру үшін облыстық, аудандық, мектеп жанындағы лагерлерге ауыл кәсіпкерлерімен байланыса отырып, демеу­шілік жасап игі іс-шараларды атқарып келеді. Осындай білім саласындағы атқарған елеулі еңбектері еленіп облыстық, аудан­дық, мектепішілік және ауыл әкімінің алғыс хаттарымен марапатталған. Жас педагог өз тәжірибесін шыңдау мақсатын­да жыл сайын аудандық жарыс­тарға белсене қатысады. 2022 жылы Сырдария аудандық «Үздік әлеуметтік педагог-2022» байқауына қатысып, жүл­делі І орынды иеленсе, 2023 жылы да дәл осы аудандық байқауда жүлделі І орынды иеленіп, облыстық кезеңінен ІІІ орын иегері атанды. Өз ісінің білгірі атанған Талшынның алға қойған мақсаты – өскелең ұрпақты заман талабына сай тәрбиелеу, тұлғаның бойына жауапкершілікті, өз Отанына деген міндет-борышын атқаруына, оның гүлденіп, өркендеуіне атсалысуына үйрету, өз тіліне, өзіне сүйіспеншілігін қалыптастыру, үлкенді сыйлап, кішіге қамқорлық көрсету, табиғатты аялауға ықпал ету керектігін алға тартады. Еліміздің болашағы бүгінгі жас ұрпақ дейміз, ал сол жастарымыздың тәлім-тәрбиесі мен сапалы білім алуы мына біздің қолымызда. Парасат пайымы жарасқан Талшындай білікті де білімді ұстаздарымыз барда еліміздің болашағынан көп үміт күтуге болады, – дейді мектеп директорының бағдарлы оқыту жөніндегі орынбасары Айдос Оспанов.</blockquote>&nbsp; «Жас келсе – іске» деген жақсы сөз бар. Бойындағы жастық жігері мен жаңашылдығын шәкірт тәрбиесіне жұмсауды жөн санайтын кейіпкеріміздің жеткен жетістіктері де аз емес. 2024 жылы облыстық «Әлеуметтік педагогтың білім беру жүйесіндегі қызметі және әртүрлі санаттағы балалармен жұмыс» атты семинарда «Мұғалім – ата-ана – оқушы» үштігі негізінде білім алушылардың жекелеген санаттарын әлеуметтік-педагогикалық қолдау тақырыбында үздік жұмыс көрсетті. Нәтижесінде облыстық «Тәрбие, спорт, қосымша білім беру» орталығының «Алғыс хатымен» марапатталды.&nbsp;Ұстаз болу – жүректің батырлығы. Әр оқушының көңілін табу, олардың тұлға болып қалыптасуына сүбелі үлес қоса білу, сапалы білім мен тәрбие беру әркімнің қолынан келе бермейді. Ол үлкен жауапкершілікті, мейірімділікті, сабырлық пен шыдамдылықты қажет етеді. Осы тұста осындай игілікті іс атқарып, келешек ұрпақ тәрбиелеуде өз уақытын аямай, өзгенің бақытын аялап, тынымсыз қызмет етіп жүрген ұлағатты ұстаздар қауымы үлкен құрмет әбден лайық.

Ауыл мектебіндегі білікті жас маман

<a href="https://kyzylorda-news.kz/">Kyzylorda-news.kz.</a> Тарихты тасқа басқан талай таңбалар көмескіленсе де, мүк қабаққа қонған талай зердің жүзін ­жауын мен күн мүжіп кетсе де, адам деген ұлы жаратылыстың соңында қалдырған мәйекті мұрасы мізбақпастан сақталады. Оны бұқара ғасыр жөңкісе де жадында ұстайды. Туғанына аттай 100 жыл толған бірегей тұлға, мемлекет және қоғам қайраткері ­Исатай Әбдікәрімов бұл ойымыздың айқын дәлелі.Жұрты үшін терсіңді еңбек етіп, телегей қажырын сарыққан, бойындағы туабітті дарыны мен қабілет-қарымын аямай ел көсегесінің көгеруі жолына жұмсаған Исатай Әбдікәрімовке арналған әдемі кеш Шиеліге қарасты Шеген Қодаманов ауылдық мәдениет үйінде өтті. Клуб қызметкерлері мен «ART LIFЕ» өнер орталығының мұрындық болуымен өткен шара «Сырдың ұлы перзенті» деп аталады. Облыстық көркемсөз оқу шеберлерінің байқауына 7 үміткер қатысты. Жырға құмар жастар 2 кезең бойынша сынға түсті. Яғни И.Әбдікәрімовтің 100 жылдығына және Шиелінің 95 жылдығына орай жүрекжарды шығармаларын оқыды.Көркемсөз оқу шеберлерін анықтау үшін Зина Файызханқызы, Абай Алмасұлы, Сұлушаш Бахтиярқызы байқауға қазылық етті. Көркем мәтiндi оқу шеберлiгi мен дауыс мәнерiне және киiм кию үлгiсiне мән берген қазылар алқасы байқауға қатысушыларды 10 балдық жүйе бойынша бағалады.Шығарманы мәнерлеп оқумен қатар әуезді ­дауыс, әдемі үн және актерлік шеберлігімен тәнті еткен үміткерлер аз болған жоқ. Байқаудың бас жүлдесін тұрандық Жанель Баймырза жеңіп алды. Ал бірінші орын Қармақшы ауданы, Иіркөл ауылынан келген Жансая Асановаға бұйырды. Екінші орынды қазалылық Мансұр Құттыбай мен жаңақорғандық Айдос Сәкенұлы иеленді. Тиісінше үшінші орыннан Жөлек, Байсын мен Бидайкөл ауылының үмітін арқалаған Зарина Рашова, Аружан Бегайдарова мен Ақерке Нысанбекқызы көрінді. Жүлдегерлер дипломымен және бағалы сыйлықпен марапатталды.Байқау соңында сөз алған қазылар алқасының төрайымы З.Файызханқызы: «Исатай Әбдікәрімов – ел экономикасының және халықтың мәдени-рухани тұрғыдан қалыптасуына өлшеусіз еңбек сіңірген, өрлігі һәм ерлігімен қашанда көш басынан көрінген тұғыры биік тұлға. 1971 жылы Социалистік Еңбек Ері атағын алған қазақтың біртуар перзентінің есімін қалай ұлықтасақ та жарасады. Бұл байқауға қатысқан жастардың беталысы біздерді қуантты. Сендердің әркез биіктен көріне беретіндеріңе бек сенеміз», – деп қатысушыларға алғысын білдірді.Шара соңында қатысушылар ұйымдастырушыларға өз ризашылық сезімін жеткізді.

Сырдың ұлы перзенті ұмытылмақ емес

<a href="https://kyzylorda-news.kz/">Kyzylorda-news.kz</a> Исатай Әбдікәрімов атындағы Қызылорда аграрлық-техникалық жоғары колледжінде көрнекті лирик ақын Сағи Жиенбаевтың 90 жылдық мерейтойына арналған поэзия кеші өтті. Іс-шараны қалалық №20 кітапхана ұйымдастырған.Нәзік жырымен оқырманын елең еткізіп, қазақ әдебиеті әлеміне 60-жылдары келген Сағи Жиенбаев – түрлі тақырыпта жырлаған көрнекті ақын. Оның поэзиясында табиғаттың әсем сұлулығы, әсерлі махаббат, жан сұлулығы, тап-таза сезімдер өрнектеліп суреттелген. Кеште ақынның осындай өлеңдерін колледж студенттері жатқа оқыды.Қырық жылдық шығармашылық қызметінде Сағи Жиенбаев айрықша ақындығымен танылды. Лирик ақынның «Қарлығаш» атты алғашқы жыржинағы 1959 жылы жарыққа шықты. Шарада қалалық №20 кітапхана кітапханашысы Падиша Шманова оның өмірі мен шығармашылығынан сыр шертті.<blockquote>– Өкінішке қарай, халқына осындай жыр сыйлаған ақын дәл туған күнінде, 60 жасында дүниеден озды. Соңында қалған оқырманы барда Сағи ақынның сырлы өлеңдері мәңгі өмір сүреді. Сондықтан оның көркем мұрасын жас ұрпаққа насихаттау – баршамыздың парызымыз, – деді ол.</blockquote>Кеш барысында Қазанғап атындағы жоғары музыкалық колледжінің студенті Қарақат Әбдікәрім Сағи ақын сүйіп тыңдаған халық әні « Ақеркені» орындады. Сондай-ақ С.Жиенбаевтың өмірі мен шығармашылығынан арнайы видеослайд көрсетіліп, кітап көрмесі ұйымдастырылды.&nbsp;

Лирик ақын Сағи Жиенбаевтың мерейтойына арналған поэзия кеші өтті

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданына қарасты Қоғалыкөл ауылында қарашаңырақтың түтінін түтеткен әрбір отбасы тарихы тереңде жатқан көл жағасында қоныстанғаны мәлім. Ризық-несібесін жерден терген Қоғалыкөл ауылының қашанда берекесі тасыған. Есімі елге белгілі театр падишасы Сәбира Майқанова, өнердің жарқын өкілі Сұлтан Қожықов пен Серәлі Лапиннің туған жерінің қойнауында қаншама ашылмаған сыр жатыр. Өткен ғасырдан бері мәдениет саласында елеулі өзгеріс орын алып, ауылдағы өнер ордасы таланттар шеберханасына айналған.Бүгінде аудандық мәслихат депутаты Динара Ибадуллаева жетекшілік ететін ауылдық клуб үйінің ұжымы 1972 жылдан бері халыққа мәдени, рухани бағыт бойынша үздіксіз жұмыс жасап келеді. Осы аралықта сахна саңлақтары ауыл мәдениетін көтеруге зор үлес қоса білген. Мәселен, 52 жыл бұрын мәдениет ошағына ардақты азамат Балтабай Еламанов басшылық жасаса, содан кейін мәдениет саласының майталманы Күлшира Көмірбаева ел-халықтың ішінде елеулі қызметімен танылды. Сонымен қатар білікті басшы Ермекбай Әдікенов ауыл мәдениетінің күретамырына қан жүгіртеді. Ал 2016-2021 жылдары музыка маманы Ләззат Сапарбаева ілкімді істерімен көпшіліктің ыстық ықыласына бөленеді.<blockquote>– Біз үшін өткен күн – тарих. Қаншама алыптар шыққан мекенде ұлт құндылығы ешқашан жұтамайды. Шын мәнінде, әрбір басшының өзіндік қолтаңбасы қалыптасқан. Анығын айтқанда, Балтабай ағамыз 1974 жылы Алматы қаласына жерлесіміз КСРО халық әртісі Сәбира Майқанованы іздеп барған екен. Ардақты азамат жерлесінің шаңырағынан дәм татып, ауылдағы ашылған театр әртістеріне арнайы грим алып қайтқанын көпшілік жақсы біледі. Бұдан бөлек Күлшира мен Ләззат апамыздың, Ермекбай ағамыздың мәдениет үйінде жүріп өткен жолы қаз-қалпында сақталған секілді. Әрине, тәжірибелі басшылардың ақыл-кеңесін ала отырып, өнердің өрісін кеңейтіп келеміз, – деді ауылдық клуб үйінің директоры Динара Ибадуллаева.</blockquote>Негізінен, осыдан 12 жыл бұрын аудандық бюджеттен қаржы бөлініп, ауылдық клуб үйінің жаңа ғимараты пайдалануға берілді. Осы күні ұжымда 8,5 штаттық бірлік бойынша 10 қызметкер жұмыс жасайды. Өткен жылы жоспар бойынша 52 іс-шара өткізіліп, 5178 көрермен тартылды. Ал аудандық деңгейде ақын М.Жұмабаевтың 130 жылдығына «Мен жастарға сенемін» тақырыбында жазба ақындар мүшайрасы өткізілсе, композитор Ә.Бейсеуовтың 85 жылдығына орай аудандық «Әсеттің әсем әндері-ай» атты әншілер байқауы өтті. Облыстық дәрежеде Құрманғазы Сағырбайұлының 200 жылдығына арналған «Күмбірле күй домбыра» тақырыбындағы кәсіби күйшілер байқауы жоғары деңгейде ұйымдастырылған болатын.<blockquote>– Қоғалыкөл ауылдық клуб үйінің жанынан құрылған 5 үйірмеде талантты балалар қамтылды. Шындығында, «Ән», «Сурет», «Домбыра», «Ардагерлер» ансамблі, «Көркемсөз» үйірмесіндегі оқушыларымыз аудандық, облыстық, республикалық байқауда топ жарып жүр. Есепті мерзімде «Адал адам» мәдени-тәрбие орталығы тұжырымдамасы бойынша және өзгеде бағытта өткізілген іс-шара саны – 40-қа жеткен. Мәдениет ошағында әдіскер Гүлшара Сарбасова, мәдени ұйымдастырушы Райхан Шүкірәлиева қажырлы еңбек етуде. Әрине, аудан құрамына кіретін үлкен ауылдың бірі саналатын Қоғалыкөлде мәдениет саласын жандандыруға барымызды саламыз. Кәсіби мамандардың біліктілігінің арқасында ауыл мәдениетін лайықты түрде жүргізе береміз, – деді кәсіпорын басшысы.</blockquote>

Қоғалыкөл ауылдық клуб үйінің жанынан құрылған 5 үйірмеде талантты балалар қамтылған 

<a href="https://kyzylorda-news.kz/">Kyzylorda-news.kz.</a> &nbsp;Мемлекет басшысы Қасым-Жомарт Кемелұлы Тоқаевтың аймақтарды абаттандыру және көгалдандыруға байланысты «Таза Қазақстан» экологиялық акциясын өткізу жөніндегі тапсырмасына және облыс әкімі Нұрлыбек Машбекұлы Нәлібаевтың «Таза Қазақстан — таза аймақ» науқанында санитарлық тазарту жұмыстарын жүргізу жөніндегі Үндеуіне сәйкес жүргізілген тазалық іс-шарасына белсенді атсалысқан табиғат жанашырлары марапатталды.Марапаттау іс-шарасында аудан басшысы туған өлкенің тазалығын сақтауға үлес қосу әрбір тұрғынның міндеті екенін атап өтті.<blockquote>– Ел Президентінің тапсырмасымен бастау алған экологиялық акцияның әр аптасы арнайы тақырыптарға арналып, науқанға сырдариялықтар белсене атсалысты.Қоршаған ортаның тазалығына жауапкершілікпен қарау, өзі тұратын үйді, аймақты, өлкені таза ұстау және ағаш отырғызу, оны күтіп баптау — әрбір азаматтың елжандылық парызы деп білемін.</blockquote>Сондықтан туған жеріміздің таза, берекелі болуына баршамыз жауаптымыз. Осы ретте, «Таза Қазақстан» экологиялық акциясына атсалысқан баршаңызға шынайы алғысымды білдіремін, — деді Берік Әбдіғаппарұлы.Мұнан соң аудан басшысы табиғат жанашырларын «Алғыс хатпен» марапаттады.Айта кетейік, тазалық акциясы аясында апта сайын сенбілік жұмыстары ұйымдастырылып, бүгінгі күнге дейін 13 мыңға жуық ағаш отырғызылып, 60 мың тонна күл-қоқыс арнайы белгіленген орындарға шығарылды. Тереңөзек кенті және ауылдық округтерде аяқ су жүретін арықтар қазылып, жалғызбасты қариялардың аулалары тазаланып, тарихи-мәдени ескерткіштердің аумағына, орталық көшелерде, аллеялар мен саябақтарда көркейту-көгалдандыру абаттандыру жұмыстары жүргізілді.

Табиғат жанашырлары марапатталды	

<a href="https://kyzylorda-news.kz/">Kyzylorda-news.kz.</a> «AMANAT» партиясының облыстық филиалының мобильді қоғамдық қабылдау тобының ауылдық жерлерге сапары жалғасуда. Бүгін мобильді топ өкілдері Қазалы ауданына қарасты Құмжиек және Басықара ауылдық округтерінде болып, тұрғындардың өтініш-тілегін тыңдады.Ең алдымен Құмжиек ауылдық округінің орталығы Қ.Пірімов ауылында өткен қабылдауда тұрғындар ауылдың инфрақұрылымына қатысты өтінштер айтты. Соның ішінде жергілікті тұрғындар үшін әлеуметтік нысандарды газдандыру, көшелерді асфальттау және жарықтандыру, электр желісі мен бағандарын ауыстыру мәселелері өзекті болып отыр.Сондай-ақ, бірқатар тұрғындар жеке мәселелеріне сәйкес денсаулық сақтау, жұмыспен қамту тақырыптарында өтініштерін айтты. Заңгерлік көмек сұраған азаматтар да болды.Басықара ауылында жалғасқан қабылдауда жергілікті тұрғындардан ауылды дамыту бойынша ұсыныстар түсті. Ауыл азаматтары ең алдымен амбулаторияны қайта ашу мәселесі оң шешімін тапса деген өтініштерін білдірді. Жеке мәселелерінде жұмысқа орналасу, денсаулық сақтау саласы төңірегінде мәселелер көтерді.Аталған өтініштерге партиялықтар тарапынан бақылауға алынып, тиісті жауаптар беріліп, заңдылық аясында түсіндірме жұмыстары жүргізілді. Қабылдауға облыстық мәслихаттағы «AMANAT» партиясы фракциясының мүшесі Мақсұт Нәлібаев, облыстық партия филиалының қоғамдық қабылдау бөлмесінің меңгерушісі Нұрлан Абдукаримов, аудандық партия филиалының төрағасы Ғазиз Әліш, Су ресурстарын пайдалануды реттеу және қорғау жөніндегі Арал-Сырдария бассейндік инспекциясының басшысы Қайратбек Сәрсенбаев сондай-ақ тиісті басқармалардың өкілдері мен заңгерлер қатысты.Атап өтейік, қос ауылда өткен мобильді қабылдау барысында азаматтардан 32 өтініш түсіп, олардың 14 оң шешілді. 12 өтініш бойынша заңнамалық кеңестер берілді. 6 мәселенің шешілуі бақылауға алынды. Мұндай мобильді қабылдаулар жыл соңына дейін 10 елді мекенде жүргізілетін болады.

 Қос ауылдық округте кезекті мобильді қоғамдық қабылдау өтті

<a href="https://kyzylorda-news.kz/">Kyzylorda-news.kz.</a> Өрт – аса қатерлі, тілсіз жау. Көктем, жаз айларында күннің күрт ысуына байланысты табиғи өрттің де қаупі арта түседі. Бұның артында адамның тағдыры тұр. Сондықтан тілсіз жауға бейжай қарауға болмайды. Өрттің пайда болуы көбіне найзағайдың соғуы, далада жатқан шыны, сынық әйнектердің қызуы жәнежүргізушілердің темекі тұқылдарын сөндірмей, жол бойына лақтырыпкетуінің нәтижесінде орын алады. Аптап ыстық пен қуаңшылық кезеңінде ормандардағы өрт қауіпсіздігі ережелерін қатаң түрде сақтаудың маңызды екенін ескерген жөн. Қазіргі уақытта айтып келмейтін апаттан сақтану да – күн тәртібіндегі басты мәселенің бірі.Осы орайда Шиелі ауданында 15-16 мамыр күндері аралығында табиғи өрт туындаған кездегі іс-қимылдарға мемлекеттік басқару органдарының, азаматтық қорғаудың күштері мен құралдарын дайындау мақсатында «Өрт –2024» республикалық командалық-штабтық оқу-жаттығуы ұйымдастырылды.Оқу-жаттығу барысында Шиелі ауданының аумағында туындайтын табиғи өрттерді сөндіру жөніндегі аумақты азаматтық қорғау күштері мен құралдарды басқару органдарының іс-қимылы, ақпарат алмасуы, өзара іс-қимыл жасайтын мекемемелер мен қызметтер арасында табиғи апатты жоюға қатысатын өртке қарсы құралымдардың дайындығы пысықталды. Екі күнге жоспарланған оқу-жаттығудың І кезеңінде Шиелі ауданы әкімінің орынбасары Болатбек Абдулхайысұлы және Шиелі аудандық төтенше жағдайлар бөлімінің басшысы, азаматтық қорғау подполковнигі Жандос Айдарбекұлы саптық қарау жұмыстарын жүргізді.Екінші күні Шиелі ауданы әкімі орынбасарының басшылығымен далалық жерде өрт пайда болған кезде мекеме, ұйымдардың және ерікті өрт сөндіру жасақтарының дайындығы тексерілді. Оқу-жаттығудың ІІ кезеңі Шиелі іргесіндегі Алмалы ауылдық огругі, 21-бекет тұсында Жөлек орманшылығының 9-айналымы 52-орамында жалғасын тапты. Қауіпті өрт кезеңінде туындайтын төтенше жағдайлардың алдын алу және оларды жою бағытында дер кезінде тиісті шаралар қабылданып, мамандар мен арнайы техникалар жұмылдырылды.Шара соңында тәжірибеден өткен мамандарға Шиелі ауданы әкімінің орынбасары Болатбек Ысмағұлов:<blockquote>– Тұтқиылдан тап беретін өртті алдын ала болжау мүмкін емес. Өрттің адам өмірі мен денсаулығына, қоршаған орта мен материалдық құндылықтарға зиян келтіретіні баршаға аян. Әсіресе дала мен орман өртінің қаупі жоғары. Сондықтан өрттің алдын алу бойынша жоспар жасалып, жүзеге асыруымыз керек. Бүгінде республика көлемінде өткізіліп жатқан «Өрт – 2024» оқу-жаттығуына қатысқан барлық сала мамандарына алғыс білдіремін. Тұтанған өрттің дер кезінде орнын анықтап, өрт жайлаған аумақты жедел түрде сөндірдіңіздер, – деп оң бағасын берді.</blockquote>

Болатбек Ысмағұлов: Тілсіз жаудың алдын алу жолдары жүргізілуде

<a href="https://kyzylorda-news.kz/">Kyzylorda-news.kz</a> Жазғы демалыс – балалардың ғана емес, ата-аналардың да асыға күтетін кезеңі. Таңертең ерте тұрып, баланы мектепке, үйірмеге тасудың қажеті жоқ, кешке де мектепте алған біліміңді еске түсіріп, үй тапсырмасын қайталамайсың. Бірақ, жазғы каникулдың ата-анаға салар өзіндік салмағы болуы тиіс. Баланың жазғы демалысын қалай ұйымдастырған жөн? Жаңа оқу жылына бала күш жинап баруы үшін нені ұмытпау керек? Әбу Досмұхамбетов атындағы облыстық дарынды балаларға мамандандырылған гимназия-интернатының педагог-психологі Гүлдана Қалиева <a href="https://kaz.inform.kz/news/balanin-zhazgi-demalisin-kalay-sauatti-uyimdastirgan-zhon-psiholog-kenes-68d022/">ҚазАқпараттың </a>сұрақтарына жауап берді.- Жазғы каникулдың басталуына санаулы күн қалды. Балаларға жазғы демалысты қалай өткізген дұрыс?&nbsp;- Қатып қалған қағида жоқ. Өйткені балалар әртүрлі ғой. Бір бала көпшіл, енді бірі жалғыздықты ұнатады. Бірақ бәріне тән бір ерекшелік – олар жаздан жаңалық, жаңа әсер, жаңа эмоция күтеді. Жаңа дос табуды қалайды. Әрине, егер ата-ана жұмысбасты болса, онда баланың демалысын ұйымдастыру оңайға соқпайды. Ал егер демалыстары тұспа-тұс келіп жатса, жоспарлап, баланың тілегін де ұмытпай, таңдау мүмкіндігін беру қажет. Балаға не қызықты – бұл бірінші кезекте тұруы тиіс.&nbsp;Егер ата-ана жұмыстан босай алмай жатса, онда бірге серуендеуге, кітап оқуға және оны талқылауға уақыт табуы керек. Бірге отырып фильм қараудың, отбасы мүшелері жиналып, үстел басында ойын ойнаудың маңызы зор, бұл жақындата түседі. Бала кішкентайынан қызықты сәттерді басынан көп өткерген сайын оның ішкі ресурсы молайып, ол жаңа құлшыныспен, ниетпен сабаққа барады.&nbsp;Әрине, ата-ананың көп жағдайда баламен шетелге шығып, жаңа елдерді көрсетуіне мүмкіндігі жоқ. Бірақ қала сыртына, өзен-көл жағасына бару, далада ойын ойнау – қолжетімді. Бұл да бала өмірін қызыққа толтырады.&nbsp;Сондай-ақ баланы қабілетіне, қызығушылығына байланысты жазғы мектептерге орналастыруға, үйірмелерге беруге болады. Мысалы бала 9 ай бойы оқып, бассейнге баруға мұршасы болмады. Жаз уақытында жүзуді үйренуіне болады немесе компьютерге қызығушылығы жоғары. Қазіргі кезде компьютерді жетік меңгеруге мүмкіндік беретін үйірмелер көп.&nbsp;- Ең тиімді күн тәртібі қандай болуы керек?&nbsp;- Меніңше, баланың денсаулығына, тілегіне байланысты жасалуы керек. Жалпы қатаң күн тәртібінен бас тартып, босаңсытуға болады, мысалы кеш жатқызып, кеш тұрғызу. Демалыс болғандықтан бала физикалық, психологиялық тұрғыда демалуы керек. Тек тамыздың соңғы апталарында бұрынғы күн тәртібіне біртіндеп көшкен жөн.&nbsp;- Бала каникулде ғой деп босаңсытып, кеш жатқызып, кеш тұрғызудың зияны жоқ па?- Кеш жатқызу дегеніміз, түнгі сағат 1.00-ге дейін жүруге рұқсат беру емес. Мысалы 23.00-ге дейін жүргізіп, таңертең сағат 10.00-де тұрғызу. Бірақ бала гаджеттерде отыратын болса, режим болуы тиіс. Ал егер далада өзі қатарластармен ойнап, құрбыларымен араласса, онда еркіндік берген жөн. Бала әлеуметтік жағынан қарым-қатынас жасай білуі керек. Кешке балалар үй жанына жиналып, кейде әңгімелесіп, жаңалықтарымен бөлісіп жатады. Отырсын, бірақ ата-ана көзден таса жібермегені дұрыс.&nbsp;Егер бала ерте жатып, ерте тұрса, басқа балалармен араласпаса, шеттетіліп, онда қызықты телефоннан іздейтін болады.&nbsp;Сондай-ақ баланың жас ерекшелігін де есепке алу керек. Бастауыш сыныптың оқушылары қарым-қатынасқа онша жоқ, оларға көбіне ата-ананың айтқаны өтімді болып келеді.&nbsp; Жасөспірім шақта балаларға құрбыларымен бірге жүру қызықты, олардың айтқаны маңызды, бір топта болғанды қалап тұрады. Бұл да әлеуметтік жағынан жақсы жетілуіне әсерін тигізеді.- Жазғы лагерьге жіберудің пайдасы неде? Баланы қай жастан лагерьге жіберген жөн?- Жазғы сауықтыру лагерінің балаға пайдасы орасан зор. Ең бірінші бұл ата-анадан сепарацияның жақсы жолы. Бала дербестікке, өз-өзіне қарауға, шешім қабылдауға үйренеді.&nbsp; Жаңа ортада басқа балалармен қарым-қатынас орнатып, өзін танып, басқаларды танып, бойындағы қабілеттері ашылып жатады.Жазғы лагерьде күн тәртібі жақсы сақталады. Таңғы жаттығу, 4-5 мезгілдік тамақтану, түрлі үйірмелер, кешке би кештері бар. Әр күн белгілі бір тақырыпта өтіп, түрлі сайыстар ұйымдастырылады. Мұның маңыздылығы – бала командада, топта жұмыс істеуге үйренеді. Осы арқылы бала өз маңыздылығын түсініп, жауапкершілікті сезінеді. Қасындағы балаларды сыйлау, түсіну, басқа балалардан үлгі алу сияқты өзіне көп әлеуметтік тәжірибе жинайды. Мен өзім жазғы лагерьде тәрбиеші болғанмын, сондықтан маған жақсы таныс. Бала лагерьден кәдімгідей есейіп келеді. Ата-анасын сағынып, олардың да қадірін түсінеді.&nbsp;Кейбір кезде жазғы лагерьде балалар өздерінің алғашқы махаббаттарын тауып жатады. Кей балалар бойларынан жаңа қабілеттерді ашып, спорттық жарыста жеңіп жатады. Енді бірінің әртістік қыры көрінуі мүмкін. Жазғы лагерь стандартты емес, креативті жолдар арқылы өз бойындағы бір дарынын ашуға септігін тигізеді.&nbsp;Бастауыш сынып оқушыларын, 7-8 жастағы балаларды лагерьге жібере беруге болады. Қаланың ішінде жазғы лагерьлер бар. Он жастан асқандарды қала сыртындағы жазғы лагерьлерге жіберуге болады.&nbsp;- Әдетте ұстаздар демалыс уақытында оқыңдар деп кітаптар тізімін береді. Алайда балалардың оны оқығысы жоқ, не істеу керек?&nbsp;- Кітап оқу мектептің, ұстаздардың ғана емес, қоғамның мәселесі. Балалар кітап оқымайды. Мұғалімдердің қыркүйекте балалар берілген кітаптарды оқымапты деп налығанын үнемі көріп жүрміз. Бұл бір күнде шешілетін мәселе емес. Кітап оқу мәдениеті «күнде бір тамшы» әдісімен қалыптасуы мүмкін. Осы тақырып бойынша мен бастауыш сынып оқушыларының ата-аналар жиналысында сөз сөйледім. Балалардың бойында білімге, кітапқа деген құмарлықты қалай оятуға болады деген тақырыпта керемет пікірталас болды. Менің ұққаным, «оқы, оқы» деп айта бергеннен нәтиже жоқ, ересектер үлгі көрсетіп, отбасында кітап оқу мәдениетін қалыптастыруы керек. Яғни алдымен ата-ана қолына кітап алуы тиіс. Бұл бір күнде болатын нәрсе емес. Бірақ аз-аздап, күнде көрсету арқылы баланы кітапқа баули аламыз. Тағы бір ескеретін жайт, бала оқитын кітабын өзі таңдауы тиіс. Ол үшін кітап дүкеніне немесе кітапханаға барған дұрыс. Кейін оқыған соң міндетті түрде мазмұнын сұраған жөн. Сондай-ақ Кассиль әдісін қолдануға болады. Яғни маңызды жерде тоқтатып қою. Мысалы телефонда ойнап отырды, сіз бір кезде оны алып қойдыңыз. Баланың ойыны қызық жерде үзіліп қалып, ол ойынан шықпайды. Сол сияқты кітапта да, қызықты жерін ертеңге қалдыру, сонда қызығушылығы арта түседі.- Бала жаңа оқу жылына дайын болып, демалып, күш жинап баруы үшін ата-аналарға қандай кеңес берер едіңіз?- Ең бастысы балаға еркіндік беріп, сүйікті ісімен айналысуға мүмкіндік жасау, ол бір хобби бола ма, далада ойнау ма – тыймау. Танымдық белсенділігін ата-ананың қолдауы. Егер тоғыз ай бойы уақыттың көп бөлігі оқуға арналса, ал демалуға, сүйікті іске бірнеше сағат қана бөлінсе, онда демалыс күндері уақыттың көп бөлігі сүйікті істерге арналуы керек. Жаз тез өте шығады. Сондықтан тамыздың соңғы күндерінде оқушының күн тәртібі біршама қатаңдатылуы тиіс. Ешқандай сылтаусыз барлығы: ұйқы, үй шаруасы, серуендеу және жазғы үй тапсырмасын орындау уақытында орындалуы қажет.&nbsp;Мұндайда ағза стрессіз мектептің күнделікті өміріне тез бейімделеді.&nbsp;Фото: Ашық дереккөз

Қазақстан және Қызылорда облысының жаңалықтары