<a href="https://kyzylorda-news.kz/ru/">Kyzylorda-news.kz.</a> Арал қаласындағы З.Шүкіров атындағы қалалық мәдениет үйінде Қазақстанның еңбек сіңірген қайраткері, Қазақстанның мәдениет қайраткері, «Құрмет» орденінің иегері, «Халық алғысы», «Еңбек даңқы» медальдарының иегері, Қазақстан Композиторлар одағының мүшесі, Арал ауданының құрметті азаматы, белгілі күйші-композитор, ақын Мұрат Сыдықов атындағы домбыра үйірмесі ашылды.
Салтанатты шарада алдымен өңірдегі өнердің атасына айналған күйші-композитор, ақын Мұрат Сыдықовтың өмір жолы, шығармашылығы, халқымыздың рухани байлығына қосылған әндері мен күйлері, тағылымды терме-толғаулары, өлең-жырлары көпшілікке таныстырылды. 
Үйірменің ашылу салтанатына Арал қаласының әкімі Ербол Талекенов қатысып, бүгінгі бастау алған игі шараның мән-маңызына тоқталып, жас өрендердің ұлттық өнерімізді асқақтата беруіне тілектестігін білдірді.
<blockquote>
 «Домбыра – қазақтың жаны. Халқымызбен ежелден жасасып келе жатқан аспап. Ата-бабамыздан біздерге қалған асыл мұра. Сондықтан да әрбір қазақтың төрінен орын алған. Домбыра үйренуші шәкірттің бойында ең бірінші ынта, талпыныс, сабырлық және төзімділік болуы керек»- деген Мұрат Сыдықыв үйірмеге алғаш қабылданған балаларға батасын беріп, домбыра аспабын табыстады.
</blockquote>
Одан соң аталған домбыра үйірмесінің жетекшісі Сержан Сәрсембаев қазақ күйінің көкжиегін кеңейткен «Мұраттың төкпесін» нақышына келтіре орындады.
Осылайша жаңа үйірменің лентасы қиылып, үйірмеге қабылданған жас домбырашыларға киелі аспапты шертудің қыр-сырын үйрету жұмыстары басталды.
<img src="https://kyzylorda-news.kz/wp-content/uploads/2022/07/293639188_3313329652328731_8838162555811302134_n.jpg" alt="" />

Белгілі күйші-композитор, ақын Мұрат Сыдықов атындағы домбыра үйірмесі ашылды

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев «Қазақстан барысы-2022» турнирінің жеңімпазы Мақсат Исағабылов пен «Алтайдай жер қайда?» атты халықаралық ақындар айтысының жүлдегері, үш дүркін «Алтын домбыра» иегері, айтыс өнерінің ақберені Мұхтар Ниязовты қабылдады.
Аймақ басшысы Сыр саңлақтарын және Мақсаттың бапкері, қазақ күресінен облыстың аға жаттықтырушысы Болатбек Кенеевті жеңісімен құттықтап,қос аймақ жұртының риясыз алғысын жеткізді.
<blockquote>
 «Әрбір жүрек түбінде жаңғырар алау сезім, ұлы күш болады. Ұлт даналығы «Ер – намысының құлы» деп бекер айтпаған. Осы ұлттық намыс бізді жеңіске жетелейді, қаһармандыққа бастайды. Бүгінгі бауырларымызды да осы қасиет оздырды. Әрине, ұшқыр да ұтқыр ұлдарымызды қалай ұлықтасақ та жарасымды. Өздеріңізге белгілі, биылғы жылдың мамыр айында мәдениет пен спорт саласы бірігіп, ірі құрылымға айналды. Ол – бірліктің белгісі, оның ерекшілігі – егіз. Сөзімнің дәлелі, Мақсат пен Мұхтардың үйлесімді жеңісі», – деді облыс әкімі.
</blockquote>
Басқосу барысында аймақ басшысы Мақсат Исағабыловқа 2 бөлмелі пәтердің кілтін табыстап, Мұхтар Ниязовқа ақ боз ат мінгізді.
Өз кезегінде қос саңлақ алғаусыз алғысын арнаған Сыр жұртына зор ризашылығын білдіріп, байрақты бәсекелер мен сөз аламанында аймақтың жүлде тайқазанына олжа салатынын жеткізді.

Аймақ басшысы дүбірлі дода жүлдегерлерін жеңісімен құттықтады

<a href="https://kyzylorda-news.kz/">Kyzylorda-news.kz.</a>&nbsp; Қaзaқтың ұлттық аспабы – дoмбыpaның мaңыздылығы epeкшe бағаланып, елімізде шiлдe айының aлғaшқы жeкceнбiсі «Ұлттық дoмбыpa күнi» болып белгіленді.
Атаулы мерекеге орай аудан орталығындағы демалыс саябағында домбыра үлгісіндегі символикалық белгінің ашылу рәсімі өтті.
<blockquote>
 «Қазақ халқымен сан ғасырдан бері егіздің сыңарындай қатар жасасқан асыл жәдігері ол – қасиетті қара домбыра. Атадан балаға аманат болған осындай асыл қазынамызды қадір тұту – бәріміздің қасиетті борышымыз. Жоралы жұртымыздың қатпар-қатпар тарихынан, асу да асу кезеңінен сыр шерткен күй-толғау, сыңғырлы сұлу ән-әуен құлағымыздан кетпесін! Әр шаңырақтан ән-күй үзілмесін! Домбыра күні мерекесі құтты болсын!» – деді мерекелік шараға қатысқан аудан әкімі С. Сермағамбетов.
</blockquote>
Шара барысында ұлы өнерді кейінгі ұрпаққа ұлықтау мақсатында аянбай еңбек етіп жүрген бірнеше белігілі күйлердің авторы, асыл мұраның жанашыры, күйші-композитор Мұрат Сыдықов пен күй қазынасын өскелең ұрпаққа мұра еткен күйші, 25-ке тарта күйді дүниеге әкелген – сазгер Жұмабай Жақып аудан әкімінің құттықтауымен марапатталып, қазақы дәстүрмен шапан жабылды.
Мерекелік жиынға арнайы келген Мәжіліс депутаты Геннадий Шиповских қазақ үшін қасиеті мол қара домбыра ұлықталған шараның маңызына тоқталып, өскелең ұрпақ үшін мәні зор игілікті іске куә болғандығына қуанышты екендігін жеткізіп, барша аралдықтарды мерекемен құттықтады. 
Одан соң, ҚР – ның Еңбек сіңірген қайраткері, ҚР ның мадениет қайраткері, Қазақстан композиторлар одағының мүшесі, «Құрмет» орденінің иегері, Арал ауданының «Құрметті азаматы», ақын – жырау, күйші – композитор Мұрат Сыдықов киелі аспаптың құдіреттілігін тарихта болған аңыз-әңгімелер арқылы жиналған жұртшылыққа мәлімдеді.
Ұлттық аспап айрықша ұлықталған тағылымды шарада «Мұраттың төкпесін» күй авторы нақышына келтіре орындаса, күйші-сазгер Жұмабай Жақып тартқан «Қара жорға» күйіне көпшілік ерекше ілтипат білдірді.
Сондай-ақ, сахна төрінде жас домбырашылар Құрманғазының «Балбырауын», «Ерке сылқым» «Адай» , Нұрғисаның «Әлқисса» күйлерін күмбірлетті.
Сонымен бірге мерекелік шарада жыршы-термешілер домбыраны әуелеген әндеріне арқау етіп, жиналған қауымға ерекше әсер сыйлады.
<img src="https://kyzylorda-news.kz/wp-content/uploads/2022/07/291918022_3306286269699736_3071074406139731176_n.jpg" alt="" />
<img src="https://kyzylorda-news.kz/wp-content/uploads/2022/07/291944514_3306286196366410_6260652010134406052_n.jpg" alt="" />
<img src="https://kyzylorda-news.kz/wp-content/uploads/2022/07/291958076_3306286649699698_6569743497893810501_n.jpg" alt="" />

Аралда домбыра үлгісіндегі символикалық белгі қойылды

Kyzylorda-news.kz. Маусым айының аяғынан бастау алған атаулы күнге арналған домбыра шерулері ауыл, аудандарда басталып кеше қалада өткізілді. Өңірдің барлық аудандарынан жиналған өнер саңлақтарының қатысуымен негізгі көпшілік шара Сырдың бас алаңында жалғасын тапты.
Қазақы дәстүрмен безендірілген сахнада облыстың белгілі өнер ұжымдары, жыршы-термешілер, домбыра шеберлері əн-күй төкті. Оркестрдің орындауымен күй атасы Құрманғазының “Сарыарқа” күйімен ашылған салтанатты шараға қатысқан облыстық Мәслихат хатшысы Наурызбай 
Байқадамов өз сөзінде рухани жаңғырудың нағыз үлгісі – домбыраны ұлықтау екенін, алғаш эпикалық дәстүр шеңберінде жыр, толғау, термелерді сүйемелдеуге қолданылған домбыра кейін аспаптық шығарма — күй жанрының қалыптасуына ықпал еткенін, ал жыр мен толғау, терме Сыр сүлейлерінен бастау алғанын айтты.
Мәдениет және спорт басқармасы ұйымдастырған концерт барысында облыстың өнер ұжымдары Түркештің “Көңілашар”, Әлшекейдің “Терісқақпай”, М.Сыдықовтың “Батыр баба”, “Күй-тартыс”, Ә.Райымбергеновтің “Секіртпе” күйлерін күмбірлетсе, әншілеріміз ұлттық музыкалық аспабымыз – домбыраны әуелеген әндеріне арқау етіп, домбыраның қос ішегіндей тартылған мың бұралған бишілер көрермендерге тамаша демалыс сыйлады.
Ұлттық саз өнерінің темірқазығына айналған Құрманғазы Сағырбайұлының күйімен бастау алған шара күйшінің “Махамбет” атты туындысымен қорытындыланды.
<img src="https://kyzylorda-news.kz/wp-content/uploads/2022/07/fb_img_1656827354325.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656827360870.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656827365214.jpg" alt="" />

Ұлттық домбыра күні Сыр бойында кең көлемде аталып өтуде

Kyzylorda-news.kz. Мемлекет басшысы Қасым-Жомарт Тоқаев қазақстандықтарды Ұлттық домбыра күнімен құттықтады, деп хабарлайды Ақорда.
***
Құрметті отандастар!
Баршаңызды Ұлттық домбыра күнімен шын жүректен құттықтаймын!
Бұл – еліміз үшін ерекше мейрам. Оны ел болып атап өту арқылы халқымыздың рухын көтеріп, танымын арттырамыз. Сондай-ақ, ұлы дала дәстүрлерін жас ұрпақтың санасына сіңіріп, төл өнеріміздің құдіретін танытамыз.
Шын мәнінде, қазақтың қара домбырасы – ұлтымыздың бойтұмары. Оның үні әрқайсымыздың жүрегімізге жақын. Өйткені, қазақ пен домбыра – бір-бірінен бөліп қарауға болмайтын егіз ұғым. Академик Ахмет Жұбанов «Домбыра – көшпелі елдің көнекөз шежіресі» деп бекер айтпаған. Қастерлі аспаптың қос ішегіне халқымыздың бүкіл болмысы сыйып тұр.
Сонау Кетбұғадан бері жалғасып келе жатқан дәулескер күйшілеріміздің мол мұрасы – баға жетпес рухани байлығымыз. Біз төл өнерімізді дәріптеу арқылы асыл құндылықтарымызды ұлықтай түсеміз.
Қазір Жаңа Қазақстанды құруға кірістік, ұлттың жаңа сапасын қалыптастыруды қолға алдық. Өркениетті ел болу үшін жаңа дәуірдің жақсы үрдістерін бойға сіңіру жеткіліксіз. Сонымен бірге, салтымызды сақтап, еңбекқорлық құндылықтарын кеңінен дәріптеп, бабалар жолын берік ұстанамыз.
Ендеше, жұртымызбен бірге домбыра да мәңгі жасайды. Күй өнері азаттық рухын ұрпақтан ұрпаққа жалғастырады.
Домбыра әр шаңырақтың төрінде тұрсын!
Еліміздің мерейі тасып, абыройы асқақтай берсін!

Мемлекет басшысы: Күй өнері азаттық рухын ұрпақтан ұрпаққа жалғастырады

Kyzylorda-news.kz. Қазақтың айтыс өнеріне қарымды олжа салып, халықтың ықыласына бөленіп жүрген жерлесіміз, үш дүркін «Алтын домбыра» иегері Мұхтар Ниязов Халықаралық ақындар айтысында жүлделі бірінші орынды иеленді.
Айтыс Шығыс Қазақстан облысының Қатонқарағай ауданы әкімшілігінің ұйымдастыруымен, Қатонқарағай ауданы кәсіпкерлері мен Толықпаевтар әулетінің демеушілігімен “Алтайдай жер қайда?” деген атаумен өтті. Ақынның айтулы жеңісі Сыр жұртшылығын бір серпілтіп тастады.
Ғасырдан ғасырға, атадан балаға, заманнан заманға ұласып келе жатқан асыл мұраны насихаттап, суырыпсалма ақындық дәстүрді дәріптеп, өз бойына біткен өнерге жас ақын-жыршыларды баулып жүрген Мұхтар Мәуленұлын жеңісімен құттықтаймыз!

Мұхтар Ниязов Халықаралық ақындар айтысында жеңіске жетті

<a href="https://kyzylorda-news.kz/">Kyzylorda-news.kz.</a> Домбыра – қазақтың киесі, қасиеті, көненің көзі, бабадан қалған асыл мирас. Қазақ пен домбыра егіз ұғым ғой! Халқымыздың қадір тұтып, төрге ілген киелі аспабының құрметіне өскелең ұрпақ санасына сіңіру мақсатында шілденің бірінші жексенбісі Ұлттық домбыра күнін болып айқындалды.
Домбыра – қазақ үшін жай ғана музыкалық аспап емес, одан әлдеқайда биік тұрған киелі құндылық. Ол Ұлы Даланың төсінде ерте заманнан бері халқымызбен бірге жасап келе жатыр. Бір кездері Майтөбенің тұсынан домбыраның суреті бар Таңбалы тас табылғанын бәріміз білеміз. Арал маңында домбыра ұстаған адамның мүсіні біздің дәуірімізден 4 ғасырдың мұрасы болыпты. Ал Алтайдан табылған ата домбыра біздің дәуірімізден 5 ғасырға тиесілі. Алтайдан Атырауға дейін бүкіл Қазақстанның даласы 4-5 мың жылдан бері осы домбыраның үнін естіп келе жатыр. Ол бар қазақтың бір екенін, қанымыздың да, жанымыздың да бір екенін дәлелдейтін көрініс.
«Кең даланы мекен еткен қазақ жұртының ең аяулы да қасиетті музыкалық аспабы домбыраның бірде күмбірлеген, бірде шертілген ойлы дыбысы құлаққа жағымды,жүрекке жақын, оның күмістей сыңғырлаған үні талай сырдың басын қайырады. Сымдай тартылған қос ішектен сан ғасырдың сан алуан сипаты ақыл-ойы, көңіл күйі жатыр. Домбыра – көшпелі елдің көнекөз шежіресі, көпті көрген қарияның көкірек күйі», – дейді Ахмет Жұбанов. Белгілі қазақ композиторының қанатты сөздері күмбірлеген қара домбыраның сан ғасырлық тарихын әспеттесе керек.
Қазіргі уақытта ұлттық аспаптың заманауи музыка ырғағымен үйлесімді үндесіп жатқанын назарға алсақ, домбыра ғұмыры әлі талай ғасыр жасайтынын аңғаруға болар. Ұлттық руханиятымызды дәріптейтін мереке домбыраның мәртебесін биікке көтере берсін!
Айтжан Оразбақов 
Облыстық ҚХА жанындағы ғылыми-сарапшылық тобының жетекшісі
<img src="https://kyzylorda-news.kz/wp-content/uploads/2022/07/291149434_3245800382405786_1581461978130287546_n.jpg" alt="" />

Домбыра – көшпелі елдің көнекөз шежіресі

<a href="https://kyzylorda-news.kz/">Kyzylorda-news.kz.</a>&nbsp;Жалағаш ауданында Ұлттық домбыра күніне орай «Домбыра – дастан» атты мерекелік концерт өтті. Салтанатты шараға аудан тұрғындары мен қонақтары, ардагерлер және БАҚ өкілдері қатысты.
Шарада аудан әкімі Асқарбек Есжанов сөз сөйлеп «Ұлттық домбыра күні» мерекесімен құттықтады.
<blockquote>
 «Домбыра – қазақ халқы үшін жай ғана музыкалық аспап емес, ол күнделікті барлық тұрмыс-тіршілігімізден биік тұрған киелі құндылық. Қазақтың сал-серісі үкілі домбырасын қолға алып, елге шыққанда халық оларды төредей күтіп, төбесіне көтерген. Ата-бабаларымыз үкілі домбыраны қастерлеп төрге ілген. Бабаларымыздан қалған осы бір игі дәстүр қазір де жалғасып келеді. Қазақтың кез-келген отбасында киелі домбыра шаңыраққа сән беріп, төрінде ілулі тұр», – деді аудан басшысы.
</blockquote>
Бірқатар сала қызметкерлері мәдениет саласының үздігі төсбелгісімен, аудан әкімінің «Алғыс хатымен»марапатталды.
Шара соңы Қ.Қазантаев атындағы аудандық Мәдениет үйінің көркемөнерпаздарының концерттік бағдарламасына ұласты.
<img src="https://kyzylorda-news.kz/wp-content/uploads/2022/07/291111455_1484750628643677_6849743169709278494_n.jpg" alt="" />
<img src="https://kyzylorda-news.kz/wp-content/uploads/2022/07/291519404_1484750651977008_8695269388665423950_n.jpg" alt="" />
<img src="https://kyzylorda-news.kz/wp-content/uploads/2022/07/291655462_1484750668643673_1121017644927348266_n.jpg" alt="" />

Жалағашта Ұлттық домбыра күні аталып өтті

<a href="https://kyzylorda-news.kz/">Kyzylorda-news.kz.</a>&nbsp; Сыр елінің төрінде Қазақстан Жазушылар және Журналистер одағының мүшесі, ҚР Ақпарат саласының үздігі, ақын Дүйсенбек Аяшұлының 60 жасқа толу мерейтойына арналған «Өлең-жырдың жүйрігі» атты шығармашылық кеш өтті.
Қаламгерді облыс әкімінің орынбасары Сақтағанов Нұрымбет Аманұлы құттықтап, облыс әкімінің Құттықтау хатын табыстады. Ізгі тілегін арнап, мерейгердің иығына шапан жауып, құрмет көрсетті. 
Сонымен қатар, жазушы, драматург, филология ғылымдарының кандидаты, Қазақстан Республикасының еңбек сіңірген қайраткері Жолтай Әлмаш, жыршы, этномузыкатанушы, фольклорист, «Дарын» Мемлекеттік сыйлығының лауреаты, «Құрмет» орденінің иегері Берік Жүсіпов, Қазақстан Жазушылар одағының мүшесі, Жарасқан Әбдірашев атындағы әдеби сыйлықтың лауреаты Толыбай Абылаевтар арнайы құттықтады.
Кеш барысында «Жұлдызым жоғары» кітабының тұсаукесер рәсімі өтіп, ақынның сөзіне жазылған “Жүрек сөзі”, “Ғашығым”, “Ана құдіреті”, “Байқоңыр”, “Шиелі”, “Нұр-Астана” әндері шырқалды. Дүйсенбек Аяшұлының “Дарияның өткелінде” өлеңіне қойылған бейнеқойылымда туған жер, өскен өлке алдындағы перзенттік қарыз бен парызды түйістірген Ботабайдағы балалық шағы көрсетілді. Ақының ардақтаған әлеумет мерейтой иесінің өлеңдерін көрермендер залына қойылған микрофондарға келіп, жатқа оқып, ақынның ізін жалғаған жас ақындар Ұлықбек Тәңірберген мен Айдар Сайлауов өз арнауларын оқыды. Сондай-ақ, қалалық жастар театры “Бір өлең жазғым келеді” атты контрастивтік қойылым қойып, көрерменнің айрықша ықыласына бөленді.
Дүйсенбек Аяшұлының отты жырлары мен парасатты поэзиясы қазақ әдебиетінің құнды мұрасына өлшеусіз үлес қосып келеді.
<img src="https://kyzylorda-news.kz/wp-content/uploads/2022/06/290797682_333176849003566_1594268082430126606_n.jpg" alt="" />

Ақын Дүйсенбек Аяшұлының мерейтойына арналған шығармашылық кеш өтті

<a href="https://kyzylorda-news.kz/">Kyzylorda-news.kz.</a> Қызылордағы Назарбаев Зияткерлік мектебінде «Туған елге тағзым» өлкетану-зерттеу экспедициясы мәресіне жетті. Алты күн бойы мектептің 9-сынып оқушылары Сыр өлкесіне саяхаттап, туған жердің ғажайыптарымен танысты.
Сырдария өзенінің бойында орналасқан үш көне мемлекет – Қыпшақ хандығының астанасы – Сығанақ, Оғыздардың мекені – Янгикент және Қоқан ханы салғызған Ақмешіт бекінісінің қалыптасу кезеңдерін көзбен көру үшін қатысушылар экспедицияның әрбір күнінде жүздеген шақырым жерді жүріп өтті.
Бағдарлама бойынша Қызылорда облысының Қазалы, Қармақшы, Шиелі және Сырдария аудандарына саяхаттар ұйымдастырылып, сол жердегі тарихи нысандармен және киелі орындармен таныстырылды. Жас зерттеушілер құнды деректерден сыр шертетін аймақтарды аралап, болашақ зерттеу жұмыстарына қажетті тың мәліметтерді жинақтады.
Экпедицияның алғашқы күні – Қазалы ауданының тарихи-өлкетану музейінен басталды. Оқушылар аудан тарихын бейнелейтін залдарда болып, көне жәдігерлерді тамашалады. Қоқандарға қарсы тұрып, ұлт-азаттық көтерілісінің қолбасшысы болған Жанқожа батырға арналған кесенесіне барып, тұлғаның өмірі туралы құнды деректерден танымдық-тәрбиелік білім алды. Содан соң елдік мұрат жолында ерлігімен танылған Ғани Мұратбаевтың мемориалдық музейіне экскурсия жасады. Жарты ғасырға жуық тарихы бар орталықта оқушылар қоғам қайраткерінің балалық шағынан бастап, оның білім алған кезеңдері, қоғамдық істерге атсалысу жолындағы атқарған жұмыстары жайлы тың мәліметтер жинақтады.
<blockquote>
 «23 жыл ғана өмір сүрген Ғани Мұратбаевтың жастардың болашағы үшін жасаған ерен еңбегіне тәнті болдым. Әсіресе ата-анасыз қалған балалардың білім алуы үшін интернат үйіне жатқызып, қоғамдық істерге араласуына дейін қолдау жасаған еңбегімен елдің ерекше құрметіне ие болған. Бүкіл қазақ жастарының басын қосып, қоғамдық-саяси істерге араласуына себепкер болған тұлға Ғани ағамыздың Сыр өңірінен шыққаны мақтаныш сезімін оятты», – дейді жас экспедицияшы Айхан Орынбай.
</blockquote>
«Рухани жаңғыру» жолымен жас өрендер кезінде Хиуа мен Қоқан саудагерлері қоныстанған Ғанибайдың керуен сарайында, одан кейін кітапханаға айналған мәдени ескерткіште болып, атақты саяхатшы Семенов-Тян-Шанский сыйға тартқан кітаптармен танысты.
VII ғасырда өмір сүрген тұтас түркі халқының ардақ тұтар абызы – Қорқыт бабаның кешені де экспедициялық топтың ерекше назарына ілікті. Дала данагөйінің өмірі мен тіршілігін бейнелейтін қасиетті ескерткішті аралап, сан ғасырлық тарихқа көз жүгіртті. Оқушылар 12 метрлік қобыз тәрізді ерекше құрылысты тамашалап, соққан желге үн қосатын қобызда орындалатын әдемі әуенді тыңдап, мәңгілік өмір өнерде ғана болады деген философияны әкелген Қорқыт жайлы қызықты деректермен танысты.
<blockquote>
 «Бұл сиқырлы әуенді естігенде, өзінің сүйікті аспабы – қобызда Қорқыттың ойнап тұрған сәті көз алдымызға шығады және бұл сазды дыбыс келушілерге ерекше әсер қалдырады», – дейді 9-сынып оқушысы Сырсұңқар Базарбайұлы.
</blockquote>
Мемориалдық кешенде орналасқан мұражайдағы экспонаттар арқылы жас зерттеушілер Қорқыт бабаның дәуіріне қайта оралды.
ТЕТ маршруты бойынша жас зерттеушілер бірнеше ғасырлар бұрын тасқа салынған таңбалы суреттер сақталған Сауысқандық шатқалында болды. Мұндағы тас дәуірінен қалған «сурет галлереясы» Қазақстан жерінде табылған ең көне тарихи ескерткіш. Оқушылар тау жоталарының түзілістері мен топырағына зерттеу жүргізіп, ежелгі адамдардың мәдениетін бейнелейтін ескерткіштердің сырына қанықты.
<blockquote>
 «Антропогенді, техногенді және табиғи факторлар петроглифтердің жойлуына әсер етуде. Сондай-ақ шатқалының қасында орналасқан ванадий өндіру процесі де кері әсерін тигіуде. Сондықтан тез арада жойылудан қорғау кешенді шараларын қолдану қажет» , – дейді экспедицияның қатысушысы Уәлихан Ибадулла.
</blockquote>
Әрі қарай топ мүшелері көне тарихтың теңдессіз ескерткіші, ортағасырлық Сауран қалашығына табан тіреді. Ақ орданың астанасы болған Ұлы жібек жолындағы ірі сауда орталығы ретінде тарихта сақталған. Жас экпедицияшылар қалашық орында қираған қамалдан қалған үйінділерді зерттеп, шахардың архитектурасымен танысты.
Сонымен бірге оқушылар Қазақстанның ең көрікті әрі абаттандырылған ауыл – Нағи Ілясов елді-мекенінде болып, өркендеген ауыл халқының әлеуметтік-экономикалық жағдайымен танысып, ауыл орталығындағы су бұрқақтарды тамашалады. Ал Қызылорда облысының орталығында оқушылар әртүрлі салалардағы зауыттарға барып, өңірдің өндірістік-экономикалық дамуы жайлы деректер жинады.
Облыстық тарихи-өлкетану мұражайы, «Ақмешіт» музейі, «Көркем сурет галлереясы», «Рухани жаңғыру» орталықтарында орналасқан тарихи жәдігерлер қатысушылардың білімдерін толықтырып, туған жеріне деген құрмет сезімдерін оятты.
<blockquote>
 «Ежелден Сыр өлкесі тарихи мекен екенін дәлелдейтін бұл жобада оқушылар Отанға деген сүйіспеншіліктерін арттырып қана қоймай, ғылымға бет бұрып, зерттеушілік дағдыларын дамытты», – дейді экспедициялық топ жетекшісі, қазақ тілі мен әдебиеті пәнінің мұғалімі Гаухар Мананбай.
</blockquote>
<img src="https://kyzylorda-news.kz/wp-content/uploads/2022/06/290613687_3127354184261161_8255069535397541632_n.jpg" alt="" />
<img src="https://kyzylorda-news.kz/wp-content/uploads/2022/06/290905830_3127354090927837_6687324184742456900_n.jpg" alt="" />

«Туған елге тағзым» өлкетану-зерттеу экспедициясы мәресіне жетті

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткелік мектебінің оқушылары үшін «Туған елге тағзым» өлкетану-зерттеу экспедициясы Қазалы ауданынан бастау алды.
Экпедицияның алғашқы күні – Қазалы ауданының тарихи-өлкетану музейінен басталды. Оқушылар аудан тарихын бейнелейтін залдарды аралап, көне жәдігерлерді тамашалады.
Қоқандарға қарсы тұрып, ұлт-азаттық көтерілісінің қолбасшысы болған Жанқожа батырға арналған кесенесіне барып, ата-бабаның рухына құран бағыштады. Қазақ халқының жадында өшпес із қалдырған тарихи тұлғаның өмірі туралы құнды деректермен танысып, жасаған ерліктері жайында танымдық-тәрбиелік білім алды.
Содан соң елдік мұрат жолында ерлігімен танылған Ғани Мұратбаевтың мемориалдық музейіне экскурсия жасады. Жарты ғасырға жуық тарихы бар орталықта оқушылар қоғам қайраткерінің балалық шағынан бастап, оның білім алған кезеңдері, қоғамдық істерге атсалысу жолындағы атқарған жұмыстары жайлы экпозициялық залдарда болып, теңдесі жоқ құжаттар, хаттар мен фотосуреттерден зерттеуге қажет тың мәліметтер жинады.
<blockquote>
 Жас экспедицияшы Орынбай Айхан: «23 жыл ғана өмір сүрген Ғани Мұратбаевтың жастардың болашағы үшін жасаған ерен еңбегіне тәнті болдым. Әсіресе ата-анасыз қалған балалардың білім алуы үшін интернат үйіне жатқызып, қоғамдық істерге араласуына дейін қолдау жасағанынан елдің ерекше құрметке ие болуының себебін түсіндім. Бүкіл қазақ жастарының басын қосып, қоғамдық-саяси істерге араласуына себепкер болған тұлға Ғани ағамыздың Сыр өңірінен шыққаны мақтаныш сезімін оятты», – дейді.
</blockquote>
«Рухани жаңғыру» жолымен жас экспедицияшылар кезінде Хиуа мен Қоқан саудагерлері қоныстанған Ғанибайдың керуен сарайында, одан кейін кітапханаға айналған мәдени ескерткіште болып, атақты саяхатшы Семенов-Тян-Шанский сыйға тартқан кітаптарымен танысты. Сыр өңіріндегі мәдени-рухани мұралардың тарихымен танысты.
<blockquote>
 «Маған ерекше әсер қалдырған ең құнды ақпарат – ол өңіріміздегі ең алғашқы кітапхана. Бұл жерде кітаптардың алтын қоры сақталған. Ең алғашқы кітап 1914 жылы славян тілінде жазылған. Өзге ұлттардың өзі біздің тарихымызды зерттеген, сондықтан біз туған еліміздің тарихын терең білуіміз қажет»,– дейді экспедицияға қатысушы Жауhар Бекберген.
</blockquote>
<img src="https://kyzylorda-news.kz/wp-content/uploads/2022/06/9484ced1-b677-4717-85cf-01baf80a6555.jpg" alt="" />
<img src="https://kyzylorda-news.kz/wp-content/uploads/2022/06/6c7f272b-b229-4719-9dd8-345b1f723896.jpg" alt="" />

ТЕТ-2022: Сыр өңіріндегі алғашқы кітапхана

<a href="https://kyzylorda-news.kz/">Kyzylorda-news.kz.</a> Қармақшы ауданы «Қорқыт ата» мемориалдық кешенінде «Мәдениетті ана – мәдениетті ұлт» республикалық жобасы аясында «Ана мен бала денсаулығы – ұлт болашағы» атты фестиваль өтті.
Облыстық ҚХА жанындағы Аналар кеңесінің төрайымы Рахима Ахметованың айтуынша, қазақстандық әйелдерді қолдау және дамыту жобасы Қазақстан халқы Ассамблеясының республикалық Аналар кеңесінің отырысында бастау алған.
Спикер жобаның міндеттері мен бағыттары туралы егжей-тегжейлі айтып берді. Атап айтқанда, қоғамдағы ананың рөлін, отбасы және отбасылық құндылықтар институтының маңыздылығын арттыру, сондай-ақ жастарды рухани-адамгершілік және патриоттық тәрбиелеуде ата-аналардың рөлін күшейту.
Фестивальге облыстық Іскер әйелдер қауымдастығының төрайымы, облыстық мәслихат депутаты Манат Алмашева, «Қазпошта» АҚ облыстық филиалының директоры, облыстық мәслихат депутаты, аналар кеңесінің мүшесі Аида Әбибуллаева қатысты.
Жоба аясында аудандағы сегіз әйел алғыс хаттармен марапатталды. Соңында қатысушылар мұражайдың жұмысымен танысты.
<img src="https://kyzylorda-news.kz/wp-content/uploads/2022/06/289391116_326559712998613_46738425198709310_n.jpg" alt="" />

Қазақстан және Қызылорда облысының жаңалықтары: Мәдениет

Белгілі күйші-композитор, ақын Мұрат Сыдықов атындағы домбыра үйірмесі ашылды

Аймақ басшысы дүбірлі дода жүлдегерлерін жеңісімен құттықтады

Аралда домбыра үлгісіндегі символикалық белгі қойылды

Ұлттық домбыра күні Сыр бойында кең көлемде аталып өтуде

Мемлекет басшысы: Күй өнері азаттық рухын ұрпақтан ұрпаққа жалғастырады

Мұхтар Ниязов Халықаралық ақындар айтысында жеңіске жетті

Домбыра – көшпелі елдің көнекөз шежіресі

Жалағашта Ұлттық домбыра күні аталып өтті

Ақын Дүйсенбек Аяшұлының мерейтойына арналған шығармашылық кеш өтті

«Туған елге тағзым» өлкетану-зерттеу экспедициясы мәресіне жетті

ТЕТ-2022: Сыр өңіріндегі алғашқы кітапхана

Қармақшыда «Ана мен бала денсаулығы – ұлт болашағы» атты фестиваль өтті

Қазақстан және Қызылорда облысының жаңалықтары: Мәдениет

Белгілі күйші-композитор, ақын Мұрат Сыдықов атындағы домбыра үйірмесі ашылды

Аймақ басшысы дүбірлі дода жүлдегерлерін жеңісімен құттықтады

Аралда домбыра үлгісіндегі символикалық белгі қойылды

Ұлттық домбыра күні Сыр бойында кең көлемде аталып өтуде

Мемлекет басшысы: Күй өнері азаттық рухын ұрпақтан ұрпаққа жалғастырады

Мұхтар Ниязов Халықаралық ақындар айтысында жеңіске жетті

Домбыра – көшпелі елдің көнекөз шежіресі

Жалағашта Ұлттық домбыра күні аталып өтті

Ақын Дүйсенбек Аяшұлының мерейтойына арналған шығармашылық кеш өтті

«Туған елге тағзым» өлкетану-зерттеу экспедициясы мәресіне жетті

ТЕТ-2022: Сыр өңіріндегі алғашқы кітапхана

Қармақшыда «Ана мен бала денсаулығы &#8211; ұлт болашағы» атты фестиваль өтті

Қармақшыда «Ана мен бала денсаулығы – ұлт болашағы» атты фестиваль өтті