<a href="https://kyzylorda-news.kz/">Kyzylorda-news.kz</a> Биыл Қызылорда қаласының ел астанасы болғанына 100 жыл толып отыр. Айтулы мерекеге орай, өңірімізде ауқымды шаралар ұйымдастырылуда.Бірнеше күннен бері мереке аясында Қызылорда қаласында «Тарихтың таңбасы – рухтың ордасы – Қызылордам»облыстық өнер байқауы өтуде. Бұған дейін облыс орталығында Жаңақорған, Жалағаш, Шиелі аудандарының өнерпаздары концерттік бағдарламасын ұсынса, бүгін Қызылорда қаласының тұрғындары мен қонақтары қазалылық өнерпаздардың өнер кешін тамашалады.Қазалылық өнерпаздардың мерекелік өнер кешін аудан әкімінің орынбасары Дәурен Тлеумбетов сөз сөйлеп ашып, өнерпаздарға сәттілік тіледі. Өнер байқауында ән әлемінің падишасы атанған Роза Бағланова, Мәдина Ералиева мен Кеңес Дүйсекеев шыққан киелі өнер қонған өңірдің өнерпаздары қызылордалықтарға ерекше мерекелік кеш сыйлады.Өнер кешінде орталық алаңда қазалылық қолөнершілердің арнайы көрмесі де ұйымдастырылып, онда Қазалы да жасалатын өнімдер де қойылды.<img src="https://knadmin.beoblood.kz/uploads/azalyly_nerpazdardy_tartuy_1_0e72b8d2d7.jpg" alt="Қазалылық өнерпаздардың тартуы 1.jpg">Фото: Қазалы ауданы

Қазалылық өнерпаздардың тартуы

<a href="https://kyzylorda-news.kz/">Kyzylorda-news.kz</a> Қызылорда қаласының астана атанғанына биыл 100 жыл толып отыр. Осы тарихи мерекеге орай «Тарихтың таңбасы, рухтың ордасы – Қызылордам» атты облыстық өнер байқауы аясында жырдың киесі қонған Қармақшы ауданының өнерпаздары қала жұртшылығына ерекше мерекелік тарту жасады.Қаланың орталық алаңында өткен ауқымды мәдени шарада жыраулық өнердің алтын бесігі саналатын Қармақшы топырағының төл өнері мен тарихи-мәдени мұрасы кеңінен насихатталды. Аудан қолөнершілері ұлттық нақыштағы бұйымдарын көпшілік назарына ұсынып, дәстүр мен заманауи стильдің үйлесімін таба білген қолөнер туындылары көрмеге қойылды.Шара шымылдығы Қармақшының жыраулық тарихынан сыр шертетін театрландырылған көрініспен ашылды. Қобыздың күңіренген үні мен жыршының шынайы сөзі көрерменді терең әсерге бөлеп, сахна рухани кеңістікке айналды.Мерекелік кешке «AMANAT» партиясы Қызылорда облыстық филиалының төрағасы Алмасбек Есмаханов, Қазақстанның өнер қайраткері, Қармақшы ауданының құрметті азаматы, ақын Серік Ыдырысов, Қармақшы ауданы әкімінің орынбасары Самат Смағұлов арнайы қатысып, Сыр елінің айтулы мерекесімен құттықтап, аудан өнерпаздарына өз алғыстарын білдірді.Сахна төрінде «Қорқыт» домбырашылар ансамблі, «Ақ Әжелер», «Айқаракөз» топтары, сондай-ақ ауданның жас әншілері мен бишілері өнер көрсетіп, көрерменнің ыстық ықыласына бөленді. Терме мен толғау, ән мен күй арқылы ата-баба аманаты ұлықталып, Сыр еліне тән рух пен сырлы сарын көрініс тапты.Кеш мазмұны тек сахналық қойылым мен дәстүрлі өнерімен ғана шектелмей, көңілді кештің шырайын ашқан Қармақшының жайдарманшылары да сахнаға көтеріліп, ұлттық болмысқа негізделген тапқыр әзілдерімен көрермен көңілін серпілтті. Жастардың шынайы тапқырлығы мен сахна мәдениеті көпшілік тарапынан ерекше қошеметке ие болды.Қармақшы ауданының өнер ұжымы Қызылорда қаласының ғасырлық торқалы тойына орай рухани тереңдікке, тарихи тағылым мен шынайы қуанышқа толы мазмұнды концерттік бағдарлама ұсынды. Жыр мен күлкі, күй мен көркем бейне тоғысқан бұл кеш қала тұрғындары мен қонақтарына ерекше рухани серпін сыйлады.<img src="https://knadmin.beoblood.kz/uploads/Zhyraular_zheri_arma_shydan_yzylorda_zh_rtshyly_yna_ruhani_tartu_1_cbf552228b.jpg" alt="Жыраулар жері – Қармақшыдан Қызылорда жұртшылығына рухани тарту 1.jpg"><img src="https://knadmin.beoblood.kz/uploads/Zhyraular_zheri_arma_shydan_yzylorda_zh_rtshyly_yna_ruhani_tartu_2_9edf0ebcfb.jpg" alt="Жыраулар жері – Қармақшыдан Қызылорда жұртшылығына рухани тарту 2.jpg">

Жыраулар жері – Қармақшыдан Қызылорда жұртшылығына рухани тарту

<a href="https://kyzylorda-news.kz/">Kyzylorda-news.kz</a> «Қаламгерлер» аллеясында БАҚ өкілдерінің мерейлі мерекесіне арналған салтанатты шара өтті.Сыр бойы әдебиетінің үш алыбы ескерткішінің жанына жиылған қаламгерлер ең әуелі жергілікті өнерпаздардың тартуын тамашалады.«Елдiң алдында тұрған саяси, экономикалық және әлеуметтiк мiндеттердi табысты орындау көп жағдайда қоғамның әлеуметтiк белсендiлiгiне байланысты, ал оған ықпал етуде бұқаралық ақпарат құралдарының қызметі орасан. Осы ретте, ұлтты бірлікке ұйыстырып, ел ертеңі үшін барлық бастамаларға белсене қатысқан үлестеріңіз үшін Сіздерге алғыс айтамыз!», - деген қала әкімінің орынбасары Бақытжан Омаров журналистердің қоғамдағы орны мен халық жүрегіндегі беделі туралы тілге тиек етіп, айшықты мерекемен құттықтады.Содан соң шаһардың тыныс-тіршілігін, өзекті мәселелері мен жарқын жетістіктерін ақпараттандырып, халық пен билік арасында алтын көпір бола білген бірқатар сала үздіктеріне қала әкімінің арнайы алғыс хаты мен сыйын табыстады. Сондай-ақ, Қызылорда қаласының құрметті азаматы, Қазақстан Журналистер одағының мүшесі, бірнеше кітаптың авторы Жүзбай Ибрагимұлының мерейлі 75 жасқа толуына орай кәде-құрмет көрсетілсе, ақын, белгілі журналист, Қазақстан Жазушылар және Журналистер одағының мүшесі Дүйсенбек Аяшұлы Қызылорда қаласының ең жоғарғы марапаты «Құрмет грамотасымен» марапатталды.Ұлт мақтанышы Шерхан Мұртаза айтқандай, «Арқалағаны алтын, жегені жантақ» сала өкілдерінің қадірін арттыру бағытында мереке қарсаңында көптеген мәні мен маңызы жоғары іс-шаралар ұйымдастырылды. Сала қызметкерлері бильярдтан, журналист қыздар боулингтен сайысқа түсіп, мереке көрігін қыздырды. Ұшқыр қалам иелеріне көрсетілер құрмет толастамақ емес.

Қаламгерлерге құрмет көрсетті

<a href="https://kyzylorda-news.kz/">Kyzylorda-news.kz</a> Достық үйінде Мәдениет және Ақпарат вице-министрі Айбек Сыдықов Сыр жұртшылығымен кездесті. Жиынды облыс әкімінің орынбасары Шахмардан Байманов ашып, қонақтарға сәттілік тілеп, халықпен ашық әрі мазмұнды диалог болуына тілектестік білдірді.Айбек Сыдықов Сыр елі - тарихы терең, рухани мұрасы бай, қазақ мәдениетінде айрықша орны бар өңір екенін атап өтті.<blockquote>- Мемлекет басшысының тапсырмасына сәйкес, халықпен жүздесіп, елді толғандырған мәселелерді бірге талқылап жүрміз. Сыр елі - тарихы терең, мәдениеті бай, рухани қазынасы мол өлке. Бұл жерде халқымызға еңбегі сіңген талай тұлғалар шыққан. Жалпы, Мәдениет және Ақпарат министрлігі мәдениет, ақпарат, жастар және отбасы салаларын дамыту бойынша жүйелі жұмыстар атқаруда. Жаңа мәдени нысандар салынып, ескі нысандар жөнделуде. Архивтер мен музейлер цифрландырылып, ұлттық мұраларымыз ЮНЕСКО тізіміне енгізіліп жатыр. Ақпараттық саясат та күшейіп келеді. Биыл жаңа “Масс медиа” заңы қабылданды. Бұл заң журналистердің мәртебесін арттыруға және отандық медианы қолдауға бағытталған. Жастар саясаты мен отбасылық құндылықтарды нығайту - біздің басты басымдықтарымыздың бірі. Жастарды жұмысқа орналастыру, баспанамен қамту және олардың идеяларын қолдау үшін көптеген жобалар іске асуда,-деді Айбек Жексенәліұлы.</blockquote>Кездесу барысында тұрғындар көкейде жүрген сұрақтарын қойып, вице-министр тарапынан нақты жауап алды.Кездесу соңында ҚР Президенті жанындағы Орталық коммуникациялар қызметінің директоры Асқар Омаровтың арнайы Алғыс хаты Өңірлік коммуникациялар қызметінің қызметкерлері Жәния Төребекова, Каюп Мұхаммедшах, Жадыра Серікқалиева және Нұрбек Рахымбаевқа табысталды. Сондай-ақ, облыс әкімінің орынбасары Шахмардан Баймановтың Алғыс хатына Рахман Динар мен Смағұлова Несібелі ие болды.28 маусым - Бұқаралық ақпарат құралдары қызметкерлері күні мерекесі қарсаңында әріптестеріміздің еңбегі еленіп, марапат төрінен көрінуі - сала мамандарына көрсетілген үлкен құрмет.

Мәдениет және Ақпарат вице-министрі Сыр жұртшылығымен кездесті 

<a href="https://kyzylorda-news.kz/">Kyzylorda-news.kz</a> &nbsp;Бала күннен кітап оқуды әдетке айналдырдым. Оның бірі – Абай Құнанбайұлының шығармалары. «Абай жолын» оқып өстік. Абайдың қара сөздерін жадымызға тоқыдық. Ұлы ақынды үлгі еттік. Абай салған сара жолды жалғап келе жатқан ұрпақ үшін Абай – тау тұлға.«Адамзаттың бәрін сүй бауырым деп...». Бұл – Абайдың мәңгі жасайтын қағидасы.Абай - ақын, ағартушы, жазба қазақ әдебиетінің, қазақ әдеби тілінің негізін қалаушы, философ, композитор, аудармашы, саяси қайраткер, либералды білімді исламға таяна отырып, орыс және еуропа мәдениетімен жақындасу арқылы қазақ мәдениетін жаңартуды көздеген реформатор.Абай ақындық шығармаларында қазақ халқының әлеуметтік, қоғамдық, моральдық мәселелерін арқау еткен. Абай Шығыс пен Батыс мәдениеті мен өркениетін жетік білген. Бірқатар әлем ойшылдарының еңбектерімен жақсы таныс болған.Болашақ ақынның дүниеге көзқарасының қалыптасуына оның озық ойлы орыс зиялы қауымының өкілдерімен араласуы орасан зор ықпал етті.Абай – ұлы ақын әрі ойшыл. Ол өз төңірегіндегі адамдардың, жақындары мен шәкірттерінің бойындағы өз халқына риясыз берілгендікті, оның мүдделерін қорғау қасиеттерін қолдап отырды.Ұлы ақын жас ұрпақты имандылыққа, адамгершілікке, ғылым-білім үйренуге шақырды.Жастарды бес нәрседен – өсектен, өтіріктен, мақтаншақтықтан, еріншектіктен, бекер мал шашпақтықтан қашық болуға, бес асыл іске – талап етуге, еңбекті сүюге, терең ойлай білуге, қанағатшыл болуға, қайырымды рақымшылық жасауга шақырды.Абай жастардың бойындағы кеселді кемістіктерді, арсыздық пен ұятсыздықты, дөрекі надандықты тәрбие және білім беру арқылы жоюға үндеді.А.ЫсқақоваҚызылорда облысының мамандандырылған&nbsp;ауданаралық әкімшілік сотының бас маман,&nbsp;&nbsp;сот отырысының хатшысы&nbsp;Фото: adebiportal.kz

Абай – ұлы тұлға

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен Бұқаралық ақпарат құралдары қызметкерлері күніне арналған «Қанатты қалам – 2025» &nbsp;салтанатты шарасы өтті. Басқосуға Мәдениет және ақпарат вице-министрі Айбек Сыдықов, өңірдің БАҚ саласы мен зиялы қауым өкілдері, құқық қорғау және жауапты сала басшылары қатысты.Аймақ басшысы журналистерді кәсіби мерекемен құттықтап, өңірдегі бастамалар мен жаңашылдықтарды халыққа жеткізудегі қаламгерлер рөліне тоқталды.<blockquote>«Бүгінгі мереке - мерзімді басылымдар мен телеарналарда, ақпараттық агенттіктер мен сайттарда қызмет жасайтын шығармашылық өкілдерінің, журналист жасаған сюжет пен жазған мақаланың техникалық, көркемдік тұрғыдан толыққанды жарыққа шығуына еңбек сіңіретін оператор, дизайнер, режиссер, инженерлердің мерейлі күні.Сіздер жаңа бетбұрыстар кезеңінде қоғам мен биліктің арасында алтын көпір болып, жұртшылыққа реформалардың маңыздылығын жеткізуде жауапты міндет атқарып келесіздер.Мереке қарсаңында Президентіміз Қасым-Жомарт Кемелұлы Бұқаралық ақпарат құралдарының бір топ қызметкерлерін Ақорда төрінде қабылдап, мемлекеттік наградалар табыстады. Салтанатты қабылдауда жерлесіміз, ақпарат саласында аянбай еңбек етіп жүрген «Qyzylorda» телеарнасының директоры Әмиша Нұрбек Шынтемірұлы «Ерен еңбегі үшін» медалімен наградталды. Бұл - Сыр журналистикасының бүгінгі беталысына берілген жоғары баға.&nbsp;Мемлекет басшымыз бірлік пен берекенің, өнер мен мәдениеттің құтты ұясы болған Сыр өңірін алтын бесікке теңеп, айрықша бағасын берген еді.&nbsp;Осыдан 100 жыл бұрын Қызылорда еліміздің тұңғыш астанасы болған тұста әлеуметтің рухани өмірінде ерекше серпіліс жасалды. Тарихи кезеңде республикалық мерзімді басылымдардың барлығы көшірілді. Ұлттық сөз өнерінің майталмандары, Алаш зиялылары Сәкен Сейфуллин, Бейімбет Майлин, Жүсіпбек Аймауытов, Сәбит Мұқанов журналистік шеберліктерін шыңдап, халыққа ақпарат тарату ісіне белсене қатысты.&nbsp;«Алаштың анасы» атанған қасиетті Сыр өңірінің ұлттық журналистика тарихында айрықша орны бар. Қазақ тарихындағы маңызды оқиғалар Қызылорда – ұлт баспасөзі мен журналистикасының рухани астанасы екенін айқын дәлелдейді. Тарихи сәттердің куәсі болған ардагерлеріміз бүгінде ортамызда. «Сыр бойымен» бірге сырласындай өмір сүріп келе жатқан Қазақстанның құрметті журналистері – Шәкірат Дәрмағанбетов, Қайырбек Мырзахметов ағаларымыз бен Рысты Бекбергенова апамыз мерейлі 90 жастың үстіне шықты. Осы газеттерден шыққан шығармашылық өкілдері елімізге танылып, қазақ әдебиетінде өзіндік ізін қалдырды. Олар: Асқар Тоқмағанбетов, Жақсылық Түменбай, Тынымбай Нұрмағанбетов, Әскербек Рахымбеков, Асқар Кіребаев, Қази Данабаев, Жолтай Жұмат секілді белгілі ақын-жазушылар.Аймағымызда Президентіміздің тапсырмасымен, Үкіметтің қолдауымен жүзеге асырылған жұмыстарды, игі бастамаларды халық арасында кеңінен насихаттауда қалалық, аудандық басылымдармен қатар «Халық», «Әлімсақ», «Ұстаз мәртебесі», «Тіл сақшысы», «Сыр мектебі» секілді &nbsp;газет-журналдар мен интернет ресурстардағы бірнеше ақпараттық агенттік белсенді қызмет атқаруда.Сыр өңірінің жылнамасын, Тәуелсіздік шежіресін &nbsp;жасаудағы қажырлы еңбектеріңіз үшін сіздерге зор ризашылығымды, алғысымды білдіремін.&nbsp;Ақпарат айдынында заман көшінен қалмай, жаңа медианы меңгеріп, елдікті сақтау, азаттықты баянды ету жолында абыройлы қызмет атқара беріңіздер! Мерейлі мерекеде дендеріңізге саулық, шығармашылықтарыңызға шабыт, отбасыларыңызға бақ-береке тілеймін!», - деді Н.Нәлібаев.</blockquote>Мерекелік жиында &nbsp;салаға ізденісі мен кәсіби шеберлігін арнап, оқырман мен көрермен құрметіне бөленген журналистер марапат төрінен көрінді. Мемлекет басшысының Жарлығымен облыстық «Сыр бойы» газеті "Руханият" бөлімінің меңгерушісі, Қазақстан Жазушылар және Журналистер &nbsp;одағының мүшесі Дүйсенбек Беркінбаев «Құрмет» орденімен, республикалық «Казахстанская правда» газетінің меншікті тілшісі Әлібек Байшүленов пен "Қоғам ТВ" арнасының шеф-редакторы Баян Құлтанова «Ерен еңбегі үшін» медалімен марапатталды. Сондай-ақ, бірқатар тілшілерге облыстың ең жоғарғы наградасы - Қызылорда облысының «Құрмет» грамотасы, облыс әкімінің Алғыс хаты мен номинациялар табысталды.Бүгінде Сыр журналистикасының тарихы өзінің ғасырлық белесіне жақындады. Өткен жылы еліміздегі ең байырғы басылымдардың бірі &nbsp;- облыстық «Сыр бойы» газетінің жарыққа шыққанына 95 жыл толса, биыл «Кызылординские вести» газеті 95 жылдығын атап өтуде. &nbsp;Жалағаш аудандық «Жалағаш жаршысы» басылымына 90 жыл, Шиелі аудандық «Өскен өңір», Сырдария аудандық «Тіршілік тынысы» газеттеріне 85 жыл, Қызылорда қалалық «Ақмешіт апталығы» газетінің жарық көргеніне 30 жыл толды.Фото: Қызылорда облысы әкімінің баспасөз қызметі

«Қанатты қалам – 2025» салтанатты шарасы өтті

<a href="https://kyzylorda-news.kz/">Kyzylorda-news.kz</a> Бүгін Арал қаласындағы “Руханият орталығының” ашылу рәсімі өтті. Оған облыс әкімі Нұрлыбек Нәлібаев, Ұлттық музей директоры Берік Әбдіғалиұлы, облыстық мәслихат төрағасы Мұрат Тілеуімбетов және зиялы қауым өкілдері арнайы қатысты.Аймақ басшысы жиналған жұртшылықты жаңа нысанның ашылуымен құттықтап, мәдениет саласында атқарылған жұмыстарға тоқталды.<blockquote>“Президентіміз Қасым-Жомарт Кемелұлы "Мәдениет – ұлттың төлқұжаты. Жаһан жұрты елімізді, ең алдымен, өнеріміз арқылы танып біледі. Біз – Ұлы далада тамыр жайған бірегей мәдениеттің заңды мұрагеріміз. Қазақ жерінен шыққан қайталанбас өнер иелерінің теңдессіз туындылары тұтас ұлтты тәрбиеледі. Қазір төл мәдениетіміз дүние жүзіне танылып жатыр", - деген болатын. Өткен 2024 жыл өңірімізде «Руханият жылы» деп жарияланып, мәдени-көпшілік шаралармен бірге көптеген ауқымды жобаларды жүзеге асырдық.Облыс орталығында «Анаға тағзым», «Отбасы орталығы», «Өнер» орталығы" салынып, ел игілігіне берілді.Осындай байыпты бастамалардың жалғасы ретінде биыл балалар мен жасөспірімдерге арналған «Сыр жұлдыздары» шығармашылық-инновациялық академиясы, «Саутс Ойл» компаниясының демеушілігімен музыкалық колледждің жаңа ғимараты, облыстық тарихи-өлкетану музейі ашылды.Бүгін өздеріңізбен бірге Арал ауданындағы «Руханият орталығын» ел игілігіне табыстаймыз.Орталықта ақ жаулықты аналарымыз, ардақты ардагерлеріміз бен жігерлі жастарымыз бір жерде бас қосып, ұрпақтар сабақтастығын жалғайды. Баршаңызды «Руханият орталығының" салтанатты ашылуымен тағы да құттықтаймын!”,- деді Н.Нәлібаев.</blockquote>Жиында Берік Әбдіғалиұлы құттықтау сөз сөйлеп, Қызылорда қаласы, Арал, Қазалы, Жаңақорған аудандарының құрметті азаматы Нажмадин Мұсабаев батасын берді.Ауданның өркендеуіне үлес қосқан ардагерлер мен құрылысты салған мердігер мекеме қызметкерлері облыс әкімінің Алғыс хатымен марапатталды.Айта кету керек, биыл Ассамблеяның 30 жылдығы аясында Қызылордада «Қазатомөнеркәсіп» ұлттық компаниясының қолдауымен жаңа «Достық үйі» салынуда. Нысан қараша айында пайдалануға беріледі. Мәдениет пен руханият өкілдеріне қолдау көрсету басты назарда. Жыл сайын «Тұран» және «Жебе» сыйлықтарын табыстау дәстүрге айналды. Былтыр алғаш рет мәдениет қызметкерлеріне арналған көпқабатты тұрғын үй салынып, 40 қызметтік пәтер берілді.Сондай-ақ, симфониялық оркестр, инклюзивті және жастар театрлары, заманауи би, хор ұжымдары құрылып, "Жыраулар үйі" ашылды.<img src="https://knadmin.beoblood.kz/uploads/Aralda_Ruhaniyat_ortaly_y_ashyldy_1_502578ef44.jpg" alt="Аралда Руханият орталығы ашылды 1.jpg"><img src="https://knadmin.beoblood.kz/uploads/Aralda_Ruhaniyat_ortaly_y_ashyldy_2_0b5f5a2184.jpg" alt="Аралда Руханият орталығы ашылды 2.jpg">Фото: Қызылорда облысы әкімінің баспасөз қызметі

Аралда "Руханият орталығы" ашылды

<a href="https://kyzylorda-news.kz/">Kyzylorda-news.kz</a> Қызылорда қаласының астана болғанына 100 жыл толуына орай ұйымдастырылған «Тарихтың таңбасы, рухтың ордасы – Қызылордам» атты облыстық өнер байқауы аясында Шиелі ауданының өнер ұжымы Қызылорда қаласының орталық алаңында ерекше мерекелік бағдарлама ұсынды.Кештің шымылдығы ұлттық нақыштағы қолөнер көрмесімен ашылып, қала тұрғындары мен қонақтарының зор қызығушылығын тудырды. Ауданның қолөнер шеберлері ұлттық мұрамызды жаңғыртқан туындыларын ұсынып, көпшілік назарына паш етті.Сахнада Шиелі ауданының мәдениет майталмандары, халықтық вокалды-аспапты ансамбль, «Әжелер» және «Келіндер» ансамбльдері, сондай-ақ ауданның талантты әншілері мен бишілері әсем ән мен күмбірлі күйден шашу шашып, көрермен ықыласына бөленді. Әрбір өнер нөмірі – туған жерге деген шынайы сүйіспеншіліктің, өнерге деген адалдықтың көрінісіндей әсер қалдырды.Киелі Шиелі жерінің өнерпаздары Сыр елінің астанасы – Қызылорданың аспанын ән мен күйге бөлеп, ел тарихына тағзым жасап, көрермендерге рухани мереке сыйлады.&nbsp;Осындай ауқымды шаралар — өңір мәдениетінің дамуына, ұлттық өнердің жаңғыруына үлкен серпін берері сөзсіз.<img src="https://knadmin.beoblood.kz/uploads/Oblysty_ner_baj_auy_4_8a56a6aef6.jpg" alt="Облыстық өнер байқауы 4.jpg">

Киелі Шиеліден – Сыр елі жүрегіне өнер шашуы

<a href="https://kyzylorda-news.kz/">Kyzylorda-news.kz</a> Бүгін «Өнер орталығында» Қазақстанның Халық әртісі, Мемлекеттік сыйлықтың екі мәрте иегері Досхан Жолжақсыновтың шығармашылық кеші өтті.Шығармашылық кешті мемлекет және қоғам қайраткері, Ұлттық музейдің директоры Берік Әбдіғалиұлы, облыс әкімі Нұрлыбек Нәлібаев, мемлекет және қоғам қайраткерлері, зиялы қауым өкілдері, аймақтың өнерсүйер жұртшылығы тамашалады.Салтанатты шарада облыс әкімі құттықтау сөз сөйлеп, ұлттық театр және кино өнерінің дамуына сүбелі үлес қосқан өнер иесіне шығармашылық табыс тіледі.<blockquote>«Досхан Жолжақсыновтың есімі аталса, әрбіріміздің көз алдымызға «Бандыны қуған Хамит» фильмі келеді. Бұл фильм қазақтың қайсар ұлы Хамиттің Отанына берілген адал бейнесімен қымбат. Душанбеде өткен кинофестивальде актер ер адам рөлін үздік сомдағаны үшін жүлде жеңіп алғанын жақсы білеміз. Қазақ киносы аталса, Шәкен Айманов, Серке Қожамқұлов, Құрманбек Жандарбеков, бүгінгі Асанәлі Әшімов, Тұңғышбай Жаманқұлов есімдері ойымызда тұрады. Ардақты Досхан ағамыздың да осы қатарда өз орны бар.Еліміздің дарынды перзенті – екі жүзден астам рөлдерді сомдаған актер. Біржан сал, Құнанбай, «Көшпенділердегі» Қалден Серен, «Алтын күздегі» Мұрат рөлдері актер Досхан Жолжақсыновтың талантын талай қиырға танытты, соңынан ерген жастарды кино алаңы мен үлкен сахнаға талпындырды. Бұл кейіпкерлер екі дәуірдің жастарын патриоттыққа, отансүйгіштікке тәрбиеледі. Досхан Жолжақсынов белгілі актер ғана емес, шебер орындаушы ретінде де халық арасында танымал. Домбырасын қолға алғанда рухтанып, қазақ деген талантты халықтың таза болмысын көз алдыңа әкеледі», – деді Нұрлыбек Машбекұлы.</blockquote>Кеште көрермен назарына «Құнанбай» және «Біржан сал» көркем фильмдерінен үзінділер ұсынылды. Бұл туындылардағы тарихи көріністер мен ұлттық құндылықтар шығармашылық кештің мазмұнын байыта түсті. Қазақстанның еңбек сіңірген қайраткері Қаракөз Сүлейменова халық әндерінен шашу шашып, «Ахау керім», «Жүрші, сәулем» сынды дәстүрлі әндермен қатар, «Біз әлі кездесерміз», «Найзағай көңіл», «Махаббат арман» атты лирикалық шығармаларды орындады.Аймақ басшысы Нұрлыбек Машбекұлы Досхан Жолжақсынов пен Қаракөз Сүлейменоваға қазақы дәстүрге сай құрмет көрсетіп, облыс әкімінің атынан ықылас гүлі табысталды.<img src="https://knadmin.beoblood.kz/uploads/1_Syr_elinde_Doshan_Zholzha_synovty_shy_armashyly_keshi_tti_b1fa7c118d.jpg" alt="1 Сыр елінде Досхан Жолжақсыновтың шығармашылық кеші өтті.jpg"><img src="https://knadmin.beoblood.kz/uploads/2_Syr_elinde_Doshan_Zholzha_synovty_shy_armashyly_keshi_tti_416e7dfa40.jpg" alt="2 Сыр елінде Досхан Жолжақсыновтың шығармашылық кеші өтті.jpg">Фото: Қызылорда облысы әкімінің баспасөз қызметі

 Сыр елінде Досхан Жолжақсыновтың шығармашылық кеші өтті

<a href="https://kyzylorda-news.kz/">Kyzylorda-news.kz</a> Маусым айының басында Мәскеу төрінде бастау алған «Еуразия жүрегіне саяхат – 2025» бірегей туристік танымдық экспедициясы тарих пен тағылым ордасы Сыр өңірінде жалғасты. Құрамында Ресей, Қырғызстан, Тәжікстан, Өзбекстан мемлекеттерінен келген 100-ден аса турист сан ғасырлық тарихы бар қалаларды аралап, әдет-ғұрпы және мәдениетімен танысуда.&nbsp;Танымдық экспедициясының мақсаты - Орталық Азия елдері мен Ресей арасындағы іскерлік, гуманитарлық және ғылыми байланыстарды нығайту, сондай-ақ халықаралық әріптестікті дамытуға бағытталған.&nbsp;Осыған орай, Сыр еліне арнайы келген құрметті қонақтар ең алдымен киелі Арал ауданына табан тіреді. Экспедиция мүшелері аудан орталығындағы “Балықшылар аллеясын“ тамашалап, Арал теңізі туралы құнды мәліметтерді тыңдады. Одан кейін XIX ғасырдағы орыс сәулет өнері үлгісінде салынған “Балықшылар музейіне” барды. Бұл музейде «Балықшылар», «Кемелер» залы және ашық аспан астындағы музей көрмесі ұйымдастырылған. Музей қорындағы құнды жәдігерлермен таныс болған құрметті қонақтар ерекше әсер алып, теңіз тарихын қызығушылықпен тыңдады.&nbsp;Экспедиция жалғасы Шижаға елді мекеніндегі құмды төбелер мен өңірдегі бірегей демалыс аймағы саналатын “Қамбаш” көлінде жалғасты.&nbsp;Ендігі кезекте экспедиция мүшелері бағдарламаға сәйкес, &nbsp;Байқоңыр қаласы, Қармақшы ауданындағы Қорқыт ата мемориалдық кешені мен Қызылорда қаласындағы бірнеше мәдени-спорттық нысандарды аралауы жоспарлануда.<img src="https://knadmin.beoblood.kz/uploads/Whats_App_Image_2025_06_24_at_09_50_01_1_299ecfedba.jpeg" alt="WhatsApp Image 2025-06-24 at 09.50.01 (1).jpeg">

Еуразия жүрегіне саяхат экспедициясы Сыр өңірінде 

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев ҚР Ұлттық музейі басшысы Берік Әбдіғалиұлымен кездесті. Аймақ басшысы өңіріміздің руханият, мәдениет саласындағы ауқымды жобалар туралы айтты.«Биыл Қызылорда қаласының еліміздің астанасы болғанына 100 жыл толды.Президентіміз Қасым-Жомарт Кемелұлы Сыр еліне жұмыс сапары кезінде ардақты аналарымызға арналған «Анаға тағзым» орталығының жұмысымен танысып, жоғары бағасын берді.Былтыр «Руханият жылы» аясында 1000 орындық "Өнер орталығы" іске қосылды.Сыр мәдениетінің негізгі бренді – жыраулық дәстүр өкілдеріне арналған "Жыраулар үйі" ашылды.Қызылорда облысының барлық 7 аудан орталығында 11 млрд. 500 млн. теңгеге "Руханият орталықтары" салынып, пайдалануға берілді.Осыған дейін облыс музейлерінде арнайы қор сақтау бөлмелері болмаған. Қазір аудандық музейлердің қор бөлімдері талапқа сай жасақталып, 20 мыңға дейін экспонат сақтауға мүмкіндік алды.Бұрын аудандардағы архив мекемелерінің қор сақтау қоймасының сыйымдылығы 35 мың құжатқа арналған болатын. Архивтер "Руханият орталығына" көшірілген соң 200 мыңға дейін, яғни алдағы 40 жылға құжат сақтауға жол ашылды."Руханият орталығына" көшірілген аудандық кітапхана, музей, архив мекемелерінің соңғы 20 жылда жаңартылмаған материалдық-техникалық базасы заманауи үлгідегі жаңа жабдықтармен жарақтандырылды.Сол жағалаудан құны 2 млрд. 700 млн теңге болатын облыстық тарихи-өлкетану музейінің жаңа ғимараты салынып, пайдалануға берілді.Мәдени мұра – біздің құнды әрі рухани қазынамыз. Сыр өңірі – ежелгі қалалардың мекені.Ұлы Жібек жолы бойындағы ежелгі Бәбіш мола, ортағасырлық Жанкент, Сығанақ қалашықтарында археологиялық қазба жұмыстары жалғасуда. 2023-2024 жылдарығылыми негіздемелерге сүйеніп, бюджет қаражаты есебінен алтын киімді «Шірік Рабат сақ жауынгері», алтын әшекейлі «Сығанақ ханшайымы», алтын қылышты «Түгіскен көсемі» және «Жетіасар ақсүйек әйелі» тарихи реконструкциялары жасалып, музей қоры құнды экспонаттармен толықты.Өткен жылы Сыр өңірі мәдениетін, құнды жәдігерлерін насихаттау мақсатында «Сыр өңірі –Түркі өркениетінің алтын бесігі» атты жылжымалы көрмені Ұлттық музей төрінде өткізуге үлкен қолдау көрсеттіңіздер. Сол үшін өзіңізге зор алғыс білдіремін», - деді Н.Нәлібаев.Басқосуда Берік Әбдіғалиұлы өңірлер арасындағы мәдени-рухани байланысты арттыру, тәжірибе алмасу ұлт руханиятына зор үлес қосатынын жеткізіп, бірқатар ұсынысын ортаға салды.Сыр еліне жұмыс сапарында ҚР Ұлттық музейі басшысы аймақтағы тарихи-мәдени нысандармен танысады деп жоспарлануда.Фото: Қызылорда облысы әкімінің баспасөз қызметі

 Облыс әкімі ҚР  Ұлттық музейі басшысымен кездесті

Ата заң бойынша Қазақстанда бір ғана&nbsp; мемлекеттік тіл бар. Бұл – қазақ тілі. ҚР Президенті Қ.К.Тоқаевтың&nbsp; Қазақстан халқына Жолдауынан<a href="https://kyzylorda-news.kz/">Kyzylorda-news.kz</a> Мемлекеттік тіл – мемлекеттік саясат тұғырының біріТақырыпқа өзек болған сөзді Мемлекет басшысы ассамблеяның биылғы отырысында айтты. Сол сәтте әлеуметтік желі арқылы түрлі пікірлер желдей есті. &nbsp;Әрине, қанша адам болса сонша пікір, сонша ой болары анық. Өйткені барша қазақ халқын толғандыратын бірден бір мәселенің бірі – &nbsp;мемлекеттік тіл машақаты. Ұлттың басты белгісінің бірі, қазақтың қазақ екенін дәлелдейтін бұлжытпас айғақ, әр қазақтың тамырында ағып жатқан қанмен рухына, ана сүтімен бойына дарыған қасиетті тіл. Тіл жойылса ұлттың жойылатыны айтпаса да белгілі. Сол үшін де кеудесінде жүрегі қазақпын деп соғатын әрбір қазақ баласы ұлттық тілінің болашағы үшін жанұшырады. Олай болмағанда қайтсін, атадан балаға мұра болып келе жатқан әдет-ғұрып пен салт-дәстүрлер, өнегеге толы тәрбие беретін рухани азықтар түгелдей бойымызға ана тіліміз арқылы сіңеді. Сондықтан да елімізде тіл туралы ой айтылса, мәселе көтерілсе қоғам екі жарылып жатады.&nbsp;Президент «МЫНА ТІЛДЕ СӨЙЛЕ ДЕП МІНДЕТТЕЙ АЛМАЙДЫ» деген сөзді қалай айтты, қалай жеткізді? Мәселе осында.&nbsp;<blockquote>– Бүгінде түлектердің 80 пайызға жуығы ұлттық бірыңғай тестілеуді мемлекеттік тілде тапсырады. Биыл алғаш рет мектепке баратын балалардың 70 пайыздан астамы қазақ тілінде оқитын болады. Әрине, елімізде азаматтар бір-бірін немесе мінберде сөйлеп тұрған адамды «мына тілде сөйле» деп мәжбүрлемеуге тиіс. Тіл мәселесін ту етіп қоғамда алауыздық туғызғысы келетін, ел ішіндегі жағдайды шиеленістіруге ұмтылатын әрбір әрекетке тосқауыл қойылып, заң жүзінде жазаланады», – деді президент.</blockquote>Мемлекет басшысы шетелде отырып алауыздық тудыруға тырысатын деструктивті ұйымдардың жұмысын да сынға алды.<blockquote>– Халқымыздың татулығын бұзып, ел ішіне іріткі салғысы келетіндер заңға сәйкес қатаң түрде жауапқа тартылады, тиісті жазасын алады. Ал ынтымақ пен бірлікті нығайтуға үлес қосқан азаматтар әрдайым зор құрметке ие болады, – деді.</blockquote>Бұдан бөлек, Қасым-Жомарт Тоқаев елімізде адамды ұлтына, тіліне, дініне қарай кемсіту ешқашан болмағанын, барша азаматтарға бірдей мүмкіндік берілгенін атап өтті.<blockquote>– Бұл – нағыз әділдік, әділетті мемлекеттің ажырамас бөлігі. Тағы да айтарым: елдің бірлігі мен татулығы ең негізгі құндылықтарымыздың қатарында тұр. Бұл – мемлекеттік саясаттың басты тұғыры. Болашақта да солай болмақ. Осы стратегияның арқасында түрлі этнос өкілдері бір шаңырақтың астында бір үйдің баласындай тату-тәтті өмір сүріп жатыр. Бұл – мағынасы терең нақты жетістік», – деп атап өтті.&nbsp;</blockquote>Пессимистік ойдан арылатын уақыт жетті&nbsp;Президент сөзінен кейін қазақ қоғамында түрлі пікірлер айтыла бастады. Мәселен, медиа сарапшы Бэлла Қасымқызы «қазақ тілін шетелдік біреулердің тапсырысымен, я біреулерді араздастыру үшін талап етіп жүргенім жоқ. Осы елдің тең құқылы азаматы екеніме сенгендіктен, құқымды білгендіктен талап етемін» деп жазса, qazaqtimes-те «Президент Қасым-Жомарт Тоқаевтың «әркім өз тілінде сөйлесін, бастысы – түсінісу» деген мәлімдемесі қоғамда үлкен резонанс тудырды. Бұл сөз жай ғана лингвистикалық пікір емес. Бұл – идеологиялық ұстаным әрі президенттік тұлғаның ішкі психологиясының, тілмен қарым-қатынасындағы қайшылығының көрінісі. Тоқаев бұл сөзді неге айтты? Ол бұл ұстанымды ел мүддесі үшін таңдады ма, әлде өзі қазақ тілін толық меңгермегендіктен, ішкі қорғаныс механизмін іске қосты ма? – деген пікір жарияланды. Одан бөлек, azattyq-қа журналист Ақсәуле Әбітайдың «мәселенің түбін зерттемей, жазалау түрін таңдайды» деп қынжылғаны және блогер Жалғас Ертай «елді бірлікке шақырамын деп елдегі көп адамдар тобына топырақ шашты» деп президентті сынағаны басылған.&nbsp;Санамалап жаза берсек, мұндай пікірлер аз емес. Мемлекеттік кеңесші Ерлан Қарин 25 сәуірде Facebook-та жазба жариялап, «билік қазақ тіліне қиянат жасады» деу – бос әңгіме, даурықпа сөз, деген пікір білдірді. Ол сондай-ақ «аттанға салып, айғайға басып, жоқ жерден шу шығаратындай ештеңе болған жоқ» деді.<blockquote>«Мемлекеттің тілге қатысты ұстанымы сол қалпы. Қазақ тілін еліміздегі этносаралық қатынас тіліне айналдыруға қатысты бағытынан айнымай, өз арнасымен тұрақты түрде жалғаса береді. Ассамблея сессиясында Президент осыны тағы да анық айтты. Жалпы қазақ тілінің болашағына қатысты пессимистік ойдан арылатын уақыт жетті. Мен мұны бұрын да айтқанмын, тағы да қайталағым келеді. Керісінше, қазақ тілінің қоғамдағы рөлі жыл өткен сайын артып келеді» деп жазды Қарин.</blockquote>Саясаткер телеграм-арнасына: «Президент қазақ тілі біртіндеп ұлтаралық қатынас тіліне айналатынын тағы қайталады. Бірақ бұл мақсатқа біз эволюциялық жолмен жылжып келе жатырмыз. Мемлекеттік тілді қолдану аясын кеңейтуді асықпай, ақылмен шешу керек. Тіл мәселесін саясиландыруға, арандатуға жол берілмейді», – деген кеңесші президенттің ішкі және сыртқы саясатта әлдебіреудің айтуымен емес, ұлттық мүддеге сай жүретінін атап өтті.Президент пәрменіҚалай болғанда да ана тілімізді көздің қарашығындай сақтауымыз керек. Өйткені біздің тіліміз даудың емес, ымыра мен бірліктің ұйытқысы болуға тиіс. Ал оны дау-дамай мен даурықпаның тіліне айналдырсақ, адами құндылықтардан айырыларымыз айғақ. Бұл тұрғыда қазақтың заңғар ақыны Мұхтар Шаханов:«Қазақ тілі – бабамыздың бабасы, Қазақ тілі – ұлтымыздың анасы. Ана тілсіз жойылады елдің рухи санасы, Бір-ақ қадам ұлтсыздық пен мәңгүрттіктің арасы», – деп тебірене жырлап, оқыған адамның жанын елжірете түседі. &nbsp;Қазақ тілінің болашағына алаңдаған зиялы қауым бірінші кезекте &nbsp;оның мемлекеттік тіл статусын алуы үшін күрес жүргізді. Құдайға шүкір, тәуелсіз Қазақстанның мемлекеттік тілі – қазақ тілі. Бұл Конституциямыздың 7 бабында көрсетілген. Қазақ тілін үш бақытының біріне балаған Мұқағали Мақатаев, жырларымен тілімізді құрметтеуге, қанша елдің тілін біліп меңгерсек те ұлттық тілімізді қадірлеп, қастерлеуге шақырған Қадыр Мырза-Әлі, Жұбан Молдағалиев, Фариза Оңғарсынованың туған тілдің төңірегіндегі тебіреністері кімді болсын бей-жай қалдырмайды. Мемлекет басшысының өзі: «Қазақтың тілі – қазақтың жаны! Халқымыздың тарихы да, тағдыры да – тілінде. Мәдениеті мен әдебиеті де, ділі мен діні де – тілінде. В.Радлов айтқандай, қазақ тілі – ең таза әрі бай тілдің бірі. Тіл өткен тарихпен ғана емес, бүгін мен болашақты байланыстыратын құрал. Меніңше, тілдің тұғыры да, тағдыры да бесіктен, отбасынан басталады. Отбасында ана тілінде сөйлеп өскен бүлдіршіннің тілге деген ықыласы терең, құрметі биік болады», – деп ана тіліне деген құрметінің ерекше екенін білдірген.&nbsp;Біз де тізгінді осы жерден тартып, президенттің «МЫНА ТІЛДЕ СӨЙЛЕ ДЕП МІНДЕТТЕЙ АЛМАЙДЫ» дегені ана тілді кемсіткені емес, қайта керісінше, оның қолданыс аясын кеңейтуге болатынын жеткізгіміз келеді. Өйткені сіз де кез келген адамға ҚАЗАҚ тілінде сөйлей аласыз, ешкім кедергі бола алмайды. Себебі президент пәрмені солай.&nbsp;Әзиз БАТЫРБЕКОВ

Қазақстан және Қызылорда облысының жаңалықтары: Мәдениет