<a href="https://kyzylorda-news.kz/">Kyzylorda-news.kz</a>&nbsp; Соңғы жылдары елімізде еңбек адамдарының мәртебесін арттыру, қоғамда құрмет көзін қалыптастыруға мән беріліп, оларды насихаттауға басымдық берілуде. Сол мақсатта бүгінде&nbsp;жұмысшы мамандықтардың маңыздылығын арттыру, техникалық және кәсіптік білім беру жүйесін реформалау бағытында ауқымды жұмыстар&nbsp;жүргізілуде.&nbsp;Жұмысшы мамандықтарға деген жастардың қызығушылығын арттыру, мектеп бітіруші балаларды осы салаға тартуда кәсіптік-техникалық білім беру орындарының үлесі зор. Бұл ретте кәсіптік-техникалық білім беруді трансформациялаудың 2025-2027 жылдарға арналған жол картасы бекітілген.&nbsp;Онда өңірлік ерекшеліктерге сәйкес жаңа мамандықтар атласын әзірлеу, кәсіптік бағдар беру тұжырымдамасын жүзеге асыру, кәсіби білікті кадрлар даярлау, сапалы жұмыс орындарын құру, жұмысшы кадрлардың мәртебесін көтеру сияқты бағыттар қамтылған.&nbsp; &nbsp; Ресми мәліметтерге үңілсек, қазіргі таңда елімізде кәсіптік-техникалық бағытта білім беретін колледждердің саны 700-ден асады екен. Бүгінде колледж ұжымдарына артылған жауапкершілік жоғары. Болашақта қажетті маман иесін даярлауды олар бүгіннен бастауы керек. Арал ауданында да бұл бағытта Арал көпсалалы колледжі еңбек етуде.&nbsp;Аталған оқу орны 1959 жылы 23 желтоқсанда ауданның «Сульфат» поселкесінде №169 селолық кәсіптік-техникалық училище болып жұмысын бастаған. 1973 жылы Арал қаласында училище филиалы ашылып, одан кейінгі жылы толығымен соған көшіріледі. Оқу-тәрбие және өндіріс бағытындағы жетістіктері үшін атауы 1989 жылы экспериментальді тірек училищесі болып ауысады. Ал 1993 жылы №16 Арал жоғары кәсіптік-техникалық лицейі дәрежесін алады. 1998 жылы №2 кәсіптік-техникалық лицей, 2002 жылы №2 кәсіптік-лицей аталады. Ал 12 жылдан бері Арал көпсалалы колледжі болып өзгерген. Бүгінде кәсіби білім мен өмірлік дағдыларды меңгерудің берік негізін қалайтын іргелі білім ошағына айналған. Онда кәсіби құзыретті мамандар даярлауға&nbsp;мүмкіндік бар.&nbsp;Қазір&nbsp;білім ошағында 300-ге жуық өрен &nbsp;11 мамандық, 26 біліктілік бойынша білім&nbsp;алуда. Оқу ордасы мемлекеттік лицензияға ие және техникалық, кәсіптік бағыттағы заманауи маман даярлауға толық мүмкіндік беретін материалдық-техникалық базамен&nbsp;толықтай қамтылған.&nbsp; Білім ордасының басшысы&nbsp;Нұралы Әбішов, колледждің басты миссиясы – кәсіби білім беру арқылы тұрақты әлеуметтік-экономикалық өсуді қамтамасыз ететін техникалық және кәсіптік білімі бар бәсекеге қабілетті мамандар даярлау екенін айтады. Оның сөзінше,&nbsp;дуальді оқыту жүйесі бойынша биыл білім алушылардың 33 проценті немесе 100-ге жуық студент техникалық және кәсіптік білім беру ісіне тартылған. Олар дуальді оқыту бойынша аудандағы өндіріс, шаруашылық серіктестіктері мен мекемелерде өндірістік тәжірибеден өтіп, теориялық білімін тәжірибе жүзінде шың­дауға мүмкіндік алған.&nbsp;Оқушылар&nbsp;«Аралтұз» зауыты, «Арал құрылыс» серіктестігі, «Қызылорда электр тарату тораптары компаниясы», өзге де жеке кә­сіпкерлермен өндірістік тәжірибеден өту туралы келісімшарт жасаған.&nbsp; Колледж ғимараты осыдан 5 жыл бұрын күрделі жөндеуден өткен.&nbsp;Жылу қазандығы&nbsp;көгілдір отынға&nbsp;қосылған.&nbsp;Ғимаратта қауіпсіздікті сақтау мақсатында іші-сыртына 60 бейнебақылау камерасы қойылған екен. Бсонджай-ақ барлық мамандық бойынша оқу кабинеттері, зертханалар мен шеберханалар&nbsp;қажетті құралдармен&nbsp;жабдықталған.&nbsp;Ал тәжі­рибе жи­нақтау сабақтары автомобильге тех­ни­калық қызмет көрсету орталық­тарында&nbsp;өткізіледі.&nbsp;Ұжымда студенттерді білімді де білікті ұстаздар қауымы білім нәрімен сусындатып жүр. Өздерінің біліктілігін дәлелдеген ұстазда, білімін дәлелдеген студенттерде жетерлік. Мәселен, өткен оқу жылында арнайы пән оқытушысы М.Аралбекқызы «Жылдың үздік педагогі» атты республикалық бай­қауда І дәрежелі диплом иеленсе, өн­ді­рістік оқу шебері Н.Сарбөпеев «ҚР үздік еңбек адамы» республикалық байқа­уында жеңімпаз, «WorldSkills Kazakh­stan-2024» республикалық чемпионатында «Кірпіш қалау» құзыреттілігі бойынша Дархан­бек Жұманов ұстазы Ғ.Назаровтың жетек­шілігімен «Үздік шебер» атанған.&nbsp;Бүгінде колледж түлектері аймақтың түрлі өндірістік кәсіп­орындарында, мекемелерінде, жеке секторда табысты еңбек етуде.&nbsp; Аудандағы тағы бір кәсіптік-техникалық білім беру мекемесі бар. Ол жүз жылдық тарихын қалыптастырған&nbsp;Арал индустриалды-техникалық колледжі. Бұл білім ошағы – уақыт талабына сай бәсекеге қабілетті, кәсіби маман даярлауды мақ­сат еткен жұмысшы мамандықтардың ұс­та­ханасы. Ол 1927 жылы балық аулау артелі болып құрылып, жергілікті тұрғындарды балықшылар бригадирі, ау құралдарын септеп-тоқу ісіне үйреткен. Ал 1955 жылы ағаш, темір ұсталарын, қайықтың матрос, мотористерін даярлайтын&nbsp;қолөнер училищесі болып қайтадан құрылған. Осылайша әртүрлі даму сатысынан өткен оқу орны 2012 жылы Арал индустриалды-техникалық колледжі&nbsp;деген атауға ие болған. Қазіргі таңда колледж қабырғасында 300-дей студент білім алуда. Оларға мемлекеттік талапқа сәйкес 6 мамандық, 7 біліктілік бойынша дәріс беріледі. Студенттердің алған білімін тәжірибемен ұштастыруда&nbsp;23 жеке әлеуметтік серіктестікпен келісімшарт жасалған. «Жұ­­мысшы мамандықтар жылына» орай техникалық және кәсіптік білім бе­руді трансформациялаудың 2025-2027 жыл­дарға арналған «Жол картасы» аясында республика көлемінде 11 техни­калық жә­не кәсіптік білім беру орнымен ынты­мақ­тастық меморандумы қабыл­данған.Білім ордасының директоры Рақым Айназаровтың айтуынша,&nbsp;«Жас маман» жобасы аясында іске қосылған дәнекерлеу тренажері, тігін ма­шиналары сияқты инновациялық технологиялармен жабдықталған оқу шеберханалары студенттерге теориялық білімді тәжірибемен ұштастыруға, кәсіптік құзы­реттілікті қалыптастыруға мүмкіндік бе­реді. Колледж әкімшілігі алдағы уақыт­та халықаралық стандарттарға сәйкес оқы­ту бағдарламаларын дайындап, инженер-пе­дагогтердің біліктілігін арттырып, сұра­нысқа ие мамандықтарға жаңа оқу үлгісін ұсынуды жоспарлауда.&nbsp;Материалдық базаны жаңғырту не­гізінде кадр даярлау және қайта даярлау үшін құзыреттілік орталығын құруды&nbsp;көздеген ұжым&nbsp;2022 жылы алғаш&nbsp;«Сән технологиясы» және «Дәнекерлеу технологиясы» құзыреттілігін&nbsp;ашқан. Осындай жаңа оқу технологиялары мен заманауи техникалық құрылғылардың ар­қасында колледждің оқу-материалдық ба­засы нығайтып, колледж базасының то­лыққандылығы, білім ордасындағы білім мен білік дағдысының тең болуына, соңғы үлгідегі құрал-жабдықтарды пайдалана отырып, мамандардың ой-өрісін техникаға бағыттау олардың құштарлығын арттыруға мүмкіндік жасаған.&nbsp;Елімізде&nbsp;«Жұмысшы мамандықтар жы­лын» өткізудің кешенді іс-шаралар жос­пары бойынша атқарылған&nbsp;жұмыстар жастардың кәсіби бағдарын айқындауға, кәсіби біліктілігін дамытып, қоғамда жұмысшы мамандығының беделін арттыруға жол ашып отыр. Білім ордасы студенттердің қолайлы білім алуына жағдай жасау мақсатында&nbsp;өндіріс орындарымен&nbsp;байланыс жасап, олардың қолдауын сезініп келеді. Биыл «Арал-Құры­лыс» ЖШС-ның&nbsp;демеушілігімен колледж ғимара­ты­ның кіреберіс аумағы асфальтталса, қала әкімі Батыржан Ұзақовтың және «То­ғыс-Аралотын» ЖШС-ның директоры Мейрамбек Жұмашевтың қолдауымен жаз­дық спорт алаңы салынып, жасанды көгал төселген. Автокөлікке техникалық қыз­мет көрсету шеберханасы да өндірістік табыс есебінен жөнделіп, студенттердің тә­жірибелік дағ­дысын қалыптастыруға қо­лайлы жағдай жасалған.Биыл колледж базасында жас мамандардың кәсіби біліктілігін арттыруға негізделген «WorldSkills -2025» чемпионатының аймақтық кезеңі өткізілген. Мұндай маңызды іс-шараның бұл оқу орнында өтуі ұжым үшін үлкен маңызға ие. Сондай-ақ байқауға қатысқан оқушылары да олжасыз болмаған. Ал байқау нәти­жесінде&nbsp;колледж студенті&nbsp;«Дәнекерлеу технологиясы» құзірет­тілігі бойынша Т.Әбдібақыт 1-орынды еншілеген. Чемпионаттың аймақтық іріктеу кезеңінде студенттер 6 құзыреттілік бойынша бақ сынап, 5 құзыреттіліктен жүлделі орындарға ие болған. Бұл да студенттердің біліммен тәжірибені ұштастыра отырып, сапалы білім алуының көрсеткіші болса керек.Кәсіптік-техникалық білім беру, жастарды сол бағытқа икемдеу бүгінгі заман талабына айналып отыр. Аталған колледж ұжымдары еліміздің дамуына орасан зор үлес қосатын, бәсекеге қабілетті маман даярлауда үлкен жауапкершілікпен еңбек етуде. Ал студенттердің сапалы білім алып, оны әрі қарай ел игілігі жолында жұмсауы жарқын болашақтың кепілі болары сөзсіз.&nbsp;

«Жұмысшы мамандық»: Аралдық студенттер білім мен тәжірибені қатар игеруде

<a href="https://kyzylorda-news.kz/">Kyzylorda-news.kz</a> Қазақтың қыран қанаты талатын сайын даласы жайқала өскен өсімдік атаулыға ғана емес, сол даланы емін-еркін кезетін тұяқты жануарларға да өлшеусіз бай. Табиғи жайылымдардың кеңдігімен мақтанғанымызбен, сол мекендерде жабайы жануарлардың кейбіріне қауіп басым келеді. Сондықтан оларды «Қызыл кітапқа» енгізіп, қорғауға алғанын білеміз. Солардың көшінде сиреп бара жатқан жануардың бірі – қарақұйрық.Бұл қуысмүйізділер тұқымдас жануар сексеуіл, жыңғыл, теріскен, жүзгін өсетін шөлді аймақтарды мекендейді. Біздің Жаңақорған аумағында да бұлардың саны баршылық. Оларды бақылау, қауіптің алдын алу үшін, жалпы түз тіршілік иелеріне қамқорлық ететін арнайы мекеме бар. Ол – «ҚР Экология және табиғи ресурстар министрлігінің орман шаруашылығы және жануарлар дүниесі комитеті» «Охотзоопром ӨБ» республикалық қазыналық кәсіпорны.Мекеменің арнайы бекітілген штат құрамы ауысым бойынша аудан аумағында қызметте жүреді. Олардың Апанғақ аймағында арнайы базасы орналасқан. Таңнан түнге дейін қоян мен өзге де жануарларды заңсыз аулағандарды, қарақұйрық пен балыққа тұзақ сала- тындарды торуылдайды. Қысқаша айтқанда, дала табиғатын баладай қорғаштап келеді. Біз арнайы мекеме инспекторы Бақытжан Исмаиловпен байланысып, бір күндік жұмыстарымен танысып көрдік.<blockquote>– Біз қазір Жаңақорған аумағында арнайы бекітілген іс-шара бойынша қызметте жүрміз. Негізінен қызметіміз осы, бірақ белгілі мерзімге қатаңдатылған режим бойынша келдік. Қазір заңсыз аң аулаудың маусымы, әсіресе, құны жоғары жануарларға броконьерлер қырғидай тиеді. Қоян, қарақұйрық және таудағы арқарды бақылауға алып, күні-түні қадағалау үстіндеміз, – дейді инспектор.</blockquote>Арнайы жасақ құрамында топ жетекшісі Ерлан Ұзақов бастаған инспекторлар Ержан Махан, Жеңісхан Ысқақов және Саттар Сәбеков бар. Олардың мақсаты – дала тағысына бақылау жасап, оларды аңшылардан аман алып қалу. Нақты саны белгілі болмаса да Жаңақорғанның құмды аймағында қарақұйрықтардың тобы бар. Олардың нарықтағы құны ақбөкендерден едәуір қымбат екен. Сондықтан аңшылар әуестігі басым келеді. Алайда, айыппұлы барын ұмытпауымыз керек.<blockquote>– Аңшылар көбіне түнде шам жарығымен жүреді, оларды құрықтауға біз бар күш-жігерімізді саламыз. Қылмыстары әшкере болған жағдайда ҚР Қылмыстық Кодексінің 337,339 бабы бойынша кінәлі саналып, айыппұл төлейді. Сондай-ақ 3 жылдан 7 жылға дейін бас бостандығынан айырылуы мүмкін. Бұл – заң талабы. Сондықтан бұл киелі жануарға жоламауға шақырамыз. Табиғат байлығын қолдан құрдымға жібермейік дегіміз келеді, – дейді инспектор.</blockquote>Дала жануарларының әрбірінің өз ерекшелігі бар. Біз сөз етіп отырған тұяқты жануардың қасиеті – суға төзімділігі. Табиғат-ана оны шөлге соншалықты шыдамды етіп жаратыпты. Шөптің ылғалы немесе жаңбырдың суын қанағат тұтатын қарақұйрықтың табиғатқа етенелігі осыдан-ақ байқалатындай. Сондықтан қарақұйрық көбіне еліміздің құрғақ далалы, шөлейтті және шөлді алқаптарында таралған. Ол сексеуіл, жыңғыл, тораңғыл өскен бұйратты жал құмдардың арасында да кездеседі.Кейде шағын тау бөктерінде теңіз деңгейінен 2500-3000 метр биіктікте жүреді. Қыс және күз мезгілдерінде қар аз түсетін жерлерге қоныс аударады. Топырағы құмды жұмсақ жерді тұяғымен тарпып қазып, уақытша жатақ жасап, жасырынып жатады. Ғалымдардың зерттеуі бойынша, қарақұйрықтың 70- тен астам шөптесін және бұталармен қоректенетіндігі анықталған. Ол орташа есеппен тәулігіне 6-7 келі қоректі пайдаланады. Ащы, тұщы және қақ суларын іше береді. Суатқа кешкілік қараңғылық түскенде және таңертеңгілік мезгілде келеді. Көбіне таңертеңгілік салқында және кешке қарай жайылады. Есту және көру мүшелері жақсы дамыған өте сақ жануар. Олардың қазақ даласындағы санының азаюына түрлі себеп барын білеміз. Сарапшылар оған алдымен броконьерлердің кесірі тиеді деп отыр.Сондай-ақ мал жайылымдарының кеңейіп, жер игеру мен инфрақұрылымның артуы қарақұйрықтардың табиғи ортасын тарылтып отыр деуге негіз бар. Қарақұйрықты қорғап, санын көбейту үшін жергілікті тұрғындар арасында үгіт-насихат жұмыстары кеңінен жүргізілуі керек. Өйткені, қарақұйрық еліміздің сымбатты аңдарының бірі болып саналады. Оны қорғаудың эстетикалық мәні де зор екенін ешуақытта естен шығармауға тиіспіз. Ен даланың еркесіне айналған бұл тіршілік иесін келешек ұрпаққа аманат ету әрбір азаматтың парызы болуы керек, ол үшін аңшылардың жолын кесу керекпіз дейді жауапты тұлғалар.<img src="https://knadmin.beoblood.kz/uploads/Whats_App_Image_2025_12_23_at_11_20_38_f83abee14d.jpeg" alt="WhatsApp Image 2025-12-23 at 11.20.38.jpeg">Әли ТЕМІРБЕКФото: gov.kz

Түз тағысы – қарақұйрық

<a href="https://kyzylorda-news.kz/">Kyzylorda-news.kz</a>&nbsp; «AMANAT» партиясының «Бақытты отбасы», «Кедергісіз келешек» жобалары аясында партияның облыстық филиалының төрағасы Жандос Базартай Талсуат елді мекенінде орналасқан Ұлттық балаларды оңалту орталығында болып, онда ем қабылдап жатқан ерекше білім беру қажеттіліктері бар балғындарды Жаңа жыл мерекесімен құттықтады.Филиал төрағасы алдымен орталықтағы балаларға жасалған жағдаймен, медициналық және әлеуметтік оңалту үдерісімен танысты. Сондай-ақ «Жастар рухы» жастар қанатының ұйымдастыруымен ерекше балаларға арналған Жаңа жылдық кешті тамашалады.Құттықтау сөз сөйлеген филиал төрағасы Жандос Базартай елімізде және өңірде балалардың, оның ішінде ерекше қажеттіліктері бар балалардың сапалы өмір сүруі, толыққанды дамуы мен қоғамға бейімделуі үшін атқарылып жатқан жұмыстарға тоқталды. Елдің болашағы әрі әрбір отбасының бақыты саналатын бүлдіршіндерге жан-жақты қолдау көрсету «AMANAT» партиясының негізгі басым бағыттарының бірі екенін атап өтіп, олардың құқықтарын қорғау, қолжетімді орта қалыптастыру және бақытты балалық шаққа жағдай жасау бағытындағы жұмыстар алдағы уақытта да жалғасын табатынын жеткізді.Іс-шара аясында «Жастар рухы» жастар қанатының еріктілері ерекше балаларға арналған мерекелік концерт ұйымдастырып, бағдарлама барысында балаларға арналған театрландырылған қойылымдар, ән-би ұсынылып, бүлдіршіндерге көтеріңкі көңіл күй сыйлады. Сондай-ақ балаларға партия атынан Жаңа жылдық сыйлықтар табысталды. Шара балғындардың жүзіне қуаныш сыйлап, жылы әсерге толы мерекелік көңіл күйде өтті.

 Қамқорлық пен мейірімге толы жаңа жылдық кеш

<a href="https://kyzylorda-news.kz/">Kyzylorda-news.kz</a> Сырдария ауданы әкімінің Берік Сәрменбаевтың қатысуымен Орталық алаңда жаңа жылдық бас шыршаның шамын жағу рәсімі өтті.Іс-шарада аудан әкімі сырдариялықтарды келе жатқан Жаңа жыл мерекесімен құттықтады.&nbsp;<blockquote>– Халқымызда «Өткен жылға өкпе жоқ, келер жылдан үміт көп» деген жақсы сөз бар. Біз де Жаңа жылға үлкен үмітпен қарап, берекелі іс пен баянды бақыт күтеміз. Өтіп бара жатқан 2025 жыл өңіріміз үшін аса маңызды оқиғаларға толы болды. Мемлекет басшысы Қасым-Жомарт Кемелұлының Сыр өңірін ерекше қолдауының арқасында бүгінгі күні облысымыз қарқынды даму үстінде. Аймағымыз барлық негізгі макроэкономикалық көрсеткіштер бойынша республикада алғашқы орында. Аймақ бюджеті 851 млрд. 300 млн. теңге болып, 2021 жылдан бері 246 пайыз өсті. Оның 56 пайызы әлеуметтік салаға бағытталған. Даму бюджетінің көлемі 2021 жылы 47 млрд. теңге болса, биыл 207 млрд. теңгеге жетіп, 4,4 есе артты.Ауданымызда да жыл көлемінде ауқымды жұмыстар атқарылды. Жыл басында аудан бюджеті 10 млрд. теңгені құраса, бүгінде 13,2 млрд. теңгеге жетті. Мемлекет басшысы халықтың тұрмысын жақсарту үшін ең алдымен инфрақұрылымдық жұмыстарды атқаруды тапсырды. Бүгінде ауданда Тереңөзек кенті мен 5 елді мекен көгілдір отынмен қамтылып, 62 пайызды құрап отыр. Биыл газдандыру жобаларын жүзеге асыруға 2,1 млрд. теңге қаржы бөлініп, Нағи Ілиясов және Шаған ауылдары табиғи газға қосылды. Жоба құны 1,8 млрд. теңгені құрайтын Ақжарма елді мекенін газдандыру жұмыстары биыл басталып, бүгінде газ құбырларын тарту жұмыстары жүргізілуде. Аудан тұрғындары орталықтандырылған ауыз сумен 100 пайыз қамтамасыз етілген. Биыл «Ауыл – ел бесігі» бағдарламасы аясында жоба құны 490,5 млн. теңгеге Қалжан ахун елді мекенін электрмен жабдықтау жұмыстары жүргізілуде. Биыл ауданда 1,3 млрд. теңгеге 25,5 шақырымнан аса автомобиль жолдары жөндеуден өтті. Қазіргі кезде жолдардың жақсы және қанағаттанарлық жағдайдағы үлесі 99 пайызға жетті. Аудандағы үлгілі елді мекен – Нағи Ілиясов ауылы «Үздік туристік ауыл – 2025» ұлттық байқауында жеңімпаз атанып, Қазақстандағы үздік 5 туристік ауылдың қатарына енді. Біздің жеткен жетістіктеріміз – аудан халқының бірлігі мен қажырлы еңбегінің нәтижесі. Жаңа 2026 жылға үлкен үміт артамыз, – деді Берік Әбдіғаппарұлы.</blockquote><img src="https://knadmin.beoblood.kz/uploads/shyrsha_1_6c6ef079a3.jpg" alt="шырша 1.jpg">Мұнан соң шырша шамы жағылып, аудан өнерпаздары концерттік бағдарлама ұсынып, мерекелік көңіл-күй сыйлады.Фото: Сырдария ауданы әкімінің баспасөз қызметі

Сырдария: Ауданның бас шыршасы жағылды

<a href="https://kyzylorda-news.kz/">Kyzylorda-news.kz</a> Халықтың күнделікті тұрмысында жарық пен жылу төлемі әжептәуір мәселеге айналды. Әсіресе биылғы коммуналдық қызметтер құнының күрт өсуі жұрттың қалтасына ғана емес, жүйкесіне де салмақ салып тұрғандай.Тарифтердің кезең-кезеңімен көтерілуі – бүгінгі күннің ең өзекті тақырыбының бірі. Халықтың табысы айтарлықтай өзгермей тұрған шақта жарық пен жылудың қымбаттауы қарапайым отбасыларға ғана емес, кәсіпкерлерге, әлеуметтік нысандарға, ауыл-аймақтарға да елеулі салмақ салып отыр. «Тариф өссе – сапа арта ма?», «Қымбаттату қандай негізге сүйенеді?», «Халық есебінен саланың шығынын жапқан дұрыс па?» деген сынды көптің көкейінде қордаланған сауалға жан-жақты жауап іздеп, тиісті азаматтардың пікірін тыңдап көрдік. Жаңақорған аудандық электр торабының басшысы Ізбасхан Әбілтанов тарифтердің қымбаттауының нақты себептеріне тоқталды.<blockquote>– 2025 жылдың 23 шілдесінен бастап электр энергиясының тұтыну тарифінің шекті бағасы 31,696 теңге/кВт. Жеке тұлғалар үшін шекті баға – 28,5264 теңге/кВт. Жеке тұлғалар үшін орташа босату тарифі 28,5264 теңге болып отыр. Бұған дейін шекті баға 25,9056 теңге/кВт. Ал, жеке тұлғалар үшін шекті баға 25,9056 теңге/кВт еді. Тұрғындар тек тұтынған электр энергиясы үшін төлеуге міндетті. Егер бір айда төлем тым көбейіп кетсе, алдымен есептегіш көрсеткішті салыстырып, түбіртекті тексеру қажет. Қыс мезгілінде жарықтың көп жұмсалуы табиғи нәрсе: таңның кеш атуы, ерте қараңғылық, жылыту құрылғыларын жиі қолдану – бәрі тұтынуды арттырады. Сондықтан халық үнемдеуге де дағдылануы тиіс, – дейді ол.</blockquote>Демек, мәселенің бір ұшы – халықтың коммуналдық есепті дұрыс жүргізбеуінен туындауы мүмкін. Ал электр энергиясын үнемдеу дегеніміз тек ақша үнемдеу емес, ресурсты тиімді пайдалану мәдениеті. Мамандардың айтуынша, көпшілік артық жарықты, қуат көзі көп қажет ететін құрылғыларды жүйесіз қолданады. Жарықты артық жақпау, қуатты құрылғыларды минималды қолдану, лампаларды экономикалық түрлеріне ауыстыру, үйдегі электр желісін тексертіп тұру керектігін мамандар баса айтты. Егер осы ескертпелерді тұрмыста іске асырсақ, ай сайынғы төлемді 15-25 пайызға дейін азайтуға болады екен.Газ бағасы да едәуір өсті. Бұл жөнінде «QazaqGaz Aimaq» АҚ ҚӨФ Жаңақорған газ шаруашылығы директоры Сұлтан Сәрсеновтен білген едік.<blockquote>– Бүгінгі күнге дейін өңірімізде 7967 абонент бар. Биыл газ бағасы 24,2 тиын болып белгіленді. Өзге облыстарға қарағанда едәуір арзан деуге болады. Қазіргі уақытта 800 абоненттен 12 962 832 теңге қарыз қордаланған. Бұл өткен жылмен салыстырғанда едәуір азайып отыр. Қарызы бар әрбір тұрғынның үйіне барып, түсіндірме жұмыстарын жүргізіп, ескертіп жатырмыз. Ал одан нәтиже шықпаған жағдайда газдан ажыратуға тура келеді. Сондықтан тұрғындар берешегін толық өтесе деген өтінішіміз бар, – дейді ол.</blockquote>Кент тұрғыны, көпбалалы әке Оңдас Асановтың да өз айтары бар.<blockquote>– Айына 10-12 мың теңге жарыққа, 16-18 мың теңге газға төлейміз. Кейде бұдан да жоғары болып кетеді. Сонда айына 25-30 мың теңге тек коммуналдық төлемдерге жұмсап отырмыз ғой. Бұл нарық заманында бір отбасына үлкен шығын, ауыртпалық деп есептеймін. Жауапты сала мамандары халықтың үніне құлақ асса жақсы болар еді, – деп көңілінде қатталған мұң-мұқтажын жасырып қалмады.</blockquote>Расымен де, қымбатшылық қамытын кигелі біраз болды. Кедейшілік – ел экономикасын кері тартатын кесел. Осындай отбасыларды кедейшілік құрсауынан алып шығуға нақты бағдарланған бағдарламалар мен көмек арқасында бүгінде Еуро одақтың 11 елінде кедейшілік жоқ. Басқа еуропалық елдерде кедейшілік көрсеткіші 1-3 процент қана. Бізге оларды өзімізбен салыстырудың қажеті жоқ. Өйткені, бізде алатын айлығы ішер асынан артылмайтын отбасылар көп. Бізде өзге елдермен салыстырғанда ұялы байланыс қызметін тұтынудың бағасы қымбаттап кеткені жасырын емес. Қазір кемінде бір айға 5990-12000 мың теңгелік болып өзгеріп кеткен. Тіпті одан да жоғарылары бар, қалауыңызға қарай. Осындай бағаның өсуіне қарапайым халықтан бөлек, шенеуніктердің де өкпесі қара қазандай. Еліміздегі ұялы байланыс оперторларының ауыз толтырып айтатын интернет қызметі жылдамдығының тым әлсіздігі, ғаламторға емін-еркін кіру мүмкіндігі жоқтығын да айта кеткен жөн. Халыққа адал, сапалы қызметтен бұрын тарифті қымбаттауға әуес ұялы байланыс операторларының қызметі жақсартуды жауапты мамандар қолға алуы керек-ақ. Бұған қатысты Мәжіліс депутаттарының біразы ұялы телефонның бағасына, желі ішіндегі сөйлесу сапасының әлсіздігіне сын айтып жүргелі біраз болды. Міне, осындай әрекеттері арқылы санаулы адамдар байлыққа кенеліп отырса, қарапайым халықтың қалтасы жұқарып барады. Жалпы алғанда коммуналдық қызмет түрлерінің қымбаттауының бір көрінісі – осы.ТҮЙІН. Жарық пен жылу – жай ғана қызмет емес, халықтың өмір сүру сапасын анықтайтын негізгі фактор. Тарифтің өсуі – қарапайым адамға салмағы ауыр, мемлекет үшін де жауапкершілігі зор қадам. Қоғам үшін ең маңыздысы – бағаның өсуіне дәлел, ашықтық және сапаның артуы. Елдің ертеңі үшін энергетика саласы дамуы керек, бірақ оның құнын халықтың мойнына толық іліп қою – әділдікке жатпайды. Тариф мәселесі халықтың тұрмысын емес, жағдайын жақсартуға жұмыс істеуі тиіс. Қымбаттаған жарық пен жылу – халықтың үніне құлақ асуды талап ететін әлеуметтік дабыл десек артық емес.Асел РЗАЕВАФото: freepik.com

Электр энергиясы – өнеркәсіп негізі

<a href="https://kyzylorda-news.kz/">Kyzylorda-news.kz</a> Биыл ел эконмикасындағы ең маңызды саланың бірі – өңдеу өнеркәсібінде оң өзгерістер өте көп. Салынған инвестиция мен шығарылған өнім көлемі едәуір артқаны байқалады. 10 айдың қорытындысы бойынша өндіріс көлемі 24 трлн теңгеден асып, 5,8%-ға өскен. Бұл туралы апта басында өткен Үкімет отырысында өнеркәсіп және құрылыс министрі Ерсайын Нағаспаев мәлімдеді. Бұдан бөлек, осы салаға қатысты бірнеше министр жыл басынан бері атқарылған жұмыстар есебін берді.&nbsp;Бұл бағытта Сыр өңіріндегі жұмыс көлемі де ауқымды. Жалпы елдегі және өңірдегі ахуалды тағы бір саралап көрейік. Үкімет отырысында алдымен өнеркәсіп және құрылыс министрі баяндама жасады. Оның айтуынша, өсім ең алдымен металлургия, машина жасау, химия саласы, сондай-ақ құрылыс материалдары сынды негізгі сегменттерде өндіріс көлемін ұлғайту есебінен қалыптасып отыр. Сондай-ақ өңдеу өнеркәсібінде жыл соңына дейін 1,5 трлн теңгеге 190 жобаны іске қосу жоспарланса, бүгінде 147 жоба жүзеге асқан. Нәтижесінде 18 мыңнан астам жұмыс орны құрылған. Олардың ішінде қытайлық Chery, Changan, Haval және Tank брендтерінің жеңіл автомобильдерін, тамақ өнеркәсібіне, тұрмыстық техникаға арналған алюминий қаптамаларын, сондай-ақ жүнді қайта өңдеу және тоқыма материалдарын өндіру бойынша жобалар бар. Егер қалған жобалар толық өндірістік қуатына шыққан кезде өңдеу өнеркәсібінің көлемі жылына 2,3 трлн теңгеге ұлғаятыны айтылды.&nbsp;Айта кететіні, бұл тізімде Жаңақорған ауданының да үлесі бар. Биыл бізде бірнеше нысан іске қосылуда. Ведомсвто басшысының айтуынша, 2022 жылдан бері жеңілдікпен несиелеу арқылы өңдеу өнеркәсібіндегі 116 жоба қаржыландырылды. Мұнда мемлекеттік даму институттары жаңа өндірістерді қолдауда маңызды рөл атқаратыны белгілі.Министр еліміздегі өндірушілер, алдымен отандық нарықты шикізатпен қамту керек деген тапсырма берді. Одан кейін ғана шетке экспорттауға лицензия беріледі. Бұл дұрыс бағыт, өйткені импортталатын тауарлардың құны сан құбылады. Оған делдалдар мен доллардың бағасы әжептеуір әсер етеді. Бүгінде аталған жүйе негізінде мыс, алюминий және мырыш өндірушілер жұмыс істеуде. Сондай-ақ 10,4 трлн теңге инвестиция тартылған 16 арнайы экономикалық аймақ, инвестиция көлемі 1,6 трлн теңгені құрайтын 305 жоба жүзеге асырылып жатқан 66 индустриялық аймақ жұмыс істейді.<blockquote>– Шағын және орта бизнесті қолдау үшін шағын өнеркәсіптік аймақтарды құру бағдарламасы жүзеге асырылуда. Бүгінгі таңда 25 мұнай өңдеу зауыты құрылды, онда 44 кәсіпорын жұмыс істеп тұр. Алдағы уақытта индустриялық алаңдарды басқарудың жаңа тетіктерін пысықтау және түрлі көздер есебінен инфрақұрылымды қаржыландыруды қамтамасыз ету жоспарланып отыр, – деді Ерсайын Нағаспаев.</blockquote>Мұнай өңдеу саласын дамыту тұжырымдамасы шеңберінде өңдеу көлемін кезең-кезеңімен ұлғайту көзделіп отыр. Бұл туралы Үкімет отырысында Энергетика министрі Ерлан Ақкенженов айтты. Оның айтуынша, 2024 жылдың қорытындысы бойынша мұнай өнімдерін өндіру көлемі 14,52 млн тоннаны құрады, осы жылы 14,55 млн тонна өнім өндіру көзделіп отыр.2040 жылға дейін мұнай өнімдерін өндіруді 14,52-ден 29,2 млн тоннаға дейін арттыру жоспарлануда. Сонымен қатар 2040 жылға қарай мұнай өнімдерінің сапасын қазіргі экологиялық стандартынан K4-тен K5+ деңгейіне дейін тұрақты түрде жақсарту және сыртқы нарықтарға экспорттау күтілуде екен. Отандық дәрі-дәрмектердің құнын төмендету және саланы қолдау үшін Денсаулық сақтау министрлігі жаңа салық жеңілдіктерін бастады. Бұл туралы Үкімет отырысында министр Ақмарал Әлназарова айтты.&nbsp;<blockquote>– Тегін медициналық көмектің кепілдендірілген көлемі (ТМККК) және МӘМС жүйесі шеңберінде сатып алынатын дәрілік заттарды өндіру кезінде пайдаланылатын импортталатын субстанция мен шикізатты ҚҚС-тан босату жөніндегі Үкімет қаулысының жобасы әзірленді, – деп атап өтті Ақмарал Әлназарова.</blockquote>Бүгінде елімізде 200-ден астам тауар өндіруші тіркелген. 10 айдың қорытындысы бойынша олардың өнімділігі 11,7%-ға өсіп, 156,6 млрд теңгеге жетті. Дәрі-дәрмектің 460 атауын локализациялауды көздейтін тағы 9 инвестициялық жоба қаралу сатысында тұр. Премьер- министр Олжас Бектенов фармацевтикалық нарықтағы тәртіпті күшейтіп, дәрілердің әділ бағамен сатып алынуын қамтамасыз ету мақсатында енгізілген жаңа цифрлық жүйе қомақты қаржыны үнемдеуге мүмкіндік бергенін айтты. Үкімет басшысы отандық фармацевтика саласына инвестиция тарту үшін жаңа келісімдер жасалып жатқанын, сондай-ақ дәрілік заттар мен медициналық бұйымдар өндірісіне қатысты 9 инвестициялық жоба қолға алынғанын атап өтті. Денсаулық сақтау министрлігі үш ай ішінде барлық ұйымдастыру шараларын аяқтап, инвесторлармен келісімдерге қол қоюды қамтамасыз етуі тиіс.АЙМАҚТАҒЫ АХУАЛҮкімет отырысынан кейін облыс әкімінің бірінші орынбасары Данияр Жаналиновтің төрағалығымен өткен мәжілісте осы және өзге де мәселелер жан-жақты талқыланып, жауапты басшыларға тапсырма берілді. Алдымен атқарылған жұмыстар бойынша жауапты басқарма басшылары баяндама жасады.<blockquote>– Өңдеу өнеркәсібінің көлемін барынша арттырып, жыл қорытындысымен оң динамикаға жету үшін нақты әрі жедел шаралар қабылдауды тапсырамын. Өңірдегі ірі өнеркәсіптік кәсіпорындардың өндірістік жоспарын нақтылау керек. Теміржол вокзалдарының сыртқы келбеті ғана емес, жолаушыларға қызмет көрсету деңгейі де жоғары болуы тиіс. «Қазақстан Темір Жолы» компаниясының облыстық филиалы, көрсетілетін қызмет сапасын қадағалаңыздар. Вокзалдар аумағының абаттандырылуын, көгалдандырылуын, санитарлық тазалығын тұрақты бақылау қажет. Қала, аудан әкімдері, тек теміржол вокзалдарының аумағы ғана емес, автовокзалдардың, жолдар мен көпірлердің, жол бойындағы май құю бекеттері мен сервистік кешендердің күтіп ұсталуы назарда болуы керек, – деді Данияр Еренғалиұлы.</blockquote>Биылғы 10 айда аймақта 328 млрд теңгенің өнімі өндіріліп, өңдеу өнеркәсібінде 10,7% өсім тіркеліпті. Экономиканы әртараптандыру аясында жоспарланған 20 жобаның 13-і іске қосылды, қалған 7-уі жыл соңына дейін пайдалануға берілетінін білдік. Соңғы бес жылда өңдеу өнеркәсібінің жалпы өнеркәсіптегі үлесі 12,9% өсіп, өнім көлемі 2,6 есе артқан. Өңір кәсіпорындары цифрлық және автоматтандырылған технологияларды кеңінен қолдануды бастап кеткен.ҚАЛДЫҚТАРДЫ ҚАЙТА СҰРЫПТАУӨңдеу өнеркәсібінің бір тармағы – қалдықтарды қайта өңдеу ісі. Бұл сала біздің елде кемшін қалып келеді. Алпауыт елдер, оның ішінде, экономикасы халық санына шаққанда төмен тұрған Үндістанның өзінде қалдықты өңдеу керемет жолға қойылған. Оларда шағын кәсіп иелері де өңдеу саласына берілген. Қазақстанда 2029 жылға дейін қатты қалдықтарды қайта өңдеу және басқаруды 40%-ға жеткізу мақсатында Экология және табиғи ресурстар министрлігі 345 млрд теңгені құрайтын 67 жобаны жүзеге асыруға әзірлеп жатыр.<blockquote>– Бүгінгі таңда 52 млрд теңгеге 14 жоба қаржыландырылды. Жалпы 67 жобаның 41-і тек қана өңдеу саласына арналған. Олар негізінен қағаз, пластик, әйнек және тағы басқалар. Қалдықтардың ішінде ең көп шығатыны осы үшеуінің қалдықтары. Сол себептен жылдың аяғына дейін біз жаңағы айтқан 67 жобаны толығымен бастап кетуді жоспарлап отырмыз. Соның нәтижесінде бүгінгі 25,8% ғана өңдейтін көрсеткішімізді 2029 жылға қарай 40%-ға жеткізетінімізге сенімдіміз, – деді Экология және табиғи ресурстар министрі Ерлан Нысанбаев.</blockquote>Біздің өңірде шыны зауыты мен бірнеше өндіріс ошағы жұмыс жасап тұр. Қалдықтарды сұрыптау бойынша Жаңақорғанда қазір үш бірдей жеке кәсіпкер бар. Олар қағаз, пластмаса, шыны ыдыстар мен өзге де жарамсыз қалдықтарды сұрыптап, көршілес өңірлерге өткізеді. Екеуі кент орталығында, біреуі Жаңарық ауылында. Демек, бізде сұрыптау ісі жолға қойылған, тек дайын шикізаттан өнім өндіру жобасы ғана қалды. Бұл бойынша нақты ұсынылған жоба жоқ, тек өтінімдер ғана бар екен. Енді аудандағы өңдеу саласына қысқаша тоқталайық. Қазір ауданда төрт бірдей ірі өндіріс ошағы бар. Бұл мемлекет бақылауындағы мекемелер, ал, жекелей кәсіп иелері бүгінде жақсы нәтиже көрсетіп келеді. Мәселен, әк зауыттары, аймақ құрылысын жартылай өніммен қамтып отыр. Одан бөлек, екі бірдей асфальт зауыты мен бетон зауыты бар. Шағын кәсіпкерліктің арқасында жергілікті өнімдердің көлемі кеңейіп келеді.Түйіндей айтқанда, өнім өндіру саласы бұл бүгінгінің ғана емес, болашақтың басты мәселесі. Бұл, ішкі нарықты және жұмыссыздықты реттесе, екіншіден, экологиялық ахуалды а тұрақты ететін құбылыс. Қалғаны уақыттың еншісіндегі шаруа.Әли ТЕМІРБЕКФото: freepik.com

Өңдеу өнеркәсібінде өсім бар

<a href="https://kyzylorda-news.kz/">Kyzylorda-news.kz</a> Алпыс жасты толтырған, қырық жылдық&nbsp;еңбегінің зейнетіне есік ашқан мерейлі күні&nbsp;ол жүрегіне ең жақын жандардың басын&nbsp;қосқан екен. Олар – өзінің ұшып шыққан&nbsp;ұясындағы және келген жұртындағы&nbsp;жанашыр тілеулестері, мектепте бірге оқыған&nbsp;сыныптастары, ұжымы, солардың ішінде&nbsp;қымбат жастық шағының жалауындай, мәңгілік&nbsp;бала бейнелері көңілінде жатталып қалған&nbsp;өзінің ең алғаш мектепке ұстаз болып келгенде&nbsp;қабылдап алған 1978 жылғы шәкірттері, одан&nbsp;кейін жағалай отырған 80, 83, 87, 91, 95 жылғы&nbsp;түлектері көзіне аса ыстық көрінді. Назарова Кенжегүл Тұрғанбайқызы туған жері – Төменарық ауылындағы No223 орта мектебін тәмамдаған соң Қызылордадағы Н.В.Гоголь атындағы педагогикалық институттың «Бастауыштың педагогикасы мен методикасы» факультетінде білім алды.Алғашқы еңбек жолын Келінтөбе ауылында бастаған еді, көп өтпеді, жас мұғалима Ақжолдың жігіті Айбарханмен көңіл жарастырып, ауылдағы үлкен үлгілі отбасына келін болып түседі. Бұл құтты шаңырақта Жүнісбекұлы Байсын мен Оспанқызы Гүлбарамнан тараған ұл-қыздың үлкені – Тілесбек ауылдың маңдайалды механизаторы болса, Тілеухан ағайымыз мектептің директоры, Әлеухан атақты күрішші, Қуантхан гидротехник, Сабырхан, Аймахан, Жармахан және өзінің ері Айдархан әр саланың беделді мамандары екен.Ауылдағы No196 орта мектепке бастауыш сыныптың мұғалімі болып орналасқан еді. Жас маманға сын көп қой. Әрі бастауыш мектептің мұғалімінің міндеті аса ауыр. Соның бәрін еңсеріп, барынша ықылас қойып, елдің баласына сапалы білім беруді мақсат етті. Мектепке жаңа келген көкөрімнің талабына жарап, тұлымшағын тарап, анасындай қарап, мың түрлі мінезіне төтеп бергеннің тауқыметі өз алдына. Қайткенде сәби санасының саңылауын ашамын, білім атты мұхиттың асау толқынына қосамын деп жарғақ құлағы жастыққа тимеді. Еңбекті бағалайтын ел бар екен. Ол кезде талап мықты. Жеті-сегіз белсенді ата-ана бас біріктіріп мұғалімнің сабағына қатысады. Баламызды кім оқытып жатыр, келешегі қалай болады деген маңызды мәселеге тікелей өздері араласады.Бұл бір жағынан болашақ тәрбиесіне жауапкершілік қой. Міне Кенжегүл осы сынақтан мүдірмей өтті. Қазір қарасаңыз, Кенжегүл Тұрғанбайқызы сол кезде мектеп директоры болған Бөлеков Әмірхан ағайымен иығы теңесіп, Қазақ КСР білім беру ісінің үздігі атағына ие болыпты. 2005 жылдың жаңа оқу жылының қарсаңы. Биыл мектепке келетін 1999 жылы туылған бірінші сыныпты қабылдап алмақ. Бұлар Әліппені жаттатып, үлкен өмірге шығарып салатын жетінші желкендері болмақ. Кенет бала бағбанының өмірі жаңа арнаға бұрылып сала берді. Осы жылы ауылда тұңғыш мемлекеттік балабақша ашылған. Соған басшы болуға ұсыныс түсті. Жиырма жыл қызмет атқарған алтын ұяны қиып кету оңай болмады.Бірақ елдің өзіне артқан сенімін ақтау бала бағбанына одан да үлкен салмақты жауапкершілік жүктейтінін жүрегімен ұғынды. Алғаш 50 бүлдіршінді қабылдаған балғындар мекеніне «Әділ» деген атты таңдап қойғандығы мақсаты – әрқашан әділ боламын, адалдықтан аттамаймын, заңсыздық, жалғандық атаулыны сәбилер ұясының босағасынан да сығалатпаймын деген іштей серттен туған тұжырым еді.Сөйтіп, ауылдағы No17 «Әділ» балабақшасына жетекшілік еткеніне де жиырма жыл өте шығыпты. Алғашында 50 бала болса, қазір оның саны 75-ке жетті. 14 педагог қызметкер, 19 техқызметкер еңбек етеді. Еңбектің екпіндісін төрге шығарып, төбесін көкке жеткізе білер елдің де, сала басшылығының да іс адамына қояр талабы төмендемек емес. Еңбек жолының соңғы үш айында аудандық білім бөлімі басшылығы ротация тәртібімен көрші Өзгент ауылындағы «Жадыра» балабақшасы меңгерушісі екеуінің орнын алмастырды. Пилоттық жоба аясында жаңа орынға басшылыққа келген Кенжегүл бірінші күннен бастап ұжыммен жақын тіл табысты. Оны жалпыға бірдей жағымды ететін, бөтен сөзге қалдырмайтын, барған жеріне судай сіңіп, балдай батыратын қадір-қасиеті бар. Ол – кең жүректігі, мейірімділігі. Алғаш ұжыммен танысып, жұмысқа жан-тәнімен кірісіп кеткен басшы есіктен кіргеннен қарамағындағыларды бетінен сүйіп есендесетін мінезін тастай алмады. Сол жылы ұшырамның ұшқыны ұжымның жадыраңқы қабағына кірбің түсірмей, әркім өз жұмысын барынша көңілді, ықыласты атқаруға тырысса, бұл да жақсылыққа, жасампаздыққа бастайтын ұстаным. Бұл балабақшада үш топта бүлдіршін тәрбиеленуде. Ұжым өзіне керемет ұнады. Бұған дейін Болдықыз апайларының тәрбиесін алған Нұрсұлу Мәмбетва басқарып келген балалар мекенінде сол сабақтастықтың сапалы ізін аңғарды. Кеше, алпыс жылдық кешіне балалар мекенінің әдіскері Құрбанкүл Ибрагимова бастап келген ұжымдағы қыздар өзіне ескерткішке арнайы жасатып алып келген «Мейірімді меңгеруші» деп жазылған статуетканы (суретте) табыс етіпті.Кенжегүл Тұрғанбайқызы өзін елдің құрметіне бөлеген бұл нығметтің астарында ата-анасының тәлім-тәрбиесі жатқанын жақсы біледі. Әкесі Тұрғанбай герман соғысына, фин соғысына қатысқан жауынгер. Әкесі майданға аттанғанда бір баламен қалып, ерінің жолын күткен анасы Өзипа жиырма жасынан бастап намазға құлап, алпыс жыл құлшылығына мін түсірмей, сексен жас жасапты. Дұғасы қабыл болып тамырын тереңге тартқан бәйтеректей жапырағын кеңге жайды. Перзенттерінің ешбірі де жаманатын шығармай, ел мақтаған тұлғалар болып қалыптасқанына қалың жұртшылық куә.«Әке көрген оқ жонар, ана көрген тон пішер» деген осы, ерекше қадір-қасиетімен көптің ілтипатына бөленген анасының үлгісімен Кенжегүл бүгінде әулеттің сүйікті келіні. Енесі Гүлбарамның да өзін ерекше көріп, батасын төгіп жүретіні талай рет жолын оңғарып, еңбекте озат атандырды. Ол кездері қайынағасы Тілеухан Байсынов басшылық ететін оқу ордасы атаулы мектеп ретінде аудандағы 40 мектепке үлгі болды. Десант сабақ деген бар, үлгілі мектептің мұғалімді бөтен мектептің кез келген сыныбына аяқ астынан сабақ беруге жібереді. Осындай сын сәттерде Кенжегүл талабына қанат бітіріп, алды-артына қарамай жұмысын алаңсыз атқаруына тірек болған енесінің қолдауына, қамқорлығына арқа сүйегенін айтты. Өмірлік серігі Айдарханның да білімге құштарлығын, оқыған адамды ерекше құрметтейтінінҚұдайдың басыма қондырған бағы деп санады. Осындай зиялы отбасы ауыл мұғалимасының маңдайын ашып, бағын жандырған бірден-бір әрі берік қамалы еді деуге әбден болады. Бір отанға келін болып түскен сегіз келіннің ынтымағы, ол өз алдына өнеге. Бүгінде ең үлкен абысыны Қалдыгүлді ана орнында санаса, өзінен кейінгі үш келінінің де ілтипаты ерекше. Жұмысқа әрі өткенде, бері өткенде әрбірінің қиылып шайға шақырар көңілін қиып кете алмас қайран күндерді өмірінің ең қымбат сәті санайтынын да жасырмайды.Осы тұста әңгімеге араласқан Кенжегүлдің жары Айдархан алғашқы күннен өмірлік серігінің төл қызметі – ұстаздық мерейіне тілектес болғанын жасырмады. Өзі кезінде Ресейде агрономия факультетін тәмамдаған, ауыл шаруашылығы маманы. Осы салада көп жылдар еңбек атқарып келеді екен.<blockquote>– Әкеміз кезінде көп тауқыметті көрген, соның бәрін қажырлылықпен жеңген нағыз еңбектің адамы еді. Бізді де адалдыққа, адамгершілікке тәрбиеледі. Бәріміз де әке өсиетіне дақ түсірмеуге тырысып келеміз, – дейді ол.</blockquote>Зейнеттік демалысқа шыққан Кенжегүл апайының орнына өзі тәрбиелеп келе жатқан ізбасары – Жайсаңбаева Гүлзамира тағайындалып, балабақша тізгінін қолға алыпты. Айдархан мен Кенжегүлдің перзенттері – Өркені әскери сала маманы, Нұркені он саусағынан өнер тамған құрылысшы.Ерлі-зайыпты Айдархан мен Кенжегүл немерелер қызығын көріп отырған бақытты ата-әже екендіктерін айтып шаттанды. Қуаныштарыңыз ұзағынан болғай!Баян ҮСЕЙІНОВАФото: автордікі

Саялы бәйтеректей тамыр жайған

<a href="https://kyzylorda-news.kz/">Kyzylorda-news.kz</a> Жаңақорған ауданы мәслихатының кезекті XXXVII сессиясы өтті. Маңызды жиынға аудан әкімі Самитов Мажит Самитұлы, аудан әкімінің орынбасарлары, дербес бөлім басшылары, кенттер мен ауылдық округтердің әкімдері, мәслихат депутаттары қатысты. Сессия жұмысын аудандық мәслихаттың төрағасы Жарқынбек Ғалымжан жүргізді.Сессияның күн тәртібіне бірқатар өзекті мәселелер енгізілді. Атап айтқанда, «Аудан әкімінің атқарған жұмыстары туралы есебі», «2026–2028 жылдарға арналған аудандық бюджетті бекіту» және басқа да маңызды мәселелер жан-жақты қаралды. Күн тәртібіне сәйкес аудан әкімі Мажит Самитұлы баяндама жасап, ауданның әлеуметтік-экономикалық дамуының негізгі көрсеткіштеріне тоқталды. Оның айтуынша, өткен жылдың есепті кезеңімен салыстырғанда бірқатар салада оң өсім байқалған. Атап айтқанда, өнеркәсіп өнімдерін өндіру көлемі 6,1 пайызға, өңдеу өнеркәсібі 5,1 пайызға, құрылыс жұмыстарының көлемі 6,7 пайызға артқан. Сондай-ақ, тұрғын үйлерді пайдалануға берудің жалпы ауданы 0,4 пайызға, негізгі капиталға салынған инвестиция көлемі 1,2 пайызға, бөлшек сауда көлемі 0,1 пайызға, ал ауыл шаруашылығының жалпы өнімі 0,7 пайызға өскені айтылды.Сонымен қатар, аудан басшысы Сыр беткейіндегі 8 елді мекенді газдандыру жұмыстарының жүзеге асырылып жатқанын атап өтті. Ірі өндіріс орындарын тұрақты газбен қамтамасыз ету мақсатында Жаңақорған автоматты газ тарату станциясының қуатын 20 мың текше метрден 40 мың текше метрге дейін ұлғайту жұмыстары жүргізілген. Бұл нысан 18 қараша күні облыс әкімі Нұрлыбек Машбекұлының қатысуымен ресми түрде іске қосылғанын жеткізді. Баяндамасында аудан көлемінде жыл бойы атқарылған өзге де инфрақұрылымдық, әлеуметтік және экономикалық бағыттағы жұмыстарға кеңінен тоқталды.Сессия барысында мәслихат депутаттары аудан әкімінің атқарған жұмыстарына оң баға беріп, алдағы кезеңде жүзеге асырылатын бастамаларға сәттілік тіледі.Күн тәртібіндегі өзге мәселелер бойынша хабарламашылардың баяндамалары тыңдалып, депутаттар тарапынан нақты ұсыныстар мен сұрақтар қойылды. Талқылау нәтижесінде тиісті жауаптар беріліп, қаралған мәселелер бойынша тиісті шешімдер қабылданды.Ауданның алдағы даму бағыттарын айқындаған бұл сессия өңірдің әлеуметтік-экономикалық әлеуетін арттыруға бағытталған маңызды жиын болды.

Жаңақорған аудандық мәслихатының кезекті сессиясы өтті

<a href="https://kyzylorda-news.kz/">Kyzylorda-news.kz</a> Манап Көкенов атындағы Жаңақорған аудандық мәдениет үйінде сөз өнерін қадірлейтін жырсүйер қауым бас қосқан тағылымды мәдени іс-шара өтті. Ақын Ерсұлтан Мұстафаевтың «Туған жердің перзентімін» атты шығармашылық кеші жоғары деңгейде ұйымдастырылып, көрерменге рухани әсер сыйлады. Кеш барысында ақынның әр жылдары жазылған және кейінгі кезеңде қаламынан туындаған өлеңдері оқылып, авторлық әндері орындалды. Әдебиет пен өнерді серік еткен оқырман қауым ақынның жүрек сүзгісінен өткен жырларымен қауышып, кештен ерекше әсер алды.Кеш барысында поэзия мен әсем ән үндесіп, көрермен қауымға рухани азық сыйлады. Ақын шығармаларынан ұлттық болмыс, туған жерге деген сағыныш пен махаббат, өмірлік толғаныс айқын сезілді. Ерсұлтан Мұстафаевтың поэзиясы – жас буынға өнеге боларлық терең ойымен, көркем тілімен және ұлттық рухты асқақтататын мазмұнымен ерекшеленетін тағылымды туындылар.Ерсұлтан Мұстафаев – поэзия мен өнерді өмірінің мәніне айналдырған қаламгер. Ол 1985 жылы 7 желтоқсанда Жаңақорған ауданына қарасты Бесарық ауылында дүниеге келген. Туған ауылындағы Жүсіп Қыдыров атындағы орта мектепті тәмамдап, 2003 жылы Түркістан қаласындағы Халықаралық қазақ-түрік университетінің өнер факультетіне оқуға түсіп, театр мамандығы бойынша білім алған. Жоғары оқу орнын аяқтағаннан кейін Түркістан қаласындағы «Сазды» драма театрында актер ретінде қызмет атқарып, сахна өнерінде тәжірибе жинақтады. Кейін Жаңақорған ауданындағы Манап Көкенов атындағы аудандық мәдениет үйінде еңбек етті. 2010 жылдан бері Бесарық ауылындағы «Бесарық» балалар өнер мектебінде драма үйірмесінің жетекшісі болып жұмыс істеп, жасөспірімдердің өнерге деген қызығушылығын арттыруға үлес қосып келеді.&nbsp;Ақынның шығармашылық жолының қалыптасуына қазақ балалар әдебиетінің көрнекті өкілі, Жаңақорған ауданының құрметті азаматы Адырбек Сопыбековтің ықпалы зор. Ерсұлтан Мұстафаев бала кезінен бастап ұстазын өзіне рухани бағдар тұтып, поэзия әлеміне сол кісінің жетелеуімен келген. Ол 2015 жылы туған жері Бесарық ауылында «Қаратаудан таңдайыма тамған жыр» атты алғашқы шығармашылық кешін өткізген.<blockquote>– Шығармашылық кешіме «Туған жердің перзентімін» деген тақырыпты плуды жөн көрдім. Бұл іс-шараны ұйымдастыруға өзім қызмет етіп жүрген «Бесарық» балалар өнер мектебі ұйытқы болды. Осы кеш арқылы халыққа не бере алдым... Бүгінде эстрадада орындалып жүрген авторлығымдағы бірнеше ән бар. Олардың қатарында 2005–2006 жылдары жазылған «Махаббат арман», «Сағынамын», «Іздеймін», «Қыздар-ай» секілді әндер сол кезеңде тыңдарман тарапынан жақсы қабылданды. Бұл әндердің сазын менімен бірге оқыған Бақытжан Мұстафаев жазды. Сондай-ақ, Жаңақорған ауданының 90 жылдығына арналған «Жаңарған Жаңақорған» атты әніміз бар. Оның сазын Мейрамбек Мырзахметов жазған. Міне осы әндер кешімізде орындалды. Поэзия адамды рухани тұрғыдан өсіреді, ой көкжиегін кеңейтеді. Әрбір қаламгер уақыт өте келе кемелдену кезеңіне жетеді деп ойлаймын. Бұл кеш – 40 жасқа қадам басқан шағымда өмір жолымда қалатын бір естелік. Кеш барысында соңғы жылдары жазылған өлеңдерім оқылып, жаңа әндер орындалды. Оқырмандарым мен тыңдармандарымның жылы лебізі мен ыстық ықыласы – мен үшін үлкен шабыт. Осы уақытқа дейін жасаған дүниелерімді халыққа шынайы ықыласпен ұсына алдым деп есептеймін, – дейді ақын.</blockquote>Шараға аудан әкімінің орынбасары Бектас Нуридинов қатысып, сөз сөйледі. Ол өз сөзінде Ерсұлтан Мұстафаевтың ауданның әдеби-мәдени өміріне қосып жүрген үлесін атап өтіп, шығармашылық жолына тоқталды. Сондай-ақ, ақынға аудан әкімінің Алғыс хаты мен арнайы сый-сияпаты табысталып, алдағы шығармашылық жолына сәттілік тіледі.Аружан МАРАТҚЫЗЫФото: автордан

Жаңақорған: Тағылымды-мәдени іс-шара өтті

<a href="https://kyzylorda-news.kz/">Kyzylorda-news.kz</a> Мемлекет басшысының, Үкіметтің қолдауымен Сыр өңірі қарқынды құрылыс алаңына айналды. Аймақта 2022 жылдан бері 200-ге жуық халыққа қажетті әлеуметтік нысан салынып, тұрғындар игілігіне берілді. Бұл туралы елордада өткен Орталық коммуникациялар қызметінің брифингінде облыс әкімі Нұрлыбек Нәлібаев атап өтті.<img src="https://knadmin.beoblood.kz/uploads/rylys_levyj_bereg_cafb0b8e73.jpg" alt="Құрылыс левый берег.jpg"><blockquote>«Аймағымызда соңғы 3 жылда алғаш рет барлық ауданда жаңадан тұрғын үйлер &nbsp;салынып, 1 800-ге жуық, атап айтқанда 2023 жылы 430, 2024 жылы 1015, 2025 жылы 332, жалпы &nbsp;1777 пәтер жерлестерімізге табыс етілді. Биыл 3600 пәтерлік тұрғын үйлер салуға бюджеттен 58 млрд. 785 млн. теңге бөлінді. &nbsp;Біздің ең бірінші міндетіміз – балаларымыздың жан-жақты сапалы білім алуына қолайлы жағдай жасап, жайлы орта қалыптастыру. &nbsp;«Білімді қолдау қорының» 8 млрд. 400 млн. теңге қаржысына физика-математика бағытындағы «Білім-инновация» лицей-интернаты ел игілігіне табысталды. Аталған қор есебінен 2 млрд. 333 млн. теңгеге салынған Арал ауданы Мергенсай ауылындағы 150 орындық мектеп жақын күндері пайдалануға беріледі. Қызылорда қаласында құрылысына 11 млрд. теңге қаралған балалар мен жасөспірімдерге арналған «Сыр жұлдыздары» академиясы, Жалағаш, Жаңақорған, Шиелі аудандарында 3 млрд. теңгеден астам қаржыға Оқушылар үйі мен Өнер мектебі, облыс орталығында «ҚазМұнайГаз» ұлттық компаниясының демеушілігімен 2 млрд. 500 млн теңгеге заманауи Оқушылар сарайы ашылды. «Саутс Ойл» компаниясы музыкалық колледждің жаңа оқу ғимараты мен жатақханасын салуға 4 млрд. 800 млн. теңге демеушілік жасады. Қазіргі уақытта Президент саябағында жыл бойы &nbsp;жұмыс істейтін заманауи балалар тынығу лагері, Ботаникалық білім беру орталығы бой көтеріп келеді. Сондай-ақ, &nbsp;жұмысшы мамандарды даярлауға арналған «Құзыреттілік орталығы» ғимараты да басталды», – деді Н.Нәлібаев.</blockquote>Мемлекет басшысының бастамасымен қолға алынған «Таза Қазақстан» республикалық экологиялық бағдарламасы аясында облыс көлемінде көркейту-көгалдандыру, ауыл аймақтарды абаттандыру жұмыстары қарқынды жүруде. Биыл қалалық мәдени-демалыс паркі қайта жаңғыртудан өтті. Қорқыт Ата мемориалды аллеясы да жаңғыртудан кейін жайлы демалыс орнына айналды.<img src="https://knadmin.beoblood.kz/uploads/rylys_levyj_bereg_2_bbf00bed56.jpg" alt="Құрылыс левый берег 2.jpg">Жаңарған Президент саябағы тұрғындар көп жиналатын қаладағы көрікті орындардың бірі болады. Бүгінде саябақта бес жұлдызды қонақүй салынуда. Сырдария өзені үстінен Астана шағын ауданы мен екі аралықты байланыстыратын жаяу жүргіншілер көпірі құрылысы жоспарланған.&nbsp;Өңірде 2023 жылдан бері облыстық «Үлгілі елді мекен» конкурсы тұрақты өткізіліп келеді. Үлгілі ауылдарға облыстық бюджет қаржысына алынған 67 арнайы техника табысталды.

Қызылорда облысы құрылыс көлемі бойынша республикада көшбасшы өңірлер қатарында

<a href="https://kyzylorda-news.kz/">Kyzylorda-news.kz</a> «Ауылда денсаулық сақтауды жаңғырту» ұлттық жобасы аясында өңірдің барлық ауданында 10 млрд. 763 млн. теңгеге 28 медициналық нысан салынды. Бұл туралы Орталық коммуникациялар қызметінің брифингінде аймақ басшысы Нұрлыбек Нәлібаев айтты.<img src="https://knadmin.beoblood.kz/uploads/an_ortaly_y_ed63e5b12a.jpg" alt="Қан орталығы.jpg"><blockquote>«Қызылорда қаласында 36 млрд. 400 млн. теңгеге 300 орындық көпбейінді аурухана құрылысы қарқын алды, 5 млрд. 400 млн. теңгеге 4 аудандағы орталық ауруханалар жанынан қосымша ғимараттар салынды. Шиелі ауданында 2 млрд. 300 млн. теңгеге бой көтерген жұқпалы аурулар бөлімшесінің жаңа ғимараты ел игілігіне табысталды. Құрылысына 2 млрд. 200 млн. теңге бөлінген дәл осындай жаңа нысан жақын күндері Арал ауданында ашылады. Бұрын-соңды өз ғимараты болмаған Қан орталығы бүгінде жаңадан салынған нысанда халыққа қызмет көрсетуде. &nbsp;Оған қоса Үкімет облыс орталығында 48 млрд. 500 млн. теңгеге 200 орындық перинаталдық орталық, 14 млрд. 780 млн теңгеге 500 орындық емхана салуға тиісті қаулы қабылдады. Құрылыс жұмыстары жақын күндері басталады. Тағы бір 400 орындық &nbsp;емхана салу жоспарлануда. Халық сұранысына сәйкес соңғы 2 жылда жергілікті бюджеттен бөлінген 5 млрд. 400 млн. теңгеге 225 жаңа санитарлық автокөлік, 45 жедел жәрдем көлігі алынып, барлық елді мекендегі денсаулық сақтау ұйымдарына табысталды», – деді Н.Нәлібаев.</blockquote>Кейінгі жылдары 24 медициналық нысан 6 млрд. теңге қаржыға күрделі жөндеуден өткізілді, 15 млрд. теңгеге медициналық құрал-жабдықтар сатып алынды. Жабдықталу деңгейі 2022 жылғы 83,2 пайыз болса, бүгінде бұл көрсеткіш 87,4 пайызға артты (республикада 85,6 пайыз).&nbsp;Халыққа сапалы медициналық қызмет көрсету үшін мамандар біліктілігін арттыру мәселесі ұдайы назарда. Халықаралық байланыстың артуы мамандардың тәжірибе алмасуына жол ашты. Өткен жылы 15 дәрігер Түркияның жетекші медициналық клиникасында білім жетілдірді. Биыл 41 медицина қызметкері Германия, Ресей, Литва, Беларусь елдеріндегі үздік клиникаларда біліктілік арттырды.<img src="https://knadmin.beoblood.kz/uploads/Zhedel_zh_rdem_30d8f40eb1.jpg" alt="Жедел жәрдем.jpg">

Қызылорда облысында биыл 43 медициналық нысан іске қосылды 

<a href="https://kyzylorda-news.kz/">Kyzylorda-news.kz</a> Қазалы ауданындағы Ақсуат ауылында ауылдық елді мекендерде ерікті өрт сөндіру жүйесін нығайту мақсатындағы «Ауыл құтқарушысы» бағдарламасы аясында жаңа өрт сөндіру бекеті ашылды.Жаңа бекеттің ашылу рәсіміне аудан әкімі Алмасбек Есмаханов, облыстық Төтенше жағдайлар департаменті бастығының бірінші орынбасары Жасұлан Түйменов және азаматтық қорғау саласының қызметкерлері мен ауыл тұрғындары қатысты.Шарада аудан басшысы ауыл тұрғындарын жаңа бекеттің ашылуымен құттықтап, ауыл тұрғындары мен аудандағы төтенше жағдайлар саласына көрсетіліп жатқан қолдау, материалдық-техникалық тұрғыдан нығайту бағытында атқарылып жатқан жұмыстар жайында айтып өтті.<blockquote>- Бүгінде Президентіміздің тапсырмасы негізінде, аймақ басшысы Нұрлыбек Машбекұлының қолдауымен өңірдегі төтенше жағдайлар саласын материалдық-техникалық тұрғыдан нығайтуға айырықша көңіл бөлініп келеді. Бүгін Өздеріңіздің қатысуларыңызбен Ақсуат елді мекенінен өрт сөндіру бекеті ашылып, бекетке заман талабына сай 1 дана өрт сөндіру техникасыда табысталуда. Соңғы 2 жылда ауданға қарасты Қызылқұм, Майдакөл және Аранды ауылдық округтеріне өрт сөндіруші 3 техника табысталса, аудан орталығындағы өрт сөндіру мекемесінің 3 техникасы жаңартылды. Жыл басынан бері ауданымызда 24 өрт оқиғасы орын алып, былтырғы жылмен салыстырғанда 7 өрт оқиғасына азайған. Орын алған оқиға орындарына құтқарушылардың дер кезінде жетіп, нәтижелі жұмыс атқаруынан ешқандай қайғылы жағдайлар орын алмаған. Авариялық құтқару және шұғыл жұмыстарға 139 шығу болған, оның ішінде 56 адамға көмек көрсетілді. Өрт оқиғаларынан 35 тұрғын үй мен басқа да нысандар құтқарылған. Ауылдың амандығы мен тыныштығы – әрқайсымыз үшін маңызды. Ендеше, осы бекетте еңбек ететін өрт сөндіруші мамандарға сәттілік, қызметтеріне табыс тілеймін! Мереке қарсаңында ашылып жатқан жаңа нысан тағы да құтты болсын, - деді аудан әкімі Алмасбек Әбілқасымұлы.</blockquote>Өрт сөндіру бекетінің ашылу рәсімінде ауылдың өсіп-өркендеуіне үлес қосып жүрген ауыл тұрғындары мен салада жемісті еңбек етіп жүрген төтеншеліктер аудан әкімінің «Алғыс хатымен» марапатталса, аудандық Төтенше жағдайлар бөлімінің бастығы Алтынбек Сауытбекұлына Қазалы ауданының «Құрмет грамотасы» табысталды. Сондай-ақ бірқатар азаматтар Төтенше жағдайлар министрлігінің «Алғыс хаты» мен ҚР Төтенше жағдайлар министрлігінің 30 жылдық төсбелгісімен марапатталды.Ашылу рәсімінде ауданға арнайы жұмыс сапарымен келген облыстық Төтенше жағдайлар департаменті бастығының бірінші орынбасары Жасұлан Түйменов сөз алып, ауыл тұрғындары мен төтеншеліктерді жаңа өрт сөндіру бекетінің ашылуымен құттықтады. Ал, ауылдық ардагерлер кеңесінің төрағасы Қуаныш Рзаханов ауыл халқының игілігі үшін жасалып жұмыстарға алғысын жеткізіп, батасын берді.<img src="https://knadmin.beoblood.kz/uploads/1_azaly_rt_s_ndiru_beket_522df6b96c.jpg" alt="1Қазалы өрт сөндіру бекет.jpg">Мұнан соң қонақтар мен ауыл тұрғындары жаңа өрт сөндіру бекетінің ішін аралап көріп, техникалық мүмкіндіктерімен танысты. Ғимарат барлық қажетті құрал - жабдықтармен, оның ішінде 1 дана жаңа өрт сөндіру көлігімен, қызметкерлердің жатын және асхана бөлмесімен толық қамтамасыз етілген.Айта кетейік, ҚР Төтенше жағдайлар министрлігінің «Ауыл құтқарушылары» бағдарламасы негізінде Ақсуат ауылындағы ашылған жаңа бекет 6 елді мекенді,1800-ден астам тұрғындарды өрт қауіпсіздігімен қамтамасыз етеді.

Қазақстан және Қызылорда облысының жаңалықтары: Қоғам