<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ерлан Төрәлиев Аққыр, Жаңаталап және Мақпалкөл ауылы тұрғындарымен кездесіп, ауылдық округтердің әлеуметтік-экономикалық жағдайымен танысты. Кездесуге ауданнан сайланған облыстық мәслихат депутаты Әмір Шаймағанбетов, аудандық мәслихат төрағасы Өмірзақ Елеусінов, сондай-ақ, тиісті мекеме, бөлім басшылары қатысты.Кездесу барысында тұрғындар аяқсу, абаттандыруға қатысты өзекті мәселелерді ортаға салды. Аудан әкімі көтерілген мәселелер бойынша жауапты сала басшыларына нақты тапсырмалар беріп, жобаларды қаржыландыру бойынша жұмысты күшейтуді тапсырды.<blockquote>«Елдің мәселесі – ортақ міндет. Әрбір ұсыныс назарға алынып, көтерілген мәселелерді кезең-кезеңімен шешу бағытында тиісті жұмыстар жүргізіледі», - деді Е.Төрәлиев.</blockquote>Аққыр және Жаңаталап ауылдарындағы аяқсу мәселесін шешу үшін жобалық-сметалық құжаттар әзірленіп, қаржыландыру сатысында тұр.Мақпалкөл ауылындағы ауылішілік жолдарды жөндеу бойынша да жобалық-сметалық құжат әзірленіп, қаржыландыруға ұсынылған.Кездесуден кейін аудан әкімі ауылдардағы білім беру және спорт нысандарын аралап, олардың жағдайымен танысты. Сондай-ақ жылу беру маусымына дайындық барысын тексерді.<img src="https://knadmin.beoblood.kz/uploads/Zhala_ash_nysandardy_aralau_t_r_yndarmen_kezdesu_2_b7bdad1f7a.jpg" alt="Жалағаш нысандарды аралау, тұрғындармен кездесу 2.jpg">

Тұрғындармен кездесіп, ауылдық округтердің әлеуметтік-экономикалық жағдайымен танысты

<a href="https://kyzylorda-news.kz/">Kyzylorda-news.kz</a> Қызылорда облыстық экономикалық тергеп-тексеру департаменті «Торғай Петролеум» АҚ-ның қаражатын аса ірі мөлшерде жымқыру фактісін анықтады. Қылмыстық іс бойынша сот үкімі шықты.Сот материалдарына сәйкес, «Б» есімді азамат 2018 жылдан бастап «Торғай Петролеум» АҚ-ның механикалық бөлімінің бастығы қызметін атқарған. 2019 жылдың қазан айында ол компанияның тауарлар, жұмыстар мен қызметтерді сатып алу кезінде қаражатты жымқыру туралы қылмыстық ниетке келген.&nbsp;Тергеу мәліметтері бойынша, «Б» қоғамның басқа да лауазымды тұлғаларымен және «MANSUR-INVEST group» ЖШС мен «KazPromStroy LTD» ЖШС басшысы С.Ш.-мен алдын ала сөз байласқан. 2019–2020 жылдары компанияның өз қызметкерлері орындаған жұмыстарды және кәсіпорын балансында бұрыннан бар тауарлық-материалдық құндылықтарды аталған жеке компаниялардан сатып алу қажеттілігі туралы қызметтік хаттар рәсімдейді.&nbsp;Осының нәтижесінде іс жүзінде жеткізілмеген тауарлар, орындалмаған жұмыстар және көрсетілмеген қызметтер үшін жасалған алты келісімшарт бойынша «MANSUR-INVEST group» және «KazPromStroy LTD» ЖШС есепшоттарына жалпы 416 млн 696 мың 896 теңге аударылған. Кейін бұл қаражат қолма-қол шешіліп алынып, қылмысқа қатысушылар арасында теңдей бөлінген.&nbsp;Сот материалдарында әрқайсысына 104 млн 174 мың 224 теңгеден тигені көрсетілген. Сот шешіміне сәйкес сот «Б» ҚР ҚК-нің 189-бабы 4-бөлігінің 2) тармағы бойынша кінәлі деп танып, бастапқыда 7 жылға бас бостандығынан айыру жазасын тағайындады. Сонымен қатар материалдық жауапкершілікпен байланысты лауазымдарды атқару құқығынан 10 жылға айыру белгіленді. 2025 жылғы рақымшылық туралы заңға сәйкес негізгі жаза мерзімі бестен бір бөлікке қысқартылып, 5 жыл 7 ай 6 күн болып белгіленген. ҚК-нің 63-бабы қолданылып, жаза шартты деп танылды және барлық мерзімге пробациялық бақылау белгіленді.Ал С.Ш ҚР ҚК-нің 216-бабы 3-бөлігі және 28-бабы 5-бөлігі, 189-бабы 4-бөлігінің 2) тармағы бойынша кінәлі деп танылған.Оған бастапқыда 7 жылға бас бостандығынан айыру жазасы тағайындалып, кейін рақымшылыққа байланысты жаза мерзімі 5 жыл 7 ай 6 күнге дейін қысқартылды. ҚК-нің 63-бабы негізінде жаза шартты деп белгіленіп, пробациялық бақылау қолданылды.Сонымен қатар С.Ш. материалдық жауапкершілікпен байланысты лауазымдарды атқару құқығынан өмір бойына айырылды.Осылайша, сот тергеу барысында анықталған аса ірі мөлшердегі қаражатты жымқыру фактісі бойынша айыпталушыларға қатысты тиісті жаза тағайындады.Сурет: Нұрболат Нұржаубай

Қызылорда облысында қылмыстық іс бойынша сот үкімі шықты

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмахановтың төрағалығымен кәсіпкерлікті дамыту, инвестициялық жобаларды жүзеге асыру және бизнестің құқықтарын қорғау мәселелеріне арналған мәжіліс өтті.Мәжіліске Қызылорда облысы кәсіпкерлер палатасының директоры Ділмұхамед Абизов бастаған Палата өкілдері, салалық мекеме басшылары, ауылдық округтердің жауапты мамандары және аудан кәсіпкерлері қатысты.Жиында алдымен аудан аудан басшысы ауданның кәсіпкерлік саласындағы атқарылып жатқан жұмыстар мен алдағы міндеттерге кеңінен тоқталып өтті.<blockquote>- Бүгінде Қазалы ауданында 5 мыңға жуық кәсіпкер тіркелген. Кәсіпкерлік бастамаларды қолдауға бағытталған «Агробизнес», «Ауыл аманаты», «Іскер», «Өңдеу өнеркәсібін дамыту» бағдарламалары аясында жүйелі жұмыстар жүргізілуде. Ағымдағы жылдың 8 айында аталған бағдарламалар шеңберінде 4,5 млрд теңгеге 273 жоба қаржыландырылды. Сонымен қатар биыл ауданға 31,8 млрд теңге инвестиция тарту жоспарланған. 2024–2025 жылдары жалпы құны 2,3 млрд теңгені құрайтын 4 ірі инвестициялық жоба іске қосылды. Ал 2026–2029 жылдары жалпы құны 6 млрд теңге болатын 4 жобаны жүзеге асыру жоспарланып, нәтижесінде 60-қа жуық жаңа жұмыс орны ашылады деп күтілуде, - деді аудан әкімі Алмасбек Әбілқасымұлы.</blockquote>Мәжілісте кәсіпкерлердің құқықтарын қорғау, әкімшілік кедергілерді азайту, инвестициялық жобаларды сүйемелдеу және бизнеске мемлекеттік қолдау тетіктерін тиімді пайдалану мәселелері бойынша ұсыныстар айтылды.Мәжілісте Қызылорда облысы кәсіпкерлер палатасының директоры Ділмұхамед Абизов Палатаның кәсіпкерлерді қолдау, инвестициялық жобаларды сүйемелдеу және бизнес бастамаларды дамыту бағытында атқарып жатқан жұмыстарына тоқталып, Қазалы ауданындағы кәсіпкерлік әлеуетті одан әрі арттырудың маңыздылығын атап өтті. Ал Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің төрағасы Болат Нұрхожаев кәсіпкерлердің құқықтарын қорғау, бизнестің жұмысына кедергі келтіретін әкімшілік мәселелерді азайту және кәсіпкерлердің проблемалық мәселелерін шешу бағытындағы жұмыстарға тоқталды. Сондай-ақ кәсіпкерлердің өз құқықтарын білуі және туындаған мәселелер бойынша тиісті органдарға жүгінуінің маңыздылығын атап өтті.Жиын соңында аудан әкімі кәсіпкерлікті дамыту мен инвестиция тарту – аудан экономикасының тұрақты өсуіне ықпал ететін маңызды бағыт екенін атап өтіп, тиісті мекемелерге кәсіпкерлердің мәселелерін шешуге және жаңа жобаларды іске асыруға қажетті қолдауды күшейтуді тапсырды.Кәсіпкерлікке қолайлы орта қалыптастыру, инвестициялық белсенділікті арттыру және жаңа жұмыс орындарын ашу бағытындағы жұмыстар алдағы уақытта да жүйелі түрде жалғасатынын жеткізді.&nbsp;

Кәсіпкерлікті дамыту және инвестициялық жобаларды іске асыру мәселелері талқыланды

<a href="https://kyzylorda-news.kz/">Kyzylorda-news.kz</a> Қазалы ауданында белгілі драматург Сұлтанәлі Балғабаевтың 1 актілі, 4 көріністен тұратын «Құдағилар» комедиялық қойылымы көрермен назарына ұсынылды.Қазалы қалалық мәдениет үйі жанынан құрылған халық театры өнерпаздары ұсынған қойылымды аудан тұрғындарымен бірге Қазалы ауданының әкімі Алмасбек Есмаханов та тамашалады.Сахналық туындыда қазақ халқының салт-дәстүрі, ұлттық тәрбие мен отбасы құндылықтары, құда-жекжаттар арасындағы қарым-қатынастар әзіл мен шынайы өмір сабақтастығы арқылы көрініс тапты. Оқиғалар желісіндегі қызықты жағдайлар көрерменді бірде күлкіге бөлесе, бірде отбасылық сыйластық пен адамгершілік құндылықтар жайында ойландырды.<img src="https://knadmin.beoblood.kz/uploads/azaly_audany_ojylym_2_750bc28633.jpg" alt="Қазалы ауданы қойылым 2.jpg">«Құдағилар» комедиясының басты мақсаты – ұлттық құндылықтарды дәріптеу, отбасы институтының маңызын насихаттау және театр өнері арқылы көрерменге мазмұнды мәдени демалыс сыйлау.Қойылымды сахналаған режиссер Бақыткелді Надиров бастаған шығармашылық ұжым көрерменнің ыстық ықыласына бөленіп, зор қошеметке ие болды.Қойылым соңында аудан әкімі шығармашылық ұжымға алғысын білдіріп, ұлттық құндылықтар мен салт-дәстүрді насихаттайтын, тәрбиелік мәні жоғары мәдени қойылымдардың маңыздылығын атап өтті.Айта кетейік, Қазалы қалалық мәдениет үйі жанынан құрылған халық театры бұған дейін «Мұғалім» әлеуметтік драмасын көрермен назарына ұсынып, қазалылық көрерменнің зор қошеметіне бөленген болатын.<img src="https://knadmin.beoblood.kz/uploads/azaly_audany_ojylym_defeda909d.jpg" alt="Қазалы ауданы қойылым.jpg">

Қазалы: «Құдағилар» комедиялық қойылымы көрермен назарына ұсынылды

<a href="https://kyzylorda-news.kz/">Kyzylorda-news.kz</a> Мемлекет басшысының оқу мәдениетін дамыту және зерделі ұлт қалыптастыру жөніндегі бастамасы аясында елімізде кітап оқуға деген қызығушылықты арттыруға бағытталған ауқымды жобалар жүзеге асуда. Соның бірі – биыл алғаш рет ұйымдастырылып отырған республикалық «Кітап оқитын ұлт» кітап оқу марафоны. Марафон 7 бағыт бойынша өтіп, әр қатысушы арнайы іріктелген әдебиеттер қатарынан 15 кітап оқиды.Осы игі бастаманы Сыр өңірінде қолдау мақсатында облыс әкімдігі тарапынан да кітап оқу мәдениетін дамытуға бағытталған жұмыстар қолға алынған. Аталған жоба оқырман мәдениетін қалыптастырып, кітапты білім мен рухани дамудың маңызды көзі ретінде кеңінен насихаттауды көздейді."Қала күніне" арналған мәдени шаралар аясында ұйымдастырылған «Кітап Fest» те осы мақсатты сабақтастырып, кітап пен әдебиетті, өлең мен өнерді бір арнаға тоғыстырды.<img src="https://knadmin.beoblood.kz/uploads/Kitap_fest_3_6b7b2df030.jpg" alt="Кітап фест 3.jpg">Фестивальге Алматы және Қарағанды қалаларынан арнайы келген баспа үйлері мен кітап дүкендері, сондай-ақ әдебиет өкілдері қатысып, оқырман қауымға жаңа кітаптарын ұсынды.Кеш қонақтары – Қазақстан Жазушылар одағының мүшесі, ақын Мөлдір Айтбай, ақын Ақжол Түменбай және елімізге танымал сазгер Үкітай Ерниязов.Шараның ерекше бөлігі – «Мөлдір өлең» жобасының негізін қалаушы Мөлдір Айтбайдың Қызылорданың жас ақындарымен өткізген ақындар дуэлі болды. Жас қаламгерлер өзара жыр додасына түсіп, көрерменге поэзияның қуаты мен сөз өнерінің сырын сезіндірді.Ақындар дуэліне қатысқан жас қаламгерлер:<ul><li style="text-align:justify;">Ақжол Түменбай,&nbsp;</li><li style="text-align:justify;">Бекжан Ержігіт,&nbsp;</li><li style="text-align:justify;">Нұргүл Төлеубай,&nbsp;</li><li style="text-align:justify;">Сәния Жақып,&nbsp;</li><li style="text-align:justify;">Бексұлтан Санақұл,&nbsp;</li><li style="text-align:justify;">Өтепберген Нұргелді,&nbsp;</li><li style="text-align:justify;">Диас Мұстахим,&nbsp;</li><li style="text-align:justify;">Сандыбай Піржан.</li></ul>Іс-шараға Қызылорда қаласы әкімінің орынбасары Еркін Турабаев қатысып, үздік оқырмандарды марапаттады. Сондай-ақ қала әкімінің атынан ақындар дуэліне қатысқан жас қаламгерлерге Алғыс хаттар мен қаржылай сыйлықтар табысталды.Кітап пен поэзияны тоғыстырған тағылымды кеш қала тұрғындарына рухани әсер сыйлап, жас қаламгерлерге шығармашылық шабыт берді. Кітап оқитын ел – ойы озық, рухы биік ел!<img src="https://knadmin.beoblood.kz/uploads/Kitap_fest_2_ed38aaacd2.jpg" alt="Кітап фест 2.jpg">

Кітап fest – руханият пен поэзия тоғысқан кеш

<a href="https://kyzylorda-news.kz/">Kyzylorda-news.kz</a> Биылғы суару науқаны Сырдария өзені алабында тұрақты жағдайда өтіп, &nbsp;өңір диқандары мол өнім жинақтау жұмыстарын жүргізуде. Биыл Шардара су қоймасына келетін су көлемі болжамнан әлдеқайда асып түсті. Атап айтқанда, 1 қыркүйекке дейін 2 млрд 457 млн текше метр су түседі деп күтілсе, нақты көрсеткіш 3 млрд 341 млн текше метрді құрап, болжам 136 пайызға орындалған. Бұл көрсеткіш өңірдің ауыл шаруашылығы алқаптарын қажетті су көлемімен толық қамтамасыз етуге мүмкіндік берді.Жыл басынан бері Қызылорда облысында 174,8 мың гектар егіс егіліп, оның 70 мыңнан астам гектарында күріш өскен. Су жеткізуші ұйымдар мен шаруалар арасында электронды «Биллинг» жүйесі іске қосылды. Су ресурстарын заңсыз пайдалану мен «қара нарыққа» қарсы күрес жұмыстары да қатаң бақылауға алынған. &nbsp;Бұл туралы Өңірлік коммуникациялар қызметі алаңында Су ресурстарын реттеу, қорғау және пайдалану жөніндегі Арал-Сырдария бассейндік су инспекциясы басшысының міндетін атқарушы Айгүл Киікбайқызы баяндады.<blockquote>«Биылғы вегетациялық кезең Арал-Сырдария бассейні бойынша тұрақты жағдайда өтті. Шардара су қоймасына келетін су көлемінің болжамнан жоғары болуы өңірдегі суармалы егістікті қажетті су көлемімен қамтамасыз етуге мүмкіндік берді. Биыл алғаш рет енгізілген электронды биллинг жүйесі су беру қызметінің ашықтығын арттырып, тараптар арасындағы келісімшарттық қатынастарды жаңа сатыға көтерді. Сонымен қатар, судың заңсыз пайдаланылуына және "қара нарыққа" қарсы бақылау жұмыстары қатаң түрде күшейтілді». – деді Айгүл Әлібекова.</blockquote>Өз кезегінде, «Қазсушар» өкілі Айдос Әлібекұлы атқарылып жатқан нақты жұмыстар туралы Өңірлік коммуникациялар қызметінің ақпарат алаңында атап өтті.&nbsp;<blockquote>«Филиал Су ресурстары және ирригация министрлігінің тапсырмасына сәйкес суару науқанына Сырдария өзені сулылығын ескере отырып, дайындық жұмыстарын қарқынды жүргізді. Біз тек су жеткізумен шектелмей, "судың қара нарығына" жол бермеу үшін күнделікті қатаң қадағалау жүргіздік. Бүгінгі таңда диқандарымыз өнім жинақтау жұмыстарын жүргізіп жатса, біз 2027 жылғы суару науқанына дайындықты ерте бастап, каналдарды бөгеп, кептіру және визуалды тексеру жұмыстарын жүргізудеміз». – деді Айдос Асанбаев.</blockquote>Алдағы кезеңде жауапты мекемелер су ресурстарын тиімді әрі ұтымды пайдалануды, суару жүйелеріндегі ысырапты азайту және заңсыз су пайдаланудың алдын алу бағытындағы жұмыстарды жүйелі түрде жүргізетіндігін айтады.

Өңірде суару науқаны қорытындыланды

<a href="https://kyzylorda-news.kz/">Kyzylorda-news.kz</a> Шиелі ауданының әкімі Айтбай Жандарбеков аудан тұрғындарын жеке мәселелері бойынша кезектілік тәртібімен қабылдады. Қабылдауға алдын ала 20 азамат жазылып, тіркелген.Қабылдау барысында тұрғындар тұрғын үймен қамту, жер алу, тұрақты жұмысқа орналасу және өзге де әлеуметтік мәселелер бойынша өтініш-тілектерін жеткізді.Аудан әкімі әрбір азаматтың мәселесін мұқият тыңдап, көтерілген сұрақтарды жауапты сала басшыларымен бірге талқылады. Бірқатар мәселелер бойынша қолданыстағы заңнама талаптарына сәйкес түсіндірмелер беріліп, жекелеген өтініштерді зерделеп, шешу үшін жауапты мекемелерге нақты тапсырмалар жүктелді.Жұмысқа орналасу мәселесі бойынша азаматтарға аудандағы мекемелер мен кәсіпкерлік нысандардағы бос жұмыс орындары ұсынылып, қоғамдық жұмыстарға және қайта даярлау курстарына қатысу мүмкіндіктері түсіндірілді.Тұрғын үй мәселесіне қатысты азаматтарға белгіленген санаттар мен заң талаптарына сәйкес тұрғын үй кезегіне қою және қамтамасыз ету тәртібі түсіндірілді.Қабылдау барысында көтерілген әрбір мәселе назарға алынып, олардың заң аясында шешілуі бойынша тиісті жұмыстар жүргізілетін болады.Айта кетейік, аудан әкімінің жеке қабылдауына egov.kz порталы, e-Өтініш ақпараттық жүйесі арқылы немесе аудан әкімдігіне жазбаша өтініш беру арқылы жазылуға болады.<img src="https://knadmin.beoblood.kz/uploads/Shieli_t_r_yndardy_abyldau_2_50d64bb111.jpg" alt="Шиелі тұрғындарды қабылдау 2.jpg">

Тұрғындар әлеуметтік мәселелер бойынша өтініш-тілектерін жеткізді

<a href="https://kyzylorda-news.kz/">Kyzylorda-news.kz</a> Биыл «Тұмар» және «Үркер» ұлттық сыйлықтарына 10 жыл толады. Мерейтойлық шара Qazaqstan Media Awards аясында өтеді.Өткізіліп келе жатқан жылдар ішінде «Тұмар» және «Үркер» ұлттық сыйлықтары Қазақстанның медиа саласының маңызды бөлігіне айналып, отандық журналистика мен медианың дамуына үлес қосқан журналистерді, редакцияларды және жобаларды жыл сайын атап өтіп келеді.Мерейтойлық іс-шара сыйлықтар тарихындағы ерекше кезең болмақ. Өйткені осы жолы «Тұмар» және «Үркер» сыйлықтары алғаш рет Qazaqstan Media Awards аясында бірігеді. Қазақстан Республикасы Мәдениет және ақпарат министрлігінің бастамасымен ұйымдастырылатын конкурсқа медиаконтент өндірумен және таратумен айналысатын республикалық және өңірлік телеарналар, радиостанциялар, баспа және интернет-басылымдар қатыса алады.Конкурсқа 2025 жылғы 18 қыркүйектен бастап 2026 жылғы 18 қыркүйекті қоса алғандағы кезеңде жарияланған немесе эфирге шыққан жұмыстар қабылданады. Байқауға қазақстандық БАҚ журналистері, тележүргізушілер, медиажобалардың авторлары мен жасаушылары, редакциялар және шығармашылық ұжымдар қатыса алады.Конкурсқа қатысуға өтінімдер 2026 жылғы 18 қыркүйек пен 2 қазан аралығында қоса алғанда QMA.kz сыйлықтың ресми сайтында екі негізгі бағыт бойынша қабылданады.Телевизиялық журналистика<ul><li style="text-align:justify;">Үздік тележүргізуші</li><li style="text-align:justify;">Үздік телевизиялық материал (репортаж, сұхбат)</li><li style="text-align:justify;">Үздік телесериал</li><li style="text-align:justify;">Үздік ақпараттық-талдамалық бағдарлама</li><li style="text-align:justify;">Үздік деректі жоба</li><li style="text-align:justify;">Қоғамдық жауапкершілік саласындағы үздік жоба («Заң мен тәртіп», «Таза Қазақстан»)</li></ul>Баспа, интернет және радио журналистикасы<ul><li style="text-align:justify;">Жылдың үздік журналисті</li><li style="text-align:justify;">Жылдың үздік материалы (сұхбат, репортаж, мақала)</li><li style="text-align:justify;">Үздік талдамалық материал</li><li style="text-align:justify;">Үздік медиажоба (YouTube, подкаст)</li><li style="text-align:justify;">Үздік радиожоба</li><li style="text-align:justify;">Журналистиканың болашағы: жасанды интеллект саласындағы үздік жоба</li></ul>2026 жылы журналистиканың болашағы мен жаңа технологияларға ерекше назар аударылады. Медиа саласының жаңа даму бағыттарын көрсететін жасанды интеллект саласындағы жобаларға арналған номинация алғаш рет енгізіліп отыр.Конкурстық жұмыстарды бағалауды белгілі журналистерден, саланың еңбек сіңірген қайраткерлері мен медиа сарапшылардан құралған тәуелсіз қазылар алқасы жүзеге асырады.

Qazaqstan Media Awards аясында «Тұмар» және «Үркер» ұлттық сыйлықтарына өтінім қабылдау басталды

<a href="https://kyzylorda-news.kz/">Kyzylorda-news.kz</a> Ә.Тәжібаев атындағы облыстық кітапханада «Қазақстанның құрметті журналисі», «Ақпарат саласының үздігі», Қазақстан Жазушылар одағы мен Қазақстан Журналистер одағының мүшесі Кенжалы Ерімбетовтің 70 жылдық мерейтойына арналған «Қаламгердің рухани әлемі» атты шығармашылық кеш өтті.<img src="https://knadmin.beoblood.kz/uploads/Whats_App_Image_2026_09_23_at_15_46_41_1_33ba9ef70f.jpeg" alt="Кенжалы Ерімбетов 70 жас.jpeg">Шығармашылық кеште мерейтой иесіне облыстық мәдениет, архивтер және құжаттама басқармасы басшысының орынбасары Ғалымжан Күлбаев, Қазақстан Жазушылар одағының Қызылорда облысындағы өкілі Қаршыға Есімсейітова, «Сыр медиа» ЖШС бас директоры Марат Аралбаев және Қорқыт ата атындағы Қызылорда университеті Гуманитарлық-педагогикалық институтының директоры, т.ғ.к. Сағат Тайман ақжарма тілектерін арнады. Сондай-ақ мәдениет саласының ардагері Қабдеш Шағыров, ақындар Мұхамеджан Нұрханов пен Гаухар Қожахметова, Жетікөл ауылының әкімі Өмірбек Тоқмамбетов, сонымен қатар Жомарт Құлмағамбетұлы мен Қанат Көзейбаев та құттықтау сөз сөйледі.Кеш барысында қаламгердің өмірі мен шығармашылық жолына арналған бейнеролик көрсетіліп, Кенжалы Ерімбетовтің туған жері – Жетікөлге арналған толғауы орындалып, ақынның туған ауылға, ата-анаға деген сағынышы мен перзенттік махаббаты сөз болды.<img src="https://knadmin.beoblood.kz/uploads/Whats_App_Image_2026_09_23_at_15_46_41_3cb5c4c31a.jpeg" alt="Кенжалы Ерімбетов 70 жас.jpeg">Қаламгер балалық шағы, журналистикаға келуі және шығармашылық жолының бастауы туралы естеліктерімен бөлісті. Кеш көркін Кенжалы Ерімбетовтің сөзіне жазылған әндер де аша түсті. Әнші, ҚР Мәдениет саласының үздігі Ләйлә Насимханова ақынның сөзіне жазылған «Қазақстаным» әнін орындаса, Тоғжан Бауыржанқызы «Туған жер» әнін шырқады. Екі әннің де музыкасын композитор Талғат Нағашбаев жазған.Кеш барысында Кенжалы Райымбекұлының өлеңдері оқылып, шәкірттері мен замандастары жүрекжарды лебіздерін жеткізді. &nbsp;Қаламгердің өзі де жырларын оқып, шығармашылық әлемінен сыр бөлістіІс-шара соңында Кенжалы Райымбекұлының «Көңіл күмбезі» және «Көл бетіндегі аппақ гүл» атты жаңа кітаптарының тұсауы кесілді. Тағылымды кеш қаламгердің жетпіс жылдық ғұмырын, журналистика мен әдебиеттегі еңбегін ұлықтап, шығармашылығына құрмет көрсеткен мазмұнды басқосуға айналды.<img src="https://knadmin.beoblood.kz/uploads/Whats_App_Image_2026_09_23_at_15_46_42_49e4ac632f.jpeg" alt="Кенжалы Ерімбетов 70 жас.jpeg">

Қалам мен ғұмыр: Қос кітап оқырманға жол тартты

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаевтың төрағалығымен мәжіліс өтіп, &nbsp;онда Қызылорда қаласын аяқсумен қамтудың және суару жүйесінің қазіргі жағдайы, алдағы кезеңге арналған жоспарлар талқыланды.<blockquote>«Су ресурстарына толық талдау жүргізіп, қалаға қажетті көлемді нақтылап, келесі жылға су беру мүмкіндігін қарастыру маңызды. Әуежай маңы мен Белкөл кентіне кіреберіс аумақтардағы жасыл белдеуге аяқсу тұрақты берілуі және тал отырғызылуы керек. Арық жүйелерін толық түгендеп, су жетпейтін учаскелерге қатысты нақты жобалық және қаржылық ұсыныс енгізіңіздер. Аяқсумен қамтылған аумақтарды кезең-кезеңімен ұлғайту үшін нақты жоспар әзірлеңіздер. Көшет отырғызу және оларды суаруды ұйымдастырыңыздар», – деді Мұрат Нәлқожаұлы.</blockquote>Бүгінде қала аумағына аяқсу 15 нүктедегі 22 насос қондырғысы арқылы беріледі. Оның 4-еуі биыл орнатылған. Арық жүйелерінің жалпы ұзындығы 98,8 шақырым, 68 көшені қамтиды. «Жібек жолы», «Сарқырама» және «Қызылжарма» каналдары арқылы 14,4 шақырымдық үлкен лоток жүйесі, 39 көшеде 68,6 шақырым болатын кіші лотоктар, ал 26 көшеде 15,8 шақырымдық лотоксыз арық жүйесі бар. Қала ішіндегі арықтарға су 6 аумақтағы насос қондырғылары арқылы таратылады.Алдағы уақытта №217 мектеп ауласындағы су ұңғымасы жөнделіп, қайта іске қосылады. Бұл Қорқыт ата көшесінің бір бөлігіне аяқ су жеткізуге мүмкіндік туғызады. Аяқсу жеткізілген аумақтарды көгалдандыру мақсатында М.Шоқай, Қожа Ахмет Яссауи &nbsp;және Д. Қонаев көшелерінің бойына көшет отырғызылады.

Қызылорда қаласын аяқсумен қамту мәселелері қаралды

<a href="https://kyzylorda-news.kz/">Kyzylorda-news.kz</a> 21 қыркүйек күні Қызылорда қаласындағы Президент саябағының амфитеатрында «Qyzylorda» телеарнасының жаңа маусымының таныстырылымы өтті. Телеарна тарихында алғаш рет ұйымдастырылған Open Air форматындағы іс-шара Сырдария жағасында ашық аспан астында өтіп, көрерменге арнаның жаңа жобалары мен жаңа маусымдағы тың телеөнімдері таныстырылды.Биыл «Қызылорда» телеарнасы үшін ерекше жыл. Тәуелсіздікпен түйедей құрдас телеарна өзінің 35 жылдығын атап өтуде. Осы айтулы датаға орай ұйымдастырылған жаңа маусымның ашылу кеші екі сағат бойы тікелей эфирде көрсетіліп, телеарна ұжымы көрерменмен офлайн және онлайн форматта жүздесті.Кеш барысында көрермендерге жаңа маусымда эфирге шығатын бірқатар жобаның тұсаукесері жасалды. Солардың қатарында ел тарихы мен танымал тұлғалардың өмірін арқау ететін «Біртуар», еңбек адамдарын дәріптейтін «Ата кәсіп», адами құндылықтардың мәнін ашатын «Құндылықнама», интернет әлемі мен жаңа технологияларды таныстыратын «HI-TECH» жобалары бар.Сонымен қатар телеарнаның бұған дейін көрермен ықыласына бөленген жобалары жаңа маусымда жалғасын тапты. Олардың қатарында «QYZYLORDA EXPEDITION» телеэкспедициясының үшінші маусымы, «Құдайы қонақ» реалити-хабары және «Қызық орда» жобасы бар.«QYZYLORDA EXPEDITION» жобасының жаңа маусымында түсірілім тобы бірнеше көне шаһарға сапарлап, тарихымыздың құнды жәдігерлері мен өшкен өркениеттердің ізін зерттеуді жалғастырды. Жоба бұған дейін Түркияның «TRT Avaz» телеарнасының эфирінен көрсетілген болатын. Жаңа маусымның таныстырылымына жобаның экспедиция мүшелері, археолог-ғалымдар Сағымбай Мұрғабаев пен Мэлс Маратұлы арнайы қатысты.Кеш барысында көрермендерге телеарнаның тұрақты жобалары мен ақпараттық өнімдері де таныстырылды. Соның ішінде өңірдегі маңызды мәселелерді талдайтын «Анықтаймс» хабары мен күн сайын эфирге шығатын «Жаңалықтар» топтамасының жұмысына назар аударылды.<img src="https://knadmin.beoblood.kz/uploads/Whats_App_Image_2026_09_23_at_11_54_24_1_e8d08daba8.jpeg" alt="">Жаңа маусымның таныстырылымы тек телевизиялық жобаларды көрсету форматында ғана өткен жоқ. Кеш қонақтары мен көрермендер түрлі интерактивті ойындарға қатысып, телеарна ұжымымен тікелей байланыс орнатты. «Құшақта кам», «Биле кам» секілді челлендждер ұйымдастырылып, көрермендер сахнадағы бағдарламаға белсенді араласты. Сонымен бірге телеарна туралы блиц-сұрақтар қойылып, жеңімпаздарға естелік сыйлықтар табысталды. Шара барысында көрермендер арасынан журналист болуды армандайтын азаматқа бір сәтке телеарна тілшісі ретінде өзін сынап көруге мүмкіндік берілді.&nbsp;Кештің маңызды сәттерінің бірі – «Құдайы қонақ» реалити-хабары арқылы көрерменге таныс болған Шилі ауылының тұрғыны Марғұланға тосынсый жасалуы болды. 13 жастағы жеткіншек әкесімен бірге шараға арнайы шақырылып, телеарна ұжымы оған бағалы сыйлық табыстады.Жаңа маусымның таныстырылымы өнерпаздардың концерттік бағдарламасымен де өрілді. Сахнада Үміт Медеуова, Бекзат Молдабергенов, Үкітай Ерниязов сынды өнер иелері өнер көрсетіп, «Мереке» вокалды-аспаптар ансамблі кештің музыкалық көркін арттырды.Кештің тікелей эфирдегі ерекше сәттерінің бірі – Сырдарияның күн батқан мезгіліндегі көрінісін көрермендермен бірге тамашалау болды. Сыр бойындағы кештің табиғи көрінісі музыкалық нөмірмен үйлесіп, Open Air форматының ерекшелігін айшықтай түсті.Таныстырылым барысында Түркияның TRT корпорациясының Қазақстандағы өкілдігінің жетекшісі Мехмет Чалышканның «Қызылорда» телеарнасының жаңа маусымына арналған құттықтауы да көрсетілді. Бұл телеарнаның халықаралық әріптестік бағытындағы жұмысына назар аударылғанын көрсетті.Жаңа маусымның басты мақсаты – көрерменге мазмұнды, заманауи әрі сапалы контент ұсыну. Телеарна ұжымы дәстүрлі телевизиялық өнімдерді жаңа форматтармен толықтырып, аудиториямен байланысты күшейтуге бағытталған жобаларды ұсынды.Екі сағатқа жуық уақытқа созылған кеш концерттік бағдарламамен қорытындыланып, «Қызылорда» телеарнасының жаңа маусымы ресми түрде ашылды.Жаңа маусымда көрерменге жаңа жобалар, жаңа кейіпкерлер және жаңа форматтар ұсынылды. Ал телеарна ұжымы үшін бұл кезең – 35 жылдық тарихы бар арнаның жаңа белесін бастайтын жаңа парақ болды.<img src="https://knadmin.beoblood.kz/uploads/Whats_App_Image_2026_09_23_at_11_54_22_a8ded21930.jpeg" alt="">

«Qyzylorda» телеарнасы жаңа маусымын ашық аспан астында таныстырды

<a href="https://kyzylorda-news.kz/">Kyzylorda-news.kz</a> Шиелі ауданы әкімдігінде аудан әкімі Айтбай Жандарбековтың төрағалығымен мәжіліс отырысы өтті.Мәжіліске аудандық мәслихат төрағасы, аудан әкімінің орынбасарлары, "Әділет" партиясы Шиелі аудандық филиалының төрағасы, дербес бөлім басшылары, кент және ауылдық округ әкімдері қатысты.Күн тәртібінде бүгін Үкімет отырысында жол және жаяу жүргіншілер қауіпсіздігін қамтамасыз ету мәселесі қаралды. Жол қозғалысы қауіпсіздігінқамтамасыз ету - жергілікті атқарушы органдардың, полицияның, жол ұйымдарының, білім беру және басқа да мүдделі мекемелердің бірлескен әрі жүйелі жұмысын талап ететін маңызды бағыт.<blockquote>Осыған байланысты Үкімет деңгейінде қойылған міндеттерді аудан көлемінде сапалы іске асыру, тиісті мемлекеттік органдардың жұмысын үйлестіру және түсіндіру жұмыстарын күшейту қажет – деді аудан әкімі.</blockquote>Күн тәртібіндегі мәселе бойынша «Аудан аумағындағы жол қозғалысының қауіпсіздігі туралы» аудандық полция бөлімі басшысының орынбасары, полиция полковнигі Досым Абуов хабарлама жасады.Мәжілісте аудандағы автомобиль жолдарындағы авариялық қауіпті учаскелерді анықтауға, жол қозғалысы ережелерінің сақталуына бағытталған рейдтік іс-шараларды тұрақты өткізу, «Таза Қазақстан» экологиялық акциясы аясында кент орталығында атқарылып жатқан абаттандыру және санитарлық тазалық жұмыстарының орындалу барысы &nbsp;бойынша жауапты сала басшыларына тиісті тапсырмалар берілді.<img src="https://knadmin.beoblood.kz/uploads/Shieli_audany_m_zhilis_otyrysy_2_bd39b680fb.jpg" alt="Шиелі ауданы мәжіліс отырысы 2.jpg">

Қазақстан және Қызылорда облысының жаңалықтары: Қоғам